1. NAFARROAKO FORU KOMUNITATEA
1.7. BESTELAKOAK
101E/2026 EBAZPENA, maiatzaren 13koa, Trantsizio Energetiko eta Digitaleko, Enpresa I+G+Bko eta Ekintzailetzako zuzendari nagusiak emana, onesten duena Nafarroako Merkataritza, Industria eta Zerbitzu Ganbera Ofizialari 2026an trantsizio energetikoa eta ekintzailetza susta ditzan egindako kudeaketa-esleipena formalizatzeko hitzarmena.
Industriako eta Enpresen Trantsizio Ekologiko eta Digitalerako Departamentuaren egitura organikoa ezartzen duen azaroaren 15eko 250/2023 Foru Dekretuaren III. kapituluan ezartzen da Trantsizio Energetiko eta Digitaleko, Enpresa I+G+Bko eta Ekintzailetzako Zuzendaritza Nagusiaren esparru materiala eta funtzionala. Trantsizio energetikoa eta ekintzailetza zuzendaritza nagusi horren kudeaketa esparruari dagozkion gaiak dira.
Kudeaketa-esleipen honen helburu orokorra da Nafarroako Gobernuari laguntza ematea trantsizio energetikoari bultzada ematen eta enpresen lehiakortasuna hobetzen. Horretarako gauzatuko diren jarduketek honakoak ahalbidetuko dituzte:
–Toki entitateetara hurbiltzea energia-efizientzia eta -aurrezpenaren arloan eskura dauden tresnak, bereziki energia-aurrezpenaren ziurtagiriak, eta jarraitzea tokiko energia komunitateen inguruan sentsibilizatzen eta haien garapenari laguntzen.
–Eredu horien inguruan ezagutza, konfiantza eta masa kritikoa sortzea udaletan.
–Energia-ekosistemako eragileen arteko elkarlana sustatzea.
Hazkunde, berrikuntza eta jasangarritasunerako potentziala duten enpresei laguntza egituratua ematea.
Horretarako, bi jarduera lerro ezartzen dira:
–1 b jarduera lerroa - energia-efizientziaren ziurtagiriak eta tokiko energia komunitateak.
–2. jarduera lerroa - "Impulsa Empresa".
Trantsizio energetikoarekin lotuta proposatu diren jarduerak 2030 Horizontea-Nafarroako Energia Planaren baitan kokatuta daude.
Ekintzailetzarekin lotuta proposatu diren jarduerak Nafarroako Ekintzailetza Planaren baitan kokatuta daude.
Nafarroako Merkataritza, Industria eta Zerbitzu Ganbera Ofizialak esperientzia du lehenagotik tokiko energia komunitateak sortzeko ekimenak sustatzen. Orain arte tokiko energia komunitateak abian jartzen aritu bada ere, egoki ikusten da ikuspegia beste fase batera bideratzea: hedapena, enpresen eta udalen gaikuntza, lurralde aktibazioa eta laguntza estrategikoa. Fase hori bat dator Nafarroako Gobernuak gaur egun dituen lehentasunekin eta enpresen eta toki entitateen premia berrietara egokituta dagoen ikuspegi batekin.
Nafarroako Merkataritza, Industria eta Zerbitzu Ganbera Ofizialari buruzko apirilaren 10eko 17/2015 Foru Legearen 7. artikuluak ahalmena ematen dio Nafarroako Foru Komunitateko Administrazioari Ganberari bere eskumeneko jarduera material edo tekniko batzuk edo zerbitzu batzuk esleitzeko, izan eraginkortasun-arrazoiengatik, izan ez duelako jarduera horiek egiteko baliabide tekniko egokirik. Nolanahi ere, esleipena egin aurretik Parlamentuari jakinarazi beharko zaio. Agindu horren arabera, kudeaketa-esleipena Nafarroako Aldizkari Ofizialean argitaratuko den hitzarmen baten bidez formalizatuko da.
