Iragarkia

108. ALDIZKARIA - 2026ko ekainaren 4a

1. NAFARROAKO FORU KOMUNITATEA

1.4. DIRU-LAGUNTZAK, LAGUNTZAK ETA BEKAK

1191/2026 EBAZPENA, maiatzaren 27koa, Nafarroako Unibertsitate Publikoko ikerketako errektoreordeak emana, zeinaren bidez onesten baita Nafarroako Unibertsitate Publikoko Lan Arriskuen Prebentzioaren Katedrak deitutako Lan Arriskuen Prebentzioko Ikerketa Sarien I. edizioaren deialdia.

Nafarroako Unibertsitate Publikoak (NUP) Nafarroako Gobernuko Ekonomia Sozialeko eta Laneko Zuzendaritza Nagusiarekin, Nafarroako Osasun Publikoaren eta Lan Osasunaren Institutuarekin (NOPLOI), Foru Komunitateko CCOO eta UGT sindikatuekin, Nafarroako Enpresarien Konfederazioarekin (CEN) eta Ekonomia Sozialeko Nafarroako Enpresen Elkartearekin (ANEL) izandako elkarlanaren emaitza da Nafarroako Unibertsitate Publikoko (NUP) Lan Arriskuen Prebentzioaren Katedra, eta helburu nagusia du laneko segurtasunari eta osasunari lotutako arloetan ezagutza teorikoa eta praktikoa sortzen eta zabaltzen laguntzea, gure gizartearen garapenerako eta ongizaterako funtsezko elementu gisa; horrela, gai horri buruzko azterlanak, ikerketak eta jarduerak sustatzen, garatzen, babesten eta bultzatzen lagunduko duten jarduerak garatzen ditu.

Horiek horrela, Nafarroako Unibertsitate Publikoko Lan Arriskuen Prebentzioaren Katedraren Jarraipen Batzorde Mistoak, 2026ko jarduera-programaren barnean, Lan Arriskuen Prebentzioko Ikerketa Sarien deialdia onestea erabaki zuen, laneko segurtasunaren eta osasunaren arloan Nafarroan egindako lanak saritzeko. Sariak hiru kategoriatan emanen dira: batetik, 2025-2026 ikasturtean Nafarroako unibertsitateetako batean defendatutako ikasketa amaierako lan hoberenak, edo Nafarroan erroldatuak dauden eta bizitokia Nafarroan duten ikasleek beste unibertsitate batean defendatutakoak (graduetakoak zein masterretakoak); bestetik, 2025ean eta 2026an egindako ikerketa-proiektu hoberena; eta azkenik, 2025ean eta 2026an egindako artikulu berritzaileena.

Ikusirik Nafarroako Unibertsitate Publikoko Lan Arriskuen Prebentzioaren Katedrak egindako akta eta proposamena.

Ikusirik Unibertsitateko Zerbitzu Juridikoak egin duen txostena.

Ikusirik Kontabilitate Atalak egindako kreditu-erreserbaren ziurtagiria eta zerga-tratamenduari buruzko txostena.

Kontuak ikuskaturik eta aldeko fiskalizazioa eginik.

Nafarroako Unibertsitate Publikoko errektoreak errektoretza-taldearen egitura orokorra onetsi eta haren funtzioak zehazteko 2023ko ekainaren 20an eman zuen 1306/2023 Ebazpenaren bidez eskuordetu dizkidan eskumenak erabiliz,

EBAZTEN DUT:

Lehenbizikoa.–Onestea Nafarroako Unibertsitate Publikoko Lan Arriskuen Prebentzioaren Katedrak deitutako Lan Arriskuen Prebentzioko Ikerketa Sarien I. edizioaren deialdia, bat etorriz ebazpen honen eranskinean dauden oinarriekin.

Bigarrena.–Baimena ematea deialdi honek sortutako gastua egiteko. Gastua, 3.000 euro-koa gehienez, sarietarako izanen da, eta Nafarroako Unibertsitate Publikoko Lan Arriskuen Prebentzioaren Katedraren aurrekontuaren bidez finantzatuko da.

