241. ALDIZKARIA - 2025eko abenduaren 2a

1. NAFARROAKO FORU KOMUNITATEA

1.5. ESTATUTUAK ETA LAN HITZARMEN KOLEKTIBOAK

152C/2025 EBAZPENA, urriaren 15ekoa, Ekonomia Sozialeko eta Laneko zuzendari nagusiak emana; honen bidez erabaki da Nafarroako Ekintza eta Esku-hartze Sozialeko sektorearen hitzarmen kolektiboa erregistratu, gordailutu eta Nafarroako Aldizkari Ofizialean argitaratzea.

Nafarroako ekintza eta esku-hartze sozialaren sektoreko hitzarmen kolektiboaren testua ikusirik (kode zenbakia: 31101815012021), erregistro honetan sartu baitzen 2025eko urriaren 8an, 2025eko irailaren 23an sinatu ondoren enpresen (ANEIS) eta sindikatuen CCOO eta LAB) ordezkariek.

Bat etorriz Langileen Estatutuaren Legearen testu bategina onesten duen urriaren 23ko 2/2015 Legegintzako Errege Dekretuaren 90. artikuluaren 2. eta 3. apartatuetan eta Hitzarmen kolektiboak, lan akordio kolektiboak eta berdintasun planak erregistratu eta gordailutzeari buruzko maiatzaren 28ko 713/2010 Errege Dekretuan ezarritakoarekin,

Nafarroako Foru Komunitateko Administrazioari eta foru sektore publiko instituzionalari buruzko martxoaren 11ko 11/2019 Foru Legearen 32. artikuluak ematen dizkidan eskudantziak baliatuz, eta Eskubide Sozialetako, Ekonomia Sozialeko eta Enpleguko Departamentuaren egitura organikoa ezartzen duen azaroaren 15eko 251/2023 Foru Dekretuarekin lotuta, honako hau

EBAZTEN DUT:

Lehenengoa.–Nafarroako Hitzarmen Kolektiboen, Lan-akordio Kolektiboen eta Berdintasun Planen Erregistroan inskribatzea Nafarroako ekintza eta esku-hartze sozialaren sektoreko hitzarmen kolektiboa (kode zenbakia: 31101815012021).

Bigarrena.–Nafarroako Aldizkari Ofizialean argitaratzeko agintzea, orok jakin dezan.

Iruñean, 2025eko urriaren 15ean.–Ekonomia Sozialeko eta Laneko zuzendari nagusia, Iñaki Mendióroz Casallo.

NAFARROAKO EKINTZA ETA ESKU-HARTZE SOZIALAREN SEKTOREKO II. HITZARMEN KOLEKTIBOA

ATARIKOA.

I. TITULUA.–XEDAPEN OROKORRAK.

I. KAPITULUA.–EREMUAK.

1. artikulua. Eremu funtzionala.

2. artikulua. Lurralde eremua.

3. artikulua. Eremu pertsonala.

4. artikulua. Indarraldia eta iraupena.

5. artikulua. Hitzarmena salatzea eta indarraldia luzatzea.

6. artikulua. Osotasunari lotzea.

7. artikulua. Lehentasuna aplikazioan eta zuzenbide osagarria.

II. KAPITULUA.–BATZORDEAK.

8. artikulua. Batzorde paritarioa.

9. artikulua. Batzorde paritarioaren osaera.

10. artikulua. Batzorde paritarioaren jardunbidea.

11. artikulua. Batzorde paritarioaren egoitza.

12. artikulua. Parte hartzeko mekanismoak.

II. TITULUA.–LANAREN ANTOLAKETA.

13. artikulua. Definizioa.

14. artikulua. Jaso izanaren agiria.

III. TITULUA.–KONTRATAZIOA ETA PRESTAKUNTZA.

I. KAPITULUA.–KONTRATAZIOA.

15. artikulua. Diskriminaziorik ezaren klausula orokorra.

16. artikulua. Kontratazioa, orokorrean.

17. artikulua. Kontratazio motak.

18. artikulua. Aldi baterako kontratuak.

19. artikulua. Lanaldi partzialeko kontratuei buruz.

20. artikulua. Kontratu mugagabe bihurtzea.

21. artikulua. Errelebo kontratua.

22. artikulua. Probaldia.

23. artikulua. Desgaitasuna duten pertsonentzat gordetako plazak.

24. artikulua. Lanpostu hutsak eta lanpostu sortu berriak.

II. KAPITULUA.–LANA UZTEA.

25. artikulua. Lana borondatez uztea.

III. KAPITULUA.–PRESTAKUNTZA.

26. artikulua. Sustapena eta lanbide prestakuntza lantokian.

IV. KAPITULUA.–LANEKO SEGURTASUNA ETA OSASUNA.

27. artikulua. Laneko segurtasuna eta osasuna.

IV. TITULUA.–LANALDIA ETA ORDAINSARIEN EGITURA.

I. KAPITULUA.–LANALDIA ETA LAN EGUTEGIA.

28. artikulua. Lanaldia eta lan egutegia.

29. artikulua. Lanaldia kontrolatzea.

30. artikulua. Gaueko lana.

II. KAPITULUA.–OPORRAK.

31. artikulua. Opor ordainduak.

III. KAPITULUA.–LANBIDE SAILKAPENA.

32. artikulua. Lanbide sailkapena.

IV. KAPITULUA.–ORDAINSARIEN EGITURA.

33. artikulua. Oinarrizko soldata.

34. artikulua. Antzinatasun plusa.

35. artikulua. Erantzukizuneko osagarriak.

36. artikulua. Aparteko pagak.

37. artikulua. Gaueko lanaren plusa; txandakako lanaren plusa; larunbat, igande eta jaiegunetako plusa; jaiegun berezietako plusa; zaintza ez-lokalizatuen edo prestutasun plusa; lanpostuko beste osagarri batzuk.

38. artikulua. Osagarria aldi baterako ezintasunaren aldian.

39. artikulua. Gastuen konpentsazioa.

V. TITULUA.–LIZENTZIAK ETA ESZEDENTZIAK.

I. KAPITULUA.–LIZENTZIAK.

40. artikulua. Ordaindutako lizentziak.

41. artikulua. Ordaindu gabeko baimenak.

42. artikulua. Etenaldiak eta lanaldi murrizketa edoskitzeko.

43. artikulua. Amatasuna, aitatasuna, adopzioa eta harrera.

44. artikulua. Beren kabuz moldatu ezin diren adingabeak edo ahaideak zaintzea.

45. artikulua. Lanaldia murriztea adinarengatik.

46. artikulua. Nahitaezko eszedentzia.

47. artikulua. Ahaideak eta seme-alabak zaintzea.

48. artikulua. Borondatezko eszedentzia.

49. artikulua. Eszedentziaren ondoren lanera itzultzea.

50. artikulua. Aldi baterako ezintasuna.

51. artikulua. Erretiroak.

VI. TITULUA.–HOBEKUNTZA SOZIALAK.

52. artikulua. Laneko arropa.

53. artikulua. Mantenua, ostatua eta joan-etorrien gastuak.

54. artikulua. Aseguruak.

55. artikulua. Orientazio juridikoa.

56. artikulua. Epaitegira joatea.

57. artikulua. Datuen babesa txostenak egitean.

58. artikulua. Enpresa-subrogazioaren klausula.

VII. TITULUA.–ESKUBIDE SINDIKALAK.

59. artikulua. Eskubide sindikalak.

60. artikulua. Batzarrak.

VIII. TITULUA.–DIZIPLINA ARAUBIDEA.

61. artikulua. Diziplina araubidea.

62. artikulua. Zehapenak.

63. artikulua. Tramitazioa eta preskripzioa.

IX. TITULUA.–BESTE XEDAPEN BATZUK.

64. artikulua. Hitzarmenean ezarritakoa ez aplikatzeko klausula.

XEDAPEN GEHIGARRIAK.

Lehen xedapen gehigarria.–Nafarroako Gobernuko Hezkuntza Departamentuaren mendeko prestakuntza programa egonkorrak.

Bigarren xedapen gehigarria.–Lanaldia egokitzea.

Hirugarren xedapen gehigarria.–Berdintasun Planak.

Laugarren xedapen gehigarria.–LGTBI+ pertsonen berdintasunerako eta diskriminaziorik ezerako neurriak.

AZKEN XEDAPENAK.

Azken xedapenetako lehenengoa.–Hitzarmena aldatzeagatik erosteko ahalmenari eusteko bermea.

Azken xedapenetako bigarrena. Hitzarmen kolektibo honetako aurreraeragin-egoerara iritsiz gero soldatak eta lanaldia berrikusteko akordio espezifikoak.

ERANSKINAK.

1. Eranskina.–Nafarroako ekintza eta esku-hartze sozialaren sektoreko II. hitzarmen kolektiboa: jardueren katalogoa.

2. Eranskina.–Soldata taulak.

NAFARROAKO EKINTZA ETA ESKU-HARTZE SOZIALAREN SEKTOREKO II. HITZARMEN KOLEKTIBOA

HITZAURREA

I

Nafarroako Esku-hartze Sozialerako II. Hitzarmen hau negoziatzeko saioetan, Nafarroako Gobernuko Pertsonen Autonomia eta Garapenerako Nafarroako Agentziak parte hartu du, gonbidatu edo behatzaile gisa.

2025eko otsailaren 4an, hitzarmen hau sinatu zuten alderdiek aurreakordio bat lortu zuten II. Hitzarmena sinatzeko, indarraldia aurreikusiz 2025., 2026, 2027 eta 2028rako, eta formula bat ere bai, Nafarroako KPIari buruzko soldata taulak eguneratzeko; aurreakordioa Nafarroako Gobernuari bidali zitzaion, jakinaren gainean egon zedin.

Nafarroako Gobernuak hitzarmena sinatu duten alderdiei eskatu zien proposatutako soldata taula horietan aintzat hartzeko Espainiako ekonomiaren desindexazioari buruzko martxoaren 30eko 2/2015 Legean jasotako eskakizunak; lege horrek mugak ezartzen dizkio KPIaren erabilerari, errentak eguneratzeko erreferentzia automatiko gisa.

Hitzarmen hau sinatu duten alderdiek ez dute onartzen Nafarroako Gobernuak negoziazio mahaiaren subiranotasunean esku hartzea; hala ere, erabat kontziente dira oso zaila dela sektorearentzat ohartarazpen ofizialei kasurik ez egitea.

Horregatik, 2025eko irailaren 18an egindako bilkuran, hitzarmenaren negoziazio mahaiak erabaki zuen 2025eko otsailaren 4ko aurreakordioa indarrik gabe uztea eta negoziazioarekin jarraitzea, hitzarmenaren testu berri bat lortu arte, hartara batera ekarriz alderdien negoziatzeko borondatea eta Nafarroako Gobernuak agertutako arau eskakizunak.

Ildo horretatik, azkenik, sektoreko bigarren hitzarmen kolektibo hau adostu da, urtebeteko indarraldiarekin, sektorea ahalik eta agudoen egokitu dadin, martxoaren 30eko 2/2015 Legea, aurreikusten den gisan, indargabetu edo aldatzen bada.

II

Nafarroako ekintza eta esku-hartze sozialaren sektoreko hitzarmen kolektibo hau sinatzaileek arduraz jokatuta sortu da. Izan ere, sektoreko langileen eta entitateen ordezkariek hitzarmen honen bidez esku-hartze sozialeko zerbitzuak bermatu nahi izan dituzte eta zerbitzu horien baldintza ekonomikoak eta lan baldintzak finkatu nahi izan dituzte.

Nafarroako Foru Komunitatean hitzarmen honen aplikazio esparruko zerbitzuak kontratatzen, hitzartzen edo ituntzen dituzten administrazio publikoek aintzat hartu behar dituzte hitzarmen honetan ezartzen diren lan baldintzak, esku-hartze sozialeko zerbitzuen kostu ekonomikoak eta lan kostuak kalkulatzean eta horretarako diru-zuzkidurak jartzean.

Alderdi sinatzaileek uste dute beharrezkoa dela sektoreko enpresen lan baldintzak bateratzea eta, era horretan, sektorean hitzartutako lan baldintzak okertzean oinarritutako lehiak sektoreari egiten dion kaltea saihestea. Hori dela eta, alderdiek uste dute hitzarmen honetan itundutako baldintzak direla sektoreko oinarrizko lan baldintzak eta, horrenbestez, eskatzen dute enpresaren esparruan lan baldintza apalagoak ez negoziatzeko.

I. TITULUA.–XEDAPEN OROKORRAK

I. KAPITULUA.–EREMUAK

1. artikulua. Eremu funtzionala.

Hitzarmen hau nahitaez aplikatu behar da jarduera nagusia ekintza eta esku-hartze sozialeko jarduerak egitea duten enpresa, elkarte, fundazio, zentro, entitate eta antzekoetan (hemendik aurrera, entitateak edo erakundeak).

Ekintza eta esku-hartze sozialaren barruan honako jarduera edo ekintza hauek sartzen dira: ahulezia sozial berezian dauden pertsonen beharrizan sozialei aurre egiteko eta pertsona horiei arreta emateko modu formalean egiten diren jarduera eta ekintza antolatuak, xedetzat dutenak gizarte bazterketa detektatzea, saihestea, arintzea, gainditzea edo zuzentzea, edo gizarteratzeko edota gizartean parte hartzeko prozesuak sustatzea.

Hitzarmen hau, ekintza sozialaren barnean, gizarteratzearen eta babes sozialaren sustapenaren esparruan aplikatuko da, bai eta esparru partekatu hauetan ere: gizartea-lana, gizartea-osasuna, gizartea-kultura, gizartea-hezkuntza, gizartea-prestakuntza eta gizartea-akademikoa, bai eta osasun mentala ere (gerora sortutako eritasun mentala). Hitzarmena esparru partekatu horietan aplikatzeko, ezinbestekoa izanen da arestian aipatutako esku-hartze sozialaren zerbitzuan edota mendean egotea, horixe baita helburu nagusia.

Honen helburu diren kolektiboak ere denetarikoak dira: babesgabezian edo horren arriskuan dauden pertsonak eta kolektiboak; adingabeak eta gazteak; emakumeak; desgaitasuna duten pertsonak; adinekoak eta helduak; baztertuta edo horren arriskuan dauden pertsonak; migratzaileak. Horien artean daude, adibidez (zerrenda hau guztia hartzeko asmorik gabe egin da): diru-arazoengatik baztertuta dauden pertsonak; arazoak dauzkaten adingabeak eta gatazka sozialean daudenak; erreformatorioan dauden gazteak; etxerik gabeko pertsonak; mendekotasunen bat duten edo izan duten pertsonak (denetariko adikzioak); pertsona migratzaileak; langabeak; espetxean dauden edo egon diren pertsonak; gerora sortutako eritasun mentala duten pertsonak; genero indarkeriaren biktima diren emakumeak; sexu-langileak. Kasu guztietan, pertsona horiek gizartean baztertuta edo babesgabezian daude edo egoteko arriskuan dira eta gizarteratu daitezen eta gizartean parte har dezaten sustatu behar da.

Halaber, hitzarmen honen aplikazio-esparruaren barruan daude beraren eremu funtzionaleko zerbitzuak egiten dituzten atalak, negozio-lerroak, sekzioak eta bestelako unitateak, haiek barne hartzen dituzten entitateak beste jarduera batean ari badira ere, edo sektore desberdinetako jarduera batean baino gehiagotan ari badira ere, non ez den entitateak itundutako baldintzak hitzarmen honetakoak baino onuragarriagoak direla, orduan, bermatuko baitira baldintza horiek.

Hitzarmen honen eremu funtzionalaren barruan daude hezkuntza arloko aisialdiko eta animazio soziokulturaleko Estatuko hitzarmenaren eremu funtzionalean bildutako jarduerak, baldin eta beren helburua gizarte bazterketa edo horren arriskua detektatzea, arintzea eta zuzentzea bada, hau da, esku-hartze sozialaren xedea betetzea.

Halaber, hitzarmen honen eremu funtzionalaren barruan daude esku-hartze sozialaren xedearekin bat datozen tailer eskolak, lanbide etxeak eta enplegu tailerrak, eta prestakuntzako nahiz prestakuntza-aurreko moduluak.

Hitzarmen honen aplikazio eremutik kanpo daude gizarteratze eta laneratze enpresak (GLE) eta nazioarteko lankidetzarekin eta garapenerako laguntzarekin lotutako jarduera egiten duten entitateak. Aurreko biak aplikazio eremutik kanpo daude, baina hitzarmenaren batzorde paritarioari barnean sartzeko eskatzen ahal diote idatziz. Nazioarteko lankidetzan eta garapenerako laguntzan lan egiten duten enpresei dagokienez, atzerrian ari diren pertsonei buruzko arautegian zerbait arautu gabe badago, Estatuko hitzarmenak xedatzen duena aplikatuko da.

Aurrekoez gainera, hitzarmen honetatik kanpo espresuki uzten dira jarduera nagusia ingurumenaren, kirolaren edo kulturaren arlokoa duten entitateak, arlook zentzu hertsian hartuta eta aurreko bi paragrafoetan xedatzen dena eragotzi gabe. Orobat, hitzarmen honen eremu funtzionaletik kanpo espresuki uzten dira zerbitzu, zentro eta jarduera hauek:

(1) Desgaituei arreta emateko zerbitzuak, hala nola: (1.a) enplegu-zentro bereziak, (1.b) egoitza-zentroak, (1.c) eguneko eta gaueko zentroak, (1.d) etxez etxeko zerbitzuak, (1.e) zentro okupazionalak, (1.f) senideen eta erabiltzaile eta ukituen elkarteak, (1.g) etxeko telelaguntza; kanpoan geratzen dira, orobat, desgaituei arreta emateko zentro eta zerbitzuen XVI. hitzarmen kolektibo orokorraren eremu funtzionaleko gainerako baliabideak ere; eta Nafarroako Gobernuarekin itundutako desgaituen arretarako zentro pribatuen hitzarmen sektorialean aipatzen direnak ere bai.

(2) Inoren mendetasuna duten pertsonei arreta emateko zerbitzuak, hala nola: (2.a) tutoretzapeko etxebizitzak, (2.b) etxez etxeko laguntza zerbitzua, (2.c) eguneko zentroak, (2.d) egoitza zentroak; (2.e) senide, erabiltzaile eta ukituen elkarteak; orobat, mendetasuna duten pertsonei arreta emateko eta horien autonomia pertsonalaren sustapena garatzeko zerbitzuen Estatuko VIII. esparru akordioaren eremu funtzionalean dauden baliabideak ere.

(3) Adinekoen arretarako zerbitzuak, hala nola: (3.a) tutoretzapeko etxebizitzak, (3.b) eguneko nahiz gaueko zentroak , (3.c) etxez etxeko laguntza zerbitzua, (3.d) erretiratuen klubak; (3.e) senide, erabiltzaile eta ukituen elkarteak; (3.f) etxeko telelaguntza; horiez gainera, mendetasuna duten pertsonei arreta emateko eta horien autonomia pertsonalaren sustapena garatzeko zerbitzuen Estatuko VIII. Esparru akordioaren eremu funtzionalean dauden baliabideak ere bai.

(4) Aisialdiko eta denbora libreko zerbitzuak, hala nola: (4.a) ludotekak, (4.b) kanpamenduak, (4.c) udalekuak, (4.d) gazteen elkarteak, (4.e) kirol klubak, (4.e) klub artistikoak; horiez gainera, hezkuntza arloko aisialdiko eta animazio soziokulturaleko Estatuko IV. Esparru hitzarmen kolektiboaren eremu funtzionalean dauden baliabideak ere bai. Salbuespenak: aurrean ezartzen denarekin bat etorriz, bazterketa edo horren arriskua detektatu, arindu eta zuzentzea xede duten animazio soziokulturaleko jarduerak eta aisialdiko eta denbora libreko jarduerak.

(5) Osasun mentaleko zerbitzuak, hala nola: (5.a) zerbitzu psikogeriatrikoak, (5.b) klinika psikiatrikoak eta osasun mentaleko klinikak; (5.c) egoitza zentroak, laguntza zentroak edota zentro soziosanitarioak, (5.d) ospitaleak eta eguneko zentroak, (5.e) errehabilitazio psikosozialeko zentroak, (5.f) zerbitzudun etxebizitzak eta apartamentuak edo tutoretzapekoak (mota eta modalitate guztiak); horiez gainera, desgaituei arreta emateko zentro eta zerbitzuen XVI. hitzarmen kolektibo orokorraren eremu funtzionaleko gainerako baliabideak ere ez.

Hitzarmen honen eremu funtzionalean honako hauek sartzen dira: 69/2008 Foru Dekretuan (martxoaren 20ko 30/2019 Foru Dekretuak aldatzen du) biltzen diren eremu orokorreko gizarte zerbitzuen zorroa; Gizarte Zerbitzuetarako Estatu Idazkaritzaren 2013ko apirilaren 23ko ebazpenean bildutako gizarte zerbitzuen erreferentziako katalogoa; administrazio zentralak edo Nafarroako Gobernuak ordezten, aldatzen edo gehitzen dituztenak ere bai; dagoeneko esparru hitzarmen arautzailea dutenak izan ezik.

Eremu funtzionala hobeki ezagutzeko eta ongi zehazteko, hitzarmen honen I. eranskinean jaso da, erantsirik, Nafarroako ekintza eta esku-hartze sozialaren sektoreko II. hitzarmeneko jardueren katalogoa. Katalogo horretako zerrenda ez dago itxita; izan ere, hitzarmenaren batzorde paritarioak, interpretazio eginkizunak betez, jarduerak gehitzen ahalko ditu, baldintza hau aintzat hartuta: zerrendan ageri diren gizarte inklusio eta babeseko jardueren eremu berekoak edo antzeko eremu batekoak izan behar dira.

2. artikulua. Lurralde eremua.

Hitzarmen kolektibo hau beraren eremu funtzionaleko entitate guztiei aplikatuko zaie, bai eta Nafarroako Foru Komunitatean (NFK) lan egiten duten entitate horietako langile guztiei ere, entitatearen egoitza soziala non dagoen eta kontratatua non egin den kontuan hartu gabe.

3. artikulua. Eremu pertsonala.

Hitzarmenaren eremuaren barruan daude eremu funtzionalean dauden entitateetan lan kontratuarekin lanean ari diren pertsona guztiak. Beraz, hitzarmen hau ezin zaie aplikatu boluntario sozialei (hauei NFK-ko boluntarioen legea aplikatuko zaie), ez eta komunitate erlijiosoetako kide diren pertsonei ere, kidetza hori dela-eta komunitateen titulartasuneko zentroetan lan egiten dutenean. Halaber, hitzarmen honen aplikazio eremutik kanpo daude goi-zuzendaritzako langileak, entitatearekin adostuz gero.

4. artikulua. Indarraldia eta iraupena.

Hitzarmen honen indarraldia 2025eko urtarrilaren 1etik 2025eko abenduaren 31ra artekoa da, hitzarmen honen azken xedapenetako bigarrenean aipatzen diren hitzarmen kolektibo honen aurreraeraginaren kasurako akordio espezifikoen kalterik gabe.

5. artikulua. Hitzarmena salatzea eta indarraldia luzatzea.

1. Aldez aurretik berariaz salatzen ez bada, hitzarmen honen akabera 2025eko abenduaren 31n automatikoki iragarriko da, eta alderdiek 2025eko uztailaren 31 baino lehen negoziazio batzordea eratzeko konpromisoa hartzen dute.

2. Itundutako iraunaldia agorturik, hitzarmen hau mugarik gabe egonen da indarrean, beste batekin ordeztu arte. Hurrengo hitzarmen kolektiboa negoziatzen den bitartean indarrean jarraituko dute honen klausulek (araugintzakoek zein betebeharrei buruzkoek) eta hitzarmen berria onartu arte aplikatuko dira.

6. artikulua. Osotasunari lotzea.

Itundutako baldintzek multzo organiko eta zatiezina osatzen dute eta aplikazio praktikoaren ondorioetarako denak batean eta osorik hartuko dira, azken xedapenetako lehenean xedatzen dena aintzat hartuta ("ad personam" bermeak). Lan arloko jurisdikzioak artikuluren bat deuseztatzen badu, hitzarmena berrikusiko da; horretarako, negoziazio mahaia epaia ematen denetik hilabete igaro baino lehen bilduko da. Negoziazio mahaiko kideetako batek aldez aurretik proposatzen dituen hitzarmeneko atalak berrikusiko dira.

7. artikulua. Lehentasuna aplikazioan eta zuzenbide osagarria.

Hitzarmen honen sinatzaileek, Langileen Estatutuaren 83.2 artikuluan xedatutakoarekin bat, hitzarmen kolektibo sektorial autonomiko honen bidez erabaki dute hitzarmen hau eta, aldi berean, goragoko esparruetako beste hitzarmen kolektibo baten aurrean, hitzarmen honi ematea lehentasuna.

Hortaz, hitzarmen kolektibo autonomiko honen xedapenak ez dira aldatuko goragoko hitzarmen kolektibo batzuen edukiagatik, salbu eta, indarreko legediaren arabera, hitzarmen horiek nahitaez aplikatu behar diren gaietan.

Gainera, hitzarmen kolektibo autonomiko honetan ituntzen ez den guztirako Estatuko sektoreko hitzarmen kolektiboan arautzen dena aplikatuko da.

II. KAPITULUA.–BATZORDEAK

8. artikulua. Batzorde paritarioa.

1. Irizpide orokorrak:

Hitzarmen kolektiboaren batzorde paritarioa sortzen da. Batzorde horrek hitzarmena interpretatuko du, bertan ezarritakoa betearaziko du eta arbitraje eta kontziliazio lanak eginen ditu. Gainera, legeek esleitzen dizkioten edota negoziazio kolektiboan adosten diren beste eskumen batzuk ere izanen ditu.

Bi alderdiek adosten dute ezen, edozein presio-neurri hartu baino lehen, batzorde paritarioak aztertuko dituela hitzarmena aplikatzean edo interpretatzean sortzen diren arazo, desadostasun eta gatazka kolektibo guztiak.

Batzorde paritarioan desadostasunik egonez gero, alderdiek adostu dute gatazkari buruzko erabakia Nafarroako Lan Auzitegiak hartuko duela, hitzarmenean ezartzen diren prozedura estrajudizialak aplikatuz (bitartekaritza eta adiskidetzea). Indarrean dagoen legeriako arbitraje prozedurak (derrigorrezko arbitrajea ez beste guztiak) borondatezkoak izanen dira alderdientzat.

Batzorde paritarioaren esku-hartzea eta, behar denean, Lan Auzitegiaren prozedurak erabiltzea nahitaezkoak izanen dira esleitutako xedeen eta gaien aurka aurkezten diren auzibide eta administrazio prozedura guztiak hasi aurretik. Nolanahi ere, uko egin ezinezko eskubideek bere hartan iraunen dute.

Batzorde paritarioak, bete beharreko legeriari erreparatuta, hitzarmen hau aldatzeko prozedurak abiarazten ahalko ditu, hitzarmena indarrean dagoen bitartean, arau bati edo batzuei eragiten dieten akordio partzialen bidez, artikuluren bat aldatzeko edo beste artikulu batzuk gehitzeko. Nolanahi ere, akordio horien xedea langileen baldintza materialak eta juridikoak hobetzea izan behar da, edota akordioan arautzen den sektoreko erakunde eta entitateen eraginkortasuna eta efizientzia hobetzea. Horrelako negoziazio partzialak egiteko prozesurik abiaraziz gero, honela jokatuko da:

1.–Hitzarmenaren batzorde paritarioak zehaztuko du zer artikulu edota gai aldatu behar diren edo berriz negoziatu behar diren.

