Iragarkia

201. ALDIZKARIA - 2026ko urriaren 9a

1. NAFARROAKO FORU KOMUNITATEA

1.4. DIRU-LAGUNTZAK, LAGUNTZAK ETA BEKAK

312E/2026 EBAZPENA, irailaren 8koa, Landa Garapeneko zuzendari nagusiak emana, zeinaren bidez onesten baita nekazaritzako ustiategietan ingurumen-helburuko inbertsioak egiteko laguntzaren 2026ko deialdia eta horren oinarri arautzaileak, 2023-2027 NPEPEaren esparruan. DDBN kodea: 928382.

Nafarroak, bere foru-araubideari esker, eskumen esklusiboa du nekazaritza eta abeltzaintzako gaietan, ekonomiaren antolamendu orokorrarekin bat, hala ezarrita baitago Nafarroako Foru Eraentza Berrezarri eta Hobetzeari buruzko abuztuaren 10eko 13/1982 Lege Organikoaren 50.1.a) artikuluan.

Foru Eraentza Berrezarri eta Hobetzeari buruzko Lege Organikoaren 56.1.a) artikuluan ezarritakoaren arabera, eta jarduera ekonomiko orokorraren oinarriekin eta antolamenduarekin bat, Nafarroako Foru Komunitateari dagokio Nafarroaren barnean jarduera ekonomikoa planifikatu eta garapen ekonomikoa sustatzeko eskumen esklusiboa.

Eskumen horien artean dago nekazaritzako ustiategietan inbertsioak sustatzea, bai eta sektore horretan asoziazionismoa sustatzea ere.

Europako Parlamentuaren eta Kontseiluaren 2021eko abenduaren 2ko 2021/2115 (EB) Erregelamenduaren bidez arauak ezartzen dira Batasuneko estatuek Nekazaritza Politika Erkidearen esparruan egin behar dituzten plan estrategikoei (NPEaren plan estrategikoak) laguntza emateko, Nekazaritza Bermatzeko Europako Funtsaren (NBEUF) eta Landa Garapenerako Europako Nekazaritza Funtsaren (LGENF) kontura finantzatzen baita, eta 1305/2013 (EB) eta 1307/2013 (EB) erregelamenduak indargabetzen dira. Bada, haren 73. eta 74. artikuluetan, inbertsioetarako laguntzak jasotzen dira.

2021-2027 NPEPEaren (Nekazaritza Politika Erkidearen Plan Estrategikoa) esku-hartzeen artean dago INVEST (73-74) izenekoa, zeinak nekazaritzako elikagaien sektorean inbertsioak egiteko babesa jasotzen baitu. Esku-hartze horren barnean, Nafarroan NPEPEk 6841 esku-hartzea jasotzen du (Inbertsio produktiboak nekazaritzako ustiategietan), zeinak helburu baitu oro har nekazaritzako ustiategien lehiakortasuna hobetzea; hala, berregituratzea planteatzen du neurriari, produkzio-orientazioari eta eraginkortasuna hobetzeari dagokionez. Halaber, elkartze-araubideko inbertsio kolektiboak ere jasotzen ditu.

6841 esku-hartzea inbertsio produktiboei buruzkoa da, oro har hartuta, eta bi neurri bereizten ditu: alde batetik, klima-aldaketa arintzen, baliabideak erabiltzen edo animalien ongizatea hobetzen zuzenean laguntzen duten inbertsioak (6841.1 neurria), eta, bestetik, ustiategien lehiakortasuna hobetzeko inbertsioak (6841.2 neurria).

Deialdi honen xedea da laguntzak ematea 6841.1 neurrian berariaz sartutako inbertsioak egiten dituzten nekazaritzako ustiategien titularrei, hau da, klima-aldaketa arintzen, baliabideak efizientziaz erabiltzen eta animalien ongizatea hobetzen laguntzen duten inbertsioak egiten dituztenei.

Kontuan izanik gizonen eta emakumeen arteko desparekotasuna, eta sektorean diharduten emakumeen tasa txikia dela, aintzat hartu da generoaren balorazioaren irizpidea ezartzea, Emakumeen eta Gizonen Berdintasun Eragingarrirako martxoaren 22ko 3/2007 Lege Organikoarekin bat.

Ebazpen honi, orobat, Dirulaguntzei buruzko azaroaren 9ko 11/2005 Foru Legea aplikatuko zaio.

Ebazpen hau maiatzaren 24ko 49/2023 Foru Dekretuaren azken xedapenetako lehenbizikoaren babesean ematen da, foru dekretu horren bidez arautzen baitira Nekazaritza Politika Erkidearen Plan Estrategikoaren gobernantza sistema, antolaketa eta funtzionamendua. Aipatu foru dekretuak ahalmena ematen dio Landa Garapeneko eta Ingurumeneko Departamentuko kontseilariari edo, kasua bada, Landa Garapeneko zuzendari nagusiari beren eskumenen esparruan foru dekretu hori garatzeko eta betearazteko behar diren xedapen guztiak eman ditzaten eta, bereziki, osorik edo partez Europako nekazaritza funtsen bidez finantzatzen diren dirulaguntzen arauak, deialdiak eta oinarri arautzaileak ezartzeko.

Nafarroako Gobernuak 2026ko apirilaren 22an hartutako Erabakiaren bidez, baimena eman zaio Landa Garapeneko zuzendari nagusiari 1.750.000 euroko gastu konpromisoa har dezan laguntza hauen 2026ko ekitaldiko deialdia finantzatzeko, 2028ko ekitaldiaren kargura. Halaber, baimena eman zaio deialdi honetarako kreditu baimendua handitzeko, gehienez ere 2.000.000 euro gehituta, Landa Garapenerako aurrekontu programaren kargura, Dirulaguntzei buruzko azaroaren 9ko 11/2005 Foru Legearen 31. artikuluko 3. puntuan ezarritakoari jarraikiz eta puntu horretan jasotzen diren baldintzak betetzen badira. Azpi esku-hartzearen %40 Landa Garapenerako Europako Nekazaritza Funtsaren kontura finantzatuko da.

2024ko martxoaren 15ean, hautaketa irizpideak onetsi zituen NPEPEaren Nafarroako jarraipen batzordeak. Irizpide horiek 2026ko laguntzen deialdian ere erabiliko dira.

Adierazitakoarekin bat, Nafarroako Foru Komunitateko Administrazioari eta foru-sektore publiko instituzionalari buruzko martxoaren 11ko 11/2019 Foru Legearen 32. artikuluak eta Landa Garapeneko eta Ingurumeneko Departamentuaren egitura organikoa ezartzen duen azaroaren 15eko 255/2023 Foru Dekretuak ematen dizkidaten eskudantziak erabiliz,

EBAZTEN DUT:

1. Nekazaritzako ustiategietan ingurumen-helburuko inbertsioak egiteko laguntzen deialdia onestea, 2023-2027 NPEPEaren esparruan, 2026ko ekitaldirako, bai eta ebazpen honen I. eranskinean agertzen diren oinarri arautzaileak ere.

2. Deialdi honek sortzen dituen gastuei aurre egiteko, 1.750.000 euroko gastua baimentzen da 2028ko ekitaldian, 2026ko aurrekontu orokorretako "720004-72200-7700-412113: NPEPE LGENF 2023-2027. Nekazaritza-ustiategietan inbertitzeko laguntzak" izeneko partidaren baliokidea den partidaren kargura, betiere kreditu egokia eta nahikoa badago.

Kreditu hori handitzen ahalko da, gehienez ere 2.000.000 euro gehituta, Dirulaguntzei buruzko azaroaren 9ko 11/2005 Foru Legearen 31.3 artikuluan jasotakoaren arabera, eta puntu horretan ezarritako baldintzak betetzen badira. Gehikuntza hori Landa Garapenaren aurrekontu programaren kargura eginen da, baldin eta kreditu egokia eta nahikoa badago.

2026ko aurrekontu orokorretako "720004 72200 7700 412113: 2023-2027 NPEPE LGENF. Nekazaritzako ustiategietan inbertsioak egiteko laguntzak" partidaren baliokidean baimendu gabeko kredituen erabilerak ordena honen arabera lehenetsiko dira: nekazaritzako ustiategietako inbertsioak (ureztalurrak modernizatzea); nekazaritzako ustiategietako inbertsioak (lurrak ureztalur bihurtzea); nekazaritzako ustiategietako inbertsioak, ingurumen helburua dutenak; eta nekazaritzako ustiategietako inbertsioak.

3. Laguntzen deialdi hau eta haren oinarri arautzaileak Dirulaguntzen Datu Base Nazionalean (DDBN) erregistratzea.

4. Ebazpen hau eta eranskinak Nafarroako Aldizkari Ofizialean argitaratzea.

5. Ebazpen honek ez du administrazio bidea amaitzen eta haren aurka gora jotzeko errekurtsoa jar daiteke, Landa Garapeneko eta Ingurumeneko kontseilariari zuzendua, argitaratu eta biharamunetik hilabeteko epean.

Iruñean, 2026ko irailaren 8an.–Landa Garapeneko zuzendari nagusia, Rubén Goñi Urroz.

I. ERANSKINA.–NEKAZARITZAKO USTIATEGIETAN INGURUMEN HELBURUA DUTEN INBERTSIOAK EGITEKO LAGUNTZAK, 2023-2027 NPEPE-AREN ESPARRUAN. 2026KO EKITALDIRAKO DEIALDIAREN OINARRI ARAUTZAILEAK

1. oinarria.–Xedea.

Oinarri hauen xedea da arautzea nola emanen zaizkien laguntzak Europako Parlamentuaren eta Kontseiluaren 2021eko abenduaren 2ko 2021/2115 (EB) Erregelamenduaren 73. eta 74. artikuluetan biltzen diren ingurumen-helburuko inbertsioak egiten dituzten nekazaritzako ustiategien titularrei –erregelamendu horren bidez arauak ezartzen dira Batasuneko estatuek Nekazaritza Politika Erkidearen esparruan egin behar dituzten plan estrategikoei (NPEaren plan estrategikoak) laguntza emateko, Nekazaritza Bermatzeko Europako Funtsaren (NBEUF) eta Landa Garapenerako Europako Nekazaritza Funtsaren (LGENF) kontura finantzatuta baitago–, 6841.1 esku-hartzeari jarraikiz ("Laguntzak, inbertsio produktiboak egiteko nekazaritzako ustiategietan, klima aldaketaren arintze-egokitzeari, baliabide naturalen erabilera efizienteari eta animalien ongizateari lotuak").

2. oinarria.–Neurriaren helburua.

