Iragarkia

106. ALDIZKARIA - 2026ko ekainaren 2a

1. NAFARROAKO FORU KOMUNITATEA

1.5. ESTATUTUAK ETA LAN HITZARMEN KOLEKTIBOAK

62C/2026 EBAZPENA, martxoaren 23koa, Ekonomia Sozialeko eta Laneko zuzendari nagusiak emana, zeinaren bidez erabakitzen baita erregistratu, gordailutu eta Nafarroako Aldizkari Ofizialean argitaratu dadila Essity Operations Allo enpresak aurkeztutako hitzarmen kolektiboa.

Ikusi da Essity Operations Allo enpresak aurkeztutako hitzarmen kolektiboa (kode zenbakia: 31008872011900), erregistro honetan sartu baitzen 2026ko otsailaren 27an, 2025eko azaroaren 27an enpresaren eta sindikatuen ordezkariek sinatu ondoren.

Bat etorriz Langileen Estatutuaren Legearen testu bategina onesten duen urriaren 23ko 2/2015 Legegintzako Errege Dekretuaren 90. artikuluaren 2. eta 3. apartatuetan ezarritakoarekin eta hitzarmen kolektiboak, lan akordio kolektiboak eta berdintasun planak erregistratu eta gordailutzeari buruzko maiatzaren 28ko 713/2010 Errege Dekretuan ezarritakoarekin.

Nafarroako Foru Komunitateko Administrazioari eta foru-sektore publiko instituzionalari buruzko martxoaren 11ko 11/2019 Foru Legearen 32. artikuluak ematen dizkidan eskudantziak erabiliz, eta kontuan hartuta zer xedatzen den Eskubide Sozialetako, Ekonomia Sozialeko eta Enpleguko Departamentuaren egitura organikoa ezartzen duen azaroaren 15eko 251/2023 Foru Dekretuan,

EBAZTEN DUT:

Lehenengoa.–Nafarroako Hitzarmen Kolektiboen, Lan Akordio Kolektiboen eta Berdintasun Planen Erregistroan inskribatzea Essity Operations Allo enpresak aurkeztutako hitzarmen kolektiboa (kode zenbakia: 31008872011900).

Bigarrena.–Nafarroako Aldizkari Ofizialean argitara dadila agintzea, orok jakin dezan.

Iruñean, 2026ko martxoaren 23an.–Ekonomia Sozialeko eta Laneko zuzendari nagusia, Iñaki Mendióroz Casallo.

ESSITY OPERATIONS ALLO SLU ENPRESAREN HITZARMEN KOLEKTIBOA, ALLOKO (NAFARROA) LANTOKIRAKO, 2025., 2026. ETA 2027. URTEETARAKO

ESSITY OPERATIONS ALLO SLU enpresaren 2025., 2026., eta 2027. urteetarako Hitzarmen Kolektibo hau Enpresako Zuzendaritzak eta Alloko Enpresa Batzordeak negoziatu eta sinatu dute. Aldeek Hitzarmena negoziatu eta izenpetzeko legitimazioa dute, Langileen Estatutuaren Legearen testu bategina onetsi zuen urriaren 23ko 2/2015 Legegintzako Errege Dekretuaren 87.1. artikuluan xedatutakoarekin bat etorriz.

1. artikulua. Aplikazio eremua.

1.1. Hitzarmen hau Alloko (Nafarroa) Essity Operations Allo SLUren (aurrerantzean, "Essity" edo "enpresa") lantokiko langileen baldintza sozioekonomikoak aplikatu eta arautzen ditu. Lantokiak papera eta higiene pertsonaleko produktuak eta haien lehengaiak eta deribatuak fabrikatu, eraldatu eta merkaturatzen ditu.

1.2. Hitzarmen honen aplikazio-eremutik kanpo daude Operational Leader (OL) eta Site Manager lanpostuen artean (biak barne) daudenetan lan egiten dutenak. Hala ere, "White collar" (WC) izeneko taldeko langileei –Team Leader (TL) kategoriakoei izan ezik– Hitzarmena aplikatuko zaie, izaera ekonomikoko artikulu eta eranskin guztiei dagokiena izan ezik. Enpresak talde horrentzat ezarritako politikek arautuko dituzte taldearen baldintza ekonomikoak, adibidez, banakako soldata igoera (Merit), ordainsari aldagarria, bizi-aseguruaren estalduraren hobekuntza, eta etorkizunean ezartzen den beste edozein, diruzko edo gauzazko ordainsari baldintzekin zerikusia duena.

Team Leader (TL) gisara diharduten langileei Hitzarmen hau aplikatuko zaie ondorio guztietarako (ekonomia arlokoak barne), Lehen xedapen iragankorrean ezarritako laneratze irizpidearekin bat.

Era berean, Hitzarmen hau aplikatuko zaie, ondorio guztietarako, ekonomikoak barne, Paper-makinaren mantentze-lanetako langileen; Galdaren mantentze-lanetako langileen; Converting-eko mantentze-lanetako langileen; Ordezko piezen biltegiko langileen; Logistikako TL-ko eta Tick Off langileen lanpostuak betetzen dituzten langileei (gaur egun WC izaera dute), BC langile izatea erabakitzen badute.

Gaur egun postu horietan lan egiten duten langileak, Hitzarmenaren aplikazio eremuan BCra pasatzea aukeratzen dutenak, Lehen Xedapen Iragankorrean ezarritako irizpidearen arabera sartuko dira.

Tick off-eko (atezaina) langileei gaur egun aplikatzen diren ordutegi eta opor-sistema berak aplikatuko zaizkie, zerbitzuaren estaldura bermatzeko. Pertsona horiei 3. taldea eta 2. maila esleituko zaie.

BCra pasatzea erabakitzen ez duten eta WCn jarraitzen duten langileei hitzarmena aplikatzen jarraituko zaie, ekonomiari buruzko artikulu eta eranskin guztiak izan ezik.

2. artikulua. Hitzarmenaren indarraldia eta hitzarmena salatzea.

2025eko urtarrilaren 1etik 2027ko abenduaren 31ra arte, eta oso-osorik luzatuko da urte naturaletan, salbu eta artikulu honen 2.2 apartatuan ezarritakoari jarraikiz salatzen baldin bada.

2.1. Hitzarmen honen indarraldia 2025eko urtarrilaren 1etik 2027ko abenduaren 31ra bitartekoa izanen da; egun horretatik aurrera, indarra galduko dute behartze-baldintzek eta baldintza ekonomikoak arautzen dituztenek.

2.2. Hitzarmen honek 2025eko urtarrilaren 1etik izanen ditu ondorioak (hala denean, atzeraeraginezkoak ere bai), Nafarroako Aldizkari Ofizialean argitaratzen den eguna edozein dela ere. Hala ere, ez dute 2025eko urtarrilaren 1ean hartuko indarra, baizik eta geroago, hitzarmen honen artikuluetan geroagoko ondorio-data ezartzen zaizkien xedapenek.

Bi alderdietako edozeinek eskatzen ahalko du hitzarmen kolektibo honen azkena iragartzeko, mugaeguna baino hiru hilabete lehenago, dela hasierakoa, dela edozein luzapenetakoa. Hitzarmena salatu eta itundutako iraupena agortu ondoren, Langileen Estatutuaren 86.3 artikuluan xedatutakoaren ondorioetarako, salatutako hitzarmena indarrean egonen da alderdiek haren ordezko beste hitzarmen bat sinatu arte.

Hitzarmen hau bukatzen denetik urtebete igarotzen bada hitzarmen berria sinatu gabe, Langileen Estatutuaren 86.4 artikuluan xedatutakoa aplikatuko da.

3. artikulua. Bake soziala.

Hitzarmen hau sinatzeak eta aplikatzeak lantegian lan harreman batzuen esparrua ezartzea eta garatzea dakar, hark iraun bitartean, baita alde sinatzaileek beren artean egoten ahal diren desadostasunak konpontzeko elkarrizketa eta negoziazioa erabiltzeko asmoa eta konpromisoa adieraztea ere.

Bi aldeek Hitzarmen honetan jasotako edukia errespetatzeak berarekin ekarri behar du bake soziala enpresan. Hori helburu, bi alderdiek Hitzarmenaren edukiak goitik behera errespetatzeko konpromisoa hartzen dute.

4. artikulua. Konpentsazioa, xurgapena eta "ad personam" bermea.

1996ko abenduaren 31n banakako "ad personam" bermeak aitortuta dituzten langile guztiek berme horiei eutsiko diete, eta bermeak gainerako soldata kontzeptuen portzentaje berean gehituko dira urtero.

5. artikulua. Interpretaziorako eta aplikaziorako Batzorde Parekidea.

5.1. Eraketa. Bi alderdi negoziatzaileek batzordea ezartzea erabaki dute, itundutakoa interpretatzeko, zaintzeko eta kontrolatzeko organo gisa. Hitzarmenaren Negoziazio Batzordeak hautatuko du hori.

5.2. Osaera. Batzordea enpresaren lau ordezkarik eta langileen lau ordezkarik osatuko dute. Kide guztien artean idazkari bat aukeratuko dute.

Batzorde horrek aholkularien noizbehinkako edo etengabeko zerbitzuak erabiltzen ahalko ditu, bere eskumeneko gai guztietan. Aholkulari horiek Batzordea osatzen duten aldeek izendatuko dituzte:

5.3. Eginkizunak. Hona hemen Batzordearen berariazko eginkizunak:

1. Hitzarmena interpretatzea.

2. Itundutakoa betetzen den zaintzea.

3. Hitzarmen honetan ezarritako baldintzak ez aplikatzearen arloan sor daitekeen edozein desadostasun ebaztea, Langileen Estatutuaren 82.3 artikuluan ezarritakoaren arabera.

4. Elkarren arteko adostasunez alderdiek ematen dizkioten gaiak.

Organo horrek arlo horietan esku hartuko du nahitaez, baina alderdiek askatasuna izanen dute, tramite hori burututa, agintaritza edo jurisdikzio eskudunera jotzeko.

5.4. Jarduteko prozedura. Alderdi bakoitzak 5.3 apartatuan adierazitako gaiei buruz sortzen diren galderak eginen dizkie bere ordezkariei. Beste alderdiari 5.3 apartatuaren 1., 2. eta 4. puntuei buruzko kontuen berri emanen zaio, eta alderdiak ados jarri beharko dira gehienez 15 eguneko epean, azken jakinarazpenetik zenbatuta, batzordearen bilera egiteko eguna eta ordua finkatzeko. Gehienez hamabost eguneko epean, batzordeak akta eginen du hartu dituen erabakiekin eta hitzartu diren salbuespenekin, alderdiek ituntzen dituzten salbuespenak izan ezik. Erabakiak aho batez hartu beharko dira eta interesdunei jakinaraziko zaizkie, bileraren aktarekin batera. 5.3 apartatuko 3. puntuan adierazi bezala Hitzarmen kolektiboaren baldintzak ez aplikatzeari dagokionez, Langileen Estatutuaren 82.3 artikuluan xedatutakoari jarraituko zaio. Kontsultaldian adostasunik ez bada, alderdietako edozeinek batzorde parekidearen esku utziko ditu desadostasunak, eta horrek gehienez ere zazpi eguneko epea izanen du erabakitzeko, desadostasuna planteatzen zaionetik. Batzordeak adostasuna lortu ezean, alderdiek Nafarroako Lan Auzitegiaren gatazkak auzibidetik kanpo konpontzeko prozeduretara joko dute.

6. artikulua. Lanaren antolaketa.

Enpresako Zuzendaritzari dagokio lana antolatzeko ahalmena. Hitzarmen honetako arauei jarraituz erabiliko du ahalmen hori, une bakoitzean indarra duten xedapen orokorrak errespetatuta.

Epe luzerako eraginkortasuna, produktibitatea eta lehiakortasuna optimizatzeko asmoz, Essity enpresak industria eragiketen bikaintasunerako eta etengabeko hobekuntzarako programak (Manufacturing excellence) inplementatzen ditu lantegi guztietan.

Hitzarmen hau sinatzen duten alderdiek adosten dute haiek uneoro babestu behar dituztela sistema horiek, antolakuntza-sistema (Blue Print) inplementatzen eta mantentzen laguntzeko, baita langile guztien trebakuntza sustatzeko ere, gaitasunen matrize baten bidez, non sartzen baita mantentze-lanen zati bat lineako ekipoetan sartzea (skill matrix), ekipoen barruan etengabeko hobekuntzaren kultura sustatzea eta enplegatuei beren jarduerari, garapen-planei eta etengabeko ebaluazioari buruzko informazioa ematea (feedback).

Zuzendaritzak lanaldi arruntaren barnean orduak ezartzeko modua zehaztuko du, etengabeko hobekuntzako saioetara joateko. Batzordeak jarduera hori babesteko konpromisoa hartzen du, langileen gaitasunak garatzeko funtsezko tresna baita.

7. artikulua. Langileen sailkapena, eginkizunen araberakoa.

Hitzarmena sinatzeko unean haren esparruan dauden langileek okupatzen dituzten lanpostuen sailkapena, lanbide taldeen araberakoa, I. eranskinean azaltzen da.

Bai lanpostu berriak, bai eginkizunak nabarmen aldatzeagatik etorkizunean berriro sailkatu beharko diren lanpostuak, lehendik dauden lanpostuekin erkatuz sailkatuko dira, I. eranskinaren lanbide-taldeen sistemaren arabera. Enpresa Batzordeko hiru kidek eta Zuzendaritzaren hiru ordezkarik osaturiko batzorde parekideak eginen du lanpostuen sailkapen hori. Batzordearen barnean desadostasunik badago, aldeek izendatzen duten/dituzten arbitroaren/arbitroen erabaki arbitrala eskatuko da gaia ebazteko. Sailkapen horretarako erreferentzia gisa, lanpostuen zerrenda bat gehitu da II. eranskinean (ez xehe-xehea), eginkizun garrantzitsuenak deskribatzen dituena sailkapenaren arabera.

Apartatu hau ez zaie aplikatuko Hitzarmen honetan zehaztu gabeko ezein lanbide-taldeko langileei; izan ere, enpresak libreki hautatzen ahalko ditu langile horiek eta, horrenbestez, Hitzarmen honen aplikazio esparrutik kanpo daude.

8. artikulua. Eginkizun-aniztasuna.

Kontuan hartuta lantegiak ahalik eta produktibitate eta malgutasun handienak izan behar dituela –kostuak murrizteko eta konpainia eta haren produktuak lehiakorrak izateko faktore garrantzitsua den aldetik–, Hitzarmen honen eraginpeko eginkizun-aniztasunaren irizpidea ezarriko da langileen artean, ahalik eta modurik orokorrenean.

Eginkizun-aniztasun deitzen zaio langilearen gaitasun jakin bati, esleitua ohi duen lanpostua ez dena/direnak eraginkortasun osoz eta eskatzen ahal diren parametroen barnean garatzekoari.

Horretarako, eginkizun-aniztasunaren bi sistema ezarri dira: bat paper-makinarako eta bestea converting-erako.

8.1. Paper-makinarako eginkizun-aniztasunaren sistema:

a) Funtzionamendua: diruz konpentsatuko zaio eginkizun-aniztasuna horrela benetan diharduen langileari, hilabetero eginkizun-aniztasunaren sari bat ordainduz. IV. eranskinaren taulan eta eginkizun-aniztasunaren gaineko apartatu honetan ezarritakoari jarraikiz ordainduko da.

Ez zaio inori eginkizun-aniztasunaren saririk ordainduko esleitua ohi duen lanpostuan jarduteagatik. Ohiko lanpostua aldatzen badu, langileak ez du gehiago ohiko lanpostu berriari dagokion eginkizun-aniztasuneko saria (horrelakorik badu) kobratuko, baina aurreko lanpostuari zegokion saria kobratzen hasiko da, baldin eta eginkizun-aniztasuna esleituta balu; izan ere, ohiko lanpostutzat jotzen da ondoz ondoko lau hilabetetik gorako aldia eman badu. Ohiko lanpostutzat joko da, halaber, baldin eta enpresak idatziz hala jakinarazten badu, nahiz eta langileak lanpostu horretan lau hilabete baino gutxiago eman.

Ez zaio eginkizun-aniztasuneko saririk aplikatzen ahalko ohiko lanpostuaren osagarri direnetan; adibidez: paper-makinako gidaria eta laguntzailea, eta abar.

b) Eginkizun-aniztasunaren saria eskuratzeko prozedura:

1. Urtarrileko lehen hamabostaldian, urtero, eginkizun-aniztasuneko sarien zerrenda eskainiko du enpresak, bi faktore hauen arabera betiere: aurreikusitako beharrak, batetik, eta lehenagotik emandako eginkizun-aniztasuneko sarien kopurua, bestetik.

2. Urtarrileko bigarren hamabostaldian, urtero, langileak goiko hurrengo arduradunari jakinaraziko dio enpresak eskainitako eginkizun-aniztasuneko sarietako bat edo batzuk eskuratzeko prozesuan parte hartu nahi duela. Epe hori agortutakoan eginkizun-aniztasuneko zenbait sari eskatu gabe geratu badira, urte osoan eskatzen ahalko dira horiek.

Aurreikusi gabeko beharrengatik edo lanpostu berrien sorreragatik enpresak egokitzat jotzen badu, eginkizun-aniztasun berriak eskaintzen ahalko ditu goian adierazitako epetik kanpo, baldintza beretan.

3. Egindako eskaera jasotzen duen goiko hurrengo arduradunak horren berri emanen dio Giza Baliabideen Atalari.

4. Egindako eskaerak enpresak eskainitako eginkizun-aniztasuneko sariak baino gehiago badira irizpide hauen arabera hautatuko dira langile partaideak, arau orokor gisa, sariak eskuratzeko prozesuan:

a.–Azken bi urteko epean lanpostuan aldez aurreko esperientzia duen langilea.

b.–Eginkizun-aniztasunaren xede den lanpostura ongien moldatzen zaion prestakuntza akademikoa duen langilea.

c.–Atalaren barneko antzinatasuna.

d.–Txanda-sistema bera duen langilea.

5. Eskaerak behin betiko onetsi baino lehen, Eginkizun-Aniztasunaren Batzordea bilduko da (langileen ordezkariek hautatutako hiru pertsonak eta enpresaren hiru ordezkarik osatuta), desadostasuna sortzen duten kasuak aztertzeko, eta kasu bakoitzean prestakuntzaren gehieneko iraupena finkatzeko. Enpresak kalitateko botoa izanen du, desadostasuna gainditzen ez den kasuetan auzia ebazteko.

6. Eskaera onetsi eta gero, enpresak tutorea hautatuko du, eginkizun-aniztasunaren saria eskuratzeko behar den prozesuaren arduraduna izanen dena.

7. Tutoreak egokitzat jotzen dituen prestakuntza txanda eta egunak ezarriko ditu, ahal dela ohiko lanalditik kanpo. Langileak prestakuntza jasotzen badu bere lan egutegitik kanpo, prestakuntza egun bakoitzeko lanaldi arrunt baten zenbatekoaren %60 jasoko du, eta ondorio guztietarako denbora hori prestakuntza ordutzat joko da.

Prestakuntza aldia gaindituta –aldeko txostena eta Departamentuko zuzendariaren oniritzia jasotzearekin batera– langileari lanpostua esleituko zaio, ondoz ondoko bost txandatan, gehienez, bakar-bakarrik gauza dezan.

Prestakuntza aldia gainditzeko, beharrezkoa izanen da ondorio horretarako esleituriko tutoreak aldeko txostena eta Departamentuko zuzendariak oniritzia ematea.

Prestakuntza aldia gainditzen ez bada, eginkizun-aniztasuna eskatu beharko da berriro ere.

8. Eginkizun-aniztasuneko sariaren xede den lanpostua menperatzen duela egiaztatzeko langileak egin beharreko lau asteko –gehienez ere– probaldiaren ondoren, tutoreak txostena eginen du, langilea lanpostuan gutxieneko segurtasun-, kalitate- eta ekoizpen-estandarrak beteaz aritzeko egokia ala desegokia den azaltzeko. Txostena aldekoa izanez gero, eta Departamentuko zuzendariak zein Giza Baliabideen Departamentuak oniritzia ematen badute, eginkizun-aniztasuneko saria emanen zaio langileari, eta hark eginkizun-aniztasuneko sariaren xede den lanpostuak esleituta daukan txanda-sistema onartuko du, hori gauzatzeko eskatzen bazaio. Aldiz, txostena aurkakoa izanez gero, langileak eginkizun-aniztasuneko saria eskuratzeko prozesua hasteko eskatzen ahalko du berriro.

9. 7. eta 8. apartatuek aipatzen duten tutorearen txostenetako edozein aurkakoa bada, langileen ordezkariek hautatutako hiru pertsonak eta enpresaren hiru ordezkarik osatzen duten Eginkizun-Aniztasunaren Batzordeari jakinaraziko zaio, kasuak banan-banan azter ditzan. Enpresak kalitateko botoa izanen du, desadostasuna gainditzen ez den kasuetan auzia ebazteko.

c) Ordainsariak: eginkizun-aniztasunaren saria hamabi hilerokotan ordainduko da.

Saria esleitu ondoren, haren lehenbiziko ordainketa hurrengo hileko nominan eginen da.

Eginkizun-aniztasunaren saria eman edo luzatzen denetik bi urte igarota, saria berritu eginen da, eta hurrengo bi urteetan ordainduko, aldi horretan sei txandatan, baldin eta aurretiaz segurtasun-, kalitate- eta ekoizpen-estandarrak betetzeko eskuratutako gaitasunari %100ean eusten zaiola egiaztatzen bada.

Eginkizun-aniztasunaren saria eman edo berritzen denetik bi urte igarotzen badira sei txandatan, gutxienez, eskuratutako gaitasunari eusten zaiola egiaztatu gabe, eginkizun-aniztasunaren sariaren zenbatekoa %50 murriztuko da hurrengo urtean.

Urte horretan hiru txandatan –gutxienez–, segurtasun-, kalitate- eta ekoizpen-estandarrak betetzeko eskuratutako gaitasunari %100ean eusten zaiola egiaztatzen ez bada, langileak eginkizun-aniztasunaren saria jasotzeari utziko dio aldi horren hondarrean. Etorkizunean eginkizun-aniztasuneko saria jasotzeko aukera izateko, ohiko eskaera prozesua abiarazi arte itxaron beharko du.

Baina urte horretan hiru txandatan, gutxienez, segurtasun-, kalitate- eta ekoizpen-estandarrak betetzeko eskuratutako gaitasunari %100ean eusten diola egiaztatzen badu, urte hondarrean eginkizun-aniztasunaren saria berrituko litzaioke bi urteko aldirako, halako moduan non sariaren %100 kobratuko bailuke berriro, eta 8.5 apartatu osoan esandakoa aplikatuko bailitzateke.

d) Eginkizun-aniztasunen kopurua: hitzarmena indarrean den bitartean, unean uneko beharren, etorkizuneko aurreikuspenen eta aurretik emandako eginkizun-aniztasunaren sari-kopuruaren arabera egokitzat jotzen dituen eginkizun-aniztasunaren sariak eskainiko ditu enpresak.

8.2. Eginkizun-aniztasunen sistema Converting-en:

2025eko abuztuaren 1etik aurrera, eginkizun-aniztasunen sistema berri bat ezartzen da, Converting-en aplikatzekoa. Sistema hori honako arau hauen arabera arautuko da:

1.–Eginkizun-aniztasuna aplikatzeko, postu/makina multzo hauek ezartzen dira:

a) Geruza bakarreko tolesketa: hiru talde egonen dira. Lehenbiziko taldea T11-k eta T12-k osatuko dute, eta eginkizun-aniztasunaren zenbatekoa 176,15 euro izanen da. Bigarren taldea T5-ek eta T6-k osatuko dute (176,15 euro); eta hirugarren taldea paletizatzaileak osatuko du. Azken horren eginkizun-aniztasunaren zenbatekoa 176,15 euro izanen da.

b) Geruza askoko tolesketa: hiru talde egonen dira. Lehenbiziko taldea T1-ek, T7-k eta T10-ek osatuko dute, eta eginkizun-aniztasunaren zenbatekoa 244,30 euro izanen da. Bigarren taldea T2-k osatuko du (244,30 euro); eta hirugarren taldea paletizatzaileak osatuko du. Azken horren eginkizun-aniztasunaren zenbatekoa 176,15 euro izanen da.

c) HAFA: bost talde egonen dira. Lehenbiziko taldea Interfolder makinaren langileek osatuko dute, eta zenbatekoa 627,10 euro izanen da. Bigarren taldea Aurpegi-zapien lineako langileek osatuko dute, eta zenbatekoa 627,10 euro izanen da. Hirugarren taldea M1-ek eta L25-ek osatuko dute, eta eginkizun-aniztasunaren zenbatekoa 627,10 euro izanen da. Laugarren taldea M2-k osatuko du (627,10 euro), eta bosgarren taldea L24-k (627,10 euro).

d) Biribilkiak: paketatzeko makinetan honako talde hauek egonen dira: (i) TMC L13, L18 eta L20 (556,64 euro); (ii) TMC L17 (556,64 euro); (iii) A5T L 20 paketatzeko makina (556,64 euro). L56 linea (627,10 euro). Birbobinatzeko makinetan talde hauek egonen dira: (i) L13, L17 eta L18 (627,10 euro), eta (ii) L 20 (627,10 euro). Talde batetik bestera pasatzeak, edo alderantziz, eginkizun-aniztasunaren %10 jasotzeko eskubidea sortuko du, hurrengo puntuan deskribatzen den sistemaren arabera.

