Iragarkia

48. ALDIZKARIA - 2026ko martxoaren 6a

1. NAFARROAKO FORU KOMUNITATEA

1.7. BESTELAKOAK

31/2026 EBAZPENA, otsailaren 4koa, Enpresen Sustapenerako eta Azpiegituretako zuzendari nagusiak emana, ukatzen dituena aurretiazko administrazio baimenak "As de Guía 6", "Ballestrinque 6", "Ballinger 6", "Carabela 6", "Carraca 6", "Margarita 6", "Nao 6" eta "Vuelta de Escota 6" izeneko haize parkeetarako (4,99 Mw-ekoa bakoitza) eta haien eraldaketa eta ebakuazio azpiegituretarako, Oltza Zendea, Etxauri, Goñerri eta Orkoiengo udal mugarteetan. Espediente kodeak: 1256-CE, 1257-CE, 1258-CE, 1259-CE, 1260-CE, 1281-CE, 1282-CE eta 1283-CE.

1.–Aurretiazko administrazio baimenen eskaerak.

2023ko azaroaren 16an eta 17an, Nafarroan haize parkeetarako baimena arautzen duen maiatzaren 8ko 56/2019 Foru Dekretuan ezarritakoa aplikatuz, Enigma Green Power 2 SLU, Enigma Green Power 4 SLU, Enigma Green Power 6 SLU, Enigma Green Power 8 SLU, Enigma Green Power 10 SLU, Savanna Power Solar 14 SLU, Savanna Power Solar 15 SLU eta Savanna Power Solar 16 SLU entitate sustatzaileek aurretiazko administrazio baimenak eskatu zituzten Oltza Zendea, Etxauri, Goñerri eta Orkoiengo udal mugarteetan ezarri nahi diren "As de Guía 6", "Ballestrinque 6", "Ballinger 6", "Carabela 6", "Carraca 6", "Margarita 6", "Nao 6" eta "Vuelta de Escota 6" haize parkeetarako (4,99 Mw-ekoa bakoitza) eta haien eraldaketa eta ebakuazio azpiegituretarako.

Geroago, 2025eko maiatzaren 9an, sustatzaileek eskaera egin zuten proiektuen espedienteetan dokumentazio berria sartzeko.

2.–Jendaurreko informazioaren eta kontsulten izapideak.

Bat etorriz maiatzaren 8ko 56/2019 Foru Dekretuaren 7. artikuluan jasotakoarekin, aurreproiektuak eta ingurumen inpaktuaren azterketak jendaurrean jarri ziren, 30 egunez, iragarki bat argitaratuta 2025eko 120. Nafarroako Aldizkari Ofizialean, ekainaren 17koan, eta Diario de Navarra eta Diario de Noticias egunkarietan (2025eko ekainaren 18an), eta dokumentazioa Nafarroako Gobernu Irekiaren dagokion web-orrian argitaratu zen. Era berean, informazioa ukitutako udalei igorri zitzaien, jendaurrean jar zezaten epe berean.

Guztira, 6.231 alegazio jaso ziren.

Aldi berean, eta maiatzaren 8ko 56/2019 Foru Dekretuaren 8. artikuluan ezarritakoa aplikatuz, kontsulta egin zitzaien taulan zerrendatzen diren erakundeei, eta txosten hauek bidali zituzten:

Ebazpen honen xede diren espedienteetan dago alegazio eta txostenen edukia.

Nafarroan haize parkeetarako baimenak arautzen dituen maiatzaren 8ko 56/2019 Foru Dekretuaren 9. artikuluari jarraikiz, 2025eko irailaren 2an haize parkeen sustatzaileei igorri zitzaizkien aipatu txostenak eta alegazioak.

3.–Ingurumen inpaktuaren ebaluazio arrunta hasteko eta lurzoru urbanizaezinean jarduerak egiteko baimena eskuratzeko eskaera.

2025eko urriaren 31n, jasotako alegazio eta txostenei erantzun zieten enpresa sustatzaileek, eta ingurumen inpaktuaren ebaluazio arrunta hasteko eta lurzoru urbanizaezinean jarduerak egiteko baimena eskuratzeko eskaera aurkeztu zuten, maiatzaren 8ko 56/2019 Foru Dekretuaren 10. artikuluan ezarritakoari jarraikiz.

Aipatu artikuluan ezarritakoa betez, Industria Antolamenduaren, Azpiegitura Energetikoen eta Meatzeen Zerbitzuak eskaerak igorri zituen Ingurumen Ebaluazioaren Atalera eta Paisaiaren eta Landa Lurzoruaren Atalera, hurrenez hurren.

4.–Proiektuaren aurkako ingurumen inpaktuaren adierazpena.

Ingurumeneko zuzendari nagusiaren abenduaren 16ko 1537E/2025 Ebazpenaren bidez, aurkako ingurumen-inpaktuaren adierazpena egin zen "As de Guía 6", "Ballestrinque 6", "Ballinger 6", "Carabela 6", "Carraca 6", "Margarita 6", "Nao 6" eta "Vuelta de Escota 6" haize parkeetarako eta haien eraldaketa eta ebakuazio azpiegitura komunetarako.

5.–Aurretiazko administrazio baimenak ukatzeko proposamena.

Aurrekoa kontuan harturik, eta zortzi espedienteen azterketa teknikoa egin ondoren, Industria Antolamenduaren, Azpiegitura Energetikoen eta Meatzeen Zerbitzuko Azpiegitura Energetikoen Atalak proposatzen du espediente horiek ebaztea eta eskatutako aurretiazko administrazio baimenak ukatzea.

