227. ALDIZKARIA - 2026ko azaroaren 13a

1. NAFARROAKO FORU KOMUNITATEA

1.7. BESTELAKOAK

1203E/2026 EBAZPENA, urriaren 20koa, Ingurumeneko zuzendari nagusiak emana, zeinaren bidez ingurumen-inpaktuaren txostena egiten baita «PSFV Autoconsumo Grafitech» eguzki-instalazio fotovoltaikoaren eta haren barneko ebakuazio-linearen proiekturako, Zizurko (Gazolatz) eta Oltza Zendeako (Ororbia) udalerrietan. Sustatzailea NetOn Project 29 SLU da.

Ingurumen-inpaktuaren ebaluazio sinplifikatuaren prozedura hasteko, eta behin egiaztatuta dokumentazioak betetzen dituela hala sektoreko legeriaren baldintzak nola Ingurumen-ebaluazioari buruzko abenduaren 9ko 21/2013 Legearen 45.1 artikulukoak, Azpiegitura Energetikoen Atalak ingurumen-organoan aurkeztu du «PSFV Autoconsumo Grafitech» eguzki-instalazio fotovoltaikoaren eta haren barneko ebakuazio-linearen proiektua, Zizurko (Gazolatz) eta Oltza Zendeako (Ororbia) udalerrietan egitekoa (sustatzailea NetOn Project 29 SLU da).

–Ingurumen-inpaktuaren ebaluazio sinplifikatua izapidetzea.

Proiektuaren ezaugarriak direla eta, Ingurumen Ebaluazioari buruzko abenduaren 9ko 21/2013 Legearen II. eranskinaren barnean sartzen da; horregatik, haren 7. artikuluan xedatutakoarekin bat, ingurumen-inpaktuaren ebaluazio sinplifikatuaren prozedura bete behar du.

Azpiegitura Energetikoen Atalak Ingurumen Ebaluaziorako Atalari igorri dio izen hau daukan ingurumen-dokumentua: Ingurumen-inpaktuaren azterketa sinplifikatua. "PSFV Autoconsumo Grafitech" eguzki-instalazio fotovoltaikoa, aziendak landutako larreetan edukita, eta barneko ebakuazio-linea, Zizurko udal-mugartean (Nafarroa).

Ingurumen-ebaluazioari buruzko abenduaren 9ko 21/2013 Legearen 46. artikuluan ezarritakoari jarraikiz, ingurumen-inpaktuaren txostena egin aurretik, Ingurumen Ebaluazioaren Atalak proiektuaren ingurumen-dokumentuaren gaineko kontsulta egin die ukitutako administrazio publikoei eta interesdunei, beren eskumeneko gaiei dagokienez oharrak edo iradokizunak egin ditzaten. Honako hauei egin zaie kontsulta: Zizurko eta Oltza Zendeako udalei, Gazolazko eta Ororbiako kontzejuei, Nafarroako Gobernuko Erregistroaren, Ondasun Higigarrien eta Arkeologiaren Atalari, Ondare Arkitektonikoaren Atalari eta Herri-lanen eta Azpiegituren Zuzendaritza Nagusiko Zainketa Zerbitzuari, Iruñeko Mankomunitateari (Arazuriko HUA), Iruñeko Ekologistak Martxan elkarteari, Gurelur-Ingurune naturala babesteko Nafarroako funtsari, Lurraren defentsarako Lurra Nafarroa elkarteari eta Sustrai Erakuntza fundazioari.

Erregistroaren, Ondasun Higigarrien eta Arkeologiaren Atalak eginiko txostenean, jakinarazten da proiektatutako eraikuntzek katalogatutako sei aztarnategi arkeologikori eragin diezaieketela, eta aldeko txostena ematen du, jarduketa arkeologiko jakin batzuk egiteko baldintzapean. Txosten hori organo substantiboari helarazi zaio. Ondare Arkitektonikoaren Atalak jakinarazi du ez dagoela eraginik bere eskumeneko gaietan. Oltza Zendeako eta Zizurreko udalen hirigintza-txostenak jaso ziren, baina ez zuten ingurumen arloko edukirik. Lurra Nafarroa elkarteak zenbait ohar aurkeztu ditu bere idazkian, lurralde-antolamenduari eta hirigintzari buruz. Ingurumen-inpaktuaren ebaluazio sinplifikatuaren izapide honetan aztertutako faktoreei dagokienez, idazkiak nabarmentzen du proiektuak lurzoruaren ezaugarri edafikoak aldatuko dituela eta lurzoru emankorra galduko dela, eta ezin izanen dela lurzoruaren nekazaritza-jarduera berreskuratu instalazioaren bizitza baliagarria bukatu ondoan. Halaber, adierazten du proiektuak finantza-bermeak aurkeztu behar dituela, jarduera bukatu ondoren lurzoruak egoera naturala berreskura dezan, bai eta tratamendu espezifiko bat ere, eraispen-fasean sortutako hondakinetarako.

