Iragarkia

216. ALDIZKARIA - 2026ko urriaren 29a

1. NAFARROAKO FORU KOMUNITATEA

1.4. DIRU-LAGUNTZAK, LAGUNTZAK ETA BEKAK

420E/2026 FORU AGINDUA, urriaren 7koa, Osasuneko kontseilariak emana, zeinaren bidez prestakuntzarako beka baten deialdirako oinarriak onesten baitira, Zuzenbideko lizentziadun edo gradudunentzat, Osasun Departamentuko Idazkaritza Tekniko Nagusian aritzeko.

Osasun Departamentuko Idazkaritza Tekniko Nagusiaren ustez, interesgarria da Zuzenbideko lizentzia edo gradua egin duten unibertsitate-tituludunen prestakuntza sustatzea, departamentu honetan aurrera eramaten diren politikak zuzenean ezagut ditzaten. Tituludun horiek espedienteen kudeaketarekin, espedienteen analisi juridikoarekin eta araudiaren aplikazioarekin lotutako laguntza-eginkizunak izanen dituzte, bai eta agintzen zaien beste edozein ere.

Bekaren deialdiaz eta hura emateaz oinarri arautzaileetan ezarrita ez dagoen orotan, arau hauetan xedatutakoari jarraituko zaio: Nafarroako Foru Komunitateko Administrazioan eta haren erakunde autonomoetan prestakuntza bekak emateko araubide orokorra ezartzen duen apirilaren 19ko 172/2004 Foru Dekretua eta, osagarri gisa, Dirulaguntzei buruzko azaroaren 9ko 11/2005 Foru Legea.

Halaber, Emakumeen eta Gizonen arteko Berdintasunari buruzko apirilaren 4ko 17/2019 Foru Legea aplikatuko da. Foru lege horrek adierazten du Nafarroako Administrazio Publikoek onesten dituzten dirulaguntzen, beken eta beste edozein laguntza publikoren oinarri arautzaileetan berdintasun klausulak sartuko direla genero berdintasuna benetan gauzatzeko jarduketak baloratzeko edo, bestela, jarduketa horiek nahitaez betearazteko.

Espedienteko txostenak ikusirik eta Osasun Departamentuko egitura organikoa ezartzen duen azaroaren 15eko 246/2023 Foru Dekretuaren eta Nafarroako Foru Komunitateko Administrazioan eta haren erakunde autonomoetan prestakuntza bekak emateko araubide orokorra ezartzen duen apirilaren 19ko 172/2004 Foru Dekretuaren bidez emandako eskudantziak erabiliz,

AGINTZEN DUT:

1. Prestakuntza beka baten deialdia onestea, Zuzenbideko lizentziadun edo gradudunentzat, Osasun Departamentuko Idazkaritza Tekniko Nagusian aritzeko. Oinarri arautzaileak foru agindu honen eranskinean agertzen dira.

2. Prestakuntza bekaren esleipenaren kostuari aurre egiteko, 18.000 euroko gastua baimentzea, 2027ko Nafarroako Aurrekontu Orokorretako "Beka juridikoa" izeneko 500000 51000 4800 311100 partidaren kargura.

3. Deialdi honen oinarrien aurka gora jotzeko errekurtsoa jartzen ahal da, Nafarroako Gobernuari zuzendua, hilabeteko epean, jakinarazi eta biharamunetik aurrera, bat etorriz Administrazio Publikoen Administrazio Prozedura Erkideari buruzko urriaren 1eko 39/2015 Legearen 112. artikuluarekin eta hurrengoekin eta Nafarroako Foru Komunitateko Administrazioari eta foru-sektore publiko instituzionalari buruzko martxoaren 11ko 11/2019 Foru Legearen 126. artikuluarekin.

4. Ebazpen hau eta bere eranskinak Nafarroako Aldizkari Ofizialean argitaratzea, eta Kontabilitate Zentrora, Osasun Departamentuko Idazkaritza Tekniko Nagusira eta Nafarroako Dirulaguntzen Datu Basera igortzea, behar diren ondorioak izan ditzaten.

