Iragarkia

173. ALDIZKARIA - 2025eko irailaren 1a

1. NAFARROAKO FORU KOMUNITATEA

1.7. BESTELAKOAK

33/2025 EBAZPENA, abuztuaren 5ekoa, Enpresen Sustapenerako eta Azpiegituretako zuzendari nagusiak emana, zeinaren bidez aurretiazko administrazio-baimena ematen baita 4,224 MW-eko potentzia instalatuko "Los Mulares" eguzki-instalazio fotovoltaikorako eta haren ebakuazio-azpiegituretarako, Erriberriko eta Tafallako udal mugarteetan. Espedientearen kodea: 5322-CE.

1.–Aurretiazko administrazio-baimenaren eta eraikitzeko administrazio-baimenaren eskaera.

2023ko apirilaren 21ean eta Sektore Elektrikoari buruzko abenduaren 26ko 24/2013 Legean eta Energia elektrikoaren instalazioak baimentzeko prozedurak eta energia elektrikoa garraiatu, banatu, merkaturatu eta haren horniketa egiteko jarduerak arautzen dituen abenduaren 1eko 1955/2000 Errege Dekretuaren 122. eta 130. artikuluetan ezarritakoari jarraikiz, Ríos Renovables SLUk aurretiazko administrazio-baimena eta eraikitzeko administrazio-baimena eskatu zituen 4,224 MW-eko potentzia instalatuko "Los Mulares" eguzki-instalazio fotovoltaikorako eta haren ebakuazio-azpiegituretarako, Erriberriko eta Tafallako udal mugarteetan.

Hasieran aurkeztutako dokumentazio teknikoaren arabera, eguzki-instalazio fotovoltaikoak Erriberriko 2. poligonoko 168. lurzatian du kokapena.

Inbertsore fotovoltaikoen bidez, korronte zuzenean sortzen den energia korronte alterno bihurtzen da, eta energia hori 30 kV-era eraldatzen da transformazio zentroetan.

Energia 30 kV-era eraldatu ondoren, ebakuazio-azpiegiturak 30 kV-eko lurpeko bi linea dira, bi transformazio-zentroetako bakoitzetik abiatuta "La Caya" eguzki-instalazio fotovoltaikoan instalatutako ebaketa-zentroraino doazenak. Ebaketa-zentro horretan jasotzen da eguzki-instalazio fotovoltaiko honek eta sustatzaile berak proiektatutako beste hiru eguzki-instalazio fotovoltaikok sortutako energia.

Puntu horretatik aurrera, instalazioko ebakuazio-azpiegiturak proiektu bereizietan aurkezten dira, baina ebakuazioa partekatzen dute sustatzaile berak proiektatutako eta "La Caya" espedientean (5322-CE ) tramitatzen diren beste hiru eguzki-instalazioekin.

2.–Jendaurreko informazioaren lehen tramitea eta ukitutako administrazio publiko eta erakundeei kontsulta egitekoa.

Abenduaren 1eko 1955/2000 Errege Dekretuaren 125. artikulua aplikatuz (errege dekretuak Energia elektrikoaren instalazioak baimentzeko prozedurak eta energia elektrikoa garraiatu, banatu, merkaturatu eta haren horniketa egiteko jarduerak arautzen ditu), eskaera jendaurrean jarri zen 30 egun balioduneko epean, iragarkia paratuta 2023ko 149. Nafarroako Aldizkari Ofizialean, uztailaren 18koan; dokumentazioa Nafarroako Gobernu Irekiaren web-fitxan argitaratu zen. Era berean, informazioa Erriberriko eta Tafallako udaletara bidali zen, jendaurrean jar zezaten dagozkien ediktu-tauletan, epe berean.

