1. NAFARROAKO FORU KOMUNITATEA
1.7. BESTELAKOAK
203E/2026 EBAZPENA, maiatzaren 27koa, Ekonomia Zirkularraren eta Berrikuntzaren Zerbitzuko zuzendariak emana, zeinaren bidez partez onartzen baita Villatuertako udal mugartean aluminiozko piezak fabrikatzen dituen instalazio baten ingurumen baimen integratuan ezarritako funtzionamendu baldintzen aldaketa. Horren ondorioz, instalazioak eta hango jarduerak ebazpen honen eranskinean ezarritako baldintzak bete beharko dituzte. Instalazioaren titularra Embega sozietate kooperatiboa da.
Espediente mota | Ingurumen baimen integratuaren baldintzak aldatzea |
Espedientearen kodea | 0001-0121-2025-000040 | Hasiera eguna | 2025-10-10 |
Kudeaketa unitatea | Ekonomia Zirkularraren eta Berrikuntzaren Zerbitzua |
Telefonoa | 848426254-848427587 | Helbide elektronikoa | autprema@navarra.es |
Sailkapena | Legeria | Jarduera |
17/2020 Foru Legea, abenduaren 16koa | Sartu gabeko zentroa |
1/2016 Legegintzako Errege Dekretua, abenduaren 16koa | I. eranskina/2.6 |
2010/75/EB Zuzentaraua, azaroaren 24koa | I. eranskina/2.6 |
21/2013 Legea, abenduaren 9koa | I. eranskina / 4.f) taldea |
Instalazioa | Aluminiozko piezen fabrikazioa |
Titularra | EMBEGA sozietate kooperatiboa |
Ingurumen identifikaziorako zenbakia | 3125703408 |
Tokia | Tafallako errepidea 10, 1. poligonoko 966. lurzatia |
Koordenatuak | UTM-ETRS89, 30N eremua, X: 581.445 eta Y: 4.723.054 |
Udalerria | Villatuerta |
Proiektua | Instalazioan sortutako hondakin berriak sartzea: 140603* EHZ kodea, 160213* EHZ kodea, 160504* EHZ kodea, 200133* EHZ kodea, 150106 EHZ kodea eta 110113* EHZ kodea. |
Instalazio horrek ingurumen baimen integratua du, Landa Garapeneko eta Ingurumeneko kontseilariaren urriaren 22ko 453/2007 Foru Aginduaren bidez emana, gero Ingurumenaren eta Uraren zuzendari nagusiaren urriaren 6ko 440E/2014 Ebazpenaren bidez eguneratu zena.
2025eko urriaren 10ean, titularrak bere ingurumen baimen integratuan dauden baldintzak aldatzea eskatu du, zehazki, ingurumen baimen integratuaren III. eranskinean, instalazioan sortzen diren hondakinen zerrendan, honako hondakin berri hauek sartzea:
EHZ KODEA | DESKRIBAPENA | JATORRIA |
14 06 03* | Bestelako disolbatzaileak eta disolbatzaile nahasketak. | Serigrafiako pantailen polimero-hondarrak garbitzeko erabilitako disolbatzailearen hondakina, estankotasun-junturen prozesuan sortua. |
16 02 13 * 13 | Zirkuituetan edo kondentsadoreetan olioa duten etxetresna elektriko handiak. Profesionala. | Mantentze-prozesuan sortutako hondakina, ekipo edo instalazioetatik datorrena. |
16 05 04* | Substantzia arriskutsuak dauzkaten presio-ontzietako gasak (haloiak barne). | Mantentze-prozesuan sortutako aerosol-potoak, lubrifikaziorako erabiltzen direnak. |
20 01 33* | 16 06 01, 16 06 02 edo 16 06 03 kodeetan zehaztutako bateria eta metagailuak, eta era horretako bateriak dituzten sailkatu gabeko metagailu eta bateriak. | Pilak eta bateriak (irratien, ekipoen eta abarren erabilera). |
15 01 06 | Material nahasiak dituzten ontziak. | Mantentze-prozesuko hondakinen nahasketa, hala nola lixak, arrabolak, eskularruak, trapuak, mantentze-lanetako askotariko hondakinak eta hiri-hondakinekin pareka daitezkeen hondakinak. |
Bestalde, 110113* EHZ kodea duen hondakinari dagokionez (koipegabetzearen ondoriozko hondakinak, substantzia arriskutsuak dituztenak) eskatu da R1 tratamendua (nagusiki erregai gisa edo energia ekoizteko beste modu batean erabiltzea) ingurumen baimen integratuaren III. eranskinean sartzea.
