Iragarkia

28. ALDIZKARIA - 2026ko otsailaren 9a

1. NAFARROAKO FORU KOMUNITATEA

1.7. BESTELAKOAK

1/2026 EBAZPENA, urtarrilaren 7koa, Enpresen Sustapenerako eta Azpiegituretako zuzendari nagusiak emana, zeinaren bidez ukatzen baitira San Martin Unxeko, Lergako, Erriberriko eta Tafallako udal-mugarteetan ezarri nahi diren energia elektrikoa ekoizteko instalazioen eta haien eraldaketa eta ebakuazio azpiegituren proiektuetarako aurretiazko administrazio baimenak.

1. Aurretiazko administrazio baimenen eskaerak.

2023ko abuztuaren 11n eta 2023ko azaroaren 22an, Nafarroan haize parkeetarako baimena arautzen duen maiatzaren 8ko 56/2019 Foru Dekretuan ezarritakoa aplikatuz, Enigma Green Power 3 SL, Enigma Green Power 2 SL, Enigma Green Power 4 SL, Enigma Green Power 6 SL, Enigma Green Power 21 SLU eta Enigma Green Power 15 SLU entitate sustatzaileek aurretiazko administrazio baimenak eskatu zituzten Martin Unxeko, Lergako, Erriberriko eta Tafallako udal-mugarteetan ezarri nahi diren "Sextante", "Singladura", "Azafea", "Mares del Mundo", "Las Marismas" eta "La Casa del Palo" 4,99 MW-eko haize parkeetarako eta haien eraldaketa eta ebakuazio azpiegituretarako.

2025eko urtarrilaren 20an, sustatzaileek zerbitzu honi jakinarazi zioten aldatu egin zirela sarbide eta konexio baimenen titulartasuna eta proiektuei lotutako eskubideak. Horiek Arena Green Power Ren 235 SLU, Arena Green Power Ren 236 SLU, Arena Green Power Ren 237 SLU eta Arena Green Power Ren 238 SLU sozietateei transferitu zitzaizkien. Aldatu gabe geratu ziren Enigma Green Power 15 SLU eta Enigma Green Power 21 SLU.

2. Jendaurreko informazioaren eta kontsulten izapideak.

Bat etorriz maiatzaren 8ko 56/2019 Foru Dekretuaren 7. artikuluarekin, aurreproiektuak eta ingurumen inpaktuaren azterketak jendaurrean jarri ziren, 30 egunez, iragarki bat argitaratuta 2025eko 57. Nafarroako Aldizkari Ofizialean, martxoaren 20koan, eta Diario de Navarra eta Diario de Noticias egunkarietan (2025eko martxoaren 21ean), eta dokumentazioa Nafarroako Gobernu Irekiaren dagokion web fitxan argitaratu zen. Dokumentazioa ukitutako udalei ere bidali zitzaien, epe berean jendaurrean jar zezaten.

Zazpi alegazio jaso ziren.

Aldi berean, eta maiatzaren 8ko 56/2019 Foru Dekretuaren 8. artikuluan ezarritakoa aplikatuz, kontsulta egin zitzaien taulan zerrendatzen diren erakundeei, eta horietatik 14k bidali zuten txostena.

Ebazpen honen xede diren espedienteetan dago alegazio eta txostenen edukia.

Maiatzaren 8ko 56/2019 Foru Dekretuaren 9. artikuluari jarraikiz, alegazioak eta txostenak haize parkeen sustatzaileei bidali zitzaizkien.

3. Ingurumen inpaktuaren ebaluazio arrunta hasteko eta lurzoru urbanizaezinean jarduerak egiteko baimena eskuratzeko eskaera.

2025eko ekainaren 6an, jasotako alegazio eta txostenei erantzun zieten enpresa sustatzaileek, eta ingurumen inpaktuaren ebaluazio arrunta hasteko eta lurzoru urbanizaezinean jarduerak egiteko baimena eskuratzeko eskaera aurkeztu zuten, maiatzaren 8ko 56/2019 Foru Dekretuaren 10. artikuluan ezarritakoari jarraikiz.

Aipatu artikuluan ezarritakoa betez, Industria Antolamenduaren, Azpiegitura Energetikoen eta Meatzeen Zerbitzuak eskaerak igorri zituen Ingurumen Ebaluazioaren Atalera eta Paisaiaren eta Landa Lurzoruaren Atalera.

4. Proiektuaren aurkako ingurumen inpaktuaren adierazpena.

Ingurumeneko zuzendari nagusiaren irailaren 30eko 1070E/2025 Ebazpenaren bidez, aurkako ingurumen inpaktuaren adierazpena formulatu zen San Martin Unxeko, Lergako, Erriberriko eta Tafallako udal-mugarteetan ezarri nahi diren "Sextante", "Singladura", "Azafea", "Mares del Mundo", "Las Marismas" eta "La Casa del Palo" izeneko haize parkeetarako eta haien eraldaketa eta ebakuazio azpiegitura komunetarako.

5. Aurretiazko administrazio baimenak ukatzeko proposamena.

2025eko urriaren 27an, sustatzaileek behin-behineko neurriak hartzeko eskaera bat aurkeztu zuten, eta horren bidez eskatu zuten, batetik, kautelaz eta behin-behinean eteteko proiektuei aplikatu beharreko administrazio mugarriak betetzeko epeak eta, bestetik, batera ez ebazteko aurretiazko administrazio baimenak eta proiektuen alde jarritako berme ekonomikoen itzulketa.

