3. ESTATUKO ADMINISTRAZIOA
LEHENDAKARITZAKO, JUSTIZIAKO ETA GORTEEKIKO HARREMANETARAKO MINISTERIOA
277/2025 Errege Dekretua, apirilaren 8koa, zeinaren bidez handitzen baitira apirilaren 4ko 252/2023 Errege Dekretuaren bidez trafikoaren eta ibilgailu motordunen zirkulazioaren arloan Estatuko Administrazioak Nafarroako Foru Komunitateari eskualdatutako eginkizunak
Konstituzioaren 149.1 artikuluaren 21. zenbakiak xedatzen du Estatuak eskumen esklusiboa duela trafikoaren eta ibilgailu motordunen zirkulazioaren arloan.
Bestalde, hala xedatuta baitago Nafarroako Foru Eraentza Berrezarri eta Hobetzeari buruzko abuztuaren 10eko 13/1982 Lege Organikoaren 49.3 artikuluan, Nafarroari dagozkio, trafikoaren, ibilgailu motordunen zirkulazioaren eta bide segurtasunaren arloan, Estatuko legeria betearazteko eskumena eta trafikoa zaintzeko eta kontrolatzeko eginkizunak, orain arte atxiki dituen ahalmenez eta eskumenez gain. Era berean, abuztuaren 10eko 13/1982 Lege Organikoaren 51.1 artikuluaren arabera, Nafarroari dagokio Foruzaingoaren araubidearen arauketa, eta gaur egun dituen eginkizunak betetzen segituko du Foru Diputazioaren agintaritza gorenaren pean; artikulu horren 2. apartatuaren hirugarren paragrafoaren arabera, trafikoari, ibilgailu motordunen zirkulazioari eta bide segurtasunari dagokienez, Foruzaingoaren eskumenak 49.3 artikuluan xedatutakoarekin bat arautuko dira.
Abuztuaren 10eko 13/1982 Lege Organikoaren artikulu horien indarreko idazketa abenduaren 5eko 6/2024 Lege Organikoak egindako aldaketaren ondorio da, lege organiko hori promulgatu baitzen Nafarroako Foru Komunitateak bere gain har zezan trafikoa zaintzeko eta kontrolatzeko eskumena, bere lurraldearen barnean, berriro bete ditzan, erabat bete ere, trafikoaren, ibilgailu motordunen zirkulazioaren eta bide segurtasunaren arloko eginkizunak.
Lehenago, apirilaren 4ko 252/2023 Errege Dekretuaren bidez, Nafarroako Foru Komunitatera eskualdatu ziren Estatuko Administrazioak trafikoaren eta ibilgailu motordunen zirkulazioaren arloan zituen zenbait eginkizun eta zerbitzu. Orobat, abuztuaren 27ko 841/2024 Errege Dekretuaren bidez, apirilaren 4ko 252/2023 Errege Dekretuaren bidez Nafarroako Foru Komunitatera eskualdatutako Estatuko Administrazioaren eginkizunak aldatu ziren.
Gainera, abuztuaren 10eko 13/1982 Lege Organikoaren laugarren xedapen iragankorrak eta abenduaren 19ko 2356/1984 Errege Dekretuak ezartzen dute zer bide eta prozedura jarraitu behar diren Estatuko Administrazioaren zerbitzuak Nafarroari eskualdatzeko.
Estatuko Administrazioaren eta Nafarroako Foru Komunitatearen arteko Transferentzien Batzordeak, zeina xedatuta baitago abenduaren 19ko 2356/1984 Errege Dekretuaren 2. artikuluan, 2025eko martxoaren 25ean egindako bilkuran hartu zuen trafikoaren eta ibilgailu motordunen zirkulazioaren arloan Estatuko Administrazioak apirilaren 4ko 252/2023 Errege Dekretuaren bidez Nafarroako Foru Komunitateari eskualdatutako eginkizunak eta zerbitzuak handitzeko Erabakia, eta hura Gobernuari aurkeztu zaio, errege dekretu baten bidez onets dezan.