Europako Parlamentuaren eta Kontseiluaren 2021/2115 (EB) Erregelamenduaren arabera, esku-hartze honen bidez honako helburu hauek lortzen lagundu nahi da:

a) Klima-aldaketara egokitzen eta hura arintzen laguntzea, hala nola berotegi-efektuko gasen emisioak murriztuz eta karbonoaren harrapaketa hobetuz, eta energia jasangarria sustatzea.

b) Ura, lurzorua, airea eta beste baliabide naturalen garapen jasangarria eta kudeaketa efizientea sustatzea, eta, bereziki mendekotasun kimikoa murriztea.

c) Europar Batasuneko nekazaritzak gizartearen eskaerei ematen dien erantzuna hobetzea elikaduraren eta osasunaren arloan, animalien ongizatea hobetzea eta mikrobioen aurkako botikekiko erresistentziaren aurka egitea.

3. oinarria.–Onuradunak.

1. Neurriaren hartzaileak pertsona fisiko eta juridikoak dira, inbertsioak egiten dituztenak, onuradunak izateko aldez aurreko baldintzak betetzen dituztenak eta hitzematen dutenak beteko dituztela aplikatzekoa den araudian ezarritako konpromisoak.

2. Administrazio publikoak ez dira onuraduntzat hartuko, ezta nortasun juridiko propioa duten entitate eta sozietate publikoak ere, administrazio publikoen mendekoak edo haiei lotuak badira.

4. oinarria.–Onuradunak onartuak izateko irizpideak.

Neurriaren onuradunak izan daitezke laguntza eskaera aurkezteko egunean onartuak izateko irizpide hauek betetzen dituzten pertsona fisiko edo juridikoak:

a) Adinez nagusia izatea, pertsona fisikoen kasuan.

b) Nafarroako Nekazaritzako Ustiategien Erregistroan (NANUE) inskribatuta dagoen nekazaritzako ustiategi baten titularra izatea.

Honako hauek salbuetsita daude: nekazari profesional gazteak ezartzeko laguntzen eskatzaileak, nekazari gazteak lanaldi partzialean ezartzeko laguntzen eskatzaileak, edo 2026an nekazari berriak ezartzeko laguntzen eskatzaileak (edo 2026an, 2025ean edo 2024an laguntza horiek jaso dituztenak). Halaber, salbuetsita daude aurreko onuradun horiek soilik eratutako sozietateak edo haien titulartasun partekatuak.

c) Dirulaguntzei buruzko azaroaren 9ko 11/2005 Foru Legearen 13. artikuluko 2. eta 3. ataletan zerrendatutako ezein egoeratan ez egotea. Bereziki, zerga-betebeharrak eta Gizarte Segurantzarekikoak egunean izatea.

Ustiategiek honako baldintza hauek bete behar dituzte:

a) Nafarroako Nekazaritza Ustiategien Erregistroan izena emanda egotea laguntza eskatzen den unean. Salbuetsita egonen dira aurreko b) puntuan ezarritako onuradunek eratutako ustiategiak.

b) Teknikoki eta ekonomikoki bideragarriak izan behar dira. Ustiategi bideragarritzat hartuko dira honako hauek: ustiategiaren ekoizpen elementuen eta jardueraren arabera, inbertsio plana bukatutakoan erreferentziako errentaren %35etik gorako errenta unitarioa lortzen dutenak.

5. oinarria.–Inbertsio diruz lagungarriak.

1. IV. eranskinean (Moduluak) zehazten diren inbertsioek soilik jasotzen ahal dute dirulaguntza, baldin eta beren helburua hauetako bat bada:

–Klima-aldaketa arintzeko edo hartara egokitzeko ekintzak sustatzea.

–Ura, lurra eta airea efizientziaz kudeatzeko inbertsioak egitea.

–Efizientzia energetikoa eta energia berdeen ekoizpena hobetzea.

–Abereen ongizatea hobetzeko inbertsioak egitea.

–Nekazaritzako ustiategietako biosegurtasuna hobetzeko neurrietan inbertitzea.

Eskatzaileek eskatzen badituzte IV. eranskinean (Moduluak) jasotzen ez diren inbertsioetarako laguntzak, baina atal honetako helburuak lortzen laguntzen badute, gastu horiek diruz laguntzen ahalko dira, baldin eta IV. eranskinean zehaztutako inbertsioekin lotura garbia badute.

2. Honako inbertsio hauetarako, adierazten diren onargarritasun irizpideak aplikatuko dira:

a) Nekazaritzako ustiategietan eginen diren inbertsioetan, laguntzak eskatzeko epea amaitzen denetik hiru hilabeteko epean, baldintza hauek bete beharko dira: dagokion ingurumen baimena edukitzea, abenduaren 16ko 17/2020 Foru Legearen araberakoa (Ingurumenean Eragina duten Jarduerak arautzen dituen Foru Legea) edo aplikatu beharreko beste arau baten araberakoa, edo, bestela, organo eskudunari (udalari edo ingurumenaren arlokoei) kontsulta egiteko izapidea amaituta izatea, baldin eta eskatzaileak uste badu eskatutako inbertsioek ez dakartela funtsezko aldaketarik lehendik daukaten ingurumen lizentzian edo baimenean.

b) Energia berriztagarria sortzeko inbertsioen helburua ustiategiaren autokontsumoa izan behar da. Instalazioa sare elektrikora konektatuta badago, instalazioaren urteko batez besteko kontsumoari dagokion zati proportzionala onartuko da gehienez dirulaguntzarako.

c) Laborantza iraunkorra (mahastiak barne) ezartzeko inbertsioak direla eta, 5 urte baino luzeago iraunen dutenak onartuko dira, landaketa berria egiteko baimena edukiz gero, Europako Parlamentuaren eta Kontseiluaren abenduaren 17ko 1308/2013 (EB) Erregelamenduaren 63. eta 64. artikuluekin bat etorriz.

d) Lurzatietan ureztatzeko ekipamendu eta instalazio iraunkorretan inbertsioak egiteko, lurzatia ureztatzeko sistema kendu eta haren ordez beste efizienteago bat ezarri beharko da. Bestela, inbertsioa egiten ahal da modernizazio eremuetan dauden lurzatietan ere, azken 10 urteetan ez bada ureztatze sistema iraunkorra instalatu. Bestalde, 2021/2115 (EB) Erregelamenduaren 74. artikulua bete behar da. Gainera, instalazioa jarduketa-eremu batean badago, Nekazaritzako azpiegiturei buruzko martxoaren 7ko 1/2002 Foru Legearen 51., 52. eta 55. artikuluetan ezartzen diren baldintzak ere bete beharko dira.

Inbertsio horiek egin beharko dira nekazaritza azpiegituretan jarduteko eremuetan ez dauden lurzatietan edo, jarduteko eremuetan egonda ere, ureztatzen hasteko deklarazioa edo egiaztapen akta onetsia 2025eko urtarrilaren 1a baino lehenagokoa dutenetan.

Jarduteko eremuetan sartzen ez diren lurzatietan, dirulaguntza jasotzen ahalko da, baldin eta aurretik presio bidezko ureztatze sistema iraunkor bat instalatuta bazegoen, eta beste ureztatze sistema batekin ordeztu behar bada; betiere, ur kontsumoa aurrezteko helburuak bete beharko ditu –aurrerago zehazten dira–.

Laguntza eskaerarekin batera, ureztatzeko instalazio bakoitzaren memoria baloratuan honako hauek justifikatu eta sartu behar dira:

i) Ureztatze Sindikatuaren edo Ureztatzaileen Elkartearen baimena, jarduketek entitate horiei egindako emakida baten bidez lortzen dutenean ura, edo Konfederazio Hidrografikoaren baimena gainontzeko kasuetan. Adierazi beharko da zein puntutan dagoen laguntzaren xede diren lurzatien ur-hargune orokorra, zeinaren bidez hornitzen baita Ureztatzaileen Elkartea, edo zein den uraren jatorria gainontzeko kasuetan.

ii) Inbertsio planean jasotako laguntzaren xede den azalerari dagokion ura neurtzeko moduko kontagailua sartzea inbertsioaren barnean, edo neurketa hori egiten duten gailuak aitzinetik badirela frogatzea.

iii) Egiaztagiria, azaltzen duena hobekuntzari esker uraren kontsumoaren aurrezpen potentziala gutxienez %10-50 artekoa izanen dela, mailaketa honen arabera:

–Hobetu nahi den ureztatze sistemaren uraren jatorriak ukitzen dituen azaleko zein lurpeko ur-masak ez badaude egoera onean edo ez badira behar bezain handiak, plangintza hidrologikoaren arabera: %50. Kasu horretan, ur-kontsumoari begira aurreztutakoa justifikatzeko memoria bat aurkeztu beharko da. Memoria horretan, azken bost urteetan ezarritako laboreen araberako ur-kontsumo errealak aztertuko dira, edo, laborerik ez badago, dagokion nekazaritza-eskualdean ohikoenak diren hiru laboreak, ureztatze sistema modernizatu ondoren espero diren kontsumoen aurreikuspenarekin batera.

–Uholde bidezko ureztapenaren ordez ureztapen lokalizatua jartzea: %25.

–Uholde bidezko ureztapenaren ordez aspertsio bidezko ureztapena jartzea: %15.

–Aspertsio bidezko ureztapenaren ordez ureztapen lokalizatua jartzea: %10.

e) Laguntza eskaeraren xedeko inbertsioarekin zuzenean lotutako ordainsariek muga hau izanen dute: inbertsio diruz lagungarrien guztizko zenbatekoaren %12. Nolanahi ere, IV. eranskineko moduluak aplikatuko dira.

3. Ez dira diruz lagungarriak eta, beraz, ez dira hautatzen ahal honako hauek:

a) Nafarroan egiten ez diren inbertsioak. Salbuespena izanen da inbertsioak egitea Nafarroako lurzatiekin mugakide diren autonomia-erkidegoetako lurzatietan, laborantza-finka bakar bat osatzen badute, eta baldin eta inbertsio berak aldi berean egiten badira.

b) Laguntza eskaera aurkeztu aurretik erabat gauzatuta dauden inbertsioak, ordainketa guztiak eginda egon zein ez, eta, orobat, 2023ko urtarrilaren 1a baino lehen hasitakoak, oinarri honetako 2.e) atalean araututako kostuak izan ezik.

Guztiz gauzatutzat joko dira egoera hauetako batean dauden inbertsioak:

–Fisikoki burutu diren inbertsioak. Georreferentziagarriak diren inbertsioak ez direla burutu frogatzeko bi modu izanen dira: georreferentziadun argazkiak aurkeztea eta/edo laguntzak kudeatzen dituen unitateko langileek ustiategia bisitatzea.

–Funtzionalki eta teknikoki operatiboak diren inbertsioak. Horretarako, ordainketa egin baino lehen, egiaztatuko da laguntza eskaera aurkeztu ondokoak direla inbertsioak abian jartzea edo erabiltzea justifikatzen duten agiriak (lizentziak, erregistroak eta abar).

–Guztira fakturatutako inbertsioak. Horretarako, ordainketa egin baino lehen, egiaztatuko da laguntza eskaera aurkeztu aurrekoak direla faktura guztiak.

