255. ALDIZKARIA - 2024ko abenduaren 17a

1. NAFARROAKO FORU KOMUNITATEA

1.5. ESTATUTUAK ETA LAN HITZARMEN KOLEKTIBOAK

189C/2024 EBAZPENA, urriaren 13koa, Ekonomia Sozialeko eta Laneko zuzendari nagusiak emana, zeinaren bidez erabakitzen baita EIS Ilundain Empresa de Inserción SLU enpresaren hitzarmen kolektiboa erregistratzea, gordailutzea eta Nafarroako Aldizkari Ofizialean argitaratzea.

Ikusi da EIS Ilundain Empresa de Inserción SLU enpresak aurkeztutako hitzarmen kolektiboa (kode zenbakia: 31101882012021), erregistro honetan sartu baitzen 2024ko abuztuaren 2an, 2024ko ekainaren 21ean enpresaren eta sindikatuen ordezkaritzek sinatu ondoren.

Langileen Estatutuaren Legearen testu bategina onesten duen urriaren 23ko 2/2015 Legegintzako Errege Dekretuaren 90. artikuluaren 2. eta 3. apartatuetan eta Hitzarmen kolektiboak, laneko akordio kolektiboak eta berdintasun planak erregistratu eta gordailutzeari buruzko maiatzaren 28ko 713/2010 Errege Dekretuan ezarritakoarekin bat etorriz,

Nafarroako Foru Komunitateko Administrazioari eta foru-sektore publiko instituzionalari buruzko martxoaren 11ko 11/2019 Foru Legearen 32. artikuluak ematen dizkidan eskudantziak erabiliz, eta Eskubide Sozialetako, Ekonomia Sozialeko eta Enpleguko Departamentuaren egitura organikoa ezartzen duen azaroaren 15eko 251/2023 Foru Dekretuak ematen dizkidanak, honako hau,

EBAZTEN DUT:

Lehenengoa.–Nafarroako Hitzarmen Kolektiboen, Lan Akordio Kolektiboen eta Berdintasun Planen Erregistroan inskribatzea EIS Ilundain Empresa de Inserción SLU enpresak aurkeztutako hitzarmen kolektiboa (kode zenbakia: 31101882012021).

Bigarrena.–Nafarroako Aldizkari Ofizialean argitara dadila xedatzea, orok jakin dezaten.

Hirugarrena.–Ebazpen hau eskatzaileari jakinaraztea, eta ohartaraztea ebazpenak ez diola bukaera ematen administrazio-bideari, eta, haren aurka, gora jotzeko errekurtsoa aurkezten ahal diola Eskubide Sozialetako, Ekonomia Sozialeko eta Enpleguko kontseilariari, hilabeteko epean, ebazpena jakinarazi eta hurrengo egunetik aurrera.

Iruñean, 2024ko urriaren 13an.–Ekonomia Sozialeko eta Laneko zuzendari nagusia, Iñaki Mendióroz Casallo.

EIS ILUNDAIN EMPRESA DE INSERCIÓN SLUREN II. LAN HITZARMEN KOLEKTIBOA

HITZAURREA

Hitzarmen hau sinatzen duten alderdiak, hau da, EIS Ilundain Empresa de Inserción SLU enpresako langileen ordezkariak eta enpresako zuzendaritza bat datoz EIS Ilundain Empresa de Inserción SLU laneratzeko enpresan lan egiten duten pertsonen lan baldintzak arautzeko gutxieneko esparru baten beharra dagoela adieraztearekin.

Gainera, hitzarmen hau aplikatuta, EIS Ilundain Empresa de Inserción SLU enpresak mantendu egiten du enplegua sortzeko eta finkatzeko konpromisoa, batez ere, askotariko inguruabarrengatik egoera zailean edo gizartean baztertuta dauden gazteen kasuan, eta bultzatu egiten du, era berean, baztertuta geratzeko arriskuan dauden gazteak lan merkatu arruntean erabat txertatzeko helburua ere.

EIS Ilundain Empresa de Inserción SLU enpresaren II. hitzarmen kolektiboaren testu artikulatua.

I. KAPITULUA.–XEDAPEN OROKORRAK ETA EREMUA

1. artikulua. Eremu funtzionala.

Hitzarmen honen bitartez, EIS Ilundain Empresa de Inserción SLU enpresaren eta enpresa horretan lan egiten duten langileen arteko lan harremanak arautzen dituzten baldintzak ezartzen dira.

EIS Ilundain Empresa de Inserción SLU enpresaren helburu soziala lorezaintzako, arotzeriako, eraikuntzako eta, oro har, zerbitzuen sektoreko lanak egitea da, baztertuta dauden pertsonen gizarteratzea eta prestakuntza soziolaborala lortzeko enplegu arrunterako igarobidean.

Hitzarmen kolektibo honek Langileen Estatutuan eta hura garatzeko gainerako legeetan ezarritako edozein kontratazio mota duten langile guztiak hartzen ditu eraginpean: langile finkoak, aldi baterako langileak, behin-behinekoak, bitarteko langileak eta abar.

2. artikulua. Lurralde eremua.

Hitzarmen kolektibo hau EIS Ilundain Empresa de Inserción SLU enpresak Nafarroako Foru Komunitatean (NFK) dituen lantokietan lan egiten duten langile guztiei aplikatuko zaie.

3. artikulua. Langile eremua.

Hitzarmenaren eremuaren barruan daude EIS Ilundain Empresa de Inserción SLU enpresan lan kontratuaren araubideari jarraikiz lan egiten duten langile guztiak.

Hitzarmenaren aplikaziotik kanpo gelditzen dira gizarte boluntario lanak egiten dituztenak (NFKko boluntariotzari buruzko legean xedatutakoaren arabera araututa), prestakuntza praktikak egiten ari direnak edo EIS Ilundain Empresa de Inserción SLU enpresarekin zerbitzuen errentamendu kontratuak sinatuta dituzten enpresen plantillako kide direnak.

4. artikulua. Indarraldia eta iraupena.

Hitzarmen hau 2024ko urtarrilaren 1ean sartuko da indarrean ondorio guztietarako, VII. kapituluan arautzen denerako izan ezik; kapitulu horretakoa 2024ko uztailaren 1etik aurrera aplikatuko da. Hitzarmen honen indarraldiak 2026ko abenduaren 31ra arte iraunen du.

5. artikulua. Hitzarmena salatzea eta indarraldia luzatzea.

Hitzarmen hau automatikoki luzatuko da urtez urte, hitzarmena berariaz eta idatziz salatu ezean. Salaketa hitzarmena sinatu duten alderdietako batek egin beharko du, indarraldia bukatu baino gutxienez sei hilabete lehenago.

Hitzarmena salatu ondotik, aurreraeragin mugagabea adostu da berariaz. Hau da, hitzarmenak indarrean eta erabat aplikagarri jarraituko du gainerako klausulei dagokienez, beste hitzarmen batekin ordezten den arte.

6. artikulua. Osotasunari lotzea.

Hemen itundutako baldintzek multzo organiko eta zatiezina osatzen dute, eta, aplikazio praktikoari dagokionez, osotasunean hartuko dira.

Lan edo epai arloko administrazio agintaritzak, bere ahalmenez baliatzean, itunetakoren batek indarreko legedia urratzen duela uste badu, hitzarmen honek ondorioak izanen ditu, berriz aztertu beharreko artikulua edo artikuluak izan ezik. Azterketa hori eraginpeko araua zein den jakinarazi eta hiru hileko epean eginen da.

7. artikulua. Lanaren antolaketa.

Indarreko legeriari jarraikiz, enpresaren zuzendaritzaren eskumena eta erantzukizuna da lana antolatzea, betiere indarreko lege xedapenak betez, eta enpresan produktibitate maila egokia lortzea du xede, giza baliabideak eta baliabide materialak ahalik eta hobekien baliatuta.

Lan eta jardueren antolakuntzarekin, kalitatearen eta jardunbide egokien irizpideak ezartzen aurrera egin nahi da, enpresaren funtzionamenduan, antolakuntzan eta jardunean zorrotz betetze aldera.

8. artikulua. Jarraipenerako eta interpretaziorako batzorde paritarioa.

Hitzarmena betetzen dela zaintzeko, eta hitzarmena aplikatzean eta interpretatzean sortzen diren zalantzen berri izan eta horiek argitzeko, batzorde paritarioa eratuko da gehienez ere sei kiderekin: hiru ordezkari langileen aldetik eta beste hiru enpresaren aldetik. Batzorde honetako kide izateko lehentasuna izanen dute hitzarmenaren negoziazio batzordeko kide izan direnek, eta horietako bat langileen hiru ordezkarietako bat izanen da; hain zuzen ere, jardunean dagoen langileen ordezkari bat edo enpresa-batzordeko kide bat.

Bi alderdietako edozeinek eskatuta eginen dira bilerak, biltzeko eskaera egiten denetik hamar egunen buruan. Lehenengo bileran, presidentea eta idazkaria aukeratuko dira.

Batzorde paritarioak hitzarmenaren interpretazioari buruz egiten dizkioten kontsulta guztiak jasoko ditu, enpresaren, langileen ordezkarien edo enpresa batzordearen bitartez, eta arau hauetan aurreikusi ez den orotan bere funtzionamendua arautzeko eskumena ere badagokio. Era berean, batzorde paritarioak hitzarmen honen klausulak moldatzeko ahalmena izanen du, aurreikusi ez den arazoren bat izanez gero, edo hitzarmenaren edukia moldatzen ahal du datu objektiboen eta aurrez finkatutakoen arabera.

Hitzarmen honen indarraldian, egoki iritzitako artikuluak aldatzen ahal dira, aplikagarritasunari dagokionez edo moldagarritasunari dagokionez, errealitate aldakorraren aurrean. Kasu horietan, hitzarmenaren negoziazio batzordea biltzeko deialdia eginen da.

Hitzarmen hau interpretatzeko garaian desadostasunak sortzen badira, lehenik batzorde paritariora joko da auzigaia ebatz dezan. Beraz, auzibidera jo baino lehen, batzorde paritarioak interpretatzea derrigorrezkoa dela itundu da.

Batzordearen erabakiak ordezkaritza bakoitzeko gehiengoaren aldeko botoarekin hartu behar dira beti, eta ematen dituen ebazpenak lotesleak izanen dira hala enpresarentzat nola langileentzat. Batzorde paritarioak gehienez hamabost eguneko epean ebatzi beharko ditu proposatzen zaizkion auziak.

Batzorde paritarioan desadostasunik egonez gero, alderdiek adostu dute gatazkari buruzko erabakia Nafarroako Lan Auzitegiak hartuko duela, hitzarmenean ezartzen diren prozedura estrajudizialak aplikatuz (bitartekaritza eta adiskidetze faseetan). Indarrean dagoen legeriako arbitraje prozedurak (derrigorrezko arbitrajea ez beste guztiak) borondatezkoak izanen dira alderdientzat.

II. KAPITULUA.–KONTRATAZIOAK

9. artikulua. Bereizkeriarik ezaren klausula orokorra.

Debekatuta dago arraza, sexua, aukera sexuala, erlijioa, etnia, aukera politikoa edo sindikala nahiz adina direla-eta diskriminaziorik egitea soldatetan, eta arrazoi horiek direla-eta enpresan lanpostu berean ari diren langile guztiei ordainsari bera ez ematea ere bai.

Emakumeek eta gizonek aukera berak edukiko dituzte enpleguan, prestakuntzan, sustapenean eta beren lan jardunean.

Gizonek eta emakumeek soldata bera izanen dute lan bera egiteagatik, eta gainerako lan baldintza guztietan ere berdintasuna bermatuko zaie, alderdi guztietan.

Beharrezkoak diren neurriak hartuko dira lanpostuak, lan jardunak, lanaren antolaketa eta lan baldintzak egokiak izan daitezen emakumeentzat zein gizonentzat.

Gainera, alderdi sinatzaileek konpromisoa hartzen dute batzorde paritarioaren bidez lantzeko gizonek eta emakumeek aukera berak edukitzeko jardun onak, honako hauetan ezartzen denarekin bat etorriz:

–Emakumeen eta Gizonen Berdintasun Eragingarrirako martxoaren 22ko 3/2007 Lege Organikoa.

–Florentzian, 1995eko urriaren 21ean, egin zen elkarrizketa sozialari buruzko gailurrean hartu ziren erabakiak biltzen dituen baterako adierazpena: –Baterako adierazpena lantokian arraza-bereizkeria eta xenofobia ez gertatzeko neurriei eta tratu-berdintasuna sustatzeko neurriei buruz–.

–Europako Parlamentuaren eta Batzordeak 2002/73/CE zuzentarauak, 76/207/CEE zuzentaraua aldatzen duenak, ezartzen dituen oharrak, proposamenak eta irizpide orokorrak.

–6/2019 Errege Lege Dekretua, martxoaren 1ekoa, premiazko neurriak ezartzen dituena emakumeen eta gizonen arteko tratu eta aukera berdintasuna bermatzeko enplegu eta lanaren arloan.

–17/2019 Foru Legea, apirilaren 4koa, Emakumeen eta Gizonen arteko Berdintasunari buruzkoa.

–1616/2020 9 Errege Dekretua, urriaren 26koa, berdintasun planak eta haien erregistroa arautzen dituena.

–902/2020 Errege Dekretua, urriaren 13koa, Emakumeen eta Gizonen Ordainsari Berdintasunari buruzkoa.

–10/2022 Lege Organikoa, irailaren 6koa, Sexu Askatasunaren Berme Osoarena.

–PCM/1047/2022 Agindua, azaroaren 1ekoa, urriaren 13ko Emakumeen eta Gizonen Ordainsari Berdintasunari buruzko 902/2020 Errege Dekretuan aurreikusitako lanpostuak baloratzeko prozedura onartu eta argitaratzen duena.

–1/2023 Lege Organikoa, otsailaren 28koa, Sexu eta Ugalketa Osasunari eta Haurdunaldiaren Borondatezko Etendurari buruzko martxoaren 3ko 2/2010 Lege Organikoa aldatzen duena.

10. artikulua. Kontratazioa, orokorrean.

