Iragarkia

145. ALDIZKARIA - 2025eko uztailaren 21a

1. NAFARROAKO FORU KOMUNITATEA

1.7. BESTELAKOAK

564E/2025 EBAZPENA, ekainaren 22koa, Ingurumeneko zuzendari nagusiak emana, zeinaren bidez ingurumen inpaktuaren adierazpena ematen baita Ríos Renovables SLUk Pitillas eta Erriberri udal mugarteetan sustatutako «Las Planillas» eguzki instalazio fotovoltaikoaren proiekturako eta lotutako ebakuazio azpiegiturarako.

Biodibertsitatearen eta Arrantza Kudeaketaren Zerbitzuan Pitillas udalerrian eraikiko den «Las Planillas» eguzki instalazio fotovoltaikoaren proiektuaren eta Pitillas eta Erriberri udal mugarteetan ezarriko diren instalazioari lotutako ebakuazio azpiegituren ingurumen inpaktuaren ebaluazio arrunta hasteko eskaera sartu da. Nafarroako Gobernuko Industria Antolamenduaren, Azpiegitura Energetikoen eta Meatzeen Zerbitzuak igorri du, eta sustatzailea Ríos Renovables SLU da.

1. Ingurumen inpaktuaren ebaluazio arruntaren prozedura izapidetzea.

Ingurumen ebaluazioari buruzko abenduaren 9ko 21/2013 Legearen 36. artikuluaren arabera, Industria Antolamenduaren, Azpiegitura Energetikoen eta Meatzeen Zerbitzuak, organo eskudun gisa, 30 egunez jendaurrean jarri zituen «Las Planillas» eguzki instalazio fotovoltaikoaren eta haren ebakuazio azpiegituren proiektua eta ingurumen inpaktuaren azterketa, 2025eko apirilaren 3ko Nafarroako Aldizkari Ofizialean, 67. zenbakian, iragarkia argitaratuta. Aguacanal Nafarroako ubideko eremu ureztagarrien sozietate emakidadunaren alegazio bakarra jaso da, proiektuak eremu ureztagarriko azpiegiturei eragiten ez diela ziurtatzeko. Ez da jaso ingurumen edukirik duen alegazio idazkirik.

Aldi berean, organo eskudunak ukitutako administrazio publikoei eta pertsona interesdunei kontsulta egin zien, Ingurumen Ebaluazioaren Legearen 37. artikuluaren arabera.

I. eranskinean laburbildu dira organo eskudunak gauzatutako jendaurreko informazio izapidearen eta ukitutako administrazio publikoei eta pertsona interesdunei zuzendutako kontsulten emaitzak.

2025eko maiatzaren 26an, Ríos Renovables SLUk proiektuaren ingurumen inpaktuaren ebaluazio arrunta hasteko eskaera aurkeztu zion Industria Antolamenduaren, Azpiegitura Energetikoen eta Meatzeen Zerbitzuari, Ingurumen ebaluazioari buruzko abenduaren 9ko 21/2013 Legearen 39. artikuluan adierazitako agiriekin batera.

2025eko maiatzaren 28an, Azpiegitura Energetikoen Atalak dokumentazio guztia igorri zion Biodibertsitatearen eta Arrantza Kudeaketaren Zerbitzuari, ingurumen organoa izanik, espedientearen azterketa teknikoari ekiteko eta ingurumen inpaktuaren adierazpen egokia egiteko.

Ingurumen inpaktuaren ebaluazio hau sustatzaileak aurkeztutako dokumentazioaren gainean egin da, 2025eko otsailean «4,32 MW-ko sareari konektatutako "Las Planillas" eguzki instalazio fotovoltaikoaren proiektuaren bigarren aldaketa» proiektuaren ingurumen inpaktua ebaluatzeko eskaera egin ondoren. Era berean, ebaluazioak kontuan hartu ditu sustatzaileak ingurumen inpaktuaren azterketa dokumentuan aztertu dituen lotutako inpaktuak eta jendaurreko informazio eta kontsulta izapideetan azaleratu direnak.

Ebaluazioak ez ditu eremu hauek barne hartzen: instalazio eta gailu elektrikoen segurtasuna, laneko segurtasun eta osasuna, hirigintza, lurraldearen antolamendua, bide segurtasuna eta araudi erregulatzailea zein berariazko instrumentuak izanik ingurumen ebaluazio honen irismen eremutik kanpo gelditzen diren gainerako eremuak.

2. Proiektuen azalpena eta kokalekua.

«Las Planillas» eguzki instalazio fotovoltaikoaren proiektua Aguilar de Abajo izeneko parajean proiektatu da, Pitillasko udal mugarteko 3. poligonoko 422 lurzatian. Hesitutako eremuak 9,66 ha inguruko azalera okupatuko du.