2.–Arestian aipatutako zenbatekoaren %10 ordainduko da, langilearen ohiko lanpostukoa ez den beste talde bateko lanpostu batean benetan lan egindako egun bakoitzeko. %100era iristean (hau da, hainbat postutan lan egindako 10 egun), langileak ohiko postutik kanpo lan egindako talde bakoitzaren eginkizun-aniztasunaren %100eko zenbatekoa mantenduko du urte naturalean (urtarrilaren 1etik abenduaren 31ra), eta ez du zenbateko gehigarririk jasoko 10 egunetik aurrera bestelako postuetan lan egindako egunengatik. Hurrengo urte naturalean, berriz hasiko da zenbaketa hutsetik.

8.3. Espezializazio saria.

2017-2020 aldiko Hitzarmena sinatu zen egunean langileek aitortutako eginkizun-aniztasunaren sariak haien banakako ordainsarien zati dira orain; "espezializazio sari" deritzo horietako bakoitzari.

Espezializazio sarien zenbateko guztien batura nominan ordainduko da, espezializazio sariaren kontzeptu gisa; gorde eginen da horien zerrenda, langile jakin batek ezin dezan espezializazio sari gisa esleituta duen eginkizun-aniztasuneko saririk berriro eskuratu.

Ondoriozko zenbatekoa urte naturalaren barnean sortuko da, hamabi hilerokotan proportzionalki banatuta, eta oinarrizko soldataren edo Hitzarmeneko soldataren gehikuntza bera izanen du.

Langile jakin batek eginkizun-aniztasuneko saria esleituta duen lanpostua betetzen badu, eta espezializazio sari gisa jasotzen badu, hori jasotzeari utziko dio lanpostuan diharduen bitartean. Langileak lanpostu hori betetzeari utziko balio, lanpostua okupatzeagatik jasotzeari utzitako espezializazio saria jasoko du berriro automatikoki.

8.4. Lanpostuak kentzea.

Lanpostu jakin bat kentzeak lanpostu horri dagozkion eginkizun-aniztasuneko sariak desagertzea ekarriko du. Hala ere, eginkizun-aniztasuneko sari gisa aitortuta dituzten langileek sariaren %50 jasotzeko eskubideari eutsiko diote lanpostua kendu ondorengo hamabi hilerokotan. Hamabi hilabeteko aldi hori burututakoan, beraz, ez dute inolako diru-kopururik jasoko kontzeptu horrengatik.

8.5. Bobinak kargatzeko trebakuntzaren saria.

Bobinak kargatzeko postuan prestatzen eta trebatzen diren logistika arloko langile guztiek 30 euro gordineko espezializazio-osagarria jasoko dute hilean.

9. artikulua. Kontratazioa, barne-igoera eta plantilla.

A.–Kontratazioa.

9.1. Plantilla handitzeko erabakia enpresako Zuzendaritzaren ahalmena izanen da. Dena den, Langileen Estatutuaren 8. artikuluak aipatzen dituen lan-kontratuen oinarrizko kopiari buruzko informazioa eman beharko du, baita luzapenen eta kontratu berriei dagozkien iragarpenen berri ere, hurrengo hamar eguneko epean. Era berean, lan harremanaren azkenari buruzko agiriak jakinarazi beharko ditu. Lanpostu berriak beteko dituzten pertsonen hautaketa enpresako Zuzendaritzari dagokio, Hitzarmen honetan xedatutakoaren bidetik.

9.2. Lantokian hasi berriei dagokienez, eta gainerako baldintzak berdinak diren neurrian, lehentasuna emanen zaie bete beharreko lanpostu hutsaren baliokideak diren lanbide-talde berekoetan aurretik lantegian aritu diren langileei, iraupen mugatuko edo langileak lagatzeko kontratuen bidez, baldin eta haren arduradunek ongi baloratzen badute enpresan aurretik egindako lana.

9.3. Lan-kontratuak iraupen mugagabea duela ulertuko da, nahiz eta iraupen mugatuko lan-kontratuak egiten ahal diren, legedian zehaztutako zirkunstantziak edo arrazoiak tarteko.

Produkzioaren inguruabarren arabera zehaztutako iraupena duen lan-kontratuaren iraupena Estatuko ore-, paper- eta kartoi-hitzarmen kolektiboaren 6.10 artikuluak arautzen du, Langileen Estatutuaren 15.2 artikuluak xedatutakoaren arabera.

9.4. Langileen sailkapena, enpresan emandako denboraren araberakoa.

Hitzarmen honen aplikazio-eremuan dauden langileak honela sailkatuko dira, enpresan lanean eman duten denboraren arabera:

1. Langile finkoak dira kontratuaren iraupenari buruz inolako modalitaterik itundu gabe enpresak onartzen dituenak.

2. Aldi baterako langileak dira indarra duen legedian ezarritako edozein kontratazio modalitatetan enpresak onartzen dituenak.

9.5. Lan-kontratuen ahozko akordioaren balio generikoa ezertan eragotzi gabe, iraupen mugatuko kontratuak idatziz eginen dira beti, haien iraupena bi astetik gorakoa bada. Horietan haien xedea, baldintzak eta iraupena adierazi beharko dira, eta langileak behar bezala baimendutako kopia jaso beharko du. Eskakizun horiek bete ezean, kontratua iraupen mugagaberako egin dela ulertuko da. Halaber, nahita lege-iruzurrean hitzartutako aldi baterako kontratuak ere iraupen mugagaberako egiten direla ulertuko da.

9.6. Iraupen mugatuko kontratu mota guztietan, enpresak idatziz eta gutxienez hamabost egun lehenago jakinarazi beharko dio, nahitaez, beste aldeari kontratua amaitzear dela, kontratuaren iraupenak eta izaerak horretarako aukera ematen badute.

9.7. Kontratazio mota alde batera, kontrataturiko langileak Hitzarmen honetan bere lanposturako ezarritako ordainsariak jasoko ditu, prestakuntza-kontratuetan (ikas-ekinezko prestakuntza kontratua, eta praktika profesionala lortzeko prestakuntza-kontratua) izan ezik, horiek berariazko ordainsariak baitituzte, legezkoak edo Hitzarmen bidezkoak.

9.8. Ordainsari hau aplikatzen ahal zaie prestakuntza-kontratuei:

9.8.1. Praktika profesionala lortzeko prestakuntza-kontratuetan, lanpostu beretan edo parekoetan diharduten langileentzat Hitzarmenean finkatutako soldataren %60. Nolanahi ere, Langileen Estatutuaren 11.3 artikuluko i) apartatuan xedatutakoa betez, praktika profesionala lortzeko prestakuntza-kontratua duen langilearen gutxieneko ordainsaria ez da izaten ahalko ikas-ekinezko prestakuntza kontraturako ezarritako gutxieneko ordainsaria baino txikiagoa (ondorengo 9.8.2 apartatuan xedatutakoaren arabera), ez eta lanbide arteko gutxieneko soldata baino txikiagoa ere, benetan lanean emandako denboraren proportzioaren arabera.

9.8.2. Ordainsari hau aplikatzen ahal zaie ikas-ekinezko prestakuntza kontratuei:

–18 urtetik beherakoentzat, 1. taldeko 3. mailarako finkatutako ordainsariaren %60.

–18 urtetik gorakoentzat, 1. taldeko 3. mailarako finkatutako ordainsariaren %70 eta %80, hurrenez hurren, kontratuaren indarraldiko lehen eta bigarren urteetan.

9.9. Egiten diren lanaldi partzialeko kontratuak ez dira izaten ahalko asteko 15 ordutik edo hileko 60 ordutik beherakoak. Apartatu hau ez zaio aplikatuko hitzarmenaren 24. artikuluan ezarritako erretiro partzialek justifikatzen duten kontratazio partzialari.

9.10. Legedi aplikagarria zorrotz betez kontratatuko dira aldi baterako langileak, une bakoitzean indarra duten kontratazio modalitateen bidez. Hala ere, kontratazioa jarraian adieraziko diren negozio-inguruabarrei erantzun ahal izateko beharreko gutxieneko langile-kopuru txikienera mugatuko da: merkatuaren beharren arabera ekoizpen gehikuntzari erantzutea, absentismoaren estaltzea, produktuaren berreskurapena, salgaien kargaren gehikuntza, eta abar.

Hitzarmenaren indarraldiko urte bakoitzeko urtarrilean, enpresaren hiru ordezkarik eta Enpresa Batzordeko hiru kidek osatutako Lan Batzordea bilduko da, lantegiko aurreko urteko aldi baterako kontratazio mailen bilakaera eta uneko ekitaldirako aurreikuspenak aztertzeko.

Aldi baterako kontratazioari eragiten dioten eta urtearen gainerako hilabeteetan gertatzen ahal diren ohiz kanpoko egoera garrantzitsurik gertatuz gero, batzorde hori osatzen duten bi aldeetako edozeinek besteari deitzen ahalko dio, egoera horiek aztertzeko.

9.11. Langileak enpresan lanean hastean proba gisa ariko direla ulertuko da, idatziz horrela agertzen bada.

9.12. Probaldiaren gehieneko iraupena hau izanen da:

–Mantentze-lanak: bi hilabetekoa, maila guztietan.

–Ekoizpena: bi hilabetekoa, maila guztietan.

–Administrariak eta teknikariak: bi hilabetekoa, maila guztietan, unibertsitate tituluaren arabera kontratatutako langileen kasuan izan ezik, horien probaldia sei hilabetekoa izanen baita, baldin eta haien kontratuan halako iraupena zehazten bada; lan-kontratuak halakorik aipatu ezean, iraupena bi hilabetekoa izanen da.

Unibertsitateko titulazioaren (goi mailakoa, erdi mailakoa edo diplomatura) arabera kontratatutako langileen kasuan izan ezik, horien probaldia sei hilabetekoa izanen baita.

9.13. Aldi baterako ezintasun egoerak probaldia etenen du, betiere dagokion lan-kontratuan idatziz hala adierazten bada.

9.14. Probaldian, langileak nahiz enpresak hura bere horretan utzi edo kontratua iraungitzen ahal dute aldez aurretik abisurik eman gabe, ezein aldek kalte-ordainik jasotzeko eskubiderik izan gabe, baina bai langileak dagokion likidazioa. Probaldia gainditu ondoren, langilea plantillan sartuko da, eta probaldian eman duen denbora antzinatasunaren ondorioetarako zenbatuko da.

9.15. Behin-behineko kontratua duten langileek ez dute probaldirik egin beharko langile finko izatera igarotzen direnean.

9.16. Legeak aldian-aldian onartzen dituen kontratazio forma guztiak erabiltzen ahalko ditu.

9.17. Lana uztea. Langileak –haren kontratu mota edozein izanik ere–, bertan behera uzten ahalko du lan harremana noiznahi, baldintza bakarra betez: enpresari jakinaraztea gutxienez hamabost egun lehenago.

Langileak aurretik abisua emateko baldintza hori behar den epean betetzen ez badu, enpresak likidaziotik kentzen ahalko dio egun bateko soldataren zenbatekoa, abisu hori atzeratu den egun bakoitzeko.

Enpresak abisu hori behar den epean jasotzen badu, langileari likidazioa ordaindu beharko dio epea agortutakoan. Enpresak betebehar hori betetzen ez badu, langileak eskubidea izanen du egun bateko soldata jasotzeko, likidazioaren ordainketan atzeratutako egun bakoitzeko.

B.–Barne-igoera eta lantokian hasi berriak.

9.18. Enpresak lanpostu iraunkor hutsak lanean hasiz edo barne-igoera bidez betetzeko hautaketa-prozesuak jakinaraziko dizkio Enpresa Batzordeari, enpresaren bitarteko elektronikoetan (Essentials eta Essence pantailak) zein iragarki oholetan argitaratuz, egin beharreko sustapenari edo kontratazioari buruzko erabakia hartu baino hamar egun lehenago, gutxienez.

9.19. Baldintza beretan izanik, sortzen diren lanpostu hutsak betetzeko lehentasun-eskubidea izanen dute enpresako langile guztiek. Barne-igoeretarako, eta baldintza beretan izanik, antzinatasuna lehentasunezko merezimendutzat joko da.

9.20. Lantokian hasi berriei dagokienez, eta gainerako baldintzak berdinak diren neurrian, lehentasuna emanen zaie bete beharreko lanpostu hutsaren baliokideak diren lanbide-talde berekoetan aurretik lantegian aritu diren langileei, iraupen mugatuko edo langileak lagatzeko kontratuen bidez, baldin eta haren arduradunek ongi baloratzen badute enpresan aurretik egindako lana.

9.21. Enpresak hautaketa-prozesuari buruzko jakinarazpena eman eta hurrengo 7 eguneko aldian, Hautaketa Batzordearen bilera egiteko eskatzen ahalko du Enpresa Batzordeak, hautaketa prozesuan parte hartzen duten barne-hautagaiei buruzko iritzia eman ahal izateko. Enpresari dagokio Batzorde horren bilera deitzea, egin beharreko barne-igoera edo kontratazioari buruzko erabakia hartu baino lehen. Kasu bakoitzean ondorio propio hautatutako sei ordezkarik (enpresako eta Enpresa Batzordeko hiruna) osatuko dute batzorde hori. Hala eta guztiz ere, enpresak izanen du kontratazioei edo barne-igoerei buruzko erabakiak hartzeko ahalmena.

9.22. Igoerei edo kontratazioei buruzko aurreko apartatua ez zaie aplikatuko TLtik (Team Leader) gorako pertsonek okupatuko dituzten lanpostuei; izan ere, enpresak berak jarraituko du hautatzen lanpostu horietarako nahi dituen langileak.

10. artikulua. Lekualdaketak.

10.1. Langileen lekualdatzeak ondorengo arrazoiengatik egiten ahalko dira:

a) Interesdunak hala eskatuta.

b) Enpresaren eta langilearen arteko adostasunaren ondorioz.

c) Zerbitzuaren beharrak.

d) Trukearen bidez.

10.2. Enpresak aldez aurretik onartuta, lekualdaketa langileak eskatuta egiten denean, langileak ez du aldaketak sortzen dituen gastuengatiko kalte-ordainik jasotzeko eskubiderik, eta lanpostu berriaren baldintzak bete beharko ditu; baldintza horiek idatziz eman beharko zaizkio aditzera.

10.3. Lekualdaketa enpresak eta langileak adostuta egiten bada, lekualdaketa horren baldintzei dagokienez, bi aldeek hitzartutakoa –zein idatziz jasoko baita betiere– beteko da.

10.4. Arrazoi tekniko, antolakuntzazko edo ekoizpeneko justifikatuak badaude, eta alderdiek ez badute aurreko artikuluan ezarritako adostasuna lortzen, Langileen Estatutuaren 40. artikuluan ezarritakoari jarraituko zaio.

Langileak bi aukera hauen artean hautatzeko eskubidea izanen du: eskualdaketa onartzea, gastuen ordainean konpentsazioa jasota, edo kontratua iraungitzea, arrazoi teknologiko edo ekonomikoengatik baimenduriko iraungipenerako finkatzen den kalte-ordaina jasota, enpresarekin erabaki onuragarriagoa itundu ezean.

Enpresaren ahalmen hori behin bakarrik baliatzen ahalko da langile bakoitzarekin.

Lekuz aldatutako langileak ondorengo gastuen zenbatekoa jasoko du konpentsazio gisa, aldez aurretik justifikatuta:

–Lokomozio-gastuak, interesdunarenak zein berarekin bizi diren ahaideen edo ekonomikoki haren menpe daudenenak.

–Altzari eta tresnen garraio-gastuak.

–Kalte-ordaina eskudirutan, egiazko soldataren bi hilabeteren halako, interesduna familiaburua bada, eta berrogeita bost egunekoaren halako, familiaburua ez bada.

–Seme-alaben eskola-gastuen diferentzia justifikatua, halakorik baldin badago, lekualdaketa gertatu deneko ikasturtea bukatu arte.

Gainera, haren beharretara egokitzen den eta lekualdaketa gertatu arte ordaintzen zuen errenta berdineko etxebizitza lortu beharko dio enpresak lekuz aldatutako langileari; hori ezinezkoa bada, errentaren alde justifikatua ordainduko dio lekuz aldatutako langileari.

Halaber, enpresak eta langileak lanpostu berrian hasteko epea adostuko dute, inola ere ez 30 egunetik beherakoa.

10.5. Enpresak lantokia beste herri batera aldatu nahi badu, indarreko legedian enplegu-politikari buruz ezarritako prozedurari jarraitu beharko dio uneoro.

10.6. Lanaren nahitaezko lekualdaketaren ondorioz ezkontideetako batek bizilekua aldatzen badu, eta bestea ere enpresa bereko langilea bada, lehentasun-eskubidea izanen du betetzen ari den lanpostuaren berdina edo antzekoa betetzeko, baldin eta enpresak ezkontideen helbide berriaren herrian lantokirik badu.

10.7. Lanbide-talde bereko lekualdaketen kasuan, lekuz aldatuko den langileak hobekuntza edo onurarik irabaziko balu, lehentasuna izanen dute lanbide-talde horretan antzinatasunik handiena dutenek, betiere bete nahi den lanpostua betetzeko prestakuntzari dagokionez egoera berean baldin badaude, barne-igoerei buruz xedatutakoa ezertan eragotzi gabe.

11. artikulua. Beste lanbide-talde bateko lanak.

11.1. Ohi bezala, berariaz itunduko da langileen mugigarritasun funtzionala, xede harturik enpresaren funtzionamendu onerako ezinbestekoak diren ekoizpen- eta kalitate-helburuak eraginkortasunez eta behar bezala bete ahal izatea. Zuzendaritzak eskumen osoa izanen du, lana atal, makina eta jardueren arabera antolatzeko.

Mugigarritasun funtzional horren ondorioetarako, lanbide-talde hauek ezarri dira:

–Mantentze-lanak: mantentze-lanetako lanbide-talde osoa.

–Ekoizpena: ekoizpeneko lanbide-talde osoa.

–Administrariak eta teknikariak: administrari eta teknikarien lanbide-talde osoa.

11.2. Enpresak Hitzarmen kolektibo honen aplikazio-eremuan dauden langileak bidaltzen ahalko ditu maila handiagoko lanpostuak gauzatzera, behar izanez gero, ondoz ondoko 12 hilabeteko alditik gorakoa ez den eperako. Egoera horretan dauden bitartean, langileek benetan gauzatzen duten eginkizunari dagokion ordainsaria jasoko dute, non eta aurretiaz eginkizun berriak zuzen gauzatzeko eta langile interesatuaren beraren zein gainerako langileen segurtasuna eta osasuna bermatu ahal izateko beharrezko prestakuntza eman zaien.

Denbora muga hori ez da aplikatuko mugigarritasuna lehenago aipatutako taldeen barruan bada. Era berean, ez da aplikatuko ondorengo arrazoiengatiko ordezkapen kasuetan: aldi baterako ezintasuna, amatasuna, aitatasuna, oporrak, baimenak eta enpresak nahitaez eman beharreko eszedentziak. Azken kasu horietan, eragin duten inguruabarrek irauten duten denbora guztia barne hartuko du ordezkapenak, eta ez dute lanpostua edo maila finkatzeko eskubiderik emanen, baina bai, ordea, ordezkapenak iraun bitartean alde ekonomikoa kobratzeko.

Langile batek maila handiagoko lanean 6 hilabetetik gora aritzen denean (kontuan hartu gabe, ez aurreko paragrafoak aipatzen dituen kasu berezietatik ondorioztatutako aldiak, ez eta eginkizun-aniztasuna eskuratzeko prestakuntza prozesuak), maila handiagoa finkatuko du, non eta hori gauzatzeko behar bezala egiaztaturiko titulua eskatzen den nahitaez. Aldi hori 12 hilabetekoa izanen da, 1. maila finkatzeko.

Lanbide-talde baliokideen arteko mugigarritasun funtzionala ez da inola ere barne-igoeratzat joko, nahiz eta maila handiagoko lanak ordaintzea edo maila hori finkatzea ekartzen ahalko duen, apartatu honetan aurretik arautu denaren arabera.

11.3. Enpresaren beharrengatik langile batek esleituta daukan mailatik beheragoko lanak egin behar baditu, bere taldeari dagokion soldata gordeko du. Dena den, hori ez da aplikatuko lanpostua langileak berak eskatuta aldatzen denean edo, lanpostua aldatzean, langileak eta enpresak kontrakoa adosten dutenean. Kasu horietan egoera berriari dagozkion lansaria eta maila aplikatuko dira.

Egindako lanak mugigarritasun funtzionalaren ondorioetarako langileak duen mailaren baliokidetzat jotzen ez den maila txikiago batean sailkatzen direnean egoera hori ez da 12 hilabeteko epetik gora luzatzen ahalko.

Zenbait arrazoi tarteko (lantegiaren ahalmena merkatuaren benetako eskaerara moldatzeko asmoz lineak gelditu edo txanden kopurua murriztu beharra, munta handiko mantentze-lanak, arazo teknikoak edo enpresaren borondatetik kanpokoak) ohiko lanpostua aldi baterako galtzen duen langile bati lanpostu berria esleitu behar zaionean, eta egoera hori nahitaez 12 hilabetetik harago luzatu behar denean, lan-baldintzak funtsean aldatzeko prozedura aplikatzeko behar beste arrazoi daudela ulertuko da, beharra sortu duen egoerak iraun bitartean langilea lanpostu horretan egon ahal izan dadin.

Hitzarmen hau sinatzeko unean dagokien mailatik beheragoko batean diharduten langileak lanbide-talde baliokideko lanak egiten ari diren zehazteko, etorkizunean oinarri hartuko den maila Hitzarmena sinatzen den unean langileak gauzatu ohi duen lanpostuari dagokiona izanen da; alabaina, langileak aurretik esleituta zuen mailari eutsiko dio gainerako ondorioetarako.

Nolanahi ere, ez dira maila txikiagoko lantzat hartuko erabiltzen ohi dituen tresna eta makinak garbitu eta onik zaintzeko burutzen dituenak, lan horiek bere funtzioen barnean daudela ulertzen baita.

Maila handiago edo txikiagoko lanak garatzeko artikulu honetan aipatzen diren denbora-mugak ez dira inola ere aplikatuko, lanpostua aldatzeko unean langileak lanpostu berriari dagokion eginkizun-aniztasuneko saria edo espezializazio saria jasotzen badu.

12. artikulua. Gaitasun fisiko urriko langileak.

Gaixotasun edo istripuaren ondorioz ohiko lanpostua gauzatzen jarraitu ezin duen langileari beste bat emanen dio enpresak, langilearen hondar-gaitasunarekin bat datorrena.

Egoera horren aurrean, enpresak bi aukeren artean hautatzen ahalko du: 55 urte bete arte lanpostu egoki bateko lana bermatzea langileari, ala jasotzen duen pentsioarekin aurreko ordainsarien %100 osatzeko lansaria ordaintzea. Hala eta guztiz ere, eta bestelako irtenbiderik ez badago, lanpostuari eusteko lehentasuna izanen du, aurkako edozein egoeraren aurrean.

13. artikulua. Lanaldia, aparteko orduak eta oporrak.

13.1. Urteko lanaldia: urteko egiazko lanaldia, bai lanaldi etengabean bai zatituan, ondokoa izanen da:

• 2025. urtean: 1728 ordu.
• 2026. urtean: 1712 ordu.
• 2027. urtean: 1712 ordu.

Hitzarmenaren indarraldiko hiru urteetarako ezarritako urteko lanaldia betetzeko, honela jardunen da:

–2025. urtea: urteko benetako lanaldia 1728 ordukoa izan dadin, kontuan izanik eguneko lanaldia lanegun kopuruaren arabera aplikatzetik (218) lanordu kopuru handiagoa ateratzen dela, langileek norberak hartzeko 2 egun libre izanen dituzte (haien orduak egutegiko orduetatik deskontatuko dira).

–2026. urtea: urteko benetako lanaldia 1712 ordukoa izan dadin, langileek norberak hartzeko 3 egun libre izanen dituzte gutxienez (haien orduak egutegiko orduetatik deskontatuko dira). Era berean, instalazioak dituen antolamendu-beharren arabera, norberak hartzeko beste egun libre bat gehituko da (guztira 4) edo, bestela, norberak hartzeko 3 egun libreak mantenduko dira, gehi egutegian finkatutako atseden-egun bat.

–2027: 2026. urterako ezarritako sistema bera erabiliko da.

Norberak hartzeko egun libreak hartzeko, langileak gutxienez 15 egun lehenago eskatu beharko du, eta enpresak eskatutako eguna edo egunak emanen ditu, antolaketa edo ekoizpen arrazoiengatik ezinezkoa denean izan ezik.

Hitzarmen hau indarrean dagoen bitartean, urteko lanaldiaren legezko murrizketa onartzen bada, legez ezarritako urteko lanaldia aplikatuko da, eta egutegian norberak hartzeko egun libreak edo atseden-egunak hartu beharko dira kontuan. Mekanismo hori bera aplikatuko da estatuko ore-, paper- eta kartoi-hitzarmenaren bidez lanaldia murrizten bada.

Urteko egutegiak aurreko urteko abenduaren 5a baino lehen argitaratuko dira.

Enpresaren Zuzendaritzak artikulu honetan ezarritako lanaldia betetzeko moduan antolatuko du lana, printzipio hauei jarraiki:

a) Ez dira inola ere egiten ahalko benetako 9 lanordu arrunt baino gehiago.

b) Lanaldi bat burutu eta hurrengoa hasi bitartean 12 ordu pasatu beharko dira, gutxienez.

c) Langileek eskubidea izanen dute astean egun eta erdiko atsedenaldi jarraitua izateko, gutxienez; oro har, larunbat arratsaldea edo astelehen goiza eta igande osoa izanen dira.

