1. NAFARROAKO FORU KOMUNITATEA
1.7. BESTELAKOAK
208E/2026 EBAZPENA, uztailaren 28koa, Trantsizio Energetiko eta Digitaleko, Enpresa I+G+Bko eta Ekintzailetzako zuzendari nagusiak emana, zeinaren bidez "Lanbide Heziketako ikastetxeen deskarbonizazioa" deritzon lehiaketa onesten baita.
2030 Horizontea-Nafarroako Energia Planaren helburuen artean daude energiaren kontsumo efizientea sustatzea, energiaren amaierako kontsumoan energia berriztagarrien ekarpena handitzea eta erregai fosilen erabilera murriztea.
Horretarako bide ematen duen palanketako bat da "Komunikazioa eta partaidetza publikoa. Prestakuntza eta sentsibilizazioa" deritzona. Haren helburuetako bat da herritarrekiko komunikazio ona eta haien parte-hartzea ahalbidetzea eta bermatzea eta, horrez gain, NEP 2030 planaren emaitzak kontrastatzea gizarte erakundeekin eta intereseko taldeekin. Hain zuzen, intereseko talde horietako bat da honako gradu hauetakoren bat ikasten duten Lanbide Heziketako (LH) ikastetxeetako ikasleek osatzen dutena:
–Hozteko eta Girotzeko Instalazioetako erdi-mailako gradua.
–Beroa Sortzeko Instalazioetako erdi-mailako gradua.
–Eraikuntzako erdi-mailako gradua.
–Energia Eraginkortasuneko eta Eguzki Energia Termikoko goi-mailako gradua.
–Energia Berriztagarrietako goi-mailako gradua.
–Bero eta Fluido Instalazioen Mantentze Lanetako goi-mailako gradua.
–Uraren Kudeaketako goi-mailako gradua.
–Eraikuntza Proiektuetako goi-mailako gradua.
–Ingurumen Hezkuntzako eta Kontroleko goi-mailako gradua.
–Trantsizio Energetiko Garbiaren arloetako erdi-mailako edo goi-mailako gradua.
"Lanbide Heziketako ikastetxeen deskarbonizazioa" deritzon lehiaketaren helburua da trantsizio energetikoaren aldeko konpromisoa indartzea gazteen artean.
Helburu horiekin bat, bada, zuzendaritza nagusi honek "Lanbide Heziketako ikastetxeen deskarbonizazioa" deritzon lehiaketaren oinarriak onetsi ditu. Lehiaketan parte hartzen ahalko dute 2026-2027 ikasturtean arestian aipatutako erdi- eta goi-mailako graduetan arituko diren ikasleek.
Adierazitakoarekin bat, eta erabiliz Nafarroako Foru Komunitateko Administrazioari eta foru-sektore publiko instituzionalari buruzko martxoaren 11ko 11/2019 Foru Legearen 32. artikuluak ematen dizkidan eskudantziak,
EBAZTEN DUT:
1. "Lanbide Heziketako ikastetxeen deskarbonizazioa" deritzon lehiaketaren oinarriak onestea. Oinarriok ebazpen honen eranskinean daude jasota.
2. Ebazpen hau eta eranskina Nafarroako Aldizkari Ofizialean argitaratzea.
3. Ebazpen honek ez du administrazio bidea amaitzen, eta haren aurka gora jotzeko errekurtsoa jar dezakete interesdunek, Industriako eta Enpresen Trantsizio Ekologiko eta Digitalerako kontseilariari zuzendua, argitaratu eta biharamunetik hilabeteko epean.
Iruñean, 2026ko uztailaren 28an.–Trantsizio Energetiko eta Digitaleko, Enpresa I+G+Bko eta Ekintzailetzako zuzendari nagusia, Garbiñe Basterra Olóriz.
ERANSKINA.–OINARRI ARAUTZAILEAK
1. oinarria.–Xedea.
Trantsizio Energetiko eta Digitaleko, Enpresa I+G+Bko eta Ekintzailetzako Zuzendaritza Nagusiak lehiaketa hau antolatu du, sustatu beharrez Lanbide Heziketako (LH) ikastetxeetako ikasleek lideratutako proiektuak eraikinak deskarbonizatzeko. Proiektu horiek balio behar dute trantsizio energetikoaren aldeko konpromisoa indartzeko gazteen artean.
2. oinarria.–Parte hartzeko baldintzak.
Lehiaketan parte hartzen ahalko dute Nafarroan ematen diren Lanbide Heziketako gradu hauetako ikasleek:
–Hozteko eta Girotzeko Instalazioetako erdi-mailako gradua.
–Beroa Sortzeko Instalazioetako erdi-mailako gradua.