Ingurumen-inpaktuaren txosten honetan, kontuan hartu dira kontsulta-izapidean jasotako erabakiak, asmoa baita proiektuak ondorio kaltegarri nabarmenik ez izatea ondare arkeologikoan eta lurzoruan exekuzio, ustiatze eta eraispen faseetan. Ez dira ez aztertzen ez kontuan hartzen hirigintzako eta lurralde-antolamenduko erabakiak, ez baitira sartzen ingurumen-ebaluazioaren prozeduran.

–Proiektuaren ingurumen ebaluazioa eta analisia, 21/2013 Legearen III. eranskineko irizpideak kontuan harturik.

Abenduaren 9ko 21/2013 Legearen 47. artikuluak ezartzen du ingurumen organoak ebazpen arrazoitua emanen duela aipatu legearen III. eranskineko irizpideen arabera argitzeko ea proiektuak ingurumen-inpaktuaren ebaluazio arrunta bete behar duen, edo ingurumen-inpaktuaren txostena eman behar den, txosten honetan ezartzen diren baldintzetan.

Jarduketaren xedea da modulu fotovoltaikoen bidez energia elektrikoa sortzeko instalazio bat jartzea Gazolazko Kontzejuko 3. poligonoko 323. lurzatian, Zizurko udal-mugartean. Moduluak 9,99 hektareako esparru hesitu bakar batean daude, eta instalatutako elementuek 3,44 ha-ko azalera hartzen dute. Instalazioetara pista batetik iristen da, NA-7010 errepidetik (Asterain-Irurtzun).

Eguzki-instalazioak 9,457MWp-eko potentzia erpina du instalatuta guztira. 27 inbertsore instalatu nahi dira, 300 kVA-ko potentzia izendatu unitarioa dutenak. Hala, potentzia izendatua, guztira 8,100 MWn-koa izanen da. Energia 0,8 kV-etik 20 kV-era igotzen da bi transformazio-zentrotan (TZ). Transformazio-zentroetatik energia erdi tentsioko lurpeko linea baten bidez garraiatuko da, 20 kV-era, bi zirkuiturekin. Lineak 2.475 metroko luzera du, autokontsumitzailearen barne-sarean sartu arte. Soberako energia ez da inoiz garraio- edo banaketa-sarean txertatuko.

Instalazio fotovoltaikoaren lurzatia eta 20 kV-eko erdi-tentsioko lurpeko linearen (LSMT) trazadura

Moduluak metalezko egitura finko baten gainean muntatuko dira. Lurrera zuzenean tinkatutako zutoinen bidez eutsiko zaio egiturari, azterketek eta txosten geoteknikoak ahalbidetzen badute.

Proiektuan, zenbait ekintza zehazten dira obra zibilean: zuinketa, lurra prestatzea eta lur-mugimenduak. Ekintza horietan, lan egokiak eginen dira lurzoruaren azaleko horizontea behar bezala tratatzeko eta kudeatzeko. Egitura fotovoltaiko guztiak beren perdoien barruan behar bezala instalatzeko behar-beharrezkoak diren lur mugimenduak eginen dira, ez gehiago. Kalkulatzen da ezen, guztira, hondeaketaren bolumena 3.325 m³ izanen dela eta betelanaren bolumena, berriz, 193 m³. Itxitura egiteko, ehiza motako hesiak jarriko dira, gutxienez 1,80 m-ko altuera izanen dutenak. Behealdean, aldiz, 20 cm-ko irekiera izanen dute, animalia txikiei pasatzen uzteko. Aurreikusten da hiru seinalez markatzea, baotik behin plaka zuriak jarriz itxituraren goiko aldean. Proiektuan, barne-bideak aurreikusten dira, oinplanoan definitu gabeak, transformazio-zentroetara eta egitura fotovoltaikoetara iristeko. Diseinuan, 4 m-ko zabalera dute, baita 20 cm-ko lodierako zabor-legar natural trinkotuko oinarria eta oinarri-azpia ere.

