Iragarkia

115. ALDIZKARIA - 2026ko ekainaren 15a

1. NAFARROAKO FORU KOMUNITATEA

1.7. BESTELAKOAK

226E/2026 EBAZPENA, maiatzaren 27koa, Ekonomia Zirkularraren eta Berrikuntzaren Zerbitzuko zuzendariak emana, zeinaren bidez aldatzen baita orga jasotzaileak fabrikatzeko eta merkaturatzeko instalazio baten ingurumen baimen bateratua, instalazioa ixteko baldintzak ezartzeko. Horrenbestez, instalazioa ixteko proiektu teknikoan eta espediente administratiboaren parte den gainerako dokumentazio gehigarrian ezarritako baldintzak bete beharko dira, bai eta ebazpen honen eranskinetan jasotako baldintzak eta neurriak ere. Instalazioa Elortzibarko udal mugartean dago, eta haren titularra Mitsubishi Logisnext Europe SA da.

Instalazio horrek badu ingurumen baimen integratua, Ingurumenaren eta Uraren zuzendari nagusiaren azaroaren 13ko 512E/2014 Ebazpenaren bidez emana, ondoren aldatu zena Ingurumenaren eta Uraren zuzendari nagusiaren martxoaren 4ko 156E/2015 Ebazpenaren bidez eta Ekonomia Zirkularraren eta Klima Aldaketaren Zerbitzuko zuzendariaren otsailaren 25eko 44E/2020 Ebazpenaren bidez.

2026ko otsailaren 17an, titularrak bere instalazioa aldatzeko proiektua jakinarazi zuen, instalazioaren ukitutako zatia partzialki ixteko (koipegabetze-, fosfatatze- eta kataforesi-lerroa eta lotutako elementuak eta ur desmineralizatua ekoizteko instalazioa desmuntatzeari dagokiona). Gainera, soldadura-lerroari lotutako hozte-dorrearen eta lurruntze-kondentsadoreen deuseztapena erregularizatu zen.

2026ko martxoaren 8an, Ekonomia Zirkularraren eta Klima Aldaketaren Zerbitzuak irizpen bat eman zuen, erabakiz aldaketa hori aldaketa ez-funtsezko nabarmena dela, bat etorriz Ingurumenean Eragina duten Jarduerak arautzen dituen abenduaren 16ko 17/2020 Foru Legea garatzeko Erregelamenduaren 31. artikuluan ezarritako irizpideekin (erregelamendu hori martxoaren 30eko 26/2022 Foru Dekretuaren bidez onetsi zen), aldaketa garrantzitsuak dakartzalako instalazioaren funtzionamendu-baldintzetan, eta aldaketa horiek kontuan hartu behar direlako lehendik duen ingurumen baimen integratuan. Beraz, ingurumen baimen integratua aldatu behar da, azkendu aurretik eta ingurumen baimen bateratuaren araubidera igaro aurretik, aldaketa proiektua gauzatu ondoren.

Espedientea tramitatu da bat etorriz Ingurumenean Eragina duten Jarduerak arautzen dituen abenduaren 16ko 17/2020 Foru Legea garatzeko Erregelamenduaren 29. artikuluan ezarritako prozedurarekin (erregelamendu hori martxoaren 30eko 26/2022 Foru Dekretuaren bidez onetsi zen).

Ebazpen proposamena hamabost egunez egon da instalazioaren titularrari entzunaldia emateko izapidean, eta hark ez du proposamenaren aurkako alegaziorik aurkeztu.

Adierazitakoarekin bat, eta erabiliz azaroaren 15eko 255/2023 Foru Dekretuak ematen dizkidan eskumenak (foru dekretu horren bidez ezarri zen Landa Garapeneko eta Ingurumeneko Departamentuaren egitura organikoa),

EBAZTEN DUT:

Lehendabizikoa.–Orga jasotzaileak fabrikatzeko eta merkaturatzeko instalazio baten ingurumen baimen integratua aldatzea, instalazioa ixteko baldintzak ezartzeko. Horrenbestez, instalazioa ixteko proiektu teknikoan eta espediente administratiboaren parte den gainerako dokumentazio gehigarrian ezarritako baldintzak bete beharko dira, bai eta ebazpen honen eranskinetan jasotako baldintzak eta neurriak ere. Instalazioa Elortzibarko udal mugartean dago, eta haren titularra Mitsubishi Logisnext Europe SA da.

