Iragarkia

129. ALDIZKARIA - 2025eko ekainaren 30a

1. NAFARROAKO FORU KOMUNITATEA

1.4. DIRU-LAGUNTZAK, LAGUNTZAK ETA BEKAK

1276/2025 EBAZPENA, ekainaren 23koa Nafarroako Unibertsitate Publikoko Errektoreak emana, Nafarroako Unibertsitate Publikoaren Batxilergoko XVI. eztabaida lehiaketarako deialdia onetsi eta dagokion gastua baimentzen duena.

Nafarroako Unibertsitate Publikoak kultura sustatzeko eta bultzatzeko garatutako politikaren barnean, eta Unibertsitateak eta Nafarroako Parlamentuak sinatutako lankidetza-hitzarmenaren emaitza gisa, Ikasleen Gaietarako, Unibertsitateko Bizitzako eta Konpromiso Sozialeko errektoreordeak Nafarroako Unibertsitate Publikoaren Batxilergoko XVI. Eztabaida Lehiaketarako deialdia egitea proposatu du. Nafarroako Foru Komunitatean Batxilergoko ikasketak ematen dituzten ikastetxeek parte hartzen ahalko dute lehiaketan.

Ikusirik Zerbitzu Juridikoaren txostena.

Ikusirik Ekonomia Gaietarako Zerbitzuaren txostena.

Kontu-hartzailetzak aldeko fiskalizazioa eginik.

Ikasleen Gaietarako, Unibertsitateko Bizitzako eta Konpromiso Sozialeko errektoreordeak eskatuta.

Unibertsitate Sistemari buruzko 2/2023 Lege Organikoaren 50. artikuluak (2023ko martxoaren 22koa) eta Nafarroako Unibertsitate Publikoaren Estatutuen 40. artikuluak (2003ko maiatzaren 12ko 110/2003 Foru Dekretuak onetsiak eta Nafarroako Gobernuaren 2011ko martxoaren 21eko erabaki baten bidez aldatuak) ematen dizkidaten eskumenak erabiliz,

EBAZTEN DUT:

Lehenbizikoa.–Ebazpen honen gastua baimentzea (6.000 euro) 2025eko aurrekontuen kargura. Zenbateko hori honela ordainduko da:

• 3.000 euro 30.5200/0610/480.05 aurrekontu-partidaren kargura ordainduko dira, sarietarako;
• 2.000 euro 30.5200/0610/141.07 aurrekontu-partidaren kargura ordainduko dira, epaimahaikideei ordaintzeko;
• 1.000 euro 30.5200/0610/223.00 aurrekontu-partidaren kargura ordainduko dira, Iruñetik kanpoko taldeek egiten dituzten joan-etorriak eta unibertsitate-egoitzetan ostatu hartzeak dakartzan gastuak finantzatzeko.

Bigarrena.–"Batxilergoko XVI. Eztabaida Lehiaketa" egiteko deialdia, I. eranskinean biltzen diren oinarriak eta II. eranskinean biltzen den lehiaketa-erregelamendua onestea.

Hirugarrena.–Ebazpen hau Ikasleen Gaietarako, Unibertsitateko Bizitzako eta Konpromiso Sozialeko errektoreordeari, kontu-hartzaileari eta Kontabilitate Atalari jakinaraztea.

Laugarrena.–Ebazpen hau eta eranskinak Nafarroako Aldizkari Ofizialean eta Nafarroako Unibertsitate Publikoaren taula elektronikoan argitaratzeko agintzea. Halaber, Unibertsitate Hedakuntzako Atalak ahaleginak eginen ditu deialdi hau Nafarroan batxilergoa ematen duten ikastetxeetan ahalik eta gehien zabaltzeko.

Bosgarrena.–Ebazpen honen, haren oinarrien eta erregelamenduaren aurka, interesdunek aukerako berraztertzeko errekurtsoa jar dezakete Nafarroako Unibertsitate Publikoko errektorearen aurrean, hilabeteko epean, edo, bestela, administrazioarekiko auzi-errekurtsoa maila bereko Nafarroako Auzitegietan, bi hilabeteko epean, Nafarroako Aldizkari Ofizialean argitaratu eta biharamunetik kontatzen hasita.

Iruñean, 2025eko ekainaren 23an.–Errektorea, Ramón Gonzalo García.

I. ERANSKINA.–BATXILERGOKO XVI. EZTABAIDA LEHIAKETARAKO DEIALDIAREN OINARRIAK (2025-2026 IKASTURTEA)

Lehenbizikoa.–Deialdiaren xedea.

Deialdi honen helburua da Batxilergoko XVI. Eztabaida Lehiaketa arautzea, baita sariak emateko prozedura ere, publizitate, objektibotasun eta lehiakortasun printzipioen arabera.

Bigarrena.–Gaia eta noiz eginen den.

Antolatzaileek irailaren 17a baino lehen emanen dute jakitera zein gai izanen duen Batxilergoko Eztabaida Lehiaketak. Webgune honetan adieraziko da: http://www.unavarra.es/ciilnira/unibertsitateko-eztabaida/batxilergoko-lehiaketa?languageId=100001.

Batxilergoko XVI. Eztabaida Lehiaketa 2025eko urriaren 17an eta 18an eginen da. Lehiaketa Nafarroako Unibertsitate Publikoan eta Nafarroako Parlamentuan eginen da. Ikasleen Gaietarako, Unibertsitateko Bizitzako eta Konpromiso Sozialeko errektoreordearen esku dago eztabaidetarako beste toki batzuk izendatzea.