Proiektuak aurreikusten du belar-estaldurari eustea eguzki-moduluen errenkaden artean, eta azalera libreetan bazka-espezieen, eztitarakoen eta espezie aromatikoen hazien nahasketa bat ereitea.

Aurkeztutako ingurumen-dokumentua bat dator Ingurumen Ebaluazioari buruzko abenduaren 9ko 21/2013 Legearen 45. artikuluan zehazten den edukiarekin. Aurkeztu dira, orobat, aztertutako aukera nagusiak, eragin nabarmena izan dezaketen ingurumen-faktoreen deskribapena eta inbentarioa, proiektuaren ekintzek faktore horietan dituzten ondorioen identifikazioa eta balorazioa, eta ingurumenaren gaineko eragin negatibo nabarmen oro prebenitu, zuzendu eta konpentsatu ahal izatea dakarten prebentzioko, zuzentzeko eta konpentsatzeko neurrien proposamena. Bai eta ingurumen jarraipeneko programa bat ere. Ingurumen-dokumentuak bateragarritzat jotzen ditu jarduerak sortutako inpaktuak.

Dokumentuak instalazioak kokatzeko bi aukera aztertzen ditu, ez jarduteko zero alternatibaz gain. Proiektua ez gauzatzea baztertu da, hala ez baitira berotegi efektuko gasen isuriak arintzen enpresaren industria-jardueraren ondorioz. Aldagai anitzeko analisia egin ondoren, hautatu den alternatiba da proiektuan deskribatutakoa eta txosten honetan laburtutakoa. Izan ere, horrela, ebakuazio-linearen trazadurak ez du Arga ibaia gurutzatzen, ezta ibai-parkearen ondoko baratzeak ureztatzen dituen erreka ere. Gainera, baztertutako alternatibak beste azpiegitura batzuei eraginen lieke, eta Ororbiako hirigunetik oso hurbil dago. Hautatutako alternatiban sistema agrovoltaikoa planteatzen da, non landare-estalkia azienden bidez aprobetxatzen baita.

Instalazio fotovoltaikoa proiektatu den lurzatian, lehorreko belar-laboreak daude gehienbat. Proiektuaren lurzatiaren barruan, katastroan B azpilurzati bat dago, 0,8 hektareako azalerakoa, larre-sastraka naturalez estalia (gaur egun erreta dago, duela gutxi baso-sute bat izan delako), eta larreetako eta basoko lurzoru gisa erregistratuta dago. Landare naturalen azalera horren mugan, Alepo pinuaren eta altzifrearen landaketa bat dago (90/10), baso zakarraren egoeran, baina baso-sutearen ondorioz kiskalita dago gaur egun hura ere.

Lurzatiaren azalera landare naturalen eremu aldera goratzen da. Hala, azalera nabarmen batek %15etik gorako maldak ditu, eta, lurzatiak koniferoen landaketarekin duen mugan, %30ekoak dira. Lurzoruaren eredu digitaletik lortutako erliebe-maparen arabera (2024ko LIDARen LED, 50 cm-ko bereizmena), lurzatiaren 3,5 hektareak baino gehiagok dituzte malda moderatuak edo handiak (%10 eta %30 arteko malda). Hala ikus daiteke proiektuaren MT-02–04 planoan (Malden azterketa, edozein orientaziotatik, aurreikusitako egoera). Malda handieneko eremuek, landare naturalak dituen aldean, ez dute instalazioen eraginik; baina proiektuak hondeaketak eta lur-mugimenduak aurreikusten ditu lursaila egokitzeko, egiturak perdoien barruan ezarriko direla bermatzeko. Proiektuaren arabera, hondeaketaren bolumena 3.325,50 m³ izanen da guztira, lursaila egokitzeko (3.301 m³) eta bi transformazio-zentroak ezartzeko (24,50 m³). Kalkulatzen denez, betelanaren bolumena 193 m³ da; beraz, hondeaketen 3.132,5 m³-ko soberakina aurreikusten da. Lur-mugimendu horiek MT-01 eta PC-02 planoetan biltzen dira ("Lur-mugimenduko eremuak eta jarduketaren sakonera" eta "2. eraikuntza-prozesua", hurrenez hurren). Azken plano horretan, lurrak metatzeko eremu bat irudikatzen da, baina proiektuan ez da zehazten hondeaketaren soberakinaren azken destinoa izanen den.

