117. ALDIZKARIA - 2025eko ekainaren 12a

2. NAFARROAKO TOKI ADMINISTRAZIOA

2.1. OPOSIZIOAK ETA LEHIAKETAK. LAN PUBLIKOAREN ESKAINTZA

ARAKIL

Deialdia, zerbitzu anitzetako ofizialaren lanpostu bat oposizio-lehiaketa bidez eta funtzionarioen araubidean betetzeko

Arakilgo Udaleko alkateak, 2025ko maiatzaren 19ko ebazpen baten bidez, deialdia onetsi du Arakilgo Udaleko zerbitzu anitzetako ofizialaren lanpostua oposizio-lehiaketa bidez eta funtzionarioen araubidean betetzeko.

OINARRIAK

1. oinarria.–Arau orokorrak.

1.1. Deialdi honen xedea da zerbitzu anitzetako ofizialaren lanpostu bat, C mailakoa eta funtzionarioen araubidekoa, oposizio-lehiaketa bidez betetzea, Arakilgo Udalaren zerbitzura aritzeko. Lanpostu horrek 7 zenbakia du plantilla organikoan, 2025erako onetsitako lan publikoaren eskaintzaren arabera.

Era berean, eta 9. oinarrian ezarritakoarekin bat, deialdi honen xedea da izangaien zerrenda bat eratzea, zerbitzu anitzetako ofizialaren lanpostua aldi baterako betetzeko, lehen proban puntuazioaren %30 gutxienez lortu duten izangaiekin.

1.2. Nafarroako Administrazio Publikoen zerbitzuko langileen estatutuaren testu bateginean eta Ordainsariei buruzko Behin-behineko Erregelamenduan C mailari dagokion ordainsaria izanen du lanpostuak, bai eta Arakilgo plantilla organikoan jasotzen diren osagarriak ere, eta Gizarte Segurantzako araubide orokorrean alta emanen zaio.

1.3. Ordutegia eta lanaldiaren araubidea izanen dira Udalak zerbitzuaren beharrei erantzuteko ezarritakoak, eta behar horien arabera aldatzen ahalko dira.

1.4. Lanpostuak euskarazko nahitaezko hizkuntza eskakizun hau du: B2 maila.

1.5. Gainditutakoen zerrendarekin zerrenda bat egingo da, lehenik, deialdiaren xede den lanpostu hutsa betetzeko eta, bigarrenik, aldi baterako kontratazioak egiteko. Halakoetan, kontratazioak eginen dira hertsiki lotuz hautaprobak gainditu dituzten izangaien arteko puntuazio ordenari.

1.6. Deialdi honen ondorioz izendatzen den izangaiak honako eginkizun hauek izanen ditu, besteak beste:

–Udalaren hainbat zerbitzu koordinatzea (udal eraikinak garbitzea, lorategietako mantentze-lanak, udal eraikinetako mantentze-lanak eta instalazio eta azpiegituretako mantentze-lanak), bai eta zerbitzu horietara atxikitako langileen zein aldi baterako kontratatzen direnen lana koordinatzea, planifikatzea eta haiekin elkarlanean aritzea.

–Haren ardura izanen da udal langileei betearaztea laneko segurtasun eta higieneko eta laneko arriskuen prebentzioko neurriak.

–Udal-mugartearen zaintza-lanak egitea aparkatzeari eta eremu publikoaren okupazioari dagokienez.

–Herritarren herri-lurretako aprobetxamenduak zaintzea eta kontrolatzea.

–Udalak adjudikatutako baso aprobetxamenduak zaintzea eta kontrolatzea.

–Begiratzea ea egoera onean dauden bide eta espazio publikoak, bai eta udal eraikinak ere, eta haien mantentze-lan eta/edo hobekuntzarako proposamenak egitea.

–Udalaren ordenantzak betetzen ote diren kontrolatzea eta begiratzea, eta ikuskapena egitea hirigintza eta ingurumen gaietan, begiratuta ea jasotzen eta betetzen ote den araudia honako hauen gainean: lizentziak eta obrak, bide publikoaren okupazioa, isurketak eta abar.

–Udalaren ibilgailuak eta makinak gidatu eta zaintzea.

–Alkateak edo Udalbatzak agindutako era guztietako zerbitzuak eta lanak egitea.

–Udalak antolatutako kultur, festa, kirol edo aisialdiko jardueretan laguntzea.

–Agindu dakizkiokeen administrazio-lanetan laguntzeko eginkizunak.

–Eta oro har, agintzen zaizkion beste guztiak, dagokion kategoriaren barnean sartzen badira, betiere.

1.7. Lanpostua bete gabe utz dezake epaimahaiak, iritziz gero izangaietatik bakar batek ere ez duela lanpostuan aritzeko behar bezalako jakintza maila, gaitasun edo prestakuntzarik.

2. oinarria.–Izangaien betebeharrak.