Jasotako alegazioak hauek dira, aurkeztutako hurrenkeran:

• 1. alegazioa.–Energía Inagotable de Keneo SLrena, 2023ko abuztuaren 17koa.
• 2. alegazioa.–Energía Inagotable de Kyoko SLrena, 2023ko abuztuaren 17koa.
• 3. alegazioa.–Bodegas Pagos de Araiz SArena, 2023ko abuztuaren 29koa.
• 4. alegazioa.–"Sustrai Erakuntza" fundazioarena, 2023ko abuztuaren 31koa.
• 5. alegazioa.–"Ongaiz-Zangozerriko Ekologistak Martxan" elkartearena, 2023ko abuztuaren 31koa.
• 6. alegazioa.–"Landazuria-Ecologistas en Acción de la Ribera" elkartearena, 2023ko abuztuaren 31koa.

Aldi berean, eta abenduaren 1eko 1955/2000 Errege Dekretuaren 127. eta 131. artikuluetan ezarritakoa aplikatuz, ukitutako gainerako administrazio publikoei eta entitateei kontsulta egin zitzaien, dagozkien txostenak egin zitzaten.

Taulan ageri diren erakundeei kontsulta egin zitzaien, eta bertan adierazitako txostenak jaso ziren:

Ingurumeneko zuzendari nagusiaren apirilaren 26ko 330E/2024 Ebazpenaren bidez, ebatzi zen "Baretón", "Los Mulares" eta "Las Planillas" eguzki-instalazio fotovoltaikoen proiektuek ondorio nabarmenak izan zitzaketela ingurumenaren gainean eta, zehazki, ukipen handia interes bereziko estepa-espezie katalogatu batzuen gainean –haietako batzuk desagertzeko arriskuan daude–; hori dela eta, proiektu horiek aurrera eraman nahi izanez gero, beharrezkoa zen ingurumen-inpaktuaren ebaluazio arrunta egitea.

3.–Jendaurreko informazioaren bigarren tramitea eta ukitutako beste administrazio publiko eta erakunde batzuei kontsulta egitekoa.

Aurrekoa ikusita, entitate sustatzaileak eguzki-instalazio fotovoltaikoa beste kokapen batean jartzeko proiektua eta ingurumen-inpaktuaren azterketa aurkeztu zituen, ingurumen-ebaluazio arruntaren prozedura betetzeko.

Aurkeztutako dokumentazio tekniko berriaren arabera, eguzki-instalazio fotovoltaikoak Erriberriko 12. poligonoko 349. lurzatian du kokapena orain, eta honako hauek dira haren osagaiak:

–6.072 modulu fotovoltaiko, unitateko 700 W-eko potentziakoak, guztira puntako 4.250,40 MWp-ko potentzia izateko, eta 6,9 hektarea inguruko azalera okupatuarekin.

–12 inbertsore fotovoltaiko, 352 kW-eko potentzia izendatua eta 4.224 kWn-ko potentzia instalatua dutenak.

–2 transformazio-zentro, 2.500 kVA-koak.

Inbertsore fotovoltaikoen bidez, moduluek korronte zuzenean sortzen duten energia korronte alterno bihurtzen da, eta energia hori transformazio-zentroetako behe-tentsioko armairuraino eramaten da, 30 kV-era eraldatzeko.

Energia 30 kV-era behin eraldatuta, eguzki-instalazio fotovoltaikoaren proiektu berrian aurreikusitako ebakuazio-azpiegiturak beste lurzati batzuetan barna doaz "La Caya" eguzki-instalazio fotovoltaikoan dagoen ebakitze-zentroraino, eta bertatik aurrera eraldaketa eta ebakuazio-azpiegiturak hasiera bateko proiektuan jasota daude eta 5322-CE "La Caya" espedientearen barruan tramitatzen ari dira.

Horregatik guztiagatik, abenduaren 1eko 1955/2000 Errege Dekretuaren 125. artikuluan eta Ingurumen Ebaluazioari buruzko abenduaren 9ko 21/2003 Legearen 36. artikuluan xedatutakoa betez, eskaera berria jendaurrean jarri zen 30 egun balioduneko epean, iragarkia 2025eko 18. Nafarroako Aldizkari Ofizialean, urtarrilaren 28koan, eta 2023ko apirilaren 19ko Diario de Navarra egunkarian argitaratuta, eta dokumentazioa Nafarroako Gobernu Irekiaren dagokion web-fitxan argitaratu zen.

