1. NAFARROAKO FORU KOMUNITATEA
1.7. BESTELAKOAK
247/2026 EBAZPENA, urriaren 15ekoa, Hezkuntza Departamentuko Irakasleak Hautatzeko eta Lanpostuak Betetzeko Zerbitzuko zuzendariak emana, argitara ematen dituena Haur eta Lehen Hezkuntza eta Derrigorrezko Bigarren Hezkuntzako lehenengo bi mailak eskaintzen dituzten ikastetxe publikoen zonifikazioa eta departamentu honen mendeko ikastetxe eta programetako plantillak, eta zehazten dituena, alde batetik, plazak ezabatzeko eta plaza ibiltariei atxikitzeko eskaeren prozedurak, eta bestetik, 2026-2027 ikasturteko lekualdatze-lehiaketaren deialdian bete beharreko behin-behineko plaza hutsak (maisu-maistren kidegoko irakasleei dagozkienak).
Hezkuntza Departamentuko Irakasleak Hautatzeko eta Lanpostuak Betetzeko Zerbitzuko zuzendariaren urriaren 8ko 246/2026 Ebazpenaren bidez, dei egin da estatu mailako lekualdatze-lehiaketarako, kidego hauetako irakasle funtzionarioentzat: maisu-maistren kidegoa, Bigarren Hezkuntzako katedradunen eta irakasleen kidegoa, Lanbide Heziketako irakasle teknikoen kidego iraungia, Lanbide Heziketako sektore berezietako irakasle espezialisten kidegoa, hizkuntza eskola ofizialetako katedradunen eta irakasleen kidegoa, Musikako eta Arte Eszenikoetako katedradunen eta irakasleen kidegoa eta Arte Plastikoetako eta Diseinuko katedradunen, irakasleen eta lantegiko maisu-maistren kidegoa.
Ebazpen horren laugarren oinarriaren arabera, deialdian beteko diren plaza hutsak, hala behin-behinekoak nola behin betikoak, lekualdatze-lehiaketa hauen prozedura-arau aplikagarriak ezarri zituen irailaren 10eko EFD/1041/2026 Aginduaren bosgarren apartatuan aurreikusitako egunetan zehaztuko dira, eta Hezkuntza Departamentuaren web orrian argitaratuko dira: https://www.educacion.navarra.es/eu/.
Azaldutakoarekin bat, bidezkoa da argitaratzea Haur eta Lehen Hezkuntza eta Derrigorrezko Bigarren Hezkuntzako lehenengo bi mailak eskaintzen dituzten ikastetxe publikoen zonifikazioa eta departamentu honen mendeko ikastetxe eta programetako plantillak.
Bestalde, beharrezkoa da zehaztea plazak formalki ezabatzeko eskaeren prozedura kasuan kasuko plantillan plaza aurreikusia ez duten maisu-maistren kidegoko lanpostuetako irakasleentzat, baita plaza ibiltariei atxikitzeko eskaeren prozedura ere.
Halaber, bidezko da zehaztea 2026-2027 ikasturteko lekualdatze-lehiaketaren deialdian bete beharreko behin-behineko plaza hutsak (maisu-maistren kidegoko irakasleei dagozkienak).
Horiek horrela, Hezkuntza Departamentuko Langileriaren zuzendari nagusiaren martxoaren 13ko 2/2026 Ebazpenaren bidez eskuordetutako eskudantziak erabiliz,
EBAZTEN DUT:
1. Ebazpen honen I. eranskin gisa argitaratzea Haur eta Lehen Hezkuntza eta Derrigorrezko Bigarren Hezkuntzako lehenengo bi mailak eskaintzen dituzten ikastetxe publikoen zonifikazioa.
Zonifikazio hori aplikatuko da urriaren 29ko 1364/2010 Errege Dekretuaren 16. eta 17. artikuluetan aurreikusitako egoeretan dauden maisu-maistren kidegoko irakasleek erabil dezaten lehentasunezko eskubidea, apirilaren 30eko 37/2014 Foru Dekretuaren 7. artikuluan xedatutakoari jarraituz. Errege dekretu horren bidez, Hezkuntzari buruzko maiatzaren 3ko 2/2006 Lege Organikoan adierazitako irakasleen kidegoetako funtzionarioen estatuko lekualdatze-lehiaketak eta haiek bete beharreko plazak betetzeko beste prozedura batzuk arautu ziren.
