Iragarkia

29. ALDIZKARIA - 2026ko otsailaren 10a

1. NAFARROAKO FORU KOMUNITATEA

1.4. DIRU-LAGUNTZAK, LAGUNTZAK ETA BEKAK

1220E/2025 FORU AGINDUA, abenduaren 11koa, Eskubide Sozialetako, Ekonomia Sozialeko eta Enpleguko kontseilariak emana, zeinaren bidez onesten baita "Adinekoen Programa Globala" dirulaguntzaren deialdia adinekoen arloan esku hartzen duten irabazi-asmorik gabeko entitateentzat, 2026. urterako. DDBN kodea: 874344.

Gizarte-zerbitzuei buruzko abenduaren 14ko 15/2006 Foru Legearen 2. artikuluan ezartzen denez, botere publikoen jarduketek, gizarte-zerbitzuen arloan, funtsezko helburu hauek izanen dituzte, besteak beste: pertsona guztien bizi-kalitatea hobetzea eta haien normalizazioa, parte-hartzea eta integrazioa sustatzea gizartean, politikan, ekonomian, lanean, kulturan eta hezkuntzan; autonomia pertsonala, familiarra eta taldeena sustatzea; kohesio soziala eta elkartasuna sustatzea; pertsonen eta taldeen bazterketa-egoerei aurrea hartu eta haietaz arduratzea; eta mendekotasunak eta oinarrizko baliabide ezak eragindako premiei erantzutea. Orobat, xedatzen du gizarte-zerbitzuen sistema publikoaren prestazioak ezarriko dituen tresna Gizarte Zerbitzuen Zorroa izanen dela.

Ekainaren 17ko 69/2008 Foru Dekretuaren bidez, Gizarte Zerbitzu Orokorren Zorroa onetsi zen. "Bermatu gabeko prestazioak" izeneko II. eranskinaren B)13 puntuan, dirulaguntzak ezartzen dira hirugarren adinekoen arloko gizarte-ekimeneko entitateentzat, eta xedatzen da ezen baliabide horien helburua dela hirugarren adinekoen autonomia pertsonala sustatzera eta mendekotasuna prebenitzera bideratutako programak egin daitezen bultzatzea, bai eta programa horiek garatzen dituzten entitateen asoziazionismoa sustatzea ere.

Dirulaguntzei buruzko azaroaren 9ko 11/2005 Foru Legeak ezartzen du zer araubide juridiko orokor aplikatu behar zaien onura publikoko edo gizarte-intereseko jarduerak sustatzeko Nafarroako Aurrekontu Orokorren kargura ematen diren dirulaguntzei. Arau horren 17. artikuluak norgehiagokako araubidea ezartzen du. Horren arabera, honako hau joko da norgehiagokatzat: dirulaguntzak emateko aurkezten diren eskaerak alderatzea, lehentasunaren arabera ordenatzeko, oinarri arautzaileetan eta deialdian ezarri diren balorazio-irizpideei jarraituz, eta irizpide horien arabera baloraziorik onena lortzen duten eskaerei dirulaguntza ematea, deialdian ezarritako muga eta kreditu erabilgarria gainditu gabe. Salbuespenez, oinarri arautzaileetan hala aurreikusiz gero, dirulaguntzetarako bideratu den gehieneko zenbateko osoa dirulaguntzaren onuradun diren entitateen artean hainbanatzea proposatuko da.

Azaroaren 28ko 31/2022 Foru Legeak, Nafarroan desgaitasuna dutenei arreta emateari eta beren eskubideak bermatzeari buruzkoak, ezartzen du nahitaezkoa dela klausula sozialak sartzea dirulaguntzen oinarrietan edo horiek emateko arauetan. Deialdi honen xedea adineko pertsonek ahalik eta autonomia-mailarik handiena izan dezaten lortzea eta, orobat, desgaitasun edo mendekotasun egoeren agerpena atzeratzea denez gero, bete-betean betetzen da baldintza hori.

Bat etorriz Osasunaren Mundu Erakundeak sustatutako esparruarekin, 2017-2022 aldirako Nafarroako Zahartze Aktiboaren eta Osasungarriaren Estrategiaren oinarriak dira adinekoen eskubideen aitortza, batetik, eta, bestetik, Nazio Batuen printzipioak: independentzia, parte-hartzea, duintasuna, laguntza eta norberaren nahiak egiteko aukera, eta orobat, ekitatea eta aukera- nahiz tratu-berdintasuna, bizitzako alderdi guztietan.

Zahartze Aktiboaren eta Osasungarriaren Estrategiaren xedea da Nafarroako biztanleak ahalik eta gaitasun funtzional handienarekin eta bizi-kalitate onenarekin zahartu daitezen sustatzea, halako moldez non pertsonek ahalik eta luzaroen iraunen duten aktibo, autonomo eta independente.

Bat etorriz Europar Batasunaren Funtzionamenduari buruzko Tratatuaren 107. artikuluarekin, dirulaguntzen deialdi hau ez dago Europar Batasuneko estatu-laguntzen araubidearen menpe, ez baitago distortsiorik ez merkatuan ez lehian. Izan ere, dirulaguntzaren hartzaileak irabazi-asmorik gabeko entitateak dira, hirugarren adinekoen esparruan zerbitzu ematen dutenak, erretiratuen klubak eta adinekoen elkarteak esaterako, eta halakoek ez dute eragin ekonomikorik merkatuan, zahartze aktiboaren programek ez dutelako etekinik sortzen; badute, ordea, berebiziko interes soziala, adinekoen ongizatean eragina dutenez gero.

Ildo beretik, Agenda 2030ek Zahartze Osasungarriaren Hamarkadaren bidez (2021-2030) heltzen dio biztanleria kalteberenari, eta aukera ematen du gobernuak, gizarte zibila, nazioarteko erakundeak, profesionalak, erakunde akademikoak, komunikabideak eta sektore pribatua biltzeko, hamar urteko epean modu bateratuan eta katalizatzailean ari daitezen, lankidetzan, adinekoen bizitzak hobetzeko, baita haien senideenak eta bizi diren komunitateenak ere.

Ekainaren 5eko 60/2024 Foru Dekretuaren bidez, Pertsonen Autonomiarako eta Garapenerako Nafarroako Agentziaren estatutuak onetsi ziren, eta erakunde horri eman zitzaizkion deialdi honen xedeko arloari buruzko eginkizunak.

Espedienteko txosten tekniko eta juridikoek adierazten dute, hurrenez hurren, dirulaguntza hauek ematea egokia eta interes publikokoa dela, eta deialdia eta oinarri arautzaileak legezkoak direla.

Horrenbestez, arau hauen bidez eman zaizkidan eskudantziak erabiliz: 14/2004 Foru Legea, abenduaren 3koa, Nafarroako Gobernuari eta Lehendakariari buruzkoa; eta 71/2023 Foru Dekretua, abuztuaren 30ekoa, Eskubide Sozialetako, Ekonomia Sozialeko eta Enpleguko Departamentuaren egitura organikoa ezartzen duena.

AGINTZEN DUT:

1. Onestea "Adinekoen Programa Globala" dirulaguntzaren deialdia adinekoen arloan esku hartzen duten irabazi-asmorik gabeko entitateentzat, 2026. urterako, baita haren oinarri arautzaileak ere (foru-agindu honen I., II. eta III. eranskinetan jasota daude).

2. Deialdi honen konpromisoei aurre egiteko, aurrekontuko kreditu hauek erreserbatu dira:

3. Deialdi honen konpromisoak betetzeko, aurrekontu-kreditu hauek baimentzen dira:

Programetarako dirulaguntzetarako baimendu den zenbatekotik (803.425,00 euro), 737.794,00 euro erabiliko dira "Programa globala" modalitaterako (II. eranskina) eta 65.631,00 euro, berriz, "Boluntariotza-programa" modalitaterako, adinekoen arloan boluntariotza-programak egiten dituzten boluntarioen entitateentzat (III. eranskina).

Deialdian aurreikusitako zenbatekoaz gain, beste zenbateko gehigarri bat ere baimentzen ahalko da. Horretarako, Dirulaguntzei buruzko Foru Legearen 31.3 artikuluan ezarritako kasuetako bat gertatu beharko da.

Dirulaguntzei buruzko azaroaren 9ko 11/2005 Foru Legearen 31.3 artikuluarekin bat, gerakinik baldin bada desgaitasuna duten pertsonen arloko gizarte-ekimeneko entitateei dirulaguntzak emateko 2025. urteko deialdian, eta, betiere, deialdi honen gaineko ebazpena eman baino lehen, %0,7ko funtseko partidak handitzen ahalko dira.

4. Foru-agindu hau eta eranskinak Nafarroako Aldizkari Ofizialean argitaratzea.

5. Deialdi honen eta oinarri arautzaileen kontra gora jotzeko errekurtsoa jartzen ahal da, Nafarroako Gobernuari zuzendua, hilabeteko epean, argitaratu eta biharamunetik hasita.

6. Foru-agindu hau igortzea, behar diren ondorioak izan ditzan, Pertsonen Autonomiarako eta Garapenerako Nafarroako Agentziako Programen eta Dirulaguntzen Kudeaketaren Atalera, Ekonomia eta Aurrekontuak Kudeatzeko Ataleko Kontabilitate Zentrora, Idazkaritza Tekniko Nagusiko Administrazio Aferetarako Bulegora eta Dirulaguntzen Datu Base Nazionalera.

Iruñean, 2025eko abenduaren 11n.–Eskubide Sozialetako, Ekonomia Sozialeko eta Enpleguko kontseilaria, María Carmen Maeztu Villafranca.

I. ERANSKINA.–Deialdia, adinekoen arloan esku hartzen duten gizarte-ekimeneko eta irabazi-asmorik gabeko entitateei dirulaguntzak emateko 2026an, asoziazionismoa sustatzeko eta zahartze aktiboa eta osasungarria areagotzen duten jardueren garapena bultzatzeko. Oinarri arautzaile orokorrak

1.–Xedea eta modalitateak.

1.1. Xedea.

Deialdi honen xedea da dirulaguntza batzuk emateko araubidea ezartzea, adinekoen arloan esku hartzen duten eta helbidea Nafarroan duten gizarte-ekimeneko eta irabazi-asmorik gabeko entitateak diruz laguntzeko, 2026ko urtarrilaren 1etik abenduaren 31ra bitarteko aldian.

Era berean, beste xede bat da diruz laguntzea gizarte-ekimeneko eta gizarte-zerbitzuen arloko boluntarioen entitateek egiten dituzten boluntariotza-programak, 2026ko urtarrilaren 1etik abenduaren 31ra bitarteko aldian.

Hona hemen lortu nahi diren helburuak:

–Adinekoen gaitasunak eta trebetasunak indartzea, zahartze ona lortzeko eta mendekotasun-egoerei aurrea hartzeko.

–Elkartegintza sendotzea parte-hartzearen bidez eta adinekoen elkarteek eta/edo erretiratuen klubek antolatzen dituzten jarduerak eginez.

–Elkartasunaren eta aniztasunarekiko errespetuaren balioen garapena sustatzea.