–Eraikuntzako erdi-mailako gradua.
–Energia Eraginkortasuneko eta Eguzki Energia Termikoko goi-mailako gradua.
–Energia Berriztagarrietako goi-mailako gradua.
–Bero eta Fluido Instalazioen Mantentze Lanetako goi-mailako gradua.
–Uraren Kudeaketako goi-mailako gradua.
–Eraikuntza Proiektuetako goi-mailako gradua.
–Ingurumen Hezkuntzako eta Kontroleko goi-mailako gradua.
–Trantsizio Energetiko Garbiari lotutako arloetako erdi-mailako edo goi-mailako gradua.
Arestian aipatutako graduetako talde bakoitzak proiektu bat aurkezten ahalko du. Taldea diogunean ikasgelaz ari gara.
3. oinarria.–Proiektuek bete beharreko baldintzak.
Proiektuari buruzko memoria bat egin beharko da. Lehiaketan parte hartzen duen gradua zer ikastetxetan ematen den, ikastetxe horretako eraikinaren egoera energetikoari buruzko diagnostiko bat jasoko da memorian, eta, orobat, eraikina deskarbonizatzeko zer jarduketa proposatzen diren azaldu beharko da. Memoriak atal hauek, gutxienez, izan beharko ditu:
–Helburuak.
–Eraikinaren diagnostiko energetikoa.
–Zer jarduketa proposatzen diren eraikina deskarbonizatzeko.
–Proposatutako jarduketen gutxi gorabeherako aurrekontua.
–Jarduketak inplementatu nahi izanez gero jarraitu beharreko izapideen eta urratsen zerrenda.
–Ondorioak.
Memoriak pdf formatua izan beharko du, 10 orrialdekoa izanen da gehienez, eta A4 tamainakoa.
4. oinarria.–Aurkezteko epea eta tokia.
4.1. Lehiaketan parte hartzeko eskaera.
1. Lehiaketan izena emateko epea hasiko da lehiaketaren oinarriak Nafarroako Aldizkari Ofizialean argitaratu eta biharamunean, eta amaituko da 2026ko urriaren 31n.
2. Eskaerak telematika bidez aurkeztuko dira nahitaez, Nafarroako Gobernuak Interneten duen Atariaren (www.nafarroa.eus) tramiteen katalogoko fitxa baliatuta (hemendik aurrera, lehiaketaren fitxa).
Honako hauek zehaztu behar dira parte hartzeko eskaeran:
–Proiektua aurkezten duen pertsonaren izena eta bi abizen, eta zer lotura duen ordezkatzen duen ikastetxearekin.
–Talde parte-hartzailearen izena, zer gradu egiten ari diren adierazita, eta taldea osatzen duten ikasleen kopurua zehaztuta.
–Ikastetxearen izena eta helbidea.
4.2. Proiektuak aurkezteko epea eta lekua.
Proiektuak aurkezteko epea lehiaketaren oinarriak Nafarroako Aldizkari Ofizialean argitaratu eta biharamunean hasiko da, eta 2027ko martxoaren 24an bukatuko da.
Proiektuak telematika bidez aurkeztuko dira nahitaez, Nafarroako Gobernuak Interneten duen Atariaren (www.nafarroa.eus) tramiteen katalogoko fitxa baliatuta (hemendik aurrera, lehiaketaren fitxa). Datu hauek jarri beharko dira:
–Proiektua aurkezten duen pertsonaren izena eta bi abizen, eta zer lotura duen ordezkatzen duen ikastetxearekin.
–Talde parte-hartzailearen izena, zer gradu egiten ari diren adierazita, eta taldea osatzen duten ikasleen kopurua zehaztuta.
–Ikastetxearen izena eta helbidea.
–Proiektuaren izenburua eta hari buruzko deskribapen labur bat. Eskabidearekin batera, proiektuaren memoria aurkeztuko da, pdf formatuan.
5. oinarria.–Lehiaketaren nondik norakoa.
5.1. Epaimahaia.
Epaimahai batek ebaluatuko ditu aurkeztutako proiektuen memoriak. Honako hauek osatuko dute:
–Trantsizio Energetikoaren Zerbitzuko zuzendaria.
–Trantsizio Energetiko eta Digitaleko, Enpresa I+G+Bko eta Ekintzailetzako Zuzendaritza Nagusiko teknikari bat.
–NASUVINSAko bi teknikari.
5.2. Lehenbiziko fasea: Proiektuen aldez aurreko hautaketa.
Arestian aipatutako epaimahaiak aurkeztutako proiektuen memoriak aztertu eta gehienez ere 80 puntu emanen dizkie, honako irizpide hauei jarraikiz:
–Proiektuaren kalitate teknikoa: 20 puntu.