Txandakako erregimeneko langile-taldeek egiten duten lan-jardueran, eta lanaren antolamenduak hala eskatzen duenean, Langileen Estatutuaren 37. artikuluaren 1. apartatuan ezarritako asteko egun erdiko atsedenaldia 4 astera arteko aldietan metatzen ahalko da, edo egun osoari dagokionetik banantzen ahalko da, asteko beste egunen batean hartzeko.

Eguneko 24 orduetan etenik gabeko ekoizpen-prozesu jarraituetan, txanden lanaren antolaketan, kontuan hartuko da, batetik taldeen txandaketa, eta bestetik langile bakar bat ere ez dela gaueko txandan bi astean baino gehiagoan arituko, bere borondatez izan ezean.

Hauek dira zentroko lan-txanda sistemak (egutegiak): Non Stop 5. txanda (361 eta 345), 3 txanda, 6 txanda (IDC), 2 txanda, txanda 1, eta lanaldi zatitua.

Hiru txandatan ari diren langileek –lineako langile gehienek hala eskatuta–, astea igandean hasteko eskatzen ahalko dute, eta enpresak aldaketa hori egiteko aukera emanen du, antolaketaren aldetik posible bada. Enpresak aldaketa onartzen ez badu, enpresa batzordeari jakinaraziko zaio.

120,47 euro gordin ordainduz konpentsatuko da txanda-aldaketa bakoitza –hots, astelehenetik ostiralera bitarteko sistema aldatzea (1, 2, 3 txanda edo lanaldi zatitua) astelehenetik igandera bitarteko txandara (5. txanda), edo alderantziz, langileei jakinarazita, hartara lantegiaren ekoizpen- eta antolakuntza-beharrei erantzun ahal izateko–, aldaketa horrek lan-baldintzen funtsezko aldaketa ekar dezakeen gorabehera; halako kasuetan araudian ezarritakoaren arabera jardunen da, eta horietan ere gorago aipatutako konpentsazioa ordainduko da. Zenbateko hori 2026. eta 2027. urteetako soldata taulen igoeraren ehuneko berean eguneratuko da.

5. txandako sisteman, pertsona batek letra (taldea) aldatzen badu, 100 euro gordin ordainduko zaizkio urte naturalean lehenbiziko aldiz letra aldatzeagatik, 150 euro gordin bigarren aldaketan eta 200 euro gordin hirugarren aldian eta hurrengoetan, urte natural berean. Hurrengo urtean, berriz hasiko da zenbaketa hutsetik. Letraren esleipenean 3 ziklo osoak gainditzen direnean aplikatuko da hobari hori.

13.2. Hitzarmen honen eraginpeko langile guztiek Eguberriko eta Urte Berriko jaiak familiarekin pasatu ahal izan ditzaten, enpresak jarduera osorik etenen du 14:00etan urte bakoitzeko abenduaren 24an eta 31n, langileen ordainsariaren inolako murrizketarik gabe.

Hala ere, Gabonetan fabrikako instalazioak gainbegiratzeko sistema bat ezarri da, XIII. eranskinean jasotakoaren arabera arautuko dena.

13.3. Lantegiko guardiako eguna maiatzaren 1ean:

XIII. eranskinean ezarritakoaren araberakoa izanen da.

13.4. Papera egiteko makinaren mantentze-lanetako teknikarientzako, Converting-eko teknikarientzako, zerbitzu orokorretako teknikarientzako eta kalitateko teknikarientzako guardia eta larrialdietarako sistema.

Guardia eta larrialdietarako sistema bat sortzea erabaki da, eta XIV. eranskinean jasotakoaren arabera arautuko da. Sistema hori 2025eko irailaren 1etik aurrera aplikatuko da.

13.5. "Non stop" lana: 345 eta 361 eguneko sistemen araudia gehitu zaio Hitzarmenari. Bi sistemen araudiak IX. eta X. eranskinetan daude, hurrenez hurren.

13.6. Aparteko orduak.

Langabeziaren egoera larria ikusirik, eta enplegua sortzen lagunduko duen politika sozial solidarioak sustatze aldera, aparteko orduak egiteko ohitura kentzea erabaki da.

Era berean, eta aurreko irizpideari indar betea ematearren, langileen eta enpresaren ordezkariek batera aztertuko dute kontratazio gehiago egiteko aukera, indarra duten kontratazio motak erabiliz, kendutako aparteko orduen ordez.

Aparteko orduak nolakoak diren, honela jokatzea erabaki da:

a) Ezbeharrak edo bestelako kalte ez-ohiko eta presakoak konpontzeko zein lehengaiak galtzeko arriskuari aurre egiteko aparteko orduak: gauzatzea.

b) Ezusteko eskaerak edo produkzio behar handiko uneak, ustekabeko absentziak, txanda-aldaketak, egiturazko beste inguruabar batzuk eta jardueraren izaerari lotutako arrazoiek eskatutako aparteko orduak: mantentzea, baldin eta legez ezarritako beste kontratu motak erabiliz ordezka ez badaitezke.

Enpresako Zuzendaritzak hilero jakinaraziko dio Lantokiko Batzordeari aparteko zenbat ordu egin diren, zergatik eta, kasua bada, atalez atal nola banatu diren. Era berean, informazio hori eta gorago azaldutako irizpideak kontuan izanik, enpresak eta langileen legezko ordezkariek aparteko orduen izaera zehaztuko dute, Hitzarmen honetan itundutakoaren arabera.

Aparteko orduak zenbatzeko ondorioetarako, langile bakoitzaren lanaldia erregistratuko da egunero, eta ordainsariak ordaintzeko ezarritako aldian zenbatuko da; laburpenaren kopia bidaliko zaio langileari ordainagirian.

III. eranskinaren tauletan agertzen diren balio bakarrak itundu dituzte alderdi biek, eta ulertzen da balio horien barnean daudela ezarri diren edo ondoren ezarriko diren legezko gainordain guztiak. IV. eranskinean ezarritako "non stop" lanaren sariaren zati proportzionala bildua dago III. eranskinean jasotako jaiegunetako aparteko orduetan. Hori dela eta, jaiegunean (larunbat gaua, igande goiza, igande arratsaldea edo jaiegun ofiziala) aparteko ordu gisara lan egiten denean, ez da bidezkoa izanen sari hori ordaintzea.

Aldiz, langileak aukeran izanen du aparteko orduak atseden-egunekin konpentsatzea, honela: atseden-egun bat egindako aparteko lanegun bakoitzeko, eta, horrez gain, 51,32 euro gordineko saria, aparteko lanegun gisa egindako bakoitzeko. Ordain hori ez da zatitzen ahalko egunetik beherako aldietan. IX. eranskinaren 4.1 i) artikuluan (egunen aldaketa) ezarritako irizpideak errespetatuz eginen da atseden bidezko konpentsazioa. Hala ere, urriaren 1etik abenduaren 31ra bitartean sortzen diren atseden-egunak hurrengo urtean hartzerik izanen da.

Hitzarmen hau sinatu duten alderdiek bere gain hartzen dute Langileen Estatutuaren 35. artikulua eta Hitzarmen hau sinatzen den unean arloan indarra duten gainerako xedapenak errespetatzeko konpromisoa.

Gaueko 22:00etatik goizeko 6:00etara bitartean egiten diren aparteko orduek eta igande zein jaiegunetan egindakoek III. eranskineko tauletan adierazten den balioa izanen dute.

13.7. Oporrak.

Hitzarmen honek ukitzen dituen langile guztientzako opor ordainduak hogeita hamar egun naturalekoak izanen dira; horietatik hogeita lau, gutxienez, lanegunak izanen dira.

Enpresak ezarriko ditu lanaldi zatitua edo txanda bateko, bi txandako edo hiru txandako araubidea duten langileen oporrak, irizpide hauen arabera:

–Abuztuko lehenbiziko 8 lanegunetan (astelehenetik ostiralera bitartean zenbatuta) lan egin ondoren hilabetean geratzen direnak.

–Abenduaren 24tik 31ra bitartean dauden lanegunak.

–Hartu beharreko gainerako opor egunak abenduaren 3, 6 eta 8aren eta Aste Santuaren artean banatuko dira.

Enpresaren egutegian ezarritako edo langileen adostasunez sorrarazitako oporraldiaren edo oporraldien aurretik sortzen den aldi baterako ezintasunak, aurretik adierazi diren egunetan oporrak hartzea eragozten duenak, oporrak beste aldi batean ezartzea ekarriko du. Horrela, langileak oporrak hartzen ahalko ditu aldi baterako ezintasunaren alditik kanpo, nahiz eta horiek sortzen dituen urte naturala akitu.

Aldi baterako ezintasuna oporraldian sortzen bada, lan arloko araudian edo hori garatzen duen Auzitegi Gorenaren jurisprudentzian une bakoitzean xedatutakoari jarraituko zaio.

Aldi baterako ezintasun-egoera eta oporrak bat datozelako langileak hartzeko dituen opor-egunak, Langileen Estatutuaren 38.3 artikuluan ezarritakoaren arabera, enpresak eta langileak hitzartutakoaren arabera hartuko dira, eta, akordiorik ezean, medikuaren alta jaso eta berehala hartuko dira.

Mantentze-lanetako eta beste zerbitzu batzuetako (adibidez, ordezko piezen biltegia, oreak eta abar) langileentzat une ezberdinak ezartzen ahalko dira urteko oporrak hartzeko, betiere legez ezarritako prozeduraren arabera edo adostasun bidez, ezertan eragotzi gabe banakako akordioen bidez lortutakoei zein txandaka ezarritakoei.

5 txandako araubidean lan egiten duten langileek 361 eta 345 eguneko sistemei buruzko IX. eta X. eranskinetan –hurrenez hurren– ezarritakoaren arabera hartuko dituzte oporrak. Egutegian oporrak hartzeko aldia izanen da urtarrilaren 1etik abenduaren 31ra bitartekoa. Langile horiek bi alditan banatzen ahalko dituzte oporrak.

Lanegunak dira probintzia osorako urteko egutegi ofizialean hala agertzen direnak.

Urtean enpresan lanean hasten den edo bertan lan egiteari uzten dion langileak oporren zati proportzionala izateko eskubidea du, lan egindako hilabete-kopuruaren arabera. Hilabete osotzat joko da hilabetearen zatia.

Asteburuan lan egin behar dutenentzat, larunbateko 22:00etan hasten den gaueko txanda jaiegun gisa ordainduko da, eta igandeko 22:00etan hasten den gaueko txanda, berriz, egun arrunt gisa. Jaiegunetan lan egin behar dutenentzat, aurreko eguneko 22:00etan hasten den gaueko txanda egun arrunt gisa ordainduko da, eta jaieguneko 22:00etan hasten den gaueko txanda, berriz, jaieguneko egun gisa.

13.8. Jaiegunen aldaketa: aste barruko jaiegunak aste bereko ostiralera edo hurrengo asteko astelehenera lekualdatzen ahalko dira.

Enpresak eta Enpresa Batzordeak elkarrekin batera erabakiko dute jaiegun bakoitza aipatutako bi egun horietatik zeinetara lekualdatuko den.

Urtarrilaren 1eko, maiatzaren 1eko, abenduaren 25eko eta tokiko zaindariaren bi jaiegunak aukera horretatik kanpo daude.

13.9. Lanegunen aldaketa: 2 eta 3 txandako sistemei atxikitako langileek eskubidea izanen dute, 3 lanegunen ordez, 3 atseden-egun hartzeko urtero. Dena den, Zuzendaritzak egutegian ondorio horretarako ezartzen dituen egunetan (gehienetan, larunbatetan) egin beharko dituzte lanaldi horiek.

Era berean, IDCko langileek lanegunen ordez atseden-egunak hartzeko aukera izanen dute. Kasu horretan, astelehenetik ostiralera eskatutako atseden-egunak lanegunetan itzuliko dira, astelehenetik ostiralera, eta larunbatetan eskatutako atseden-egunak lanegunetan itzuliko dira, astelehenetik larunbatera. Ez da egunik itzuliko igande edo jaiegunean, salbu eta aurreko atsedenaldia igande edo jaiegunean hartu bada.

13.10. Sartzeko ordutegi malgua lanaldi zatituan: lanaldi zatituko langileek ordutegi malgua izanen dute lanaldiaren sarreran edo hasieran, goizeko 7:30etik 9:30era bitartean, bai eta 45 minutuko tartea eguerdiko bazkarirako. Ordutegi malguak ez du departamentu bakoitzaren funtzionamendu egokia oztopatzen ahalko, ezta haien arteko lankidetza ere. Behar den kasuetan, Line Managerrak malgutasunaren erabilera zehazten ahalko du, zerbitzuaren beharrekin eta laneko eta familiako bizitzarekin bateragarri egiteko.

14. artikulua. Baimen ordainduak eta arrazoi familiarren ondoriozko etenaldia. Laneratze saria.

14.1. artikulua. Baimen ordainduak, etenaldiak, murrizketak eta eszedentziak.

Baimen ordainduak.

Langileek, lehenbailehen abisatuta eta behar bezala justifikatuta, lanera ez agertzeko aukera izanen dute, ordainsaria izateko eskubidearekin, arrazoi hauengatik, adierazten den gutxieneko denborarako eta XII. eranskinaren irizpideak errespetatuta: baimen ordainduen laburpen taula.

Baimenaren edo lizentziaren lehenbiziko eguna gertaera eragilearen berbera izanen da, edo lan egiten hasteko lehendabiziko eguna (enpresan berriro lanean hastea), baldin eta langilea atseden egoeran zelarik gertaera eragileak bere horretan irauten badu.

Lan harremana arrazoi familiarrengatik etetea. Eszedentziak:

Lan harremana arrazoi familiarrengatik etetearen laburpen taula eransten da (XII. eranskina), lan arloan indarra duen legediaren arabera.

Ahaide baten gaixotasun larriaren inguruan aurreikusitako kasuetan, gaixotasunak bere horretan jarraitzen badu, langileak eskubidea izanen du ordaindutako lizentzia gehiago hartzeko, bata bestearen atzetik, iraupen berekoak, aurreko lizentzia bukatu eta hogeita hamar egun jarraian iragan ondotik.

Gaueko txandako langileek, hauteskunde-mahai bateko kide izendatzen direnean, bai titular gisa, bai ordezko gisa, larunbat gaua atseden-egun batekin aldatzeko eskatzen ahalko dute, eta beste egun batean berreskuratu.

14.2. Laneratze saria.

Laneratze saria ezarri da, urte naturalaren ondorengo urtarrilean kobratuko dena, eta lan egutegiaren arabera benetan lan egin diren egun guztien arabera sortuko dena. Horiek zenbatzeko, ez dira salbuetsiko ordezkaritza sindikaleko orduak, enpresak deituriko bilera ofizialetakoak eta prebentzioko ordezkarien jardueretakoak baino.

Baremo aplikagarria IV. eranskinean jasotakoa da.

Lanaldi arrunta da urteko lanaldi teorikoa zenbatzeko erreferentzia. Denbora-tarte horretan ez da zenbatzen lanalditik kanpo emandako denbora, adibidez: langileak egiten ahal dituen aparteko orduak, prestakuntza aldiak, eginkizun-aniztasunaren ondorioetarako erakustaldia, ponpatze praktikak, sute edo hondamendietako esku-hartzeetan emandako orduak, truke egunen itzulketa, eta abar.

15. artikulua Ordainsariak.

15.1. Baldintza ekonomikoen aplikazio-eremuaren barneko langileentzat Hitzarmenean ezartzen diren ordainsariak honako portzentaje hauen arabera gehituko dira, kontrakoa ezarrita duten kontzeptuetan izan ezik:

–2025: 2024ko taulak %3,8 handituko dira (KPI 2024/12/31n +%1). Paga ez finkagarri baten ordainketa 2026ko otsailean, 2025eko batez besteko KPIaren baliokidea.

–2026: 2025eko taulak +%1 handituko dira, 2025/12/31ko urte arteko KPIan, +%6ko gehieneko mugarekin. Paga ez finkagarri baten ordainketa 2027ko otsailean, 2026ko batez besteko KPIaren baliokidea.

–2027: 2026ko taulak +%1 handituko dira, 2026/12/31ko urte arteko KPIan, +%6ko gehieneko mugarekin. Paga ez finkagarri baten ordainketa 2028ko otsailean, 2027ko batez besteko KPIaren baliokidea.

KPIa negatiboa bada, ez da deskonturik aplikatuko, ez taulen igoeretan, ez ordainsari ez finkagarrian ere. III. eranskinean jasotzen dira 2025eko ekitaldiari dagozkion taulak.

15.2. Antzinatasuna: langile guztiek aldizkako igoerak izanen dituzte lanean emandako denboragatik: bi hirurteko (6 urte) eta ondoz ondoko bosturtekoak, hamaika urteko antzinatasunetik aurrera (20 urte). Hau da, hirurteko baten edo biren zenbatekoa jasoko dute hiru edo sei urteko antzinatasunagatik, hurrenez hurren, eta ondoren, hamaika urteko antzinatasuna bete ondoren, lehendabiziko bosturtekoa jasoko dute. Hamaikagarren urtetik aurrera, eta bost urtean behin, bosturteko baten aldizkako igoera jasoko dute. Hala ere, antzinatasunagatik jasotzen ahal den gehieneko zenbatekoa bi hirurtekoren eta lau bosturtekoren batura izanen da, hogeita sei urteko antzinatasun-mugaraino. Izan ere, une horretatik aurrera ez da sortuko hirurtekoak, bosturtekoak edo antzinatasunari lotutako ondorengo aldizkako gehikuntzak jasotzeko eskubiderik.

IV. eranskinaren taulan ageri da 2025erako hirurteko eta bosturteko horien balioa.

15.3. Gaueko lana: gaueko 22:00etatik goizeko 06:00ak arteko txandan diharduten langileak gaueko lanaren plusa jasoko du. Haren zenbatekoa IV. eranskinaren taulan ageri da.

15.4. Lanaldi jarraituagatiko konpentsazioa: lanaldi jarraituan aritzen diren eta etenik gabe bost ordu jarraituko lanaldia gainditzen duten langile guztiek IV. eranskinaren taulan aipatzen den saria jasoko dute kontzeptu horrengatik, aintzat hartuta haien lanaren izaeragatik hamabost minutuko atsedenaldia hartzerik ez dutela.

15.5. Mozkinen saria, III. eranskinaren taularen araberakoa.

15.6. Hiru txandako lanaren saria: txandakako hiru txandako araubidean lan egiten duten langileek "3 txandako saria" izeneko lansari osagarria jasoko dute, IV. eranskinaren taularen arabera.

15.7. Elektromekanikarien trebakuntzaren saria. Hitzarmen honen baldintza ekonomikoen aplikazio-eremuaren barneko elektromekanikarien trebakuntzaren sari bat ezarri da, V. eranskinean jasotakoaren arabera.

15.8. Galdarak manipulatzeagatiko saria: galdarak manipulatzeagatiko saria ezarri da ur-instalazioetako langileentzat eta paper-makinetako elektromekanikarientzat. Sari horren zenbatekoa, 2025. urterako, hilean 30 euro gordin izanen da, III. eranskinean jasotakoaren arabera. 2026. eta 2027. urteetarako, hitzarmen-gehikuntza berberak aplikatuko dira.

15.9. Seme-alaben ikasketetarako laguntza: hitzarmen honek indarra duen bitartean, kontzeptu honetarako baremoak ikasketa arautuak bukatu arte luzatuko dira, eta ordainsari guztietarako ezarritako igoerak aplikatuko dira. Laguntza hori jasotzea arautzen duen araudia (erregelamendua eta horri dagokion baremoa) VII. eranskinean aipatzen dena izanen da.

Seme-alaben ikasketetarako laguntza jasotzen ahalko dute Hitzarmen hau aplikagarria zaien langile guztiek (izan BC, izan WC), hiru urtetik (barne) aurrerako seme-alabarik ardurapean badute, ikasketa arautuak burutzen dituzten arte.

15.10. Desgaitasunen bat duten pertsonentzako egokitzapenak. Enpresak seme-alaben ikasketetan laguntzeko zenbatekoaren hirukoitza ordainduko du %33ko edo hortik gorako desgaitasun psikiko edo fisikoren bat duten seme-alaben kasuan, adin-mugarik gabe. Zenbateko hori VII. eranskinean ageri da. 2022ko urtarrilaren 1etik aurrera izanen ditu ondorioak neurri honek. Eskubide hori ez du ezkontideetako batek baino baliatzen ahalko, baldin eta biek lantoki berean lan egiten badute.

15.11. Konpentsazioa pentsio plangatik: BC kolektiboaren kideek, pentsio plan gisa eta apirileko nominarekin 2022ko urtarrilaren 1a baino lehen jasotzen zuten ordainsari teoriko gordinaren urteko %0,5az gain –ez dute zertan justifikatu banakako pentsio-plan baterako ekarpenak egin izana–, urtean %0,25eko ordainketa gehigarria ere jasotzen ahalko dute, baldin eta egiaztatzen badute, kasu horretan, banakako pentsio plan baterako ekarpena egin dutela. Ordainketa gehigarri hori abenduko nominarekin batera eginen da, langileak ekarpena egin duela egiaztatu ondoren, eta urte horretan egindako zerbitzualdiarekiko proportzionala izanen da.

WC kolektiboaren kideek aldagairik gabeko ordainsari finkoaren urteko %0,5eko ordainketa jasoko dute apirileko nominarekin batera, banakako pentsio plan batean ekarpenik egin dutela justifikatu beharrik gabe. Era berean, urteko %0,25eko ordainketa gehigarria jasotzen ahalko dute, baldin eta banakako pentsio plan baterako ekarpena egin dutela frogatzen badute. Ordainketa gehigarri hori abenduko nominarekin batera eginen da, langileak ekarpena egin duela egiaztatu ondoren, eta urte horretan egindako zerbitzualdiarekiko proportzionala izanen da.

15.12. Oinarrizko soldata lanaldi eta errendimendu arruntengatik sortuko da.

15.13. Hitzarmen honetan ezarritako ordainsari guztiak gordinak direla ulertzen da. Beraz, ordainsarietatik kenduko zaizkie Gizarte Segurantzako kuoten eta mota guztietako zergen kontzeptuan langileek ordaindu behar dituzten kopuruak.

15.14. Soldatak hilabetea bukatutakoan ordainduko zaizkie, nola hartzekoak hilero sorrarazten dituzten langileei, hala eguneko edo lanorduko sorrarazten dituztenei ere.

Ordainsariak hilabete bakoitzeko azken egunean ordainduko dira.

Ordainsariak kreditu entitateen bidez ordainduko dira, indarreko legedian ezarritakoaren arabera.

Behar bezala egiaztaturiko banku-abonuak lansarien ordainagiriaren sinadura ordeztuko du.

Ordainbide guztietan, langileak soldaten ordainagiriaren kopia bat jasoko du, hartara ikus eta jakin ditzan: ordainsari kontzeptuak, Ogasun Publikoari ordaintzen diona, eta Gizarte Segurantzarako kotizatzen duena.

15.15. Aparteko haborokinak: oinarrizko lansariaren barruan sartzen dira udako eta Gabonetako aparteko haborokinak. Haborokin horietako bakoitzaren zenbatekoa honela kalkulatuko da: haborokina zati 14, hileko ordainsaria jasotzen duten langileentzat, eta haborokina zati 425 bider 30, eguneko ordainsaria jasotzen duten langileentzat, gehi langile bakoitzari dagokion antzinatasunaren osagarria.

Haborokin horietatik lehena ekaineko nominaren barruan ordainduko da, eta bigarrena abenduaren 15etik 20ra bitartean.

Urte horretan enpresan lanean hasi edo enpresa utzi duten langileek lan egindako denboraren proportzioan kobratuko dute haborokin hori; hilabete edo astebete osotzat joko da hilabetearen edo astebetearen zatiki bakoitza.

15.16. Dietak: zerbitzuaren beharrengatik langile bat ohiko destinoko herritik mugitu behar bada, Essityk bidaietako gastuetarako ezarritako politika aplikatuko da.

15.17. Aurrerakinak: langileak eskubidea izanen du egindako lanaren kontura aurrerakinak jasotzeko, betiere sortutako oinarrizko soldataren %90eko muga gainditu gabe.

15.18. Langileen ikasketetarako laguntza: Essityk ezarritako politika aplikatuko da.

16. artikulua: Lantokiko Batzordea.

16.1. Legeek emandako eskubideak eta ahalmenak galarazi gabe, Lantokiko Batzordeari honako eginkizun eta eskumen hauek aitortuko zaizkio:

1.–Hiru hilean behin enpresako Zuzendaritzaren eskutik honako hauei buruzko informazioa jasotzekoa: enpresaren sektore ekonomikoaren bilakaera orokorra, entitatearen negozioen nondik norakoa eta ekoizpenaren zein salmenten egoera, enpresaren ekoizpen programa eta enpresan enpleguak ustez izanen duen bilakaera.

2.–Urtero, honako hauek ezagutzea eta eskuragai izatea: balantzea, emaitzen kontua, memoria eta, enpresa akzio edo partaidetza bidezko sozietatea baldin bada, bazkideei ematen zaizkien agiri guztiak.

16.2. Gauzatu baino lehen, enpresaren eskutik ondokoen berri jasotzea:

1.–Enpresaren instalazioen lekualdaketa, erabateko edo zati batekoa delarik ere.