–Prestakuntza-jarduerak eta hazkunde pertsonalekoak indartzea prestakuntza-jarduera horiek egiten dituzten adinekoentzat.

–Adinekoen ongizate fisikoan, ongizate psikikoan eta gizarte-ongizatean eragin positiboa duten jarduerak sustatzea.

–Jarduera fisikoa eta kirol-jarduera sustatzea, baita aisialdiko eta astialdiko sormenezko jarduerak ere.

1.2. Programa diruz lagungarriak.

Foru-agindu honen ondorioetarako, diruz lagungarriak izanen dira xedetzat autonomia sustatzea eta mendekotasunari aurrea hartzea duten programak, arlo hauetan egiten direnak:

1.2.1. Parte-hartzea eta gizarte-ekintza.

Adinekoek gizarte-ekintzarako ahalmen handia dute, baita gizartearentzat positiboak diren ekarpenak egitekoa ere. Parte-hartzeak esan nahi du espazio batzuk sortu behar direla erabakiak batera hartu ahal izateko eta behar dutenei laguntza ematea sustatzeko.

Jarduketa hauek bultzatuko dira:

–Adinekoen elkartegintza-mugimenduari laguntzea, eta horretarako funtzionamendu-gastuak finantzatuko dira elkarteak abian jartzen direnean.

–Adineko pertsonei laguntzeko eta konpainia egiteko boluntariotza-programak sustatzea, adinekoen elkarteek berek egiten badituzte. Besteak beste, programa hauen alde eginen da: bakarrik bizi diren adinekoentzako laguntza, jantokietako laguntza, gaixoak bisitatzea...

–Belaunaldien arteko harremanetarako programak antolatzea, talentuak, baliabideak eta elkarrenganako babesa partekatu ditzaten, eta, horrela, hala gazteentzat nola adinekoentzat mesedegarriak izan daitezkeen jarduerak sortzea. Honako hauek dira azpimarragarriak: hezkuntzarako laguntza, lehengo istorioak, bide-hezkuntza...

–Aisialdiko eta astialdiko programak egitea: mahai-jokoak, txangoak...

1.2.2. Prestakuntza eta ikaskuntza.

Asmoa da adinekoen ikaskuntzaren jarraipena eta garapen pertsonala eta soziala sustatzea, beren gaitasunei eutsi diezaieten, bai bizitza pertsonalean, bai gizartearekiko konpromisoan. Era berean, prestatzaile gisa duten zeregina bultzatuko da, ezagutza eta bizi-esperientzia ugari biltzen baitituzte. Besteak beste, jarduketa hauek sustatuko dira:

–Kolektiboaren interesekin bat datozen ikastaroak antolatzea: hizkuntzak, historiaren ezagutza, margolaritza, zur-lanketa, argazkigintza, antzerkia, sukaldaritza, lorezaintza...

–Musika-arloko prestakuntza eta praktika: kantua, instrumentuetan trebatzea, rondalla, koruak...

–Kultur jarduerak antolatzea: irakurle taldeak, bisita kulturalak, belaunaldien arteko jarduera eta jardunaldiak, erakusketak eta aste soziokulturalak antolatzea.

1.2.3. Bizimodu osasungarrien sustapena.

Bizimoduak oso garrantzitsuak dira zahartze aktiboari eta osasungarriari dagokionez, eta erabakigarriak, gaitasun funtzionalak bizitzan zehar izanen duen bilakaerari begira. Besteak beste, ekintza hauek garatuko dira:

–Adinekoen artean bizimodu osasungarriak sustatzea:

• Elikadura osasungarriari buruzko lantegiak.
• Oinak nola zaindu: Podologia.

–Solasaldiak eta hitzaldiak egitea honako hauei buruz:

• Norbera zaintzea.
• Babesa eta defentsa.
• Erorikoak prebenitzea.
• Ingurumena babestu eta zaintzea.
• Adinekoen sexualitatea.
• Sexualitate-harreman mota desberdinak.

–Adineko pertsonen artean ariketa fisikoa sustatzea: mantentzeko gimnastika, pilatesa, tai jia, uretako gimnastika, mendi-ibiliak, mendi-igoerak, psikomotrizitatea, yoga, dantza...

–Gaitasun kognitiboa eta zaintza emozionala estimulatzeko eta hobetzeko jarduerak sustatzea, honako gai hauei buruzko lantegiak eginez: estimulazio kognitiboa eta memoria, erlaxazioa, meditazioa, yoga, garun-entrenamendua, adimen emozionala, barreterapia...

1.2.4. Besteak eta norbera zaintzea bultzatzea.

Gaur egun ere, genero-rolak direla-eta, emakumeei esleitzen zaizkie oraindik zaintzari lotutako egitekoak, eta zaintza informala adineko emakumeen esku uzten da maiz. Bizi-kalitatea hobetzeko, zaintzaren inpaktu fisikoa eta emozionala murrizteko eta zaintza pertsonala errazteko hainbat ekintza bultzatu nahi dira. Zaintza-eskolak eta zaintzaileei laguntzeko taldeak izan daitezke, besteak beste.

1.2.5. Informazio eta komunikazio soziala.

Adinekoek eskuratzeko moduan jarri nahi da askotariko zerbitzu eta baliabide komunitarioen informazio digitala, alegia, horretara jotzeko bidea erraztu nahi zaie. Halaber, adinekoekiko berdintasun- eta errespetu-printzipioak bultzatzea da asmoa. Izan ere, eten digitala gero eta txikiagoa izan dadin lagundu nahi da, honako gai hauen inguruko lantegi informatikoak antolatuta:

–Administrazioarekiko harreman telematikoa. Eskaerak izapidetzea, hitzordua eskatzea medikuarekin edo Ogasunean...

–Harreman telematikorako tresnak: posta elektronikoa, web-orriak, argibide eta albiste digitalak, sare sozialak.

–Mugikorra edo tableta erabiltzea. Aplikazio interesgarriak erabiltzea, bankuarekiko harreman telematikoa, Internet bidezko erosketak.

Jarduera horietarako dirulaguntza eskatzen ahalko da, bakar-bakarrik, 2.1 oinarrian ezarritako baldintzak betetzen dituzten bazkideentzat.

Halaber, deialdi honen xedea da adinekoen arloko boluntariotza-programak diruz laguntzea, hain zuzen ere gizarte-ekimenekoak eta gizarte-zerbitzuen esparrukoak diren boluntarioen entitateek egiten dituztenak.

Jarduketak diruz laguntzeko, honako hauek hartuko dira kontuan:

–Adinekoen bakardadea eta isolamendu soziala murrizteko programak.

–Adinekoen premia espezifikoak asetzera bideratutako programak, zuzeneko babesaren edo laguntzaren bidez, adibidez:

• Laguntza eta sostengua norberaren kudeaketetan.
• Eriei bisitak egitea, jantokietako laguntza, hezkuntza-laguntza.
• Elikagaiak, liburuak, jostailuak eta abar biltzea, kudeatzea eta banatzea.
• Boluntarioen prestakuntza.

1.3. Modalitateak.

Deialdi honen ondorioetarako, dirulaguntzen bi modalitate ezartzen dira:

a) Programa globala, klubena, adinekoen elkarteena eta elkarteen federazioena.

b) Boluntariotza-programa, adinekoen arloan diharduten gizarte-zerbitzuen esparruko entitateentzat.

2.–Entitate onuradunak.

2.1. Klubak, adinekoen elkarteak eta elkarteen federazioak.

Klubak, adinekoen elkarteak eta federazioak dirulaguntza hauen onuradun izaten ahalko dira, baldin eta irabazi-asmorik gabekoak badira, helbidea edo lurralde-ordezkaritza Nafarroako Foru Komunitatean badute, eta beren estatutuen arabera helburutzat badute adinekoen arloan eta ez bestetan esku hartzea, asoziazionismoaren oinarrizko jarduerak garatuz eta autonomia pertsonala sustatzera eta mendekotasuna prebenitzera bideratutako jarduerak eginez. Entitate horiek "Programa globala" modalitatean (II. eranskina) parte hartuko dute.

Entitate horiek honako hauek hartzen ahalko dituzte dirulaguntzaren xedeko bazkidetzat: 65 urtetik gorako pertsonak, erretiro aurreratua duten pentsiodunak, baliaezintasunaren eta alarguntzearen ondoriozko pentsiodunak eta haien ezkontide edo izatezko bikotekideak, baldin eta azken horiek lanean ez badaude.

2.2. Boluntarioen entitateak.

Gizarte-zerbitzuen esparruan aritzen diren eta adinekoen arloan boluntariotza-programa bat egiten duten gizarte-ekimeneko entitateak dira. "Boluntariotza-programa" modalitatean (III. eranskina) parte hartuko dute.

Ezin izanen dira onuradun izan adinekoen egoitzak edo adinekoei ostatua emateko beste baliabide batzuk, adinekoentzako eguneko zentroak eta tokiko administrazio publikoak, ezta horiei lotuta edo horien mende dauden entitate, erakunde edo sozietateak ere.

3.–Entitate eskatzaileek bete beharreko baldintza orokorrak.

Aurkezten diren entitateek betebehar hauek izanen dituzte:

a) Legez eratutako pertsona juridikoa izatea eta dagokion erregistro ofizialean inskribatuta egotea.

b) Sozietatearen helbidea edo lurralde-ordezkaritza Nafarroako Foru Komunitatean izatea. Hori oinarri honen 3.a) apartatuan aipatzen den erregistroko inskripzioaren bidez frogatuko da.

c) Irabazi-asmorik ez edukitzea.

d) Entitatearen estutuetan espresuki agertzea xedetzat duela adinekoei lotuta eta horiei bakar-bakarrik zuzendutako jarduerak prestatzea; honetan salbuespen dira "Boluntariotza-programa" modalitaterako dirulaguntza eskatzen duten boluntarioen entitateak.

e) Estatutuen arabera, boluntarioen entitateen helburuetako bat izan beharko da gizarte-boluntarioei zuzendutako edo lan horri lotutako jarduerak egitea; orobat, boluntariotza-programak egiten dituzten entitateen erroldan inskribaturik egon beharko dute (errolda hori onetsi zen ekintza boluntarioko entitateen errolda onesteko Gizarte Politiketako kontseilariak maiatzaren 13an emandako 306/2014 Foru Aginduaren bidez).

f) Funts berekietatik eta/edo beste dirulaguntza publiko edo pribatu batzuetatik heldu den finantzaketa izatea.

g) Nafarroako Foru Komunitateko Administrazioarekiko eta haren erakunde autonomoekiko zorrak kitatuak izatea, edo, bestela, entitate horiekin ordainketa geroratu edo zatikatzea adostu izana.

h) Dirulaguntzen onuraduna izateko Dirulaguntzei buruzko Foru Legearen 13. artikuluko 2. eta 3. apartatuetan ezarritako gainerako debeku-egoeretan ez egotea.

Eskaerak aurkezteko epea bukatzen den egunean bete beharko dira baldintza guztiak, eta, orobat, diruz laguntzen den jarduerak irauten duen bitartean.

4.–Eskaerak aurkeztea.