Kontratua idatziz gauzatu beharko da eta kontratu horren hiru kopia eginen dira. Alderdi bakoitzak kopia horietako ale bana hartuko du, eta hirugarrena organismo eskudunarentzat izanen da. Kontratuetan honako datu hauek zehaztu behar dira: kontratuaren iraupena eta langilea zein lanpostutarako eta zein lanbide taldetarako kontratatu den.

Enpresak langileen legezko ordezkarien eskura jarri behar du kontratuaren oinarrizko kopia, epealdi laburrean, gehienez ere hura sinatzen denetik hamar (10) egun igaro baino lehen, enpresaren egoitza sozialean.

11. artikulua. Kontratu motak.

Langilearen eta enpresaren arteko kontratazio librearen bidez sartuko dira langileak. Kontratua mota hauetakoa izan daiteke:

a) Kontratazio mugagabea: kontratu mota hau erabiliko da lanpostu iraunkor finkoak betetzeko. Kontratazio mota hau modalitate guztietan egiten ahalko da: lanaldi osoa, lanaldi partziala, hobaria jasotzeko eskubidearekin zein halakorik gabe, aldizkako kontratu finkoa eta abar.

b) Behin-behineko kontratazioa, ekoizpenaren inguruabarrengatik: Ekoizpenaren inguruabartzat joko dira ekoizpena une jakin batean eta ustekabean igotzea eta, enpresak normaltasunez jardun arren, gorabeherek aldi baterako desoreka sortzea eskuragarri dagoen enplegu egonkorraren eta behar denaren artean, betiere Langileen Estatutuaren 16.1 artikuluan jasotako kasuei erantzuten ez badiete. Aurreko paragrafoan aipatzen diren gorabeheren artean sartuko dira urteko oporraldien ondoriozkoak. Iraupen mugatuko kontratua ekoizpenaren inguruabarren ondorio bada, kontratuaren iraupena ez da sei hilabetetik gorakoa izaten ahalko.

c) Bitarteko kontratua edo ordezte kontratua: honelako kontratua erabiliko da lanpostua gordetzeko eskubidea duen langile bat ordeztu behar denean; ezinbestekoa da lan kontratuan adieraztea zer langile ordezten den eta zein den ordezpenaren arrazoia. Bitarteko langileak lanpostua utzi beharko du ordezten duen pertsona berriz lanean hastean denean, legez ezartzen den bezala eta legezko epealdiaren barruan.

Legez eta erregelamenduz arautzen diren kasuetan ez ezik, honako arrazoi hauengatik ere aplikatzen ahal da kontratu mota hau: norbait enplegurik eta soldatarik gabe uztea diziplina arrazoiengatik; norbaitek eszedentzia hartzea, lanpostua gordeta; guraso baimena edo amatasun baimena hartzea edo haurdunaldia arriskuan izatea; langile batek baja hartzea aldi baterako ezintasunagatik.

d) Gizarteratzeko eta laneratzeko prozesuetan dauden pertsonei egindako kontratuak: Gizarteratzeko prozesuetan dauden pertsonen kasuan, honako arau hauetan xedatutakoari jarraituko zaio: 44/2007 Legea, abenduaren 13koa, laneratzeko enpresen araubidea arautzen duena; 94/2016 Foru Dekretua, urriaren 26koa, Nafarroako Gizarteratze eta Laneratze Enpresen kalifikazioaren, erregistroaren eta laguntzen araubidea ezartzen duena; 340/2019 Foru Dekretua, abenduaren 27koa, urriaren 26ko 94/2016 Foru Dekretua aldatzen duena; edo aipatu berri diren horien ordezko beste lege batzuetan xedatutakoari.

Gizarteratze enpresaren eta gizartean baztertuta dauden langileen arteko lan kontratua iraupen jakin baterako egiten ahal da, lan arloko legeetan aurreikusitako kontratazio modalitateei jarraikiz eta Langileen Estatutuan eta aplikatu beharreko gainerako arauetan xedatutako betekizunen arabera, betiere gizarteratzeko eta laneratzeko ibilbideak ezinbestean duen iraupena gorabehera.

Era berean, kontratazioaren arrazoia zein den gorabehera, 44/2007 Legearen 15. artikuluan arautzen den lan kontratua sinatzen ahal da (44/2007 Legea, abenduaren 13koa, laneratzeko enpresen araubidea arautzen duena).

Dokumentu horien kopia bat igorriko da gizarteratzeko ibilbide pertsonalizatuaren jarraipena egiteko eskudunak diren Gizarte Zerbitzu Publikoetara.

Kontratuan, alderdiek gizarteratzeko ibilbide pertsonalizatuaren garapenean bere gain hartzen dituzten betebeharrak eta praktikan jarri beharreko neurri zehatzak zeintzuk diren adierazi behar da, eranskinean.

e) Gainerako kontratuak: Gainerako kontratuetarako indarrean dagoen legediari jarraituko zaio.

Lan kontratuak, horien luzapenak eta aldaketak idatzita formalizatuko dira beti, Estatuko Enplegu Zerbitzu Publikoak zehaztutako ereduan, eta enplegu bulego publikoari jakinaraziko zaizkio.

Artikulu honetan azaldutakoa alde batera utzi gabe, enpresak guztiz beharrezkoa denean baino ez ditu langileak Aldi Baterako Laneko Enpresen bidez kontratatuko, betiere langileen legezko ordezkariei aldez aurretik jakinarazita.

12. artikulua. Aldi baterako kontratuak.

Kontratu finkorik gabe kontratatutako langileak finko bihurtuz gero, lan egindako egunak baliozkoak izanen dira entitateko antzinatasunerako zenbatzeko.

Pertsona batek kontratatzen dutenetik hiru (3) urtez eten gabe lan egiten badu, aldi baterako kontratua (bitarteko kontratua edo ordezte kontratua ez beste guztiak) kontratu mugagabe bihurtuko da. Gizarteratzeko eta laneratzeko prozesuan dauden pertsonen kontratua ere ez da mugagabe izatera igaroko, kontratu mota edozein izanik ere, sinatzen dutenetik hiru urte igarotzen direnean bukatu eginen baita beren kontratua. (Arau hauetan xedatutakoaren arabera: 44/2007 Legea, abenduaren 13koa; 94/2016 Foru Dekretua, urriaren 26koa; eta 94/2016 Foru Dekretua, urriaren 26koa).

Orobat, langile finko bihurtuko dira hogeita lau hilabeteko epe batean hemezortzi hilabetetik gora kontratatuta egon diren langileak, jarraian izan nahiz epeka izan, lanpostu berean aritzeko aldi baterako bi kontraturen edo gehiagoren bidez, enpresak berak kontratatuta izan nahiz aldi baterako laneko enpresek kontratatuta izan, iraupen jakin bateko kontratu mota berdinetan nahiz desberdinetan. Hori ez da aplikatuko prestakuntzako, erreleboko eta bitarteko kontratuak erabiltzean.

13. artikulua. Kontratu mugagabe bihurtzea.

Langile guztien kontratuak automatikoki finko mugagabe bihurtuko dira honako kasu honetan: baldin eta, kontratuan ezartzen den aldia bukatu ondoren, langileak beren lanak egiten segitzen badu kontratu berria egin gabe, kontratua berariaz bukatu gabe edo luzatu gabe.

14. artikulua. Errelebo kontratua.

Langileek erretiro partzialari heltzea erabakitzen ahalko dute horretarako aldi bakoitzean eskatzen diren baldintza orokorrak betez gero.

Oro har, errelebo kontratua bukatutakoan, enpresak eginahalak eginen ditu kontratatutako langilea finko bihurtzeko, lanpostuak bere hartan irauten badu entitatean.

Adosten da ezen erretiro partzialeko langileek aukera izanen dutela beren lanaldia metatzeko aldi bakoitzean aplikatzekoak diren lege xedapenekin eta doktrina xedapenekin bat etorriz.

15. artikulua. Probaldia.

Kontratu finkorik gabeko langilea finko bihurtuz gero, probaldirako lan egindako egunak baliozkoak izanen dira zenbaktarako.

Langile sartu berriek probaldia eginen dute: sei hilabete kontratu mugagabea duten teknikari tituludunen kasuan, eta bi hilabete gainerakoen kasuan.

Probaldia aplikatzeko, kontratuaren iraupena bederatzi hilabetetik gorakoa izan behar da. Hori baino laburragoak diren kontratuetan, probaldia kontratuaren iraupenaren heinean murriztuko da; nolanahi ere, artikulu honetan ondoz ondoko kontratazioetarako xedatzen dena aplikatuko da.

Kontratuaren iraupena gorabehera, probaldia inolaz ere ez da izanen 15 egunetik beherakoa aurrean aipatu diren lanbide taldeetako lanpostuetan.

Probaldian, bai kontratatutako pertsonak, bai enpresaren zuzendaritzak noiznahi eteten ahalko dute lan kontratua, hau da, aurreabisua emateko epealdirik gabe, eta langileek ez dute izanen kalte-ordaina jasotzeko eskubiderik.

Probaldia bukaturik, langilea enpresako plantillan sartuko da eta probaldia kontuan hartuko zaio ondorio guztietarako.

Aldi baterako lan kontratua duen pertsona bati ondoz ondoko zenbait kontratu egiten bazaizkio, ez zaio eskatuko probaldirik, baldin eta aurreko aldi baterako kontratuaren edo kontratuen iraupena dena delako lanbide-kategoriako edo lanbide-taldeko probaldia baino luzeagoa bada.

Lanpostu batean aritzeko probaldia egin ondoren langileek ez dute beste probaldirik egin beharko lanpostu bererako.

16. artikulua. Lanpostu hutsak eta lanpostu sortu berriak.

Kontratazio guztietan lehentasuna emanen zaio enpresako langileen barne sustapenari.

Enpresak barnean aplikatzeko araudi bat izan beharko du, eta nahitaez aplikatu beharrekoa. Araudi horrek honetara, gutxienez, behartuko du enpresa: eskaintza egin duen entitateko langileei –gutxienez sei hilabeteko antzinatasuna onartuta dutenei– eskaini behar zaizkie hutsik dauden lanpostuak eta lanpostu berriak, betiere konfiantzazko lanpostuak ez direnak. Goian aipatutako araudi horretan gutxienez arautu behar da zer informazio emanen zaien langileei eta nolakoak izanen diren haiek parte hartzeko eta kontsultatzeko prozedurak. Besteak beste, honako irizpide hauek hartuko dira kontuan: esperientzia, antzinatasuna, eskatutako prestakuntza edota titulazioa eta langilea lanposturako egokia den. Helburua izan behar da indarrean dauden kontratuak hobetzea kontratazio berriak egin aurretik.

Araudi hori langileen legezko ordezkaritzari (LLO) eman behar zaio hitzarmen hau Nafarroako Aldizkari Ofizialean argitaratzen den egunetik sei hilabete igaro baino lehen.

Langileen legezko ordezkariei aldez aurretik eman behar zaie lanpostu berriei eta horiek lortzeko betekizunei buruzko informazioa.

Kontratu berriak egin baino lehen, egungo kontratuak hobetzera jo beharko da.

17. artikulua. Lana borondatez uztea.

Langile batek bere borondatez utzi nahi badu enpresa, idatziz jakinarazi beharko dio enpresari, gutxienez hilabete bat lehenago teknikari tituludunen kasuan, eta hamar egun lehenago gainerako langileen kasuan.

Aurreabisua epe horren barruan eman ezean, kopuru bat kenduko da likidaziotik baldintza hori betetzen ez den egun bakoitzeko. Enpresak aurreabisua behar den aldiaren barruan eta behar den moduan jasotzen badu, lan harremanaren bukaeragatik dagokion likidazioa ordaindu beharko dio langileari.

III. KAPITULUA–PRESTAKUNTZA

18. artikulua. Sustapena eta lanbide prestakuntza lantokian.

Langileen Estatutuaren 23. artikuluak 1. puntuan dioen bezala, langileek honako eskubide hauek dituzte:

a) Azterketetara aurkezteko beharrezko baimenak jasotzeko, titulu akademiko edo titulu profesionalen bat lortzeko ikasketak erregulartasunez egiten ari bada.

b) Laneko ohiko jardunaldia egokitzeko, lanbide heziketako ikastaroetara joateko bada.

c) Lanpostua gordez, lanbide prestakuntzarako edo hobekuntzarako behar dituen baimenak lortzeko.

d) Lanpostuan egiten diren aldaketetara moldatzeko behar den prestakuntza jasotzeko. Enpresa arduratuko da horretaz, prestakuntzara bideratutako kredituak lortzeko aukera bazter utzi gabe. Prestakuntzan ematen den denbora lanean egindako denboratzat hartuko da.

2. Negoziazio kolektiboan itundu beharko dira eskubide horiek gauzatzeko baldintzak; betiere, sexu bateko eta besteko langileen artean zuzeneko nahiz zeharkako bazterkeriarik ez dagoela bermatzen duten irizpide eta sistemak baliatu beharko dira.

Urteko prestakuntza plana egiten denean –pertsona bakoitzeko 15 ordu izanen dira–, langileek beren iradokizunak eta ekarpenak egiten ahalko dituzte, une bakoitzean egokiak eta beharrezkoak direla uste dutenak, hain zuzen ere.

Gainera, urteko prestakuntza plana egiten denean, enpresan egindako berdintasun planetan xedatutakoa kontuan izan behar da.

Ahaleginak eginen dira lan ordutegiak errespetatzeko, ahal den neurrian, eta goizeko orduetan egiteko, batik bat. Ahal dela, urteko egutegietan sartuko da. Prestakuntza ohiko lan ordutegitik kanpo baldin bada, borondatezkoa izanen da bertan parte hartzea, eta honako konpentsazio hau emanen da.

–Gizarteratzeko prozesuan dauden pertsonak: egindako ordu bakoitzeko ordubete.

–Teknikariak:

  • Egindako ordu bakoitzeko ordubete, baldin eta prestakuntza horrek langilea gaitzen badu 28. artikuluan deskribatutako espezializazioko osagarri bat jasotzeko.
  • Ordu bakoitzeko ordu eta erdiko konpentsazioa, baldin eta prestakuntza horrek ez badu langilea gaitzen 28. artikuluan deskribatutako espezializazioko osagarria jasotzeko. Borondatezko prestakuntza hori lan ordutegitik kanpo geratzen da.