2.–Enpresaren lanbide-prestakuntzako planak (gainera, prestakuntza-zentroen irakaskuntzaren kalitatea eta eraginkortasuna zein enpresaren gaikuntza ikuskatzeko eskubidea izanen du).

3.–Enpresak beste batekin batzea, beste batek irenstea, edo haren estatus juridikoa aldatzea, horiek enplegu-kopuruan eragina baldin badute.

4.–Enpresaren titulartasun aldaketak, idatziz jakinarazi beharrekoak.

5.–Langileen kontratazio berriak: enpresak erabiltzen dituen lan-kontratuen ereduak, bai eta lan harremana bukatzearen inguruko agiriak ere: TC2 agiriaren, kitatze-agiriaren eta enpresa-ziurtagiriaren kopiak.

6.–Idatziz, enpresak ezarritako oporraldien taula; urte bakoitzeko apirilaren 1a baino lehen jendaurrean jarri behar da.

7.–Abenduaren 5a baino lehen egin beharreko lan-egutegia, baldin eta egun horretarako Nafarroako Foru Komunitateko lan-egutegia ezagutzen bada.

8.–Absentismo indizea eta horren zergatiak, laneko istripuak eta lanbideko gaixotasunak eta horien ondorioak, istripuen indizeak, enpresan sartu berriak eta enpresa utzi dutenak eta mailaz igo direnak.

9.–Beren borondatez 24. artikuluan ezarritako erretiro prozedurari heldu dion langile-kopurua.

10.–Enpresako zerbitzu medikoen jarduera, langilearen osasunaren babesari lotutako alde guztiei dagokienez.

11.–Telebistako zirkuitu itxiko bideokamera gehiagoren instalazioa.

16.3. Gai hauetan zaintza-lana egitea:

1.–Indarreko itunei, baldintzei eta enpresa erabilerei buruz lan eta Gizarte Segurantzaren arloan indarra duten arauen betetze maila.

2.–Enpresako zuzendaritzarekin lankidetzan aritzea, enpresaren produktibitatea mantentzen eta handitzen laguntzeko neurriak bete ahal izateko, horretarako informazio egokia emanda.

3.–Langileak hautatzeko prozesuetan indarreko araudia edo araudi itundua betetzea, bai eta diskriminaziorik ezeko printzipioak, sexuen arteko berdintasuna eta enpleguaren politika arrazionala ere.

16.4. Gaitasuna eta isiltasun profesionala.

1.–Lantokiko Batzordeari, kide anitzeko organoa den aldetik, gaitasun prozesala aitortzen zaio, bere eskumeneko esparruan ekintza administratiboetan edo judizialetan aritzeko.

2.–Lantokiko Batzordeko kide guztiek eta batzordeak, oro har, isiltasun profesionalez jokatuko dute 16.1 eta 16.2 apartatuetan jasotakoaren inguruan, are Lantokiko Batzordeko kide izateari utzitakoan ere, eta bereziki Zuzendaritzak sekretupekotzat jotzen dituen gaien inguruan.

16.5. Produktibitate sistemak ezartzeko edo lehendik daudenak funtsean aldatzeko, derrigorrezkoa izanen da Lantokiko Batzordeak txostena egitea.

16.6. Langileen sailkapenean aldaketak proposatzen ahal dira. Enpresako Zuzendaritzarekin adostasunik lortu ezean, Batzorde Parekideak erabakiko du.

16.7. Segurtasunaren eta osasunaren arloan, Lantokiko Batzordeari dagokio kideen artean prebentzioko ordezkariak hautatzea, laneko arriskuen prebentzioari buruzko legeak ezarritako kopuruan. Aldi berean, kide horiek Segurtasun eta Osasuneko Batzordeko kideak izanen dira. Horrez gain, Lantokiko Batzordearen eskumena da, baita, egokitzat jotzen duenean kideak kargutik kentzea, eta Segurtasun eta Osasuneko Batzordearen jardueren berri jasotzea ere.

16.8. Enpresarekin ados ez badago, Lantokiko Batzordeak lan arloko agintaritzan espedientea eskatzen ahalko du, Segurtasun eta Osasuneko Batzordeak esan beharrekoa entzun ondoren, lanposturen baten balizko toxikotasunari buruzko irizpena eman dezan.

Era berean, enpresarekin ados ez badago, Lantokiko Batzordeak lan-baldintzen ondorioz lan-­istripu edo -gaixotasuna agertzen ahal duten kasuen berri emanen dio lan arloko jurisdikzio eskudunari, Segurtasun eta Osasuneko Batzordeak esan beharrekoa entzun ondoren.

16.9. Langileak ukitzen dituzten lan-baldintzak funtsean aldatzen badira (betiere interesdunekin adostasuna egon ezean), horien berri jaso eta nahitaez zabaltzea.

16.10. Enplegua erregulatzeko espedienteetan, arrazoiak ekonomikoak edo teknologikoak badira, aurretik enpresarekin negoziatzeko eskaera derrigorrez egin beharko dute langileen ordezkariek eta sindikatuek (teknikarien aholkularitza izan dezaketelarik). Enpresarekin batera aztertuko dute haren egoera ekonomikoa, baldin eta espedientearen atzean arrazoi ekonomikoak badaude. Azterlan hori egiteko epea hogei egun naturalekoa izanen da gehienez ere; epe hori gainditu ondoren, enpresak arloko agintaritzaren aurrean espedientea aurkezteko eskumena izanen du.

Aldez aurretik negoziatzeko eskaeraren epeak ez dauka zerikusirik arloan indarra duen legedian ezarritako epearekin.

16.11. Lantokiko Batzordeko buruaren edo idazkariaren eskutik horren berri jasotzea, zehapenak ezarri baino lehen.

16.12. Lantokiko Batzordeak ahalmena izanen du maila handia eta txikiagoko lanei buruzko artikuluetan hausnartutako kasuak egiaztatzeko, eta, horietan ezartzen diren baldintzak errespetatu ezean, horren berri emanen dio lan arloko agintaritzari, baldin eta enpresaren Zuzendaritzarekin desadostasuna badago.

16.13. Lehendik dauden lan-ordutegiak aldatzen badira eta langile interesdunekin aldaketari buruzko adostasunik ezean, Lantokiko Batzordek lan arloko jurisdikzio eskudunera jotzeko eskumena izanen du.

Enpresak ez du aldaketa indarrean jartzen ahalko, harik lan arloko agintaritzak auzia ebazten duen arte.

16.14. Bermeak:

a) Lantokiko batzordearen kiderik ez da kaleratzen edo zehatzen ahalko bere funtzioak betetzen ari den bitartean, ezta kargua utzi eta hurrengo urtean ere, salbu eta kargugabetzea errebokatzeagatik edo dimisioagatik gertatu bada, eta, betiere, kaleratzea edo zehapena langileak bere eginkizunetan legez aritzearen ondoriozkoa bada. Kanporatzea edo ustezko falta astun edo oso astunen ondoriozko zehapena beste arrazoi batzuengatik izan baldin bada, alde biko espedientea izapidetu beharko da. Izapidea egitean, entzunaldia emanen zaie interesdunari, Lantokiko Batzordeari eta langilea kide den sindikatuaren ordezkariari (enpresan kargu hori aitortu baldin bazaio).

Arrazoi teknologiko edo ekonomikoen ondoriozko etenaldi edo iraungitze kasuetan, enpresan edo lantokian gelditzeko lehentasuna izanen dute gainerako langileen aurrean.

b) Ez dira diskriminatzen ahalko beren igoera ekonomikoan, ezta profesionalean ere, ordezkaritza eginkizunetan aritzeagatik.

c) Enpresaren barrenean adierazpen askatasuna izanen dute beren ordezkaritzari dagozkion gaietan eta, horrenbestez, lanerako interesa edo interes soziala duten argitalpenak banatzen ahalko dituzte, produkzio prozesuaren ohiko funtzionamendua galarazi gabe, betiere aurretik enpresari jakinarazita eta indarreko lege-arauen arabera.

d) Lantokiko langileen kopurua kontuan hartuta, zeregin sindikaletan aritzeko ordu-kreditua izanen dute, hilean ordaindutako orduekin, Langileen Estatutuaren 68. artikuluan ezarritako baremoaren arabera.

Indarreko legediaren arabera, langileen ordezkariek karguaren ondoriozko zereginetan baliatzen dituzten lanaldiko orduak benetan lan egindako ordu gisa ordainduko dira.

Enpresaren kargurako ordutzat hartuko dira langileen ordezkariak enpresarekin bildu aurreko gaueko azken 4 orduak, enpresaren kargurako bileratzat hartzen badira.

Lantokiko Batzordeko kideek dagozkien ordu guztiei edo horietako batzuei uko egiten ahalko diete, eta kideetako batengan edo hainbatengan guztiak metatu, betiere legeak ezarritako gehieneko muga gainditu gabe. Metaketa horrek urteko lanordu guztiak hartzen baditu, lanean ordezten ahalko dira, ordainsariari kalterik egin gabe.

Ordu horiei uko egiten dietenek akta bat sinatuko dute –non ukoa bera eta orduak metatzen dituen edo dituztenen pertsonaren edo pertsonen onarpena adieraziko baitira–, eta enpresaren Zuzendaritzari helaraziko diote.

Halaber, ez dira horren barnean zenbatuko lantegiaren esparruan edo Batzorde Parekidearen bileretan negoziazio kolektiboa egiteko orduen legezko gehieneko mugatik gora erabiltzen diren orduak.

e) Batzordeko kideek dituzten ordu ordainduak kide bakoitzaren sindikatuak, prestakuntza erakundeek edo beste entitate batzuek antolatutako prestakuntza ikastaroetara joateko erabiltzen ahalko dira, betiere legeko muga gainditu gabe.

17. artikulua. Batzarrak.

Langileen batzarrak bilera-gela berdean egiten ahalko dira, betiere horretarako aukera badago. Aldi bereko ekitaldiak lantegiko beste areto batzuetan egiten saiatuko da, beti lanorduetatik kanpo, apartatu honetan araututako kasuetan izan ezik.

Langileen ordezkariek 12 ordu izanen dituzte, lanorduetan, langileen batzarrak egiteko, baina ekoizpen prozesuen ohiko martxa inola ere oztopatu gabe.

Lanorduetan egindako batzarrengatik ez da zenbatekorik deskontatuko soldatetatik, urtean lantegiko ekoizpena gehienez ere hiru orduz geldituta. Batzarrak egiteko urteko orduen poltsa horri honela arautzen den poltsa osagarria gehituko zaio:

–Poltsa osagarri horrek ordu bat gehiago izanen du batzarrik egiten ez den urte natural bakoitzeko, gehienez ere 3 orduko mugaraino.

–Poltsa gehigarri horretan dauden orduak ez dira iraungiko, lanorduetan batzarrak egiteko kontsumitzen ez diren bitartean, ekitaldi horri dagozkion urteko 3 orduak kontsumitu ondoren.

Adibidez: 2025ean batzarrik batere egiten ez bada lanorduetan, 2026an poltsa osagarriak ordu bat izanen du. Era berean, 2026an batzarrik egiten ez bada, 2027an poltsa osagarriak bi ordu izanen ditu. Eta horrela jarraituko litzateke, hurrenez hurren, poltsa osagarriak hiru ordu izan arte. Alabaina, 2026an batzarrik eginen balitz ekoizpeneko 4 ordu hartuta, ez da lansarien inolako deskonturik aplikatuko eta poltsa osagarrian erabili gabe dagoen ordua hurrengo urteetarako gordeko da; horren ondorioz, 2027an ez da poltsa osagarria handituko, aurreko urtean lanorduetan batzarrak egin baitira.

Batzarrak egin baino 48 ordu lehenago eskatu beharko dira.

18. artikulua. Ekintza sindikala.

18.1. Enpresak errespetatu eginen du langile guztien libreki sindikatzeko eskubidea: enpresak ez du ez afiliatzeko edo afiliazioa uzteko baldintza jartzen ahalko langile batek bere lanpostuari eusteko, ezta ere afiliatuta egoteagatik edo sindikatuko jardueretan parte hartzeagatik langilea kaleratu edo beste inolaz kaltetu ere.

18.2. Sindikatu jakin batean afiliatutako kideak diren langileek Askatasun Sindikalari buruzko abuztuaren 2ko 11/1985 Lege Organikoaren 8. artikulutik 11.era artean ekintza sindikalari buruz xedatutakoa baliatzen ahalko dute.

18.3. Enpresak atal sindikalen lokalak egokitzeko konpromisoa hartu du bere gain.

19. artikulua. Laneko segurtasuna eta osasuna.

Hitzarmena sinatu duten alderdiak bat datoz segurtasun eta osasunaren arloko jarduera tekniko eta prebentziokoak sendotu beharraren garrantziaren inguruan. Jarduera horiek arriskua etengabe antolatu eta kontrolatzen duen metodoa izan beharko dute, lan ezbeharrak (lan-istripuak eta -gaixotasunak) desagerrarazteko edo, horren ezean, horiek kontrolpean hartzeko bederen.

Ondorio horretarako, laneko osasuna eta segurtasuna eragiten dion oro lehenetsi behar dela kontuan hartuta, Hitzarmena sinatu alderdi biek arreta eskatzen dute, arreta benetan handia, prebentzio- eta segurtasun-arau guztiak zorrotzago bete, zain eta aplika daitezen, bai eta ezbeharrak benetan murrizteko beharrezkotzat jotzen diren antolaketa-, prestakuntza- eta informazio-jarduerei ekiteko ere.

Alderdi guztien lankidetza ahalik eta handiena bilatu behar da, prebentzio-neurriek ekoizpen-prozesuen ondoriozko arriskuak eta bertan gertatzen diren ezbeharrak eraginkortasunez murriztu ahal ditzaten.

Era berean, lehentasunezkotzat joko da prebentzio izaerako antolaketa-, prestakuntza- eta informazio-ekintzak sustatu eta areagotzea, langileak antolaketa aldaketetara edo teknologia berriek berekin dakartzaten aldaketetara egokitzea ahalbidetzen dutenak.

Alderdi sinatzaileek adierazi dute, halaber, beharrezkoa dela Enpresako Zerbitzu Medikoek zainketa medikoaren eta epidemiologikoaren alderdiak indartzea.

Nolanahi ere, alderdi biek men eginen diote laneko arriskuen prebentzioari buruz indarra duen legediari.

Hitzaldi bateratuak egiten ahalko dituzte alderdi biek, Zuzendaritzak, prebentzio zerbitzuak eta prebentzioko ordezkariek parte hartuta, betiere eguneko gai-zerrenda, eguna eta ordua adosten badira.

20. artikulua. Suhiltzaileen kidegoko kideak.

Alloko lantegiaren jarduera industriala den aldetik, alderdiek behar bezala entrenatuta dauden suhiltzaileak izatearen garrantzia azpimarratu nahi dute, suteen aurkako ekintzan erantzuteko gaitasun egokia emanen dutena eta, giza baliabide diren aldetik, lantokian dauden elementu fisikoen eraginkortasuna osatuko dutena.

Suterik balego, suhiltzaileen kidegokoak izan ala ez, langile guztien betebeharra da sutea itzaltzen laguntzea, zerbitzua ematen ari diren ala ez alde batera utzita, eta suteen aurkako planaren arauen eta une bakoitzean indarrean dauden segurtasun-neurrien arabera.

Espezializazioaren eta prestakuntza teknikoaren arabera, Alloko lantegiko suhiltzaileak bi talde edo brigadatan banatuko dira: alde batetik, espezialistak ez diren derrigorrezko 59 suhiltzaile eta borondatez brigadara atxikitako langileak, guztira espezialistak ez diren 120 suhiltzaile egon arte; eta, beste aldetik, suhiltzaile espezialisten brigada. Hurrengo arauetan adieraziko da brigada bien erregulazioa.

Suhiltzaileen kidegoari borondatez atxikitzeko eskaera langile guztien eskura egonen da.

Suhiltzaileen ardura izanen da dagokien eremuan lanorduetan gerta daitezkeen ezbeharretan azkar esku hartzea edo, beste eremuren batek laguntza behar izanez gero, hara joatea.

Suhiltzaileak ahalik eta azkarren joan beharko dira lantegira, gertatzen ahal den eta lantegiko instalazioen edo makinen segurtasunari eragiten ahal dion sute, uholde edo beste edonolako ezbeharretan esku hartzeko deitzen bazaie. Esku-hartze horietan ematen diren orduak ez dira ordainduko.

Edonola ere eta egoeraz arduratzen den aginte handiagoko inor ez badago, suhiltzaileak izanen dira sua itzaltzeko lanak zuzentzeko arduradunak. Horretarako, beharrezkotzat jotzen dituzten baliabide fisikoak zein giza baliabideak erabiliko dituzte.

20.1. Suhiltzaile ez espezialistak.

Bi pertsona motak osatuko dute suhiltzaile ez espezialisten brigada: lanpostuagatik derrigortuak eta boluntarioak.

59 langilek osatuko dute suhiltzaile ez espezialista derrigortuen brigada. Derrigorrez izan beharko dira talde horretako kide, hala xedatzen baitu suhiltzaile ez espezialisten araudiaren 3. artikuluak, lanpostu eta txandei dagokienez.

Makinen kokapenaren balizko aldaketek edo lanpostuen aldaketak gaur egungo banaketa aldarazten ahalko dute, betiere Prebentzio Zerbitzuaren irizpidearen arabera. Izan ere, berari dagokio nahitaez suhiltzaile ez espezialista derrigortu izan behar duten lanpostuak zehaztea.

Halaber, suhiltzaile ez espezialista derrigortuen taldean sartuko dira borondatez horrekin bat egitea erabakitzen duten langileak, taldean guztira 120 suhiltzaile ez espezialista izan arte. Norberaren borondatez kide izateko eskaerak hautatzeko irizpide objektiboa lantegiko banaketa homogeneoa izanen da, suhiltzaile ez espezialista horiek gauzatzen dituzten lanpostuen eta horien prestakuntza fisikoaren arabera.

Suhiltzaile ez espezialisten taldeko kide izatea –dela derrigorrez, dela norberaren borondatez– VI. eranskinean adierazitako suhiltzaile ez espezialisten erregelamenduak arautuko du.

2024/12/31n hitzarmeneko suhiltzaile izaera zuten pertsonek boluntario gisa jarraituko dute, baldin eta gaitasun eta prestakuntza baldintzak betetzen badituzte.

20.2. Suhiltzaile espezialistak.

Gure ekoizpen prozesuaren ezaugarriek eta instalazioen tamainak behartzen dute suhiltzaile espezialisten taldea izatera. Talde hori langile batek edo hainbat langilek osatuko dute txanda bakoitzeko, eta suhiltzaile ez espezialisten taldeak baino eginkizun espezifikoagoak izanen ditu.

Suhiltzaile espezialisten taldearen lana, funtsean, kontrolik gabeko suteetara eta larrialdietara bideratuko da; alabaina, haren eginkizun nagusietako bat suteen aurkako elementuei buruzko prestakuntza, antolaketa eta berrikuspenean parte hartzea izanen da, Aktiboen Segurtasunerako arduradunaren erantzukizunpean.

Langile bakoitzak bere borondatez erabakiko du suhiltzaile espezialisten taldeko kide izatea, eta VI. eranskinean adierazi den suhiltzaile espezialisten erregelamenduak arautuko du.

Giza Baliabideen Zuzendaritzak aukeratuko du talde horren kide izateko hautagaien zerrenda, Industriako eta/edo Materialetako Zuzendaritzarekin batera.

Behin betiko kide izan eta horri dagokion kontratua sinatu baino lehen, hautagaiek Prebentzio Zerbitzuak zehazten dituen eta VI. eranskinaren II. kapituluan aipatzen diren derrigorrezko ezaugarri psikoteknikoak eta fisikoak bildu beharko dituzte. Horretarako, langileak eranskin horretan adierazten diren probak egin beharko ditu.

Suhiltzaile espezialistak diren baina suhiltzaile izaten jarraitzeko gaitasuna galtzen duten langileek lehentasuna izanen dute hitzarmeneko suhiltzaile boluntario izateko, VI. eranskinean ezarritakoaren arabera.

21. artikulua. Absentismoa.

Hitzarmen honek iraun bitartean, enpresak Gizarte Segurantzaren sarien osagarria bermatuko dio aldi baterako ezintasuna duen langileari, langilearen lanaldi arrunteko benetako lansariaren %100eraino.

22. artikulua. Adingabeen lana eta lanbide heziketa.

22.1. Arlo horretan legediak une bakoitzean xedatutakoari jarraituko zaio.

22.2. Aldaketa teknologikoak. Aldaketa teknologikoek lanpostu jakin bat ukitzen badute, Zuzendaritzak prestakuntza-ikastaroa eskainiko die horretan diharduten langileei, teknologia berrietara egokitzeko beharrezkoa den denboran.

22.3. Lanbide heziketa. Zuzendaritzak enpresan lanbide heziketako ikastaroak (papergintzaren alorrean zein orokorrak) ematen lagunduko die probintziako, autonomiako edo estatuko bidezko erakundeei, hartara langileen maila kulturala eta teknikoa hobetzeko asmoz.

Enpresak langileentzako prestakuntza plana eginen du urtero sindikatuekin batera, eta horretarako funtsak eskatuko ditu, legez ezarritako bideetatik.

23. artikulua. Laneko arropa eta norbera babesteko ekipamenduak.

Enpresak zereginak garatzeko bat datozen laneko arropa eta norbera babesteko ekipamenduak emanen dizkie langileei, Segurtasun eta Osasuneko Batzordearen jarraibideen arabera.

Lan egitean betaurrekoak, gailu ortopediko edo entzutekoak apurtzen badira, enpresak ordainduko du horien konponketa, ondorio horietarako espedientean adieraziko diren beharrezko egiaztapenak egin ondoren.

Zuzendaritzaren ustez eta Segurtasun eta Osasuneko Batzordeak esan beharrekoa entzun ondoren, lan jakin bat egiteko material berezia behar bada, langileari halakoa emanen zaio.

24. artikulua. Erretiroa.

24.1. Une bakoitzean aplikatzen ahal diren lege-xedapenek horretarako aukera ematen duten guztietan, enpresak hitzematen du erretiro partziala eskuratzeko eskaerak onartuko dituela, indarrean dagoen araudiak ezarritako gutxieneko adinetik aurrera, eta erreleboa hartzen duten langileak kontratatuko dituela eskaera horiek ezartzeko, Langileen Estatutuaren 12. artikuluaren 6. eta 7. apartatuetan ezarritakoaren arabera, baldin eta honako baldintza hauek betetzen badira:

1. Langileak erretiro partziala hartu nahi duen eguna baino 12 hilabete lehenagotik abisatzea.

2. Lantegian lanposturik amortizatu beharrik ez izatea.

3. Urtean gehienez ere 5 erretiro partzial egitea. Hala eta guztiz ere, Hitzarmenak iraun bitartean (alegia, 2025etik 2027ra bitartean), aurreko urteetan eskatu ez diren erretiro partzialak metatzea onartuko da hurrengo urteetarako. Metatze prozesu hori aplikatu arren, ez dira 25 erretiro partzial baino gehiago onartzen ahalko Hitzarmenak iraun bitartean. Adibidez: 2025ean bi erretiro partzial eskatzen badira, hiru erabili gabe geratuko dira, hurrengo urtean erabiltzen ahalko direnak. Dena den, aurretik esan bezala, metatze prozesu hori aplikatu arren, ez dira 25 erretiro partzial baino gehiago onartzen ahalko Hitzarmenak iraun bitartean (alegia, 2025etik 2027ra bitartean).

Urte bakoitzeko mugara heldu arte, adinaren araberako hurrenkerari jarraituko zaio zorrotz, eskaerei dagokienez, lehentasuna adin handieneko langileari emanda.

61 urte bete baino lehen erretiro partziala hartzeko eskaerei dagokienez, une bakoitzean indarra duen araudiak eskatzen dituen baldintza guztiak betetzen badira, enpresak kasuak aztertzeko konpromisoa hartuko du bere gain, ahal denean eskaera horiei erantzun ahal izateko. Nolanahi ere, horrela egiten diren erretiro partzialak aurretik deskribatu diren urteko mugen ondorioetarako zenbatuko dira.

Bestelakoa adierazten duen itunik egon ezean, enpresak erretirodun partzialaren lanaldi murrizketaren portzentajea ahalik eta gehien aplikatzeko konpromisoa hartuko du, lansaria ere hein berean murriztuta, betiere une bakoitzean legez araututa dagoena oinarri hartuta, eta enpresak ordezko langilea kontratatzeko hautatu duen aukeraren arabera.

Indarrean dagoen araudiaren arabera, erretiro partziala hartzen duen langileak aukera izanen du, bere borondatez, ohiko erretiro adinera iritsi arte erretiro partzial gisa egin behar duen lanaldi osoa egiteko, lehenbiziko urtearen barruan aldi bakar batean metatuta, edota erretiro partziala hartu bitartean erretiro partziala hartzen ari den urte guztietan lanaldi hori egiteko. Kasu bietan langileak enpresan alta egoeran jarraituko du, dagozkion ordainsariak jasoko ditu, eta Gizarte Segurantzan kotizazioak eginen dira haren izenean modu hainbanatuan, erretiro partzialaren eta erretiroko adin arruntaren bitartean dagoen aldi osoan, erretiro osoa hartu arte.

Erretiro partziala hartzen duen langileak esleitzen zaion lanpostuaren egutegia, txanda-sistema, ordutegia eta baldintzak onartzeko konpromisoa hartuko du bere gain, hartara lanaldi partzialeko kontratuari dagozkion zerbitzuak eraginkortasunez gauzatu ahal izateko.

