Iragarkia

106. ALDIZKARIA - 2026ko ekainaren 2a

1. NAFARROAKO FORU KOMUNITATEA

1.5. ESTATUTUAK ETA LAN HITZARMEN KOLEKTIBOAK

81C/2026 EBAZPENA, apirilaren 14koa, Ekonomia Sozialeko eta Laneko zuzendari nagusiak emana, zeinaren bidez erabakitzen baita erregistratu, gordailutu eta Nafarroako Aldizkari Ofizialean argitaratzea Elortzibar Servicios Deportivos SL enpresaren hitzarmen kolektiboa.

Ikusirik Elortzibar Servicios Deportivos SL enpresak aurkeztu duen hitzarmen kolektiboaren testua (kode zenbakia: 31102110012023), zeina erregistro honetan sartu baitzen 2026ko martxoaren 13an, eta enpresaren ordezkariek eta sindikatuen ordezkariek 2026ko otsailaren 20an izenpetu baitzuten.

Bat etorriz Langileen Estatutuaren Legearen testu bategina onesten duen urriaren 23ko 2/2015 Legegintzako Errege Dekretuaren 90. artikuluaren 2. eta 3. apartatuetan eta Hitzarmen kolektiboak, lan akordio kolektiboak eta berdintasun planak erregistratu eta gordailutzeari buruzko maiatzaren 28ko 713/2010 Errege Dekretuan ezarritakoarekin.

Nafarroako Foru Komunitateko Administrazioari eta foru-sektore publiko instituzionalari buruzko martxoaren 11ko 11/2019 Foru Legearen 32. artikuluak ematen dizkidan eskudantziak erabiliz, eta kontuan hartuta zer xedatzen den Eskubide Sozialetako, Ekonomia Sozialeko eta Enpleguko Departamentuaren egitura organikoa ezartzen duen azaroaren 15eko 251/2023 Foru Dekretuan,

EBAZTEN DUT:

Lehena.–Nafarroako Hitzarmen Kolektiboen, Lan Akordio Kolektiboen eta Berdintasun Planen Erregistroan inskribatzea Elortzibar Servicios Deportivos SL enpresak aurkeztutako hitzarmen kolektiboa (kode-zenbakia: 31102110012023).

Bigarrena.–Nafarroako Aldizkari Ofizialean argitaratzeko agintzea, orok jakin dezan.

Iruñean, 2026ko apirilaren 14an.–Ekonomia Sozialeko eta Laneko zuzendari nagusia, Iñaki Mendióroz Casallo.

ELORTZIBAR SERVICIOS DEPORTIVOS SL UDAL ENPRESAREN HITZARMEN KOLEKTIBOA

ATARIKO KAPITULUA.–ALDERDIAK ZEHAZTEA

1. artikulua. Hitzarmen kolektibo hau adostu dute, enpresaren aldetik, Elortzibar Servicios Deportivos SLren Administrazio Kontseiluko presidente Jesus Alberto Abaurrea Orozek, eta, langileen aldetik, plantillaren ordezkari sindikal Mercedes López Perea andreak, Josune Erro Extremado jaunak, Yessica Ovelar Bogado andreak eta Esperanza Tovar Aponte andreak.

LEHEN KAPITULUA.–XEDAPEN OROKORRAK

2. artikulua. Eremu funtzionala eta langile eremua.

Elortzibar Servicios Deportivos SL enpresako langile guztiei aplikatuko zaie hitzarmen hau, orain enpresan dihardutenei nahiz etorkizunean kontratatzen ahal direnei, kontuan hartu gabe lan harremana aldi baterako kontratuaren bidez edo kontratu mugagabearen bidez egiten den.

3. artikulua. Lurralde-eremua.

Hitzarmen hau eskualde mailakoa da, eta enpresak Nafarroako Foru Komunitatean dituen lantokietan aplikatuko da.

4. artikulua. Hitzarmenaren indarraldia eta salaketa.

Hitzarmen kolektibo honek 2025eko urtarrilaren 1ean hartuko du indarra, eta 2027ko abenduaren 31 arte iraunen du.

Edonola ere, Langileen Estatutuaren 86.3.4 artikuluan arautuarekin bat, hitzarmenak indarrean jarraituko du harik eta bi alderdiek haren ordezko bat izenpetzen duten arte.

Langileen Estatutuaren testu bateginaren 86.2 artikuluan ezarritakoaren ondorioetarako, hitzarmen hau salatutzat jotzen da sinatzen den egunetik beretik.

5. artikulua. Osotasunari lotzea.

Hemen itundutako baldintzek multzo organiko eta zatiezina osatzen dute, eta, aplikazio praktikoari dagokionez, osotasunean hartuko dira.

Kasu horretan, hitzarmen honen hobekuntzek multzo bat osatzen dute, edozein modutan ere lehendik daudenekin konpentsatzekoa, baina konparazioa urteko guztirakoari begira eginen da, errendimendu normalean eta asistentzia osoa izanik.

Etorkizunean ezarritako xedapenei dagokienez, aldaketa ekonomikorik badakarte, eragina izanen dute baldin eta, osotara kontuan harturik eta urte osoan neurturik, hitzarmen honetan ezarritakoak gainditzen badituzte.

6. artikulua. Konpentsazioa.

Hitzarmen honetan itundutako baldintzak, denak batera hartuta, indarra hartu aurretik zeuden guztiekin konpentsatzen ahal dira, edozein dela ere haien izaera edo jatorria.

7. artikulua. Berme pertsonalak.

Langileren batek, urte osoko kopurua harturik eta orokorrean neurturik, hitzarmen honetan ezarritakoak baino baldintza hobeak izanez gero, errespetatu eginen zaizkio.

Soldatei dagokienez, errespetatu eginen dira hitzarmenean ituntzen diren soldaten gainetik enpresan dauden baldintza ekonomikoak. Ez dira izanen ez xurgagarriak eta ez konpentsagarriak. Halaber, ez dira kentzen ahalko lan-baldintzen funtsezko aldaketen bidez.

8. artikulua. Probaldia.

Langileak enpresan lanean hastean proba gisan arituko direla ulertuko da idatziz horrela agertzen bada lan kontratuan. Probaldia ez da, inondik ere, hau baino luzeagoa izanen:

• 6 hilabete, hitzarmen honen 10. artikuluan finkatutako langileen sailkapenean 1. lanbide taldean daudenentzat.
• 2 hilabete, 2. lanbide taldeko langileentzat.
• Hilabete bat, 3., 4. eta 5. lanbide taldeetako langileentzat.
• 15 egun natural, 6. lanbide taldeko langileentzat.

Probaldian, bi alderdietako edozeinek lan kontratua bertan behera uzten ahal du aurreabisurako eperik jarri gabe eta kalte-ordaina izateko eskubiderik izan gabe.

Probaldia bukatutakoan, bi alderdietako batek ere lan kontratuan atzera egin ez badu, kontratuak dagozkion ondorio guztiak sortuko ditu.

9. artikulua. Batzorde paritarioa.

Hitzarmen honetako batzorde paritarioa eratu da, hitzarmenaren aplikazioa interpretatzeko eta zaintzeko, edukiaren gainean sortzen ahal diren desadostasunetan, bai eta Langileen Estatutuaren 85.3 c) artikuluan jasotako auzietan ere.

Bi alderdiek espresuki adostu dutenez, zalantzarik edo desadostasunik sortuz gero, txostena eskatuko zaio batzorde paritarioari, jurisdikzio eskudunari edozein erreklamazio egin aurretik.

Batzordea bi kidek osatuko dute: horietako bat enpresako ordezkariek hautatua eta bestea hitzarmena sinatzen duten langileen ordezkariek hautatua. Batak eta besteak aholkularien laguntza izan dezakete, azken horiek hizpidea dutela baina botorik ez.

Batzorde horrek alderdietako edozeinek eskatuta eginen du bilera, desadostasunak izaten direnean Langileen Estatutuaren 85.3 c) artikuluan araututako gainerako gaien gainean. Gutxienez astebete lehenago emanen da abisua, eta arazoak konpontzeko gehienez ere bi aste izanen du.

Aztertzen diren gaiak bi alderdiek onetsi beharko dituzte, eta, ados jarriz gero, hitzarmenaren testuan sartuko dira.

