Iragarkia

68. ALDIZKARIA - 2026ko apirilaren 9a

1. NAFARROAKO FORU KOMUNITATEA

1.5. ESTATUTUAK ETA LAN HITZARMEN KOLEKTIBOAK

36C/2026 EBAZPENA, otsailaren 25ekoa, Ekonomia Sozialeko eta Laneko zuzendari nagusiak emana, zeinaren bidez erabakitzen baita Andamios y Montajes Eca SL enpresaren hitzarmen kolektiboa erregistratzea, gordailutzea eta Nafarroako Aldizkari Ofizialean argitaratzea.

Azterturik Andamios y Montajes Eca SL enpresaren hitzarmen kolektiboaren testua (kode zenbakia: 31102552012026), zeina erregistro honetan sartu baitzen 2026ko otsailaren 19an, enpresaren eta sindikatuen ordezkariek 2026ko otsailaren 9an sinatua.

Bat etorriz Langileen Estatutuaren Legearen testu bategina onesten duen urriaren 23ko 2/2015 Legegintzako Errege Dekretuaren 90. artikuluaren 2. eta 3. apartatuetan eta Hitzarmen kolektiboak, lan akordio kolektiboak eta berdintasun planak erregistratu eta gordailutzeari buruzko maiatzaren 28ko 713/2010 Errege Dekretuan ezarritakoarekin,

Nafarroako Foru Komunitateko Administrazioari eta foru-sektore publiko instituzionalari buruzko martxoaren 11ko 11/2019 Foru Legearen 32. artikuluak ematen dizkidan eskudantziak erabiliz eta Eskubide Sozialetako, Ekonomia Sozialeko eta Enpleguko Departamentuaren egitura organikoa ezartzen duen azaroaren 15eko 251/2023 Foru Dekretuan xedatutakoa kontuan hartuta,

EBAZTEN DUT:

Lehena.–Nafarroako Hitzarmen Kolektiboen, Lan Akordio Kolektiboen eta Berdintasun Planen Erregistroan inskribatzea Andamios y Montajes Eca SLk aurkeztutako hitzarmen kolektiboa (kode zenbakia: 31102552012026).

Bigarrena.–Nafarroako Aldizkari Ofizialean argitara dadila agintzea, orok jakin dezan.

Iruñean, 2026ko otsailaren 25ean.–Ekonomia Sozialeko eta Laneko zuzendari nagusia, Iñaki Mendióroz Casallo.

ANDAMIOS Y MONTAJES ECA SL ENPRESAREN LAN HITZARMEN KOLEKTIBOA

1. artikulua. Pertsona eremua eta eremu funtzionala.

Hitzarmen kolektibo hau Andamios y Montajes ECA Sociedad Limitada enpresaren zerbitzura lan egiten duten langile guztiei aplikatuko zaie, lan harreman bereziak edo bestelakoak dituzten zuzendaritzako kargudunei eta langileei izan ezik. Haren izenak berak adierazten duen bezala, enpresak obretarako aldamioak instalatzeko, muntatzeko eta desmuntatzeko lanak egiten ditu.

Hitzarmen kolektibo hau enpresaren legezko ordezkariak eta langileen delegatuak sinatu dute, eta elkarri aitortzen diote enpresan biek ala biek duten kargua.

2. artikulua. Iraunaldia, indarraldia eta salaketa.

Hitzarmen kolektibo honen testuak lau urteko indarraldia izanen du. 2026ko urtarrilaren 1etik aitzina sortuko ditu ondorioak, eta 2029ko abenduaren 31n bukatuko da.

Nolanahi ere, enpresaren hitzarmen kolektibo honen iraunaldia bukaturik, bertan jasotzen diren baldintzek indarrean segituko dute beste urte batez, eta bi alderdiek hitz ematen dute epe horretan enpresarentzako beste hitzarmen kolektibo bat negoziatu eta sinatuko dutela.

Hitzarmen kolektibo hau salatutzat joko da une horretatik beretik.

3. artikulua. Derrigorrezkotasuna eta ordezko arauak.

Enpresaren hitzarmen kolektibo honetako arauak Langileen Estatutuan xedatutakoari jarraikiz itundu dira, eta hitzarmenaren eragin eremuko langileen lan harremanak derrigortzeko indarra izanen dute. Gainera, lehentasunez aplikatuko dira estatuko edo autonomia erkidegoko beste hitzarmen sektorial guztien aurretik, Langileen Estatutuaren 84.2 artikuluarekin bat.

Nolanahi ere, itunik ezean, indarra duten ordezko arau orokorretan xedatutakoari jarraituko zaio.

4. artikulua. Langile kontratudunen bermeak.

Enpresaren hitzarmen kolektibo honetan biltzen diren baldintza guztiak gutxienekotzat joko dira; beraz, hitzartutakoak baino baldintza hobeak dakartzaten klausula, itun eta egoerek, gaur egun enpresan ezarriak daudenek, bere horretan segituko dute haietaz baliatzen diren langileentzat.

5. artikulua. Batzorde paritarioa. Kideak, eginkizunak, prozedura.

–Eraketa.

Batzorde paritario bat eratuko da, alde bakoitzeko ordezkari banak osatua.

–Eginkizunak.