2.1. Eskabideak aurkezteko epea bukatzen den egunean, izangaiek honako baldintza hauek bete beharko dituzte:

a) Espainiako herritarra izatea, edo Europar Batasuneko bertze estatu batekoa, edo langileen zirkulazio librea aplikatzen den eremuko estatu batekoa, Europar Batasunak sinatu eta Espainiak berretsitako nazioarteko tratatuak direla medio.

Parte har dezakete, orobat, espainiarren ezkontideek eta Europar Batasuneko beste estatu bateko edo aipatu nazioarteko itunek ukitutako estatuetako herritarren ezkontideek, zuzenbidez bananduta ez badaude, bai eta herritar horien ondorengoek eta –legez bananduta ez badaude– ezkontidearenek, hogeita bat urtetik beherakoak badira, edo gorakoak, haien kontura biziz gero.

b) Adinez nagusia izatea eta nahitaezko erretiroa hartzeko ezarritako adina ez izatea.

c) Eskabideak aurkezteko epea bukatzen den egunean, titulu hauetako bat, gutxienez, edukitzea, edo eskuratzeko moduan egotea (eskuratzeko eskubideak ordaindu izanaren gordekina): Batxilergoa, II. mailako Lanbide Heziketa edo horien baliokidea.

Atzerrian lortutako tituluak badira, homologazioa egiaztatzen duen agiria eduki beharko da.

d) Hizkuntzetarako Europako Erreferentzia Esparru Bateratuaren arabera, euskarazko B2 maila egiaztatzen duen titulu edo ziurtagiri bat izatea. Titulu edo ziurtagiri horrek agertu beharko du Nafarroako Administrazio Publikoaren Institutuko zuzendari kudeatzailearen irailaren 13ko 210/2010 Ebazpenean bildu den titulu-zerrendan, edo, bestela, ofizialki horien baliokidetzat hartzen den titulazioa izan beharko du.

e) Behar den gaitasun fisiko eta psikikoa izatea, bete behar diren eginkizunetan aritzeko.

f) Ez egotea eginkizun publikoetan aritzeko desgaitua edo gabetua eta ez egotea administrazio publikoren baten zerbitzutik kendua.

g) B motako gidabaimena izatea.

2.2. Eskabideak aurkezteko epea bukatzen den egunerako bete beharko dira aurreko baldintzak, eta bete beharko dira hautapen-prozesuak eta kontratazioak dirauen bitartean.

3. oinarria.–Eskabideak aurkeztea.

3.1. Deialdian parte hartzeko, eskabidea aurkeztu beharko da Arakilgo Udaleko erregistro orokorrean, edo Administrazio Publikoen Administrazio Prozedura Erkideari buruzko urriaren 1eko 39/2015 Legearen 16.4 artikuluan ezarritako edozein baliabideren bidez, hogeita hamar egun naturaleko epean, deialdi hau Nafarroako Aldizkari Ofizialean argitaratu eta biharamunetik zenbatzen hasita. Aipatu eskabideak deialdian I. eranskin gisa argitaratutako ereduari lotuko zaizkio, eta horiekin batera aurkeztuko dira honako agiri hauek:

a) Nortasun Agiri Nazionalaren kopia konpultsatua, edo izangaiaren nazionalitatea eta nortasuna frogatzen duen beste agiri baliokideren batena.

b) Eskatutako tituluaren kopia konpultsatua, edo titulua lortzeko eskubideak ordaindu izanaren gordekinarena.

c) Euskararen B2 maila frogatzen duen titulua edo ziurtagiri ofiziala.

d) Lehiaketaldian izangaiak baliatu nahi dituen merezimenduen jatorrizko agiriak edo kopia kautotuak.

e) Izangaiaren gidabaimenaren kopia konpultsatua; gutxienez B motakoa behar du.

f) Azterketa-eskubideetarako 25 euro ordaindu izanaren frogagiria; dirua CaixaBankeko ES49 2100 5016 1021 0019 988 kontuan sartuko da. Ordainagirian datu hauek adierazi beharko dira nahitaez:

–Izangaiaren izen-deiturak.

–Kontzeptua: zerbitzu anitzetako ofizialaren azterketa.

Azterketa eskubideen tasa ordaintzen ez bada, izangaia baztertu eginen da.

3.2. Eskabideak aurkezteko epea ezin izanen da luzatu.

4. oinarria.–Izangaien onarpena eta erreklamazioak.

4.1. Eskabideak aurkezteko epea amaiturik, Arakilgo Udaleko alkateak onartuen eta baztertuen behin-behineko zerrenda onesten duen ebazpena emanen du, eta aginduko du argitara dadila Nafarroako Aldizkari Ofizialean eta Arakilgo Udalaren iragarki-taulan. Izangai bazterturik ez bada, onartuen zerrenda behin betiko onetsiko da zuzenean.