Era berean, iragarkia Erriberriko Udalari bidali zitzaion, iragarki-taulan jendaurrean jar zezan, epe berean, eta espedientean jasota daude egintza horiek egiaztatzeko eginbideak.

Jendaurreko informazioaren bigarren tramitean honako alegazio hau jaso zen:

• 7. alegazioa.–Aguacanalena, 2025eko apirilaren 11koa.

Jendaurreko informazioaren bigarren tramitearekin batera, eta abenduaren 1eko 1955/2000 Errege Dekretuaren 127. eta 131. artikuluetan ezarritakoari jarraikiz, aurkeztutako dokumentazio tekniko berria igorri zitzaien ukitutako erakundeei, txostenak egin zitzaten. Taulan ageri diren erakundeei kontsulta egin zitzaien, eta zenbakitutako txostenak jaso ziren, taulan bertan adierazitako egunetan:

4.–Sustatzaileari alegazioak eta txostenak bidaltzea eta emandako erantzuna.

Bat etorriz ezarrita dagoenarekin abenduaren 1eko 1955/2000 Errege Dekretuaren 126., 127. eta 131. artikuluetan, Industria Antolamenduaren, Azpiegitura Energetikoen eta Meatzeen Zerbitzuak Ríos Renovables SLUri igorri zizkion jasotako alegazioak eta txostenak, eta entitate sustatzaileak ere horiei erantzuteko agiriak bidali zituen. Espedientean dago aipatutako dokumentazio guztia.

Edukia eta azterketa laburbilduta ageri dira ebazpen honen I. eta II. eranskinetan.

5.–Ingurumen-inpaktuaren adierazpena eta lurzoru urbanizaezinean jarduerak egiteko baimena.

Ingurumeneko zuzendari nagusiaren maiatzaren 2ko 348E/2025 Ebazpenaren bidez, ingurumen-inpaktuaren adierazpena egin zen, proiektu honen aldekoa, ebazpenean bertan jasotako neurriak betetzeko baldintzarekin: "Los Mulares" eta "Baretón" eguzki-instalazio fotovoltaikoak eta haien ebakuazio-azpiegiturak, Erriberriko udal mugartean, Ríos Renovables SLUk sustatuta.

Lurralde Antolamenduko zuzendari nagusiaren abuztuaren 1eko 384E/2025 Ebazpenaren bidez, lurzoru urbanizaezinean jarduerak egiteko baimena eman zen proiekturako, ebazpen horretan jasotako determinazioak betetzera behartuta, haien menpe baitago. Besteak beste, ebazpen horrek eskatzen du "Los Mulares" eguzki-instalazio fotovoltaikotik kentzea iparraldean eta ekialdean dauden jarraitzaileen bi azalera txiki, kota eta malda handienekoak.

Era berean, Lurralde Antolamenduko zuzendari nagusiaren ebazpenak ezartzen duenez, Enpresen Sustapenerako eta Azpiegituretako Zuzendaritza Nagusiak eraikitzeko administrazio-baimena eman aurretik, proiektua igorriko da, ebazpen honetan adierazitako neurriak betetzen direla egiaztatzeko.

Ebazpen honetan ezarritakoa ikusita, 2025eko abuztuaren 4an, Ríos Renovables SLUk ekipoen banaketa berria planteatzen duen dokumentu teknikoa aurkeztu zuen.

6.–Aurretiazko administrazio-baimena emateko proposamena.

Sektore Elektrikoari buruzko abenduaren 26ko 24/2013 Legean eta abenduaren 1eko 1955/2000 Errege Dekretuan xedatutakoa betez, Ríos Renovables SLUren gaitasun legala, teknikoa eta ekonomikoa egiaztatu da. Era berean, abenduaren 1eko 1955/2000 Errege Dekretuaren 123.2 artikuluaren arabera, egiaztatu da 30/66 kV-eko Promotores Tafalla azpiestazioaren erabilera partekatuari buruzko akordio loteslea dagoela alderdientzat.