Horiek horrela, abuztuaren 10eko 13/1982 Lege Organikoaren laugarren xedapen iragankorra betez, Lurralde Politikako eta Memoria Demokratikoko Ministerioak proposatuta eta Ministroen Kontseiluak 2025eko apirilaren 8ko bilkuran aztertu ondoren,
XEDATZEN DUT:
1. artikulua. Transferentzien Batzordearen Erabakia onestea.
Onesten da Transferentzien Batzordearen osoko bilkuraren 2025eko martxoaren 25eko Erabakia, zeinaren bidez handitzen baitira apirilaren 4ko 252/2023 Errege Dekretuaren bidez trafikoaren eta ibilgailu motordunen zirkulazioaren arloan Estatuko Administrazioak Nafarroako Foru Komunitatera eskualdatutako eginkizunak (errege dekretu honen eranskinean jaso da erabaki hori). Transferentzien Batzorde hori Estatuaren zerbitzuak Nafarroako Foru Komunitateari eskualdatzeko arauak ezartzen dituen abenduaren 19ko 2356/1984 Errege Dekretuaren 2. artikuluak xedatzen du.
2. artikulua. Eskualdatutako eginkizunak handitzea.
Horrenbestez, apirilaren 4ko 252/2023 Errege Dekretuaren bidez trafikoaren eta ibilgailu motordunen zirkulazioaren arloan Estatuko Administrazioak Nafarroako Foru Komunitateari eskualdatutako eginkizunak handitzen dira, Transferentzien Batzordearen Erabakian jasotakoarekin bat eta hartan ezarritako modu eta baldintzetan.
3. artikulua. Handitzearen ondorioak.
Handitzeak ondorioak izanen ditu Transferentzien Batzordearen Erabakian adierazitako datatik aurrera.
Azken xedapen bakarra.–Indarra hartzea.
Errege dekretu hau aldi berean emanen da argitara Estatuko Aldizkari Ofizialean eta Nafarroako Aldizkari Ofizialean, eta argitaratzen denean hartuko du indarra.
Madrilen, 2025eko apirilaren 8an.–Felipe E.–Lurralde Politikako eta Memoria Demokratikoko ministroa, Ángel Víctor Torres Pérez.
ERANSKINA
Jorge García Carreño jaunak eta Idoia Tajadura Tejada andreak, Estatuaren zerbitzuak Nafarroako Foru Komunitateari eskualdatzeko arauak ezartzen dituen abenduaren 19ko 2356/1984 Errege Dekretuaren 2. artikuluan xedatutako Transferentzien Batzordeko idazkariak baitira,
ZIURTATZEN DUTE:
Estatuko Administrazioaren eta Nafarroako Foru Komunitatearen arteko Transferentzien Batzordearen 2025eko martxoaren 25eko osoko bilkuran hartu zela trafikoaren eta ibilgailu motordunen zirkulazioaren arloan Estatuko Administrazioak apirilaren 4ko 252/2023 Errege Dekretuaren bidez Nafarroako Foru Komunitatera eskualdatutako eginkizunak handitzeko Erabakia, jarraian azaltzen diren baldintzetan:
A) Erreferentziak konstituzio arauei eta Nafarroako Foru Eraentza Berrezarri eta Hobetzeari buruzko Lege Organikoari, handitzea haien babespean egiten baita.
Konstituzioaren 149.1 artikuluaren 21. zenbakiak xedatzen du Estatuak eskumen esklusiboa duela trafikoaren eta ibilgailu motordunen zirkulazioaren arloan.