Nafarroako Gobernuak ez du behar adina langile, arestian aipatutako jarduerak gauzatzeko gaitasun egokia dutenak, eta, Nafarroako Merkataritza, Industria eta Zerbitzu Ganbera Ofizialaren izaera juridikoa kontuan hartuta, bai eta esleiturik dituen eginkizun publiko-administratiboak ere, komenigarria da, eraginkortasuna eta baliabideen optimizazioa direla eta, Nafarroako Ganberari esleitzea jarduketa horien kudeaketa, apirilaren 10eko 17/2015 Foru Legearen 7. artikuluan xedatutakoaren babesean.
Jarduera horiek 2026. urtean eginen dira, eta 50.000 euroko gastua ekarriko dute gehienez.
Adierazitakoarekin bat, eta erabiliz Nafarroako Foru Komunitateko Administrazioari eta foru-sektore publiko instituzionalari buruzko martxoaren 11ko 11/2019 Foru Legearen 32. artikuluak ematen dizkidan eskudantziak,
EBAZTEN DUT:
1. Onestea Nafarroako Merkataritza, Industria eta Zerbitzu Ganbera Ofizialari 2026an trantsizio energetikoa eta ekintzailetza sustatzeko egiten zaion kudeaketa-esleipena formalizatzeko hitzarmena. Eranskinean ageri da.
2. 50.000 euroko gastua xedatzea hitzarmenaren ondoriozko konpromisoei aurre egiteko, 2026ko gastu-aurrekontuetako 820000 82000 2276 425207 partidaren kargura (Merkataritza Ganbera, trantsizio energetikoa eta ekintzailetza sustatzeko).
3. Ebazpen hau Nafarroako Merkataritza, Industria eta Zerbitzu Ganbera Ofizialari eta Trantsizio Energetikoaren Zerbitzuari igortzea, bai eta Lehendakaritza eta Berdintasun Departamentuari ere, Nafarroako Parlamentura bidal dezan.
4. Ebazpen hau eta erantsitako hitzarmena, behin bi alderdiek sinatu ondoren, Nafarroako Aldizkari Ofizialean argitaratzea.
Ebazpen honek ez du administrazio bidea amaitzen, eta haren aurka gora jotzeko errekurtsoa jartzen ahalko da, Industriako eta Enpresen Trantsizio Ekologiko eta Digitalerako Departamentuko kontseilariari zuzendua, argitaratu eta hurrengo egunetik hilabeteko epean.
Iruñean, 2026ko maiatzaren 13an.–Trantsizio Energetiko eta Digitaleko, Enpresa I+G+Bko eta Ekintzailetzako zuzendari nagusia, Garbiñe Basterra Olóriz.
HITZARMENA, TRANTSIZIO ENERGETIKO ETA DIGITALEKO,
ENPRESA I+G+B-KO ETA EKINTZAILETZAKO ZUZENDARITZA NAGUSIAK NAFARROAKO MERKATARITZA, INDUSTRIA ETA ZERBITZU GANBERA OFIZIALARI 2026AN TRANTSIZIO ENERGETIKOA ETA EKINTZAILETZA SUSTA DITZAN EGINDAKO KUDEAKETA-ESLEIPENA FORMALIZATZEN DUENA
Iruñean, azken sinadura digitalaren egunean.
BILDURIK:
Alde batetik, Garbiñe Basterra Olóriz andrea, Trantsizio Energetiko eta Digitaleko, Enpresa I+G+Bko eta Ekintzailetzako zuzendari nagusia, Nafarroako Foru Komunitateko Administrazioari eta foru-sektore publiko instituzionalari buruzko martxoaren 11ko 11/2019 Foru Legearen 32. artikuluak ematen dizkion eskudantziak erabiliz.
Eta, bestetik, Javier Taberna Jiménez jauna, Nafarroako Merkataritza, Industria eta Zerbitzu Ganbera Ofizialeko lehendakaria.