24.2. Borondatezko erretiro pizgarriduna: legez erretiro aurreraturako ezarritako adinean borondatezko erretiro aurreratua hartzea erabakitzen duten langileentzat 10.359,18 euroko kopurua ezartzen da 2025erako.

Hitzarmen honek iraun bitartean, urtero berrikusiko da zenbateko hori, eta lansarien berrikuspenei aplikatzen zaien portzentaje bera aplikatuko zaio hari ere.

Lanaldi partzialeko kontratuak dituzten langileei dagokienez, zenbateko hori lanaldiaren neurri berean murriztuko zaie (langilearen urteko lanordu arruntak / lanaldi osoko kontratua duen langilearen lanordu arruntak).

25. artikulua. Faltak eta zehapenak.

VIII. eranskinean adierazten da Hitzarmen honen aplikazio-eremuaren barneko langileen diziplina araubidea.

26. artikulua. Lan-baldintzen funtsezko aldaketak.

Langileen Estatutuaren 41. artikuluaren lan-baldintzen (a) Lanaldia, b) Ordutegia, eta c) Txandako lanaren araubidea) aldaketa nabarmena badago, kontratua deuseztatzen duten 58 urteko edo hortik gorako langileentzat enpresak kalte-ordaina kalkulatuko du 12 hilekoren mugarekin, lege testu horretan finkatzen diren 9 hilekoen ordez.

27. artikulua. Arrazoi objektiboengatik kaleratzea.

Enpresak ez du langilea lanera ez joateagatik kaleratuko, baldin eta arrazoia osasun zerbitzu ofizialek behar bezala justifikatutako baja bada, edo arrazoi naturalak: elurra, uholdeak edo ezinbesteko beste arrazoi batzuk.

28. artikulua. Gizarte funtsa eta kultur elkartea.

Enpresak bidezko diru kopurua (36 zentimo langile eta hilabete bakoitzeko) ordainduko du, baina ez ditu nominatik deskontatuko langileen ekarpenak, Batzordeak zuzenean bilduko baititu. Zenbateko hori ez da aldatuko Hitzarmenak iraun bitartean, eta ez du inolako gehikuntzarik izanen.

29. artikulua. Lanpostura egokitzea edo lanpostu aldaketa.

Aldaketa teknologikoek lanpostu jakin bat ukitzen badute, Zuzendaritzak prestakuntza-ikastaroa eskainiko die horretan diharduten langileei, teknologia berrietara egokitzeko beharrezkoa den denboran, bai eta horretara egokitzeko aldi bat ere, gehienez ere hiru hilabetekoa.

Langilea teknologia berrira egokitzen ez bada, Batzordeari jakinaraziko zaio eta langileari beste lanpostu bat eskainiko zaio, haren jakintzarekin hobeki moldatzen dena, hargatik lanbide-maila galdu gabe.

30. artikulua. Bizi aseguru kolektiboa.

30.1. Enpresak aseguru kolektiboa izanen du indarrean, jarraian adieraziko diren arriskuak kalte-­ordain hauekin estaliko dituena:

a) Gaixotasun arruntaren ondoriozko heriotza: 18.030 euro.

b) Lanbidekoa ez den istripuaren ondoriozko heriotza: 18.030 euro.

c) Laneko gaixotasunaren ondoriozko heriotza: 36.030 euro.

d) Laneko istripuaren ondoriozko heriotza: 36.030 euro.

e) Ezintasun iraunkor absolutua, gaixotasun arruntaren edo lanekoa ez den istripuaren ondorioz: 18.030 euro.

f) Ezintasun iraunkor absolutua, eritasun profesionalaren ondorioz: 36.030 euro.

g) Ezintasun iraunkor absolutua, istripu profesionalaren ondorioz: 36.030 euro.

Zenbateko horiek ez dira aldatuko Hitzarmenak iraun bitartean, eta ez dute inolako gehikuntzarik izanen.

30.2. Saria ordaintzeko, enpresak kopuru horren %55 jarriko du, eta langileak %45. Langile bakoitzak erabakiko du aseguru horri atxiki edo ez.

30.3. Erretiro aurreratuaren kasuan, erretiratuak eskatuta eta aseguru-erakundearekin adostuta, kontingentzien estaldurari dagokionez, enpresak eta langileak artikulu honetan aipatzen den ekarpen-baldintza berberetan mantenduko dute asegurua, hirurogeita bost urte bete arte. Hona hemen kasu horretan estali beharreko kontingentziak:

–Heriotza, gaixotasun arruntaren ondorioz.

–Heriotza, istripu ez profesionalaren ondorioz.

–Heriotza, gaixotasun profesionalaren ondorioz.

–Baliaezintasun iraunkor absolutua, gaixotasun arruntaren edo lanekoa ez den istripuaren ondorioz.

–Baliaezintasun iraunkor absolutua, gaixotasun profesionalaren ondorioz.

31. artikulua. Enplegu aniztasuna.

Hitzarmen hau sinatu duten alderdiek komenigarritzat jotzen dute enplegu-aniztasuna ezabatzea, arau orokor gisa.

Horretarako, beharrezkotzat jotzen dute indarreko legerian ezarritako zehapenak zorrotz aplikatzea, beste enpresa batean lehendik alta emanda egoteagatik Gizarte Segurantzan alta eman gabe dauden langileen kasuetan.

Enplegu-aniztasuna kontrolatzeko helburuari begira, funtsezkotzat jotzen da Gizarte Segurantzako kotizazio-buletinak, Enpresan erabiltzen diren idatzizko lan-kontratuen ereduak eta lan-harremana azkentzeari buruzko dokumentuak langileen legezko ordezkariei ezagutarazteko baldintza zehatz-mehatz betetzea, Langileen Estatutuaren 64.1.5 artikuluan xedatutakoaren arabera. Betebehar hori ez betetzea zehatzen ahalko da, aplikatu beharreko lege xedapenen arabera.

Lehen xedapen gehigarria.–Hitzarmen honen eranskin guztiak hitzarmenaren parte dira eta dagokien eraginkortasuna daukate.

Bigarren xedapen gehigarria.–Home Office-ri dagokionez, alderdiek sinatu duten ESSITY Españaren Urrutiko Lan Politikan ezarritakoari jarraituko zaio.

Lehen xedapen iragankorra.–Hitzarmen honen 1. artikuluan ezarritakoaren arabera, eta 2017-2020ko Hitzarmenaren aurreko Hitzarmen Kolektiboekin gertatzen ez zen bezala, Team Leader (TL) lanpostuan diharduten langileak Hitzarmenaren aplikazio-eremu pertsonalean sartuko dira ondorio guztietarako, eta 3. lanbide-taldeko (Administrariak eta Teknikariak) 1. mailan sartuko dira, eta talde eta maila horietarako ezarritako soldata-taulak aplikatuko zaizkie.

2017-2020ko Hitzarmena indarrean sartzean Hitzarmen Kolektiboan ezarritakoa baino soldata handiagoa zuten Lan Harremanetako Unitateei "ad personam" osagarri gisa errespetatzen zaie balioa handitu ezin dakiekeen osagarri gisa (Hitzarmenaren gehikuntzak ez aplikatzea), eta hori ez da xurgatzen ahalko, ezta konpentsatzen ere, langilea TL lanpostuan dagoen bitartean, baina bai beste lanpostu batean hasiz gero.

Era berean, Hitzarmen honen 1. artikuluan ezarritakoaren arabera, eta 2025-2027ko Hitzarmenaren aurreko Hitzarmen Kolektiboetan ez bezala, Paper-makinaren mantentze-lanetako langileek, Galdaren mantentze-lanetako langileek, Converting-eko mantentze-lanetako langileek, Ordezko piezen biltegiko langileek, Logistikako Team Leader-ek eta Tick Off-eko (atezaintza) langileek aukera izanen dute, beren borondatez, Blue Collar ("BC") izeneko kolektibora pasatzeko, hitzarmenean ezarritako baldintza guztiak aplikatuta, ekonomikoak barne.

BCra pasatu ez eta White Collar ("WC") kolektiboaren barruan jarraitzen badute, Hitzarmena aplikatzen jarraituko zaie, artikulu ekonomikoak izan ezik (gainerako WC bezala, TLtik aurrera eta OLraino, hura salbu).

2025-2027ko Hitzarmen hau sinatzen den egunean aurreko paragrafoan aipatutako posizioetan dauden pertsonei, BCra pasatzea aukeratzen badute eta Hitzarmen Kolektiboan ezarritakoa baino soldata handiagoa badute, errebalorazigarria ez den ad personam osagarri gisa errespetatuko zaie aldea (Hitzarmenaren igoerak ez aplikatzea), eta ez da konpentsagarria izanen, ezta xurgagarria ere, langileak zuen posizioa betetzen duen bitartean, baina bai beste posizio batera aldatzen denean.

Tick off-eko (atezaina) langileei gaur egun aplikatzen diren ordutegi eta opor-sistema berak aplikatuko zaizkie, zerbitzuaren estaldura bermatzeko. Zentzu horretan, Tick off-ek astelehenetik igandera arteko estaldura eskaintzen du, baita jaiegunetan ere, goizeko eta arratsaldeko txandetan. Oporrak departamentuko arduradunarekin batera kudeatzen dira, zerbitzuaren estaldura ziurtatzeko.

Bigarren xedapen iragankorra.–2017-2020ko Hitzarmen Kolektiboa sinatu zen egunean, Mantentze-lanen Zentralari edo Bulego Teknikoari atxikita eta ardurapeko langilerik izan gabe ziharduten White Collar (WC) taldeko elektromekanikariek bi aukera hauetako bat hautatu ahal izan zuten: batetik, WC kolektiboan jarraitzea, hartara izaera ekonomikoko artikuluak izan ezik Hitzarmena aplikatuko zitzaizkielarik (WCko gainerakoak bezala, TLtik aurrera eta OLraino, azken hori kenduta); ala, bestetik, Blue Collar (BC) kolektibora aldatzea, hartara Hitzarmenean ezarritako baldintza guztiak (izaera ekonomikokoak barne) aplikatuko zitzaizkielarik. Azken kasu horretan, pertsona horiek Hitzarmenean sartzeko, Lehen Xedapen Iragankorrean TLentzat adierazitakoaren eskema bera baliatu zen, hau da, une horretan Hitzarmen Kolektiboan ezarritakoa baino soldata handiagoa bazuten, "ad personam" osagarri birbaloraezin gisa (hots, Hitzarmenean jasotako gehikuntzak aplikatu gabe) errespetatu zitzaien diferentzia, eta ez da konpentsatzen ahalko, ezta xurgatzen ere, langilea lanaldi zatituan Mantentze-lanen Zentralari edo BC Bulego Teknikoari atxikitako elektromekanikariaren postuan dagoen bitartean. BC kolektibora aldatzea aukeratzen duten elektromekanikariak mantentze-lanetako 2. taldeko 1. mailan kokatuko dira.

I. ERANSKINA.–LANBIDE TALDEAK

1. taldea.–Produkzioa.

–1. maila.

• Paper-makinako gidaria.

– 2. maila.

• Paper-makinako laguntzailea.
• Ura tratatzeko eta orez elikatzeko planta.
• Paper higienikoaren lineako birbobinatzeko makinako gidaria.
• Sukaldeko paperaren lineako birbobinatzeko makinako gidaria.
• Converting lineako laguntzailea.
• Paper higienikoaren lineako paketatzailea.
• Sukaldeko paperaren lineako paketatzailea.
• Ezpainzapien lineako gidaria.
• Musuzapien lineako gidaria.
• Interfolder-eko gidaria.
• Aurpegi-zapien lineako gidaria.
• Multiplis.
• Fabrikazioko ordezkoa.
• Logistika integraleko operadorea.
• Pulperen eta orean alanbrea kentzeko operadorea (Serman paketeak): 2. Mailako aldaketa, 2022ko urtarrilaren 1etik aurrerako ondorioekin).

–3. maila.

• Converting ataleko paletizatzailea.
• Salgaien eta sarbideen kontrola.
• Converting ataleko garbiketa.
• Garbiketa orokorra.

2. taldea.–Mantentze-lanak.

–1. maila.

• Fabrikazioko elektromekanikaria.
• Converting ataleko elektromekanikaria.
• IDC ataleko elektromekanikaria.
• Makina-erremintako mekanikaria.
• Bulego teknikoari atxikitako elektrikaria.

–2. maila.

3. taldea.–Administrariak eta teknikariak.

–1. maila.

• Team Leader.

–2. maila.

• Tick Off-eko langileak (atezaintza).
• Ordezko piezen biltegiko langilea.

–3. maila.

• Administrari laguntzailea.
• Teknikari laguntzailea.

Oharra: mantentze-lanetako langileen eta administrari eta teknikarien taldeen kasuetan, bete beharreko lanpostuari esleitutako mailaren azpi-azpian dagoen mailan sartuko da langilea, eta horretan hiru urtez arituko da gehienez, lanposturako prestakuntza eta gaikuntza egokia emateko asmoz.

II. ERANSKINA.–LANPOSTUEN DESKRIBAPENA

Paper-makinaren gidaria: paper-makina (I. paper-makina, II. paper-makina eta III. paper-makina) abiarazi eta gidatzen duen langilea da, betiere fabrikazio-aginduan zehaztutako ezaugarriei jarraiki.

Paper-makinako laguntzailea: paper-makinako gidariari lanpostu horren eragiketa guztietan laguntzen dion langilea da.

Ura tratatzeko eta orez elikatzeko instalazioko langilea: ibaitik hartutako urak, hondakin-urak eta lurruna tratatzeko instalazioak behar bezala funtzionatzeko moduan zaintzea eta galdaren funtzionamendua eta segurtasuna artatzea da haren funtzioa. Halaber, ore unitateei alanbrea kentzeko gailu automatikoan orea sartzeaz arduratuko da.

Komuneko eta sukaldeko paperaren lineetako birbobinatzeko makinako gidaria: tisu papera birbobinatzeko makina automatikoa eta horri lotutako mandrinagailua, besteak beste, elikatu eta gidatzen duen langilea da. Hori dela eta, prozesuaren aldagaiak kontrolatzeaz eta horri atxikitako eragiketa guztiez arduratuko da.

Converting lineako laguntzailea: paketatzaileari, birbobinatzeko langileari eta T1 eta T2 lineetako makinistei ohiko lanetan laguntzen dien langilea da.

Komuneko eta sukaldeko paperaren lineetako paketatzailea: makina sorta bat (zerra, makina paketatzailea, zakuratzeko makina, troxatzeko makina eta produktua paletizatzeko makina) gidatzen duen langilea da. Horrez gain, produktua etiketatzeaz arduratuko da, prozesuaren aldagaiak kontrolatuko ditu, eta horri atxikitako eragiketa guztiez arduratuko da.

Ezpainzapien lineako gidaria: ezpainzapien linea (honako hauek osatzen dute, besteak beste: desbobinatzeko makina, tolesteko makina, makina paketatzailea eta ahokatzeko makinak) gidatzen duen langilea da.

Musuzapien lineako gidaria: musuzapien linea (honako hauek osatzen dute, besteak beste: desbobinatzeko makina, tolesteko makina, makina paketatzailea, makina multzokatzailea eta ahokatzeko makinak) gidatzen duen langilea da.

Interfolder-eko gidaria: ezpainzapien linea (honako hauek osatzen dute, besteak beste: desbobinatzeko makina, tolesteko makina, makina paketatzailea, ahokatzeko makina eta paletizatzeko makina) gidatzen duen langilea da.

Aurpegi-zapien lineako gidaria: aurpegi-zapien linea (honako hauek osatzen dute, besteak beste: desbobinatzeko makina, entzungailua, errobot-zelula eta makina multzokatzailea) gidatzen duen langilea da.

Multiplis makinaren gidaria: multiplis izeneko makina elikatu, gidatu eta husten duen langilea da, betiere fabrikazioko-aginduen arabera.

Fabrikazioko ordezkoa: kontramaisu-maistraren agindupean, fabrikazioko lanpostuetan lan lagungarrietan aritzen den langilea da, baita sortzen ahal diren lanpostu hutsak betetzen ere.

Logistika integraleko langilea: logistika departamentuko langilea da. Hauek ditu eginkizun nagusi: orea eta produktu osagarriak, bobinak zein produktu bukatuak kargatzea, deskargatzea eta txukun antolatzea, baita horiek Converting-era hornitzea ere; AGVen funtzionamenduan laguntzea; edukiontziak eta paletak kentzea, eta gai ez diren produktuak berreskuratu eta tratamendu egokia ematea.

Converting ataleko paletizatzailea: besteak beste hainbat produktu lineatatik datozen produktuak paketatu, etiketatu eta paletak horiekin bete eta paletak metatzeaz arduratzen den lan-taldea gidatzen duen langilea da.

Pulperen eta orean alanbrea kentzeko operadorea (Serman paketeak): egin beharreko ekoizpenaren kalitatearen arabera, makina bakoitzari ore-fardelen nahasketa egokia baldintza onetan emateaz arduratzen den langilea da.

Paper Machine Logístic Operator: ekoizpenaren arloan lan operatiboak egiteaz arduratzen da; besteak beste, materialak garraiatzeko orga jasotzailea erabiltzea, biribilki-bobinak, musuzapiak eta ezpainzapiak moztea, eta mandril handiak eta txikiak garbitzea eta ebakitzea. Halaber, libratzeaz eta pasta biltzeaz arduratzen da, eta 1. eta 5. pulperen lanetan parte hartzen du, ekoizpen prozesuak ezarritako segurtasun eta kalitate estandarren arabera behar bezala funtzionatzen duela bermatuta.

Supply Service Clerk (Tick-Off): atezaintzan eta baskulako eragiketetan arreta eskaintzea eta horiek zaintzen dituen langilea da; horrez gain, telefono deiak hartu eta banatzeaz eta instalazioen sarreran dagoen jendea kontrolatu eta artatzeaz ere arduratzen da.

"Converting" ataleko garbitzailea: Converting ataleko instalazioak behar bezala garbitzen dituen langilea da. Bera arduratzen da erratz-makina automatikoa gidatzeaz, eta hondakinen ontzien kudeaketaz zein garbiketari lotutako lan osagarriez ere.

Garbitzaile orokorra: lantegi osoko denentzako eremuetako, komunetako eta bulegoetako ordenaz eta garbiketa egokiaz arduratzen da.

Produktuaren berreskuratzailea: merkaturatzeko egokia ez den produktua berreskuratu eta tratamendu komenigarria emateaz arduratzen den langilea da.

Eskuzko paletizazioko langilea: produktuak eskuz paletizatzeaz eta zumitzak jartzeaz arduratzen den langilea da.

Converting ataleko elektromekanikaria: Converting atalean elektromekanikari lanetan aritzen da, eta, behar izanez gero, lantegiko gainerako ataletan ere mekanikari lanetan aritzen ahal da.

Fabrikazioko elektromekanikaria: papergintzako elektromekanikari lanetan aritzen da, eta, behar izanez gero, lantegiko gainerako ataletan ere mekanikari lanetan aritzen ahal da.

IDC ataleko elektromekanikaria: IDCn elektrikari lanetan aritzen da, eta, behar izanez gero, lantegiko gainerako ataletan ere elektromekanikari lanetan aritzen ahal da.

Makina-erremintako mekanikaria: lantegiko makina-erreminten funtzionamendu egokiaz arduratzen da, horietan egiteko agintzen zaizkion lan eskaerei erantzunda.

Bulego teknikoari atxikitako elektrikaria: bulego teknikoari atxikitako zeregin elektrikoez arduratzen den langilea da; zerbitzu ematen dio Bulego teknikoari lantegiko instalazio guztietan.

Team Leader: ekoizpen talde baten arduraduna da, eta Segurtasun, Kalitate, Kostu eta Moralaren helburuak betetzen direla bermatu behar du. Hura atxikita duen RSTren arduradunaren mende dago.

Administrazioko 1. mailako ofiziala: bere ardurapean funtzio jakin bat duen langilea da, eta, horren barruan bere ekimenez aritzen da, eta langileak izan ditzake ardurapean.

Laborategiko 1. mailako ofizial teknikaria: kalitate-arduradunaren jarraibideak aintzat hartuta, ekoizpen-prozesuan dagoen produktua esleitutako zehaztapenekin bat datorrela edo fabrikatutako produktuak aurrez finkatutako ezaugarriei erantzuten diela zaintzen eta egiaztatzen duen langilea da, horretarako behar adina saiakera eta azterlan eginez, baita merkatu-beharrengatik egoki jotakoak ere.

Technician Facilities Management: instalazio industrialen kudeaketan laguntzeko teknikaria; klimatizazio sistemen mantentze-lanen, garbiketaren eta konponketaren arduraduna, baita eskorgen, plataforma jasotzaileen, zubi-garabien eta erreminta elektrikoen erabileraren arduraduna ere. Ekoizpen eremuetan eta egituretan garbiketa teknikoa egiten du, produktu kimikoak erabiltzen ditu eta instalazioko behar operatiboei euskarri orokorra ematen die.

Spare Parts Warehouse Technician: ordezko piezen biltegia kudeatzeaz arduratzen da; besteak beste, piezak jaso eta biltegiratzeaz, stock-a kontrolatzeaz eta mantentze- eta ekoizpen-piezak hornitzeaz. Sistema informatikoak erabiltzen ditu mugimenduak erregistratzeko, eta ziurtatzen du behar bezala antolatzen direla eta lantegirako material kritikoak eskuragarri daudela.

Administrazioko 2. mailako ofiziala: 1. mailako ofizial administrariaren lanaren aldean bigarren mailako lanak egiten ditu, hari lagunduz.

2. mailako teknikaria: 1. mailako ofizial teknikariaren lanaren aldean bigarren mailako lanak egiten ditu, hari lagunduz.

Administrari laguntzailea: administrazioko oinarrizko eragiketetan aritzen den langilea da, batik bat horiei dagozkien lan mekanikoetan.

Lanpostu bakoitzaren eginkizunen deskribapen hau gutxi gorabeherakoa da, eta lantegian sortzen ahal diren lanpostu berriak edo aldatzen ahal direnak sailkatzeko ondorioetarako osatu da. Izan ere, langileek lanpostu bakoitzari atxikitako eginkizunak zuzen gauzatzeko behar diren zeregin eta eginkizun guztietan aritu beharko dira.

III. ERANSKINA.–SOLDATEN TAULAK

%3,8 HANDITU DIRA 2024AREKIKO

IV. ERANSKINA.–2025eko SARIAK

V. ERANSKINA

V. ERANSKINA.–BLUE COLLAR (BC) TALDEKO ELEKTROMEKANIKARIEN TREBAKUNTZA SARIA

Trebakuntza sari bat ezarri da, Blue Collar taldeko mantentze-lanetako langile guztientzat, bakoitzari esleitutako txanda-sistema gorabehera.

Arau argiak ezarriko dira elektromekanikariek finkatzen diren puntuak metatzeko agertu behar dituzten gaitasunak baloratzeko. Hasteko eta behin, langileak autoebaluazioa eginen du.

Balorazio Batzordea sortuko da, honako hauek osatua: mantentze-lanetako arduraduna (PM, CV edo IDCkoa, egokia denaren arabera), jakintza egiaztatuko bi teknikari (mekanikari eta elektrikari bana), Giza Baliabideen Departamentuko kide bat, Enpresa Batzordeko kide bat eta dagokion OM.

Balorazioak 18 hilabeteko indarraldia izanen du; aldi hori igaro ondoren, beste balorazio bat eginen da. Plantillako langileei 2017-2020ko Hitzarmena sinatzean egin zitzaien hasierako balorazioa, bai eta 18 hilabetera egin beharreko berrikuspena ere. Langile sartu berriei hasierako balorazioa egin eta 18 hilabete igaro ondoren eginen zaie lehen balorazioa.

Saria mantentze-lanetako lanpostuari lotuta dago. Horrenbestez, lanpostu horretan lan egiteari uzten bazaio edo lanbide-taldea aldatzen bada, saria jasotzeari utziko zaio.

Hona hemen 2025erako ordainsari-eskema:

• ≥5 puntu: 100,29 euro gordin hilean, 1.203,45 euro gordin urtean.
• ≥7 puntu: 150,38 euro gordin hilean, 1.804,61 euro gordin urtean.
• ≥9 puntu: 235 euro gordin hilean, 2.820 euro gordin urtean.

2026. eta 2027. urteetarako, aurreko zenbatekoei 15.1 artikuluan ezarritako taulen gehikuntzak aplikatuko zaizkie.

Zabarkeria larririk gertatuz gero, Batzordea bildu, eta langileari saria kentzea erabakitzen ahal du.

VI. ERANSKINA.–SUHILTZAILEAK

Suhiltzaileen erregelamendua

I. kapitulua.–Suhiltzaile ez espezialistak

1. artikulua. Prebentzio eginkizunak.

Suteen aurkako instalazioan atzemandako arazo ororen berri eman beharko da, baita larrialdietako irteeretan edo itzalketa elementuak baliatzea oztopa dezakeen traba ororen berri ere. Jakinarazpen hori berehala egin beharko da, suhiltzailea lanean diharduen ataleko buruari edo Segurtasun Departamentuaren zuzendariari.

2. artikulua. Suhiltzaileen praktikak.

Praktikak lanalditik kanpo eginen dira, bazkaldu aurretik edo ondoren, txandaren irteeran edo sarreran. Suhiltzaileek enpresaren kargura erabiltzen ahalko dute lantegiko jantokia praktikak egin ahal izateko, lanaldi zatituko langileak balira bezala.