Proiektuak zehazten du ebakuazio-linea erdi tentsiokoa izanen dela (20 kV) eta lurperatuta joanen dela, oraingo soroen mugetatik igarotzen den zangatik. Trazadura pasatuko da lurzatien ertzetatik Arga ibaira doazen drainatzeen gainetik. Drainatze horietan landare naturalak daude, eta trazadura Grafitechek ibaiaren ertzean dituen instalazioetara hurbildu ahala, garrantzi handiagoa eta ibaiertzeko landarediaren eitea hartzen dute.

Espedientean jasota dago Erregistroaren, Ondasun Higigarrien eta Arkeologiaren Atalaren txostena, non jasotzen baita inbentariatutako sei aztarnategi arkeologiko ukitzen ahal dituela proiektuak, eta zehazten baita zer bete behar den horietan eraginik ez izateko.

Ebazpen honen baldintzetan, behar diren prebentzio zehaztapenak eta neurriak adierazten dira, proiektua gauzatzeak ez dezan ondorio kaltegarri nabarmenik eragin Ingurumen-ebaluazioari buruzko abenduaren 9ko 21/2013 Legearen 45. artikuluaren 1. apartatuan adierazitako faktoreetan.

Aurkeztutako dokumentazioa ikusita eta proiektua gauzatzearen, ustiatzearen eta bertan behera uztearen ondorioz sortzen ahal diren ingurumen ondorioak aztertuta, Ingurumen Ebaluazioaren Atalak ebatzi du ezen, kontsulten emaitza kontuan izanda eta Ingurumen-ebaluazioari buruzko abenduaren 9ko 21/2013 Legearen III. eranskinean horri dagokionez jasotzen diren irizpideetan oinarrituta, proiektuak ez duela eragin kaltegarri nabarmenik izanen ingurumenean, ingurumen-inpaktuaren txosten honetan jasotako zehaztapenak betetzen badira.

Ingurumen-inpaktuaren ebaluazio sinplifikatuaren prozedura modu egokian bete dela iritzita, adierazitakoarekin bat, eta honako hauek ematen dizkidaten eskudantziak erabiliz: Nafarroako Foru Komunitateko Administrazioari eta foru-sektore publiko instituzionalari buruzko martxoaren 11ko 11/2019 Foru Legearen 32. artikulua, Nafarroako Foru Komunitateko Administrazioaren departamentuen egitura ezartzen duen Nafarroako Foru Komunitateko Lehendakariaren abuztuaren 17ko 10/2023 Foru Dekretua eta Landa Garapeneko eta Ingurumeneko Departamentuaren egitura organikoa ezartzen duen azaroaren 15eko 255/2023 Foru Dekretua,

EBAZTEN DUT:

1. Ingurumen-ebaluazio arruntaren prozedura beharrezkoa ez dela iritzita, ingurumen-inpaktuaren txostena egitea «PSFV Autoconsumo Grafitech» eguzki-instalazio fotovoltaikoaren eta haren barneko ebakuazio-linearen proiekturako, Zizurko (Gazolatz) eta Oltza Zendeako (Ororbia) udalerrietan. Sustatzailea NetOn Project 29 SLU da. Ez da ingurumenaren gaineko ondorio kaltegarri nabarmenik aurreikusten, baldin eta betetzen badira ingurumen-dokumentuan eta ebazpen honetan ezarritako neurriak eta aginduak. Hori guztia ezertan galarazi gabe aplikatu beharreko indarreko legeriaren arabera preziso diren beste emakida edo baimen batzuk lortu beharra.

2. Proiektuaren ingurumen-dokumentuan jasotako neurriak eta ingurumena zaintzeko programa osorik bete beharko ditu sustatzaileak, betiere ebazpen honetan ezarritakoaren aurka ez badoa. Gainera, proiektuak honako baldintza hauek ere bete behar ditu:

1.–Proiektuaren diseinu eta exekuzioa lurzorua eta lurzoruaren morfologia ahalik eta gutxien ukituz egin beharko dira. Horretarako, baldintza hauek beteko dira:

–Arau orokor gisa, ez da modulu fotovoltaikorik instalatuko %10etik gorako malda duten eremuetan.

