1. NAFARROAKO FORU KOMUNITATEA
1.7. BESTELAKOAK
1227E/2026 EBAZPENA, urriaren 22koa, Ingurumeneko zuzendari nagusiak emana, zeinaren bidez ingurumen-inpaktuaren txostena egiten baita energia metatzeko 368,00 kW / 1867,20 kWh-ko "INTERMEAT" instalazioaren proiektuaz. Sustatzailea Intermeat 2 SA da.
Ingurumen-inpaktuaren ebaluazio sinplifikaturako prozedura hasteko, eta behin egiaztatuta dokumentazioak betetzen dituela hala sektoreko legeriaren baldintzak nola Ingurumen-ebaluazioari buruzko abenduaren 9ko 21/2013 Legearen 45.1 artikuluan xedatutakoa, Azpiegitura Energetikoen Atalak Ingurumen Ebaluaziorako Atalari igorri dio, 2026ko uztailaren 30ean, «Energia metatzeko 368,00 kW / 1867,20 kWh-ko "INTERMEAT" instalazioa» izeneko proiektua, «BESS Intermeat, baterien bidez energia biltegiratzeko sistema hibridoa. II. eranskineko jardueretarako ingurumen agiria» delakoarekin batera. Proiektuaren sustatzailea Intermeat 2 SA da.
–Ingurumen-inpaktuaren ebaluazio sinplifikatua izapidetzea.
Proiektuaren ezaugarriak direla eta, Ingurumen-ebaluazioari buruzko abenduaren 9ko 21/2013 Legearen II. eranskinaren barnean sartzen da; horregatik, bertan xedatutakoarekin bat, ingurumen-inpaktuaren ebaluazio sinplifikatuaren prozedura bete behar du.
Ingurumen-ebaluazioari buruzko abenduaren 9ko 21/2013 Legearen 46. artikuluan ezarritakoari jarraikiz, ingurumen-inpaktuaren txostena egin aurretik, Ingurumen Ebaluazioaren Atalak proiektuaren ingurumen agiriaz kontsulta egin die ukitutako administrazio publikoei eta interesdunei, beren eskumeneko gaiei dagokienez oharrak edo iradokizunak egin ditzaten. Kontsulta egin zaio Arangurengo Udalari. Legean ezarritako epea bukatuta, ez da erantzunik jaso.
Abenduaren 9ko 21/2013 Legearen 47. artikuluak ezartzen du ingurumen organoak ebazpen arrazoitua emanen duela aipatu legearen III. eranskineko irizpideen arabera argitzeko ea proiektuak ingurumen-inpaktuaren ebaluazio arrunta bete behar duen, edo ingurumen-inpaktuaren txostena eman behar den, txosten honetan ezartzen diren baldintzetan.
–Proiektuaren ingurumen-ebaluazioa eta analisia, 21/2013 Legearen III. eranskineko irizpideak kontuan harturik.
Proiektuaren xedea da energia baterien bidez biltegiratzeko sistema hibrido bat ezartzea, «BESS Intermeat» sistema, 368 kW-eko potentzia eta 1.867,20 kWh-ko biltegiratze gaitasuna duena. Sistema hori hibridatuko da Intermeat enpresaren industria nabearen teilatuan autokontsumorako dagoen instalazio fotovoltaikoarekin. Biltegiratzeko instalazioak 18,47 m² inguruko eremu bat okupatuko du Intermeat SA enpresa kokatuta dagoen industria lurzatian, Mutiloabeitiko industrialdeko A kalean (Mutiloa 31192, Aranguren). Sarbidea du espazio horretan dagoen bide publikoen sarearen bitartez. Lurren sailkapena hiri-lurzoru finkatuarena da. Metatzeko instalazioa bateria-edukiontzi bat da, lurzatian dagoen hormigoizko zolatan ezarria, nabetik kanpo, eta nabeko horman jarrita dauden 4 inbertsoreri konektatua. Korrontearen kableak babestuta jarriko dira, azalean, hormigoizko zolatan, ahalik eta trazadura zuzenenarekin; behar bezala finkatuko dira zoruan edo horman. Kanalizazioak erretilu itsu estalkidunean jarriko dira, zeina pvc-koa edo metalezkoa izanen baita, beharren arabera.
Aurkeztutako ingurumen agiria bat dator Ingurumen-ebaluazioari buruzko abenduaren 9ko 21/2013 Legearen 45. artikuluan zehazten den edukiarekin. Bere baitan biltzen ditu alternatiben azterketa, ingurumen faktoreen inbentarioa eta deskribapena, inpaktuen analisia, sinergien azterketa, ingurumen neurrien proposamena eta proiektuaren arriskuen eta kalteberatasunaren analisia.
Proiektuak zero alternatiba aztertzen du, hau da, ez egitea, eta haren ondorioa da biltegiratzeko proiektua egitearekin alderatuta, ez egiteak kalte handiagoak ekarriko lituzkeela zenbait faktoretan, hala nola horniduraren segurtasunean, klima aldaketa apaltzeko neurrietan eta garapen sozioekonomikoan. Proiektua hiri-lurzoru antropizatuan dagoenez, industrialdean barruan, ingurumen arloko gainerako faktoreen gaineko ukipenak minimizatzen ditu. Alternatiben azterketak hautatzen du energiaren ebakuaziorako azpiegituraren okupazio azalera eta luzera minimizatzen dituena. Hautatutako alternatiba hiri-lurzoru finkatuan garatzen da, industrialdearen barruan, autokontsumorako eguzki-instalazioa teilatuan duen nabeak okupatzen duen lurzatian, konexio puntutik 11 metrora soilik.