Iruñean, 2026ko urriaren 7an.–Osasuneko kontseilaria, Fernando Domínguez Cunchillos.

I. ERANSKINA.–OINARRIAK, ZUZENBIDEKO LIZENTZIADUN EDO GRADUDUNENTZAKO PRESTAKUNTZA BEKA BATEN DEIALDIRAKO, OSASUN DEPARTAMENTUKO IDAZKARITZA TEKNIKO NAGUSIAN ARITZEKO,
2027. URTERAKO

1. oinarria. Xedea.

Deialdiaren xedea da Zuzenbideko lizentziadunak edo gradudunak prestatzeko beka bat ematea, norgehiagokako araubideari jarraikiz, Osasun Departamentuko Idazkaritza Tekniko Nagusian aritzeko.

Deialdiaren helburua da unibertsitateko lizentziadunen edo gradudunen prestakuntza bultzatzea, modu praktiko eta zuzenean ezagut ditzaten Osasun Departamentuan eta haren erakunde autonomoetan egiten diren jarduketak.

2. oinarria. Aurrekontuko diru erabilgarria.

18.000 euro izanen dira bekarako, 2027ko Nafarroako Aurrekontu Orokorretako "Beka juridikoak" izeneko 500000 51000 4800 311100 aurrekontuko partidaren kargura. Gorde beharreko gehieneko zenbatekoaren barnean Gizarte Segurantzaren enpresa kuota ordaintzeko zenbatekoa dago.

3. oinarria. Iraupena.

Beka emateko ebazpenean adierazitako egunean hasiko da bekaldia. Aurreikusten da 2027ko urtarrilaren 11 izatea hasiera data, eta urte bereko abenduaren 31n amaituko da.

Beka sei hilabetez behin luzatzen ahalko da, Idazkaritza Tekniko Nagusiaren ebazpenaren bidez. Horretarako, aldez aurretik eskaera egin beharko du bekaren tutoreak eta konforme egon beharko du bekadunak. Luzapenerako baldintza izanen da aurrekontuetan horretarako kreditu erabilgarri nahikoa egotea.

Bekak hogeita hamasei hilabete iraunen du gehienez, izaten ahal diren luzapenak barne.

4. oinarria. Bekaren zenbatekoa eta ordainketa.

Bekaren zuzkidura hilero 1.400 euro gordinekoa izanen da, edo dagokion zati proportzionala, hala behar bada. Kopuru horretatik bekadunari dagokion Gizarte Segurantzaren kuota deskontatuko da. Diru kopuru horretan pertsona fisikoen errentaren gaineko zergari dagokion atxikipena eginen da, indarra duten arauei jarraikiz hala egin behar baldin bada.

Bekaren onuraduna besteren konturako araubidean dauden langileen parekoa izanen da Gizarte Segurantzako Araubide Orokorrean sartzearen ondorioetarako, urriaren 24ko 1493/2011 Errege Dekretuan ezarri bezala; dekretu horrek prestakuntza programetan parte hartzen dutenak Gizarte Segurantzako Araubide Orokorrean nola eta zein baldintzatan sartzen diren arautzen du, Gizarte Segurantzaren sistema eguneratu, egokitu eta modernizatzeari buruzko abuztuaren 1eko 27/2011 Legearen hirugarren xedapen gehigarrian aurreikusitakoa garatuz.

Gizarte Segurantzako Araubide Orokorrean sartzeko (bertan afiliatzeko eta/edo alta hartzeko), eta araubide horretatik ateratzeko ere, kontuan hartuko da onuraduna noiz hasten den prestakuntza programan eta noiz uzten duen, enpresak Gizarte Segurantzan inskribatzeko eta langileak afiliatzeko, alta eta bajak hartzeko eta haien datuak aldatzeko Erregelamendu Orokorrean ezarritako modu, epe eta ondorioekin.