Abenduaren 26ko 24/2013 Legearen 53. artikuluan xedatutakoari jarraikiz, espedientean jaso dira "Los Mulares" eguzki-instalazio fotovoltaikoa banaketa sarean sartzeko eta bertara konektatzeko baimenak –emana du 4,02 MW-eko sarbide-ahalmena eta 4,224 MW-eko potentzia instalatua–, I-DE Redes Eléctricas Inteligentes SAUk emanik.

Aurkeztutako dokumentazioa ikusita, eta jarraikiz xedatuta dagoenari Sektore Elektrikoari buruzko abenduaren 26ko 24/2013 Legean, Industria Antolamenduaren, Azpiegitura Energetikoen eta Meatzeen Zerbitzuko Azpiegitura Energetikoen Atalaren ondorioa da prozedura behar bezala egin dela, eta, hortaz, proposatzen du aurretiazko administrazio-baimena ematea Ríos Renovables SLUri, energia elektrikoa ekoizteko instalazio honetarako eta haren ebakuazio-azpiegituretarako: 4,224 MW-eko potentzia instalatuko "Los Mulares" eguzki-instalazio fotovoltaikoa, Erriberriko eta Tafallako udal mugarteetan.

Adierazitakoarekin bat, eta erabiliz Nafarroako Foru Komunitateko Administrazioari eta foru-sektore publiko instituzionalari buruzko martxoaren 11ko 11/2019 Foru Legearen 32. artikuluak ematen dizkidan eskudantziak,

EBAZTEN DUT:

1. Ríos Renovables SLUri aurretiazko administrazio-baimena ematea energia elektrikoa ekoizteko 4,224 MW-eko potentzia instalatuko "Los Mulares" eguzki-instalazio fotovoltaikorako eta haren ebakuazio-azpiegituretarako, Erriberriko eta Tafallako udal mugarteetan.

2. Aurretiazko administrazio-baimen hau emanda ere, instalazioa gauzatzeko beharrezkoak diren kontzesio, lizentzia eta baimen guztiak, publikoak nahiz pribatuak, lortu beharko ditu instalazioaren eskatzaileak, aplikatzekoak diren beste xedapen batzuekin bat.

3. Ebazpen hau igortzea Industria Antolamenduaren, Azpiegitura Energetikoen eta Meatzeen Zerbitzuari, Ingurumen Ebaluaziorako Atalari, Paisaiaren eta Landa-lurzoruaren Atalari, Baso Plangintzaren Atalari, Herri-lanen eta Azpiegituren Zuzendaritza Nagusira, Ondare Historikoaren Zerbitzuko Ondare Arkitektonikoaren Atalari eta Erregistroaren, Ondasun Higigarrien eta Arkeologiaren Atalari, behar diren ondorioak izan ditzan.

4. Ebazpen hau Nafarroako Aldizkari Ofizialean argitaratzea, orok jakin dezan.

5. Ebazpen hau jakinaraztea Ríos Renovables SLUri, i-DE Redes Eléctricas Inteligentes SAUri, AUDENASAri, CANASAri, ENAGASi, Energía Inagotable de Keneo SLri, Energía Inagotable de Kyoko SLri, Bodegas Pagos de Araiz SAri, "Sustrai Erakuntza" fundazioari, "Ongaiz-Zangozerriko Ekologistak Martxan" elkarteari, "Landazuria-Ecologistas en Acción de la Ribera" elkarteari eta Aguacanali, eta ohartaraztea ebazpenak ez duela administrazio bidea amaitzen eta haren aurka gora jotzeko errekurtsoa jartzen ahal dela, Industriako eta Enpresen Trantsizio Ekologiko eta Digitalerako kontseilariari zuzendua, jakinarazi eta biharamunetik hilabeteko epean. Hartan espediente kodea adierazi beharko da.

