1. NAFARROAKO FORU KOMUNITATEA
1.1. XEDAPEN OROKORRAK
1.1.1. Foru legeak eta legegintzako foru dekretuak
10/2026 FORU LEGEA, maiatzaren 20koa, itunpeko unitateak luzatzeari eta funts publikoz sostengatutako ikastetxeetako eskola-unitate bakoitzeko gehieneko ikasle-ratioa oro har jaisteari buruzkoa.
NAFARROAKO FORU KOMUNITATEKO LEHENDAKARIA NAIZEN HONEK.
Aditzera ematen dut Nafarroako Parlamentuak onetsi duela honako:
FORU LEGEA, ITUNPEKO UNITATEAK LUZATZEARI ETA FUNTS PUBLIKOZ SOSTENGATUTAKO IKASTETXEETAKO ESKOLA-UNITATE BAKOITZEKO GEHIENEKO IKASLE-RATIOA ORO HAR JAISTEARI BURUZKOA.
1. artikulua. Itunak berritzeko irizpideak planifikatzea.
1. Hezkuntza Departamentuak zehaztuko ditu, maila guztietako hezkuntza-itunak amaitzen diren ikasturtearen hasieran, berritzeko eskaerak ebazteko aplikatuko dituen irizpide zehatzak, bereziki kontuan hartuta familiek beren seme-alabentzako nahi duten hezkuntza aukeratzeko duten askatasuna bermatzen duten horiek.
2. Hezkuntza-unitateak ikasle-kopuruaren aldaketetara egokitzeko, itunpeko ikastetxeek Hezkuntza Departamentuak ezarritako irizpideez bestelako proposamenak aurkeztu ahal izanen dizkiote Hezkuntza Departamentuari, honako arlo hauetan, besteak beste: hezkuntza-inklusioa, ikasleen beharrak, berrikuntza pedagogikoa, esku-hartze soziala edo egokitzat jotzen duten beste edozein alderdi. Itun Batzorde eskudunak nahitaez baloratu beharko ditu proposamen horiek, itunpeko unitateen kopurua aitortze aldera.
2. artikulua. Hezkuntza publikoan eta itunduan ratioak murrizteko irizpideak.
Eskola publikorako onesten diren ratio- eta unitate-murrizketarako irizpide berak aplikatuko dira irakaskuntza itunduan.
Xedapen iragankor bakarra.
1. Indarrean dauden hezkuntza-itunen eta ikastetxe publikoetako ikasgela-kopuruaren luzamendua 2026/2027ko ikasturterako.
Segurtasun juridikoa bermatze eta foru-lege honetan xedatutakoa behar bezala aplikatze aldera, urtebeteko luzamendua ezartzen da 2026/2027ko ikasturterako eguneratu beharrekoak diren hezkuntza-itunak berritzean eta aldatzean eta ikastetxe publikoetako ikasgela-kopurua planifikatzean ikasgela-murrizketak aplikatzeko; hori horrela, aipatutako ikasturte horretan, gaur egun dauden unitate publikoak eta itunduak mantenduko dira itunen eraginpean dauden ikasmailetan.
2. 2026-2027 ikasturterako onarpen-prozesuan izanen dituen eraginak.
Ikasleen onarpen-prozesuaren ondorioetarako, 2027/2028 ikasturtetik aurrera aplikatuko dira gehieneko ikasle/ikasgela ratioen murrizketak, itunpeko irakaskuntzan eskaini beharreko plaza hutsak murriztuz.
Xedapen indargabetzaile bakarra.–Arau-indargabetzea.
Indargabetu egiten dira foru-lege honetan xedatutakoaren kontrakoak diren maila bereko edo beheragoko xedapen guztiak, eta, zehazki, Langileriaren zuzendari nagusiaren apirilaren 10eko 26/2026 Ebazpena, zeinaren bidez ebazten baita Nafarroako Foru Komunitateko ikastetxeetan 2026/2027 ikasturtetik aurrera Haur Hezkuntzako bigarren zikloko eta Batxilergoko unitateen hezkuntza-ituna berritzeko prozedura.
Azken xedapena.–Indarra hartzea.
Foru-lege honek Nafarroako Aldizkari Ofizialean argitaratu eta biharamunean hartuko du indarra.
Nik, Nafarroako Foru Eraentza Berrezarri eta Hobetzeari buruzko Lege Organikoaren 22. artikuluan xedatutakoa bete dadin, foru lege hau B.M. Erregearen izenean aldarrikatzen dut, Nafarroako Aldizkari Ofizialean berehala argitara eta Estatuko Aldizkari Ofizialera igor dadila agintzen dut eta herritar eta agintariei bete eta betearaz dezatela manatzen diet.
Iruñean, 2026ko maiatzaren 20an.–Nafarroako Foru Komunitateko lehendakaria, María Chivite Navascués.
Iragarkiaren kodea: F2607461
