1. NAFARROAKO FORU KOMUNITATEA
1.7. BESTELAKOAK
2/2025 EBAZPENA, urtarrilaren 21ekoa, Aurrekontuen eta Ondarearen zuzendari nagusiak emana, zeinaren bidez amaitzen baita Banco Bilbao Vizcaya Argentaria SAn 2019ko abenduaren 31n, 2020ko abenduaren 31n eta 2021eko abenduaren 31n abandonatutako saldoak eta gordailuak ikertzeko prozedura (GP 2020053).
Banco Bilbao Vizcaya Argentaria SAk Ondare Zerbitzuari jakinarazi zion 2019ko abenduaren 31n, 2020ko abenduaren 31n eta 2021eko abenduaren 31n abandonatutako gordailuak eta kontu korronteak daudela, eskudirua eta baloreak, Nafarroako Ondareari buruzko apirilaren 4ko 14/2007 Foru Legearen 16. artikuluan arautzen den espedientea izapidetzeko.
Azaroaren 7ko EHA/3291/2008 Aginduaren bidez arautzen da nola eman behar duten finantza-entitateek abandonatutako ondasun higigarrien eta saldoen berri. Horretan xedatzen denaren arabera, aurrean aipatu den entitateak adierazten du interesdunek ez dituztela gordailu eta saldo horiek kudeatu 20 urtean, eta abandonatu direla uste den gordailu eta saldoen titularrei horren berri jakinarazi zaiela.
Nafarroako Ondareari buruzko apirilaren 4ko 14/2007 Foru Legearen 16. artikuluan ezartzen denez, Nafarroako Foru Komunitatearenak dira Gordailuen Kutxa Orokorrean eta kreditu entitateetan, balore sozietate edo agentzietan edo bestelako edozein finantza-entitatetan gordailututako balore, diru eta gainerako ondasun higigarriak, hala nola kontu korronteetako, aurrezki-libretetako edo establezimendu horietan irekitako antzeko tresnetan gordailutuak, baldin eta abandonatuta badaude eta betiere 55. artikuluan ezarritakoaren arabera tramitatutako espediente baten izapideak egin ondoren; abandonatutzat joko dira haiei buruz interesdunek hogei urteko epean beren jabetza-eskubidea adierazten duen inolako kudeaketarik egin ez dutenean.
Foru lege horren 55. artikuluan xedatzen denaren arabera, ondare gaietan eskumena duen departamentuak eginen du ikerketa, eta departamentu horrek ebatziko du eskaera hori onargarria den, eta aginduko du, kasua bada, ikerketa prozedurari ekitea.
Aurrekontuen eta Ondarearen zuzendari nagusiaren ekainaren 5eko 109/2024 Ebazpenaren bidez hasi zen Banco Bilbao Vizcaya Argentaria SAn 2019ko abenduaren 31n, 2020ko abenduaren 31n eta 2021eko abenduaren 31n abandonatutako saldoak eta gordailuak ikertzeko prozedura. Aipatu ebazpena 2024ko 139. Nafarroako Aldizkari Ofizialean argitaratu zen, uztailaren 8koan.
Azaroaren 7ko EHA/3291/2008 Aginduaren bidez arautzen da nola eman behar duten finantza-entitateek abandonatutako ondasun higigarrien eta saldoen berri. Agindu horren 3. artikuluari jarraikiz, 2024ko irailaren 30ean ofizioz errekeritu zitzaion Banco Bilbao Vizcaya Argentaria SAri hilabeteko epean igor zitzan hogei urte bete aurreko hiru hilabeteetan bidalitako idazki guztiak –ustez abandonaturik dauden saldoen eta gordailuen berri emanez bezero guztiei–, bai eta bidalketak posta ziurtatu bidez egiaztatzen dituzten dokumentuak ere, aipatutako manua aplikatuz. Errekerimendu hori ez da bete.
Ondare Zerbitzuak egindako txostenean proposatzen da Banco Bilbao Vizcaya Argentaria SAn 2019ko abenduaren 31n, 2020ko abenduaren 31n eta 2021eko abenduaren 31n bertan abandonatutako saldoak eta gordailuak ikertzeko prozedura amaitzea, aurrean aipatutako legeriarekin eta txosten juridikoarekin bat etorriz. Kontu-hartzailetza Delegatuak espedientea aztertu du eta inork ez du hari buruzko oharrik adierazi, ez eragozpenik aurkeztu.
Horrenbestez, Nafarroako Ondareari buruzko apirilaren 4ko 14/2007 Foru Legearen 16. artikuluak emandako ahalmenen ondorioz eta Ekonomia eta Ogasun Departamentuaren egitura organikoa ezartzen duen urriaren 30eko 243/2023 Foru Dekretuaren 19. artikuluaren bidez esleitu didaten ahalmena erabiliz, honako hau,
EBAZTEN DUT:
1. Amaitzea Banco Bilbao Vizcaya Argentaria SAn 2019ko abenduaren 31n, 2020ko abenduaren 31n eta 2021eko abenduaren 31n abandonatutako saldoak eta gordailuak ikertzeko prozedura, abandonatutako saldoak eta gordailuak deklaratu gabe.
2. Ebazpen hau Nafarroako Aldizkari Ofizialean argitaratzea.
3. Ebazpen hau Ekonomia eta Ogasun Departamentuko Kontabilitate Orokorraren Atalari, Ondare Zerbitzuari (Ondarearen Kudeaketa Juridikoaren Atala, Administrazio Laguntzako Bulegoa eta Ekonomia Aferetako Bulegoa) eta Kontu-hartzailetza Delegatuari helaraztea, behar diren ondorioetarako, bai eta Banco Bilbao Vizcaya Argentaria SAri ere, eta azken horri adieraztea ebazpenaren aurka gora jotzeko errekurtsoa jartzen ahal duela, Ekonomia eta Ogasun Departamentuko kontseilariari zuzendua, jakinarazpena jaso eta biharamunetik hilabete iragan baino lehen, Nafarroako Foru Komunitateko Administrazioari eta foru-sektore publiko instituzionalari buruzko martxoaren 11ko 11/2019 Foru Legearen 126.1.b) artikuluan eta Administrazio Publikoen Administrazio Prozedura Erkidearen urriaren 1eko 39/2015 Legearen 121. eta 122. artikuluetan xedatzen denarekin bat.
Iruñean, 2025eko urtarrilaren 21ean.–Aurrekontuen eta Ondarearen zuzendari nagusia, Maite Domínguez Muguiro.
Iragarkiaren kodea: F2500819
