Iragarkia

108. ALDIZKARIA - 2026ko ekainaren 4a

1. NAFARROAKO FORU KOMUNITATEA

1.4. DIRU-LAGUNTZAK, LAGUNTZAK ETA BEKAK

294E/2026 FORU AGINDUA, maiatzaren 12koa, Eskubide Sozialetako, Ekonomia Sozialeko eta Enpleguko kontseilariak emana, zeinaren bidez dirulaguntza baten deialdia onesten baita 2026. urterako, desgaitasuna duten pertsonen arloan ari diren gizarte ekimeneko entitateek desgaitasuna duten pertsonen familiei atseden emateko programak garatu ditzaten. DDBN kodea: 905546.

Gizarte-zerbitzuei buruzko abenduaren 14ko 15/2006 Foru Legearen 2. artikuluan ezartzen denez, botere publikoen jarduketek, gizarte-zerbitzuen arloan, funtsezko helburu hauek izanen dituzte, besteak beste: pertsona guztien bizi-kalitatea hobetzea eta haien normalizazioa, parte-hartzea eta integrazioa sustatzea gizartean, politikan, ekonomian, lanean, kulturan eta hezkuntzan; autonomia pertsonala, familiarra eta taldeena sustatzea; kohesio soziala eta elkartasuna sustatzea; pertsonen eta taldeen bazterketa-egoerei aurrea hartu eta haietaz arduratzea; eta mendekotasunak eta oinarrizko baliabide ezak eragindako premiei erantzutea. Orobat, xedatzen du gizarte-zerbitzuen sistema publikoaren prestazioak ezarriko dituen tresna Gizarte Zerbitzuen Zorroa izanen dela.

Agindu hori Nafarroako Foru Komunitateak gizarte laguntzaren arloan duen eskumen esklusiboaren arabera eman zen, bat etorriz Nafarroako Foru Eraentza Berrezarri eta Hobetzeari buruzko abuztuaren 10eko 13/1982 Lege Organikoaren 44.17 artikuluan xedatutakoarekin. Agindu hori Espainiako Konstituzioaren 49. artikuluan xedatutakoarekin lotu behar da; izan ere, horren arabera, botere publikoek desgaitasuna duten pertsonen autonomia pertsonal osoa eta inklusio soziala bermatuko duten politikak bultzatuko dituzte, ingurune zeharo irisgarrietan. Era berean, kolektibo horretako erakundeen parte-hartzea sustatuko dute, legeak ezartzen duen moduan. Bereziki artatuko dira emakumeen eta desgaitasuna duten adingabeen premia espezifikoak.

Martxoaren 30eko 30/2019 Foru Dekretuak, zeinaren bidez aldatzen baita ekainaren 17ko 69/2008 Foru Dekretua, Gizarte Zerbitzu Orokorren Zorroa onetsi zuen. "Bermatu gabeko prestazioak" izeneko II. eranskinean, C) 16 atalean, desgaitasuna duten pertsonen arloan aritzen diren gizarte zerbitzuetako entitateentzako dirulaguntzak ezartzen ditu, eta xedatzen baliabidearen helburua dela desgaitasuna duten pertsonen autonomia pertsonala sustatzeko eta mendekotasuna prebenitzeko programak gauzatzea eta horrelako programak garatzen dituzten irabazi-asmorik gabeko entitateetan asoziazionismoa sustatzea.

Dirulaguntzei buruzko azaroaren 9ko 11/2005 Foru Legeak ezartzen du zer araubide juridiko orokor aplikatu behar zaien onura publikoko edo gizarte-intereseko jarduerak sustatzeko Nafarroako Aurrekontu Orokorren kargura ematen diren dirulaguntzei. Arau horren 17. artikuluak norgehiagokako araubidea ezartzen du, eta halakotzat jotzen du dirulaguntza emateko aurkezten diren eskaerak alderatzea, oinarri arautzaileetan eta deialdian ezarri diren balorazio irizpideei jarraituz eskaeren arteko lehentasun ordena ezartzeko, eta ordena horren arabera esleitzea dirulaguntza, deialdian ezarritako muga eta kreditu erabilgarria gainditu gabe. Salbuespenez, oinarri arautzaileetan hala aurreikusiz gero, dirulaguntzetarako bideratu den gehieneko zenbateko osoa dirulaguntzaren onuradunen artean hainbanatzea proposatuko da.

Azaroaren 28ko 31/2022 Foru Legeak, Nafarroan desgaitasuna dutenei arreta emateari eta beren eskubideak bermatzeari buruzkoak, ezartzen du nahitaezkoa dela klausula sozialak sartzea dirulaguntzen oinarrietan edo horiek emateko arauetan. Kontuan izanda deialdi hau desgaitasunaren sektoreko entitateei zuzenduta dagoela, zeinetan deialdi honen xedeko programek helburu baitute berariaz erantzutea desgaitasuna duten pertsonen premiei, haien autonomia eta bizi-kalitatea bermatuta, bai eta mendekotasunari arreta ematea eta aurrea hartzea ere, baldintza hori osorik betetzen da.

Ekainaren 5eko 60/2024 Foru Dekretuaren bidez, Pertsonen Autonomiarako eta Garapenerako Nafarroako Agentziaren estatutuak onetsi ziren, eta erakunde horri eman zitzaizkion deialdi honen xedeko arloari buruzko eginkizunak.

Ikusirik espedienteari lotutako txosten teknikoak eta juridikoak, argi dago egokia eta interes publikokoa dela deialdi hau onestea, eta legezkoak direla deialdia eta oinarri arautzaileak.

Horrenbestez, erabiliz Nafarroako Gobernuari eta Lehendakariari buruzko abenduaren 3ko 14/2004 Foru Legearen bidez eta Eskubide Sozialetako Departamentuaren egitura organikoa ezartzen duen urriaren 30eko 268/2019 Foru Dekretuaren bidez esleitu dizkidaten eskudantziak,

AGINTZEN DUT:

1. Onestea foru agindu honen I. eranskinean ageri diren oinarriak, zeinen bidez arautzen baita desgaitasuna duten pertsonen arloan ari diren gizarte ekimeneko entitateei dirulaguntzak emateko deialdi bat, desgaitasuna duten pertsonen familiei atseden emateko programak garatu ditzaten 2026. urtean.

2. 123.382 euroko gastua baimentzea, 2026ko gastu-aurrekontuko "Desgaitasuna duten pertsonen familiei atseden emateko programa" izeneko 920005-93100-4819-231B45 partidaren kontura.

3. Foru agindu hau eta eranskinak Nafarroako Aldizkari Ofizialean argitaratzea.

4. Foru agindu honen kontra, gora jotzeko errekurtsoa jartzen ahalko da, Nafarroako Gobernuari zuzendua, Nafarroako Aldizkari Ofizialean argitaratu eta biharamunetik hilabeteko epean.

