1. NAFARROAKO FORU KOMUNITATEA
1.3. LURRALDEAREN ANTOLAMENDUA ETA HIRIGINTZA
55E/2026 FORU AGINDUA, maiatzaren 12koa, Lurralde Kohesiorako kontseilariak emana, behin betiko onesten duena Mendazako Udal Plan Orokorraren determinazioen aldaketa puntuala, Asartan, 2. poligonoko 28. lurzatian (UE.61 eta UE.54 unitateak). Sustatzailea Jesús María Alegría Azcárate da.
Mendazako Udalak idazpuruan azaltzen den espedientea aurkeztu du Lurralde Kohesiorako Departamentuan, behin betiko onets dadin.
Espediente honen xedea da Asartako kontzejuko 2. poligonoko 28. lurzatiaren zatirik handiena birsailkatzea (Mendazako udal-mugartea), bertan familia bakarreko etxebizitza bat eraiki ahal izateko. Txikiagoa den gainerako azalerak jarraituko du nekazaritzako produktibitate ertaineko lurzoru urbanizaezin gisa sailkatuta egoten.
Gaur egun erabiltzen ez diren abeltegien eraikinak daude lurzatian. Espedienteak aurreikusten du eraikin horiek desagertzea (antolamenduz kanpokotzat deklaratu ondoren). Era berean, exekuzio-unitate berri bat zedarritzen du (UE-121), 28. lurzatiaren azalera birsailkatuarekin eta hura inguratzen duen bide publikoaren hiru zatirekin (Florida kalea). Horietako bi lehendik atxikita zeuden aldameneko exekuzio-unitateei (UE-61 eta UE-56). Azkenik, UE-121 berri hori lehendik dagoen AH-S2 eremu homogeneoan sartzen da, zeinetan baldintzak ezartzen baitira Asartako hirigunearen perimetroko EUetarako (guztiak hiri-lurzoru finkatugabe gisa daude kalifikatuta).
Ingurumeneko zuzendari nagusiaren abuztuaren 12ko 736E/2024 Ebazpenaren bidez, aldeko ingurumen-txosten estrategikoa egin zen honi buruz, ingurumen ukipenik sortzen ez duela iritzita: Mendazako 28/2 katastro-lurzatiaren aldaketa egituratzailea, hiri-lurzoru finkatu gisa sailkatzeko (UE-121 berria), UE-61-UE-54 aldatuta.
Ebazpen hori 2025eko 176. Nafarroako Aldizkari Ofizialean argitaratu zen, abuztuaren 29koan.
Ikusirik aurkeztutako dokumentazioa, bai eta Lurralde eta Paisaia Zerbitzuaren txostena ere, bidezkoa da espedientea behin betiko onestea.
Azaldutakoarekin bat, eta Lurralde Kohesiorako Departamentuaren egitura ezartzen duen azaroaren 15eko 249/2023 Foru Dekretuan xedatutakoari jarraikiz,
AGINTZEN DUT:
1. Behin betiko onestea Mendazako Udal Plan Orokorraren determinazioen aldaketa puntuala, Asartan, 2. poligonoko 28. lurzatian (UE.61 eta UE.54 unitateak). Sustatzailea Jesús María Alegría Azcárate da.
2. Foru agindu hau espedientearen sustatzaileari eta Ingurumen Ebaluaziorako Atalari jakinaraztea, behar diren ondorioak izan ditzan.
3. Foru agindu hau Mendazako Udalera igortzea, jakinaren gainean egon dadin eta behar diren ondorioak izan ditzan, eta, zehazki, dagokion hirigintza araudia argitara dezan Nafarroako Aldizkari Ofizialean, hala, onetsitako hirigintza tresnak indarra har dezan.
4. Adieraztea foru agindu honek ez duela administrazio bidea amaitzen. Administrazio publikoak ez diren interesdunek gora jotzeko errekurtsoa jartzen ahalko dute, Nafarroako Gobernuari zuzendua, legezkotasunaren kontrola onesteko egintza honen aurka, hilabeteko epean, foru agindu hau jakinarazi edo, hala badagokio, Nafarroako Aldizkari Ofizialean argitaratu eta biharamunetik hasita.
Onetsitako hirigintzako araudiaren aurka administrazioarekiko auzi-errekurtsoa jar daiteke, Nafarroako Justizia Auzitegi Nagusiko Administrazioarekiko Auzien Salari zuzendua, bi hilabeteko epean, dagokion udalak eskaturik, edukia Nafarroako Aldizkari Ofizialean argitaratzen denetik aurrera.
Administrazio publikoek administrazioarekiko auzi-errekurtsoa jartzen ahalko dute, Nafarroako Justizia Auzitegi Nagusiko Administrazioarekiko Auzien Salari zuzendua, bi hilabeteko epean. Horrek ez du galarazten Nafarroako Gobernuari aurretiazko errekerimendua egin ahal izatea, Administrazioarekiko Auzien Jurisdikzioa arautzen duen uztailaren 13ko 29/1998 Legearen 44. artikuluan ezarritako moduan eta epean.
5. Foru agindu hau Nafarroako Aldizkari Ofizialean argitaratzea, behar diren ondorioak izan ditzan.
Iruñean, 2026ko maiatzaren 12an.–Lurralde Kohesiorako kontseilaria, Óscar Chivite Cornago.
Iragarkiaren kodea: F2607071
