1. NAFARROAKO FORU KOMUNITATEA
1.7. BESTELAKOAK
37/2025 EBAZPENA, apirilaren 3koa, Energia, Enpresa I+G+b eta Ekintzailetzako zuzendari nagusiak emana, zeinaren bidez aurretiazko administrazio-baimena ukatzen baita "La Blanca" haize-parkea izeneko energia elektrikoa sortzeko instalazioaren proiekturako, Uxue, Pitillas eta Erriberriko udal mugarteetan. Espedientearen kodea: 1322-CE.
1.–Aurretiazko administrazio-baimenaren eskaera.
2023ko maiatzaren 26an, Nafarroan haize-parkeetarako baimena arautzen duen maiatzaren 8ko 56/2019 Foru Dekretuan ezarritakoa aplikatuz, Los Corrales Energy SLUk, sustatzailea baita, aurretiazko administrazio-baimena eskatu zion Industria Antolamenduaren, Azpiegitura Energetikoen eta Meatzeen Zerbitzuari "La Blanca" haize-parkea izeneko energia elektrikoa sortzeko instalazioa, 49,5 MW-ekoa, eta haren ebakuazio azpiegiturak egiteko proiekturako, Uxue, Pitillas eta Erriberriko udal mugarteetan.
2.–Aurreproiektua eta ingurumen-inpaktuaren azterketa jendaurrean jartzeko eta kontsultetarako tramiteak.
Bat etorriz maiatzaren 8ko 56/2019 Foru Dekretuko 7. artikuluan ezarritakoarekin, Industria Antolamenduaren, Azpiegitura Energetikoen eta Meatzeen Zerbitzuak jendaurrean jarri zituen, 30 egunez, aurreproiektua eta ingurumen-inpaktuaren azterketa, Los Corrales Energy SLUk aurkeztutakoak. Horretarako, iragarkia argitaratu zuen 2023ko 151. Nafarroako Aldizkari Ofizialean, uztailaren 20koan, 2023ko uztailaren 21eko Diario de Navarra egunkarian eta, halaber, Nafarroako Gobernuaren Gobernu Irekiaren webgunean.
Aldi berean, eta maiatzaren 8ko 56/2019 Foru Dekretuko 8. artikuluak ezarritakoa aplikatuz, Industria Antolamenduaren, Azpiegitura Energetikoen eta Meatzeen Zerbitzuak behar ziren kontsultak egin zituen.
Maiatzaren 8ko 56/2019 Foru Dekretuko 9. artikuluak ezarritakoa betez, Industria Antolamenduaren, Azpiegitura Energetikoen eta Meatzeen Zerbitzuak Los Corrales Energy SLUri igorri zizkion jendaurrean jartzeko eta kontsultetarako tramiteetan jasotako alegazio eta txostenak.
3.–Ingurumen-inpaktuaren ebaluazio arrunta hasteko eta lurzoru urbanizaezinean jarduerak egiteko baimena eskuratzeko eskaera.
Maiatzaren 8ko 56/2019 Foru Dekretuaren 10. artikuluan ezartzen dena aintzat hartuta, 2023ko abenduaren 11n, Los Corrales Energy SLUk dokumentazioa aurkeztu zuen, eskatzeko ingurumen-inpaktuaren ebaluazioa hasteko, batetik, eta lurzoru urbanizaezinean jarduerak egiteko baimena emateko, bestetik. Jasotako alegazioei eta txostenei emandako erantzuna gehitu zuen.
4.–Proiektuaren aurkako ingurumen-inpaktuaren adierazpena.
Ingurumeneko zuzendari nagusiaren martxoaren 28ko 250E/2025 Ebazpenaren bidez, aurkako ingurumen-inpaktuaren adierazpena eman zen Los Corrales Energy SLUk sustatutako proiektu honi buruz: "La Blanca" haize-parkea, Uxue, Pitillas eta Erriberriko udal mugarteetan.
5.–Aurretiazko administrazio-baimena ukatzeko proposamena.