Online prestakuntzaren kasuan, enpresak langileen legezko ordezkaritzarekin itunduko du, prestakuntza bakoitzaren aurretik, lanorduen konpentsazioa.

19. artikulua. Gizarteratzeko eta laneratzeko prozesua, hezkuntza helburuak, eta gizarteratzeko eta laneratzeko ibilbide pertsonalizatuak.

EIS Ilundain Empresa de Inserción SLU enpresan, hezkuntza-helburuak betetzeak lehentasuna izan behar du bai enpresarako, bai hura osatzen duten langile guztientzat, gizarteratzeko prozesuan dauden langileek lana lortzeko aukera gehiago izan ditzaten, betiere honako dekretuan gizarteratzeko eta laneratzeko ezarritako konpromisoak bermatuta: 340/2019 Foru Dekretua, abenduaren 27koa, urriaren 26ko 94/2016 Foru Dekretua aldatzen duena. Haren bidez ezarri zen Nafarroako gizarteratze eta laneratze enpresen kalifikazioaren, erregistroaren eta laguntzen araubidea.

Hartara, EIS Ilundain Empresa de Inserción SLU enpresaren hezkuntzarako helburuak, funtsean, honako hauek dira:

–Laneko erantzukizunari, produktibitateari, talde-lanari, errendimenduari eta emaitzen kalitateari lotutako laneko ohiturak transmititzea, enpresa benetako lantokitzat hartuta.

–Aurrerapen pertsonala bultzatzea, konfiantzako eta babespeko ingurune batean gizarte-laguntza emanda, pertsona ardatz duen esku-hartze integralaren bitartez.

–Balioetan heztea, gizarte askea, errespetuzkoa eta berdintasunezkoa eraikitzeko, parte-hartzaileak beren prozesuan modu proaktiboan inplikatuta.

–Lanbidearen garapena bultzatzea prestakuntzaren bitartez; praktika profesionalarekin tartekatutako prestakuntza, laneko gaitasunak eskuratuta.

–Gizarteratzeko prozesuan dauden pertsonen laneratzea sustatzea, enplegua bilatzeko prozesu indibidualizatu baten bitartez.

Helburu horiek betetzeko, EIS Ilundain Empresa de Inserción SLU enpresako langile guztiei emanen zaizkie honako hauek: lan-prozesuaren definizioa, lanpostu bakoitzaren eginkizunen eta erantzukizunen deskribapena, metodologia hezitzaile bat eta EIS Ilundain Empresa de Inserción SLU enpresak ezarritako barne-araudi bat, beren lanbide-jardunerako ezagutu eta aplikatu behar dutena.

Gizarteratzeko prozesuan dauden pertsonentzat biziki garrantzitsua eta funtsezkoa izanen da gizarteratzeko prozesuan dauden langileen lanbide-kualifikazioa hobetzea eta, horretarako, gaitasunak –lanbideari dagozkionak, gizartearen eta lanaren arlokoak, baita pertsonalak ere– garatzea, betiere gizarteratzeko ibilbide pertsonalizatuetan ezarritako helburuak garatzen direla bermatzeko eta etorkizunean lan-merkatuan sartzen laguntzeko. Horrela, lehen harrera-prozesu baten ondoren, gizarteratzeko prozesuan dauden pertsonek Gizarteratzeko Ibilbide Pertsonalizatua izanen dute, hau da, prestakuntzako ekintza, garapen pertsonalerako ekintza eta lanbide-garapeneko ekintza sorta bat zehaztea, beren gaitasunak hobetzea eta lana lortzeko aukerak hobetzea ahalbidetze aldera.

Aldi berean, ebaluazio jarraitua eginen da eta lan-prozesuan parte hartzen duten teknikari guztiak inplikatuko dira. Ebaluazio horri esker, lan eginez pixkanaka eskuratu dituzten gaitasunak aitortzen ahal dira eta, gainera, haien gaitasunen profila osatzen duten prestakuntzako ekintzak egin izana edo helburu pertsonaletan aurrera egin izana ere balioetsiko dira. Tresna hori EIS Ilundain Empresa de Inserción SLUk finkatutako hezkuntza-irizpideen eta parametro metodologikoen arabera ezarri da; horri esker, lanbide-kategorietan gora egiteko irizpide objektibo bat ezartzen ahal da, gizarteratzeko prozesuan etengabeko hobekuntza-prozesu bat egiteko aukera bermatuta.

IV. KAPITULUA.–LANEKO SEGURTASUNA ETA OSASUNA

20. artikulua. Laneko segurtasuna eta osasuna.

Hitzarmen honen eraginpeko langileek eta enpresak Laneko Arriskuen Prebentziorako azaroaren 8ko 31/1995 Legean eta lege hori osatzen eta garatzen duten gainerako arauetan laneko segurtasunari eta osasunari buruz xedatzen dena bete behar dute.

Laneko Arriskuen Prebentziorako Legeak 14.5 artikuluan xedatzen duenarekin bat etorriz, laneko segurtasunerako eta osasunerako neurrien kostua ezin zaie langileei ordainarazi, inolaz ere.

Osasuna zaintzea.

Langile guztiei borondatezko azterketa medikoa eginen zaiela bermatuko duten zerbitzuak kontratatuta izan behar ditu enpresak; azterketa hori Prebentzio Zerbitzuak lanpostu bakoitzerako gomendatzen duen maiztasunarekin egin beharko litzateke. Enpresak lan egindako denboratzat zenbatuko du langileek azterketa medikoak egiteko joan-etorrietan ematen duten denbora. Azterketa medikoa lan ordutegitik kanpo eginez gero, joan-etorrien gastuak edo kilometrajea enpresak ordainduko ditu.

Prebentzio Zerbitzua.

Enpresak prebentzioko laguntza teknikoaz arduratuko den prebentzio zerbitzua eduki behar du, berena edo itundua. Zerbitzu horren eginkizun nagusia izanen da prebentzio plana diseinatzea eta aplikatzea; planean honako hauek bilduko dira gutxienez:

–Langileen osasunari eta segurtasunari eragin diezaieketen arrisku-faktoreak aztertzea.

–Lehentasunak zehaztea prebentziozko neurri egokiak hartzerakoan, eta horien eraginkortasuna begiratzea.

–Lanpostuetako arriskuen prebentzioari eta osasunaren babesari buruzko informazioa eta prestakuntza ematea langileei.

–Lehen sorospenak ongi ematea eta larrialdi planak prestatzea.

–Langileen osasuna begiratzea, lanaren ondoriozko arriskuei dagokienez.

Jarduera horiek prebentzio batzordean onetsi eta ebaluatuko dira edo, bestela, Lan Prebentzioei buruzko Legean ezartzen diren formulen bitartez.

Arrisku jakin batzuen aurrean bereziki sentikorrak diren langileak babestea.

Enpresaburuak modu berezian bermatuko du ezaugarri pertsonalak edo egoera biologiko ezagunak direla-eta laneko arriskuen aurrean bereziki sentiberak diren langileen babesa, desgaitasun fisiko, psikiko edo zentzumenezko egoera aitortu zaien langileena barne. Xede horretarako, enpresaburuak inguruabar horiek arriskuak ebaluatzean aintzat hartu beharko ditu, eta ebaluazio horien arabera prebentziozko neurri eta babeserako neurri egokiak hartuko ditu.

Langileak ez dira lanean ariko beren ezaugarri pertsonalen, egoera biologikoaren edo desgaitasun fisiko, psikiko edo sentsorial onartuaren ondorioz beren buruari zein gainerako langileei edo entitatearekin lotutako beste pertsona batzuei kalte egin diezaieketen edo arriskuan jartzen ahal dituzten lanpostuetan.

Amatasuna babestea: Ugalkortasuna, haurdunaldia eta edoskitzea.

Prebentziozko neurri egokiak hartze aldera, enpresak ebaluazioetan kontuan hartu beharko ditu langileen ugaltzeko funtzioan eragina izan dezaketen arriskuak, batez ere agente fisiko, kimiko eta biologikoekin lan egiteagatik, ugalketari, ugalkortasunari nahiz ondorengoen garapenari dagokienez izan ditzakeen ondorio mutagenikoak edo toxikoak.

Ebaluazioak erakusten badu emakumezko langile horien segurtasun eta osasunerako arriskua dagoela edo haurdunaldian edo haurrari ematen dioten esnean eragina izan dezakeela, enpresak behar diren neurriak hartuko ditu eta, beraz, emakumearen lan baldintzak edo lan denbora egokituko ditu, langilea arrisku horren eraginpean egon ez dadin.

Beroaren protokoloa.

Protokolo hori aire zabalean jarduten duten langileei aplikatuko zaie.

–Hezetasun erlatiboa %70ekoa denean:

  • 26ºC-rekin, tenperatura kontrolatua duen lokal batean (aire girotuko lokala) orduero 5 minutuko atsedenaldiak eginen ahal dira.
  • 29ºC-rekin, tenperatura kontrolatua duen lokal batean (aire girotuko lokala) orduero 10 minutuko atsedenaldiak eginen ahal dira.
  • 31ºC-rekin, tenperatura kontrolatua duen lokal batean (aire girotuko lokala) orduero 15 minutuko atsedenaldiak eginen ahal dira.
  • Tenperatura 34ºC-koa edo altuagoa denean, jarduera geldiaraztea proposatzen ahal da, Laneko Arriskuen Prebentziorako Legeak 21. artikuluan xedatzen duenarekin bat etorriz, laneko agintaritzari dagokion jakinarazpena eginda eta tenperatura hori jaitsi bitartean.

–Hezetasun erlatiboa %80koa denean:

  • 25ºC-rekin, tenperatura kontrolatua duen lokal batean (aire girotuko lokala) orduero 5 minutuko atsedenaldiak eginen ahal dira.
  • 29ºC-rekin, tenperatura kontrolatua duen lokal batean (aire girotuko lokala) orduero 10 minutuko atsedenaldiak eginen ahal dira.
  • 30ºC-rekin, tenperatura kontrolatua duen lokal batean (aire girotuko lokala) orduero 15 minutuko atsedenaldiak eginen ahal dira.
  • Tenperatura 33ºC-koa edo altuagoa denean, jarduera geldiaraztea proposatzen ahal da, Laneko Arriskuen Prebentziorako Legeak 21. artikuluan xedatzen duenarekin bat etorriz, laneko agintaritzari dagokion jakinarazpena eginda eta tenperatura hori jaitsi bitartean.

–Hezetasun erlatiboa %90ekoa denean:

  • 24ºC-rekin, tenperatura kontrolatua duen lokal batean (aire girotuko lokala) orduero 5 minutuko atsedenaldiak eginen ahal dira.
  • 27ºC-rekin, tenperatura kontrolatua duen lokal batean (aire girotuko lokala) orduero 10 minutuko atsedenaldiak eginen ahal dira.
  • 28ºC-rekin, tenperatura kontrolatua duen lokal batean (aire girotuko lokala) orduero 15 minutuko atsedenaldiak eginen ahal dira.
  • Tenperatura 32ºC-koa edo altuagoa denean, jarduera geldiaraztea proposatzen ahal da, Laneko Arriskuen Prebentziorako Legeak 21. artikuluan xedatzen duenarekin bat etorriz, laneko agintaritzari dagokion jakinarazpena eginda eta tenperatura hori jaitsi bitartean.

V. KAPITULUA.–LANALDIA ETA LAN EGUTEGIA

21. artikulua. Lanaldia, laneko ordutegia eta egutegia.

Urtean gehienez ere 1.680 orduko lanaldia ezartzen da hitzarmen honen indarraldiko urte bakoitzerako.

Langile batek benetan lan eginen duen denbora zenbatzeko, pertsona horrek lanaldia hasteko unetik bukatzeko unera arte bere lanpostuan lanean diharduen denbora izanen da kontuan. Lan jarduerari ekin ahal izateko lantokitik langilearen lanpostura heldu arte denbora luzea eman behar denean urrun egoteagatik, lanaldia kontatzen hasiko da langilea, laneko arropa jantzita eta behar diren erremintak hartuta, lantokitik ateratzen denean lana burutu behar duen lekura abiatzeko.

Langileek 20 minutuko atsedenaldia izanen dute egunean 6 ordutik gorako lanaldia dutenean, eta atsedenaldi hori lan egindako denboratzat hartuko da. Atsedenaldiko 20 minutuak lan jarduera eteten den unetik berriz lanari ekiten zaion unera arte zenbatuko dira. Enpresaren antolamendu ona bermatzeko, etenaldi hori, oro har, 10:40tik 11:00etara bitartean eginen da, eta horrekin lotutako edozein aldaketa enpresari jakinarazi beharko zaio. Etenaldian ez da baliabide, ibilgailu, material edo erreminta bat ere gainbegiratu gabe utziko.

Eguneko lanaldia lan egindako zortzi ordukoa izanen da gehienez. Oro har, %10eko malgutasuna ez baliatzea hitzartu da; hala ere, lanaldia urtean modu irregularrean banatzea ituntzen ahal da langileen legezko ordezkariekin, baina lan egindako denbora ez da, inolaz ere, egunean bederatzi ordutik gorakoa izaten ahalko. Enpresak lan egutegia eginen du langileen legezko ordezkariekin ados jarrita, eta lantokietan ageriko lekuan jarriko du.

Lan ordutegia: Plantillan dauden langile guztiek astelehenetik ostiralera lan eginen dutela erabaki da, goizeko txandan, normalean 07:00etatik 15:00etara bitarteko ordutegian.

Urte bakoitzean egin beharreko eguneko lanaldia kalkulatzeko, urteko lanegunen guztizkoari opor egunak (32) kenduko zaizkio; era horretan, urtean lan egin beharreko egunen kopuru osoa lortuko da. Urteko lanaldia, 1.680 ordukoa, lan egin beharreko egunen kopuru horrekin zatituko da, eta horren arabera kalkulatuko da egun bakoitzeko lan denbora. Enpresaren eta langileen legezko ordezkaritzaren artean urtero negoziatuko da eguneko lan denbora hori zein ordutegitan eginen den, 7:00etatik 15:00etara bitarteko ordutegiaren barruan.

