Iragarkia

126. ALDIZKARIA - 2026ko ekainaren 30a

1. NAFARROAKO FORU KOMUNITATEA

1.5. ESTATUTUAK ETA LAN HITZARMEN KOLEKTIBOAK

395E/2026 EBAZPENA, ekainaren 1ekoa, Lehendakaritzako, Gobernu Irekiko eta Nafarroako Parlamentuarekiko Harremanetako zuzendari nagusiak emana, zeinaren bidez agintzen baita Higiezinen Jabetza Agenteen Nafarroako Elkargo Ofiziala (HJANEO) inskribatzeko Nafarroako Lanbide Elkargoen eta Elkargoen Kontseiluen Erregistroan, baita haren estatutuak Nafarroako Aldizkari Ofizialean argitaratzeko ere.

2025eko abenduaren 5ean, Javier Urrutia Sagardíak, Higiezinen Jabetza Agenteen Nafarroako Elkargo Ofizialaren (HJANEO) izenean, eskaera egin zuen erakundearen estatutuak Nafarroako Elkargo Profesionalen Erregistroan eta Elkargoen Kontseiluetan inskribatzeko.

Dokumentu hauek eman zituen: Higiezinen Jabetza Agenteen Espainiako Elkargo Ofizialen Kontseiluaren ziurtagiri bat, haien eraketa baliozkoa eta legezkoa egiaztatzeko; estatutuak eta Batzar Nagusi Bereziaren akta, 2023ko azaroaren 9koa, estatutu horiek onesten dituena; baita Elkargoaren IFZa ere.

Dokumentuak aztertu ondoren, 2026ko urtarrilaren 21ean, Elkargoari zenbait akats konpontzeko eskatu zitzaion, bai dokumentuenak, bai funtsekoak. 2026ko martxoaren 26an, Elkargoak errekerimenduari erantzun zion, eta estatutu aldatuak eta eskatu ziren ziurtagiriak entregatu zituen; hala ere, dokumentu horiek aztertu ondoren, Erregistroak bigarren errekerimendu bat egin zion Elkargoari, 2026ko apirilaren 17an. Errekerimendu horri 2026ko maiatzaren 6an eta 26an erantzun zitzaion, eta inskribatzeko beharrezko eta egoki ziren dokumentuak erantsi zituen.

Espedientean dauden dokumentuen arabera, elkargoa xedapen eta erabaki hauetan oinarritzen da:

–1948ko abenduaren 17ko Dekretua, lurralde nazionaleko probintzia guztietan higiezinen jabetza agenteen elkargo ofizialak sortzen dituena (1949ko 17. Estatuko Aldizkari Ofiziala, urtarrilaren 17koa);

–Lan Ministerioaren 1951ko apirilaren 6ko Dekretua, Higiezinen Jabetza Agenteen Elkargo Ofizialen Erregelamendua onesten duena, lanbidea arautzen duena (1951ko 146. Estatuko Aldizkari Ofiziala, maiatzaren 26koa).

–Espainiako Higiezinen Jabetza Agenteen Kontseilu Nagusiaren erabakia, 1949ko ekainaren 14koa, Nafarroako Elkargoaren behin-behinean eratzea onesten duena, aipatutako elkargo probintzialak igorritako aktan oinarrituta.

–Azkenik, 1952ko martxoaren 31n, Lan Ministerioak Higiezinen Jabetza Agenteen Nafarroako Elkargoaren Barne Araubidearen Erregelamendua onetsi zuen.

Estatutu berriak eta izena emateko erabakia 2026ko martxoaren 5ean hartu ziren, une horretan indarrean zeuden estatutuen arabera;

Estatutuak bat datoz abenduaren 22ko 25/2009 Legearekin (Omnibus Legea); Lanbide Elkargoei buruzko 2/1974 Legearekin (25/2009 Legeak aldatua); Lanbide Elkargoei buruzko apirilaren 6ko 3/1998 Foru Legearekin; eta Higiezinen Jabetza Agenteen Elkargo Ofizialen eta haien Kontseilu Nagusiaren estatutu orokorrak onesten dituen irailaren 28ko 1294/2007 Errege Dekretuarekin;

Azkenik, inskripzio eskaerak betetzen du ezarrita dagoena Lanbide Elkargoei buruzko apirilaren 6ko 3/1998 Foru Legean eta abenduaren 18ko 375/2000 Foru Dekretuan, zeinaren bidez onesten baita eta foru lege hori garatzeko Erregelamendua .

Horrenbestez, erabiliz Lehendakaritza eta Berdintasun Departamentuaren egitura organikoa ezartzen duen azaroaren 15eko 238/2023 Foru Dekretuak ematen dizkidan ahalmenak,

EBAZTEN DUT:

1. Higiezinen Jabetza Agenteen Nafarroako Elkargo Ofiziala (HJANEO) inskribatzea Nafarroako Lanbide Elkargoen eta Elkargoen Kontseiluen Erregistroan, dagokion erregistro zenbakiarekin.

2 Agintzea, behar diren ondorioak izan ditzan, Nafarroako Aldizkari Ofizialean argitara daitezela ebazpen hau eta haren eranskina. Eranskin horretan Higiezinen Jabetza Agenteen Nafarroako Elkargo Ofizialaren (HJANEO) estatutuak daude.

3 Ebazpen hau jakinaraztea Higiezinen Jabetza Agenteen Nafarroako Elkargo Ofizialari (HJANEO), eta adieraztea ebazpenak ez duela administrazio-bidea amaitzen eta haren kontra gora jotzeko errekurtsoa jartzen ahal dela, Lehendakaritza eta Berdintasuneko kontseilariari zuzendua, jakinarazi eta biharamunetik hasita hilabeteko epean.

Iruñean, 2026ko ekainaren 1ean.–Lehendakaritzako, Gobernu Irekiko eta Nafarroako Parlamentuarekiko Harremanetako zuzendari nagusia, Joseba Asiáin Albisu.

ERANSKINA.–HIGIEZINEN JABETZA AGENTEEN NAFARROAKO ELKARGO OFIZIALAREN (HJANEO) ESTATUTUAK

I. TITULUA.–IZAERA, NORTASUNA ETA ARAUBIDE JURIDIKOA. ADMINISTRAZIOAREKIKO HARREMANAK. JARDUKETA ESPARRUA

1. artikulua. Izaera, nortasuna eta araubide juridikoa.

Higiezinen Jabetza Agenteen Nafarroako Elkargo Ofiziala (HJANEO), aurrerantzean Elkargoa (izena gaztelaniaz, euskaraz edo ele bietan), zuzenbide publikoko korporazio bat da, Legeak babestua eta Estatuak aintzatetsia. Nortasun juridiko propioa du, baita bere helburuak betetzeko gaitasun osoa ere. Kostu bidez edo irabazi-asmoekin, era guztietako ondasunak besterendu, saldu, kargatu, eduki eta aldarrikatzen ahal ditu, betebeharrak bere gain hartu eta, oro har, edozein motatako eskubideen titular izaten ahal da, eta edozein ekintza judizial, erreklamazio edo errekurtso egin edo jasaten ahal du bide eta jurisdikzio guztietan.

Honako hauek eraenduko dute: Lanbide Elkargoei buruzko 2/1974 Legea; Nafarroako Lanbide Elkargoei buruzko 3/1998 Foru Legea, Lehiaren Babesari buruzko 15/2007 Legeari jarraikiz; haren Estatutu Orokorra, 1294/2007 Errege Dekretuaren bidez onetsia; Estatutu hauek, egiten ahal diren barne-araudiak, eta korporazioko organoek beren eskumenen esparruan onetsitako akordioak, baita nahitaez bete beharreko gainerako arauak ere.

Elkargoaren barne-egitura eta funtzionamendua printzipio demokratikoen arabera eraentzen dira, Espainiako Konstituzioaren 36. artikuluan xedatutakoaren arabera.

Elkargoaren erabakiek, akordioek eta aholkuek errespetatuko dituzte Lehiaren Babesari buruzko uztailaren 3ko 15/2007 Legearen mugak. Nolanahi ere, elkargoaren esparruan, lehia askearen araubidean gauzatuko da lanbide hori, eta, zerbitzu-eskaintzari eta haien ordainsariak finkatzeari dagokienez, lehia babesteari eta lehia desleialari buruzko legeria bete beharko du. Zehazki, zerbitzu profesionalen ordainsaria finkatzean, Lanbide Elkargoei buruzko otsailaren 13ko 2/1974 Legearen 14. artikuluan xedatutakoa beteko da.

2. artikulua. Administrazioarekiko harremanak.

Elkargoak, Autonomia Erkidegoaren esparruan, eta bere araubide juridikoari eta alderdi instituzional eta korporatiboei dagokienez, unean-unean lanbide elkargoen arloko eskumena esleituta duen Nafarroako Gobernuaren Departamentuarekin izanen ditu harremanak.

3. artikulua. Lurralde-eremua.

Lurralde-eremua Nafarroako Foru Komunitatea da, eta Elkargoaren egungo egoitza honako hau da: Azueloko Monasterioaren plaza 1, 9. F, Iruña.

II. TITULUA.–ELKARGOA: HELBURUAK, EGINKIZUNAK ETA BETEBEHARRAK

4. artikulua. Helburuak.

Honako hauek dira Elkargoaren funtsezko helburuak:

a) Elkargokideek lanbidean jarduteko antolaketa egitea, dagokien lege-esparruaren barruan eta beren eskumenen eremuan.

b) Elkargokideen lanbide interesak defendatzea.

c) Elkargokideen zerbitzuen kontsumitzaileen eta erabiltzaileen interesak babestea.

d) Elkargokideen lanbide-prestazioen kalitatea egokia dela zaintzea eta beren jarduera lanbidearen arau deontologikoen mende jartzen dela kontrolatzea.

5. artikulua. Eginkizunak.

Honako hauek dira Elkargoaren eginkizunak:

a) Estatutuak eta barne-araudiak onestea eta aldatzea.

b) Bere eskumenen esparruan lanbidearen ordezkari eta babesle izatea, ezertan galarazi gabe 2/1974 Legearen lehenbiziko artikuluaren hirugarren apartatuan xedatutakoa, Administrazioaren, erakundeen, auzitegien, entitateen eta partikularren aurrean, zilegitasuna izanik elkargokideen lanbide-interesei eragiten dieten auzietan alderdi izateko.

c) Elkargokideen lanbide-jarduera antolatzea, bere eskumenen esparruan, eta lanbideari buruzko arau deontologikoak prestatzea.

d) Eskatzeko eskubidea erabiltzea legearen arabera.

e) Antolatzea jarduera eta zerbitzu komunak, lanbideari lotuak, kultur arlokoak, laguntzakoak, aurreikuspenekoak eta antzekoak, elkargokideentzat interesgarriak direnak.

f) Sarrera eta gastuen urteko aurrekontuak eta haien kontu eta likidazioak prestatzea eta onestea.

g) Elkargokideen ekarpen ekonomikoak ezartzea eta eskatzea.

h) Elkargoko kideek libreki eta berariaz eskatuz gero, lanaren hartzeko, ordainsari edo zerbitzu-sariak kobratzeaz arduratzea, betiere Elkargoak horretarako zerbitzu egokiak baditu.

i) Erakunde publiko eta pribatuekin elkarlanean aritzea, merkatuaren funtzionamenduari edo elkargokideen zerbitzuen ordainketari buruzko azterlanak egiteko, edo interes komuneko gaiei buruzko hitzarmenak sinatzea.

j) Prozedura administratibo edo judizialetan txostenak egitea, lanaren ordainsariak eztabaidatzen diren eremu guztietan.

k) Organo jurisdikzionalei eta administrazio publikoei peritu gisa esku hartzeko edo zuzenean izendatzeko eskatzen ahal zaien elkargokideen zerrenda ematea.

l) Laneko intrusismoa eta lehia desleiala saihesteko behar diren neurriak proposatzea eta, hala badagokio, hartzea.

m) Bitartekaritza bultzatzea eta gauzatzea, bitartekari gisa arituta, eta arbitraje-lanak egitea.

n) Lanbidearen jarduera eta elkargokideen etengabeko prestakuntza hobetzen ahalegintzea.

o) Elkargokideen gaineko diziplina-ahala erabiltzea, lanbidean eta elkargoan.

p) Elkargokideei laneko erantzukizun zibileko aseguruetarako sarbidea erraztea. Aseguru kolektibo bat ezin izanen da kontratatu aseguru-erakunde jakin batekin, salbu eta legezko arau batek betebehar hori ezartzen badu.

q) Administrazio publikoen organo aholku-emaileetan parte hartzea.

r) Lanbide-jardunaren baldintza orokorrei buruzko arau-proiektuei buruzko txostenak egitea, hala eskatzen zaionean.

s) Legez ematen zaizkion administrazio-eskumen guztiak baliatzea.

t) Lege orokor eta bereziak, elkargoaren estatutuak, barne-araudiak eta elkargoko organoek hartutako erabakiak bete eta elkargokideei betearaztea.

u) Kontsumitzaileen eta erabiltzaileen interesak babestearen aldeko eginkizun oro.

v) Elkargoko kideei buruzko informazio-eskaerei eta ezartzen zaizkien zehapen irmoei erantzutea.

w) Ondarearen gainean xedatze- eta administrazio-egintzak eta kargak ezartzen dituzten guztiak gauzatzea.

x) Prozedura judizialetan txostenak, balorazioak eta peritazioak egitea sustatzeko zerbitzuak sortzea.

y) Unibertsitateekin elkarlanean aritzea ikasketa-planak egiteko.