Urriaren 3an eta 4ean aldez aurretiko prestakuntza-saio bat edo batzuk eginen dira parte hartuko duten taldeei behar bezala argitzeko lehiaketari buruz dauzkaten zalantza guztiak.

Hirugarrena.–Sariak.

–Sari nagusia: tableta elektroniko bat taldeko kide bakoitzarentzat.

–Bigarren saria: gailu elektroniko bat edo antzeko zerbait –zehazteke dago oraindik– taldeko kide bakoitzarentzat.

Gauzazko sariak dira, eta konturako sarrera bat aplikatu behar zaie Pertsona Fisikoen Errentaren Gaineko Zergaren Arautegiaren 88. artikuluaren arabera. Ez dago konturako sarrerarik egiteko betebeharrik baldin eta sarien merkatuaren balioa edo kostua 300 eurotik gorakoa ez bada.

Laugarrena.–Izen-ematea eta hizkuntza.

Deialdi honetan parte hartu nahi duten ikastetxeek izena emateko eskabidea aurkeztu behar dute, deialdia Nafarroako Aldizkari Ofizialean argitaratu eta hurrengo egunetik 2025eko irailaren 26ra arte, Nafarroako Unibertsitate Publikoaren erregistro elektronikoaren bidez. Horretarako, Unibertsitatearen egoitza elektronikoaren bidez sartu behar dute, orri honetan eskuragarri izango duten inprimaki normalizatuan www.unavarra.es/cultura/debate-universitario/torneo-bachillerato. Inprimaki honetan aurkeztutako eskabideak baino ez dira onartuko.

NUPek gutxienez 4 eta gehienez 16 ikastetxe onartuko ditu gaztelaniazko modalitaterako, eta beste horrenbeste euskarazkorako. Ikastetxeak hautatzeko, izen-emateko ordena hartuko da kontuan. Bi hizkuntza-modalitateetan, gutxienez 4 ikastetxek eman beharko dute izena.

Batxilergoko ikastetxeak bi hizkuntzetan lehiatu ahal izanen dira, ikasle talde desberdinekin.

Izena emanez gero, parte-hartzaileek espresuki onartzen dute Batxilergoko XVI. Eztabaida Lehiaketan egiten diren argazkien eta bideoen irudi eskubide guztiak NUPi lagatzea.

Parte hartuko duten ikastetxeen zerrenda Nafarroako Unibertsitate Publikoaren iragarki ohol elektronikoan argitaratuko da, eta bertan adierazi beharko da bakoitzak zer hizkuntza-modalitatetan parte hartu nahi duen. Edonola ere, Kulturako eta Kiroletako Unitateko Batxilergoko Eztabaida Lehiaketaren webgunean ere zabaltzen ahalko da zerrenda hori.

Bosgarrena.–Bidaia-poltsa.

1.000 eurora arteko bidaia-poltsa bat dago, jatorrizko ikastetxea Iruñetik 20 kilometrora baino gehiagora duten taldeen joan-etorriak, ostatua eta dietak diruz laguntzeko. Bidaia-poltsa garraioaren, ostatuaren eta dieten modalitateetan esleituko da, lehiaketan izena emateko hurrenkera kontuan hartuta. Parte-hartzaileen ikastetxetik Iruñeko erdigunera zenbat kilometro dauden, horren arabera esleituko da garraioaren modalitatean zenbateko bat edo beste.

Seigarrena.–Erregelamendua.

Erregelamenduan ezarritakoaren arabera eginen da eztabaida lehiaketa hau. Erregelamendu horrek G-9 Taldearen Unibertsitateko Eztabaida Ligaren Erregelamendua du oinarri, eta II. eranskinean dago jasoa.

Zazpigarrena.–Epaimahaia.

Unibertsitate Ikasleen Gaietarako, Unibertsitateko Bizitzako eta Konpromiso Sozialeko errektoreordeak izendatuko ditu epaimahaia osatuko duten kideak, duten kargua adieraziz. Pertsona horiek ezingo dute loturarik izan baloratzen dituzten taldeekin.

Alde horretatik, Sektore Publikoaren Araubide Juridikoaren urriaren 1eko 40/2015 Legearen 23. eta 24. artikuluek ezartzen dutenaren arabera, epaimahaikideek abstenitu egin beharko dute, eta txapelketan parte hartzen duten ikastetxe edo ikasleek errefusatzea sustatu ahal izango dute.

Zortzigarrena.–Sariak ematea eta banatzea.

Epaimahaiak eztabaida bakoitzean parte hartu duten taldeen jarduna baloratuko du lehiaketaren Erregelamenduan ezarritako irizpideak betez, eta, eztabaida guztiak bukatu ondoren, saria zer talderi eman proposatuko du, azken aktan jasotako balorazioari jarraikiz.

Balorazio horrekin eta epaimahaiaren proposamenarekin bat etorriz, Ikasleen Gaietarako, Unibertsitateko Bizitzako eta Konpromiso Sozialeko errektoreordeak sariak behin betiko emateko ebazpena onetsiko du. Ebazpen hori Nafarroako Unibertsitate Publikoaren egoitza elektronikoko iragarki ohol elektronikoan argitaratuko da.

Era berean, argitalpen horrez gain, ebazpena Nafarroako Unibertsitate Publikoko Kulturako eta Kiroletako Unitatearen webgunean zabaltzen ahalko da. Esteka honek ematen du hartara sartzeko modua: https://www.unavarra.es/cultura/unibertsitateko-eztabaida/batxilergoko-lehiaketa?languageId=100001.

Sariak emateko ekitaldi publiko bat eginen da finalaren egunean, behin eztabaida guztiak amaitu eta finala amaitutzat ematen denean.