Onuradunari ematen zaion dirua ez da inolaz ere soldata edo lansaritzat hartuko, laguntza ekonomiko publikotzat baizik.

5. oinarria. Bateraezintasunak.

Prestakuntza beka bateraezina izanen da administrazio beraren eta beste administrazio publiko batzuen bekekin.

Era berean, ezin izanen dira bekaren onuradun izan Administrazioaren beraren beste beka baten onuradun izan direnak, baldin eta beka honen ezaugarri berberak badituzte.

6. oinarria. Izangaiek bete beharreko baldintzak.

6.1. Dokumentazioa aurkezteko epea bukatzen den egunean honako betebehar hauek guztiak betetzen dituzten pertsona fisikoak soilik izaten ahal dira onuradunak:

a) Adinez nagusia izatea.

b) Espainiako nazionalitatea izatea edo Europar Batasuneko estaturen batekoa edo, Europar Batasunak izenpetu eta Espainiak berretsitako nazioarteko tratatuen arabera, langileen joan-etorri askea aplikatzen duen estaturen batekoa. Nolanahi ere, Espainiako nazionalitatea ez dutenek gaztelaniaz behar adina badakitela frogatu beharko dute.

c) Jarduteko gaitasun osoa izatea eta desgaitua ez egotea Nafarroako Foru Komunitateko Administrazioaren eta haren erakunde autonomoen laguntza eta dirulaguntza publikoak jasotzeko, bat etorriz Dirulaguntzei buruzko azaroaren 9ko 11/2005 Foru Legearen 13.2 artikuluarekin.

d) Bizitokia Nafarroan izatea, deialdia argitaratu baino urte bat lehenagotik gutxienez.

e) 1. oinarrian aipatzen den unibertsitateko titulu ofiziala izatea, Espainiako agintariek emana edo homologatua.

f) Eskatutako unibertsitateko titulu ofiziala bekaren deialdi hau argitaratu aurreko hiru urteen barrenean eskuratua izatea.

g) Beharrezkoa bada, beka emateko ebazpenaren aurretik frogatzea zerga betebeharrak eta Gizarte Segurantzarekikoak egunean dituela. Horrekin batera, aitorpen edo hitzemate idazki bat aurkeztu beharko du, adierazteko ez duela kobratzen Nafarroako Foru Komunitateko Administrazioaren beste departamentu batetik edo beste administrazio edo entitate publiko edo pribatu batetik helburu bera duen beste edozein laguntza publiko bateraezin.

h) Ez izatea ezintasun fisikorik edo gaixotasunik, bekaren xedeko prestakuntzan aritzea galarazten ahal dionik.

6.2. Betebehar horiek guztiak bekak irauten duen denbora osoan bete beharko dira.

7. oinarria. Balorazio baremoa.

1. Ebaluazio batzordeak aurkezten diren eskaerak aztertu eta baloratuko ditu; gero, beka emateko proposamena eginen du, lortutako puntuazioaren araberako ordenari jarraikiz. Gehienez ere 25 puntu lortzen ahalko dira.

Baremo honi jarraituz baloratuko dira eskaerak:

a) Ikasketa espedientea. 10 puntu, gehienez.

Espedientearen batez besteko nota baloratuko da, zeina eskaeran zenbaki gisa adieraziko baita.

Ez dira baloratuko 6,5 puntutik beherako batezbestekoa duten espedienteak (10 puntuko eskalan).

Honako puntuazio hauek emanen dira:

–Nahikoa (6,5etik 6,99ra bitarteko batez besteko nota): 6 puntu,

–Oso ongi (7tik 8,99ra bitarteko batez besteko nota): 8 puntu,

–Bikain (batez besteko nota 9tik 9,99ra): 9 puntu eta

–Ohorezko matrikula (10eko batez besteko nota): 10 puntu.

b) Deialdi honetan eskatutakoaz bestelako lizentzia edo gradu tituluak. 2 puntu, gehienez.