Honako hauek dira informazioa eta laguntza emateko berariazko betebeharrak:

a) Leihatila bakar elektronikoa izatea.

b) Kontsumitzaile eta erabiltzaileei informazio argia eta doakoa ematea.

c) Elkargokideen erregistro sortu eta eguneratuta mantentzea.

d) Urteko memoria publikoa egitea.

e) Kontsumitzaile eta erabiltzaileentzako arreta-zerbitzua izatea.

f) Administrazioarekin elkarlanean aritzea bateraezintasunak kontrolatzeko.

III. TITULUA.–ELKARGOKIDEAK: SARTZEKO PROZESUA, ESKUBIDEAK ETA BETEBEHARRAK

I. KAPITULUA.–SARTZEKO PROZESUA

6. artikulua. Elkargoan sartzea.

Elkargoan sartzeko, gaitasun-baldintza orokor hauek egiaztatu behar dira:

a) Adinez nagusi izatea eta ezgaiturik ez egotea.

b) Gradudun, lizentziadun, diplomadun, ingeniari, arkitekto, ingeniari tekniko edo arkitekto teknikoaren titulua izatea.

c) Lanbidean aritzeko ezgaitzen duen aurrekari penalik ez izatea.

Elkargoan sartzeko, honako betekizun hauek bete beharko dira:

a) Interesdunak Elkargoko lehendakariari egindako eskaera.

b) Elkargoko kide egiteko kuota ezarritako baldintzetan ordaintzea.

Elkargoan inskribatzen direnek estatutu honetan ezartzen diren betebehar eta eskubideak izanen dituzte.

Elkargoko kide egiteko eta bertan jarduteko, tratu-berdintasunaren eta diskriminaziorik ezaren printzipioak izanen dira oinarri.

Gaitasun-baldintza orokorrak bete eta eskatutako tituluak dituenak onartua izateko eskubidea izanen du.

Jardunean dauden elkargokideek higiezinen jabetza agente izena erabiltzen ahalko dute beren lanbide-jardueran. Hala ere, izen hori elkargokide ez diren langileek ere erabiltzen ahalko dute, jardueran aritzeko legezko baldintzak betetzen badituzte.

Elkargo honen kideek higiezinen jabetza agente gisa jarduten ahalko dute Espainiako lurralde osoan.

Elkargoak ezin izanen die beste elkargo baten kideei eskatu Nafarroako Elkargoaren lurralde eremuan inolako komunikazio edo gaikuntzarik egin dezaten.

Elkargokoa ez den lurralde batean lan eginez gero, administrazio-lankidetzarako mekanismoak erabiliko dira.

Elkargokideek Estatutu Orokorretan ezarritako betebeharrak eta eskubideak izanen dituzte.

7. artikulua. Elkargoko kide egiteko modalitateak eta betekizunak.

Eskaera hala jardunean nola jardunean egon gabe egiten ahal da.

Jarduneko elkargokideak berezko lanbide-jarduerak egiten dituztenak dira. Higiezinen jabetzako agente izena erabiltzen ahalko dute, baina horrek ez du esan nahi elkargokideen aldeko erreserba esklusiboa egin behar denik.

Jardunean ez dauden elkargokideak dira jardunean ez daudenak. Ezin izanen dute armarri ofiziala erabili.

Programan sartzeko, beharrezkoa da:

a) Adinez nagusi izatea eta ezgaiturik ez egotea.

b) Unibertsitateko titulua izatea (gradua, lizentzia, diploma, ingeniari- edo arkitekto-titulua edo baliokideak).

c) Aurrekari penal desgaitzailerik ez izatea.

Sartzeko honako hauek egin beharko dira:

a) Presidenteari zuzendutako eskaera, 1294/2007 Errege Dekretuaren 3. artikuluan adierazitako dokumentuekin batera.

b) Programan sartzeko kuota ordainduko da, zeinak ez baititu gaindituko izapideei lotutako kostuak.

8. artikulua. Elkargoko kide egiteko eskaerak:

1. Izapideak leihatila bakar elektronikoaren bidez egiten ahalko dira.

2. Titulu originala edo notarioaren lekukotasuna, ikasketen ziurtagiria eta aurrekari penalen ziurtagiria entregatuko dira.

3. Zinpeko aitorpena, ukatzeko kausaren batean sarturik ez dagoela dioena.

4. Elkargoak elkargokideen eskura jarriko du, bere borondatez, erantzukizun zibil profesionaleko aseguru bat edo aseguru kolektibo bati atxikitzeko aukera, Gobernu Batzarrak ezartzen dituen baldintzetan.

5. Gobernu Batzarrak hilabeteko epean onartuko ditu eskaerak.

6. Elkargoak borondatezko prestakuntza-ekintzak antolatzen ahalko ditu.

7. Ebazpen arrazoitua jakinaraziko da.

8. 1294/2007 Errege Dekretuaren arabera eskatzen ahal diren gainerako dokumentuak.

9. Batzarraren erabakiaren aurka errekurtsoa jartzen ahal da.

9. artikulua. Kide izateko eskaera ukatzea.

1. Honako kasu hauetan ukatuko da:

a) Dokumentuak nahikoak ez badira edo faltsuak badira eta 10 eguneko epean zuzentzen ez badira.

b) Lanbidean aritzeko ezgaitzen duen kondena irmoa.

c) Beste elkargo batetik kanporatu izana, errehabilitaziorik gabe.

d) Lanbidean aritzeko gabetze irmoa.

2. Behin oztopoak desagertuta, elkargoko kide egitea onartuko da.

10. artikulua. Elkargokide izateari uztea.

1. Honako kasu hauetan elkargokide izateari utziko zaio:

a) Hiltzea.

b) Jarduteko ezintasun iraunkorra.

c) Kondena irmoa eta desgaitzea.

d) Gabetzeko edo kanporatzeko zehapen irmoa.

e) Norberak borondatez uztea.

f) Sei hilabetean hiru hilabeteko kuotak ez ordaintzea, diziplinazko espedientea egin ondoren.

g) Zehapen ekonomiko irmoak ez ordaintzea.

2. Izaera hori galtzen bada armarria eta logotipoak ezin izanen dira erabili.

3. Batzarrak erabakiko du ebazpen arrazoituaren bidez.

11. artikulua. Berriz ere sartzea.

Elkargoan baja ematen duen higiezinen jabetza agentea berriz sartzen ahalko da, baina, aurreko 10.1 artikuluaren b) letraren kasuan, ezgaitasuna desagertu beharko da; c) eta d) letren kasuan, lanbidean aritzeko birgaituta egon beharko du edo zehapena beteta izan; f) eta g) letren kasuan, baja eman arte ordaintzeke dauden diruzko betebeharrak ordainduta izan beharko ditu. Ondore horietarako, estatutu hauen 8. artikuluan ezarritako baldintzak kontuan hartuko dira.

II. KAPITULUA.–ELKARGOKIDEEN ESKUBIDEAK ETA BETEBEHARRAK

12. artikulua. Elkargokideen eskubideak.

1. Hona hemen elkargokideen eskubideak:

a) Zuzendaritza-karguak eta ordezkaritza-postuak betetzeko hautatzea eta hautatuak izatea, aplikatzekoa den araudiak eskatutako baldintzak betetzen badituzte.

b) Aldian-aldian informazioa jasotzea Elkargoaren jarduketei buruz, alderdi guztietan, baita lanbidean eragina izaten ahal duten alderdi guztiei buruz ere.

c) Elkargoaren gobernu-organoek hartutako erabakien berri izatea.

d) Indarrean dauden arauekin bat, kasuan kasuko elkargoaren kudeaketa ekonomikoan, administratiboan eta instituzionalean esku hartzea, eta lanbidearen inguruko gaietan bere iritziak libreki adieraztea, betiere pertsonen ohorea errespetatzen bada.

e) Elkargoko kide egiteko, hartan aritzeko eta lanbide-elkargoan baja emateko behar diren izapide guztiak egitea, leihatila bakarraren bidez, elektronikoki eta urrutitik. Hala ere, aurrez aurre ere egiten ahalko ditu hala nahi duenak eta elkargoaren egoitza sozialean eskatzen duenak.

f) Elkargokide gisa dituen eskubide eta interesak babesteko behar diren ekintza eta errekurtso administratibo eta judizialak gauzatzea.

g) Elkargoaren zerbitzuez baliatzea, haiek arautzen dituen araudiaren arabera.

h) Elkargoaren batzar nagusietara joatea, hitza eta botoa dituela.

i) Kexak adieraztea bere Elkargoaren Gobernu Batzarrari, kasu bakoitzerako ezarritako araudiaren arabera, eta zuzentzen zaizkion eskaerak arduraz izapidetzeko eskatzea.

j) Dagokion elkargoari legez eta estatutuetan ezarritako helburuak bete ditzan eskatzea.

k) Elkargoaren babesa izatea lanbide-jardueran ari direnean.

l) Elkargoko kide gisa identifikatzen dituen lanbidearen anagramak, intsigniak, logotipoak eta bereizgarriak erabiltzea.

m) Gobernu-organoen titularrak kargutik kentzea sustatzea, zentsura-mozioaren bidez, estatutu honetan ezarri moduan.

n) Gobernu-organoen jarduketak sustatzea, ekimenen eta proposamenen bidez.

o) Epaitegi eta Auzitegietara edo Erakunde Administratibo edo Judizialetara bidali beharreko zerrendetan egotea, auzitegi-zerbitzuak betetzeko (peritu-irizpenak, txostenak, balorazioak, era guztietako tasazioak), Elkargoaren Gobernu Batzarrak erabakitzen dituen funtzionamendu-arauak bere gain hartuta.

p) Legezko arauetatik eta estatutuetatik ondorioztatzen diren gainerakoak.

13. artikulua. Elkargokideen betebeharrak.

1. Honako hauek dira elkargoko kideen betebeharrak:

a) Lanbide-jarduketak modu arduratsuan, eraginkorrean eta etikoan egitea, baita zuhurtasunez eta deontologiaren arabera.

b) Bere lanbide-eginkizunei eragiten dien ordenamendu juridikoa oso-osorik betetzen dela errespetatu eta zaintzea.

c) Batzarrean, Gobernu Batzarretan, Batzordeetan eta deituak izan diren gainerako bilkuretan parte hartzea, eta hautatuak izan diren karguak arduraz betetzea, behar duten efikaziarekin.

d) Elkargoari jakinaraztea probintzian barnean lanbide-helbidea aldatzen denean, eta beste edozein inguruabar komunikatzea, berariaz adierazi eta lanbide-jarduerarako garrantzitsua dena; eta elkargoak ezarrita dituen ikuskapen-zerbitzuei eskatzen zaizkion datuak ematea, baldin informazio hori erabat erreserbatua ez bada.

e) Elkargoko Gobernu Batzarrari ordenamendu juridikoaren aurkako egintzen berri ematea, eskatzen zaizkion datu eta informazio guztiak ematea, salaketak berresteko eskatzen zaizkion organo judizial edo administratibo guztien aurrean agertzea eta, oro har, lanbidean aurkitzen edo izaten ahal dituen gertakari edo irregulartasunen berri ematea.

f) Elkargoko gobernu-organoekin eta gainerako zuzendaritza-organoekin elkarlanean aritzea, baita kontsumitzaileak babesteko erakunde publiko eta pribatuekin ere, bere lanbide-jarduerarekin zerikusia duten alderdiei buruzko txosten, irizpen eta azterlanak egiterakoan.

g) Lanbide-araudiaren edo zuzendaritza-organo eskudunen erabakien arabera ordaindu beharreko kuotak, derramak eta gainerako zenbatekoak horretarako finkatutako epeen barruan ordaintzea.

h) Bezeroekiko leialtasunez eta arretaz jokatzea, haien interesak babestera behartuta baitaude.

i) Elkargoan errespetuzko bizikidetza egon dadin laguntzea eta elkargoaren ospea nahita galtzea dakarren adierazpenik ez egitea.

j) Behar den laguntza ematea antzeko erakunde eta administrazioekiko loturak hobetzeko.

k) Elkargoaren jardueretan parte hartzen saiatzea, zerbitzuak hobetzeko eta elkargoak gizartearekiko duen irudi ona hobetzeko.

l) Behar duten lanbide-jarduketetan behar den konfidentzialtasuna zaintzea.

m) Unean-unean indarrean dauden legezko arauen eta lanbidearen estatutu orokorren ondoriozko gainerakoak.

n) Lanean aritzeko behar den prestakuntza frogatzea, aplikatzekoak diren arauetan edo Elkargoko organo eskudunek etengabeko prestakuntzaren arloan hartzen dituzten erabakietan ezartzen denaren arabera.