Sariak behin betiko emateko ebazpenaren kontra, interesdunek zilegi dute berraztertzeko errekurtsoa jartzea, Nafarroako Unibertsitate Publikoko errektoreari zuzendua, hilabeteko epean, edo, bestela, administrazioarekiko auzi-errekurtsoa maila bereko Nafarroako epaitegietan, bi hilabeteko epean, biak ere ebazpena Unibertsitatearen iragarki ohol elektronikoan argitaratu eta biharamunetik kontatzen hasita.

Bederatzigarrena.–Oinarrien onarpena.

Batxilergoko XVI. Eztabaida Lehiaketan parte hartzeak berarekin dakar oinarriak ezagutu eta onartzea.

Hamargarrena.–Datuen babesa.

Hauek izanen dira tratamenduaren xede diren datuak: ikastetxearen eta parte-hartzaileen identifikazio datuak eta kontu korronteko zenbaki bat edo beste ordainketa-daturen bat, Iruñetik kanpoko taldeen joan-etorriei eta ostatuari loturiko dirulaguntza ordaintzeko behar dena. Datuok fitxategi automatizatu batean txertatuko dira, eta helburu bakar bat izanen dute: Nafarroako Unibertsitate Publikoak Batxilergoko Eztabaida Lehiaketa kudeatzea.

Jakinarazten da NUPek ekitaldia grabatuko duela eta irudiak hartuko dituela, gero sare sozialetan eta Interneten zabaltzeko. Horrek esan nahi du haren irudia, ahotsa eta esku-hartzeen edukia tratatu behar direla. Grabazio horrek eta hura garatu bitartean hartutako irudiek ekitaldiaren dibulgazioa indartzen dute, interes publikoan oinarrituta (Europako Parlamentuaren eta Kontseiluaren 2016ko apirilaren 27ko 2016/679 (EB) Erregelamenduaren 6.1 e) artikulua, datu pertsonalen tratamenduari dagokionez pertsona fisikoen babesari eta datu horien zirkulazio askeari buruzko arauak ezartzen dituena (DBEO). Gerora datuak ezabatzeko egiten den edozein eskaera aztertzeko, kontuan hartuko da irudiak grabatu eta hartu direla, eta NUPek arrazoizko ahalegin teknologikoak baino ez dituela egin behar.

Nafarroako Unibertsitate Publikoa da datu horien tratamenduaren arduraduna, eta honako hauek bete behar ditu: 2016/679 (EB) Erregelamendua, 2016ko apirilaren 27koa, Europako Parlamentuarena eta Kontseiluarena, datu pertsonalen tratamenduari dagokionez pertsona fisikoen babesari eta datu horien zirkulazio askeari buruzko arauak ezartzen dituena (DBEO), eta 3/2018 Lege Organikoa, abenduaren 5ekoa, Datu Pertsonalak Babesteari eta Eskubide Digitalak Bermatzeari buruzkoa.

Datu horiek tratatuko dira deialdi hau izapidetu eta gauzatzeko, interes publikoko xedeetarako, bat etorrita Datu Pertsonalak Babesteko Erregelamendu Orokorraren 6.1.e) artikuluarekin. Aipatu xedeen oinarri juridikoa dibulgazio akademikoa da, Unibertsitate Sistemari buruzko 2023ko martxoaren 22ko 2/2023 Lege Organikoaren arabera.

Zilegi da datuak eskuratzeko eta zuzentzeko eskubidea eta bestelako eskubideak erabiltzea, datuak babesteko araudiari jarraikiz, delegado.protecciondatos@unavarra.es helbidera idatzita. Azken aukera gisa, Datuak Babesteko Espainiar Agentziari aurkezten ahalko zaio erreklamazioa.

Hamaikagarrena.–Argitalpena.

Oinarri hauek Nafarroako Unibertsitate Publikoaren iragarki ohol elektronikoan eta Nafarroako Aldizkari Ofizialean argitaratuko dira.

Hamabigarrena.–Errekurtsoak.

Deialdi honen oinarrien aurka, eta deialdi honen ondorioz sariak behin betikoz emateari buruzko ebazpenaren aurka, zilegi da aukerako berraztertze-errekurtsoa jartzea, Nafarroako Unibertsitate Publikoko errektorearen aurrean, hilabeteko epean, edo administrazioarekiko auzi-errekurtsoa maila bereko Nafarroako Auzitegietan, bi hilabeteko epean. Epeok dagokion argitalpena egin eta biharamunetik aurrera hasiko dira kontatzen.

II. ERANSKINA.–LEHIAKETAREN ARAUAK BATXILERGOKO XVI. EZTABAIDA LEHIAKETA (2025-2026 IKASTURTEA)

I. TITULUA.–APLIKAZIO EREMUA

1. artikulua.

1. Nafarroako Unibertsitate Publikoko Batxilergoko XVI. Eztabaida Lehiaketan aplikatuko da erregelamendu hau.

2. Erregelamendu honek zehatz-mehatz arautu gabeko alderdiak "Batxilergoko XVI. Eztabaida Lehiaketako deialdiaren oinarriak" izeneko dokumentuan jasoko dira idatziz.

3. Nafarroako Unibertsitate Publikoko Batxilergoko XVI. Eztabaida Lehiaketan parte hartzeak berekin dakar erregelamendu hau ontzat ematea eta bere arauei men egitea.

II. TITULUA.–PARTE HARTZEKO BALDINTZAK

2. artikulua.

Batxilergoko ikasketak ematen dituzten Nafarroako ikastetxeek edukiko dute Batxilergoko XVI. Eztabaida Lehiaketarako deialdian (2025-2026 ikasturtekoan) parte hartzeko aukera.