2.–Hitzarmenaren batzorde paritarioa negoziazio batzorde bihurtuko da. Batzorde paritarioak akordio partzialerako gai negoziagarri gisa zehaztu dituen artikuluak edota gaiak soilik jorratuko ditu negoziazio batzordeak.

3.–Negoziatzeko legezkotzat jotzen diren alderdi guztiak ariko dira negoziazio batzordean, bai langileen alderdia, bai enpresaren alderdia, aplikatu beharreko legeriaren arabera negoziazio batzordea eratzen den ordezkaritzarekin.

2. Batzorde paritarioaren harremanak administrazio publikoekin:

Batzorde paritarioan hitzarmen honen sinatzaile guztiak ariko dira. Bertan neurri egokiak ezarriko dira administrazio publikoei jakinarazteko alderdiek konpromisoa hartu dutela enplegua bermatzeko eta gutxieneko lan baldintza batzuk errespetatzeko.

Neurri horien artean hauek izanen dira gutxienez:

–Hitzarmenaren testu osoa bidaltzea administrazio publiko nagusiei (Nafarroako Gobernua, Nafarroako Udal eta Kontzejuen Federazioa eta udal nagusiak), jakinaren gainean egon daitezen eta kontuan har dezaten beren eremu funtzionalaren barruan egiten dituzten kontratuetan, hitzarmenetan, itunetan, dirulaguntzetan edo finantzaketa orokorrean.

Halaber, administrazio publikoek indarrean dauden zerbitzuak kanpoan kontratatzeaz estatutu gisako akordio kolektiboetan ezartzen dena betetzen ote den kontrolatuko da, batez ere gai hauei dagokienez:

–Zerbitzu publikoen adjudikazioetan, plantilla egonkortzeko asmoarekin, entitate edo enpresa adjudikaziodunak bermatzea lanean ari diren pertsonen subrogazioa, adjudikazioa egiten denean dagoen benetako plantilla errespetatuz.

–Baldintza-agirietan bermatzea entitate edo enpresa kontratistak laneko arriskuen prebentzioari buruzko legeria betetzen duela.

–Entitate edo enpresa kontratistako lan kontratupeko langileek bermatuta izatea, gutxienez, jardueraren araberako sektoreko hitzarmenean ezartzen diren ordainsariak eta lan baldintzak edo, bestela, enpresarenak, hobeak izanez gero.

–Entitate edo enpresa adjudikaziodunek ezin azpikontratatu izatea zerbitzuak hirugarren bati.

Ikuskaritza lan horietan akordio honen kontrako jarduketaren bat detektatzen bada, batzorde paritarioak hau eginen du:

–Lehenbizi, idatzi baten bidez egoera irregularraren berri eman administrazio egokiari.

–Erreklamazioa aintzat hartu ezean, batzorde paritarioak gertatutakoa salatuko du Kontuen Ganberaren aurrean, Nafarroako Arartekoaren aurrean eta egokitzat jotzen dituen gainerako erakunde eta batzorde guztien aurrean.

–Azkenik, akordioa sinatu duten entitateek administrazioarekiko auzi-erreklamazioa aurkezten ahalko dute justizia auzitegien aurrean.

Negoziatzen diren hurrengo hitzarmenetan sektoreko profesionalen lan baldintzak eta aitortza hobetzen jarraitzea, ahal dela.

9. artikulua. Batzorde paritarioaren osaera.

Batzorde paritario bat bakarra egonen da Nafarroako Foru Komunitatean. Hamar (10) batzordekide egonen dira: bost (5) hitzarmena sinatzen duten entitateen ordezkariak izanen dira eta beste bost (5) sindikatuenak. Batzordekide bakoitzak ordezkoa izanen du. Alderdi sinatzaile bakoitzak gutxienez ordezkari bat edukiko du batzordean. Nolanahi ere, alderdi bakoitzak negoziazio mahaiko botoen ehuneko bera izanen du batzorde paritarioan. Bi alderdiek nahi duten aholkularitza izaten ahalko dute bileretan.

10. artikulua. Batzorde paritarioaren jardunbidea.

Hitzarmen hau sinatu eta hurrengo hamabost egun naturaletan eratuko da batzorde paritarioa. Lehen bileran batzordeburua eta idazkaria izendatuko dira eta, beharrezkoa bada, batzordearen jardunerako arautegia onartuko da.

Bileren deialdietan agertu beharko da deialdia egiten duen alderdiak proposatutako aztergaien zerrenda. Gainera, beste gai batzuk ere sartzen ahalko dira zerrendan, alderdiak akordio batera iristen badira, espresuki eta boto aski bilduta, bilera eskaera jakinarazi baino bost egun lehenago gutxienez.

Erabakiak baliozkoak izan daitezen, batzordea eratutzat joko da gutxienez alderdi bakoitzaren ordezkarien erdiak (%50) bileran daudenean. Erabakiak boto kualifikatuen bidez hartuko dira, batzordeko kide diren erakundeen ordezkaritzaren arabera. Erabakiak hartu ahal izateko, ezinbestekoa izanen da enpresaren eta langileen ordezkarien erdiek onartzea.

Batzorde honen deialdiak batzordeburuak eginen ditu edo, hura ez badago, alderdietako batek. Hartzen diren erabakiak idazkariak jakinaraziko ditu.

Batzordearen ebazpenak lotesleak izanen dira. Bilera bakoitzaren akta egin behar da, akaberan bertaratutakoek sinatu behar dute, aztertutako gaiak artxibatu behar dira eta lan arloko agintaritza eskudunaren aurrean erregistratu behar dira.

11. artikulua. Batzorde paritarioaren egoitza.

Batzorde paritarioaren egoitza Nafarroako Lan Auzitegiaren egoitza da. Batzorde paritarioari posta elektronikoz helarazten ahal zaizkio komunikazioak (paritariasocialnavarra@gmail.com). Komunikazioa baliozkoa izanen bada, mezu elektronikoaren kopia bidali behar da honako helbide hauetara:

1. asociacion.aneis@gmail.com

2. szk.nafarroa@lab.eus

3. is.navarra@fsc.ccoo.es

12. artikulua. Parte hartzeko mekanismoak.

Hitzarmena ez dela bete uste izanez gero, haren inguruko interpretazioa eskatu nahi izanez gero edo gatazka kolektibo batean bitartekaritza edo arbitrajea behar izanez gero, alderdiek batzorde paritariora jo beharko dute; gero, lehen bilera arruntean edo hilabete pasatu baino lehen, batzordeak bere ebazpena emanen du aurkeztu zaion gaiaz.

Komunikazioak bi alderdietatik zeinahiri bidaltzen ahal zaizkio.

Batzorde paritarioaren ebazpenek hitzarmenaren beraren legezko indar bera izanen dute, eta haren osagai izanen dira. Ebazpenak erregistratu eta gordailatu behar dira eta Nafarroako Aldizkari Ofizialean argitaratu, herritar guztiak jakinaren gainean egon daitezen.

II. TITULUA.–LANAREN ANTOLAKETA

13. artikulua. Definizioa.

Lanaren antolaketa entitateen egitekoa da, zuzendaritzaren bitartez. Beraz entitateek beren kabuz antolatzen ahal dituzte eskura dituzten giza baliabideak eta baliabide materialak. Nolanahi ere, hitzarmen honen, Langileen Estatutuen eta aplikatu beharreko gainerako arautegiaren arabera langileek eta beren ordezkariek entzunaldi, informazio eta negoziazio eskubideak dituzte, besteak beste.

14. artikulua. Jaso izanaren agiria.

Langileak edo langileen legezko ordezkariek espresuki eskatzen duten guztietan, entitateek egindako eskaeren eta komunikazioen idazki bat jaso dutela adierazi beharko dute, jasotze data adierazita.

Era berean, entitateek espresuki eskatzen duen guztietan, langileen legezko ordezkaritza eta/edo atal sindikalak osatzen dituzten pertsonek enpresak egindako jakinarazpenak jaso dituztela adierazi beharko dute, jasotze data adierazita.

III. TITULUA.–KONTRATAZIOA ETA PRESTAKUNTZA

I. KAPITULUA.–KONTRATAZIOA

15. artikulua. Diskriminaziorik ezaren klausula orokorra.

Debekatuta dago arraza, sexua, sexu-hautua, erlijioa, etnia, hautu politikoa edo sindikala nahiz adina direla-eta diskriminaziorik egitea soldatetan, eta arrazoi horiek direla-eta enpresan lanpostu berean ari diren langile guztiei ordainsari bera ez ematea ere bai.

Emakumeek eta gizonek aukera berak izanen dituzte enpleguan, prestakuntzan, sustapenean eta beren lan jardunean.

Gizonek eta emakumeek soldata bera izanen dute lan bera egiteagatik, eta gainerako lan baldintza guztietan ere berdintasuna bermatuko zaie, alderdi guztietan.

Beharrezkoak diren neurriak hartuko dira lanpostuak, lan jardunak, lanaren antolaketa eta lan baldintzak egokiak izan daitezen emakumeentzat zein gizonentzat.

Gainera, alderdi sinatzaileek konpromisoa hartzen dute batzorde paritarioaren bidez aplikatzeko gizonek eta emakumeek aukera berdinak izateko jardunbide onen irizpideak, Nafarroako esku-hartze sozialaren sektoreko entitateetan, hauen testuinguruan ezartzen denarekin bat etorriz:

–3/2007 Lege Organikoa, martxoaren 22koa, emakumeen eta gizonen berdintasun eragingarrirakoa.

–Elkarrizketa Sozialari buruz Florentzian, 1995eko urriaren 21ean, egin zen gailurrean hartu ziren erabakiak biltzen dituen Adierazpen Bateratua: «Adierazpen Bateratua, lantokian arraza bereizkeria eta xenofobia ez gertatzeko neurriei eta tratu berdintasuna sustatzeko neurriei buruz».

–Europako Parlamentuaren eta Batzordearen 2002/73/EE Zuzentarauak, 76/207/EEE Zuzentaraua aldatzen duenak, ezartzen dituen oharrak, proposamenak eta irizpide orokorrak.

–6/2019 Errege Lege-dekretua, martxoaren 1ekoa, premiazko neurriak ezartzen dituena emakumeen eta gizonen arteko tratu eta aukera berdintasuna bermatzeko, enplegu eta lanaren arloan.

–17/2019 Foru Legea, apirilaren 4koa, Emakumeen eta Gizonen arteko Berdintasunari buruzkoa.

–901/2020 Errege Dekretua, urriaren 13koa, berdintasun planak eta haien erregistroa arautzen dituena.

–902/2020 Errege Dekretua, urriaren 13koa, Emakumeen eta gizonen ordainsarien berdintasunari buruzkoa.

–10/2022 Lege Organikoa, irailaren 6koa, Sexu askatasunaren berme osoarena.

–PCM/1047/2022 Agindua, azaroaren 1ekoa, urriaren 13ko Emakumeen eta gizonen ordainsarien berdintasunari buruzko 902/2020 Errege Dekretuan aurreikusitako lanpostuak baloratzeko prozedura onartu eta argitaratzen duena.

–1/2023 Lege Organikoa, otsailaren 28koa, Sexu eta ugalketa osasunari eta haurdunaldiaren borondatezko etendurari buruzko martxoaren 3ko 2/2010 Lege Organikoa aldatzen duena.

–15/2022 Legea, uztailaren 12koa, Tratu berdintasunari eta diskriminazio ezari buruzkoa.

16. artikulua. Kontratazioa, orokorrean.

Hitzarmen honen eremuan, kontratuak eta beren luzapenak eta aldaketak idatziz formalizatu behar dira. Kontratatzen den pertsonak eskubidea dauka kontratuaren kopia jasotzeko lanean hasi aurretik, honako kasu hauetan izan ezik, justifikatuta baitago: azken orduko ordezpena, ezustekoa, presazko kontratazioa, asteburuko kontratazioa, jaieguneko kontratazioa, errefortzua edo antzeko beste kasu batzuk. Beste alde batetik, entitateek langileen legezko ordezkarien eskura jarri behar dute kontratuaren oinarrizko kopia, epealdi laburrean, gehienez ere hura sinatzen denetik hamar (10) egun igaro baino lehen.

17. artikulua. Kontratazio motak.

Kontratazio motak. Hitzarmen honen eraginpeko langileak legez indarrean dagoen edozein kontratu modalitateren babesean kontratatzen ahalko dira, bereizitasun hauek aintzakotzat hartuta:

1. Mugagabeko kontratua: kontratu mota hau erabiliko da lanpostu iraunkor finkoen beharrak betetzeko. Gainera, sektore hau arautzen duten Estatu zein autonomia erkidegoen mailako legeen arabera eskubide objektibotzat edo bermatutako prestaziotzat jotzen diren prestazioak edo zerbitzuak egiteko asmoarekin abiarazten diren programetan edota zerbitzuetan ari diren langile guztiei ere kontratu mota hau egin behar zaie. Kontratu hauek modalitate guztietan egiten ahalko dira: lanaldi osoa, lanaldi partziala, hobaria jasotzeko eskubidearekin zein halakorik gabe, aldizkako kontratu finkoa eta abar.

2. Obra edo zerbitzu jakin baterako aldi baterako kontratazioa: kontratu mota hori ez da kontratazio berrietarako erabiltzen ahalko. Era horretako kontratuak, iraupen mugatukoak, hitzarmen hau sinatzean indarrean badaude, aplikatu beharreko araudi iragankorra betez eginen dira.

3. Behin-behineko kontratua produkzioaren inguruabarren ondorioz: honelako kontratuekin aparteko beharrizanei erantzunen zaie; beren iraupena ezin da izan hamabi hilabetetik gorakoa hamabost hilabeteko aldian. Entitateak ahalik eta lasterren jakinaraziko dio langileen legezko ordezkaritzari horrelako kontratuen erabilera.

4. Bitarteko kontratua edo ordezte-kontratua: honelako kontratua erabiliko da lanpostua gordetzeko eskubidea duen langile bat ordeztu behar denean; ezinbestekoa da lan kontratuan adieraztea zer langile ordezten den eta zein den ordezpenaren arrazoia. Bitarteko langileak lanpostua utzi beharko du ordezten duen pertsona berriz lanean hastean denean, legez ezartzen den bezala eta legezko epealdiaren barruan.

Legez eta erregelamenduz arautzen diren kasuetan ez ezik, honako arrazoi hauengatik ere aplikatzen ahal da kontratu mota hau: norbait enplegurik eta soldatarik gabe uztea diziplina arrazoiengatik; norbaitek eszedentzia hartzea, lanpostua gordeta; hautapen prozesuak egitea; guraso baimena edo amatasun baimena hartzea edo haurdunaldia arriskuan izatea; langileak baja hartzea aldi baterako ezintasunagatik.

5. Praktikaldiko kontratua: kontratatuak aritzen den kategoriarako tauletan ezarritako soldataren %90 kobratuko du eta kontratuaren gehieneko iraupena 6 hilabetekoa izanen da; aldi hori agorturik, praktikaldiko kontratua mugagabeko kontratu edo kontratu finko bihurtuko da eta likidazioan jaso ez den %10 ordainduko da.

Aurrean azaldu diren kontratu motez gainera, hitzarmen honen eremu funtzionalean diharduten entitateek legez araututako gainerako mota guztietako kontratuak egiten ahalko dituzte (praktikaldikoak, prestakuntzakoak, desgaitasuna duten pertsonen enplegua sustatzekoak, 64 urterekin erretiratzeko ordezte kontratuak, errelebo kontratuak eta abar). Kontratu mota bakoitzerako sinatzen denean indarrean dagoen arautegia aplikatuko da.

Kontratazio modalitate hori ez da nahastu behar aplikatzekoa den araudiaren arabera arautuko den "bekadunaren" figurarekin.

6. Aldizkako kontratu finkoak:

1.–Aldizkako kontratu mugagabe finkoak urtaroko lanak edo sasoian sasoiko produkzio jarduerekin lotutakoak egiteko baliatuko dira, edo, bestela, izaera hori izan ez arren, aldizkako prestaziokoak izanik, exekuzio aldi ziurrak dituzten lanak egiteko, zehatzak edo zehaztugabeak.

Aldizkako kontratu finkoa baliatzen ahalko da aurreikus daitezkeen eta enpresaren ohiko jardueraren parte diren merkataritza edo administrazio kontraten esparruan zerbitzuak emateko lanak egiteko.

2.–Aldizkako lan kontratu finkoa idatziz formalizatuko da nahitaez, eta lan jardueraren funtsezko elementuak jaso beharko ditu, besteak beste, jarduera aldiaren iraupena, lanaldia eta ordutegi banaketa. Hala ere, azken horiek gutxi gorabeherakoak izanen dira, deialdia egiten den unean zehazten ahal badira ere.

Hitzarmen hau sinatzen duten alderdiek, hitzarmena argitaratu eta gehienez ere hiru (3) hilabeteko epean, deialdi protokolo bat negoziatu eta itunduko dute, aldizkako pertsona finkoen deialdia arautuko duten irizpide objektibo eta formalak ezartzeko. Deialdia idatziz egin beharko da, edo, bestela, interesdunari behar bezala jakinarazi zaiola jasota uzteko aukera ematen duen beste moduren baten batez. Deialdia behar besteko aurrerapenarekin eginen da eta lanean hasteko baldintzak zehazki adierazi beharko dira.

3.–Aldizkako kontratazio finkoa justifikatzen bada kontratak edo azpikontratak egin direlako edo administrazio emakidak hartu direlako, Langileen Estatutuaren 16. artikuluan ezarritakoarekin bat, kontsideratuko da jarduerarik gabeko aldiak itxaronaldiak direla, azpikontratazio batetik bestera lanean hasi artekoak, ez besterik. Ondorio horietarako, azpikontraten arteko jarduerarik ezaren gehieneko epea sei (6) hilabetekoa izanen da, eta bederatzi (9) hilabetera luza daiteke, batzorde paritarioak aldez aurretik adostuta edo baimena emanda.

4.–Sektorearen jardueraren berezitasunak direla eta, lanaldi partzialeko aldizkako kontratu finkoak egiten ahalko dira, aplikatu beharreko lege araudiaren arabera.

5.–Enpresak hutsik dauden lanpostu finko arrunten berri eman beharko die aldizkako langile finkoei eta langileen legezko ordezkariei, langile horiek borondatezko aldaketa eskaerak egin ahal izan ditzaten, hitzarmen kolektibo sektorialean ezartzen diren prozeduren arabera, edo, halakorik ezean, enpresa akordioan ezarritakoen arabera.

6.–Aldizkako langile finkoak lehentasunezko kolektibotzat hartuko dira lan eremuko enplegurako lanbide prestakuntzaren sistemako prestakuntza ekimenetan sartzeko, enplegurik gabe dauden aldietan.

Arestian azaldu diren kontratu motez gainera, hitzarmen honen eremu funtzionalean diharduten entitateek legez araututako gainerako mota guztietako kontratuak egiten ahalko dituzte; kontratu mota bakoitzerako sinatzen denean indarrean dagoen arautegia aplikatuko da.

18. artikulua. Aldi baterako kontratuak.

Kontratu finkorik gabe kontratatutako langileak finko bihurtuz gero, lan egindako egunak baliozkoak izanen dira entitateko antzinatasunerako zenbatzeko.

Halaber, hogeita lau (24) hilabeteko aldian hemezortzi (18) hilabete baino aldi luzeagoan enpresa bateko lanpostu batean kontratatuta egon diren langileak, etenik gabe zein etenekin, aldi baterako bi kontratu edo gehiagoren bitartez, zuzenean zein aldi baterako lan enpresa baten bitartez kontratatuta, iraupen jakineko kontratu mota berarekin nahiz hainbat motarekin, langile finko bihurtuko dira. Salbuespena: hemen ezartzen dena ez zaie aplikatuko prestakuntzako kontratuei, errelebo kontratuei eta bitarteko kontratuei.

19. artikulua. Lanaldi partzialeko kontratuei buruz.

1. Lan kontratuan espresuki ezarriko da langileak urte natural oso batean eginen lukeen urteko lanaldia; kasu horretan, partzialtasunaren portzentajea hitzarmen honetan ezarritako urteko lanaldiaren proportzioan zehaztuko da.

Lanaldi partzialeko langileek ez dute aparteko ordurik egiten ahalko.

Lanaldi osoko lan bat lanaldi partzialeko lan bihurtzea, eta alderantziz, borondatezkoa izanen da beti langilearentzat, eta ez du inposatzen ahalko inork bere gogoz, edo lan baldintzen funtsezko aldaketa baten ondorioz.

2. Lanaldia finkatzea: urte natural bakoitzaren hasieran, langileak eskubidea izanen du aurreko urtean kontratatutako lanaldiaren gainetik egindako orduen %50 finkatzeko, hau da, kontsolidazioa aurreko urteko urtarrilean ezarritako lanaldiaren gainean izanen da, eta kontsolidazioa kalkulatzeko, kontuan hartuko dira bai ordu osagarriak, bai lanaldiaren berritzeak/aldaketak. Hori guztia eginen da kontratatutakoa baino lanaldi luzeagoa egin bada 3 hilabete jarraituetan edo 6 hilabete ez jarraituetan, epealdi berean. Lanaldia finkatzea borondatezkoa izanen da langileentzat, eta langileak bere erakundeari eskatu beharko dio, abian den urte bakoitzeko azarotik abendura bitartean.

3. Ordu osagarriei dagokienez:

Enpresak ordu osagarriak egitea eskatzen ahalko du, langilearekin espresuki itundu duenean bakarrik. Ordu osagarrien gaineko ituna lanaldi partzialeko kontratua egitean hitzartzen ahal da, edo hura egin ondoren; baina, edonola ere, berariazko itun bat izanen da kontratuari dagokionez. Ituna idatziz eginen da ezinbestean.

Ordu osagarriei buruzko hitzarmen bat soilik egiten ahalko da lanaldi partzialeko kontratuetan, partzialtasun hori urteko konputu arruntaren %33 edo hortik gorakoa denean.

Ordu osagarrien itunak jaso behar du zenbat ordu osagarri eskatzen ahalko dituen enpresaburuak.

Langileak gutxienez 5 laneguneko aurreabisua hartuta jakin beharko du zer egunetan eta zer ordutan egin behar dituen ordu osagarri itunduak.

Ordu osagarriei buruzko hitzarmena bertan behera uzten ahalko du langileak, hamabost egun lehenago jakinarazten baldin badu, hitzarmen hori izenpetu zenetik urtebete igaro ondotik.

Benetan egindako ordu osagarriak ordu arrunten moduan ordainduko dira eta Gizarte Segurantzako kotizazio oinarrien, gabealdien eta prestazioen oinarri arauemaileen ondorioetarako zenbatuko dira. Ondorio horretarako, egindako ordu osagarrien kopurua eta ordainsaria soldaten banakako ordainagirian eta Gizarte Segurantzako kotizazio agirietan adierazi beharko dira.

20. artikulua. Kontratu mugagabe bihurtzea.

Langile guztien kontratuak automatikoki finko mugagabe bihurtuko dira honako kasu honetan: baldin eta, kontratuan ezartzen den aldia bukatu ondoren, langileak bere lanak egiten segitzen badu kontratu berria egin gabe, kontratua espresuki bukatu gabe edo luzatu gabe.

21. artikulua. Errelebo kontratua.

Langileek erretiro partzialari heltzea erabakitzen ahalko dute, horretarako unean-unean eskatzen diren baldintza orokorrak betez gero.

Oro har, entitateek ahaleginak eginen dituzte errelebo-kontratua akitutakoan kontratatutako langilea finko bihurtzeko, lanpostuak bere hartan irauten badu entitatean.

Adosten da ezen erretiro partzialeko langileek aukera izanen dutela beren lanaldia metatzeko aldi bakoitzean aplikatzekoak diren lege xedapenekin eta doktrina xedapenekin bat etorriz.

22. artikulua. Probaldia.

Kontratu finkorik gabeko langilea finko bihurtuz gero, probaldirako lan egindako egunak baliozkoak izanen dira zenbaketarako.

Langile sartu berriek probaldia eginen dute: sei hilabetekoa 1. lanbide taldearentzat, lau hilabetekoa 2. lanbide taldearentzat eta bi hilabetekoa gainerako lanbide taldeentzat.

Probaldi horiek aplikatzeko, kontratuaren iraupena bederatzi hilabetetik gorakoa izan behar da. Hori baino laburragoak diren kontratuetan, probaldia kontratuaren iraupenaren heinean murriztuko da; nolanahi ere, artikulu honetan ondoz ondoko kontratazioetarako xedatzen dena aplikatuko da.

Kontratuaren iraupena gorabehera, probaldia inolaz ere ez da izanen 15 egunetik beherakoa, arestian aipatu diren lanbide taldeetako lanpostuetan.

Probaldian, bai kontratatutako pertsonak, bai entitatearen titularrak noiznahi eteten ahalko dute lan kontratua, hau da, aurreabisua emateko epealdirik gabe, eta langileek ez dute izanen kalte-ordaina jasotzeko eskubiderik.

Probaldia agorturik, langilea entitateko plantillan sartuko da eta probaldia kontuan hartuko zaio ondorio guztietarako.

Aldi baterako lan kontratua duen pertsona bati ondoz ondoko zenbait kontratu egiten bazaizkio, ez zaio eskatuko probaldirik, baldin eta aurreko aldi baterako kontratuaren edo kontratuen iraupena dena delako lanbide kategoriako edo lanbide taldeko probaldia baino luzeagoa bada.

Lanpostu batean aritzeko probaldia egin ondoren langileek ez dute beste probaldirik egin beharko lanpostu bererako.

23. artikulua. Desgaitasuna duten pertsonentzat gordetako plazak.

Hitzarmen hau argitaratzen denetik aurrera egiten diren kontratazioetan entitateak lanpostu batzuk gordeko ditu desgaitasuna duten pertsonentzat: gutxienez, unean-uneko indarreko legerian ezartzen den portzentajea, arautegi horretan ezartzen denarekin bat etorriz eta bertan eskatzen diren baldintzak aplikatuz. Langileen legezko ordezkarien txostena jaso ondoren entitate bakoitzaren zuzendaritzak zehaztuko du zer lanpostu gordetzen diren desgaitasuna duten pertsonentzat, desgaitasun graduen ezaugarriak eta lanpostuetan aritzeko egin beharreko egokitzapenak kontuan hartuz.

24. artikulua. Lanpostu hutsak eta lanpostu sortu berriak.

Kontratazio berri orok, mugagabea bada, erakundeko lan kontratuko langileen maila igotzea bultzatuko du.

Hitzarmen hau aplikatzen zaien entitate guztiek nahitaez bete beharreko barne-aplikazioko araudi bat eduki behar dute, entitatea behartu behar duena, gutxienez, entitateko langileentzako deialdiak egitera, lanpostu hutsak eta lanpostu berriak betetzeko. Lehen aipatutako araua langileen legezko ordezkaritzaren parte hartzearekin egin beharko da, eta gutxienez hauek jasoko ditu:

–Hitzarmenaren 14. artikuluaren arabera, genero, arraza, sexu, sexu-hautua, erlijio, etnia, aukera politiko edo sindikal edo adinagatiko diskriminazioa saihesten duten mekanismoak.