5. Foru agindu hau igortzea, behar diren ondorioak izan ditzan, Programen eta Dirulaguntzen Kudeaketaren Atalera, Ekonomia eta Aurrekontuak Kudeatzeko Ataleko Kontabilitate Zentrora, Idazkaritza Tekniko Nagusiko Administrazio Aferetarako Bulegora eta Dirulaguntzen Datu Base Nazionalera.

Iruñean, 2026ko maiatzaren 12an.–Eskubide Sozialetako, Ekonomia Sozialeko eta Enpleguko kontseilaria, María Carmen Maeztu Villafranca.

I. ERANSKINA.–Dirulaguntza-deialdia, desgaitasuna duten pertsonen arloan ari diren gizarte ekimeneko entitateek desgaitasuna duten pertsonen familiei atseden emateko programak garatu ditzaten 2026. urtean. Oinarriak

1.–Xedea, aplikazio eremua eta programa motak.

1.1. Xedea.

Foru agindu honen xedea da arautzea nola eman desgaitasuna duten pertsonen arloan soilik ari diren gizarte ekimeneko entitateentzako dirulaguntzak, zeinen bidez finantzatzen lagunduko baitira familiei atseden emateko programak, helburu dutenak autonomia pertsonala sustatzea eta mendekotasuna prebenitzea.

Helburua da desgaitasuna duten pertsonen bizitza independentea erraztea eta horien integrazio pertsonal eta sozial handiena lortzea, oporretako txandak eginez irisgarritasun handieneko baldintzekin, pertsonak aisiara eta kulturara hurbiltzeko eta senideen eta zaintzaileen atsedenaldia ahalbidetzeko.

Oreka eta arrazionaltasuna bilatuko da opor proposamenen kalitatearen, kostuaren eta parte-hartzaileen ekarpenaren artean, eta saiatuko da minimizatzen bazterketa gerta dadin oporrak hartzeko garaian, arrazoi ekonomikoak direla eta.

Horrez gain, programen bidez honako hauek sustatu nahi dira: taldeak sortzea, talde horietako kideen parte-hartzea eta elkarlana handitzea, parte-hartzaileen gaitasun sozialak garatzea eta haien integrazioa sustatzea. Hori guztia Eskubide Sozialetako Departamentuak kudeatzen dituen prestazio, programa eta zerbitzuen osagarri izanen da.

1.2. Aplikazio eremua.

Deialdi honetan ezartzen diren dirulaguntzak irabazi-asmorik gabeko elkarte eta entitateentzat dira, zeinek Nafarroan kokaturik egon beharko baitute, eta, bakar-bakarrik, desgaitasuna duten pertsonen arloan aritu.

1.3. Aurkeztuko diren programa motak.

Desgaitasuna duten pertsonentzako programak, oporren txanda inklusibo eta irisgarriak antolatzen dituztenak, ahalik eta normalizatuenak, pertsona horiek aisialdiko eta kulturako ondasunak eskura dezaten errazteko, helburua izanik ahalik eta integrazio pertsonal eta sozialik handiena lortzea eta, aldi berean, desgaitasuna duten pertsonak beren kargura dituzten familiei atsedena ematea.

2.–Aurrekontu-baliabideak.

Helburu horietarako 123.382,00 euro bideratuko dira, 2026ko aurrekontuko "Desgaitasuna duten pertsonen familiei atseden emateko programa" izeneko 920005-93100-4819-231B45 partidaren kontura.

3.–Entitate eskatzaileek bete beharreko baldintzak.

Honako hauek izan daitezke oinarri arautzaile hauetan aurreikusten diren dirulaguntzen onuradun: desgaitasuna duten pertsonen arloan soilik ari diren eta haien beharrak asetzea xede duten gizarte ekimeneko Nafarroako entitateak, irabazi-asmorik gabekoak.

Entitateek baldintza hauek bete beharko dituzte:

a) Legez eratutako pertsona juridikoa izatea eta dagokion erregistro ofizialean inskribatuta egotea.

b) Egoitza soziala Nafarroako Foru Komunitatearen lurraldean izatea edo ordezkaritza iraunkor bat izatea lurralde honetan. Azken kasu horretan, gutxienez 3 urteko antzinatasuna izan behar dute Nafarroako Foru Komunitatean, eta behar adinako egitura eta antolaketa izan behar dute, gauza izan daitezen erabakiak hartzeko eta deialdi honetan aurkeztutako proiektuak autonomiaz kudeatzeko.

c) Irabazi-asmorik ez edukitzea.

d) Entitatearen helburua izatea, estatutuen arabera, desgaitasuna duten pertsonentzako eta/edo haien familientzako jarduerak egitea.

e) Funts berekietatik eta/edo beste dirulaguntza publiko edo pribatu batzuetatik heldu den finantzaketa izatea.

f) Zerga betebeharrak eta Gizarte Segurantzarekikoak egunean izatea, eta Nafarroako Foru Komunitateko Administrazioarekiko eta haren erakunde autonomoekiko zorrak kitatuak izatea, edo, bestela, entitate horiekin ordainketa geroratzea edo zatikatzea adostu izana.

g) Dirulaguntzen onuraduna izateko Dirulaguntzei buruzko Foru Legearen 13. artikuluko 2. eta 3. apartatuetan ezarritako gainerako debeku-egoeretan ez egotea.

h) Administrazio ebazpen irmoz edo kondena-epai irmoz zehapena edo zigorra jaso ez izana sexua edo generoa dela-eta lan-jardunbide baztertzaileak izateagatik edo onartzeagatik.

i) Dirulaguntza jaso izana, "Programak gauzatzea" izeneko modalitatean, desgaitasuna duten pertsonen arloko entitateentzako dirulaguntzen aurreko urteko deialdian.

Eskaerak aurkezteko epea bukatzen den egunean bete beharko dira baldintza guztiak, eta, orobat, diruz laguntzen den jarduerak irauten duen bitartean.

4.–Dirulaguntzaren xedeko programaren betebeharrak.

4.1. Entitateek honako definizio hauek hartuko dituzte kontuan, aurkeztutako programan agertu beharko baitira:

–Programa: programatzat txanden multzoa jotzen da.

–Txanda: pertsona talde zehatz eta homogeneo batek toki eta egun jakin batzuetan egiten duen oinarrizko unitatea da. Horrek esan nahi du plazak kostu bera duela taldeko kide guztientzat. Txanda bakoitzean irteera-egunak zein itzulera-egunak ere sartuko dira, eta ostatu-gauak txanda bakoitzaren egunak baino bat gutxiago izanen dira.

–Programaren koordinatzailea: familiei atseden emateko programa orokorra planifikatu, antolatu eta ebaluatzen duen pertsona. Horrez gain, txandak gainbegiratzen ditu, eta haietan laguntzen.

–Txandako arduraduna: txandako arduradun orokor gisa diharduen pertsona da, dirulaguntza hartzen duen entitateak izendatua. Txanda bakoitzean arduradun batek egon beharko du nahitaez.