Inbertsio batean hasierako bisitan edo georreferentziadun argazkien bidez detektatzen bada elementuak edo unitateak ezabatu direla inbertsioak guztiz gauzatuta ez izateko baldintza betetzearren, ulertuko da laguntza jasotzeko gezurrezko baldintzak sortu direla, eta inbertsioa ez da diruz laguntzeko modukotzat joko.

2023ko urtarrilaren 1a baino lehenago hasitakotzat joko dira data hori baino lehenagoko fakturak, ordainagiriak edo froga-balioa duten agiri baliokideak dituzten inbertsioak.

c) Bigarren eskuko ekipamendua erostea eta jartzea.

d) Azken 10 urteetan laguntza jaso duten eta/edo 10 urtera arteko antzinatasuna duten inbertsioak ordezkatzen dituzten inbertsioak.

e) Balio erantsiaren gaineko zerga (BEZa), beste zerga batzuk eta proiektuen mozkin industriala.

f) Ondasunaren jabetza geroago eskuratzea baldintzatuko duten finantzaketa-formulak (ondasunak finantzatzea jabaria erreserbatzeko kontratuen bidez, leasing formula, etab.), diruz lagungarritzat joko dira baldin ondasunak osoki bihurtzen badira onuradunaren jabetzakoak laguntza justifikatzeko epea bukatzen denerako. Zehazki, makinak eta ekipamendua erosten badira finantza errentamenduko eragiketen bidez, erosketa diruz lagungarria izanen da soilik baldin kontratuak biltzen badu erosketa konpromisoa, non aurreikusiko baita onuraduna bihurtuko dela makinaren edo ekipamenduaren jabe laguntza justifikatzeko epearen barruan.

g) Finantza errentamenduko kontratuari lotutako beste kostu batzuk, hala nola zergak, errentatzailearen marjina, interesen birfinantzaketa kostuak, gastu orokorrak edo aseguruen gastuak.

h) Ustiategiko bertako langileen gastuak eta zuzeneko beste ekarpen batzuk, salgaietan.

i) Ezkontideen eta lehen mailako ahaideen artean ondasunak eta zerbitzuak eskualdatzea, baita pertsona fisikoen eta juridikoen artean ere, baldin eta horien ezkontideek edo lehen mailako ahaideek entitate juridikoaren bazkide edo administratzaile gisa parte hartzen badute, edozein dela ere eskualdatzeko prozedura edo modua. Salbuetsita egonen dira 14/2006 Foru Legearen 65.1 a) artikuluaren arabera katalogaturiko kooperatibek beren bazkideentzat emandako fakturak eta likidazio ziurtagiriak.

j) Ingurumenean ondorio negatiboak izaten ahal dituzten inbertsio-eragiketak.

Horren ondorioetarako, ez dira diruz lagunduko eskaerak aurkezteko epea amaitu eta 3 hilabeteko epean baldintza hauek betetzen ez dituzten inbertsioak:

–Dagokion ingurumen-baimena ez dutenak, jarraikiz Ingurumenean Eragina duten Jarduerak arautzen dituen abenduaren 16ko 17/2020 Foru Legeari edo aplikatzekoa den beste edozein arauri.

–Organo eskudunari (udalari edo ingurumenaren arlokoei) kontsulta egiteko izapidea amaituta ez egotea, baldin eta eskatzaileak uste badu eskatutako inbertsioek ez dakartela funtsezko aldaketarik lehendik daukaten ingurumen lizentzian edo baimenean.

k) Inbertsio horiek non inbertsioa egiteko premia ez dagoen behar bezala frogatuta inbertsio planean bildutako azterketan, ikuspuntu tekniko, ekonomiko eta finantzariotik begiratuta eta ustiategiarekiko koherentzia aintzat hartuta. Ildo horretatik, inbertsio bat justifikatu gabekotzat hartzen ahalko da haren neurria edo ahalmena gehiegizkoa bada ustiategiaren neurria kontuan hartuta, ustiategiaren ekoizpen orientaziora egokitzen ez bada, etab.

l) IV. eranskinean (Moduluak) sartuta ez dauden inbertsioak, oinarri arautzaileetako 5.1 oinarrian zehaztutako helburuak lortzen laguntzen ez badute. Kasu horretan, laguntzak eskatu beharko dira ustiategien lehiakortasuna hobetzeko inbertsio produktiboetarako laguntzen deialdiaren bidez (6841.2 neurria).

6. oinarria.–Inbertsio plana.

1. Laguntza eskaerarekin batera, inbertsio plana aurkeztuko da, eta hura izanen da laguntzarako eskubidea sortzeko oinarria.

2. Inbertsio planean alderdi hauek sartuko dira:

a) Ustiategiaren abiapuntuko egoeraren azalpena, datu hauek barne, besteak beste:

–Ustiategiaren identifikazioa, kokalekua eta ekoizpenaren ildoa.

–Nortasun fisiko edo juridikoa, titulartasuna eta, bidezkoa bada, titularren zerrenda eta sozietatearen kapitaleko partaidetza.

–Ekoizpen elementuen zerrenda (kopurua, parametro ekonomikoak eta neurriari buruzko parametroak).

b) Ustiategiaren bukaerako egoeraren azalpena; abiapuntuan azaldutako parametroen aipamen konparatiboa egin behar da eta azken emaitza hori lortzen ahal dela frogatzen duten datu ekonomikoak eman behar dira.

c) Egin asmo diren inbertsioen zerrenda eta azterketa, ikuspuntu teknikotik, ekonomikotik eta finantzariotik begiratuta, koherentzia izanik abiapuntuko ustiategiaren eta bukaerako egoeraren artean, inbertsioak egiteko beharra justifikatzeko.

d) Inbertsio planaren iraupena. Inbertsioen izaeraren eta gauzatzeko aurreikuspenaren araberakoa izanen da.

3. Azterketa horrek bere baitan izan beharko ditu, halaber, inbertsio horiek diruz lagungarritzat jotzeko behar diren justifikazio teknikoak eta agiri egokiak, bat etorriz oinarri arautzaile hauetan ezarritako beharkizun eta baldintzekin. Zehazki:

a) Justifikatzea nola lagunduko duten inbertsioek klima-aldaketa arintzen edo hartara egokitzen, baliabide naturalak efizientziarekin erabiltzen eta abereen ongizatea hobetzen.

b) Justifikatzea nola aplikatzen den kostuen moderazioa, oinarri arautzaile hauetako 13. oinarriko 1.b) puntuaren arabera.

7. oinarria.–Laguntza motak eta zenbatekoa.

1. Laguntzak kapitaleko zuzeneko dirulaguntza gisa emanen dira.

2. Laguntzaren zenbatekoa, gehienez ere, inbertsio diruz lagungarriaren %50 izanen da.

3. Espediente bakoitzari dagozkion laguntzen portzentajeak kalkulatzeko, aurreko puntuan adierazitako mugarekin betiere, honako gehikuntza hauek aplikatuko zaizkio %20ko oinarrizko portzentajeari:

a) Nekazari gazteak eta berriak: %15.

Honako hauek izanen dira nekazari gazteak eta berriak:

–Laguntza hauen onuradun direnak: nekazari profesional gazteak ezartzeko laguntzak; nekazari gazteak lanaldi partzialean ezartzeko laguntzak, edo 2026an nekazari berriak ezartzeko laguntzak (edo 2026an, 2025ean edo 2024an laguntza horiek jaso dituztenak).

–Nekazari gazteak lehenengoz ezartzeko laguntza lortuta, baldintza hauek betetzen dituztenak laguntza eskaera aurkezten duten egunean: 41 urte beterik ez izatea eta ezartzeko prozesua bukatu zenetik hiru urteko epearen barnean egotea. Ondorio horietarako, ulertuko da prozesu hori bukatu dela lehenengoz ezartzeko laguntzaren azken tarteko ordainketa onesten den egunean.

–Nekazari gazteak lehenengoz ezartzeko laguntza lortu gabe, baldintza hauek betetzen dituztenak laguntza eskaera aurkezten duten egunean: 41 urte beterik ez izatea, OON (ogibide nagusia nekazaritza) gisa katalogatuta egotea eta hiru urte baino gutxiago igaro izana nekazaritzaren arloko gizarte segurantzan afiliatu zirenetik.

Onuraduna pertsona juridikoa bada, eta, deskribatutako baldintzen arabera, bazkide guztiak gazteak badira, aurreko portzentajea aplikatuko da osorik.

Onuraduna pertsona juridikoa bada, eta horretan bazkide gazteek parte hartzen edo hartuko badute –gazte eta nekazari gazteen definizioarekin bat– sozietateak adierazitakoarekin koherentea den enpresa plan batekin, aurreko portzentaje hori aplikatuko da, gazteari gizarte kapitalean dagokion parte-hartzearen arabera.

b) Lehentasunezko ustiategiak: %10.

Laguntza intentsitate hori aplikatuko zaie laguntza eskatzean lehentasunezko gisa sailkatuta dauden nekazaritzako ustiategien titularrak diren onuradunei, bai eta nekazari profesional gazteak ezartzeko laguntzei esker prozesu horretan diren pertsonei ere.

c) Muga naturalak edo bestelako muga berariazkoak dituzten eskualdeetan dauden ustiategiak: %5.

Laguntza intentsitate hori aplikatuko zaie ustiategiei baldin eta, inbertsio plana bukatu ondoren, ustiategia kokatua dagoen udalerria (Nafarroako Nekazaritzako Ustiategien Erregistroan jasoa dagoen EIN kodearen arabera) muga naturalak edo bestelako muga berariazkoak dituzten eskualdeetako esku-hartzean sartzen bada, 2023-2027ko NPEPEaren esparruan.

4. Deialdi eta onuradun bakoitzeko, gehieneko inbertsio bolumen diruz lagungarria 100.000 eurokoa da ustiategiaren urteko lan unitateko (ULU), inbertsio plana gauzatu ondoren kalkulaturik, eta gehienez ere 800.000 eurokoa guztira.

5. Gutxieneko inbertsio diruz lagungarria 7.500 eurokoa izanen da. Zenbateko hori kalkulatuko da bai laguntza eskatzeko unean, aurkeztutako inbertsio planaren arabera, bai ordainketa egiteko eskaera egiten denean, inbertsio plan gauzatuaren arabera, betiere kostuen moderazioko irizpideak aplikatu ondoren.

6. Entitate onuradun bakoitzak gehienez ere 300.000 euro jasotzen ahalko ditu inbertsioen urteko deialdietan, eta 800.000 euro programa bakoitzeko.

Muga hori gaindituz gero, murrizketa aplikatuko litzateke lehenik eta behin, nekazaritzako ustiategietako inbertsioetarako laguntzari eta, ondoren, hauetarako laguntzari: ingurumen helburua duten nekazaritzako ustiategietako inbertsioak, nekazaritzako ustiategietako inbertsioak (lurrak ureztalur bihurtzeko) eta, azkenik, nekazaritzako ustiategietako inbertsioak (ureztalurrak modernizatzeko).