Instalazioak 4,320 MW-eko isurketa potentzia mugatua eta moduluetan 4,528 MW-eko potentzia instalatua izatea proiektatzen da. 12 inbertsore eta 2 transformazio zentro beharko dira. Transformazio zentroak hormigoiz edo antzeko material batez egindako 20 m² inguruko eraikin prefabrikatu batean kokatuko dira. Hor egonen dira 30/0,8 kV-eko transformadorea eta sarrerako, irteerako eta babeserako gelaxkak. Transformazio zentroetatik abiatzen dira lurpeko eroanbideak, 30 kV-eko tentsio ertaineko konexio lineekin, instalazioaren perimetroaren barruan dagoen babes eta neurketa zentroraino (BNZ) doazenak. Zentroa hormigoi prefabrikatuzko eraikin batean egonen da eta 20 m² inguruko azalera okupatuko du.

«Las Planillas» instalazio fotovoltaikoaren BNZtik ebakuatzen da ekoiztutako energia, 6.835 m-ko luzera duen 30 kV-eko lurpeko linea baten bidez, «La Caya» instalazio fotovoltaikoaren BNZraino. «La Caya» instalazio fotovoltaikoak, energia sarerako konexio punturaino ebakuatzen duten azpiegiturekin batera, ingurumen organo honen aldeko txostena jaso zuen, Ingurumeneko zuzendari nagusiaren apirilaren 26ko 330E/2024 Ebazpenaren bidez (2024ko maiatzaren 17ko Nafarroako Aldizkari Ofiziala, 102. zk.). Ebakuazio azpiegitura erkide horiek barne dituzte tentsio ertaineko lurpeko linea bat «La Caya» instalazio fotovoltaikoaren BNZtik «SET Promotores Tafalla» 66/30 kV-eko instalazioraino, SET Promotores instalazioa bera eta 66 kV-eko lurpeko linea elektriko bat lehendik zegoen «SET Tafalla» instalazioarekin konektatzeko (i+DE).

3. Espedientearen azterketa teknikoa.

a) Alternatiben azterketa.

Sustatzaileak aurkeztu duen ingurumen inpaktuaren azterketan (IIA) kontuan hartu dira zero alternatiba, hots, proiektua ez egitearena, eta eguzki instalazio fotovoltaikoa eta lotutako ebakuazio linea kokatzeko beste hiru alternatiba.

Ez egitearen alternatiba baztertu egin da, energia iturri berriztagarriei onura handiagoa ateratzeko, garapen eta trantsizio energetikoko helburuak erdiesteko eta proiektuak ekarriko duen onura sozioekonomikoagatik.

Instalazioak ezartzeko alternatiben definizioak zenbait aurretiazko baldintzatzaile tekniko ditu, sarerako sarbidearen ingurukoak eta ingurumen zein hirigintza bateragarritasunaren ingurukoak. Hiru alternatibak teknikoki eta ingurumenaren aldetik bideragarriak dira, eta lurzoruaren okupazioa antzekoa litzateke, 10 ha ingurukoa. Hirurak profil lauko nekazaritza lurretan proiektatzen dira, eta ekoitzitako energia, tentsio ertaineko lurpeko linea elektriko baten bidez, «La Caya» instalazio fotovoltaikoaren babes eta kontrol zentroraino eramanen dute.

IIAk alternatiba horietako bakoitzaren inpaktua aztertu eta baloratzen du, ingurumen ebaluazioari buruzko abenduaren 9ko 21/2013 Legearen 35.1 artikuluko c) letran aipatzen diren diseinuari, kokalekuari, eraikuntzari sozioekonomiari eta ingurumen alderdiei buruzko zenbait irizpideren arabera. Irizpide anitzeko analisi hori oinarri hartuta, sustatzaileak 2. alternatiba hautatzen du egokiena izateagatik, bai moduluak ezartzeko eta baita ebakuazio sistemaren aldetik ere.

b) Proiektuaren inpaktu nagusien analisia.

Jarraian, proiektuaren inpaktu nagusiak eta horien tratamendua aztertu dira, sustatzaileak ingurumen inpaktuaren azterketan adierazitakoak edo jendaurreko informazio eta kontsulta prozeduretan azaleratu direnak. Ez nagusitzat jo diren inpaktuak ez dira ebazpen honetan jorratu.

IIAren obra zibilaren deskribapenaren arabera, jarraipen egiturak ezartzeko lursailean %7ko gehieneko malda egon daiteke ipar-hego norabidean. Egitura finkoak, berriz, %10eko gehieneko malda izan dezake norabide guztietan. Sustatzaileak 40 cm-ko tolerantzia ezarri du ardatzaren euskarri-zutoinen altuera maximoa eta minimoa aldatzeari begira, eta tinkatze luzerarekin doitzen joanen da, topografiaren eta profilaren luzeraren arabera. Lurrean tinkatzeko gutxieneko luzera eta zutoinaren guztizko luzera kontuan hartuta, gomendatutako gehieneko eta gutxieneko altuera baldintzak betetzen ez badira, sustatzaileak lurraren nibelazio txikiak egitea aurreikusten du, muntaketaren eta orografiaren beharren arabera desmuntatuz edo betez.