–Monitoreak: txandako arduradunarekin elkarlanean, taldea koordinatzeko eta txanda antolatzeko lanak egiten dituzten pertsonak dira, programaren helburuak betetzeko. Aldi berean, eguneroko bizitzako jardueretan lagunduko diete onuradunei, hala behar dutenean.

Monitoreak boluntarioak izan daitezke, entitateak edo desgaitasuna duen pertsonak berak jarriak.

4.2. Dirulaguntza jasotzeko, programek baldintza hauek bete beharko dituzte:

a) Deialdi honen 1. oinarrian jasotako xederako egokiak izatea.

b) Funts berekietatik eta/edo beste dirulaguntza publiko edo pribatu batzuetatik heldu den finantzaketa izatea.

c) Entitate eskatzaileak programa bakar bat aurkeztuko du. Programa behar diren txandetan egituratuko da, xedeko kolektiboaren arabera, eta entitatearen estatutuetan zehaztutako desgaitasuna duten Nafarroako Foru Komunitateko pertsonei zuzenduko zaio. Txanda bakoitzak lau egun gutxienez iraunen du, eta zortzi egun gehienez.

d) Salbuespen gisa, onuradunen lehen mailako ahaideak joaten ahalko dira txandetara, familia taldearen batasuna indartzeko. Pertsona horiek plazaren kostu osoa ordainduko dute, salbu eta beharrezko laguntzaile gisa joaten baldin badira.

e) Txanda bakoitzean honako hauek egotea: txandako arduraduna, diruz lagundutako entitatea ordezkatuz arituko dena, eta monitore lanetan aritzeko gai diren pertsonak, kopuru egokian, parte-hartzaile kopurua eta desgaitasun eta mendekotasun motak kontuan hartuta.

f) Txanda bakoitzean desgaitasuna duten 6 pertsona gutxienez eta 30 gehienez egotea; salbuespen gisa eta behar bezala arrazoituta egonez gero, pertsona gutxiago edo gehiago hartzen dituzten txandak antolatzen ahalko dira.

g) Onuradunek parte hartzeagatik ordaindu beharreko kuota ezartzea. Koordinatzaileak, txandako arduradunak eta monitoreek ez dute kuota hori ordaindu behar.

4.3. Entitateen ardurapekoak izanen dira honako hauek:

a) Garraio enpresak kontratatzea, postuak erreserbatzea, ostatua eta zerbitzua ematea.

b) Egutegia antolatzea.

c) Aseguruak kontratatzea.

d) Oporretan egin beharreko jardueretarako programa ezartzea.

e) Programa gauzatzeko behar diren langileak kontratatzea.

f) Behar diren boluntarioen parte-hartzea eta prestakuntza erraztea.

g) Programa zabaldu eta argitaratzea, bertan parte hartzeko erraztasunak emateko.

h) Erabiltzaileak hautatzea Pertsonen Autonomiarako eta Garapenerako Nafarroako Agentziak aldez aurretik ezarri eta ezagututako irizpide eta prozeduren arabera.

i) Erabiltzaileek txanda bakar baterako dirulaguntza edukiko dute. Beste txanda batzuetako inskripzioa ez da finantzatuko, beste elkarte baten bidez parte harturik ere. Erabiltzaile berari bi txandatarako edo gehiagotarako dirulaguntza emanez gero, diruz lagundutako zenbatekoaren zati proportzionala itzuli beharko da.

5.–Eskaerak aurkeztea.

5.1. Eskaerak noiz eta non aurkeztu.

Eskaerak aurkezteko epea 30 egun naturalekoa izanen da, deialdi hau Nafarroako Aldizkari Ofizialean argitaratu eta biharamunetik hasita.

Dirulaguntza jasotzeko eskaerak telematikoki aurkeztuko dira, Nafarroako Gobernuaren webgunean dagoen fitxaren bidez, "Eskatu" botoia sakatuta. Fitxarako sarbidea tramiteen bilatzailean dago: www.navarra.eus, "Laguntzak eta dirulaguntzak" botoia.

Dokumentazioa deialdi honetako ereduen arabera aurkeztuko da, dokumentu bereizietan, bakoitzak bere izena behar bezala dakarrela.

Eskaera aurkezten bada lehen esandako modua ez den beste edozein erabiliz, ez aurkeztutzat joko da. Sarrera data baliodun bakarra aurkezpen telematikoarena izanen da.

5.2. Dokumentazio berariazkoa:

a) Dirulaguntza eskaera.

Eskaeran nahitaez adierazi beharko dira aurrekontua, dirulaguntzatzat eskatzen den zenbatekoa eta parte-hartzaileen partaidetza-kuota, eskatutako txanda bakoitzerako. Programaren datu ekonomiko orokorrak aurkeztuko dira diru-sarreren eta gastuen aurrekontuan.

b) Programaren proiektu teknikoa, deialdiaren web-fitxan eskuragarri dagoen dokumentu-txantiloiaren arabera.

Formatuari dagokionez, gehienez 20 orrialdetan egin beharko da, behar bezala zenbakituta, DIN A4 tamainan; zenbaketatik kanpo utziko dira azala eta aurkibidea. Letra mota Arial edo antzekoa izanen da, gutxienez 11 puntuko neurrikoa, eta lerroartea bakuna. Grafikoek gutxienez ere 10 puntuko letra izanen dute, eta ezin izanen dute orrialde osoa hartu. Aipatu orrialde kopurua gainditzen bada, organo kudeatzaileak gehieneko kopuruan sartzen dena bakarrik baloratuko du.

Idazketari dagokionez, proiektu teknikoa hizkuntza argi eta zehatzean idatziko da, nahasmendua edo anbiguotasuna eragin dezaketen adierazpenak saihestuz; hizkuntza inklusiboa erabiliko da eta genero-ikuspegia sartuko da, pertsonei buruzko datuak sexuaren arabera bereizita.

c) Dirulaguntzaren xedeko programaren diru-sarreren eta gastuen aurrekontua, deialdiaren web-fitxan eskuragarri dagoen dokumentu-txantiloiaren arabera.

Txanda bakoitzaren gastuak honela multzokatuko dira:

–Zuzeneko langileak, familiei atseden emateko programaren koordinatzailea barne.

–Ostatua eta mantenua.

–Garraioa.

–Jarduerak.

–Oporretarako berariazko aseguruak.

–Administrazio eta kudeaketa gastuak. Gehienez ere programaren aurrekontuaren %10 izatea onartuko da.

d) 2025ean diruz lagundutako programaren memoria teknikoa.

Gehienez ere 25 orrialdetan osatu beharko da, behar bezala zenbakituta, DIN A4 tamainan. Azala eta aurkibidea ez dira sartzen kopuru horretan. Letra mota: Arial edo antzekoa, gutxienez ere 11 puntuko neurrikoa, eta lerroarte bakuna. Grafikoek gutxienez ere 10 puntuko letra izanen dute, eta ezin izanen dute orrialde osoa hartu. Aipatu orrialde kopurua gainditzen bada, organo kudeatzaileak gehieneko kopuruan sartzen dena bakarrik baloratuko du.

e) 2025ean diruz lagundutako programaren emaitzen kontua (diru-sarrerak eta gastuak).