Batzorde horri esleitzen zaio hitzartutakoaren interpretazioa, jarraipena eta zaintza egitea, baita haren menpe jartzen diren gatazkak aztertu eta erabakia hartzea ere arazoei irtenbidea emateko prozeduretan; orobat, premiazkoa denean, hitzarmenaren edukia osatzea, hitzarmen honetan ezarritakoari jarraikiz.

Halaber, hitzarmen honetan xedatutakoaren interpretazioaz edo aplikazioaz edozein gatazka indibidual edo kolektibo paratu aitzin, hala lan arloko agintaritza eskudunari zuzendutako aurretiko erreklamazioetan, nola organo jurisdikzionaletakoetan, lehenik auzia batzorde paritarioaren esku jarriko da.

Langileen Estatutuaren III. tituluan xedatutakoarekin bat, batzordeak hitzarmen honen xede diren gaiei buruz eta hitzarmena interpretatu eta garatzeko asmoz hartzen dituen erabakiak hitzarmenari erantsiko zaizkio, eta izaera juridiko bera izanen dute.

–Erregelamendua.

Batzorde paritarioak erregelamendu bat prestatu eta onesten ahalko du, eta horretara egokitu beharko du bere funtzionamendua.

Batzorde paritarioa edozein alderdik eskaturik bilduko da, deialdia eskatzen denetik hamabost eguneko epean, salbu eta, presa dela eta, bilera alderdi guztien eskubideak zaintzeko moduko epe batean egitea komeni denean.

Batzordeak erabakiak hartzeko, betiere, bi batzordekideek aldeko botoa eman beharko dute, eta ebazpenak gehienez astebeteko epean eman beharko dira.

6. artikulua. Lana zuzentzea.

Lana zuzentzea enpresaren zuzendaritza organoen erantzukizun eta ahalmena da, eta haiei dagokie, behar izanez gero, ahalmen hori nori eskuordetzen dion erabakitzea, betiere aplikagarri diren arau eta itunetan eta legedian ezarritakoari jarraikiz.

Lana antolatzeko ahalmenak erabiltzean, honako hauek dagozkio enpresako zuzendaritzari, betiere enpresako langileen ordezkaritza organoek Langileen Estatutuaren 64. artikuluaren bitartez arlo honetan esleituak dituzten eskumenak errespetatuz: lanak ezarri, finkatu, aldatu edo kentzea, zereginak esleitzea, lanak egiteko metodo berriak ezartzea, lanpostuak sortu edo amortizatzea eta antolatzea enpresak unean-unean dituen beharren arabera, eta lan egiteko modua finkatzea alderdi guztietan.

7. artikulua. Mugikortasun funtzionala, lanbide talde eta kategoriak.

Ondotik azaltzen den langileen sailkapena aipamen huts bat baino ez da. Beraz, ez da beharrezkoa izanen lanbide talde guztietan eta kategoria guztietan lanpostuak edukitzea.

Enpresako mugikortasun funtzionalaren muga bakarrak hauek izanen dira: lan egiteko behar diren titulazio akademikoak edo lanbide titulazioak eta langile bakoitzaren lanbide taldea. Mugikortasun funtzionala parekoak diren lanbide kategorien artean eginen da.

Langileen Estatutuaren 39. artikuluan xedatutakoarekin bat, erabakia justifikatzen duten arrazoi tekniko edo antolakuntzakoak izanez gero, langileak beste zeregin edo lan batean jartzen ahal dira, beren lanbide talde edo kategoriakoak ez badira ere, lan zehatz hori egiteko behar-beharrezkoa den denboran, betiere haien duintasuna errespetatuz. Horren ondorioetarako, antolakuntzako arrazoi gisa hartuko da langileari dagokion lanbide kategorian lanik ez egotea. Mugikortasun funtzionala dela-eta goragoko kategoria bateko lanak 6 hilabete baino gehiagoz urtebeteko epean, edo 8 hilabete baino gehiagoz bi urteko epean, egiten dituzten langileek agindu zaizkien eginkizunei dagokien kategoriara igotzeko eskatzen ahalko dute, aplikagarri diren arauei jarraikiz. Era berean, soldata diferentziak jasotzeko eskubidea izanen dute.

Hitzarmen honek indarra hartzearekin batera, langileak lanbide talde hauetako batean sartuko dira, bakoitzaren lanbide kategoriaren eta eginkizunen arabera:

Hona hemen ezarri diren lanbide taldeak:

–I. taldea: Langile teknikoak eta administrazioko langileak.

Lanbide talde honetan sartzen dira eginkizun teknikoak eta/edo antolaketakoak egiten dituzten langileak; lanbide talde honetan sartzen dira, orobat, lan administratiboak, bulegokoak eta/edo kontabilitatekoak egiten dituztenak, barne direlarik informatikako baliabideekin egiten diren lanak, telefono harrerakoak, zerbitzuak antolatzekoak eta fakturaziokoak egiten dituztenak.

–II. taldea: Produkzioko langileak eta laguntza zerbitzuetakoak.

Enpresako instalazioetan edo haietatik kanpo makinen edo ekipamenduen mugimenduaz eta manipulazioaz arduratzen diren langileak, ibilgailuen mantentze-lanak barne, eta, orobat, enpresaren jarduera nagusiari laguntzeko jardueretan aritzen direnak.

Hona hemen enpresako langile guztien lanbide kategoriak:

–Lehen mailako ofiziala.

–Administrari-ofiziala.

–Bigarren mailako ofiziala.