Administrazio Publikoen Administrazio Prozedura Erkideari buruzko urriaren 1eko 39/2015 Legearen 57. artikuluaren arabera, aurkeztutako eskaerak funtsean berdinak direnez, bidezkoa da eskaera horiek metatzea baimenak ukatzeko ebazpenean.

Adierazitakoarekin eta espedientean jasotako agiriekin bat, eta Nafarroako Foru Komunitateko Administrazioari eta foru-sektore publiko instituzionalari buruzko martxoaren 11ko 11/2019 Foru Legearen 32. artikuluak ematen dizkidan eskudantziak erabilita,

EBAZTEN DUT:

1. Ukatzea aurretiazko administrazio baimenak "As de Guía 6", "Ballestrinque 6", "Ballinger 6", "Carabela 6", "Carraca 6", "Margarita 6", "Nao 6" eta "Vuelta de Escota 6" izeneko haize parkeetarako (4,99 Mw-ekoa bakoitza) eta haien eraldaketa eta ebakuazio azpiegituretarako, Oltza Zendea, Etxauri, Goñerri eta Orkoiengo udal mugarteetan.

2. Diruzaintza Atalari proposatzea sarbide eta konexio prozedurekin lotutako bost bermeak itzultzeko. Abal gordailuaren frogagiriak eta itzulketa eginbideenak ebazpen honen eranskinetan daude.

3. Ebazpen hau igortzea, behar diren ondorioak izan ditzan, Industria Antolamenduaren, Azpiegitura Energetikoen eta Meatzeen Zerbitzura, Ingurumen Ebaluaziorako Atalera, Paisaiaren eta Landa-lurzoruaren Atalera, Ustiapen Atalera, Herri-lurren Atalera, Ondare Arkitektonikoaren Atalera, Erregistroaren, Ondasun Higigarrien eta Arkeologiaren Atalera, Gobernu Irekiaren eta Herritarrentzako Arretaren Zerbitzura, eta Ekonomia eta Ogasun Departamentuko Ekonomia eta Finantza Zerbitzuko Diruzaintza Atalera.

4. Ebazpen hau Nafarroako Aldizkari Ofizialean argitaratzea, orok jakin dezan.

5. Ebazpen hau jakinaraztea honako hauei: Enigma Green Power 2 SLU, Enigma Green Power 4 SLU, Enigma Green Power 6 SLU, Enigma Green Power 8 SLU, Enigma Green Power 10 SLU, Savanna Power Solar 14 SLU, Savanna Power Solar 15 SLU, Savanna Power Solar 16 SLU, Nafarroako Ekologistak Martxan elkartea, Espainiako Ornitologia Elkartea (SEO Birdlife), I-DE Redes Eléctricas Inteligentes SAU, Red Eléctrica de España SAUko Operazioetako eta Sistemaren Garapeneko zuzendaritzak, Enagás Transporte SAU, Euskal Herriko Nekazarien Elkartea Nafarroan, Iruñerriko Mankomunitatea, Ugatzaren Kontserbaziorako Fundazioa, Muvao-Ollarango Emakumeak, Retevision I SAU, Zunbeltz-Landa Garapenerako Elkartea, Iranzuko Lurrak turismo elkartea, Electra Valdizarbe Distribucion SLU, Urederra E. Bike SL, Urbasa-Andia Bizirik plataforma, Andia Mankomunitatea, Sustrai Erakuntza fundazioa, Etxauribar Lanean elkartea, Ongaiz-Zangozako Ekologistak Martxan eta Telefónica de España SAU; eta ohartaraztea, halaber, ebazpen honek ez duela administrazio bidea amaitzen eta haren aurka gora jotzeko errekurtsoa jartzen ahal dela, Industriako eta Enpresen Trantsizio Ekologiko eta Digitalerako kontseilariari zuzendua, hilabeteko epean, jakinarazi eta biharamunetik hasita. Errekurtsoan espediente kodea adierazi beharko da.

6. Ebazpen hau jakinaraztea honako hauei: Goñerri, Etxauri, Oltza Zendea, Orkoien, Jaitz, Ollaran, Bidaurreta, Ergoiena, Gesalatz, Eulate, Zirauki, Antzin, Ameskoabarrena, Deierri eta Artazuko udalak; Egillor, Unanu, Lizarraga, Izu, Eraul, Izkue, Aratzuri, Ibero, Ororbia, Saratsate, Otxobi, San Martin Ameskoa, Larrion, Amillao, Artabia, Eultz eta Zudairiko kontzejuak; Trantsizio Ekologikorako eta Erronka Demografikorako Ministerioa, Ebroko Konfederazio Hidrografikoa, eta Aire Segurtasuneko Estatu Agentzia; eta ohartaraztea haren kontra administrazioarekiko auzi-errekurtsoa jartzen ahal dela, Nafarroako Justizia Auzitegi Nagusiko Administrazioarekiko Auzien Salari zuzenduta, bi hilabeteko epean, galarazi gabe Nafarroako Gobernuan aldez aurreko errekerimendua egin ahal izatea, Administrazioarekiko Auzien Jurisdikzioa arautzen duen uztailaren 13ko 29/1998 Legearen 44. artikuluan ezarritako moduan eta epean.

Iruñean, 2026ko otsailaren 4an.–Enpresen Sustapenerako eta Azpiegituretako zuzendari nagusia, Iñigo Arruti Torre.

Iragarkiaren kodea: F2601903