BIGARREN KAPITULUA.–LANGILEEN SAILKAPENA

10. artikulua. Maila funtzionalak.

Hitzarmen honen aplikazio eremuan biltzen diren langileak sei maila funtzionaletan sailkatuko dira: 1. taldea, 2. taldea, 3. taldea, 4. taldea, 5. taldea eta 6. taldea, bakoitzaren oinarrizko zereginen eta eginkizunen arabera eratuak, bai eta horietan jarduteko eskatutako prestakuntzaren edo espezializazioaren arabera ere.

–1. TALDEA:

Irizpide orokorrak: eginkizun konplexuak eta heterogeneoak burutzea, maila handieneko gaitasun profesionala eskatzen dutenak.

Laguntzaile talde batek egiten dituen lanak integratu, koordinatu eta gainbegiratzeko diren eginkizunak.

Hau da eskatzen den prestakuntza: goi mailako titulazioa, erdi mailako titulazioa edo esperientzia.

Parekatzea: talde honetan sartzen dira lanpostu hauei dagozkien jarduera guztiak: instalazioko zuzendariak, kudeatzailea, proiektuko arduraduna.

–2. TALDEA:

Irizpide orokorrak: zeregin heterogeneoak integratzeko, koordinatzeko eta gainbegiratzeko lanak, hala nola lankide talde baten lana antolatzeko ardura.

Multzo horretan sartzen dira, halaber, lan konplexuak eta aldi berean homogeneoak, aginte erantzukizunik izan gabe ere berariazko prestakuntza handia eskatzen dutenak.

Prestakuntza: erdi mailako prestakuntza akademikoa edo lanpostuari dagokion titulazio berariazkoa, praktikaldi batez edo antzeko lanetan izandako esperientziaz osatua.

Parekatzea: talde honetan sartzen dira lanpostu hauei dagozkien jarduera guztiak: kirol koordinatzailea, fisioterapeuta, OLT-EDU, departamentuko arduradunak.

–3. TALDEA:

Irizpide orokorrak: diseinuan, programazioan, prestakuntzan eta exekuzioan autonomia handia eskatzen duten eginkizunak, eduki homogeneoko zereginak, lankide talde txiki batek eginak, integratu, koordinatu eta gainbegiratzea eskatzen ahal dutenak.

Prestakuntza: eskatzen den oinarrizko prestakuntza egiten diren lanei dagokien titulazio berariazkoa izanen da edo bigarren mailako lanbide heziketaren parekoa (LH II). Hori ordezkatzen ahal da enpresa berean edo sektoreko beste enpresa batzuetan eite bereko lanetan gutxienez urtebetez izandako esperientziarekin.

Parekatzea: talde honetan sartzen dira kirol jardueretako teknikariari (monitoreari) dagozkion jarduera guztiak, espezialitate guztietan.

–4. TALDEA:

Irizpide orokorrak: zeregin homogeneoak integratzeko, koordinatzeko eta gainbegiratzeko diren eginkizunak, laguntzaile talde txiki batek eginak, edo aginte erantzukizunik izan gabe ere, betetzean autonomia handia eskatzen dutenak.

Prestakuntza: eskatzen den oinarrizko prestakuntza bigarren mailako lanbide heziketaren parekoa (LH II) izanen da edo egiten diren lanei dagokien titulazio berariazkoa. Enpresa berean edo sektoreko beste enpresa batzuetan eite bereko lanetan gutxienez urtebetez izandako esperientziarekin ordezkatzen ahal da hori.

Parekatzea: talde honetan sartzen dira lanpostu hauei dagozkien jarduera guztiak: aretoko teknikaria, masajistak, lehen mailako administrari-ofiziala, zenbait lanbidetako lehen mailako ofiziala eta soroslea.

–5. TALDEA:

Irizpide orokorrak: eduki homogeneoko zereginak, autonomiaz eta jarraibide zehatzei lotuz egitekoak.

Prestakuntza: eskatzen den oinarrizko prestakuntza lehen mailako lanbide heziketaren parekoa (LH I) izanen da edo egiten diren lanei dagokien titulazio berariazkoa. Enpresa berean edo sektoreko beste enpresa batzuetan eite bereko lanetan gutxienez sei hilez izandako esperientziarekin ordezkatzen ahal da hori.

Parekatzea: talde honetan sartzen dira lanpostu hauei dagozkien jarduera guztiak: administrari laguntzailea, zerbitzu orokorretako langilea, monitorearen laguntzailea.

"Zerbitzu orokorretako langilea" deitzen zaio 5. eta 6. taldeetako eginkizunetan diharduen balio anitzeko langileari.

–6. TALDEA:

Irizpide orokorrak: lan metodo zehatz, jakin eta aurrez ezarritakoari jarraikiz egiten diren lanak, lanbide ezagutza oinarrizkoak eta egokitze aldi labur bat eskatzen dituztenak.

Prestakuntza: eskatzen den prestakuntza eskola graduatuaren parekoa da, eginkizun horietan izandako esperientziarekin ordezkatzen ahal dena.

Parekatzea: talde honetan sartzen dira lanpostu hauei dagozkien jarduera guztiak: etxezaina, atezaina, peoia eta garbiketako peoia.

11. artikulua. Balioaniztasuna.

Sektorean ematen diren zerbitzuen izaeragatik, denbora partzialean eta asko murriztutako lanaldietan ematen diren zerbitzu asko daudenez, eta horrek, besteak beste, sektorea profesionalizatzea zailtzen duenez, bi aldeen iritziz funtsezkoa da sektoreko langileen balioaniztasuna espresuki arautzea, mugigarritasun funtzionalaren mugak eta balioaniztasuna erregulatzekoak oztopo bihur ez daitezen sinatutako denbora partzialeko kontratuetan lanaldia luzatzeko eta hasieratik lanaldi luzeagoa kontratatzeko aukera izan dadin.

Aurreko horretan oinarrituz, erabaki da ezen, kontratu partzialetan lanaldi gehiago kontratatu ahal izateko edo ondoren luzatzeko, betiere ondotik adierazten diren kasuen mugen barnean, zilegi izanen dela enpresaren eta langilearen artean ituntzea lanbide talde bati baino gehiagori dagozkien eginkizunak egitea, aldeek espresuki adosten eta idatziz jasotzen badute hasierako lan-kontratuan edo hasierako kontratu horretako lanaldia luzatzen duen kontratu berrituan.

Zehazki, balioaniztasun kasu hauek ezarri dira:

a) Kirol jardueretako teknikaria (3. taldea) eta kirol koordinatzailea (2. taldea).

b) 3. eta 4. taldeak.

c) Kirol jardueretako teknikaria (3. taldea) eta zerbitzu orokorretako langilea (5. taldea).

d) Soroslea (4. taldea) eta zerbitzu orokorretako langilea (5. taldea).

Artikulu honetan aipatutako kasuetan eta mugen barnean, eta ikusirik bi alderdiek balioaniztasun sistema honek ahalbidetzen duen kontratazioan edo lanaldien luzapenean duten interesa, berariaz itundu da ezen, kasu bakoitzean lehentasunezkoak jotzen ahal diren eginkizunak gorabehera, kasu bakoitzean ordainduko den ordainsaria izanen dela lanbide talde bakoitzarentzat ezarritakoa, talde bakoitzeko eginkizunetan emandako denboraren arabera.

Artikulu honetan aurreikusitako inguruabarrak gertatzen ez direnean, legedia orokorrean balioaniztasunaren eta mugikortasun funtzionalaren kasuetarako xedatutakoa aplikatuko da.

HIRUGARREN KAPITULUA.–BALDINTZA EKONOMIKOAK

12. artikulua. Soldatak.

Hitzarmen kolektibo honen eraginpeko langileek 2025. urtean zehar hitzarmeneko I. eranskineko soldaten taulan lanbide talde bakoitzarentzat ezarritako ordainsariak jasoko dituzte. Ordainsari horiek lanaldi osoko zerbitzu emateari dagozkio.

Orain arteko ordainsariak, urtean osotara zenbatuak, hitzarmen honen testuan ezarritakoak baino handiagoak badira, langilearen aldeko diferentzia "ad personam" osagarri gisa erantsiko da, "osagarri pertsonala" izenpean.