4.2. Izangai baztertuek hamar egun balioduneko epea izanen dute, behin-behineko zerrenda Nafarroako Aldizkari Ofizialean argitaratzen denetik, erreklamazioak aurkezteko eta, akatsik egin badute, haiek zuzentzeko.

4.3. Erreklamazioak aurkezteko epea iragan eta horiek ebatzita, Arakilgo Udaleko alkateak ebazpena emanen du onartuen eta baztertuen behin betiko zerrenda onesteko, eta Nafarroako Aldizkari Ofizialean argitara dadila aginduko du, bai eta Arakilgo Udalaren web-orrian eta iragarki-taulan ere.

Ebazpen horretan bertan zehaztuko da probak non, noiz eta zer ordutan hasiko diren.

5. oinarria.–Kalifikazio-epaimahaia.

5.1. Hauek izanen dira kalifikazio epaimahaiko kideak:

Epaimahaiburua: Oihana Olaberria Jaka, Arakilgo Udaleko alkatea.

Ordezkoa: Julen Llorens Espada, Arakilgo Udaleko zinegotzia.

1. epaimahaikidea: Carlos Marti Sanz, Foru Administrazioko suhiltzailea eta Arakilgo Udaleko zinegotzia.

Ordezkoa: David Gómez Urrutia, Arakilgo Udaleko arkitekto aholkularia.

2. epaimahaikidea: Javier Almirantearena Legaz, Lekunberriko Udaleko zerbitzu anitzetako ofiziala.

Ordezkoa: Felix Benjumea Motino, Altsasuko Udaleko zerbitzu anitzetako arduraduna.

3. epaimahaikidea: Gorka Garate Olano, Etxarri Aranazko Udaleko zerbitzu anitzetako arduraduna.

Ordezkoa: Carlos Luquin Astiz, Olaztiko Udaleko zerbitzu anitzetako arduraduna.

Epaimahaikide idazkaria: Imanol Goñi Razkin, Arakilgo Udaleko idazkaria.

Ordezkoa: Xabier Álvarez Liceaga, Irurtzungo Udaleko idazkaria.

5.2. Epaimahaia eratu beharko da hautaprobak hasi baino lehen, eta, haren eraketak eta jardunak balioa izan dezaten, bildu beharko da kide guztien gehiengo osoa gutxienez.

5.3. Epaimahaiak gehiengoz ebatziko ditu deialdiaren oinarriak interpretatu eta aplikatzeko garaian sortzen diren gorabehera guztiak.

5.4. Epaimahaiak aholkulari adituen laguntza izan dezake, laguntzeko proba batzuetan nahiz guztietan. Aholkulari horiek beren espezialitate teknikoetan baizik ez dira ariko, eta haietan bakarrik emanen diote laguntza epaimahaiari.

6. oinarria.–Oposizio-lehiaketaren nondik norakoa.

Oposizio-lehiaketa bi alditan eginen da, lehiaketaldia lehenbizi eta oposizioaldia gero, oinarri hauetan zehazten den gisara.

Oposizio-lehiaketan, gehienez, 100 puntu eskuratzen ahalko dira osotara; haietarik, 15 puntu lehiaketaldiari dagozkio, eta 85 puntu oposizioaldiari.

6.1. Lehiaketaldia.

Lehiaketaldian, 15 puntu lortzen ahalko dira gehienez, eta ez da baztertzailea izanen.

Probak gainditu dituzten izangaiek alegatutako merezimenduak baloratuko ditu epaimahaiak, II. eranskineko merezimenduen baremoari jarraikiz.

Oposizio-lehiaketan parte hartzeko eskabidea egitean aurkeztu eta egiaztatu beharko dira merezimendu guztiak. Agiri horiek jatorrizkoak edo behar bezala konpultsatuak izan beharko dute, bestela aurkeztu gabetzat joko baitira.

Merezimenduen baloraziotik ateratzen diren puntuazioak oposizioa hasi baino lehen argitaratuko dira udaleko web-orrian eta udaleko ediktu-taulan, eta adieraziko da hurrengo bost egun balioduneko epean izangaiek erreklamazioak aurkeztu ahalko dituztela.

6.2. Oposizioaldia.

Oposizioaldia baztertzailea izanen da eta 85 puntu lortzen ahalko dira gehienez ere.

Oposizioaldiko proba bakoitzerako dei bakarra eginen da, eta izangaiek nortasun agiri nazionala, pasaportea edo gidabaimena eraman beharko dute. Oposiziotik baztertuko dira iragarritako egunetan, orduetan eta tokietan agertzen ez diren izangaiak edo aipatu diren agirien bidez identifikatzen ez direnak.

Oposizioko proba bakoitzaren kalifikazioa amaitu ondoren, epaimahaiak iragarki-taulan jarriko du jendaurrean gainditu duten izangaien zerrenda, lortutako kalifikazioekin.

Oposizioaldiko probak honako oinarri honetan zehaztutakoak izanen dira, eta deialdiko III. eranskinean zehazten den gai-zerrendako gaiei buruz eta ordena berean eginen dira.