–Administrari laguntzailea.

–Morroi espezializatua.

C1 motako gidabaimena beharrezkoa duten ibilgailuen gidariek, lan arloko eta Gizarte Segurantzako ondorio guztietarako, lehen mailako ofizial profesionaltzat hartuko dira.

B motako gidabaimena beharrezkoa duten ibilgailuen gidariek, lan arloko eta Gizarte Segurantzako ondorio guztietarako, bigarren mailako ofizial profesionaltzat hartuko dira.

Bigarren mailako ofizialen lanbide kategoria duten langileak, enpresan 3 zerbitzu urte betetzen dituztenean, lehen mailako ofizialen kategoriara igoko dira.

8. artikulua. Lanaldia.

Enpresaren hitzarmen kolektibo honen indarraldia bitartean, egin beharreko benetako lanaldia urtean 1.742 ordukoa izanen da.

Lanaldia hasteko orduan, puntu-puntuan, langileak bere lanpostuan egon beharko du, laneko arropa jantzirik, eta lanaldia bukatu arte ez du lanpostutik alde eginen. Eguneko lanaldia bukatzeko unean bukatzear dauden lanak burutu beharko ditu, denbora laburrean egin badaitezke, deusetan galarazi gabe laneko aparteko denbora gisa kontatzea.

9. artikulua. Ordainsariak.

2026. urtean jaso beharreko soldatak enpresaren hitzarmen kolektibo honen I. eranskinean agertzen den soldata taulan ezarritakoak izanen dira.

Hitzarmen honen indarraldiko hurrengo lau urteetan, hau da, 2026an, 2027an, 2028an eta 2029an, enpresaren zuzendaritza eta sindikatuen ordezkariak urte horretako azken hiruhilekoan bilduko dira aipatu soldatak igotzeko aukera negoziatzeko, ekitaldi horretako emaitzen eta hurrengo urteko aurreikuspenen eta aurrekontuen arabera.

Urte horietan soldatak igotzeko akordioa lortzen bada, dagokion akta eginen da eta urte bakoitzean hitzartutako ordainsariak argitaratuko dira.

10. artikulua. Antzinatasuna.

Enpresan lau urteko zerbitzualdia betetzen den bakoitzean antzinatasun plus edo osagarri bat sortuko da. Langileek behar adina laurteko sorrarazten ahalko dituzte, mugarik gabe.

Aldi baterako kontratu bat mugagabeko kontratu bihurtzen denean, aldi baterako kontratu horren iraupena ere kontuan hartuko da antzinatasuna kalkulatzeko.

Laurteko bakoitzaren zenbatekoa oinarrizko soldataren %5 izanen da.

11. artikulua. Aparteko haborokinak.

Urtero bi aparteko haborokin ordainduko dira, bat uztailean eta bestea eguberrietan, sei hilabetez kontatuta, langileak hilabete batean jasotzen dituen guztirako ordainsariak adinakoak.

Gainera, enpresak mozkinen aparteko paga bat ordainduko du urtero ekainaren 30a baino lehen, aurreko urteko abenduan langileak jasotako guztirako ordainsariak adinakoa.

12. artikulua. Oporrak.

Langile guztiek urtero opor ordainduak izanen dituzte, baldintza hauek kontuan hartuta:

1) Hogeita hamar egun naturaleko oporrak izanen dira, langileen lanbide kategoria edozein dela ere.

2) Langilea eta enpresa ados jarriko dira oporrak noiz hartu erabakitzeko. Dena dela, langile bakoitzak 15 egun natural jarraian hartzen ahalko ditu uztailetik irailera, eta gainerako 15 egunak gainerako hilabeteetan, horiek ere jarraian, betiere enpresak eta langileak adostutako egunetan.

Oporrak hartzeko egunei buruz akordiorik ez badago, enpresaren hitzarmen kolektibo hau onestean eratzen den batzorde paritarioak finkatzen dituen irizpideei men eginen diete bi alderdiek.

3) Arau orokor gisa, oporrak ez dira bi alditan baino gehiagotan hartuko, non ez den kontrakorik ituntzen.

4) Urtean zehar enpresa uzten duen langileak eskubidea izanen du hartu ez dituen oporrak proportzioan kobratzeko, lan egindako denboraren arabera.

5) Oporraldiak aldi baterako lan ezintasuneko egoera batekin bat eginez gero, oporrak etenen dira, eta ukitutako langileak eta enpresako zuzendaritzak adosten duten egunetan hartuko dira.

6) Aurreikusi gabeko guztian Langileen Estatutuan xedatutakoari jarraituko zaio.

13. artikulua. Lizentzia ordainduak.

Langile orok, aurretik abisatu eta justifikatuta, baimena izanen du lanera ez agertzeko, ordaindua izateko eskubidearekin, arrazoi hauetako bat dela medio eta honenbeste denborarako:

a) Langilearen ezkontza: hogei egun natural, oporraldiarekin meta daitezkeenak, betiere enpresarekin adostuta eta haren funtzionamendu normala eragozten ez bada.

b) Seme-alaben, gurasoen eta anai-arreben ezkontza: egun natural bat.

c) Seme edo alaba baten jaiotza: bi egun natural, horietatik bat, gutxienez, laneguna.

d) Ezkontideak, izatezko bikotekideak edo bigarren mailara arteko odol- edo ezkontza-ahaideek (izatezko bikotekidearen odol-ahaideak barne) edo langilearekin etxe berean bizi den eta haren zaintza behar duen beste edozein pertsonak istripu edo eritasun larria baldin badute, ospitaleratu behar badituzte edo ospitaleratzerik ez baina etxean atseden hartzea eskatzen duen ebakuntza kirurgikoa baldin badute: bost egun.

e) Gurasoen heriotza: hiru egun natural.

f) Seme edo alaba baten edo ezkontidearen heriotza: bost egun natural.

g) Bigarren mailara arteko odol- edo ezkontza-ahaideen heriotzagatik, bi egun.