IIAk oso txikitzat jotzen ditu beharrezko aldaketa geomorfologikoak; izan ere, okupatutako lurzatiaren gainazalak malda lauak (< %3) eta desnibel maximo txikia (%10etik beherako maldak) ditu nagusi. Malda handieneko eremuak hesiaren barruan uharte gisa geldituko dira, instalazioek eragin gabe. Sustatzaileak garrantzi txikikotzat jo du obra zibilaren exekuzio fasean lurzoruaren profilak aldatzeagatik sortuko den geomorfologiaren gaineko hondar inpaktua. Lurzorua trinkotzeagatik eta isuriengatik gertatuko den lurzoru galeraren hondar inpaktua bateragarritzat jo da lanen fasean.

Ebazpen honen baldintzen artean adierazten dira proiektuak duen geodibertsitatearen, lurzoruaren eta zorupearen gaineko eraginaren bateragarritasuna bermatzeko hartu beharreko neurriak. Oro har, %5-10 arteko maldetan dauden modulu fotovoltaikoak egitura finkoen gainean jarri behar dira.

IIAk proiektuak ukitutako gainazaleko drainatze sarea deskribatzen du. Sare hori hainbat sakanek eta aldizkako fluxu ibilguk osatzen dute. Instalazio fotovoltaikoa izenik gabeko ibilgu batetik 100 metro baino gutxiagora eraikiko da, zeinak ez baitu azpiegituren eraginik jasanen. Tentsio ertaineko lurpeko linea (LSMT) ibilgu horrekiko paraleloan igarotzen da 90 bat metrotan, bide gainean. Aurrerago, tentsio ertaineko lurpeko linearen zangak Vallacuera sakana zeharkatzen du, bide gainean baita ere. Lur gaineko drainatzearen eraginaren, uren kalitatearen aldaketaren eta lurpeko uren gaineko eraginaren ondorioz lanen faseak izanen duen hondar inpaktua bateragarritzat jotzen da IIAn. Ebazpen honen baldintzen artean adierazten dira proiektua egiteak sare hidrografikoan eta lotutako biodibertsitatean izanen dituen ondorioak arintzeko hartu beharreko neurriak.

IIAk adierazten du eguzki instalazioaren eremu hesituaren barruan badaudela etze-larre landaredi naturala duten eremuak, laboratu gabeak, oro har orografiagatik edo gaitasun agrologiko okerragoagatik. Ebakuazio linea zanga batean lurperatzea aurreikusten da, lehendik dauden bideei atxikita; beraz, sustatzaileak ez du uste landaredi naturalari eraginen dionik. IIAk bateragarritzat jotzen du proiektua gauzatzean landarediari eragindako hondar inpaktua, landare-estaldura aldatzeagatik eragindakoa; izan ere, ukitutako landarediaren azalera txikia da eta ezaugarriak urriak, eta prebentzio, zuzenketa eta ingurumena leheneratzeko neurriak aplikatuko dira.

Espedientea aztertzeko fasean, Ingurumen Ebaluazioaren Atalak ikusi du hesitutako esparruaren behealdean landatu gabeko eremu bat dagoela, lurzatia drainatzen duen aldizkako ibilgu natural bati lotutako landaredi naturalarekin. Azalera hori moduluen ezarpenetik kanpo dago, proiektuaren arabera. Nolanahi ere, balizatu eta errespetatu egin beharko da, kalterik ez eragiteko. IIAn eta ebazpen honen baldintzetan zehazten diren prebentzio eta zuzenketa neurrien artean zehazten dira proiektua florarekin, landarediarekin eta habitatekin bateragarria dela ziurtatzeko hartu beharreko neurriak.

IIAk eremua lehorreko agrosistema pobre edo intereseko faunarentzat garrantzi gutxikotzat deskribatzen du, antropizazio handia duelako eta intentsitate handiko errepide batetik hurbil dagoelako. Sustatzaileak bateragarritzat jotzen du proiektuaren exekuzio eta funtzionamendu faseetan gertatuko diren habitat galeren eta eragozpenen ondoriozko faunaren gaineko hondar eragina. Ebakuazio linea lurpetik diseinatu izanak hegazti fauna ukitzea saihesten du, ez baita talka edo elektrokuzio arriskurik egonen. IIAn eta ebazpen honen baldintzetan prebentzio eta zuzenketa neurriak planteatzen dira proiektua eta faunaren kontserbazioa bateragarri egiteko.