Ikastetxe bakoitzak talde bakar batekin parte hartuko du hizkuntza modalitate bakoitzean. Ikastetxean 2025-2026 ikasturtean Batxilergoko 2. ikasmaila egiten ari diren ikasleek osatuko dituzte taldeak.

III. TITULUA.–GAIA ETA DATA

3. artikulua.

Antolatzaileek 2025eko irailaren 17an emanen dute jakitera zein gai izanen duen Batxilergoko XVI. Eztabaida Lehiaketak. Webgune honetan adieraziko da: http://www.unavarra.es/cultura/unibertsitateko-eztabaida/batxilergoko-lehiaketa?languageId=100001.

4. artikulua.

2025eko urriaren 24an eta 25ean eginen da Nafarroako Unibertsitate Publikoko Batxilergoko XVI. Eztabaida Lehiaketa.

IV. TITULUA.–ANTOLAKETA

5. artikulua. Lehiaketaren Zuzendaritza.

1. Osaera: pertsona bakarreko organoa da, eta Unibertsitateko komunitateko kide bat izan behar da nahitaez.

2. Eginkizunak: batetik, araudi hau behar bezala betetzen dela zaintzea; bestetik, arauak ez betetzeagatik edo jokabide desegokiak izateagatik ezar daitezkeen zigorren berri ematea parte-hartzaileei; eta, azkenik, erregelamendu honetan jasotzen diren zigorrak aplikatzea.

3. Funtzionamendu araubidea: lehiaketaren zuzendariak bere eskumeneko erabakiak hartuko ditu Lehiaketa Batzordeari txostenik eskatu beharrik gabe. Azken horrek ebatziko ditu zuzendariaren erabakien kontra aurkezten diren erreklamazioak, halakorik aurkeztu bada.

6. artikulua. Lehiaketa Batzordea.

1. Osaera: epaileek osatuko dute batzordea, eta lehiaketaren zuzendaria izanen da batzordeburua, zeinak kalitateko botoa izanen baitu berdinketa izanez gero. Eginkizunak: batetik, araudi hau behar bezala betetzen dela zaintzea; bestetik, aurkezten zaizkien erreklamazioak ebaztea, eta aretoko arbitroak ezartzen dituen zigorren aplikazioari buruzko auziak eta lehiaketako gorabeherei buruzko erreklamazioak ebaztea; eta, azkenik, erregelamendu hau interpretatzea eta erregelamendu honetan arautu gabeko gorabeherak konpontzea.

2. Funtzionamendu araubidea: batzordeko kideen botoen gehiengoz hartuko dira erabakiak, horien berri eman gabe betiere, eta akta batean jasoko dira, zeina Lehiaketa Batzordeko kide guztiek sinatuko baitute. Erabakien aurka ez da zilegi apelazioa.

7. artikulua. Epaimahaia.

1. Osaera: gutxienez bi epaile eta epaile nagusi bat izanen dira epaimahaiko kideak, eta ahal dela bakoitia izanen da kide kopurua. Antolatzaileek gonbidatutako pertsonak eta Unibertsitateko komunitateko kideak izan daitezke epaimahaikide. Epaimahai bat egonen da areto bakoitzean. Epaimahaiak elkarren artean independenteak izanen dira. Epaimahaikideek ez dute loturarik eduki behar baloratzen dituzten taldeekin. Aurtengo eta iazko Batxilergoko Eztabaida Lehiaketako prestatzaileak ezin dira epaile izan prestatu dituzten taldeak lehiatzen direnean.

2. Eginkizunak: oro har eztabaiden eta, bereziki, parte-hartzeen eta interpelazioen balorazioa egitea, bai eta puntualtasunarena eta erregelamendu honetan jasotako gainerako alderdienak ere. Aretoko arbitroak jakinaraziko du talderen batek edo talderen bateko kideak ez dituela eztabaida egiteko arauak bete, baita aretoan gertatu den eta arbitroak ezagutu ez duen edozein oker ere.

3. Funtzionamendu araubidea: epaimahaiaren gehiengoz hartuko dira erabakiak, eta ahal dela epaimahaikideen kopurua bakoitia izanen da. Epaimahaikideen artean berdinketarik izanez gero, epaile nagusiaren botoak erabakiko du eztabaida. Epaimahaikide bakoitzak epailearen aktan adierazi behar du bere erabakia, eta eztabaidaren aktan, berriz, organoaren erabakia. Epaile bakoitzaren akta bere izenik gabe argitaratuko da.

8. artikulua. Aretoko arbitrajea.

1. Osaera: eztabaidak eginen diren aretoetan arbitro izanen direnek osatuko dute.

2. Eginkizunak: taldeetako kideak etorri diren edo ez eta puntual iritsi diren edo ez kontrolatzea, aretoan denak ongi funtzionatzen duela egiaztatzea, hizketaldietan kronometroarekin denbora neurtzea, eztabaidetan arauak betetzen ez badira epaimahaikideei zigorrak proposatzea eta jakinaraztea, eta talderen batek edo taldeetako kideren batek arauak betetzen ez baditu edo epaimahaikideak ohartu gabe aretoan irregulartasunen bat gertatzen bada horren berri ematea.

3. Funtzionamendu araubidea: aretoko arbitroak bere kabuz hartuko ditu erabakiak, eta zigortzeko modukotzat jotzen duen jokabidea gertatu den mintzaldia bukatu eta berehala jakinaraziko die epaimahaikideei, ozenki, behar den publizitatea emateko. Berehala jakinaraztea ezinezkoa bada, eztabaida bukatu eta gero ematen ahalko die epaimahaikideei gertatukoaren berri. Bere erabakien aurka zilegi dira errekurtsoak, Lehiaketa Batzordearen aurrean.