Ez da beharrezkoa izanen d) eta e) letretan eskatutako dokumentuak aurkeztea, horiek administrazioaren esku badaude eta aldaketarik izan ez badute.

5.3. Eskaerako akatsak zuzentzea.

Eskaerarekin batera nahitaezko agiriak aurkeztu ezean edo oso-osorik ez badaude, instrukzio organoak entitate interesdunari eskatuko dio gehienez ere 10 egun balioduneko epean akatsak zuzen ditzala, eta adieraziko dio horrela egin ezean haren eskaera ezetsitzat joko dela. Kasu horretan, espedientea artxibatzeko aginduko da, eta dagokionari jakinaraziko zaio, Administrazio Publikoen Administrazio Prozedura Erkideari buruzko urriaren 1eko 39/2015 Legean ezarri bezala.

Orobat, instrukzio-organoak noiznahi eskatzen ahalko du deialdia ebazteko beharrezkotzat jotzen duen dokumentazioa edo informazio osagarria, baita behar diren agiriak ere, frogatzeko osorik betetzen direla oinarri hauetan eskatzen diren baldintzak.

Eskaeraren zuzenketa edo dokumentazio osagarria aurkeztea izapidetuko da Nafarroako Gobernuaren webgunean dagoen deialdiaren fitxan, "Zuzendu" botoia sakatuta. Fitxarako sarbidea tramiteen bilatzailean dago: www.navarra.eus, "Laguntzak eta dirulaguntzak" botoia.

6.–Antolaketa, instrukzioa eta ebazpena.

Deialdi honen ondorioetarako, dirulaguntzak emateko prozedura antolatu eta instruitzeko eginkizunak Programen eta Dirulaguntzen Kudeaketaren Atalari esleitu zaizkio.

Pertsonen Autonomiarako eta Garapenerako Nafarroako Agentziako zuzendari kudeatzaileak izanen du laguntzak emateko prozedura ebazteko eskumena.

7.–Arau orokorrak: dirulaguntzak emateko prozedura eta balorazioa.

Deialdi honetan aurreikusten diren dirulaguntzak emateko prozedura norgehiagokako araubidearen bidez tramitatuko da, aurkezten diren eskaerak erkatuz, bat etorriz Dirulaguntzei buruzko Foru Legearen 17.1 artikuluan xedatutakoarekin.

Balorazioak fase bakarra izanen du, eta aurkezturiko programa baloratuko da bertan.

Fase hori baztertzailea izanen da, eta dauden 70 puntuetatik 42 edo gehiago lortzen dituzten programek baizik ez dute finantzaketa jasoko.

8.–Balorazio irizpideak.

Erabiliko diren balorazio eta puntuazio irizpideak II. eranskinean daude ezarrita.

9.–Dirulaguntzaren zenbatekoa esleitzea.

42 puntutik gorako puntuazioa lortzen duten programa guztiek hartuko dute dirulaguntza.

Helburu hori betetzeko, honako hauek izanen dira pertsona eta gau bakoitzeko diruz lagun daitezkeen gehieneko zenbatekoak:

Onuradunak mendekotasun aitortua duenean bakarrik baloratuko da laguntzailearen beharra.

Aurreikusita dagoen gehieneko dirulaguntzaren eta eskatzen den dirulaguntzaren arabera esleituko da dirulaguntzaren zenbatekoa.

Balorazio ekonomikoaren ondoriozko diru zenbatekoa, guztira, aurrekontuetan dagoen dirua baino handiagoa bada, kasuan kasuko baremoaren aplikazioaren ondoriozko zenbatekoak hainbanatuko dira.

10.–Prozeduraren ebazpena, jakinarazpena, publizitatea eta errekurtsoak.

Instrukzio-organoak egindako ebazpen-proposamenak ikusita, Pertsonen Autonomiarako eta Garapenerako Nafarroako Agentziako zuzendari kudeatzaileak dirulaguntzak esleitzeko ebazpena emanen du.

Ebazpenak entitate interesdunei jakinaraziko zaizkie, eta adieraziko dira ebazpena emateko aintzat hartutako oinarriak, dirulaguntza hartzen duten eskatzaileen zerrenda eta, halakorik bada, beste eskaerak ukatzeko arrazoiak. Dirulaguntza emanez gero, zehaztuko dira helburua, zenbatekoa, ordaintzeko modua eta dirulaguntza justifikatzeko modua eta epea.

Aurrekoa deusetan galarazi gabe, Nafarroako Gobernuko webgunean argitaratuko dira dirulaguntzak emateko ebazpenak. Argitalpen horretan honako hauek adieraziko dira: deialdia, aurrekontuko zer kredituri egozten zaizkion dirulaguntzak, erakunde onuradunak, emandako zenbatekoa eta dirulaguntzaren helburua.

Ebazpenak eman eta jakinaraziko dira legez ezarritako gehieneko epean, hau da, Dirulaguntzei buruzko Foru Legearen 17.4 artikuluan ezarritakoan. Epe hori bukatuta, entitate interesdunek ulertzen ahalko dute eskaera ezetsi egin dela. Hala ere, Administrazioa beharturik dago ebazpena ematera.

Berariazko edo presuntziozko ebazpenaren aurka gora jotzeko errekurtsoa aurkezten ahalko da, Eskubide Sozialetako, Ekonomia Sozialeko eta Enpleguko kontseilariari zuzendua, bat etorriz Nafarroako Foru Komunitateko Administrazioari eta foru-sektore publiko instituzionalari buruzko martxoaren 11ko 11/2019 Foru Legean eta Administrazio Publikoen Administrazio Prozedura Erkideari buruzko urriaren 1eko 39/2015 Legean xedatutakoarekin.

Dirulaguntzaren zenbatekoa aurkeztutako eskaeran ageri dena baino txikiagoa izanez gero, entitate eskatzaileak eskaera berregiten ahalko du. Betiere, bermatu beharko da berregindako proiektuak jatorrizko proiektuaren xede eta ezaugarri berak izanen dituela.

11.–Bateragarritasuna.

Deialdi honetan aurreikusitako dirulaguntzak bateragarriak dira xede bererako jasotzen den beste edozein laguntzarekin. Hala ere, dirulaguntzen zenbatekoa ezin da inola ere izan, bakarrik edo beste dirulaguntza, laguntza, diru-sarrera edo diruz lagundutako jardueraren berezko baliabide batzuekin batuta, entitate onuradunak egin beharreko jardueraren kostua baino handiagoa.

12.–Dirulaguntzaren ordainketa.