Orientazio gisa, aipatu I. eranskinean lanbide talde bakoitzarentzat ezarri da benetan lan egindako ordu bakoitzaren prezio gordina, zeinean sartzen bai eta asteko atsedenaren ordainsariaren, aparteko pagen, oporren eta jaiegunen zati proportzionala.

Orduaren prezio horretan ez da sartzen hitzarmenaren 15. artikuluan ezarritako gaueko lanaren plusa, ez eta benetan lan egindako jaiegunetako edo igandeko lanaren plusak ere, 16. eta 17. artikuluetan ezarritakoak.

13. artikulua. Soldata igoera.

Urteko soldata igoera sektore publikoko langileen berdina izanen da, eta urte bakoitzeko urtarrilaren 1ean atzeraeraginezko igoera aplikatuko da.

2025. urterako, %2,5eko igoera aplikatuko da.

2026rako, %1,5eko igoera finkoa aplikatuko zaie 2025aren amaieran indarrean zeuden zenbatekoei, eta beste %0,5 gehitu ahal izanen zaie baldin urte horretako inflazioa %1,5 edo hortik gorakoa bada. Halakorik gertatuz gero, 2027ko lehen hiruhilekoan ordainduko litzateke %0,5 gehigarri hori.

2027rako, igoera %4,5ekoa izanen da, bat etorriz sektore publikoko langileentzat aurreikusitako igoerarekin.

Baldin kirol kudeatzaileen hitzarmeneko igoera txikiagoa bada sektore publikoko hitzarmenekoa baino, azken hori aplikatuko da.

Monitoreen benetako soldatak portzentaje berean igoko dira.

14. artikulua. Aparteko haborokinak.

Langile guztiek urtean aparteko hiru ordainsari izanen dituzte: ekaineko ordainsaria, abenduko ordainsaria eta martxoko ordainsaria. Horien zenbatekoa izanen da hitzarmen honen eranskinetako soldata taulen ordainsarien maila bakoitzean ezarrita dagoena.

Aparteko ordainsari horietarako araubide hau ezarri da:

1. Ekaineko eta abenduko aparteko ordainsariak:

aparteko ordainsari horiek uneko urteko ekainean eta abenduan kobratuko dira, eta hilez hil proportzioan banatzen eta ordaintzen ahal dira bakoitzaren soldata agirian, baldin lan kontratuaren iraupena urtebetetik beherakoa baldin bada.

Bi ordainsari horiek sei hilabetetik behin sortuko dira. Ordainketa, kontaketa edo likidaziorako hainbanaketa egiteko, hasiera edo bukaera ezartzeko, urtarrilaren 1etik ekainaren 30era bitarteko tartea hartuko da lehen kasuan eta uztailaren 1etik abenduaren 31 bitartekoa bigarrenean.

Ekaineko aparteko paga, hainbanatzen ez den kasuetan, urteko ekainaren 20a baino lehen ordainduko da.

Abenduko aparteko paga, hainbanatzen ez den kasuetan, urteko abenduaren 20a baino lehen ordainduko da.

2. Martxoko aparteko ordainsaria:

aparteko ordainsari hori sortu eta hurrengo urteko martxoan kobratuko da, eta hilez hil proportzioan banatzen eta ordaintzen ahal da bakoitzaren soldata agirian, lan kontratuaren iraupena urtebetetik beherakoa baldin bada.

Paga hori urte oso bakoitzeko sorraraziko da. Likidazioagatik, lanean hasteagatik edo lana uzteagatik kontaketa edo hainbanaketa egiteko, tartea urtarrilaren 1etik abenduaren 31ra bitartekoa izanen da.

Ordainketa sortzapenaren urtean indarrean dauden taulen arabera eginen da, eta erantsitako soldata tauletan ezarri da zenbatekoa, hitzarmen honen 12. artikuluan ezarritako irizpideekin bat.

Martxoko aparteko paga, sortu eta hurrengo urteko martxoko nominarekin batera ordainduko da, azaldu diren baldintzen arabera.

15. artikulua. Gaueko lanaren plusa.

Gaueko lana 22:00etatik 06:00etara bitarte egiten dena da.

Gauez lan egiten duten langileek osagarri bat jasoko dute gaueko ordutegian lan egindako ordu bakoitzeko, eta "Gaueko lanaren plusa" esanen zaio. Plus hori gaueko ordutegian egindako zerbitzuekiko proportzionala izanen da, eta ordua 5 euroan ordainduko da (zenbateko gordina), hitzarmen hau indarrean den bitartean. Hitzarmen honen eranskinetako soldaten taulan dago ezarrita.

16. artikulua. Jaiegunetako plusa.

Artikulu honetan ezarritakoaren ondorioetarako, jaiegun izanen dira urtero ezarritako 14 jaiegun ofizialak eta Aste Santuko larunbata; horiexek besterik ez.

14 jaiegun ofizialetako batean edo Aste Santuko larunbatean lanean aritzen diren sektoreko langileek "jaiegunetako plusa" jasoko dute. Plus hori berdina izanen da kategoria guztietan, eta ordua 7 euroan ordainduko da (zenbateko gordina) hitzarmen hau indarrean den bitartean. Langileek jaiegunetako plusa jasoko dute 14 jaiegun ofizialetako batean edo Aste Santuko larunbatean benetan lan egindako ordu bakoitzagatik.

17. artikulua. Igandeetako plusa.

Igandez lan egiten duten sektoreko langileek "igandeetako plusa" jasoko dute, benetan lan egindako ordu bakoitzeko. Plus hori berdina izanen da kategoria guztietan, eta ordua 7 euroan ordainduko da (zenbateko gordina) hitzarmen hau indarrean den bitartean. Langileek igandeetako plus hori jasoko dute igandez benetan lan egindako ordu bakoitzeko.

18. artikulua. Plus berezia.

Instalazioa itxi ondoren edo instalazioa ixteko orduan lan egiten dutenek "plus berezi" bat jasoko dute, denbora horretan benetan lan egin duten ordu bakoitzagatik. Plus hori berdina izanen da kategoria guztietan, eta ordua 8 euroan ordainduko da (zenbateko gordina) hitzarmen hau indarrean den bitartean.

19. artikulua. Lanerako aldi baterako ezintasunaren eta haurdunaldiko arriskuaren osagarria.

A) Laneko istripuaren edo gaixotasun profesionalaren ondoriozko aldi baterako ezintasuna:

Enpresak laneko istripuaren edo eritasun profesionalaren ondoriozko aldi baterako ezintasunaren prestazioak osatuko ditu, hilabete horretan langilea bajan egon ez balitz zegokiokeen soldata gordinaren %100era arte, salbu gaueko lanaren, jaieguneko lanaren edo igandeko lanaren osagarriak.

B) Gaixotasun arruntaren edo lanetik kanpoko istripuaren ondoriozko aldi baterako ezintasuna:

Eritasun arruntaren edo lanetik kanpoko istripuaren ondoriozko aldi baterako ezintasunaren prestazio hauek ezarri dira, kontuan hartuta urte naturalean zehar langileen bajak zenbat izan diren eta haien iraupena:

Lehenbiziko baja: urteko lehenbiziko bajaren aurreneko 10 egunetan, enpresak hil horretan langilea bajan izan ez jasoko zukeen soldata gordinaren %80ra arte osatuko du, salbu gaueko lanaren, jaiegun edo igandeko lanaren osagarriak.

Bajako 11. egunetik 60.era arte, biak barne, langilea hilabete horretan bajan izan ez balitz jasoko zukeen soldata gordinaren %100era arte osatuko du enpresak, salbu gaueko lanaren, jaieguneko lanaren edo igandeko lanaren osagarriak.

Bigarren baja: urteko bigarren bajaren aurreneko 10 egunetan, enpresak hil horretan langilea bajan izan ez balitz jasoko zukeen soldata gordinaren %75era arte osatuko du, salbu gaueko lanaren, jaiegun edo igandeko lanaren osagarriak.

Bajako 11. egunetik 30.era arte, biak barne, langilea hilabete horretan bajan izan ez balitz jasoko zukeen soldata gordinaren %90era arte osatuko du enpresak, salbu gaueko lanaren, jaieguneko lanaren edo igandeko lanaren osagarriak.