6. Ebazpen hau jakinaraztea Erriberriko eta Tafallako udalei eta Ebroko Konfederazio Hidrografikoari, eta aditzera ematea ezen honen kontra administrazioarekiko auzi-errekurtsoa jartzen ahal dela, eskumena duen ordena jurisdikzionalari zuzendua, bi hilabeteko epean, honako hau jakinarazi eta biharamunetik hasita, alde batera utzi gabe Nafarroako Gobernuan aldez aurreko errekerimendua egin ahal izatea, Administrazioarekiko Auzien Jurisdikzioa arautzen duen uztailaren 13ko 29/1998 Legearen 44. artikuluan ezarritako moduan eta epean.

Iruñean, 2025eko abuztuaren 5ean.–Enpresen Sustapenerako eta Azpiegituretako zuzendari nagusia, Iñigo Arruti Torre.

I. ERANSKINA.–JASOTAKO ALEGAZIOAK

Jaso diren alegazioen laburpena eta analisia azalduko dira jarraian.

1. alegazioa.–Energía Inagotable de Keneo SLrena.

2023ko abuztuaren 17an, Energía Inagotable de Keneo SLk alegazio bat aurkeztu zuen, adierazteko Industria eta Energia Ministerioarekin tramitatzen ari dela 49,5 MW-eko "Keneo" haize-parkearen eta haren ebakuazio-azpiegituren aurretiazko administrazio-baimena, eta adierazten du "La Caya" eguzki-instalazio fotovoltaikoaren proiektuko ebakuazio-lineak "Keneo" haize-parkearen ebakuazio-linea ukituko lukeela.

Erantzuna:

Alegazio hori ikusita, entitate sustatzaileak erantzun zuen alegazioan ez dela zehazten zein diren bi proiektuen arteko ukipenak, baina, nolanahi ere, "La Caya" eguzki-instalazio fotovoltaikoaren ebakuazio-linea lurpetik doala eta "Keneo" haize-parkearena, aldiz, airetik doala, eta bi proiektuen tramitazio egoerak ez duela lehenesten proiektu bat bestearen aurretik.

Hala eta guzti ere, bi proiektuak inguru horretan ezartzea errazteko eta gerta litezkeen ukipenak konpontzeko, entitate sustatzaileak prest dago bere lanak entitate alegatzailearekin koordinatzeko, bi proiektuek aurrera eginez gero.

2. alegazioa.–Energía Inagotable de Kyoko SLrena.

2023ko abuztuaren 17an, Energía Inagotable de Kyoko SLk alegazio bat aurkeztu zuen, Energía Inagotable de Keneo SLk aurkeztutakoaren ildo eta irismen berekin (1. alegazioa).

Erantzuna:

Alegazio horri entitate sustatzaileak 1. alegazioari emandako erantzun bera eman dio.

3. alegazioa.–Bodegas Pagos de Araiz SArena.

2023ko abuztuaren 29an, Bodegas Pagos de Araiz SAk alegazio bat aurkeztu zuen, adierazteko "Las Planillas", "Los Mulares", "La Caya" eta "Baretón" eguzki-instalazio fotovoltaikoen proiektuen 30 kV-eko erdi-tentsioko lurpeko linearen trazadurak ukipenak izanen dituela "Araiz" eguzki-instalazio fotovoltaikoan, zeinak aurretiazko administrazio-baimena eta eraikitzeko administrazio-baimena baititu, bai eta onura publikoa zehazki deklaratuta ere, azaroaren 4ko 138/2022 Ebazpenaren bidez entitate alegatzaileari emanak. "Las Planillas", "Los Mulares", "La Caya" eta "Baretón" eguzki-instalazio fotovoltaikoen proiektuak 2023ko 149. Nafarroako Aldizkari Ofizialean argitaratu ziren, uztailaren 18koan. Entitate alegatzaileak proiektuak aldatzeko eskatzen du, "Araiz" eguzki-instalazio fotovoltaikoari kalterik ez eragiteko.

Erantzuna:

Entitate sustatzaileak adierazi duenez, lineen artean gerta daitezkeen gurutzaketek ez dakarte haien arteko bateraezintasunik, eta, nolanahi ere, aplikatu beharreko araudian ezarritako baldintzak errespetatuko direla dio, eta eskura dituen ahalegin guztiak eginen dituela "Araiz" eguzki-instalazio fotovoltaikoari kalte edo galera ahalik eta txikiena eragiteko.

