1. NAFARROAKO FORU KOMUNITATEA
1.4. DIRU-LAGUNTZAK, LAGUNTZAK ETA BEKAK
4806E/2026 EBAZPENA, abuztuaren 18koa, Nafar Lansare-Nafarroako Enplegu Zerbitzuko zuzendari kudeatzaileak emana, aldatzen duena Nafar Lansare-Nafarroako Enplegu Zerbitzuko zuzendari kudeatzailearen ekainaren 2ko 2776E/2026 Ebazpena, zeinaren bidez onesten baitira lehentasunez langabeei zuzendutako prestakuntza- eta enplegu-programa integratuak (PEPI) egiteko 2026ko dirulaguntzen deialdia eta oinarri arautzaileak. DDBN kodea: 910223.
PEPIan ikasleei ematen zaizkien zerbitzuak hobetzeko helburuz, Lanbide Gaitasunak Garatzeko Zerbitzuak erabaki du zabaldu eta zehaztea entitateek ikasleei programa bakoitza garatzean eman beharreko orientazioko eta lagun egiteko ekintzak.
Horretarako, Lanbide Gaitasunak Garatzeko Zerbitzuak onetsi du aldatzea Nafar Lansare-Nafarroako Enplegu Zerbitzuko zuzendari kudeatzailearen ekainaren 2ko 2776E/2026 Ebazpenaren 3.3.d), 3.8, 16.4.1 eta 19.2.g) oinarriak. Ebazpen horren bidez onesten dira lehentasunez langabeei zuzendutako prestakuntza- eta enplegu-programa integratuak (PEPI) egiteko 2026ko dirulaguntzen deialdia eta oinarri arautzaileak.
3.3.d) oinarrian, jatorrizko testuaren ordez honakoa jartzea:
"d) Orientazioa eta lagun-egitea.
d1) Orientazioa.
Orientazio zerbitzuak gauzatuko dira oinarri hartuta apirilaren 30eko 438/2024 Errege Dekretuaren III. kapitulua (errege dekretu horren bidez garatu ziren Enplegu Sistema Nazionalaren Zerbitzu Erkideen Zorroa eta Enpleguari buruzko otsailaren 28ko 3/2023 Legean ezarritako zerbitzu bermatuak).
Zerbitzu horien baitan, jarduera hauek egin beharko dira nahitaez:
–Banakako diagnostikoa eta profila egitea.
–Enplegu ibilbidea diseinatzea, banakakoa eta pertsonalizatua.
–Ibilbidearen jarraipena.
–Aurrekoak ez diren beste bi zerbitzu, gutxienez, zerbitzuen taulan jasotakoak.
Aipatutako zerbitzuak, hau da, banakako diagnostikoa eta profila egitea, banakako enplegu ibilbide pertsonalizatua diseinatzea eta ibilbidearen jarraipena egitea, banaka eman beharko dira. Gainerako zerbitzuak banaka nahiz taldeka ematen ahalko dira.
Orientazio zerbitzuak prestakuntzaren eta zeharkako konpetentzien garapenaren etapa bukatu arte emanen dira, eta Orientasare plataforma informatikoan erregistratu beharko dira, egin eta 5 eguneko epean gehienez. Banakako profila eta ibilbide edo plan pertsonalizatua programaren lehen hilabetean egin beharko dira.
Gutxienez ere 8 orduko orientazioa eman beharko zaio parte-hartzaile bakoitzari, baina muga hori ez da nahitaezkoa izanen PEPIa prestakuntzaren eta zeharkako konpetentzien garapenaren etapa bukatu aurretik uzten dutenen kasuan.
Prestakuntzaren eta zeharkako konpetentzien garapenaren etapa bukatuta, ibilbidea itxi beharko da Orientasaren.
d2) Lagun-egitea.
Lagun-egitea prozesu bat da, nahitaezkoa, osoa, jarraitua eta pertsonalizatua, jarraipena eta tutoretza egiteko, eta haren helburua da indartzea eta bultzatzea pertsonek parte har dezatela enplegu ibilbide pertsonalizatuan eta laneratzen laguntzea.