Sorturiko gastua Nafarroako Unibertsitate Publikoak 2026ko ekitaldirako duen Gastuen Aurrekontuetako partida honen kargura ordainduko da:

30.30.00.689A 480.25 Katedren Sariak 3.000,00 euro (EX2026/0001017).

Hirugarrena.–Honako sari hauek emanen dira:

–Ikasketa Amaierako Lan hoberenentzako sariak: 400 euroko sari bat GAL hoberenarentzat; 400 euroko sari bat MAL hoberenarentzat; eta 100 euroko bi accesit.

–Ikerketa-proiektu hoberenarentzako saria: 600 euroko sari bat proiektu hoberenarentzat eta 400 euroko accesit bat.

–Argitalpen hoberenarentzako saria: 600 euroko sari bat argitalpen hoberenarentzat eta 400 euroko accesit bat.

Laugarrena.–Ebazpen hau aditzera ematea Nafarroako Unibertsitate Publikoko Lan Arriskuen Prebentzioaren Katedrari, Kontabilitate Atalari, Ikerketa Zerbitzuari eta Barne Kontrolerako Zerbitzuari.

Bosgarrena.–Ebazpen hau Nafarroako Aldizkari Ofizialean eta Nafarroako Unibertsitate Publikoaren iragarki ohol elektronikoan argitara dadila agintzea.

Seigarrena.–Ebazpen honek administrazio bidea agortzen du, 2023ko martxoaren 22ko 2/2023 Unibertsitate Sistemari buruzko Lege Organikoaren 38.4 artikuluak xedatzen duenaren arabera, eta haren kontra zilegi da aukerako berraztertzeko errekurtsoa jartzea, errektoreari zuzendua, edo, bestela, zuzenean administrazioarekiko auzi-errekurtsoa, Iruñeko Auzialdiko Auzitegiko maila bereko atalari zuzendua, hilabeteko epean lehenbiziko kasuan, eta bi hilabeteko epean bigarrenean, biak ere ebazpena argitaratu eta biharamunetik kontatzen hasita.

2026ko maiatzaren 27an.–Martín Larraza Quintana, Ikerketako errektoreordea.

I. ERANSKINA.–LAN ARRISKUEN PREBENTZIOKO IKERKETA SARIEN
I. EDIZIOA. OINARRIAK

"NAFARROAKO UNIBERTSITATE PUBLIKOKO LAN ARRISKUEN PREBENTZIOAREN KATEDRA"

Nafarroako Unibertsitate Publikoak, Lan Arriskuen Prebentzioaren Katedra osatzen duten erakundeekin batera, hau da, Nafarroako Gobernuko Ekonomia Sozialeko eta Laneko Zuzendaritza Nagusiarekin, Nafarroako Osasun Publikoaren eta Lan Osasunaren Institutuarekin (NOPLOI), Foru Komunitateko CCOO eta UGT sindikatuekin, Nafarroako Enpresarien Konfederazioarekin (CEN) eta Ekonomia Sozialeko Nafarroako Enpresen Elkartearekin (ANEL) batera, beharrezkotzat jotzen dute arlo horretan ezagutza sortzea unibertsitateko ikasleei zuzendutako prestakuntza- eta ikerketa-jardueren bidez.

Hori horrela, Lan Arriskuen Prebentzioko Ikerketa Sarien deialdia egin du Katedrak, eta, zehazki, hiru kategoria hauetan emanen ditu sariak: batetik, 2025-2026 ikasturtean Nafarroako unibertsitateetako batean defendatutako ikasketa amaierako lan hoberenak edo Nafarroan erroldatuak dauden eta bizitokia Nafarroan duten ikasleek beste unibertsitate batean defendatutakoak (graduetakoak zein masterretakoak); bestetik, 2025ean eta 2026an egindako ikerketa-proiektu hoberena; eta azkenik, 2025ean eta 2026an egindako artikulu berritzaileena.