Aurreko c), d), e), f) eta g) kasuetan, langileak joan-etorrietan 200 kilometrotik gorako bidaia egin behar badu, bi egun gehiago gehituko zaizkio.

h) Ohiko etxebizitzaz aldatzeagatik: egun natural bat.

i) Behar-beharrezkoa den denbora, publikoa eta pertsonala den eginbehar saihetsezin bat betetzeko, boto ematekoa barne. Legez edo hitzarmen bidez ezarritako arau batean denbora jakin bat finkatua badago, arau horretan absentziaren iraupenari eta horren konpentsazio ekonomikoari buruz xedatuta dagoenari jarraituko zaio.

j) Behar-beharrezkoa den denbora, jaio aurreko azterketak egiteko eta erditzea prestatzeko tekniketan trebatzeko, bai eta, adopzioaren, adopziorako zaintzaren edo harreraren kasuetan, informazio eta prestakuntza saioetara joateko eta egokitasun deklarazioaren aurreko txosten psikologiko eta sozialak egiteko ere, betiere lanorduetan egin behar badira.

k) Lau egun, lanera joan gabe gelditzeko edo lanetik alde egiteko ezinbesteko arrazoi bategatik, beharrezkoa denean ahaideekin edo bizikideekin zerikusia duten presako familia-arrazoiak direla kausa, langilea berehala bertaratzea eskatzen duen gaixotasun edo istripuren bat gertatzen denean. Absentziaren arrazoia egiaztatu egin behar da.

l) Behar-beharrezkoa den denbora, organoak edo ehunak emateko prestaketa lanak egiteko, betiere lanaldiaren barnean egin behar badira.

m) Eguneko ordu bateko murrizketa, edoskitzeagatik. Baimen hau amak edo aitak hartzen ahal dute, beren nahierara.

Lizentzia horien ondorioetarako, eritasun larritzat joko da ospitaleratu eta gaua bertan eman beharra dakarrena. Gertaera eragilea sortzen den unetik beretik kontatuko da lizentzia ordainduen hasiera. Lizentzien iraupena nola banatu adostu eginen da edo ospitaleratzeak dirauen bitartekoa izanen da.

Ondorio horietarako, behar bezala erregistratutako izatezko bikoteek ere lizentzia berberak izanen dituzte.

14. artikulua. Eritasuna eta istripua.

Edozein kontingentziaren ondoriozko aldi baterako ezintasun egoeretan, haurdunaldiko arriskuarena barne dela, enpresak Gizarte Segurantzak ematen duenaren eta soldata osoaren arteko diferentzia ordainduko du, betiere langileak enpresan segitzen badu.

Aurrekoa gorabehera, haurdun dauden emakumeei lanpostu egokiago bat emanen zaie behin-behinekoz, horrelakorik baldin badago eta aldatzea beharrezkoa badute, medikuak justifikatu ondoren, eta enpresako aukera teknikoak eta antolaketarenak eta langilearen gaitasuna kontuan hartuta.

15. artikulua. Erretiro partziala.

Erretiro partzialari dagokionez, alderdiek legez xedatutakoa bete beharko dute.

Edonola ere, erretiro partziala hartzen ahalko da enpresa eta langilea ados badaude eta horretarako legezko betebeharrak betetzen badira.

16. artikulua. Laneko jantziak.

Enpresa behartua dago langileei laneko bi jantzi edo gehiago ematera, bakoitzak dituen eginkizunetarako egokiak direnak.

Jantzi horiek enpresaren eta langilearen arteko lan harremanaren hasieran banatuko dira eta urte bakoitzeko lehen hiruhilekoan berrituko dira, edo beharrezkoa denean.

Langileak garbituko ditu, eta lan kontratua bukatutakoan itzuliko ditu.

17. artikulua. Lanbide prestakuntza.

Enpresak langileen prestakuntza eta birziklapena sustatuko ditu, eta horretarako etengabeko prestakuntzarako plan bat prestatuko du, batzorde paritarioaren bitartez.

18. artikulua. Aseguru-poliza.

Enpresak aseguru kolektibo bat kontratatuko du langileentzat, istripuaren ondoriozko heriotzako edo ezintasun iraunkor absolutuko kasuetarako, honako kopuru hauek bermatzeko:

• 36.061 euro, heriotza kasuetan.
• 36.061 euro, laneko edo lanetik kanpoko istripuaren ondoriozko edo laneko eritasun baten ondoriozko ezintasun iraunkor absolutua gertatuz gero.

19. artikulua. Laneko osasuna eta segurtasuna.

Hitzarmen honen eraginpeko langileek eskubidea dute beren lan prestazioan derrigorrezkoak diren neurri eta arau guztiak bete daitezen, Laneko Arriskuen Prebentzioari buruzko azaroaren 8ko 31/1995 Legean, UNE arauetan eta hura garatzeko erregelamenduetan ezarritakoari jarraikiz, eta batez ere metalezko aldamio tubularrei buruzko arau guztiak.