Horretarako, lanpostu bakoitzean sartzeko baldintzak ezarriko dira, eta lanpostu horietan aldaketak egitea, hautagai izan daitezkeenei mesede egiteko edo diskriminatzeko asmoarekin, saihestuko da. Baldintza horiek entitateko Zuzendaritzak zehaztuko ditu, baina, barne-aplikazioko arauan bertan aipatuko dira lanpostuak betetzeko kontuan hartuko diren irizpideak.

Lanpostuen zerrendaren eranskinean jasoko diren betekizunen artean, honako hauek sartuko dira:

1. Lanpostuaren definizioa (funtzioak, eskatzen den profila...).

2. Lanpostu hutsaren/lanpostu berriaren komunikazio prozesua (epea, komunikabidea...).

3. Aukeratzeko irizpideak.

4. Hautatzeko prozedura (hautagaitzak aurkezteko epeak, eskatutako dokumentazioa, ebazteko epea...).

5. Eranskina Konfiantzazko lanpostuak: protokoloak berariazko eranskin bat izanen du, konfiantzazko lanpostuak lortzeko bidea jasoko duena. Lanpostu horiek entitate bakoitzak zehaztuko ditu.

Mendetasuna duen senide batek beren kargura duten langileek eskubidea izanen dute eskatzeko beren etxetik edo eriaren etxetik hurbilago dagoen edo komunikazio hobea duen zentro batera aldatzeko, lanpostu hutsa eta bera ari den lanpostua berdinak badira.

Lanaldi partziala handitzeko orduan, lehentasuna izanen dute zentro edo zerbitzu bereko kategorian hutsik dauden lanpostuetan lanean ari diren pertsonek, baldin eta bateragarriak badira ordutegiaren aldetik, eta zenbait irizpideri jarraiki, besteak beste, antzinatasuna, eskatutako prestakuntza edota titulazioa, eta lanposturako egokitasuna. Helburua da indarrean dauden kontratuak hobetzea, kontratazio berriak egin aurretik. Nolanahi ere, horrek ez du ekartzen ahalko Gizarte Segurantzaren hobariei edo kontrataziorako dirulaguntzei uko egitea.

Entitate bakoitzak sistema bat ezarriko du behin-behineko langileak eta haien lan kontratuak erregistratzeko, ahalik eta egokiena entitatearen tamaina, beharrak, antolamendua eta beste ezaugarri batzuk kontuan hartuta. Datu horiek aintzat hartzen ahalko dira plantillak egonkortzean, honako irizpide hauek kontuan hartuz, besteak beste: esperientzia, eskatutako prestakuntza edota titulazioa eta lanposturako egokitasuna. Helburua da indarrean dauden kontratuak hobetzea kontratazio berriak egin aurretik.

II. KAPITULUA.–LANA UZTEA

25. artikulua. Lana borondatez uztea.

Langile batek bere borondatez utzi nahi badu enpresa, idatziz jakinarazi behar dio enpresari, gutxienez 30 egun lehenago 1. lanbide taldean, 20 egun 2. lanbide taldean, eta hamabost egun gainerako taldeetako langileen kasuan. Aurreabisua epe horren barruan eman ezean, kopuru bat kenduko da likidaziotik baldintza hori betetzen ez den egun bakoitzeko.

Entitateak aurreabisua behar den aldiaren barruan eta behar den moduan jasotzen badu, lan harremanaren akaberako likidazio egokia ordaindu beharko dio langileari.

III. KAPITULUA–PRESTAKUNTZA

26. artikulua. Sustapena eta lanbide prestakuntza lantokian.

1. Langileen Estatutuaren 23. artikuluak 1. puntuan dioen bezala, langileek honako eskubide hauek dituzte:

a) Azterketak egiteko baimenak izateko eta lan txanda aukeratzeko lehentasuna –enpresak txandakako lana egiten badu–, titulu akademikoa edo profesionala eskuratzeko ikasketak erregulartasunez egiten baditu.

b) Laneko ohiko jardunaldia egokitzeko, lanbide heziketako ikastaroetara joateko bada.

c) Lanpostua gordez, lanbide prestakuntzarako edo hobekuntzarako behar dituen baimenak lortzeko.

d) Lanpostuan egiten diren aldaketetara moldatzeko behar den prestakuntza jasotzeko. Enpresa arduratuko da horretaz, prestakuntzara bideratutako kredituak lortzeko aukera bazter utzi gabe. Prestakuntzan ematen den denbora lanean egindako denboratzat hartuko da.

2. Negoziazio kolektiboan itundu beharko dira eskubide horiek gauzatzeko baldintzak; betiere, sexu bateko eta besteko langileen artean zuzeneko nahiz zeharkako bazterkeriarik ez dagoela bermatzen duten irizpide eta sistemak baliatu beharko dira.

3. Enpresan gutxienez urtebeteko antzinatasuna duten langileek enplegurako lanbide heziketa jasotzeko hogei orduko baimen ordainduaren eskubidea dute, eta ordu horiek gehienez ere bost urtez metatzen ahalko dira. Lanbide heziketak enpresaren jarduerarekin lotuta egon behar du. Eskubide hori baliatutzat joko da, nolanahi ere, langileak enplegurako lanbide prestakuntzarako ekintzak egin ahal baditu enpresaren ekimenez abian jarritako edo negoziazio kolektiboan adostutako prestakuntza plan baten esparruan.

Aurrekoa deusetan ukatu gabe, apartatu honetan adierazitako eskubidean ez da sartuko enpresak, beste lege batzuetan ezarritakoarekin bat, bere kargura eta nahitaez eman behar duen prestakuntza. Hitzarmen kolektiboan besterik ezarri ezean, langilearen eta entitatearen arteko adostasuna beharko da baimena nola baliatu behar den zehazteko.

Urteko prestakuntza plana egiten denean, langileek beren iradokizunak eta ekarpenak egiten ahalko dituzte, une bakoitzean egokiak eta beharrezkoak direla uste dutenak, hain zuzen ere.

Gainera, urteko prestakuntza plana egiten denean, kontuan izan behar da entitate desberdinetako berdintasun planetan ezartzen dena.

Ahaleginak eginen dira lan ordutegiak errespetatzeko, ahal den neurrian, eta goizeko ordutegian eginen dira, ahal bada. Ahal dela, urteko egutegietan sartuko da.

Erakundeak ordainduko ditu lantokitik prestakuntza saioetara joateko gastuak, betiere lantokiaren udalerritik kanpo egiten badira.

IV. KAPITULUA.–LANEKO SEGURTASUNA ETA OSASUNA

27. artikulua. Laneko segurtasuna eta osasuna.

Hitzarmen honen eraginpeko entitateek eta langileek bete behar dute Laneko Arriskuen Prebentziorako azaroaren 8ko 31/1995 Legean eta lege hori osatzen eta garatzen duten gainerako arauetan laneko segurtasunari eta osasunari buruz xedatzen dena.

Laneko Arriskuen Prebentziorako Legeak 14.5 artikuluan xedatzen duenarekin bat etorriz, laneko segurtasunerako eta osasunerako neurrien kostua ezin zaie inolaz ere ordainarazi langileei.

–Laneko arriskuen prebentziorako plana, arriskuen ebaluazioa eta prebentzio lanaren plangintza:

Laneko Arriskuen Prebentzioko Legearen 16. artikuluak xedatzen du laneko arriskuen prebentzioa enpresaren sistema orokorrean txertatuko dela, bai bere jarduera guztietan, bai enpresaren maila hierarkiko guztietan, laneko arriskuen prebentziorako plan bat ezarriz eta aplikatuz.

Laneko arriskuen prebentziorako planean alderdi hauek jasoko dira: enpresan arriskuen prebentzio lana egiteko antolaketaren egitura, erantzukizunak, zereginak, jarduerak, prozedurak eta behar diren baliabideak, erregelamenduz ezartzen den moduan.

Arriskuen prebentzioaren plana kudeatzeko eta aplikatzeko oinarrizko tresnak dira laneko arriskuen ebaluazioa eta prebentzioko jardueraren plangintza. Fasez fase egin daitezke, programa baten arabera.

Entitateak langileen segurtasun eta osasunerako arriskuen hasierako ebaluazio espezifikoa egin beharko du, kontuan harturik, oro har, jardueraren izaera, hango lanpostuen ezaugarriak eta horietan ari behar duten langileen ezaugarriak. Ebaluazio hori egin beharko da, orobat, lanerako ekipamenduak hautatzen direnean, erabili beharreko substantzien edo prestakin kimikoak hautatzen direnean eta lantokiak egokitzen direnean. Arrisku espezifikoen eta arriskugarritasun berezia duten jardueren aurrean babesteari buruzko araudian xedatuarekin bat garatu behar diren bestelako jarduketak ere kontuan hartuko dira hasierako ebaluazioan. Ebaluazio hori eguneratuko da lan baldintzak aldatzen direnean, eta, betiere, aztertu eta berrikusiko da, beharrezkoa bada, inoren osasuna kaltetu denean.

–Osasuna zaintzea:

Hitzarmen honen eraginpeko entitate guztiek sektoreko langile guztiei urtean azterketa mediko bat egiteko behar den zerbitzua kontratatu behar dute. Salbuespena: inguruabar bereziak direla eta, baliteke entitate jakin batzuetan azterketaren maiztasuna ez izatea urtean behingoa. Urteko azterketa medikoak borondatezkoak izanen dira langilearentzat. Aitzitik, hamabi hilabete baino gehiagoko baja medikoaren ondoren eskaintzen diren azterketa medikoak nahitaezkoak izanen dira langilearentzat, langileak berak eta langileen legezko ordezkaritzak idatziz uko egin ezean.

Entitateek lan egindako denbora modura zenbatuko dute langileek azterketak egiteko joan-etorrietan ematen duten denbora. Azterketa medikoa lan ordutegitik kanpo eginez gero, joan-etorrien gastuak (kilometrajea) entitateen kargura izanen dira.

–Prebentzio zerbitzuak:

Entitateek prebentzioko laguntza teknikoaz arduratuko den prebentzio zerbitzua izan behar dute, beraiena edo itundua. Zerbitzu horren eginkizun nagusia izanen da prebentzio plana diseinatzea eta aplikatzea; planean honako hauek jasoko dira gutxienez:

  • Langileen osasunari eta segurtasunari eragin diezaioketen arrisku faktoreak aztertzea.
  • Lehentasunak zehaztea prebentziozko neurri egokiak hartzerakoan, eta horien eraginkortasuna begiratzea.
  • Lanpostuetako arriskuen prebentzioari eta osasunaren babesari buruzko informazioa eta prestakuntza ematea langileei.
  • Lehen sorospenak ongi ematea eta larrialdi planak prestatzea.
  • Langileen osasuna begiratzea, lanaren ondoriozko arriskuei dagokienez.

Jarduera horiek prebentzio batzordean onetsi eta ebaluatuko dira edo, bestela, Lan Arriskuen Prebentzioei buruzko Legean ezartzen diren formulen bitartez.

LAP plan berrietan eta halako planen berrikuspenetan arrisku psikosozialei buruzko atala egon behar da. Horretarako, lehenbizi arriskuok ebaluatu behar dira.

Hitzarmen hau Nafarroako Aldizkari Ofizialean argitaratzen den egunetik sei hilabete igaro baino lehen batzorde paritarioak laneko jazarpenaren, sexu-jazarpenaren eta sexuagatiko jazarpenaren kontrako protokolo eredu bat prestatuko du eta sektoreko entitateei helaraziko die, egokitu eta ezar dezaten.

–Arrisku jakin batzuen aurrean bereziki minberak diren langileak babestea:

Enpresak modu espezifikoan bermatuko du langileen babesa, beren ezaugarri pertsonalengatik edo egoera biologiko ezagunagatik, lanak eragindako arriskuen aurrean bereziki sentiberak badira, barne direla ezgaitasun fisiko, psikiko edo sentsorialeko egoera administrazioak onartuta dutenak. Xede horretarako, inguruabar horiek aintzat hartu beharko ditu enpresaburuak arriskuak ebaluatzean, eta ebaluazio horien arabera prebentziozko neurri eta babeserako neurri egokiak hartuko ditu.

Langileak ez dira lanean ariko beren ezaugarri pertsonalen, egoera biologikoaren edo desgaitasun fisiko, psikiko edo sentsorial onartuaren ondorioz beren buruari zein gainerako langileei edo entitatearekin lotutako beste pertsona batzuei kalte eragiten ahal dieten edo arriskuan jartzen ahal dituzten lanpostuetan.

–Amatasunaren babesa. Ugalkortasuna, haurdunaldia eta edoskitzea:

Langileen ugaltze-funtzioan eragina izaten ahal duten arrisku faktoreak kontuan hartu behar ditu enpresak bere ebaluazioetan, bereziki, agente fisiko, kimiko eta biologikoekiko esposizioan lan egiten denean, ugalketari, ugalkortasunari nahiz ondorengoen garapenari dagokienez izan ditzakeen ondorio mutagenikoak edo toxikoak direla eta, prebentzio neurri egokiak hartu ahal izateko.

Haurdun daudela jakinarazten duten unean haurdun dauden pertsonei prebentzio zerbitzuak deituko die, haien egoera fisikoa ebaluatzeko eta behar diren egokitzapenak egiteko haien lanpostuan, barne dela, hala badagokio, haurdunaldiko lan arriskuagatiko prestazioa ematea ere.

Haurdun dauden langileek eskubidea izanen dute gaueko txandan lanik ez egiteko eta egunean 8 ordutik gorako lanaldirik ez egiteko, hala eskatzen badute.

Ebaluazioak erakusten badu emakume horien segurtasun eta osasunerako arriskua dagoela edo haurdunaldia edo edoskitzea kaltetzen ahal dituztela, entitateak behar diren neurriak hartuko ditu eta, beraz, emakumearen lan baldintzak edo lan denbora egokituko ditu, langilea arrisku horren eraginpean egon ez dadin. Gaueko lanik edo txandakako lanik ez egitea izanen da neurri horietako bat, behar izanez gero.

Sektore honetan emakumeak nagusi direnez gero, entitateek haurdun geratzen diren langileak babestu behar dituzte eta haien osasuna ziurtatzeko behar diren prebentzio neurriak ezarri behar dituzte.

Haurdun dagoen pertsonaren lanpostuaren arriskuen ebaluazioa haurdunaldia jakinarazi ondoren berraztertuko da. Gizarte Segurantzako Institutu Nazionalak argitaratutako "Laneko arriskuak haurdunaldian baloratzeko laguntza-gida" dokumentuan oinarrituko da ebaluazioa, gida horretan berean oinarritzen baitira Gizarte Segurantzaren Mutua Laguntzaileak, arriskua, prestazioa ematearen egokitasuna eta epeak baloratzeko.

IV. TITULUA.–LANALDIA ETA ORDAINSARIEN EGITURA

I. KAPITULUA.–LANALDIA ETA LAN EGUTEGIA

28. artikulua. Lanaldia eta lan egutegia.

–2025rako gehieneko lanaldia benetan lan egindako 1620 ordukoa izanen da.

Hitzarmen honetan ezartzen direnak baino lanaldi murritzagoa duten entitateek bete beharko dute, lanaldiaren egokitzapena dela eta, bigarren xedapen iragankorrean ezartzen dena.

Eguneko lanaldi jarraituaren iraupena sei ordutik gorakoa izanez gero, gutxienez hamabost minutuko atsedenaldi bat ezarriko da.

Lanaldia jarraitua edo etena izan daiteke, baina etena baldin bada, etenaldi bat bakarra egon daiteke. Salbuespenez, eta zerbitzu motak bigarren eten bat egitea eskatzen badu, enpresak langileen legezko ordezkariekin adosten ahalko du bigarren etenaldia. Baldin eta langileen legezko ordezkaritzarik ez badago edo ordezkariak enpresarekin ados jartzen ez badira, batzorde paritarioari eskatuko zaio bigarren etena egiteko premia eta dagozkion baldintzak aztertzeko. Batzordeak egutegiko 15 eguneko epean onartu edo baztertuko du.

Urtero, abenduaren 22rako, hitzarmen honen aplikazio eremuko entitate guztiek prest izan behar dute, behinik behin, hurrengo urteko lan egutegi orokorra eta, egutegi orokor horrekin artikulatuta, unitate funtzional, programa edo proiektu bakoitzeko egutegi berezi bana ere bai, programen araberako berariazko egutegirik behar ez den kasuetan izan ezik. Egutegi orokorraren eta egutegi berezien berri eman aurretik, jakinaren gainean jarriko dira legeriaren arabera horretarako eskubidea duten eragile sozialak.

Jarduera baten ezaugarri bereziak direla eta lan egutegi aldaezina aplikatzerik ez badago, egutegia alderdien artean adostu beharko da eta gero LLOri jakinarazi beharko zaio. Aurreko komunikazio betebeharretik kanpo uzten dira zaintza edo itxarote araubidean dauden langileak; horiei 37. artikuluan xedatzen dena aplikatuko zaie.

Zaintza edo itxarote araubidean dauden langileen egutegia astero ezarriko da. Nolanahi ere, urtero, oporren egutegiaren berri eman behar zaie otsailaren azken egunerako.

Sartzeko eta irteteko ordutegien malgutasuneko banakako akordioak lortzen ahalko dira, familia eta lana bateragarri egitea errazteko, izaerak eta ordutegi/egutegiak ahalbidetzen duten zentro eta lanpostuetan, hala nola administrazioko lanpostuetan, zerbitzu orokorretan, zerbitzu osagarrietan eta abarretan, hau da, pertsonen arteko txanden kadentzia edo mendekotasunik ez duten lanpostuetan. Akordio horiek erakunde bakoitzeko langileen legezko ordezkaritzari jakinaraziko zaizkio.

Laneko denboratzat hartuko dira pertsona erabiltzaileekin zuzenean egiten diren orduak eta agindutako jarduera edo eginkizuna aurrera eramateko egin beharreko guztiak (koordinazioa, txostenak, joan-etorriak ohiko eguneko lansaioan eta abar). Nolanahi ere, orduen egozpena entitateak eginen du.

Ordaindutako lizentziak eta baimenak benetan lan egindako denbora gisa zenbatuko dira.

Langileen Estatutuaren 34.2 artikuluan ezartzen denaren ondorioetarako, hitzartzen da alderdiek ez dutela beren kabuz erabiliko artikulu horretan aipatzen den %10eko malgutasuna. Nolanahi ere, entitateen zuzendaritzek eta langileek legez bidezkoak diren akordioak sinatzen ahalko dituzte (LLOri jakinarazi beharko zaio, hitzartuz gero) eta hitzarmen hau sinatu aurretik jardun iraunkorreko egoitza-zentroetan edo egoitza-proiektuetan indarrean egon diren akordioek hala jarraituko dute.

Behar larri, premiazko eta ustekabekoengatik, nagusiek atzeratu ezin diren zereginak egitea aginduta, lanegun batean langileak bere lanaldi arruntari dagozkionak baino ordu gehiago egiten baditu, lanean lehenago sartu edo beranduago irten behar duelako lan efektiboko lanaldia luzatuz, eskubidea izanen du benetako lan denboraren ehuneko 110eko konpentsazioa jasotzeko.

Gaueko txandan, igandean eta/edo jaiegunean soberan egindako orduek benetako lan denboraren ehuneko 110eko konpentsazioa izanen dute, gaueko txandan, igandean eta/edo jaiegunean hartzen badira, edo ehuneko 150eko konpentsazioa, beste aldi batean hartzen badira. Astelehenetik ostiralera egunez lanean egiten diren gehiegizko orduak astelehenetik ostiralera arteko eguneko orduekin konpentsatuko dira.

Konpentsazioa atsedenerako denbora gisa emanen da eta zenbaketa hilean behin eginen da. Ordu horiek noiz hartu (soberako orduak egin ondoko 4 hiletan) langile bakoitzak adostu beharko du bere arduradunarekin.

24 orduko arreta duten egoitza zentroak kudeatzen dituzten entitateek, egutegiak ezartzerakoan, 15 minutuko gainjartze bat izanen dute kontuan txanda aldaketa bakoitzeko (egunean hiru aldiz gehienez), informazioa sartzen den txandari eskura jarri ahal izateko. Txanda aldaketa bakoitzeko profesional bati bakarrik (hezitzailea edo hezitzaile laguntzailea) aplikatuko zaio. Norberaren aferetarako denbora benetan lan egindako denboratzat hartuko da.

29. artikulua. Lanaldia kontrolatzea.

Lan denbora kontatzeko, langileak, hala eguneroko lanaldiaren hasieran nola bukaeran, lanpostuan egon behar du.

Langileen Estatutuaren 34.9 artikuluak ezartzen duenarekin bat etorriz, entitateek lan orduak kontrolatzeko eta erregistratzeko sistema ezarri beharko dute. Sistema horretan modu fidagarrian agertu behar da langile bakoitzaren lanaldia: noiz hasi den eta noiz akitu den. Nolanahi ere, ordutegi malgutasuna ezartzen ahal da.

Sistema horrek ezin ditu urratu langileen intimitaterako eskubidea, haien datu pertsonalak babestuta egoteko eskubidea eta indarreko arautegiaren arabera langileek dauzkaten eskubide digitalak.

Erregistroa lantokian egon beharko da beti, langileek, beren legezko ordezkariek edo Laneko eta Gizarte Segurantzako Ikuskatzailetzak aztertu nahi balute ere.

30. artikulua. Gaueko lana.

Gaueko hamarretatik (22:00) goizeko seiak arte (06:00) lan egiten den orduak gaueko lanalditzat joko dira. Halaber, gaueko lanaldia jai bezperan edo igandean hasten bada, jai egunekotzat joko da. Entitate bakoitzak bertako LLOrekin adosten ahalko du gaueko lanaren ordu-tartea.

Esku-hartze sozialaren arloko egitekoetan gauez (beti zein noizean behin) lan egiten duten pertsonek pertsona erabiltzaileei zuzeneko arreta emateko lanak eta horiekin lotutakoak baino ez dituzte eginen: ezin agindu izanen zaie egiteko beste lanik beren arlo funtzionalekoak eta lanbide taldekoak baino. Zerbitzua ematean pertsona erabiltzaileen zuzeneko arreta bermatu beharko da. Arreta hori nola eman alderdiek adosten ahalko dute. Arestian esandakoak ezin eragotziko du aparteko kasuetan beharrezkoak diren lan guztiak egitea.

Gaueko lanaren plusa hitzarmen honen 37. artikuluan arautzen da.

II. KAPITULUA.–OPORRAK

31. artikulua. Opor ordainduak.

Langile guztiek eskubidea izanen dute oporraldi bat gozatzeko hitzarmen hau indarrean dagoen urte bakoitzeko, lan egindako urte bakoitzeko, edo, bestela, lan egindako denborari dagokion zati proportzionala.

Langile bakoitzak urteko lanaldiko orduak bete behar ditu eta har ditzakeen opor egun guztiak hartu behar ditu. Oporraldiak behin betiko adostu ondoren, entitate bakoitzak egutegia erregularizatzen ahalko du, urteko lanaldiko orduak eta ezarritako opor egunak bateratzeko.

Urteko oporrak gutxienez 33 lanegunekoak edo 45 egun naturalekoak izanen dira, hitzarmenaren indarraldi osorako.

Entitate bakoitzean oporraldiak aplikatzeko akordioak negoziatzen ahalko dira, kudeaketaren beharren arabera.

Kasu guztietan, opor egunetako hiru (3) egun solte gisa baliatzen ahalko dira. Halakoetan, eskaera hamabost egun lehenago egin beharko da, zerbitzuaren funtzionamendua bermatzeko, eta zazpi egun baino lehenago baiezkoa eman beharko da, antolamendu arrazoiren batengatik ezinezkoa denean izan ezik.

Oporraldia hilabetekoa ez bada, langileak esleituta duen lehenengo lanegunean hasiko da kontatzen, eta dagokion asteko atsedena akabatu ondoren.

Oporraldian langile batek aldi baterako ezintasuna badu eta ondorioz ezin baditu hartu opor egun horiek urte naturalaren barruan, aldi baterako ezintasuna akitzean hartzen ahalko ditu (ezintasuna ekarri duen kontingentzia edozein dela ere), betiere oporren urtearen akaberatik ez badira pasatu hemezortzi hilabete baino gehiago.

Oporrak ezin dira diruz konpentsatu.

Oporraldia osorik edo partez baliatzen den hilabeteari dagokion soldatan oporraldirik gabeko hilabete baten soldata kontzeptu berdinak sartuko dira, jaiegun bereziei dagokien plusa izan ezik.

Ordezko modura kontratatzen diren pertsonek bi aukera izanen dituzte kontratua akitzen zaienean: sortutako opor egunak hartu edo horien finikitoa kobratu.

III. KAPITULUA.–LANBIDE SAILKAPENA

32. artikulua. Lanbide sailkapena.

1. Xedapen orokorrak.

1.1. Lanbideen sailkapeneko sistema antolamendu juridiko bat da; horren bidez, teknikan eta antolaketan oinarrituta, langileak sartzen dira lan eginkizunak modu orokorrean ezartzen dituzten lanbide taldeetan.

1.2. Lanbide taldea da lanbide gaitasunak, titulazioak eta lanpostuko jardun orokorra batera biltzen dituen taldea. Lanbide talde batean zenbait titulazio eta gaitasun egon daitezke, bai eta zenbait jarduera ere: langileei ataza, eginkizun, lanbideko espezialitate eta ardura desberdinak esleitzen ahal zaizkie.

1.3. Lanbide sailkapeneko sistema hartuko da oinarritzat mugikortasun funtzionala eta horren kasu desberdinak nola gauzatuko diren arautzeko.

1.4. Lanbide sailkapeneko sistema hitzarmen honen eremu funtzionalaren barruan dagoen jardueran ari diren langile guztiei aplikatuko zaie. Hitzarmen honen eraginpeko entitateek eta erakundeek sei hilabeteko gehieneko epealdia izanen dute hitzarmena indarrean jartzen denetik langileak egokitzeko bertan ezartzen den lanbide sailkapenera.

2. Sailkapenaren oinarriak.

2.1. Lanbide sailkapeneko sistema ezartzeko Langileen Estatutuaren 22. artikuluan lanbide taldeak sortzeko adierazten diren irizpideak aplikatu dira, batez ere: lanbide gaitasunak, titulazioak eta lanpostuko jarduna.

2.2. Lanbideen sailkapenak ezartzen ditu jarduera arloak eta lanbide taldeak ditu, eta horretarako faktore objektibo orokorrak interpretatzen eta aplikatzen ditu, eta langileek egin beharreko lanak eta funtzioak hartzen ditu kontuan. Langileak, beren lanpostuaren arabera, kapitulu honetan ezarritako jarduera arloetako batean eta lanbide taldeetako batean sailkatuko dira: horrela zehaztuko da enpresaren antolaketaren barruan eta ordainsarien eskeman duten tokia.

Langile batek lanbide talde jakin bateko gaitasunen bat edo gaitasun guztiak izaten ahal ditu, baina horregatik ez da nahitaez talde horretan sailkatuko, aitzitik, bere lanpostuko eginkizunetarako gaitasun horien beharra izateak eta benetan erabiltzeak ekarriko du sailkapena. Nolanahi ere, langileari ezagutza horiek baliagarriak izanen zaizkio eta enpresak kontuan hartu beharko ditu, lanbidean mailaz igotzeko abian jartzen diren deialdietan.