Bildutakoek, nork bere ordezkaritza erabiliz, eta adostasunez,
AZALTZEN DUTE:
I. Industriako eta Enpresen Trantsizio Ekologiko eta Digitalerako Departamentuaren egitura organikoa ezartzen duen azaroaren 15eko 250/2023 Foru Dekretuaren III. kapituluan ezartzen da Trantsizio Energetiko eta Digitaleko, Enpresa I+G+Bko eta Ekintzailetzako Zuzendaritza Nagusiaren esparru materiala eta funtzionala. Trantsizio energetikoa eta ekintzailetza zuzendaritza nagusi horren kudeaketa esparruari dagozkion gaiak dira.
II. Trantsizio Energetiko eta Digitaleko, Enpresa I+G+Bko eta Ekintzailetzako Zuzendaritza Nagusiak, bere eskumenak betez, zenbait jarduera sustatu nahi ditu trantsizio energetikoaren eta ekintzailetzaren arloan, honako hauek ahalbidetzeko:
–Toki entitateetara hurbiltzea energia-efizientzia eta -aurrezpenaren arloan eskura dauden tresnak, bereziki energia-aurrezpenaren ziurtagiriak, eta jarraitzea tokiko energia komunitateen inguruan sentsibilizatzen eta haien garapenari laguntzen.
–Eredu horien inguruan ezagutza, konfiantza eta masa kritikoa sortzea udaletan.
–Energia-ekosistemako eragileen arteko elkarlana sustatzea.
–Hazkunde, berrikuntza eta jasangarritasunerako potentziala duten enpresei laguntza egituratua ematea.
III. Nafarroako Merkataritza, Industria eta Zerbitzu Ganbera Ofiziala (aurrerantzean Nafarroako Ganbera) zuzenbide publikoko korporazio bat da, nortasun juridikoa duena, eta helburuak betetzeko jardute-gaitasun osokoa. Administrazio publikoen aholkularitza eta lankidetzarako organoa da, hura arautzen duen apirilaren 10eko 17/2015 Foru Legearen 2. artikuluaren arabera.
IV. 17/2015 Foru Legearen 7. artikuluak ahalmena ematen dio Nafarroako Foru Komunitateko Administrazioari Ganberari bere eskumeneko jarduera material edo tekniko batzuk edo zerbitzu batzuk esleitzeko, izan eraginkortasun-arrazoiengatik, izan ez duelako jarduera horiek egiteko baliabide tekniko egokirik. Nolanahi ere, esleipena egin aurretik Parlamentuari jakinarazi beharko zaio.
Manu horren arabera, kudeaketa-esleipen hori Nafarroako Aldizkari Ofizialean argitaratu beharreko hitzarmen baten bidez formalizatuko da. Honako hauek jasoko dira hitzarmen horretan: esleipenaren xedeko jarduerak, indarraldia, esleitutako kudeaketaren izaera eta hedadura, eta, hala badagokio, bi alderdiek jartzen dituzten bitarteko ekonomikoak.
V. Kasu honetan, nola eraginkortasunarekin hala Administrazioak baliabide tekniko egokirik ez izatearekin loturiko arrazoiak direla eta, Nafarroako Ganberari egiten zaio esleipena, honako hauek aintzat hartuta: Ganberak betetzen dituen funtzio publiko-administratiboak eta "TODA Energía" energia komunitatea (zeinean Nafarroako Foru Komunitateko 29 udalek hartzen baitute parte) eratzean bereganatu duen esperientzia. Aipatutako proiektu arrakastatsu hori eredugarria gertatu zaio hainbat Merkataritza Ganberari energia-komunitateak bultzatzeko.
Era berean, Nafarroako Ganberak Nafarroako Foru Komunitateko enpresei zerbitzu integrala ematen jardun du, batez ere enpresa txiki eta ertainei, haien hazkunde, nazioartekotze, eraldaketa digital eta jasangarritasuneko prozesuetan laguntzeko.
Azaldutakoarekin bat etorriz, alderdiek hitzarmen hau sinatzen dute, zeinaren bidez Nafarroako Ganberari egin beharreko esleipena formalizatzen baita. Hona hemen hitzarmenaren
KLAUSULAK
Lehena.–Xedea.