1.–Deialdiaren xedea.

Deialdi honen xedea da zenbait sari ematea, publizitate, objektibotasun eta lehiakortasun printzipioen arabera, honako hauei: Nafarroako Unibertsitate Publikoan 2025-2026 ikasturtean aurkeztutako eta gainditutako ikerketa-lan hoberenei, hain zuzen ere ikasketa amaierako lana arlo horri buruz egin zuten Nafarroako Unibertsitate Publikoko ikasleek egindakoei, bai eta arlo horretako ikerketa-proiektu hoberenari eta artikulu berritzaileenari ere.

2.–Finantzaketa.

Deialdi honek 3.000,00 euroko aurrekontua du osotara, eta Nafarroako Unibertsitate Publikoaren 2026ko gastuen aurrekontuko 30.30.00.689A 480.25 (EX2026/0001017) aurrekontu-partidaren kargura ordainduko dira.

Nafarroako Unibertsitate Publikoko Lan Arriskuen Prebentzioaren Katedrak jarriko du diru kopuru hori.

3.–Deialdiko sariak.

Honako sari hauek emanen dira:

–Ikasketa Amaierako Lan hoberenentzako sariak: 400 euroko sari bat GAL hoberenarentzat; 400 euroko sari bat MAL hoberenarentzat; eta 100 euroko bi accesit.

–Ikerketa-proiektu hoberenarentzako saria: 600 euroko sari bat proiektu hoberenarentzat eta 400 euroko accesit bat.

–Argitalpen hoberenarentzako saria: 600 euroko sari bat argitaratua izan den artikulu hoberenarentzat eta 400 euroko accesit bat.

4.–Hautagai izateko baldintzak.

4.1. Ikasketa amaierako lan hoberenentzako sariak.

Ikasketa amaierako lan hoberenentzako kategorian, gradu amaierako lana (GAL) eta master amaierako lana (MAL) laneko segurtasunaren eta osasunaren arloan egin eta 2025-2026 ikasturtean Nafarroako unibertsitateetako batean defendatu dutenek hartzen ahalko dute parte. Ikasketa amaierako lana Nafarroatik kanpoko unibertsitate batean aurkeztu eta defendatu dutenek ere hartzen ahalko dute parte baldin eta 2025eko urtarrilaren 1etik aurrera Nafarroan erroldatuak badaude eta bizitokia Nafarroan badute, eta hala jarraitzen badute eskaera aurkezteko unean.

Unibertsitateko ikasketen amaierako saria jaso nahi duten lanek baldintza hauek bete beharko dituzte:

a) Lanaren edukia laneko segurtasunaren eta osasunaren arloari buruzkoa izatea.

b) Gradu amaierako lan bati (GAL) edo master amaierako lan bati (MAL) eskatzen zaizkion baldintza guztiak betetzea, eta dagokion fakultatearen edo ikastegiaren ebaluazioa gainditua izatea.

c) Lanaren puntuazioa gutxienez 8koa izatea 10etik.

d) Lana 2025-2026 ikasturtean aurkeztu eta defendatu izana.

e) GALen eta MALen sarien beste deialdi batean saririk jaso ez izana.

4.2. Ikerketa-proiektu hoberenarentzako eta argitalpen hoberenarentzako sariak.

Prebentzioaren arloan egindako ikerketa-proiektuen edo artikulu berritzaileen kategorietan, SINAIko eragileek hartzen ahalko dute parte, baldin eta egoitza Nafarroan duten zentro hauetakoren batean akreditatuak badaude deialdia Nafarroako Aldizkari Ofizialean argitaratzen denean: unibertsitatea, ikerketa-zentroa, zentro teknologikoa, I+G+Bko enpresa-unitatea, osasun ikerketako institutua edo entitate berezia.