Gai guztiak eskatuko dira deialdi hau Nafarroako Aldizkari Ofizialean argitaratzen den egunean indarrean den araudiaren arabera.

Hautaprobak egiteko, behar diren eta posible diren egokitzapenak eginen dira desgaitasun aitorturen bat dutenentzat, denbora eta baliabideen aldetik, eskabidean hala eskatu badute.

Oposizioak honako proba hauek izanen ditu:

Lehenbiziko proba, 45 puntu, gehienez ere.

Teorikoa: idatziz erantzun beharko zaie III. eranskinean jasotako gaiei buruzko galdera labur eta/edo test moduko batzuei.

Ariketa honetan gehienez ere 45 puntu emanen dira, eta ariketa gainditzeko gutxienez ere 22 puntu erdietsi behar dira; baztertuta geldituko dira hori lortzen ez duten izangaiak.

Bigarren proba, 40 puntu, gehienez ere.

Praktikoa: lanpostuarekin zerikusia duten proba praktiko batzuk egin beharko dira, II. eranskineko zerrendan ageri diren gaiei buruzkoak.

Ariketa honetan gehienez ere 40 puntu emanen dira, eta ariketa gainditzeko gutxienez ere 20 puntu erdietsi behar dira; baztertuta geldituko dira hori lortzen ez duten izangaiak.

Epaimahaiak zehaztuko du ariketa horretako probak egun bakarrean ala gehiagotan eginen diren, bai eta zenbat denbora iraunen duten ere, betiere haien edukiaren arabera.

Epaimahaiak erabakiko du proba hauetako bakoitza egiteko zer denbora izanen den.

Proba bakoitzaren kalifikazioa bukatu ondoren, epaimahaiak Arakilgo Udalaren egoitza elektronikoan eta iragarki-taulan argitaratuko ditu izangaiek lortutako puntuazioak, eta bost egun balioduneko epea ezarriko du interesdunek eskubidekotzat jotzen duten guztia alega dezaten.

7. oinarria.–Probak gainditzen dituztenen zerrenda, izendapen proposamena eta agirien aurkezpena.

7.1. Azken ariketaren kalifikazioa eta lehiaketaldiaren balorazioa bukatuta, probak gainditu dituztenen zerrenda eginen du epaimahaiak, puntuazio handienetik txikienerako hurrenkeran antolatua, izangai bakoitzak lehiaketaldian eta oposizioaldian ateratako puntuazioak batuta. Zerrenda Arakilgo Udalaren web-orrian eta iragarki-taulan argitaratuko da.

7.2. Epaimahaiak alkatetzara bidaliko du puntuaziorik handiena lortu duen izangaiaren aldeko izendapen-proposamena, loteslea izanen dena. Proposamen hori argitaratuko da Nafarroako Aldizkari Ofizialean eta Arakilgo Udalaren iragarki-taulan.

7.3. Izendapen proposamena Nafarroako Aldizkari Ofizialean argitara eman eta hamabost egun naturaleko epearen barrenean, proposatutako izangaiak honako agiri hauek aurkeztu beharko ditu Udalaren Erregistro Orokorrean:

1.–Zin egin edo hitz ematea Nafarroako Foru Araubidea errespetatu, Konstituzioari eta legeei men egin, eta karguari dagozkion beharkizunak zuzen beteko dituela.

2.–Zinpeko aitorpena, adierazten duena ez dagoela eginkizun publikoak betetzeko ezgaiturik edo gabeturik, eta ez dela bereizia izan inongo administrazio publikoren zerbitzutik.

3.–Osasun ziurtagiria, frogatzen duena ez duela eritasunik edo akats fisikorik, galarazten dionik karguaren eginkizunetan aritzea. Izangaiak minusbaliotasunen bat alegatzen badu, egiaztagiri bat aurkeztu beharko du, balorazio eta orientazio talde eskudunek emana, non azalduko baitute bateragarriak direla hura eta deialdi honetako xede den lanpostua.

7.4. Aipatu epearen barnean, eta aski arrazoituriko ezinbesteko kasuetan izan ezik, hautaturiko izangaiak ez baditu aurkezten aipatu agiri horiek, ezin izanen da izendatu eta, beraz, bere jarduketa guztiak deuseztaturik geldituko dira, galarazi gabe deialdian parte hartzeko eskabidean egin faltsukeriagatik legokiokeen erantzunbeharra.

7.5. Aurreko apartatuan azaldutakoa gertatuz gero, lanpostua beteko du 7.1 oinarrian aipaturiko gaindituen zerrendan ondo-ondotik datorren izangaiak. Harekin ere aurreko apartatuetan adierazitako moduan jokatuko da.

8. oinarria.–Izendapena eta lanpostuaz jabetzea.