Ordainketa onuradunaren kontuan eginen da, Nafarroako Gobernuaren Diruzaintzan agertzen den horretan. Kontu hori kontsultatu eta, hala badagokio, alda daiteke esteka honetan: https://www.navarra.es/eu/tramiteak/on/-/line/kontuen-eta-ordainketen-kontsulta. Ziurtagiri digitala edo Cl@ve erabili behar da sartzeko. Onuradunak ezin badu bere kontua esteka horretan erregistratu ziurtagiri digitalik edo Cl@ve sarbiderik ez duelako, laguntzaren ordainketa jaso ahal izateko, transferentzia bidez ordaintzeko eskaera bat aurkeztu beharko du, behar den inprimakia helbide honetatik hartuta: https://www.navarra.es/eu/tramiteak/on/-/line/nafarroako-foru-administrazioaren-inprimaki-orokorrak.

Dirulaguntza ordaintzeko, beharrezkoa izanen da kasu guztietan irailaren 11ko 59/2013 Foru Dekretuan ezarritakoa betetzea, horren bidez arautzen baitira Nafarroako Aurrekontu Orokorren kargurako dirulaguntzen onuradunen gardentasun betebeharrak.

Oro har, Dirulaguntzei buruzko azaroaren 9ko 11/2005 Foru Legearen 32. artikuluan ezarritakoari jarraikiz ordainduko da dirulaguntza, jarduera egin dela frogatu ondoren, eranskin honen 13. oinarrian xedatutakoari jarraikiz.

Dirulaguntzei buruzko azaroaren 9ko 11/2005 Foru Legearen 33. artikuluan ezarritakoari jarraituz, aurreikusten da dirulaguntzaren aurrerakinak ordaintzen ahalko direla, baldintza hau betez gero:

Entitateak ordainketa aldez aurretik egiteko eskatu izana. Horretarako, eskabidearekin batera aurkeztu beharreko dokumentazioaz gainera, funtsen beharra frogatzen duen dokumentazioa aurkeztu beharko du entitateak, honako hauek erantsita: behar hori frogatzen duen txostena, ordezkariaren ziurtagiri bat entitatearen izenean dauden banku-kontuak agertzeko, bankuko kontuetako uneko saldoak agertzen dituen bankuko ziurtagiri bat –banku elektroniko bidez lortutakoak ere onartuko dira–, eta diruzaintzako fluxuen hileroko aurreikuspen bat (kobrantzak, ordainketak, maileguak eta abar zehazten dituena), edo dirulaguntzaren xedeak betetzeko funtsak behar direla frogatzen duen beste edozein ziurtagiri.

Emandako dokumentazioa aztertuta, aurrerakinak ordaintzeko baldintzak betetzen diren ala ez baloratuko du organo kudeatzaileak.

Aurreko atalean eskatutako baldintza betez gero, aurrerakinak honela ordainduko dira:

a) Onartu den dirulaguntza 60.000 eurokoa edo txikiagoa baldin bada, ordainketa bakarra eginen da, dirulaguntza emateko ebazpena sinatzen denean.

b) Hartuko den dirulaguntza 60.000 eurotik gorakoa bada, gutxienez bi zatitan ordainduko da: lehenbizikoa, dirulaguntza emateko ebazpena sinatzearekin batera, eta hurrengoa edo hurrengoak, aurretik ordaindutako zenbatekoari dagokion exekuzioaren justifikazio ekonomikoa egin ondoren.

13.–Justifikazioa.

13.1. Justifikazio partzialak.

13.1.1. Ordainketa aurreratu bakarra.

Dirulaguntza ordainketa aurreratu bakar gisa jasotzen duten entitateek dirulaguntzaren azken justifikazioa aurkeztuko dute oporren azken txanda bukatu eta 30 eguneko epean, eta, nolanahi ere, 2027ko urtarrilaren 31 baino lehen. Azken justifikazioa eginen da 13.2 atalean ezarritakoaren arabera.

Justifikazioa aurkezteko azken egunean entitateak ez badauzka programari esleitutako langileengatik Gizarte Segurantzari eta Nafarroako Ogasunari egindako ordainketen egiaztagiriak, geroago aurkeztu beharko ditu.

13.1.2. Justifikatu ondorengo ordainketa.

Dirulaguntza gastuak justifikatu ondoren jasotzen duten entitateek justifikazio partziala aurkeztu beharko dute ordainketa baten gastua justifikatzen duten bakoitzean. Lehendabiziko justifikazio partziala 2026ko irailaren 30a baino lehen aurkeztu beharko da.

Azken ordainketa egiteko, azken justifikazioa 2026ko azaroaren 10ean aurkeztuko da beranduenez. Salbuespenez, eta behar bezala justifikatuz gero, azaroaren 22ra arte aurkezten ahalko da.

Gehienez bi justifikazio onartuko dira.

13.1.3. Ordainketa zatikatu aurreratuak.

Aldez aurretiko ordainketa zatikatuaren bidez ordaintzen zaien entitateek, bigarren ordainketa egiteko, lehen ordainketa aurreratuaren justifikazioa aurkeztuko dute, 2026ko azaroaren 10a baino lehen. Salbuespenez, eta behar bezala justifikatuz gero, 2026ko azaroaren 22ra arte aurkezten ahalko da.

13.1.2 (Justifikatu aurreko ordainketak) eta 13.1.3 (Ordainketa zatikatu aurreratuak) atalei dagokien justifikazio partziala egiteko, honako dokumentazio hau aurkeztu beharko da:

a) Tarteko txosten narratibo laburra, programaren bilakaerari buruzkoa, deialdiaren web-fitxan eskuragarri dagoen dokumentu-txantiloiaren arabera.

Formatuari dagokionez, entitatearen tarteko txostena gehienez 10 orrialdetan egin beharko da, behar bezala zenbakituta, DIN A4 tamainan; zenbaketatik kanpo utziko dira azala eta aurkibidea. Letra mota Arial edo antzekoa izanen da, gutxienez 10 puntuko neurrikoa, eta lerroartea bakuna. Grafikoek gutxienez ere 9 puntuko letra izanen dute, eta ezin izanen dute orrialde osoa hartu. Aipatu orrialde kopurua gainditzen bada, organo kudeatzaileak gehieneko kopuruan sartzen dena bakarrik baloratuko du.

Idazketari dagokionez, tarteko txostena hizkuntza argi eta zehatzean idatziko da, nahasmendua edo anbiguotasuna eragin dezaketen adierazpenak saihestuz; hizkuntza inklusiboa erabiliko da eta genero-ikuspegia sartuko da, pertsonei buruzko datuak sexuaren arabera bereizita.

b) Jasotako dirulaguntzari aplikatu zaizkion gastuen zerrenda, kontzeptuka, non agiri zenbakia, kontzeptua, jaulkitzailea, data eta zenbatekoa zehaztuko baitira.

Aditzera emanen dira jasotako dirulaguntzari egotzitako zenbatekoak, kontzeptuka, zehazturik agiri-zenbakia, kontzeptua, jaulkitzailea, data eta zenbatekoa.