–Metodologia eta diagnostikoan erabilitako adierazleak: 20 puntu.
–Proiektuan proposatutako jarduketen kopurua eta koherentzia: 20 puntu.
–Proiektuaren bideragarritasuna: 20 puntu.
Baloratu ondoren, puntuaziorik handienak lortu dituzten 5 proiektuak aukeratuko dira, eta horiek izanen dira hurrengo fasera –proiektuaren aurkezpen-fasera, alegia– igaroko direnak.
Ez dira aintzat hartuko epaimahaiaren iritziz 3. oinarrian aipatutako ezaugarriekin zerikusirik ez duten proiektuak.
5.3. Bigarren fasea: Proiektu irabazlea hautatzeko azken saioa.
5.3.1. Proiektua aurkeztea.
Epaimahaiaren ebaluazioaren ondoren, saio bat antolatuko da, eta aurrez hautatutako 5 proiektuen egileek beren proiektua aurkeztu beharko dute epaimahaikideen eta bertaratutakoen aurrean. Talde bakoitzak 10 minutu izanen ditu, beren proiektua azaltzeko eta proiektu hori beren ikastetxean nola aplikatuko duten zehazteko. Material grafikoa erabiltzen ahalko da proiektua azaltzeko.
5.3.2. Debatea.
Aurkezpen guztien ondoren, galderetarako tartea egonen da. Tarte horretan, epaimahaikideek galdera bat (edo batzuk) eginen di(zki)ete aurrez hautatutako proiektuak egin dituzten taldeei, eta talde bakoitzak 5 minutu izanen ditu erantzuteko. Taldeek aurkezpenak zer ordenatan eginen dituzten erabakitzeko, zozketa bat eginen da emaitzak aurkezteko saioan bertan.
5.3.3. Aurkezpena eta debatea baloratzea.
Epaimahaiak 20 puntu emanen ditu gehienez, honako alderdi hauek baloratuta:
–Komunikatzeko gaitasuna eta argitasuna, proiektua azaltzeko orduan: 10 puntu.
–Debateko galderei erantzuteko gaitasuna: 10 puntu.
5.4. Azken balorazioa eta lehiaketa ebaztea.
Aurrez hautatutako proiektuen azken balorazioa egiteko, lehenbiziko fasean egindako hasierako balorazioari (5.2 oinarria) gehituko zaio proiektuen aurkezpenean eta debatean (5.3.3) lortutako balorazioa.
Aurkezpen-saioaren amaieran, epaimahaiak zer proiektuk irabazi duen iragarriko du. Irabazlea argitaratuko da tramiteen katalogoan, dagokion fitxan, Nafarroako Gobernuaren sare sozialetan eta egoki jotzen diren hedabideetan.
6. oinarria.–Saria.
Talde irabazleak honako sari hau izanen du: bisita bat lehiaketako gaiarekin zerikusia duen instalazio batera.
7. oinarria.–Administrazio dei-egilearen eskubideak.
Trantsizio Energetiko eta Digitaleko, Enpresa I+G+Bko eta Ekintzailetzako Zuzendaritza Nagusiak beretzat gordetzen du oinarri hauetan xedatutakoa betetzen ez duten ikastetxeak lehiaketatik kanpo uzteko eskubidea.
Lehiaketan parte hartzeak esan nahi du aipatutako zuzendaritza nagusiaren esku uztea lan irabazlea, bai eta proiektu irabazlea jendaurrean komunikatzeko eskubideak ere, proiektua sustatzen duen ikastetxea aipatuta.
8. oinarria.–Datuen babesa.
Lehiaketan parte hartzeak berekin dakar lehiaketa honetan parte hartzen duten pertsonen datuak tratatzeko baimena ematea, Datu Pertsonalak Babesteko eta Eskubide Digitalak Bermatzeko abenduaren 5eko 3/2018 Lege Organikoaren esparruan.
9. oinarria.–Parte hartzearekin batera hartutako konpromisoa.
Lehiaketan parte hartzeak berekin dakar oinarri hauek onartzea, baita epaimahaiak edo Trantsizio Energetiko eta Digitaleko, Enpresa I+G+Bko eta Ekintzailetzako Zuzendaritza Nagusiak hartzen ahal dituen erabakiei men egitea ere.
Oinarri hauek ez betetzeak lehiaketan parte hartzeko ezintasuna ekarriko du, epaimahaiaren eta zuzendaritza nagusiaren irizpideari jarraikiz. Era berean, Zuzendaritza Nagusiak oinarri hauetan aurreikusi gabeko edozein kontingentzia konpontzeko eta horiek interpretatzeko ahalmena izanen du.
Iragarkiaren kodea: F2610484
