Iragarkia

94. ALDIZKARIA - 2026ko maiatzaren 15a

1. NAFARROAKO FORU KOMUNITATEA

1.7. BESTELAKOAK

148E/2026 EBAZPENA, apirilaren 16koa, Ekonomia Zirkularraren eta Berrikuntzaren Zerbitzuko zuzendariak emana, zeinaren bidez aldatzen baita Lesakako udal mugartean hotzeko ijezketa eta altzairuzko bobinen gainestaldurak egiteko dagoen instalazio baten ingurumen baimen integratua. Instalazioaren titularra Arcelormittal España SA da.

Instalazio horrek ingurumen baimen integratua du, Ingurumenaren eta Uraren zuzendari nagusiaren urtarrilaren 19ko 112/2011 Ebazpenaren bidez emana, gero Ingurumenaren eta Uraren zuzendari nagusiaren urtarrilaren 16ko 14E/2015 Ebazpenaren bidez eguneratu zena.

Ingurumena Babesteko Esku-hartzeari buruzko martxoaren 22ko 4/2005 Foru Legea garatzen duen Erregelamenduaren 104.c artikuluan eta ingurumen baimen integratuan bertan ezarritakoarekin bat, 2025eko ekainaren 20an, titularrak Luberrondo lantegiko jardueraren zati bat behin betiko uztearen berri eman zuen, eta ukitutako instalazioaren zatia ixteko proiektu teknikoa aurkeztu zuen. Ekonomia Zirkularraren eta Berrikuntzaren Zerbitzuko zuzendariaren uztailaren 14ko 274E/2025 Ebazpenaren bidez, baimena eman zen lantegi horretan zeuden hondakinak 1250 lantegiko beste kokaleku batera eramateko, eta jarduera utzi zen. Luberrondo lantegiak 14.000 m² ditu, eta Lesakako 3. poligonoko 1. lurzatian dago.

Proiektu hori garatzeak instalazioaren funtzionamendu baldintzak nabarmenki aldatzen dituenez eta aldaketa horiek instalazioaren ingurumen baimen integratuan agertu behar direnez, baimena aldatu behar da instalazioaren zati hori iraungi baino lehen (proiektua burutu ondoren iraungiko da baimena).

Era berean, aipatu instalaziorako aurkeztu da honako oinarrizko txosten hau, zeina eskatu baitzen Ingurumenaren eta Uraren zuzendari nagusiaren urtarrilaren 16ko 14E/2016 Ebazpenaren bidez:

"Oinarrizko txostena, hizpide duena Arcelormittal España SAk Lesakan (Nafarroa) duen lantegiko lurzoruen eta lurpeko uren abiapuntuko egoera. Arauzko ikuskapena; 2015eko irailaren 30ekoa, P-081963-001-001-001 kodeduna".

Aipatu txostenak adierazten du badagoela kutsatzailerik, eta lurzorua sailkatzen du industria-erabilerarekin bateragarria den lurzoru aldatu gisa. Bestalde, aipatu azterketak kokalekuaren aldez aurreko azterketa egin bazuen ere, zerbitzu honetan ez dago jasota gerora azterketarik egin denik hautemandako lurzoruaren kutsaduraren hedadura zehazteko.

Espedientea tramitatu da Ingurumena Babesteko Esku-hartzeari buruzko martxoaren 22ko 4/2005 Foru Legea garatzeko Erregelamenduaren 29. artikuluan ezarritako prozedurarekin bat etorriz (erregelamendu hori abenduaren 28ko 93/2006 Foru Dekretuaren bidez onetsi zen).

Ebazpen proposamena hamabost egunez egon da instalazioaren titularrari entzunaldia emateko izapidean, eta hark ez du proposamenaren aurkako alegaziorik aurkeztu.

Adierazitakoarekin bat, eta Ingurumeneko zuzendari nagusiak azaroaren 8an emandako 107/2019 Ebazpenaren bidez eskuordeturik ditudan eskumenak erabiliz,

EBAZTEN DUT:

Lehendabizikoa.–Lesakako udal mugartean hotzeko ijezketa eta altzairuzko bobinen gainestaldurak egiteko dagoen instalazio baten ingurumen baimen integratua aldatzea, instalazioaren zati bat ixteko baldintzak ezartzearren; izan ere, instalazioa ixteko proiektu teknikoan eta administrazio espedientearen gainerako agiri osagarrietan aipatzen diren baldintzak bete beharko dira, bai eta ebazpen honen eranskinetan jasotako baldintzak eta neurriak ere. Instalazioaren titularra Arcelormittal España SA da.