Zerrenda horrekin batera, dagozkion egiaztagiriak, fakturak eta ordainagiriak aurkeztu beharko dira, gastuen zerrendako hurrenkerari jarraituz. Egiaztagiri gisa, bankuko kontu-laburpenak, ordainagiriak eta fakturak onartuko dira bakarrik, eta horietan jaulkitzailearen eta hartzailearen datuak, data, kontzeptua, prezioa eta ordaintzeko modua adierazi beharko dira, apirilaren 10eko 23/2013 Foru Dekretuan xedatutakoari jarraikiz, horren bidez fakturazio betebeharrak arautzen dituen erregelamendua onetsi baitzen.

Gastuen zerrenda hori entitateek telematika bidez igorriko dute, entitatearen legezko ordezkariaren sinadura digitala duela, eta adierazirik gastuok dirulaguntza honetarako baizik ez direla aurkeztu.

Gastu hauek kontabilizatuko dira: pertsonal gastuak, ondasun-emateenak edo zerbitzu-prestazioenak, 2026ko abenduaren 31ra bitarte egin badira eta 2027ko otsailaren 15era arte ordaintzen ahal badira.

Organo kudeatzaileak posta elektronikoz bidaliko die erakundeei onartutako gastuen zerrenda, gastuen aldaketak barne (halakorik baldin badago), eta ziurtatuko du onartutako dokumentazioa aurkeztu izana Pertsonen Autonomiarako eta Garapenerako Nafarroako Agentzian, jasotako dirulaguntza justifikatzeari begira.

13.2. Azken justifikazioa.

2027ko urtarrilaren 31 baino lehen, entitate onuradunak dokumentazio hau aurkeztu beharko du jarduera gauzatu duela justifikatzeko:

a) Lehenago aurkeztu ez badu, eta azken ordainketa justifikatzeko, kontzeptu bakoitzerako jasotako dirulaguntzari aplikatutako gastuen zerrenda, oinarri honen 13.1.b) atalean azaltzen den bezalaxe prestatua.

b) Diruz lagundutako programaren memoria teknikoa, deialdiaren web-fitxan eskuragarri dagoen dokumentu-txantiloiaren arabera.

Formatuari dagokionez, entitatearen memoria teknikoa gehienez 25 orrialdetan egin beharko da, behar bezala zenbakituta, DIN A4 tamainan; zenbaketatik kanpo utziko dira azala eta aurkibidea. Letra mota Arial edo antzekoa izanen da, gutxienez 10 puntuko neurrikoa, eta lerroartea bakuna. Grafikoek gutxienez ere 9 puntuko letra izanen dute, eta ezin izanen dute orrialde osoa hartu. Aipatu orrialde kopurua gainditzen bada, organo kudeatzaileak gehieneko kopuruan sartzen dena bakarrik baloratuko du.

Idazketari dagokionez, txostena hizkuntza argi eta zehatzean idatziko da, nahasmendua edo anbiguotasuna eragin dezaketen adierazpenak saihestuz; hizkuntza inklusiboa erabiliko da eta genero-ikuspegia sartuko da, pertsonei buruzko datuak sexuaren arabera bereizita.

c) Diruz lagundutako programaren erabiltzaileen zerrenda, sexuaren eta egindako txandaren arabera bereizita, deialdiaren web-fitxan eskuragarri dagoen dokumentu-txantiloiaren arabera.

d) Diruz lagundutako programaren emaitzen kontua (diru-sarrerak eta gastuak), deialdiaren web-­fitxan eskuragarri dagoen dokumentu-txantiloiaren arabera.

Diru-sarreren kapituluan, erakundeak azalduko ditu diruz lagundutako jarduera finantzatzeko jasotako diru-sarrerak, zehaztuta funts horien zenbatekoa eta jatorria, barnean direla Pertsonen Autonomiarako eta Garapenerako Nafarroako Agentziak emandakoarekin bateragarriak diren dirulaguntzak. Diru-sarrerak guztira ezin dira izan diruz lagundutako jarduera egiteko kostuak baino handiagoak.

Gastuen kapituluan gastu guztiak zehaztuko dira, honela banatuta:

–Zuzeneko langileak, familiei atseden emateko programaren koordinatzailea barne.

–Ostatua eta mantenua.

–Garraioa.

–Jarduerak.

–Oporretarako berariazko aseguruak.

–Administrazio eta kudeaketa gastuak.

e) Diruz lagundutako programaren guztizko gastuaren zerrenda, deialdiaren web-fitxan eskuragarri dagoen dokumentu-txantiloiaren arabera. Aurkeztu beharko da Excel formatuan eta digitalki sinatutako PDF formatuan.

Halaber, entitateak instrukzio organoaren eskura utziko ditu jatorrizko fakturak.

14.–Entitate onuradunen betebeharrak.

a) Programa gauzatzea entitateak eskaeran eta dirulaguntza emateko baldintzetan zehaztu bezala.

b) Aurkeztea eranskin honen 13. oinarrian aipatzen diren frogagiriak, tartekoak eta azkenekoak.

c) Deialdi honen kargura finantzatutako programei edo jarduerei buruzko informazio-, dibulgazio- eta publizitate-jarduera guztiek bete beharko dute uztailaren 2ko 212/2010 Foru Aginduan xedatutakoa, zehazki, 2. artikuluko betebehar orokorrak eta 4.1b) artikuluko betebehar espezifikoak. Beraz, proiektuaren komunikazio elementu orotan logo ofiziala eta honako testu hau agertuko dira: "Nafarroako Gobernuak finantzatutako programa/jarduera/funtzionamendua".

Jarduketa horiek justifikatzeko, entitateak aurkeztu beharko du Nafarroako Gobernuaren eta Pertsonen Autonomiarako eta Garapenerako Nafarroako Agentziaren parte hartzea azaldu izanaren frogagiria. Proiektuari lotutako publizitate, hedapen eta agiri guztietan, edozein dela ere erabilitako bitartekoa, Nafarroako Gobernuaren logotipo ofiziala eta testu hau agertu behar dira: "Nafarroako Gobernuak-Pertsonen Autonomiarako eta Garapenerako Nafarroako Agentziak diruz laguntzen dute". Testu horrek urtarrilaren 27ko 4/2016 Foru Dekretuan jasotako ezaugarri teknikoak bete beharko ditu, horren bidez arautzen baitira Nafarroako Gobernuaren sinbolo ofiziala eta haren erabilera.

d) Laguntza ematen duen organoak eta indarra duen antolamendu juridikoaren arabera eskudun diren bestelako organoek egin beharreko egiaztapen lanak onartzea.

e) Dirulaguntza jasotzen duen jardueraren frogagiriak gordetzea, dokumentu elektronikoak barne, egiaztatze eta kontrol lanen xede izan daitezkeen bitartean.

f) Laguntza ematen duen organoari komunikatzea diruz lagundutako jarduera finantzatzeko lortutako beste laguntzak, diru-sarrerak edo baliabideak. Jakin bezain laster emanen da horren berri, eta jasotako funtsak zertan erabili diren justifikatu baino lehen.

g) Betetzea kontabilitatean eskatzen ahal zaizkion betebeharrak, entitatearen izaeraren araberakoak.

h) Deialdi honetan eta aplikatzekoa den legerian ezarritako kasuetan, jasotako funtsak itzultzea.

i) Dirulaguntzei buruzko Foru Legeak dirulaguntzen onuradunei ezartzen dizkien gainerako betebeharrak.