IIAk Natura 2000 Sarearen gaineko ondorioen ebaluazioa egiten den ala ez egiaztatzen du, Habitatei buruzko 92/43/EEE Zuzentarauak eta Hegaztiei buruzko 2009/147/EE Zuzentarauak eskatzen dituzten eta Natura Ondareari eta Biodibertsitateari buruzko abenduaren 13ko 42/2007 Legearen bidez ekarritako betebeharretatik eratorritako gomendio metodologikoei jarraikiz. Azterketak ondorioztatzen duenez, ez dago Natura 2000 Sareko guneetan eragiteko aukerarik, eta, beraz, inpaktua ez garrantzitsutzat edo hutsaltzat jotzen da, bai Natura 2000 Sareko guneen, bai haien arteko konektagarritasunaren gaineko eraginagatik.

IIAk proiektuaren ezarpen eremuko paisaia aztertzen du, ikuseremua kalkulatuz eta proiektuaren inpaktua ebaluatuz, paisaiaren kalitate eta hauskortasun balioen arabera. Sustatzailearen balorazioaren arabera, eremuko paisaia kalitate bisual txiki-ertainekoa eta hauskortasun txiki-ertainekoa da. Neurri prebentibo eta zuzentzaile moduan, sustatzaileak heskai perimetral bat mantentzea eta eragindako eremuetako landareen lehengoratzea proposatzen ditu, ebakuazio linea lurpekoa izateaz gain. Aurreikusitako instalazioen lanen eta ustiapenaren faseetan izanen den intrusio bisualak paisaian eraginen duen hondar inpaktua bateragarritzat jotzen da IIAn. Espedientean ez da ageri Paisaiaren eta Landa Lurzoruaren Atalak emandako paisaiaren inguruko txostenik. Sustatzaileak Lurralde eta Paisaia Zerbitzuak egindako aldeko txostena behar du, eta, nolanahi ere, lurzoru urbanizaezineko jardueren nahitaezko baimenean txertatzen ahalko da faktore hori.

IIAk ez du azpiegiturak ezartzeko eta ebakuazio zangaren eremuaren azterketa arkeologikorik egiten, baina organo eskudunari azterketa arkeologiko bat egiteko baimena eskatzeko egindako eskaera erantsi da. Espedientean ez dago Erregistroaren, Ondasun Higigarrien eta Arkeologiaren Atalaren txostenik. Edonola ere, proiektua izapidetzean eta lanak egitean, Nafarroako kultur ondareari buruzko azaroaren 22ko 14/2005 Foru Legeak eta Espainiako ondare historikoari buruzko ekainaren 25eko 16/1985 Legeak xedatutakoa bete beharko da.

IIAk aurreikusten du proiektuak istripu larri edo hondamendi bat sortzeko duen probabilitatea oso txikia edo hutsala dela, eta, beraz, proiektuaren kalteberatasunaren ondorioz ez dago arriskurik ezbehar larririk gertatzeko, ez eta hondamendirik gertatzeko ere, eta, gertatuz gero, ez da aurreikusten ondorio kaltegarri nabarmenik izanen denik ingurumenean.

Sustatzaileak proposatutako proiektuak izan ditzakeen sinergia- eta/edo metatze-inpaktuak aztertzen ditu, lehendik dauden beste azpiegitura batzuekiko elkarreraginaren ondoriozkoak. IIAk ondorioztatzen du bateragarritzat jotzen dela prebentzio eta zuzenketa neurriak aplikatu eta ingurumena zaintzeko programa abian jarri ondorengo sinergia- eta/edo metatze-inpaktu globala.

c) Ingurumena zaintzeko programa.

Sustatzaileak ingurumena zaintzeko programa (IZP) bat aurkeztu du, zuinketa fasetik desmuntatze fasera arte, baina aurrekontuan sartu den jarraipena ustiapenaren lehen hiru urteetarako da bakarrik, astean behingo bisitekin. Fitxa metodologikoak deskribatu ditu sustatzaileak jarraituko diren ingurumen faktoreetako bakoitzerako, horren barne direla helburuak, adierazleak eta hartuko diren ekintza eta neurriak. Urtean behin txosten arrunt bat eta bukaerako txosten bat entregatzea proposatzen da; horrez gainera, ezohiko eta/edo berariazko txostenak entregatzeko aukera ere proposatzen da, ustekabeko egoerak gertatzen badira edo organo eskudunak eskatzen baditu.

4. Proposamena.

Espedientearen azterketa teknikoa egin ondotik, Biodibertsitatearen eta Arrantza Kudeaketaren Zerbitzuak ondorioztatu du ingurumen inpaktuaren ebaluazioaren prozedura ongi egin dela, eta uste du «Las Planillas» izeneko eguzki instalazio fotovoltaikoaren eta bere ebakuazio azpiegituren proiektua bideragarria dela zenbait baldintzarekin. Horregatik proposatzen du aldeko ingurumen inpaktuaren adierazpena egitea, baldin eta betetzen badira prebentzio, zuzenketa eta konpentsazio neurriak, ingurumena zaintzeko programa eta ingurumen inpaktuaren adierazpen honetan ezartzen diren gainerako baldintzak.