V. TITULUA.–DOKUMENTAZIO OFIZIALA

9. artikulua. Epailearen akta.

Epaimahaikide bakoitzak taldeei ematen dizkien kalifikazioak jasoko dira dokumentu honetan. Erregelamendu honen I. eranskineko ereduari segitu behar dio, eta akta egiten duen epaileak sinatu behar du.

10. artikulua. Eztabaidaren akta.

Epaimahaiaren azken erabakia jasoko da dokumentu honetan, bai eta taldeei aplikatu zaizkien zigorrak eta erantsi beharreko oharrak ere. Epaile nagusiak eta aretoko arbitroak sinatu behar dute. Erregelamendu honen II. eranskineko ereduari segitu behar dio.

11. artikulua. Lehiaketaren akta.

Sailkapena jasoko da dokumentu honetan. Lehiaketa Zuzendaritzak egin behar du, eta organo horren izenpea edukiko du. Erregelamendu honen III. eranskineko ereduari segitu behar dio.

12. artikulua. Lehiaketa Batzordearen akta.

Lehiaketa Batzordeari aurkeztu zaizkion erreklamazioei buruz zer erabaki hartu dituen jasoko da dokumentu honetan. Batzordekideek egin eta sinatuko dute, eta erreklamazioa daukan orria erantsiko zaio.

Lehiaketa Batzordearen aktak erregelamendu honen IV. eranskineko ereduari segituko dio.

13. artikulua. Lehiaketa-koadroa.

Eztabaiden eguna, ordua, tokia, eta bakoitzean zein talde lehiatuko diren elkarrekin bilduko du dokumentu honek, lehiaketa dela-eta izanen den zozketatik aterako baitira, bai eta sailkapen-aldiei eta finalei dagozkien datuak ere. Argitaratu eginen da, eta, beharrezkoa izanez gero, espresuki jakinaraziko da.

VI. TITULUA.–TALDEAK

14. artikulua.

Gutxienez hiru kide eta gehienez bost edukiko ditu talde bakoitzak. Kideetako bat kapitaina izanen da. Bere taldea ordezkatuko du arbitroen eta epaimahaiaren aurrean, eta aukera izanen du mintzatzeko txandetan hitz egiteko eta epaimahaiari kexak aurkezteko. Inor ezin da talde bat baino gehiagotakoa izan.

15. artikulua.

Talde bakoitzak 2 hizlari izendatuko ditu gutxienez ere, eta zozketan suertatu zaien jarreraren alde mintzatuko dira, txanda eskemaren arabera. Eztabaidak irauten duen bitartean, taldeko kideak ezinen dira komunikatu, ez hitzez ez keinuz; oharrak erabiliko dituzte horretarako. Aipatu beharra dago taldeko kideek dagokien eginkizuna alda dezaketela eztabaida batetik bestera.

VII. TITULUA.–EZTABAIDEN EGITURA, DENBORAK ETA GARAPENA

16. artikulua. Eztabaidaren egitura.

1. Eztabaiden egitura honako hau izanen da:

–Sarrera. Aldeko taldea.

–Sarrera. Aurkako taldea.

–Lehen gezurtatzea. Aldeko taldea.

–Lehen gezurtatzea. Aurkako taldea.

–Bigarren gezurtatzea. Aldeko taldea.

–Bigarren gezurtatzea. Aurkako taldea.

–Ondorioa. Aurkako taldea.

–Ondorioa. Aldeko taldea.

17. artikulua. Eztabaidarako denborak.

1. Txanda bakoitzak aldez aurretik finkatuta dagoen iraupen jarraitu hau izanen du:.

–Sarrera: 4 minutu.

–Lehen gezurtatzea: 5 minutu.

–Bigarren gezurtatzea: 5 minutu.

–Ondorioa: 3 minutu.

2. Txanda bakoitzean taldekide batek baino ez du izanen hitz egiteko aukera: kapitainak edo hizlariak.

3. Aretoko arbitroa kronometratzen hasiko da taldeko kapitaina edo hizlari bat mintzatzen hasten den unean, eta ez du kronometroa geldituko hark bere hitzaldia bukatu arte.

18. artikulua. Eztabaidaren garapena.

1. Eztabaidatu behar duten taldeak erabaki diren orduetan azaldu beharko dira eztabaida egiteko aretoan, eta bertaratu direla jakinaraziko diote aretoko arbitroari. Lehiaketa-koadroan argitaratuko dira norgehiagoka bakoitza hasteko orduak. Eztabaida hasteko orduan, bi taldeak aurkeztu direla eta puntual iritsi direla baieztatuko da.

2. Eztabaidaren aurkezpena: arbitroak labur-labur aurkeztuko ditu gaia, epaimahaikideak eta taldeak zein taldekideak; gero, lehiaketaren zuzendariak adierazi dizkion gauzen berri emanen du; eta, azkenik, taldeetako kapitainei deituko die zozketa egiteko eta, hala, eztabaidetan aldeko edo kontrako jarrera izan behar duten zehazteko.

3. Jarreren zozketa: taldeetako kapitainek jarreren zozketan parte hartuko dute. Aldeko edo kontrako jarrera ausaz esleitzen dela ziurtatuko duen sistema bat erabiliko da zozketa egiteko. Zozketaren emaitzaren arabera zehaztuko da taldeak aretoan non kokatuko diren: "aldeko taldea" epaimahaiaren ezkerrean eseriko da beti; "aurkako taldea", aldiz, eskuinean.