Ezartzen den lanbide sailkapenak ez du behartzen hemen jasotzen diren lanbide talde eta jarduera arlo guztietako jarduera, ataza edota eginkizun guztiak baliatzera, enpresaren edo entitatearen ezaugarriak edo jardueraren bolumena direla-eta beharrezkoak ez badira.

2.3. Langileen lanbide sailkapenean eragina duten faktoreak (hau da, langileak zer lanbide taldetakoak diren adierazten dutenak) honako hauek dira, beti ere Langileen Estatutuaren 22. artikuluan ezarritzen diren irizpideen arabera:

2.3.1. Prestakuntza: faktore honen balorazioan kontuan hartuko dira lanpostuan aritzeko behar diren ezagutzak, esperientzia eta trebetasunak, enpresako eginkizun edo jarduera bati erreparatuta. Faktore honen barruan osagai hauek daude:

–Titulazioa: lanpostuko eginkizunak behar bezala betetzeko hasiera batean izan behar diren ezagutza teorikoen gutxieneko maila hartzen da kontuan.

–Espezializazioa: ezagutza espezializatuaren edo hasierako oinarrizko prestakuntzaren ezagutza osagarriaren eskakizuna hartzen da kontuan.

2.3.2. Ekimena: faktore hau baloratzeko kontuan hartuko da eginbehar edo funtzioak egitean arauak, prozedurak edo jarraibideak zenbateraino hartzen diren gidatzat.

2.3.3. Autonomia: faktore hau baloratzeko kontuan hartuko da langilearen mendekotasun hierarkikoaren gradua bere eginkizunetan ari denean, bai eta ezarritako helburuetara iristeko asmoarekin jarduera jakin batean aplikatutako erabakimenaren eta ekintzailetzaren maila ere.

2.3.4. Erantzukizuna: faktore hau baloratzeko, kontuan hartzen da eginkizunaren titularrak jarduteko duen autonomia, emaitzen gainean duen eragina eta giza baliabide, baliabide tekniko eta baliabide produktiboen kudeaketaren garrantzia.

2.3.5. Agintea: faktore hau baloratzeko kontuan hartuko da noraino gainbegiratu eta antolatu behar dituen eginkizunak eta zereginak, baita harremanetarako gaitasuna, lantaldearen ezaugarriak eta zenbat pertsona izanen dituen bere agindupean ere.

2.3.6. Konplexutasuna: faktore hau baloratzeko kontuan hartuko da lehen aipatutako faktore horietako zenbat biltzen diren eta noraino integratzen diren esleitu zaion eginkizunean nahiz lanpostuan.

3. Arlo funtzionalak.

Arlo funtzionalak edo jarduera arloak dira enpresaren antolaketa taldeak, kontuan izanik, batetik, arloko lanpostuen edukia eta, bestetik, arlo horiek definitzen dituzten oinarrizko eginkizunak. Horrez gainera, arlo funtzionalek zehazten dituzte lanbide karreren ibilbide naturalak eta lanbide taldeen arteko mugikortasun horizontala. Lanbide talde guztietan komunak diren arlo funtzionalak honako hauek dira:

3.1. Esku-hartze sozialaren eta zuzeneko arretaren arloa: jarduera arlo honen barruan daude esku-hartze sozialaren sektoreko entitateen berezko ezaugarriei eta helburu sozialari dagozkien jarduera profesional eta teknikoa aurrera eramateko misioa duten lanpostu guztiak, beti ere hitzarmen honen eremu funtzionalaren barruan.

3.2. Plangintza eta kudeaketa arloa: jarduera arlo honen barruan daude eginkizun nagusitzat plangintza, enpresaren barruko kontrola, zeharkako administrazio zerbitzuak edo informazioaren eta dokumentazioaren kudeaketa orokor teknikoa edota administratiboa dituzten lanpostuak, haien helburua baita sostengua ematea esku-hartze sozialeko eta zuzeneko laguntzako arloari, antolamendua eta funtzionamendua egokiak izan daitezen. Haren eginkizunetakoak dira idazkaritza kudeaketa ekonomikoa, administratiboa eta giza baliabideena, eta merkataritza lanak ere bai, batzuetan.

3.3. Zerbitzu eta jarduera osagarri ez-teknikoen arloa: honen barruan jarduera nagusiarekin lotutako eginkizun osagarriak dituzten lanpostuak daude.

4. Lanbide taldeak.

Jarraian agertuko diren lanbide taldeen prestazio orokorra zehazteko adibide gisa azaltzen diren eginkizun edo lanak aipatu baizik ez dira egiten; ez dira guztiak. Erreferentzia modura hartu behar dira beste izen batzuekin ageri diren antzeko lanpostuak esleitzeko, bai eta sektorearen beraren bilakaeraren ondorioz agertzen ahal diren beste lanpostu batzuk esleitzeko ere.

Enpresan edo entitatean langile batek lanbide talde baterako zehaztutako lan espezifikoak egiten dituenetik aurrera ordaina jaso beharko du, eta zenbatekoa hitzarmen honetan biltzen den ordainsari bera izan behar da gutxienez.

Langile bat lanbide talde zehatz bati atxiki behar zaionean eta hari dagokion egitekoa edo jarduera hitzarmen kolektibo honetan agertzen ez bada, batzorde mistora igorriko da.

Hona hemen lanbide taldeak:

–1. Lanbide taldea.

Irizpide orokorrak: eginkizun orokorren ardatza enpresaren jarduera arloak koordinatzeko, plangintza egiteko, antolatzeko, zuzentzeko eta kontrolatzeko goi-mailako lanak egitea da.

Talde honetan ari diren pertsonen eginkizunen helburua da giza baliabideak eta baliabide materialak efikaziaz erabiltzeko enpresa eta antolaketa mailako gidalerroak ezartzea, bere gain hartuta planifikatutako helburuak erdiesteko ardura. Halaber, talde honetako langileek enpresaren jardunaren funtsezko puntuei buruzko erabakiak hartzen dituzte eta zuzendaritza lanak egiten dituzte enpresaren jardun arloetan eta departamentuetan.

Talde honetako langileak enpresak izendatzen ditu bere kabuz, guztien lanbide gaitasunak eta gaitasun pertsonalak kontuan hartuz.

Orientazio gisara, honako lanpostu hauek aipatzen ahal ditugu:

  • Arloko zuzendaria, programako zuzendaria eta zerbitzuko zuzendaria.

–2. lanbide taldea.

Irizpide orokorrak: talde honetan sartzen dira lanpostu mota desberdinak, haien eginkizunak eta sailkapenean eragina duten faktoreak batera aintzat hartuta.

Eginkizun orokorraren ardatza da autonomia eta lanbidearen ezagutza maila handiak dituzten postuetan lan egitea, ardura handiekin entitateko atal edo departamentu baten edo gehiagoren gainean. Langileok gidalerro oso zabalak izaten dituzte eta egiten duten lanaren berri eman behar izaten diete entitateko jarduera arloetako edo departamentuetako zuzendariei.

Jarduera konplexuak eta denetarikoak egiten dituzte, helburuak zehaztuta dituztela eta eskakizun oso handiarekin, autonomia eta ardura aldetik.

Halaber, lan konplexuak egiten dira; batzuetan aginte ardurak izaten dira eta beste batzuetan ez, baina guztietan ere maila handiko ezagutza intelektualak edo jendearekiko harreman estuak behar dira. Laguntzaileen koordinazio lanak egiten ahal dituzte, beren eremu funtzionalean edo jardun eremuan.

Prestakuntza: unibertsitate titulua. LHko goi-mailako titulua eta horrez gainera lan esperientzia luzea edota prestakuntza espezializatua. Bestela, lanean eskuratutako ezagutzak eta horrez gainera prestakuntza berezia tituluaren baliokidea den lanpostuari buruz.

Nolanahi ere, lanbidean aritzeko behar den titulua izan beharko dute legezko arautegian ezartzen den lanpostuetan ari diren langileek.

Talde honetako lanbide jarduerak ondoren azalduko direnen antzekoak dira eta lanpostuari dagokion «lanpostuaren osagarria» sor dezakete ordainsarian.

  • Oro har, eta orientazio modura, talde honen barruan daude beren lan eremuko arazoak konpontzeko konplexutasun handiko lanak egin behar dituzten teknikari kualifikatuak. Beren erreferentzia esparrua egiten duten jarduerari buruzko lege arautegiak eta arautegi deontologikoak zehazten dute, bai eta entitatearen politikek ere. Ataza hauetan aritzeko ezagutza intelektual handiak behar dira eta jarduera konplexuak egin behar dira; hala ere, lanpostuak ez dauka zertan ekarri aginterik berekin.
  • Garrantzi handiko proiektu, zentro, programa eta zerbitzu berezien arduradunak izan daitezke; lanpostu horietan erabakimen, autonomia eta ardura handiak behar dira. Langile hauek aldagai teknikoak, ekonomikoak eta antolakuntzakoak izan behar dituzte kontuan, eta beren lanak eragin handia dauka entitatearen emaitzetan.
  • Halaber, laguntzaileak koordinatzen ahal dituzte beren eremu funtzionalean.

Orientazio gisara, lanpostu hauek aipatzen ahal ditugu:

  • taldeko koordinatzailea eta arduraduna; erizaintza; gizarte hezitzailea; gizarteratze teknikaria; animazio soziokulturaleko teknikaria; haur hezkuntzako teknikaria; orientazioko teknikaria; psikologoa; psikologo terapeuta; gizarte langilea; irakaslea; tailerreko irakaslea; ekonomialaria; administrazioko eta finantzetako teknikaria; gizarte graduatua; giza baliabideen teknikaria; komunikazioetako teknikaria; informatikako teknikaria; kalitateko teknikaria. Entitate bakoitzak beste izen batzuk erabil ditzake, baina lanpostuek bat etorri behar dute arestian azaldu den eginkizunen definizioarekin.

–3. lanbide taldea.

Irizpide orokorrak: talde honetako lanpostuetan aritzeko ezinbestekoa da oinarri teorikoak eta praktikoak ulertzea eta ezagutzea. Hartzen diren erabakiak eta langileen autonomia maila aurretik zehaztutako sistemen, jarraibideen, prozeduren eta lan metodoen aplikazioarekin lotuta daude.

Eginkizunak: maila ertaineko konplexutasuna duten lanak egitea ongi zehaztutako lanbide jarduera operatibo batzuen barruan; langile hauek gauza izan behar dira batez ere gauzatze lanetarako behar diren tresnak eta teknikak erabiltzeko, eta beren kabuz ari daitezke, teknika horien esparruaren barruan. Jarduerak lanbide arlo espezializatukoak dira.

Prestakuntza: goi-mailako edo maila ertaineko Lanbide Heziketa edo horren baliokidea den prestakuntza akademikoa, eta horren osagarri, lanpostuko esperientziari esker eskuratutako ezagutzak eta lanpostuan aritzeko behar den prestakuntza berezia.

Talde honetako lanbide jarduerak ondoren orientazio gisara azalduko direnen antzekoak dira eta bidezko «lanpostuaren osagarria» sor dezakete:

hezkuntzako laguntzailea; programa edo tailerreko begiralea; etxez etxeko laguntza zerbitzuko laguntzailea; laguntzaile soziosanitarioa; erizaintzako laguntzailea; etxez etxeko familia langilea; administrari laguntzailea; zaintza eta segurtasuneko langilea; mantentze lanetako langile tituluduna. Entitate bakoitzak beste izen batzuk erabil ditzake, baina lanpostuak bat etorri behar dira arestian azaltzen den eginkizunen definizioarekin.

–4. lanbide taldea.

Irizpide orokorrak: autonomia eta konplexutasuna egiten diren jardueren arau esparruaren edo prozedura esparruaren araberakoak dira. Langileek ardura operatiboak izaten ahal dituzte informazioaren eguneratzean, tratamenduan, eskuragarritasunean eta kontrolean eta dokumentazioan, batez ere administrazioko laguntza lanpostuetan.

Laguntza emateko lanpostuak ere sartzen dira, errutina eta jarraibide zehatz sinple eta errepikakorrak dituztenak. Haien erantzukizuna zuzeneko ikuskapen sistematiko batek mugatzen du.

Zereginak: jarraibide zehatzen arabera egin arren, ezagutza profesional egokiak eta gaitasun praktikoak eskatzen dituzten zereginak. Ezagutzak, trebetasuna eta menperatzea behar dituzte haien espezialitatean, jarduera funtzionaleko arlo baten barruan. Beste lanpostu edo proiektu batzuei laguntzeko lanak egiten dituzte, ongi zehaztutako prozesu normalizatuen barruan.

Talde honetan lanpostu batzuetan lan metodo zehatzen arabera jarduten da, gainbegiratze maila handiarekin. Oinarrizko lanbide ezagutzak behar dira eta aldi laburra eman behar da lanpostura moldatzen.

Maila ertaineko prestakuntza akademikoa edota lanbide prestakuntza behar da, edo horren baliokidea, eta horrez gainera esperientzia edo lanpostuan aritzeko beharrezkoa den lanbide titulua.

Ezinbesteko oinarrizko prestakuntza DBH edo horren baliokidea den oinarrizko lanbide heziketa izanen da; horri maila ertaineko prestakuntza espezifikoa edo lanbide esperientzia gehitzen ahal zaizkio, osagarri gisa.

Talde honetako lanbide jarduerak ondoren azalduko direnen antzekoak dira eta dagokion «lanpostuaren osagarria» sor dezakete ordainsarian.

Orientazio gisa: sukaldeko laguntzailea; mantentze lanetako laguntzailea; garbiketako eta sukaldeko langilea; atezaina; mandataria; garbiketako langilea; biltegizaina eta banatzailea; telefonozaina, etab. Entitate bakoitzak beste izen batzuk erabil ditzake, baina lanpostuak bat etorri behar dira arestian azaldu den eginkizunen definizioarekin.

Bi alderdiek interesa adierazten dute administrazioek ekintza eta esku-hartze sozialaren sektoreko hitzarmen honen eremu funtzionalaren barruko zerbitzuak edota jarduera kontratatzeko ezartzen dituzten baldintzen agirietan begirune handiz jaso daitezen hitzarmen honetan ezarritako lanbide eta soldata sailkapena. Halaber, interesa adierazten dute deialdien baldintzetan zorrotz bete daitezen apirilaren 5eko 38/2023 Foru Dekretuan ezarritakoa, eta era berezian, lanbide talde eta soldata maila egokietara iristeko baldintzak, aurrera eraman beharreko eginkizunen arabera, eskatutako prestakuntza, eta helburu horretarako hitzarmen kolektibo honetan ezartzen diren gainerako irizpideen arabera.

Hitzarmen honetan ezartzen diren lan baldintzak eta soldatak ez dira aldatuko baldintzen agirietan ezartzen denagatik.

IV. KAPITULUA.–ORDAINSARIEN EGITURA

33. artikulua. Oinarrizko soldata.

Oinarrizko soldataren zenbatekoa hitzarmen honen II. eranskinean adierazitakoa da. Eranskin horretan jasotzen diren zenbateko guztiak gordinak eta urtekoak dira, besterik zehaztu ezean.

Ordainsari egituraren aldaketaren ondoren erosteko ahalmena mantendu nahian, baldin eta lehengo oinarrizko soldata + aurreko antzinatasun plusa + aurreko hitzarmeneko osagarriak edo lanpostuaren osagarriak baturaren emaitza hitzarmen honetako oinarrizko soldata berria baino gehiago bada, langileek eskubidea izanen dute ad personam osagarri gisara kontsolidatzeko bi zenbateko horien arteko diferentzia. Osagarri hori oinarrizko soldata bezala errebalorizatuko da. Berme honetatik kanpo geratzen dira ardura osagarriak (II. eranskinean zehazten da nola eguneratuko diren).

Nafarroako esku-hartze sozialeko lehen hitzarmenean ezarritako soldata erregularizazio berriaren ondorioz 2024ko abenduaren 31rako aitortutako "ad personam" osagarriak oinarrizko soldata bezala errebalorizatuko dira.

2025eko soldata taulak hitzarmen honen II. eranskinean daude jasota.

Hitzarmen kolektibo honen balizko aurreraeragin egoeran, hitzarmenaren azken xedapenetako bigarrenean xedatutakoari jarraituko zaio.

34. artikulua. Antzinatasun plusa.

2010eko urtarrilaren 1etik aurrera, eta bost hirurtekorako gehienez, data horretan kontratua duten langile guztiek II. eranskinean zehazten den diru kopurua jasotzen ahalko dute hirurteko bakoitzeko. 2021eko uztailaren 1etik aurrera egiten diren kontratu berrietan, hirurtekoak kontratazio egunetik aurrera zenbatuko dira. Hirurteko bakoitzaren zenbatekoa hura betetzen den hileko nominan ordainduko da.

35. artikulua. Erantzukizuneko osagarriak.

Esleitutako lanpostuko eginkizunetan ariko diren aldian kontsolidatuko ez den arduraren bat edo ardura funtzionaleko kargua duten langileek II. eranskinean ezartzen den zenbatekoa jasotzen ahalko dute.

Langile batek erantzukizuneko osagarri bat baino gehiago jasotzeko aukera badu, zenbatekorik handienekoa baizik ez du jasoko.

–Arloko zuzendaritzaren osagarria.

Osagarri hau entitatearen organo kudeatzaile gorenak ekintza edo esku-hartze sozialeko bi programa edo zerbitzuren edo gehiagoren zuzendaritzan aritzeko izendatzen dituen pertsonek jasoko dute.

–Programako edo zerbitzuko zuzendaritzaren osagarria.

Osagarri hau entitatearen organo kudeatzaile gorenak ekintza edo esku-hartze sozialeko programa edo zerbitzu baten plangintzan eta antolamenduan aritzeko izendatzen dituen pertsonek jasoko dute, baldin eta gutxienez 30 lanposturen baliokidea den langile taldea badute beren agindupean, modu egonkorrean, aldi batez.

–1. koordinazioko osagarria.

Osagarri hau entitatearen organo kudeatzaile gorenak ekintza edo esku-hartze sozialeko programa edo zerbitzu baten plangintzan eta antolamenduan aritzeko izendatzen dituen pertsonek jasoko dute, baldin eta beren agindupean gutxienez 18 lanposturen baliokidea den langile taldea badute, modu egonkorrean, aldi batez.

–2. koordinazioko osagarria.

Osagarri hau entitatearen organo kudeatzaile gorenak ekintza edo esku-hartze sozialeko programa edo zerbitzu baten plangintzan eta antolamenduan aritzeko izendatzen dituen pertsonek jasoko dute, baldin eta beren agindupean gutxienez 12 lanposturen baliokidea den langile taldea badute, modu egonkorrean, aldi batez.

–Erantzukizuneko osagarria.

Osagarri hau entitatearen organo kudeatzaile gorenak ekintza edo esku-hartze sozialeko programa edo zerbitzu baten plangintzan eta antolamenduan aritzeko izendatzen dituen pertsonek jasoko dute, baldin eta beren agindupean gutxienez 3 lanposturen baliokidea den langile taldea badute, modu egonkorrean, aldi batez.

36. artikulua. Aparteko pagak.

Hitzarmen honen aplikazio eremuan dauden langileek aparteko bi eskersari jasoko dituzte hilabetetik gorako aldizkako osagarri gisa. Eskersari bakoitzaren zenbatekoa honako hauen batura izanen da: hilabeteko oinarrizko soldata, antzinatasun plusa eta osagarriak. Eskersari hauek uztailean eta abenduan ordainduko dira. Aparteko bi ordainsariak sei hilean behin sortuko dira: lehenengoa urtarriletik ekainera, eta bigarrena uztailetik abendura.

Urtean zehar lana utzi edo lanean hasten diren langileei lehen aipatutako hiletik gorako mugaegunaren osagarriak ordainduko zaizkie; zenbatekoa lan egindako denboraren arabera hainbanatuko da.

Zuzendaritzak eta langileen ordezkaritzak adosten ahalko dute aparteko bi eskersariak hamabi hilekotan hainbanatzea.

37. artikulua. Gaueko lanaren plusa; txandakako lanaren plusa; larunbat, igande eta jaiegunetako plusa; jaiegun berezietako plusa; zaintza ez lokalizatuen edo prestasun plusa; lanpostuko beste osagarri batzuk.

Artikulu honetan arautzen diren plus guztiak langile bakoitzaren kontratuko lanaldiaren ehunekoaren proportzioan ordainduko dira. Plus mota bakoitzak hitzarmenaren indarraldiko urte bakoitzean izanen duen zenbatekoa II. eranskinean zehazten da.

Txandakako lanaren plusa. Txandaka ari diren langileak. Lana taldean antolatzeko modua txandakakoa dela ulertuko da baldin eta langileek lanpostu berak betetzen badituzte bata bestearen ondotik, erritmo jarraitu edo eten batean, eta horren ondorioz langileak ordu ezberdinetan eman behar baditu zerbitzuak, zenbait egunetako edo astetako epe baten barnean. Egiten duten jarduera dela-eta lana txandaka (igandeak eta jaiegunak barne) egiten den entitateek bi aukera izanen dituzte: astebetez ariko diren taldeak antolatu; langileak kontratatu astean behin edo gehiagotan taldeak osatzeko. Txandaka aritzen diren langileek plusa jasotzen ahalko dute hala jarduteagatik. Txandakako laneko plusa jasoko dute ohiko lau txandetatik (goizez/arratsaldez/gauez/asteburua) hirutan lan egiten dutenek, baldin eta hiruretan txandaka aritzen badira. Asteburuko txandatzat hartuko da larunbat-igandeetan 14 ordu baino gehiago egitea lanean. Halaber, plus hau jasoko dute egoitza zentroetan txanda/ordutegi irregularretan aritzen diren langileek ere, hau da, txanda eta egunaren arabera ordutegi desberdinekin aritzen direnek, baldin eta horren ondorioz txandetako bat asteburuan bada eta lanaldiaren irregulartasunaren eraginez asteko atseden eguna irregularra bada, hots, asteko egun desberdinetan. Hemen arautzen ez diren kasuak eta adostasunik ez dagoen kasuak batzorde paritarioan aztertuko dira.

Txandakako lanaren plusa jasoz gero, ezin da jaso gaueko lanaren plusa, ez zaintza eta itxarote plusa.

Gaueko lanaren plusa. Gauez ari diren langileak. Hitzarmen honetan xedatzen denaren ondorioetarako, gaueko lana da gaueko hamarretatik goizeko seiak artekoa. Gaueko lanera jo ohi duten entitateek horren berri eman beharko diote laneko agintaritzari. Gauez lan egiten dutenen lanaldia ezin da izan batez beste zortzi ordutik gorakoa egunean, hamabost eguneko aldia erreferentzia modura hartuta. Langile hauek ezin dute aparteko ordurik egin.

Aurreko paragrafoan xedatzen dena aplikatzeko, eguneko lanaldiko hiru ordu gutxienez gauez egiten dutenak gaueko langiletzat hartuko dira, bai eta urteko lanaldiaren heren batean gutxienez gauez ariko direla aurreikusten den langileak ere. Gauez aritzen diren langileek gaueko lanaren plusa jaso dezakete.

Gaueko lanaren plusa jasoz gero, ezin da jaso txandakako lanaren plusa.

Gaueko lanaren osagarria. Gaueko langileak izan ez eta gaueko 10etatik goizeko 6ak arte lan egiten dutenak. Gaueko lantzat hartuko da gaueko ordutegian aritzeko berariaz kontratatu ez diren langileek, Langileen Estatuaren definizioaren arabera gaueko langileak ez direnek, gaueko 10etatik goizeko 6ak bitartean lanean egiten dituzten orduak. Gaueko lana bertan egon beharreko denboraren ehuneko 125 gisa zenbatuko da. Alde hori soldatan ordain daiteke edo ordutan meta daiteke, egun oso gisa hartzeko, baita jaiegunekin eta/edo opor egunekin batera ere, enpresarekin adostuz gero.

Gaueko lanaren osagarria jasoz gero, ezin da jaso txandakako lanaren plusa, txandetako bat gauekoa izanez gero.

Larunbat, igande eta jaiegunetako plusa. Larunbat, igande eta jaiegunetan aritzen diren langileak. Larunbat, igande eta jaiegunetako plusa jasoko da benetan lan egiten den larunbat, igande eta jaiegunengatik. Kobratzen diren baimenak benetan lan egindakotzat joko dira.

Plus hau jasotzen duenak ezin du jaso txandakako lanaren plusa, ez eta gaueko lanaren plusa ere.

Jaiegun berezietako plusa. Jaiegun berezietan aritzen diren langileak. Jaiegun berezitzat joko dira honako hauek: abenduaren 24a, arratsaldeko 16:00etatik gaueko 24:00ak arte; abenduaren 25a, 00:00etatik gaueko 24:00ak arte; abenduaren 31, arratsaldeko 16:00etatik gaueko 24:00ak arte; urtarrilaren 1a, 00:00etatik gaueko 24:00ak arte. Plus hori bateragarria da larunbat, igande eta/edo jaiegunetako plusarekin.

Prestasun plusa: zaintza edo itxarotea: araubide honetan ariko diren pertsonak horrexetarako kontratatu behar dira eta idatziz jasoko da lan kontratuan.

Ahal dela, zerbitzuen egutegia eginen da eta aste baterako aurreikusitako lanaren berri hiru egun aurretik emanen da (ahal dela, ostiralean hurrengo astelehenerako).

Langile hauek prest egon behar dira enpresan egoteko 180 minutu igaro baino lehen.

Horregatik jasoko duten hileko plusa oinarrizko soldataren %12 izanen da (kategoriaren araberako soldata), zaintzan-itxaroten ematen duten denboraren arabera.

Langile batek jarraikako lanaldietan egin behar baditu txanda-egun osoak (eguneko edo gaueko lanaldi osoa), gutxienez 12 orduko atsedenaldia beharko du lan txanden artean. Atsedenaldi horretan ez zaio deitzen ahalko lanera.

Gainera, hilean gutxienez asteburu oso bat izanen dute atsedenerako (langileek berek hautatuta), ostiraleko arratsaldeko 16:00etatik asteleheneko goizeko 8:00ak arte. Urtean beste 6 asteburu oso izanen dituzte atsedenerako.

Benetan lanean egindako denboratzat hartuko da langileek etxetik lanposturako joan-etorrietan ematen duten denbora, eta konpentsazioa emanen zaie kilometroengatik edo joan-etorriek eragindako gastuengatik.

Gehieneko lanaldia 40 ordukoa izanen da asteko ziklo batean (7 egun jarraian). Ziklo batetik beste batera gutxienez egun eta erdiko atsedena hartu beharko da, egutegiari jarraikiz (36 ordu etenik gabe). Beraz, ziklo bakoitzean 5,5 lanegun egonen dira eta 1,5 atseden egun.

Plus hori batera ezina da larunbat, igande eta/edo jaiegunetako plusarekin.

Psikologo Terapeutaren plusa: psikologiako lizentziatura edo gradua duten langileek jasoko dute (esku-hartze sozialeko psikologiako eta psikologia juridiko edo auzitegiko psikologiako master ofiziala behar dute) edo osasun arloko gaikuntza baliokidea dutenek, baldin eta terapia eman behar badiete esku-hartze sozialeko programak edo zerbitzuak erabiltzen dituzten pertsonei.