Adierazitakoarekin bat, eta dagozkidan eskumenak erabiliz (honako hauek ematen dizkidatenak: Nafarroako Foru Komunitateko Administrazioari eta foru-sektore publiko instituzionalari buruzko martxoaren 11ko 11/2019 Foru Legearen 32. artikuluak, Nafarroako Foru Komunitateko Administrazioaren departamentuen egitura ezartzen duen abuztuaren 17ko 10/2023 Foru Dekretuak eta Landa Garapeneko eta Ingurumeneko Departamentuaren oinarrizko egitura ezartzen duen abuztuaren 30eko 74/2023 Foru Dekretuak), honako hau,

EBAZTEN DUT:

1. Ingurumen inpaktuaren aldeko adierazpena egitea Ríos Renovables SLUk Pitillas eta Erriberri udalerrietan sustatutako «Las Planillas» eguzki instalazio fotovoltaikoaren eta bere ebakuazio azpiegituraren proiektuari.

2. Jarduera egiteko, jarraitu beharko zaie idazpuruan azaltzen den espedienteari atxikitako dokumentazio teknikoan jasotako baldintzei, eta, gainera, baldintza hauei ere:

i) Proiektuaren baldintza orokorrak:

1.–Sustatzaileak ingurumen inpaktuaren azterketan eta haren eranskinetan jasotako eta jendaurreko informazioaren izapideen ondotik onartutako prebentzio, zuzenketa eta konpentsazio neurri guztiak bete beharko ditu, edo espedienteari emandako informazio osagarrian jasotakoak, baldin eta ebazpen honetan ezarritakoaren aurkakoak ez badira, baita ingurumen inpaktuaren adierazpen honetan zehaztutako baldintza eta neurri gehigarriak ere.

2.–Oro har, ebazpen honetan eskatutako neurri guztiak sustatzaileak eraikuntza baimena eskatzeko organo eskudunean aurkeztu beharreko exekuzio proiektuan sartuko dira. Era berean, lanak bukatzean eta funtzionatzen hasteko baimena eskatu aurretik, ingurumen organoari egiaztatu beharko zaio ebazpen honetan ustiapen aldirako zehaztutako neurri aringarriak eta ingurumen jarraipeneko neurriak programatu eta abiarazi direla.

3.–Eraikuntza proiektua baimendu aitzin, paisaiaren arloan eskumena duen unitatearen aldeko txostena eduki beharko da.

4.–Proiektua baimendu aitzin, sustatzaileak Erregistroaren, Ondasun Higigarrien eta Arkeologiaren Atalaren aldeko txostena eskuratu beharko du, Nafarroako kultur ondareari buruzko 14/2005 Foru Legearen 32. artikuluan xedatutakoari jarraikiz.

5.–Lanak hasi baino 72 ordu lehenago gutxienez, Ingurumen Ebaluazio Estrategikoaren eta Ingurumen Ebaluazioaren Bulegoari jakinarazi beharko zaio (seguimiento.ambiental@navarra.es).

ii) Ondorio adierazgarrienak prebenitzeko, zuzentzeko eta konpentsatzeko neurriei buruzko baldintzak:

6.–Proiektuaren diseinu eta exekuzioa lurzorua eta lurzoruaren morfologia ahalik eta gutxien ukituz egin beharko dira. Horretarako, baldintza hauek beteko dira:

–Oro har, ez dira ukituko %10etik gorako maldak. Ardatz horizontala duten jarraitzaileen gaineko modulu fotovoltaikoak %5eko edo gutxiagoko maldetan ezarriko dira bakarrik. %5etik gorako eta %10erainoko maldetan, modulu fotovoltaikoak egitura finkoen gainean instalatuko dira.

–%5etik gorako eta %10erainoko azaleretan, ardatz bateko jarraitzaileak instalatzen ahalko dira, betiere lurraren profilean aldaketarik egin gabe ezartzeko aukera ematen duten irtenbide teknikoak edo diseinukoak aurkitzen badira.

–Azterketa geotekniko zehatza egin ondotik, modulu edo jarraitzaile fotovoltaikoen euste elementuak lurrean zuzenean tinkatuko dira, ahal den guztietan, pilote edo hormigoizko zapataren erabilera ahalik eta txikiena izan dadin.

–Moduluen euskarrien egiturak lurzoruaren topografia naturalaren arabera egokitu beharko dira, lanak egin bitartean guztiz ezinbestekoak diren eremuak soilik ukitzeko moduan, eta lur mugimendu ahalik eta txikienak egiteko moduan. Ez da baimenduko lurzoru geruzarik kentzea instalazioaren ezarpenak hartzen duen azalera osoan. Plakak ezartzeko eremuan egin beharreko sasi garbitzeak eta lur berdintzeak ez dira eremu osoak ukituz eginen; zimenduen zutoinek osatzen dituzten lerroetarako beharrezkoak diren ukipenak soilik eraginen dira, modulu fotovoltaikoen ezarpen eta/edo funtzionamendu egokirako doi beharrezkoak direnak.