Zuzenbidekoa ez den lizentziako edo graduko unibertsitate titulu bakoitzeko puntu bat emanen da.

c) Unibertsitateko master titulua Zuzenbideko espezializazioan. 2 puntu, gehienez.

Espezializazio juridikoko unibertsitateko master titulu bakoitzeko puntu bat emanen da, baldin eta horietan sartzeko Zuzenbideko gradu edo lizentzia izatea derrigorrezkoa bada.

d) Hizkuntzak jakitea: euskara, ingelesa, frantsesa eta alemana. 4 puntu, gehienez.

Hizkuntza eskola ofizial batek emandako gaitasun agiria edo C2 titulua edo ofizialki baliokidea den titulua edukiz gero, 1 puntu gehienez hizkuntza bakoitzarengatik, baremo honen arabera:

Hizkuntza eskola ofizialetatik kanpoko ikastetxeetan egindako ikasketen kasuan, berariaz aipatu beharko da egindako ikasketak zein ziurtagiriren baliokideak diren, Hizkuntzetarako Europako Erreferentzia Esparru Bateratuaren gomendioei jarraikiz. Aipatutako titulua berariaz aurkeztu beharko da.

e) Emakumeen eta gizonen arteko berdintasunaren arloko prestakuntza: 4 puntu gehienez. 20 ordutik beherako ikastaroak ez dira kontuan hartuko.

–600 ordutik gorako prestakuntza: 4 puntu.

–400 ordutik 600 ordura bitarteko prestakuntza: 3 puntu.

–200 ordutik 400 ordura bitarteko prestakuntza: 2 puntu.

–20 ordutik 200 ordura bitarteko prestakuntza: 1 puntu.

Erakunde edo zentro publikoek eta unibertsitate publikoek nahiz pribatuek antolatutako edo emandako prestakuntza baino ez da baloratuko. Prestakuntza zentroak emandako ziurtagiriaren bidez egiaztatu beharko da prestakuntza, eta bertan eskola-orduen kopurua adierazi beharko da. Eskola-orduen kopurua agertzen ez duten ziurtagiriei 0 puntuko balorazioa emanen zaie.

f) Elkarrizketa pertsonala. 3 puntu gehienez.

Gehienez ere 10 lagun deitzen ahalko dira elkarrizketa pertsonalera ebaluazio batzordearen aurrean. Baremazioaren a) letratik e) letrara bitartean lortutako puntuazioen arabera eginen zaie deia.

Baloraziorako honako hauek hartuko dira kontuan: motibazioa, ekimena, erantzunen argitasuna eta ordena, gaiak beren artean lotzeko gaitasuna, talde-lanerako gaitasuna eta beste gaitasun sozial batzuk.

Aipatu a) letratik e) letrara bitarteko balorazioetan puntuaziorik handiena lortzen duten eskatzaileei dei eginen zaie telefonoz eta posta elektronikoz, gutxienez ere 72 ordu lehenago. Elkarrizketa egitea nahitaezkoa da, eta hautapen prozesutik baztertu eginen da agertzen ez dena; halakoetan, puntuazio handiena duen hurrengoari deituko zaio.

2. Puntu-berdinketak hausteko irizpideak: Bekarako izangaien merezimendu guztiak batu ondoren puntu-berdinketa gertatuz gero, a) atalean puntuaziorik altuena lortu duenaren alde eginen da. Berdinketa horrela hausten ez bada, b) eta c) atalen zenbaketaren arabera ebatzi beharko da. Berdinketak jarraituz gero, zozketa bidez erabakiko da.

8. oinarria. Eskaerak.

8.1. Interesdunek dagokion eskaera aurkeztu beharko dute, deialdi hau Nafarroako Aldizkari Ofizialean argitaratu eta biharamunetik 15 egun balioduneko epean, Osasun Departamentuaren erregistroan, Nafarroako Gobernuaren gainerako erregistro bulegoetako edozeinetan, edo, bestela, Administrazio Publikoen Administrazio Prozedura Erkideari buruzko urriaren 1eko 39/2015 Legearen 16.4 artikuluan aipatzen diren tokietatik edozeinetan.