4.1. Eskaerak aurkezteko epea eta lekua.

Entitate interesdunek eskaera bat aurkeztu beharko dute, horretarako prestatu diren ereduen araberakoa, eta horri Nafarroako Gobernuko eskabide orokorra erantsiko diote. Ereduak interesdunen eskura egonen dira erakunde beraren web-orrian.

Eskaerak aurkezteko epea 30 egun naturalekoa izanen da, deialdi hau Nafarroako Aldizkari Ofizialean argitaratu eta biharamunetik hasita.

Eskaerak telematikoki aurkeztuko dira, ekainaren 23ko 70/2008 Foru Dekretuaren bidez sortutako eta araututako Erregistro Orokor Elektronikoaren bidez, Nafarroako Gobernuaren Erregistro Orokorrean.

Eskaerak adierazitako epetik kanpo aurkeztuz gero, ez dira onartuko.

Dirulaguntza eskatzeak berekin dakar deialdi hau arautzen duten oinarriak onartzea.

4.2. Entitate eskatzaileek aurkeztu beharreko dokumentazio orokorra, modalitate batean nahiz bestean aurkeztu:

a) Proiektua eta eskaera, non zehaztuko baitira langileak, entitatearen funtzionamendu-gastuak eta 2026an eginen diren jarduerak. Prestatutako ereduak deialdiaren webgunean egonen dira eskuragarri:

–Programa globalaren eskabidea, klubentzat, adinekoen elkarteentzat eta federazioentzat.

–Boluntariotza-programaren eskabidea, boluntarioen entitateentzat.

b) Elkartearen edo entitatearen estatutuen kopiak.

c) Kasuan kasuko erregistroan inskribatu izanaren adierazpena.

d) Dirulaguntzaren eskaera sinatzen duen pertsonaren ordezkaritza frogatzeko agiria eta pertsona horren nortasun-agiri nazionalaren kopia.

e) Entitatearen identifikazio fiskaleko txartela.

f) Zinpeko adierazpena, ordainketak egunean dituzten eta deialdi honen 2.1 apartatua betetzen duten bazkideen benetako kopuruarena.

g) Erantzukizunpeko adierazpena, entitatearen ordezkariak emana, agerrarazten duena ezen ez entitateak, ez administratzaileek edo ordezkariek ez dutela dirulaguntzen onuradun izateko debekurik urratzen. Debeku horiek Dirulaguntzei buruzko Foru Legearen 13. artikuluko 2. eta 3. apartatuetan ageri dira.

h) Ordainketa aurreratua eskatzeko, entitatea ordezkatzen duenaren ziurtagiri bat aurkeztu beharko dute, entitatearen titulartasuneko banku-kontuen kopurua adierazten duena, bai eta banku-ziurtagiri bat ere, banku-kontuetan gaur egun dagoen saldoari buruzkoa. Horretarako, banku elektronikoaren bidez lortutakoak ere onartuko dira.

Boluntarioen entitateen kasuan, III. eranskinaren 4.2 oinarrian aipatutako dokumentazioa aurkeztuko dute. Organo kudeatzaileak baloratuko du ordainketa aurreratua onartzen den ala ez, 10. oinarriaren bigarren puntuan ezarritakoari jarraikiz.

i) Entitatearen ordezkariak sinatutako idazkia, zeinaren bidez baimena ematen baitzaio Administrazioari behar den informazioa eskura dezan, kontsultatzeko ea entitateak egunean dituen indarra duten xedapenek Gizarte Segurantzaren aurrean ezartzen dizkioten betebeharrak.

j) Entitate eskatzaileek gardentasun-betebeharra betetzeko eskatzen zaien informazioa aurkeztuko dute, I. eranskinaren 13. oinarrian arautu bezala.

Bat etorriz Dirulaguntzei buruzko Foru Legearen 13.8 artikuluan eta Administrazio Publikoen Administrazio Prozedura Erkideari buruzko urriaren 1eko 39/2015 Legearen 28. artikuluan xedatutakoarekin, ez dago b), c), d), e) eta f) letretan eskatzen diren agiriak aurkeztu beharrik, baldin eta Foru Komunitateko Administrazioko organoek eman behar badute horien ziurtagiria edo datu horiek jada Administrazioaren esku badaude (dokumentu horietan aldaketarik egon ezean).

4.3. Eskaerako akatsak zuzentzea.

Ez badira eskaerarekin batera nahitaezko agiriak aurkezten, instrukzio-organoak entitate interesdunari eskatuko dio akatsak zuzendu ditzala gehienez ere 10 egun balioduneko epean, eta adieraziko dio eskaera ezetsitzat joko dela akatsak zuzendu ezean. Kasu horretan, espedientea artxibatzeko aginduko da, eta dagokionari jakinaraziko zaio, Administrazio Publikoen Administrazio Prozedura Erkideari buruzko urriaren 1eko 39/2015 Legearen 68. artikuluan ezarritakoarekin bat.

Orobat, instrukzio-organoak noiznahi eskatzen ahalko du deialdia ebazteko beharrezkotzat jotzen duen dokumentazioa edo informazio osagarria, baita behar diren agiriak ere, frogatzeko osorik betetzen direla oinarri hauetan eskatzen diren baldintzak.

5.–Antolaketa, instrukzioa eta ebazpena.

Deialdi honetan aurreikusitakoaren ondorioetarako, dirulaguntzak emateko prozedura antolatu eta instruitzeko eginkizunak Pertsonen Autonomiarako eta Garapenerako Nafarroako Agentziako Programen eta Dirulaguntzen Kudeaketaren Atalari esleitzen zaizkio. Oinarri hauetan "instrukzio-organoa" aipatzen delarik, atal horretaz ari da.

Pertsonen Autonomiarako eta Garapenerako Nafarroako Agentziako zuzendari kudeatzaileak izanen du laguntzak emateko prozedura ebazteko eskumena.

6.–Dirulaguntzak emateko prozedura, baloratzeko arau orokorrak eta lehentasunak.

Deialdi honetan aurreikusten diren dirulaguntzak emateko prozedura norgehiagokako araubidearen bidez tramitatuko da, aurkezten diren eskaerak erkatuz, bat etorriz Dirulaguntzei buruzko Foru Legearen 17.1 artikuluan xedatutakoarekin.

Modalitate bakoitzerako eskaerak aparte baloratu eta ebatziko dira, kasuan kasuko dokumentuetan ezarritako balorazio-irizpideei jarraikiz. Eskaerak baloratzeko eta dirulaguntzak emateko, lehentasun hauek ezarri dira:

Lehenbizi, "Boluntariotza-programa" modalitatea baloratuko da. Modalitate horretako dirulaguntzak ez badira iristen erreserbatutako partidaren guztizkora, soberakin hori "Programa globala" modalitaterako baimendutako zenbatekoari gehituko zaio.

7.–Eskaeren balorazioa eta dirulaguntzaren zenbatekoa esleitzea.

7.1. Eskaeren balorazioa.

1.2 oinarriarekin bat, dirulaguntza zer modalitatetarako eskatzen den, horren arabera baloratuko dira eskaerak.

–Klubak, adinekoen elkarteak eta federazioak. II. eranskinean ageri dira balorazio-irizpideak eta dirulaguntzaren zenbatekoaren esleipena.

–Boluntarioen entitateak. III. eranskinean ageri dira balorazio-irizpideak eta dirulaguntzaren zenbatekoaren esleipena.

7.2. Dirulaguntzaren zenbatekoa esleitzea.

Dirulaguntzaren zenbatekoa esleitzeko, aintzat hartuko dira modalitate bakoitzerako ezarritako gehieneko dirulaguntza, eskatutako zenbatekoa eta balorazioan lortutako puntuazioa.

Programari onartzen zaion aurrekontua zehazteko, proiektuan sartutako kostu ekonomikoen ebaluazioa eginen da. Aurreikusitako kostuak gainbaloratuta daudela ikusten bada, programaren balorazio ekonomikoa eginen da prezio errealei egokitutako prezioetan, dirulaguntza esleitu aurretik, bat etorriz Dirulaguntzei buruzko Foru Legearen 28.1 artikuluan ezarritakoarekin.

Balorazio ekonomikoaren ondoriozko diru-zenbatekoa, guztira, aurrekontuetan dagoen dirua baino handiagoa bada, kasuan kasuko baremoaren aplikazioaren ondoriozko zenbatekoak hainbanatuko dira modalitate bakoitzean.

8.–Prozeduraren ebazpena, jakinarazpena, publizitatea eta errekurtsoak.

Instrukzio-organoak egindako ebazpen-proposamenak ikusita, Pertsonen Autonomiarako eta Garapenerako Nafarroako Agentziako zuzendari kudeatzaileak dirulaguntzak esleitzeko ebazpena emanen du.

Ebazpenak entitate interesdunei jakinaraziko zaizkie, eta entitate eskatzaileen eskaerak ez onartzeko eta ukatzeko aintzat hartutako oinarriak adieraziko dira, baita dirulaguntza jasotzen duten entitateak ere, lortutako puntuazioarekin batera. Dirulaguntza emanez gero, zehaztuko dira helburua, zenbatekoa, ordaintzeko modua eta dirulaguntza justifikatzeko modua eta epea.

Dirulaguntzak emateko ebazpenak Nafarroako Gobernuaren web-orrian argitaratuko dira. Argitalpen horretan adieraziko dira deialdia, aurrekontuko zer kredituri egozten zaizkion dirulaguntzak, onuradunak, emandako zenbatekoa eta dirulaguntzaren helburua.

Ebatzi eta jakinarazteko epea hiru hilabetekoa izanen da, gehienez ere, eskaerak aurkezteko epea bukatzen denetik hasita. Epe hori bukatuta, entitate interesdunek ulertzen ahalko dute eskaera ezetsi egin dela. Hala ere, Administrazioa beharturik dago ebazpena ematera.

Berariazko edo presuntziozko ebazpenaren aurka gora jotzeko errekurtsoa aurkezten ahalko da, Eskubide Sozialetako, Ekonomia Sozialeko eta Enpleguko kontseilariari zuzendua, bat etorriz Nafarroako Foru Komunitateko Administrazioari eta foru-sektore publiko instituzionalari buruzko martxoaren 11ko 11/2019 Foru Legean eta Administrazio Publikoen Administrazio Prozedura Erkideari buruzko urriaren 1eko 39/2015 Legean xedatutakoarekin.

9.–Bateragarritasuna.

Deialdi honetan aurreikusitako dirulaguntzak bateragarriak dira xede bererako jasotzen den beste edozein laguntzarekin. Hala ere, dirulaguntzen zenbatekoa ezin da inola ere izan, bakarrik edo beste dirulaguntza, laguntza, diru-sarrera edo diruz lagundutako jardueraren berezko baliabide batzuekin batuta, entitate onuradunak egin beharreko jardueraren kostua baino handiagoa.

Dena dela, jarduera horietarako dirulaguntza eskatzea bateraezina izanen da departamentu honek 1.2 oinarri honetan zehaztutako arloetarako emandako beste edozein laguntzarekin.

10.–Dirulaguntzaren ordainketa.