Ingurumen agiriaren arabera, proiektuaren exekuzioak eta jarduerak eraginen dituzten inpaktuak bateragarriak dira.
Ukipen atmosferikoak, hau da, gasak, partikulak eta zarata sortzearen ondoriozkoak, aldi batekoak izanen dira eta obra fasera mugatuak. Obrak bukatuta desagertuko dira, eta, oro har, sinergia positiboa sortuko da, klimaren gaineko inpaktuak gutxitu eginen baitira proiektua jardunean dagoenean. Soinu mailari dagokionez, hozte sistemen eta inbertsoreen funtzionamendu jarraituak zarata apala eta etengabea sortuko du. Soinu inpaktu hori oso txikia eta motela da, zeharo bateragarria industrialde batean baimenduta dauden jarduerekin eta zarata mailei buruzko araudiarekin.
Moderatutzat kalifikatzen den inpaktu bakarra arrisku meteorologikoei dagokie. Proiektuak arrisku ertain-altua du elurraren aurrean, baina ezarritako prebentzio eta kontrol neurriak aplikatuz gero arriskurik ez dagoela uste da.
Ingurumen-ebaluazioari buruzko abenduaren 9ko 21/2013 Legearen 47. artikuluan ezartzen denarekin bat, aurkeztutako dokumentazioa ikusirik eta proiektua gauzatu, ustiatu eta desmuntatzearen ondoriozko ingurumen-inpaktua aztertuta, Biodibertsitatearen eta Arrantza Kudeaketaren Zerbitzuak, Ingurumen Ebaluaziorako Atalaren bidez, proposatzen du ezen, kontsulten emaitza kontuan hartuta, eta Ingurumen-ebaluazioari buruzko 21/2013 Legearen III. eranskinean horri buruz jasotzen diren irizpideetan oinarrituta, proiektuak ez duela kalte nabarmenik eraginen ingurumenean eta ez dela ingurumen-inpaktuari buruzko ebaluazio arruntaren izapidetzea hasi behar. Horrenbestez, aldeko ingurumen-inpaktuaren txostena ematea proposatzen du Intermeat 2 SAk Arangurengo udalerrian sustatutako «Energia metatzeko 368,00 kW / 1867,20 kWh-ko "INTERMEAT" instalazioa» egiteko proiektuaz, baldin eta proiektua garatzean betetzen badira ingurumen-inpaktuaren ebaluazio sinplifikatua hasteko eskaerarekin batera aurkeztutako ingurumen agirian proposatutako neurriak, eta, horiez gain, ingurumen-inpaktuaren txosten honetan jasotzen diren zehaztapenak, ondoren zehaztu eta proiektuaren baimen substantiboan jasoko direnak.
Ingurumen-inpaktuaren ebaluazio sinplifikatuaren prozedura modu egokian bete dela iritzita, adierazitakoarekin bat, eta honako hauek ematen dizkidaten eskudantziak erabiliz: Nafarroako Foru Komunitateko Administrazioari eta foru-sektore publiko instituzionalari buruzko martxoaren 11ko 11/2019 Foru Legearen 32. artikulua, Nafarroako Foru Komunitateko Administrazioaren departamentuen egitura ezartzen duen Nafarroako Foru Komunitateko Lehendakariaren abuztuaren 17ko 10/2023 Foru Dekretua eta Landa Garapeneko eta Ingurumeneko Departamentuaren egitura organikoa ezartzen duen azaroaren 15eko 255/2023 Foru Dekretua,
EBAZTEN DUT:
1. Intermeat 2 SAk Mutiloabeitiko industrialdean (Aranguren) sustatutako «Energia metatzeko 368,00 kW / 1867,20 kWh-ko "INTERMEAT" instalazioa» egiteko proiektuak ez du ondorio nabarmenik ingurumenaren gainean, ingurumen-inpaktuari buruzko txosten honetan ezarritako baldintzetan, eta, beraz, ez du ingurumen-inpaktuaren ebaluazio arrunta bete beharrik, Ingurumen-ebaluazioari buruzko abenduaren 9ko 21/2013 Legearen II. tituluko II. kapituluko 1. atalaren araberakoa.
2. Sustatzaileak osotara bete beharko ditu ingurumen-inpaktuaren ebaluazio sinplifikatua hasteko eskaerarekin batera aurkeztutako ingurumen agirian proposatutako neurriak.
3. Ingurumen-inpaktuaren txosten honek ez du salbuesten sustatzailea aplikagarria den indarreko legeriaren arabera beharrezkoak diren gainerako baimenak lortzetik.
4. Ingurumen-ebaluazioari buruzko abenduaren 9ko 21/2013 Legearen 47.5 artikuluan aurreikusitakoari jarraikiz, ingurumen txostenaren aurka ezin izanen da errekurtsorik jarri, proiektua baimentzeko egintzaren aurka bide administratibo edo judizialean jar daitezkeenak galarazi gabe.
5. Ebazpen hau Nafarroako Aldizkari Ofizialean argitaratzea.
6. Ebazpen hau igortzea Azpiegitura Energetikoen Atalera, Arangurengo Udalera eta interesdunari, behar diren ondorioak izan ditzan.
Iruñean, 2026ko urriaren 22an.–Ingurumeneko zuzendari nagusia, Ana Bretaña de la Torre.
Iragarkiaren kodea: F2614080