Uztailaren 6a, abenduaren 24a eta abenduaren 31 ez dira laneguntzat joko. Egun horiek lanegunak ez badira, langile bakoitzak izendatzeko/erabakitzeko eguntzat hartuko dira, eta ez zaie ratiorik ezarriko.

Baldin eta justifikatutako aparteko premiak badaude, ordutegi orokorraz bestelako ordutegiak adosten ahal dira, betiere langileen ordezkariei aldez aurretik kontsulta eginda.

Lanaldi baten bukaeraren eta hurrengoaren hasieraren artean hamabi ordu pasatu beharko dira, gutxienez.

22. artikulua. Aparteko orduak.

Aparteko orduak lan egitea borondatezkoa izanen da, eta betiere aldez aurretik enpresako zuzendaritzak ontzat emanez gero.

Aurreko artikuluan finkatutako lanaldi arruntaren gehieneko iraupenetik aurrera egiten diren lan orduak aparteko ordutzat joko dira.

Aparteko orduak lan egindako ordu bakoitzeko 1,5 orduko atsedenaldiekin konpentsatzen ahal dira; bestela, ordaindu eginen dira, langilearen kategoriako oinarrizko soldatari dagokion orduko prezioa bider 1,5 eginda ateratzen den prezioan. Langileak berak hautatzen ahal du aukera bat edo bestea. Atsedenaldiaren konpentsazioa aukeratuz gero, enpresaren eta langileen artean adosten diren egunetan hartuko da.

Aparteko orduen kopurua ez da urtean 20 ordutik gorakoa izaten ahalko, pertsona bakoitzeko.

23. artikulua. Lanaldia kontrolatzea.

Lan denbora kontatzeko, langileak, hala eguneroko lanaldiaren hasieran nola bukaeran, lanpostuan egon behar du.

Langileen Estatutuaren 34.9 artikuluak ezartzen duenarekin bat etorriz, enpresak lan orduak kontrolatzeko eta erregistratzeko sistema ezarri beharko du. Sistema horretan modu fidagarrian agertu behar da langile bakoitzaren lanaldia: noiz hasi den eta noiz bukatu den. Nolanahi ere, ordutegi malgutasuna ezartzen ahal da.

Sistema horrek ezin ditu urratu langileen intimitaterako eskubidea, haien datu pertsonalak babestuta egoteko eskubidea eta indarreko araudiak langileei aitortzen dizkien eskubide digitalak.

Erregistroa lantokian egon beharko da beti, langileek, beren legezko ordezkariek edo Laneko eta Gizarte Segurantzako Ikuskatzailetzak aztertu nahi balu ere.

24. artikulua. Opor ordainduak.

Langile guztiek 32 laneguneko oporraldia baliatzeko eskubidea izanen dute hitzarmen honen indarraldiko urte bakoitzean, astelehenetik ostiralera bitarte; horietatik 16 egun langileak hautatuko ditu, betiere zerbitzuaren premiak bermatuz gero.

Opor egunetako bat (1) norberaren aukerako egun moduan baliatzen ahal da. Azken kasu horretan, egun horren eskaera bost egun lehenago egin beharko da, zerbitzuaren funtzionamendua bermatzeko, eta hurrengo 48 orduetan eman beharko da baiezko erantzuna, antolamendu-arrazoiren batengatik ezinezkoa denean izan ezik. Erantzunik ez badu, onartutzat joko da.

Gehienez ere lanbide kategoria eta espezialitate berean (lorezaintza, arotzeria edo unean unekoak) diharduten eta kontratu mugagabea duten langileen %50ek hartzen ahal ditu oporrak aldi berean; orobat, ehuneko hori bera aplikatuko zaie laneratzeko prozesuan dauden pertsonei. Pertsona kopuru hori bakoitia denean, handiagora biribilduko da oporretan aldi berean egon daitezkeen langileen kopurua, eskaera handiko hilabeteetan izan ezik (martxoa, apirila, maiatza eta ekaina); hilabete horietan, txikiagora biribilduko da, erreferentziazko langileen presentzia bermatzeko. Lanbide kategoria batean pertsona bakarra dagoen kasua salbuespena izanen da. Eskaerek kointzidituz gero, Enpresa Batzordearekin negoziatuko da, ezarritako ratioa lortzeko akordio batera iristeko.

Kontratu mugagabea ez duten eta 180 egun baino gehiagorako kontratatu diren teknikarien kasuan (dela kontratu batekin, dela kontratu bat baino gehiago elkartuta), pertsona langile mugagabetzat hartuko da ratioa kalkulatzeari dagokionez. Salbuespena izanen dira beste teknikari bat ordezteko bitarteko kontratua duten kasuak.

Oporraldi batean, edozein inguruabar dela eta, aldi baterako ezintasuna gertatuz gero, eta horren ondorioz langileak oporrak dagozkion urte naturalean hartzerik ez badu, osorik edo partez, ezintasuna bukatu ondoren hartzen ahalko ditu.

Oporraldia osorik edo partez baliatzen den hilabeteari dagokion soldatan oporraldirik gabeko hilabeteko soldata-kontzeptu berdinak sartuko dira: oinarrizko soldata eta, hala badagokio, antzinatasuna eta plusak.

Lanean urtebete eman ez duten langileek lanean emandako denborari dagozkion opor egunak izanen dituzte.

Oporraldia ez da diruz konpentsatzen ahalko, lan harremana kitatzearen kasuan izan ezik; kasu horretan, langileak hautatuko du sortutako opor egunetatik hartu gabe dituenak hartuko dituen ala ordaintzea nahi duen.

VI. KAPITULUA.–LANBIDE SAILKAPENA

25. artikulua. Langileen sailkapena.

Hitzarmen kolektibo honen aplikazio eremuaren eraginpeko langileak eta sartzen diren berriak ondoren aipatu eta definitzen diren lanbide taldeetako batean sartuko dira.

Artikulu honetan deskribatzen diren lanbide taldeen sailkapena eta haietako bakoitzeko lanbide kategoriak edo mailak aipatu baino ez dira egiten; horrek ez du esan nahi horiek guztiak beteta eduki behar direnik.

Lanbide taldeen sailkapen hau egiteko zenbait faktore interpretatu, aplikatu eta haztatu dira batera, hala nola titulazioa, prestakuntza, lanbide gaitasunak, ezagutza, esperientzia, iniziatiba, autonomia, erantzukizuna, balioaniztasuna, agintea eta konplexutasuna, baita langileek egiten dituzten lan eta zeregin oinarrizko adierazgarrienak ere.

Honako hauek hartzen dira lanbide gaitasuntzat: nolako gaitasuna eta/edo egokitasuna duen langileak lanbide edo egiteko bati dagozkion zeregin edo eginkizunak betetzeko, eta lanbidean gaitasun maila jakin bat erdiesteko edo eginkizun jakin batzuk betetzeko aukerak.

Honako hauek dira enpresako langileak sailkatzeko lanbide taldeak:

I. taldea.

Irizpide orokorrak: Lanbide talde honetan sartzen dira unibertsitate titulua duten eta titulu horrek bideratutako zereginetan ari diren langileak. Ikus 1. eranskina.

Orientazio gisa: Esku-hartze eta gizarteratze teknikaria.

II. taldea.

Irizpide orokorrak: Lanbide talde honetan sartzen dira administrazioko, kontabilitateko, finantzetako edo bestelako eginkizun teknikoak betetzen dituzten langileak eta, horretarako, informazioa tratatzeko behar diren tresnak erabiltzen dituztenak enpresa barruan; beste pertsona batzuen lanak ere gainbegiratu ditzakete. Ikus 1. eranskina.

Orientazio gisa: Administrazioko teknikaria, Administrari laguntzailea.

III. taldea.

Irizpide orokorrak: Lanbide talde honetan sartzen dira beren espezialitateari dagozkion eginkizunak betetzen dituztenak, eta beste pertsona batzuen lanak ere gainbegiratu ditzakete. Ikus 1. eranskina.

Orientazio gisa: Lantegiko maisua - Laguntzeko teknikaria.

IV. taldea.

Irizpide orokorrak: Lanbide talde honetan sartzen direnek, ongi zehaztutako jarraibideak betez, argi ezarritako lanak egiten dituzte, menpekotasun maila handiarekin; arreta edo esfortzu fisikoa eskatzen duten lanak dira, behin eta berriz errepikatzen direnak, eta prestakuntza berezirik eskatzen ez dutenak, lanpostura behar bezala egokitzekoa behar dena besterik ez. Halaber, lan metodo zehatz bati segituz egiten diren lanak, beste norbaiten gainbegiratze lan handiarekin. Lan horietarako oinarrizko ezagupenak behar dira, eta egokitzeko aldia.

Ikus 1. eranskina.

Orientazio gisa: 2. mailako langilea/laguntzailea, 1. mailako langilea/laguntzailea, peoia.

VII. KAPITULUA.–ORDAINSARIEN EGITURA

26. artikulua. Oinarrizko soldata.

2024rako oinarrizko soldata 1. eranskinean adierazitakoa izanen da. Hurrengo urteetarako –2025 eta 2026–, oinarrizko soldata honela kalkulatuko da: aurreko urteko oinarrizko soldatari Nafarroako aurreko urteko KPIari dagokion gehikuntza erantsita.

Nolanahi ere, 2024ko oinarrizko soldataren eta osagarrien zenbatekoen %1,35eko gehikuntza bermatuko da 2025erako, eta 2025eko zenbatekoen %1,30eko gehikuntza 2026. urterako.

Aurreraeragineko kasuetan, soldaten taulek aurreko urteko Nafarroako KPIaren arabera igotzen jarraituko dute.

27. artikulua. Antzinatasun plusa.

Langile bakoitzari 40 euro gordin ordainduko zaizkio hilero (12 hileko soldata + aparteko 2 paga) enpresan benetan lan egindako hirurteko bakoitzeko, betiere honako muga hauekin: 10 hirurteko. Egiten diren kontratu berrietan, hirurtekoak kontratazio egunetik aurrera zenbatuko dira.

Zenbateko hori urtero eguneratuko da, eranskinean jasotako soldata tauletan ezarritakoaren arabera.

Hirurteko bakoitzari dagokion zenbatekoa hura bete eta hurrengo hileko nominan ordainduko da.

28. artikulua. Erantzukizuneko osagarriak.

Langileek esleituta duten lanpostuko egitekoetan ariko diren aldian kontsolidatuko ez den erantzukizunen bat badute edo erantzukizun funtzionaleko karguren bat betetzen badute, jarraian adierazitako zenbatekoa jasotzen ahalko dute.

Langile batek erantzukizuneko osagarri bat baino gehiago jasotzen ahal badu, zenbatekorik handienekoa baizik ez du jasoko.

Osagarri bakoitzari dagozkion zenbatekoak 1. eranskinean jaso dira.

–Zuzendaritzako osagarria.

  • Enpresaren jabeak libreki izendatu eta enpresaren zuzendaritza orokorreko zereginak betetzen dituen pertsonari aplikatuko zaio osagarri hori.

–Koordinazioko osagarria.

  • Enpresaren zuzendaritzak libreki izendatu eta programa edo zerbitzu baten plangintzan eta antolamenduan aritzen den pertsonari aplikatuko zaio, baldin eta bere agintean gutxienez 20 lanposturen baliokidea den langile taldea badu modu egonkorrean.

–Espezializazioko osagarriak.

  • Enpresaren zuzendaritzak libreki izendatu eta enpresak garatzen dituen zerbitzuen barruan zeregin espezializatuak egiten dituzten pertsonei aplikatuko zaizkie osagarri horiek. Horretarako, zeregin horiek betetzeko beharrezkoa den prestakuntza eta/edo gaikuntza izan beharko dute.

Espezializazioko osagarri hauek daude:

–Ureztatze sistemen muntaketa eta mantentze lanetako espezialista.

–Makineria bereziko espezialista (makina astunak, atzerako hondeamakinak, minikargagailuak, orgak eta, oro har, ohikoak ez diren makina guztiak).

–Plataformarekin altuerako lanak egiteko espezialista.

Pertsona bakoitzak espezializazioko osagarri bakarra jasotzen ahal du, eta espezializazioko osagarri bakoitza pertsona bakar batek kobratzen ahal du; hori horrela izanik, aldi baterako ezintasunagatik, oporrengatik edo beste edozein arrazoirengatik, beste pertsona batek osagarria merezi duten lanak erregulartasunez egiten baditu, osagarri hori pertsona batetik bestera igaroko da.

Pertsona batek osagarri horietako bat kobratzeak ez du esan nahi beste pertsona batzuek, une jakin batzuetan, espezialitate bakoitzarekin lotutako lanak egin ezin dituztenik, betiere segurtasunari buruzko arau guztiak betetzen badira, horretarako prestatuta eta/edo gaituta badaude, eta enpresaren zuzendaritzak aldez aurretik horretarako baimena eman badie. Pertsona horiek egunean 11,67 euroko plusa jasotzeko eskubidea izanen dute.

Espezializazioko plusetako bat modu erregularrean kobratzen duten pertsonek ez dute, inola ere, aurreko paragrafoan aipatutako eguneroko espezializazioko plusik kobratzen ahalko.

Ahal den neurrian, espezializazioko plus horiek jasotzen dituzten pertsonak aldian-aldian txandakatu eginen dira, betiere eskatzen diren prestakuntzaren eta/edo esperientziaren baldintzak betetzen badira; hartara, lan espezializatuagoetan jarduteko prestakuntza hartzea sustatuko da langileen artean, baita ordainsarien artean ahalik eta berdintasun handiena izatea ere. Horretarako, enpresak urtero eskainiko die langileei lan espezializatu horietan parte hartzeko aukera.

29. artikulua. Aparteko pagak.

Hitzarmen honen aplikazio eremuan dauden langileek aparteko bi eskersari jasoko dituzte hilabetetik gorako aldizkako osagarri gisa. Eskersari bakoitzaren zenbatekoa honako hauen batura izanen da: 1. eranskinean zehaztutako hilabeteko oinarrizko soldata, antzinatasun-plusa eta osagarriak. Eskersari horiek uztailean eta abenduan ordainduko dira.