4. Eztabaidaren prestakuntza: zozketa egin eta gero, taldeek 4 minutu edukiko dituzte eztabaida prestatzeko.

5. Mintzaldien jakinarazpena: talde bakoitzak idatziz jakinaraziko dio aretoko arbitroari, horretarako ematen den euskarrian, taldeko zein kidek parte hartuko duten eztabaidan, mintzatzeko txandetan. Taldekideen esleipenean profil hauek zehaztu behar dira: kapitaina, hizlariak eta ikertzaileak. Zilegi izanen da eginkizun guztiak aldatzea eztabaida bakoitzean; ez, ordea, eztabaidatzen ari diren bitartean.

6. Eztabaidaren garapena: eztabaida erregelamendu honetan ezarritako hurrenkera eta txanden arabera eginen da. Talde bakoitzak aurrez zehaztutako txanden arabera parte hartuko du, hitzaldi bakoitzerako ezarritako denborak errespetatuz. Arbitro lanak egiten dituen pertsonari dagokio hitzaldi txanden hurrenkera eta aurrez aurrekoaren arau formalak betetzen direla kontrolatzea.

7. Erreklamazioak: epaimahaiak, interpelazio zuzenean, edo taldeko kapitainak, hitza eskatuz (eskua altxatuz) aretoko arbitroari, aukera izanen dute parte-hartzaileei eskatzeko egiazta ditzatela beren mintzatzeko txandetan eta interpelazioetan emandako datuak. Datua aipatu den txanda amaitu eta gero aurkeztuko da erreklamazio hori, edo, bestela, eztabaida bukatu eta ondorengo 10 minutuetan. Erreklamazioa egin eta gero, erantzun behar duen taldeak 10 minutu edukiko ditu datua egiazkoa dela frogatzeko epaimahaiaren aurrean. Talde horrek aretoan dauden gainerakoekin partekatu beharko du datua.

8. Epaimahaia itxian sartzea, deliberatzeko: epaimahaiak ateak itxita deliberatuko du, eztabaida bukatu eta gero, horretarako ezarria den denboran. Epaimahaiko kide bakoitzak bere kabuz eta besteen iritzia jakin gabe beteko du deliberazio akta. Aktak eta emaitzen sailkapena jendaurrean jarriko dira. Kontsultatzeko moduan jartzen diren aktetan ez da agertuko zein epailek bete dituen, eta artxibatu eginen dira, behar izanez gero kontsultatzeko.

9. Epaimahaiko kideen botoen gehiengoa lortzen duen taldeak irabaziko du eztabaida-lehiaketa.

10. Emaitzak jakinaraztea: epaimahaiak iritziak trukatu eta erabakia hartu ondoren, epaimahaiaren emaitza orokorra argitaratuko da eztabaidaren webgunean.

19. artikulua. Interpelazioak.

1. Mintzatzen ari ez diren taldekideek aukera izanen dute aurkako taldeko hizlariari hitza eskatu eta galdera bat edo baieztapen bat egiteko.

2. Aurkako taldea bere txanda baliatuz mintzatzen ari bada eta hitza eskatu nahi bazaio, eskua altxa eta hitza duen hizlariak hitza eman arte itxoin beharko da. Antolakuntzak beste aukera batzuk eman ahal izanen ditu, aretoaren ezaugarrien arabera.

3. Gehienez ere 15 segundo izanen dituzte interperlazio bakoitzeko, eta denbora tarte hori txandaren iraupenari dagokio.

4. Ezin izanen da interpelaziorik eskatu, ez sarrerako azalpenetan, ez eta ondorioetan ere.

5. "Babestutako minutuaren" figura ezarriko da. Horren ondorioz, ezin izanen da interpelaziorik eskatu gezurtatzeen lehenbiziko eta azken minutuetan, etenaldirik gabeko minutu babestutzat hartzen baitira.

6. Babestutako minutuetako edozeinetan hitza eskatzeak (eskua altxatzeak) zigorra ekarriko du automatikoki. Automatikoki zigortuko da erregelamendu honetan jasotako zehapenei jarraikiz.

7. Hizketan ari ez den taldekide batek galdera bat egiteko zain dagoenean ikusiko balu denbora azkeneko minutuan sartzen dela, hitza eskatzeari utzi beharko dio (eskua jaitsi beharko du) azkeneko minutu babestuan, eta ez zaio zigorrik jarriko.

8. Hizlari batek azkeneko minutu babestua hasi baino segundo batzuk lehenago erabakitzen badu hitza ematea, galdera egin nahi duenak 15 segundo izanen ditu gehienez galdera egiteko, eta ez zaio zigorrik jarriko.

20. artikulua. Materialak eta zerbitzuak.

1. taldeek beharrezkotzat jotzen duten materiala erabiltzen ahalko dute beren jarrera defendatzeko, baldin eta lehiaketaren funtzionamendu egokiari traba egiten ez badio, eta dauden instalazioekin bateragarria bada. Arau orokor gisa, erabiltzaileek ezin izanen dute partekatu beren pantaila, eta kameraren bidez erakutsi beharko dituzte egokitzat jotzen dituzten dokumentuak.

2. Hertsiki debekatuta dago komunikazio-sistema elektroniko edo telematikoak erabiltzea eztabaidan, taldea esku hartzeko erabiltzen ari denaz bestelakoak.

VIII. titulua. Puntuaziorako eta berdinketa hausteko sistema.

21. artikulua. Balorazio eta puntuazio sistema.

1. Epaimahaiak epai bidez zehaztuko du zein den talde irabazlea. Balorazio sistema epaimahaikide bakoitzak taldeei buruz eginiko banakako ebaluazioan oinarrituko da. Ebaluazioa eranskinean jasotako errubrikaren arabera eginen da; horren arabera epaile bakoitzak 100 puntu eman ahal izanen ditu gehienez ere.