8. oinarria.–Dirulaguntzak emateko prozedura eta balorazio irizpideak.

1. Ebazpen honek arautzen dituen laguntzak norgehiagokako prozedurari jarraikiz emanen dira, aurkeztutako eskaerak alderatuta, haien arteko lehentasun-hurrenkera ezartzeko.

2. Eskaeren lehentasun-hurrenkera ezartzeko, balorazio irizpideen arabera emandako puntuak batuko dira. Balorazio irizpideak II. eranskinean zehazten dira.

3. Inbertsioen kategorian, baremoko puntuak honela zehaztuko dira:

Ingurumen-onura duten inbertsioetarako, zehaztuko da zenbat puntu ematen dituen baremoan, kontuan harturik zein den, batetik, inbertsio diruz lagungarria inbertsio diruz lagungarri osoari dagokionez, eta, bestetik, ingurumen-onura duten inbertsioetarako baremoko puntuak, honako formula hau aplikatuta:

Baremoko puntuak = Ingurumen-onura duten inbertsioen baremoko puntuak x (ingurumen-onura duen inbertsioaren inbertsio diruz lagungarria / inbertsio diruz lagungarri osoa)

Aurkeztutako inbertsio plana berrikusi eta baloratu ondotik eta kostuen moderazioko prozedura aplikatu ondotik zehaztuko dira diruz laguntzen ahal den ingurumen-onura duen inbertsioaren eta diruz laguntzen ahal den inbertsio osoaren balioa, 13. oinarrian jasotakoaren arabera.

4. Onuradunak bere eskaeran adierazi beharko du, berariaz, zer balorazio irizpideren arabera eskatzen duen aplika dakiola aurreko baremoa. Eskaera hori erantzukizunpeko adierazpentzat hartuko da laguntza eskaera aurkeztean edo, egoki denean, eskaerak aurkezteko epea bukatzen den egunean betetzen diren irizpideei dagokienez, eta bete beharreko konpromisotzat inbertsio planean aurreikusitako ekintzei dagokienez, eta plan horrekin bat etorri beharko du.

5. Onuradunak kontuan hartzeko eskatu dituen balorazio irizpideengatik bakarrik emanen dira puntuak. Betetzeko modu bat baino gehiago onartzen dituen irizpide bat ezarri bada, aintzat hartuko da puntu gehien ematen dituen egoera, eskura dagoen informazioarekin egiaztatzen ahal dena, eskatutako puntuazioa inola ere gainditu gabe.

9. oinarria.–Norgehiagokako prozeduraren aplikazioa.

1. Norgehiagokako araubideko izapidean, eskaeren arteko lehentasun-hurrenkera ezarriko da, aurreko puntuetan ezarritako balorazio irizpideak aplikatuta. Hala, irizpide horien arabera balorazio handiena lortzen duten eskaerei esleituko zaie dirulaguntza, deialdian erabilgarri dagoen kredituak ezarritako mugarekin.

2. Espedienteen artean puntuazio-berdinketa gertatzen bada, lehentasuna edukiko du 8.3 oinarrian ezartzen denaren arabera inbertsioen baremazioan puntu gehien dauzkanak. Aurreko irizpidea aplikatu eta gero berdinketak bere horretan segitzen badu, lehentasuna edukiko dute honako irizpide hauen arabera puntuaziorik altuena duten eskaerek, hurrenkerari jarraikiz: belaunaldi erreleboa, generoa eta katalogazioa. Hala ere berdinketa hausten ez bada, aurkeztu diren hurrenkeraren arabera lehenetsiko dira eskaerak.

3. Aurrekontuan diru erabilgarririk izanik ere, laguntzarako eskubidea izateko nahitaezkoa izanen da gutxienez ere 30 puntu lortzea balorazio irizpideetan.

4. Deialdirako dagoen aurrekontu-kreditua nahikoa ez bada laguntzarako eskubidea duten eskaera guztiei dirulaguntza emateko, ezetsi eginen dira dagokion ekitaldiko aurrekontuan zuzkidura nahikoa ez izateagatik onartu ezin diren guztiak.

5. Laguntza eman ondoren aurrekontu-partidan kreditu erabilgarria sortzen bada, diru kopuru osagarri bat ematen ahalko zaie aurrekontu-eskasiagatik ezetsitako espedienteei, lehentasun-hurrenkerari jarraituz. Diru kopuru horiek emateko, aurretik onartutako gainerako eskaeren baldintza berberak bete beharko dira. Inbertsio plana bukatzeko epea egokituko da luzapenetarako onar daitekeen azken egunaren arabera, eta esleipenaren ebazpenean zehaztuko da.

10. oinarria.–Ordaindu aurretik entitate onuradunek dituzten konpromisoak eta betebeharrak.

1. Laguntza hauen onuradunek honako betebehar eta konpromiso hauek izanen dituzte:

a) Inbertsio plana 2028ko maiatzaren 2a baino lehen gauzatzea. Aurrekoa gorabehera, epea luzatzeko eskatzen ahal dute onuradunek, baldin eta frogatzen badute justifikatutako arrazoiengatik ezin dituztela inbertsioak burutu epearen barnean. Luzapen hori, beranduenez 2028ko otsailaren 29an eskatuko da, eta inbertsio planak gauzatzeko azken eguna urte horretako irailaren 15a izanen da.

b) Jarduketak egitea eta, hala bada, mantentzea, eta espedienteak lehenesteko (8. oinarriaren arabera) erabili diren kalifikazioak mantentzea.

c) Gerora bete beharreko konpromisoak mantentzea, 11. oinarrian ezartzen den bezala.

d) Landa Garapeneko eta Ingurumeneko Departamentuan honako hauek justifikatzea:

–Jasotako funtsak aplikatuta egindako gastuak eta ordainketak, eta

–Hartu diren funtsak laguntza emateko arrazoi izan ziren helburuetarako erabili direla, ezarrita dauden epe eta moduan.

e) Behar diren kontrolak onartzea, egiaztatzeko laguntza ongi eman dela, inbertsioak ongi gauzatu direla eta konpromisoak mantendu direla.

f) Behar diren argibideak ematea ustiategiaren alderdi tekniko-ekonomikoez, lan arlokoez eta sozialez, baita neurri honen esparruan hartutako laguntzez ere, haien jarraipena eta ebaluazioa bideratzeko adierazleak prestatzeko.

g) Diruz lagundutako jarduketak finantzatzeko beste dirulaguntza publiko eta laguntza batzuk eskatu edo lortu badira, horren berri ematea Landa Garapeneko eta Ingurumeneko Departamentuari. Jakin bezain laster emanen da horren berri, eta, betiere, jasotako dirua zertan erabili den azkeneko ordainketan frogatu baino lehen.

h) Egiaztapen eta kontrolak egiteko ahalmenak behar bezala erabil daitezen bermatzeko asmoz, kontabilitate liburuak, erregistro eginbidetuak eta gainerako agiriak behar bezala ikuskatuak edukitzea, pertsona onuradunari aplikatu behar zaizkion merkataritzako eta sektoreko legeetan agindutako moduan.

i) Gordetzea jasotako diruaren erabilerari buruzko frogagiriak, agiri elektronikoak barne, egiaztapenen eta kontrolen xede izan daitezkeen artean.

j) Guztira 50.000 eurotik gorako laguntza publikoz hornitutako inbertsioak dakartzaten ekintzetarako, onuradunak paratu beharko du azalpen plaka bat, ereduaren araberakoa. Eredua eskura daiteke laguntzetarako izapideen katalogoan.

Plaka horretan, proiektuaren edo eragiketaren deskribapen bat agertuko da. Horretaz gain, Europako ikurra agertuko da, Europar Batasuneko arau grafikoei jarraikiz, Batzordearen 2021eko abenduaren 21eko 2022/129 (EB) Betearazpen Erregelamenduaren II. eranskinaren arabera.

k) Jasotako funtsak itzultzea, oinarri arautzaile hauetan ezarritako kasuetan.

l) Hala dagokionean, inbertsioko ondasunak inbertsio plana bukatu baino lehen inskribatuko dira Nafarroako Foru Komunitateko behar diren erregistro ofizialetan.

m) Enpresa-deslokalizaziorik ez egitea, Enpresen sustraitzearen aldeko eta enpresen deslokalizazioaren aurkako neurriei buruzko abenduaren 16ko 18/2020 Foru Legearen 4. artikuluan ezarritakoari jarraikiz. Eginbehar hau ez betetzeak aipatutako foru legean jasotzen diren diru-itzulketak ekarriko ditu.

n) Dirulaguntza eman dela jakinarazten denetik hilabeteko epean, dirulaguntzen onuradunek gardentasun betebeharrari buruzko adierazpena aurkeztu beharko dute, modu telematikoan, deialdi honen 23. oinarrian ezarritako moduan, esteka honen bidez: gardentasunari buruzko adierazpena (https://administracionelectronica.navarra.es/RGE2/gestorinstancia.aspx?idinstancia=2007657).

Adierazpen hori beti aurkeztu behar da, gardentasun betebeharra izan (Gardentasunari, Informazio Publikoa Eskuratzeari eta Gobernu Onari buruzko maiatzaren 17ko 5/2018 Foru Legearen 3. artikuluko baldintzak betetzeagatik) edo ez izan (kasu horretan, inguruabar hori jasoko da adierazpenean).

2. Laguntza eskaera aurkezteak berekin dakar oinarri arautzaile hauetan ezarritako baldintzak eta konpromisoak onartzea.

11. oinarria.–Gerora bete beharreko konpromisoak.

1. Gerora bete beharreko konpromisoak dira onuradunak bere gain hartuko dituenak, bost urtez horiei eusteko baldintzarekin, edo hiru urtez, enpresa txiki eta ertainen kasuan, azkeneko ordainketa onesten duen ebazpenaren egunetik aurrera.

2. Hauek hartuko dira gerora bete beharreko konpromisotzat, oro har, era guztietako espediente eta entitate onuradunen kasuan:

a) Ustiategiaren titulartasuna mantentzea.

b) Diruz laguntzen diren inbertsioen jabetza mantentzea.

c) Eragiketaren helburuei, izaerari eta gauzatzeko baldintzei eustea, funtsezko aldaketarik gabe eta jatorrizko helburuak kaltetu gabe.

d) Onuradunaren eta ustiategiaren baldintzei eustea, haiengatik puntuak jaso badira 8. oinarriko baremoaren arabera.

3. Onuradunak aurreko 2. puntuko konpromisoak hartzen dituela ulertuko da horiek baliozkotu ondoren, laguntza ematen eta/edo ordaintzen denean.

Konpromiso horiek ez zaizkie eskatuko eragiketei ekoizpen jarduera bat bertan behera uzten bada iruzurrezkoa ez den porrotarengatik.