Ingurumen-inpaktuaren adierazpena aurkakoa dela ikusirik, eta espedientearen azterketa teknikoa egin eta gero, Industria Antolamenduaren, Azpiegitura Energetikoen eta Meatzeen Zerbitzuko Azpiegitura Energetikoen Atalak ondorioztatu du prozedura era egokian egin dela, eta espedientea ebaztea proposatu du, eskatutako aurretiazko administrazio-baimena ukatuz.
Adierazitakoarekin bat, eta erabiliz Nafarroako Foru Komunitateko Administrazioari eta foru-sektore publiko instituzionalari buruzko martxoaren 11ko 11/2019 Foru Legearen 32. artikuluak ematen dizkidan eskudantziak,
EBAZTEN DUT:
1. Ukatzea aurretiazko administrazio-baimena, Los Corrales Energy SLUk eskatu zuena "La Blanca" haize-parkea izeneko energia elektrikoa sortzeko instalazioa, 49,5 MW-ekoa, eta haren ebakuazio azpiegiturak egiteko proiekturako, Uxue, Pitillas eta Erriberriko udal mugarteetan.
2. Diruzaintza Atalari proposatzea sarbide- eta konexio-prozedurari lotutako 1.980.000,00 euroko bermea itzul dezala; Los Corrales Energy SLUk jarri zuen berme hori 2023ko martxoaren 24an, eta 5020000192 CFNA 2023 (Av-NAV-0773) erregistro zenbakia du.
3. Ebazpen hau igortzea Industria Antolamenduaren, Azpiegitura Energetikoen eta Meatzeen Zerbitzura, Ingurumen Ebaluazioaren Atalera, Paisaiaren eta Landa-lurzoruaren Atalera, Basoen eta Ehizaren Zerbitzura, Herri-lanen eta Azpiegituren Zuzendaritza Nagusiko Zainketa Zerbitzura, Ondare Historikoaren Zerbitzura eta Ekonomia eta Ogasun Departamentuko Ekonomia eta Finantza Zerbitzuko Diruzaintza Atalera, behar diren ondorioak izan ditzan.
4. Ebazpen hau Nafarroako Aldizkari Ofizialean argitaratzea, orok jakin dezan.
5. Ebazpen hau jakinaraztea Los Corrales Energy SLUri, Ebroko Konfederazio Hidrografikoari, Retevisión I SAri, Garraioetako, Mugikortasuneko eta Hiri Agendako Ministerioari, ADIFi, Nafarroako Ubidea SAri, i-DE Redes Eléctricas Inteligentes SAUri, Red Eléctrica de España SAUri, Energia Inagotable De Kyoko SLri, Sustrai Erakuntza fundazioari, Landazuria-Erriberako Ekologistak Martxan elkarteari eta Ongaiz-Zangozako Ekologistak Martxan elkarteari; eta ohartaraztea, halaber, ebazpen honek ez duela administrazio bidea amaitzen eta haren aurka gora jotzeko errekurtsoa jartzen ahal dela, Industriako eta Enpresen Trantsizio Ekologiko eta Digitalerako kontseilariari zuzendua, hilabeteko epean, jakinarazi eta biharamunetik hasita. Errekurtsoan espediente kodea adierazi beharko da.
6. Ebazpen hau Uxueko Udalari, Pitillasko Udalari eta Erriberriko Udalari jakinaraztea, eta aditzera ematea honen kontra administrazioarekiko auzi-errekurtsoa jartzen ahal dela, Nafarroako Justizia Auzitegi Nagusiko Administrazioarekiko Auzien Salari zuzendua, bi hilabeteko epean, ezertan galarazi gabe Nafarroako Gobernuan aldez aurreko errekerimendua egin ahal izatea, Administrazioarekiko Auzien Jurisdikzioa arautzen duen uztailaren 13ko 29/1998 Legearen 44. artikuluan ezarritako moduan eta epean.
Iruñean, 2025eko apirilaren 3an.–Energia, Enpresa I+G+b eta Ekintzailetzako zuzendari nagusia, Garbiñe Basterra Olóriz.
Iragarkiaren kodea: F2505342