2. Item bakoitzeko 0 eta 10 puntu artean eman ahal izanen dira, eztabaidan behatutako jardunaren arabera, azken bi itemetan (h eta i) izan ezik: lehenbizikoa 5 punturekin baloratuko da, eta bigarrena 15 punturekin.

3. Honako hauek dira ebaluazio-kategoriak eta irizpideak:

a) Funtsa: 40 puntu.

1. Taldeak eztabaidagaiari erantzuten dio eta txanda bakoitzak egoki betetzen du bere eginkizuna (10 puntu).

2. Argudio sendoak eta garrantzitsuak erabili dituzte tesiari eusteko, eta modu koherentean aurkeztu dituzte (10 puntu).

3. Aurkarien argudioak sendotasunez, azkartasunez eta arretaz gezurtatu dituzte (10 puntu).

4. Argudioak ebidentzian eta iturri egokietan oinarritu dituzte, eta zorrotz eta argi azaldu (10 puntu).

b) Forma.

1. Diskurtsoa originala da, argia, ongi egituratua eta interesgarria, eta erabilitako hizkera aberatsa eta zehatza (10 puntu).

2. Ahotsa, isiluneak eta tonua ongi menderatzen dituztela erakutsi dute (10 puntu).

3. Behar bezala erabiltzen dituzte espazioa, kontaktu bisuala, ez-hitzezko hizkera eta adierazkortasuna (10 puntu).

4. Azkartasuna eta abilezia erakutsi dute interpelazioetan, bai eta inprobisatzeko gaitasuna ere (10 puntu).

c) Taldeak jarrera egokia du: errespetua eta elkarlanerako eta eztabaidarako prestasuna erakutsi ditu (5 puntu).

d) Taldeak eztabaidaren funtsezko puntuak identifikatu ditu, eta konbikzioz, argitasunez eta pertsuasioz defendatu ditu, eta eragin komunikatibo nabarmena lortu du (15 puntu).

4. Epaimahaiak ateak itxita erabakia hartu ondoren, epaile bakoitzak bere balorazio akta bete beharko du, item bakoitzari puntuazio bat esleituta, eta irizpide orokorraren arabera zehaztuko du talde irabazlea.

5. Epaimahaiaren aldeko boto gehien jasotzen dituen taldea izanen da norgehiagokaren irabazlea.

6. Epaileen aktek ezin izanen dute inolaz ere irabazletzat izendatu aurkako taldeak baino guztizko puntuazio txikiagoa lortu duen talde bat.

7. Norgehiagoka sisteman guztizko puntuazioa erabili behar bada (adibidez ligaxka sistemaren bidezko sailkapen faseetan), epaile guztiek emandako puntuazioen batez besteko aritmetikoa kalkulatuko da. Puntuazio horrek berdinketak desegiteko soilik balio izanen du.

22. artikulua. Guztizko puntuazioa epaile bakoitzeko.

Epaimahaiko kideen botoen gehiengoa lortzen duen taldeak irabaziko du eztabaida-lehiaketa. Epaimahaikideak emandako puntuazio orokorra kalkulatzeko, taldeak item bakoitzean ateratzen dituen puntuak batuko dira. Balioespenaren ondoren puntuaziorik altuena lortu duen taldea joko du irabazletzat epaimahaikide bakoitzak.

23. artikulua. Eztabaida baten puntuazio orokorra.

Lehiaketako puntuazio orokorra honela kalkulatuko da: lehenik, epaimahaikideek talde bakoitzari eman dizkioten puntuak batu behar dira; gero, epaimahaiak dituen kideen kopuruarekin zatituko da emaitza, eta, azkenik, taldeei ezarri zaizkien zigorrei dagozkien puntuak kenduko zaizkio lortzen den zenbakiari.

24. artikulua. Taldeak eztabaidara ez joatea.

Talderen batek aurkaririk ez badu, dela beste taldea bertaratu ez delako, dela kanporatu dutelako, aurkeztu den taldea izanen da eztabaida horren irabazlea. Eztabaida hori hartuko da bertaratu den taldeak hiru epaileren aldeko botoarekin eta aurkako botorik gabe irabazi balu bezala. Taldekako fasea bada, talde irabazleari lehiaketako beste eztabaidetan lortutako puntuazioaren batezbestekoa emanen zaio, eta agertzen ez den edo kanporatua izan den taldeari zero puntu.

25. artikulua. Txapelketaren amaierako sailkapena.

Sailkapenerako, honako irizpide hauek hartuko dira kontuan, ordena honetan:

1. Erlatiboki eztabaida gehien irabazi duena.

2. Epaimahaikideen eskutik aldeko boto erlatibo gehien jaso duena.

3. Puntu erlatibo gehien erdietsi duena.

4. Bi talderen arteko aurrez aurreko eztabaida irabazi duena.

5. Puntu gutxien galdu duena (abisuak + hutsegite arinak + hutsegite larriak).

6. Lehiaketa Batzordearen erabaki arrazoitua.

VIII. TITULUA.–ZIGORRAK

26. artikulua. Abisuak.

1. Hitzezko ohartarazpenera mugatuko da. Epaile nagusiak abisu bat emanen du talde bateko kideek hutsegite hauetakoren bat eginez gero:

a) Mintzatzeko ezarri den denbora baino geroago bukatzea mintzaldia: 10 eta 30 segundo bitarte geroago.

b) Mintzatzeko ezarri den denbora baino lehenago bukatzea mintzaldia: 10 eta 30 segundo bitarte lehenago.

c) Babestutako denboran interpelazioak egitea, edo interpelazioek 15 segundo baino gehiago eta gehienez ere 25 segundo irautea.

d) Taldeko kideek beren artean hitz egitea.