Laneko osasunari eta laneko arriskuen prebentzioari buruzko xedapen orokor gisa, honako hau erabaki da:

1. Enpresek langileen segurtasuna eta osasuna babesteko beharrezkoak diren neurri guztiak hartuko dituzte laneko arriskuak prebenitzearren.

2. Nolanahi ere, langileek eta enpresak, biek batera, hartzen dituzten neurri, jarduketa eta planteamenduen helburua lan baldintzak hobetzea izanen da, laneko jarduera baldintzatu gabe, horrela langileen osasunaren eta segurtasunaren babes maila handitzeko.

3. Langileek prebentzio neurriak diseinatu, hartu eta betetzeko lanetan parte hartzen ahalko dute, Laneko Arriskuen Prebentzioari buruzko Legearen V. kapituluan ezarrita dagoen bezala.

4. Hitzarmenak indarra duen bitartean, enpresek langileen segurtasunerako eta osasunerako arriskuen hasiera bateko ebaluazioa eginen dute, oro har jardueraren izaera kontuan harturik. Era berean, bidezkoa denean, laneko ekipamenduei eta lantokiak egokitzeari buruzko ebaluazioa eginen da.

5. Ebaluazioaren emaitzak ikusita beharrezkoa bada, enpresek behar diren prebentzio jarduerak eginen dituzte langileen segurtasunaren eta osasunaren babes maila hobea bermatzeko eta atzematen diren arriskuak murriztu edo ezabatzeko, lan eta produkzio metodoei loturiko prebentzio jarduerak barne direla.

6. Instalazioak, laneko ekipamenduak eta, oro har, lan baldintzak aldatzen diren guztietan beharrezkoa izanen da langileen segurtasunerako eta osasunerako arriskuen ebaluazioa eguneratzea, eta hori ukitutako langileei eta/edo horien legezko ordezkariei jakinarazi beharko zaie.

7. Enpresak beren osasun egoera aldian behin begiratzea bermatuko die langileei, bakoitzaren lanak dituen arriskuen arabera. Azterketa hori ahalmen teknikoa, prestakuntza eta gaitasuna egiaztatua duten osasun arloko langileek egin beharko dute. Haurdun dauden emakumeei arreta berezia jarriko zaie, azterketa berariazkoak eginez. Ukitutako langileei azterketa medikoaren emaitzak jakinaraziko zaizkie.

8. Behar bezala egiaztatzen denean lanpostu baten baldintzek haurdun dagoen emakume baten edo fetuaren osasunari kalte egiten ahal diotela, enpresak, ahal bada, langilea lanpostuz aldatuko du haurdunaldiak irauten duen bitartean, egoera hori zuzentzeko. Lanpostuz aldatzerik ez badago, langileak aldi baterako ezintasuna hartzen ahalko du, Gizarte Segurantzako araubidean osasun arreta ematen dion medikuak hala ziurtatzen badu.

9. Arrisku bereziak dituzten lanpostuen ebaluazioa egiteko, Laneko Segurtasun eta Higienerako Institutu Nazionalaren gidetan jasotako metodo eta irizpideak hartuko dira kontuan.

10. Hitzarmen honek ukitzen dituen langileek eskubidea dute beren lanpostuan edo eginkizunetan eragina duten berariazko arriskuen berri eta haien gaineko prestakuntza izateko, baita arrisku horiei aplikatu beharreko babes eta prebentzio neurrien berri izateko ere.

11. Langile guztiek lana segurtasun baldintzetan gauzatzeko behar diren babes neurri indibidual eta kolektiboak jasoko dituzte.

Berariazko ohar hauek egiten dira aldamioa, jasogailuak, igogailuak eta masta gaineko igogailu-plataformak muntatu, desmuntatu eta erabiltzeko:

I.–Aldamio guztiek materialei, egonkortasunari, erresistentziari, laneko segurtasunari eta segurtasun orokorrari buruzko baldintza orokorrak bete beharko dituzte, baita aldamio mota bakoitzari dagozkion baldintza partikularrak ere, zeinak zehaztuak baitaude uztailaren 18ko 1215/97 Errege Dekretuan (azaroaren 12ko 2177/2004 Errege Dekretuaren bidez aldatua).

II.–Hauek dira baldintza orokorrak:

a) Aldamioek eta haien elementuek egonkortuak egon beharko dute, tinkaturik edo beste edozein baliabide erabiliz. Haien gainean ibili behar diren langileek arriskurik ez dutela izanen bermatuko da, ez igotzean ez bertan egotean.

b) 2 m-tik baino goragotik erortzeko arriskua dagoenean, aldamioek baranda edo beste edozein babes kolektibo izan beharko dute, antzeko segurtasuna edo handiagoa emateko. Barandak hauskaitzak izanen dira, 90 cm garai gutxienez ere, tarteko babesa emateko modukoak, eta zokalo bat izanen dute, 15 cm garai gutxienez ere, inguru guztian, fatxadatik 20 cm baino hurbilago dauden aldeetan izan ezik.