12. oinarria.–Laguntza eskaera, dokumentazioa eta instrukzio organoarekiko harremanak.

1. Eskaerak aurkezteko epea deialdia Nafarroako Aldizkari Ofizialean argitaratu eta biharamunetik hasiko da, eta 2026ko azaroaren 30ean amaituko.

2. Laguntza eskaerak aurkeztuko dira horretarako ezarri den atzemate programaren bidez. Programa hori onuradunen eskura dago Nafarroako Gobernuaren Interneteko atariaren tramiteen katalogoan (https://www.navarra.es/eu/tramiteak/on/-/line/ayudas-a-inversiones-en-explotaciones-agrarias-con-objetivo-medioambiental-2026).

3. Programa hori erabiltzeko beharrezkoa izanen da onuradunaren autentikotasuna egiaztatzea, haren sinadura elektronikoaren bidez edo onuradunaren ordezkari gisa arituko den entitate laguntzailearenaren bidez, bat etorriz Landa Garapeneko eta Ingurumeneko kontseilariaren azaroaren 21eko 46/2023 Foru Aginduarekin, haren bidez onesten baitira Landa Garapeneko eta Ingurumeneko Departamentuaren konturako laguntzen tratamenduan 2024-2027 aldian parte hartuko duten entitate laguntzaileak deitzeko eta hautatzeko arauak.

4. Jarduketa deialdiaren helburuetara egokitzen dela frogatzeko, III. eranskinean azaltzen den dokumentazioa aurkeztu beharko da eskaerarekin batera, tramiteen katalogoan kontsultatzen ahalko den zerrendaren arabera.

5. Nekazaritza Politika Erkidea kudeatzeko sistema eta hari loturiko beste gai batzuk arautzen dituen abenduaren 23ko 30/2022 Legearen 4. artikulua aplikatuz, laguntzen onuradunek bitarteko elektronikoak baino ez dituzte erabiliko instrukzio organoarekiko harremanetan.

13. oinarria.–Kostuen moderazioa.

1. Plan Estrategikoaren esku-hartzeen eta Nekazaritza Politika Erkidearen beste laguntza batzuen kudeaketa- eta kontrol-sistema arautzen duen abenduaren 27ko 1047/2022 Errege Dekretuak, besteak beste, proposatutako kostuen moderazioa egiaztatzeko betebeharra jasotzen du eta hura ebaluatzeko metodologia zehazten du.

Ondorio horietarako, diruz lagungarria den inbertsioaren zenbatekoa honela zehaztuko da:

a) IV. eranskinean (Moduluak) azaltzen diren inbertsioek zenbatekoa esleituta badute, dirulaguntzarako onartuko den zenbatekoa bi hauetako txikiena izanen da: onuradunak aurkeztutakoa eta IV. eranskinean ezarritakoa.

b) IV. eranskinean (Moduluak) azaltzen diren inbertsioek zenbatekoa esleituta ez badute, eskatzaileak hiru proformako faktura edo aurrekontu aurkeztu beharko ditu laguntza-eskaerarekin batera. Zenbateko diruz lagungarritzat hartuko da onuradunak aurkezten dituenetatik txikiena.

Eskaintzak egiazko enpresa hornitzaile independenteek eginak izan beharko dira, eta alderatzeko behar bezain zehatzak. Nolanahi ere, ez da beharrezkoa izanen hiru eskaintzak aurkeztea, justifikatzen bada merkatuan ez dagoela behar adina entitate hornitzaile edo emaile, gastu diruz lagungarrien ezaugarri bereziengatik. Salbuespen hori behar bezain justifikatuta egonen da inbertsio planean.

c) Inbertsioaren ezaugarriak direla-eta aurreko kasu horietako bakar batean ere sartu ezin diren inbertsioen kasuan, onuradunak proformako faktura edo aurrekontua aurkeztu beharko du inbertsioaren zenbatekoa justifikatzeko. Balorazio batzorde batek aztertuko du zenbatekoa. Batzorde hori instrukzio organoaren arduradunak eta profil teknikoa duten hango bi teknikarik osatuko dute, eta aurkeztutako aurrekontuaren aldeko txostena eman beharko dute edo, bestela, ordezko aurrekontu bat aurkeztu.

Batzorde horren erabakia justifikatuko da, orobat, ondasunaren prezioak egiaztatuz onuradunari dagokion jarduketa-merkatu logiko batean.

2. Kostuen moderazioa aplikatu izanari buruzko egiaztatze kontrolak eginen dira laguntza esleitu baino lehen, laguntza eskaeran oinarrituta, eta azken ordainketa egin baino lehen, onuradunak aurkeztutako ordainketa eskaeran oinarrituta. Egiaztatze kontrolak eginen dira, orobat, onuradunak aldaketak egitea eskatzen duenean.

3. Kostuen moderazioa zuzen aplikatzeko, onuradunak behar diren agiriak erantsi beharko dizkio (proformako fakturak, aurrekontuak, fakturak, etab.) inbertsio planari edo bukaerako ordainketa eskaerari, legez eska daitekeen informazio guztiarekin eta agiriaren jaulkitzailearen identifikazio datuei buruzko informazio fidagarriarekin, eta, orobat, entregatu beharreko ondasunaren ezaugarri teknikoak, lan egiteko gaitasunak, tamaina eta abar zehatz-mehatz azalduta.

4. Onuradunak horretarako aurkeztutako agiriak nahikotzat jotzen ez badira, kostuen moderazioa behar den bermearekin aplikatu ezin zaien ondasunak ez dira diruz lagungarritzat joko.

14. oinarria.–Instrukzio organoa.

Nekazaritzako Ustiategiak eta Nekazarien Elkarteak Sustatzeko Atala arduratuko da esku-hartze honetan aurreikusitako laguntzak emateko prozeduren instrukzioaz; atal hori Landa Garapeneko Zuzendaritza Nagusiko Nekazaritzako Ustiategien eta Elikagaien Sustapenerako Zerbitzuari atxikia dago.

15. oinarria.–Dirulaguntza emateko prozeduraren instrukzioa.

1. Instrukzio organoak laguntza eskaerak jaso ondoren, eskatzen den dokumentazio guztia duten egiaztatuko da. Behar izanez gero, eskaera 10 egun balioduneko epean zuzen dezala eskatuko zaio interesdunari, eta adieraziko zaio ezen, hori egin ezean, eskaerari uko egiten diola ondorioztatuko dela eta espedientea artxibatzeko ebazpena emanen dela, edo agiriak bere horretan daudela instruituko dela espedientea.

2. Behin eskaera osorik dagoela, eskatzen diren baldintzak betetzen dituen egiaztatuko da, eta horretarako behar diren kontrolak eginen dira.

3. Kontrol horiek egiteko, instrukzio organoak behar dituen erregistro ofizial guztiak erabiliko ditu, bai eta foru administrazioaren eta/edo beste administrazio batzuen esku dauden informazio iturriak ere, eta betiere aintzat hartuta laguntzaren eskaera aurkezteko unean eskuragarri dagoen informazioa, non ez duen interesdunak horren aurka egiten, bat etorriz Administrazio Publikoen Administrazio Prozedura Erkideari buruzko urriaren 1eko 39/2015 Legearen 28.2. puntuan adierazitakoarekin. Kasu horretan, onuradunak berak aurkeztu beharko ditu agiri horiek laguntzaren eskaerarekin batera, eta, horrela egin ezean, zuzentzeko eskatuko zaio, lehen atalean ezartzen den moduan.

Nekazaritzako Ustiategien Erregistroan kontsultatzen ahal diren parametroak zehazteko, onetsitako azken katalogazioaren araberako datuak erabiliko dira.

4. Instrukzioaren prozeduran zehar, unitate arduradunak argibideak eska ditzake aurkeztutako informazioari eta dokumentazioari buruz. Behar izanez gero, interesdunari eskatuko zaio argibideak gehienez 10 egun balioduneko epean aurkezteko, eta adieraziko zaio ezen, hala egiten ez badu, dagoen informazioaren arabera instruituko dela espedientea.

5. Laguntzaren zenbatekoa zehazteko, inbertsio diruz lagungarrien aurrekontua eta aplikatzekoak diren mugak, baremoak eta moduluak hartuko dira kontuan, oinarri arautzaile hauen arabera.

6. Ondoren, eskaerak ofizioz ebaluatuko dira norgehiagokako prozeduraren arabera eta oinarri arautzaile hauetan ezarritako balorazio irizpide, modu eta lehentasunetan oinarriturik.

7. Ebaluazioa ikusirik, ebazpen proposamena eginen da, eta dirulaguntzak emateko espedientean jaso beharko da onuradunek laguntza eskuratzeko behar diren baldintza guztiak betetzen dituztela.

16. oinarria.–Ebazpena.

1. Ebazpen proposamena ikusirik, Landa Garapeneko Zuzendaritza Nagusiak dirulaguntzak emateari buruzko ebazpena emanen du.

2. Ebazpena arrazoitua izanen da, eta hartutako ebazpenaren oinarriak frogaturik egonen dira beti.

3. Ebazpenean dirulaguntza jasoko duten eskatzaileen zerrenda azalduko da, eta, eskaerarik ezetsiz gero, horiek ere espresuki agertuko dira, eta, horien artean, zein diren aurrekontuko baliabideen mugagatik ezetsitakoak.

4. Eskaerak aurkezteko epea bukatzen denetik sei hilabetean ebatziko da laguntzak eman edo ukatzen diren. Ebazpen horretan, honako hauek jasoko dira: esleitutako dirulaguntzaren zenbatekoa justifikatzeko nahikoa den informazioa eta onuradunak bete behar dituen baldintzak eta konpromisoak.

Ebazpena argitara emanen da Nafarroako Gobernuaren atariko tramiteen katalogoko fitxan, deialdirako gaitzen den horretan.

5. Prozedura ebazteko epea iragaten bada berariazko ebazpenik eman gabe, eskaera administrazioaren isiltasunaren bidez ezetsi dela ulertuko da.

6. Aurkeztutako eskaeraren berariazko edo presuntziozko ezespenaren aurka, onuradunak gora jotzeko errekurtsoa jartzen ahalko du, Landa Garapeneko eta Ingurumeneko kontseilariari zuzendua, hilabeteko epean, ebazpena jakinarazi eta biharamunetik, berariazko ezespena izanez gero, edo administrazio isiltasunez ezetsi dela ulertzen den egunetik, presuntziozko ezespena izanez gero.

17. oinarria.–Inbertsio plana aldatzea.

1. Arrazoi justifikatuengatik entitate onuradunak beharrezkotzat jotzen badu aldaketak egitea hasiera batean onetsitako inbertsio planean, esleipena aldatzeko eskaera aurkeztu beharko du. Esleipena aldatzeko eskaerak ere horretarako ezarritako atzemate programaren bidez aurkeztuko dira; onuradunentzat eskuragarri dago Nafarroako Gobernuko Interneteko atarian, tramiteen katalogoan (https://www.navarra.es/eu/tramiteak/on/-/line/ayudas-a-inversiones-en-explotaciones-agrarias-con-objetivo-medioambiental-2026). Eskaera beranduenez 2027ko irailaren 1ean aurkeztu beharko da, eta, onets dadin, bete beharko ditu laguntza eskaerak dituen irizpide eta baldintza berberak.