7.–Lur naturala edo soro landuak dituzten jarduketa eremuetan, landare lurreko geruza aurretiaz kendu beharko da, gutxienez 30 cm-ko sakoneraraino. Material hori berariaz hautatutako tokietan metatuko da, 2 m-tik beherako altuera duten kabailoiak osatuz, lanak bukatutakoan lehengoratze lanetan erabiltzeko.

8.–Lur mugimenduak eurien garaian egiten badira eta euriak sedimentuak eramaten baditu drainatze sare naturalera, drainatze osagarriak eginen dira, jariatze urak solidoei eusteko sistemetarantz bideratzeko; urak drainatze sare nagusian isuri aurretik kokatutako puntuetan ezarriko dira sistema horiek.

9.–Lur mugimenduetako soberakinak ahalik eta gehien aprobetxatzen saiatuko dira, obran bertan erabiliz. Hondeaketak eta zangaren exekuzioa bukatzean sobera dauden lurrak nekazaritzako lurzatietan zabaltzen ahalko dira, baina ez hurbileko etzeetan edo landaredi naturalean. Lur soberakinik egotekotan, hondakinen kudeatzaile baimendu batek kudeatuko ditu, eta lehentasunezko helburua izanen da inguruko espazio narriatuak lehengoratzea. Lehengoratzeko lanetan erabiliko ez diren lurrak zabortegi baimendu batera lekutuko dira. Nolanahi ere, lurren lekualdaketa eskatzen duten operazio guztiek Ekonomia Zirkularraren eta Klima Aldaketaren Zerbitzuko Hondakinen Atalaren aldeko txostena beharko dute.

10.–Lanak hasi aurretik, zehaztu eginen dira lan eremuak, makinak pasatzeko eremuak eta materialak biltzekoak. Landaredi naturala ahalik eta gutxien ukitzeko, lan eremua ahal den txikiena izanen da eta ezin ukitzen ahal diren eremuak balizatuko dira. Landaredi naturaleko eremuetan ez da inolako material bilketarik edo isuririk eginen, eta makinak ez dira eremu horietan kokatuko. Lurzatien arteko banaketen mugak eta bertan dagoen landaredia mantentzea lehenetsiko da, egun dauden harri metak errespetatuko dira, faunarentzat intereseko lekuak direlako gehienbat nekazaritzarako den ingurune baten barruan. Neurri hau aplikagarria izanen da lurpeko linea elektrikoaren trazadurak eta zangek ukitutako azaleretan.

11.–Proiektua gauzatzeak ez dio eragiten ahalko modulu fotovoltaikoak ezartzeko eremuaren barnean dagoen landaredi naturalari, Pitillasko udal mugarteko 3. poligonoko 422 lurzatiaren katastro azaleratik kanpo geratzen den izenik gabeko ur-ibilguaren ondoan dagoen landaredia barne. Landaredi naturaleko eremu horietan ez da aurreikusten modulurik instalatzea, eta marka ikusgarriekin seinaleztatu beharko dira, instalazio osagarrietatik, makinen mugimenduetatik edo instalazioa eraikitzeko obrei dagozkien beste lan batzuetatik babesteko. Sakana katastroko lurzatitik kanpo geratzen den azalerak irudikatzen du, eta landaredia duten eremuak larre azalera gisa irudikatuta daude katastroko lurzati zedulan, B, C, D, E eta F azpilurzati gisa (ikus II. eranskina).

12.–Lurpeko ebakuazio linearen zanga, aldi baterako ibilguekiko eta lurretako erretenekiko gurutzaketetan eta trazadurak landaredi naturaleko azalerak zeharkatzen dituen eremuetan, lehendik dauden nekazaritza bideen jabari eremutik joanen da, dela albotik, dela errodadura eremuaren azpitik. Lehendik dauden bideak lanak bukatzean lehengoratu beharko dira, beren funtzionalitatea erabat berreskuratu arte.

13.–Ebakuazio linearen zanga eta drainatze naturaleko ibilguak gurutzatzen diren puntuetan, bisoi europarrarentzat egokia den habitata egotekotan (sastraka trinkoa, lezka, etab.), irailaren 1etik martxoaren 30era bitartean eginen dira lanak, espezie horren ugalketarako aldi kritikoa kanpo utzita. Salbuespen gisa, eta faunan eskumena duen teknikariak prestatutako justifikazio txostena ingurumen organoari aurkeztu ondotik, lanak egiten ahalko dira, inguruan belar sastrakak garbitzen badira, apirilaren 1a baino lehen. Lanak ez badira berehala hasten, belar sastrakak garbitu beharko dira aldian-aldian, landare estalkia ez dadin hazi lanak hasi arte. Belar sastrakak ez badira garbitu apirilaren 1a baino lehen, espezie babestuetan eskumena duen unitatearen berariazko baimena beharko da. Kasu horretan, belar sastrakak eskuz garbitzea bakarrik izanen da bideragarria. Landare estalkia kendu eta 48 ordura hasten ahalko dira lanak.