c) Aldamiora igotzeko edo lan jakin bat egiteko babes kolektiboko gailuak kendu edo deuseztatzen direnean, langileen babesa segurtatuko duten konpentsazio neurriak hartu beharko dira, eta ez da lanik eginen neurri horiek hartu gabe. Lana bukatutakoan, hasierako segurtasun gailuak jarriko dira berriro.

d) Aldamioek beharrezko erresistentzia edo/eta sostengatzeko eta eusteko elementuak izan beharko dituzte, haien diseinuaren araberako baldintzetan erabiliz gero erortzeko arriskurik izan ez dadin hautsi edo mugitzen direlako.

e) Plataformak tokiz mugitu, baskulatu edo irristatu ez daitezen moduan ezarriko dira. Aise ibili ahal izateko eta lanak egiteko elementuak pilatu ahal izateko bezain zabalak izanen dira, 60 cm gutxienez ere. Metalezkoak izanen dira edo beste material higagaitz eta irristagaitz batekoak, ez baskulatzeko moduan finkatuta egoteko gailuak izanen dituzte, gehienez onartutako karga agerian eta ezin ezabatzeko moduan markatuta dutela.

f) Lana egiteko behar den materiala bakarrik pilatuko da eta, lanaldia bukatutakoan, ahal dela, ez da kargarik utziko aldamioan.

g) Aldamioaren eta paramentuaren artetik ezer ere ez erortzeko, oholak jarriko dira, erortzeko arriskua duten tarte guztiak estaltzeko.

h) Iraultzeko, erortzeko edo kontrolik gabe ez desplazatzeko moduan muntatu eta erabiliko dira aldamioak.

i) Aldamioak fabrikatzaileek erabakitako moduan bakarrik erabiltzen ahalko dira, non ez diren aurretik hartu arriskua ebaluatzeko eta hura gutxitzeko behar diren neurriak.

j) Aldamioa erabili aurretik, hura erabiltzeko baldintzak eta babesak egokiak direla eta ez duela arriskurik egiaztatu beharko da.

k) Eguraldi txarragatik edo segurtasuna galarazten duten beste edozein inguruabarrengatik aldamioak hondatzen direnean, ez dira erabiliko.

l) Atxikitako eskaileren bidez edo tranpa-ohola duten plataformetan integratutako eskaileren bidez igoko da aldamiora. Tranpa-oholek itxita egon beharko dute, aldamiora igotzeko xedetik kanpo daudenean. Aldamiora eraikinetik sartzen ahalko da, bakar-bakarrik, segurtasun planean edo arriskuen ebaluazioan justifikatuta dagoenean, eta, horretarako, behar bezala babestutako pasabideak edo plataformak erabiliko dira.

m) Aldamioan sostengatzeko elementuek edozein elementu irristagaitzen bidez babestuta egon beharko dute, egituraren egonkortasuna ziurtatzearren.

III.–Aldamioak kalkulu notarik ez duenean edo ereduko konfigurazioetan ez dagoenean, erresistentzia eta egonkortasuna kalkulatzeko nota atera beharko da. Horretarako, unibertsitateko prestakuntza duen norbaitek egin beharko du kalkulu hori.

IV.–Konplexutasunaren arabera, unibertsitateko prestakuntza edo esperientzia erakutsia duen norbaitek prestatuko du aldamioa muntatu, desmuntatu eta erabiltzeko plan bat. Nahitaezkoa izanen da kasu hauetan:

a) Masta gaineko igogailu-plataformak.

b) Lurzoruaren, hormigoizko zolaten, forjatuen, hegalen edo beste elementu batzuen gainean jartzen diren aldamioak, 6 m-tik gorako altuera dutenean edo 8 m-tik gorako distantziara iristen diren elementu horizontalak dituztenean.

c) Teilatu lau, kupula, terraza eta abarren gainean instalatzen diren aldamioak, lurretik 24 m baino altuago daudenean.

d) Igotzeko dorreak eta laneko dorre mugikorrak, lanak 6 m baino gorago egiten direnean.

Hala ere, EEren markaketa duten aldamioak direnean (masta gaineko plataformak) edo, EEren markaketaren menpe jarri ezin diren aldamio normalizatuen kasuan (legez beharturik ez daudelako), fabrikatzaileek haiekin harmonizazio dokumentuek eskatzen dituzten saiakuntzak egin dituztenean eta ziurtagiria dutenean, fabrikatzailearen jarraibideak erabiliko dira muntaketa planaren ordez; betiere, aldamioa ereduko konfigurazio baten arabera muntatu beharko da.

V.–Berariazko prestakuntza egokia jaso duten langileek bakarrik muntatu, desmuntatu edo aldatzen ahalko dituzte aldamioak, unibertsitateko prestakuntza duen norbaiten edo horretarako gaituta dagoen profesional baten zuzendaritzapean.

VI.–Metalezko aldamio tubularretarako baldintza partikularrak:

a) Egiaztatze entitate batek ziurtatuta egon beharko dute.

b) Muntatze eta mantentze lanetako jarraibideen eskuliburua izan beharko dute.

c) Kontratistari edo erabiltzaileei ez zaie inoiz utziko hasierako diseinuan aldaketak egiten, ez bada zuzendaritza fakultatiboak edo segurtasuneko koordinatzaileak baimenduta edo esku hartuta, eta muntatu, erabili eta desmuntatzeko plana egin gabe.