Esku-hartze familiarraren plusa adingabeentzako egoitza zentroetan: esku hartze familiarreko teknikariaren eta/edo psikologoaren eginkizunak betetzeko ardura duten langileek jasoko dute; biak adingabeak zaintzeko egoitza zentroetan ematen dira. Plus horrek xurgatu eginen ditu hitzarmen hau indarrean sartzean entitateek esku-hartze familiarreko teknikariei eta/edo psikologoei ordaintzen dizkieten plus edo osagarri baliokideak, biak adingabeei arreta emateko egoitza zentroetan.

38. artikulua. Osagarria aldi baterako ezintasunaren aldian.

Aldi baterako ezintasuneko prozesuak soldata errealaren %100eraino osatuko dira bajaren 1. egunetik aurrera.

Osagarri hori jasotzeko eskubidea sortzeko ezinbestekoa da langileak aldi baterako ezintasunaren prestazio ekonomikoa jasotzeko eskubidea izatea, medikuaren baja agiriak eta berrespen agiriak legez ezarritako epealdien barruan aurkeztea eta lan harremana azkenduta ez egotea, eta eszedentzian ez egotea ere bai.

39. artikulua. Gastuen konpentsazioa.

Lanpostua dela-eta joan-etorriak autoz egin behar dituzten langileek 0,30 euro jasoko dituzte kilometro bakoitzeko, eta autobideko gastuak eta zenbait hiri eta udalerritako zaintzapeko aparkalekuen gastuak ere enpresak ordainduko ditu.

Langileek gastu horiek kobratzeko ezinbestekoa da entitateak agintzea joan-etorriak beren kabuz egiteko. Aldiz, entitateak agintzen badu joan-etorrietan garraio publikoa erabiltzeko, horren kostua ordainduko du, frogagiriak aurkeztuz gero. Salbuespena: joan-etorrien kostua 15 eurotik gorakoa bada, entitateak aldez aurretik emanen die langileei.

Zenbait langilek batera egiten badituzte joan-etorriak, kilometrajearen zenbatekoa ibilgailua jartzen duenari baizik ez zaio ordainduko.

Norberaren autoa ezin da erabili pertsona erabiltzaileak eramateko.

V. TITULUA.–LIZENTZIAK ETA ESZEDENTZIAK

I. KAPITULUA.–LIZENTZIAK

40. artikulua. Ordaindutako lizentziak.

1. Honako egoera hauetan, langileak baimena izanen du denbora batez lanera ez agertzeko, ordaindua izateko eskubidea galdu gabe, betiere aldez aurretik abisatu eta justifikatzen badu (larrialdiko kasuetan izan ezik):

a) Hamasei (16) egun natural ezkontzeagatik edo izatezko bikotea eratzeagatik. Izatezko bikotea eratzeak lizentzia hau hartzeko eskubidea sor dezan, ezinbestekoa da bikotea erregistro ofizialean inskribatu dela frogatzea. Ez dira bi modalitate horiek bikote berberarekin baliatzen ahalko. Bikotekide berarekin behin bakarrik hartzen ahal da lizentzia hau, bi modalitateetan. Ezkontzaren edo izatezko bikotearen erakuntzaren egunean lizentzia zenbatzen hasiko da. Salbuespena: egun hori ez bada laneguna langilearentzat, lizentzia hurrengo lanegunean hasiko da zenbatzen. Lizentzia hau erabiltzeko eskubidea sortu edo mantenduko bada, lan harremanak bere ondorio guztiak sortu behar ditu eta ezin da egon ez etenda ez oporraldian. Honelako lizentzia bat gozatzen hasi ondoren ez da eteten ahalko, eta ondoko egunak langileendako ez badira lanegun ere, ez da lizentzia atzeratzen ahalko.

b) Bost lanegun, istripu edo eritasun larria, ospitaleratu behar bada edo etxean atseden hartzea eskatzen duen ospitaleratzerik gabeko ebakuntza kirurgikoa baldin badu ezkontideak, izatezko bikotekideak edo odol edo ezkontza bidezko bigarren mailara arteko ahaideek (izatezko bikotekidearen odol bidezko ahaideak barne) edo langilearekin etxe berean bizi den eta haren zaintza behar duen beste edozein pertsonak, gertaera eragileak irauten duen bitartean.

c) Hiru (3) egun gehienez, ezkontidearen, izatezko bikotekidearen edo odol nahiz ezkontza bidezko bigarren mailarainoko senideen heriotzagatik. Bidaia bat egin behar bada Nafarroatik kanpora, lizentziari beste lanegun bat (1) gehituko zaio, edo bi (2) gehiago, egin beharreko bidaia lantokitik 180 km-tik gorako distantziakoa bada. Alderdiek adosten ahalko dute lizentziari egunak gehitzea, opor egunak hartuta, edo ordaindu gabeko baimenen artikuluan arautzen den gisan, langileak aurrez hala eskatuta. Entitate bateko zenbait langile ahaideak badira eta honelako lizentzia bat hartzeko eskubidea badute, langileek lizentziaren gozamena mailakatzen ahalko dute, lizentzia aldi berean hartu beharrik ez izateko. Gerora hartzeko sistema berri honen eraginez, langileak ez ditu hartzen ahalko gertaera eragilearen ondoren baimena berehala hartuta egokituko litzaizkiokeen lanegunak baino gehiago.

d) Lanegun bat (1) ohiko bizilekua aldatzeagatik, justifikatuta.

e) Nahitaezko eginbehar publiko eta pertsonal bat betetzeagatik, doi beharrezkoa den denbora. Hitzarmenaren ondorioetarako, honako hauek dira nahitaezko eginbehar publiko eta pertsonalak, besteak beste:

–Nortasun agiri nazionala, bizileku eta lan baimena, gida baimena, pasaportea eta ziurtagiriak, erakunde ofizialetako erregistroak eta abar egitea eta berritzea.

–Zitazio baten ondorioz auzitegira, polizia etxera, gobernuaren ordezkaritzara edo antzeko batera joatea.

–Ordezkaritzako kargu publikoaren eginkizunak. Goian aipatutako eginbeharra betetzeagatik langile batek ezin badu lan egin hiru (3) hileko aldiko lanorduen ehuneko hogei (%20) baino gehiagotan, entitateak eszedentziara pasatzen ahalko du langile hori (egoera hori hitzarmen honen eszedentziei buruzko artikuluetan arautzen da).

–Medikuaren kontsultara joateko edo lehen gradura arteko odol-ahaidetasunezko edo ezkontza-ahaidetasunezko senitarteko bati medikuaren kontsultara laguntzeko behar den ezinbesteko denbora (guztira hamar ordu urtean gehienez). Ezinbestekoa da kontsulta sistema publikoan edo horrekin ituna daukan zentro batean izatea (egiaztagiria aurkeztu behar da).

–TMS/103/2019 Aginduak, otsailaren 6koak, uztailaren 29ko 1148/2011 Errege Dekretuaren eranskina aldatzen duenak, arautzen dituen gaixotasun larrien kasuan, medikuaren kontsultara joateko edo lehen gradura arteko odol-ahaidetasunezko senitarteko bati laguntzeko behar den denbora doia.

–Hondamendiek (erakunde eskudun batek modu ofizialean onartutakoek) langilearen ohiko etxebizitza den ondasun higiezinean egiten dituzten kalteak konpontzea.

f) Langileak eskubidea izanen du lanetik alde egiteko ezinbesteko kasuetan, beharrezkoa denean familiakoekin edo bizikideekin lotutako premiazko arrazoiengatik, gaixotasuna edo istripua dela-eta ezinbestekoa baldin bada langilea berehala haren ondoan egotea.

Langileek eskubidea izanen dute apartatu honetan azaltzen diren arrazoiengatik lanean ari ez diren orduen ordaina jasotzeko, hain zuzen ere lau egun urtean guztira. Halakoetan, lanera ez joateko arrazoia frogatu beharko dute.

g) Bigarren mailara arteko odol edo ezkontza bidezko senideen ezkontzaren eguna.

h) Azterketa ofizialak egiteko behar den denbora, eskubide hori egiazki erabiltzen ahal dela bermatuz. Langileak gauez lan egiten badu, azterketaren bezperako lanalditik irteteko eskubidea izanen du, aldez aurretik jakinarazita eta justifikatuta, eta orduak berreskuratu beharko ditu.

i) Eginkizun sindikaletan edo langileen ordezkaritzako lanetan aritzeko, legerian eta hitzarmen honetan ezartzen denarekin bat etorriz.

j) Erditu aurreko azterketak egiteko eta erditzea prestatzeko tekniketan trebatzeko, eta adopzioaren, harreraren edo adoptatzeko egiten den zaintzaren kasuetan, informazio eta prestakuntza saioetara joateko eta egokitasun deklarazioaren aurreko txosten psikologiko eta sozialak egiteko behar den denbora doia, betiere laneko ordutegian egin behar badira.

2. Indarrean dagoen Langileen Estatutuaren 37.3 artikuluaren testuan jasotako gainerako eskubideak.

3. Emakume langileek eskubidea dute denbora batez lanera ez agertzeko, ordainsaria jasotzeko eskubidea galdu gabe, ernalketarako teknikak aplikatzeko; urtean 21 ordu gehienez.

4. Genero indarkeriaren biktimek eskubidea dute lanera ez joateko gizarte zerbitzuek erabakitzen duten ezinbesteko aldi batean, ordainsaria jasotzeko eskubidea galdu gabe, 1/2004 Lege Organikoak (abenduaren 28koa, genero indarkeriaren aurka oso-osoko babesa emateko neurriei buruzkoa) ezartzen duenarekin bat etorriz.

5. Egun osoko lizentzia eta baimen guztiak lanaldi guztirako dira, lanaldiaren iraupena edozein dela ere.

6. Gaueko lana egiten ari diren langileek lizentzia edo baimen bat, edozein dela ere, behar dutenean, aurreko edo ondoko gaua hautatzen ahalko dute. Lizentzia bi egunetan zehar egiten den lan txanda batean hartzen bada, lan txanda osoa hartuko da eta lizentzia egun bat bakarrik zenbatuko da.

7. Langileek guraso baimena hartzeko eskubidea izanen dute, Langileen Estatutuaren 48 bis) artikuluan ezarritako moduan, bat etorriz ekainaren 28ko 5/2023 Errege Lege Dekretuaren 127. artikuluko zazpigarren apartatuaren testuarekin.

8. Baimen ordainduak zenbatzeko arauak:

a) Baimena gertaera eragilearen egunean hasiko da zenbatzen, langilearentzat laneguna izanez gero.

b) Gertaera eragilearen eguna ez bada laneguna, hau da, jaieguna bada edo lan egutegiaren arabera lanik gabekoa bada, baimena hurrengo lanegunean hasiko da zenbatzen.

c) Jaiotzagatik, heriotzagatik, gaixotasunagatik, ospitaleratzeagatik eta bizilekua aldatzeagatik hartzen diren baimenak: iraunaldiko lanegunak baino ez dira zenbatuko. Era berean, gertaera eragileak irauten duen bitartean egunak solte ere hartzen ahalko dira. Odolkidetasunagatiko lehen mailako ahaideen heriotzaren kasuan, egun solteak hartzen ahalko dira, baimena zatituta, gertaera eragilearen ondorengo lehen hilabetean.

9. Lizentziei buruzko artikulu honetan ezkontidea aipatzen denean, ezartzen dena izatezko bikotekideei ere aplikatuko zaie, bikotea erregistro ofizialean inskribatuta egonez gero.

41. artikulua. Ordaindu gabeko baimenak.

Urtebetetik gorako antzinatasuna duten langile guztiek gehienez ere urtean behin hartzen ahalko dituzte ordaindu gabeko baimen edo OGB hauek. Baimen horietan, langileak ez du soldatako edo soldataz kanpoko ordainsaririk sortuko, ezta aparteko ordainsarien eta oporren zati proportzionalik ere.

1. Oro har, 35 egun naturaleko ordaindu gabeko baimena ezartzen da urte natural bakoitzeko. Egun horiek elkarren segidako zazpi egun naturaleko multiploetan hartuko dira, eta eskaera eta emakida honako arau hauen arabera eginen dira:

a) OGB horien eskaerak idatziz eginen dira beti, erakundeak jaso izanaren adierazpena eginda.

b) Lantoki bereko bi langilek edo gehiagok ez dute aldi berean hartzen ahalko OGB osoa edo partziala.

c) Urte bakoitzeko urtarrilaren 16tik uztailaren 15era bitartean hasten diren baimenak, lehentasunez, aurreko urteko urrian eskatuko dira. Uztailaren 16tik hurrengo urteko urtarrilaren 15era bitartean hasten diren baimenak, lehentasunez, uneko urteko apirilean eskatuko dira. Bi eskabideren edo gehiagoren daten artean erabateko kointzidentzia edo bat-etortze partziala egonez gero, bai entitatea bai langileen legezko ordezkaritza eskatzaileen arteko akordio bat lortzen saiatuko dira, eta akordio hori lortzen ez bada, erakundeak zozketa eginen du maiatzaren 10a eta azaroaren 10a baino lehen, hurrenez hurren, eta horren emaitzaren berri emanen die eskatzaileei eta langileen legezko ordezkaritzari.

d) Aurreko puntuan aipatzen diren lehentasunezko eskaera epeak iraganik, ordaindu gabeko baimenak eskatzen ahalko dira, baimena hasi baino gutxienez 20 egun natural lehenago, eta eskaeren hurrenkeraren arabera emanen dira.

e) Apartatu honetan arautzen den lizentzia eskatzeko arrazoia bada hondamendi humanitariotzat jo den gune batera langile espezializatu gisa joatea erakunde humanitario ezagun batek antolatuta, 20 egun aurretik abisua eman beharra ez da aplikatuko.

2. Horrez gain, urtean ordaindu gabeko beste 14 baimen egun hartzen ahalko dira gehienez, elkarren segidako zazpi egun naturaleko multiploetan, ezkontidearen, izatezko bikotekidearen edo bigarren mailarainoko odol ahaidetasun edo ezkontza ahaidetasunezko ahaideen ospitaleratze edo gaixotasun larrien kasuetarako, izatezko bikotearen odol ahaideen kasua barne, bai eta aurrekoez bestelako edozein pertsonarena ere, baldin eta langilearekin etxebizitza berean bizi bada eta hura benetan zaindu behar badu, hitzarmen honen 39.1.b) artikuluan aipatzen den ordaindutako lizentzia akabatzean gertaera eragileak irauten badu.

42. artikulua. Etenaldiak eta lanaldi murrizketa edoskitzeko.

Bederatzi (9) hilabetetik beherako semeari edo alabari esnea ematen dioten langileek eskubidea dute lanaldia ordubetez (1) eteteko. Denbora hori ordu erdiko bi (2) etenalditan zatitzen ahalko da. Lanaldia eten beharrean langileek hautatzen ahal dute ohiko lanaldia ordu erdi murriztea. Murrizketa lanaldiaren hasieran zein bukaeran aplikatzen ahalko da, langileak nahi duen moduan.

Etenaldi edo murrizketa hau ordaindua izanen da. Edoskitze artifizialaren kasuan, gurasoetako edozeinek eskatzen ahalko du; nolanahi ere, biak badira entitateko langileak, batek bakarrik eskatzen ahalko du.

Edoskitzeko baimenaren ordu guztiak batera erabiltzea hautatzen ahal dute langileek, amatasun etenaldia akitu ondoren. Horrelakoetan, edoskitzeko baimenaren iraunaldia egutegiko 21 egunekoa izanen da. Salbuespena: aurretik eszedentzia hartu bada, iraupena horren araberako proportziozkoa izanen da. Martxoaren 23ko 3/2007 Lege Organikoaren arabera, erditze anizkoitzaren kasuan edoskitzeko baimenaren iraunaldia modu proportzionalean luzatzen ahalko da haurren kopuruaren arabera. Nafarroako Foru Komunitatean aplikatzen den legeriari jarraikiz, ezkondutako bikoteen onura berak onartzen zaizkie elkarrekin bizi diren pertsonei.

43. artikulua. Amatasuna, aitatasuna, adopzioa eta harrera.

a) Kontratua etetea:

Jaiotzak (horren barruan sartzen dira erditzea eta hamabi hilabetetik beherako haurra zaintzea) ama biologikoaren lan kontratua etenen du hamasei (16) astez; erditzea anizkoitza bada, etenaldia hemezortzi (18) astekoa izaten ahalko da, eta beste aste bat gehitzen ahal zaio bigarrenetik aitzineko haur bakoitzeko. Etenaldi horretan, nahitaez hartu beharko dira erditzearen ondoko lehen sei asteak, jarraian; aste horietan lanaldi osoak hartu beharko dira, amaren osasuna babesteko.

Jaiotzak ama biologikoa ez den beste gurasoaren lan kontratua etenen du indarreko legerian ezartzen den aldian. Etenaldi horretan, nahitaez hartu beharko dira erditzearen ondoko lehen sei asteak, jarraian; aste horietan lanaldi osoak hartu beharko dira, Kode Zibilak 68. artikuluan ezartzen dituen zaintza betebeharrak betetzeko.

Erditze goiztiarretan edo edozein konturengatik jaioberriak ospitalean egon behar badu erditzearen ondoren, ama biologikoak edo beste gurasoak eskaturik, ospitalean alta hartzen denetik aurrera zenbatzen ahalko da etenaldia. Zenbaketa horretatik salbuesten dira erditu ondoko sei asteak, epe horretan nahitaez eten beharko baita ama biologikoaren kontratua.

Garaia baino lehen pisu gutxirekin jaiotzen diren haurren kasuan eta, baldintza klinikoren bat dela medio, jaioberriak ospitalean egon behar badu gutxienez zazpi egunez erditzearen ondoren, etenaldia ospitaleratze horrek dirauen bitartean luzatuko da, gehienez ere hamahiru aste gehiagora arte, erregelamenduz garatutako baldintzak betez.

Haurra hiltzen bada, etenaldia ez da murriztuko, salbu eta nahitaez hartu beharreko sei asteko atsedenaren ondoren, langileak lanpostura itzultzea eskatzen badu. Ama hiltzen bada, lanik egiten zuen edo ez kontuan hartu gabe, beste gurasoak etenaldi osoa edo geratzen den zatia hartzen ahalko du, erditzearen egunetik zenbatuta, eta erditu aurretik amak egunak hartu bazituen, horiek ez zaizkio deskontatuko.

Erditu eta hurrengo sei asteak igaro ondoren, guraso bakoitzak adingabea zaintzeko kontratua eteteko duen eskubidea hark nahi bezala banatuko da, astebeteko alditan, modu jarraituan edo etenak eginez, eta baliatzen ahalko da erditu ondorengo nahitaezko etenaldia bukatzen denetik semeak edo alabak hamabi hilabete bete arte. Hala ere, ama biologikoak kontratuaren etenaldia aurreratzen ahalko du, eta erditzea aurreikusten den eguna baino lau aste lehenagotik hasita baliatu. Astebeteko aldi bakoitza hartzeko edo, hala badagokio, aldi horiek metatzeko, gutxienez hamabost egun lehenago jakinarazi beharko zaio enpresari.

Eskubide hori indibiduala da langileentzat, eta ezin zaio eskubide hori beste gurasoari transferitu.

Erditu eta hurrengo sei asteak igaro ondoren, lan kontratuaren etenaldia lanaldi osoan edo lanaldi partzialean hartzen ahalko da, aldez aurretik enpresaren eta langilearen artean adosturik, erregelamenduan ezartzen denarekin bat.

Langileak, gutxienez hamabost egun lehenago, enpresari jakinaraziko dio eskubide honetaz baliatuko dela, kasua bada, hitzarmen kolektiboetan ezarritako baldintzetan.

Eskubide hori baliatzen duten bi gurasoek enpresa bererako lan egiten badute, enpresaren zuzendaritzak eskubidea biek batera baliatzeko aukera mugatzen ahal du, arrazoi funtsatuak eta objektiboak badaude, idatziz behar bezala arrazoituta.

Adopzioaren, adoptatzeko zaintzaren edo harreraren kasuan, Langileen Estatutuaren 45.1.d) artikuluarekin bat, etenaldiak hamasei aste iraunen du adoptatzaile, zaintzaile edo harrera-egile bakoitzarentzat. Sei aste, nahitaez, lanaldi osoz eta etenik gabe hartu beharko dira adopzioa eratzen duen epailearen ebazpenaren ondoren, edo adoptatzeko zaintza edo harrera baiesten duen erabaki administratiboaren ondoren.

Gainerako hamar asteak asteka hartzen ahalko dira, metatuta edo etenda, adopzioa eratzen duen epailearen ebazpenaren edo adoptatzeko zaintza edo harrera baiesten duen erabaki administratiboaren ondorengo hamabi hilabeteko epean. Ez da zilegi langile batek etenaldi bat baino gehiago hartzea adingabe beragatik. Astebeteko aldi bakoitza hartzeko edo, hala badagokio, aldi horiek metatzeko, gutxienez hamabost egun lehenago jakinarazi beharko zaio enpresari. Hamar aste horietako etenaldia lanaldi osoan edo lanaldi partzialean hartzen ahalko da, aldez aurretik ados jarrita enpresa eta kasua dagokion langilea, erregelamenduz erabakitzen diren baldintzen arabera.

Nazioarteko adopzioen kasuetan, gurasoek adopzioan hartuko duten haurraren jatorrizko herrialdera joan beharra dutenean, adopzioari buruzko ebazpena eman baino lau aste lehenagotik ere hasten ahalko da apartatu honetan kasu bakoitzerako aurreikusitako lizentzia.

Eskubide hori indibiduala da langileentzat, eta ezin zaio transferitu beste adoptatzaileari, adoptatu aurreko zaintzaileari edo harrera egiten duenari.

Langileak, gutxienez hamabost egun lehenago, enpresari jakinaraziko dio eskubide honetaz baliatuko dela, kasua bada, hitzarmen kolektiboetan ezarritako baldintzetan.

Eskubide hori baliatzen duten bi adoptatzaile, zaintzaile edo harrera-egileek enpresa bererako lan egiten badute, enpresak borondatezko hamar aste horiek aldi berean baliatzeko aukera mugatzen ahal du, arrazoi funtsatuak eta objektiboak badaude, idatziz behar bezala arrazoituta.

Jaiotzaren, adopzioaren, adoptatzeko zaintzaren edo harreraren kasuan semeak nahiz alabak desgaitasunen bat badu, kontratuaren etenaldiak bi aste gehiago iraunen du (bat guraso bakoitzarentzat). Jaiotze, adopzio, adoptatzeko zaintza edo harrera anizkoitzetan berdin jokatuko da seme nahiz alaba bakoitzeko, bigarrenetik hasita.

Haurdunaldian edo haurrari bularra emateko aldian arriskurik baldin badago, Laneko Arriskuen Prebentzioari buruzko azaroaren 8ko 31/1995 Legearen 26. artikuluan aurreikusitakoaren arabera, kontratu etete hori bukatuko da kontratua erditzeagatik eteten den egunean edo bularreko haurrak bederatzi hilabete betetzen dituenean, hurrenez hurren, edo, bi kasuetan, langilea aurreko lanpostura edo bere egoerarako egokia den batera itzultzeko ezintasuna desagertzen denean.

Langileen Estatutuaren 45.1.n) artikuluan aurreikusita dagoen kasuan, etenaldia sei hilabetekoa izanen da gehienez hasiera batean, eta luzatzen ahalko da, babes judizialeko jarduketetan horren beharra ikusten bada, biktimaren babes eskubidea eraginkorra izan dadin.

Kasu horretan epaileak luzatzen ahalko du etenaldia, hiru hilabeteko aldietan, gehienez ere hemezortzi hilabete igaro arte.

Kontratua etenda dagoen artean langileek izaten ahal dituzten lan baldintzen hobekuntza guztiak izanen dituzte etenaldian dauden langileek ere.

44. artikulua. Beren kabuz moldatu ezin diren adingabeak edo ahaideak zaintzea.

Legezko zaintza dela eta langileren batek bere kargu izanez gero hamabi (12) urte bitarteko haur bat edo lan ordaindurik egiten ez duen eta desgaitasun fisiko, psikiko nahiz zentzumenezkoren bat duen pertsona bat, eskubidea izanen du lanaldia murrizteko, zortziren bat gutxienez eta erdia gehienez ere, lansaria ere hein berean murriztuta. Adinagatik edo istripu nahiz eritasun baten ondorioz bere kasa bizitzeko gauza ez den eta lan ordaindurik egiten ez duen senitartekoa –odol bidezko edo ezkontza bidezko bigarren mailara artekoa– zaindu behar duen langileak ere eskubide bera izanen du. Baimen hau ezin dute hartu zentro bateko bi langilek pertsona bera zaintzeko. Lanaldiaren murrizketaren ordu zehaztapena langileak eginen du, eta hamabost (15) egun lehenago jakinarazi beharko dio entitatearen zuzendaritzari, berriz ere ohiko lanaldian hasteko unean.

45. artikulua. Lanaldia murriztea adinarengatik.

Berrogeita hamalau (54) urte bete ondorengo urteko urtarrilaren 1etik aurrera, langileek lanaldia murrizten ahalko dute adinarengatik: gutxienez ohiko lanaldiaren zortziren bat eta gehienez erdia; soldata ere hein berean murriztuko zaie. Lanaldi murrizketa hori urte natural osokoa izanen da, eta aldi horretan ez da ez atzera itzultzen, ez aldatzen ahalko ere. Baimena emateko, idatziz eskatu beharko da, abenduaren 1a baino lehen. Urte bakoitzeko abenduaren 1a baino lehen kontrakorik adierazten ez bada, emandako murrizketa egoerak bere horretan jarraituko du, beste urte natural batez. Baimenak eman, atzera itzuli eta aldatzeko eskaera guztien kasuan, jaso izanaren agiria eman behar du enpresak.

Ordutegiaren zehaztapena langileak aukeratuko du, baldin eta eguneko lanaldiaren barruan badago; bestela, entitatearekin ados jarri beharko da.

II. KAPITULUA.–ESZEDENTZIAK

46. artikulua. Nahitaezko eszedentzia.

Nahitaezko eszedentzia honako kasu hauetan emanen da:

a) Langilea lanera joatea galarazten duen ordezkaritza kargu publiko baterako izendatzea edo hautatzea.

b) Probintzia barneko edo esparru handiagoko sindikatu eginkizunetan aritzea (eszedentzia karguak irauten duen denborarako izanen da).

c) Legez ezartzen diren gainerako kasu guztiak.

Eszedentzia horiek indarrean egonen dira kargu edo eginkizun sindikal horiek bukatu arte, eta gero langileek lanpostura automatikoki itzultzeko eskubidea izanen dute.

Eszedentzia hori inolako lansaririk jasotzeko eskubiderik gabe eman dela ulertuko da, eta aldi hori antzinatasuna kalkulatzeko zenbatuko da. Idatziz eskatu behar da beti, hartu baino hogeita hamar (30) egun lehenago gutxienez, egiaztatzen ahal diren premia larriko arrazoiengatik izan ezik. Entitateak idatziz erantzun behar du bost (5) egun igaro baino lehen. Eszedentziak irauten duen artean ordezko langile batek beteko du lanpostu hutsa. Titularra lanera itzultzen denean ordezkoaren lana akituko da eta berarekiko lan harremana bukatutzat emanen da. Halaber, langileak lanbide prestakuntzako ikastaroak egitera joateko eskubidea izanen du.