Urtean zehar lana utzi edo lanean hasten diren langileei lehen aipatutako hiletik gorako mugaegunaren osagarriak ordainduko zaizkie; zenbatekoa lan egindako denboraren arabera hainbanatuko da.

30. artikulua. Beste plus batzuk.

Hitzarmen hau indarrean sartzen denetik, langileei plus hauek onartuko zaizkie:

–Prestasuneko osagarria.

  • Osagarri hori jasoko dute larrialdiak artatzeko prest egonen diren langileek, betiere enpresarekin adostuz gero.
  • Ahal den neurrian, enpresak ez du prestasun horretaz baliatzera joko, benetako larrialdietan ez bada.
  • Benetan lan egindako denboratzat hartuko da langileek etxetik lanposturako joan-etorrietan ematen duten denbora, eta konpentsazioa emanen zaie kilometroengatik edo joan-etorriek eragindako gastuengatik, hitzarmen honetan xedatutakoari jarraikiz. Era berean, modalitate horretan lan egindako orduen kasuan, lan egindako ordu bakoitzeko 1,5 ordu zenbatuko dira.
  • Halaber, edonola ere, eguneko eta asteko atsedenaldiak errespetatuko dira.
  • Plus horren zenbatekoa 1. eranskinean jasota dago.

–Lan toxiko, nekagarri edo arriskutsuen plusa.

  • Osagarri hori jasoko dute, enpresako zuzendaritzak berariaz aginduta, elementu toxikoekin lan egiten duten, edo lan nekagarriak edo lan arriskutsuak egiten dituzten pertsonek, baldin eta, hala badagokie, jarduera horiek egiteko gaitzen dituen prestakuntza badute. Jaso beharreko zenbatekoak 1. eranskinean zehaztu dira.
  • Plus hori kobratzeari dagokionez, lan nekagarriak eta/edo arriskutsuak izanen dira hiriarteko trafiko-bideetan egiten diren lanak, bai eta produktu fitosanitario konbentzionalak erabiltzea dakartenak ere, non eta ez duten "Ekologiko" ziurtapenik.
  • Landareak, zuhaitzak eta zuhaixkak inausteko, birrintzeko, ebakitzeko, garbitzeko, tertziatzeko, bakantzeko, pintzatzeko eta eratzeko lanak ez dira nekagarritzat eta/edo arriskutsutzat hartuko; hala ere, lan horietan langilearen oinak metro batetik gorako altueran badaude, plusa aitortuko zaie.
  • Plus hori sortzearen ondorioetarako, berariaz kanpo geratzen dira garraioa eta ibilgailuen zamalanak.

31. artikulua. Osagarria aldi baterako ezintasunaren aldian.

Oro har, hitzarmen hau indarrean sartuz geroztik hasitako aldi baterako ezintasun prozesu guztiak egiazko soldataren (oinarrizko soldata eta antzinatasuna) %100era arte osatuko dira, bajaren lehenengo egunetik, egun hori ere sartuta, hala lanbide-kontingentzietan, nola kontingentzia arruntetan.

Gizarteratzeko prozesuetan dauden pertsonentzat (1. edo 2. mailako langileen/laguntzaileen postuak) ere %100era arte osatuko dira, honako baldintza hauetan:

–Lanbide-kontingentziak: bajaren 1. egunetik hasita, egun hori sartuta.

–Kontingentzia arruntak: bajaren 4. egunetik hasita, egun hori sartuta.

Osagarria ez da 18 hilabetetik goiti luzatuko, hala badagokio.

Osagarri horren eskubidea sortzeko ezinbestekoa da langileak aldi baterako ezintasunaren prestazio ekonomikoa jasotzeko eskubidea izatea, eta lan harremana azkenduta ez egotea, ez eta eszedentzian ere.

Gizarte bazterkeriagatik ebazpen administratibo bidez berariaz laneratzeko prozesuan onartuta dauden langileek 4. egunetik aurrera –egun hori sartuta– sortuko dute osagarri hori. Abenduaren 13ko 44/2007 Legearen, laneratzeko enpresei buruzkoaren, ondorioz da hori horrela; lege horren xedea, hain zuzen, pertsona horiek gizarteratzea eta laneratzea da, lan merkatu arruntean erabat integratzea lortzeko. Horretarako, enpresa kontratatzaileak prestakuntza eta orientazioa jasotzeko aukera ematen die langileei, esku-hartzeko eta laguntzeko ibilbide eta zerbitzu pertsonalizatuen bidez, laneratzea zailtzen duten bazterkeriaren ondoriozko arazo espezifikoak konpontzeko. Urteetan zehar ikusi da, objektiboki, osagarri edo hobekuntza ekonomikoen bidez ezintasun egoeran irautea bultzatzeak heziketarekin lortu nahi duen efektuaren kontrakoa lortzen duela, efektu edo helburu hori lan merkatuan benetan integratzea izanik, hain zuzen ere.

32. artikulua. Gastuen konpentsazioa.

Lanpostua dela-eta joan-etorriak autoz egin behar dituzten langileek 0,32 euro jasoko dituzte kilometro bakoitzeko, eta autobideko gastuak eta zenbait hiri eta udalerritako zaintzapeko aparkalekuen gastuak ere enpresak ordainduko ditu.

Langileek gastu horiek kobratzeko ezinbestekoa da entitateak agintzea joan-etorriak beren kabuz egiteko. Aldiz, entitateak agintzen badu joan-etorrietan garraio publikoa erabiltzeko, horren kostua ordainduko du, frogagiriak aurkeztu eta gero. Salbuespena: joan-etorrien kostua 15 eurotik gorakoa bada, entitateak aldez aurretik emanen die langileei.

Zenbait langilek batera egiten badituzte joan-etorriak, kilometrajearen zenbatekoa ibilgailua jartzen duenari baizik ez zaio ordainduko.

VIII. KAPITULUA.–LIZENTZIAK ETA ESZEDENTZIAK

33. artikulua. Lizentzia ordainduak.

1. Honako egoera hauetan, langileak baimena izanen du denbora batez lanera ez agertzeko, ordaindua izateko eskubidea galdu gabe, betiere aldez aurretik abisatu eta justifikatzen badu (larrialdiko kasuetan ez da justifikatu beharrik izanen):

a) Hamasei (16) egun natural ezkontzeagatik edo izatezko bikotea eratzeagatik. Izatezko bikotea eratzeak lizentzia hau hartzeko eskubidea sor dezan, ezinbestekoa da bikotea erregistro ofizialean inskribatu dela frogatzea. Ez dira bi modalitate horiek bikote berberarekin baliatzen ahalko. Bikotekide berarekin behin bakarrik hartzen ahal da lizentzia hau, bi modalitateetan, eta urtean behin. Ezkontzeko edo izatezko bikotea eratzeko egunean hasiko da lizentzia zenbatzen. Salbuespena: egun hori ez bada laneguna langilearentzat, lizentzia hurrengo lanegunean hasiko da zenbatzen. Lizentzia hori erabiltzeko eskubidea sortu edo mantenduko bada, lan harremanak bere ondorio guztiak sortu behar ditu eta ezin da egon ez etenda ez oporraldian. Honelako lizentzia bat baliatzen hasi ondoren ez da eteten ahalko, eta ondoko egun batzuk ez badira lanegunak langileentzat, ez dira atzeratzen ahalko.

b) Bost (5) egun, langilearen ezkontideak, izatezko bikotekideak edota odol nahiz ezkontza bidezko bigarren mailarainoko ahaide batek (izatezko bikotekidearen odol bidezko senideak barne) edo langilearekin etxe berean bizi den eta haren zaintza behar duen beste edozein pertsonak istripu nahiz gaixotasun larria edo ospitaleratzea jasaten badu, edo etxean atseden hartzea eskatzen duen ospitaleratzerik gabeko ebakuntza kirurgikoa jasan behar badu.

c) Hiru (3) egun gehienez ere, ezkontidearen, izatezko bikotekidearen edo odol nahiz ezkontza bidezko bigarren mailarainoko senideen heriotzagatik. Bidaia bat egin behar bada Nafarroatik kanpora, lizentziari beste lanegun bat (1) gehituko zaio, edo bi (2) gehiago, egin beharreko bidaia lantokitik 180 km-tik gorako distantziakoa bada. Alderdiek adosten ahalko dute lizentziari egunak gehitzea, opor egunak hartuta, edo ordaindu gabeko baimenen artikuluan arautzen den gisan, langileak aurrez hala eskatuta. Entitateko zenbait langile senitartekoak badira eta honelako lizentzia bat hartzeko eskubidea badute, txandaka hartzen ahalko dute, bi langile aldi berean lanetik kanpo ez egoteko. Gerora hartzeko sistema berri honen eraginez, langileak ez ditu hartzen ahalko gertaera eragilearen ondo-ondotik hartu izan balitu zegozkiokeenak baino lan egun gehiago.

Ospitaleratzeen eta gaixotasun larrien kasuetan, egoerak irauten duen bitartean hartzen ahalko da baimena.

d) Lau (4) lanegun gehienez ere, orduka hartzekoak, ezinbesteak eraginik lanera joan gabe gelditzeko, baldin eta ahaideekin edo bizikideekin zerikusia duten premiazko familiako arrazoiengatik sortzen bada halabehar hori edo berehala bertaratzea eskatzen duen gaixotasun edo istripuren bat gertatzen bada.

e) Bi (2) lanegun ohiko bizilekua aldatzeagatik.

f) Nahitaezko eginbehar publiko eta pertsonal bat betetzeko: behar-beharrezkoa den denbora. Hitzarmenaren ondorioetarako, honako hauek dira nahitaezko eginbehar publiko eta pertsonalak, besteak beste:

–Nortasun agiri nazionala, bizileku baimena, lan baimena, gidabaimena, pasaportea eta ziurtagiriak egitea eta berritzea, erakunde ofizialetan erregistratzea, zitazio baten ondorioz Nafarroako Foru Ogasunera joatea eta abar.

–Zitazio baten ondorioz auzitegira, polizia etxera, gobernuaren ordezkaritzara edo antzeko batera joatea.

–Ordezkaritza-kargu publikoan aritzea. Goian aipatutako eginbeharra betetzeagatik langile batek ezin izan badu hiru (3) hilabeteko epean dauden lanorduen ehuneko hogei (% 20) baino gehiagotan lan egin, entitateak eszedentziara pasatzen ahalko du langile hori (egoera hori hitzarmen honen eszedentziei buruzko artikuluetan arautzen da).

–Medikuaren kontsultara joateko edo lehen mailara arteko odol zein ezkontza bidezko ahaide bati medikuaren kontsultara laguntzeko behar den ezinbesteko denbora, baldin eta kontsulta sistema publikoan edo horrekin ituna daukan zentro batean bada, eta egiaztagiria aurkezten bada.

–Medikuaren kontsultara joateko edo lehen mailara arteko odol nahiz ezkontza bidezko ahaide bati medikuaren kontsultara laguntzeko behar den ezinbesteko denbora (guztira hamar ordu urtean gehienez), baldin eta kontsulta sistema pribatuan bada eta egiaztagiria aurkezten bada.

–TMS/103/2019 Aginduak, otsailaren 6koak, uztailaren 29ko 1148/2011 Errege Dekretuaren eranskina aldatzen duenak, arautzen dituen gaixotasun larrietako batengatik medikuaren kontsultara joateko edo halako gaixotasuna duen lehen mailara arteko odol bidezko senitarteko bati medikuaren kontsultara laguntzeko behar den ezinbesteko denbora.

–Hondamendiek (erakunde eskudun batek modu ofizialean onartutakoek) langilearen ohiko etxebizitza den ondasun higiezinean egiten dituzten kalteak konpontzea.

–Martxoaren 28ko 7/2023 Legeak, animalien eskubideak eta ongizatea babestekoak, ezartzen dituen betebeharrak betetzeko behar den ezinbesteko denbora, animalia baten titular, bizikide edo arduradun gisa.

–Hezur Muinaren Emaileen Erregistroan (REDMO) izena emana duten langileek hezur muina ematearen ondoriozko betebeharrak betetzeko behar den ezinbesteko denbora.

g) Bigarren mailara arteko odol edo ezkontza bidezko senideen ezkontzaren eguna.

h) Azterketa ofizialak egiteko behar den denbora, eskubide hori egiazki erabiltzen ahal dela bermatuz.

i) Eginkizun sindikaletan edo langileen ordezkaritzako lanetan aritzeko, legerian eta hitzarmen honetan ezartzen denarekin bat etorriz.

2. Langile haurdunek eskubidea dute denbora batez lanera ez agertzeko, ordainsaria jasotzeko eskubidea galdu gabe, haurra jaio aurreko azterketak eta erditzerako prestatzeko azterketa teknikoak egiteko. Horretarako, aurretik entitateari abisatu beharko diote eta azterketa horiek lanaldiaren barrenean egin beharra justifikatu beharko dute. Eskubide hori legezko ezkontideak eta bikotekide egonkorrak ere izanen dute.

3. Emakume langileek eskubidea dute denbora batez lanera ez agertzeko, ordainsaria jasotzeko eskubidea galdu gabe, ernalketarako teknikak aplikatzeko; urtean 21 ordu gehienez.

4. Genero-indarkeriaren biktimek eskubidea dute lanera ez joateko gizarte zerbitzuek erabakitzen duten ezinbesteko aldi batean, ordainsaria jasotzeko eskubidea galdu gabe, 1/2004 Lege Organikoak (abenduaren 28koa, genero-indarkeriaren aurka oso-osoko babesa emateko neurriei buruzkoa) ezartzen duenarekin bat etorriz.

5. Egun oso lizentzia eta baimen guztiak lanaldi guztirako dira, dena delakoa lanaldiaren iraupena.

6. Baimen ordainduak zenbatzeko arauak:

a) Baimena gertaera eragilearen egunean hasiko da zenbatzen, langilearentzat laneguna izanez gero.

b) Gertaera eragilearen eguna ez bada laneguna, hau da, jaieguna bada edo lan egutegiaren arabera lanik gabekoa bada, baimena hurrengo lanegunean hasiko da zenbatzen.

c) Jaiotzagatik, heriotzagatik, gaixotasunagatik, ospitaleratzeagatik eta bizilekua aldatzeagatik hartzen diren baimenak: iraunaldiko lanegunak baino ez dira zenbatuko.