Praktikak egiteagatik konpentsazio gisa, IV. eranskinean jasotako suhiltzaile ez espezialistentzako saria emanen zaio suhiltzaile bakoitzari.

Praktikaldi bat eginen da hilean behin, ordubetekoa, eta horietan derrigorrez izendatutako suhiltzaileek zein boluntarioek hartu beharko dute parte.

Praktikaldia talde txikitan eginen da, Segurtasun Departamentuak ikuskatuta. Langileen prestakuntza teorikoaz zein praktikoaz arduratuko da, baita materialak (su-itzalgailuak, mahukak eta abar) onik mantentzeko zereginez ere.

Praktika batera ez joateak hileko ordain ekonomikoa ez jasotzea ekarriko du. Praktiketara justifikatu gabe ondoz ondoko hiru alditan edo aldizka seitan ez joateak borondatezko suhiltzaile izateari uztea edo suhiltzaile derrigortuei dagozkien diziplina-neurriak aplikatzea ekarriko du.

Prestakuntza-saioetara bertaratzearen kontrola eginen da, eta interesdunetako bakoitzak sinatu beharko du bertan.

3. artikulua. Suhiltzaile ez espezialista derrigortuen lanpostuen taula.

2024/12/31n hitzarmeneko suhiltzaile izaera zuten pertsonek beren izaerari eutsiko diote, beren borondatez uko egin ezean.

II. KAPITULUA.–SUHILTZAILE ESPEZIALISTAK

1. artikulua. Suhiltzaile espezialisten taldearen eginkizunak.

1.1. Sute txikia.

Lantegiko beste edozein langilek bezala, suhiltzaile espezialistak sutea berehala itzaltzen saiatzeko ardura dauka, sute handiagoa bihurtu baino lehen.

1.2. Sute handia.

a) Sutea suhiltzailearen lantokian piztu bada, une horretan eskura dituen baliabideen bidez itzaltzen saiatuko da, alarma seinalea emanen du eta lekuan bertan itxaronen du Esku-hartzeko burua etorri arte, haren aginduetara jartzeko.

b) Sutea beste nonbait piztu bada, berak zuzenean ikusi duela zein alarma bidez ohartu dela, sutea dagoen tokira joanen da berehala, une horretan eskura dituen baliabideen bidez itzaltzen saiatzeko, eta Esku-hartzeko buruaren aginduetara jartzeko.

Betiere Esku-hartzeko buruaren aginduetara, honako hauek egiten ahalko ditu suhiltzaileak:

1. Sutea itzaltzen laguntzea mahuka, su-itzalgailu, arnasketa autonomoko ekipo, ura ateratzeko ponpa edo abarren bidez, Suhiltzaileen Zerbitzu Publikoak heldu arte.

2. Ahal den neurrian, Suhiltzaileen Zerbitzu Publikoei laguntzea, horiek lantegira heldu orduko.

3. Sutearen fokuaren aurka eraso-bide berriak irekitzea (ateak apurtu edo zabaltzeko palankak, pikotxak eta abar erabilita).

4. Itzaltzeko, sugarrak geldiarazteko, fluidoei eusteko eta abarretarako beharrezkoak izaten ahal diren materialak eramatea sutearen fokuari erasotzeko puntura.

5. Sutearen ondoko inguruak zaintzea, foku berriak piztu ez daitezen saihesteko neurri gisa.

6. Sutea itzali bitartean zein itzali ondoren, hondakin, makina eta erregai-ontziak –besteak beste– kentzea.

7. Esku-hartzeko buruak sutea itzaltzen laguntzeko beharrezkotzat jotzen duen beste edozertan aritzea.

1.3. Ebakuazioa (kontrolik gabeko sutea).

Betiere Esku-hartzeko buruaren aginduetara, honako hauek egiten ahalko ditu suhiltzaileak:

1. Bere ataleko langileak ebakuatzen laguntzea, ebakuazioa modu ordenatuan eta kontrolpean egin dadin.

2. Ke-dentsitate handiko eta/edo sugarrez inguratutako eremuetan harrapatuta geratu diren langileak ebakuatzea.

3. Dagoeneko ebakuatu diren eremuak (komunak, bulegoak eta abar) berrikustea, barruan inor dagoen egiaztatze aldera.

4. Esku-hartzeko buruaren laguntzaileari topalekuan dauden langileak zenbatzen laguntzea, ebakuatu den eremuaren barnean inor ez dagoela egiaztatze aldera.

5. Inor zauriturik badago, lehen sorospenak egitea.

6. Esku-hartzeko buruak ebakuatzen laguntzeko beharrezkotzat jotzen duen beste edozertan aritzea.

2. artikulua. Suhiltzaile espezialisten brigadako kideak.

Honako hauek izanen dira suhiltzaile espezialisten postuak:

2024/12/31n suhiltzaile espezialista ziren pertsonek beren izaerari eutsiko diote, borondatez uko egiten ez badiete, betiere baldintza medikoak betetzen badituzte eta dagozkien praktikak egiten badituzte.

Langileak suhiltzaile espezialisten taldeko kideak izanen dira hamabi hilabeterako, eta langileak talde horretako kide izateko behar bezala sinatzen duen erabakiaren eredua haren kontratuari gehituko zaio, eranskin gisa. Erabaki hori aldi berdinetarako luzatzen joanen da, alderdietako edozeinek une bakoitzeko urteko aldia burutu baino bi hilabete lehenago aurreabisua eman ezean.

Beharrezko diren gaitasun fisikoa edo ezaugarri psikoteknikoak murriztu edo galtzeak langileak suhiltzaile espezialisten brigadako kide izateari berehala uztea ekarriko du berekin.

Urteko berritze bakoitzaren aurretik, langileak beharrezko probak egin beharko ditu, baldintza fisikoei eta psikoteknikoei eusten diela erakusteko.

Enpresako zuzendaritza suhiltzaile espezialisten taldeko kideak mailaka berritzen saiatuko da, ahal den neurrian. Horrela, aldaketek ahalik eta eraginik txikiena izanen dute taldearen jarduketa koordinatuaren eraginkortasunean.

Suhiltzaile espezialisten zerrenda unean-unean eguneratuta eta edonoren eskura egonen da, Giza Baliabideen datu-basean kontsultatu ahal izateko.

3. artikulua. Suhiltzaile espezialisten talderako konpentsazio ekonomikoa.

Hiru hilean behingo 3 orduko praktikaldia lanalditik kanpo egiteagatik, eta langilearen gainerako prestakuntza-jardueretara joateagatik, IV. eranskinean aipatzen den suhiltzaile espezialisten saria jasoko du.

Ez zaio konpentsazio hori emanen praktiketara edo prestakuntza jardueretara arrazoi justifikaturik gabe joaten ez denari.

Praktikak lan-ordutegiarekin bat egiten badu, ordutegia egokituko da, bertan egon ahal izateko eta, horrela, benetako lanaldia berreskuratu ahal izateko.

Suhiltzaile ez espezialistaren saria bateraezina da suhiltzaile espezialistaren sariarekin, halako moduan non azken honek hura ordeztuko baitu.

Suhiltzaileen sariaren zenbateko bereizia ezartzen da Esku-hartzeko buruarentzat eta Esku-hartzeko buruaren laguntzailearentzat.

Suhiltzaile espezialisten brigadako kide izateari utziz gero, arrazoia edozein delarik ere, langileak suhiltzaile ez espezialista behartuari dagokion izaera eta ordainsaria berreskuratuko ditu, betetzen duen lanpostuagatik hala balegokio. Betetzen duen lanpostuagatik halakorik ez balegokio, suhiltzaile ez espezialista boluntario izan nahi badu suhiltzaile espezialistaren izaera galdu duen horrek, enpresari eskatu beharko dio berriro, eta hark erabakiko du, une jakin horretan suhiltzaile ez espezialista boluntarioen kopuruaren zein txanda eta lanpostuetan duten banaketaren arabera. Nolanahi ere, pertsona horiek lehentasuna izanen dute espezialista ez den suhiltzaile boluntario gisa jarduteko.

4. artikulua. Kide izateko baldintzak.

1. Suhiltzaile espezialista izateko eskatzen diren ezaugarri psikoteknikoak.

Suhiltzailearen lanpostuaren profil profesionalera (=estandarra) egokitzea, ondorio horretarako egiten den testaren arabera.

2. Ezaugarri fisikoak.

Osasunaren Zaintza Zerbitzuak langilea "GAI" kalifikazioarekin baloratzea, hurrengo parametroen arabera:

1.–Prebentzio Zerbitzuak zehaztutako zalutasun-proba gainditzea.

2.–Gaixotasunak.

Azterketa egiteko unean suhiltzaile espezialistaren lanpostuari dagozkion eginkizunak betetzea oztopatu edo galarazteko moduko ondoriorik eragin dezakeen gaixotasun edo lesio larririk ez izatea. Hautaketa prozesuaren eta gaixotasun motaren arabera, azterketarako beste epe bat ematen ahalko da.

3.–Begia eta ikusmena.

Hauetakorik batere ez pairatzea:

–Begi-zorroztasuna, korrekziorik gabea, ohikoa den ikusmenaren bi herenak baino gutxiago begi bakoitzean.

–Keratomia erradiala.

–Erretina-askatzea.

–Estrabismoa.

–Hemianopsia.

–Diskromatopsia.

Osasunaren Zaintza Zerbitzuaren iritziz begi-zorroztasuna nabarmen traba dezakeen beste edozein prozesu patologiko.

4.–Belarria eta entzumena.

Entzumen-zorroztasunari dagokionez, ez izatea 35 dezibeliotan 1.000 eta 3.000 arteko hertzeko galerarik, ez eta 45 dezibeliotan 4.000 hertzekoa, belarri bakoitzean.

5.–Lokomozio-aparatua.

Osasunaren Zaintzarako Zerbitzuaren iritziz suhiltzaile espezialistaren berezko funtzioak betetzea mugatzen edo oztopatzen duen lokomozio-aparatuaren inolako alteraziorik ez izatea.

6.–Zirkulazio-aparatua.

Ez izatea: inolako hipertentsio arterialik (atseden egoerako zifrak ez dira 145 mm/Hg baino gehiago izaten ahalko presio sistolikoan, eta 90 mm/Hg baino gehiago presio diastolikoan); barizeak edo bena-­gutxiegitasun periferikoa; ezta Osasuna Zaintzeko Zerbitzuaren iritziz suhiltzaile espezialistaren berezko eginkizunak galarazten ahal dituen beste edozein patologia edo lesio kardiobaskular ere. Alde horretatik, hautagaiek elektrokardiograma eginen dute aldez aurretik, parametro arruntak islatu beharko dituena.

7.–Arnas aparatua.

Suhiltzaile espezialisten brigadatik baztertzeko arrazoi izanen dira bronkioetako asma, buxadurazko bronkopatia kronikoa, biriketako tuberkulosi aktiboa, eta Osasunaren Zaintza Zerbitzuaren ustez suhiltzaileen eginkizunak oztopa ditzakeen arnas aparatuko beste edozein gaitz. Baita aurpegiko edo bestelako anomaliak, arnas-babeseko jantziak doitzea edo arnasketa-ekipo autonomoetan arnas-ahoari eustea oztopatzen duten neurrian.

8.–Nerbio-sistema.

Ez da onartuko epilepsia, depresioa, buruko mina, dardara (jatorria edozein delarik ere), klaustrofobia, alkoholismoa edo toxikomaniaren bat duen pertsonarik, ezta suhiltzaile espezialisten eginkizunak garatzea eragozten ahal dion bestelako prozesu patologikorik duenik ere.

9.–Azala.

Ez da onartuko funtzio murriztapena dakarren psoriasia, ekzema edo orbainen bat duen pertsonarik, ezta suhiltzaile espezialisten eginkizunak garatzea eragozten ahal dion bestelako prozesu patologikorik duenik ere.

10.–Beste prozesu patologiko batzuk.

Ez da onartuko diabetesa, gaixotasun kutsakorrik egoera aktiboan, odol bidezko gaixotasunik, gaixotasun immunologiko sistemikorik, intoxikazio kronikorik, hemopatia larririk, sortzetiko malformaziorik eta psikosiren bat duen pertsonarik, ezta suhiltzaile espezialisten eginkizunak garatzea eragozten ahal dion bestelako prozesu patologikorik duenik ere.

VII. ERANSKINA.–LANGILEEN SEME-ALABEN IKASKETETARAKO LAGUNTZA

I. KAPITULUA

1. artikulua. 1. artikuluan ezarritakoaren arabera hitzarmen hau aplikatu behar zaien langileen seme-alabentzako ikasketa-laguntzen sistema Blue Collar kolektiboko pertsonei zein White Collar kolektiboko pertsonei aplikatuko zaie. Sistema hori eranskin honetan garatzen diren arauen bidez arautzen da.

2. artikulua. Erregelamendu honen bidez ezarritako ikasketetarako laguntzak enpresaren ekarpenak dira, langileen seme-alaben hezkuntza gastuak ordaintzen laguntzera bideratuak. Horrenbestez, enpresak eskubidea izanen du gastu horiek, osorik edo zati batean, aldatzeko, edo ikasturte bakoitzaren hondarrean aldi baterako edo behin betiko eteteko.

Hitzarmenaren 15.8 artikuluan ezarritakoaren haritik, enpresak seme-alaben ikasketetan laguntzeko zenbatekoaren hirukoitza ordainduko du, baldin eta semeak edo alabak %33ko edo hortik gorako ezgaitasun psikikoa edo fisikoa. Eskubide hori ez du ezkontideetako batek baino baliatzen ahalko, baldin eta biek lantoki berean lan egiten badute.

II. KAPITULUA.–Laguntzak ematea

3. artikulua. Erregelamendu honetan ezarritako ikasketetarako laguntzak jasoko dituzte behar bezala eskatzen duten eta hurrengo baldintzak betetzen dituzten pertsonek:

a) Essity enpresaren Alloko (Nafarroa) plantillako kide izatea.

b) Hitzarmen honen aplikazio esparruaren barnean egotea.

c) Seme-alabak izatea ardurapean, 3 urtetik ikasketa arautuak burutu arteko adinekoak.

d) Seme-alabak ikastetxeren batean matrikulatuta egotea.

e) Eskaera ondorio horretarako formularioan betetzea, behar bezala beteta, ikasturtea hasi aurreko 15 eguneko epean. Formulario horiek Giza Baliabideen Departamentuan entregatuko dira.

f) Oro har edo bereziki adierazten diren agiriak eta egiaztagiriak entregatzea.

4. artikulua. Ekoizpenaren gorabeherengatik aldi baterako diharduten langileek ez dute laguntza horiek jasotzeko eskubiderik izanen.

5. artikulua. Nolanahi ere, erregelamendu honetako ikasketetarako laguntzak uneko ikasturterako bakarrik emanen dira; hurrengo ikasturteetan berriro eskatu beharko dira.

6. artikulua. Eskubide hori ez du ezkontideetako batek baino baliatzen ahalko, baldin eta biek lantoki berean lan egiten badute.

III. KAPITULUA.–Laguntzen zenbatekoa

7. artikulua. 2025. urtean, ikasketetarako laguntzaren zenbateko aplikagarriak honako taula honetatik ateratzen direnak izanen dira:

Taula horrek kontuan hartzen ditu eskatzailearen eskola-adineko seme-alaben kopurua eta soldata-maila.

Eskolako laguntza jasotzeko, ez da kontuan hartuko "non stop" lanaren saria.

Hitzarmen hau indarrean dagoen bitartean, aurreko taulako zenbatekoak 15.1 artikuluan ezarritako taulen igoeren arabera eguneratuko dira.

IV. KAPITULUA.–Laguntzak ordaintzeko modua

8. artikulua. Ikasketa-laguntzak ikastaroaren bigarren zatiari dagokion urtean ordainduko zaizkie langileei.

9. artikulua. Giza Baliabideen Zuzendaritzak ikasketetarako laguntzak ordainduko ditu zuzenean langile bakoitzak nomina helbideratuta duen bankuko kontu pertsonalean.

V. KAPITULUA.–Laguntzak bertan behera uztea

10. artikulua. Arrazoi hauengatik galduko dira laguntzak:

a) Eskatzaileak Essity enpresaren Alloko (Nafarroa) plantillan baja ematea, eszedentziagatik, borondatezko bajagatik edo kaleratua izan delako.

b) Familiaren egoerari buruzko datuetako baten bat edo guztiak edo eskaera espedientearen gaineko agiriak edo frogagiriak faltsutzea.

c) Laguntzaren xede diren ikasketak ikasturtearen lehenbiziko hiruhilekoan ez hastea, behar bezala justifikatzen diren ezinbesteko kasuetan izan ezik.

d) Laguntza emateko arrazoi diren seme-alabetako baten batek edo batzuek lan ordaindua egitea –norberaren kontura besteren kontura–, baita horrek ikasteari uztea ez badakar ere (ez dira aintzat hartuko udan egindako lanak).

e) Oro har, ezarritako arauak maltzurkeriaz edo zabarkeriaz ez betetzea, eskatzaileari egozten ahal bazaio.

11. artikulua. Aurreko arrazoiek gertakaria gertatutzat jotzen den unetik aurrera izanen dituzte ondorioak; horrenbestez, eskatzaileak, hala badagokio, igaro gabeko hilabeteen kontura bidegabe jasotako zenbatekoak itzuli beharko ditu.

12. artikulua. Gainera, 10. artikuluaren b) apartatuan ezarritako kasuetan eskatzaileak ez du etorkizunean mota horretako beste laguntzarik jasotzen ahalko.

XEDAPEN GEHIGARRIAK

Laguntza horiek erabat independentetzat joko dira ikasleak eskuratzen ahal dituen gainerako laguntza ofizial zein ez-ofizialetatik, esaterako mota guztietako beka, ikasketa-poltsa eta abarretatik.

Ikasketa-laguntzen onuradun guztiek seme-alabak ikasten ari diren zentroetara joan izanaren egiaztagiriak entregatu beharko dituzte, halakorik eskatzen bazaie.

Hirugarrena.–Laguntzen zenbatekoak kalkulatzeko ondorioetarako, ikasturtearen iraupena bederatzi hilabetekoa dela ulertuko da, ikasturtearen benetako iraupena edozein dela ere.

Laugarrena.–Erregelamendu hau interpretatzean sortzen ahal den edozein zalantza edo desadostasun Giza Baliabideetako Zuzendaritzak argituko du.

VIII. KAPITULUA.–FALTAK ETA ZEHAPENAK

1. artikulua. Falten sailkapena.

Langileak eginiko faltak honela sailkatuko dira, kontuan hartuta faltaren tamaina edo garrantzia: arinak, astunak edo oso astunak.

2. artikulua. Falta arinak.

Falta arin gisa ondoko hauek hartzen dira:

1. Edozein lanetan ari dela, langileari egozten ahal zaizkion arduragabetasun edo zabarkeriaren ondoriozko errakuntza zein atzerapenak, baldin eta agindu zaion zerbitzuan nahasmendu larririk eragiten ez badu.

2. Aldi baterako ezintasunagatik lanera huts egitean, hurrengo 24 orduko epearen barruan baja-­agiririk ez aurkeztea.

3. Materiala zaintzean horren hondatze arina sor dezaketen arduragabetasun txikiak.

4. Esleitu zaizkion makina edo tresnen garbitasunik eza, baldin eta enpresak horretarako beharrezko baliabideak eman badizkio.

5. Jendeari behar bezalako arretaz ez artatzea, arreta hori laneko betebeharrei dagokienean.

6. Lanaldian lanekoez aparteko gaiei buruz eztabaidatzea, baldin eta agindutako zerbitzuan gorabeherak sortzen badituzte. Aipatutako eztabaidek iskanbila nabarmena sortzen badute, hutsegite larritzat har daitezke.

7. Irteera-ordua baino lehen arropa aldatzea, enpresak ez badu berariaz horrelakorik baimendu.

8. Paperak, trapuak, azalak, zaborrak eta abar biltzeko ontzietatik kanpora botatzea.

9. Lanorduetan lanarekin zerikusirik ez duten telefono-deiak egitea edo jasotzea, enpresaren baimenik gabe. Muga hori ez litzateke kontuan hartuko sakelako telefono partikularrak zentzuz erabiltzen badira, baldin eta produkzio-prozesuari eragiten ez bazaio, edo langilearen beraren zein gainerako lankideen segurtasuna arriskuan jartzen ez bada.

10. Ez dagokion txanda eta orduan lantokian sartzea, horretarako baimenik gabe.

11. Arduradun hurrenari material-akatsen edo material gehiagoren beharraren berri ez ematea, baldin eta nahasmendu larririk eragiten ez badu.

12. Laneko sarrera-irteeren berri jasotzeko arduradunen aurrean ez agertzea edo kontrol-erlojuan ez fitxatzea.

13. Familian izandako aldaketen berri garaiz ez jakinaraztea, baldin eta eragina izan badezakete derrigorrezko gizarte-aseguruetan, aurreikuspen-erakundeetan edo familia-laguntzako erakundeetan.

14. Arropa zein objektuak aldageletatik kanpo uztea.

15. Lanalditik kanpo eta baimenik gabe esku-erremintak norberaren erabilerarako erabiltzea.

16. Langileak baimenduta ez dituen makina edo erremintak erabiltzea.

17. Lanorduetan lanekoak ez diren entretenimendutan edo irakurketetan aritzea. Horietatik kalte larria eratortzen bada, falta astuntzat hartuko da.

18. Baimenik gabe enpresako ibilgailuetan ibiltzea.

3. artikulua. Falta astunak.

Falta astun gisa ondoko hauek hartzen dira:

1. Hiru hilabeteko epean falta arinean berrerortzea edo hura errepikatzea.

2. Lanera joanen ez dela behar bezalako aurrerapenaz ez adieraztea.

3. Egun batean lanera ez joatea, justifikatutako arrazoirik gabe.

4. Enpresari datuak maltzurkeriaz ezkutatzea, baldin eta derrigorrezko gizarte-aseguruetan, aurreikuspen-erakunde zein familia-laguntzan, soldata zein soldata-osagarritan eragina izan badezakete.

5. Lanean utzikeriaz edo zabarkeriaz aritzea, jokabide horrekin lanaren martxa onari edo produktuen kalitateari kalte larria egiten bazaio.

6. Agindutako eginkizunak edo zerbitzuak garaiz ez betetzea, baldin eta enpresari kalte larria eragiten bazaio.

7. Langilearen kargura dauden makina, material eta obretan ikusiriko hondaketa edo anormaltasunak berehala jakitera ez ematea, enpresari kalte larria eragiten zaionean.

8. Goiko hurrengo arduradunari ez ematea obraren akaberaren edo lanean jarraitzeko material beharraren berri, horregatik kalte larriak sortzen badira.

9. Liskar edo jokoetan parte hartzea.

10. Material, pieza, makina, erreminta, tresna eta altzariak baliogabetu, hondatu edo galtzea, langileari egozten ahal zaion jokamolde zuhurtziagabeagatik.

11. Iragarki-tauletan jarritako jakinarazpenak hondatzea edo baliogabetzea.

12. Beharrezko baimenik gabe ataletik, bulegotik edo lan-eremutik alde egitea. Horren ondorioz enpresari kalte larria eragiten bazaio, edo lankideren bati istripua, falta oso astuntzat jo daiteke.

13. Enpresaren egoitzako altzarietan edo hormetan idatzi edo kartelak ezartzea. Kartel horiek enpresarentzat edo bertako edozein langilerentzat iraingarriak badira, falta oso astuntzat joko da.

14. Baimen bat lortzeko iruzurra edo itxurakeria baliatzea.

15. Enpresak berariaz baimendu gabeko pertsonak bertako ibilgailuetan igotzea.

16. Lanean mozkortzea edo drogak hartzea.

17. Lanean zuhurtziarik gabe jokatzea. Jokabide hori falta oso astuntzat joko da, baldin eta langilea bera eta lankideak arriskuan edo instalazioak hondatzeko zorian jartzen badira.

Kasu hauetan langilea zuhurtziagabe aritu dela joko da:

a) Istripuak sortzeko arriskua izanik motor edo makinak abiaraztea.

b) Estutu, lotu edo itxi gabeko arropa erabiltzea, arropa horiek kateatzen ahal duten makina edo transmisioen ondoan egonik. Enpresaren betebeharra da egin beharreko zereginetarako arropa egokia ematea.

c) Goi tentsioko tutuetan lanak egitea, lineak moztuta dauden egiaztatu gabe.

d) Zintzilik dauden kargen azpitik pasatzea edo horien azpian jartzea, beharrik gabe.

e) Norberaren ekimenez eta baimenik gabe babeserako gailuak eta tresnak aldatu edo kentzea.

18. Debekatutako tokietan baimenik gabe sartzea.

19. Beste sexuko langileentzako komunetan sartzea, horretarako baimenik izan gabe.

20. Menpeko langileei laneko segurtasun- eta higiene-arauak hausten uztea.

21. Debekatuta dagoen tokietan erretzea.

22. Lanalditik kanpo enpresaren makinak edo materiala norbere erabilerarako erabiltzea, baimenik gabe.

23. Enpresako mediku-zerbitzuei aldian-aldian egin beharreko azterketa egiteari uko egitea.

24. Behar fisiologikoak komunetik kanpo egitea.

25. Garbiketa eta txukuntasun eza etengabea eta ohikoa, lankideengan kexa justifikatua eragiten duena.

4. artikulua. Falta oso astunak.