Telematika bidez ere aurkezten ahal dira, Nafarroako Gobernuak Interneten duen Atariko tramiteen katalogoko fitxa erabiliz (https://www.navarra.es/eu/tramiteak). Fitxa horretan, esteka bat izanen da Nafarroako Foru Komunitateko Administrazioaren Erregistro Orokor Elektronikoan sartzeko. Bertan identifikatzeko, ziurtagiri digitala eduki behar da.

8.2. Eskaerarekin batera honako agiri hauek aurkeztuko dira:

a) Eskaera-orria, eredu normalizatuaren araberakoa (II. eranskina). nafarroa.eus webguneko fitxan ere eskuratzen ahalko da. Esteka honetatik sar daiteke fitxa horretara:

https://www.navarra.es/eu/tramiteak/on/-/line/beca-de-formacion-para-personas-licenciadas-o-graduadas-en-derecho-para-la-secretaria-general-tecnica-del-departamento-de-salud

b) Eskatzailearen curriculum vitaea, non jasoko baitira, zehatz-mehatz, lortutako merezimendu guztiak.

c) Zuzenbideko lizentziaren edo graduaren tituluaren fotokopia.

d) Ikasketa espedientearen ziurtagiria (jatorrizkoa edo fotokopia), non agertu behar baitira maila bakoitzeko ikasgai guztien kalifikazioak, berariaz aipatuta zein deialditan gainditu zituen, eta lortutako batez besteko nota.

e) Alegatutako merezimenduak frogatzeko agiriak. Hizkuntzen kasuan, korrespondentzia-taulak web honetan daude ezarrita:

https://formainap.navarra.es/inapidiomas_web/eu/hizkuntzen-egiaztapena/laburpen-taula/

f) Nortasun agiri nazionalaren edo baliokidea den identifikazio agiri baten kopia.

g) Nafarroan erroldatuta egotearen ziurtagiria, gehienez ere bi hilabete lehenago emana, noizkoa den jasotzen duena.

h) Eskatzailearen erantzukizunpeko adierazpena, adierazten duena ez dagoela onuradun izatea galarazten dioten egoeretako bakar batean ere, Dirulaguntzei buruzko azaroaren 9ko 11/2005 Foru Legearen 13.2 artikuluaren arabera.

8.3. Epearen barrenean aurkeztutako eskaerak aurreko zenbakietan finkatutako dokumentuak ez baditu, interesdunari eskatuko zaio hamar egun balioduneko epean zuzendu dezala, eta adieraziko zaio ezen, zuzendu ezean, eskaerari uko egiten diola ondorioztatuko dela eta espedientea artxibatzeko ebazpena emanen dela; ebazpen hori jakinarazi eginen zaio.

Zuzenketa hori egiteko, nafarroa.eus web-orriko fitxaren bidez aurkeztuko da eskatutako dokumentazioa.

Eskatzaileek helbide elektroniko bat emanen dute, behar diren komunikazioak edo jakinarazpenak egiteko.

Deialdian ezarritako merezimenduei buruzko agiriak aurkezten ez badira, ezin izanen da zuzenketarik egin.

8.4. Prestakuntza beka jasotzeko eskaera aurkezteak berekin dakar eskatzaileak deialdiaren oinarriak onartzea.

9. oinarria. Ebaluazio batzordearen osaera eta bekak emateko prozedura.

9.1. Ebaluazio batzordea arduratuko da betebeharrak egiaztatzeaz eta bekak eskatzen dituztenek alegatutako merezimenduak ebaluatzeaz. Ebaluazio batzordeak ebazpen proposamena prestatuko du, non izangai onartuei guztira emandako puntuak adieraziko baitira.

Ebaluazio batzordea honako hauek osatuko dute:

–Idazkari tekniko nagusia.

–Araubide Juridikoaren Ataleko burua.