Bigarrena.–Titularrak erantzukizunpeko adierazpen bat aurkeztu beharko du, non ziurtatuko baitu ebazpen honetan ezarritako baldintzen eta neurrien arabera itxi dela Luberrondo lantegia. Erantsiko dira, gainera, obra-bukaerako ziurtagiria, egoera-txostena, gelditzen den instalazioaren behin betiko planoak eta egindako neurketa eta egiaztapen praktikoen emaitzak.

Hirugarrena.–Erantzukizunpeko adierazpenarekin batera, titularrak honako agiri hauek aurkeztu beharko ditu:

–Eraispenean sortutako hondakinak kudeatzaile baimenduei entregatu izanaren egiaztagiriak.

– Konpainia hornitzaileen (gasa, elektrizitatea, ura eta abar) kontratu-baja.

–Kutsaduraren hedaduraren analisiaren ebaluazioa, IV. eranskinean adierazitako egoera-txostenaren arabera.

Laugarrena.–Ebazpen honetan jasotzen diren baldintzak ez betetzeak berekin dakar ingurumeneko diziplina neurriak hartzea, hain zuzen ere, Kutsaduraren Prebentzio eta Kontrol Integratuari buruzko Legearen testu bateginaren IV. tituluan jasotakoak (testu bategin hori abenduaren 16ko 1/2016 Legegintzako Errege Dekretuaren bidez onetsi zen), ezertan galarazi gabe sektoreko legerian ezarritakoa, aplikatzekoa izaten segituko baitu, eta, subsidiarioki, Ingurumenean Eragina duten Jarduerak arautzen dituen abenduaren 16ko 17/2020 Foru Legearen III. tituluan ezarritako zehapen araubidean jasotakoa.

Bosgarrena.–Ebazpen hau Nafarroako Aldizkari Ofizialean argitaratzea.

Seigarrena.–Ebazpen honek ez du administrazio bidea amaitzen, eta espedientean interesa dutenek, administrazio publikoek izan ezik, gora jotzeko errekurtsoa jartzen ahalko dute, Landa Garapeneko eta Ingurumeneko kontseilariari zuzendua, hilabeteko epean. Administrazio publikoek administrazioarekiko auzi-errekurtsoa jartzen ahalko dute, Nafarroako Justizia Auzitegi Nagusiko Administrazioarekiko Auzien Salari zuzendua, bi hilabeteko epean. Horrek ez du galarazten Nafarroako Gobernuari aurretiazko errekerimendua egin ahal izatea, Administrazioarekiko Auzien Jurisdikzioa arautzen duen uztailaren 13ko 29/1998 Legearen 44. artikuluan ezarritako moduan eta epean. Epeak ebazpen hau jakinarazi eta biharamunetik aurrera kontatuko dira.

Zazpigarrena.–Ebazpen hau igortzea, behar diren ondorioak izan ditzan, Arcelormittal España SAri, Lesakako Udalari, Babes Zibileko eta Larrialdietako Zerbitzuari, Nafarroako Toki Azpiegiturak SAri, Nafarroako Osasun Publikoaren eta Lan Osasunaren Institutuari, Lurralde eta Paisaia Zerbitzuari, Biodibertsitatearen Zerbitzuari eta Ingurumena Zaintzeko Atalari.

Iruñean, 2026ko apirilaren 16an.–Ekonomia Zirkularraren eta Berrikuntzaren Zerbitzuko zuzendaria, Francisco Javier Larrañeta Nido.

Oharra: Ebazpen honetan aipatzen diren eranskinak interesdunen eskura egonen dira Ingurumen Zuzendaritza Nagusiaren bulegoetan (González Tablas kalea 9, behea, Iruña; Ekonomia Zirkularraren eta Berrikuntzaren Zerbitzua) eta Nafarroako Gobernuaren webgune honetan: https://extra.navarra.es/InformacionPublicaPRTR/CentroPublicaciones.html#/CentroPublicaciones.

Iragarkiaren kodea: F2605834