–Eguzki-instalazio fotovoltaikoa lurraren topografia naturalera egokitu beharko da, eta konponbide teknikoak edo diseinukoak bilatu beharko dira, lurraren profilean aldaketarik egin gabe ezartzeko; hala, obrak egiten diren bitartean, guztiz ezinbestekoa den eremuei soilik eraginen zaie, eta lur-mugimenduak minimizatuko dira. Ez da baimenduko lurreko goiko geruza kentzea instalazioaren ezarpenak hartzen duen azalera osoan; aitzitik, zimendu-zutoinek osatutako lerroetan soilik eraginen da, behar-beharrezkoa bada modulu fotovoltaikoak behar bezala ezartzeko edo funtzionatzeko.

–Azterketa geotekniko zehatza egin ondotik, modulu fotovoltaikoen euste elementuak lurrean zuzenean tinkatuko dira, ahal den guztietan, pilote edo hormigoizko zapataren erabilera ahalik eta txikiena izan dadin.

–Ahaleginak eginen dira lur-mugimenduen soberakinak ahalik eta gehien aprobetxatzeko, obran bertan edo Hondakinei eta Lurzoru Kutsatuei buruzko eta Ekonomia Zirkularra Bultzatzeko apirilaren 8ko 7/2022 Legearen II. eranskinean jasotako balorizazio-eragiketetan erabiliz.

2.–Obrak hasi aurretik, zehaztu eginen dira lan eremuak, makinak pasatzeko eremuak eta materialak pilatzekoak. Landaredi naturala ahalik eta gutxien ukitzeko, lan eremua ahal den txikiena izanen da eta eragin ezin dituen eremuak balizatuko dira. Landaredi naturaleko eremuetan ez da inolako material bilketarik edo isuririk eginen, hondeaketako lurrak ez dira zabalduko eta makinak ez dira eremu horietan kokatuko. Lurzatien arteko banalerroak eta bertan dagoen landaredia mantentzea lehenetsiko da, eta gaur egungo harri metak errespetatuko dira, faunarentzat intereseko lekuak direlako gehienbat nekazaritzarako den ingurune batean. Neurri hori lurpeko linea elektrikoaren trazadurak eta zangek ukitutako azaleretan ere aplikatzen ahalko da.

3.–Oro har, eta ahal den heinean, saihestu beharko da lurzatiaren mugetako eta aldameneko lurzatietako landarediari eta/edo sastrakei eragitea, eta ebakuazio-linea nekazaritza-lurzatien mugetatik trazatu beharko da, larre edo sastrakadietako landaredi naturalari eragin gabe.

4.–Zehazki, ebakuazio-linea lurperatzeko zangaren trazadura ez da pasatuko landaredi naturala duten landa-lurzatien mugen gainetik, eta laborantzako lurretan edo bideetan barna eginen da. Zangak egiteak ez die zuzenean eraginen landa-lurzatien arteko drainatze-ibilguei, ez eta haiei lotutako zuhaixkei eta zuhaitzei ere. Makinak sartu aurretik, prebentzio-neurriak hartuko dira, zeharkako eraginak murrizteko zangaren trazaduratik kanpo geratzen diren landareen gainean, balizak erabiliz, inausketa ez-traumatikoak eginez, etab.

5.–Zangak, transformazio-zentroak, bideak, zapatak eta obra osagarriak egiteko hondeaketa lanetan, landare-lurrezko geruza bat kenduko da, gutxienez 30 cm-ko lodierakoa, bai lur naturalean, bai soroetan. Material hori berariaz hautatutako tokietan metatuko da, 2 m-tik beherako altuera duten piloak osatuz, lanak bukatutakoan zanga betetzeko eta leheneratzeko lanetan erabiltzeko.

6.–Lur mugimenduak eurien garaian egiten badira eta euriak sedimentuak eramaten baditu drainatze sare naturalera, drainatze osagarriak eginen dira, jariatze urak solidoei eusteko sistemetarantz bideratzeko; urak drainatze sare nagusian isuri aurretik kokatutako puntuetan ezarriko dira sistema horiek.