14.–Lanak egin bitartean Nafarroako landare eta animalia mehatxatuen katalogoetan edota Espainiako espezie mehatxatuen katalogoan jasotako espezieren baten presentzia detektatzen bada, lanek kaltetuko luketena, berehala jakinaraziko zaio Biodibertsitatearen eta Arrantza Kudeaketaren Zerbitzuari, eta hark xedatzen duena bete beharko da.

15.–Inguruko hesia zutoinen bidez bakarrik tinkatuko da lurrean, fauna txikiari azpitik igarotzeko aukera uzteko, eta, horretarako, azpitik tarte bat utzi beharko du, lurretik 15-20 cm altxatua. Hesia diseinatuko da iragazkortasuna hobetzeko tamaina txikiko faunarentzat, eta ez du elementu zorrotz edo ebakitzailerik izanen.

16.–Inguruko hesia seinalez markatzeko neurriak hartuko dira, hegaztiek ikus ditzaten, landare naturalez egindako pantailak eratuz eta/edo plakak jarriz, metalikoak hobe, 15x30 edo 20x20 cm-koak, zuriak edo kontraste handikoak, batetik bestera bi metroko tarte horizontala utziz eta bi ilaratan jarrita, itxituraren altuera desberdinetan, modu alternoan kokatuta.

17.–Ingurumen inpaktuaren azterketan aurreikusitako itxituraren inguruan ikusizko pantaila bat sortzeko zuhaitz edo zuhaixka espezieen landaketa ez da eginen azpiegiturak ahalik eta gehien ezkutatzeko bakarrik. Espezieen landaketa diseinatu eta hautatzean, ez da forma erreferentzia, irudi geometriko, inausketa edo horrelakorik baliatuko, aitzitik, ahalik eta aniztasun handiena bilatuko da morfologian (zuhaitzak, zuhaixkak, sastrakak eta belarrak) eta espezieetan, ingurumen zerbitzu gehiago sortzeko (loreak, fruituak, konektagarritasuna), eta betiere inguruko landaredi serieetako espezie autoktonoak erabiliko dira.

18.–Lanei ekin aitzin, ingurumen inpaktuaren azterketaren 15. kapituluan adierazitako landareztatze proiektua aurkeztuko da. Inguruko landaredi serieko espezie autoktonoak erabiliko dira landareztatzeko. Zurezko eta basogintzako landareen haziak zonaldekoak izanen dira, Ekoizpeneko Baso Materiala Identifikatzeko eta Erabiltzeko Eskualdeetako arauen arabera. Lanak bukatu eta 6 hilabete igaro baino lehen bukatu beharko dira landareztatze lanak. Landaketak eta hidroereiteak landaketa garaiaren, klima baldintzen eta abarren mende daudenez, lanak bukatu eta hurrengo landaketa garaian eginen dira. Landaketen jarraipena egin beharko da, eta bideragarriak direla ziurtatu, instalazioen bizitza baliagarri guztian.

19.–Instalazioetan argiteria planteatu bada, ezinbestekoak diren argiak jarriko dira soilik. Kanpoko argiztapena erabiliko da behar den lanorduetan edo lanetan, eta gainerako denboran itzalita egon beharko da.

20.–Lanak bukatutakoan, behin-behineko instalazioak desmuntatu eta kenduko dira, eta lanen hondarrak garbituko dira okupatu den eremu osoan. Lanek eragindako gainazal guztiak, aldi batez eragindakoak barne, harrotu eginen dira eta, behar izanez gero, landare lurraren geruza batez estaliko dira, zeina lehenago kendu eta behar bezala pilatuko baita. Lanak bukatzen direnetik sei hilabete igaro baino lehenago, eragindako gainazal guztietan belardiko inguruko espezie autoktonoen hazien nahasketa bat ereinen da, ez bada laborantzarako lurrak direla.

21.–Plakak ezartzeko eremuan dagoen landaredia kontrolatzeko eta mantentzeko ohiko metodo gisa, abeltzaintza estentsiboa erabiltzea gomendatzen da, eta, behar berezia izanez gero, sasi garbitze mekanikoa baimenduko da. Herbizidak erabiltzea espresuki debekatua dago.

22.–Lagomorfoak, karraskariak eta bestelako animaliak kontrolatu behar badira, egokiak diren baimenak eskuratu ondoren, baliabide mekanikoak eta biologikoak erabiliko dira eta guztiz debekaturik egonen da pestizidak, intsektizidak, errodentizidak eta bestelako pozoiak erabiltzea.

23.–Panelak garbitzeko ezarriko den sistemak ez du erabiliko produktu kimiko kutsagarri edo arriskutsurik.