8.1. Hautapen prozesua bukaturik, eta izangaiak aurreko 7.3 oinarrian aipatutako agiriak aurkezturik, proposatutako izangaia Arakilgo Udaleko funtzionario izendatuko du Alkatetzak, zerbitzu anitzetako ofizialaren lanpostuan aritzeko.

Izendapena Nafarroako Aldizkari Ofizialean argitaratuko da.

8.2. Izendatutako izangaiak hilabeteko epean hartu beharko du lanpostuaren jabetza, izendapena jakinarazten zaionetik hasita. Ezinbesteko kasuetan salbu, epe horretan ez bada jabetza hartzen, izendapenak dakartzan eskubide guztiak galduko ditu, 7.4 oinarrian ezarritako moduan eta ondorio berekin. Halakorik gertatzen bada, 7.5 oinarrian xedatuari jarraikiko zaio.

9. oinarria.–Behin betiko zerrenda.

Proba teorikoa gainditzen duten izangai guztien puntuazioaren behin betiko zerrenda erabiltzen ahalko da aldi baterako kontratazioak egiteko, lan pilaketak, bajak, oporrak edo gerora sortzen diren arrazoiak direla-eta edo udal zerbitzuak indartzeko behar puntualak izaten direnean, eta kasu horretan lanpostuaren kontratazioa kasuan kasuko lanpostuari egokituko zaio.

10. oinarria.–Aldi baterako kontrataziorako dei egitea.

10.1. Gainditu duten izangaiei Arakilgo Udalean gertatzen diren beharren arabera eginen zaie dei, deialdi honetan ezarritakoari eta aplikatzekoak diren gainerako arauei jarraikiz.

10.2. Deialdiak kudeatzeko, kontuan izanen da IV. eranskinean ezarritako araudia.

10.3. Lokalizatuak izateko, izangaiek harremanetarako telefono bat bederen eman beharko dute (harremanetarako beste telefono batzuk ere eman ditzakete), bai eta helbide elektroniko bat ere. Informazio hori une oro eguneratua eduki behar dute.

11. oinarria.–Datuen babesa.

Bat etorriz 2016/679 (EB) Erregelamenduaren 13. artikuluan ezarritakoarekin (Datuak Babesteko Erregelamendu Orokorra, DBEO), izangaiei honako hauek jakinarazten zaizkie:

–Arakilgo Udala da parte-hartzaileek emandako datu pertsonalen tratamenduaren arduraduna.

–Datuen tratamenduaren helburua da langileak hautatzea eta deialdiko lanpostua betetzea.

–Oinarri juridikoa honako hau da: DBEOren 6.1.b) artikulua, kontratu bat gauzatzeko behar den tratamendua, interesduna kontratu horren alderdi bat denean, edo berak eskatuta kontratu aurreko neurriak aplikatzeko beharrezkoa den tratamendua, eta DBEOren 6.1.c) artikulua, tratamenduaren arduradunari aplikagarri zaion legezko betebehar bat betetzeko behar den tratamendua.

–Datuak zer helburutarako bildu diren, helburu hori lortzeko beharrezkoa den denbora guztian gordeko dira, bai eta deialdiaren edo datuen tratamenduaren ondoriozko erantzukizun guztiak zehazteko beharrezkoa den denbora guztian ere. Artxiboen eta dokumentazioaren gaineko araudian ezarritakoa aplikatuko da (Nafarroako toki-erakundeen agiriak ebaluatu eta ezabatzeko jarraibideak).

–Datuen komunikazioa eginen da legeak ezarritako kasuetan (5/2015 LED, urriaren 30ekoa), gardentasunaren atarian argitaratzea barne, 5/2018 Foru Legearen 19.2.f artikuluarekin bat.

–Titularrek eskubidea izanen dute datuetan sartzeko, datuak zuzentzeko, deuseztatzeko, tratamendua mugatzeko, kontra egiteko eta datuak eramateko, udal bulegoetara joz edo webgunearen bitartez, non informazio gehiago baitago eskura.

–Halaber, eskubidea dute erreklamazioa aurkezteko Datuak Babesteko Espainiako Bulegoan (aepd.es), uste badute datuen tratamendua ez datorrela bat indarrean den araudiarekin.

12. oinarria.–Errekurtsoak.

Deialdiaren, oinarrien eta aplikazio egintzen aurka, honako errekurtso hauetako bat jartzen ahalko da, hautara:

a) Berraztertzeko errekurtsoa, egintza gauzatu duen organoari zuzendua, hilabeteko epean, ebazpen hau jakinarazi edo argitaratu eta biharamunetik aitzina.

b) Administrazioarekiko auzi errekurtsoa, zeina zuzendu behar baitzaio Nafarroako Justizia Auzitegi Nagusiko Administrazioarekiko Auzien Epaitegiari, bi hilabeteko epean, errekurtsoaren xedeko egintza edo erabakia jakinarazi edo argitaratu eta biharamunetik hasita.

c) Gora jotzeko errekurtsoa, Nafarroako Administrazio Auzitegiari zuzendua, hilabeteko epean, errekurtsoaren xedeko egintza edo erabakia argitaratu edo jakinarazten denetik hasita.