7.–Lanak hasi aitzin, prospekzio bat eginen da jarduketa eremu osoan, babes bereziko araubidean mehatxupeko gisa katalogatutako edo zerrendatutako espezierik ote dagoen antzemateko, eta beharrezkoa bada, espezie horiek babesteko neurri egokiak hartzeko. Lanak egin bitartean Nafarroako landare eta animalia mehatxatuen katalogoetan edota Espainiako espezie mehatxatuen katalogoan jasotako espezieren baten presentzia detektatzen bada, lanek kaltetuko luketena, berehala jakinaraziko zaio Biodibertsitatearen eta Arrantza Kudeaketaren Zerbitzuari, eta hark xedatzen duena bete beharko da.

8.–Kableendako zangak estali aitzinetik, ikuskapena eginen da, nahigabe barrura erori den fauna alerik ez dagoela egiaztatzeko.

9.–Hesi perimetrala zutoinen bidez bakarrik tinkatuko da lurrean, fauna txikiari azpitik igarotzen uzteko, eta horretarako, beheko aldean tarte bat utzi beharko da lurzorura, 20 cm-koa. Ehiza motako sarea izanen da; ez du elementu ebakitzailerik edo zorrotzik izanen, eta ez da txarrantxarik erabiltzen ahalko inolako kasutan.

10.–Hesi perimetrala seinalez markatzeko neurriak hartuko dira, hegaztiek talka egitea saihesteko. Horretarako, plakak paratuko dira, metalikoak ahal bada, 15x30 edo 20x20 cm-koak, zuriak edo kontraste handikoak, batetik bestera 2 metroko tarte horizontala utziz eta bi ilaratan jarrita, itxituraren altuera desberdinetan eta modu alternoan.

11.–Proiektuan adierazten denez, ez da kanpoko argiteriarik instalatuko instalazio fotovoltaikoan, intrusioaren aurkako ekipoei lotutakoa izan ezik; hori martxan jarriko da baldin eta zaintza-sistemak anomaliaren bat detektatzen badu. Nolanahi ere, intentsitate txikikoa izanen da, zorura begirakoa, eta nahi den eremua soilik argiztatuko da.

12.–Sustatzaileak bete beharko ditu Erregistroaren, Ondasun Higigarrien eta Arkeologiaren Atalak kontsulta-fasean emandako 2026ko irailaren 2ko txostenean adierazitako zehaztapenak.

13.–Jarraipen arkeologiko intentsiboa, legeak hala aginduta, teknikari arkeologo batek edo sektoreko enpresa espezializatu batek egin beharko du, proiektuaren sustatzailearen kontura. Horien arduradunak Kultura Zuzendaritza Nagusiaren baimen administratiboa beharko du, urriaren 3ko 218/1986 Foru Dekretuan xedatutakoari jarraikiz, horrexek arautzen baititu Nafarroako Foru Komunitatean egin beharreko prospekzio eta indusketa arkeologikoak. Ikuskapen-lana Erregistroaren, Ondasun Higigarrien eta Arkeologiaren Atalari dagokio (helbide elektronikoa: arqueologia@navarra.es), eta, horretarako, obraren sustatzaileak idatziz jakinarazi beharko du, nahitaez eta behar den denboraz, egin beharreko lanen hasiera.

14.–Obrak egitean, aztarna arkeologikoren bat agertzen bada, legeak agintzen du horren berri eman behar zaiola lehenbailehen Erregistroaren, Ondasun Higigarrien eta Arkeologiaren Atalari (helbide elektronikoa: arqueologia@navarra.es), hala jasota baitago ondare historikoaren arloan indarra duen legerian (Nafarroako Kultur Ondareari buruzko azaroaren 22ko 14/2005 Foru Legearen 59. artikuluan eta Espainiako Ondare Historikoari buruzko ekainaren 25eko 16/1985 Legearen 42.3 eta 44. artikuluetan). Hala egin ezean, eginbehar hori ez betetzeagatik ondare historikoari eragiten zaizkion ukipen guztiak arau-hauste astuntzat hartuko dira, aipatutako foru lege horren 101.h artikulua aplikatuz.

15.–Obrak hasi baino 72 ordu lehenago, gutxienez, jakinarazi beharko zaio IEEaren eta Ingurumen Jarraipenaren Bulegoari, posta elektronikoz eta dei eginez: seguimiento.ambiental@navarra.es eta 848 42 14 86 telefonoa. Baita Ingurumena Zaintzeko Atalari (Iruñeko barrutia) ere: gmapamplona@navarra.es eta 608 062 649/948 18 86 90 telefonoak.