Hitzarmen honen xedea da Trantsizio Energetiko eta Digitaleko, Enpresa I+G+Bko eta Ekintzailetzako Zuzendaritza Nagusiak Nafarroako Merkataritza, Industria eta Zerbitzu Ganbera Ofizialari 2026an trantsizio energetikoa eta ekintzailetza susta ditzan egindako kudeaketa-esleipena formalizatzea.
Bigarrena.–Esleitutako jarduketak.
Jarduketa honen helburua da laguntzea deskribatutako helburuak erdiesten, jarduera lerro hauen bidez:
–1. jarduera lerroa: energia-efizientziaren ziurtagiriak eta tokiko energia komunitateak.
- Energia-efizientziaren ziurtagiriei buruzko eduki teknikoa lantzeko jardunaldia, Nafarroako Udal eta Kontzejuen Federazioarekin elkarlanean.
- Energia-efizientziaren ziurtagiriei buruzko banakako informazioa Nafarroako toki entitateetako udalentzat.
- Tokiko energia komunitateen arloko jardueren jarraipena.
–2. jarduera lerroa: "Impulsa empresa".
- Enpresaren diagnostiko integrala.
- Lortutako informazioaren azterketa eta hobetzeko aukeren detekzioa.
- Banakako ekintza plan baten diseinua, jarduketen lehenespena eta kronogramaren zehaztapena barne.
- Proiektuari esleitzea Ganberako gestore bat, enpresa bakoitzari lagun eginen diona prozesuan.
- Ibilbidearen jarraipena eta emaitzen azken ebaluazioa.
Hirugarrena.–Nafarroako Merkataritza, Industria eta Zerbitzu Ganbera Ofizialaren betebeharrak.
Nafarroako Merkataritza, Industria eta Zerbitzu Ganbera Ofizialak konpromiso hauek hartzen ditu:
a) Esleitutako jarduketak betetzea Trantsizio Energetiko eta Digitaleko, Enpresa I+G+Bko eta Ekintzailetzako Zuzendaritza Nagusiak horretarako emandako jarraibideekin bat.
b) Esleitutako jarduketak betetzeko beharrezkoak diren giza baliabideak eta baliabide materialak edukitzea.
c) Garatu beharreko ekintzak eta jarduerak zehaztea hasierako memoria batean, bai eta ekintza eta jarduera horiek behar bezala gauzatzeko eskura jarritako baliabide materialak eta giza baliabideak, lanen aurrekontua eta bete beharreko mugarrien kronograma ere.
d) Esleitutako lanak garatzeko sortzen diren agirietan jasotzea Nafarroako Foru Komunitateko Administrazioaren ekintzak direla, Nafarroako Ganberarekin elkarlanean gauzatuak, eta agiri horietan bi erakundeen logotipoak jartzea.
e) Egindako jarduketen justifikazioa aurkeztea, bosgarren klausulan ezartzen den moduan.
Laugarrena.–Trantsizio Energetiko eta Digitaleko, Enpresa I+G+Bko eta Ekintzailetzako Zuzendaritza Nagusiaren betebeharrak.
Trantsizio Energetiko eta Digitaleko, Enpresa I+G+Bko eta Ekintzailetzako Zuzendaritza Nagusiak konpromiso hauek hartzen ditu:
a) Esleitzen diren jarduketak egiteko behar den laguntza teknikoa ematea.
b) Esleipena gauzatzeko beharrezkoa den informazio guztia Nafarroako Ganberaren esku jartzea.
c) Bigarren klausulan adierazten diren jarduketak egiteko 50.000 euro ordaintzea, gehienez, Nafarroako Ganberari.
Bosgarrena.–Egindako jarduketen justifikazioa eta ordainketa.
1. Nafarroako Ganberak, jarduketak egin ondotik, egindako jarduera justifikatzen duen dokumentazio tekniko eta ekonomikoa aurkeztu beharko du, telematikoki, 2026ko abenduaren 2a baino lehen.
Hona hemen aurkeztu beharreko agiriak:
–Garatu diren eta 2. oinarrian deskribatzen diren jarduketen memoria-txostena.