Nafarroako I+G+B Sistemako (SINAI) eragileek egindako ikerketa-proiektu edo artikulu berritzaileen kategorietan sarituak izateko, baldintza hauek bete beharko dira:

a) Lanaren edukia laneko segurtasunaren eta osasunaren arloari buruzkoa izatea.

b) Ikerketa-proiektuen kasuan, 2025ean edo 2026an amaituak izatea eta Nafarroako laneko segurtasunaren eta osasunaren arloko ikerketa-sarien aurreko deialdiren batean aurkeztu ez izana.

c) Artikulu zientifikoen kasuan, 2025ean edo 2026an argitaratuak izatea eta Nafarroako laneko segurtasunaren arloko ikerketa-sarien aurreko deialdiren batean aurkeztu ez izana.

Deialdi honetan parte hartzeak berekin dakar oinarri hauek onartzea eta epaimahaiak hartzen dituen erabakiak betetzea.

5.–Hautagaitzak aurkezteko modua.

Deialdian parte hartu nahi dutenek Nafarroako Unibertsitate Publikoaren Erregistro Elektronikoan aurkeztu beharko dute eskaera; Unibertsitatearen egoitza elektronikoaren bidez sartzen da horra.

1. Ikasketa amaierako lanen kategoriako sarirako hautagaitza aurkezteko, honako agiri hauek aurkeztu behar dira:

a. Lanaren ildo nagusien laburpena.

b. Azalpen labur bat, aditzera ematen duena lanak saria zergatik merezi duen eta zer ekarpen egiten dien deialdiko esparruei.

c. GALaren edo MALaren kopia.

d. Lortutako kalifikazioaren egiaztagiria (espediente akademikoa).

e. Erantzukizunpeko adierazpena, aditzera ematen duena, batetik, aurkeztutako lana bat datorrela dagokion unibertsitateak ebaluatu zuenarekin, eta bestetik, beste lehiaketa batzuetan saririk jaso ez duela.

f. Lana Nafarroan ez dagoen unibertsitate batean aurkeztu eta defendatu bada, erroldaren eta bizikidetzaren ziurtagiria ere aurkeztuko da, dagokion udalak emana.

Dokumentu horiez gain, aurkeztutako lana dibulgatzeko bideo bat ere aurkeztu beharko da. Bideoa hiru minutukoa izanen da, eta gaztelaniaz eta formatu horizontalean grabatu beharko da; hartan, IALa hizkera errazean eta jende guztiarentzat irisgarria den moduan aurkeztuko da. Bideoak MP4 formatuan bidali beharko dira, RedIRISen "File Sender" bidez. Horretarako, parte hartzeko eskaera jaso ondoren, NUPek eskatzaileari gonbidapen bat bidaliko dio eskaeran adierazi duen helbide elektronikora, baita bideoa bidaltzeko jarraibideak ere.

2. Prebentzioaren arloan egindako ikerketa-proiektu edo artikulu berritzaileenaren sarirako hautagaitza aurkezteko, honako agiri hauek aurkeztu behar dira:

a. Lanaren ildo nagusien laburpena.

b. Azalpen labur bat, aditzera ematen duena lanak saria zergatik merezi duen eta zer ekarpen egiten dien deialdiko esparruei.

c. Ikerketa-proiektuaren edo artikuluaren kopia.

d. Erantzukizunpeko adierazpena, non adieraziko baita aurkeztutako lana ez dela saritu beste lehiaketaren batean.

Dokumentu horiez gain, aurkeztutako proiektua edo artikulua dibulgatzeko bideo bat ere aurkeztu beharko da. Bidea hiru minutukoa izanen da, eta gaztelaniaz eta formatu horizontalean grabatu beharko da; hartan, proiektua edo artikulua hizkera errazean eta jende guztiarentzat irisgarria den moduan aurkeztuko da. Bideoak MP4 formatuan bidali beharko dira, RedIRISen "File Sender" bidez. Horretarako, parte hartzeko eskaera jaso ondoren, NUPek eskatzaileari gonbidapen bat bidaliko dio eskaeran adierazi duen posta elektronikora. Haren bidez, zenbait jarraibide adieraziko dira bideoa bidaltzeko.