16.–Obrak bukatutakoan, behin-behineko instalazioak desmuntatu eta kenduko dira, eta obra hondarrak garbituko dira okupatu den eremu osoan. Lanek eragindako gainazal guztiak, aldi batez eragindakoak barne, harrotu eginen dira eta, behar izanez gero, landare lurraren geruza batez estaliko dira, zeina lehenago kendu eta behar bezala pilatuko baita. Lanak bukatzen direnetik sei hilabete igaro baino lehenago, eragindako gainazal guztietan inguruko espezie autoktonoen belar hazien nahasketa bat ereinen da, laborantzara bideratu beharreko eremuetan izan ezik.

17.–Proiektua gauzatzean erabili diren bideak obra bukatutakoan lehengoratu behar dira, haien funtzionaltasuna erabat berreskuratu arte.

18.–Proiektuan adierazten den bezala, abeltzaintza estentsiboa erabiliko da plaken eremuan dagoen landaredia kontrolatzeko eta mantentzeko. Premia handiko kasuetan, sastrakak mekanikoki kentzen ahalko dira. Herbizidak erabiltzea espresuki debekatua dago.

19.–Panelak garbitzeko ezarriko den sistemak ez du erabiliko gai kimiko kutsagarri edo arriskugarririk.

20.–Lagomorfo, karraskari eta bestelako animalien kontrola beharrezkoa balitz, aurrez behar diren baimenak lortuta egin beharko litzateke, bitarteko mekaniko eta biologikoak erabiliz, guztiz debekaturik dagoelako pestizida, intsektizida, errodentizida eta bestelako pozoiak erabiltzea.

21.–Ingurumen-dokumentuan ingurumena zaintzeko proposatutako programa beteko da (ingurumen-inpaktuaren azterketa sinplifikatua, 2026ko apirila). Ingurumena zaintzeko programan aurreikusitako bisita planarekin bat, inguruko hesiarekin edo modulu fotovoltaikoekin talka egitearen ondorioz hildako hegaztien gorpuzkiak bilatuko dira. Nafarroako edo Espainiako espezie mehatxatuen katalogoetako espezierik aurkituz gero, edo faunaren ezohiko heriotza tasa bat antzematen bada, berehala jakinaraziko zaio Ingurumen Ebaluazio Estrategikoaren eta Ingurumen Jarraipenaren Bulegoari (seguimiento.ambiental@navarra.es). Lortutako datuen arabera, eta Landa Garapeneko eta Ingurumeneko Departamentuak baimendu ondoren, gorpuzkiak bilatzeko lanak murrizten ahalko dira.

22.–Ustiapen-aldia amaitutakoan, instalazio guztiak kenduko dira, eta okupatutako lursailak leheneratuko dira urtebete baino epe laburragoan. Instalazio guztiak behar bezala desmuntatu eta kenduko dira; hondakinak indarreko legediaren arabera kudeatuko dira, eta landare estalkia lehengoratuko da. Jarduketa horiek dagokien ingurumen ebaluazioko prozeduraren esparruan eginen dira.

23.–Txosten honek ez du salbuesten sustatzailea aplikagarrian den indarreko legeriaren arabera beharrezkoak diren gainerako baimenak lortzetik.

3. Ingurumen-ebaluazioari buruzko abenduaren 9ko 21/2013 Legearen 47.5 artikuluan aurreikusitakoari jarraikiz, ingurumen txostenaren aurka ezin izanen da errekurtsorik jarri, proiektua baimentzeko egintzaren aurka bide administratibo edo judizialean jar daitezkeenak galarazi gabe.

4. Ebazpen hau Nafarroako Aldizkari Ofizialean argitaratzea.

5. Ebazpen hau igortzea, behar diren ondorioak izan ditzan, Azpiegitura Energetikoen Atalari, Paisaiaren eta Landa-lurzoruaren Atalari, Oltzako Zendeako eta Zizurreko udalei, Ingurumen Zaintzeko Atalari (Iruñeko Koordinazio Unitatea) eta interesdunari.

Iruñean, 2026ko urriaren 20an.–Ingurumeneko zuzendari nagusia, Ana Bretaña de la Torre.

Iragarkiaren kodea: F2614084