Bajako 31. egunetik aurrera, enpresak hilabete horretan langilea bajan izan ez balitz jasoko zukeen soldata gordinaren %80ra arte osatuko du, salbu gaueko lanaren, jaieguneko lanaren edo igandeko lanaren osagarriak.

3. baja: urteko hirugarren bajan, enpresak hilabete horretan langilea bajan izan ez balitz jasoko zukeen soldata gordinaren %75era arte osatuko du, salbu gaueko lanaren, jaieguneko lanaren edo igandeko lanaren osagarriak.

Bajako 31. egunetik aurrera, enpresak hilabete horretan langilea bajan izan ez balitz jasoko zukeen soldata gordinaren %75era arte osatuko du, salbu gaueko lanaren, jaieguneko lanaren edo igandeko lanaren osagarriak.

Laugarren bajan eta hurrengoetanez da osagarririk egongo enpresen kontura, eta langileak dagozkion prestazioak baino ez ditu jasoko.

Eritasun arruntaren edo lanetik kanpoko istripuaren ondoriozko aldi baterako ezintasun kasuetan, langilea ospitaleratu beharra izanez gero, ospitaleratzeak dirauen bitartean enpresak hilabete horretan langilea bajan egon ez balitz zegokiokeen soldata gordinaren %100era arte osatuko ditu aldi baterako ezintasunaren prestazioak, salbu gaueko lanaren, jaieguneko lanaren edo igandeko lanaren osagarriak.

C) Eritasun arruntaren edo lanetik kanpoko istripuaren ondoriozko iraupen luzeko aldi baterako ezintasuna:

iraupen luzeko aldi baterako ezintasunaren kasuan (bajaren 2. hilabetetik aurrera), enpresak hil horretan langilea bajan izan ez balitz jasoko zukeen soldata gordinaren %100era iritsi arte osatuko du, salbu gaueko lanaren, jaieguneko lanaren edo igandeko lanaren osagarriak.

D) Haurdunaldiko arriskua:

Gizarte Segurantzako Institutu Nazionalak emakumezko langile bat haurdunaldiko arriskuan dagoela aitortzen duen kasuetan, enpresek hilabete horretan langilea bajan izan ez balitz jasoko zukeen soldata gordinaren %100era arte osatuko dituzte aldi baterako ezintasunaren prestazioak, salbu gaueko lanaren, jaieguneko lanaren edo igandeko lanaren osagarriak.

E) Gaixotasun larri edo onkologikoengatiko bajak:

Gaixotasun onkologiko edo gaixotasun larri batek (garuneko eta odol-hodietako gaixotasuna, gaixotasun kardiobaskularra edo endekapen-gaixotasuna) eragindako aldi baterako ezintasuneko kasuetan, hilabete horretan langilea bajan izan ez balitz jasoko zukeen soldata gordinaren %100era iritsi arte osatuko du enpresak, salbu gaueko lanaren, jaieguneko lanaren edo igandeko lanaren osagarriak.

20. artikulua. Kilometrajea.

Langileak bidaia egin behar badu bere lana betetzeko, 0,21 euro jasoko du kilometroko 2025ean.

Balio horrek hitzarmen honen 13. artikuluan itundutako igoera berak izanen ditu 2026ko urtarrilaren 1etik aurrera.

21. artikulua. Laneko arropa.

Beren eginkizunak betetzeko laneko arropa behar duten langile guztiei urtean bi uniforme emanen zaizkie.

Soroslearen uniformea honela dago osatua: kamiseta, galtzamotzak, txankletak eta kapela. Igeriketako monitorearen uniformea honela dago osatua: kamiseta, bainujantzia eta txankletak.

Noizbehinka erabiltzen den laneko arropa berritzeko, kontuan hartuko da nola dagoen.

Kirol jardueretako teknikarien kasuan (monitoreak), ikusirik uniformeak jarduerak bezain ugariak direla, goian aipatu uniforme horien ordez 60 euro gordineko gastu ordejarria ordainduko da urtean, 0,17 euro gordin eguneko, alegia, enpresan alta izandako eguneko, benetako lanaldia edozein dela ere.

LAUGARREN KAPITULUA.–LANALDIA, ATSEDENALDIAK, BAIMENAK, ESZEDENTZIAK ETA OPORRAK

22. artikulua. Lanaldia.

2026. urterako, 1.682 orduko urteko lanaldia ezartzen da.

Eta, 2027ko urtarrilaren 1etik aurrera, langile talde bakoitzaren urteko lanaldia 7 orduz murriztuko da. Orokorrean, eta Langileen Estatutuaren 34. artikuluak xedatzen duenari jarraikiz, lanaldi osoko urteko lanaldia benetan lan egindako 1.675 ordutan finkatu da hitzarmenaren indarraldi osorako, arestian aipaturiko egunetik aurrera zenbatzen hasita.

Kirol jardueretako teknikarien (monitoreak) jardueren baldintzak ikusirik, batez ere euren lan fisiko handia, talde horrek urtean ordu hauek izanen ditu lanaldi osoan:

• 2026. urterako 1.591 orduko benetako lanaldia.
• 2027. urterako 1.584 orduko benetako lanaldia.

Aretoko teknikaria:

• 2026. urterako 1.615 orduko benetako lanaldia.
• 2027. urterako 1.608 orduko benetako lanaldia.

Lan denbora kontatzeko, langileak, hala eguneroko lanaldiaren hasieran nola bukaeran, lanpostuan egon behar du.

6 ordutik gorako eguneroko lanaldi jarraituan, 15 minutuko atsedenaldia ezarri da, benetan lan egindako denboratzat hartuko ez dena.

Atsedenaldiok hartzeko txandak enpresaren arduradunen eta langileen artean adostuko dira, zerbitzuaren beharrak kontuan hartuta.

Norberaren aferetarako hiru egun ezartzen dira.

Egun horietako bat hartzeko, langileak 3 hilabetez eman behar du zerbitzua, gutxienez ere; 2 egun hartzeko, 6 hilabetez, eta 3 hartzeko, 9 hilabetez. Hori guztia egutegiko urte beraren barruan, hitzarmen hau indarrean den bitartean. Egun horiek ezin izanen dira errekuperatu, eta langileak eskatutako egunean hartzen ahalko dira enpresarekin adostuta, baldin eta zerbitzuan eman beharreko arreta bermatzen bada, opor egunak hartzeko irizpide berberei jarraikiz.

Eskaerak 7 egun lehenagotik egin behar dira, gutxienez. Egun hori langile batek baino gehiagok eskatuz gero, lehentasuna eskariaren ordenaren arabera zehaztuko da, eta, batera aurkeztuz gero, lanpostuaren arabera.

Egun horiek gozatzeko irizpidea eta oporrak gozatzeko irizpidea berberak izanen dira.

Urte bukaerarako ez badira gozatu, ordu estraren prezioan ordainduko dira.

23. artikulua. Lanaldi irregularra.

Langileen Estatutuaren 34.2 artikuluan araututakoarekin bat, aldeek adostu dute lanaldiaren %10 banatuko dela modu irregularrean.

24. artikulua. Lan egutegia.

Urte bakoitzeko urtarrilaren 31 baino lehen eginen da. Jardueretako langileen kasuan, kanpainen araberako egutegiak eginen dira. Egutegietan lanegunak, atseden egunak eta lan ordutegiak ezarriko dira gutxienez.

Gehiegizko lanaldirik gertatuz gero, egun osoetan konpentsatuko da denbora hori, norberaren eginkizunetarako egunak hartzeko eskaera eta gozamen mekanika berarekin.

25. artikulua. Asteko atsedena.

Asteko atseden etengabea, egun eta erdikoa, gehienez hamalau eguneko tartean metatzen ahal da, eta horrelakoetan hiru eguneko atsedenaldia hartzen ahal da hamalau eguneko tartean.

26. artikulua. Oporrak.

Urteko 31 egun naturaleko oporraldi ordaindua ezarri da.

Eskola kanpainarako berariaz kontratatutako langileak alde batera utzita, enpresak ezarri beharreko oporraldia ekainaren eta irailaren artean hartuko da, bi hilabeteak barne.