4. alegazioa.–"Sustrai Erakuntza" fundazioa.

2023ko abuztuaren 31n, "Sustrai Erakuntza" fundazioak alegazio-idazki bat aurkeztu zuen, bi ataletan egituratuta.

Lehenengoa Nafarroan haize-parkeak eta eguzki-parkeak instalatzeko plangintzarik ezari buruzkoa da. Horren arabera, proiektuak ez du aztertzen Nafarroako energia-egoera, ez eta sortutako CO2 isuriak ere, eta ingurumen ukipen larriak eragiten ditu naturaguneetan.

Bigarrenen ataleko alegazioek lotura zuzena dute "Las Planillas", "Los Mulares", "La Caya" eta "Baretón" eguzki-instalazio fotovoltaikoen proiektuekin eta horien ebakuazio-azpiegiturekin eta dakarten ingurumen-inpaktuarekin, eta ondorio gisa adierazten da hura Nafarroako ingurumen eta gizarte balioentzat kaltegarria litzatekeela eta horregatik eskatzen du hura bertan behera uzteko eta, horrekin lotuta, bidean diren mota horretako proiektu guztiak ere geldiarazteko, eta Nafarroan behar den energia-ereduari buruzko gogoeta eta plangintza prozesu egoki bat abian jartzeko. "Las Planillas", "Los Mulares", "La Caya" eta "Baretón" eguzki-instalazio fotovoltaikoen proiektuak 2023ko 149. Nafarroako Aldizkari Ofizialean argitaratu ziren, uztailaren 18koan.

Azkenik, proiektuan interesdun gisa onartzeko eta hari buruz emanen den ebazpenaren berri emateko eskatzen du.

Erantzuna:

Proiektua Nafarroako energia-egoerarako egokia izateari dagokionez, esan beharra dago proiektuan Sektore Elektrikoari buruzko abenduaren 26ko 24/2013 Legeak ezartzen dituen baldintzak eta helburuak betetzen direla, eta bat datorrela Estatuko sektore elektrikoaren planarekin eta 2030erako Nafarroako Energia Planarekin, zeinak, edonola ere, izaera orientagarria baitu.

Gainerako ingurumen gaiak Ingurumeneko zuzendari nagusiaren apirilaren 26ko 330E/2024 Ebazpenean ebaluatuta daude, haren bidez proiektuaren aldeko ingurumen ukipenen txostena egin baitzen.

Produktibitate handiko eta lurralde-izaerako nekazaritza-lurzoruaren galera Lurralde Antolamenduko zuzendari nagusiaren abuztuaren 1eko 384E/2025 Ebazpenean ebaluatu da. Ebazpen horren bidez, lurzoru urbanizaezinean jarduerak egiteko baimena ematen da proiekturako.

Azkenik, Administrazio Publikoen Administrazio Prozedura Erkideari buruzko urriaren 1eko 39/2015 Legearen 4. artikuluan xedatutakoaren arabera, interes ekonomiko eta sozialen ordezkari diren elkarte eta erakundeak interes kolektibo legitimoen titular izanen dira, legeak onartzen dituen baldintzetan.

5. alegazioa.–"Ongaiz-Zangozerriko Ekologistak Martxan" elkartea.

2023ko abuztuaren 31n, "Ongaiz-Zangozerriko Ekologistak Martxan" elkarteak alegazio idazki bat aurkeztu zuen. Bertan biltzen dira Nafarroako energia-egoerari buruzko azterketa orokorra, honelako proiektuen inpaktuaren azalpena eta proposatutako aukerak edo konponbideak: energia gutxiago kontsumitzea, energia efizientzia, autokontsumoa, erregai fosilen ordez energia berriztagarriak erabiltzea eta Ingurumen Erantzukizunari buruzko Legea aldatzea.