–Sostengu Juridikoa Emateko Bulegoko burua.

Batzordeko kideren bat kanpoan edo gaixorik badago, haren ordez, Idazkaritza Tekniko Nagusiko langile bat arituko da, deialdi honetan eskatzen den titulazio berdina duena.

Departamentuko Idazkaritza Tekniko Nagusiko langileek laguntza emanen diote ebaluazio batzordeari.

9.2. Prozedura ofizioz hasiko da interesdunen eskaerak jasotakoan.

9.3. Ebaluazio batzordea instrukzio organoa da, eta ofizioz ebaluatuko ditu eskaerak, deialdi honetan ezarritako irizpideen arabera.

Elkarrizketa pertsonalerako dei egin baino lehen, deialdiaren web-orrian argitaratuko dira izangaien zerrenda eta lortutako puntuazioa, eskaeren baremoa egin ondokoa.

Beka eman aurretik, ebaluazio batzordeak txosten bat prestatuko du, non adieraziko baita eskatzaileek laguntza jasotzeko baldintza guztiak betetzen dituzten ala ez. 6. oinarrian ezarritako baldintzak betetzen ez dituzten eskaerak ez dira baloratuko.

9.4. Ebaluazio batzordeak aurkezten diren eskaerak aztertu eta baloratuko ditu; gero, puntuazio handiena lortu duen izangaiari beka emateko proposamena eginen du, eta izangaien zerrenda bat eginen du, lortutako puntuazioaren araberakoa.

9.5. Osasun Departamentuko idazkari tekniko nagusiaren ebazpen bidez emanen da beka, ebaluazio batzordeak proposamena egin ondotik. Ebazpena Nafarroako web-orrian (https://www.nafarroa.eus) jarriko da, instrukzio organoak emandako puntuazioaren arabera eskatzaileek duten lehentasun hurrenkeran egindako zerrendarekin batera.

Ebazpenean, gutxienez, beka eskuratzen duen pertsonaren izena eta eskatzaileen zerrenda, lortutako puntuazioaren arabera ordenatuta, jaso beharko dira, eta berariaz adieraziko da gainerako eskaerak ezetsi direla, halakorik baldin bada.

Ebazpena Nafarroako Gobernuaren web-atarian argitaratuko da, bekaren deialdiaren fitxan. Argitaratzeak jakinaraztearen ondorio berberak izanen ditu, urriaren 1eko 39/2015 Legearen 45. artikuluarekin bat.

Eskaerak aurkezteko epea bukatu eta hiru hilabeteko epean berariazko ebazpenik argitaratzen ez bada, ezetsi egin direla ulertuko da.

10. oinarria. Tutoretza.

10.1. Idazkari tekniko nagusiari eta Araubide Juridikoaren Ataleko buruari dagokie bekaren onuradunaren jardueren tutoretza, zuzendaritza eta ikuskapena egitea.

10.2. Tutoreek zeregin zehatzak agindu eta ordutegiak finkatuko dituzte, eta begiratuko dute bekadunak bere eginbehar orokor eta berariazkoak betetzen dituen.

11. oinarria. Justifikatzeko epea eta modua.

Onuradunak txosten edo memoria bat aurkeztu beharko du egindako jarduerei buruz eta deialdian ezarritako helburuen betetze mailari buruz. Txosten hori tutoreek baloratuko dute. Txostena 2027ko abendua baino lehen aurkeztuko da, eta, bekaldia luzatuz gero, urte bakoitza bukatu baino lehen.

