Iragarkia

106. ALDIZKARIA - 2026ko ekainaren 2a

1. NAFARROAKO FORU KOMUNITATEA

1.5. ESTATUTUAK ETA LAN HITZARMEN KOLEKTIBOAK

94C/2026 EBAZPENA, maiatzaren 14koa, Ekonomia Sozialeko eta Laneko zuzendari nagusiak emana, zeinaren bidez erabakitzen baita Nafarroako ardogintzaren industrien sektoreko hitzarmen kolektiboko soldatak 2024-2025 urteetarako berrikusteari buruzko akordioa erregistratzea, gordailutzea eta Nafarroako Aldizkari Ofizialean argitaratzea.

Aztertu da Nafarroako ardogintzaren industrien sektoreko hitzarmen kolektiboko soldatak 2024-2025 urteetarako berrikusteari buruzko akordioa (hitzarmenaren kode zenbakia: 31007605011981), erregistro honetan 2026ko apirilaren 27an sartu dena, enpresaren eta sindikatuen ordezkariek 2026ko martxoaren 17an sinatu ondoren.

Bat etorriz Langileen Estatutuaren Legearen testu bategina onesten duen urriaren 23ko 2/2015 Legegintzako Errege Dekretuaren 90. artikuluaren 2. eta 3. apartatuetan eta Hitzarmen kolektiboak, lan akordio kolektiboak eta berdintasun planak erregistratu eta gordailutzeari buruzko maiatzaren 28ko 713/2010 Errege Dekretuan ezarritakoarekin.

Nafarroako Foru Komunitateko Administrazioari eta foru-sektore publiko instituzionalari buruzko martxoaren 11ko 11/2019 Foru Legearen 32. artikuluak ematen dizkidan eskudantziak erabiliz, eta kontuan hartuta zer xedatzen den Eskubide Sozialetako, Ekonomia Sozialeko eta Enpleguko Departamentuaren egitura organikoa ezartzen duen azaroaren 15eko 251/2023 Foru Dekretuan,

EBAZTEN DUT:

Lehenbizikoa.–Nafarroako Hitzarmen Kolektiboen, Lan Akordio Kolektiboen eta Berdintasun Planen Erregistroan inskribatzeko agintzea.

Bigarrena.–Nafarroako Aldizkari Ofizialean argitaratzeko agintzea, orok jakin dezan.

Hirugarrena.–Ebazpen hau eskatzaileari jakinaraztea, eta ohartaraztea ez duela administrazio bidea amaitzen eta haren aurka gora jotzeko errekurtsoa jartzen ahal dela Eskubide Sozialetako, Ekonomia Sozialeko eta Enpleguko kontseilariari zuzendua, hilabeteko epean, ebazpena jakinarazi eta hurrengo egunetik aurrera.

Iruñean, 2026ko maiatzaren 14an.–Ekonomia Sozialeko eta Laneko zuzendari nagusia, Iñaki Mendióroz Casallo.

NAFARROAKO ARDOGINTZAREN INDUSTRIAREN HITZARMEN KOLEKTIBOKO BATZORDE PAREKIDEAREN BILERAREN AKTA

Iruñean, 2026ko martxoaren 17ko 16:30ean, deialdia egin ondoren, bildu da Nafarroako ardo, alkohol, likore eta sagardo industriarako 2024-2025 urteetarako probintziako lan-hitzarmen kolektiboaren batzorde paritarioa, honako hau aztertzeko:

GAI-ZERRENDA:

1. Batzorde paritarioko idazkaria izendatzea.

2. Hitzarmen kolektiboko soldata-taulen berrikuspen teknikoa.

3. Bileraren akta eta horren ondoriozko soldata taulak onestea, bidezkoa bada.

4. Eskuordetza ematea hitzarmena erregistratzeko eta argitaratzeko izapideetarako.

5. Galde-eskeak.

Honako hauek bertaratu dira bilerara:

Alde batetik, Nafarroako enpresa-sektorea ordezkatuz:

ANEVID (Asociación Navarra de empresas vinícolas y derivados) elkartearen izenean:

Eduardo Llorente

Jesús Pavía

Pablo Esparza

José Miguel Beneroso

Neus Pérez

Roser Torrellas

UCAN (Unión de Cooperativas Agroalimentarias de Navarra) elkartearen izenean:

Javier Zabaleta

Miriam Echarri

Eta, bestetik, Nafarroako ardogintza-sektoreko langileak ordezkatuz:

UGT (Unión General de Trabajadores) sindikatuaren izenean:

Demetrio Muñoz

Javier Velasco

CC.OO. (Langile Komisioak) sindikatuaren izenean:

Eva Ciaurriz

Lehena.–Batzorde paritarioko idazkaria izendatzea.