III. KAPITULUA.–LANBIDE-JARDUERA SOZIETATEEN BIDEZ GAUZATZEA

14. artikulua. Lanbide-jarduera sozietateen bidez gauzatzea.

Higiezinen jabetza agentearen lanbide-jarduera, legez ezarritako moduan, horretarako eratutako sozietateen bidez egiten ahalko da, indarrean dagoen lege-araudiari bete-betean atxikita.

15. artikulua. Sozietatearen bidez gauzatutako lanbide-jardueraren eskubideak.

Aurreko artikuluan ezarritakoaren kaltetan izan gabe, lanbide-bazkideek edo higiezinen jabetza agente elkargokideek Elkargoaren aurrean duten erantzukizun pertsonala estatutu hauetan deskribatzen dena izanen da, beren betebehar eta eskubideei dagokienez.

IV. TITULUA.–ELKARGOAREN ORDEZKARITZA-ORGANOAK

I. KAPITULUA.–XEDAPEN OROKORRA

16. artikulua. Elkargoaren organoak.

Honako hauek dira Elkargoaren ordezkaritza-, erabaki-, kontrol-, gobernu-, kudeaketa- eta administrazio-organoak: Batzar Nagusia, Gobernu Batzarra eta Lehendakaria.

II. KAPITULUA.–BATZAR NAGUSIA

17. artikulua. Batzar Nagusia.

1. Batzar Nagusia Gobernu Batzarraren kudeaketa erabaki eta kontrolatzeko osoko organoa da. Batzar Nagusia Elkargoaren organo subirano, demokratiko eta asoziatiboa da. Jardunean eta jardunean ez dauden elkargokide guztiek osatzen dute, eta botoen gehiengoaren printzipioaren arabera hartuko ditu erabakiak.

2. Batzar Nagusian egiten diren bozketetan, elkargokide bakoitzak boto bakarra izanen du. Bere erabaki eta ebazpenek elkargokide guztiak behartzen dituzte, baita aurka bozkatu dutenak, abstenitu direnak edo bertaratu ez direnak ere.

3. Batzar Nagusiari dagozkio:

a) Estatutuak onestea eta aldatzea.

b) Gobernu Batzarraren kideak kargutik kentzea, zentsura-mozioaren bidez.

c) Aurrekontua, Elkargoaren kontuak eta Gobernu Batzarraren kudeaketa onestea, baita Gobernu Batzarrak proposatutako kuoten eta ordaintzeko moduen zenbatekoa ere.

d) Batzar Nagusira joandako elkargokideen gehiengoak garrantzi berezia izateagatik erabakitzen dituen gai guztiak ezagutzea eta haiei buruz erabakitzea, baita Estatutu hauek emandako beste edozein ahalmen ere.

4. Batzar Nagusiak ohikoak edo bereziak izaten ahal dira. Edonola ere, bileretarako deia eginen da posta arruntez, bide telematikoz edo elkargokideek jaso dutela edo badakitela behar bezala ziurtatzen duen beste edozein bide erabilita. Jakinarazpen hori gutxienez bilera-eguna baino zazpi egun natural lehenago bidali beharko da. Deialdian bileraren lekua, eguna eta ordua adieraziko dira, baita gai-zerrenda eta beste edozein datu ere, Gobernu Batzarrak beharrezkotzat jotzen dituenak batzarra egoki egiteko.

5. Oro har, Batzar Nagusia, ohikoa nahiz berezia izan, lehenbiziko deialdian balio osoz eratutzat joko da baldin eta, batzarra egiteko finkatutako orduan, gutxienez elkargokideen %50 bertan badago. Ehuneko hori lortzen ez bada, bigarren deialdia eginen da beti. Lehenbiziko deialdia baino ordu erdi geroago eginen da eta balioz eraturik geldituko da, bertaratutako elkargokideen kopurua edozein delarik ere.

6. Lehendakaria eta idazkaria edo haien ordezkoak bertan egon beharko dira.

7. Aztertu beharreko gaien aurrekariak elkargokideen eskura egon beharko dira Elkargoaren Idazkaritzan, Batzarra egin baino 48 ordu aurretik gutxienez.

8. Egin litekeen deliberazioaren kaltetan izan gabe, berariaz debekatuta dago gai-zerrendan ez dauden gaiei buruzko erabakiak hartzea.

18. artikulua. Batzar Nagusian parte hartzea eta ordezkatzea.

Elkargokide guztiek dute Batzar Nagusietara pertsonalki, hitzarekin eta botoarekin joateko eskubidea, estatutu hauen 12. artikuluaren h apartatuan jasotako salbuespena kontuan hartuta. Boto-eskubidea duen beste elkargokide baten alde idatziz egindako eskuordetza edo ordezkaritza onartuko da.

19. artikulua. Batzar Nagusiaren funtzionamendua.

1. Batzar Nagusiaren bilkuretan Elkargoaren lehendakaria izanen da buru, idazkariarekin eta Gobernu Batzarraren kideekin batera, aztertu beharreko gai-zerrendaren gaietan esku hartu behar badute.

2. Lehendakariaren eginkizuna eztabaidak bideratzea da, eta, horretarako, hitza ematea edo kentzea eta bozketak antolatzea.

3. Batzar Nagusiaren idazkaria Elkargoaren Gobernu Batzarraren idazkaria izanen da, edo, hura ez badago, Gobernu Batzarraren beste kide bat, lehendakariak izendatua edo unean bertan bere eginkizunetan aritzen dena, edo, bestela, bertaratuen gehiengoaz erabakitzen dena. Hark akta eginen du, lehendakariaren oniritziarekin. Akta, behin idatzita, hurrengo Batzar Nagusian onetsiko da. Nolanahi ere, hartzen diren erabakiak betearazi beharrekoak izanen dira onesten diren unetik, akta geroago onetsiko bada ere.

4. Erabakiak gehiengo soilez hartuko dira emandako botoen artean. Hala ere, gehiengoa emandako botoen %35 izan beharko da honako kasu hauetan: Estatutu hauek aldatzea, higiezinak saltzea; Elkargoa banatzea, bat egitea, xurgatzea edo desegitea; edo Gobernu Batzarraren zentsura. Proposamena Gobernu Batzarretik abiatzen ahalko da, batzarraren zentsura-mozioaren kasuan izan ezik, edo elkargokideen kopuru batek elkargoaren erroldaren %30 osatzen badu, gutxienez. Proposamena berariaz deitutako Batzar Nagusi Berezian eztabaidatu eta bozkatuko da, gai-zerrendako puntu bakar gisa. Proposamen bera ezinen da elkarren segidako bi Batzar Nagusiren gai-zerrendan sartu, dagokion erabakia hartu bada, salbu eta bien artean gutxienez hamabi hilabeteko tartea badago.

20. artikulua. Ohiko bilkurak.

Batzar Nagusia urtean behin bilduko da, gutxienez, martxoaren 31 baino lehen, Gobernu Batzarrak deituta. Gai-zerrendan aurreko ekitaldiko Gobernu Batzarraren kudeaketari eta hurrengo ekitaldiko aurrekontuari buruzko eztabaida, balantzea eta memoria sartuko dira.

21. artikulua. Bilkura bereziak.

Batzar Nagusiak kasu hauetan egin ditzake bilkura bereziak:

a) Lehendakariaren ekimenez, edo Gobernu Batzarraren gehiengoaren ekimenez, elkargoaren funtzionamendurako beharrezkoa dela jotzen denean.

b) Elkargokideen kopuru jakin batek eskatzen duenean. Nolanahi ere, kopuru hori erroldaren %30 baino handiagoa izanen da, eta Estatutuen aldaketa sustatzen denean ehuneko hori %35 izanen da. Kasu horretan, Gobernu Batzarrari eskatuko zaio, eta aztertu beharreko gaiak sartuko dira, baina ezin izanen da sartu dagokion ohiko batzarrean jada aztertutako gairik.

22. artikulua. Bozketen araubidea.

1. Batzar Nagusien bozketak eskua jasota egin ohi dira, baina izenezkoak (publikoak edo isilpekoak) izanen dira bertaratutako elkargokideen gehiengoak hala eskatzen duenean edo lehendakariak hala erabakitzen duenean, eta sekretuak izanen dira bozketa gai pertsonalei buruzkoa denean.

2. Ohiko bozketan, bertaratutakoak zenbatu ondoren, lehendakariak eskatuko du, lehenik eta behin, alde daudenek eskua altxatuta adieraz dezatela; ondoren, aurka daudenek egin dezatela. Bi kasuetan, zenbaketa eginen da, eta bien baturaren eta bertaratutakoen guztizkoaren arteko aldea abstentzio gisa zenbatuko da.

3. Izenezko bozketan elkargokideak izendatuko dira eta bakoitzak bere botoa emanen du, entzuteko moduan, eta zenbaketa eginen da aldi berean.

4. Isilpeko bozketan, parte-hartzaileei dei eginen zaie, eta, ondoren, bakoitzak boto-paperaren bidez bozkatuko du. Amaieran, botoak zenbatuko dira.

5. Lehendakariak zenbatuko ditu botoak, idazkariak lagunduta.

6. Berdinketa egonez gero, bigarren bozketa eginen da, eztabaida labur baten ondoren. Berdinketak jarraitzen badu, lehendakariaren kalitatezko botoarekin ebatziko da.

III. KAPITULUA.–GOBERNU-BATZARRA

23. artikulua. Zuzendaritza-organoa: Gobernu Batzarraren osaera.

Elkargoaren zuzendaritza betearazlea eta ordezkaritza gauzatzeko demokratikoki hautatutako organoa da Gobernu Batzarra. Gutxienez kide hauek osatuko dute: lehendakari batek, lehendakariorde batek, idazkari batek, diruzain batek; eta hogeita hamar elkargokideko edo gehienez ere Batzarraren hamar kideko zatiki bakoitzeko kide batek.

24. artikulua. Erabakiak betearaztea eta akta-liburuak.

1. Batzar Nagusiaren eta Gobernu Batzarraren erabakiak berehala betearazi beharrekoak izanen dira, salbu eta erabakiok hartzeko epea edo baldintzak ezarri badira.

2. Gobernu Batzarraren erabakiak 27. artikuluan xedatutakoaren arabera hartuko dira.

3. Elkargoan derrigorrez bi akta-liburu izanen dira, orri higikorrekoak izaten ahal direnak; bereizita transkribatuko dira Batzar Nagusiari eta Gobernu Batzarrari dagozkienak.

4. Aktetan, gutxienez, data, ordua, bertaratuen zerrenda, gai-zerrenda eta hartutako erabakiak jasoko dira, baita interesgarria izaten ahal den beste edozein inguruabar ere; idazkariak sinatu beharko ditu, lehendakariaren oniritziarekin, edo haien eginkizunak dagozkien bilkuretan bete dituztenen oniritziarekin; eta aztertu nahi dituzten Gobernu Batzarraren kideen eta gainerako elkargokideen eskura egonen dira. Idazkariak egokitzat jotzen diren alderdien ziurtagiria eginen du.

5. Gobernu Batzarraren kideak erabakien erantzule izanen dira, erabakia hartzen den bileran bertan egon ez arren, kontrako botoa espresuki adierazten denean izan ezik. Bertaratzen ez badira, eta bertaratutako kideen iritziz justifikatuta badago, Gobernu Batzarraren hurrengo bilkuran adierazi beharko da, onesteko unean.

25. artikulua. Eskumenak.