12. oinarria. Onuradunen betebeharrak.

a) Bekaren xedeko prestakuntza jarduera betetzea.

b) Organo emaileari justifikatzea betebeharrak eta baldintzak betetzen dituela eta, orobat, beka jasotzeko arrazoi izan den jarduera egin duela eta helburua bete dela.

c) Eskumena duten organoek eman den bekaren gainean egiten ahal dituzten egiaztapen lan guztiak onartzea.

d) Helburu berarekin eskatu edo jaso dituen bestelako beka edo dirulaguntzen berri ematea beka eman duen organoari.

e) Emandako bekari berariaz uko eginez gero, jarduerak utzi baino hamabost egun natural lehenago gutxienez jakinaraztea organo eskudunari.

f) Osasun Departamentuko Idazkaritza Tekniko Nagusian bekadun gisa aritu dela adieraztea bekaren zuzeneko ondorio diren jarduera eta argitalpen guztietan.

g) Prestakuntzan ari dela ezagutu duen eta isilpekotzat jo daitekeen informazio tekniko edo administratiboaren gainean sekretua eta konfidentzialtasuna gordetzea bekak irauten duen bitartean, eta ondoren ere bai.

h) Zein erakundetan jarduten duen, bertako barne- edo funtzionamendu-araudia betetzea.

i) Bekaren garapenari buruzko txostenak aurkeztea, 11. oinarrian azaldu den moduan.

13. oinarria. Prestakuntza jardueraren hasiera eta ukoak.

Onuradunak beka emateko ebazpenean adierazten den egunean hasi beharko du jardunean. Ebazpenean adierazitako egunean onuraduna ez bada jardunean hasten, organo eskudunari horren berri eman gabe, eta baldin eta organo eskudunak ezinbesteko arrazoiak edo behar bezala justifikatutako beste edozein gorabehera ikusten ez baditu, bekari behin betiko uko egiten diola ulertuko da.

Jardunean hasi ondoren bekari berariaz uko eginez gero, Idazkaritza Tekniko Nagusiari horren berri eman beharko zaio. Ukoaren berri ematea jarduera utzi baino hamabost egun natural lehenago egin beharko da gutxienez.

Eskuratutako bekari edozein arrazoirengatik uko eginez gero, zilegi izanen da beka instrukzio-organoak ezarritako zerrendan hurrengo dagoenari ematea, deusetan galarazi gabe onuradunak betetzea uko egin arte sortu diren betebeharrak.

14. oinarria. Prestakuntza jarduera egitea.

Bekaduna Osasun Departamentuaren bulegoetan arituko da, astean gehienez ere 30 orduz. Halaber, bekadunak prestakuntzarako behar diren joan-etorriak eginen ditu.

Bekaldiaren hilabete bakoitzeko, bekadunak 2,5 egun naturaleko atsedenaldia izanen du.

15. oinarria. Jabetza intelektuala.

Beka jasotzeko hautatzen diren pertsonek jabetza intelektualaren gainean dituzten eskubideak, bekaldia bitartean Osasun Departamentuan egindako jardueraren ondorioz eskuratzen dituztenak, eskubide horiek erregulatzen dituzten Estatuko arauetan ezarritakoari jarraikiz arautuko dira. Horri dagokionez, Administrazio Publikoak ez dio uko egiten agirien, azterlanen, ikerlanen, lanen, eskubideen, emaitza zientifikoen eta izaten ahal diren asmakarien gainean legokiokeen jabetzari.

16. oinarria. Lan edo administrazio harremanik eza.

16.1. Beka erabiltzea eta bekaduna izatea ez da zerbitzuak ematea, eta egoera horrek ez dakar berekin lan-harremanik, administratiborik edo estatutupekorik sortzea Nafarroako Foru Komunitateko Administrazioarekin edo haren erakunde autonomoekin, ez eta antzeko eskubiderik lortzea ere. Administrazioak ez du konpromisorik hartuko beka bukatutakoan bekaduna bere plantillan sartzeko.

16.2. Prestakuntza bekaren onuradunari agintzen zaizkion lanak edo jarduerak Osasun Departamentuko langileek –funtzionario nahiz kontratudunek– gainbegiratuko dituzte, eta haiek izanen dira lan horien erantzuleak. Bekaren onuradunak ezin izanen ditu funtzionario publikoen eginkizunak bete edo berarentzat hartu, ez eta hirugarrenen aurrean administrazio publikoko kide, ordezkari edo agente gisa agertu ere.