15.–Gardentasun betebeharrak.

Gardentasunari, Informazio Publikoa Eskuratzeari eta Gobernu Onari buruzko maiatzaren 17ko 5/2018 Foru Legearen 3.c) artikuluan aipatutako entitate pribatuak behartuak daude gardentasun betebeharrak betetzera baldin eta, urtebetean, 20.000 eurotik gorako laguntzak edo dirulaguntzak jasotzen badituzte Nafarroako Aurrekontu Orokorren kargura, edo jasotako laguntzak edo dirulaguntzak beren urteko diru-sarrera guztien %20 edo gehiago badira eta, gutxienez, 5.000 euro.

Aurreko atalean ezarritako muga kuantitatiboak gainditzen diren jakiteko, batuko dira Nafarroako Foru Komunitateko Administrazioak edo haren erakunde publikoek urte naturalean emandako dirulaguntza guztien kopuruak. Urte batean baino gehiagotan ordaintzen diren dirulaguntzen kasuan, aurrekontu-ekitaldi bakoitzean emandako kopurua hartuko da kontuan ondorio horietarako, ez guztizko batura. Negozio-zifra honako hauetako txikiena izanen da:

–Aurreko urteko negozio-zifra.

–Hala badagokio, dirulaguntza ematen den ekitaldian entitateko organo eskudunak onetsitako negozio-zifra.

Dirulaguntzen onuradun izanik, gardentasuna betebeharra duten entitateek, eskaera aurkeztean, horretarako den "Gardentasuna" atalean aurkezten beharko dute honako informazio hau:

a) Entitatearen gobernu, administrazio eta zuzendaritza organoen osaera.

b) Organo horiek osatzen dituzten kargudunen zerrenda.

c) Entitateak aurreko urtean kargudun bakoitzari ordaindutako ordainsari gordinak eta gainerako diru konpentsazioak, kontzeptuz kontzeptu. Sortu berriak diren entitateen kasuan, informazioa izanen da haien aurrekontuetan edo plan ekonomiko-finantzarioan jasotakoa.

d) Entitatearen gobernu, administrazio eta zuzendaritza eginkizunetan ematen den dedikazioaren araubidea.

e) Entitate onuradunaren azken urteko kontuen kopia.

Entitateak gardentasun betebeharra bete behar ez badu, aurreikusitako inguruabarrak gertatzen ez direlako, horren gaineko adierazpena aurkeztu beharko du.

Entitateak dirulaguntza bat baino gehiago jasotzen baditu ekitaldi berean, ez du informazioa errepikatu beharko dirulaguntza bakoitzerako, salbu eta hasieran eman zituen datuak aldatu badira. Horretarako, entitateak adierazi beharko du Foru Komunitateko Administrazioaren zein organoren aurrean aurkeztu zuen, eta noiz.

Aurrekoa deusetan galarazi gabe, onuradun guztiak behartuak daude unitate kudeatzaileari behar den informazio guztia ematera, aurretiazko errekerimendua eginda eta hamar eguneko epean, hark bete ahal izan ditzan maiatzaren 17ko 5/2018 Foru Legearen II. tituluan ezarritako gardentasun betebeharrak (Gardentasunari, Informazio Publikoa Eskuratzeari eta Gobernu Onari buruzko Foru Legea).

16.–Dokumentazioaren eskuragarritasuna.

Ekintzen gastu eta kudeaketari buruzko egiaztagiriak gorde egin beharko dira, eta auditoria- eta kontrol-organoek eskuragarri izanen dituzte gutxienez lau urteko epean, likidazioa ebazten denetik zenbatzen hasita. Entitate onuradunaren erantzukizunak, gainera, Nafarroako Ogasun Publikoari buruzko apirilaren 4ko 13/2007 Foru Legean ezarritakoari lotuta daude.

17.–Azpikontratazioa eta hornitzaileen kontratazioa.

Deialdi honetan aurreikusitako ondorioetarako, bidezkoa da azpikontratazioa egitea, alegia, hirugarrenekin hitzartzea haiek gauzatu dezaten, hein batean, dirulaguntzaren xede den jarduera. Dirulaguntzaren xede den jarduera onuradunak berak egin ahal izateko egin behar dituen gastuen kontratazioa kontzeptu horretatik kanpo gelditzen da.

Entitateek, gehienez ere, diruz lagundutako jardueraren zenbatekoaren %50 azpikontrata dezakete. Hirugarrenekin hitzartutako jarduerak dirulaguntzaren zenbatekoaren %20 gainditzen badu eta zenbateko hori 60.000 eurotik gorakoa bada, idatzizko kontratuaren bidez egin beharko da azpikontratazioa.

Dirulaguntzei buruzko Foru Legearen 28.3 artikuluan xedatutakoarekin bat, zerbitzuak aholkularitza- edo laguntza-enpresek ematen badituzte eta gastu diruz lagungarrien zenbatekoa 12.000 eurokoa baino handiagoa bada, onuradunak frogatu beharko du, dirulaguntza ematen duen organoaren aurrean, hornitzailea efizientzia- eta ekonomia-irizpideei jarraikiz hautatu dela.

Kasu horietan, entitate onuradunak helburua lortzeko gai diren hiru enpresarekin edo gehiagorekin kontsultatu eta negoziatu beharko ditu kontratuaren baldintzak, eta eskaintzarik onena egiten duenarekin sinatuko du. Entitate onuradunak gorde egin beharko ditu kontsulta-tramitearen gaineko dokumentazioa eta eskaintzak. Kontu horiek agiri bidez frogatu beharko ditu dirulaguntza ematen duen organoaren aurrean, kontratua sinatu bezain laster. Agiri horiekin batera, aurkeztu beharko da egindako hautapena arrazoitzeko txosten labur bat.

Ez da beharrezkoa izanen enpresa bati baino gehiagori kontsulta egitea, baldin eta gastu diruz lagungarrien ezaugarrien berezitasunagatik, behar adina ez badira merkatuan hornidura edo zerbitzu hori ematen duten enpresak.

18.–Baldintzak aldatzea.

Entitate onuradunek, jasotzen dituzten bestelako dirulaguntza, laguntza edo diru-sarrerez gain, dirulaguntza emateko eta haren zenbatekoa zehazteko kontuan hartutako baldintzetan gertatzen diren aldaketa guztiak ere jakinarazi beharko dizkiote Pertsonen Autonomiarako eta Garapenerako Nafarroako Agentziari. Jakinarazpen hori formalki egin beharko da, erregistro elektronikoan aurkeztutako eskabide baten bidez.