1. Honako hauek dira Gobernu Batzarraren eskumenak:

a) Elkargokideak onartzea erabakitzea, legeetan eta estatutu hauetan ezarritakoaren arabera.

b) Elkargoa ordezkatzea administrazioen, erakunde publikoen edo pribatuen aurrean, baita egiten diren edozein egintza eta kontratutan ere.

c) Elkargoaren zerbitzuan dauden langileak eta profesionalak kontratatzea, lan-kontratuarekin edo zerbitzuak emateko kontratuaren bidez.

d) Lankidetza-hitzarmenak sinatzea edozein motatako administraziorekin edo erakunde publiko edo pribaturekin, elkargoaren helburuak betetzeko.

e) Elkargoaren jarduna antolatu, zuzendu eta ikuskatzea, eta zerbitzuen funtzionamendu egokirako behar diren barne arauak onestea.

f) Elkargoaren diru-sarreren zenbatekoa Batzar Nagusiari proposatzea, elkargoaren kuotak eta elkargokideen beste edozein betebehar ekonomiko nola sortu eta ordaindu erabakitzea, eta betebehar horiek betetzeko behar diren neurriak hartzea.

g) Urteko aurrekontua egitea eta gauzatzea, eta ordainketa edo diru-sarrera bakoitza kontabilizatzea, aplikatu beharreko kontabilitate-araudiaren arabera.

h) Elkargoaren ordezkari izanen direnak izendatzea, elkargoaren organo gorenetan eta edozein motatako lanbide- edo administrazio-erakundetan.

i) Era guztietako ondasun higigarriak erosi eta saltzea Elkargoarentzat; higiezinentzat Batzar Nagusiaren baimena beharko da. Elkargoaren izenean banku-kontuak ireki edo ixtea, funtsak erabili edo aplikatzea, baloreak gordailutu edo kentzea, abalak eman eta elkargoaren alde kentzea, eta egokitzat jotzen dituen banku-eragiketak, merkataritzakoak edo zibilak egitea.

j) Elkargoaren eta lanbidearen interesak defendatzea, epaiketan eta auzitegitik kanpo, auzietarako ahalmenak emanda abokatu eta prokuradoreen alde, lehendakariaren bitartez.

k) Gobernu Batzarrean kargurik ez duten Elkargoaren kideak zehatzeko ahala erabiltzea.

l) Kontsultak erantzutea eta txostenak edo irizpenak egitea, hirugarren interesdunek, Administrazio Publikoak edo Botere Judizialak eskatuta edo bere ekimenez.

m) Elkargokideen prestakuntza eta lanbidearen garapena zaintzea.

n) Begiratzea kideen lanbideko esku-hartzeetan lege- eta etika-xedapenak betetzen direla, eta bereziki kontsumitzaile eta erabiltzaileen eskubideak errespetatzen direla, baita edozein motatako etxebizitzen arloan aplikagarria den araudia ere; horretarako, Administrazio Publikoarekin elkarlanean arituko da botere publikoek unean-unean finkatzen duten etxebizitza-politika behar bezala gauzatzeko.

o) Zerbitzu-sarien irizpide orientagarriak egitea, judizioko kostuak tasatzeko soilik.

p) Administrazio Publikoarekin elkarlanean aritzea, hark eskatzen dionean, eta administrazio horri bere lanbideari eta jarduerari buruzko interes orokorrekotzat edo elkargokideen garapen partikularrerako interes berezikotzat jotzen dituen ekimen guztiak proposatzea.

q) Elkargoaren funtzionamendurako eta zerbitzuetarako araudia onestea.

r) Kuotak ez ordaintzeagatik edo estatutu hauetan ezarritako beste arrazoi batzuengatik elkargoan baja ematea erabakitzea.

s) Elkargokideen artean gaiak banatzeko txanda bat sortzea, elkargoaren bidez lanbide-zerbitzuren bat eman behar denean.

t) Elkargokideek epaitegi, auzitegi edo administrazio publikoen aurrean peritu- edo tasazio-eginkizunetan bete behar dituzten jarraibideak eta eginbeharrak ezartzea.

u) Bere helburuak betetzeko antolatzea, lan-batzordeak sortuta eta gaiak banatuta.

v) Elkargoaren helburuak betetzeko eta elkargokideentzat interesgarriak diren gaiak arautzeko behar diren erregelamenduak onestea.

w) Elkargokideak behar bezala prestatzeko, haien ezagutzak eta teknikak hobetzeko eta lanbidean sartzeko beharrezkoak diren ikastaroak eta ikasketa-planak antolatzen laguntzea.

x) Gobernu Batzarraren kideen ordezkoak kooptazio bidez izendatzea, agintaldia amaitzea ez den beste arrazoiren batengatik baja hartzen dutenean.

y) Indarrean dagoen legeriak gai horri buruz informatzeko aipatzen dituen antzeko mekanismoei buruzko herritarrentzako zerbitzu-karta prestatzea eta onestea.

z) Elkargoak bete behar dituen eta Batzar Nagusiari ez dagozkion gainerako eginkizun guztiak.

2. Honako hauek ere dagozkio Gobernu Batzarrari:

a) Estatutuak onartzeko eta aldatzeko prozedura bultzatzea.

b) Bere eskumeneko gaiak Batzarrari proposatzea.

c) Elkargoaren aurrekontua eta kontuak prestatzea.

d) Batzar Nagusiari aholku eta laguntza teknikoa ematea.

e) Estatutu hauek esleitzen dioten beste edozein eginkizun.

26. artikulua. Bilkurak.

1. Gobernu Batzarra bilduko da lehendakariak deituta, bere ekimenez, idazkariak eskatuta edo gutxienez kideen laurden batek hala eskatuta. Nolanahi ere, hiru hilabetetik behin bilduko da gutxienez.

2. Deialdiak bost egun lehenago eginen dira gutxienez, behar bezala arrazoitutako eta egiaztatutako premiazko arrazoiak direla-eta berehala egin behar direnean izan ezik. Hala ere, deialdia gutxienez 48 ordu aurretik egin beharko da. Deialdian gai-zerrenda adieraziko da, eta ezin izanen da erabakirik hartu gai-zerrendan sartu ez diren gaiei buruz, salbu eta batzarkide guztiak bertan egonik, aho batez erabakitzen bada gaia presakoa dela. Aurrekoari kalterik egin gabe, Batzarrak egun jakin batzuetarako bilkurak egitea erabakitzen ahal du, onesten den urteko egutegian.

3. Gobernu Batzarrak balioz eratzeko kideen gehiengoa bertaratu beharko da, bai pertsonalki bai Gobernu Batzarraren beste kideren batek ordezkatuta.

4. Idazkariak bilkuren akta eginen du, eta Gobernu Batzarrak onetsi beharko du hurrengo deialdiaren aztergaien zerrendako lehenbiziko puntu gisa.

5. Erabakiak gehiengo soilez hartuko dira. Berdinketa gertatuz gero, lehendakariaren botoa bi aldiz zenbatuko da.

6. Gobernu Batzarrak, bere bilkuretako punturen batean, botorik gabeko aholkulari gisa gonbidatzen ahalko ditu komenigarritzat jotzen dituen pertsonak.

IV. KAPITULUA.–GOBERNU BATZARRAREN KARGUAK

27. artikulua. Lehendakariaren eskudantziak.

1. Elkargoaren lehendakariari dagokio elkargoa ordezkatzea, baita elkargoari eragiten dioten gai guztiak bultzatzea eta gainbegiratzea ere. Halaber, mota guztietako ekintzak, errekurtsoak eta erreklamazioak eskuordetu eta erabakitzeko ahalmena du, bai administrazioaren arloan, bai arlo judizialean.

2. Honako hauek dira, bereziki, lehendakariaren eginkizunak:

a) Elkargoa ordezkatzea administrazio publikoen aurrean, Higiezinen Jabetza Agenteen Kontseilu Nagusiaren aurrean, beste erakunde profesional edo edozein motatako erakundeen aurrean, edozein pertsona fisiko edo juridikoren aurrean eta, oro har, iritzi publikoaren aurrean.

b) Elkargoa ordezkatzea edozein prozedura administratibo edo judizialetan.

c) Elkargoa behartzen duten kontratu publiko edo pribatuak sinatzea, elkargoaren izenean.

d) Gobernu Batzarrak eta Batzar Nagusiak hartutako erabakiak gauzatzea edo betearaztea.

e) Ohiko nahiz Batzar Nagusi Berezietarako eta Gobernu Batzarraren bileretarako deialdiak egitea eta haietan buru izatea.

28. artikulua. Lehendakariordearen eskudantziak.

Lehendakariordeari dagokio lehendakaria ordezkatzea bere eginkizun guztietan, hura ez dagoenean, gaixorik dagoenean, ezin duenean edo kargua uzten duenean. Lehendakariak kargua uzten badu, lehendakariordeak beteko ditu haren eginkizunak Gobernu Batzarraren hurrengo hauteskundeetara arte. Hautatzen den Batzar berriak uzten duen Batzarrari zegokion denboran beteko ditu bere eginkizunak.

29. artikulua. Idazkariaren eskudantziak.

1. Idazkariari dagokio:

a) Batzar Nagusiaren eta Gobernu Batzarraren bileretan idazkari gisa jardutea, bileretan eztabaidatu eta erabakitzen denaren akta jasotzea, eta hartutako erabakien ziurtagiriak egitea.

b) Akta-liburuak zaintzea.

c) Elkargoaren organoek hartzen dituzten erabakien berri ematea elkargokideei.

d) Idazkaritzan eta elkargoaren artxiboetan dauden dokumentu eta inguruabarrei buruzko ziurtagiriak ematea, eta emandako ziurtagirien artxiboa egitea.

e) Elkargoari eta lanbideari buruzkoak eta ezagunak izanik, Batzarrari erabakiak hartzen laguntzen dioten gai guztiei buruzko txostenak egitea, Batzarrean gaiak banatzeko aukera baztertu gabe.

f) Gobernu Batzarrak esleitzen dion beste edozein.

2. Idazkariaren heriotza, absentzia, gaixotasuna, kargu-uztea, dimisioa edo ezintasuna gertatuz gero, jarduneko elkargokide gisa antzinatasunik handiena duen kideak beteko ditu haren eginkizunak, baldin eta elkargoaren Gobernu Batzarrean beste kargurik ez badu. Heriotza, kargu-uztea edo dimisioa gertatuz gero, Gobernu Batzarrean hura ordezkatuko duen beste kide bat izendatu beharko da, karguok gauzatu edo aurreko inguruabarren baten berri izan eta berehala.

30. artikulua. Diruzainaren eskudantziak.

Hona diruzainari dagokiona:

a) Elkargoaren funts ekonomikoak zaintzea.

b) Kobrantza-ziurtagiriak egitea.

c) Elkargokideen kuotak eta gainerako betebehar ekonomikoak kobratzea eta hirugarrenengandik jaso behar diren zenbatekoak kobratzeko eskatzea.

d) Elkargoaren kontabilitatea eta Zerga Administrazioaren aurrean egin beharreko zerga-betebeharrak edo beste edozein eratakoak antolatzea eta ziurtatzea.

e) Elkargoaren diru-sarrerak eta egiten dituen ordainketak gainbegiratzea, eta haien ordena egokia ziurtatzea.

31. artikulua. Batzarkideen eskudantziak.

Gobernu Batzarrean berariaz aipatutako karguren bat ez duten kideek Gobernu Batzarrak behar bezala funtziona dezan lagunduko dute, eta Gobernu Batzarrak behar bezala jarduteko eta elkargoaren helburuak betetzeko beharrezkoak diren jarduera guztietan lagunduko dute. Gobernu Batzarrak agintzen dizkien gaiak bere gain hartzen ahalko dituzte, baita Batzarrari esleitzen zaion eginkizuna bete ere, eta Batzordeak xede jakin eta zehatz batzuetarako sortutako arloak zuzenduko dituzte.

V. KAPITULUA.–GOBERNU-BATZARRA AUKERATZEA

32. artikulua. Gobernu Batzarrerako hauteskundeak.

1. Gobernu Batzarrak sustatu eta erabakitako hauteskundeetarako deialdia gutxienez hauteskundeak egin baino hogeita hamar egun lehenago eginen da. Akordioan zehaztuko dira hauteskunde-prozesua ongi garatzeko arau baliagarriak, Elkargoaren idazkariak hautesle-errolda egiteko behar duen informazioa eta hauteskunde-prozesuaren egutegi zehatza.

2. Hona hemen hauteskunde-prozesuaren epeak, Gobernu Batzarrak beharrezko iritziz gero beste zazpi egunez aldatzen ahalko direnak:

a) Erroldaren deialdia egin, argitaratu eta jendaurrean jartzea.

b) Gutxienez hiru (3) egun balioduneko epean, errolda jendaurrean jartzen denetik, haren inguruko erreklamazioak egiteko.

c) Gutxienez hiru (3) egun baliodun, Gobernu Batzarrak erreklamazioak ebazteko aurreko epea amaitzen denetik hasita.

d) Hautagaitzak egiteko hamabost (15) egun baliodun.

e) Egun baliodun bat (1) Gobernu Batzarrak hautagaitzak jendaurrean jarri eta Hauteskunde Mahaia aukeratzeko.

f) Gutxienez hiru (3) egun baliodun hauteskunde-mahaia eratzeko akta egiteko eta hamabost (15) egun baliodun izendatutako hautagaien hauteskunde-kanpainarako.

33. artikulua. Kide hautesleak eta hautagai hautagarriak.

1. Elkargokide guztiak izanen dira hautesleak eta agertuko dira hautesle-erroldan, baldin eta zehaturik ez badaude hauteskunde-deialdiaren egunean elkargoaren eskubideak eteten dituen ebazpen irmoaren bidez eta elkargoarekiko betebehar ekonomikoak eguneraturik badituzte.

2. Behin-behineko hautesle-erroldaren aurka erreklamazioak egiten ahalko dira. Erreklamazioak egiteko epea bukatu eta hurrengo hiru egunen buruan ebatziko dira, interesdunei emaitzaren berri emanen zaie eta behin betiko errolda elkargoaren webgunean argitaratuko da.

3. Artikulu honen 1. puntuan ezarritakoaren arabera hautesle diren elkargokide guztiak izaten ahal dira hautagai, betiere 4. puntuan adierazitako betekizunak betetzen badituzte.