2025eko azaroaren 7an, enpresa sustatzaileek eskatu zuten 2025eko urriaren 27an aurkeztutako eskaeran atzera egiteko eta berme ekonomikoa kitatu eta itzultzeko ebazpena emateko.

Horregatik guztiagatik, aurkeztutako dokumentazioa azterturik eta sei espedienteen azterketa teknikoa egin ondotik, Industria Antolamenduaren, Azpiegitura Energetikoen eta Meatzeen Zerbitzuko Azpiegitura Energetikoen Atalak proposatzen du espediente horiek ebaztea eta eskatutako aurretiazko administrazio baimenak ukatzea.

Administrazio Publikoen Administrazio Prozedura Erkideari buruzko urriaren 1eko 39/2015 Legearen 57. artikuluaren arabera, aurkeztutako eskaerak funtsean berdinak direnez, bidezkoa da eskaera horiek metatzea baimenak ukatzeko ebazpenean.

Adierazitakoarekin bat, eta Nafarroako Foru Komunitateko Administrazioari eta foru-sektore publiko instituzionalari buruzko martxoaren 11ko 11/2019 Foru Legearen 32. artikuluak ematen dizkidan eskudantziak erabiliz,

EBAZTEN DUT:

1. Aurretiazko administrazio baimenak ukatzea Martin Unxeko, Lergako, Erriberriko eta Tafallako udal-mugarteetan ezarri nahi diren "Sextante", "Singladura", "Azafea", "Mares del Mundo", "Las Marismas" eta "La Casa del Palo" 4,99 MW-eko haize parkeetarako eta haien eraldaketa eta ebakuazio azpiegituretarako.

2. Diruzaintza Atalari proposatzea sarbide eta konexio prozedurekin lotutako sei bermeak itzultzeko. Abal gordailuaren frogagiriak eta itzulketa eginbideenak ebazpen honen eranskinetan daude.

3. Ebazpen hau igortzea, behar diren ondorioak izan ditzan, Industria Antolamenduaren, Azpiegitura Energetikoen eta Meatzeen Zerbitzuari, Ingurumen Ebaluazioaren Atalari, Paisaiaren eta Landa-lurzoruaren Atalari, Ustiapen Atalari, Herri-lurren Atalari, Ondare Arkitektonikoaren Atalari, Erregistroaren, Ondasun Higigarrien eta Arkeologiaren Atalari eta Gobernu Irekiaren eta Herritarrentzako Arretaren Zerbitzuari.

4. Ebazpen hau Nafarroako Aldizkari Ofizialean argitaratzea, orok jakin dezan.

5. Ebazpen hau jakinaraztea Arena Green Power Ren 235 SLUri, Arena Green Power Ren 236 SLUri, Arena Green Power Ren 237 SLUri, Arena Green Power Ren 238 SLUri, Enigma Green Power 15 SLUri, Enigma Green Power 21 SLUri, Enigma Green Power 3 SLri, Enigma Green Power 2 SLri, Enigma Green Power 4 SLri eta Enigma Green Power 6 SLri, Nafarroako Ekologistak Martxan elkarteari, Espainiako Ornitologia Elkarteari (SEO BIRDLIFE), I-DE Redes Eléctricas Inteligentes SAUri eta Red Eléctrica de España SAUko Eragiketen Zuzendaritzari eta Sistemaren Garapenerako Zuzendaritzari, Enagás Transporte SAUri, Telefónica SAri, Lyntia Networks SAri, Acciona Generación Renovable SAri, eta Aguacanal enpresari. Orobat, ohartaraztea ebazpen honek ez duela administrazio bidea amaitzen eta haren aurka gora jotzeko errekurtsoa jartzen ahal dela, Industriako eta Enpresen Trantsizio Ekologiko eta Digitalerako kontseilariari zuzendua, hilabeteko epean, jakinarazi eta biharamunetik hasita. Errekurtsoan espedientearen kodea adierazi beharko da.

6. Ebazpen hau jakinaraztea San Martin Unxeko, Lergako, Erriberriko eta Tafallako udalei, Trantsizio Ekologikorako eta Erronka Demografikorako Ministerioari, Ebroko Konfederazio Hidrografikoari, Aire Segurtasuneko Estatuko Agentziari eta Trenbide Azpiegituren Administratzaileari (ADIF), eta ohartaraztea beronen kontra administrazioarekiko auzi-errekurtsoa jartzen ahal dela, Nafarroako Justizia Auzitegi Nagusiko Administrazioarekiko Auzien Salari zuzenduta, bi hilabeteko epean, galarazi gabe Nafarroako Gobernuan aldez aurreko errekerimendua egin ahal izatea, Administrazioarekiko Auzien Jurisdikzioa arautzen duen uztailaren 13ko 29/1998 Legearen 44. artikuluan ezarritako moduan eta epean.

Iruñean, 2026ko urtarrilaren 7an.–Enpresen Sustapenerako eta Azpiegituretako zuzendari nagusia, Iñigo Arruti Torre.

Iragarkiaren kodea: F2600290