Langileak bere lanpostura itzultzeko eskatu beharko du hilabete bateko (1) epean, arrazoia akitzen den egunetik zenbatzen hasita, eta entitateak eskaera jaso eta hogeita hamar (30) egun naturaleko epean itzuli beharko du lanera. Langilea Nafarroako Gobernuko kideen eta/edo azaroaren 4ko 19/1996 Foru Legean aipatzen diren Nafarroako Foru Komunitateko Administrazioko goi-kargudunen bateraezintasunen araubidearen eraginpean badago, eraginpekotasuna azkendutzat joko da bateraezintasun aldia akitzen denean.

47. artikulua. Ahaideak eta seme-alabak zaintzea.

1. Langileek gehienez lau (4) urteko eszedentzia hartzeko eskubidea izanen dute seme edo alaba bakoitza zaintzeko (bai biologikoa, bai adoptatua, bai harrerakoa; behin betiko harrera zein adopzioaren aurretiko harrera). Eszedentzia umea jaiotzen den egunetik edo epaileen edo administrazioaren erabakiaren egunetik hasiko da zenbatzen. Eszedentzia horrek irauten duen bitartean, langileak lanpostua gordetzeko eskubidea izanen du, eta ordezko batek beteko du, ordezkapena beharrezkoa izanez gero. Titularra lanera itzultzen denean edo lanpostua gorde beharreko aldia bukatzen denean, ordezkoaren lana ere bukatuko da eta berarekiko lan harremana finitutzat emanen da.

2. Hiru (3) urte arteko eszedentzia hartzeko eskubidea izanen dute, halaber, bigarren mailara arteko odol edo ezkontza bidezko senitarteko bat beren kargura duten langileek, baldin eta senitarteko hori, adinagatik, %50 edo gehiagoko desgaitasun aitortua duelako, nolabaiteko edo hortik gorako mendetasuna duelako, edo istripu nahiz eritasunagatik, bere kabuz moldatu ezin bada eta ordaindutako jarduerarik egiten ez badu. Azken eszedentzia horretako lehen bi urteetan langileak lanpostua beretzat gordetzeko eskubidea izanen du. Lanpostu erreserba hori eszedentzia osora zabaltzen ahalko da, langilea ofizialki guraso bakarreko familia dela aitortuta duen familia bateko kide den bitartean. Eszedentziako lehen bi urteetan hutsik gelditu den lanpostua bete behar izanez gero, ordezkoa ariko da bertan. Titularra lanera itzultzen denean edo lanpostua gorde beharreko aldia bukatzen denean, ordezkoaren lana ere bukatuko da eta berarekiko lan harremana finitutzat emanen da.

3. Eszedentzia horiek biak ordainsarirako eskubiderik gabe emanen dira, eta antzinatasunerako zenbatuko dira lanpostua gordetzeko eskubideak irauten duen bitartean.

4. Eszedentzia horien bien kasuan, subjektu eragile batek beste eszedentzia baterako eskubidea sortzen duenean, hori hastearekin batera bukatuko da ordura arteko lan etenaldia.

5. Eszedentzia horiek biak idatziz eskatu behar dira beti, hartu baino hogeita hamar (30) egun lehenago gutxienez, egiaztatzen ahal diren premia larriko arrazoiengatik izan ezik. Entitateak idatziz erantzun behar du bost (5) egun igaro baino lehen.

6. Halaber, langileak lanbide heziketako ikastaroak egitera joateko eskubidea izanen du.

48. artikulua. Borondatezko eszedentzia.

Entitatean etengabeko jardun aktiboan gutxienez urtebeteko (1) antzinatasuna duen langileak borondatezko eszedentzia eskatzen ahalko du, gutxienez hiru (3) hilabetekoa, eta gehienez bost (5) urtekoa. Eszedentzia bost (5) urteko gehieneko muga baino laburragoa bada, luzapen bakar baterako eskubidea izanen du langileak, ez bost urte baino luzeagoa; horretarako, eszedentzia akitu baino hogeita hamar (30) egun lehenago eskatu behar du luzapena. Langileak ez du beste eszedentzia bat eskatzen ahalko, aurreko eszedentzia edota haren luzapena akitu eta bi (2) urte igaro arte.

Eszedentzia hori inolako lansaririk jasotzeko eskubiderik gabe eman dela ulertuko da eta denbora hori ez da antzinatasuna kalkulatzeko kontatuko. Eszedentzia hori idatziz eskatu behar da beti, hasi baino hogeita hamar (30) egun lehenago gutxienez. Entitateak ere idatziz erantzun beharko du bost (5) egun igaro baino lehen.

Lan kontratu mugagabea duten pertsonek eskubidea izanen dute lehen urtean lanpostua gordetzeko; haien lanpostuetan ordezkoak ariko dira. Lehen urtea iraganik, langileak ez du izanen beste eskubiderik entitatean hutsik dagoen edo hutsik geratzen den kategoria bereko edo antzeko kategoriako lanpostu batera itzultzeko lehentasuna baizik.

49. artikulua. Eszedentziaren ondoren lanera itzultzea.

Aurreikusi diren eszedentzia egoera guztietan, baldin eta eszedentzialdia agorturik langileak entitatera itzuli nahi badu, aldi hori akitu baino hogeita hamar (30) egun natural lehenago eskatu beharko du, eta eskaeran adierazi beharko du noiz nahi duen hasi lanean. Eszedentzialdia agortu eta hurrengo hogeita hamar (30) egun natural igaro aurretik hasi beharko du lanean.

Eskaera aurkezten ez badu, lehentasun eskubideari uko egiten diola ulertuko da.

Eszedentzialdian ordezkoa kontratatu bada lanpostu hutsean aritzeko, titularra lanera itzultzen denean ordezkoaren lana bukatuko da eta berarekiko lan harremana finitutzat emanen da.

50. artikulua. Aldi baterako ezintasuna.

Langile batek lanerako aldi baterako ezintasuna duen kasuan, kontratua etenda egonen da ezintasunak irauten duen aldian, entitateak Gizarte Segurantzako kotizazioak egiten ez dituen egunak barne. Ohiko lanbidean aritzeko baliaezintasun iraunkor osoa, erabateko baliaezintasuna edo baliaezintasun handia gertatuz gero, lan kontratua bi urtez etenen da, baliaezintasuna adierazten duen ebazpena eman den egunetik aurrera zenbatuta, baldin eta, kalifikazio organoaren ustez, langilearen ezintasuna berriz aztertu behar bada, hobera egiteko antza duelako, langilea berriz ere lanean hasteko moduan, eta ebazpen administratiboan hala adierazten bada. Etenaldi horretan antzinatasuna zenbatuko da.

51. artikulua. Erretiroak.

Une bakoitzean indarrean den lege arautegia aplikatuko da.

Hitzarmen honi lotutako entitateak saiatuko dira, haien antolamenduaren eta kudeaketaren ikuspegitik posible den neurrian, 55 urtetik gorako langileak lanpostu egokienetan birkokatzen.

Edonola ere, birkokatze hori egiteko, aldeen arteko adostasuna beharko da, eta, aldez aurretik, kontsulta egin beharko zaie langileen legezko ordezkariei.

VI. TITULUA.–HOBEKUNTZA SOZIALAK

52. artikulua. Laneko arropa.

Urtean behin gutxienez, entitateek laneko arropak emanen dizkiete beren eginkizunengatik behar dituzten langileei. Laneko arropak ematen ez dituzten entitateek dirua eman beharko dute erosteko: 115 euro urtean.

53. artikulua. Mantenua, ostatua eta joan-etorrien gastuak.

Hitzarmen honen eraginpeko langileek honako eskubide hauek dauzkate:

a) Jantokiko eta sukaldeko zerbitzuetan ari diren langileek otordua egiteko eskubidea izanen dute lan egiten duten egunetan, baldin eta otorduak eguneko lanaldian egiten badira. Komunitate terapeutikoetako langileek eskubide bera izanen dute.

b) Barnetegi erregimenean ari diren langileek mantenu eta ostatu eskubidea dute.

54. artikulua. Aseguruak.

Entitateek erantzukizun zibileko aseguru poliza eginen diete langile guztiei, lanaren ondorioz gertatzen ahal diren erantzukizunak estaltzeko. 50 langileko eta hortik gorako entitateen polizetako kapital aseguratua 330.000 euro izan behar da gutxienez.

Halaber, aseguru poliza bat izan behar dute laneko istripuak eta eritasun profesionalak estaltzeko; kontingentziak eta zenbatekoak honako hauek izan behar dira:

–Heriotza, erabateko ezintasun iraunkorra edo baliaezintasun larria: 50.000 euro.

–Ezintasun iraunkor osoa: 25.000 euro.

–Ezintasun iraunkor partziala: 12.000 euro gehienez, baremo ehunekoaren arabera.

Urtero polizaren kopia emanen zaio langileen legezko ordezkaritzari.

55. artikulua. Orientazio juridikoa.

Entitateek aholkularitza juridiko estrajudiziala emanen diete hala eskatzen duten langileei, emandako zerbitzuen erabiltzaileekin (eta/edo haien hurbilekoekin) dituzten gatazkei dagokienez, betiere eskaera horiek zuzenean lotuta badaude beren eginkizun profesionalekin eta entitatearen erantzukizun eremua gainditzen ez badute. Langileak LLOko kide baten laguntza izaten ahalko du.

Aurrekoaz gain, langilearen jarduera profesionalaren ondoriozko lan gatazka bat gertatzen denean, entitateak, nahierara, defentsa judiziala bere gain hartzen ahalko du abokatua eta/edo prokuradorea izendatuz, eta lotutako kostuak bere gain hartzen ahalko ditu.

56. artikulua. Epaitegira joatea.

Zerbitzuari dagozkion arrazoiengatik epaitegietara edo auzitegietara joateko zitazioa jasotzen duten langileek eskubidea izanen dute eginbide egokiak egiteko erabilitako orduak benetan lan egindako denboratzat zenbatzeko, bai eta joan-etorrietarako emandako denbora ere.

Zitazioa oporraldiarekin edo ordaindutako lizentziarekin bat badator, epaitegiak edo auzitegiak ez badu uzten ezarritako hitzordua edo zitazioa aldatzen, aurreko paragrafoan aipatutako orduen ordez, langileak aparteko opor egun bat edo ordaindutako lizentzia bat sortuko du konpentsazio gisa. Zitazioa ordaindu gabeko baimen aldiarekin bat badator, konpentsatzeko aukera langilearekin negoziatuko da.

57. artikulua. Datuen babesa txostenak egitean.

Langileek txostenak edo antzeko dokumentuak sinatu behar badituzte epaitegietara edo administrazio publikoetara helarazteko, ematen diren zerbitzuen erabiltzaileekin (eta/edo hurbilekoekin) esku-hartzeari dagokionez, beren identifikazio datuak babesteko eskubidea izanen dute. Horretarako, entitateak emanen dien langilearen kodea edo zenbakia erabiliko da.

Entitateak ez du emanen txostena egin duen langilearen izenik, abizenik eta/edo NANik, non ez den Auzitegi edo Administrazio Publiko eskudunak identifikatzeko eskatzen diola. Entitateak ez dizkie datu horiek emanen erabiltzaileei.

58. artikulua. Enpresa subrogazioaren klausula.

1. Lantaldeak egonkortu dituzten lehiaketa publikoetan, itunetan, lankidetza hitzarmenetan edo finantzaketa publikorako beste modu batzuetan, bai eta zerbitzu, baliabide edo ekoizpen unitate baten titulartasuna entitateen artean eskualdatu behar denean ere, betiere entitate horiei aplikagarria bazaie hitzarmen hau edo hitzarmen honen eremu funtzionalean badaude, entitate berria subrogatu eginen da betebehar eta arduretan, zerbitzu, baliabide edo ekoizpen unitate horretan ari diren langileei dagokienez.

Dena den, beste batzuen kalterako kontratatutako langile horiek ez dituzte artikulu honetan ezarritako subrogazio ondorioak izanen; izan ere, ondorio horiek enpresa uzten duen titularrari loturik jarraituko dute.

Kontratua beste batzuen kalterako egin dela ulertuko da, esleipena akitu aurreko hiru (3) hilabetetik beherako aldian, kontratatutako orduen kopurua gorantz aldatu bada, eta horrek emakidadun administrazioaren berariazko oniritziarekin egin beharreko jarduera orduen kopuruan benetako igoerarik eragin ez badu.

Ondorio horietarako, zerbitzuan, baliabidean edo ekoizpen unitatean jarraipena dagoela ondorioztatuko da, baldin eta eskualdatzeak bere nortasunari eusten dion zerbitzu, baliabide edo ekoizpen unitate bati eragin badio, betiere ulertuta jarduera egiteko antolatutako bitartekoak direla.

Ekoizpen unitatearen titulartasuna aldatzen den unean probaldian dauden langileek egoera horretan segituko dute probaldia bukatu arte.

2. Ekoizpen unitatearen titulartasuna aldatzen den unean aldi baterako ezintasun egoeran, eszedentzian, ordaindu gabeko lizentzialdian, oporretan, diziplina bidezko eginkizun-etenaldian edo lanpostua erreserbatzeko eskubidea ematen duen beste egoera batean dauden langileak kontratu publikoaren, kontratu pribatuaren edo lankidetza hitzarmenaren entitate adjudikaziodun berriari atxikita geratuko dira.

Langile horiek ordezten dituzten bitarteko kontratudun langileak enpresa titular berrian sartuko dira ordezko langile gisa, eta izaera eta kontratu hori mantenduko zaie ordeztutako pertsona itzuli arte.

3. Ateratzen den edo lagapena egiten duen entitatearen betebeharrak:

a) Entitate lagatzaileak, kasuan kasuko espedientearen edo administrazio egintzaren hasieran, honako dokumentazio hau eman beharko dio ardura duen administrazio publikoari, subrogazio eskubidea duten langileak eta haien lan baldintzak lehiaketaren, kontratuaren edo hitzarmenaren baldintza agirian sartu ahal izateko:

–Langileen zerrenda, hauek zehaztuta: izen-abizenak, NAN, Gizarte Segurantzako afiliazio zenbakia, antzinatasuna, lanbide kategoria, lanaldia, ordutegia, kontratazio modalitatea eta oporraldia, bai eta norberaren baldintza onuragarrienak, baldin badaude, edo egon daitezkeen enpresa itunak ere.

–Gizarte Segurantzaren ordainketa eguneratua duela dioen ziurtagiria.

–Langileen soldaten azken ordainagirien fotokopiak.

–Gizarte Segurantzako kotizazioari buruzko TC-1 eta TC-2 dokumentuen fotokopiak.

–Subrogatzen diren langileen kontratuen fotokopiak.

b) Ateratzen den entitateak zerbitzuen errentamendu kontratuaren suntsiarazpenaren berri eta adjudikaziodun berriaren izenaren berri emanen die ukitutako langileei, langileen legezko ordezkaritzaren bitartez, bataren eta bestearen berri formalki izan bezain laster.

c) Aurreko 3.a) puntuan adierazten den dokumentazioaz gainera, entitate lagatzaileak ondoren zehazten den dokumentazioa utzi beharko du adjudikaziodun berriaren esku, zerbitzuaren prestazioa hasi behar duen eguna baino hamar egun baliodun lehenagotik gutxienez, edo formalki adjudikazioaren berri jakiten duenetik hasita epe berean:

–Entitate lagatzailea zerbitzuak emateko kontratuaren akaberaz, akaberaren iragarpenaz edo ez berritzeaz jakitun izan zeneko dataren behar bezalako egiaztapena.

–Azken hilabeteetako nominen fotokopiak, urte naturalaren hasieratik kontatuta, eta kontratuaren titulartasuna aldatzen den egunean subrogazioaren eraginpeko langileak beren soldatak, aparteko ordainsarien zati proportzionalak, oporrak eta gainerako kontzeptuetako konpentsazioak edo ordainsariak garaiz jasotzen ari direla egiaztatzen duen agiria.

–TC1 eta TC2 kotizazio buletinen fotokopiak eta Gizarte Segurantzan ordaindu direla frogatzeko agiria. Horretarako, sartzen den entitateari Gizarte Segurantzako Institutu Nazionalak luzatutako ziurtagiri bat aurkeztuko dio, zeinean aurrekoa frogatzeaz gainera, ziurtagiriaren datan mugaeguneraturik dauden kotizazioak agertuko baitira.

–Artikulu honen 1. puntuan adierazitako edozein arrazoi dela kausa, kontratua eten zaien langileen zerrenda, horren arrazoia eta aurreikusten den etenduraren iraupena adierazita.

–Ekoizpen unitateko urteko egutegia, ordutegien antolamendua eta lan txandak, hitzartutako oporraldien zerrenda barne, adostu badira, bai eta plantillako langile bakoitzak hartutako opor egunak, norberaren aferetarako egunak, lizentziak eta baimenak ere.

–Titulartasunaren aldaketarako aurreikusitako egunera arte, plantillako langile bakoitzak benetan egindako lanaldien zerrenda, egindako lanaldi aldaketak adieraziz (kontratuan ezarritako lanaldi arrunten murrizketak eta luzapenak).

d) Erretiro partzialeko kasuetan, lanaldia metatzen denean, ateratzen den entitateak sartzen den entitatea konpentsatu beharko du, honako formula honen arabera:

c = d* h* p.

c = ateratzen den entitateak ordaindu beharreko konpentsazioa.

h = erretiro partzialeko pertsonaren eguneko ordu teorikoak.

h = egin beharreko lanaldiaren %x urteko lanaldia / 365.

d = zenbat egun geratzen diren subrogaziotik erabateko erretiroa hartu arte.

p = orduaren prezioa = langilearen urteko ordainsari erreala / urteko lanaldia.

–Urteko prestakuntza plana eta haren gauzatze maila, bai orokorrean, bai plantillako langile bakoitzeko.

–Langileen legezko ordezkaritza hautatzeko azkeneko prozesuaren espedientea, hala nola aurreko bileretako akten fotokopiak, eta, orobat, ordura arte alderdiek sinatu eta erregistratuta dauden entitateko edo zentroko hitzarmen edo itun kolektibo guztien fotokopia.

–Esleipena hartzen duen entitateak, ondorio horietarako, eskatzen duen edo bidezkoa den beste edozein agiri, beharrezkoa edo aginduzkoa baldin bada.

e) Ateratzen den entitateak aurreko xehetasun guztiak egiaztatzen ez baditu, sartzen denak modu sinesgarrian eskatuko dizkio, egiaztatu ez dituen betebeharrak berariaz adieraziz, bi egunen buruan salatutako ez-egiteak zuzen ditzan.

f) Emandako informazioaren faltsutasuna edo zehaztasun falta dela eta entitate adjudikaziodunari sortzen zaizkion ondorioen erantzulea ateratzen den entitatea izanen da, deusetan galarazi gabe bidegabeki subrogatutako langileak ateratzen den entitate horretara itzultzea.

4. Zerbitzuaren adjudikaziodun berriaren betebeharrak:

a) Entitate berriak langileak lehengo enpresan zituen lan eskubide guztiak errespetatu beharko ditu, betiere eskubide horiek legezko itun edo akordio idatzien ondoriozkoak badira eta, behar den dokumentazioarekin batera, entitateari komunikatzen bazaizkio edo langileak frogatzerik baldin badu.

b) Sartzen den enpresak, orobat, lan egitearen ondoriozko ordainketak eta kuotak aurreikusitako egunetan ordaintzea bere gain hartuko du, ekoizpen unitatearen kudeaketa esleitzen zaion unetik.

c) Erretiro partzialeko kasuetan, baita lanaldia metatzen den kasuetan ere, bai partzialki erretiratutako langilea bai erreleboko langileak subrogaturik igaroko dira sartzen den entitatera.

5. Bestelako gaiak:

Sartzen den entitateak ekoizpen unitatean ezarritako oporren egutegia errespetatuko du goitik behera eta oporraldi guztiak egutegi horretan ezarri bezala onartuko ditu, kontuan hartu gabe enpresa bakoitzean sortutako oporren zati proportzionala.

Subrogazioa urte naturala hasi aurretik gertatzen bada, sartzen den entitateak eta ateratzen den entitateak aurrekoa betetzeko behar diren konpentsazio ekonomikoak eginen dituzte.

Bi entitateak konpentsazio ekonomikoaren gainean ados jartzen ez badira, oporraldi osoa egin deneko entitateko titularrak langilearen nominatik edo, hala bada, likidaziotik deskontatuko du beste entitatean sorrarazitako aldiari dagokiona. Oporrik hartzen ez deneko entitateak oporrengatik dagokien zati proportzionala ordainduko die langileei, likidazioarekin edo lehenengo nominarekin batera, kasuan-kasuan.

Adostasunik ez badago, sortutako oporrei dagokien aldia Gizarte Segurantzan kotizatu ez duen entitatea behartuta egonen da kotizazio horiei dagokien dirua ordaintzera beste entitateari.

Entitateen arteko konpentsazio ekonomikoaren kopia bat emanen zaie, langileen legezko ordezkariei, enpresa elkarteari eta hitzarmenaren Batzorde Paritarioari.

Ateratzen den entitateak langileei legozkiekeen hartzekoen likidazioa eta eskersarien zati proportzionalak ordainduko dizkie.

Kontratuen subrogazio partzialak saihesten ahalko dira, partziala gabe osoa eginez, enpresak eta langileak akordio batera iritsi eta idatziz adieraziz gero.

Artikulu honetan subrogatzeko ezarrita dagoen bidea berez erabiliko da, entitatearen izaera zein den kontuan hartu gabe, pertsona fisikoa, juridikoa edo bestelakoa.

Artikulu hau aplikatzea nahitaezkoa izanen da lotetsitako alderdi guztientzat: ateratzen den entitatea eta entitate titular berria.

Ateratzen den entitateak dokumentazioa ez aurkezteak ez du murrizten langileen subrogaziorako eskubidea. Gainera, baliteke entitateak erantzukizuna edukitzea.

6. Ordezkaritza bateratu eta sindikalaren bermeak.

Subrogazioa gertatzen denean horren eraginpeko zentroetan dauden ordezkaritza bateratu eta sindikaleko organoak, delegatuak, batzordeak eta atal sindikalak mantenduko dira, honako irizpide eta babes hauek aplikatuz:

a) Azken hauteskundeen ondoren zentroan dauden ordezkaritza bateratua eta ordezkaritza sindikala mantenduko dira, bai titularrak, bai ordezkoak, eta zentroko ordezkaritza-ahala babestuko da enpresa edo entitate berriko talde berari dagokionez, bai eta langileen legezko ordezkaritzaren berezko eskubideak eta bermeak ere, langileen legezko ordezkaritza izaeratik sortzen baitira, harik eta beste hauteskunde sindikal batzuen prozesua abiarazi arte.

b) Subrogazioak berekin badakar ordezkaritza lehendik duen zentro batean integratzea, langileen legezko ordezkaritzaren berezko eskubideak eta bermeak mantenduko dira, harik eta beste hauteskunde sindikal batzuen prozesua abiarazi arte. Ez dute izanen zentro berriko legezko ordezkaritza-ahala, baina bai hitz egiteko eta zentroko lan harremanetan parte hartzeko eskubidea, han lehendik dagoen ordezkaritzarekin batera.

Apartatu honen aurreko paragrafoan ezartzen den salbuespenarekin, langileen delegatuak edo enpresa batzordeko kideak finkoak badira irteten den entitatean edo enpresan, eta adjudikaziodunaren aldaketak ondorioak sortzen dituen egunaren aurreko sei hilabeteetan, aldaketaren objektu den lan zentrora aldatu eta atxiki badituzte, honako bi aukeren artean hautatu beharko dute: enpresa adjudikaziodun berrian sartu edo irteten den enpresaren plantillan geratu, beren lanbide taldean lanposturik egonez gero. Bigarren aukera hautatzen duten delegatuek edo batzordekideek indarreko lan arloko legeriaren arabera esleitzen zaien lanpostua onartu beharko dute.

VII. TITULUA.–ESKUBIDE SINDIKALAK

59. artikulua. Eskubide sindikalak.

Enpresa batzordeek, langileen ordezkariek eta sekzioko sindikatuek honako eskubide eta eginkizun hauek izanen dituzte, besteak beste:

a) Beren lantokian falta arin, larri eta oso larriengatik ezartzen diren zehapen guztien berri jasotzea, zehapena ezarri aurretik. Zehapen larria edo oso larria ezartzen denean, kargu-orrien berri jasotzeko eskubidea dute.

b) Hiru hilean behin bederen honako hauei buruzko estatistikak jasotzea: absentismo indizea eta horren arrazoiak, lan istripuak eta laneko gaixotasunak eta horien ondorioak, istripu tasak, laneko ingurumen arloko aldian aldiko azterketak edo azterketa bereziak, eta erabiltzen diren prebentzio baliabideak.

c) Lanaren, Gizarte Segurantzaren eta enpleguaren alorrean indarrean dauden arauak, eta erakundearen gainerako indarreko itun, baldintza eta erabilerak bete daitezen zaintzea. Beharrezkoa bada, legezko ekintza egokiak jarriko dituzte abian, erakundearen eta entitate edo auzitegi eskudunen aurrean.

d) Entitateko lanak betetzean laneko segurtasunaren eta osasunaren baldintzak betetzen ote diren zaintzea eta kontrolatzea. Lan-arriskuen Prebentziorako Legeak agintzen dituen eginkizunak bete ahal izateko prebentzioko ordezkariek behar duten denbora izanen dute lan arriskuen prebentzioari buruzko prestakuntza –betetzen duten kargurako nahitaezkoa– jasotzeko. Ordu horiek ez dira ordezkaritzarako ordutegiaren kontura izanen, ezta Lan-arriskuen Prebentziorako Legean bildutako ahalmenak eta eskumenak betetzeko aurreikusitakoaren kontura ere. Entitateak eman eta ordaindu behar du prebentzioari buruzko prestakuntza. Lan ordutegiaren barruan egin beharko da.

e) Hitzarmena negoziatzeko izendatzen diren langileen legezko ordezkariek baimen ordainduak baliatzen ahalko dituzte negoziazioek irauten duten bitartean, alegia, negoziazio mahaiaren bileretan izateko behar diren guztiak. Eskubide hori baliatu nahi dutenek abisua eman behar diote goragoko arduradunari 48 ordu lehenago gutxienez.

f) Langileen legezko ordezkarien kreditu sindikal arrunta honako hau izanen da:

  • 100 langile arteko entitateak: 15 ordu hilean.
  • 101 eta 250 arteko langileko entitateak: 20 ordu hilean.
  • 251 eta 500 arteko langileko entitateak: 30 ordu hilean.
  • 501 langile edo hortik gorako entitateak: 35 ordu hilean.

g) Lantoki guztietan iragarki taula sindikalak jarriko dira, tamaina egokikoak eta leku ikusgarrietan jarriak. Tauletako bat enpresa batzordearen informazioa jartzeko izanen da, eta bestea sekzio sindikalentzat. Entitateak jarriko ditu taula horiek, langileen legezko ordezkariekin adostuta. Iragarki taula horietan, arduradun sindikalek egoki iritzitako ohar eta jakinarazpenak jarriko dituzte.

h) Langilerik ez da baztertuko bere afiliazio sindikalarengatik; bakoitzak bere iritziak libreki adierazten ahalko ditu, eta laneko edo gizarte intereseko argitalpenak argitaratu eta banatzen ahalko ditu, lanaren ohiko jarduna deusetan kaltetu gabe. Langile guztiek dute kargu sindikaletarako hautesle eta hautetsi izateko eskubidea, Langileen Estatutuan eta Sindikatu Askatasunaren Lege Organikoan ezarritako baldintzak betez gero.

i) Entitateak lokalak eta bitarteko informatikoak, baliabide materialak eta bulegoko materialak emanen dizkie enpresa batzordeei, langileen ordezkariei eta legez eratutako atal sindikalei, beren eginkizunak gauzatu ahal izan ditzaten. Entitateetako bileretara joatea ere baimenduko da, hitzarekin baina botorik gabe; erakunde sindikal bakoitzeko bi arduradun eta/edo aholkulari joan daitezke, langileen legezko ordezkaritzari laguntzeko.

j) Langileen ordezkariek, enpresa berekoak badira, daukaten ordu kreditu sindikal osoa edo zati bat metatu eta beste ordezkari baten eskura uzten ahal dituzte, sindikatuko hautagai zerrenda berean hautatua izan bada. Ordu kredituaren orduak metatzeko poltsa hori urteko hamaika hilabeteri dagozkien orduekin osatzen ahalko da, eta kanpo utzi beharko da titularraren oporretako hilabetea.

k) Halaber, kreditu sindikala lauhilekoetan konputatuko da, salbu eta entitate baten esparruan zuzendaritzarekin beste aldi bat adosten denean erreferentzia gisa; aldi horretan, modu irregularrean birbanatzen ahalko da haren erabilera, aldez aurretik entitateko zuzendaritzari idatziz jakinarazita, erabili baino hamabost egun lehenago, antolaketari begira.

l) Sindikatu edo konfederazioek atal sindikalak ezartzen ahalko dituzte sektoreko entitateetan, Sindikatu Askatasunaren Lege Organikoan, Langileen Estatutuan eta aplikatu beharreko gainerako arauetan ezarritakoarekin bat. Enpresetan edo, hala badagokio, 100 langiletik gorako plantilla duten lantokietan, enpresa batzordeetan presentzia duten sindikatuetan afiliatutako langileek eratu ditzaketen atal sindikalak ordezkari sindikal batek ordezkatuko ditu. Ordezkari hori enpresako edo lantokiko afiliatuek aukeratuko dute, beren afiliatuen artean, Askatasun Sindikalari buruzko abuztuaren 2ko 11/1985 Lege Organikoan aurreikusitako moduan eta eskubide nahiz bermeekin.