24.–Ingurumen inpaktuaren azterketan proposatu den ingurumen zaintzako programa beteko da. Lehen bi urteetan, ingurumena zaintzeko programan aurreikusitako bisita planarekin bat, inguruko hesiarekin edo modulu fotovoltaikoekin talka egitearen ondorioz hildako hegaztien gorpuzkiak bilatuko dira. Nafarroako edo Espainiako espezie mehatxatuen katalogoan dagoen espezieren bat aurkitzekotan, edo faunaren ezohiko heriotza tasa bat antzematen bada, berehala jakinaraziko zaio Ingurumen Ebaluazio Estrategikoaren eta Ingurumen Jarraipenaren Bulegoari (seguimiento.ambiental@navarra.es). Hirugarren ustiapen urtea hasten denetik aurrera, lortutako datuen arabera eta Landa Garapeneko eta Ingurumeneko Departamentuaren baimena jaso ondotik, ahalegina murrizten ahalko da.

25.–Proiektuaren balio bizitza akituta, instalazio guztiak deseginen dira, eta okupatutako lurrak jatorrizko egoerara leheneratuko dira. Uzte eta eraiste aldiak lehengoratze proiektu espezifiko baten xede izan behar du. Sustatzaileak aurkeztuko du, eta ingurumen arloko organo eskudunen txostena beharko du.

3. Ebazpen hau Nafarroako Aldizkari Ofizialean argitaratzea, Ingurumen Ebaluazioari buruzko abenduaren 9ko 21/2013 Legearen 41.3 artikuluan ezarritakoari jarraikiz.

4. Ebazpen hau jakinaraztea Industria Antolamenduaren, Azpiegitura Energetikoen eta Meatzeen Zerbitzuari, Lurralde eta Paisaia Zerbitzuari, Erregistroaren, Ondasun Higigarrien eta Arkeologiaren Atalari, Ingurumeneko Basozainen Atalari, Tafalla-Zangoza aldeko Koordinazio Unitateari eta sustatzaileari, behar diren ondorioak izan ditzan.

Iruñean, 2025eko ekainaren 22an.–Ingurumeneko zuzendari nagusia, Ana Bretaña de la Torre.

I. ERANSKINA.–JENDAURREKO INFORMAZIOAREN IZAPIDEAREN EMAITZA

Ingurumen ebaluazioari buruzko abenduaren 9ko 21/2013 Legearen 36. artikuluan, Sektore Elektrikoari buruzko abenduaren 26ko 24/2013 Legearen 53. artikuluan eta Energia elektrikoko instalazioen garraioko, banaketako, merkaturatzeko eta hornidurako jarduerak eta baimentze prozedurak arautzen dituen abenduaren 1eko 1955/2000 Errege Dekretuaren 125. artikuluan xedatutakoa betez, Industria Antolamenduaren, Azpiegitura Energetikoen eta Meatzeen Zerbitzuak 30 egun baliodunez jendaurrean jarri zituen Ríos Renovables SLU sozietateak sustatutako eta Pitillas eta Erriberri udal mugarteetan eraikiko den «Las Planillas» eguzki instalazio fotovoltaikoaren eta bere ebakuazio azpiegituren proiektua eta ingurumen inpaktuaren azterketa (espedientearen kodea: 5321-CE), Nafarroako Aldizkari Ofizialean iragarkia argitaratuta (67. zenbakia, 2025eko apirilaren 3koa).

Aguacanal Nafarroako ubidearen eremu ureztagarriaren sozietate emakidadunaren alegazioa jaso da. Alegaziogileak idazkian adierazten du proiektuetan deskribatutako obrak egiteak (plakak, ebakuazio lineak, etab.) Aguacanalek kudeatutako azpiegiturak ukituko dituela (bideak, drainatzeak, hodiak). Horregatik, proiektuaren fasetik bertatik emakidadun horri (info@aguacanal.es) baldintza teknikoak eskatu beharko zaizkio, obrek eremu ureztagarriaren azpiegituretan ahalik eta eragin txikiena izanen dutela bermatzeko.

Ukituriko administrazio publikoarentzat eta pertsona interesdunentzat irekitako kontsulta tramitearen emaitza.

Ingurumen ebaluazioari buruzko abenduaren 9ko 21/2013 Legearen 37. artikuluan eta energia elektrikoa garraiatu, banatu, merkaturatu eta hornidura egiteko jarduerak eta instalazioak baimentzeko prozedurak arautzen dituen abenduaren 1eko 1955/2000 Errege Dekretuaren 127. artikuluan xedatutakoa betez, Industria Antolamenduaren, Azpiegitura Energetikoen eta Meatzeen Zerbitzuak kontsulta egin zien jarraian adierazitako erakundeei, eta taulan ageri diren txostenak jaso zituen:

II. ERANSKINA

Izenik gabeko sakana eta landaredi naturala duten katastroko azpilurzatiak,
eguzki instalazio fotovoltaikoaren perimetroaren barnean daudenak

Iragarkiaren kodea: F2508990