Gainera, atal batean aztertzen da zer ingurumen-balio dituen "Las Planillas", "Los Mulares", "La Caya" eta "Baretón" eguzki-instalazio fotovoltaikoen eta haien ebakuazio-azpiegituren proiektuen inguruneak, baita zer ingurumen-inpaktu duten ere, eta ondorio gisa adierazten da hura Nafarroako ingurumen eta gizarte balioentzat kaltegarria litzatekeela. Horregatik eskatzen du hura bertan behera uzteko eta, horrekin lotuta, bidean diren mota horretako proiektu guztiak ere geldiarazteko, eta Nafarroan behar den energia-ereduari buruzko gogoeta eta plangintza prozesu egoki bat abian jartzeko.

Azkenik, proiektuan interesdun gisa onartzeko eta hari buruz emanen den ebazpenaren berri emateko eskatzen du.

Erantzuna:

"Sustrai Erakuntza" fundazioari emandako erantzuna (4. alegazioa).

6. alegazioa.–"Landazuria-Erriberako Ekologistak Martxan" elkartea.

2023ko abuztuaren 31n, "Landazuria-Erriberako Ekologistak Martxan" elkarteak alegazio idazki bat aurkeztu zuen, "Ongaiz-Zangozerriko Ekologistak Martxan" elkarteak aurkeztutakoaren testu bera zeukana (5. alegazioa).

Erantzuna:

"Sustrai Erakuntza" fundazioari emandako erantzuna (4. alegazioa).

7. alegazioa.–Aguacanal.

2025eko apirilaren 11n, Aguacanalek alegazio-idazki bat aurkeztu zuen, eta bertan adierazi zuen proiektuan deskribatutako obrak egiteak ukipenak eraginen dituela Aguacanalek kudeatutako azpiegituretan (bideak, drainatzeak, hodiak), eta, obrak egiteak eremu ureztagarriko azpiegituretan ahalik eta eragin txikiena izanen duela bermatzeko, beharrezkoa dela baldintza teknikoak eskatzea berari, enpresa emakidaduna den aldetik, proiektu-fasetik hasita.

Erantzuna:

Entitate sustatzaileak onartu egin du, eta adierazi du entitate alegatzailearekin harremanetan jarriko dela eskatutako baldintza teknikoak tramitatzeko.

II. ERANSKINA.–JASOTAKO TXOSTENAK

Jasotako txostenen laburpena eta analisia azalduko dira jarraian.

1. txostena.–CANASA.

2023ko uztailaren 19an, CANASAk txosten bat aurkeztu zuen, eta adierazi zuen "Las Planillas", "Los Mulares", "La Caya" eta "Baretón" eguzki-instalazio fotovoltaikoen eta ebakuazio-azpiegituren proiektuek ez dutela ukipenik eragiten Canal de Navarra SA Estatuko Merkataritza Sozietateak kudeatzen dituen instalazioetan. Proiektuak 2023ko 149. Nafarroako Aldizkari Ofizialean argitaratu ziren, uztailaren 18koan.

1 bis txostena.–CANASA.

2025eko otsailaren 13an, txosten bat aurkeztu zuen, eta adierazi zuen "Los Mulares" eta "Baretón" eguzki-instalazio fotovoltaikoen proiektu berriek (2025eko 18. Nafarroako Aldizkari Ofizialean argitaratu ziren, urtarrilaren 28koan) partekatzen dutela sortutako energiaren ebakuazioa, "La Caya" eguzki-instalazio fotovoltaikoraino eramateko, eta ibilbide horretan gurutzaketa bat dagoela Canal de Navarra SAk kudeatzen dituen ubidearen 19. adarreko hoditeriarekin eta 38. zerbitzu-bidearekin. Eragin horien aurrean, CANASAk errespetatu beharreko zenbait ohar ezartzen ditu, eta entitate sustatzaileak horiek betetzeko konpromisoa hartzen du, eskatutako babes katodikoko azterketa osagarria barne.

2. txostena.–Erriberriko Udala.