7. Lizentziei buruzko artikulu honetan ezkontidea aipatzen denean, ezartzen dena izatezko bikotekideei ere aplikatuko zaie, bikotea erregistro ofizialean inskribatuta egonez gero.

8. Binkulograma sozioafektibo pertsonala: Langile bakoitzak subjektu eragile bat izendatzen ahalko du (senitartekoa, bikotekidea, laguna), artikulu honetan jasotakoaren arabera baimen ordaindua izateko eskubidea sortuko duena; pertsona hori odol nahiz ezkontza bidezko lehen mailako ahaidetzat hartuko da. Izendapen hori lan harremana hastean eginen da, eta kasu hauetan aldatzen ahalko da: Heriotzagatik eta harreman sentimentala hausteagatik, hala gertatzen denean. Gainerako kasuetan, urte bakoitzeko apirilean, abuztuan eta abenduan, enpresako zuzendaritzari jakinarazita.

34. artikulua. Ordaindu gabeko lizentziak.

a) Urtebetetik gorako antzinatasuna duten langile guztiek ordaindu gabeko lizentzia bat hartzen ahalko dute urtean, gehienez ere 30 egunekoa. Ordaindu gabeko lizentziak 7 egunekoak izan behar dira gutxienez. Honelako lizentziei ondoko asteko atsedenaldiko egunak, jaiegunak edo opor egunak gehituko zaizkie.

Abisua 20 egun aurretik emanez gero, eskatzaileari lizentzia emanen zaio beti, baldin eta enpresako beste langileren bat lizentzia berarekin ez badago aldi berean. Abisuaren baldintza ez da aplikatuko lizentzia honako kasu hauetan eskatuz gero: ezkontidea edo bigarren mailara arteko aurreko zein ondoko odol zein ezkontza bidezko senitartekoak ospitaleratu behar izatea edo gaixotasun larria edukitzea.

Apartatu honetan arautzen den lizentzia eskatzeko arrazoia bada hondamendi humanitariotzat jo den gune batera langile espezializatu gisa joatea onartutako erakunde humanitario batek antolatuta, 20 egun aurretik abisua eman beharra ez da aplikatuko.

b) 8 laneguneko ordaindu gabeko baimena ezartzen da ezkontideak, semeak edo alabak edo bigarren mailara arteko odol edo ezkontza bidezko ahaideak ospitaleratu beharra edo gaixotasun larria edukitzeagatik. Egun horiek jarraian baliatuko dira, etenaldirik gabe.

c) Langileek Langileen Estatutuaren 48 bis) artikuluan ezarritako guraso baimenerako eskubidea izanen dute, bat etorriz ekainaren 28ko 5/2023 Errege Lege Dekretuaren 127. artikuluko zazpigarren apartatuan emandako idazketarekin, une bakoitzean indarrean dagoen legeriak ezartzen duenaren arabera.

35. artikulua. Etenaldiak eta lanaldi murrizketa edoskitzeko.

Bederatzi (9) hilabetetik beherako semeari edo alabari esnea ematen dioten langileek eskubidea dute lanaldia ordubetez (1) eteteko. Denbora hori ordu erdiko bi (2) etenalditan zatitzen ahalko da. Lanaldia eten beharrean langileek hautatzen ahal dute ohiko lanaldia ordu erdi murriztea. Murrizketa lanaldiaren hasieran zein bukaeran aplikatzen ahalko da, langileak nahi duen moduan.

Etenaldi edo murrizketa hori ordaindua izanen da. Edoskitze artifizialaren kasuan, gurasoetako edozeinek eskatzen ahalko du; nolanahi ere, biak badira enpresako langile, batek bakarrik eskatzen ahalko du.

Edoskitzeko baimenaren ordu guztiak batera erabiltzea hautatzen ahal dute langileek, amatasun etenaldia bukatu ondoren. Horrelakoetan, edoskitzeko baimenaren iraunaldia 21 egun natural izanen da. Salbuespena: aurretik eszedentzia hartu bada, iraupena horren araberako proportziozkoa izanen da. Martxoaren 23ko 3/2007 Lege Organikoaren arabera, erditze anizkoitzaren kasuan edoskitzeko baimenaren iraunaldia modu proportzionalean luzatzen ahalko da haurren kopuruaren arabera. Nafarroako Foru Komunitatean aplikatzen den legeriari jarraikiz, ezkondutako bikoteen onura berak onartzen zaizkie elkarrekin bizi diren pertsonei.

36. artikulua. Amatasuna, aitatasuna, adopzioa eta harrera.

a) Kontratua etetea:

Jaiotzak (horren barruan sartzen dira erditzea eta hamabi hilabetetik beherako haurra zaintzea) ama biologikoaren lan kontratua etenen du hamasei (16) astez; erditzea anizkoitza bada, etenaldia hemezortzi (18) astekoa izanen da, eta beste aste bat gehitzen ahal zaio bigarrenetik aitzineko haur bakoitzeko. Etenaldi horretan, nahitaez hartu beharko dira erditzearen ondoko lehen sei asteak, jarraian; aste horietan lanaldi osoak hartu beharko dira, amaren osasuna babesteko.

Jaiotzak ama biologikoa ez beste gurasoaren lan kontratua etenen du indarreko legerian ezartzen den aldian. Etenaldi horretan, nahitaez hartu beharko dira erditzearen ondoko lehen sei asteak, jarraian; aste horietan lanaldi osoak hartu beharko dira, Kode Zibilak 68. artikuluan ezartzen dituen zaintza betebeharrak betetzeko.

Erditze goiztiarretan edo edozein konturengatik jaioberriak ospitalean egon behar badu erditzearen ondoren, ama biologikoak edo beste gurasoak eskaturik, ospitalean alta hartzen denetik aurrera zenbatzen ahalko da etenaldia. Zenbaketa horretatik salbuesten dira erditu ondoko sei asteak, epe horretan nahitaez eten beharko baita ama biologikoaren kontratua.

Garaia baino lehen pisu gutxirekin jaiotzen diren haurren kasuan eta, baldintza klinikoren bat dela medio, jaioberriak ospitalean egon behar badu gutxienez zazpi egunez erditzearen ondoren, etenaldia ospitaleratze horrek dirauen bitartean luzatuko da, gehienez ere hamahiru aste gehiagora arte, erregelamenduz garatutako baldintzak betez.

Haurra hiltzen bada, etenaldia ez da murriztuko, salbu eta nahitaez hartu beharreko sei asteko atsedenaren ondoren, langileak lanpostura itzultzea eskatzen badu. Ama hiltzen bada, lanik egiten zuen edo ez kontuan hartu gabe, beste gurasoak etenaldi osoa edo geratzen den zatia hartzen ahalko du, erditzearen egunetik zenbatuta, eta erditu aurretik amak egunak hartu bazituen, horiek ez zaizkio deskontatuko.

Erditu eta hurrengo sei asteak igaro ondoren, guraso bakoitzak adingabea zaintzeko kontratua eteteko duen eskubidea hark nahi bezala banatuko da, astebeteko alditan, modu jarraituan edo etenak eginez, eta baliatzen ahalko da erditu ondorengo nahitaezko etenaldia bukatzen denetik semeak edo alabak hamabi hilabete bete arte. Hala ere, ama biologikoak kontratuaren etenaldia aurreratzen ahalko du, eta erditzea aurreikusten den eguna baino lau aste lehenagotik hasita baliatu. Astebeteko aldi bakoitza hartzeko edo, hala badagokio, aldi horiek metatzeko, gutxienez hamabost egun lehenago jakinarazi beharko zaio enpresari.

Eskubide hori indibiduala da langileentzat, eta ezin zaio eskubide hori beste gurasoari transferitu.

Erditu eta hurrengo sei asteak igarotakoan, lan kontratuaren etenaldia lanaldi osoan edo lanaldi partzialean hartzen ahalko da, aldez aurretik enpresaren eta langilearen artean adosturik, erregelamenduan ezartzen denarekin bat.

Langileak, gutxienez hamabost egun lehenago, enpresari jakinaraziko dio eskubide honetaz baliatuko dela, kasua bada, hitzarmen kolektiboetan ezarritako baldintzetan. Eskubide hori baliatzen duten bi gurasoek enpresa bererako lan egiten badute, enpresaren zuzendaritzak hura aldi berean baliatzeko aukera mugatzen ahal du, arrazoi funtsatuak eta objektiboak badaude, idatziz behar bezala arrazoituta.

Adopzioaren, adoptatzeko zaintzaren edo harreraren kasuan, Langileen Estatutuaren 45.1.d) artikuluarekin bat, etenaldiak hamasei aste iraunen du adoptatzaile, zaintzaile edo harrera-egile bakoitzarentzat. Sei aste, nahitaez, lanaldi osoz eta etenik gabe hartu beharko dira adopzioa eratzen duen epailearen ebazpenaren ondoren, edo adoptatzeko zaintza edo harrera baiesten duen erabaki administratiboaren ondoren.

Gainerako hamar asteak asteka hartzen ahalko dira, metatuta edo etenda, adopzioa eratzen duen epailearen ebazpenaren edo adoptatzeko zaintza edo harrera baiesten duen erabaki administratiboaren ondorengo hamabi hilabeteko epean. Ez da zilegi langile batek etenaldi bat baino gehiago hartzea adingabe beragatik. Astebeteko aldi bakoitza hartzeko edo, hala badagokio, aldi horiek metatzeko, gutxienez hamabost egun lehenago jakinarazi beharko zaio enpresari. Hamar aste horietako etenaldia lanaldi osoan edo lanaldi partzialean hartzen ahalko da, aldez aurretik ados jarrita enpresa eta kasua dagokion langilea, erregelamenduz erabakitzen diren baldintzen arabera.

Nazioarteko adopzioen kasuetan, gurasoek adopzioan hartuko duten haurraren jatorrizko herrialdera joan beharra dutenean, adopzioari buruzko ebazpena eman baino lau aste lehenagotik ere hasten ahalko da apartatu honetan kasu bakoitzerako aurreikusitako lizentzia.

Eskubide hori indibiduala da langileentzat, eta ezin zaio transferitu beste adoptatzaileari, adoptatu aurreko zaintzaileari edo harrera egiten duenari.

Langileak, gutxienez hamabost egun lehenago, enpresari jakinaraziko dio eskubide honetaz baliatuko dela, kasua bada, hitzarmen kolektiboetan ezarritako baldintzetan. Eskubide hori baliatzen duten bi adoptatzaile, zaintzaile edo harrera-egileek enpresa bererako lan egiten badute, enpresak borondatezko hamar aste horiek aldi berean baliatzeko aukera mugatzen ahal du, arrazoi funtsatuak eta objektiboak badaude, idatziz behar bezala arrazoituta.

Jaiotzaren, adopzioaren, adoptatzeko zaintzaren edo harreraren kasuan semeak nahiz alabak desgaitasunen bat badu, kontratuaren etenaldiak bi aste gehiago iraunen du (bat guraso bakoitzarentzat). Jaiotze, adopzio, adoptatzeko zaintza edo harrera anizkoitzetan berdin jokatuko da seme nahiz alaba bakoitzeko, bigarrenetik hasita.

Haurdunaldian edo haurrari bularra emateko aldian arriskurik baldin badago, Laneko Arriskuen Prebentzioari buruzko azaroaren 8ko 31/1995 Legearen 26. artikuluan aurreikusitakoaren arabera, kontratu etete hori bukatuko da kontratua erditzeagatik eteten den egunean edo bularreko haurrak bederatzi hilabete betetzen dituenean, hurrenez hurren, edo, bi kasuetan, langilea aurreko lanpostura edo bere egoerarako egokia den batera itzultzeko ezintasuna desagertzen denean.

Langileen Estatutuaren 45.1.n) artikuluan aurreikusita dagoen kasuan, etenaldia sei hilabetekoa izanen da gehienez hasiera batean, eta luzatzen ahalko da, babes judizialeko jarduketetan horren beharra ikusten bada, biktimaren babes eskubidea eraginkorra izan dadin. Kasu horretan epaileak hiru hilabeteko luzamenduak agintzen ahalko ditu, gehienez ere hemezortzi hilabete igaro arte.

Kontratua etenda dagoen artean langileek izan zitzaketen lan baldintzen hobekuntza guztiak izanen dituzte.

37. artikulua. Beren kabuz moldatu ezin duten adingabeak edo senitartekoak zaintzea.

Legezko zaintza dela eta langileren batek bere kargu izanez gero hamabi (12) urte bitarteko haur bat edo lan ordaindurik egiten ez duen eta desgaitasun fisiko, psikiko nahiz zentzumenezkoren bat daukan pertsona bat, eskubidea izanen du lanaldia murrizteko, zortziren bat gutxienez eta erdia gehienez ere, lansaria ere hein berean murriztuta.

Adinagatik edo istripu edo eritasun baten ondorioz bere kasa bizitzeko gauza ez den eta lan ordaindurik egiten ez duen senitartekoa –odol bereko edo ezkontza bidezko bigarren mailara artekoa– zaindu behar duen langileak ere eskubide bera izanen du. Baimen hori ezin dute hartu enpresako bi langilek pertsona bera zaintzeko. Lanaldiaren murrizketaren ordu-zehaztapena langileak eginen du, eta hamabost (15) egun lehenago jakinarazi beharko dio enpresaren zuzendaritzari berriz ere ohiko lanaldiari ekinen diola.

38. artikulua. Lanaldia murriztea adinarengatik.

Berrogeita hamabost urte bete ondoren langileek lanaldia murrizten ahalko dute adinarengatik: gutxienez ohiko lanaldiaren zortziren bat eta gehienez erdia; soldata ere hein berean murriztuko zaio.

Murrizketaren eskaera hamabost egun lehenago egin beharko da gutxienez, idatziz, eta enpresak eskaera jaso izanaren berri eman beharko du.

39. artikulua. Nahitaezko eszedentzia.