4. Elkargokide guztiek hautatuko dituzte Gobernu Batzarraren kideak, zuzeneko eta isilpeko bozketa bidez. Botoa pertsonalki edo postaz emanen da, estatutu hauetan ezartzen diren arauen arabera.

5. Elkargoaren lehendakariak, lehendakariordeak eta idazkariak gutxienez bost urteko antzinatasuna izan beharko dute jarduneko elkargokide gisa, baita Batzarraren gainerako kideek ere, deialdi horren aurre-aurretik. Horrez gain, jarduneko elkargokide izaten jarraituko dute beren agintaldi osoan, estatutu honetan kargua uzteko arrazoiei buruz xedatutakoa baztertu gabe.

34. artikulua. Hauteskundeen aldizkakotasuna.

1. Gobernu Batzarraren karguak lau urtean behin hautatuko dira, eta hautaketa dagokion urteko azken hiruhilekoa baino lehen egin beharko da.

2. Hautatuak izan diren hautagaiak Gobernu Batzarraren bilkuran jabetuko dira karguaz. Bilkura hori hurrengo hila amaitu baino lehen egin beharko da, eta, aldi berean, urteko Batzar Nagusia epe barruan prestatu beharko da.

35. artikulua. Hauteskundeetarako deialdia.

Gobernu Batzarrak kasu hauetan erabakiko du hauteskundeetarako deialdia egitea:

1. Berriztatzea dagokionean, estatutuetan ezarritako epean.

2. Lehendakaritzan posturen bat hutsik baldin badago, Gobernu Batzarrak hauteskundeak aurreratzea erabakitzen duenean.

36. artikulua. Hauteskundeak deitzeko erabakia.

Gobernu Batzarrak hauteskundeen deialdiari buruz hartutako erabakia hartu eta hurrengo egunean jakinaraziko zaie elkargokide guztiei, presazko postaz, elektronikoki edo jaso izana egiaztatzen duen beste edozein bide erabilita. Horrez gain, webgunean informazio gisa sartu beharko da hauteskunde-garaian, aukeratutako hautagaitza iragarri arte.

37. artikulua. Hauteskunde Mahaia eratzea eta haren osaera.

1. Hautagai-zerrendak behin betiko izendatzeko hauteskunde-egutegian adierazitako egunean, Gobernu Batzarrak Hauteskunde Mahaia izendatuko du. Mahai hori hiru kidek osatuko dute, eta beste horrenbeste ordezko aukeratzen ahalko dira. Haietariko inor ezin izanen da izendaturiko hautagai-zerrendetan sartu.

2. Lanbidean antzinatasun handiena duten jarduneko bi elkargokidek eta antzinatasun txikiena duen jarduneko elkargokide batek parte hartuko dute, behar bezala justifikatutako ezinbesteko arrazoiengatik uko egiten diotenean izan ezik. Elkargokide zaharrena arituko da lehendakari lanetan, eta antzinatasun txikiena duena idazkari lanetan.

3. Gobernu Batzarrak berehala deituko die guztiei, egutegian ezarritako epean Mahaia eratzeko akta egin dadin. Akta hori mahaikideek eta Elkargoaren lehendakariak eta idazkariak edo haien ordezkoek sinatu beharko dute. Eraketa-akta egindakoan, Hauteskunde Mahaiko kideek beren karguak hartu dituztela ulertuko da, eta independentzia osoz eta Elkargoaren lehendakariaren eta idazkariaren esku-hartzerik gabe jardunen dute.

4. Hauteskunde Mahaia da hauteskunde-prozedurari buruzko erabakiak hartzeko organo gorena, eta hauteskunde-prozesuaren erreklamazioei, eskaerei eta idazkiei buruzko erabakiak hartuko ditu. Hartzen dituen erabakiak aktetan jasoko dira, eta, nahi izanez gero, dagozkien erreklamazioak egiten ahalko dira akten aurka.

38. artikulua. Hautagaitzak egitea.

1. Gobernu Batzarraren kide izateko kandidaturak Elkargoaren Idazkaritzan eginen dira, bi aletan, bata Elkargoan geratuko da eta bestea egileari itzuliko zaio Elkargoaren hartu-agiriarekin zigilatuta. Justifikagarria den edozein bitarteko elektronikoren bidez ere egiten ahalko dira.

2. Hautagaitzak egiteko hamabost (15) egun izanen dira, Gobernu Batzarrak, estatutu hauetan ezarritakoaren arabera, erroldari egiten ahal zaizkion erreklamazioak ebazten dituenetik hasita.

39. artikulua. Hautagaitzen modalitatea.

Hautagaitzak zerrenda itxietan eta blokeatuetan eginen dira, eta Gobernu Batzarraren kideak eta bi ordezko izanen dira. Gutxienez lau kide izanen dituzte (lehendakaria, lehendakariordea, idazkaria eta diruzaina) eta gehienez hamar kide, bi ordezkoak barne; lehenbiziko izena lehendakariak proposatuko du, bigarrena lehendakariordeak, hirugarrena idazkariak, laugarrena diruzainak eta gainerakoak, behar izanez gero, batzarkideek.

40. artikulua. Hautagaitzak izendatzea.

1. Hautagaitzak egiteko epea amaitu eta hurrengo lanegunean, Gobernu Batzarrak egindako hautagaitzak izendatuko ditu, eta haietako batzuk ez onartzea erabakitzen ahalko du, arrazoiak azalduta. Zuzenketa formalak badira eta Mahaiaren iritziz, onartu ez direnei egun bateko epea emanen zaie behar bezala egiteko.

2. Onartutako hautagaitzak eta baztertutakoak, arrazoiak adierazita, Elkargoaren iragarki-taulan eta webgunean argitaratuko dira, eta egindako ordenaren arabera adieraziko dira.

3. Estatutu hauetan ezarritakoaren arabera, gutxienez hiru (3) egun balioduneko epean, hauteskunde-mahaia eratzeko akta eta hautagaitzen behin betiko izendapena eginen dira.

41. artikulua. Hauteskunde-kanpaina.

Hauteskunde-kanpaina bozketaren bezperan amaituko da.

42. artikulua. Boto-paperak.

Boto-paperak Gobernu Batzarrak aldez aurretik ezarritako formatua izanen du, eta formatu eta kolore bakarrekoa izanen da jardunean dauden eta ari ez diren elkargokideentzat.

43. artikulua. Bozketa-prozesua.

1. Hauteskunde Mahaiak, bozketa-egunerako, hautestontziak prestatu beharko ditu, boto-paperak eta gutun-azalak gainbegiratu beharko ditu, eta behar diren jarduketak egin beharko ditu bozketa normaltasunez egin dadin, botoaren sekretua bermatzeko eta postaz bozkatzea errazteko.

2. Bozketa Elkargoaren egoitzan hasiko da, Elkargoa irekitzen den ohiko orduan, eta etenik gabe eginen da, Hauteskunde Mahaiak zehazten duen ordura arte eta, gutxienez, 14:00ak arte. Une oro, gutxienez hiru kidek egon beharko dute bertan, Hauteskunde Mahaiaren titular edo ordezkoek.

3. Boto-emaileak beren Nortasun Agiri Nazionalarekin, pasaportearekin edo balio bereko dokumentu ofizialarekin identifikatuta gerturatuko dira hautestontzietara. Gutun-azala eta boto-papera mahaiburuari emanen dizkiote, eta mahaiburuak hautestontzian sartuko ditu, boto-emailea hautesleen zerrendan sartu dela egiaztatu ondoren.

4. Botoa postaz ematen ahalko da, elkargokideak hala eskatzen badu hauteskundeetarako deialdiaren erabakia jakinarazten denetik hauteskunde-kanpaina amaitu arteko epean. Posta bidezko botoaren kasuan, hura egiaztatu beharko da eta elkargoaren egoitzan egon beharko da ekitaldia egin baino egun bat aurretik gutxienez. Kasu horretan, Hauteskunde Mahaiak behar den bidea jarriko du botoaren sekretua bermatzeko eta elkargokideei botoa ematen uzteko. Horrez gain, eskatzen duten elkargokide guztiei honako hauek emanen dizkie:

a) Boto-papera uzteko gutun-azala.

b) Gutun-azal bat, botoa elkargora bidaltzeko.

c) Idazkariak emandako ziurtagiri bat, egiaztatzen duena elkargokideak eskaera egin duela eta nor den, baita erantsi den boto-papera dagokion elkargokideak bidali duela ere. Ziurtagiria boto-txartela duen gutun-azalean sartuko da, eta dagokion elkargokideak izenpetuko du.

5. Posta bidezko botoak hautestontzian sartuko dira azkenik, horretarako ezarritako betekizun guztiak betetzen dituztela egiaztatu ondoren. Dagokion aktan intzidentzia gisa adieraziko da posta bidezko botoak hautestontzian sartu ez izana, halakorik badago, legezko betekizunak betetzen ez direlako, boto-emailea aipatu gabe.

6. Betebehar horietako edozein betetzen ez bada, botoa baliogabetu eginen da.

7. Posta elektroniko eta bide telematiko bidezko botoa. Posta elektronikoaren eta beste aukera telematiko batzuen bidez bozkatzeko eskubidea erabiltzen ahalko da, betiere botoaren fidagarritasuna, benetakotasuna eta sekretua bermatzen badira. Horretarako, Elkargoak plataforma seguruak jarriko ditu, boto-emailearen identifikazioa, prozesuaren osotasuna eta datu pertsonalen babesa ziurtatzeko. Bitarteko horien bidez emandako botoak aurrez aurreko eta posta bidezko botoen segurtasun-irizpide berberen arabera jaso eta zainduko dira, eta balio dutela egiaztatu ondoren, une egokian sartuko dira hautestontzian. Hauteskunde Mahaiak ezarriko ditu sistema horiek ezartzeko behar diren prozedura tekniko eta administratiboak, eta aldez aurretik elkargokide guztiei emanen die haien funtzionamenduaren eta betekizunen berri. Bitarteko elektroniko edo telematikoen bidez bozkatzeko ezarritako betekizunak betetzen ez badira, botoa baliogabetu eginen da.

44. artikulua. Boto-paperak baliorik gabe uztea.

1. Baliogabeak izanen dira zirriborroren bat duten boto-paperak, lanpostu hautagarriak baino bokal gehiago dituztenak, edo arau hauekin hertsiki bat ez datorren beste edozein irregulartasun dutenak.

2. Boto-txartel zuriak ere ematen ahalko dira.

45. artikulua. Kontu-hartzaileak.

1. Hautagaiek kontu-hartzaile bat izendatzen ahalko dute, bozketa-prozesua zaintzeko. Kontu-hartzaileek elkargokideak izan behar dute, eta hainbat kontu-hartzailek hautagai bera ordezkatzen ahalko dute. Eta hautagaiak ere izaten ahal dira kontu-hartzaile.

2. Bozketa hasi aurretik, izangaiek kontu-hartzaile gisa arituko diren elkargokideen zerrenda emanen diote Hauteskunde Mahaiaren lehendakariari.

3. Bozketan ezin izanen da kontu-hartzaile bat baino gehiago egon hautagaitza bakoitzeko.

46. artikulua. Boto-zenbaketa.

1. Bozketa amaituta, Hauteskunde Mahaiaren lehendakariak hautestontziak irekiko ditu eta botoak zenbatzeari ekinen dio.

2. Botoak zenbatu ondoren, Hauteskunde Mahaiaren lehendakariak Gobernu Batzar berriaren kide izateko boto gehien lortu dituztenen zerrenda emanen du.

3. Mahaiak dagokion akta eginen du, bi aletan, kide guztiek sinatua, nahi duten kontu-hartzaileak barne, eta bertan jasoko dira hauteskundearen emaitzak, boto baliogabeak eta zuriak, boto-emaileen kopurua, zenbatutako boto-paperena, bozketan izandako gorabeherak eta egindako protesta edo erreklamazioak. Horietako bat Gobernu Batzarrari helaraziko zaio, idazkariaren bitartez, Batzarrak hauteskundeen emaitzen berri izan dezan. Bigarrena gutun-azal itxian sartuko da, mahaikideek sinatuta, eta gutun-azal horretan sartuko dira mahaiak baliogabetzat jotako boto-paperak eta haien baliozkotasunari buruz erreklamaziorik jaso dutenak. Gutun-azal hori mahaiburuaren esku egonen da. Mahaiburuak, halaber, erabakitzen ahalko du Elkargoaren bulegoetan utz dadila, eskura, eta horretarako behar diren baliabideak emanen zaizkio.

47. artikulua. Erreklamazioak, emaitzak argitaratzea eta jartzen ahal diren errekurtsoak.

1. Bozketaren emaitzak egunean bertan jakinaraziko dira, eta Hauteskunde Mahaiaren aurrean erreklamatzen ahalko dira. Mahaiak edozein hauteslek bere aurrean egiten duen erreklamazioa berehala ebatziko du. Egindako erreklamazioak ebatzi ondoren, hautaketaren behin betiko emaitzak hurrengo egun baliodunean argitaratuko dira Elkargoaren iragarki-taulan.