Ekonomia Zirkularraren eta Uraren Zerbitzuak berrikusi du aurkeztutako eskaera, eta balorazio hau egin:
EHZ KODEA | DESKRIBAPENA | BALORAZIOA |
14 06 03* | Bestelako disolbatzaileak eta disolbatzaile nahasketak. | Onartzen da instalazioan sortutako hondakinen zerrendan sartzea, baina haren bilketa estankotasun-junturen fabrikazio-prozesutik datozen disolbatzaile erabilien hondakinetara mugatzen da. |
16 02 13 * 13 | Zirkuituetan edo kondentsadoreetan olioa duten etxetresna elektriko handiak. Profesionala. | Onartzen da instalazioan sortutako hondakinen zerrendan sartzea, baina haren bilketa mantentze-prozesuaren ondorioz zirkuituetan edo kondentsadoreetan olioa duten etxetresna elektriko handietara mugatzen da. |
16 05 04* | Substantzia arriskutsuak dituzten presio-ontzietako gasak (haloiak barne). | Onartzen da instalazioan sortzen diren hondakinen zerrendan sartzea. |
20 01 33* | 16 06 01, 16 06 02 edo 16 06 03 kodeetan zehaztutako bateria eta metagailuak, eta era horretako bateriak dituzten sailkatu gabeko metagailu eta bateriak. | Ez da onargarria instalazioan sortutako hondakinen zerrendan sartzea, ez baitator bat haien jatorriarekin. Mantentze-prozesutik datozen pilak eta bateriak kudeatu daitezen, 16 02 13* 51 EHZ kodea sartzen da, hots: Gailu txikiak. 50 cm-tik gorako kanpoko neurririk ez dutenak. Osagai arriskutsuak dituztenak eta pilak daramatzatenak. Profesionala. |
15 01 06 | Material nahasiak dituzten ontziak. | Ez da onargarria instalazioan sortutako hondakinen zerrendan sartzea, ontzien hondakinak ez direlako. 16 01 19 EHZ kodea sartzen da, hots, plastikoa, mantentze-prozesutik datozen plastikoak kudeatzeko (hodi korrugatuak, lixak, arrabolak edo askotariko mantentze-lanen hondakinak, plastiko izaera dutenak). Mantentze-prozesutik datozen trapuak eta eskularruak kudeatzeko, EHZ kode bat dago baimenduta: 15 02 02 Xurgatzaileak, iragazketa-materialak (beste kategoria batean zehazturik ez dauden olio-iragazkiak barne), substantzia arriskutsuz kutsaturiko garbiketarako zapiak eta babes jantziak. Bestalde, langileek erabiltzen dituzten jantokietako hondarrei dagozkien hondakinak, hiri-hondakinekin pareka daitezkeenak, ez dira industria-hondakintzat hartzen, eta, beraz, ez da haiek kudeatzeko EHZ koderik sartzen instalazioaren ingurumen baimenean. |
EHZ KODEA | DESKRIBAPENA | AZKEN KUDEAKETA | BALORAZIOA |
11 01 13* | Koipea kentzeko prozesuaren hondakinak, substantzia arriskutsuak dituztenak. | R2, R6, D9 | Ez da onartzen EHZ kode horretarako R1 kudeaketa-bidea sartzea instalazioan sortutako hondakinen taulan. Hondakinei eta Lurzoru Kutsatuei buruzko eta Ekonomia Zirkularra Bultzatzeko apirilaren 8ko 7/2022 Legearen 24.4 artikuluaren arabera, birziklatu daitezkeen hondakinak ezin izanen dira erraustera bideratu, balorizazio energetikoa egin ala ez. Horri dagokionez, mota horretako hondakinak kudeatzeko, balorizazio-eragiketa espezifikoak daude, hala nola R2, disolbatzaileak berreskuratzea edo birsortzea, eta R6, azidoak edo baseak birsortzea, zeinak dagoeneko ingurumen baimenean sartuta baitaude. |
Onartutako aldaketek ez dute eragozten instalazioaren funtzionamendu egokia ingurumenari dagokionez, eta bat datoz ingurumen baimen integratuan ezarritako gehieneko isurketa-balioekin eta gainerako eskakizunekin, bai eta teknika erabilgarri onenen aplikazioarekin ere.
