1. NAFARROAKO FORU KOMUNITATEA
1.7. BESTELAKOAK
225E/2026 EBAZPENA, maiatzaren 27koa, Ekonomia Zirkularraren eta Berrikuntzaren Zerbitzuko zuzendariak emana, zeinaren bidez partez onartzen baita Cárcarko udal mugartean oilo zirina prozesatu eta konposta ekoizten duen instalazio baten ingurumen baimen integratuan ezarritako funtzionamendu baldintzen aldaketa. Horren ondorioz, instalazioak eta hango jarduerak ebazpen honen eranskinean ezarritako baldintzak bete beharko dituzte. Instalazioaren titularra Redondo-Izal SL da.
Espediente mota | Ingurumen baimen integratuaren baldintzak aldatzea |
Espedientearen kodea | 0001-0121-2023-000043 | Hasiera eguna | 2023-11-15 |
Kudeaketa unitatea | Ekonomia Zirkularraren eta Berrikuntzaren Zerbitzua |
Telefonoa | 848426254-848427587 | Helbide elektronikoa | autprema@navarra.es |
Sailkapena | Legeria | Jarduera |
17/2020 Foru Legea, abenduaren 16koa | Sartu gabeko zentroa |
1/2016 Legegintzako Errege Dekretua, abenduaren 16koa | I. eranskina / 5.4.a) |
2010/75/EB Zuzentaraua, azaroaren 24koa | I. eranskina / 5.3.b).i) |
21/2013 Legea, abenduaren 9koa | II. eranskina / 9.e) taldea |
Instalazioa | Oilo zirina prozesatzeko eta konposta ekoizteko instalazioa |
Titularra | REDONDO-IZAL SL |
Ingurumen identifikaziorako zenbakia | 3106600833 |
Tokia | Lizarra-Andosilla NA-122 errepidea, 8. poligonoko 974. eta 1073. lurzatiak, El Saso alderdia |
Koordenatuak | UTM-ETRS89, 30N eremua, X: 584.395,840 eta Y: 4.698.568,037 |
Udalerria | CÁRCAR |
Proiektua | Sortzen diren hondakinen zerrendan hondakin berri batzuk sartzea, 190599, 200139 eta 160601 EHZ kodeak dituztenak |
Instalazio horrek ingurumen baimen integratua du, Ingurumeneko eta Lurraldearen Antolamenduko zuzendari nagusiaren ekainaren 2ko 254E/2017 Ebazpenaren bidez emana, gero Ekonomia Zirkularraren eta Klima Aldaketaren Zerbitzuko zuzendariaren maiatzaren 19ko 179E/2023 Ebazpenaren bidez berrikusi zena.
2023ko azaroaren 15ean, titularrak bere ingurumen baimen integratuan dauden baldintzak aldatzeko eskatu zuen, zehazki, ingurumen baimen integratuaren III. eranskinean, instalazioan sortzen diren hondakinen zerrendan, honako hondakin berri hauek sartzeko:
EHZ KODEA | AZALPENA | JATORRIA |
19 05 99 | Beste kategoria batean zehaztuak ez dauden hondakinak. | Konposta egiteko prozesutik datorren landare lurra. |
Konposta egiteko prozesutik datozen hondakin heterogeneoak. |
Konposta egiteko prozesuko fintze etapatik datorren errefusa. |
20 01 39 | Plastikoak. | Plastikozko eta errafiazko zakuak. |
15 01 10* | Substantzia arriskutsuen hondarrak dituzten ontziak, edo haiekin kutsatuak daudenak. | Bidoi kutsatuak (plastikozkoak eta metalezkoak). |
16 06 01* | Berunezko bateriak. | Berunezko bateriak, makina eta ibilgailu propioen mantentze-lanetatik datozenak. |
Ekonomia Zirkularraren eta Berrikuntzaren Zerbitzuak aztertu du aurkeztutako eskaera, eta balorazio hau egin du:
EHZ KODEA | AZALPENA | BALORAZIOA |
19 05 99 | Beste kategoria batean zehaztuak ez dauden hondakinak. Landare lurra. | Ez da onartzen proposatutako EHZ kodearekin sartzea sortutako hondakinen zerrendan. Konposta egiteko prozesutik datorren landare lurra kudeatzeko, beste kode hau sartu da: 19 05 02 EHZ kodea (Animalia edo landare jatorriko hondakinen frakzio konpostatu gabea). |
19 05 99 | Beste kategoria batean zehaztuak ez dauden hondakinak. Hondakin heterogeneoak. | Onartzen da sortzen diren hondakinen zerrendan sartzea, baina bilketa prozesu honetatik datozen hondakinetara mugatuta: R030101 (Konposta egitea. Substratu edo ongarri industrialak ekoiztea // Substratu organikoa ekoiztea). |
19 05 99 | Beste kategoria batean zehaztuak ez dauden hondakinak. Konposta egiteko fintze etapatik datorren errefusa. | Ez da onartzen proposatutako EHZ kodearekin sartzea sortutako hondakinen zerrendan. Konposta egiteko fintze etapatik datorren errefusa kudeatzeko, beste kode hau sartu da: 19 12 12 EHZ kodea (Hondakinen tratamendu mekanikoan sortutako beste hondakin batzuk –materialen nahasketak barne–, 19 12 11 kodean zehaztutakoez bestelakoak); izan ere, beste kategoria batean zehaztu ez diren hondakinen tratamendu mekanikoan sortutako hondakina da. |
20 01 39 | Plastikoak. Plastikozko eta errafiazko zakuak. | Ez da onartzen proposatutako EHZ kodearekin sartzea sortutako hondakinen zerrendan. Plastikozko eta errafiazko zakuak kudeatzeko, beste kode hau sartu da: 15 01 02 EHZ kodea (Plastikozko ontziak); izan ere, lehengaien eta gai osagarrien enbalajetik datozen hondakinak dira. |
15 01 10* | Substantzia arriskutsuen hondarrak dituzten ontziak, edo haiekin kutsatuak daudenak. | Onartzen da instalazioan sortzen diren hondakinen zerrendan sartzea. |
16 06 01* | Berunezko bateriak. | Onartzen da instalazioan sortzen diren hondakinen zerrendan sartzea. |
Onartutako aldaketek ez dute eragozten instalazioaren funtzionamendu egokia ingurumenari dagokionez, eta bat datoz ingurumen baimen integratuan ezarritako gehieneko isurketa-balioekin eta gainerako eskakizunekin, bai eta teknika erabilgarri onenen aplikazioarekin ere.