Hautagaitzak aurkezteko epea deialdia Nafarroako Aldizkari Ofizialean argitaratu eta biharamunetik hasi eta 2026ko urriaren 15ean bukatuko da.

Sarietara aurkezteak deialdiaren oinarriak onartzea dakar berekin.

6.–Saridunen betebeharrak.

1. Saridunek nahi bezala erabiliko dute jasotako diru kopurua, eta ordainketa Nafarroako Unibertsitate Publikoko Lan Arriskuen Prebentzioaren Katedrak antolatuko duen ekitaldi publiko baten ondoren eginen da.

2. Halako sariak ondare irabazpentzat hartzen dira Nafarroan, eta ez dute atxikipenik, ez baitira lehiaketa, joko edo zozketetan parte hartzearen ondoriozko sariak.

3. Saridunek konpromisoa hartzen dute sariak emateko ekitaldian parte hartzeko, baita Lan Arriskuen Prebentzioaren Katedran deialdi honekin lotuta programatzen diren dibulgazio ekitaldietan ere. Parte-hartzaileek konpromisoa hartzen dute bideoa erabiltzeko eskubideak Katedrari lagatzeko, eta baimena ematen diote lan arriskuen prebentzioa sustatzeko helburuarekin hura erreproduzitzeko eta zabaltzeko.

4. Deialdiaren oinarriak bete ezean, edo datuak ezkutatu, aldatu edo haietan iruzur egiten bada, zilegi izanen da saria kentzea. Hala gertatzen denean, dirua itzuli beharko du interesdunak. Dagokion espedientea izapidetu ondoren, Nafarroako Unibertsitate Publikoko Ikerketako errektoreordeak dirua itzultzeko ebazpen bat emanen du, dirua itzultzeko baldintzak eta epeak adierazita. Ebazpen horrek administrazio bidea agortzen du, eta zilegi da haren kontra aukerako berraztertzeko errekurtsoa jartzea, edo, bestela, zuzenean administrazioarekiko auzi-errekurtsoa, Iruñeko Auzialdiko Auzitegiko maila bereko atalari zuzendua, hilabeteko epean lehenbiziko kasuan, eta bi hilabeteko epean bigarrenean, biak ere jakinarazpenaren biharamunetik kontatzen hasita.

7.–Sariaren epaimahaia.

Honako lau kide hauek osatutako epaimahaiak emanen ditu sariak:

–Jarraipen Batzorde Mistoaren burua, edo hark eskuordetzen duen pertsona.

–Katedraren zuzendaria, Nafarroako Unibertsitate Publikoko irakasle dena, edo hark eskuordetutako pertsona.

–Batzorde Mistoko bi kide, edo haiek eskuordetutako pertsonak.

Nafarroako Unibertsitate Publikoko Lan Arriskuen Prebentzioaren Katedraren zuzendariak eskatuta eratuko da epaimahaia, eta, horretarako, epaimahaikideei dei eginen die. Halaber, Katedrak behar diren kudeaketa-lanak eginen ditu epaimahaiaren jarduna errazteko.

8.–Sariaren esleipena.

1.–Nafarroako Unibertsitate Publikoko Lan Arriskuen Prebentzioaren Katedrak deitutako Lan Arriskuen Prebentzioko Ikerketa Sariak (I. edizioa) esleitzeko prozesuan, epaimahaiak alderdi hauek hartuko ditu kontuan:

1) Lanaren kalitate zientifikoa eta teknikoa. 40 puntu gehienez ere.

Alderdi hauek baloratuko dira:

1.1. Helburuak eta metodologia. Helburuen definizioaren argitasuna eta zehaztasuna baloratuko dira, bai eta helburu horiek lortzeko proposatutako metodologiaren egokitasuna ere. 15 puntu gehienez ere.