Langileak enpresarekin adostuta aukeratuko ditu bere opor guztiak, eta muga bakarra izanen da lanpostu bereko langileen %50ek baino gehiagok horiek aukeratu ez izana. Adostasunik ezean, alderdi bakoitzak 15/16 egun natural aukeratuko ditu.

Enpresak oporrak aldi horietatik kanpo ezartzen ahalko ditu, baina kasu horretan langileek beste bi egun hartzen ahalko dituzte konpentsazio gisa, baldin eta opor egun guztiak erreferentzia aldi horretatik kanpo ezartzen badira.

Erreferentzia aldi horretatik kanpo zortzi egun baino gutxiago ezartzen badira, konpentsazioa opor egun batekoa izanen da.

Konpentsazioko egun horiek oporrak benetan hartuz gero gehituko lirateke eta ez, ordea, oporren likidazioa egitea egokitzen denean.

Eskatutako opor egunei dagokienez, 7 eguneko, 8 eguneko, 15 eguneko edo 16 eguneko bloketan eskatu beharko dira. Baldin eta zentroaren beharrak asetzen badira, eta enpresarekin ados jarriz gero, urte naturaleko martxoaren 31 baino lehen jakinarazi beharko zaizkio idatziz enpresari. Langileak ez baditu aipatutako eguna baino lehen jakinarazten, enpresak aukeratuko ditu automatikoki, aurretik ezarritako irizpideekin bat.

Enpresak, beranduenez, eskaerak aurkezteko epea bukatu eta hurrengo hilabeteko azkeneko egunean erantzunen die oporren eskaerei, hau da, apirilaren 30ean. Epe horretan erantzunik ematen ez bada, automatikoki ulertuko da langileak eskatutako opor egunak onartu direla.

Langileek opor egunak aukeratzeari dagokionez honako irizpide hauek ezarri dira:

1. Azaldu bezala, oporrak 7 eguneko, 8 eguneko, 15 eguneko edo 16 eguneko bloketan eskatu beharko dira.

2 Lantoki bakoitzean, ezin izanen dira izan aldi berean oporretan lanpostu bera betetzen duten langileen %50 baino gehiago. Zenbaki bakoitia izanez gero, beheragoko zifrara biribilduko da (hiru langile izanez gero, bakar batek hartzen ahalko ditu oporrak).

Aurreko irizpideak aplikatzearen ondoriozko kopurua baino eskari gehiago dauden kasuetarako, lehentasuneko irizpide hauek ezarri dira:

a) Egunari dagokionez eskaria lehenago aurkeztu duten langileek izanen dute lehentasuna, eta egun berean aurkeztu badute, lehenagoko ordu batean aurkeztu dutenek izanen dute lehentasuna.

b) Eguna zein ordua berbera izanez gero, enpresan antzinatasun handiagoa duen langileak izanen du lehentasuna.

c) Antzinatasun bera duten langileak egonez gero, enpresak dagozkien langileen aurrean egindako zozketa bidez erabakiko da lehentasuna.

3. Lantokia ixten bada, ukitutako langile guztiek oporrak hartuko dituzte enpresa itxita dagoen egun horietan.

Baldin enpresa itxita izanen den aldia txikiagoa bada oporraldiko 31 egun naturalak baino, langileak kontsumituko ditu, aurreko paragrafoan ezarritakoaren ondorioetarako, enpresak ezarri beharreko egunak, eta egun horiek agortutakoan –horiek agortutakoan, soilik–, langileari dagozkionak.

Oporraldien ordainsaria osatuko dute, batetik, oinarrizko soldatak eta, bestetik, langile bakoitzaren soldata osagarri finkoek.

Oporraldian bajan den langileak eskubidea izanen du beste oporraldi bat ezartzeko aldi baterako ezintasuna bukatu ondoren.

27. artikulua. Aparteko orduak.

Aparteko ordu bakoitzeko ordu eta erdiko konpentsazioa izanen da, atsedenaldiekin konpentsatu nahiz dirutan konpentsatu.

Aparteko orduak urteko 14 jaiegun ofizialetako batean eginez gero, aparteko ordu bakoitzeko bi orduko konpentsazioa izanen da.

Konpentsazioaldia 4 hilabetekoa izanen da, aparteko orduak egiten direnetik. Aparteko orduak borondatezkoak dira.

28. artikulua. Lizentzia ordainduak.

Langileak, aurretik abisatuta eta ondotik justifikatuta, baimena du lanera ez agertzeko, ordaindua izateko eskubidearekin, arrazoi hauetako bat dela medio:

A) Langilearen ezkontzagatik: 18 egun natural.

B) Seme edo alaba baten jaiotzagatik: Langileen Estatutuaren 37.4 eta 37.5 artikuluetan xedatutakoa.

C) Ondoko hauen heriotzagatik:

–Ezkontidea eta seme-alabak: 6 egun natural.

–Gurasoak, aita-amaginarrebak, aitona-amonak eta anai-arrebak: 3 egun natural.

–Bigarren mailako gainerako odol edo ezkontza bidezko ahaideak: 2 egun natural.

D) Gaixotasun larria edo ospitalizazioa:

–Langileen Estatutuaren 37.3 artikuluan xedatutakoaren arabera.

Baimen hauek hartzeari begira, ebakuntza eta horretarako prestatzeko aurretik behar litezkeen ospitalizazioak kasu bakartzat hartuko dira. Halaber, espresuki ezarri da baimena ezin dela ospitaleratzealdia baino luzeagoa izan.

Ospitaleratzeak dirauen bitartean hartzen ahal da lizentzia. Ezein kasutan ez dira hartzen ahalko, gerora hartzeko sistema honen bidez, egun gehiago gertaera eragilearen ondo-ondotik hartu izan balitu zegozkiokeenak baino.

Herri batetik bestera joan behar izanez gero, eta bien artean 200 kilometroko tartea edo handiagoa bada, C) eta D) ataletan adierazitako baimenak luzatzen ahalko dira:

–Egun bat gehiago, 200 km-tik 400era arteko distantzia baldin bada.

–Bi egun gehiago, 400 km-tik gorako distantzia baldin bada.

E) Ohiko bizilekua aldatzeagatik (ezkontzaren eguna ez dena): egun bat.

F) Gurasoen, seme-alaben edo anai-arreben ezkontzagatik: egun natural bat.

G) Nahitaezko eginbehar publiko eta pertsonal bat betetzeko: behar-beharrezkoa den denbora.

H) Hezkuntza eta Zientzia Ministerioak edo Nafarroako Gobernuak ofizialki onartutako titulu akademiko edo profesional bat ateratzeko azterketak egitera joateko behar-beharrezkoa den denbora. Joan-etorrietan ematen den denbora ez da baimen ordaindutzat hartuko, baldin eta joan-etorri hori Nafarroako Komunitatearen mugetatik kanpo egiten bada. Joan-etorria muga horien barnean egiten bada, joan-etorri hori baimen ordaindutzat hartuko da.

I) Gehienez ere urtean 10 orduko lizentzia ordaindua izanen da kontsulta medikoetara joateko edo ezkontideari eta lehen mailako odol ahaideei kontsulta medikuetara laguntzeko. Arrazoi horregatik ordu gehiago behar izanez gero, ordu horiek hartzen ahalko dira, baina urtearen barruan berreskuratu beharko dira.

J) Bigarren mailara arteko odol- edo ezkontza-ahaide bati kirurgia anbulatorioa egiteagatik, baldin eta etxean atseden hartzea beharrezkoa bada: bi egun.

A), B), C) eta E) apartatuetan aipatutako kasuetan, baimen egunak gertaera eragilea sortu den unetik beretik hasiko dira kontatzen.

Aipatutako lizentziak, ezkontideari dagozkionak, langilearekin bikotekide egonkor gisa bizi denari ere aplikatuko zaizkio, baldin eta gertaera eragilea baino urtebete lehenagotik gutxienez elkarrekin bizi badira eta inguruabar horiek frogatzen badituzte bizileku duten herriko udalaren ziurtagiri baten bidez.

Baimen kontuetan legezko aldaketak izaten direnez, baimena hartzeko unean indarreko legeetan zer xedatzen den, horretara moldatuko dira baimenak, non eta ez den hitzarmen honetan xedatutakoa baino txikiagoa.

29. artikulua. Borondatezko eszedentzia.