VII.–Berariazko arauak, igotzeko dorreetarako eta laneko dorre mugikorretarako:

a) Igotzeko dorreak eta laneko dorre mugikorrak egonkorrak izan daitezen, azken plataformarainoko altuera 4 m-koa izanen da, gehienez ere, alde txikieneko metro bakoitzeko. Beharrezkoa izanez gero, egonkorgailuak erabiliko dira, alde txikiena handituko da...

b) Laneko dorre mugikorren gurpilek errotazioa eta translazioa blokatzeko gailu bat izan beharko dute, eta balazten funtzionamendu egokia egiaztatu beharko da. Dorre horiek eskuz bakarrik mugituko dira lurzoru finko, solido, nibelatu eta oztoporik gabekoan, eta guztiz debekatuta dago tokiz aldatzea gainean jendea, tresnak eta materialak dituztela.

c) Debekatua dago txirrikak edo igotzeko beste gailu batzuk erabiltzea, non ez dituen fabrikatzaileak helburu horretarako propio proiektatu.

d) Ez dira erresistentzia edo egonkortasun txikiko materialen gainean jarri behar, edo material arinen gainean (adreilua, aparra...).

e) Tranpa-ohola duten plataformei atxikitako edo integratutako eskaileren bidez igoko da haietara.

f) Debekatua dago jauzi egitea haien zolen gainean edo/eta zubiak jartzea dorre mugikorren artean edo horien eta obrako edo eraikineko elementu finko baten artean.

VIII.–Berariazko arauak, masta gaineko igogailu-plataformetarako eta igogailuetarako:

a) Urriaren 10eko 1644/2008 Errege Dekretua aplikatzen zaie; hortaz, EEren markaketa, EEren adostasun deklarazioa eta jarraibideen eskuliburua eskatzen zaizkie.

b) Erabili aurretik, bermapuntuen erresistentzia eta egonkortasuna egiaztatu beharko da.

c) Babestuta egon beharko dute zeharkako kontaktu elektrikoaren arriskuaren aurrean, eta inguruan aireko linea elektrikorik ez dela egiaztatu beharko da.

d) Ezin hobeki lerrokatuta eta zimendatuta egon beharko dute, muturretan topeak dituztela.

e) Lurraren beheko aldea balizatu, seinalatu eta akotatuko da.

f) Ez dira gehiegi kargatuko.

g) Aldian behin berrikusi beharko dira, eta ez dira fabrikatzaileak aurreikusitakoa gainditzen duten eguraldi txarreko baldintzetan erabiliko.

IX.–Berariazko arauak materialen jasogailuetarako:

a) 98/37/EE zuzentaraua aplikatzen zaie; hortaz, EEren markaketa eta deklarazioa eta jarraibideen eskuliburua izatea eskatzen zaie.

b) Erabili aurretik, bermapuntuen erresistentzia eta egonkortasuna egiaztatu beharko da.

c) Babestuta egon beharko dute zeharkako kontaktu elektrikoaren arriskuaren aurrean, eta inguruan aireko linea elektrikorik ez dela egiaztatu beharko da.

d) Ezin hobeki lerrokatuta eta zimendatuta egon beharko dute, muturretan topeak dituztela.

e) Lurraren beheko aldea balizatu, seinalatu eta akotatuko da.

f) Ez dira gehiegi kargatuko.

g) Aldian behin berrikusi beharko dira, eta ez dira fabrikatzaileak aurreikusitako eguraldi txarreko baldintzetan erabiliko.

20. artikulua. Gidabaimena kentzea.

Gidabaimena kentzeagatik langile batek ezin badu bere lanbide kategoriari dagozkion eginkizun nagusiak gauzatu, enpresak aukera izanen du langilea beste lanpostu batean kokatzeko, benetan egiten duen lanari dagokion lanbide kategoriaren araberakoa ordainduz, edo bestela, kontratua bertan behera utziko du, gerora etorritako gaitasun gabezia dela kausa.

Hori ez da aplikatuko gidabaimena kendu bazaio lanaldia bitartean alkoholismoagatik edo beste adikzio bategatik, edo zuhurtziagabekeria ausartegiagatik, kasu horretan enpresak Langileen Estatutuan jasotako dituen diziplina ahalmenak erabiltzen ahalko ditu eta.

21. artikulua. Emakumezko langilea.

Aukera-berdintasuna lortzeko asmoz, akordio hau sinatu duten alderdiek helburu garrantzitsutzat jotzen dituzte honako hauek:

a) Berdintasuna lanean, zuzeneko eta zeharkako diskriminazioa baztertuz.

b) Soldatetan sexu-diskriminaziorik ez izatea.

c) Enplegurako aukera-berdintasuna izatea.

d) Lanbide prestakuntza eta birziklatze prozesuetan parte hartzea.

Amatasun eszedentzia Langileen Estatutuan aurreikusitako moduan emanen da.

Era berean, enpresak konpromisoa hartzen du haurdunaldia bitartean langilea lanpostuz aldatzeko, ohiko lanpostuan aritzea kaltegarria bada osasunerako eta enpresan aldaketa egiteko aukerarik baldin badago.

Zehaztu ez diren gainerako kontuetan, indarra duen legerian xedatutakoari lotuko zaio.

22. artikulua. Diziplina araubidea.

Diziplina arloan, Merkataritzaren Esparru Akordioan, Merkataritzaren Ordenantzan eta, horrelakorik ezean, Langileen Estatutuan ezarritakoari men eginen zaio oso-osorik.