2. Elkargoaren iragarki-taulan argitaratzen diren emaitzak hurrengo hamar (10) egun baliodunetan mantenduko dira, ohiko informazio orokorreko sistemaren bidez.

3. Hautesleak izendatzeari buruz Hauteskunde Mahaiak hartutako erabakiaren aurka errekurtsoa jartzen ahalko da, estatutu honen araubide juridikoan ezarritakoaren arabera. Errekurtsoan prozesuan egindako erreklamazioak jasotzen ahalko dira, baita egoki iritzitako dokumentuak edo bestelako frogak ere. Elkargoak Hauteskunde Mahaiaren txostena emanen du, errekurtsoarekin batera, baita boto-zenbaketaren akta ere, mahaiburuaren eskura geratzen dena.

48. artikulua. Hautagaitza bakarra.

Zerrenda bakar bat egin bada eta ezarritako epeen barruan aurkaratzerik edo erreklamaziorik egin ez bada, zerrenda hori irabazletzat joko da.

49. artikulua. Gobernu Batzarraren barruan karguak izendatzea eta batzordeak sortzea.

1. Gobernu Batzar berriaren lehenbiziko bileran izendatuko dira karguak, estatutu hauen 39. artikuluan ezarritakoaren arabera. Mahaikiderik badago, gaiak esleituko zaizkie.

2. Gobernu Batzarrak noiznahi sortzen ahalko ditu Batzordeak edo Lan-arloak berariazko gaiei eta xede jakinei buruz, bertako edozein kideren kargura.

50. artikulua. Batzarkideek kargua uztea.

1. Gobernu Batzarraren kideek honako arrazoi hauengatik utziko diote kargua betetzeari:

a) Hautatuak izan diren aldia amaitzea. Kasu horretan, behin-behinean jarraituko du karguan, harik eta nor ordeztuko duen izendatu arte.

b) Hiltzea.

c) Jarduneko elkargokide izateari uztea.

d) Desgaikuntza.

e) Ez bertaratzea, Gobernu Batzarraren iritziz horretarako arrazoirik ez badago, ondoz ondoko hiru batzarretara edo txandakako sei batzarretara bi urteko epean, baita Estatutu hauetan ezarritako beste edozeinetara ere. Batzarrak erabaki hori arrazoitu beharko du.

2. Arauzko berrikuntza ez den beste arrazoiren batengatik Gobernu Batzarrean hutsik geratzen diren karguak beteko dira gertatutako egunaren ondoko hogeita hamar egunetan, lehendakariaren proposamenez, eta Gobernu Batzarrak neurri egokiak hartu beharko ditu Elkargoaren zerbitzu ona eten ez dadin. Izendatutako agenteak kargua beteko du, lanpostu hutsa sortu duenak kargua utzi behar zuen arte. Salbuespen izanen dira batzarkideak, estatutu hauetan jasotakoaren arabera 40 kide baino gutxiago baditu, edo nahitaezkoak ez diren karguetako edozein. Kasu horietan, ez da berritu beharrik izanen. Hala ere, lehendakariaren kargua hutsik geratuz gero, 28. artikuluan ezarritakoa beteko da.

51. artikulua. Zentsura-mozioa.

1. Jardunean dauden elkargokideek zentsura-mozioa proposatzen ahalko dute Gobernu Batzarraren aurka, arau hauen arabera:

a) Mozioa idatziz eginen da, gutxienez elkargokideen ehuneko hogeita hamarrak sinatuta. Bertan, mozioa justifikatzen duten arrazoiak eta Gobernu Batzar osorako proposatzen diren elkargokide hautagarriak jasoko dira, hura osatzen duten kideen eta bi ordezkoren zerrenda itxian. Gehienez ere hamar kide eta bi ordezko izanen dira, eta zerrendaren lehenbizikoa proposatuko da lehendakari. Zentsura-mozioa sinatzen duten elkargokideek edo zentsura-mozioan hautagai izateko proposatzen direnek ezin izanen dute besterik sinatu agintaldia bukatu arte. Idazkiarekin batera, mozioa babesten duen elkargokide bakoitzaren izena eta zenbakia eta kargu bakoitzerako proposatutakoen onarpena agertuko dira. Horrez gain, sinatzaile bakoitzaren nortasun agiri nazionalaren edo elkargokide-txartelaren fotokopia emanen da, baita proposatutako hautagaienak ere.

2. Mozioa azaldutako betekizunen arabera proposatu ondoren, Elkargokideen Batzar Nagusi Berezirako deialdia egin beharko da, proposamena egin eta hogeita hamar egun balioduneko epearen barruan egin dadin; horretarako, abuztua ez da balioduntzat hartuko.

3. Dagokion Batzar Nagusi Berezian, eguneko gai bakarra mozioaren eztabaida izanen delarik, lehendakarigaiak hartuko du parte lehenik; ondotik eztabaida hasiko da aldeko eta kontrako hiruna txandatan, bakoitzak gehienez hamar minutuko iraupena izanen duelarik eta Gobernu Batzarraren kideek edozein momentutan hitza hartzen ahalko dutelarik. Eztabaida amaituta, lehendakarigaiak hartuko du hitza; jarraian, Elkargoaren lehendakariak eztabaida amaitutzat emanen du.

4. Ondoren, zentsura-mozioa bozkatuko da, eta botoen bi heren lortzen baditu onetsiko da.

5. Zentsura-mozioak aurrera eginez gero, Gobernu Batzarrak bere funtzioak automatikoki utziko ditu, eta hautatutakoa jabetuko da karguaz zentsuratuaren agintaldiaren gainerako zatian.

V. TITULUA.–ELKARGOAREN ARAUBIDE EKONOMIKOA ETA BESTE BETEBEHAR FORMAL BATZUK

I. KAPITULUA.–ARAUBIDE EKONOMIKOA

52. artikulua. Elkargoaren baliabideak.

1. Nafarroako Higiezinen Jabetza Agenteen Elkargo Ofizialak finantza-autonomia osoa izanen du ekonomiaren eta ondarearen arloan. Bere xedeetarako baliabide propioak izan beharko ditu, eta elkargokide guztiak behartuta egonen dira baliabide horiek zaintzera.

2. Elkargoaren baliabideak honako hauek izanen dira:

a) Elkargoan sartzeko kuotak.

b) Kuota arruntak.

c) Kuota bereziak.

d) Peritu-zerbitzuei eusteko ekarpenak.

e) Ziurtagiriak.

f) Elkargokideren bati bakarka emandako zerbitzuengatiko karguak.

g) Lankidetza-hitzarmenetatik eratorritako diru-sarrerak.

h) Dirulaguntzak eta laguntza publikoak.

i) Jaraunspenak, legatuak, dohaintzak eta liberalitateak.

j) Finantza-sarrerak.

k) Elkargoaren ondaretik eta argitalpenetatik datozenak.

l) Ezartzen diren zehapen ekonomikoen ondoriozko diru-sarrerak.

m) Gobernu Batzarrean onartzen ahal den beste edozein.

3. Baliabide ekonomikoak biltzea Gobernu Batzarrari dagokio.

53. artikulua. Aurrekontua.

1. Elkargoaren ekitaldi ekonomikoa urteko aurrekontuaren araubideari egokituko zaio eta bat etorriko da urte naturalarekin, Gobernu Batzarrak izaten ahal dituen aldaketak gorabehera.

2. Aurrekontua Gobernu Batzarrak eginen du eraginkortasun, berdintasun eta ekonomiaren printzipioen arabera, eta aurreikusitako diru-sarrera eta gastu guztiak jasoko ditu.

3. Aurrekontua indarrean egonen den ekitaldi ekonomikoaren lehenbiziko egunean onesten ez bada, aurreko ekitaldikoa luzatuko da besterik gabe, hura onesten ez den bitartean, aurreko urteko KPIa gehituta.

4. Aurrekontuak aldatu behar izanez gero, Batzar Nagusi Bereziaren baimena beharko da.

54. artikulua. Gastuak ordaintzea.

1. Elkargoaren gastuak aurrekontuan sartutakoak baizik ez dira izanen, eta ezin izanen da aurreikusi gabeko ordainketarik egin, behar bezala arrazoitutako presako kasuetan izan ezik eta Gobernu Batzarrak erabakia hartu ondotik.

2. Erabaki hori hurrengo Batzar Nagusian berretsi beharko da.

55. artikulua. Gobernu Batzarraren ahalmenak.

Gobernu Batzarrak proposatuko ditu kuota arrunten zenbatekoa eta ordaintzeko modua, sortzapena eta gainerako inguruabarrak. Halaber, Batzarrari onesteko proposatuko dio, aldaketak egin behar badira.

56. artikulua. Jaraunspenak, legatuak, dohaintzak eta liberalitateak.

Gobernu Batzarrak ahalmena du jaraunspenak, legatuak, dohaintzak edo bestelako liberalitateak onartzeko. Hala ere, Gobernu Batzarrak Elkargoaren Aholkularitza Juridikoaren aurreko txostena beharko du, xede, helburu, baldintza, modu edo bestelako mugei buruzkoa, eta dagokion aktan jaso beharko da.

57. artikulua. Erreklamazioak.

Ordaindu gabeko kuotak dituen elkargokideari baja eman ondoren, Gobernu Batzarrak, lehendik eman ez badu, zordunaren aurka erreklamazio-ekintzak abiaraztea erabakitzen ahalko du, zorra ordain dezan.

58. artikulua. Elkargoaren ondarea.

Elkargokideek ezin dute Elkargoaren ondarea banaka eskatu, iraungitzea edo desegitea erabakitzen denean izan ezik. Kasu horretan, elkargokide bakoitzak, dagokion erabakia hartzeko unean, dagokion likidaziotik sortutako kopuruak baino ezinen ditu jaso, ondasuna erosi zenetik igaro diren urteetan ordaindutako kuoten proportzioan.

59. artikulua. Kontabilitate-betebeharra.

1. Elkargoak Kontabilitate Plan Orokorrari eta haren beharrei egokitutako kontabilitatea eginen du, une bakoitzean indarra duen legeriaren arabera beharrezkoak diren dokumentuekin.

2. Kontabilitateko dokumentuak gutxienez hamar urtez gorde beharko dira, eta ezin izanen dira suntsitu elkargoaren bizitza eta historia ezagutzeko datu esanguratsuak dituztenak. Eta sei urtez, liburuetan egindako azken erregistrotik zenbatzen hasita, haiek gordetzeko, korrespondentziarako, dokumentaziorako eta jarduerari dagozkion frogagirietarako.

3. Diruzainak Gobernu Batzarrari lagunduko dio arlo honetan eman zaizkion eginkizunak betetzen.

II. KAPITULUA.–BESTE BETEBEHAR FORMAL BATZUK

60. artikulua. Beste betebehar formal batzuk.

Elkargoaren idazkariak bere ardurapean dituen liburu eta artxiboak gorabehera, Elkargoaren Idazkaritzan elkargokideen liburua eta fitxategi bana gordeko dira, baita dokumentuen sarrera eta irteera erregistratzekoa ere.

VI. TITULUA.–ESTATUTUAK ONESTEA EDO ALDATZEA

61. artikulua. Eskumena eta prozedura.

1. Elkargoaren estatutuak onestea edo aldatzea Batzar Nagusi Bereziaren eskumena da, Gobernu Batzarrak edo elkargokideen %35ek baino gehiagok proposatuta.

2. Gobernu Batzarrari dagokio Batzar Nagusi Berezia egiteko deialdia egitea, hura egin baino gutxienez zazpi egun natural lehenago. Deialdiarekin batera, jendaurrean jarriko da estatutuen proposamena edo estatutuak aldatzeko proposamena.

3. Batzar Nagusi Berezia lehenbiziko deialdian balio osoz eratuko da, baldin eta elkargokideen ehuneko berrogeita hamar gutxienez bertaratzen bada. Quorum hori lortzen ez bada, bigarren deialdian eratzen ahalko da, inolako quorum berezirik eskatu gabe. Batzar Nagusi Berezia saio batean edo gehiagotan egiten ahalko da, eztabaidatzeko, eta beste batean, bozkatzeko.

4. Estatutuak onesteko edo aldatzeko, emandako botoen bi heren eskatuko dira.

5. Estatutuak onetsi ondoren edo Batzar Nagusiak haiek aldatu ondoren, indarrean sartzeko legez eskatzen diren izapideak bete beharko dituzte.

VII. TITULUA.–ELKARGOA FUSIONATZEA, BANANTZEA, DESEGITEA ETA LIKIDATZEA

62. artikulua. Fusionatzea eta banantzea.

1. Gobernu Batzarrak berariaz deitutako Batzar Nagusi Berezian hartu beharko da fusionatzeko erabakia, edo elkargokideen kopuru batek eskatuta. Kopuru horrek elkargoaren erroldaren %30 izan behar du gutxienez, eta Estatutu hauen 19.4 artikuluan ezarritako gehiengoa beharko da.