Gai honetan Langileen Estatutuaren 46. artikuluan xedatutakoa aplikatuko da. Dena dela, enpresan gutxienez urtebeteko antzinatasuna duten langileek eskubidea izanen dute borondatezko eszedentzia hartzeko, 4 hilabetekoa gutxienez eta 5 urtekoa gehienez, lanpostua bi urtez gordeta baina antzinatasuna kontatzeko eskubiderik gabe, eta lehentasunezko eskubidea izanik kategoria bereko edo antzeko lanpostu hutsetan berriz sartzeko. Gainera, langile bakoitzak eskubidea izanen du gehienez ere hiru urteko eszedentzia hartzeko, seme edo alaba bakoitza zaintzeko, norberak izandakoa edo adoptatua izan, edo adopziorako zaintzan nahiz harrera iraunkorrean hartua. Hiru urte horiek haurra jaiotzen denetik edo, bestela, ebazpen judizialaren edo administratiboaren egunetik aurrera kontatuko dira. Era berean, langileek gehienez ere bi urteko eszedentzia hartzeko eskubidea izanen dute, ezkontidea edo izatezko bikotekidea zaintzeko, edo odol edo ezkontza bidezko bigarren mailara arteko ahaide bat zaintzeko, izatezko bikotekidearen odol-ahaideak barne, baldin eta adinagatik, istripuagatik, gaixotasunagatik edo desgaitasunagatik ezin bada bere kabuz moldatu eta ez badu ordaindutako jarduerarik egiten.

Seme-alabak zaintzeko eszedentziako eta langilearen kargura dagoen familiako bat zaintzeko eszedentziako aldiak antzinatasunerako zenbatuko dira.

Eszedentzian dagoen langileak ez du zilegi eszedentzian dagoen bitartean sektore bereko edo antzeko beste enpresa batzuetan lan egitea, adibidez gimnasioetan edo kirol klubetan.

Aurreko eszedentzia bukatu eta lau urte igaro ondoren baliatzen ahalko du berriz ere langile berak eskubide hori.

Gainera, eta hitzarmenaren indarraldi osoan behin soilik, langileek gutxienez bi hilabete eta gehienez lau urte iraunen duen borondatezko eszedentzia bakarra hartzen ahalko dute, bi urtez lanpostua gordeta.

Langileak gutxienez 15 egun lehenago eskatu beharko du eszedentzia, eta hilabete lehenago jakinarazi beharko dio enpresari berriz lanean hasi dela.

30. artikulua. Ordainsaririk eta kotizaziorik gabeko baimena.

Ordainsaririk eta kotizaziorik gabeko baimen berri bat ezartzen da, 15 egun eta 4 hilabete bitartekoa, kontratu finkoa duten langileentzat, familia eta lana uztartzeko osagarri gisa. Enpresarekin adostu beharko da.

31. artikulua. Lanaldia murriztea adingabe bat zaintzeko.

Legezko zaintza dela-eta langileren batek adingabekoren bat edo ordaindutako lanik egiten ez duen minusbaliatu fisiko, psikiko edo sentsorial bat bere kargu izanez gero, eskubidea izanen du lanaldia murrizteko, zortziren bat gutxienez eta erdia gehienez ere, lansaria ere hein berean murriztuta. Lanaldia laburtzeko eskubideak adingabeak 12 urte bete bitarte iraunen du, eta seme-alabak adin hori betetzen duen ikasturtea bukatu arte (ekaina) luzatzen ahalko da.

32. artikulua. Bularra emateko baimena.

Bularra emateko baimena, Langileen Estatutuaren 37.4 artikuluan ezarritakoa, hartzeko eskubidea duten emakumezko langileek Estatutuan ezarri bezala hartzen ahal dute ala, aukeran, baimen ordaindu batekin ordeztu. Azken kasu horretan amatasun baimenaren ondotik hartuko litzateke.

Hitzarmen hau indarrean den bitartean, baimen ordaindu honen iraupena 15 egun naturalekoa izanen da. Baimen hori proportzionalki handituko da erditze anizkoitzen kasuan.

Aukera hori izateko, amatasun baimena bukatu baino hamabost egun lehenago eskatu beharko da gutxienez.

33. artikulua. Aitatasun baimena.

Indarreko legediari lotuko zaizkio.

BOSGARREN KAPITULUA.–KONTRATAZIOAK ETA KARGU-UZTEAK

34. artikulua. Lanbide praktika lortzeko prestakuntzako kontratua.

Praktiketako kontratuaren modalitatean kontrataturiko langileek hitzarmen kolektibo honetan lanpostu berean edo baliokidean ari den langilearentzat finkatutako ordainsariaren %100 jasoko dute.

35. artikulua. Aldizkako kontratu finkoak.

Langileen Estatutuaren 16. artikuluan ezarritakoarekin bat, xedatzen da aldizkako langile finko bihurtuko direla urtaroen araberako lanak egiteko edo denboraldiko ekoizpen jarduerekin lotutako lanak egiteko kontratatu diren langileak, edo izaera hori ez dutenak, baina aldizkako prestazioa emanik, gauzatze aldi ziurrak, zehaztuak edo zehaztugabeak dituztenak.

Sektorearen berezitasunak kontuan izanik, enpresak langileekin aldizkako lan kontratu finkoak izenpetzen ahal ditu, lanaldi osorako zein lanaldi partzialerako kontratuaren modalitatean, hori guztia aplikagarri den indarreko araudian eta harekin bat datorren araudian aurreikusitakoarekin bat.

Langile deialdiak ekoizpen edo lan beharreko eskatu ahala eginen dira, urte bakoitzeko lanaren garapenaren arabera, eta deitutako langile bakoitzari banan-banan jakinaraziko zaio dagokion moduan. Horretarako, kanpaina bakoitzaren hasieran, aldizkako langile finkoak lan jarduera hasiko den eguna baino 15 egun lehenago deituko dira. Jarduerak irauten duen bitartean eta beharrezkoa denean, deialdiak egiten jarraitzen ahalko da bi egun lehenago, edo, bestela, albait aurrerapen handienarekin, inguruabarrek ez badute epe hori errespetatzeko aukera ematen. Deialdi hori idatziz egin beharko da, interesdunari jakinarazpena behar bezala egin zaiola jasota uzteko edozein baliabideren bitartez. Jakinarazpen sistema guztiak dira baliozkoak, telematikoa barne, hala nola WhatsApp edo antzeko mezularitza sistema, bi alderdiek aldez aurretik hala hitzartu badute.

Kontratu modalitate horretan kontratatutako pertsonei dei eginen zaie, enpresaren beharren araberako hurrenkeran, kontratazioaren antzinatasunaren arabera eta enpresaren beraren atalez atal. Kontratazioa eragin zuen ekoizpen jarduerak behera egin ahala, alderantzizko hurrenkeran etenen dira kontratuak.

Pertsona bati zerbitzuak emateko deialdia egiten bazaio eta lanera joaten ez bada, edo lanera ez joatea ez badu behar bezala justifikatzen lanean hasteko eguna baino 7 egun lehenago, aldizkako langile finko izateari utziko dio, eta borondatezko bajan geratuko da. Horrez gain, enpresarekin duen lan kontratua iraungiko da.

Jasota geratzen da, eta hala hitzartzen da, ezen aldizkako langile finko baten lan etenaldi bakoitzean ez dela iraungitzat joko lan harremana, etentzat baizik, nahiz eta langileak langabezia eskuratu jarduerarik ez duen bitartean.

Aldizkako langile finkoek benetan lan egindako ordu bakoitzeko ordainsaria jasoko dute, zeinetan sartuko baita aparteko ordainsarien eta mozkinen, asteko atsedenaldiaren, jaiegunen eta oporren zati proportzionala, dagokion taldearen eta lanbide mailaren urteko soldataren arabera.

36. artikulua. Behin-behineko kontratuak.

Langileen Estatutuaren 15.2 artikuluan xedatutakoarekin bat, ekoizpen inguruabartzat joko dira jardueraren noizbehinkako eta aurreikusi ezinezko hazkundea eta gorabeherak, baldin eta enpresaren jarduera normala izan arren aldi baterako desoreka sortzen badute eskuragarri dagoen enplegu egonkorraren eta behar denaren artean.