Hitzarmenaren 53. artikuluarekin bat etorriz, batzorde paritarioa: "Hitzarmena sinatu duten alderdiek osatzen dute: lau batzordekide langileen aldetik, eta beste lau enpresaburuen ordezkari gisa, sinatzaileen artetik izendatuak. Aholkulari baten laguntza izan dezakete, eta bi alderdiek izendatuko dute idazkaria".

Horren arabera, honako hauek osatzen dute batzorde paritarioa balio osoz:

–Enpresaren aldeko batzordekideak: Eduardo Llorente, Jesús Pavía, eta Pablo Esparza, ANEVIDekoak, eta Javier Zabaleta, UCANekoa.

–Langileen aldeko batzordekideak, Eva Ciaurriz, Demetrio Muñoz eta Javier Velasco.

Gainerako parte-hartzaileak beren erakundeetako aholkulari gisa agertu dira, hitzarekin baina botorik gabe.

Batzorde paritarioaren gehiengoak José Miguel Beneroso izendatu du batzorde paritarioko idazkari.

Bigarrena.–Hitzarmen kolektiboko soldata-taulen berrikuspen teknikoa.

Hitzarmenaren 29.2 artikuluaren arabera, 2025. urterako, %1eko igoera aplikatuko da 2024ko soldata taulen gainean, eta ondorioak 2025eko urtarrilaren 1etik aurrera izanen ditu, 2. eranskineko taularen arabera.

Artikulu horrek, halaber, KPIa bermatzeko klausula bat jasotzen du, eta, beraz, aurreikusten du hitzarmena urte bukaeran berrikustea. Klausula horren helburua da, baldin 2025. urtea bukatzean 2025eko abenduko urte arteko KPIa %1etik gorakoa bada, aplika dadin aipatutako KPIaren eta %1aren arteko aldeari dagokion igoera gehigarria; hala ere, 2025eko taulek %4ko igoera izanen dute, gehienez, 2024ko taulekiko.

2025erako KPIaren urte arteko aldakuntza %2,9koa izan da, EINen datuen arabera.

Hirugarrena.–Bileraren akta eta horren ondoriozko soldata taulak onestea, bidezkoa bada.

Ondorioz, aho batez erabaki da 2025eko taulak erregularizatzea, aldakuntza hori %1etik gorakoa eta %4tik beherakoa baita.

Erregularizatu ondoren, 2025eko behin betiko soldata-taulak 1. eranskin gisa erantsi dira.

Goititze horren ondoriozko zenbatekoak 2025eko urtarrilaren 1etik aurrera izanen ditu ondorioak, eta aldeak hitzarmeneko atzerapen gisa erregularizatuko dira, tauletako kontzeptuei dagokienez, atzerapenen ordainketa batean.

Laugarrena.–Eskuordetza ematea hitzarmena erregistratzeko eta argitaratzeko izapideetarako.

Aho batez onetsi da, halaber, batzorde paritarioko idazkari José Miguel Benerosori eta/edo Marta Hernández Goñi abokatuari eta/edo Neus Pérez Rey aholkulariari eskuordetzea beharrezko izapideak egin ditzaten batzorde paritarioaren akta hau eta soldata taulak igortzeko Ekonomia Sozialeko eta Laneko Zuzendaritza Nagusiari edo Nafarroako Gobernuko dagokion erakundeari, erregistratzeko eta argitara emateko Nafarroako Aldizkari Ofizialean.

Bosgarrena.–Galde-eskeak.

Hitz egiteko txanda hasita, alderdiek adostu dute data bat jartzea hitzarmenaren negoziazio-mahaia eratzeko, eta 2026ko apirilaren 15erako proposatu dute.

Eta beste aztergairik ez dagoenez, bilera bukatutzat eman da. Akta hau egin da, eta bertaratuek eta batzorde paritarioko idazkariak sinatu dute.

I. ERANSKINA.–2025EKO BEHIN BETIKO SOLDATA TAULAK

Iragarkiaren kodea: F2607216