2. Proposatutako aldaketak aski arrazoitua eta justifikatua egon beharko du, eta behar den dokumentazioa aurkeztu beharko da, honako hauek bermatzeko:

–Inbertsio plan berriaren bideragarritasuna.

–Ez dela urratzen eskaeren hurrenkerako emaitza ekarri zuten balorazio irizpideen aplikazioa.

3. Eskatzen diren aldaketak nabarmenak izanen dira bi kasu hauetan: eskatutako inbertsioei kostuen moderaziorako prozedura aplikatu beharra ekartzen dutenean, beste modulu bat aplikatzeagatik; eta diruz lagungarria den inbertsioan, guztira, 15.000 euro baino gehiagoko murrizketa ekartzen dutenean. Diruz lagungarria den guztizko inbertsioaren murrizketa hori kalkulatzeko, ez dira aintzat hartuko laguntza eskaera egin aurretik egin ziren inbertsioak.

4. Inbertsio planaren aldaketa nabarmen bat bakarrik onetsiko da.

5. Instrukzio organoaren balorazioaren mende egonen da eskatutako aldaketak onestea. Onespen horrekin ere, hasiera batean esleituriko laguntzak ez dira handituko.

–Aldaketa nabarmenak.

• Komunikatuak. Inbertsio plan berria ebazpen bidez onetsi beharko da, hasiera batean onetsitako planaren irizpide berberei jarraituta.
• Komunikatu gabekoak. Kostuak moderatzeko prozedura aplikatuko da azken ordainketa egin aurretik. Prozedura hori berme askirekin aplikatzerik ez bada, inbertsioak ez dira diruz lagungarritzat joko. Hori guztia 20. oinarriko 7. puntuan jasotakoaren arabera aplika daitezkeen murrizketak alde batera utzi gabe.

–Aldaketa ez-nabarmenak.

• Komunikatuak. Emandako inbertsioen doikuntza eginen da txosten tekniko baten bidez, eta interesdunari jakinaraziko zaio. Laguntza murriztu bada, ebazpen bidez onetsi beharko da.
• Komunikatu gabekoak. Azken ordainketaren unean, behar den doikuntza eginen da inbertsioetan eta emandako laguntzan.

Proposatutako aldaketa onesten ez bada, inbertsio plana hasiera batean onartutako moduan egin beharko da. Aldaketa ukatzen bada, ebazpen bidez izapidetuko da.

18. oinarria.–Ordainketa eskaera.

1. Laguntzak jaso ahal izateko, onuradunak ordainketa eskaera aurkeztu beharko du Nafarroako Gobernuaren web-orriko tramiteen katalogoan eskura dagoen atzemate programaren bidez.

2. Ordaintzeko eskaera –fakturak, ordainketen frogagiriak, baimenak, erregistroak eta nahitaez aurkeztu beharreko gainerako dokumentazioa erantsita– aurkezteko epea 2028ko urtarrilaren 1ean hasi eta urte bereko maiatzaren 2an bukatuko da. Beraz, ulertuko da data hori dela baimen horiek lortzeko eta/edo erregistro horiek egiteko muga-eguna.

Epe horiek bete behar izateak ez du esan nahi ezin direnik luzapenak eskatu eta eman justifikatutako arrazoiengatik. Halako kasuan, ordainketa eskaera aurkezteko azken eguna 2028ko irailaren 15a izanen da.

3. Ordainketa eskaerarekin batera, onuradunak inbertsioen bukaeraren berri eman beharko du, baita justifikatu ere horiek nola bete diren eta ordainketak nola gauzatu diren laguntzaren xede ziren kontzeptuengatik; horretarako, aurkeztuko dira behar diren fakturak eta/edo froga-balio baliokidea duten agiriak eta gastu eta inbertsio diruz lagungarri guztien ordainagiriak.

4. Onuradunak erabakitzen badu bere dirulaguntza enpresa hornitzaileari edo banku erakunde bati lagatzea, lagapen hori justifikatzen duen agiria aurkeztu beharko du ordainketa eskaerarekin batera. Agiri horretan, laguntza zer erakunderi lagatzen zaion, haren datuak jasoko dira, baita lagatako zenbatekoa ere.

19. oinarria.–Laguntzen ordainketa.

1. Laguntzen ordainketa deialdian zehaztutako aurrekontu-ekitaldiaren kargura eginen da.

2. Oro har, dirulaguntzak ordaindu aurretik, organo kudeatzaileak egiaztatuko du laguntzaren onuradunak bete egin dituela bai dirulaguntza emateko arrazoi izandako xedeak, bai gardentasuneko informazio betebeharra.

Horri dagokionez, ez da ulertuko jarduera gauzatua dagoela frogatu denik harik eta instrukzio organoak inbertsio plana bukatu dela ziurtatu eta ordainagiriak zuzen daudela egiaztatu arte.

Osorik gauzatu gabetzat hartzen diren inbertsioetan (5.3b) oinarria), egiaztapen horiek egin ostean egiaztatzen bada exekuzio maila ez dela aldatu, ulertuko da inbertsioa amaituta zegoela eskaera egiteko unean, eta, hortaz, ezin izanen da diruz lagundu.

3. Instrukzio organoak behar adina kontrol eginen ditu, egiaztatzeko onuradunak hartutako konpromisoak betetzen dituela eta inbertsioa aurkeztutako proiektuarekin bat datorrela. Kontrolen emaitzak ikusirik, bidezko ordainketak baimenduko ditu, eta laguntzak ordaintzeko ebazpen proposamena prestatuko.

4. Kontrol horiek egiteko, instrukzio organoak behar dituen erregistro ofizial guztiak erabiliko ditu, bai eta foru administrazioaren eta/edo beste administrazio batzuen esku dauden informazio iturriak ere, eta betiere aintzat hartuta laguntzaren eskaera aurkezteko unean eskuragarri dagoen informazioa, non ez duen interesdunak horren aurka egiten. Kasu horretan, onuradunak berak aurkeztu beharko ditu agiri horiek ordainketa eskaerarekin batera, eta, horrela egin ezean, zuzentzeko eskatuko zaio.

Kontrol horien barnean, bisitak egiten ahalko dira ustiategietara, egiaztatzeko inbertsioak bukatu eta zuzen gauzatu direla, edo egiaztatzeko instrukzio organoak beharrezkotzat jotzen duen beste edozein alderdi.

Nekazaritzako Ustiategien Erregistroan kontsultatzen ahal diren parametroak zehazteko, onetsitako azken katalogazioaren araberako datuak erabiliko dira.

5. Laguntza jaso dezaketen egiazko gastuei oinarri hauetan ezarritako portzentajea aplikaturik aterako da ordaindu beharreko zenbatekoa, betiere hasiera batean esleitutako kopurua gainditu gabe.

6. Instrukzio organoak egindako egiaztapenetan ondorioztatzen baldin bada beheranzko desbideratzeak daudela onuradunak aurkeztutako azkeneko ordainketa eskaerarekin alderatuta, hurrengo oinarrian aipatzen diren murrizketa eta bazterketa irizpideak aplikatuko dira.

20. oinarria.–Murrizketak eta bazterketak baremoa ezartzeko irizpideetan, laguntzetan eta ordainketetan.

1. Ordaintzeko eskaera ez bada ezarritako epean aurkezten, laguntza osorik galduko da, eta ez da laguntzarik eskatzen ahalko inbertsioak egiteko laguntzen hurrengo deialdian.

2. Azken ordainketa egin aurretik egiaztatzen bada ez direla bete eskaeren hurrenkera finkatzeko puntuazioa ateratzeko aintzat hartutako balorazio irizpideak, puntuazio txikiagoa zegokiola eta, horren ondorioz, onuradun izaera galduko zukeela, laguntza guztia galduko da.

3. Ez bada betetzen gastuak epe barruan justifikatzeko konpromisoa, gastu horiei lotutako laguntza kobratzeko eskubidea galduko da.

4. Ez badira betetzen 10. oinarriko 1. zenbakiko e) eta n) letretan jasotako betebeharrak (kontrolak onartzeko eta gardentasunari buruzko adierazpena aurkezteko betebeharrak, hurrenez hurren), laguntza osoa galduko da.

5. Ez badira betetzen 10. oinarriaren 1. zenbakiko f), g), h) eta l) letretan jasotako konpromisoak (kontabilitateari, jasotzen diren beste laguntzak jakinarazteari eta erregistroetan inskribatzeari buruzkoak, hurrenez hurren), konpromiso bakoitzari zuzenean lotutako laguntza galduko da.

6. Ez badira betetzen 10. oinarriko i) eta j) letretan jasotako konpromisoak (agiriak gordetzea eta azalpen plakak jartzea hurrenez hurren), laguntzaren %50 galduko da.

7. Jakinarazi gabeko aldaketa nabarmenen kasuan, inbertsio diruz lagungarrian 15.000 euro baino gehiagoko murrizketa eragiten badute, benetan gauzatutakoari dagokion zenbatekora doituko da ordainketa, eta %10eko penalizazioa aplikatuko zaio doikuntza egin ondorengo laguntzari.

8. Emandako laguntza guztiei uko egiten bazaie, eta ukoa ez bada jakinarazi esleipena aldatzeko eskaera aurkezteko epea bukatu baino lehen, ez da laguntzarik eskatzen ahalko hurrengo deialdian.

9. Ordainketa eskaerari dagokionez, murrizketa hau aplikatuko da:

Baldin ordainketa eskaeran adierazitako laguntzaren zenbatekoa bada, eskaera horren onargarritasun azterketa egin ondoren, ordaindu beharreko zenbatekoa baino %10 handiagoa, ordaintzeko zehaztutako zenbatekoa beste horrenbeste gutxituko da.

Dena den, ez da zenbatekorik murriztuko, baldin eta onuradunak frogatzen badu ez dela diruz lagungarri ez den zenbateko hori sartu izanaren erantzulea edo murrizketa hori aurreikusi gabeko kostuen jaitsiera baten ondorio dela.

10. Aurreko murrizketak eta bazterketak ez dira aplikatuko baldin eta onuradunak frogatzen badu ezinbesteko arrazoiengatik gertatu direla aldaketa horiek, hurrengo oinarriaren 6. puntuaren arabera, edo gerora sortutako eta onuradunari egotzi ezin zaizkion arrazoien frogagiriak aurkezten baditu.