Ordainketa entitate onuradunaren kontuan eginen da, Nafarroako Gobernuaren Diruzaintzan agertzen den horretan. Kontu hori kontsultatu eta, hala badagokio, alda daiteke esteka honetan: https://www.navarra.es/eu/tramiteak/on/-/line/kontuen-eta-ordainketen-kontsulta Bertan sartzeko, ordezkariaren ziurtagiri digitala beharko da. Entitate onuradunak ezin badu bere kontua esteka horretan erregistratu, laguntzaren ordainketa jaso ahal izateko, transferentzia bidez ordaintzeko eskaera bat aurkeztu beharko du, behar den inprimakia helbide honetatik hartuta: https://www.navarra.es/eu/tramiteak/on/-/line/nafarroako-foru-administrazioaren-inprimaki-orokorrak".

Kasu guztietan, dirulaguntza ordaindu ahal izateko, irailaren 11ko 59/2013 Foru Dekretua bete beharko da, haren bidez arautzen baitira Nafarroako Aurrekontu Orokorren kargurako dirulaguntzen onuradunen gardentasun-betebeharrak.

Arau orokor modura, gizarte-ekintzako proiektu edo programak finantzatzera bideratutako dirulaguntzen ordainketa aurreratua eginen zaie irabazi-asmorik gabeko entitateei edota horien federazio edo konfederazioei, baldin eta une jakin batean ez badute diruz lagundutako jarduera gauzatzeko baliabide nahikorik eta inguruabar hori behar adina frogatzen badute, bat etorriz Dirulaguntzei buruzko azaroaren 9ko 11/2005 Foru Legearen 33. artikuluak ezarritakoarekin.

Aurrerakinak ordainketa bakarrean ordainduko dira, dirulaguntza emateko ebazpena sinatzen denean.

Dirulaguntzaren aurrerakinaren beharra frogatu ez duten entitateentzat, ordainketa eginen da jarduera egin dela justifikatu ondoren, bat etorriz Dirulaguntzei buruzko azaroaren 9ko 11/2005 Foru Legearen 32. artikuluan ezarritakoarekin.

11.–Dirulaguntzaren justifikazioa.

Entitateei dirulaguntzaren ordainketa aurreratua egiten bazaie, urte horretako abenduaren 30ean aurkeztu beharko dute, beranduenez, emandako dirulaguntzaren justifikazio ekonomikoa.

Entitateei gastuak justifikatu ondoren ordaintzen bazaie dirulaguntza, urte horretako azaroaren 20an aurkeztu beharko dute, beranduenez, dirulaguntzaren justifikazio ekonomikoa.

11.1. Emandako zenbatekoaren justifikazioak honako agiri hauek izan beharko ditu:

a. Dirulaguntzari egozten zaizkion gastuen zerrenda, justifikazioaren aurkezpen egunera arte gauzatutakoena. Aurkeztuko da sinatutako PDFan eta, gainera, Excelen, kontuen egiaztapena errazteko. Honako hau zehaztuko da: agiri zenbakia, kontzeptua, jaulkitzailea, data eta zenbatekoa. "Programa globalean" sartzen diren gastuen zerrenda bat dago klubentzat, adinekoen elkarteentzat eta federazioentzat, eta beste zerrenda bat, "Boluntariotza-programan" sartzen diren gastuena, boluntarioen entitateentzat.

b. Fakturen eta ordainagirien kopiak, zerrendan deskribatutako gastuei dagozkienak. Egiaztagiri gisa onartuko dira banku-laburpenak, ordainagiriak eta fakturak, eta horietan adierazi beharko dira jaulkitzailearen eta hartzailearen datuak, data, kontzeptua eta prezioa, apirilaren 10eko 23/2013 Foru Dekretuan xedatutakoari jarraikiz, horren bidez onetsi baitzen fakturazio-betebeharrak arautzen dituen erregelamendua. Jardueren fakturetan, adierazi behar dira ikastaroaren ordu kopurua eta orduko prezioa.

Bidaien fakturetan, aldiz, adierazi behar da zenbat eguneko bidaia izan den eta zenbat lagunek parte hartu duten, eta banakatuta egon beharko dira haien barneko kontzeptuen kostuak (autobus kopurua, hotela, bisita gidatuak...).

Iruzur fiskala prebenitzeko eta haren aurka borrokatzeko neurriei buruzko uztailaren 9ko 11/2021 Legeak ezartzen duenez, ez da onartuko eskudirutan ordaindutako 1.000 eurotik gorako fakturarik. Eskudirutan ordaindutako fakturak, zenbateko hori baino gutxiagokoak betiere, onartu ahal izateko, kutxaren egunerokoa aurkeztu beharko da, non irteera-data, enpresa hartzailea eta ordaindu beharreko kontzeptua jasoko baitira.

c. Entitatearen legezko ordezkariaren zinpeko adierazpena, non jasoko baita egotzitako gastuak dirulaguntza honetara baizik ez direla aurkezten.

d. Dirulaguntzaren xedeko ikastaro, bidaia, lantegi edo jarduera bakoitzean izena eman duten pertsonen zerrenda, sexuaren arabera bereizita.

e. Dokumentuak, informazio-kartelak, elkarteko kartela, webguneko anagrama, entitatearen memoria... Izan ere, horietan guztietan Nafarroako Gobernuaren ikur ofiziala agertu beharko da, diruz lagundutako programa eta jardueretan Nafarroako Gobernuaren parte-hartzea zabaltzeko betebeharra betez.

11.2. Azken justifikazioa.

Dirulaguntza eman ondorengo urteko urtarrilean, entitate onuradunak dirulaguntzaren azken justifikazioa eginen du, klubentzat, elkarteentzat eta federazioentzat edo boluntarioen entitateentzat prestatutako ereduarekin bat.

Klubek, adinekoen elkarteek eta federazioek honako agiri hauek aurkeztu beharko dituzte:

a. Entitatearen memoria teknikoa, azalduko dituena 2026. urtean egindako jarduketak eta jarduerak, eta lortutako gogobetetasun-maila. Jardueraren bat ezin izan bada egin, arrazoiak azalduko dira. Memoria teknikoaren eredua lortzeko, eskabidearen inprimaki ofiziala lortzeko bide berberak erabil daitezke. Programa globalaren modalitaterako, "Memoria tekniko eta ekonomikoaren ereduan" zerrenda bat dago "2026an egindako jardueren txostena" adierazteko, eta "Jardueraren fitxa" bana entitateak egindako jarduera bakoitzeko.

b. Entitatearen 2026ko memoria ekonomikoa, non sartuko baitira:

–Guztizko gastuen zerrenda, urtean izandako gastu guztiak adierazita.

–Entitatearen 2026ko emaitzen kontua (diru-sarrerak eta gastuak).

Emaitzen kontu horren goialdean entitatearen izena adieraziko da. Diru-sarreren atalean, entitateak programa globala finantzatzeko jaso dituen diru-sarrera guztiak azaldu beharko ditu, funts horien zenbatekoa eta jatorria zehaztuta, Pertsonen Autonomiarako eta Garapenerako Nafarroako Agentziak emandakoarekin bateragarriak diren dirulaguntzak barne.

Gastuen atalean entitatearen gastu guztiak zehaztuko dira, honela sailkatuta: Langileak, Funtzionamendua eta Jarduerak. Langileak kontratatuz gero, Gizarte Segurantzaren eta PFEZaren gastuak 2027ko urtarrilaren 31ra arte aurkeztea onartzen ahalko da.

Boluntarioen entitateen kasuan, aurkeztu beharreko dokumentazioa da deialdi honen III. eranskineko 4.2 oinarrian adierazitakoa.

Entitateek beste edozein agiri ematen ahalko dute beren proiektua behar bezala ulertzeko.

12.–Entitate onuradunen betebeharrak.

a. Proiektua gauzatzea entitateak eskaeran azaldutako moduan eta dirulaguntza emateko baldintzekin bat, edozein dela modalitatea (programa globalarena edo boluntariotza-programarena).

b. Deialdi honen 11. oinarrian aipatzen diren frogagiriak, erdibidekoak eta azkenekoak, aurkeztea.

c. Betetzea Familia, Gazteria, Kirol eta Gizarte Gaietako kontseilariaren uztailaren 2ko 212/2010 Foru Aginduan xedatutakoa, dirulaguntza honen kargura finantzatutako programen edo jardueren gaineko informazio-, zabalkunde- eta publizitate-jarduketa guztietan.

d. Laguntza ematen duen organoak eta indarra duen antolamendu juridikoaren arabera eskudun diren bestelako organoek egin beharreko egiaztapen-lanak onartzea.

e. Diruz lagundutako jardueraren frogagiriak gordetzea, dokumentu elektronikoak barne, egiaztatze- eta kontrol-lanen xede izan daitezkeen bitartean.

f. Diruz lagundutako jarduera finantzatzeko eskuratu diren bestelako laguntza, diru-sarrera edo baliabideen berri ematea organo emaileari, ahal bezain laster, eta, betiere, jasotako funtsak zertan aplikatu diren justifikatu aurretik.

g. Betetzea kontabilitatean eskatzen ahal zaizkion betebeharrak, entitatearen izaeraren araberakoak.

h. Deialdi honetan eta aplikatzekoa den legerian ezarritako kasuetan, jasotako funtsak itzultzea.

i. Funts berekietatik eta/edo beste dirulaguntza publiko edo pribatu batzuetatik heldu den finantzaketa izatea.

j. Emakumeen eta Gizonen arteko Berdintasunari buruzko apirilaren 4ko 17/2019 Foru Legean xedatutakoarekin bat etorriz, bermatuko da hizkuntza inklusiboa erabiltzen dela programa idazteko eta proposamenak aurkezteko sortzen diren dokumentu eta material guztietan, baita programa hedatu eta gauzatzeko sortzen direnetan ere, eta bermatuko da, halaber, emakumeen eta gizonen arteko berdintasun-balioak, estereotipatu gabeko genero-rolak eta zainketen erantzukidetasuna erakusten dituzten irudiak erabiltzen direla.

k. Dirulaguntzei buruzko azaroaren 9ko 11/2005 Foru Legeak onuradunei ezartzen dizkien gainerako betebeharrak.

13.–Gardentasuna.

Gardentasunari, Informazio Publikoa Eskuratzeari eta Gobernu Onari buruzko maiatzaren 17ko 5/2018 Foru Legearen 3.c) artikuluan aipatutako entitate pribatuak behartuak daude gardentasun-betebeharra betetzera baldin eta, urtebetean, 20.000 eurotik gorako laguntzak edo dirulaguntzak jasotzen badituzte Nafarroako Aurrekontu Orokorren kargura, edo jasotako laguntzak edo dirulaguntzak beren urteko diru-sarrera guztien %20 edo gehiago badira eta, gutxienez, 5.000 euro.

Aurreko atalean ezarritako muga kuantitatiboak gainditzen diren jakiteko, batuko dira Nafarroako Foru Komunitateko Administrazioak edo haren erakunde publikoek urte naturalean emandako dirulaguntza guztien kopuruak. Urte batean baino gehiagotan ordaintzen diren dirulaguntzen kasuan, aurrekontu-ekitaldi bakoitzean emandako kopurua hartuko da kontuan ondorio horietarako, ez guztizko batura. Negozio-zifra honako hauetako txikiena izanen da:

a. Aurreko urteko negozio-zifra.

b. Hala badagokio, dirulaguntza ematen den ekitaldian entitateko organo eskudunak onetsitako negozio-zifra.