1.2. Zorroztasuna iturriak erabiltzean. Iturri bibliografiko eta dokumentalen zabaltasuna eta egokitasuna eta datuen tratamendu egokia baloratuko dira. 15 puntu gehienez ere.

1.3. Estiloaren zuzentasuna. Adierazpenaren argitasuna, idazkera eta lanaren aurkezpena baloratuko dira. 10 puntu gehienez ere.

2) Aztergaiak laneko segurtasunaren eta osasunaren arloan ikertzeko duen garrantzia. 60 puntu gehienez ere.

Alderdi hauek baloratuko dira:

2.1. Landutako gaiaren originaltasuna: edukiaren berritasuna eta ikuspegia baloratuko dira laneko segurtasunaren eta osasunaren arloko ikerketan aurrera egiteari dagokionez. 20 puntu gehienez ere.

2.2. Aplikazio eremua: gaiak laneko segurtasunaren eta osasunaren arloko ikerketan nolako irismena duen baloratuko da. 20 puntu gehienez ere.

2.2.–Inplikazio praktikoak: baloratuko da lanak zer ekarpen egiten dion laneko segurtasunaren eta osasunaren baldintzak hobetzeko ikerketari, bai eta prebentzioan inplikatutako eragile eta enpresek kontuan har ditzaketen zer proposamen egiten dituen ere. 20 puntu gehienez ere.

2.–Epaimahaiak sariak emateko proposamena eginen du, txosten arrazoitu batean oinarrituta.

3.–Epaimahaiak Unibertsitateko Ikerketako errektoreordeari bidaliko dio sariak emateko proposamena. Errektoreordeak dagokion ebazpena emanen du Nafarroako Unibertsitate Publikoko Lan Arriskuen Prebentzioaren Katedrak deitutako Lan Arriskuen Prebentzioko Ikerketa Sariak emateko. Ebazpen horretan, saritutako hautagaien izena besterik ez da agertuko, eta gainerako hautagaitzak atzera bota direla ulertuko da.

4.–Saria eman gabe utz daiteke epaimahaiaren iritziaren arabera, edo hautagairik ez dagoelako.

5.–Zilegi du, halaber, sariak ex aequo ematea, epaimahaiari hala egitea egokia iruditzen bazaio.

6.–Ekitaldi publikoa eginen da saria emateko.

7.–Sariak emateko ebazpena Nafarroako Unibertsitate Publikoaren iragarki ohol elektronikoan eta Nafarroako Unibertsitate Publikoko Lan Arriskuen Prebentzioaren Katedraren webgunean argitaratuko da, sariak banatzeko ekitaldi publikoaren aurretik. Ebazpen horrek administrazio bidea agortzen du, eta zilegi da haren kontra aukerako berraztertzeko errekurtsoa jartzea, edo, bestela, zuzenean administrazioarekiko auzi-errekurtsoa, Iruñeko Auzialdiko Auzitegiko maila bereko atalari zuzendua, hilabeteko epean lehenbiziko kasuan, eta bi hilabeteko epean bigarrenean, biak ere argitalpenaren biharamunetik kontatzen hasita.

9.–Eskubideen lagapena.

Deialdi honetan parte hartzeak aurkeztutako lanari buruzko dibulgazio bideoak edozein formatutan editatzeko eta zabaltzeko eskubidea lagatzea dakarkie saridunei. Nolanahi ere, saridunek Nafarroako Unibertsitate Publikoari bideoa zabaldu, argitaratu eta erabiltzeko eskubideak laga arren, Unibertsitateak egileen eskubide moralak errespetatuko ditu, eta egilearen izena aipatuko du. Horretarako, deialdi honetan parte hartzeko eskaera egiteko inprimakian, jasota agertuko da parte-hartzaileek baimena ematen dutela aurkeztutako lanari buruzko dibulgazio bideoak edozein formatutan editatzeko eta zabaltzeko.