Aurreko paragrafoan aipatzen diren gorabeheren artean sartuko dira urteko oporraldien ondoriozkoak.

Berariaz adosten da ezen aurreikus ezin daitezkeen ekoizpen gorabeherengatik egiten diren behin-behineko kontratuek 9 hilabeteko iraupena izanen dutela gehienez, kontratua justifikatzen duen kausa zehatza gertatzen denetik.

Kontratuetan argi eta zehatz adieraziko dira kontratuaren oinarria eta sorburua.

Hitzarmen kolektibo honetan ezarrita dagoen gehieneko iraupenetik beherako kontratua egiten denean, eta bi alderdiak ados egonez gero, kontratua luzatzen ahalko da, baina kontratuaren guztirako iraupena eta luzapena ez da gehieneko iraupena baino handiagoa izaten ahalko.

37. artikulua. Lanpostua uztea eta aurreabisuak.

Langileek lanpostua beren borondatez uzteko erabakiaren berri emanen diote enpresari, idatziz eta gutxienez ere 15 egun aurretik.

Aurrez abisatzen ez bada, enpresak ahalmena izanen du azken likidazioan abisatu gabe utzitako egun kopurua kentzeko.

Era berean, enpresak kontratuaren bukaera idatziz eta gutxienez 15 egun lehenago jakinaraziko dio langileari, salbu eta langilearekin bitarteko kontratua itundua duenean eta ez dagoenean jakiterik ordezkatzearen arrazoia noiz bukatuko den, bai eta diziplinako kaleratzeen kasuetan ere.

38. artikulua. Enplegua bermatzeko neurriak eta lan baldintzen aplikazioa.

Elortzibarko Udaletik jakinarazten denez, enpresa pribatu baten bidezko kudeaketa berriro aukeratuz gero, baldintza agirian sartuko da kontzesiodun berriak Elortzibar Servicios Deportivos SL enpresan hitzarmen honetako 10. artikuluko maila funtzional guztietan diharduten eta 4 hilabeteko antzinatasuna edo gehiago duten langileak nahitaez subrogatu behar izatea, Langileen Estatutuaren 44. artikuluan ezarritako bermeak errespetatuz.

39. artikulua. Lanpostu hutsak betetzea.

Lanaldi partzialeko kontratua duten langile finko edo aldizkako finkoek, behar den lanbide trebakuntza izanez gero, eskubidea izanen dute lanpostu hutsak betetzeko, lanorduak behin betiko handituz. Horretarako, prozedura honi jarraituko zaio:

Langileei behar adinako aurrerapenarekin emanen zaie lanpostu hutsaren berri, interesa dutenek eskatzaile gisa izena eman ahal izateko.

Jakinarazpen horretan honako hauek ezarriko dira: betebeharrak, zer baloratuko den eta lanpostuaren baldintzak (ordutegia, soldata…).

Izangaiak eskatu diren betebeharren arabera baloratuko dira. Izangai batzuen artean berdinketarik badago, irizpide hauek hartuko dira kontutan, hurrenkera honetan:

• Antzinatasun handiagoa enpresan.
• Adin handiena.
• Kontratatutako lanaldiaren portzentaje txikiagoa.

Lanpostu hutsa aldi baterako beteko bada, prozedura honi jarraituko zaio:

Aldi baterako lanpostu hutsak bete nahi dituztenek enpresako zuzendaritzari jakinaraziko diote. Langile horiek biltzen dituen zerrenda bat eginen da, bertan jasorik deitzeko ordena eta pertsona bakoitzak betetzen ahal dituen lanpostuak.

Deitzeko ordena ezartzeko, lehentasuna emanen zaio kontratatutako lanaldiaren ehuneko txikienari. Deiak ezarri den hurrenkeran eginen dira.

Lanpostua aldi baterako betetzea borondatez onartuko da. Norbaitek ez badu onartzen, zerrendako azken postura iraganen da.

Norbaitek lehen dei ordena ezarri ondotik sartu nahi badu ordezkapenen zerrendan, zilegi izanen du, eta azkeneko postuan kokatuko da.

Langileen ordezkariei prozeduraren bilakaerari eta amaierari buruzko informazioa helaraziko zaie.

Ezein langilek ez du gaindituko lanaldiaren %100 lanpostu hutsen bat betetzean.

SEIGARREN KAPITULUA.–BESTE BATZUK

40. artikulua. Nomina ordaintzea.

Hileko nomina hura sortu eta hurrengo hileko lehen bost egun baliodunen barnean ordainduko da.

41. artikulua. Prestakuntza.

Enpresak konpromisoa hartzen du urtero bere langileentzako prestakuntza plan bat egiteko.

Legez behartuta dagoen prestakuntza, inbertitutako denboran eta kostuan, enpresaren kontura izanen da.

42. artikulua. Lan osasuna.

Hitzarmen hau sinatzean batzorde bat eratuko da, eta bertan proposatu eta zehaztuko dira lan osasunaren arloan egin beharreko jarduketak.

Enpresak langileen aseguru kolektiboaren poliza bat kontratatuko du.

43. artikulua. Ordu sindikalak metatzeko aukera.

Langileen Estatutuaren 68 e) artikuluan ezarritakoaren arabera, enpresa batzordeetako kideek edo langileen delegatuek hilean daukaten ordu kreditua langileen ordezkari bakar batek edo batzuek metatzen ahal dute, hauteskunde gune bereko ordezkariak gai horretan ados jarriz gero, betiere.

Itun hori gauzatzen bada, idatziz jakinaraziko zaio enpresako zuzendaritzari.

44. artikulua. Hitzarmenean ezarritakoa ez aplikatzeko klausula.

Enpresak ezin izanen dio inola ere heldu bere aldetik hitzarmen hau ez aplikatzeko aukerari Langileen Estatutuaren 82.3 artikuluko prozeduraz baliatuz, eta lehenik eta behin saiaketa egin beharko du muga-eguna baino lehen hitzarmena berriz ere negoziatzeko, beste hitzarmen bat lortzeko edo Langileen Estatutuaren 86.1 artikuluak ezartzen duen berrikuspena egiteko.

Enpresan akordiorik lortzen ez bada, bi alderdiek espresuki erabaki dute ezen, desadostasunak konpontzeko, Nafarroako Lan Auzitegiko akordioaren adiskidetze eta bitartekaritza prozesuen mende jarriko direla. Arbitraje prozedura aplikatuko da, bakar-bakarrik, bi alderdiak haren mende jartzeko ados badaude.

Orobat, gaia Aholku Batzorde Nazionalaren edo Autonomikoaren mende jartzen ahalko da, alderdien arteko adostasuna badago.

45. artikulua. Arau-hausteak eta zehapenak.

–Honako hauek dira falta arinak:

A) Hogeita hamar egunean lanera hiru aldiz berandu iristea.

B) Lanera huts egitearen arrazoiak ez jakinaraztea aurrez behar den denboraz.

C) Lanetik bidezko arrazoirik gabe alde egitea, nahiz eta denbora gutxirako izan, baldin eta enpresarentzako, erabiltzaileentzako edo lankideentzako kalteak direla-eta falta astun edo oso astuntzat hartzerik ez badago.

D) Fitxatzeko eginbeharra ez betetzea.

E) Zabarkeriaz jokatzea arauei edo jasotako aginduei dagokienez.

F) Aldi baterako ezintasuneko kasuetan, baja edo berrespen agiriak horretarako ezarritako epean ez jakinaraztea, ez eta helbide aldaketak eta, oro har, egoera zibilari eta familiarrari buruz zergen eta gizarte segurantzaren ondorioetarako garrantzitsuak izan daitezkeen gainerako datuak ere.

G) Laneko segurtasun eta higiene arauak ez betetzea, horren inguruabar edo ondorioengatik astuntzat edo oso astuntzat kalifikatzerik ez badago.

–Honako hauek dira falta astunak:

A) Lanera behin berandu iristea, enpresari edo erabiltzaileei kalte larria egiten bazaie edo haientzat arriskugarria bada.

B) Hogeita hamar egunean lanera hiru aldiz baino gehiagotan eta hamar baino gutxiagotan berandu iristea.

C) Hogeita hamar egunean behin lanera ez joatea justifikatu gabe.