Aipatu diren inguruabarrak gertatzeagatik gardentasun-betebeharra duten entitate onuradunek jarraian adierazten den informazioa eman beharko dute hilabeteko epean, dirulaguntza emateko ebazpena jakinarazten denetik zenbatzen hasita:

a. Entitatearen gobernu-, administrazio- eta zuzendaritza-organoen osaera.

b. Organo horiek osatzen dituzten kargudunen zerrenda.

c. Entitateak aurreko urtean kargudun bakoitzari ordaindutako ordainsari gordinak eta gainerako diru-konpentsazioak, kontzeptuz kontzeptu. Sortu berriak diren entitateen kasuan, informazioa izanen da haien aurrekontuetan edo plan ekonomiko-finantzarioan jasotakoa.

d. Entitatearen gobernu, administrazio eta zuzendaritzako eginkizunetan ematen den dedikazioaren araubidea.

e. Entitate onuradunaren azken urteko kontuen kopia.

Informazio hori entitate onuradunaren legezko ordezkariak sinatuta aurkeztuko da, Nafarroako Gobernuaren Erregistro Orokor Elektronikoaren bide telematikoak erabiliz, eta dirulaguntza kudeatzen duen administrazio-unitateari bidaliko zaio.

Entitateak ez badu gardentasun-betebeharra konplitu beharrik, aurreikusitako egoerak gertatzen ez direlako, horren gaineko adierazpena aurkeztu beharko du.

Entitateak dirulaguntza bat baino gehiago jasotzen baditu ekitaldi berean, ez du informazioa errepikatu beharko dirulaguntza bakoitzerako, salbu eta hasieran eman zituen datuak aldatu badira. Horretarako, entitateak adierazi beharko du Foru Komunitateko Administrazioaren zein organoren aurrean aurkeztu zuen, eta noiz.

Betebehar hori bete ezean, emandako dirulaguntza ez da ordainduko, ezta aurrerakinak ere, eta kobratutako zenbatekoak itzuli egin beharko dira, Dirulaguntzei buruzko azaroaren 9ko 11/2005 Foru Legearen 35.1.c) artikuluan ezarritakoari jarraikiz.

Aurrekoa galarazi gabe, onuradun guztiak behartuak daude unitate kudeatzaileari behar den informazio guztia ematera, aurretiazko errekerimendua eginda eta hamar eguneko epean, hark bete ahal ditzan Gardentasunari, Informazio Publikoa Eskuratzeari eta Gobernu Onari buruzko maiatzaren 17ko 5/2018 Foru Legearen II. tituluan ezarritako gardentasun-betebeharrak.

Errekerimenduan emandako epea bukatzen bada eskatutakoa bete gabe, hertsapen-isunak ezartzea erabakitzen ahalko da, 500 eurotik 5.000 eurora bitartekoak, interesdunari ohartarazpena egin ondoren eta entzunaldia emanda. Isuna hamabost egunetik behin errepikatuko da, errekerimendua bete arte. Isunaren zenbateko osoa ez da izanen dirulaguntzaren zenbatekoaren ehuneko bost baino handiagoa. Zenbatekoa zehazteko, ez-betetzearen astuntasuna eta proportzionaltasunaren printzipioa hartuko dira kontuan.

14.–Azpikontratazioa eta entitate hornitzaileen kontratazioa.

14.1. Azpikontratazioa.

Deialdi honetan aurreikusitako ondorioetarako, bidezkoa da azpikontratatzea, alegia, beste batzuekin hitzarmen bat sinatzea, haiek gauzatu dezaten, hein batean, dirulaguntzaren xede den jarduera. Entitate onuradunak berak egiten badu diruz lagundutako jarduera, horretarako behar diren gastuen kontratazioa kontzeptu honetatik kanpo geldituko da.

Entitateek, gehienez ere, diruz lagundutako jardueraren zenbatekoaren %50 azpikontrata dezakete. Hirugarrenekin hitzartutako jarduerak dirulaguntzaren zenbatekoaren %20 gainditzen badu eta zenbateko hori 60.000 eurotik gorakoa bada, idatzizko kontratuaren bidez egin beharko da azpikontratazioa.

14.2. Entitate hornitzaileen kontratazioa.

Dirulaguntzei buruzko Foru Legearen 28.3 artikuluan xedatutakoarekin bat, zerbitzuak aholkularitza- edo laguntza-enpresek ematen badituzte eta gastu diruz lagungarrien zenbatekoa 12.000 eurokoa baino handiagoa bada, onuradunak frogatu beharko du, dirulaguntza ematen duen organoaren aurrean, hornitzailea efizientzia- eta ekonomia-irizpideei jarraikiz hautatu dela.

Kasu horietan, entitate onuradunak helburua lortzeko gai diren hiru enpresarekin edo gehiagorekin kontsultatu eta negoziatu beharko ditu kontratuaren baldintzak, eta eskaintzarik hoberena egiten duenarekin sinatuko du. Entitate onuradunak gorde egin beharko ditu kontsulta-tramitearen gaineko dokumentazioa eta eskaintzak. Kontu horiek agiri bidez frogatu beharko ditu dirulaguntza ematen duen organoaren aurrean, kontratua sinatu bezain laster. Agiri horiekin batera, egindako hautapenaren arrazoiei buruzko txosten labur bat aurkeztuko da.

Ez da beharrezkoa izanen enpresa bati baino gehiagori kontsulta egitea baldin eta, gastu diruz lagungarrien ezaugarri bereziengatik, behar adina ez badira merkatuan hornidura edo zerbitzu hori egiten duten enpresak.

15.–Baldintzak aldatzea.

Entitate onuradunek, jasotzen dituzten bestelako dirulaguntza, laguntza edo diru-sarrerez gain, dirulaguntza emateko eta haren zenbatekoa zehazteko kontuan hartutako inguruabarretan gertatzen diren aldaketa guztiak ere jakinarazi beharko dizkiote Pertsonen Autonomiarako eta Garapenerako Agentziari.

Dirulaguntza jasotzen duten entitateek baimena eskatu beharko dute, salbuespen gisa, diruz lagundutako oinarrizko jarduketen edo programen edukia aldatzeko, baita horiek gauzatzeko modua eta epeak aldatzeko ere, kasu hauetan:

a. Oinarrizko jarduketen edo programaren garapena aldatzen edo zailtzen duten inguruabarrak agertzen direnean.

b. Baliabideak egoki erabiltzearen ondorioz, diruz laguntzen den jarduerari aplikatu gabeko gerakinak daudenean eta gerakin horiek laguntza jasotzen duen proiektuko jarduerak handitzeko erabili nahi direnean.

Programa aldatzeko eskaeretan, eman beharko dira aldaketa edo zailtasun horren inguruko behar adina arrazoi, eta inguruabar horiek adierazi beharko dira gertatu eta berehala, eta, betiere, diruz lagundutako oinarrizko jarduketak edo programak egiteko epea bukatu baino lehen.

Dirulaguntza emateko kontuan hartutako baldintzetan egiten den edozein aldaketak ekar dezake dirulaguntza emateko ebazpena aldatzea, nahiz eta hura onartu Pertsonen Autonomiarako eta Garapenerako Nafarroako Agentziak, edo eskatzen ahalko da zenbatekoa itzultzeko, hala badagokio.

16.–Itzulketak eta ez-betetzeak.

Hartutako zenbatekoa itzuli beharko da, osorik edo partez, baldin programa gauzatzen ez bada, betetzen ez badira dirulaguntza emateko ezarritako baldintzak, gertatzen badira Dirulaguntzei buruzko Foru Legearen 35. artikuluan aipatzen diren zergatikoak edo betetzen ez badira deialdi honetan berariaz aipatzen diren betebeharrak.

Legez ezarritako kasuetan, gainera, bidezkoa izanen da berandutze-interesak ordaindu daitezela eskatzea; hain zuzen, dirulaguntza ordaindu zenetik itzuli beharraren gaineko ebazpena ematen den arte sortutakoak.

Dirua itzultzea eskatzeko prozedurak aipatutako artikuluan xedatutakoari jarraituko dio, eta hasten denetik 12 hilabeteko epean ebatzi beharko da.

Dena dela, entitateak bere borondatez eskatzen ahalko du justifikatu gabeko dirulaguntzaren zenbatekoaren itzulketa. Horretarako, frogagiri bat aurkeztu beharko du erakusteko diru-sarrera bat egin dela Eskubide Sozialetako, Ekonomia Sozialeko eta Enpleguko Departamentuaren alde, aldez aurretik ordaindutako zenbatekoaren eta justifikatutako zenbatekoaren arteko aldea adinakoa. Kasu horretan, ez da berandutze-interesik aplikatuko, eta ulertuko da entitateak espresuki uko egiten diola itzultzen duen zenbatekoari.

Orobat, entitate onuradunak ia betebehar guztiak betetzen dituenean eta bere eginbeharrak betetzeko jarrera garbia erakusten duenean, proportzionaltasun-printzipioari jarraituz zehaztuko da itzuli edo ordaindu beharreko zenbatekoa, ikusita zenbat eta noraino bete diren dirulaguntza emateko ezarritako baldintzak. Ez-betetzeak mailakatuko dira Dirulaguntzei buruzko azaroaren 9ko 11/2005 Foru Legearen 14.1.p) artikuluaren arabera.

Justifikatzeko epeak –partzialak nahiz amaierakoak– igarotzen badira dagokion dokumentazioa aurkeztu gabe, eta dokumentazio hori epe hori iragan ondoko 5 egunen barnean aurkezten bada, atzerapen hori zigortuko da emandako dirulaguntzaren zenbatekoa %5 murriztuz. Atzerapeneko seigarren egunetik aurrera, penalizazioa %1 handituko da igarotzen den egun bakoitzeko, 15 egunera arte gehienez ere. Hamaseigarren egunetik aurrera, galdu eginen da dirulaguntzaren zenbatekoa jasotzeko eskubidea.

17.–Arau-hausteak eta zehapenak.

Deialdi honetan aurreikusitako dirulaguntzen onuradun diren entitateei aplikatuko zaie Dirulaguntzei buruzko Foru Legearen 42. artikuluan eta hurrengoetan ezarritako zehapen-araubidea, dirulaguntzen arloko arau-hauste administratiboei dagokienez, eta izanen dituzte bertan ezarritako erantzukizunak.

Dirulaguntzen arloko zehapenak erregelamendu bidez finkatzen den prozeduraren arabera ezarriko dira, edo, halakorik izan ezean, Nafarroako Foru Komunitateko Administrazioari eta foru-sektore publiko instituzionalari buruzko martxoaren 11ko 11/2019 Foru Legean xedatutakoari jarraikiz.

18.–Deialdiaren eta oinarri arautzaileen aurka bidezkoak diren errekurtso administratiboak.