2. Beste elkargo bat eratzeko banantzea onetsiko da aurreko paragrafoetan ezarritako betekizun berberekin.

3. Erabaki horiek hartu ondoren, lanbide-elkargoen araubide juridikoaren arloan eskumena duen Nafarroako Gobernuaren departamentuan eginen dira eskaerak eta administrazio izapideak.

63. artikulua. Desegitea.

1. Goragoko mailako arau batek hala xedatzen duenean ez ezik, Batzar Nagusi Berezian nahitaez hartutako erabakiaren bidez deseginen da HJANEO, Gobernu Batzarraren proposamenez eta Estatutu hauen 19.4 artikuluan ezarritako gehiengoekin.

2. Gero, fusionatu eta banantzeko aurreko kasuetarako ezarritako izapideak eginen dira, eta Nafarroako Gobernuaren departamentu eskudunari espresuki jakinaraziko zaio, ezarritako prozeduraren arabera.

64. artikulua. Likidatzea eta iraungitzea.

1. Elkargoa deseginez gero, Gobernu Batzarrak Batzorde Likidatzaile gisa jardunen du, eta Batzar Nagusiari eginen dio soberan dauden ondasunak erabiltzeko proposamena, bete gabe dauden betebeharrak bete ondoren. Likidazioa sei hilabeteko epean egin beharko da, eta, hala badagokio, beste hiru hilabetez luzatzen ahalko da.

2. Edozein unetan, hartzeko sozialak banatu aurretik, Batzar Nagusiak, Gobernu Batzarrak ofizioz deituta edo jarduneko elkargokideen gutxienez ehuneko hogeita hamarrak eskaera arrazoitua eginda, desegiteko erabakia bertan behera uzten ahalko du. Erabaki hori desegiteko erabakiaren gehiengo eta betekizun berberekin hartu beharko da.

VIII. TITULUA.–DIZIPLINA-ARAUBIDEA

I. KAPITULUA.–XEDAPEN OROKORRAK

65. artikulua. Oinarrizko diziplina-printzipioak.

1. Elkargoaren eginbeharrak edo Estatutu hauetan araututakoak hausten dituzten elkargokideei diziplina-zehapena ezarriko zaie, izaten ahal dituzten bestelako erantzukizun zibil, penal edo administratiboez gain.

2. Era berean, Nafarroako Higiezinen Jabetza Agenteen Elkargo Ofizialean zuzendaritza-karguak betetzen dituzten pertsonei diziplina-zehapenak ezartzen ahalko zaizkie.

3. Elkargoko higiezinen jabetza agenteen diziplina-araubideak men eginen die legezkotasun, tipikotasun, kontraesan, defentsa-gabeziarik ezaren eta errugabetasun-presuntzioaren printzipioei.

66. artikulua. Diziplina-ahala baliatzea.

1. Ezin izanen da diziplina-zehapenik ezarri, ez bada horretarako espedientearen bidez, interesdunari entzunaldia eman ondotik.

2. Elkargokideen gaineko diziplina-ahala Nafarroako Higiezinen Jabetza Agenteen Elkargo Ofizialaren Gobernu Batzarrari dagokio.

3. Espainiako Higiezinen Jabetza Agenteen Elkargo Ofizialen Kontseilu Nagusiari dagokio Elkargoaren Gobernu Batzarraren kideak auzipetzea eta diziplina-zehapenak ezartzeko ahala.

4. Elkargo Ofizialak berehala emanen dio Kontseilu Nagusiari lanbide-jardunaren etendura dakarten zehapen guztien berri, eta espedientearen laburpena bidaliko dio.

67. artikulua. Elkargo Ofizialaren zehatzeko eskumenak.

1. Elkargoak diziplina-zehapena ezarriko die Estatutu hau, arau deontologikoak edo elkargoaren beste edozein arau hausten duten elkargokideen ekintza eta ez-egite guztiei.

2. Jarduera nagusia beste elkargo baten esparruan duten higiezinen jabetza-agenteak Higiezinen Jabetza Agenteen Nafarroako Elkargo Ofizialaren diziplina-ahalaren mende geldituko dira beren lurralde-eremuan egiten dituzten jarduketengatik, dagoen lanbide-elkargoei buruzko araudiaren arabera.

II. KAPITULUA.–ARAU-HAUSTEAK ETA ZEHAPENAK

68. artikulua. Arau-hausteen sailkapena.

Higiezinen jabetza-agente elkargokideek egindako arau-hausteak arinak, astunak edo oso astunak izaten ahal dira.

69. artikulua. Arau-hausteak.

1. Arau-hauste arina izanen da:

a) Elkargoaren ordena eta jarduera egokirako ezarritako arauak ez betetzea.

b) Elkargokidearen atzerapen edo zabarkeria arina bere lanbide-jardueretan edo -betebeharretan.

c) Elkargokide gisa edozein eginbehar ez betetzea, betiere horrek arau-hauste astuna edo oso astuna ez badakar.

d) Lanbidearen Estatutu Orokorretan arintzat jotako beste edozein.

e) Kontsumitzaile eta erabiltzaileen legeriari buruzko araudia ez betetzea.

2. Arau-hauste astunak izanen dira:

a) Elkargoaren organoen erabakiak ez betetzea eta organo horien agindu edo mandatuak ez betetzea.

b) Lankideekiko, bezeroekiko edo zuzendaritza-organoen kideekiko begirunerik eza.

c) Elkargoaren jarduera edo eginbeharrak betetzean zabarkeria desenkusaezina edo engainuzko jarduketa egitea, hirugarrenei kalterik egin ez badie.

d) Lehia desleialeko egintzak babestea, edozein modutan, jurisdikzio eskudunak hala deklaratu duenean.

e) Zerga-arloko xedapenak urratzeagatik ebazpen irmoaren bidez administrazio-zehapena ekarri duten jokabideak, edo higiezinen sektoreari aplikatu beharreko legeria berezian jasotako beste batzuk, baldin eta arau-hauste horrek lotura zuzena badu beren lanbidean aritzearekin eta ez badira arau-hauste oso astunak.

f) Lanbide-eginbeharrak ez betetzea, lanbide-jarduketa eskatu edo itundu dutenei kalte egiten zaienean edo lanbidearen iritzi publikoari kalte egiten zaionean.

g) Lanbidearen Arau Deontologikoak urratzen dituzten lanbide-intrusismoko egintzak edo lanbide-jarduketak estaltzea, baldin eta lanbide-zerbitzuak eskatu edo hitzartu dituzten pertsonei kalte egiten badiete edo lehia urratzen badute.

h) Lanbidean aritzean, beste elkargokide, Elkargoko langile edo hirugarren batzuei eraso fisiko edo moral larria egitea.

i) Elkargoaren edo bere organoen funtzionamendu normala eragotzi edo aldatzen duten legez kontrako egintzak.

j) Gutxienez bost arau-hauste arin irmo egitea bi urteko epean.

k) Unean-unean indarrean dauden Lanbidearen Estatutu Orokorretan astuntzat jotako beste edozein.

l) Kontsumitzaile eta erabiltzaileen legeriari buruzko araudia ez betetzea.

3. Hauek izanen dira arau-hauste oso astunak:

a) Esku hartzen duen transakzioetatik eratorritako informazioa bere edo hirugarrenen onurarako erabiltzea, bezeroarentzat kaltegarria bada.

b) (Ezabatua).

c) Lehia desleialeko egintzak egitea, jurisdikzio eskudunak hala deklaratu duenean.

d) Elkargoaren jarduera edo eginbeharrak betetzean zabarkeria desenkusaezina edo engainuzko jarduketa egitea, hirugarrenei kalte egiten badie.

e) Osoko Bilkurak onetsitako urteko aurrekontuan jasotako kuotak ez ordaintzea, baldin eta aldez aurretik zorra kontzeptu guztietan likidatu bada eta hura dokumentu bidez ordaintzeko eskatu bada.

f) Zerga-arloko xedapenen arau-hauste astunagatik edo higiezinen sektoreari aplikagarria zaion legeria berezian ezarritako beste batzuengatik ebazpen irmoz administrazio-zehapena ekarri duten jokabideak, betiere arau-hauste horrek lotura zuzena badu beren lanbidean aritzearekin.

g) Lanbide-sekretua urratzea.

h) Lanbidean aritzea, lanbidean aritzeko desgaikuntza dakarren arrazoirik, bateraezintasunik edo edozein debeku baldin badago.

i) Lanbide-jardueran epai edo ebazpen irmo baten bidez egiaztatutako engainuzko delituak egitea, edozein partaidetza-mailatan.

j) Bi urteko epean gutxienez epai edo ebazpen irmo baten bidez berretsitako bi arau-hauste astun egitea.

k) (Errepikatzeagatik ezabatua).

l) Gobernu Batzarrari erreserbatutako gutunen edo dokumentuen edukiaren sekretua ez gordetzea.

m) Unean-unean indarrean dauden Lanbidearen Estatutu Orokorretan oso astuntzat jotzen diren gainerako guztiak.

70. artikulua. Zehapenak.

1. Arau-hauste arinak egiteagatik honako zehapen hauek ezartzen ahal dira:

a) Kargu-hartze pribatua.

b) 30 eurotik 300 eurora bitarteko isuna.

2. Arau-hauste astunak egiteagatik honako zehapen hauek ezartzen ahal dira:

a) 300,01 eurotik 3.000 eurora bitarteko isuna.

b) Elkargokide izateari uztea, gehienez ere sei hilabetez.

3. Arau-hauste oso astunak egiteagatik honako zehapen hauek ezartzen ahal dira:

a) Elkargokide izateari uztea, sei hilabetez baino gehiagoz eta bi urtez baino gutxiagoz. Horrekin batera, zuzendaritza-karguak betetzeko desgaikuntza ezarriko da, desgaikuntzak irauten duen bitartean.

b) Elkargokide izaera behin betiko kentzea eta elkargotik kanporatzea.

4. Kasu bakoitzean dagokion zehapena mailakatu eginen da egitatearen eta arau-hauslearen inguruabarrak kontuan hartuta. Arau-haustea behin baino gehiagotan egiten bada, zehapena gehienezko mugan ezartzen ahalko da.

5. Artikulu honetan jasotako isunen zenbatekoak urtero eguneratuko dira automatikoki, EINk aurreko urteko abenduan argitaratutako Kontsumoko Prezioen Indizearen (KPI) aldaketa orokorraren arabera.

71. artikulua. Arau-hauste eta zehapenen preskripzioa.

1. Arau-hauste arinek sei hilabeteren buruan preskribatuko dute, astunek bi urteren buruan eta oso astunek hiru urteren buruan.

2. Arau-hausteen preskripzio-epea zenbatzen hasiko da arau-haustea egin den egunetik aurrera. Arau-hausteen preskripzioa eten eginen da zehapen-prozedura hastea erabakitzen denean, interesduna jakitun dela. Dena den, zehapen-espedientea hiru hilabete baino gehiagoz geldirik egoten bada, eta errua ezin bazaio prozedurari lotutako elkargokideari egotzi, epea berriz ere abian jarriko da.

3. Arau-hauste arinak egiteagatik ezarritako zehapenak urtebetera preskribatuko dira, arau-hauste astunak egiteagatik jarritakoak bi urtera, eta arau-hauste oso astunak egiteagatik jarritakoak hiru urtera.

4. Zehapenen preskripzio-epea zehapena ezartzen duen ebazpena irmo bihurtzen den egunaren biharamunean hasiko da zenbatzen. Interesduna jakitun dela betearazteko prozedura hasteak preskripzioa etenen du, eta preskripzio-epeak berriro eginen du aurrera, baldin eta prozedura sei hilabetez baino gehiagoz geldiarazita egon bada arau-hausleari egotzi ezin zaion arrazoiren batengatik.

72. artikulua. Diziplina-erantzukizuna iraungitzea.

1. Honela iraungiko da diziplina-erantzukizuna:

a) Elkargokidea hiltzeagatik edo heriotza deklaratzeagatik.

b) Ezarritako zehapena betetzeagatik.

c) Hutsegitea preskribatzeagatik.

d) Zehapena preskribatzeagatik.

e) Ordaindu gabeko kuotak edo derramak ordaintzeagatik.

2. Zehapen-espedientea izapidetzen ari den bitartean inputatutako elkargokidea hiltzen bada edo heriotza-deklarazioa egiten bada, iraungitzat joko da espediente hori eta jarduketak artxibatzeko aginduko da.

III. KAPITULUA.–ZEHAPEN-PROZEDURA

73. artikulua. Behin-behinean eginkizunik gabe uztea.

1. Elkargoaren higiezinen jabetza-agenteari behin-behinean eteten ahalko zaizkio elkargokide gisa dituen eskubideak, baldin eta diziplinazko espedientea jartzen bazaio arau-hauste oso astuna egiteagatik, eta neurri hori organo eskudunak espresuki onartu badu instrukzio-egileak proposatuta.