Nahitaezko eszedentzia honako kasu hauetan emanen da:

a) Langilea lanera joatea galarazten duen ordezkaritza kargu publiko baterako izendatzea edo hautatzea.

b) Probintzia barneko edo esparru handiagoko sindikatu eginkizunetan aritzea (eszedentzia karguak irauten duen denborarako izanen da).

c) Legez ezartzen diren gainerako kasu guztiak.

Eszedentzia horiek indarrean egonen dira kargu edo eginkizun sindikal horiek bukatu arte, eta gero langileek lanpostura automatikoki itzultzeko eskubidea izanen dute.

Eszedentzia hori inolako lansaririk jasotzeko eskubiderik gabe eman dela ulertuko da, eta aldi hori antzinatasuna kalkulatzeko zenbatuko da. Idatziz eskatu behar da beti, hartu baino hogeita hamar (30) egun lehenago gutxienez, egiaztatzen ahal diren premia larriko arrazoiengatik izan ezik. Entitateak idatziz erantzun behar du bost (5) egun igaro baino lehen. Eszedentziak irauten duen artean ordezko batek betetzen ahal du lanpostu hutsa. Titularra lanera itzultzen denean ordezkoaren lana bukatuko da eta berarekiko lan harremana bukatutzat emanen da. Halaber, langileak lanbide heziketako ikastaroak egitera joateko eskubidea izanen du.

Eszedentzia eragiten duen gertaera bukatzen denetik hilabete bat (1) igaro aurretik itzuli beharko da langilea lanera.

40. artikulua. Senitartekoak eta seme-alabak zaintzea.

Langileek gehienez lau (4) urteko eszedentzia hartzeko eskubidea izanen dute seme edo alaba bakoitza zaintzeko (bai biologikoa, bai adoptatua, bai harrerakoa –behin betiko harrera zein adopzio-aurreko harrera–). Eszedentzia umea jaiotzen den egunetik edo epaileen edo administrazioaren erabakiaren egunetik hasiko da zenbatzen.

Eszedentzia horrek irauten duen artean, langileak lanpostua beretzat gordetzeko eskubidea izanen du.

Hiru (3) urtetik gorakoa ez den eszedentzia hartzeko eskubidea izanen dute, halaber, beren kargura dagoen bigarren mailara arteko odol edo ezkontza bidezko senitarteko bat zaindu behar duten langileek, baldin eta senitarteko hori, adinagatik, istripuren bat izan duelako edo gaixorik dagoelako, bere kabuz moldatu ezin bada eta ordaindutako jarduerarik egiten ez badu.

Azken eszedentzia horretako lehen bi urteetan langileak lanpostua beretzat gordetzeko eskubidea izanen du. Beste subjektu eragile batek beste eszedentzia baterako eskubidea sortzen duenean, hori hastearekin batera bukatuko da ordura artekoa. Eszedentzia hori inolako lansaririk jasotzeko eskubiderik gabe emanen da eta antzinatasuna kalkulatzeko zenbatuko da, lehen urtean. Idatziz eskatu behar da beti, hartu baino hogeita hamar (30) egun lehenago gutxienez, egiazta daitezkeen premia larriko arrazoiengatik izan ezik. Entitateak idatziz erantzun behar du bost (5) egun igaro baino lehen. Eszedentziako lehen bi urteetan hutsik gelditu den lanpostua bete behar izanez gero, ordezkoa aritzen ahalko da bertan. Titularra lanera itzultzen denean edo lanpostua gorde beharreko aldia bukatzen denean, ordezkoaren lana ere bukatuko da eta berarekiko lan harremana finitutzat emanen da. Halaber, langileak lanbide heziketako ikastaroak egitera joateko eskubidea izanen du. Lehenengo urtean, langileak lanpostua gordetzeko eskubidea izanen du. Epe hori bukatuta, gordeko zaion lanpostua lanbide talde berekoa edo balio bereko kategoria batekoa izanen da. Aurrekoa hala izanik ere, langilea ofizialki aitortutako familia ugari bateko kidea baldin bada, lanpostua hamabost (15) hilabetez gordeko zaio, gehienez ere, kategoria orokorreko familia ugaria denean, eta hemezortzi (18) hilabetez, gehienez, kategoria berezikoa denean.

41. artikulua. Borondatezko eszedentzia.

Enpresan etengabeko jardun aktiboan gutxienez urtebeteko (1) antzinatasuna duen langileak borondatezko eszedentzia eskatzen ahalko du. Eszedentzia hori ez da izanen hiru (3) hilabetetik beherakoa, ez eta bost (5) urtetik gorakoa ere. Langileak ez du beste eszedentziarik hartzen ahalko aurrekoa bukatzen denetik benetako laneko bi (2) urte igaro arte.

Eszedentzia hori inolako lansaririk jasotzeko eskubiderik gabe eman dela ulertuko da eta denbora hori ez da antzinatasuna kalkulatzeko kontatuko. Eszedentzia hori idatziz eskatu behar da beti, hasi baino hogeita hamar (30) egun lehenago gutxienez. Enpresak ere idatziz erantzun beharko du bost (5) egun igaro baino lehen.

Lan kontratu mugagabea duten pertsonek lanpostua gordetzeko eskubidea izanen dute lehen urtean; beren lanpostuetan ordezkoak aritzen ahalko dira. Lehen urtea igarotakoan langileak entitatean hutsik dagoen edo hutsik gelditzen den kategoria bereko edo antzeko kategoriako lanpostu batera itzultzeko lehentasuna izateko eskubidea baizik ez du izanen.

42. artikulua. Eszedentziaren ondoren lanera itzultzea.

Aurreikusi diren eszedentzia egoera guztietan, baldin eta eszedentzialdia bukatutakoan langileak entitatera itzuli nahi badu, aldi hori bukatu baino hogeita hamar (30) egun natural lehenago eskatu beharko du, eta eskaeran adierazi beharko du noiz nahi duen hasi lanean. Eszedentzialdia bukatu eta hurrengo hogeita hamar (30) egun natural igaro aurretik hasi beharko du lanean.

Eskaera aurkezten ez badu, lehentasun eskubideari uko egiten diola ulertuko da.

Eszedentzialdian ordezkoa kontratatu bada lanpostu hutsean aritzeko, titularra lanera itzultzen denean ordezkoaren lana bukatuko da eta berarekiko lan harremana finitutzat emanen da.

IX. KAPITULUA.–HOBEKUNTZA SOZIALAK

43. artikulua. Laneko arropa eta norbera babesteko ekipamenduak (NBE).

Enpresak laneko arropa eman behar du, negurako eta udarako, bai eta norbera babesteko ekipamenduak (NBEak) ere, bete beharreko eginkizunen arabera behar duten langileei.

NBEak hautatzea enpresari dagokio, langileen legezko ordezkariekin aldez aurretik kontsulta eginda; lanpostu bakoitzeko arriskuen ebaluazioaren irizpideei jarraikiz hautatuko dira, dagozkion babeseko eta prebentzioko neurriak bermatuta.

Enpresak arropa hau emanen die eskatzen duten langileei:

–Udaberri/udako denboraldia:

  • Mahuka motzeko kotoizko elastikoa.
  • Praka luze sinpleak.
  • Jantzi polarra gizarteratzeko prozesuan dauden pertsonentzat, eta jantzi polarra edo puntuzko jertsea gainerako langileentzat.

–Udazken/neguko denboraldia:

  • Buffa.
  • Txanoa.
  • Mauka luzeko kamiseta, kotoizkoa eta/edo termikoa (denboraldi bakoitzeko bat).
  • Praka luze forratuak (denboraldi bakoitzeko pare bat).
  • Lanerako eskularru forratuak (denboraldi bakoitzeko pare bat).

–Denboraldia edozein dela ere:

  • Parka edo txalekoa gizarteratzeko prozesuan dauden pertsonentzat, eta parka, haize-babesgarria edo txalekoa gainerako langileentzat.
  • Oinetako egokiak, Laneko Arriskuen Prebentzioko Legearekin bat etorriz.

Langile berriak sartzean, gizarteratzeko prozesuan dauden pertsonak nahiz teknikariak izan, honako hauek emanen zaizkie: mahuka motzeko edo mahuka luzeko bi elastiko; bi praka pare luze sinple; jantzi polarra edo jertsea; parka, haize-babesgarria edo txalekoa, lehen ezarritakoaren arabera, eta bota pare bat. Horretarako, Laneko Arriskuen Prebentzioko Legean ezarritakoari jarraituko zaio.

Langilea, lanean ari diren bitartean, enpresak emandako arropa eta NBEak erabiltzera behartuta dago, eta horiek zaindu ere egin behar ditu. Laneko arropak eta NBEak enpresan soilik erabiliko dira, eta enpresari itzuliko zaizkio hark arropa berriak ematen dituenean eta/edo kontratua bukatzen denean.

44. artikulua. Aseguruak.

Enpresak, erantzukizun zibileko poliza baten bidez, aseguru bat eginen die langile guztiei, lanaren ondorioz gerta litezkeen erantzukizunak estaltzeko.

Halaber, enpresak aseguru poliza bat kontratatuko du laneko istripuak eta eritasun profesionalak estaltzeko; kontingentziak eta zenbatekoak honako hauek izan behar dira:

Heriotza, ezintasun iraunkor absolutua edo baliaezintasun handia: 50.000 euro.

Ezintasun iraunkor osoa: 25.000 euro.

Ezintasun iraunkor partziala: 12.000 euro gehienez, baremo-ehunekoaren arabera.

Urtero polizaren kopia emanen zaio langileen legezko ordezkaritzari.

45. artikulua. Telelana.

I. eta II. taldeetako lanbide kategorietan telelana egin daiteke, honako baldintza hauetan:

–Telelana une jakin batzuetan eginen da, baldin eta langileak justifikatutako premiak baditu.

–Enpresako zuzendaritzaren onespenarekin eginen da beti.

–Enpresaren egoitzan gutxienez pertsona bat egotea bermatuko da beti, telefono bidezko eta aurrez aurreko arreta emanen dela ziurtatzeko.

Enpresak ez ditu inola ere konpentsatuko une jakin batzuetan telelana egiten duten pertsonak, telelana berez langileei eskaintzen zaie abantaila gisa ulertzen baita.

Gainerako lanbide taldeetako langileek ez dute telelana egiteko aukerarik izanen, lan jarduna modu presentzialean egin behar baitute ezinbestean.

X. KAPITULUA.–DIZIPLINA ARAUBIDEA

46. artikulua. Faltak.

Hiru falta mota ezarri dira hitzarmen honen eraginpeko langile guztientzat: Falta arinak, astunak eta oso astunak. Kalifikazio honen arabera sailkatzen dira (zerrenda adierazgarria baino ez da):

–Falta arinak:

  • Bidezko arrazoirik gabe hiru alditan garaiz ez iristea, hogeita hamar egunean.
  • Bidezko arrazoirik gabe behin lanera ez etortzea, hogeita hamar egunean.
  • Bidezko arrazoirik gabe eguneko lanaldia garaia baino lehen bukatutzat ematea, bi alditan gehienez hogeita hamar egunean.
  • Aldez aurretik ez jakinaraztea lanera ez dela joanen eta ondoko 24 orduen barruan ez-joate hori ez justifikatzea, hori egitea ezinezkoa izan dela frogatu ezean.
  • Bidezko arrazoi edo kausarik gabe lanpostutik alde egitea, denbora laburrez bada ere, betiere alde egite horrek kalterik ez dakarrenean enpresaren jarduerarako, edo lankideei kalte edo istripurik eragiten ez dienean; izan ere, horrelakoetan falta astuntzat edo oso astuntzat joko litzateke.
  • Agindutako lanean zabarkeriaz jardutea edo materiala ongi ez zaintzea, betiere enpresari edo lankideei kalterik eragin gabe; izan ere, kalterik eraginez gero, falta astuntzat edo oso astuntzat joko litzateke.
  • Zabarkeriaz jokatzea lantokiko funtzionamendu arauei edo norberaren eginkizunei dagokienez.
  • Norberaren garbitasun eta txukuntasun eza. Horren ondorioz lankideek erreklamazioak edo kexak egiten badituzte, falta astuntzat edo oso astuntzat hartzen ahalko da.
  • Enpresako edozein kide, bezeroak edo senitartekoak errespeturik eta begirunerik gabe tratatzea.
  • Lanorduetatik kanpo lantokian egotea, baimenik gabe.
  • Laneko arriskuen prebentzioko arauak ez betetzea, betiere horrek langileari, lankideei edo hirugarrenei arriskurik ekartzen ez dienean.
  • Enpresaren telefonoa edo baliabide telematikoak, informatikoak, mekanikoak edo elektronikoak erabiltzea norberaren kontuetarako, dagokion baimenik izan gabe.

–Falta astunak:

  • Bidezko arrazoirik gabe hiru alditan baino gehiagotan eta hamaika alditan baino gutxiagotan garaiz ez iristea, hogeita hamar eguneko epean.
  • Bidezko arrazoirik gabe behin baino gehiagotan eta bost alditan baino gutxiagotan lanera ez etortzea, hogeita hamar eguneko epean.
  • Langileak zabarkeria edo arduragabekeria larriz jokatzea, bai agindutako lanak eta/edo eginkizunak betetzen ari delarik, bai bere ardurapean dituen materialak edo makinak zaintzean edo garbitzean.
  • Laneko arriskuen prebentzioko arauak edo aginduak ez betetzea, betiere horrek langileari, lankideei edo hirugarrenei arrisku larria ekartzen dienean; era berean, enpresak emandako segurtasuneko bitartekoak edo NBEak erabiltzeari uko egitea ere falta astuntzat hartuko da.
  • Laneko edozein gaitan nagusien esana ez betetzea, baldin eta agindua ez bada iraingarria langilearentzat edo bizitza arriskuan jartzen ez badu, bai langilearena berarena, bai beste langileena.
  • Langileak ikusitako edozein gertakari edo falta ezkutatzea, baldin eta enpresari, lankideei edo hirugarrenei kalte larria eragin badiezaieke; hor sartzen dira instalazioetan, makinetan edo lokaletan hautemandako anomalia, matxura edo istripu guztiak.
  • Baimenik ez duten pertsonak lantokira sartzea edo sartzen laguntzea.
  • Lan partikularrak egitea lantokian, behar den baimenik gabe, bai eta enpresaren tresnak norberaren kontuetarako erabiltzea ere, laneko lokalen barruan nahiz kanpoan, non eta ez duen dagokion baimenik.
  • Enpresako edozein kide, bezeroak edo senitartekoak errespeturik eta begirunerik gabe tratatzea eta jendaurrean eztabaidak izatea haiekin.
  • Edozein falta arin behin baino gehiagotan egitea, hiruhileko berean, tartean enpresaren idatzizko zehapena izan denean.