Laneko jazarpena, edozein motatakoa dela ere, falta oso astuntzat joko da.

23. artikulua. Lana uzteagatiko kalte-ordaina.

Enpresan hogei urtez aritu ondoren erretiratzen den langile orok kalte-ordain bat jasoko du, bi hilabetekoa 10 urteko zerbitzualdi bakoitzeko. Kalte-ordaina hamar urtetik beherako zatikien arabera kalkulatuko da, zerbitzualdian emandako denboraren proportzioan.

24. artikulua. Heriotzagatiko laguntza.

Jardunean ari den langile bat hiltzen bada, haren eskubidedunei enpresak hiru hilabeteko soldata ordainduko die, horietako bakoitza hil den langileak kobratu duen azken soldata adinakoa.

25. artikulua. Gatazkak auzibidetik kanpo konpontzea.

Bi alderdiek adostu dute auzibidetik kanpoko bitartekotza-, adiskidetze- eta, hala behar badu, arbitraje-prozeduretara eramatea hitzarmen kolektibo honetako gaietan sor daitezkeen desadostasun guztiak, eta onartzen dute bi alderdiek onartu eta bere egiten duten lanbide arteko organo independente baten esku-hartzea desadostasun horiek ebazteko. Horretarako, Nafarroako Lan Auzitegia izendatu dute –Iruñeko Kale Berria 30-32, behea–.

XEDAPEN GEHIGARRI BAKARRA

Enpresako hitzarmen kolektibo hau sinatzen duten alderdiek adostu dute xedapen gehigarri honen aurreko 23. eta 24. artikuluetan jasota dauden kalte-ordaina eta laguntza ez direla kanpoko aseguru baten bidez kapitalizatuko. Beraz, enpresak konpromisoa hartzen du zuzenean ordaintzeko, ordaintzeko baldintzak betez gero.

Mutiloan (Nafarroa), 2026ko otsailaren 9an.

I. ERANSKINA

ANDAMIOS Y MONTAJES ECA SL ENPRESAREN HITZARMEN KOLEKTIBOAREN NEGOZIAZIO MAHAIA ERATZEKO AKTA

Mutiloan (Nafarroa), 2026ko urtarrilaren 16an.

Bildurik:

Batetik, Ignacio Javier Miron Miqueleiz jauna, Andamios y Montajes ECA, SL enpresaren ordezkari gisa.

Bestetik, Darwin Antonio Lima Agurto jauna, langileen delegatua, langileen ordezkari gisa.

Bi alderdiek, legezko ahalmena elkarri aitortuta,

Erabaki dute:

Bakarra: Andamios y Montajes ECA SL enpresaren hitzarmen kolektiboaren negoziazio mahaia eratzea. Goiburuan adierazitako pertsonek osatuko dute mahai hori.

Eta aztertzeko beste gairik ez dagoenez, bilerari bukaera eman zaio eta, adostasunaren adierazgarri, bertaratutakoek honako akta hau sinatu dute goian aipatutako tokian eta egunean.

ANDAMIOS Y MONTAJES ECA SL ENPRESAREN HITZARMEN KOLEKTIBOAREN NEGOZIAZIO MAHAIAREN BUKAERA AKTA

Mutiloan (Nafarroa), bi mila eta hogeita seiko otsailaren seian.

Bildurik:

Batetik, Ignacio Javier Miron Miqueleiz jauna, Andamios y Montajes ECA, SL enpresaren ordezkari gisa.

Bestetik, Darwin Antonio Lima Agurto jauna, langileen delegatua, langileen ordezkari gisa.

Bi alderdiek, legezko ahalmena elkarri aitortuta,

Erabaki dute:

Lehena.–Enpresaren ordezkariak eta langileen delegatuak onetsi eta sinatu dute Andamios y Montajes ECA SL enpresaren hitzarmen kolektiboaren testua, bi alderdiek adostua, 2026ko urtarrilaren 1etik 2029ko abenduaren 31ra arte indarraldia izanen duena. Testu hori akta honi erantsi zaio, eta 25 artikulu, xedapen gehigarri bat eta soldata-taulak jasotzen dituen eranskin bat ditu.

Bigarrena.–Hitzarmen kolektiboaren testua egoki den Nafarroako Gobernuko kontseilariari igortzea –aginduzkoa den ale kopurua bidaliko zaio–, behar den guztia egin dadin erregistratu, gorde eta Nafarroako Aldizkari Ofizialean argitaratzeko, bat etorriz urriaren 23ko 2/2015 Legegintzako Errege Dekretuaren bidez onetsitako indarreko Langileen Estatutuaren 90. artikuluko 2. eta 3. apartatuetan agindutakoarekin. Horretarako, ahalmena ematen zaio José Manuel Piquer Martín-Portugués legelariari, beharrezkoak diren kudeaketak egin ditzan.

Hirugarrena.–Hitzarmeneko batzorde paritarioko kideak izendatzea, honela:

–Enpresaren ordezkariak: Ignacio Javier Miron Miqueleiz.

–Langileen ordezkariak: Darwin Antonio Lima Agurto.

Eta aztertzeko beste gairik ez dagoenez, bilerari bukaera eman zaio eta, adostasunaren adierazgarri, bertaratutakoek honako akta hau sinatu dute goian aipatutako tokian eta egunean.

Iragarkiaren kodea: F2603342