17. oinarria. Kalte-ordainak jasotzeko eskubidea.

Bekadunak, prestakuntza zer administrazio publikorekin egiten ari den, administrazio horrekin duen harreman juridikoa ezertan aldatu gabe, eskubidea izanen du zerbitzuagatik eta bidaiengatik izaten dituen gastuengatik funtzionarioei dagozkien ordain berberak jasotzeko.

18. oinarria. Beka bukatzea.

Honako hauek dira beka bukatzeko arrazoiak:

a) Bekaren epea bukatzea, luzapenik izan gabe.

b) Luzapenaren gehieneko epea bukatzea.

c) Bekari probetxurik ez ateratzea.

d) Bekadunak haren gain utzitako betebehar eta eginkizunak ez betetzea, jarduerak egitean ardurarik ez jartzea, prestakuntzari errendimendu edo probetxu eskasa ateratzea edo prestakuntza batere ez aprobetxatzea, edo lanak kalitate gabekoak izatea.

19. oinarria. Ez-betetzeak.

Dirulaguntzei buruzko azaroaren 9ko 11/2005 Foru Legearen 35. artikuluan ezarritakoari jarraikiz, zilegi izanen da jasotako dirua itzultzeko eskatzea. Zehazki, honako egoeretan itzuli beharko da dirua:

a) Bekadunak ez betetzea haren gain utzitako betebehar eta eginkizunak, jarduerak egitean ardurarik ez jartzea, prestakuntzari errendimendu edo probetxu eskasa ateratzea edo prestakuntza batere ez aprobetxatzea, edo lanak kalitate gabekoak izatea.

b) Prestakuntza beka emateko kontuan hartu diren baldintzak aldatzea, aldez aurretik administrazio baimena lortu gabe, eta, horrez gain, aldi berean jasotzea horrekin bateragarria ez diren beste beka edo dirulaguntza batzuk.

c) Azken hilean jasotakoa itzuli beharko da amaierako memoria ez aurkezteagatik.

20. oinarria. Errekurtsoak.

Deialdi honen oinarrien eta deialdia aplikatzeko emandako egintzen aurka gora jotzeko errekurtsoa jartzen ahalko da, Nafarroako Gobernuari zuzendua, hilabeteko epean, jakinarazi eta biharamunetik hasita, bat etorriz Administrazio Publikoen Administrazio Prozedura Erkideari buruzko urriaren 1eko 39/2015 Legearen 112. artikuluarekin eta hurrengoekin, eta Nafarroako Foru Komunitateko Administrazioari eta foru-sektore publiko instituzionalari buruzko martxoaren 11ko 11/2019 Foru Legearen 126. artikuluarekin.

21. oinarria. Aplikatzekoa den legeria.

Agertzen ahal diren gorabehera guztiak honako hauetan ezarritakoarekin bat ebatziko dira: deialdi honetako oinarriak, apirilaren 19ko 172/2004 Foru Dekretua, Nafarroako Foru Komunitateko Administrazioan eta haren erakunde autonomoetan prestakuntza bekak emateko araubide orokorra ezartzen duena, eta, osagarri, Dirulaguntzei buruzko azaroaren 9ko 11/2005 Foru Legea.

22. oinarria. Emandako bekaren publizitatea.

Laguntza hau Osasun Departamentuaren web-orrian argitaratuko da. Adieraziko da zein deialdiri, programari eta aurrekontuko kredituri egotzita ematen den, baita onuraduna, emandako zenbatekoa eta xedea ere.

II. ERANSKINA.–AURKEZTU BEHARREKO DOKUMENTAZIOA

Dokumentuen ereduak katalogoko fitxan daude eskuragarri:

https://www.navarra.es/eu/tramiteak/on/-/line/beca-de-formacion-para-personas-licenciadas-o-graduadas-en-derecho-para-la-secretaria-general-tecnica-del-departamento-de-salud

Iragarkiaren kodea: F2613119