–Falta oso astunak:

  • Bidezko arrazoirik gabe hamaika alditan baino gehiagotan garaiz ez iristea, hogeita hamar eguneko epean.
  • Bidezko arrazoirik gabe bost alditan baino gehiagotan lanera ez etortzea, hogeita hamar eguneko epean.
  • Errespetu falta larriak eta tratu txarrak, hitzezkoak zein egintzazkoak, enpresako edozein kideri. Horrelako eztabaidetan liskar edo istilu larriak sortuz gero, falta oso astuntzat hartzen ahalko dira.
  • Agindutako lan, kudeaketa edo jardueran iruzur egitea, leialtasunik ezaz jokatzea edo konfiantzaz aprobetxatzea; hala lankideei, nola enpresari, edo lantokian nahiz lantokitik kanpo dagoen edozein pertsonari ebastea eta lapurtzea, lanean ari den bitartean.
  • Enpresako edo lantokiko materiala, lanabesak, makinak, instalazioak, eraikinak, aparatuak, tresnak, agiriak edo ibilgailuak desagerrarazi, hondatu edo suntsitzea.
  • Laneko arriskuen prebentzioko arauak ez betetzea edo ez aintzat hartzea, horren ondorioz lan istripu larria gertatzen denean edo lankideei, hirugarrenei edo enpresari kalte larriak ekartzen dizkienean.
  • Laneko errendimendu arrunta nahita gutxitzea behin eta berriz edo etengabe.
  • Arduradun edo goragokoen esana ez betetzea etengabe edo behin eta berriz.
  • Enpresari edo lantokiari buruzko berri edo informazio faltsuak ematea maltzurkeriaz, edo arduragabekeria barkaezinagatik.
  • Agindutako lana egitearen ondorioz edo lan hori egiteagatik, lantokian edo lantokitik kanpo egindako egintzak, delitu izaten ahal direnak.
  • Lanpostutik arrazoirik gabe alde egitea, batez ere aginteko edo erantzukizuneko postuak direnean, edo alde egite horrek kalte nabaria eragiten duenean enpresarako edo langileari, lankideei edo hirugarrenei istripua eragiten ahal dienean.
  • Agindutako lanean arduragabekeria edo utzikeria erakustea, edo enpresaren instalazioetan edo makinerian matxura larriak edo istripuren bat eragiteko moduan lan egitea.
  • Falta astuna –mota desberdinekoa izan ala ez izan– behin baino gehiagotan egitea, seihileko berean, enpresak zehapena idazki bidez adierazi duenean.
  • Langileen edo erabiltzaileen datuak erabiltzea, datu pertsonalak babesteari buruz indarrean dauden arauak urratuz; dokumentazioa galtzea, eta datuetara sartzeko pasahitza galtzea edo ematea.
  • Langileari berari edo lankideei buruzko datu pertsonalak, lanekoak edo osasunari buruzkoak aldatzea edo faltsutzea.
  • Lantoki edo enpresari buruzko edo bertako pertsonei buruzko isilpeko datuak ematea, horretarako behar den baimenik izan gabe.
  • Alkohola kontsumitzea, drogen eraginpean egotea, edozein substantzia estupefaziente edukitzea edo horiekin trafikatzea.
  • Falta astunak edo oso astunak idatziz jakinarazi behar zaizkio ordezkari sindikalari, halakorik baldin badago.

47. artikulua. Zehapenak.

Enpresako zuzendaritzak langileei zehapenak ezartzeko ahalmena izanen du; horretarako, gertaerak, faltaren gradua eta erabakitako zehapena adierazi beharko ditu. Enpresak, falten astuntasuna eta inguruabarrak kontuan hartuta, gehienez zehapen hauek jartzen ahal ditu:

–Falta arinak: Hitzez edo idatziz kargu hartzea.

–Falta astunak: Enplegu eta soldatarik gabe uztea bi egunetik hamabost egunera bitarte.

–Falta oso astunak: Enplegu eta soldatarik gabe uztea hamasei egunetik hirurogei egunera bitarte. Kaleratzea.

Falta astunak eta oso astunak lehenbizi langileen ordezkariei jakinaraziko zaizkie, eta haien iritziak entzunen ditu enpresak zehapena jarri aurretik. Dena den, zehapenak jartzeko ahalmena enpresak izanen du beti.

48. artikulua. Falten preskripzioa.

Graduaren arabera, falta arinek hamar egunen buruan preskribatuko dute, astunek hogei egunetan eta oso astunek hirurogei egunetan.

Horiek guztiak enpresak gertaeren berri izaten duenetik kontatzen hasita eta, betiere, gertatu eta handik sei hilabetera.

49. artikulua. Enpresaren arau-hausteak.

Enpresaren lan arloko arau-hausteak izanen dira lan arloko lege xedapenen, hitzarmen kolektiboaren eta gainerako arau aplikagarrien aurkako ekintzak edo ez-betetzeak.

XI. KAPITULUA.–ESKUBIDE SINDIKALAK

50. artikulua. Eskubide sindikalak.

Enpresako ordezkari sindikalek honako eskubide hauek izanen dituzte:

a) Beren lantokian falta astun eta oso astunengatik ezartzen diren zehapen guztien berri jasotzea, zehapena ezarri aurretik.

b) Hiru hilean behin bederen ondokoei buruzko estatistikak jasotzea: absentismo indizea eta horren arrazoiak, lan istripuak eta lanbideari lotutako gaixotasunak eta horien ondorioak, laneko ingurumen arloko aldian aldiko azterketak edo azterketa bereziak, eta erabiltzen diren prebentzio baliabideak.

c) Lanaren, gizarte segurantzaren eta okupazioaren arloetan indarra duten arauak eta hitzarmen honetan jasotako gainerako itun eta baldintzak betetzen diren begiratzea.

d) Enpresako lanetan segurtasuneko eta higieneko baldintzak betetzen diren begiratzea eta kontrolatzea, Langileen Estatutuaren 19. artikuluan horren inguruan ezarritako berezitasunak kontuan hartuta.

e) Ordaindutako 15 orduko kreditua izatea hilean sindikatuko eginkizunak egiteko.

f) Legez edo hitzarmenez ematen zaizkien gainerakoak.

Aurrekoa deusetan galarazi gabe, EIS Ilundain Empresa de Inserción SLU enpresako langileen ordezkari guztiek Langileen Estatutuaren 68. artikuluan ezarritako bermeak izanen dituzte.

XII. KAPITULUA–BESTE XEDAPEN BATZUK

51. artikulua. Hitzarmenean ezarritakoa ez aplikatzeko klausula.

Enpresak hitzarmen kolektibo honetan aurreikusitako baldintzak aplikatu gabe utzi ahal ditzan, Langileen Estatutuaren 82.3 artikuluan xedatutakoarekin bat, hobekuntza prozedura hau adostu da:

a) Alderdien artean, hau da, entitateko zuzendaritzaren eta langileen legezko ordezkarien artean kontsultak egiteko 15 egun naturaleko epea izanen da. Langileek ez badute ordezkaririk, langileek horretarako aukeratutako pertsonez osatutako "ad hoc" batzorde batean eginen dira kontsultak. Kontsultaldia akordio batekin bukatzen bada, horren berri eman beharko zaie Hitzarmenaren Batzorde Paritarioko kideei. Akordioan zehatz azaldu beharko dira eraginpeko lantokian aplikatzekoak diren baldintza berriak eta horien iraupena.

b) Akordiorik ez badago, alderdiek Hitzarmenaren Batzorde Paritariora bidaliko dute espedientea zazpi egun naturaleko epean, kontsultaldia bukatzen denetik kontatzen hasita. Hitzarmenaren Batzorde Paritarioak 7 eguneko epea izanen du berariazko ebazpena emateko, adieraziz "ados" edo "ez ados" dagoen planteatutako ez-betetzearekin. Erabakiak ordezkaritza bakoitzaren –enpresaburuena eta langileena– gehiengo bidez hartu behar dira. "Adostasun" ebazpenek kontsultaldiko akordioen eraginkortasun berdina izanen dute, eta Laneko Agintaritzari jakinarazi behar zaizkio.

c) Batzorde Paritarioak "ez ados" dagoela ebazte badu, alderdiek bitartekaritzapean jarri beharko dituzte negoziazioan sortutako desadostasunak, Nafarroako Lan Auzitegian. Bitartekaritza hori zazpi egun naturaleko epean eskatu beharko da, Batzorde Paritarioak "ez ados" ebazpena jakinarazten duenetik hasita. Bitartekaritza gehienez ere 30 egun naturaleko epean eginen da, eta luzatzen ahalko da, baldin aurretik alderdiak berariaz ados jartzen badira. Alderdien arteko adostasuna lortzen bada, ez aplikatzeko akordioan zehazki ezarri behar da zein diren enpresan aplikatu beharreko lan baldintza berriak eta horien iraupena. Akordioa jakinarazi egin beharko zaie Laneko Agintaritzari eta Hitzarmenaren Batzorde Paritarioari.

d) Nafarroako Lan Auzitegiko bitartekaritza akordiorik gabe bukatzen bada, auzia arbitrajepean jartzeko aukera eta Hitzarmen Kolektiboetarako Aholku Batzorde Nazionalera jotzeko aukera izateko, beharrezkoa izanen da enpresaren ordezkariek idatziz akordioa egitea langileen legezko ordezkariekin edo, horrelakorik ezean, langileek "ad hoc" eratutako batzordearekin, derrigorrezko arbitrajea alde batera utzita, betiere.

1. ERANSKINA.–2024TIK 2026RA BITARTEKO SOLDATA TAULAK

TALDEA

KATEGORIA

HASIERAN ESKATUTAKO OINARRIZKO
PRESTAKUNTZA

2024

2025

2026

I. taldea

Esku-hartze eta gizarteratze teknikaria

Gizarte arloko unibertsitateko titulua eta bi urteko esperientzia, gutxienez, bere lanpostuari dagokion ezagutza arloan

28.010,80

Nafarroako 2024ko KPIa (bermatutako gutxienekoa: %1,35)

Nafarroako 2024ko KPIa (bermatutako gutxienekoa: %1,35)

II. taldea

Administrazioko teknikaria

Bere lanpostuari dagokion ezagutza arloko gradua, edo goi mailako Lanbide Heziketa, eta 2 urteko esperientzia, gutxienez, bere lanpostuari dagokion ezagutza arloan.

26.178,42

Nafarroako 2024ko KPIa (bermatutako gutxienekoa: %1,35)

Nafarroako 2025eko KPIa (bermatutako gutxienekoa: %1,35)

Administrari laguntzailea

Erdi mailako Lanbide Heziketa bere lanpostuari dagokion ezagutza arloan

19.840,98

Nafarroako 2024ko KPIa (bermatutako gutxienekoa: %1,35)

Nafarroako 2025eko KPIa (bermatutako gutxienekoa: %1,35)

III. taldea

Lantegiko maisua - Laguntzeko teknikaria

Erdi mailako Lanbide Heziketa eta 2 urteko esperientzia, gutxienez, bere lanpostuari dagokion ezagutza arloan

26.178,42

Nafarroako 2024ko KPIa (bermatutako gutxienekoa: %1,35)

Nafarroako 2025eko KPIa (bermatutako gutxienekoa: %1,35)

IV. taldea

Peoia

 

19.286,60

Nafarroako 2024ko KPIa (bermatutako gutxienekoa: %1,35)

Nafarroako 2025eko KPIa (bermatutako gutxienekoa: %1,35)

1. mailako langilea/laguntzailea

 

17.331,20

Nafarroako 2024ko KPIa (bermatutako gutxienekoa: %1,35)

Nafarroako 2025eko KPIa (bermatutako gutxienekoa: %1,35)

2. mailako langilea/laguntzailea

 

16.531,20

Nafarroako 2024ko KPIa (bermatutako gutxienekoa: %1,35)

Nafarroako 2025eko KPIa (bermatutako gutxienekoa: %1,35)

2024

2025

2026

Antzinatasuna - hirurtekoa (x14, gehienez 10 hirurteko)

40,00

Nafarroako 2024ko KPIa (bermatutako gutxienekoa: %1,35)

Nafarroako 2025eko KPIa (bermatutako gutxienekoa: %1,35)

Zuzendaritzako osagarria (x14)

700,27

Nafarroako 2024ko KPIa (bermatutako gutxienekoa: %1,35)

Nafarroako 2025eko KPIa (bermatutako gutxienekoa: %1,35)

Koordinazioko osagarria (x14)

350,13

Nafarroako 2024ko KPIa (bermatutako gutxienekoa: %1,35)

Nafarroako 2025eko KPIa (bermatutako gutxienekoa: %1,35)

Espezializazioko osagarria (x12)

204,25

Nafarroako 2024ko KPIa (bermatutako gutxienekoa: %1,35)

Nafarroako 2025eko KPIa (bermatutako gutxienekoa: %1,35)

Prestasuneko plusa (x12)

204,25

Nafarroako 2024ko KPIa (bermatutako gutxienekoa: %1,35)

Nafarroako 2025eko KPIa (bermatutako gutxienekoa: %1,35)

Lan toxiko, nekagarri edo arriskutsuen plusa (x egunak)

11,67

Nafarroako 2024ko KPIa (bermatutako gutxienekoa: %1,35)

Nafarroako 2025eko KPIa (bermatutako gutxienekoa: %1,35)

Espezializazioko plusa (x egunak)

11,67

Nafarroako 2024ko KPIa (bermatutako gutxienekoa: %1,35)

Nafarroako 2025eko KPIa (bermatutako gutxienekoa: %1,35)

Nork bere autoan egindako joan-etorrien gastuak

0,32 €/km

Iragarkiaren kodea: F2416477