2. Ebazpen honen II. eranskin gisa argitaratzea Nafarroako Foru Komunitateko Haur eta Lehen Hezkuntzako ikastetxe publikoetako plantillak, Derrigorrezko Bigarren Hezkuntzako lehenengo bi mailetakoak eta beste ikastetxe eta programa batzuetakoak, eta zehaztea zein diren 2026-2027 ikasturteko lekualdatze-lehiaketaren deialdian bete beharreko behin-behineko plaza hutsak (maisu-maistren kidegoko irakasleei dagozkienak).
Plaza hutsen zutabean agertzen den minus ikurrak esan nahi du lehiaketaren ondoriozko plazak amortizatu eginen direla, eta, hortaz, bete beharreko plaza kopurua ez dela handituko.
Ebazpen honetan aurreikusitako plazei lekualdatze-lehiaketaren deialdia ebaztearen ondorioz sortzen direnak gehituko zaizkie. Horiez gain, gutxienez 2026ko abenduaren 31ra arte erretiroengatik, heriotzengatik edo plaza gordetzeko eskubiderik gabeko eszedentziengatik sortzen diren plaza hutsak ere sartuko dira. Plaza horiek guztiek eskola plangintzan aurreikusiak egon beharko dute.
3. Deialdia ebatzi eta gero Derrigorrezko Bigarren Hezkuntzako lehenengo bi mailetan esleitu gabe geratzen diren plaza hutsak, baita deialdiaren ondorioz hutsik gelditzen direnak ere, Derrigorrezko Bigarren Hezkuntzako irakasleen kidegoko funtzionarioei eskainiko zaizkie lanpostuak betetzeko hurrengo prozesuetan, betiere eskola plangintzan aurreikusiak baldin badaude.
4. Ebazpen honen bidez onesten diren plantilletan ez da plazarik ezabatuko. Horrela, onetsitako plantillatik gora gelditzen diren plazak, "(+)" ikurra daukatenak, erretiroak, eszedentziak edo lanpostua galtzea dakarten ezabaketak direla-eta amortizatuko dira, hutsik gelditzen badira lehiaketaren, heriotzaren edo antzeko arrazoien ondorioz.
5. Behin betiko destinoa duten maisu-maistren kidegoko funtzionarioek, baldin eta beren plaza onetsitako plantilletan aurreikusita ez badago, beren plaza ezabatzeko eskatzen ahalko dute, prozedura honen arabera:
a) Kasuan kasuko plantillan aurreikusi ez diren edo murriztu diren plazei atxikiak dauden maisu-maistrek plazak ezabatzeko eskaera egiten ahalko diote Irakasleak Hautatzeko eta Lanpostuak Betetzeko Zerbitzuari, eta, horretarako, ebazpen honen II. eranskinean azaltzen den agiria beteko dute. Eskaera hori aurkezteko epea 5 egun baliodunekoa izanen da, ebazpen hau Nafarroako Aldizkari Ofizialean argitaratu eta biharamunetik hasita.
b) Murriztutako espezialitateko edo hizkuntzako plazei atxikitako maisu-maistra eskatzaileak gehiago badira murriztutako plazak baino, hurrengo irizpideak bata bestearen ondoren aplikatzetik ateratzen diren maisu-maistrei eraginen die ezabaketak:
1. Behin betiko langile gisa etengabeko antzinatasun handiena izatea ikastetxean edo eskualdean, lanpostu bereziei atxikitako maisu-maistren kasuan.
2. Maisu-maistren kidegoan benetan emandako zerbitzuetan denbora gutxien duena, funtzionario, lan-kontratudun edo aldi baterako administrazio-kontratudun langile gisa.
Kidegoan abenduaren 30eko 31/1991 Legearen 29. xedapen gehigarriari jarraikiz sartu ziren langileei dagokienez, maisu-maistren kidegoko karrerako funtzionario gisa duten antzinatasunari lan-kontratudun finko gisa egiaztaturik dutena gehituko zaie, lehen zerbitzu urtea kenduta.