–Egindako jardunaldiak justifikatzen duten agiriak.
–"Impulsa" zerbitzuan enpresei emandako laguntza justifikatzen duten agiriak.
Aurkezten den dokumentazio ekonomikoak egindako gastuak egiaztatuko ditu. Horretarako, honako hauek aurkeztu beharko dira:
–Gastuen eta ordainketen ziurtagiria, Nafarroako Merkataritza, Industria eta Zerbitzu Ganbera Ofizialaren arduradun ekonomikoak sinatua, non agertuko baitira egotzitako gastuaren eta egindako ordainketen datuak, Trantsizio Energetiko eta Digitaleko, Enpresa I+G+Bko eta Ekintzailetzako Zuzendaritza Nagusiak konprometitutako gehieneko mugaraino, baita haien egiaztagiriak ere.
Gastuen artean ezin da zeharkako zergarik sartu, berreskuratu edo konpentsatzeko modukoak badira, ez eta errentaren gaineko zerga pertsonalak ere.
–Langileria-gastuak honako agiri hauek aurkeztuz justifikatuko dira:
- Langileen nominak.
- Gizarte Segurantzako kotizazioaren TC1 eta TC2 agiriak, aldi berari dagozkionak.
- Garatutako zereginetan esku hartu duten langileen ordu-egozpena zehazten duen agiria.
–Aurreikusitako jarduketak garatzeko Nafarroako Ganberak kontratatutako kanpoko kolaborazioen eta laguntzen fakturak eta ordainagiriak. Ordainketa-agiriek sektoreko araudi aplikagarrian aurreikusitako ordainketa-epeak bete beharko dituzte, edo, halakorik ezean, Merkataritzako eragiketetako berankortasunaren aurka borrokatzeko neurriak ezartzen dituen abenduaren 29ko 3/2004 Legean aurreikusitakoak.
–Zeharkako gastuen portzentajea, hau da, langile gastuen %10, justifikatuko da itxitako azken ekitaldiko kostu errealen arabera, oro har onartutako kontabilitateko printzipio eta arauekin bat.
2. Esleitutako lanak bi zatitan ordainduko dira. Lehen ordainketa, %50ekoa, alderdiek hitzarmena sinatzean eginen da, eta, gainerako zenbatekoa, agindutako lana amaitu ondotik. Aldez aurretik, egin beharreko jarduketa justifikatzen duen dokumentazio teknikoa eta ekonomikoa aurkeztu beharko da.
Seigarrena.–Jarraipen batzordea.
Esleipen hau egoki gauzatzen dela begiratzeko, jarraipen batzorde bat eratzen da. Batzorde horretako burua Trantsizio Energetiko eta Digitaleko, Enpresa I+G+Bko eta Ekintzailetzako Zuzendaritza Nagusi izanen da, edo hark eskuordetzen duena, eta bi batzordekide hauek ere izanen ditu: bata, zuzendaritza nagusi horrek izendatua, eta, bestea, Nafarroako Merkataritza, Industria eta Zerbitzu Ganbera Ofizialak izendatua.
Zazpigarrena.–Auziak ebaztea.
Alderdien artean sortzen diren auzien gainean jarraipen batzordean adostasunik lortzen ez bada, Industriako eta Enpresen Trantsizio Ekologiko eta Digitalerako kontseilariak ebatziko ditu, eta, hala badagokio, administrazioarekiko auzien gaineko jurisdikzio-ordenari jakinaraziko zaizkio.
Zortzigarrena.–Esleipenaren indarraldia.
Kudeaketa-esleipen honek hitzarmen hau sinatzearekin batera hartuko du indarra, eta 2026ko abenduaren 2ra arte egonen da indarrean.
Esleitzen diren jarduerak nola garatzen diren, epe hori luzatzen ahalko da, bi alderdiek berariaz hala erabakita.
Eta ados daudela adierazteko, alderdiek elektronikoki sinatzen dute hitzarmen hau, azken sinaduraren eguna dela benetako sinadura data.
Iragarkiaren kodea: F2607040