Deialdi honen eta oinarri arautzaileen kontra bidezkoa da gora jotzeko errekurtsoa aurkeztea, Nafarroako Gobernuari zuzendua, argitaratu eta biharamunetik hilabeteko epean, bat etorriz Administrazio Publikoen Administrazio Prozedura Erkideari buruzko urriaren 1eko 39/2015 Legean xedatutakoarekin.

19.–Aplikatu beharreko araudia.

Oinarri arautzaile hauetan ezarritakoaz gain, Dirulaguntzei buruzko azaroaren 9ko 11/2005 Foru Legearen xedapenak aplikatuko dira.

II. ERANSKINA.–"Programa globala" modalitatearen berariazko oinarriak 2026. urterako. Modalitate hau adinekoen arloko gizarte-ekimeneko entitateei zuzenduta dago

1.–Xedea.

Oinarri hauen xedea da behar den araubidea ezartzea adinekoen arloko gizarte-ekimeneko entitateei dirulaguntzak emateko 2026. urtean.

Ulertzen da entitate batek programa global bat garatzen duela zahartze aktiboa sustatzera bideratutako jarduerak abiarazten dituenean, kontzeptu hauek barnean hartuta: funtzionamendua, langileak eta/edo jarduerak.

Funtzionamenduaren kontzeptuaren barnean, entitateak elkartearen egoitza irekita edukitzeko egiten dituen gastuak sartzen dira (ur-hornidura, berokuntza, argia, konponketak, material suntsigarria, aseguruak...). Era berean, zerbitzuak kontratatzearen ondoriozko gastuak sartzen dira: aholkularitza, kontabilitatea, garbiketa...

Langileen kontzeptuaren barnean, elkartearen funtzionamendurako beharrezkoak diren langileak kontratatzeko gastuak sartzen dira. Langile horiek Gizarte Segurantzan kotizatu beharko dute jarduera horregatik.

Jardueren kontzeptuaren barnean sartzen dira dirulaguntza-eskaeran adierazitako jarduerak egitearen ondoriozko gastuak, 1.2 oinarrian ezarritakoaren barruan. Programa diruz lagungarriak, I. eranskinekoak:

–Ikastaroak: harreman telematikoa administrazioarekin eta bankuekin, kudeaketak kutxazainetan eta web-orrietan...

–Kultur jarduerak: antzerki-lantegiak, irakurle-kluba, bisita gidatuak, abesbatzak, errondailak...

–Lehiaketak: poesia, literatur lehiaketak, lehiaketa gastronomikoak...

–Belaunaldien arteko jarduerak.

–Hitzaldiak: nork bere burua zaintzea, babestea eta defendatzea, erorikoak prebenitzea, elikadura osasungarria, adinekoen sexualitatea, sexualitate mota desberdinak...

–Hitzaldiak.

–Podologia: podologiako profesionalek emana.

–Fisioterapia: fisioterapiako profesionalek emana.

–Jarduera fisikoak: mendi-ibiliak, mendi-igoerak, tai jia, pilatesa, ibilketa nordikoa, gimnastika, ariketak uretan, dantzak...

–Lantegiak: memoria, gaitasun kognitiboak mantentzea, hizkuntzak, sukaldaritza, margolaritza, eskulanak, musika-tresnak eta kantua...

–Boluntariotza jarduerak: jantoki sozialetan laguntzea, gaixo daudenei sostengua ematea, boluntarioen prestakuntza...

–Mahai-jokoak: xakea, kartak; beste joko batzuk, hala nola petanka...

–Kultura edo kirola xede duten egun bateko txangoak, gehienez ere bost. Onartuko da egun bateko txangoak estatutik kanpo egitea.

–Gehienez 6 gauko bidaia bat, estatuko lurraldearen barnean.

–Sustapen-jarduerak gizarte-informazioaren eta -komunikazioaren arloan.

Dirulaguntza horien bidez, asoziazionismoaren garapena sustatu eta bultzatu nahi da, baita xedeko kolektiboaren beharrak asetzera bideratutako jardueren eta jarduketen garapena ere. Horrela, adinekoak beren ingurunean egotea sustatzen da, bizi-kalitate onarekin, eta indartzen dira zahartze aktiboa eta bizitza independentea.

2.–Berariazko baldintzak.

2.1. Programa globalaren modalitatean egiten den jarduera berariazkoak bat etorri beharko du deialdiaren xedearekin, zeina adierazita baitago deialdia onesten duen foru-aginduaren testuan eta deialdi honen II. eranskineko 1. oinarrian.

2.2. Modalitate honetako dirulaguntza jaso ahal izateko, entitateek deialdi honen I. eranskineko 3. oinarrian ezarritako betebehar orokorrak bete beharko dituzte.

3.–Entitateak aurkeztu beharreko dokumentazio orokorra eta berariazkoa.

Dokumentazio orokorra da deialdi honen I. eranskinaren 4. oinarri arautzailearen 4.2 atalean ezarritakoa.

Entitate horiek eskaera aurkeztuko dute "Programa globalaren eskabidea" izeneko eredu ofizialaren arabera. Programarekin batera, entitatearen diru-sarreren eta gastuen aurrekontua aurkeztuko dute, baita dirulaguntzaren xede den programaren diru-sarreren eta gastuen aurrekontua ere.

4.–Programa globalaren balorazioa.

Modalitate honetan aurkezten diren eskaeren balorazioa bereizita eginen da adierazitako kontzeptu bakoitzerako: langileak, funtzionamendua, jarduerak.

4.1. Langileak: kontzeptu hau baloratuko da elkarteak administrariak, atezainak edo garbitzaileak kontratatzen dituenean, baldin eta Gizarte Segurantzan kotizatzen badute. Elkarteak adierazi beharko du langile bakoitzak urtean egiten duen ordu kopurua. Diruz lagunduko da, gehienez ere, lanaldi oso bati dagokion zenbatekoa, kasuan kasuko hitzarmen kolektiboarekin bat datorrena. Ez da dirulaguntzarik emanen tabernako langileentzat.

Entitateak zenbat bazkide dituen aintzat hartuta, portzentaje hauek aplikatuko zaizkio kontzeptu horretarako aurkeztutako gastu-aurrekontuari:

4.2. Funtzionamendua: kontzeptu honetarako behar den laguntza baloratzeko, bi aldagai hartuko dira aintzat: entitateak zenbat bazkide dituen eta entitatearen egoitza dagoen lokalaren ezaugarriak eta gastuak.

Lehenik, ikusiko da elkarte, klub edo federazioak zenbat bazkide dituen, kuota ordaindua dutenak, eta taula honen arabera emanen zaizkio puntuak:

Era berean, elkarteak deskribatzen dituen inguruabarren araberako puntuazioa emanen da, nolako lokala duen eta haren funtzionamenduaren ondoriozko gastuak aintzat hartuta:

Bi puntuazioak bilduta, kontzeptu honetarako aurkeztutako gastuaren gaineko portzentaje bat emanen da:

4.3. Jarduerak: adinekoen klub, elkarte edo federazio bakoitzak proposatutako jarduera guztiak baloratuko dira, osotara. Puntuazioa ateratzeko, irizpide hauek erabiliko dira:

a) Programaren izaera (30 puntu gehienez). Klub, elkarte edo federazio bakoitzak aurkeztutako jarduera kopurua baloratuko da, bazkide kopuruaren arabera, balorazio-taula honen arabera:

b) Programetako parte-hartzea (20 puntu gehienez). Jardueretan parte hartzen dutenen portzentajea baloratuko da, bazkide kopuruarekin alderatuta. Oro har, jarduera bakoitzeko parte-hartzaileen kopurua ezin da izan entitateko bazkide guztien kopurua baino gehiago. Eskala honekin bat eginen da parte-hartzeari buruzko balorazioa:

c) Kofinantzaketa (10 puntu gehienez). Kofinantzaketatzat jotzen da entitateak, bazkideek eta/edo erabiltzaileek diru-ekarpenak egitea. Kofinantzaketa honako eskalarekin bat baloratuko da:

d) Kaudimen tekniko eta ekonomikoa (15 puntu gehienez). Kaudimen tekniko eta ekonomikotzat jotzen da hasiera batean aurreikusitako programa behar besteko zehaztasunarekin eta zorroztasunarekin programatzeko eta gauzatzeko gaitasuna.

e) Programaren interesa (20 puntu gehienez). Zenbat eta askotarikoagoak izan programan proposatutako jarduerak, orduan eta puntuazio handiagoa emanen da:

f) Eragina lurraldean (5 puntu gehienez). Kontuan hartuko da entitateak duen gaitasuna programa Foru Komunitateko hainbat herritan gauzatzeko. Entitateak egoitza duen herrian ez beste batzuetan gauzatzen badu programa, 5 puntu eskuratuko ditu; bestela, ez du punturik lortuko.

Entitate bakoitzaren jardueren programa baloratutakoan gehieneko dirulaguntza bat esleituko da, eskuratutako puntuen araberakoa, eta honako portzentaje hauekin bat:

5.–Kontzeptu diruz lagungarriak.

Aurrekontuak aztertu eta baloratzeko, muga hauek ezarriko dira:

a) Langileria. Honako kostu hauek onartuko dira langileen gastutzat:

–Garbiketa- edo atezaintza-zerbitzuak 50 bazkide baino gehiagoko entitateentzat izanen dira diruz lagungarriak.

–Administrariak 500 bazkide baino gehiagoko entitateentzat izanen dira diruz lagungarriak.

Hona hemen onartuko den gehieneko aurrekontua, lanaldi osorako kontratatutako langileen lanbide-kategorien arabera:

–Administrariak: 15.681,32 euro urtean.

–Atezainak, garbitzaileak: 13.985,85 euro urtean.

Entitate bakoitzari, gehienez ere, bi lanbide-kategoriatako lanaldi oso bati dagokiona ordainduko zaio, eta kontzeptu horrengatiko gehieneko dirulaguntza, betiere, 23.533,05 eurokoa izanen da urtean.

Langileek Gizarte Segurantzaren Araubidean alta emanda eta kotizatzen egon behar dute emandako dirulaguntzaren aldiak iraun bitartean.

b) Funtzionamendua. Honako hauek onartuko dira funtzionamenduaren gastutzat:

–Entitatearen egoitza dagoen lokaleko argindarraren, uraren, hondakinen eta berokuntzaren hornidura-gastuak. Kontzeptu horien balorazioa kalkulatzeko, aurreko urtean gauzatutako gastuak hartuko dira kontuan.

–Entitatearen egoitzaren lokalaren kontribuzio-gastuak.

–Posta gastuak; onartuko den aurrekontua, gehienez: 270 euro urtean.

–Telefono eta Internet gastuak, baita estimulazio kognitiborako programa informatikoen harpidetzak ere. Kontzeptu horretarako onartuko den aurrekontua, gehienez: 1.000 euro urtean.

–Bulegoko materialen eta material informatikoaren gastuak. Onartuko den aurrekontua: 1.500 euro urtean.

–Garbiketa- eta burdineria-produktuetarako gastuak. Kontzeptu horretarako onartutako aurrekontua: 700 euro urtean.

–Garbiketa-zerbitzuak kontratatzeko gastuak. Onartuko den aurrekontua: 9.500 euro urtean.