Sindikatu baten estatutuetan ezarritakoaren arabera eratzen ahal diren sekzio sindikalek, arestian adierazitako baldintzak betetzen ez badituzte ere, haiek ere ordezkari sindikal bat izaten ahal dute. Ordezkari sindikal horrek sindikatuaren eta enpresako afiliatuen interesak ordezkatu eta defendatuko ditu, eta sindikatuaren eta enpresa bakoitzaren zuzendaritzaren arteko komunikaziorako tresna ere izanen da. Hala ere, horrek ez du esan nahi aurreko paragrafoan aipatzen diren delegatuentzat aurreikusitako eskubideak esleituko direnik, enpresaren eremuan akordiorik lortzen ez bada.

60. artikulua. Batzarrak.

Enpresa batzordeek, langileen ordezkariek, modu baliozkoan eratutako atal sindikalek eta plantillako langile guztien ehuneko hogeik (%20) –berrogeita hamar (50) langile baino gehiago dituzten zentroetan– edo ehuneko hogeita hamarrek (%30) –berrogeita hamar (50) langiletik beherako zentroetan– bilerarako deiak egiten ahalko dituzte hogeita lau (24) ordu lehenago, gutxienez, eta aldez aurretik entitateari jakinarazita. Batzarrerako deialdia eta batzarraren nondik norakoa bat etorriko dira une bakoitzean indarra duen lan arloko legerian xedatutakoarekin.

Entitateek uzten ahalko dute lokal edo espazio propio bat erabil dezaten batzarrak egiteko.

VIII. TITULUA.–DIZIPLINA ARAUBIDEA

61. artikulua. Diziplina araubidea.

Diziplina araubideari buruzko manuen xedea da laneko giro eta bizikidetza egokiak bermatzea, baita entitateen antolamendu teknikoa eta antolaketa ere, entitateetako zuzendaritzak plantillarekiko dituen diziplina ahalmenak zainduz.

Diziplina ezartzeko ahalmena baliatu eta hitzarmen honetan ezarritako zehapenak aplikatzeko, kontuan hartu beharko dira zehatutako egitatearen inguruabarrak eta ukitutako langilearen jokabide mota: zabarkeriaz ala nahita jokatu duen, jarraitutasunez ala noizbehinka, berrerorlea den ala ez.

Honako hauen arabera zehazten eta mailakatzen dira zehapenak:

–Intentzionalitate maila.

–Entitatearen interes eta printzipioei egindako kaltea.

–Falta errepikatu edo berriro egitea.

Zehapen jardueran saihestu egin beharko da diziplina ezartzeko ahalmenaren ustekabeko aplikazioa; ahalmen hori erabiltzean tratu berdintasunaren, proportzionaltasunaren, haztapenaren eta orekaren printzipioak errespetatuko dira.

–Faltak mailakatzea.

Langile batek falta bat egiten badu eta falta hori kontratuaren erruzko ez-betetzea bada, enpresako zuzendaritzak langilea zehatzen ahal du. Falta bakoitza arin, astun edo oso astun gisa sailkatu beharko da.

A) Falta arinak.

1. Eginkizunak betetzeko atzerapen, zabarkeria edo arreta falta desenkusagarria, edota entitatearen lokalak, materialak edo dokumentuak (bereak nahiz erabiltzen dituenak) behar ez bezala erabiltzea.

2. Justifikatutako arrazoiengatik lanera joan behar ez denean aurretik behar den denboraz ez jakinaraztea arduradunari, jakinarazi ezina frogatu ezean.

3. Lanera ez joatea, 2 egunetan gehienez, arrazoia justifikatu gabe.

4. Lan mota bakoitzari esleitutako denborak aldatzea, arduradunak baimenik eman gabe edo justifikaziorik gabe.

5. Arrazoia justifikatu gabe 3, 4 edo 5 puntualtasun falta metatzea 30 eguneko epean.

6. Lanaldi batean lanpostuko eginkizunen bat bertan behera uztea.

7. Ez errespetatzea, zabarkeriagatik, arreta faltagatik edo nahita, laneko arriskuei aurrea hartzeko neurriak eta segurtasun arauak, ondorioz arrisku arina sortzen denean norberaren, beste langile batzuen edo erabiltzaileen osasunarentzat.

8. Agindutako lanak gaizki egitea behin eta berriz, langileei, lanaren hartzaileei, entitateari berari edo elkarlanean aritzen diren administrazio publikoei kalte larririk eragiten ez bazaie.

9. Erakundearen tresnak eta instalazioak modu ezegokian erabiltzea eginbehar pertsonal edo pribatuetarako (inprimagailuak, fotokopiagailuak, telefonoak, Internet eta abar).

10. Norberaren garbitasunik eta txukuntasunik eza.

B) Falta astunak:

1. Diziplinarik edo obedientziarik eza laneko edozein gaitan.

2. 30 eguneko epean lanera berandu iristea 6, 7, edo 8 egunetan.

3. Hilabetean 4 egunetan, gehienez, lanera huts egitea, bidezko arrazoirik izan gabe.

4. Hilabeteko epean bi lanalditan lanpostuari dagokion funtzioren bat alde batera uztea.

5. Hiru falta arin egitea gehienez, desberdinak izanagatik ere, lau hilabeteko epean, betiere aurretik haiengatik zehapenak izan badira.

6. Erabiltzaile edota lankideekiko tratuan behin eta berriz gizalegerik gabe aritzea.

C) Falta oso astunak:

1. Egiten diren jardueren ondorioz ezagutzen diren datu pertsonalak isilpean gordetzeko betebeharra ez betetzea. Nahitaez isilpean gorde beharreko sekretuak haustea edo bortxatzea, horrek kalte larria eragiten duenean.

2. Lanpostuko eginkizunen bat bertan behera uztea, hori behin eta berriz egiten bada eta aurretik kargu-hartzea izan bada.

3. Eritasuna edo istripua simulatzea.

4. Nagusiei informazio faltsua ematea edo informazioa ezkutatzea zereginak betetzeari buruz.

5. Zerbitzuaren hartzaileei edo haien ahaideei, lankideei eta esku-hartzean lankide diren beste entitate batzuetako profesionalei irain edo tratu txar fisiko, psikiko nahiz moral oso larriak eragitea.

6. Ez errespetatzea eta urratzea, zabarkeriagatik, arreta faltagatik edo nahita, laneko arriskuei aurrea hartzeko neurriak eta segurtasun arauak, ondorioz arrisku larria sortzen denean norberaren, beste langile batzuen edo zerbitzuaren hartzaileen osasunarentzat.

7. Pertsona hartzaileen, entitatearen edo beste langile batzuen ondasun material, dokumental, ekonomiko eta abarrekoez jabetzea.

8. Iruzur egitea, leialtasun falta eta konfiantza abusua, bai eta engainuzko delitu den edozein jokabide ere.

9. Lana lau egunetan baino gehiagotan huts egitea, hilabeteko epean, justifikatutako arrazoirik gabe.

10. Behin eta berriz diziplina urratzea edo desobeditzea laneko edozein gaitan, aurretik zehapenik izan gabe ere.

11. Zigor Kodean definitutako sexu jazarpena.

12. Laneko jazarpena.

13. Urte batean hutsegite astun edo oso astun bat baino gehiago egitea, nahiz eta mota desberdinetakoak izan, baldin eta langileari, haien ondorioz, zehapenik jarri bazaio.

14. Erakundeak ezarritako etika eta jokabide kodearen urratze larria.

15. Norbera lanean ari den herrialdean erakundeak ezarritako segurtasun planak ez betetzea, arriskuan jarriz norberaren eta erakundeko gainerako kideen segurtasuna edo erakundea bera.

16. Homofobia-bifobia-transfobiari lotutako jazarpena.

17. Estupefazienteen kontsumoa eta/edo trafikoa lantokian eta lanaldian.

62. artikulua. Zehapenak.

Falten kalifikazioaren arabera enpresak ezartzen ahal dituen zehapenak hauek dira:

1. Falta arinengatik:

–Hitzezko kargu hartzea.

–Idatzizko kargu hartzea.

2. Falta astunengatik:

–Idatzizko kargu-hartzea.

–3 egunetik 14 egunera bitartean enplegu eta soldatarik gabe uztea.

3. Falta oso astunengatik:

–15 egunetik 30 egunera bitartean enplegu eta soldatarik gabe uztea.

–Goragoko talde batera pasatzeko aukera kentzea urtebeterako gehienez.

–Kaleratzea.

63. artikulua. Tramitazioa eta preskripzioa.

Falta arinak hamar egunen buruan preskribatuko dira, astunak hogei egunen buruan, eta oso astunak hirurogei egunen buruan, enpresak faltaren berri izaten duen egunetik aitzina, eta, nolanahi ere, falta egin eta sei hilabeteren buruan.

Falta astunen eta oso astunen zehapenak idatziz eta arrazoituta jakinaraziko zaizkio interesdunari, jakitun izan dadin eta behar diren ondorioak sor daitezen. Enpresak jakinaren gainean jarriko ditu enpresa batzordea edo langileen ordezkariak, eta laguntza eskatuko die gertaerak argitzeko; eta atal sindikalarengana ere joko du, ukitutako langilearen afiliazioaren berri sinesgarria jaso badu edo ukitutako langileak hala eskatzen badio.

Falta oso larriengatik zehapenak ezartzeko derrigorrezkoa izanen da diziplinako informazio espedientea izapidetzea.

Espediente hori irekiko da arau haustea jakinarazi ondoren, eta interesdunari karguen agiria igorriko zaio, ustezko falta ekarri duten egintzak labur adierazita. Espediente hori enpresa batzordeari edo langileen ordezkariei helaraziko zaie eta laguntza eskatuko zaie; eta atal sindikalari ere bai, baldin eta enpresak langilearen afiliazioaren berri sinesgarria jaso badu, edo langileak hala eskatzen badio. Horrela, bi alderdiek, zazpi eguneko epean, gertaerak argitzeko egokitzat jotzen dutena adierazten ahalko diote enpresari.

Falta oso larrien kasuan, enpresak enpleguaren etenaldia ezartzen ahalko du kautela neurri gisa, eta arau haustearen preskripzio epea etenda egonen da espedienteak dirauen bitartean, betiere espediente osoak hiru hilabete baino gehiago irauten ez badu, karguen agiria irekitzen denetik aurrera, espedientepeko langilearen errurik gabe.

Zazpi eguneko epea iraganda, batzordeak, ordezkariek, atal sindikalak eta ukitutako langileak ez badute baliatu alegazioak egiteko aitortu zaien eskubidea, langileari bidezko juzgatzen den zehapena ezarriko zaio, faltaren larritasunarekin eta hitzarmen honetan zehaztutakoarekin bat.

Ukitutako langilea enpresa batzordeko kidea, langileen ordezkaria edo ordezkari sindikala denean –bai kargu sindikaletan jardunean dagoena bai oraindik arauzko bermealdian dagoena–, zehapen astunak eta oso astunak jartzeko ezinbestekoa izanen da alde biko espedientea tramitatzea.

Enpresak artikulu honetako izapideetatik edozein ez betetzeak berekin ekarriko du zehapena eta beraren kalifikazioa baliorik gabe geratzea.

IX. TITULUA.–BESTE XEDAPEN BATZUK

64. artikulua. Hitzarmenean ezarritakoa ez aplikatzeko klausula.

Entitateek hitzarmen kolektibo honetan aurreikusitako baldintzak aplikatu gabe uzteko aukera izan dezaten, Langileen Estatutuaren 82.3 artikuluan xedatutakoarekin bat, ondoko hobekuntza prozedura hau adostu da:

a) 15 egun naturalean eginen da kontsulten aldia alderdien artean, hots, entitateko zuzendaritzaren eta ukitutako lantokiko langileen legezko ordezkarien artean. Langileen legezko ordezkaritzarik ez baldin badago, langileek horretarako ad hoc aukeratutako batzorde batekin eginen dira kontsultak. Kontsultaldia akordio batekin ixten bada, horren berri eman beharko zaio Hitzarmenaren Batzorde Paritarioari. Akordioak zehatz azaldu beharko ditu ukitutako lantokian aplikatzekoak diren baldintza berriak eta haien iraupena.

b) Akordiorik ez badago, alderdiek Hitzarmenaren Batzorde Paritariora bidaliko dute espedientea zazpi egun naturaleko epean, kontsultaldia bukatzen denetik kontatzen hasita. Hitzarmenaren Batzorde Paritarioak 7 eguneko epea izanen du berariazko ebazpena emateko, adieraziz "ados" edo "ez ados" dagoen planteatutako ez-betetzearekin. Erabakiak ordezkaritza bakoitzaren –enpresaburuena eta langileena– gehiengo bidez hartu behar dira. "Adostasun" ebazpenek kontsultaldiko akordioen eraginkortasun berdina izanen dute, eta Laneko Agintaritzari jakinarazi behar zaizkio.

c) Batzorde Paritarioak "ez ados" dagoela ebazten badu, alderdiek bitartekaritzapean jarri beharko dituzte negoziazioan sortutako desadostasunak, Nafarroako Lan Auzitegian. Bitartekaritza hori zazpi egun naturaleko epean eskatu beharko da, Batzorde Paritarioak "ez ados" ebazpena jakinarazten duenetik hasita. Bitartekaritza gehienez ere 30 egun naturaleko epean eginen da, eta luzatzen ahalko da, baldin aurretik alderdiak espresuki ados jartzen badira. Alderdien arteko akordioa lortzen bada, ez aplikatzeko akordioak zehazki ezarri behar du zein diren lan baldintza berriak, eraginpeko lantokian aplikatu beharrekoak, eta horien iraupena. Akordioa jakinarazi egin beharko zaie Laneko Agintaritzari eta Hitzarmenaren Batzorde Paritarioari.

d) Nafarroako Lan Auzitegiko bitartekaritza akordiorik gabe azkentzen bada, bai auzia arbitrajepean paratzeko aukera, bai eta Hitzarmen Kolektiboetarako Aholku Batzorde Nazionalera jotzeko aukera ere izateko, beharrezkoa izanen da enpresaren ordezkariek idatziz akordioa egitea langileen legezko ordezkariekin edo, horrelakorik ezean, langileek ad hoc eratutako batzordearekin.

XEDAPEN GEHIGARRIAK

Lehen xedapen gehigarria.–Nafarroako Gobernuko Hezkuntza Departamentuaren mendeko prestakuntza programa egonkorrak.

Nafarroako Gobernuko Hezkuntza Departamentuaren mendeko prestakuntza programa egonkorretan (Curriculum Egokituko Programa eta Oinarrizko Mailako Lanbide Heziketa, etorkizunean izan ditzaketen izendapen desberdinekin), irakasle lanpostuak betetzen dituzten langileek (irakasleak eta tailerreko irakasleak) 1.408 orduko urteko lanaldia izanen dute hitzarmen honen indarraldi osoan. Urteko lanaldi hori aplikatuko zaie, halaber, programa horien erabiltzaileei arreta zuzena ematen dieten teknikariei (orientatzailea, gizarte langilea...), programa horiei zuzenean eskaintzen dieten lanaldiaren ehunekoan.

"Irakaskuntzako plus" bat ezartzen da Nafarroako Gobernuaren Hezkuntza Departamentuaren mendeko prestakuntza programa egonkorretan (CEP eta Oinarrizko Mailako Lanbide Heziketa, etorkizunean izan ditzaketen izendapen desberdinekin) irakasle postuak betetzen dituzten langile guztientzat (irakasleak, lantegiko maisu/maistrak). Urteko 2.480 euro gordin izanen ditu 2025ean, eta urtero errebalorizatuko da, hitzarmen honetako soldata tauletan sartutako gainerako plusen proportzio berean. Hitzarmen hau indarrean jarri aurretik plus pertsonal bat zuten pertsonek irakaskuntzako plus berriaren zenbateko baliokidea xurgatuko dute, eta plus pertsonal gisa gordeko dute kasu bakoitzean dagokion zenbatekoa.

Bigarren xedapen gehigarria.–Lanaldia egokitzea.

Nafarroako esku-hartze sozialaren lehenengo hitzarmena indarrean jarri aurretik, benetako lanaldi dat itunduta izan duten entitateek, hitzarmen honetan aurreikusten den lanaldiaren desberdina, honako irizpide hauek aplikatuko dituzte:

Haien lanaldi osoa hitzarmen honetan ezarritakoa baino laburragoa bada, banaketa hori errespetatuko da, harik eta hitzarmen honetan ezarritako lanaldia entitate bakoitzean lehendik zegoenaren berdina edo laburragoa geratzen den arte. Aldiz, lanaldia hitzarmen honetakoa baino luzeagoa bada, hitzarmen honetan aurreikusten den gehieneko lanaldi berrira egokitu beharko da.

Sektorean lehendik zegoen lanaldi aitortua honako hau da:

–Nafarroako "Nuevo Futuro" elkartea:

Orain arte bezala, zuzeneko esku-hartzeko lanaldia 1.424 ordukoa izanen da kategoria honetan: egoitza zentroko hezitzailea, zaintzarekin eta ordezko hezitzailearekin. Hitzarmen honetan ezartzen den urteko gehieneko lanaldia osatzeko, 40 prestakuntza ordu eginen dira, eta aplikatu beharreko gainerako orduak zaintza-itxaronaldi gisa araututako kontzeptuan, (gehienez 180 minutu lanera iristeko); lan zentro desberdinetan zaintza-itxaronaldian egiten diren orduen %37 onartuko dira, ezarritako lan egutegiarekin bat etorriz. Gainerako kategoria eta lanpostuetan (zaintzarik gabeko hezitzaileak, teknikariak eta abar) hitzarmen honetako erreferentziako urteko lanaldia aplikatuko da.

Azken xedapenetan hirugarrena.–Berdintsun planak.

3/2007 Lege Organikoan ezarritakoarekin bat, entitateek tratu eta aukera berdintasuna errespetatu behar dute lan esparruan, eta xede horretarako, lanean emakumeen eta gizonen arteko edozein bereizkeria eragozteko neurriak hartu behar dituzte. Neurri horiek langileen legezko ordezkariekin negoziatu beharko dituzte, lan arloko legerian zehazten den moduan.

Entitateak 50 langile baino gehiago baditu, lantoki bakarra nahiz lantoki gehiago izan, aurreko paragrafoan aipatutako berdintasun arloko neurriak biltzen dituen berdintasun plana prestatu eta aplikatu beharko da.

Enplegu eta lanaren arloan emakumeen eta gizonen arteko tratu eta aukera berdintasuna bermatzeko premiazko neurriak ezartzen dituen martxoaren 1eko 6/2019 Errege Lege Dekretuaren 45. eta 46. artikuluak idazketan apurka-apurka aplikatzeari buruzko hamabigarren xedapen iragankorrean adierazitakoarekin bat etorriz, honako hau xedatzen da:

Ehun eta berrogeita hamar langile baino gehiago eta berrehun langilera arteko plantilla duten entitateek urtebeteko epealdia izanen dute berdintasun planak onesteko.

Ehun langile baino gehiago eta ehun eta berrogeita hamar langilera arteko plantilla duten entitateek bi urteko epealdia izanen dute berdintasun planak onesteko.

Berrogeita hamar langile baino gehiago eta ehun langilera arteko plantilla duten entitateek hiru urteko epealdia izanen dute berdintasun planak onesteko.

Trantsizio-aldi horiek hitzarmen kolektibo hau Nafarroako Aldizkari Ofizialean argitaratzen denetik aurrera zenbatuko dira.

Entitateek, gainera, berdintasun plana prestatu eta aplikatu beharko dute, langileen ordezkariekin negoziatu edo kontsultatu ondoren –ordezkaririk bada–, lan arloko agintaritzak halakorik egitea erabakitzen duenean zehapen prozedura batean, zehapen osagarrien egoera plan horren prestaketaren eta aplikazioaren arabera, aipatu erabakian finkatzen den moduan.

Gainerako entitateek beren borondatez egin eta ezartzen ahal dituzte berdintasun planak, aurretik langileen legezko ordezkariei kontsulta eginda.

Hitzarmen honetan berdintasun planei eta egoeraren diagnostikoei buruz ezarritako arauen ondorioetarako, kontuan hartu beharko da 3/2007 Lege Organikoaren 5. artikuluak dioena. Horren arabera, sexuarekin zerikusia duen ezaugarri batean oinarritutako tratu desberdintasuna ez da laneratzeko eta behar den prestakuntza jasotzeko bereizkeria izanen, baldin eta, egin behar den lanbide jardueraren berezitasunengatik edo testuinguruagatik, ezaugarri hori izatea lanerako eskakizun funtsezkoa eta erabakigarria bada, eta, betiere, xedea zilegi bada eta eskakizuna behar den neurrikoa.

Helburu horrekin, hitzarmen honek, segidan, berdintasun planetarako eta egoeraren diagnostikoetarako jarraibide eta arau batzuk ematen ditu bere aplikazio eremuko 250 langiletik gorako enpresentzat, 3/2007 Lege Organikoa aplikatzen eta ezartzen laguntzeko.

A) Berdintasun planak zer diren.

3/2007 Lege Organikoan xedatutakoaren arabera, entitateetako berdintasun planak antolatutako neurri multzoa dira; neurri horiek egoeraren diagnostiko bat egin ondoren hartuko dira, eta xede izanen dute enpresan emakumeen eta gizonen arteko tratu eta aukera berdintasuna lortzea eta sexuan oinarritutako bereizkeria ezabatzea.

Berdintasun planek ezarriko dituzte lortu beharreko berdintasun helburu zehatzak, horretarako gauzatu beharreko estrategia eta jardunbideak, bai eta ezarritako helburuei jarraipena egiteko eta helburuok ebaluatzeko sistema eragingarriak ere.

B) Egoeraren diagnostikoa.

Lortu behar diren berdintasun helburuak finkatu aurretik, enpresek egoeraren diagnostikoa eginen dute, lan baldintzen inguruko datuak, sexuaren arabera sailkatuak, biltzeko. Gai batzuk arreta bereziz aztertuko dituzte, hala nola lanean hasteko aukera, prestakuntza, lanbide sailkapena eta mailaz igotzea, lana ordaintzeko eta lanaldia antolatzeko baldintzak, lana, familiako bizitza eta bizitza pertsonala uztartzea, etab. Horrela atzemanen dira gizonen eta emakumeen arteko tratu edo aukera desberdineko egoerak, arrazoi objektiborik eta zentzuzkorik gabeak, edo sexuarengatiko bereizkeriak, halakorik bada; horrekin batera, horiek zuzentzeko helburuak finkatu beharko dira.

Entitateek horren guztiaren berri emanen diete idatziz langileen ordezkariei, eta horiek txostena egiten ahalko dute, egokia iruditzen bazaie.

Egoeraren diagnostikoan sexuaren arabera banatutako datuak emanen dira honako gai hauei buruz, besteak beste:

a) Plantillaren banaketa adinaren, antzinatasunaren, hierarkia mailaren, lanbide taldeen eta prestakuntza mailaren arabera.

b) Plantillaren banaketa kontratu moten arabera.

c) Plantillaren banaketa lanbide taldetan eta lansari taldetan.

d) Plantillaren banaketa lanaldiaren antolamenduaren, urteko lanorduen, txanda araubidearen eta lan bizitza eta familia bateragarri egiteko neurrien arabera.

e) Plantillaren banaketa ordezkaritza sindikalari dagokionez.

f) Azken urtean enpresan sartu diren langileak eta enpresa utzi dutenak: lanbide taldea, adina eta kontratu mota.

g) Absentismo mailak, absentismoaren arrazoiak zehaztuta, eta azalduta zein diren baimenei, ezintasunei eta beste batzuei dagozkienak.

h) Azken urteko eszedentziak eta horien arrazoiak.

i) Azken urteko igoerak: zein lanbide taldetara eta lanpostutara igo den zehaztuko da, bai eta mugigarritasun geografikoari lotutako igoerak ere.

j) Azken urteko prestakuntza orduak eta prestakuntza ekintzen motak.

Ondokoak ere sartu behar dira diagnostikoan: langileak aukeratu, trebatu eta mailaz igotzeko prozesuetan erabiltzen diren irizpideak eta informazio edota komunikazio bideak; lanbide profilen eta lanpostuen deskribapenetan erabiltzen diren metodoak; enplegu eskaintzetan eta langileak aukeratu, trebatu eta mailaz igotzeko prozesuetan parte hartzeko eskaera orrietan erabiltzen den hizkuntza eta agiri horien edukia.

C) Berdintasun planen helburuak.

Egoeraren diagnostikoa egin ondoren, bildutako datuetan oinarrituta, lortu beharreko helburu zehatzak ezartzen ahalko dira; adibidez, ekintza positiboko neurriak arrazoi objektiborik gabe emakumeen eta gizonen arteko desberdintasunak dauden gaietan, edo zer neurri orokor hartu beharko diren tratu berdintasunaren eta bereizkeriarik ezaren printzipioa eraginkortasunez aplikatzeko.