D) Zerbitzuari dagokionez, agindutako lanetan behar den arreta ez jartzea eta goragokoen jarraibideei jaramonik ez egitea, enpresaren edo erabiltzaileen kalterako.

E) Hirurogei egunean falta arin bera errepikatzea edo beste falta arin bat egitea.

F) Hirurogei egunean falta arin bera errepikatzea edo beste falta arin bat egitea, nahiz eta beste mota batekoa izan, idatzizko zehapena egon den kasuetan.

G) Lankide baten ordez fitxatzea.

H) Laneko segurtasun eta higiene arauak ez betetzea, horren inguruabar edo ondorioengatik oso astuntzat kalifikatzerik ez badago.

–Falta oso astunak honako hauek dira:

A) Lanera bitan edo gehiagotan berandu iristea, enpresari edo erabiltzaileei kalte larria egiten bazaie edo haientzat arriskugarria bada.

B) Hamabi hilabeteko aldian 20 aldiz baino gehiagotan berandu iristea.

C) Hogeita hamar egunean hirutan lanera ez joatea justifikatu gabe.

D) Gaixotasun edo istripuaren itxurak egitea.

E) Lana uztea edo zabarkeriaz egitea, baldin eta enpresari edo erabiltzaileei kalte larriak ekartzen ahal badizkie.

F) Hitzezko eta egitezko tratu txarrak ematea erabiltzaileei, goragokoei edo lankideei.

G) Iruzurra, leialtasun eza edo konfiantza-abusua agindu zaion lanean.

H) Enpresari edo beste edozein pertsonari ebastea, lapurtzea edo jokabide horren konplize gisa aritzea, enpresan berean edo jardueraren kokaleku den lantokian.

I) Agintekeria.

J) Lanerako bajan dagoen bitartean langileak norbere zein besteren kontura lan egitea, bai eta baja egoera sortu edo luzatze aldera iruzur egitea ere.

K) Laurogeita hamar egunean falta astun bera errepikatzea edo beste falta astun bat egitea, nahiz eta beste mota batekoa izan.

Aurreko artikuluetako falten zerrenda adierazpen gisa eman da.

Zehapenak:

Enpresak zehapenak jartzeko ahalmena du. Zehapenak idatziz jakinaraziko zaizkio langileari; gertakariak, faltaren gradua eta ezarritako zehapena adieraziko dira.

Falta astunak eta oso astunak lehenbizi langileen ordezkariei jakinaraziko zaizkie, eta haien iritziak entzunen ditu enpresak zehapena jarri aurretik. Dena den, zehapenak jartzeko ahalmena enpresak izanen du beti.

Enpresak, falten astuntasuna eta inguruabarrak kontuan hartuta, gehienez zehapen hauek jartzen ahal ditu:

a. Falta arinak:

–Idatzizko kargu-hartzea.

–Enplegu eta soldatarik gabe uztea gehienez bi egunez.

b. Falta astunak:

–Idatzizko kargu-hartzea.

–3 egunetik 15 egunera bitartean enplegu eta soldatarik gabe uztea.

c. Falta oso astunak:

–Enplegu eta soldata gabe uztea 16 egunetik 60 egunera bitarte.

–Kaleratzea.

46. artikulua. Falten preskripzioa.

Graduaren arabera, falta arinek hamar egunen buruan preskribatuko dute, astunek hogei egunen buruan eta oso astunek hirurogei egunen buruan.

Horiek guztiak enpresak gertaeren berri izaten duenetik eta, betiere, gertatu eta sei hilabetera.

47. artikulua. Erretiro partziala eta errelebo kontratua.

Hitzarmena Nafarroako Aldizkari Ofizialean argitaratzen den egunetik aurrera, indarreko legediak une bakoitzean ezartzen dituen eskakizunak betetzen dituzten langileek erretiro partziala hartzen ahalko dute beren kabuz, baldin eta eskaera egiteko unean beren lanaldiaren %50ean gutxienez hartzen badute erretiroa.

Erretiroa %50 baino ehuneko txikiagoan hartu nahi badute, langilearen eta enpresaren arteko akordioa egin beharko da.

Erretiro partziala hartu duen langileak laneko aldia metatu ahalko du, baldin eta hala adosten badu aldez aurretik enpresarekin.

Aurreikusitako kasuetako edozeinetan, erretiro partziala hartu nahi duen langileak aurreabisua eman beharko du gutxienez erretiroa hartzeko eguna baino sei hilabete lehenago.

48. artikulua. Lege subsidiarioak.

Hitzarmen honetan jasota ez dagoen orotan, Nafarroako beste entitate batzuen jabetzako kirol ekipamenduak eta zerbitzuak kudeatzen dituzten enpresa eta entitateen hitzarmen kolektiboan, Langileen Estatutuan eta indarreko legedian xedatutakoa hartuko da aintzat.

Alderdiren batean hitzarmen sektoriala Elortzibar Servicios Deportivos SL enpresarena baino hobea bada, hobekuntza horiek automatikoki sartuko dira enpresako hitzarmenean.

Azken xedapenetako lehena.–"Fideltasun plusa" izenekoa ezartzen da, zeina ordainduko baita hamabi hilabeteetako ordainsari guztietan, langileak enpresarekiko fideltasun baldintza jakin batzuk betetzen dituenean:

Enpresarekin 2 urte eta egun bateko lotura duten langileek kontzeptu honengatik hitzarmeneko tauletan beren mailari dagokion hileko oinarrizko soldataren %2 jasoko dute, edo bestela, kontratatua duten lanaldiaren zati proportzionala.

Enpresarekin 3 urte eta egun bateko lotura duten langileek kontzeptu honengatik hitzarmeneko tauletan beren mailari dagokion hileko oinarrizko soldataren %4 jasoko dute, edo bestela, kontratatua duten lanaldiaren zati proportzionala.

Enpresarekin 4 urte eta egun bateko lotura duten langileek kontzeptu honengatik hitzarmeneko tauletan beren mailari dagokion hileko oinarrizko soldataren %6 jasoko dute, edo bestela, kontratatua duten lanaldiaren zati proportzionala.

Enpresarekin 10 urte eta egun bateko lotura duten langileek kontzeptu honengatik hitzarmeneko tauletan beren mailari dagokion hileko oinarrizko soldataren %8 jasoko dute, edo bestela, kontratatua duten lanaldiaren zati proportzionala.

Enpresarekin 13 urte eta egun bateko lotura duten langileek hitzarmeneko tauletan beren mailari dagokion hileko oinarrizko soldataren %10 jasoko dute kontzeptu horrengatik, edo, bestela, kontratatua duten lanaldiaren proportziozko zatia.

Ehuneko horiek ezin dira metatu.

Plus hori kasu bakoitzerako ezarri den portzentajean jasotzeko, loturako denbora-tarte guztiak erabat osatu behar dira, hau da, 2 urte eta egun batekoa, 3 urte eta egun batekoa, 4 urte eta egun batekoa, 10 urte eta egun batekoa eta 13 urte eta egun batekoa.

Baldin eta kirol kudeatzaileen hitzarmenean "fideltasun plusaren" kontzeptuan lehendik daudenak baino tarte bat gehiago sartzen bada, Elortzibar Servicios Deportivos SL enpresa publikoak beste maila bat sartzeko konpromisoa hartuko du, hileko oinarrizko soldataren %12koa.

Antzinatasunaren ondorioetarako, aintzat hartuko da instalazioa aurretik kudeatu duten hirugarren enpresetan izandako antzinatasuna, sektoreko hitzarmen probintzialaren 35. artikuluan jasotako langileen subrogazio eskubideak oinarri hartuta.

Azken xedapenetan bigarrena.–Berdintasun planak.

Probintziako hitzarmen sektorialean xedapen honi dagokionez ezarritakoari jarraituko zaio.

AHAIDETASUN-, ODOL-AHAIDETASUN ETA EZKONTZA-AHAIDETASUN MAILEN TAULA

1. ERANSKINA.–2025EKO SOLDATA TAULA

Soldata taula, 2025eko %2,5eko igoera aplikatuta

2. ERANSKINA.–2026KO SOLDATA TAULA

Soldata taula, 2026ko %1,5eko igoera aplikatuta

Iragarkiaren kodea: F2605836