–Administrazio-zerbitzuak kontratatzeko gastuak. Kontzeptu honen kontura, 500 bazkide baino gehiagoko elkarteentzat onartuko den aurrekontua 4.800 eurokoa izanen da urtean.

–Prentsa-gastuak eta bestelako harpidetzak. Kontzeptu horretarako onartutako aurrekontua, gehienez: 600 euro urtean.

–Kilometro-ordainaren, aparkalekuen eta bidesarien gastuak, zenbait herri biltzen dituzten entitateentzat. Kontzeptu horretarako onartutako aurrekontua, gehienez: 1.300 euro urtean. Kontzeptu horrengatiko gastuak onartuko zaizkie, orobat, Adinekoen Kontseiluko kideei, zehazki, Iruñerritik kanpokoak direnei, beren karguaren eginkizunak betetzeko behar diren bileretara Kontseiluaren ordezkari gisa joateko egindakoak. Joan-etorrien gastuek adierazi beharko dute noiz eta zer ordutan egin ziren, abiaburua eta helmuga, egindako kilometroak (Michelin gidaren edo Google Mapsen arabera), eta bidaiaren xedea. Onartzen diren zenbatekoak kalkulatuko dira egiten den kilometro bakoitzeko Nafarroako Gobernuak aplikatzen duen zenbatekoa oinarri hartuta.

–Entitatearen egoitza dagoen lokalaren alokairuko gastuak; dirulaguntza, gehienez: 6.500 euro urtean. Atal honetan kontuan hartuko da, halaber, areto egokirik ez duten entitateek jardueraren bat egiteko areto bat alokatzea, eta gehieneko dirulaguntza 500 eurokoa izanen da urtean.

–Kudeaketa- eta/edo aholkularitza-gastuak. Onartutako aurrekontua: 1.200 euro urtean.

–Aseguru-gastuak. Kontzeptu horretarako onartutako aurrekontua: 675 euro urtean. Salbuespen gisa, 501 bazkidetik gora dauzkaten entitateen kasuan, erantzukizun zibileko aseguruaren gastua edo entitatearen egoitzaren lokalaren aseguruarena onartuko da, 2.160 euroko gehieneko aurrekontuarekin. Aire zabalean nolabaiteko arriskuko jarduera fisikoak egiten dituzten entitateen kasuan, istripurako aseguru-gastu bat onartuko da, 3.000 euroko gehieneko aurrekontuarekin.

–Konponketen eta mantentze-lanen gastuak. Onartutako aurrekontua: 2.600 euro urtean. Entitate batek obra edo konponketaren bat egin behar duenean lokaletan oztopo arkitektonikoak kentzeko, kontzeptu horrek sortutako gastuak direla-eta beharrezkoa izanen da amortizazio-plan bat aurkeztea eta unitate kudeatzaileak onestea, eta kontzeptu horrengatik urteko 2.100 euroko aurrekontua onartuko da.

–Igogailuaren mantentze-lanen gastuak. Onartutako aurrekontua: 1.200 euro urtean.

–Bankuko gastuak. Onartutako aurrekontua: 1.000 euro urtean. Kontzeptu horretan ez dira sartzen interes zordunak, errekarguak eta zehapenak.

–Entitatearen administraziorako beharrezkoak diren ekipo informatikoen amortizazio-gastuak. Kontzeptu horrengatik urteko 350 euroko aurrekontua onartuko da aurreko deialdietan onartu diren amortizazio-planetarako, haien amortizazioa amaitu ez bada.

–Ekipo informatikoak erosteko gastuak; gehieneko aurrekontua: 1.000 euro. Justifikatutako arrazoirik ez badago, ezin izanen da ekipo informatiko mota bera erosteko laguntzarik eskatu harik eta aurreko ekipoa eskatu zenetik 3 urte igaro arte.

–Altzariak/etxetresna elektrikoak ordezteko gastuak; gehieneko aurrekontua: 1.000 euro urtean.

–Kirol-jarduera egiteko gailuak erosteko gastuak; gehieneko aurrekontua: 400 euro urtean. Mendi-ibiliak egiteko GPS produktuak, aire zabaleko jarduera fisikoetan beharrezkoak direnak, amortizatzeko gastuak onartuko dira. Horretarako, beharrezkoa izanen da amortizazio-plan bat aurkeztea eta unitate kudeatzaileak onestea. Urtean 350 euroko aurrekontua onartuko da.

c) Jarduerak. Honako hauek onartuko dira jardueren gastutzat:

–Kultur ikastaro eta jarduerak:

• Ikastaroak (musika ikastea, zur-lanketa, joskintza, lorezaintza, sukaldaritza, margolaritza, antzerkia...). Onartutako aurrekontua: gehienez 50 euro profesional bakoitzak emandako ordu bakoitzeko, eta urtean 80 ordu gehienez; ikastaro bakoitzak gutxienez 6 parte-hartzaile izan behar ditu.
• Denbora luzez garatzen diren kultur jarduerak (abesbatzak, rondallak, literatura-solasaldiak...). Onartutako aurrekontua: gehienez 50 euro profesional bakoitzak emandako ordu bakoitzeko, eta urtean 80 ordu gehienez.
• Aste soziokulturalak edo belaunaldien arteko jarduerak. Onartutako aurrekontua: gehienez 300 euro.
• Bisita kulturalak: gehienez 10 euroko aurrekontua onartzen da parte-hartzaile bakoitzeko, eta gehieneko aurrekontua 1.000 eurokoa izanen da urtean.
• Erakusketa, emanaldi, lehiaketa, eta gisa horretako ekintzen bidez egiten diren jarduerak. Onartutako aurrekontua: gehienez 200 euro jarduera bakoitzeko.

–Solasaldiak eta hitzaldiak. Onartutako aurrekontua: gehienez 150 euro emandako solasaldi bakoitzeko. Ez dira onartuko hizlariei opariak erosteko egindako gastuak.

–Podologia: egozten ahal den gehieneko aurrekontua entitatearen bazkide kopuruaren araberakoa izanen da, hurrengo taulan adierazten den moduan. Podologia-zerbitzua bazkideen herrietan eskaintzen duten federazioek 3.000 euro egozten ahalko dizkiote urtean gastu horri.

–Fisioterapeutek emandako masajeen gastuak. Onartutako aurrekontua: gehienez 800 euro urtean.

–Jarduera fisikoak. Onartutako aurrekontua: gehienez 50 euro profesional bakoitzak emandako ordu bakoitzeko, eta urtean 80 ordu gehienez; klase bakoitzak gutxienez 6 parte-hartzaile izan behar ditu. Ez dira finantzatuko monitorerik gabe egiten diren jarduerak, salbu eta jarduera eginen den tokira joateko autobusak kontratatu beharra dagoen aire zabaleko jarduera fisikoak, hala nola mendi-ibiliak edo mendi-igoerak. Jarduera horietarako, gehienez 3 autobus kontratatzen ahalko dira irteera bakoitzeko, muga hauekin:

Aire zabaleko jarduera fisiko horietan ez da finantzatuko gidak edo bestelako profil profesionalak kontratatzea. Laguntza hori jasotzeko, ezinbesteko baldintza izanen da zahartze aktiboa faboratzen duten beste jarduera batzuk egitea, I. eranskineko 1.2 oinarrian deskribatutakoak.

–Gaitasun kognitiboa eta zaintza emozionala estimulatzeko jarduerak. Onartutako aurrekontua: gehienez 50 euro profesional bakoitzak emandako ordu bakoitzeko, eta urtean 80 ordu gehienez; klase bakoitzak gutxienez 6 parte-hartzaile izan behar ditu. Ez dira finantzatuko monitorerik gabe egiten diren jarduerak.

–Besteen zaintza eta norbere buruaren zaintza sustatzeko jarduerak. Onartutako aurrekontua: gehienez 50 euro profesional bakoitzak emandako ordu bakoitzeko, eta urtean 80 ordu gehienez; klase bakoitzak gutxienez 6 parte-hartzaile izan behar ditu.

–Boluntariotza jarduerak: diruz lagungarriak izanen dira dirulaguntzaren xede diren boluntarioen jarduerak egiteko ezinbestekoak diren joan-etorrien, prestakuntzaren eta material suntsikorren gastuak eta beste batzuk. Faktura eta ordainagiriak aurkeztu beharko dira beti. Halaber, gastuak aurkezten ahalko dituzte boluntarioentzako prestakuntzaren kontzeptuagatik. Otorduak ez dira diruz lagunduko.

–Mahai-jokoak eta aire zabalekoak: jarduera egiteko beharrezkoa den materialaren fakturak bakarrik onartuko dira; aurrekontua, gehienez: 300 euro urtean. Ez dira diruz lagunduko txapelketen sariak.

–Egun bateko txangoak. Gehieneko aurrekontua: 700 euro egun bakarreko txangoa egiteko kontratatzen den autobus bakoitzeko. Gehienez ere 5 txango onartuko zaizkio entitate bakoitzari. Otorduen gastuak ez dira onartuko.

–Gehienez 6 gauko bidaiak. Gehieneko aurrekontua: 115 euro erabiltzaile bakoitzeko. Bidaia bat onartuko da entitate bakoitzeko. Ez da diruz lagunduko atzerrirako bidaiarik.

–Ospakizunak. Onartutako aurrekontua: 15 euro parte-hartzaile bakoitzeko, entitateko bazkideen %70entzat gehienez ere. Urtean, egun berezietan egindako bi ospakizunen gastuak bakarrik egozten ahalko dira. Ez dira diruz lagunduko bazkarietako kontzertuak. Menuen prezioak ezin dira izan 42 eurotik gorakoak jankide bakoitzeko. Salbuespenez, onartuko da ospakizunak herritik kanpo egitea, baldin eta arrazoi aski badago horretarako, eta organo kudeatzaileak aldez aurretik baimena ematen badu. Kasu horretan, adostutako joan-etorrien gastuak diruz laguntzen ahalko dira.

–Informazioa eta komunikazio soziala sustatzeko jarduerak. Onartutako aurrekontua: gehienez 50 euro profesional bakoitzak emandako ordu bakoitzeko, eta urtean 80 ordu gehienez; klase bakoitzak gutxienez 6 parte-hartzaile izan behar ditu.

6. Dirulaguntzaren zenbatekoa esleitzea.

Dirulaguntzaren zenbatekoa esleitzeko, aintzat hartuko dira modalitate bakoitzerako aurreikusitako gehieneko dirulaguntza, eskuratutako puntuazioa eta eskatutako zenbatekoa.

Dirulaguntza hau eskatu duten entitateetako batek ere ezin du eskuratu "Programa globala" modalitateari dagokion aurrekontuko partidan eskuragarri dagoen diruaren %4 baino gehiago.

Balorazio ekonomikoaren ondoriozko diru-zenbatekoa, guztira, aurrekontuetan dagoen dirua baino handiagoa bada, kasuan kasuko baremoaren aplikazioaren ondoriozko zenbatekoak hainbanatuko dira modalitate bakoitzean.

III. ERANSKINA.–Adinekoen arloko "Boluntariotza-programa" modalitatearen berariazko oinarriak 2026. urterako

1.–Xedea.