2. Aretoko arbitro lanean ari den pertsonari dagokio zigorraren aplikazioa zehaztea, baita zigorra eta hura eragin duen ekintza eztabaidaren aktan jasotzea ere.

27. artikulua. Hutsegite arinak.

1. Hutsegite arin batek 3 puntu kenduko dizkio taldeari eztabaida horretan izan duen batez besteko azken kalifikaziotik. Honako ekintza hauek dira hutsegite arinak:

a) Bi ohartarazpen metatzea.

b) Gehienez ere 5 minutuko atzerapenez agertzea, dela talde osoa, dela ezarritako gutxieneko taldekide kopurua.

c) Mintzatzeko ezarri den denbora baino geroago bukatzea mintzaldia: 31 segundo eta 1 minutu bitarte geroago.

d) Mintzatzeko ezarri den denbora baino lehenago bukatzea: 31 segundo eta minutu bat bitarte lehenago.

e) Interpelazioak eginez hizlariari moztea, hitz egiteko txandan egon ez arren.

f) Interpelazioak 25 segundotik gora luzatzea, eta gehienez 45 segundo.

2. Aretoko arbitro aritzen den pertsonari dagokio zigorraren aplikazioa zehaztea, baita zigorra eta hura eragin duen ekintza eztabaidaren aktan jasotzea ere.

28. artikulua. Hutsegite larriak.

1. Hutsegite larri batek 5 puntu kenduko dizkio taldeari eztabaida horretan izan duen batez besteko azken kalifikaziotik. Honako ekintza hauek dira hutsegite larriak:

a) 5 minututik 15 minutura bitarteko atzerapenez agertzea, dela talde osoa, dela ezarritako gutxieneko taldekide kopurua.

b) Talde baten izenean hizlari bakar batek hartzea hitza.

c) Mintzatzeko ezarri den denbora baino minutu batetik gora lehenago bukatzea.

d) Interpelazioak 45 segundotik gora luzatzea.

e) Eztabaidan jarrera desegokia izatea aurkako taldearekin, epaimahaiarekin, ikus-entzuleekin edo antolatzaileekin. Hitz iraingarriak erabiltzea mintzaldian edo interpelazioan, edozeini zuzentzen zaizkiola ere.

2. Aretoko arbitro aritzen den pertsonari eta lehiaketaren zuzendaritzari dagokie zigorraren aplikazioa zehaztea, zigorraren aplikazioa zehaztea, baita zigorra eta hura eragin duen ekintza eztabaidaren aktan jasotzea ere.

29. artikulua. Lehiaketatik kanpo uzteko arrazoiak.

1. Parte hartzen ari den talde bat kanporatzen bada, taldea eztabaidatik behin betiko kanporatua geratuko da. Honako ekintza hauek dira taldea kanporatzeko arrazoi:

a) 15 minutu baino gehiagoko atzerapenez agertzea, dela talde osoa, dela ezarritako gutxieneko taldekide kopurua. Kasu honetan, aurkeztu den taldea izanen da eztabaidaren irabazlea, aurkako taldea ez agertzeagatik.

b) Txapelketan behin eta berriz jarrera desegokiak izatea edo hitz eta keinu oldarkorrak erabiltzea, edozeini zuzentzen zaizkiola ere.

2) Aretoko arbitroari dagokio zigorra behin-behinean ezartzea eta lehiaketaren zuzendariari jakinaraztea, zigor hori berrets edo ezets dezan, zuzendariak baitauka kanporatzea betearazteko eskumena.

3) Lehiaketaren zuzendariak zigorrei buruzko erabakien berri emango die kaltetuei, bai eta haiek ordezkatzen duten taldeari ere, bere arduradunen edo ordezkarien bidez, idatziz nahiz ahoz, egokien jotzen duen moduan.

4. Ezarritako zigorrak eztabaidaren aktan jasoko dira.

IX. TITULUA.–ERREKLAMAZIOAK

30. artikulua.

Lehiaketak iraun bitartean sortzen diren erreklamazioak idatziz nahiz ahoz helaraziko zaizkio erabakia hartu duen organoaren nagusi hierarkikoari, eta, beharrezkoa bada, idatzizko berrespena emanen da. Lehiaketa Batzordeari zuzentzen zaizkion erreklamazioak idatziz egin beharko dira, eta erregelamendu honen V. eranskinean ezartzen den ereduaren arabera aurkeztuko dira.

31. artikulua.

Lehiaketaren gai orokorren bati buruzko erreklamazioak lehiaketaren zuzendariari bidaliko zaizkio, eta hark, beharrezkoa bada, Lehiaketa Batzordeko bilerarako deia eginen du.

I. ERANSKINA.–EPAILEAREN AKTA

Talde irabazlea:

Epailearen sinadura:

II. ERANSKINA.–EZTABAIDAREN AKTA

–Oharrak:

III. ERANSKINA.–LEHIAKETAREN AKTA

–Oharrak:

Lehiaketaren zuzendariaren sinadura

IV. ERANSKINA: LEHIAKETA BATZORDEAREN EBAZPENA

–Arrazoiak:

Lehiaketa Batzordeko kideen sinadura

(Egindako erreklamazioa erantsi behar da)

V. ERANSKINA.–LEHIAKETA BATZORDEARI ERREKLAMAZIOAK AURKEZTEKO ESKABIDEA

–Eskaera:

Sinadura

Iragarkiaren kodea: F2509043