Lagun egiteko prozesu horretan, honako hau eginen da:
–Aurrerapena eta parte-hartzea baloratzeko banakako saioak parte-hartzaile bakoitzarekin. Erritmorik gal ez dadin prestakuntza- eta enplegu-programa integratuan ikasteko eta parte hartzeko orduan, prestakuntza ematen duten irakasleekin koordinatuta zehaztu beharko dira programaren iraupena eta edukiak.
–Prestakuntzarako kontratuaren banakako jarraipena, entitate kontratatzaileak esleitutako tutorearekin batera.
–Laneratze prozesuetan lagun egitea.
Lagun-egitea banaka nahiz taldeka ematen ahalko da.
Orientazioa eta lagun-egitea finantzatzeko gehieneko zenbatekoa zehaztuko da prestakuntza teknikoak eta zeharkako konpetentzien garapenak irauten duten denboraren arabera:
–100 ordutik beherakoa bada: 300 ordu talde bakoitzeko.
–100 ordu edo hortik gorakoa eta 200 ordu edo hortik beherakoa baldin bada: 360 ordu talde bakoitzeko.
–200 ordutik gorakoa baldin bada: 450 ordu talde bakoitzeko.
Parte-hartzaile bakoitzari emandako orientazio eta lagun-egite ordu guztietatik erdiak gutxienez banaka eman beharko dira.
Kalkulu hori 15 laguneko taldeetarako egin da. Prestakuntza teknikoan pertsona gutxiago hasiko balira, orduak proportzioan murriztuko lirateke".
3.8 oinarrian, honela dio:
"3.8. Entitateak lagun egiteko teknikari bat izendatuko du; hain zuzen ere, lagun egiteko jarduketetan parte hartzeko eta 3.3 oinarrian jasotako zeharkako konpetentziekin lotutako jarduketak gauzatzeko".
Honako hau behar du:
"3.8. Entitateak lagun egiteko teknikari bat izendatuko du; hain zuzen ere, orientazioko eta lagun egiteko jarduketak egiteko eta 3.3 oinarrian jasotako zeharkako konpetentziekin lotutako jarduketak gauzatzeko".
16.4.1.a) oinarrian, honela dioen tokian:
"–Lagun egiteko jarduketen arloan: egindako jarduketen xehetasuna, parte hartu duten ikasleak eta ordu kopurua".
Honako hau behar du:
"–Orientazioko eta lagun egiteko jarduketen arloan: egindako jarduketen xehetasuna, parte hartu duten ikasleak eta ordu kopurua".
19.2.g) oinarrian, honela dio:
"g) Lagun egiteko jarduketak ez badira erregistratzen Orientasare plataforma informatikoan, erregistratu gabeko lagun egiteko orduak ez dira ordainduko".
Honako hau behar du:
"g) Orientazioko jarduketak ez badira erregistratzen Orientasare plataforma informatikoan, erregistratu gabeko orientazio orduak ez dira ordainduko".
Horrenbestez, Nafar Lansare-Nafarroako Enplegu Zerbitzuaren estatutuak onesten dituen otsailaren 7ko 13/2024 Foru Dekretuaren 14. artikuluan emandako ahalmenak erabiliz,
EBAZTEN DUT:
1. Nafar Lansare-Nafarroako Enplegu Zerbitzuko zuzendari kudeatzailearen ekainaren 2ko 2776E/2026 Ebazpena aldatzea azalpen zatian adierazitako moduan.
2. Ebazpen hau Nafarroako Aldizkari Ofizialean argitaratzea.
3. Ebazpen honek ez du administrazio bidea amaitzen, eta haren aurka gora jotzeko errekurtsoa jar daiteke, Eskubide Sozialetako, Ekonomia Sozialeko eta Enpleguko kontseilariari zuzendua, hilabeteko epean, argitaratu eta biharamunetik hasita.
Iruñean, 2026ko abuztuaren 18an.–Nafar Lansare-Nafarroako Enplegu Zerbitzuko zuzendari kudeatzailea, María Esther Fernández Razquin.
Iragarkiaren kodea: F2611218