Ebazpen proposamena hamabost egunez egon da instalazioaren titularrari entzunaldia emateko izapidean, eta hark ez du proposamenaren aurkako alegaziorik aurkeztu.
Adierazitakoarekin bat, eta Landa Garapeneko eta Ingurumeneko Departamentuaren egitura organikoa ezartzen duen azaroaren 15eko 255/2023 Foru Dekretuak ematen dizkidan eskudantziak erabiliz,
EBAZTEN DUT:
Lehendabizikoa.–Partez onartzea Villatuertako udal mugartean aluminiozko piezak fabrikatzen dituen instalazio baten ingurumen baimen integratuan ezarritako funtzionamendu baldintzen aldaketa. Horren ondorioz, instalazioak eta hango jarduerak ebazpen honen eranskinean ezarritako baldintzak bete beharko dituzte. Instalazioaren titularra Embega sozietate kooperatiboa da.
Bigarrena.–Ebazpen honetan jasotako baldintzak betetzen ez badira, Kutsaduraren Prebentzio eta Kontrol Integratuaren Legearen testu bateginaren IV. tituluan jasotako ingurumen diziplinako neurriak hartuko dira (testu bategin hori abenduaren 16ko 1/2016 Legegintzako Errege Dekretuaren bidez onetsi zen), eta, subsidiarioki, Ingurumenean Eragina duten Jarduerak arautzen dituen abenduaren 16ko 17/2020 Foru Legearen III. tituluan ezarritako zehapen araubidean jasotakoak, ezertan galarazi gabe legeria sektorialean ezarritakoa, aurrerantzean ere aplikatu beharko baita.
Hirugarrena.–Ebazpen hau Nafarroako Aldizkari Ofizialean argitaratzea.
Laugarrena.–Ebazpen honek ez du administrazio bidea amaitzen, eta espedientean interesa dutenek, administrazio publikoek izan ezik, gora jotzeko errekurtsoa jartzen ahalko dute haren aurka, Landa Garapeneko eta Ingurumeneko kontseilariari zuzendua, hilabeteko epean. Administrazio publikoek administrazioarekiko auzi-errekurtsoa jartzen ahalko dute, Nafarroako Justizia Auzitegi Nagusiko Administrazioarekiko Auzien Salari zuzendua, bi hilabeteko epean. Horrek ez du galarazten Nafarroako Gobernuari aurretiazko errekerimendua egin ahal izatea, Administrazioarekiko Auzien Jurisdikzioa arautzen duen uztailaren 13ko 29/1998 Legearen 44. artikuluan ezarritako moduan eta epean. Epeak ebazpen hau jakinarazi eta biharamunetik aurrera kontatuko dira.
Bosgarrena.–Ebazpen hau igortzea Embega sozietate kooperatibora eta Villatuertako Udalera, behar diren ondorioak izan ditzan.
Iruñean, 2026ko maiatzaren 27an.–Ekonomia Zirkularraren eta Berrikuntzaren Zerbitzuko zuzendaria, Francisco Javier Larrañeta Nido.
Oharra: ebazpen honetan aipatzen diren eranskinak interesdunen eskura egonen dira Ingurumen Zuzendaritza Nagusiaren bulegoetan (González Tablas kalea 9, behea, Iruña; Ekonomia Zirkularraren eta Berrikuntzaren Zerbitzua) eta Nafarroako Gobernuaren webgune honetan: https://extra.navarra.es/InformacionPublicaPRTR/CentroPublicaciones.html#/CentroPublicaciones.
Iragarkiaren kodea: F2607819