Falta oso astuntzat joko dira honako hauek:

1. Sei hilabeteko epean hutsegite larri bera behin baino gehiagotan egitea.

2. Bi hilabeteko epean bi egunetan lanera ez joatea, bidezko arrazoirik gabe.

3. Iruzurra, leialtasun eza edo konfiantza-abusua agindutako kudeaketetan, eta ebastea edo lapurtzea.

4. Enpresaren lehengai, produktu erabilgarri, erreminta, makina, gailu, instalazio, eraikin, altzari, tresna eta dokumentuak suntsitu edo hondatzea.

5. Gaixo-plantak egitea, edo istripuren bat izan duela sinetsarazten saiatzea.

6. Baimenik gabe enpresaren ibilgailuak gidatzea.

7. Baimenik gabe, lanaldian lan partikularretan aritzea.

8. Nagusiek indarreko lege eta Hitzarmenen arabera emandako aginduak ez betetzea, eta gainerakoak horretara bultzatzea.

9. Lan-kontroleko dokumentuetan datuak faltsutzea.

10. Laneko istripuaren itxurak egiteko norbere buruari eta nahita lesioak egitea, edo laneko istripuaren plantak egitea, lanetik kanpoko lesioak laneko lesiotzat jo daitezen lortzeko.

11. Lanean sarritan mozkortzea edo drogak hartzea.

12. Enpresaren isilpeko gutunen sekretua urratzea.

13. Enpresari lehia egitea, edo negozio berberetan edo antzekoetan zerbitzuak ematea, enpresaren baimenik gabe.

14. Arduradunei, lankideei zein mendekoei hitzez eta egintzaz tratu txarrak ematea edo errespetu-falta larria egitea, bai eta haien senideei ere.

15. Agintekeria. Nagusi batek egitate arbitrario bat egiten badu, beheragoko baten kaltetan edo lege-manu bat hautsita, egintza agintekeriatzat eta falta oso astuntzat joko da; ondorioz, dagokion espedientea irekiko da.

Kasu horietan, langile interesdunak Enpresa Batzordeari edo langileen ordezkariei jakinaraziko die, hiru eguneko epean, zeinek enpresako Zuzendaritzari emanen baitiote gertatuaren berri. Enpresak espedientea abiaraziko du, Enpresa Batzordearen edo langileen ordezkarien jakinarazpena jaso eta 10 eguneko epean, gehienez ere.

Enpresako Zuzendaritzak ez badu aipatutako epean espedienterik abiarazten, kaltetuak, 15 eguneko epean, idatziz emanen dio horren berri Probintziako Lan Ordezkaritzari, langileen ordezkarien edo Enpresa Batzordearen bitartez. Ordezkaritzak bidezkotzat jotzen badu, gaiaren aurrekariak eskatuko dizkio enpresari, eta, aholkuak eman ondoren, gertakaria frogatzen bada, bidezkoa dena ebatziko du.

16. Zigor Kodean definitutako delituetan parte-hartze zuzena edo zeharkakoa izatea, betiere epai judizial irmoa baldin badago.

17. Enpresako edo langileen ondarea ukitzen duten ondasunak desagertzen badira, enpresak langileen armairuak edo gauza pertsonalak arakatzeko agintzen ahalko du. Erregistroa egiteko, langileen ordezkarietako batek egon beharko du aurrean, baldin eta horietako bat enpresan badago. Kontrol horri uko egitea hutsegite oso larritzat joko da.

18. Lanaldian lo egitea, lanpostuan zein lanpostutik kanpo, baimenik ezean.

19. Laneko errendimendua edo jarduera nahita gutxitzea, modu jarraituan.

20. Liskarrak eta borrokak sorraraztea.

21. Falta astunak egitea, asmo txar nabaria dagoenean.

22. Beste langile baten ordez sinatu edo fitxatzea, lantokian dagoela pentsarazteko. Zein langileren izenean iruzurrez sinatu edo fitxatu den, hark ere falta bera eginen du, baldin eta jakinaren gainean dagoenetik horren berri ematen ez badu.

5. artikulua. Puntualtasun faltak.

Lanpostura sartzerakoan 10 minuturainoko atzerapena idatzizko kargu-hartzearekin zigortuko da, falta hori lehenbiziko falta egin eta handik aurrera hilabete naturalaren barruan 3 aldiz errepikatzen bada.

Hurrengo horietako bakoitza, epe beraren barruan, enplegua eta soldata egun batez etetearekin zigortuko da, zazpigarrenera arte, hori barne. Epe beraren barrenean falta horretatik aurrera egindako mota bereko falta bakoitza arintzat hartuko da.

Atzerapena hamar minututik gorakoa eta hogeita hamarretik beherakoa bada, eta epe berean hiru aldiz errepikatzen bada, bi eguneko enplegu eta soldata etetearekin zigortuko da.

Hortik aurrera, mota eta epe bereko falta bakoitza falta astuntzat hartuko da.

Atzerapena hogeita hamar minututik gorakoa bada eta epe berean bi aldiz errepikatzen bada, egun batez enplegua eta soldata etetearekin zigortuko da.

Epe berean mota horretako hirugarren hutsegitea egiten bada, lau egunez enplegua eta soldata etetearekin zigortuko da, eta laugarren hutsegitik aurrera, oso larritzat joko da eta hala zehatuko.

Puntualtasun faltek ez dute eraginik beste edozein faltaren berrerortze edo errepikapenen araubidean.

Kontzeptu horrengatiko falta astunak, gehienez, 15 eguneko enplegu eta soldataren etenaldiarekin soilik zigortzen ahalko dira.

Kontzeptu horrengatiko lehen falta oso astuna zehatu eginen da, langileen ordezkariekin nahitaez negoziatu ondoren, zehapenen artikuluan jasotzen diren falta oso astunetarako ezarritako zehapenen barruan. Beste falta oso astun bat eginez gero, ez da aldez aurretik negoziatu beharko.

6. artikulua. Zehapenak.

Falta nolakoa izan den, zehapen hauek ezarriko dira:

–Falta arinengatik:

• Hitzezko kargu-hartzea.
• Idatzizko kargu-hartzea.
• Egun batez enplegua eta soldata etetea, langileari idatziz jakinarazita.

–Falta astunengatik:

• Gehienez ere 15 egunez enplegua eta soldata etetea.
• Aldi baterako desgaitzea goragoko talde batera igarotzeko, gehienez ere hiru urtez.

–Falta oso astunengatik:

• Enplegua eta soldata etetea, gutxienez hamasei egunez eta gehienez sei hilabetez.
• Goragoko maila batera pasatzeko gaitasuna kentzea aldi baterako, sei urterako gehienez.
• Kaleratzea.

Falta astun eta oso astunengatiko zehapenak idatziz jakinaraziko zaizkio langileari.

Ezar daitezkeen zehapenek ez dute eragotziko erruduntasun-testigantza auzitegietara pasatzea, egindako hutsegitea delitu edo falta izan daitekeenean, edo gobernu-agintaritzari horren berri ematea, hala badagokio.

7. artikulua. Preskripzioa.

Falten preskripzioari dagokionez, indarreko legezko xedapenetan ezarritakoari jarraituko zaio.

IX. ERANSKINA.–361 EGUNEKO SISTEMAREN "NON STOP" LANA EDO 5. TXANDAKO SISTEMAKO LANA

1. "Non stop" lanaren sistemak urteko benetako lanaren gehieneko lanaldiaren honako banaketa hau dakar: urteko lan-egutegiaren arabera erabilgarri dauden 361 ekoizpen-egun bete ondoren, langileak eguneko lanaldi gehiago egin behar ditu, ezarririko urteko gehieneko lanaldiaren iraupena osatzeko; lanaldi horiei "txandako ordezko lana" esaten zaie.

2. 361 ekoizpen-eguneko lan egutegian, jaiegun berreskuraezintzat joko dira honako hauek: urtarrilaren 1a, maiatzaren 1a eta abenduaren 25a. Era berean, ekoizpena eten eginen da abenduaren 24ko eta 31ko 14:00etan.

3. Txandako ordezko lana.

Txandako ordezko lanak asteko edozein egunetan finkatuko dira egutegian, eta derrigor egin beharko dira bertan esleitzen den egunean. Hala eta guztiz ere, enpresak eguna aldatzen ahalko du; halakoetan, IV. eranskinean adierazitako txandako ordezko lanaren saria ordainduko da, horrela egiten den txandako ordezko lan-saio bakoitzeko.

Langilearentzat bakarrik izanen da nahitaezkoa txandako ordezko lana egitea larunbatean, igandean edo jaiegunean, urte horretan txandako ordezko hiru lan edo gutxiago baditu. Nahitaezkoa izanen da txandako ordezko lana egitea larunbatean eta igandean edo jaiegunean, urte horretan txandako ordezko lau lan edo gehiago baditu. Azken kasu horretan egun horietako bat jaiegun ofiziala eta larunbata edo igandea bada aldi berean, nahitaezko bi egun horietako bat bakarrik erabili dela ulertuko da.

Arau orokor gisa, ahalik eta arinen jakinaraziko zaio langileari txandako ordezko lanean aritu beharra duela, eta, betiere, txandako ordezko lan-saioa hasi baino 48 ordu lehenagoko gutxieneko epea errespetatzen saiatuta.

Irizpide hauen arabera hautatuko da txandako ordezko lanean aritu behar den langilea: lanpostu bereko langilea izatea, beharrezko eginkizun-aniztasuna onartua izatea eta hori egunean izatea, eta txandako ordezko lan-saio gehien egin behar dituen langilearen baldintza beretan egotea.

4. Oporrak.

5. txandako egutegian langilearen opor egun guztiak markatuko dira. Oporrak hartzeko aldi gisa urtarrilaren 1etik abenduaren 31ra bitartekoa hartuko da. 5. txandako langileek bi alditan banatzen ahalko dituzte opor egunak.

Araubide horretan, langileak urtean hamalau opor-egun jarraitu hartzen ahalko ditu gehienez.

Ondoz ondoko hamalau opor egun horiek hartzeak ez du langileak osorik egin behar duen urteko lanaldiaren inolako murrizketarik ekarriko. Izan ere, langilearen egutegian laneguntzat jotzen diren egunetatik egun bat edo gehiagoren aldaketa izanen da (ondoz ondoko zazpi lanegunekoa, gehienez), horiek atseden-egun bihurtuko direla. Gauzak horrela, urteko lan-egutegi orokorrean laneguntzat jotzen diren eta ondoz ondoko opor egunen aldia hartzeko aldatu behar diren egunak itzuli beharko ditu langileak, urte naturalaren barruan.

4.1. Hauxe da lanegunen aldaketa eskatzeko prozedura, oporrak hartzeko:

a) Ondoz ondoko 14 opor egun edo gutxiago (7 eguneko 2 zati) hartu nahi dituen langileak goiko hurrengo arduradunari jakinaraziko dio, eskatutako aldiaren hasierako eta hondarreko egunak zehaztuta. Aldi horren barnean aldatu beharreko egunak zein opor egun bihurtu beharko diren atseden egunak adieraziko ditu.

b) Jarraian, 361 eguneko sistemaren 5. txandako sistemako langileen oporrei buruzko datu basean sartuko da eskaera.

c) Sistemak agiri bat sortuko du eskaeraren datuekin; bertan bakarrik adieraziko delarik zein egunetan egin den, eta baita eskaera onartzeke eta itzultzeko egunak esleitzeke daudela, eta bat datorrela ezarritako gehieneko egunen kopuruarekin: ondoz ondoko 14 opor egun, edo trukeko 7 egun artekoa. Ondoz ondoko 14 opor egun hartzeko trukean 7 egun baino gehiago eskatzen dituzten kasuak banan-banan aztertuko dira, eta ahal delarik, egutegia egokitzeko ahaleginak eginen dira, beharrezko egun-aldaketak bitarte. Agiri horren bi kopia eginen dira, eta langileak zein eskaera jasotzen duen arduradunak sinatuko dute. Gero, kopia bat emanen dio langileari, eta bestea Giza Baliabideen Atalera bidaliko du.

d) Egutegian ezarritako opor egunak itzultzeko egunetan, enpresak eskatuta eta langileak onartuta egun berean dataz edo txandaz aldatzen badira, txandako ordezko lanaren saria ordainduko da.

f) Adierazitakoa gorabehera, egun berak hartzeko hainbat eskaera egoteagatik aldaketa guztiak automatikoki eman ezin badira, hurrengo arauak beteko dira:

1.–Berez ekoizpenari kalterik eragiten ez dioten edo ordezten ahal diren aldaketa guztiak emanen dira.

2.–Egun berberak hartzeko gainerako aldaketa-eskaerak antzinatasun handiena duten eta aurreko urtean sistema hau baliatu ez duten langileei emanen zaizkie, ekoizpenak horretarako aukera ematen duen heinean. Beharrezkoa bada, txanda-sistema ezarriko da.

3.–Lanpostuaren ezaugarriek, maila baliokideko taldeak edo langilearen esperientziak horretarako aukera ematen duenean, zehaztapen horiek aplikatzea errazten duten laneko txandak aldatzen ahalko dira, egun beretan.

4.–Zalantzarik egonez gero, langileen familia-egoerari erreparatuko zaio auzia ebazteko (adibidez: ezkontidearen lanari, eta ardurapean duen seme-alaben kopuruari). Beharrezkoa bada, txanda-sistema ezarriko da.

g) Aurreikusi gabeko ez bertaratzeak edo ekoizpenaren zirkunstantziak direla-eta aldaketa eman ezin denean, langileak beste eskaera bat egiten ahalko du egun baterako edo batzuetarako, hamabost egun lehenago jakinarazita. Kasu horretan, langileak lehentasun-eskubidea eskuratuko du hurrengo urterako, onartu ezin izan zaion egunari edo aldiari dagokionez.

h) Zuzendaritzak kasu bakoitzari dagokion ebazpena jakinaraziko die langileei eskaera egin eta hilabeteko epean, eskaera epe laburragoan egiten denean izan ezik. Kasu horretan, ahalik eta lasterren erantzunen zaie. Nolanahi ere, aldaketaren xede izan diren lanaldiak zein egunetan egin beharko diren adieraziko da, eta horretarako banakako egutegi batean finkatuko dira itzuli beharreko egunak, nahitaez bete beharrekoak.

i) Aldatutako egunen itzulketak ez dira inola ere diruz ordainduko eta, ahal dela, banakako egutegian finkatuko dira, oporren gaineko beste eskaera batzuek sortzen dituzten ordezpenak betetzeko. Aldi horretan finkatzen ez diren itzuli beharreko egunak egutegian finkatuko dira.

j) Lanegunen ordez, lanegunak itzuliko dira; larunbaten ordez, aldiz, larunbatak; eta igandeen eta jaiegunen ordez, igandeak eta jaiegunak.

4.2. Hasieratik ordezko langilea adierazita (lanpostu bakoitzerako langile egokia bada) eta lanpostu bereko langileen artean egiten diren ordezpenak lehenetsita aldaketok eskatzen laguntzeko, "oporretarako egunak aldatzea" kontzeptupean eskatzen diren trukeak ahalik eta lasterren baimenduko dira, beharrezko betekizunak betetzen direla egiaztatu ondoren eta oporren plana egin zain egon gabe, eta eskatzen diren beste aldaketa batzuen aurrean lehentasuna izanen dute.

4.3. Urtean zehar oporretarako aldaketarik eskatu ez dutenek, edo trukeen sistemaren bidez bakarrik eskatu dutenek, hurrengo urteko urtarrileko nominarekin batera, IV. eranskinean oporretarako aldaketarik ez eskatzeagatiko saria jasoko dute, aurreko urtean eskatu ez den egun bakoitzeko edo oporrak trukatuta eskatu den egun bakoitzeko.

5. Arrazoi tekniko, antolakuntzazko edo ekoizpenekoak tarteko lan-egutegiaren araberako lanegunetan ekoizpena hein batean edo osorik gelditu behar denean, langileari beste zeregin batzuk esleituko zaizkio, beste atalen batean ekoizpenekoak zein mantentze-lanak.

6. Trukeak.

Langileek lanegun bat edo gehiago aldatzeko edo lankideen artean trukatzeko eskatzen ahal dute, edo txanda bat edo gehiago aldatzeko, lanegun beraren edo batzuen barruan. Truke-eskaeran aldaketa egin nahi duten bi langileen izenak adierazi beharko dira; bi langileen artean nolabaiteko korrelazioa izan beharko dute txanda-sisteman eta trukatu nahi duten lanpostuan.

Sistema informatikoan truke-eskaera sartu eta gero, horren berri eman beharko zaio Giza Baliabideen Atalari, zeinak trukea onetsi ala ez ebatziko baitu. Erabakia ahalik eta lasterren jakinaraziko zaio interesdunari.

Enpresak 5. txandako langileek egindako truke-eskaerei erantzunen die, eskaera egin eta 15 laneguneko epean, salbu eta eskaera epe laburragoan egiten bada; kasu horretan, ahalik eta lasterren erantzunen zaie.

7. Egun-aldaketa.

Oporrei buruzko 4. apartatuan araututakoa galarazi gabe, langileak egun bat edo gehiago aldatzeko eskatzen ahalko du, gehienez ere hiru urtean, egutegian lanegun gisa finkatuta dituenetatik, eta, hortaz, atsedena hartu egun horietan, eta horiei dagozkien lanaldiak urte bereko beste egun batzuetan bete. Urteko azken hiruhilekoan egindako eskaerei dagokienez, egutegian finkatu behar diren lanaldiak hurrengo urteko martxoaren 31ra arte finkatzen ahalko dira. Egun-aldaketak zehaztapen hauei jarraikiz eskatuko dira:

a) Langileak aldaketak eskatzen ahalko ditu egokitzat jotzen duen guztietan, justifikatu behar izan gabe, nahikoa izanen duelarik gutxienez hiru egun lehenago jakinaraztea.

b) Oporrak aldatzeko egunak egutegiko 48 orduko (2 txanda) tartea (gutxienez) duten egunetan eskatzen ahalko dira, oporrak aldatzeko baimendutako egunen aurretik eta atzetik.

c) Nolanahi ere, aldatu diren txanda edo lanaldietan arituko den langileak dena delako lanpostuaren zereginetarako lanbide-kategoria edo eskarmentu egokiak izan beharko ditu.

d) Eskaera interesdunak sinatuta entregatu behar da.

e) Adierazitakoa gorabehera, egun berak hartzeko hainbat eskaera egoteagatik aldaketa guztiak automatikoki eman ezin badira, hurrengo arauak beteko dira:

1) Berez ekoizpenari kalterik eragiten ez dioten edo ordezten ahal diren aldaketa guztiak emanen dira.

2) Egun berberak hartzeko gainerako aldaketa-eskaerak antzinatasun handiena duten eta aurreko urtean sistema hau baliatu ez duten langileei emanen zaizkie, ekoizpenak horretarako aukera ematen duen heinean. Beharrezkoa bada, txanda-sistema ezarriko da.

f) Aurreikusi gabeko ez bertaratzeak edo ekoizpenaren gorabeherak tarteko aldaketa onartu ezin den kasuetan, langileak beste eskaera bat egiten ahalko du beste egun edo aldi baterako, hamabost egun lehenago jakinarazita.

g) Zuzendaritzak dagokion ebazpena jakinaraziko die langileei eskaera egin eta hilabeteko epean, eskaera epe laburragoan egiten denean izan ezik. Kasu horretan, ahalik eta lasterren erantzunen zaie. Nolanahi ere, aldaketaren xede izen diren lanaldiak zein egunetan egin beharko diren adieraziko da.

X. ERANSKINA.–345 EGUNEKO "NON STOP" LAN-SISTEMA, 5 TXANDAKOA

345 eguneko "non stop" lan-sistema edo 5 txandakoa.

Alloko lantegian 345 eguneko sistemaren "non stop" lana erregelamendu honek arautuko du:

1. Lana bost txandatan eginen da, egutegiaren arabera.

2. Urte arruntetan makinek 345 egunez ekoiztea bermatzen da, eta bisurteetan 346 egunez. Geldialdi ofiziala abuztuaren 15etik 28ra bitartekoa izanen da, biak barne, gehi geldialdi ofizialeko egunak: urtarrilaren 1a, Pazko eguna, maiatzaren 1a, uztailaren 22a, abenduaren 24a eta abenduaren 31 (egunaren 2/3).

3. Txanda guztietan opor aldia izanen da abuztuaren 15etik 28ra bitartean, biak barne. Gainerako oporrak txanda bakoitzerako finkatuko dira urtean, egutegiaren arabera.

4. Txandako ordezko lana: ondorio horietarako, txanda bakoitzean X eta X' bereizten dira. Txandako ordezko lan-saioak astelehenetik ostiralera bitartean eginen dira, jaiegun edo jaiegunaren bezpera ez den neurrian. Goizean eta arratsaldean finkatuko da egutegiaren arabera, eta txandako ordezko lan-saioko (goiz, arratsalde zein gau) egun horietan gertatzen diren bajak bete behar dira nahitaez; langile bakoitzak gaueko 2 ordezkapen eginen ahalko ditu, gehienez, urte osoan.

Txandako ordezko lanaren inguruan gertatzen den ordutegi-aldaketa oro interesdunari gutxienez 24 ordu lehenago jakinarazteko ahaleginak egin beharko dira.

Txandako bere ordezko lanaren egunak aldatu nahi dituen langileak Kontramaisu-maistrari jakinarazi beharko dio, 24 ordu lehenago, gutxienez, egun hori itzultzeko eguna bien artean adostuta.

Txandako ordezko lanak urtarrilean, otsailean, martxoan, apirilean, maiatzean, urrian, azaroan eta abenduan finkatuko dira.

5. Lantegiko lanak urtean zehar banatuko dira eta astelehenetik ostiralera bitartean eginen dira. Igande edo jaiegunean langileren bat bertaratzen ez bada, bete egin beharko da haren jarduna, lan horren truke jaiegunaren sari berezia jasota.

6. Sari hori ez da jasoko beste absentzia batzuengatik, oporretan eta langilearen zuzeneko senide baten (ezkontidea, gurasoak, seme-alabak, anai-arrebak eta ezkontidearen gurasoen heriotza) heriotza edo ebakuntza kirurgikoaren kasuan izan ezik.

7. Arrazoi teknologiko edo segurtasunezkoengatik zaintzapean egon behar duten instalazioen zainketa ziurtatuko dute lan-araubide honetan diharduten langileek, lantegia geldirik dagoen bitartean, ezinbesteko langileak baino arituko ez direla zeregin horretan.

XI. ERANSKINA.–IDC ZAMALANAK

1. artikulua. Lan-sistema bat eduki behar da, salgaien zamalanak linealki egiteko astelehenetik ostiralera, larunbatetan eta tokiko jaiegunetan, urte osoan.

2. artikulua. Langileak 2 pertsonako 6 taldetan antolatzen dira: 12 pertsona guztira, goizeko, arratsaldeko edo lanaldi zatituko txandetan banatuta, IDCren berariazko egutegiaren arabera.

Lanaldi zatituan diharduten langileek lanaldi malgua erabiltzen ahalko dute, ezarritako baldintzetan.

3. artikulua. 2025erako konpentsazio ekonomikoa:

Salgaien zamalanetarako urteko saria, 720 euro gordin.

Benetan lan egindako larunbat bakoitzeko saria, 85 euro gordin.

Benetan lan egindako tokiko edo autonomia-erkidegoko jaiegun bakoitzeko saria, 170 euro gordin.

4. artikulua. Trukeak. Hitzarmenaren IX. eranskinaren 6. puntuan jasotako truke-sistema aplikatuko da.

5. artikulua. Lan-sistema horrek IDCko zamalanei eta picking/stacking-ari bakarrik eraginen die. Lantegiko beste edozein lanpostutan aplikatzeko, batzordearekin hitzartu beharko da.

6. artikulua. Larunbateko lanaldi zatituko lan-tartea 08:00etatik 18:00etara izanen da.

2025eko IDCko egutegia

2026ko IDCko egutegia

2027ko IDCko egutegia

XII. ERANSKINA.–ORDAINDUTAKO BAIMENAK. ETENALDIAK, MURRIZTAPENAK ETA ESZEDENTZIAK

1. 16 egun naturaleko ezkontzagatiko baimena izatezko bikotearen kasuan ere hartzen ahalko da, baina langile bakoitzak behin bakarrik eskatzen ahalko du. Gerora langilea pertsona horrekin berarekin (izatezko bikote harremana osatzeagatik 16 egun naturaleko baimena eskatu eta hartu zuen pertsona berarekin) ezkontzen bada, egoera horrek ez du 16 egun naturaleko beste baimen bat hartzeko eskubiderik sortuko, baimena aurretiaz hartutzat joko baita. Izatezko bikote erregistro ofizialean izena eman eta astebete igaro baino lehen hasi beharko da baimena.

2. Lehen mailako odol- edo ezkontza-ahaideen jaiotza edo heriotza gertatzen denean, ematen diren bi egunetatik bat laneguna izanen da.

3. Joan-etorrietarako, hurrengo irizpidea aplikatuko da:

a. 3 egun, 100 km eta 250 km arteko distantzia badago edo Iruñera, Logroñora edo antzeko distantziara dagoen beste leku batera joan behar bada.

b. 4 egun, 250 km eta 500 km arteko distantzia badago.

c. 5 egun, distantzia 500 km-tik gorakoa bada.

Hiru kasuetan, distantzia lantokiaren eta baimenaren arrazoi den ahaidea dagoen lekuaren artekoa (ospitalea edo etxea) izanen da.

Bidaiaren luzera neurtzerakoan enpresaren eta langilearen artean desadostasunik bada, enpresa arduratuko da distantziaren proba egiteaz. Distantzia neurtzeko, ibilbide laburrena hautatuko da.