Gainera, kalifikazio-epaimahaiaren erabakien aurka, posible da gora jotzeko errekurtsoa aurkeztea, Arakilgo Udaleko alkateari zuzendua, hilabeteko epean, errekurtsoaren xedeko egintza edo erabakia jakinarazten denetik hasita.

Arakilen, 2025eko maiatzaren 19an.–Alkatea, Oihana Olaberria Jaka.

I. ERANSKINA.–ESKABIDEA

https://www.navarra.es/appsext/DescargarFichero/default.aspx?CodigoCompleto=Portal@@@epub/BON/IMPRESOSG/005_Local_solicitud_proceso_selecc_E.pdf

II. ERANSKINA.–MEREZIMENDUEN BAREMOA

Merezimendu guztiak agiri bidez eta egiaztatzeko moduan frogatu behar dituzte izangaiek, oposizio-lehiaketan parte hartzeko eskabidea aurkeztean, horretarako erabiliz jatorrizko agiriak edo behar bezala konpultsatuak. Horrela egin ezean, ez dira kontuan hartuko. Epaimahaiak ezin izanen du inola ere kontuan hartu aurkeztu gabeko edo agirien bidez frogatu gabeko merezimendurik.

Epaimahaiak noiznahi eska ditzake izangaiek alegatutako merezimenduei buruzko argibideak eta datu osagarriak.

Lanbide-esperientzia.

1. Administrazio publiko batean emandako zerbitzu urte edo zati proportzional bakoitzeko, baldin eta deitutako lanpostuaren antzeko ezaugarriak baditu: 2 puntu urteko.

ADMINISTRAZIOAK EMANDAKO ZIURTAGIRIA

2. Titulartasun publiko edo pribatuko enpresa batean emandako zerbitzu-urte edo zati proportzional bakoitzeko, baldin eta deialdiko lanpostuaren antzeko ezaugarriak baditu: 1 puntu urteko.

ENPRESAK EMANDAKO ZIURTAGIRIA

Apartatu honetan 10 puntu lortzen ahal dira gehienez.

Oharrak:

Deialdia argitaratu ondotik egindako zerbitzuak ez dira baloratuko.

Lan egindako denbora egiaztatzeko, aurkeztu beharko dira enpresek eta/edo administrazio publikoek emandako ziurtagiriak, adierazita egindako lana eta zigorrik edo diziplina-espedienterik ez dela jaso.

Epaimahaiak, beharrezkotzat badu, aipatutakoa baino agiri gehiago eskatzen ahalko dizkie izangaiei.

Epaimahaiak edozein unetan eskatzen ahalko dizkie izangaiei lehiaketaldia baloratzeko aurkeztutako dokumentazioaren jatorrizkoak edo fotokopia konpultsatuak, bai eta aurkeztutako edozein agiriri buruzko argibideak ere. Epaimahaiak ebazten ahalko du eskatutako dokumentazioa aurkezten ez duten edo epaimahaiak eskatutako argibideak ematen ez dituzten izangaiek alegatutako merezimenduak ez baloratzea.

Lehiaketaldia bukatutakoan, epaimahaiak Udalaren iragarki-taulan argitara emanen du izangai bakoitzak lortutako puntuazioa.

Lehiaketaldian eskuraturiko puntuak oposizioaldian lortutako puntu guztiei batuko zaizkie, eta horren emaitza izanen da oposizio-lehiaketan guztira eskuraturiko puntuazioa.

Prestakuntza.

Lanpostuaren eginkizunekin zerikusia duten prestakuntza-ikastaroak egiteagatik, eta lanpostuarekin lotutako LH2, erdi mailako gradua edo haren baliokidea den titulazioa edukitzeagatik, irizpide hauen arabera ateratzen diren puntuazioak emanen dira:

–Erakunde publiko aitortuek antolatutako ikastaro bakoitzeko, lanpostuaren eginkizunekin zerikusia badute eta 10 orduko iraupena gutxienez: 1 puntu.

–Erakunde publiko aitortuek antolatutako ikastaro bakoitzeko, lanpostuaren eginkizunekin zerikusia badute eta gutxienez 20 ordu eta gehienez 50 ordu irauten badute: 2 puntu.

–Erakunde publiko aitortuek antolatutako ikastaro bakoitzeko, lanpostuaren eginkizunekin zerikusia badute eta gutxienez 50 ordu eta gehienez 100 ordu irauten badute: 3 puntu.

–Erakunde publiko aitortuek antolatutako ikastaro bakoitzeko, lanpostuaren eginkizunekin zerikusia badute eta gutxienez 100 ordu eta gehienez 200 ordu irauten badute: 4 puntu.