Salbuespen gisa, dirulaguntza jasotzen duten entitateek diruz lagundutako programaren edukia aldatzeko baimena eskatzen ahalko dute, baita hura gauzatzeko modua eta epeak ere, kasu hauetan:

a) Programa aldarazten duten edo aurrera eramatea zailtzen duten inguruabarrak agertzen badira, helburuei, emaitzei, biztanleria onuradunari, edo lurralde-kokapenari dagokionez, edo desbideratze ekonomikoa diruz lagundu daitezkeen gastu guztien %5 edo handiagoa bada hasierako aurrekontuarekiko.

Proiekturako onartutako aurrekontuaren %5erainoko desbideratze ekonomikoa onartuko da, proiektuaren ezaugarriei eragin gabe.

b) Baliabideak egoki erabiltzearen ondorioz, diruz laguntzen den jarduerari aplikatu gabeko gerakinak daudenean, eta gerakin horiek erabili nahi direnean laguntza jasotzen duen programako jarduerak handitzeko.

Programa aldatzeko eskaeretan aldaketa edo zailtasun horren inguruko behar adina arrazoi eman beharko dira, eta inguruabar horiek gertatu eta berehala adierazi beharko dira, betiere diruz lagundutako programa egiteko epea bukatu baino lehen.

Dirulaguntza emateko kontuan hartutako baldintzetan edozer aldatuz gero, Pertsonen Autonomiarako eta Garapenerako Nafarroako Agentziak onartu ala ez, dirulaguntza emateko ebazpena aldatzen ahalko da, edo, hala badagokio, kasuan kasuko zenbatekoa itzultzeko eskatzen ahalko da.

19.–Itzulketak eta ez-betetzeak.

Hartutako zenbatekoa itzuli beharko da, osorik edo partez, baldin programa gauzatzen ez bada, betetzen ez badira dirulaguntza emateko ezarritako baldintzak, gertatzen badira Dirulaguntzei buruzko Foru Legearen 35. artikuluan aipatzen diren zergatikoak edo betetzen ez badira deialdi honetan berariaz aipatzen diren betebeharrak. Legez ezarritako kasuetan, gainera, bidezkoa izanen da berandutze-interesak ordaindu daitezela eskatzea; hain zuzen, dirulaguntza ordaindu zenetik itzuli beharraren gaineko ebazpena ematen den arte sortutakoak.

Dirua itzultzea eskatzeko prozedurak jarraituko dio aipatutako artikuluan xedatutakoari, eta ebatzi beharko da hasten denetik hamabi hilabeteko epean.

Dena dela, entitateak bere borondatez eskatzen ahalko du justifikatu gabeko dirulaguntzaren zenbatekoaren itzulketa. Horretarako, frogagiri bat aurkeztu beharko du erakusteko diru-sarrera bat egin dela Eskubide Sozialetako Departamentuaren alde, aldez aurretik ordaindutako zenbatekoaren eta justifikatutako zenbatekoaren arteko aldea adinakoa. Kasu horretan, ez da berandutze-interesik aplikatuko, eta ulertuko da entitateak espresuki uko egiten diola itzultzen duen zenbatekoari.

Orobat, entitate onuradunak ia betebehar guztiak betetzen dituenean eta bere eginbeharrak betetzeko jarrera garbia erakusten duenean, proportzionaltasun-printzipioari jarraituz zehaztuko da itzuli edo ordaindu beharreko zenbatekoa, ikusita zenbat eta noraino bete diren dirulaguntza emateko ezarritako baldintzak. Ez-betetzeak mailakatuko dira Dirulaguntzei buruzko azaroaren 9ko 11/2005 Foru Legearen 14.1.p) artikuluaren arabera.

Dagokion dokumentazioa ez bada aurkezten justifikazioa egiteko epeetan, partzialetan zein amaierakoan, baina bai aurkezten bada horien ondorengo 5 egunetan, honako hau izanen da atzerapenaren penalizazioa: emandako dirulaguntzaren zenbatekoa %5 murriztuko da. Atzerapeneko seigarren egunetik aurrera, %1 erantsiko da eguneko, 15 egunez gehienez ere. Hamaseigarren egunetik aurrera, galdu eginen da dirulaguntzaren zenbatekoa jasotzeko eskubidea.

20.–Arau-hausteak eta zehapenak.

Deialdi honetan ezarritako dirulaguntzen onuradun gertatzen diren entitateak Dirulaguntzei buruzko Foru Legearen 42. artikuluan eta hurrengoetan ezarritako zehapen araubidearen mende egonen dira, dirulaguntzen arloko arau-hauste administratiboei dagokienez, eta han ezarritako erantzukizunak izanen dituzte.

Dirulaguntzen arloko zehapenak erregelamendu bidez finkatzen den prozeduraren arabera ezarriko dira, edo, halakorik izan ezean, Nafarroako Foru Komunitateko Administrazioari eta foru-sektore publiko instituzionalari buruzko martxoaren 11ko 11/2019 Foru Legearen VI. tituluko III. kapituluan xedatutakoari jarraikiz.

21.–Deialdiaren eta oinarri arautzaileen aurka bidezkoak diren errekurtso administratiboak.

Deialdi honen eta haren oinarri arautzaileen kontra, bidezkoa da gora jotzeko errekurtsoa aurkeztea, Nafarroako Gobernuari zuzendua, argitaratu eta biharamunetik hilabeteko epean, bat etorriz Nafarroako Foru Komunitateko Administrazioari eta foru-sektore publiko instituzionalari buruzko martxoaren 11ko 11/2019 Foru Legean eta Administrazio Publikoen Administrazio Prozedura Erkideari buruzko urriaren 1eko 39/2015 Legean xedatutakoarekin.

22.–Aplikatzekoa den araudia.

Oinarri arautzaile hauetan ezarritakoaz gain, Dirulaguntzei buruzko azaroaren 9ko 11/2005 Foru Legearen xedapenak aplikatuko dira.

23.–Datuen babesa.

Proiektu hauek gauzatzeko datu pertsonalak lagatzea dela eta, hala badagokio, Datu Pertsonalak Babesteko eta Eskubide Digitalak Bermatzeko abenduaren 5eko 3/2018 Lege Organikoarekin bat eginen da lagatze hori, eta bi aldeek errespetatu beharko dute.

II. ERANSKINA.–BALORAZIO ETA PUNTUAZIO IRIZPIDEAK

1. irizpidea.–Balorazio teknikoa (10 puntu).

2. irizpidea.–Baloratu beharreko beste alderdi batzuk (40 puntu gehienez).

3. irizpidea.–Kofinantzaketa (20 puntu gehienez).

Programaren kofinantzaketaren ehunekoa formula honen bidez kalkulatuko da:

Iragarkiaren kodea: F2607170