Bestalde, hala xedatuta baitago Nafarroako Foru Eraentza Berrezarri eta Hobetzeari buruzko abuztuaren 10eko 13/1982 Lege Organikoaren 49.3 artikuluan, Nafarroari dagozkio, trafikoaren, ibilgailu motordunen zirkulazioaren eta bide segurtasunaren arloan, Estatuko legeria betearazteko eskumena eta trafikoa zaintzeko eta kontrolatzeko eginkizunak, orain arte atxiki dituen ahalmenez eta eskumenez gain. Era berean, abuztuaren 10eko 13/1982 Lege Organikoaren 51.1 artikuluaren arabera, Nafarroari dagokio Foruzaingoaren araubidearen arauketa, eta gaur egun dituen eginkizunak betetzen segituko du Foru Diputazioaren agintaritza gorenaren pean; artikulu horren 2. apartatuaren hirugarren paragrafoaren arabera, trafikoari, ibilgailu motordunen zirkulazioari eta bide segurtasunari dagokienez, Foruzaingoaren eskumenak 49.3 artikuluan xedatutakoarekin bat arautuko dira.
Abuztuaren 10eko 13/1982 Lege Organikoaren artikulu horien indarreko idazketa abenduaren 5eko 6/2024 Lege Organikoak egindako aldaketaren ondorio da, lege organiko hori promulgatu baitzen Nafarroako Foru Komunitateak bere gain har zezan trafikoa zaintzeko eta kontrolatzeko eskumena, bere lurraldearen barnean, berriro bete ditzan, erabat bete ere, trafikoaren, ibilgailu motordunen zirkulazioaren eta bide segurtasunaren arloko eginkizunak.
Lehenago, apirilaren 4ko 252/2023 Errege Dekretuaren bidez, Nafarroako Foru Komunitatera eskualdatu ziren Estatuko Administrazioak trafikoaren eta ibilgailu motordunen zirkulazioaren arloan zituen zenbait eginkizun eta zerbitzu. Orobat, abuztuaren 27ko 841/2024 Errege Dekretuaren bidez, apirilaren 4ko 252/2023 Errege Dekretuaren bidez Nafarroako Foru Komunitatera eskualdatutako Estatuko Administrazioaren eginkizunak aldatu ziren.
Gainera, abuztuaren 10eko 13/1982 Lege Organikoaren laugarren xedapen iragankorrak eta abenduaren 19ko 2356/1984 Errege Dekretuak ezartzen dute zer bide eta prozedura jarraitu behar diren Estatuko Administrazioaren zerbitzuak Nafarroari eskualdatzeko.
Arauzko xedapen horiek oinarri hartuta, bidezkoa da handitzea apirilaren 4ko 252/2023 Errege Dekretuaren bidez trafikoaren eta ibilgailu motordunen zirkulazioaren arloan Estatuko Administrazioak Nafarroako Foru Komunitateari eskualdatutako eginkizunak.
B) Handitzen diren Estatuko Administrazioaren eginkizunak.
Handitu egiten dira Estatuko Administrazioak Nafarroako Foru Komunitatera trafikoari eta ibilgailu motordunen zirkulazioari dagozkion eginkizunak eta zerbitzuak eskualdatzeko Erabakiaren B).1 apartatuaren bigarren paragrafoan ezarritako eginkizunak (erabaki hori apirilaren 4ko 252/2023 Errege Dekretuaren bidez onetsi zen). Izan ere, arau-hausteak atzemateko eginkizuna eskualdatzen da, ibilgailu motordunen trafikoari eta zirkulazioari buruzko araudian ezarritako administrazio-zehapenak ezartzeko ahalmenaren esparruan, toki entitateei dagozkienean izan ezik.
C) Handitzearen eraginkortasun data.
Erabaki horren xedeko handitzearekin, eskualdaketaren erabakiaren B).1 apartatuan jasotako eginkizunak 2026ko uztailaren 1etik aurrera izanen ditu ondorioak, eta ordura arte Estatuko Administrazioko organo eskudunei dagokie eginkizun hori betetzea, erabaki horren erabaki osagarrian ezarritako baldintzetan.
Eta hala jasota gera dadin, ziurtagiri hau egiten da Madrilen eta Iruñean, 2025eko martxoaren 25ean. Transferentzien Batzordeko idazkariak, Jorge García Carreño jauna eta Idoia Tajadura Tejada andrea.
Iragarkiaren kodea: E2505464