4. 2. mailara arteko ahaidetzat joko dira honako hauek:

a. Odol ahaideak:

(i) Gurasoak.

(ii) Seme-alabak.

(ii) Neba-arrebak.

(iii) Aitona-amonak.

(iv) Bilobak.

b. Ezkontza-ahaideak:

(i) Aitaginarreba-amaginarrebak.

(ii) Seme-alaben ezkontideak (erraina/suhia).

(ii) Ezkontidearen anai-arrebak (koinatu-koinatak).

(iii) Ezkontidearen aitona-amonak.

(iv) Ezkontidearen bilobak.

5. Ondorio horietarako, erregistro publiko ofizialetan erregistratuta dauden "izatezko bikoteak" aintzatetsiko dira.

6. Hori emateko, beharrezkoa izanen da hurrengo baldintza hauek izatea:

a. Bi ezkontideak edo izatezko bikotekideak besteren konturako langileak direla egiaztatzea.

b. Kontsultaren ordutegia bien lanaldiarekin bat etortzea.

7. Baimen horren gehieneko iraupena etxeko atsedena bukatu artekoa izanen da.

8. Senide baten heriotzagatiko baimena, bai eta istripu edo gaixotasun larriagatiko, ospitaleratzeagatiko edo ospitaleratzerik gabeko ebakuntza kirurgikoagatiko baimena ere, baldin eta etxean atseden hartu behar bada, ezkontidearen anai-arreben (koinatu-koinatak) kasuan ere aplikatuko da. Era berean, eta ondorio berberekin, ospitalizazioko edo ebakuntza kirurgikoko baimena gertaera eragilearen aurreko egunean baliatzen ahalko da, baldin eta horrek eranskin honetan adierazitakoaren arabera dagozkion baimen-egunen kopurua handitzea ez badakar.

9. Senide baten ebakuntza kirurgikoaren egunean gaueko txandan lan egiten duten langileek, ebakuntzaren egunean atsedena edo oporrak izateagatik baimena egun horretan hastea ez badagokie, lan-txanda aldatzeko eskatzen ahalko dute.

10. Aurreko koadroan jasotako istripu edo gaixotasun larriagatiko, ospitaleratzeagatiko edo ospitaleratzerik gabeko ebakuntza kirurgikoagatiko baimena beste egun batez luzatuko da, baldin eta langileak 400 km-ko edo gehiagoko itzulerako bidaia egin behar badu.

1. Jaiotza, adopziorako ebazpen judizial edo harrerako erabaki administratibo edo judizialaren legezko baimena agortzen denetik seme-alabaren jaiotzagatiko kontratuaren etenaldia burutu arte edo etenaldi hori gertatu eta berehala.

2. Lanaldi partzialeko araubidean %50, gutxienez, hartzen ahalko da, enpresa eta langilea ados egonez gero.

3. Haren lanpostua hutsik ez badago, langileak maila handiagoko edo txikiagoko lanpostu huts bat hartzen ahalko du; betiere beste langile batzuen barne-igoerarako eskubidea errespetatzen delarik, eta hartzen ahal duen lanpostuaren ezaugarriak betetzen dituelarik. Aurretik eszedentzian egondako langileak berriro eszedentzia hartu ahal izateko lau urte igaro beharko dira, aurrekoa bukatu zenetik.

4. Eszedentzian dagoen langileak ez du enpresan sor litezkeen lanpostu hutsetan sartzeko lehentasun-eskubiderik, bere mailakoetan edo antzekoetan baino.

5. Legezko zaintzagatik lanaldi murriztua duten langileek lanaldi murriztua metatzeko aukera izanen dute, baldin eta lanaldi murriztua duten pertsonen ehunekoak ez badu %5,27 gainditzen (Hitzarmen Kolektiboa sinatu den egunean dagoen ehunekoa gehi 2 puntu). Metatze hori hiruhilekoa izanen da, eta langileak 15 egun lehenago jakinarazi beharko du, egutegi-proposamen bat erantsita. Hiruhilekoaren hondarrean saldoa zero izan beharko da. Negozio-inguruabarrengatik langileak egindako proposamena ezin bada onartu, enpresako ordezkariek eta Batzordeko ordezkariek berariaz osatuko duten batzorde parekide batean aztertuko da.

XIII. ERANSKINA.–FABRIKAKO INSTALAZIOAK IKUSKATZEKO SISTEMA GABONETAN ETA GUARDIA MAIATZAREN 1EAN

a) Gabonetan fabrikako instalazioak gainbegiratzea: fabrikako instalazioak gainbegiratzeko sistema bat ezarri da Gabonetako eta Urte Berriko egunetan, fabrika geldirik dagoen bitartean, aurreko Hitzarmenaren 13.2 artikuluak jasotzen zuen guardiaren ordez.

Gainbegiratze-sistema horretan sartzen ahalko dira Hitzarmenaren 1., 2. eta 3. lanbide-taldeetako langile guztiak. Xedea izanen da enpresak zehaztuko dituen puntu jakin batzuk gainbegiratzea, Gabonetako eta Urte Berriko geraldian lantegiaren instalazioen segurtasuna bermatzeko.

Honela banatuko dira gainbegiratze-txandak:

–Abenduaren 24an, arratsaldeko txanda eta gaueko txanda.

–Abenduaren 25a, goizeko txanda, arratsaldeko txanda eta gaueko txanda.

–Abenduaren 31n, arratsaldeko txanda eta gaueko txanda.

–Urtarrilaren 1ean, goizeko txandan, arratsaldeko txandan eta gaueko txandan.

Gainbegiratze-txanda bakoitza papergintza eremuko pertsona batek eta lantokiko gainerako eremuetako pertsona batek osatuko dute.

Gainbegiratze-txanda egitea borondatezkoa izanen da, hautagaien poltsan izena eman eta behar bezala trebatu diren pertsonentzako.

Honela konpentsatuko da gainbegiratze-txanda bat egitea: sari ekonomikoa, jaieguneko aparteko orduetarako ezarritako zenbatekoaren baliokidea; sari ekonomikoa, jaieguneko aparteko orduetarako ezarritako zenbatekoaren baliokidea; jaieguneko txandako ordezko lanean eguna aldatzeari dagokion saria; eta atseden egun bat, hurrengo urtean langileak berak eta bere RSTko eragiketa-buruak –edo, bestela, departamentuko arduradunak– adosten duten egunean hartzekoa.

Enpresak finkatuko du gainbegiratze prozedura, instalazioen segurtasuna eta beharrezko prestakuntzaren edukia bermatuko dituena.

Urriko lehen hamabostaldian irekiko du enpresak izena emateko epea, fabrikazio arloko zein lantegiko gainerako eremuetako hautagaitzak jasotzeko, eta horietako bakoitza zein txandarako aukeratzen ahal den adieraziko du.

Honako hau izanen da hautaketa egiteko prozedura:

–Urriko azken astean argitaratuko da gainbegiratze-txanda bakoitza egiteko interesa agertu duten langileen zerrenda.

–Baztertu eginen dira ohiko txanda-zikloaren araberako sekuentzia oztopatzen duten hautagaitzak (adibidez, hilaren 24ko goizeko txandan aritu behar denak ez du egun horretako arratsalde edo gaueko txanda eskatzen ahalko).

–Azaroko bigarren hamabostaldian aukeratuko dira txandak eginen dituzten pertsonak eta horien ordezkoak.

–Bete beharreko postuak baino hautagaitza gehiago egonez gero, irizpide hauen arabera eginen da zozketa:

a) Zozketaren eguna gutxienez 72 ordu lehenago ezarri eta argitaratuko da.

b) Giza Baliabideen Atalak antolatuko du zozketa.

c) Zozketa horretan gutxienez Batzordeko kide bat, Operational Manager bat eta PMko Operational Leader bat egon beharko dira.

d) Poltsa batean sartuko dira hautagaitzako izenak eta txandak; esleipen bakoitzak zehaztuko du haiek ateratzeko hurrenkera.

e) Hautaketa abenduaren 24ko arratsaldeko txandan hasiko da eta urtarrilaren 1eko gaueko txandan bukatuko da.

f) Bi hautagaitza edo gehiago egonen balira, txanda horretatik baztertu eginen dira urte horretan bertan beste txandaren baterako hautatu direnak. Parte hartzerik izanen dute ordezko gisa izendatu badira, eta ordezkapen horrek lehentasuna izanen du hurrengo txandaren aurretik.

g) Bi hautagaitza edo gehiago egonen balira, haiek ateratzeko ordenak txandako titularra zehaztuko du lehenik, eta ordezkoa bigarrenik.

h) Ezin bada ordezkorik aukeratu, beste txanda batzuetarako eskaera egin duten eta titular edo ordezko gisa hautatu ez diren beste langile batzuei eskainiko zaie aukera hori, ahal dela txandaka.

i) Zozketaren emaitzaren akta eginen da, baita argitaratu ere.

Txanda egiteko izendatutako pertsona agertuko ez balitz, ordezkoak eginen du. Lanpostua betetzea ezinezkoa balitz, txanda baterako aukerarik izan ez dutenei eskainiko zaie, aurreko puntuan adierazitakoaren arabera eta irizpide berberekin.

Txandaren baterako boluntariorik ez balego, zozketa eginen da, aurrez zehaztutako irizpideen arabera, Hitzarmeneko 1., 2. eta 3. taldeetako langile guztien artean, bat fabrikazio eremurako eta bestea lantokiko gainerako eremuetarako. Zozketa horretan hautatzen diren pertsonek esleitutako txandan gainbegiratze-lanak egiteko betebeharra izanen dute, eta ez dute berriro parte hartu beharko urte horretan eta hurrengoetan boluntariorik ez egoteagatik egiten diren zozketetan, harik eta dagozkien arloetako langile guztiak hautatu arte. Hala ere, beren borondatez parte hartzen ahalko dute lehen aipatutako hautagaiak aukeratzeko zozketan.

b) Maiatzaren 1eko guardia: Maiatzaren 1ean guardiako sistema berria ezarriko da, orain arte aplikatzen zenaren ordez. Maiatzaren 1eko guardiaren helburua da egun horretako jaiegunaren ondoren produkzioa segurtasun baldintzetan berriro hasiko dela bermatzea.

Guardiako pertsona bat behar da ur- eta galdara-instalaziorako, beste bat PM2rako, beste bat PM3rako, 5. PM txandako elektromekanikari bat, eta pertsona bat instalazioaren gainerako eremuetarako.

Honela konpentsatuko da maiatzaren 1eko guardia egitea: sari ekonomikoa, jaieguneko aparteko orduetarako ezarritako zenbatekoaren baliokidea; jaieguneko txandako ordezko lanean eguna aldatzeari dagokion jaieguneko "non stop" saria; eta atseden egun bat, langileak berak aukeratzen duen egunean hartzekoa, salbu eta antolamendu- edo ekoizpen-arrazoiengatik ezinezkoa bada.

Guardiaren beharrak betetzeko kontuan hartuko dira, lehenik eta behin, adierazitako eremu bakoitzerako langileek beren borondatez eginiko eskaerak.

Apirileko lehen hamabostaldian, enpresak nahitaezko guardien egutegia argitaratuko du; bertan esleituko dira zerbitzua eman behar duten txanda eta lanpostuak. Lehentasuna izanen dute borondatez aritu nahi duten langileek, baldin eta aukeratzen duten guardia-txandak ez badie egutegiaren arabera dagokien guardia-txanda egitea galarazten.

Egutegia argitaratu eta hurrengo hamar egunetan, beren borondatez aritu nahi duten eta baldintzak betetzen dituztenek egin nahi duten guardiako txandaren berri emanen diote Team Leaderrari ("TL"). TLk posta elektroniko bidez mezua bidaliko dio Giza Baliabideen Departamentuari, kopia eta guzti, eskaerarekin. TL bada aritu nahi duena, OLri eta Giza Baliabideen Departamentuari jakinaraziko die.

Eskatutako txandak egutegiaren arabera dagokion guardia-txanda egiteko oztopo ez izateaz gain, boluntarioek baldintza hauek bete behar dituzte:

–Hitzarmeneko 1., 2. eta 3. taldeetako edozein pertsona izaten ahal da boluntario.

–PM eremuan (PM2, PM3 eta 5. PM txanda, ur- eta galdara-instalazioa) boluntario izan nahi duten langileek guardia-zerbitzurako adierazitako lanpostua edo baliokidea betetzen jakin beharko dute. Alde horretatik, eta adibide gisa, zerbitzu honetarako baliokidetzat hartzen dira PM2 edo PM3ko gidaria eta laguntzailea, edo, halakorik ezean, dagokion guardia egiteko behar den gaitasuna izatea, horretarako ezarritako prozeduraren arabera, bai PMentzat, bai ur- eta galdara-instalaziokoentzat, bai mantentze-lanetakoentzat, bai PM1eko gidari edo laguntzaile izan diren langileentzat ere. OLek eta Mantentze-lanetako arduradunak baloratuko dute egokitasuna, eta, behar izatera, zozketa egin baino lehen justifikatuko liokete eskatzaileari egokitasun eza.

Gainerako eremuei dagokien lanposturako, boluntario aurkezten ahalko da Hitzarmenaren 1., 2. eta 3. taldeetako edozein pertsona, baldin eta PM lanpostuagatik nahitaezko guardia-taldeetan ez badago.

–Egutegiaren arabera guardia-txanda jakin bat dagokion eta txanda hori egiteko interesa duen pertsonak, bere borondatez jakinarazi beharko du txanda egin nahi duela; izan ere, nahiz eta bere eskaerak lehentasuna izanen duen gainerakoen aldean, hala egiten ez badu, ez da borondatezkotzat jotzen ahalko eta, ondorioz, lehentasuna izanen dute beste pertsona batzuek borondatez egindako eskaerek.

Eskatutako postuetarako guardia-txandan pertsona bat baino gehiago egonez gero, guardiako egutegiaren arabera hala esleitutakoek izanen dute lehentasuna, aurreko apartatuan adierazitakoaren arabera. Halako lehentasunik gertatzen ez bada, zozketa eginen da beren nahia helarazi duten eta baldintzak betetzen dituzten langileen artean, eta zozketaren emaitza zein lehentasun-ordena zehaztuko dira (esatera baterako: hiru eskaera badaude, zozketa eginen da, eskabide bakoitzari zenbaki bat esleituta, batetik hirura; horren arabera finkatuko da absentziak ordezteko dei-ordena).

Irizpide hauei jarraiki eginen da zozketa:

a) Zozketaren eguna gutxienez 72 ordu lehenago ezarri eta argitaratuko da.

b) Giza Baliabideen Atalak antolatuko du zozketa.

c) Zozketa horretan gutxienez Batzordeko kide bat, Operational Manager bat eta PMko Operational Leader bat egon beharko dira.

d) Poltsa batean sartuko dira hautagaitzako izenak eta txandak; esleipen bakoitzak zehaztuko du haiek ateratzeko hurrenkera.

e) Hautaketa hilaren 1eko goizeko txandan hasiko da eta egun bereko gaueko txandan bukatuko da.

f) Bi hautagaitza edo gehiago egonen balira, txanda horretatik baztertu eginen dira urte horretan bertan beste txandaren baterako hautatu direnak. Parte hartzerik izanen dute ordezko gisa izendatu badira, eta ordezkapen horrek lehentasuna izanen du hurrengo txandaren aurretik.

g) Bi hautagaitza edo gehiago egonen balira, haiek ateratzeko ordenak txandako titularra zehaztuko du lehenik, eta ordezkoa bigarrenik.

h) Ezin bada ordezkorik aukeratu, beste txanda batzuetarako eskaera egin duten eta titular edo ordezko gisa hautatu ez diren beste langile batzuei eskainiko zaie aukera hori, ahal dela txandaka.

i) Zozketaren emaitzaren akta eginen da, baita argitaratu ere.

PMentzat, bere borondatez guardia egitekoa zen pertsona ez bada agertzen, guardia hori egiteko eskatu duen beste pertsona batek beteko du haren lekua, zozketaren hurrenkera berean. Boluntariorik ez balego, egutegiaren arabera lan egin behar duen langileak eginen du guardia, eta, halakorik ere ez balego, beste titular batek edo egutegiaren arabera agertu ez denaren letra berbera duen beste norbaitek.

Gainerako eremuen lanpostua betetzeko, txandaren batean boluntariorik ez balego, zozketa eginen da EP lanpostuagatik derrigorrezko guardiako taldeetan ez dauden Hitzarmeneko 1., 2. eta 3. taldeetako langile guztien artean. Boluntarioak hautatzeko aurrez zehaztutako irizpide berberen arabera eginen da zozketa. Zozketa horretan hautatzen diren pertsonek maiatzaren 1eko guardia egin beharko dute esleitutako txandan, eta ez dute berriro parte hartu beharrik izanen urte horretan, ez hurrengoetan, boluntarioren ezaren ondorioz, beren eremuko langile guztiak hautatuak izan diren arte. Hala ere, izanen dute hurrengo zozketetan parte hartzerik.

Zozketaren biharamunean (dela boluntarioen zozketa, dela –hala behar denean– boluntariorik ez izateagatik antolatua), maiatzaren 1eko guardiako txanden behin betiko egutegia argitaratuko da, guardia esleitu zaien pertsonen izenekin.

Guardiako ordezko gisa izendatutako pertsonek, bai Gabonetan bai maiatzaren 1eko guardian, 50 euro gordin jasoko dute konpentsazio gisa, guardia bakoitzeko. Konpentsazio hori urtero eguneratuko da, Hitzarmenak egiten duen moduan. Hitzarmena indarrean sartzen denetik izanen ditu ondorioak konpentsazio horrek.

XIV. ERANSKINA.–PAPERA EGITEKO MAKINAREN MANTENTZE-LANETAKO TEKNIKARIENTZAKO, CONVERTING-EKO TEKNIKARIENTZAKO, ZERBITZU OROKORRETAKO TEKNIKARIENTZAKO ETA KALITATEKO TEKNIKARIENTZAKO GUARDIA ETA LARRIALDIETARAKO SISTEMA

2025eko irailaren 1etik aurrerako ondorioekin, erabaki da guardien eta larrialdien sistema bat sortzea, eranskin honetan ezarritakoaren arabera arautuko dena.

1.–Guardien zerbitzua.

Guardia esaten zaio langileak atsedenaldian urrutiko laneko arazoak konpontzeko duen prestasunari, lantokira joan beharrik gabe, dela telefono bidez, dela online konexioaren bidez.

Guardien zerbitzuak Teknikari eta Administrarien Elkargoko langileei bakarrik eragiten die. Guardiak borondatezkoak izanen dira.

Guardiak egiteko, langileak lanerako prest egon behar du. Hori dela eta, ez da horrelakorik eginen aldi baterako ezintasunean, oporretan, baimenetan, sindikatu-kredituan edo/eta benetako lan-prestazioaren beste edozein etenalditan.

Langileek astean behin izanen dituzte guardiak, astelehenetik 10:00etatik hurrengo astelehenera arte, 10:00ak arte. Guardien sistemari atxikitako departamentu bakoitzak esleituko ditu.

Guardia esleitu zaion langilea lanerako prest ez badago, departamentuko beste pertsona batek eginen du borondatez. Boluntariorik ez badago, unitateak aldez aurretik ezarritako zerrenda baten arabera esleituko da guardia, enpresaren antzinatasun-dataren arabera, beherantz, eta txanda hurrengoari pasatuko zaio, gerta litekeen hurrengo gorabeherarako. Guardian benetan emandako denboraren proportzioan ordainduko da.

Urteko guardia-egutegiak eginen dira, eta honako departamentu hauetan eta haien postu batzuetan esleituko dira:

1.–Kalitatea.

2.–Logistika.

3.–Zerbitzu Orokorrak.

4.–Converting:

–Mantentze-lanak.

–Prozesua.

5.–Paper-makinak:

–Mantentze-lanak.

–Prozesua.

Guardia-zerbitzua egin behar duten Departamentuko edo Unitateko pertsonen kopurua aldatuz gero, aurtengo urteko gainerako egutegia berreginen da, eta guardia-asteen esleipen berria eginen da. Guardia-sisteman eta Departamentu berean dauden lankideen artean trukeak egiten ahalko dira.

Zaintza-zerbitzua ematen duen langileak honako eginkizun hauek izanen ditu, besteak beste: makinen edo lineen eguneroko lehentasunen, haien kritikotasunaren eta haietako bakoitzean produkzioak duen presa eta beharraren berri izatea. Asteko guardiaren parte bat egin beharko du, eta txanda-aldaketa egokia egin beharko du guardien egutegian haren ondorengo izanen den pertsonarekin. Astelehena jaieguna bada, txanda-aldaketa telefonoz egiten ahalko da.

Departamentuko edo Unitateko arduradunaren betebeharra da, halaber, makinen edo lineen ekoizpen-beharrei buruzko unean uneko informazioa izatea, bai eta arazoak konpontzeko duten kritikotasunari eta presari buruzkoa ere. Guardiako partea berrikusi eta baliozkotzeaz ere arduratuko da, bai eta erabilitako baliabideei oniritzia emateaz ere.

Goian aipatutako informazio guztia eta sistema horretatik atera daitekeena partekatzeko, datu-base bat sortuko da.

Kontraprestazioak honako hauek izanen dira:

–125 euro pertsona bakoitzeko eta guardiako aste bakoitzeko. Zenbateko horrek prestasuna eta urruneko arreta saritzen ditu.

Guardien soldata-kontzeptua ez da kontuan hartuko merituagatiko soldata-berrikuspenaren prozesuan (Merit). Kontraprestazio horiek urtero eguneratuko dira hitzarmenean itundutako igoeren arabera.

2.–Larrialdiak.

Larrialditzat jotzen da langilea lantokian egotea, hala eskatu zaionetik ahalik eta lasterren, eta lantokian makinaren geldialdi bat, linea bat edo egiturazko arazo bat konpontzeko bertaratzea. Salbuespen gisa, Kalitate Departamentuko langileen kasuan, larrialdien kontzeptua aplikatuko da, instalazioan egotea beharrezkoa ez izan arren, erreklamazioa izan duen produktuaren jarraipena egiteko, blokeoak egiteko eta abarretarako. Gorabeheraren iraupena guardiena baino askoz luzeagoa izanen da.

Arau orokor gisa, guardiak egiten ari diren pertsonek konponduko dituzte larrialdiak, eta larrialdiak akitu arte bertan egon beharko dute.

Larrialdiak egitearen ordainetan, langileak honako hauek jasoko ditu:

–Benetan egindako aparteko orduak ordaintzea, markaketen araberako biribiltzerik gabe, gutxienez 2 ordu larrialdi bakoitzeko. Urtean, gehienez, aparteko 80 ordu izaten ahal dira langile bakoitzeko. 1.2. artikuluaren arabera hitzarmenaren aplikazio eremutik kanpo geratzen diren pertsonei (White Collars izenekoak) aparteko orduak ordainduko zaizkie hitzarmenean 3. taldeko 1. mailarako (administrariak eta teknikariak) jasotzen diren zenbatekoen arabera. Jaieguneko edo gaueko lanaren plusak ere aplikatuko dira, hala badagokio. Bestela, eta langileak hala nahi izanez gero, aparteko ordu horiek atsedenarekin konpentsatzen ahalko dira. Atseden-egun bat hartuko da egindako aparteko egun bakoitzeko, gehi sari bat, hitzarmenaren 13.6 artikuluan ezarritakoaren arabera.

–Joan-etorrien konpentsazioa (kilometro kopurua edo taxia).

–Bazkaria, beharrezkoa izanez gero.

–12 orduko lanaldien arteko atsedenaldia. Atseden horren orduak, lanordu gisa ezarritako orduekin bat datozenak, ez ditu langileak berreskuratu beharko.

–Egutegiaren arabera ezartzen diren lantokiko geldialdiaren egunetan, horien ordainsaria akordioen, aparteko orduen eta gaueko lanaren arabera arautuko da, hala badagokio. Geldialdiko guardiak borondatezkoak izanen dira.

Larrialdiaren kontzeptuak salbuespenezkoa izan behar du, eta arazoak konpontzeko azken baliabidea. Larrialdi bat egiteko, Departamentuko arduradunaren aldez aurreko baimena behar da.

Kasua hori bada, hamabi orduko atsedenaldia dela-eta, larrialdia egin ondorengo lanaldiko ordutegia langilearen eta haren line managerraren artean adostuko da. Lanaldi osoari dagokionez (gutxienez 3 ordu) lanaldi arrunta egin ezin bada, edo langilearen ohiko ordutegiaren arabera lanpostura joan ezin bada, falta diren orduak "Guardiengatiko atsedenaldia" izanen dira.

Larrialdiak, hitzarmen honen arabera, borondatez eta ordainduta egin behar dituzte, guardian egon ez arren, atsedenaldian lantokira joan behar duten pertsonek, larrialdiak konpontzeko, dokumentu honetan definituta dagoen moduan.

Guardien sistemak eragiten ez dien langileek eta, larrialdien apartatuan jasotakoaren arabera, beren lanalditik kanpo lan egin behar dutenek konpentsazio berak izanen dituzte. Sorburu beretik eratorritako gertaera eragileren batek eragindako pertsona guztiei aplikatuko zaie.

Enpresako Zuzendaritzak eta Gizarte Ordezkaritzak zainduko dute lanaldiak larrialdietan egokitzen direla, eta horien eragina gutxitzeko konpromisoa hartuko dute. Hiru hilean behin egiten diren bileretan, Enpresa Batzordeari egindako guardia eta larrialdien berri emanen zaio, baita gertatu ahal izan diren gorabeheren berri ere.

Iragarkiaren kodea: F2604606