Oinarri hauen xedea da behar den araubidea ezartzea 2026ko ekitaldian adinekoen arloan boluntariotza-programak garatzeko dirulaguntzak emateko.

Hona hemen nori zuzendua den deialdi hau: gizarte-ekimeneko entitateak, gizarte-zerbitzuen arlokoak eta irabazi-asmorik gabekoak, helbidea Nafarroan dutenak edo lurralde horretan ordezkaritza dutenak, adinekoen arloan soilik aritzen ez badira ere, arlo horretara zuzendutako boluntariotza-programa bat aurkezten badute (I. eranskineko 2.2 oinarria).

2.–Garatu beharreko programa.

Gizarte-zerbitzuen eremuko entitate horiek dirulaguntzaren xede den adinekoentzako boluntariotza-programa bat aurkezten ahalko dute, kolektibo horren berariazko beharrizanak asetzeko asmoz.

Programak bilduko ditu adinekoen kolektiboarentzako zuzeneko laguntzari/sostenguari buruzko jarduketak, gizarte-zerbitzuen eremuaren barnekoak, baita boluntarioen arloko harrera, koordinazio eta prestakuntzari buruzkoak ere.

Programa hori DIN A4 tamainako hamar orritan (20 orrialde) gehienez garatu beharko da, eta bi aldeetatik inprimatuko dira. Azala eta aurkibidea ez dira sartzen kopuru horretan. Letra mota Arial edo antzekoa izanen da, gutxienez ere 11 puntuko neurrikoa, eta lerroartea, arrunta. Grafikoek gutxienez ere 10 puntuko letra izanen dute, eta ezin izanen dute orrialde osoa hartu. Aipatu orrialde kopurua gainditzen bada, organo kudeatzaileak gehieneko folio kopuruan sartzen dena baloratuko du bakarrik.

Dirulaguntzaren xede den programak bat etorri beharko du deialdiaren xedearekin, eta funts berekietatik eta/edo beste dirulaguntza publiko edo pribatu batzuetatik heldu den finantzaketa izan.

3.–Entitate eskatzaileek bete beharreko baldintzak.

Entitate guztiek bete beharko dituzte deialdi honen I. eranskinaren 3. oinarrian ezarritako betebehar orokorrak.

Boluntarioen entitateek, beren estatutuen arabera, gizarte-boluntarioei zuzendutako edo lan horri lotutako jarduerak egiteko helburuak izan beharko dituzte, eta inskribatuta egon behar dute boluntariotza-ekintzak egiten dituzten entitateen erroldan (ekintza boluntarioko entitateen errolda arautzen duen Gizarte Politiketako kontseilariaren maiatzaren 13ko 306/2014 Foru Aginduaren bidez onetsia). Gainera, eskatzen den programa adinekoen arloan garatu beharko da.

4.–Boluntarioen entitateak aurkeztu beharreko dokumentazio orokorra eta berariazkoa.

Dokumentazio orokorra da deialdi honen I. eranskinaren 4. oinarri arautzailearen 4.2 atalean ezarritakoa.

Entitate horiek eskaera aurkeztuko dute "Boluntariotza-programaren eskabidea" izeneko eredu ofizialaren arabera. Programarekin batera, entitatearen diru-sarreren eta gastuen aurrekontua aurkeztuko dute, baita dirulaguntzaren xede den programaren diru-sarreren eta gastuen aurrekontua ere.

Entitateak adierazten ahalko du funtsak aldez aurretik jaso beharra duela dirulaguntzaren xedeak betetzeko.

Dirulaguntzei buruzko azaroaren 9ko 11/2005 Foru Legearen 33. artikuluak aurreikusten du onartutako dirulaguntzaren ordainketa-aurrerakinak emateko aukera. Horretarako, honako hauek aurkeztu beharko ditu: premia hori justifikatzeko txosten bat; entitatearen ordezkariaren ziurtagiri bat, non entitatearen titulartasuneko banku-kontuen kopurua adieraziko baita; eta banku-ziurtagiri bat, banku-kontuetan gaur egun dagoen saldoari buruzkoa (banku elektronikoaren bidez lortutakoak ere onartuko dira).

4.1. Dirulaguntza justifikatzeko, honako hauek aurkeztuko dira:

a) Proiektuaren gauzatzeari buruzko txosten teknikoa.

b) Kontzeptu bakoitzerako (langileak, funtzionamendua eta jarduerak) jasotako dirulaguntzari aplikatutako gastuen zerrenda, non agiri-zenbakia, kontzeptua, jaulkitzailea, data eta zenbatekoa zehaztuko baitira. Zerrenda horrekin batera, dagozkion egiaztagiriak, fakturak eta ordainagiriak aurkeztu beharko dira. Ez da dirulaguntzarik emanen otorduak egiteko, ezta opariak erosteko ere.

c) Entitatearen legezko ordezkariaren zinpeko adierazpena, non aditzera emanen baita egotzitako gastuak dirulaguntza honetara baizik ez direla aurkeztu (gastuen zerrendarekin batera aurkeztuko da, beteta eta sinaturik).

Horretarako, entitate onuradunak fakturen eta ordainagirien fotokopiak aurkeztuko ditu. Egiaztagiri gisa, banku-laburpenak, ordainagiriak eta fakturak onartuko dira bakarrik, eta horietan jaulkitzailearen eta hartzailearen datuak, data, kontzeptua eta prezioa adierazi beharko dira, maiatzaren 17ko 205/2004 Foru Dekretuan xedatutakoari jarraikiz, horren bidez onetsi baitzen fakturazio betebeharrak arautzen dituen erregelamendua.

4.2. Honako hauek aurkeztuko dira dirulaguntzaren azkeneko justifikaziorako:

a. Entitatearen memoria teknikoa, aurreko urtean eginiko proiektua azaltzen duena. Ematen diren datuen artean, onuradunen kopurua sartuko da, generoaren arabera bereizita.

b. Diruz lagundutako programaren guztirako gastuaren zerrenda, euskarri informatikoan.

c. Entitatearen eta diruz lagundutako programaren emaitzen kontua (diru-sarrerak eta gastuak). Gastuen zerrendaren eta emaitzen kontuaren ereduak lortzeko, eskabidearen inprimaki ofiziala lortzeko bide berberak erabil daitezke.

Gastuen kapituluan sartuko dira langileen, funtzionamenduaren eta jardueren gastu guztiak.

Diru-sarreren kapituluan, erakundeak azalduko ditu diruz lagundutako jarduera finantzatzeko jasotako diru-sarrerak, zehaztuta funts horien zenbatekoa eta jatorria, barnean direla Pertsonen Autonomiarako eta Garapenerako Nafarroako Agentziak emandakoarekin bateragarriak diren dirulaguntzak. Diru-sarrerak guztira ezin dira izan diruz lagundutako jarduera egiteko kostuak baino handiagoak.

Halaber, entitateek instrukzio-organoaren eskura utzi beharko dituzte jatorrizko fakturak.

5.–Kontzeptu diruz lagungarriak, onartutako gehieneko aurrekontuak eta dirulaguntzaren gehieneko zenbatekoa.

Boluntarioen entitateek aurkezten duten programari dagozkion langileria-, jarduera- eta funtzionamendu-gastuak sartzen ahalko dituzte aurrekontuan.

Gizarte-boluntarioen beste deialdi batzuen bidez uneko urtean dirulaguntza jaso duten boluntarioen entitateek dirulaguntzaren xede den proportzioaren araberako funtzionamendu-gastuak aurkeztuko dituzte.

Dirulaguntzaren gehieneko zenbatekoa instrukzio-organoak onetsitako programaren aurrekontuaren %80 izanen da.

Entitate bakoitzarentzat onartutako aurrekontua PAGNAk aurreko urtean onetsitakoa baino handiagoa bada, alde hori ezin izanen da iazkoaren %5etik gorakoa izan, salbu eta, salbuespen gisa, gehitze handiago baten beharra justifikaturik gelditzen bada. Aurreko urtean aurrekontuan boluntarioen jarduerarik adierazi ez zuten entitateei ez zaie muga hori aplikatuko.

6.–Prozedura eta baloraziorako irizpideak.

6.1. Balorazioa bi fasetan eginen da:

–Lehenbiziko fasean, boluntarioen entitatea baloratuko da, dirulaguntzaren xede den programaren arduraduna den aldetik.

–Bigarrenean, aurkeztutako programa baloratuko da.

Bi faseak zein bere aldetik baloratuko dira, jarraian aipatzen diren irizpide eta puntuazioak erabilita. Fase bakoitzean gehienez ere 100 puntu lortzen ahalko dira.

Bi faseak baztertzaileak dira; hortaz, haietako bakoitzean, entitateek 60 puntu eskuratu beharko dituzte gutxienez.

6.2. Balorazio-irizpideak.

a) Lehenbiziko fasea: entitatea baloratzeko irizpideak.

1. irizpidea: Proiektuaren kalitate teknikoa (45 puntu gehienez).

2. irizpidea: Barne-koherentzia (20 puntu gehienez).

3. irizpidea: Entitateekin eta/edo elkarteekin koordinatzea (15 puntu gehienez).

4. irizpidea: Kofinantzaketa (20 puntu gehienez).

Kofinantzaketatzat jotzen da entitateak diru-sarrerak izatea, Eskubide Sozialetako, Ekonomia Sozialeko eta Enpleguko Departamentuari eskatutakoarekin konparatuta.

b) Bigarren fasea: programa baloratzeko irizpideak.

1. irizpidea. Programaren kalitate teknikoa (55 puntu gehienez).

2. irizpidea: Programaren koherentzia (25 puntu).

3. irizpidea: Kofinantzaketa (20 puntu):

Baloratuko da eskura dauden baliabide errealen araberako programa bat gauzatzeko gaitasuna.

7.–Dirulaguntzaren zenbatekoa esleitzea.

Dirulaguntzaren zenbatekoa esleitzeko kontuan hartuko dira erabilgarri dagoen aurrekontu kreditua, eskuratutako puntuazioa eta dirulaguntzaren eskaeran eskatutakoa.

Gehieneko dirulaguntza kalkulatzeko, lortutako puntuazioaren araberako portzentajea aplikatuko zaio programarako onartzen den aurrekontuari, kontuan hartuta eranskin honen bosgarren oinarriak deialdiaren kontzeptu eta gehieneko diru kopuru diruz lagungarriei buruz ezarritakoa.

Portzentaje hori honela kalkulatuko da:

Deialdi honetan sartzen diren modalitateen banakako balorazioa egin ondoren, balorazio ekonomikoaren ondoriozko zenbateko osoa aurrekontuetan erabilgarri dagoen dirua baino handiagoa bada, proportzionalki banatu edo hainbanatuko da baremoa aplikatzearen ondoriozko zenbatekoen gainean.

Adinekoen arloan aritzen diren gizarte-zerbitzuen esparruko entitateei zuzendutako "Boluntariotza-programa" modalitateko dirulaguntzak ez badira iristen horretarako erreserbatutako guztizko zenbatekora, horrenbesteko zenbatekoarekin handituko da klubei, adinekoen elkarteei eta elkarteen federazioei zuzendutako "Programa globala" modalitatean baimendutako zenbatekoa.

Iragarkiaren kodea: F2516520