–Erakunde publiko aitortuek antolatutako ikastaro bakoitzeko, lanpostuaren eginkizunekin zerikusia badute eta 200 ordutik gora irauten badute: 5 puntu.

Atal honetan 5 puntu lortzen ahal dira gehienez.

III. ERANSKINA.–GAI-ZERRENDA

1.–Arakil: kokapen geografikoa, azalera, biztanleria, lekuak, alderdiak, errekastoak, fauna, landaredia. Udal ondasun eta instalazioen, eraikinen eta zerbitzuen ezaugarriak eta antolaketa. Udalaren osaera.

2.–Arakilgo Udalaren ordenantzak.

3.–Administrazio publikoen administrazio-prozedura erkidearen oinarrizko gaiak: jakinarazpenak, administrazio-egintzak. Udalaren antolamendua eta eskumenak.

4.–Oinarrizko ezagutzak laneko segurtasun eta higienearen gaineko arauez eta oztopo arkitektonikoen gaineko arauez. Segurtasuna, makinak eta erremintak erabiltzean.

5.–Igeltserotzako kontzeptu orokorrak. Erremintak. Materialak. Zolatzea eta alikatatzea. Kofratuak eta paretak egitea. Obrak egoera onean zaintzea eta haiek mantentzeko lanak. Obra txiki eta ertainetako makinak maneiatzea.

6.–Zurgintzako oinarrizko lanak, esaterako: ate-leihoak doitzea, sarrailak, bonbinak eta pertsianak eta horrelakoak.

7.–Ohiko argien zirkuituak: etengailuak, kommutadoreak, entxufe-oinak, lanparak, pitzarazgailuak eta erreaktantziak. Eraikinetako banaketa koadroak, potentzia kontrolatzeko etengailua, magnetotermikoa eta diferentziala.

8.–Iturgintzako eta berokuntzako instalazioen gaineko mantentze-lanak: sanitarioak, txorrotak, zisternak, sifoiak, berokuntza zirkuituak, zirkuituak betetzea eta airez purgatzea, galdara-gelak eta haien berezko elementuak. Ezagutzea instalazio termikoetan efizientzia energetikoa hobetzeko sistemak (eguzki-energia termikoa, energia geotermikoa, biomasa).

9.–Ezagutzea, maneiatzea eta mantentzea lorezaintzako eta mendiko produktuak, makinak eta erremintak (sasi-garbitzeko makina, belarra mozteko makina, heskai-moztekoa, aizkora, motozerra, altueran moarratzeko plataforma jasotzailea, traktorea, atzerako hondeamakina). Fitosanitarioak aplikatzea.

10.–Lorezaintzako eta basogintzako ezagutzak. Arakilgo herri-basoa antolatzeko plana.

11.–Hondakinen tratamendua eta haiei buruzko ezagupen orokorra.

12.–Aritmetikako eta geometriako oinarrizko ezagupenak.

IV. ERANSKINA–LAN-POLTSAREN ARAUDIA

Probak gainditu baina lanposturik eskuratu ez dutenen zerrenda.

Zerrenda hauetan sartuko dira lanposturik gabeko izangai gaindituak.

Probak gainditu baina lanposturik eskuratu ez dutenen zerrendan lehentasuna ezartzeko, aintzat hartuko da sartzeko hautapen-prozesuan lortutako puntuazio, handienetik txikienera. Berdinketarik izanez gero, lehentasun-postua ebatziko da Udalak eginen duen zozketa baten bidez.

Aldi baterako kontratatzeko prozesuaren kudeaketa.

Deiak egiteko arau orokorrak.

1. Errazago lokalizatzeko, izangaiek harremanetarako telefono bat bederen eman beharko dute (harremanetarako beste telefono batzuk ere eman ditzakete), bai eta helbide elektroniko bat ere. Informazio hori etengabe eguneratua eduki behar dute.

2. Izangaiak honela lokalizatuko dira:

–Kontratazioa presakoa ez bada, lokalizatzeko lau saio eginen dira 2 egunean.

–Lanpostuan beranduenez bi egunen buruan hasi behar bada, lokalizatzeko bi saio eginen dira egun berean, tartean gutxienez 2 ordu utzita.

–Lanpostuan gehienez 24 orduren buruan hasi behar bada, izangai guztiei segidan deituko zaie, une horretan kontratazio zerrendan duten hurrenkeraren arabera, proposatutako kontratua onartzeko izangai eskuragarria aurkitu arte.

3. Lokalizatzeko lehen saioa telefonoz deituta eginen da, eta bigarrena, beharrezkoa balitz, mezu elektronikoa bidalita.

4. Betiere, dei bakoitza artxibo batean jasoko da, hura zer egoeratan, zer egunetan eta zer ordutan egin den adieraziz. Langileen ordezkariek sarbide zuzena izanen dute artxibo horretan.