Ebazpen proposamena hamabost egunez egon da instalazioaren titularrari entzunaldia emateko izapidean, eta hark ez du proposamenaren aurkako alegaziorik aurkeztu.
Adierazitakoarekin bat, eta Landa Garapeneko eta Ingurumeneko Departamentuaren egitura organikoa ezartzen duen azaroaren 15eko 255/2023 Foru Dekretuak ematen dizkidan eskudantziak erabiliz,
EBAZTEN DUT:
Lehendabizikoa.–Partez onartzea Cárcarko udal mugartean oilo zirina prozesatu eta konposta ekoizten duen instalazio baten ingurumen baimen integratuan ezarritako funtzionamendu baldintzen aldaketa. Horren ondorioz, instalazioak eta hango jarduerak ebazpen honen eranskinean ezarritako baldintzak bete beharko dituzte. Instalazioaren titularra Redondo-Izal SL da.
Bigarrena.–Suteen aurkako segurtasunari dagokionez (abenduaren 3ko 2267/2004 Errege Dekretua), instalazioan biltegiratutako hondakinen kopuruak ez du handituko ingurumen baimen integratua emateko espedientearen dokumentazio teknikoan kalkulatutako arrisku intrintsekoaren maila.
Hirugarrena.–Ebazpen honetan jasotako baldintzak betetzen ez baldin badira, Kutsaduraren Prebentzio eta Kontrol Integratuaren Legearen testu bateginaren IV. tituluan jasotako ingurumen-diziplinako neurriak hartuko dira (testu bategin hori abenduaren 16ko 1/2016 Legegintzako Errege Dekretuaren bidez onetsi zen), eta, subsidiarioki, Ingurumenean Eragina duten Jarduerak arautzen dituen abenduaren 16ko 17/2020 Foru Legearen III. tituluan ezarritako zehapen-araubidean jasotakoak, ezertan galarazi gabe legeria sektorialean ezarritakoa, aurrerantzean ere aplikatu beharko baita.
Laugarrena.–Ingurumen baimen integratuan ezarritako funtzionamendu baldintzen aldaketa hau onartzen da galarazi gabe instalazioak beste baimen batzuk eskuratu behar izatea bestelako arau batzuen indarrez, adibidez, Europako Parlamentuak eta Kontseiluak 2009ko urriaren 21ean gizakien kontsumorako ez diren animalien azpiproduktuei eta produktu deribatuei aplikatu beharreko osasun arauak ezartzeko emandako 1069/2009 Erregelamenduan eskatzen direnak.
Bosgarrena.–Ebazpen hau Nafarroako Aldizkari Ofizialean argitaratzea.
Seigarrena.–Ebazpen honek ez du administrazio bidea amaitzen, eta espedientean interesa dutenek, administrazio publikoek izan ezik, gora jotzeko errekurtsoa jartzen ahalko dute haren aurka, Landa Garapeneko eta Ingurumeneko kontseilariari zuzendua, hilabeteko epean. Administrazio publikoek administrazioarekiko auzi-errekurtsoa jartzen ahalko dute, Nafarroako Justizia Auzitegi Nagusiko Administrazioarekiko Auzien Salari zuzendua, bi hilabeteko epean. Horrek ez du galarazten Nafarroako Gobernuari aurretiazko errekerimendua egin ahal izatea, Administrazioarekiko Auzien Jurisdikzioa arautzen duen uztailaren 13ko 29/1998 Legearen 44. artikuluan ezarritako moduan eta epean. Epeak ebazpen hau jakinarazi eta biharamunetik aurrera kontatuko dira.
Zazpigarrena.–Ebazpen hau Redondo-Izal SLri eta Cárcarko Udalari igortzea, behar diren ondorioak izan ditzan.
Iruñean, 2026ko maiatzaren 27an.–Ekonomia Zirkularraren eta Berrikuntzaren Zerbitzuko zuzendaria, Francisco Javier Larrañeta Nido.
Oharra: Ebazpen honetan aipatzen diren eranskinak interesdunen eskura egonen dira Ingurumen Zuzendaritza Nagusiaren bulegoetan (González Tablas kalea 9, behea, Iruña; Ekonomia Zirkularraren eta Berrikuntzaren Zerbitzua) eta Nafarroako Gobernuaren webgune honetan: https://extra.navarra.es/InformacionPublicaPRTR/CentroPublicaciones.html#/CentroPublicaciones.
Iragarkiaren kodea: F2607836