2023ko abuztuaren 2an, Erriberriko Udalak aldeko hirigintza-txostena aurkeztu zuen, baldintza hauekin: obra-lizentzia lortu aurretik, aurreikusitako eraikinek udal-araudia betetzen dutela justifikatzen duen dokumentazioa aurkeztea; Erriberriko udal mugartean ebakuazio-lineak duen eragin ekonomikoaren kuantifikazioa; ebakuazio-lineako zangen tipologia argitzea; eta eraikuntzaren hondakinak behar bezala kudeatzeko fidantza/abala ordaintzea.

3. txostena.–Ondare Historikoaren Zerbitzuko Ondare Arkitektonikoaren Atala.

2023ko abuztuaren 2an, Ondare Historikoaren Zerbitzuko Ondare Arkitektonikoaren Atalak txosten bat aurkeztu zuen, adierazteko "Las Planillas", "Los Mulares", "La Caya" eta "Baretón" eguzki-instalazio fotovoltaikoen proiektuek ez dutela ukipenik eragiten Ondare Arkitektonikoaren Atalaren eskumeneko gaietan.

4. txostena.–Baso Plangintzarako Atala.

2023ko abuztuaren 4an, Baso Plangintzarako Atalak aldeko txostena aurkeztu zuen, eta, bertan, abelbideen gaineko ukipena minimizatzeko baldintza batzuk planteatzen dira. Entitate sustatzaileak konpromisoa hartzen du horiek betetzeko, eta, gainera, hesitik 5 metroko tartea errespetatuko du Erriberriko 2. poligonoko 150. katastro-lurzatiaren hegoaldeko mugan.

4 bis txostena.–Herri-lurren Atala.

"Los Mulares" eguzki-instalazio fotovoltaikoaren kokapen berria dela eta, haren ebakuazio-azpiegiturek, energia "La Caya" eguzki-instalazio fotovoltaikoraino eramaten dutenek, gurutzatu egiten dute abelbide bat, zehazki, 46. iraganbidea, Erriberriko udal mugartean egiten duen tartean, lurpetik gurutzatu ere. Ukipen hori ikusita, Herri-lurren Atalak errespetatu beharreko zenbait ohar ezartzen ditu, eta entitate sustatzaileak horiek betetzeko konpromisoa hartzen du.

5. txostena.–Tafallako Udala.

2023ko irailaren 7an, Tafallako Udalak aldeko hirigintza-txostena aurkeztu zuen, eta bertan adierazi proposatutako proiektua bateragarria dela Tafallako indarreko HAPOaren hirigintza arau orokorren 63. artikuluan ezarritako babes araubidearekin, bai eta Erdialdeko Eremuetako LAP 4 planaren PN6 eranskinean ezarritakoarekin.

6. txostena.–ENAGAS.

2023ko irailaren 7an, ENAGASek aldeko txostena aurkeztu zuen, baldintza orokor eta partikular batzuk betetzeko baldintzarekin, eta entitate sustatzaileak horiek betetzeko konpromisoa hartu zuen.

7. txostena.–AUDENASA.

2025eko otsailaren 17an, AUDENASAk txosten bat aurkeztu zuen, non ikusten baita AP-15 autobidea lurpeko kanalizazio berri batek ukitzen duela, eta kanalizazio hori autobidearen azpitik igarotzen dela pontoi batetik, 41+600 KPan, gutxi gorabehera. Ukipen horri dagokionez, adierazi du ez dagoela eragozpenik eskatutakoa baimentzeko, egiaztatzen bada ez dagoela asfalto-geruzaren azpian pontoiaren parte den egiturazko hormigoizko lauzarik, eta, halakorik balego, proiektuan aurkeztutako konponbidea ezin izanen litzatekeela egin eta zulaketa gidatu bat egin beharko litzatekeela.

Erantzuna:

Entitate sustatzaileak konpromisoa hartzen du entitate alegatzailearekin harremanetan jartzeko, egiturazko hormigoizko lauzarik ez dagoela egiaztatzeko, eta, hala ez bada, alegazioan bertan jasotzen dena egiteko.

Iragarkiaren kodea: F2510579