11. Egiaztatzen bada onuradunak nahita egin duela gezurrezko adierazpen bat, emandako laguntzak bertan behera utziko dira, eta laguntzetatik jasotako zenbateko guztiak berreskuratuko dira. Gainera, onuraduna esku-hartze horretarako laguntzetatik bazterturik geldituko da, ekitaldi horretan eta hurrengoan, deusetan galarazi gabe Dirulaguntzei buruzko azaroaren 9ko 11/2005 Foru Legean ezarritako zehapenak edo gezurrezko adierazpena aurkezteko unean iruzurraren kontrako borrokarako indarrean diren prozeduretatik datozenak.

Aurreko paragrafoaren ondorioetarako, proformako faktura edo aurrekontu faltsuak aurkeztea nahita egindako adierazpen faltsutzat hartuko da.

12. Frogatzen bada onuradunak baldintza artifizialak sortu dituela laguntza jaso ahal izateko, laguntzetatik kanpo geldituko da, aplikatuz abenduaren 27ko 1047/2022 Errege Dekretuaren 3. artikulua, eta laguntzengatik jasotako zenbateko guztiak itzuli beharko ditu.

Horri dagokionez, georreferentziadun argazkien edo ustiategira egindako bisiten bidez, inbertsioa osorik gauzatu ondoren, detektatzen bada elementuak edo unitateak ezabatu direla laguntzak eskatzeko unean inbertsioak bukatu ez izanaren baldintza betetzearren, ulertuko da laguntza jasotzeko baldintza artifizialak sortu direla, eta inbertsioa ez da diruz laguntzeko modukotzat joko.

Onuradunen eta/edo ustiategien onargarritasun irizpideak aztertzean, atzematen bada aldaketak egin direla Nafarroako Nekazaritzako Ustiategien Erregistroak ofizioz egindako nekazaritzako ustiategien katalogazioaren ondotik, helburu izan dezaketenak laguntzan abantaila lortzea, aldaketa horiek sartu gabe egokituko zitzaionaren gainetik, ulertuko da laguntza jasotzeko baldintza artifizialak sortu direla, eta eskaera laguntzetatik kanpo geratuko da.

21. oinarria.–Gerora bete beharreko konpromisoen murrizketak.

1. Oinarri arautzaile hauetan azaldutako gerorako konpromisoak betetzen ez badira, laguntzak itzuli beharko dira osoki edo partez, Dirulaguntzei buruzko azaroaren 9ko 11/2005 Foru Legearen 34. eta 35. artikuluekin bat.

2. Konpromiso horien ez-betetzea mailakatu eginen da, ondoren ezartzen diren irizpideekin bat, eta, horien arabera, jasotako laguntza itzultzeko portzentajeak kalkulatuko dira, baita legez ezarritako berandutze-interesak ere.

3. Ez bada betetzen 11.2 oinarriko a) letran xedatutakoa, laguntza osoa itzuli beharko da, legez dagozkion interesekin batera.

4. Ez bada betetzen 11. 2 oinarriko b) letran xedatutakoa, ez-betetzearen xede den inbertsiorako laguntza itzuli beharko da, legez dagozkion interesekin batera.

5. Ez badira betetzen 8. oinarriko balorazio-irizpideak, eta, ondorioz, ez bada eskuratu onuradun izateko puntuazio nahikorik, jasotako laguntza osoa itzuli beharko da, legez dagozkion interesekin batera.

6. Aurreko ataletan aipatzen diren konpromisoak ez dira bete gabetzat joko ez betetzeko arrazoia ezinbesteko kausa bat denean.

Ezinbesteko arrazoiak edo salbuespeneko kasuak gertatu direla ulertuko da honako egoera hauetan:

a) Onuradunen heriotza, pertsona fisikoen kasuan, edo onuradunen bazkideren batena, onuradunak pertsona juridikoak badira.

b) Onuradunetako baten lanerako ezintasun luzea, pertsona fisikoen kasuan, edo onuradunen bazkideren batena, onuradunak pertsona juridikoak badira.

c) Ustiategia osorik edo zati handi bat desjabetzea, baldin eta eskaera aurkeztu zenean aurreikusi ezin bazen. Ustiategiaren zati handi bat dela ulertuko da baldin Europako Dimentsioko Unitateen %40 baino gehiago murrizten badira.

d) Hondamendi natural larria, ustiategiko lurretan eta/edo instalazioetan kalte nabarmena eragin duena.

e) Ustiategiko eraikuntzen eta/edo instalazioen suntsipena, istripuz.

f) Epizootia edo landareen gaitza, ustiategiko azienda edo labore guztiei edo zati bati kalte egin diena.

Ezinbesteko kasuak edo salbuespenezko inguruabarrak gertatuz gero, entitate onuradunak edo haren eskubidedunak idatziz jakinarazi beharko du, froga egokiak erantsita, gertakaria izan eta hogeita hamar egun balioduneko epean, eta betiere instrukzio organoak kontrola egin behar duela adierazi edo hura gauzatu baino lehenago.

7. Honi dagokionez, onuradun batek, azken ordainketaren ondoren erabakitzen badu sozietate batean sartzea bere ustiategia osorik edo hein batean jarriz, ez da ulertuko bertan behera utzi duela konpromisoa, baldin eta: onuraduna bere baitan hartu duen entitateak lehentasunezko nekazaritzako ustiategiaren izaera badu; ustiategiaren nekazaritzako lan unitateak –hots, entitate berriaren kapital sozialean daukan partaidetza kontuan hartuta onuradunari dagozkionak– balio berekoak edo handiagokoak baldin badira, benetan ekarri dituen ekoizpen unitateekin alderatuta. Gainera, sozietateak bere gain hartu beharko ditu gerora bete beharreko konpromisoak.

8. Pertsona fisiko batek laguntzak jaso ondoren erabakitzen badu titulartasun partekatuko nekazaritzako ustiategi bat eratzea, ez du bete beharko aurreko paragrafoan zehazten den nekazaritzako lan unitateen baldintza, baldin eta ustiategi berria lehentasunezko gisa sailkatuta badago eta gerora bete beharreko konpromisoak bere gain hartzen baditu.

9. Ustiategiko titulartasuna mantentzeko konpromisoa betetzen dela ulertuko da, nahiz eta nortasun juridikoko entitatearen tipologia aldatu, baldin eta entitate elkartu berri horrek hasierako entitatearen baldintza berberak betetzen baditu eta gerora bete beharreko konpromisoak bere gain hartzen baditu.

10. Ulertuko da jarduera mantentzen dela, pertsona fisikoa den onuradunak erretiroa hartzen duelarik, ustiategia beste ustiategi batean integratzen bada eta hura lehentasuneko gisa katalogaturik badago eskualdaketa egin baino lehenago, edo ezartzen ari den nekazari batek haren ordez hartzen badu. Ustiategian erreleborik bada, titular berriak ezartzeko laguntzak jasotzeko baldintzak bete beharko ditu. Kasu batean zein bestean, gerora bete beharreko konpromisoak bere gain hartu beharko baditu.

22. oinarria.–Beste laguntza batzuekiko bateragarritasuna edo bateraezintasuna.

Laguntza hauen onuradunek ez dute xede eta helburu bererako beste laguntzarik jasotzen ahalko.

Beste deialdiren batean laguntza jaso duten ondasunek ez dute inola ere laguntzarik jasoko deialdi honetan.

23. oinarria.–Onuradunaren gardentasun betebeharrak.

Gardentasunari, Informazio Publikoa Eskuratzeari eta Gobernu Onari buruzko maiatzaren 17ko 5/2018 Foru Legearen 3. artikuluan aipatutako entitateak behartuak daude gardentasun betebeharra betetzera baldin eta, urtebetean, 20.000 eurotik gorako laguntzak edo dirulaguntzak jasotzen badituzte Nafarroako Aurrekontu Orokorren kargura, edo jasotako laguntzak edo dirulaguntzak beren urteko sarrera guztien %20 edo gehiago badira, eta, gutxienez, 5.000 euro. Horretarako, honako esteka honetan dagoen eredua aurkeztu beharko dute, gardentasun betebeharrari buruzko adierazpena, alegia: Gardentasun betebeharrari buruzko adierazpena (https://administracionelectronica.navarra.es/RGE2/gestorinstancia.aspx?idinstancia=2007657).

Aurreko atalean ezarritako muga kuantitatiboak gainditzen diren jakiteko, batuko dira Nafarroako Foru Komunitateko Administrazioak edo haren entitate publikoek urte naturalean emandako dirulaguntza guztien kopuruak. Urte batean baino gehiagotan ordaintzen diren dirulaguntzen kasuan, aurrekontu-ekitaldi bakoitzean emandako kopurua hartuko da kontuan ondorio horietarako, ez guztizko batura. Negozio-zifra honako hauetako txikiena izanen da:

a) Aurreko urteko negozio-zifra.

b) Hala badagokio, dirulaguntza ematen den ekitaldian entitateko organo eskudunak onetsitako negozio-zifra.

Aipatu diren inguruabarrak gertatzeagatik gardentasun betebeharra duten entitate onuradunek jarraian adierazten den informazioa eman beharko dute hilabeteko epean, dirulaguntza emateko ebazpena jakinarazten denetik zenbatzen hasita:

a) Entitatearen gobernu, administrazio eta zuzendaritza organoen osaera.

b) Organo horiek osatzen dituzten kargudunen zerrenda.

c) Entitatearen gobernu, administrazio eta zuzendaritzako eginkizunetan ematen den dedikazioaren araubidea.

d) Entitateak aurreko urtean kargudun bakoitzari ordaindutako ordainsari gordinak eta gainerako diru konpentsazioak. Sortu berriak diren entitateen kasuan, informazioa izanen da haien aurrekontuetan edo plan ekonomiko-finantzarioan jasotakoa.

e) Entitate onuradunaren azken urteko kontuen kopia.

Informazio hori entitate onuradunaren legezko ordezkariak sinatuta aurkeztuko da, telematikoki, gardentasunari buruzko adierazpenaren estekaren bidez (https://administracionelectronica.navarra.es/RGE2/gestorinstancia.aspx?idinstancia=2007657), eta eredu hauen araberako agiriak erantsita:

• Goiko a), b) eta c) letretan zehazten den informazioa emateko, I. eranskinean dagoen eredua erabiliko da, zeina esteka honetan eskuratzen ahal baita: Organoen osaerari eta dedikazioari buruzko adierazpena (https://www.navarra.es/documents/48192/5726243/2+Declaracion+de+cargos+y+dedicacion_cas_eus.pdf/a4040dbc-5f38-6419-de18-be7af29f4cca?t=1651059276963).
• d) letran zehazten den informazioa emateko, II. eranskinean dagoen eredua erabiliko da, zeina esteka honetan eskuratzen ahal baita: Organoen ordainsariei buruzko adierazpena (https://www.navarra.es/documents/48192/5726243/3+Declaracion+de+retribuciones+cas_eus.pdf/476d1d82-9ef4-7d25-7668-36cf9ae8c191?t=1651059275713).

