2. NAFARROAKO TOKI ADMINISTRAZIOA
2.2. XEDAPEN ETA IRAGARKIAK, HERRIEN ARABERA ANTOLATUAK
ETXARRI ARANATZ
Etxebizitza hutsen gaineko zerga arautzen duen ordenantza fiskala. Behin betiko onespena
Etxarri Aranazko Udalak, 2026ko maiatzaren 14an egindako osoko bilkuran, hasiera batez onetsi zuen Etxebizitza hutsen gaineko zerga arautzen duen ordenantza fiskala.
Espedientea jendaurrean egon zen 30 egunez, 2026ko ekainaren 9ko 111. Nafarroako Aldizkari Ofizialen argitaraturik, bai eta Etxarri Aranazko Udalaren iragarki-taula elektronikoan ere, eta epe horretan inork ez du ohar, erreklamazio edo alegaziorik aurkeztu.
Beraz, bat etorriz Nafarroako Toki Administrazioari buruzko uztailaren 2ko 6/1990 Foru Legearen 325.1.c) artikuluarekin, behin betiko onetsia geratu da Etxarri Aranazko etxebizitza hutsen gaineko zerga arautzen duen ordenantza fiskala, eta iragarki honen bidez haren testua osorik argitaratzen da.
Etxarri Aranatzen, 2026ko abuztuaren 3an.–Alkatea, María Saez de Albeniz Bregaña.
ETXARRI ARANAZKO ETXEBIZITZA HUTSEN GAINEKO ZERGA ARAUTZEN DUEN ORDENANTZA FISKALA
Oinarria
1. artikulua. Ordainarazpen hau ezartzen da honako arau hau babes harturik: martxoaren 10eko Nafarroako Toki Ogasunei buruzko 2/1995 Foru Legea, zehazki, II. tituluko VIII. kapituluko 184.etik 1991.era bitarteko artikuluak.
Zerga-egitatea
2. artikulua. Zerga-egitatea da Etxarri Aranazko udal-mugartean diren etxebizitzen titulartasuna.
3. artikulua. Zergaren ondorioetarako, etxe huts gisa hartzen da etxebizitza izateko eskubideari buruzko maiatzaren 10eko 10/2010 Foru Legeari jarraiki Etxebizitza Hutsen Erregistroan alta emanda agerturik, etxebizitzaren arloko Departamentu eskudunak halakotzat deklaratu duena.
Subjektu pasiboak
4. artikulua. Zergaren subjektu pasiboak dira pertsona fisikoak eta juridikoak, jaraunspen jasogabeak, ondasun-erkidegoak, eta nortasun juridikorik izan ez arren unitate ekonomikoa osatzen duten entitateak edo ondare bereizia osatzen duten entitateak, baldin eta:
a) Etxebizitza hutsen gaineko jabetza-eskubidearen titular badira, etxebizitza horien gainean ez dagoenean bestelako gozamen- edo xedapen-eskubide errealik.
b) Etxebizitza hutsen gaineko gozamen- edo erabilera-eskubide erreal baten titular baldin badira, eskubide hori jabeari ez dagokionean.
Salbuespenak
5. artikulua.
1) Zerga honetatik salbuetsirik egonen dira honako kasu hauetan daudenak:
a) Etxebizitzen titularrak funtzionario publikoak badira, eta haiek etxebizitza dagoen herritik kanpora betetzen badituzte beren eginkizunak, aplikatzen ahal zaien legediari jarraikiz.
b) Etxebizitzen titularrak arrazoi teknikoak, antolamendukoak zein ekoizpenekoak direla medio edo, bestela, enpresaren jardunari dagozkion kontratuak direla bide edo toki- mugikortasunaren menpe daudelako, ohiko bizileku duten herritik kanpora aldi baterako joan behar izaten duten langileak badira.
c) Administrazio Publikoaren (Nasuvinsaren edo dagokion erakundearen) esku jarri diren etxebizitzak, gizarte alokairurako erabiltzeko.
2) Betiere zerga-salbuespena etxebizitza bakar batek izanen du.
Zerga-oinarria
6. artikulua. Zerga-oinarria izanen da Hiri-lurreko Ondasunen gaineko Kontribuzioa ordainarazteko indarra duen bera.
Kuota
7. artikulua. Zerga honen kuota izanen da zerga-oinarriari karga-tasa aplikatu ondokoa.
Karga-tasa
8. artikulua.
1) Karga-tasa izanen da Udalaren Osoko Bilkurak ekitaldi bakoitzerako, etxebizitza Etxebizitza Hutsen Erregistroan inskribaturik dagoen lehenengo eta bigarren urterako, onesten duena. Honakoak izango dira karga-tasaren tarteak:
–Lehen urtea: %0,25 eta %0,50 artean.
–Bigarren urtea: %0,50 eta %1 artean.
Hirugarren urterako eta hurrengoetarako %1,5 izango da.
2) Karga-tasa bat bera izanen da udal-mugarte osoan.
Zergaren sortzapena
9. artikulua.
1) Zerga lehen aldiz sortuko da etxebizitza hutsik dagoela deklaratzen duen kasuko ebazpena ematen denean.
2) Gero, zerga urte bakoitzeko lehen egunean sortuko da, Etxebizitza Hutsen Erregistroan etxebizitza alta emanda dagoen bitartean.
3) Kuotak sei hilean behin izanen dira, seihilekoak naturalak izanen direlarik, eta horien barnean, zatiezinak eta txikiezinak.
4) Subjektu pasiboek, dagokion espedientea izapidetuz, eskatzen ahalko dute itzul dakiela zergaren sortzapen-aldiari dagozkion kuoten zati proportzionala, etxebizitzak okupatzen diren unetik aurrerakoa.
Zergaren kudeaketa
10. artikulua. Zergaren ordainarazpena egiteko, Etxarri Aranazko Udalak Etxebizitza Hutsen Udal Errolda eguneraturik mantenduko du Etxebizitza Hutsen Erregistroan gertatzen diren altak eta bajak kontuan harturik. Alta eta baja horiek Nafarroako Gobernuko departamentu eskudunak ofizioz jakinaraziko dizkio Udalari.
11. artikulua. Erregistroan alta emanda, Udalak titularrari jakinaraziko dio alta hori, eta adieraziko dizkio zerga-oinarria eta karga-tasa indarduna.
12. artikulua. Zerga kudeatzeko, erabiliko dira lur-ondasunen gaineko kontribuzioa kudeatzeko erabiltzen diren arau berak, eta batera eginen dira kasuko likidazioak eta kobrantza-dokumentuen igorpenak.
TARIFEN ERANSKINA
Karga-tasa:
–Lehenengo urtean: %0,50.
–Bigarren urtean: %1,00.
–Hirugarren urtean eta hurrengoetan: %1,50.
Karga-tasak bakarrak izango dira udalerri osorako.
Iragarkiaren kodea: L2610671