Helburu horiekin batera doaz horiek lortzeko estrategiak eta praktikak. Lehentasunak izanen dira lana lortzea, prestakuntza, lanbide sailkapena eta sustapena, ordainsarien eta lanaldiaren baldintzak, laneko bizitza eta familia bateragarri egitea, etab., eta, besteak beste, honako hauek:

a) Langileak aukeratzeko eta mailaz igotzeko prozesuetan bereizkeria bertikala eta horizontala eta hizkuntza sexistaren erabilera saihestea. Horrenbestez, entitateetan sartzeko hautapen prozedura gardenak bermatuko dira, enplegu eskaintzak bereizkeriarik gabe idatziz eta zabalduz eta eskaintzen den lanpostuaren eskakizunetarako egokiak diren proba objektiboak ezarriz, pertsonaren jarrerak eta gaitasunak baloratzea xede bakarra dutenak.

b) Emakumeek agintea eta/edo ardura eskatzen duten lanpostuak har ditzaten sustatzea.

c) Emakume gutxiegi dagoen lanpostuetan emakumeak hautatu eta sustatzeko programa berariazkoak ezartzea.

d) Ohiz kanpoko kontratazio motek (lanaldi partzialeko kontratuak eta aldi baterako kontratazioaren modalitateak) emakumezko langileen kolektiboan duten eragina aztertzea, gizonezko langileekin alderatuz, eta behar diren zuzenketa neurriak hartzea, emakumezkoengan eragin handiagoa dutela ikusten bada.

e) Enpresa barneko zein kanpoko prestakuntzarako aukera berdinak ematea gizonei eta emakumeei, emakumeek lanean iraun dezaten, eta emakumeen prestakuntza maila eta enplegu eskariaren baldintzetara moldatzeko gaitasuna areagotzea.

f) Emakumeei berariaz informazioa ematea, gizonezkoek bete ohi dituzten lanpostuetarako prestakuntza ikastaroei buruz.

g) Aukera berdintasunari buruzko berariazko ikastaroak egitea.

h) Soldataren osagarriak aztertzea, horien atzean emakumezko langileen kontrako bereizkeriarik ez dagoela egiaztatzeko.

i) Gizonen eta emakumeen arteko soldata desberdintasunak badaude, horiek zuzentzeko prozesuak sustatu eta epeak ezartzea.

j) Gizonek zein emakumeek familiako bizitza eta lana hobeki uztartu ditzaten lortzea, sentsibilizazio kanpainak eginez eta legezko baimen eta eszedentzien berri zabalduz, etab.

k) Emakumezko langileen osasunari kalte egiten ahal dioten arriskuak atzeman eta zuzentzeko neurriak ezartzea, batez ere emakume haurdunentzat, eta jazarpen morala eta sexuala eragoztea.

D) Entitateek eta langileen ordezkariek berdintasun planak eta araubide iragankorra prestatzeko dituzten eskumenak.

Enpresak egoeraren diagnostikoa egiteko eskumena izanen du. Diagnostiko horretan egiten diren agiriak langileen ordezkariei emanen zaizkie, txostenerako.

Egoeraren diagnostikoa egin ondoren, xedapen hauen eraginpeko entitateek (250 langile baino gehiago dituztenek) langileen ordezkariekin negoziatu beharko dute Berdintasun Plana. Negoziazioaren emaitza edozein dela ere, bai planaren edukia bai hartu beharreko neurriak beti egonen dira aurretik egindako diagnostikoaren mende.

Enpresan Berdintasunerako Plana ezarririk, langileen ordezkariei sei hilean behin emanen zaie haren bilakaeraren berri, eta haiek txostena egiten ahalko dute, egokitzat jotzen badute.

Entitateek hitzarmen kolektibo honen indarraldia akitu arteko epea izanen dute aurreko artikuluetan egoeraren diagnostikoei eta berdintasun planei buruz xedatutakoa aplikatzeko.

Laugarren xedapen gehigarria. LGTBI+ pertsonen berdintasunerako eta ez baztertzeko neurriak.

Hitzarmen hau sinatu duten alderdiek lesbianen, gayen, transexualen, bisexualen eta intersexualen (aurrerantzean, LGTBI+) diskriminazio mota oro erabat arbuiatzen dute, eta entitateetan haiekiko izan daitekeen tratu baztertzaile oro gaitzesten dute.

LGTBI+ pertsonen eskubideak bermatzeko helburuarekin, eta prebentzioaren eta jarduketaren printzipioaren arabera, honako babes neurri hauek planifikatzen dira:

1. LGTBI+ pertsonen tratu berdintasunerako eta ez diskriminatzeko protokoloa.

50 langile baino gehiagoko enpresa edo erakunde guztiek negoziatuko dute langileen legezko ordezkariekin tratu berdintasunerako eta LGTBI+ pertsonen kolektiboa ez diskriminatzeko protokolo bat ezartzea. Hitzarmen honen batzorde paritarioak LGTBI+ pertsonen tratu berdintasunaren eta diskriminaziorik ezaren protokolo sektorial bat adostu beharko du, eta enpresako protokolorik ezean aplikatuko da. Protokoloa langileei aplikatuko zaie, bakoitzak enpresarekin duen lotura juridikoa edozein dela ere, baldin eta beren jarduera beren antolamendu eremuan garatzen badute. Bazkideei, goi-mailako zuzendariei eta gobernu edo zuzendaritza organoko kideei ere aplikatuko zaie, enpresaren antolamendu eremuari dagokionez. Azkenik, aplikatuko zaie, orobat, lanpostu bat eskatzen dutenei, zerbitzua eskaintzen duten langileei, hornitzaileei, bezeroei eta bisitariei ere bai, besteak beste.

2. LGTBI+ pertsonen berdintasuna eta diskriminaziorik eza bermatzeko planifikatutako neurriak.

–LGTBI+ pertsonen bermeak enplegua lortzearen arloan:

Langileak onartzea eta sartzea eta kontratatzea enpresako zuzendaritzaren eskumena da. Hala ere, irizpide objektiboetan eta ez-diskriminatzaileetan oinarritutako hautaketaren prozedura bermatu beharko dute.

1.–Irizpide argiak eta zehatzak ezartzea, hautaketa eta kontratazio prozesuan berma dadin lehentasuna emanen zaiola pertsona horrek lanposturako duen prestakuntzari edo egokitasunari, haren sexu orientazioa eta identitatea edo genero adierazpena gorabehera; arreta berezia eskainiko die bereziki zaurgarriak diren kolektiboetako pertsonei.

2.–Enpresak prestakuntza emanen die zuzendaritza taldeei, Giza Baliabideen Departamentuari eta gainerako arduradunei, hautaketa eta kontratazioa dibertsitatea aintzat hartuta egiteari buruz, eta giza baliabideen kudeaketa dibertsitatean egin eta trans-integratzailea izan dadin, LGTB+ pertsonen enplegua lortzeko estereotipoak desagerrarazteko.

3.–Langileen legezko ordezkaritzak, halakorik balego, langileen hautaketa eta kontratazio prozesuetan aukera berdintasuna errespetatzen dela zainduko du.

4.–Oraindik legezko dokumentazioa aldatu ezin izan duten transexualen kasuan, saihestu eginen da beste izen eta genero adierazpen bat duen dokumentazio ofizial bat aurkeztea kontratazioa ukatzeko arrazoia izatea, lanposturako eskatzen diren baldintzak betetzen badituzte.

–LGTBI+ pertsonen bermeak enplegua lortzearen arloan:

1.–Sailkapena, lanbide sustapena eta mailaz igotzeko araubidea LGTBI+ pertsonen kolektiboarentzako zuzeneko edo zeharkako diskriminaziorik ez eragiteko moduan eginen dira, kualifikazio profesionala eta gaitasuna bezalako elementu objektiboetan oinarrituko dira, eta beren karrera profesionala baldintza berdinetan garatzea bermatuko dute.

2.–Enpresan aukera berdintasunerako batzorderik badago, sustapen eta/edo igoera prozesu guztietan aukera berdintasuna errespetatzen dela zainduko du enpresak.

–LGTBI+ pertsonen bermeak enplegua lortzearen, sentsibilizazioaren eta lengoaiaren arloan:

1.–Enpresak berdintasunari buruzko prestakuntza planetan LGTBI+ pertsonek lan arloan dituzten eskubideei buruzko modulu espezifikoak txertatuko ditu, tratu eta aukera berdintasuna eta diskriminaziorik eza azpimarratuz.

2.–Enpresa osoan aukera berdintasunari eta aniztasunari buruzko prestakuntza sustatzea, erdi-mailako arduradunak eta zuzendaritza barne, gutxienez honako hauek jasoko dituena:

a) Hitzarmen kolektibo honetan jasotako LGTBI+ neurri planifikatuen ezagutza orokorra eta hedapena.

b) Otsailaren 28ko 4/2023 Legean (trans pertsonen berdintasun egiazko eta eragingarrirako eta LGTBI+ pertsonen eskubideak bermatzekoa) sexu, familia eta genero aniztasunari buruz jasotako oinarrizko definizioak eta kontzeptuak ezagutzea.

c) Enpresek informazioa zabaldu beharko dute lantokietan pertsona transexualei enpleguan laguntzeko protokoloaren existentziari buruz, halakorik izanez gero.

d) Enpresek informazioa eta publizitatea eman beharko dute, lantokiko leku ikusgarrian, sexu orientazio eta identitatean edo genero adierazpenean eta sexu ezaugarrietan oinarritutako jazarpen diskriminatzailea edo indarkeria prebenitzeko, hautemateko eta jarduteko protokolo baten berri emateko.

3.–Enpresek ziurtatu beharko dute prestakuntza eskaintzaren deialdi guztiak langile guztiengana iristen direla, eta plantillan balio aniztasun aski dagoela, lanpostu txandakatzea eta mailaz igotzeko aukera handiagoak erraztu eta diskriminazio egoerak saihesteko.

4.–Langile guztien artean sustatzea trans errealitateari buruzko prestakuntza eta sentsibilizazioa.

5.–Enpresak hizkuntza gida inklusibo bat eginen du, aniztasuna errespetatuko duena, eta langile guztiei zabalduko die.

6.–Galdetegiek eta formularioek aukera emanen dute edozein langilerekin sexu identitatea islatzeko, adibidez, "ez bitarra" aukera bat sartuta.

7.–Enpresaren komunikazioetarako erabiltzen diren irudiek edo elementu grafikoek saihestu beharko dute pertsonen sexuari edo generoari buruzko estereotipoak eta rolak errepikatzea.

–LGTBI+ pertsonen bermeak lan ingurune askotarikoen, seguruen eta inklusiboen arloan:

1. Plantillen heterogeneotasuna sustatuko da, askotariko lan ingurune inklusiboak eta seguruak lortzeko. Horretarako, LGTBI+ kolektiboarekiko portaera fobikoen aurkako babesa bermatuko du, bereziki laneko jazarpenari, sexu jazarpenari eta sexuan oinarritutako jazarpenari aurre egiteko protokoloaren bidez.

–LGTBI+ pertsonen bermeak baimen eta onura sozialen arloan:

1.–Enpresak bermatuko die langile guztiei berdintasun baldintzetan baliatzea mediku kontsultara edo lege izapideetara joateko baimenak, bereziki zainduz trans pertsonekiko arreta.

2.–Era berean, LGTBI+ familia desberdinen, ezkontideen, izatezko bikoteen errealitatea hartuko du kontuan, eta bermatuko du baldintza berdinetan baliatu ahal izatea baimen, onura sozial nahiz eskubide guztiak, diskriminaziorik gabe, sexu orientazio nahiz identitateagatik, genero adierazpenagatik eta familia aniztasunagatik.

3.–Familiei dagokienez, arreta berezia jarri beharko da aitatasun baimenaz hitz egitean. Aitaren figura jasotzeaz gain, kontuan hartu behar da gurasoetako batek hartu beharreko baimenak direla, sexua edozein dela ere. Eskubide hori baliatzen duen langileak Langileen Estatutuaren 48 bis artikuluan ezarritako lanaldi epeen arabera egiten ahalko du.

4.–Enpresak trans pertsona haurdunaldian dagoenean behar dituen baimenak emanen ditu, baita enpresan aurreikusitako onura sozialak ere, gainerako langileen eskubide eta baldintza berberetan.

5.–Enpresek konpromisoa hartzen dute generoa baieztatzeko edozein prozesu hasten duten langileei eszedentzia aldi bat baimentzeko, lanpostua gordeta.

–LGTBI+ pertsonen bermeak laneko osasunaren arloan:

1.–Arrisku psikosozialen ebaluazioak egitean, LGTBIfobia haien artean jasotzea bermatuko da, eta LGTBI+ pertsonen espezifikotasunerako beharrezkoak diren itemak sartzea ere bai, esaterako, egiten duten jardueraren ezaugarriak.

AZKEN XEDAPENAK

Azken xedapenetako lehenengoa.–Hitzarmena aldatzeagatik erosteko ahalmenari eusteko bermea.

Lan harremanak hitzarmen honen bidez arautzen hasten diren langileentzat erosteko ahalmenari eusteko bermea ezartzen da. Hala, lehenagoko ordainsarien egituraren arabera jasotzen zituzten zenbatekoen batura (oinarrizko soldata, antzinatasun plusa, hitzarmeneko osagarriak, lanpostuaren osagarriak eta/edo osagarri pertsonalak) hitzarmen honetan ezarritako ordainsarien egituraren arabera jaso beharreko zenbatekoen batura baino handiagoa balitz (oinarrizko soldata, antzinatasun plusa, hitzarmeneko osagarriak eta/edo lanpostu osagarriak, eta/edo osagarri pertsonalak), pertsona horiek eskubidea izanen dute "ad personam osagarri berri" gisa bi zenbatekoen arteko aldea finkatzeko. Osagarri hori, oinarrizko soldata bezala, urtero errebalorizatuko da. Berme honetatik kanpo geratzen dira ardura osagarriak (II. eranskinean zehazten da nola eguneratuko diren).

Azken xedapenetako bigarrena.–Soldatak eta lanaldia berrikusteko akordio espezifikoak, hitzarmen kolektibo hau aurreraeragin egoerara iristen bada.

1. Hitzarmen kolektibo honen aurreraeragin egoeran, hitzarmen honen II. eranskineko Soldata Tauletan jasotako kontzeptu guztiak, "antzinatasuna" izan ezik, urtero eguneratuko dira, Nafarroako Gobernuaren zerbitzura dauden langileen ordainsariaren igoeraren arabera, eta 2026., 2027. eta 2028. urteetarako gutxienez %2ko igoera ezarriko da. Hitzarmenaren batzorde paritarioari dagokio urte bakoitzeko behin-behineko eta behin betiko soldata taulak finkatzea.

2. Hitzarmen kolektibo honen aurreraeragin egoeran, lanaldia honela eguneratzea erabaki da:

  • 2026an, gehieneko lanaldia benetan lan egindako 1612 ordukoa izanen da.
  • 2027an, gehieneko lanaldia benetan lan egindako 1604 ordukoa izanen da.
  • 2028an, gehieneko lanaldia benetan lan egindako 1592 ordukoa izanen da.

Entitate bakoitzak bi aukera hauen artean hautatu beharko du itundutako urteko lanaldia murrizteko: opor egunak gehitzea edo lanaldiaren banaketa aldatzea.

ERANSKINAK

I. ERANSKINA.–NAFARROAKO FORU KOMUNITATEKO EKINTZA ETA ESKU-HARTZE SOZIALAREN HITZARMEN KOLEKTIBOKO JARDUEREN KATALOGOA

Hitzarmen honen eremu funtzionalean honako hauek sartzen dira: 69/2008 Foru Dekretuan (martxoaren 20ko 30/2019 Foru Dekretuak aldatzen du) biltzen diren eremu orokorreko gizarte zerbitzuen zorroa; Gizarte Zerbitzuetarako Estatu Idazkaritzaren 2013ko apirilaren 23ko Ebazpenean bildutako gizarte zerbitzuen erreferentziako katalogoa; eta Administrazio Zentralak edo Nafarroako Gobernuak ordezten, aldatzen edo gehitzen ahal dituztenak, esparru hitzarmen arautzailea dutenak izan ezik.

Eremu funtzionala hobeki ezagutu eta zehazteko, eranskin honetan Nafarroako esku-hartze sozialaren sektoreko I. hitzarmeneko jardueren katalogoa atxiki da. Katalogo honetako zerrenda ez dago itxita; izan ere, hitzarmenaren batzorde paritarioak bere interpretazio egitekoen arabera jarduerak gehitzen ahalko ditu, baldintza hau aintzat hartuta: zerrendan ageri diren gizarteratzeko eta gizarte babeseko jardueren eremu berekoak edo antzeko eremu batekoak izan behar dira.

1. Babesgabezian dauden adingabeei eta gazteei arreta emateko programak; honako hauek dira, besteak beste:

–Adingabeentzako behaketa eta harrera zentroak.

–Egoitzan oinarrizko harrera egiteko programak.

–Egoitza harrera espezializatua egiteko programak.

–Baliabide irekian, autonomia prozesuan dauden gazteei laguntza emateko programak.

–Bakarrik dauden adingabe atzerritarrei arreta egiteko programak.

–Familia harrerako eta adopzio ondoko arretako programa.

–Familian esku hartzeko programak.

–Adopziorako eta adopzioaren aurreko programa.

–Haur eta nerabeak artatzeko taldea.

–Autonomia prozesuan dauden gazteen jarraipenerako programak.

–Adingabe haurdunentzako egoitzen programak.

–Esku-hartze sozialeko programak haurrentzat.

–Neurri judizialak betetzeko programa adingabe arau-hausleentzat.

–Egoitza irekian bizitzeko programa, elkar bizitzeko beste pertsona batekin, familiarekin edo hezkuntza talde batekin.

–Nerabeen heziketarako programa.

–Gurasoen eta seme-alaben arteko indarkeria gertatzen den kasuetan adingabeei eta senideei arreta terapeutikoa emateko programa.

–Arriskuan dauden nerabe eta gazteen garapen pertsonalerako, gizarte integraziorako eta gizarte hezkuntzako hutsuneak betetzeko aurre-tailerrak.

2. Genero indarkeria jasaten duten emakumeei arreta emateko programak; guztiak aipatu gabe, honako hauek dira, besteak beste:

–Emakumeekin esku hartzeko eta arreta, informazioa, aholkuak eta tratamendua emateko zerbitzuak (bai emakume guztiei, oro har, bai modu espezializatuan: genero indarkeria, prostitutak, gizarte arazo espezifikoak dauzkaten emakumeak eta abar).

–Epaitegietan arreta soziala emateko zerbitzuak.

–Etxeko indarkeriaren biktimei arreta emateko zerbitzuak (haurrak, emakumeak eta abar).

–Emakumeentzako eta gizarte bazterketaren arriskuan dauden pertsonentzako eguneko zentroak eta zentro irekiak.

–Harrera zentroak (hezkuntza arloko ekintza, egonaldi mugatuan, tratu txarrak jasan dituzten emakumeentzat, pobrezian dauden pertsonentzat eta gizarte bazterketaren arriskuan dauden beste pertsona batzuentzat).

–Genero arloko tratu txarrak jasan ondoren babespean dauden emakumeentzako etxebizitzak.

–Genero indarkeriaren biktima diren emakumeak hartzeko baliabideak.

–Genero indarkeriaren biktimei osoko arreta emateko baliabideak.

–"Eman aukera bat zure buruari" programa.

3. Familiei laguntzeko programak, honako eremu hauetan:

–Familia elkartzeko guneak.

–Adingabeen eguneko zentroa.

–Familian esku hartzeko programak.

–Arretako, esku hartzeko eta bitartekaritzako programak.

4. Ahulezia sozialean dauden pertsonei arreta eta laguntza emateko programak; honako hauek dira, besteak beste:

–Gizarteratzeko eta laneratzeko taldeak.

–Gizarte bazterketan dauden helduentzako egoitza-arreta.

–Gizarte bazterketan dauden helduei baliabide irekian laguntza ematea.

–Etxerik gabeko pertsonentzako aterpetxeak.

–Gizarte bazterketan, laneratzeko prestatzen edo laneratu aurreko fasean dauden pertsonei gizarteratzen laguntzeko eguneko zentroak.

–Gizarteratzeko eta laneratzeko programa esperimentalak eta programa berritzaileak.

–Lanbiderako orientazioa eta informazioa emateko programak.

–Laneratzeko motibaziorako programen ekintzak.

–Lan programak tutoreen laguntzarekin.

–Iragaitzazko bidarien eta etxerik gabekoen zentroak.

–Housing first programa.

–Jantoki sozialak.

–Gaueko zentroak eta ostatu sozialak.

–Gizarte bazterketaren arriskuan dauden kolektiboentzako zentroak, etxebizitzak eta bestelako egoitza baliabide guztiak.

–Gizarteratzeko eta laneratzeko zerbitzuak.

–Laneratzeko lanbide orientazioko zerbitzuak, nork bere lana sortzeko laguntza eta laneratzeko ibilbideak.

–Informazioa, orientazioa eta aholkuak emateko zerbitzuak, bitartekaritza zerbitzuak eta enpresa sentsibilizaziorako zerbitzuak.

–Gizarte bazterketaren arriskuan dauden kolektiboentzako lana aurkitzeko aukerak hobetzeko zerbitzu integralak.

–Gizarte bazterketaren arriskuan dauden kolektiboei enpresa normaletan sartzen laguntzeko zerbitzua.

–Lan orientazioko zerbitzu terapeutikoak (aurretailerrak, lan bulego teknikoak eta abar).

–Immigratzaileei lehen harrera egiteko zerbitzuak.

–Errefuxiatuentzako zentroak eta etxebizitzak.

–Espetxearen ordezko neurriak betearazteko zerbitzua, adingabeak bazter utzita.

–Tutoretzako eta gizarteratzen laguntzeko zerbitzuak.

–Justiziaren arloko bitartekaritza zerbitzuak (prozedura penala, zibila eta abar).

–Pertsona arrazializatuei arreta emateko zerbitzuak.

–Espetxean dauden pertsonei edo espetxetik irten berri diren pertsonei arreta emateko zerbitzuak.

5. Arreta soziosanitarioa eta laguntza emateko programak; honako hauek dira, besteak beste:

–Gaixo terminalen erosotasuna eta bizi kalitatea hobetzeko zerbitzu psiko-sozialak.

–Doluan ari direnei laguntza emozionala emateko zerbitzuak.

–Gaixoei (GIB gaixoak eta beste batzuk) eta haien senideei laguntza emozionala emateko zerbitzuak.

–GIB eta droga-mendekotasunen prebentziorako eta arretarako zerbitzuak.

–Gizarte bazterketan dauden edo horren arriskuan diren pertsonen errehabilitaziorako zerbitzu soziosanitarioak.

–Gizarte arazo larriak dituzten pertsonei arreta emateko zerbitzuak (janaria, jantokiak, arropa eta oinarrizko bestelako beharrak).

–Gizarte larrialdiko zerbitzuak.

–Osasun eta gizarte baliabideak koordinatzeko zerbitzuak.

–Errefuxiatuei laguntzeko zerbitzuak.

–Pertsona migratzaileei arreta emateko zerbitzuak.

–LGTBI+ pertsonei eta aniztasun sexualari arreta eta laguntza emateko zerbitzuak.

–HIESaren eta beste STI batzuen prebentziorako programa prostituzioan lan egiten duten pertsonentzat.

6. Herritarrei arreta soziokomunitarioa emateko programak; honako hauek dira, besteak beste:

–Esku-hartze sozialeko zerbitzu komunitarioak haurrentzat, nerabeentzat eta gazteentzat.

–Gizarte arloko prebentzio eta sustapeneko zerbitzu komunitarioak.

–Garapen komunitariorako programak.

–Genero indarkeriaren prebentzio komunitarioa eta emakumeen ahalduntzea.

–Esku-hartze soziokomunitariorako taldea (EHSKT).

7. Herritarrentzako gizarte hezkuntzako programak; honako hauek dira, besteak beste:

–Ahulezia sozialean dauden pertsonentzako hezkuntza arautuko programak, prestakuntza eta prestakuntza aurreko moduluak.

–Lantegi eskolak, lanbide etxeak eta enplegu lantegiak (haien ikasleak izan ezik).

8. Gizarte programak kudeatzeko, aztertzeko, prestatzeko, ebaluatzeko, diagnostikatzeko eta antolatzeko programak; honako hauek dira, besteak beste:

–Baliabide materialak, teknologikoak eta giza baliabideak planifikatu eta administratzeko zerbitzuak, zentroak, taldeak eta programak, helburu hauekin: esku-hartze sozialeko lanen eta jarduketen garapena eta ikuskaritza sistematizatzea oinarri teknikoetatik abiatuta, lan horiek eraginkorrak eta eragingarriak izan daitezen.

–Esku-hartze sozialaren arloan diagnostikoak, ikerketak, berrikuntzak eta proposamenak egiteko aholkularitzako zerbitzuak, zentroak, taldeak eta programak.

II ERANSKINA.–NAFARROAKO FORU KOMUNITATEKO EKINTZA ETA ESKU-HARTZE SOZIALEKO II HITZARMEN KOLEKTIBOAREN SOLDATA TAULAK

ESKU-HARTZE SOZIALAREN HITZARMENEKO SOLDATA TAULAK 2025

2025

Oinarrizko soldata (urteko gordina) (12 ordainsari + aparteko 2 ordainsari)

1. TALDEA

29.223,91

2. TALDEA

27.443,80

3. TALDEA

24.809,89

4. TALDEA

22.668,46

Antzinatasuna (12 ordainsari + 2 aparteko ordainsari) (sortzapena 2010/1/1etik aurrera)

44,00

Gaueko lanaren plusa (urteko gordina) (12 paga + aparteko 2 paga)

2.157,53

Txanda-plusa (urteko gordina) (12 paga + aparteko 2 paga)

2.157,53

Larunbat, igande eta jaiegunetako plusa (x benetan lan egindako ordua)

3,60

Jaiegun berezietako plusa (x benetan lan egindako ordua)

5,87

ARDURAREN ETA LANPOSTUAREN OSAGARRI FUNTZIONALAK

Arloko Zuzendaritzaren osagarria (urteko gordina) (12 paga + aparteko 2 paga)

13.184,92

Zerbitzuko Zuzendaritzaren osagarria (urteko gordina) (12 paga + aparteko 2 paga)

11.781,00

1. Koordinazio osagarria (urteko gordina) (12 paga + aparteko 2 paga)

7.683,26

2. Koordinazio osagarria (urteko gordina) (12 paga + aparteko 2 paga)

5.393,83

Arduradunaren osagarria (urteko gordina) (12 paga + aparteko 2 paga)

3.595,89

Psikologo-terapeutaren osagarria (urteko gordina) (12 paga + aparteko 2 paga)

2.000,00

Esku-hartze familiarra adingabeentzako egoitza zentroetan; osagarria

(urteko gordina) (12 ordainsari + aparteko 2 ordainsari)

1.500,00

Irakaskuntzaren osagarria [1. xedapen gehigarria]

(urteko gordina) (12 ordainsari + aparteko 2 ordainsari)

2.480,00

Iragarkiaren kodea: F2513397