Entitateak ez badu gardentasun betebeharrik ezarritako egoerak gertatzen ez direlako, horren gaineko adierazpena aurkeztu beharko du.

Entitateak dirulaguntza bat baino gehiago jasotzen baditu ekitaldi berean, ez du informazioa berriz eman beharko dirulaguntza bakoitzerako, salbu eta hasieran eman zituen datuak aldatu badira. Horretarako, entitateak adierazi beharko du Foru Komunitateko Administrazioaren zein organoren aurrean aurkeztu zuen, eta noiz.

Betebehar hori bete ezean, ez da ordainduko onartutako dirulaguntza.

Aurrekoa galarazi gabe, onuradun guztiak behartuak daude Administrazioari behar den informazio guztia ematera, aurretiazko errekerimendua eginda eta hamar eguneko epean, hark bete ahal ditzan Gardentasunari, Informazio Publikoa Eskuratzeari eta Gobernu Onari buruzko maiatzaren 17ko 5/2018 Foru Legearen II. tituluan jasotako gardentasun betebeharrak. Era berean, foru lege horretan ezarrita dagoen arau-hauste eta zehapenen araubidea aplikatuko da.

24. oinarria.–Emandako dirulaguntzen publizitatea.

Oinarri arautzaile hauen esparruan emandako laguntzaren publizitatea Batzordearen 2021eko abenduaren 21eko 2022/129 (EB) Betearazpen Erregelamenduaren III. eranskinak ezarritakoaren arabera eginen da (erregelamendu horren bidez ezartzen dira olio-hazien, kotoiaren eta ardogintzako azpiproduktuen gaineko esku-hartze motetarako arauak, Europako Parlamentuaren eta Kontseiluaren 2021/2115 (EB) Erregelamenduari jarraikiz), bai eta Batasunaren laguntzarekin eta NPEaren plan estrategikoekin lotutako informazioari, publizitateari eta ikusgarritasunari buruzko betekizunen arabera ere.

25. oinarria.–Arau-hausteak eta zehapenak.

1. Arau-hauste administratiboak dira Nekazaritza Politika Erkidea kudeatzeko sistema eta hari lotutako beste gai batzuk arautzen dituen abenduaren 23ko 30/2022 Legean tipifikatutako ekintzak eta omisioak, eta zehagarriak izanen dira baita zabarkeria hutsez eginak badira ere, salbu eta ezinbesteko kasuetan edo Europako araudiak ezarritako beste kasu batzuetan.

2. Halaber, Dirulaguntzei buruzko azaroaren 9ko 11/2005 Foru Legean ezarritako arau-hauste eta zehapenen araubidea aplikatuko da, eta, hala badagokio, ez-betetzeen ondoriozko zigorrak ere (20. eta 21. oinarrietan zehazten dira).

3. Arau-hauste administratiboen erantzule izanen dira ekintzaz edo omisioz arau-hauste gisa tipifikatutako inguruabarretan erortzen diren pertsona fisiko edo juridikoak, publiko edo pribatuak eta nortasunik gabeko entitateak.

4. Arau-hausteak bi legeetan ezarritakoaren arabera tipifikatu eta mailakatuko dira.

26. oinarria.–Aplikatu beharreko araudia.

Honako hauek arautuko dute deialdi hau: haren oinarri arautzaileak; Europako Parlamentuaren eta Kontseiluaren 2021eko abenduaren 2ko 2021/2115 (EB) Erregelamendua, zeinaren bidez arauak ezartzen baitira Batasuneko estatuek Nekazaritza Politika Erkidearen esparruan egin behar dituzten plan estrategikoei (NPEaren plan estrategikoak) laguntza emateko, Nekazaritza Bermatzeko Europako Funtsaren (NBEUF) eta Landa Garapenerako Europako Nekazaritza Funtsaren (LGENF) kontura finantzatzen baita, eta 1305/2013 (EB) eta 1307/2013 (EB) erregelamenduak indargabetzen dira; azaroaren 9ko 11/2005 Foru Agindua, dirulaguntzei buruzkoa; eta aplikatu beharreko gainerako xedapenak.

27. oinarria.–Errekurtsoak.

Deialdi honen, haren oinarrien eta Landa Garapeneko zuzendari nagusiak hartutako aplikazio-egintzen kontra gora jotzeko errekurtsoa jartzen ahalko da, Landa Garapeneko eta Ingurumeneko Departamentuko titularrari zuzendua, hilabeteko epean, errekurtsoaren xede den egintza argitaratu edo jakinarazi eta biharamunetik aurrera.

Hori guztia, bat etorriz urriaren 1eko 39/2015 Legearen 121. eta 122. artikuluekin (Administrazio Publikoen Administrazio Prozedura Erkideari buruzko Legea) eta martxoaren 1eko 11/2019 Foru Legearen 126. artikuluarekin (Nafarroako Toki Administrazioari eta foru-sektore publiko instituzionalari buruzko Foru Legea).

II. ERANSKINA.–NEKAZARITZAKO USTIATEGIETAN INGURUMEN HELBURUA DUTEN INBERTSIOAK EGITEKO LAGUNTZAK 2023-2027 NPEPE-AREN ESPARRUAN. HAUTAKETA IRIZPIDEAK

(*) Pertsona juridikoek jasoko duten puntuazioa izanen da kasuan kasuko irizpidea betetzen duten pertsona fisikoek kapital sozialean duten portzentajearen araberakoa.

(1) Honako pertsona hauek:

–2026an nekazari profesional gazteak ezartzeko laguntzen onuradunak, edo laguntza horiek 2026an, 2025ean edo 2024an laguntza horiek jaso dituztenak.

–Nekazari gazteak lehenengoz ezartzeko laguntza lortuta, baldintza hauek betetzen dituztenak laguntza eskaera aurkezten duten egunean: 41 urte beterik ez izatea eta ezartzeko prozesua bukatu zenetik hiru urteko epearen barnean egotea. Ondorio horietarako, ulertuko da prozesu hori bukatu dela ezartzeko laguntzaren azken tarteko ordainketa onesten den egunean.

–Nekazari gazteak lehenengoz ezartzeko laguntza lortu gabe, baldintza hauek betetzen dituztenak laguntza eskaera aurkezten duten egunean: 41 urte beterik ez izatea, OON (ogibide nagusia nekazaritza) gisa katalogatuta egotea eta hiru urte baino gutxiago igaro izana nekazaritzaren arloko gizarte segurantzan afiliatu zirenetik.

(2) 2024ko, 2025eko edo 2026ko ekitaldietan nekazari gazteak lanaldi partzialean ezartzeko laguntzen onuradunak izan direnak, edo lanaldi partzialean dauden nekazari gazteek soil-soilik osatutako pertsona juridikoak.

(3) 2024ko, 2025eko edo 2026ko ekitaldietan nekazari gazteak ezartzeko laguntzen onuradunak izan direnak, edo nekazari berri bat ezarri den eta titulartasun partekatua duten instalazioak.

(4) 7. oinarriko 3.b) ataleko definizioaren arabera: Puntuazio hori aplikatuko zaie laguntza eskatzean lehentasunezko gisa sailkatuta dauden nekazaritzako ustiategien titularrak diren onuradunei, bai eta nekazari profesional gazteak ezartzeko laguntzei esker prozesu horretan diren pertsonei ere.

(5) Ustiategiaren kokapenaren arabera (7. oinarriko 3.c) puntua): puntuazio hori aplikatuko zaie ustiategiei baldin eta, inbertsio plana bukatu ondoren, ustiategia kokatua dagoen udalerria (Nafarroako Nekazaritzako Ustiategien Erregistroan jasoa dagoen EIN kodearen arabera) sartzen bada muga naturalak edo bestelako muga berariazkoak dituzten eskualdeetako esku-hartzean, 2023-2027ko NPEPEaren esparruan.

(6) Baremorako puntuazioa kalkulatzeko formula hau aplikatu behar da: (ingurumen-onura duten inbertsioen puntuazioa * industria onura duen inbertsioaren zenbateko diruz lagungarria) / diruz laguntzen ahal den espedienteko zenbateko osoa.

(7) Inbertsio-moduluak: 1.1.1. Minda-putzuak estaltzea. 1.1.9. Simaurtegiak irazgaiztea. 1.1.10. Minda-­putzuak irazgaiztea.

(8) Inbertsio-moduluak: 1.1.2. Solidoak eta likidoak bereizteko gailua.

(9) Inbertsio-moduluak: 1.1.6. Simaurra iraultzeko ekipoak. 1.1.7. Konpostagailuak. 1.1.8. Oilo-gorotzaren idortegiak.

(10) Uholde bidezko ureztapenaren ordez presio bidezkoa jartzea. Inbertsio-moduluak: 2.1.1. Aspertsio bidezko ureztapena. 2.1.2. Tantakako ureztapena.

(11) Inbertsio-moduluak: 3.1.1. Eguzki unitate fotovoltaikoa. 3.1.2. Mini-eolikoa. 3.1.3. Mini-hidraulikoa. 3.1.4. Biomasa-energia termikoa. 3.1.5. Aerotermia. 3.1.6. Geotermia.

(12) Inbertsio-moduluak: 3.2. Dauden nabeetako isolamendua.

(13) Inbertsio-moduluak: 4.2.3. Urrunetik kontrolatzeko teknologiak (lepokoak) eta hesi birtualak.

(14) Inbertsio-moduluak: 5.1.1. Osasun-ibia. 5.2.1.7. Hesi bikoitzeko sistema. 5.3.1. Desinfekzio-arkua. 5.8. Ozonozko desinfekzio-ekipoak.

III. ERANSKINA.–LAGUNTZA ETA ORDAINKETA ESKAEREKIN BATERA AURKEZTU BEHARREKO AGIRIEN ZERRENDA

–Laguntza eskaerarekin batera aurkeztu beharreko dokumentazioa:

a) Eskatzailearen IFZaren kopia.

b) Inbertsioak eta haien ezaugarriak azaltzen dituzten memoriak, proiektuak eta abar.

c) Abeltzaintza-ustiategietarako, indarrean dauden ingurumen baimenak, inbertsioak lehendik dauden instalazioetan eginez gero.

d) Ingurumen baimen bateratua, ingurumen ukipenen txostena edo jarduera sailkaturako lizentzia, kasuan kasuko inbertsio motari dagokionaren arabera, Ingurumenean Eragina duten Jarduerak arautzen dituen abenduaren 16ko 17/2020 Foru Legearekin edo aplikatzekoa den beste arau batekin bat.

e) Kostuen moderaziorako prozedura aplikatzeko, proformako fakturak, aurrekontuak eta abar.

–Ordainketa eskaerarekin batera aurkeztu beharreko dokumentazioa:

a) Fakturak, ordainagiriak edota froga-balioa duten beste agiri batzuk.

b) Baimenak, erregistroak, etab.

c) Kredituaren lagapena.

IV. ERANSKINA.–MODULUAK

Iragarkiaren kodea: F2612118