5. Izangai batekin harremanetan jartzerik ez bada, zerrendako hurrengoari edo hurrengoei deituko zaie, harik eta eskainitako lanpostua edo lanpostuak bete arte. Izangaiekin harremanetan jartzerik izan ez bada, izangai horiek zerrendan zuten postuari eutsiko diote.

6. Izangai batekin harremanetan jarri eta kontratatzeko eskaintza eginez gero, erantzuten ez badu, uko egiten diola ondorioztatuko da.

7. Kontratu bat onartzen duten izangaiei ez zaie beste lanpostu batean aritzeko kontraturik eskainiko, non eta ez den lanpostu hutsak betetzeko, edo 6 hilabeteko edo gehiagoko kontratuetarako, edo lanaldia luzatzeko.

Deietarako orokorrean ezarritakoa deusetan ukatu gabe, izangaia lanpostuan aritu bada aldi baterako kontratu baten bidez eta, kontratu hori bukatu eta hurrengo 15 eguneko epearen barnean, baimentzen bada antzeko lanpostu bat aldi baterako betetzea, Administrazioak izangai berari eskainiko dio kontratua, dei egiten zaion mementoan baldintza hauek betetzen badira:

a) Dei egiten den unean indarrean dagoen zerrenda batean egotea izangaia.

b) Aurreko kontratuaren bukaeraren arrazoia ez izatea hari uko egin izana.

Izangairen batek eskaini zaion lanpostuari uko egiten baldin badio, zerrendatik at geldituko da, honako egoera hauetako batean dagoela frogatu ezean:

a) Horretara behartua egotea, indarrean dagoen izendapen, kontratu administratibo edo lan kontratu batengatik.

b) Aldi baterako ezintasun egoeran egotea, edo lizentzia izatea ama izateagatik edo adoptatzeagatik.

c) Zaindu behar badu 3 urte baino gutxiagoko semea edo alaba, berezkoa zein adoptatua. Arrazoi hori dela kausa kontratu bati uko egiten dioten izangaiak ez dira berriz eskuragarri egonen, harik eta kontratuari uko egin zioten egunetik gutxienez hilabete bat iragan arte, salbu eta hura eragin zuen arrazoia lehenago desagertzen bada.

d) Zaindu behar izatea bigarren mailara arteko odol edo ezkontza bidezko ahaide bat, berez baliatu ezin dena, adina, istripua edo eritasuna dela kausa. Arrazoi hori dela kausa kontratu bati uko egiten dioten izangaiak ez dira berriz eskuragarri egonen, harik eta kontratuari uko egin zioten egunetik gutxienez hilabete bat iragan arte, salbu eta hura eragin zuen arrazoia lehenago desagertzen bada.

e) Izangaia ezkondu berria izatea edo, uztailaren 3ko 6/2000 Legearen arabera (Bikote Egonkorrentzako Berdintasun Juridikoari buruzko Legea), parekatutako egoeran sartu berria izatea, baldin eskainitako kontratuaren hasiera eguna badago bikotea eratu ondoko edo eratu aurreko hamabortz egun naturalen barnean.

f) Desgaitasunen bat behar bezala aitortua izatea eta desgaitasunaren ezaugarriak bateraezinak izatea eskaintzen zaion lanpostuaren berariazko ezaugarriekin.

Kasu guztietan agiri bidez frogatu behar da badela arrazoi bat, 15 egun naturaleko epean, uko egin zaion lanpostua eskaintzen den egunaren biharamunetik hasita.

Honako hauek izanen dira izangaiak deiari dagokion zerrendatik kanpo gelditzeko arrazoiak:

a) Eskainitako lanpostuari arrazoirik gabe uko egitea.

b) Dei egin eta lanpostua onartu ondotik, kontratua ez sinatzea, izangaiari egotzi beharreko arrazoiengatik.

c) Probaldia ez gainditzea, baldin zerbitzuaren arduradunaren txosten arrazoitua eta langileen ordezkariekiko adostasuna badaude.

d) Sinatutako kontratuari uko egitea.

e) Urtebeteko epean izangaiarekin harremanetan jartzea ezinezkoa izatea, nahiz eta behin eta berriz egin kontratatzeko deiak, hark emandako telefonoaren edo helbide elektronikoaren bidez.

f) Lanpostua bertan behera uztea.

g) Kontratua azkentzea diziplina espediente bat izapidetu izanaren ondorioz, baldin bukatzen bada azkentzea onesten duen ebazpen irmo batekin.

h) Kontratua amaitzea gerora sortutako arrazoiak direla kausa; hain zuzen, kontratatzen den langilea lanpostuan aritzeko gaitasun edo egokitzapen faltagatik, horrek lanpostuak dituen eginkizunak eraginkortasunez betetzea galarazten duen errendimendu eskasa badakar. Betiere, zerbitzuaren arduradunaren txosten arrazoitua eta langileen ordezkariekiko adostasuna egon behar dira.

Iragarkiaren kodea: L2507544