3. Nor sartu zen lehenago kidegoan (urtea).
4. Kidegoan sartzeko hautapen prozeduran, zerrendan zenbaki txikiena izatea edo puntuazio handiena.
c) Lanpostua ezabatzeak 5 egun balioduneko epearen azken egunean izanen ditu ondorioak, ebazpen hau Nafarroako Aldizkari Ofizialean argitaratu eta biharamunetik hasita. Hortaz, interesdunek ikasturte honetako lekualdatze-lehiaketan erabiltzen ahalko dute lanpostuak betetzeko araudian aurreikusitako lehentasunezko eskubidea, bat etorriz Irakasleak Hautatzeko eta Lanpostuak Betetzeko Zerbitzuko zuzendariaren urriaren 7ko 246/2026 Ebazpenean ezarritako baldintzekin. Ebazpen horren bidez estatu mailako lekualdatze-lehiaketa deia egiten da, kidego hauetako irakasle funtzionarioentzat: maisu-maistren kidegoa, Bigarren Hezkuntzako katedradunen eta irakasleen kidegoa, Lanbide Heziketako irakasle teknikoen kidego iraungia, Lanbide Heziketako sektore berezietako irakasle espezialisten kidegoa, Hizkuntza Eskola Ofizialetako katedradunen eta irakasleen kidegoa, Musikako eta Arte Eszenikoetako katedradunen eta irakasleen kidegoa eta Arte Plastikoetako eta Diseinuko katedradunen, irakasleen eta lantegiko maisu-maistren kidegoa.
6. Maisu-maistren kidegoko irakasleek behin betiko destinoa ikastetxe bateko plaza arrunt batean baldin badute, plantillan ibiltari gisa ageri dena, plaza ibiltari berriari atxikitzea hautatzen ahalko dute, ikastetxean duten antzinatasuna ondorio guztietarako mantenduz, edo, bestela, plaza ezabatzea hautatu, aurreko atalean adierazitako baldintzetan.
Plaza ibiltariari atxikitzea erabakitzen badute, IV. eranskineko ereduaren araberako eskaera bete, eta Irakasleak Hautatzeko eta Lanpostuak Betetzeko Zerbitzura igorri beharko dute, 5 egun balioduneko epean, ebazpen hau Nafarroako Aldizkari Ofizialean argitaratu eta biharamunetik hasita. Plaza berriko atxikipenak 2027ko irailaren 1etik aurrera izanen ditu ondorioak.
Destinoa ikastetxe bati atxikitako lanpostu ibiltari batean duten maisu-maistren kidegoko funtzionarioen kasuan, lanpostu hori ikastetxeko lanpostu arrunt gisa ageri bada plantillan, ofizioz atxikiko zaizkio ikastetxeko lanpostu arrunt berriari, eta horrek 2027ko irailaren 1etik aurrera izanen ditu ondorioak.
7. Ebazpen hau Nafarroako Aldizkari Ofizialean argitaratzea, eta eranskinak Hezkuntza Departamentuaren web-orrian (www.educacion.navarra.es/eu/) argitara daitezela agintzea.
8. Ebazpen honen eta bere eranskinen aurka gora jotzeko errekurtsoa aurkezten ahalko dute interesdunek, Barneko, Funtzio Publikoko eta Justiziako Departamentuko kontseilariari zuzendua, hilabeteko epean, Nafarroako Aldizkari Ofizialean argitaratu eta biharamunetik aurrera.
9. Ebazpen hau eta eranskinak Hezkuntza Departamentuko Idazkaritza Tekniko Nagusira, Irakasleak Hautatzeko eta Lanpostuak Betetzeko Zerbitzuko Lanpostuak Betetzeko Atalera, Hezkuntzako Ikuskapen Zerbitzura eta Kudeaketa Juridiko-administratiboaren Atalera igortzea, behar diren ondorioak izan ditzaten.
Iruñean, 2026ko urriaren 15ean.–Irakasleak Hautatzeko eta Lanpostuak Betetzeko Zerbitzuko zuzendaria, Ricardo Iribas Latour.
Iragarkiaren kodea: F2613585