Enpresaren edo erakunderen batekin konfidentzialtasun hitzarmen edo betebehar bat sinatua eta indarrean daukaten ikasketa amaierako lanek, bai GALek eta bai MALek, akordio horretan ezarritakoa bete beharko dute. Nolanahi ere, hautagaien ardura izanen da beren eskaeretan eta defentsetan datu edo informazio konfidentzialik ez zabaltzea.

10.–Datuen babesa.

Parte-hartzaileek deialdi honetan ematen dituzten datu pertsonalak arau hauen arabera tratatuko dira: Europako Parlamentuaren eta Kontseiluaren 2016/679 Erregelamendua, 2016ko apirilaren 27koa; Datuak Babesteko Erregelamendu Orokorra; eta 3/2018 Lege Organikoa, 2018ko abenduaren 5ekoa, Datu Pertsonalak Babesteari eta Eskubide Digitalak Bermatzeari buruzkoa.

Datuen tratamendu horren helburua da ezagutza sortzea laneko arriskuen prebentzioaren arloan, eta, horretarako, arlo horretan eragina duten NUPeko ikerketa-lanen sariak deitu dira. Hortaz, tratamenduaren oinarri juridikoa botere publikoa baliatzea eta interes publikoaren misioa betetzea da, DBEOren 6.1.e) artikuluaren arabera.

Datuen tratamenduaren arduraduna Nafarroako Unibertsitate Publikoa da. Interesdunek eskubidea dute datuak eskuratzeko, zuzentzeko, ezabatzeko, bai eta beste eskubide batzuk erabiltzeko ere, delegado.protecciondatos@unavarra.es helbidera idatziz, Datu Pertsonalak Babesteari eta Eskubide Digitalak Bermatzeari buruzko Lege Organikoko 11. artikulutik 18. artikulura bitartean ezarritakoaren arabera.

NUPek datu hauek tratatuko ditu: hautagaien identifikazio-datuak, harremanetan jartzekoak, sinadura eta ikerketa-lanak, bai eta grabatu beharreko bideoko ahotsa, irudia eta bestelako edukiak ere.

Horretaz gainera, zer hautagaitza proposatu diren eta saria nork irabazi duen argitaratuko da. Halaber, bankuko datuak ere tratatuko dira saridunei ordainketak egiteko.

11.–Argitaratzea eta zabaltzea.

Deialdi honetako oinarriak Nafarroako Aldizkari Ofizialean, Nafarroako Unibertsitate Publikoaren iragarki ohol elektronikoan eta Nafarroako Unibertsitate Publikoaren Katedraren webgunean argitaratuko dira. Halaber, Nafarroako Unibertsitate Publikoko Lan Arriskuen Prebentzioaren Katedra arduratuko da oinarriak zabaltzeaz.

Bitarteko horiek izanen dira Nafarroako Unibertsitate Publikoko Lan Arriskuen Prebentzioaren Katedrak onartutako publizitate tresna bakarra; nolanahi ere, baliteke interesdunei posta elektronikoaren bidez jakinarazpen bat bidaltzea modu osagarri eta ez-ofizialean.

12.–Errekurtsoak.

Ebazpen honek administrazio bidea agortzen du, Unibertsitate Sistemari buruzko 2023ko martxoaren 22ko Lege Organikoaren 38.4 artikuluak xedatzen duenaren arabera, eta haren kontra zilegi da aukerako berraztertzeko errekurtsoa jartzea, errektoreari zuzendua, edo, bestela, zuzenean administrazioarekiko auzi-errekurtsoa, Iruñeko Auzialdiko Auzitegiko maila bereko atalari zuzendua, hilabeteko epean lehenbiziko kasuan, eta bi hilabeteko epean bigarrenean, biak ere ebazpena Nafarroako Aldizkari Ofizialean argitaratu eta biharamunetik kontatzen hasita.

Iragarkiaren kodea: F2607867