Bigarrena.–Titularrak erantzukizunpeko adierazpen bat aurkeztu beharko du, non ziurtatuko baitu instalazioa partzialki itxi dela ebazpen honetan ezarritako baldintzen eta neurrien arabera. Horrekin batera, obra-bukaerako ziurtagiria eta instalazioaren behin betiko planoak aurkeztu beharko ditu.

Hirugarrena.–Aldaketa egin izanaren erantzukizunpeko adierazpenarekin batera, titularrak honako agiri hauek aurkeztu beharko ditu:

–Eraispenean sortutako hondakinak kudeatzaile baimenduei entregatu izanaren egiaztagiriak.

–Instalazioetan aldaketak egin ondoren, 12 hilabeteko epean, memoria bat aurkeztu beharko da. Memoria horretan, proiektatutako eraispenari lotutako ur-, gas- eta elektrizitate-kontsumoaren murrizketa kuantifikatuko da, bai eta urak tratatzeko prozesuaren urteko gaitasun nominalaren murrizketa ere.

–III. eranskinean jasotako hasierako ziurtapenaren emaitzak; neurketak, aldaketa abian jarri ondoren.

Laugarrena.–Ebazpen honetan jasotzen diren baldintzak ez betetzeak berekin dakar ingurumeneko diziplina neurriak hartzea; hain zuzen ere, Kutsaduraren Prebentzio eta Kontrol Integratuari buruzko Legearen testu bateginaren IV. tituluan jasotakoak (testu bategin hori abenduaren 16ko 1/2016 Legegintzako Errege Dekretuaren bidez onetsi zen), ezertan galarazi gabe sektoreko legerian ezarritakoa, aplikatzekoa izaten segituko baitu, eta, subsidiarioki, Ingurumenean Eragina duten Jarduerak arautzen dituen abenduaren 16ko 17/2020 Foru Legearen III. tituluan ezarritako zehapen araubidean jasotakoa.

Bosgarrena.–Ebazpen hau Nafarroako Aldizkari Ofizialean argitaratzea.

Seigarrena.–Ebazpen honek ez du administrazio bidea amaitzen, eta espedientean interesa dutenek, administrazio publikoek izan ezik, gora jotzeko errekurtsoa jartzen ahalko dute, Landa Garapeneko eta Ingurumeneko kontseilariari zuzendua, hilabeteko epean. Administrazio publikoek administrazioarekiko auzi-errekurtsoa jartzen ahalko dute, Nafarroako Justizia Auzitegi Nagusiko Administrazioarekiko Auzien Salari zuzendua, bi hilabeteko epean. Horrek ez du galarazten Nafarroako Gobernuari aurretiazko errekerimendua egin ahal izatea, Administrazioarekiko Auzien Jurisdikzioa arautzen duen uztailaren 13ko 29/1998 Legearen 44. artikuluan ezarritako moduan eta epean. Ebazpen hau jakinarazi eta biharamunetik aurrera kontatuko dira epeak.

Zazpigarrena.–Ebazpen hau igortzea, behar diren ondorioak izan ditzan, Mitsubishi Logisnext Europe SAri, Elortzibarko Udalari eta Babes Zibileko eta Larrialdietako Zerbitzuari.

Iruñean, 2026ko maiatzaren 27an.–Ekonomia Zirkularraren eta Berrikuntzaren Zerbitzuko zuzendaria, Francisco Javier Larrañeta Nido.

Oharra: Ebazpen honetan aipatzen diren eranskinak interesdunen eskura egonen dira Ingurumen Zuzendaritza Nagusiaren bulegoetan (González Tablas kalea 9, behea, Iruña; Ekonomia Zirkularraren eta Berrikuntzaren Zerbitzua) eta Nafarroako Gobernuaren webgune honetan: https://extra.navarra.es/InformacionPublicaPRTR/CentroPublicaciones.html#/CentroPublicaciones.

Iragarkiaren kodea: F2607858