2. Elkargokide izaera behin-behinean kentzeak ez du sei hilabete baino gehiago iraunen.

74. artikulua. Zehapen-prozedura.

1. Ezin izanen da zehapenik ezarri aldez aurretik prozedura izapidetu ez bada. Diziplina-erantzukizunik ezaren presuntzioa errespetatu beharko da izapidetzean, kontrakoa frogatzen ez den bitartean.

2. Zehapen arinak, astunak eta oso astunak honako prozedura honen bidez ezarri beharko dira:

a) Prozedura Gobernu Batzarraren erabakiz hasiko da, edo lehendakariaren erabakiz premia larriko kasuan, dela bere ekimenez, dela salaketaren batengatik. Prozeduraren izapidea egitea erabaki aurretik, Gobernu Batzarrak egitateak argitzeko erreserbatutako informazioa ematen ahalko du.

b) Instrukzio-egile batek eta idazkari batek izapidetuko dute prozedura. Gobernu Batzarrak izendatuko ditu, bere kideen artean.

c) Prozedura hasteko erabakia eta instrukzio-egilearen eta idazkariaren izendapena espedientepekoari jakinaraziko zaizkio, baita kargu horiek betetzeko izendatutakoei ere, lehenak errekusatzen badu eta bigarrenak abstenitzen badira; Gobernu Batzarrak ebatziko du, eta ebazpenaren aurka ezinen da errekurtsorik jarri. Hala ere, jartzen diren errekurtsoetan errekusatzeko aukera egonen da.

d) Instrukzio-egileak, gertaerak argitzeko eta zehatzeko moduko erantzukizunak zehazteko egokitzat jotzen dituen eginbideak egin ondoren, kargu-orri bat eginen du, hala badagokio, eta egotzitako egitateak, haiek osatzen dituzten arau-hausteak eta aplikatzen ahal den zehapena zehaztuko ditu. Kargu-orri hori modu sinesgarrian jakinaraziko zaio erruztatuari, espedientea ikusi eta hamar (10) egun balioduneko epean, jakinarazpena egiten denetik zenbatzen hasita, alegazioak egin eta, hala badagokio, froga-proposamena egiteko. Instrukzio-egileak eskatutako frogei buruzko erabakiak hartuko ditu eta bidezkotzat jotzen dituenak egiteko eguna eta ordua zehaztuko ditu. Bidezkotzat jotzen dituenak ofizioz ere egiten ahalko ditu. Kargu-orriari erantzun ondoren edo epea igaro eta erantzunik eman ez bada, instrukzio-egileak dagokion ebazpen-proposamen arrazoitua eginen du, eta interesdunari jakinaraziko dio, hamar (10) egun balioduneko epean bere defentsarako komenigarritzat jotzen duen guztia alega dezan. Interesdunari entzun ondoren, edo epea alegaziorik gabe igarota, instrukzio-egileak espedientea Gobernu Batzarrera bidaliko du, hark ebatz dezan. Halaber, instrukzio-egileak prozeduraren edozein unetan bidaltzen ahalko du espedientea, eta espedientea amaitzeko proposamena egin, erantzukizun-deklaraziorik egin gabe eta jarduketak artxibatuta, baldin eta ondorioztatzen badu ez dagoela diziplina-erantzukizunik edo hura oinarritzeko edo pertsona jakin bati egozteko proba egokirik.

e) Espedientea jasotakoan, Gobernu Batzarrak, osatu gabe dagoela irizten badio, instrukzio-egileari itzultzen ahalko dio, egokitzat jotzen dituen eginbideak egin ditzan edo izapidetzean egindako prozedura-akatsak zuzen ditzan; bestela, dagokion ebazpena emanen du. Gobernu Batzarrak zehapen astunak eta oso astunak ezartzeko erabakia hartuko du hamabost (15) egun balioduneko epean, isilpeko botazioan, eta kideen gehiengo osoa beharko da. Bertaratzea nahitaezkoa izanen da, Batzarrak errekusatzeko bidezko arrazoirik ikusten ez badu. Prozeduran instrukzio-egile eta idazkari gisa jardun duten batzarkideek ezin izanen dute parte hartu ez eztabaidatzen ez bozkatzen. Zehapen-ebazpena arrazoitu beharko da, instrukzio-egileak interesdunari jakinarazitako gertaeretan soilik oinarrituta. Zehatz adierazi beharko da zer arau-hauste egin den, zehapena zein manutan jasotzen den eta zein zehapen ezartzen den, eta, halaber, zein diren erantzulearen inguruabarrak eta zeinek eragiten ahal dieten arau-haustea ezartzeko interes profesional edo korporatiboei. Espedientearen ebazpena espedientepekoari jakinaraziko zaio, eta adieraziko zaio zein errekurtso jartzen ahal dituen ebazpenaren aurka, zein korporazio-organoren aurrean, eta zein epetan, Estatutu honen araubide juridikoan ezarritakoaren arabera.

3. Zehapen-ebazpena emateko eta jakinarazteko gehienezko epea hamabost egun baliodunekoa izanen da.

75. artikulua. Batzarkideen kasua.

Elkargoa desegiten bada, Elkargoaren Gobernu Batzarraren kideen gaineko diziplina-ahala dagokio Espainiako Higiezinen Jabetza Agenteen Elkargo Ofizialen Kontseilu Nagusiari.

76. artikulua. Batzarra eratzea, diziplinazko espedientea egiteko.

Gobernu Batzarrak kide guztiak bertan direla jardunen du, baldin eta ez badute eragozpenik alegatzen (Batzarrak onetsitakoa) edo ez badituzte errekusatzen. Erabakiak kideen gehiengo osoz hartuko dira, isilpeko bozketa bidez.

77. artikulua. Abstenitzeko eta errekusatzeko arrazoiak.

1. Abstenitzeko eta errefusatzeko arrazoiak hauek dira:

a) Interes pertsonala izatea aztertuko den gaian edo besteren batean, baldin eta ebazpenak eragin badiezaioke; sozietate edo erakunde interesdunen bateko administratzaile izatea, edo interesdunen batekin ebatzi gabeko auziren bat izatea.

b) Ahaidetasuna izatea, laugarren gradurainoko odolkidetasunezkoa edo bigarren gradurainoko ezkontza-ahaidetasunezkoa, interesdunetako edozeinekin, erakunde edo sozietate interesdunen baten administratzaileekin, baita prozeduran esku hartzen duten aholkulari, legezko ordezkari edo mandatariekin ere, edo haien bulego berekoa izatea edo haiekin elkartuta egotea aholkularitza, ordezkaritza edo mandataritzarako.

c) Aurreko apartatuan aipaturiko pertsonetakoren batekin adiskidetasun mina edo ikusiezin nabarmena izatea.

d) Dagokion prozeduran aditu edo lekuko gisa parte hartu izana.

e) Gaian zuzeneko interesa duen pertsona fisiko edo juridikoren batekin zerbitzu harremana izatea edo pertsona horri, azken bi urteetan, zerbitzu profesionalak eskaini izana, edozein motatakoak eta edozein baldintza eta tokitan.

f) Elkargokide guztiek Gobernu Batzarrari jakinarazi beharko dizkiote edozein kidek errekusatzeko dituen arrazoiak, eta Batzarrak ofizioz aplikatu beharko du abstenitzeko edo errekusatzeko arrazoien berri duenean.

78. artikulua. Historia profesionalean jasota geratzea.

Idazkariak, Gobernu Batzarrak aginduta eta eskatuta, zehatutako elkargokidearen historian jaso beharko du ezarri zaion zehapena.

IV. KAPITULUA.–EGINTZEN ARAUBIDE JURIDIKOA ETA HAIEK AURKARATZEA

79. artikulua. Elkargoaren egintzen araubide juridikoa. Baliabideak.

1. Elkargoaren organoen eraketari buruzko jarduketa eta bere administrazio-ahalak erabilita egiten duena Administrazio Zuzenbidearen mende daude, Nafarroako Foru Komunitateko Lanbide Elkargoei buruzko uztailaren 8ko 3/1998 Foru Legean eta Lanbide Elkargoei buruzko Foru Legea garatzeko Erregelamendua onesten duen otsailaren 21eko 26/2002 Foru Dekretuan eta Estatutu honetan ezarritakoaren arabera. Estatutuetako arauan jaso ez den guztirako, administrazio-prozedura erkidea arautzen duten arauak beteko dira.

2. Arlo zibileko, penaleko edo lan-arloko gaiak dagokien araubide juridikoaren menpe egonen dira.

3. Elkargotik datozen eta administrazio-zuzenbideari loturik dauden egintzek amaiera ematen diote administrazio-bideari, hurrengo apartatuan xedatzen dena galarazi gabe.

4. Lanbide-elkargoen organoen egintza eta erabaki administratiboen aurka, Administrazioak eskuordetu dizkion ahalmen eta eskumenez baliatuz, bidezko errekurtsoa jartzen ahalko da Nafarroako Gobernuan, administrazioarekiko auzi-errekurtsoa baino lehen, administrazio-prozedurari buruzko indarreko legean ezarritakoaren arabera.

5. Interesdunak, aurreko apartatuetan jasotako errekurtsoak jarri beharrik gabe, egintzaren aurka egin ahalko du administrazioarekiko auzien jurisdikzioan, hura arautzen duen legean ezarritakoaren arabera.

6. Elkargoaren barne-araudiari eragiten dioten egintza eta erabakiak behar bezala iragarriko dira, elkargokide guztiek haien berri izan dezaten.

80. artikulua. Betearaztea.

Zehapen-espedienteetan emandako ebazpenak betearazi beharrekoak izanen dira administrazio-bidea amaitzen dutenean, behin aurreko artikuluan aipatutako errekurtsoaren ebazpena eman eta gero, halakorik jartzen bada, edo errekurtsoa jartzeko epea amaitu eta gero, halakorik egin ez bada.

XEDAPEN GEHIGARRIAK

Lehenbizikoa.–Zaindaria.

Tradizioz, Elkargoaren zaindaria Santa Teresa Jesusena da.

Bigarrena.–Intsigniak eta kondekorazioak.

1. Honako hauek dira higiezinen jabetza agente elkargokideen eta haien Elkargo Ofizialen enblema pribatiboak: Armarri ofiziala, Gobernu Batzarrak onetsitako logotipoekin batera, legez indarra duten egokitzapenekin.

2. Elkargoen Gobernu Batzarren kideek bereizgarriak erabil ditzaten, ikurren eta identitate korporatiboaren arloan indarrean dagoen araudian ezarritakoa bete beharko da, baita kasuan kasuko elkargoek, autonomia-erkidegoetako kontseiluek edo Kontseilu Nagusiaren Osoko Bilkurak bereizgarri korporatiboen eta haiek sortzeko, emateko eta erabiltzeko hartzen dituzten erabakietan ezarritakoa ere.

3. Elkargoaren Gobernu Batzarrak kasu jakin batzuetan sortutako bereizgarria instituzionalizatzea erabakitzen ahalko du, pertsona edo erakunde jakin batzuek lanbideari edo, oro har, gizarteari egin dioten ekarpena aintzatesteko, bereizgarri eta tituluen bidez.

XEDAPEN IRAGANKORRA

Bakarra.–Abian diren prozedurak.

Estatutu hauek indarrean jartzean izapidetzen ari diren prozedurek izapidetze-prozesuan jarraituko dute, haiek hastean aplikatu beharreko prozeduraren arabera.

XEDAPEN INDARGABETZAILEA

Bakarra.–Arauak indargabetzea.

Indargabeturik geratzen dira, eduki osoan, Estatutu honen aurka egiten duten barne-araubideko akordio guztiak eta beheragoko mailako xedapenak.

AZKEN XEDAPENAK

Lehenbizikoa.–Ordezko administrazio-araubidea.

Profesionalen Elkargoei buruzko Legean, Higiezinen Jabetza Agenteen Elkargoen Estatutu Orokorretan eta haren Kontseilu Nagusian ezarritako moduan, Araubide Juridikoari eta Administrazio Prozedura Erkideari buruzko legeria osagarria aplikatuko da izaera administratiboa duten jarduketa korporatiboetan.

Bigarrena.–Hauteskundeetarako ordezko araubidea.

Hauteskunde-araubide orokorraren legeria organikoa osagarri gisa aplikatuko zaio Estatutu hauetan araututako hauteskunde-prozedurari, baldin eta manuek Higiezinen Jabetza Agenteen Estatutu orokorren eta Estatutu hauen erregulazioaren printzipio orokorrekin bat egiten badute.

Hirugarrena.–Erregelamenduak egiteko gaikuntza.

Gobernu Batzarra gaitzen da estatutu hauek garatu eta ezartzeko, kasuan kasuko barne-araudien bidez.

Laugarrena.–Indarrean sartzea.

Estatutu hauek Nafarroako Aldizkari Ofizialean argitaratu eta biharamunean sartuko dira indarrean.

Iragarkiaren kodea: F2608202