Iragarkia

156. ALDIZKARIA - 2024ko abuztuaren 1a

3. ESTATUKO ADMINISTRAZIOA

TRANTSIZIO EKOLOGIKORAKO ETA ERRONKA DEMOGRAFIKORAKO MINISTERIOA

Ebazpena, Politika Energetikoaren eta Meategien Zuzendaritza Nagusiak emana, Buganvilla Solar PV SLri aldaketetarako aurretiazko administrazio-baimena eta eraikitzeko administrazio-baimena ematen dizkiona Serna I Solar instalazio fotovoltaikorako (107,79 MW-eko potentzia instalatua) eta haren ebakuazio-azpiegiturarako (Corella eta Tuterako udal-mugarteetan daude, Nafarroan). SEE/DGPEM/SGEE/Ebazpena Pfot-324 (AAP mod, ACC eta DUP)

Buganvilla Solar PV SLk (aurrerantzean, sustatzailea), 2020ko azaroaren 20an, aurretiazko administrazio-baimena eskatu zuen, Corella eta Tuterako udal-mugarteetan (Nafarroa), Serna I Solar instalazio fotovoltaikorako (120 MW modulu fotovoltaikoetan eta 107,79 MW inbertsoreen potentzian) eta haren ebakuazio-azpiegiturarako.

Energia Politikako eta Meatzeetako Zuzendaritza Nagusiaren 2023ko apirilaren 25eko Ebazpenaren bidez, aurretiazko administrazio-baimena eman zitzaion Buganvilla Solar PV SLkri 107,9 MW-ko potentzia instalatuko Serna I Solar eguzki-instalazio fotovoltaikorako eta haren ebakuazio-azpiegiturarako, Corella eta Tuterako udal-mugarteetan, Nafarroan (aurrerantzean, aurretiazko administrazio-baimenaren ebazpena); 2023ko maiatzaren 29an argitaratu zen Estatuko Aldizkari Ofizialean (127. zenbakia).

Aurretiazko administrazio-baimenaren ebazpen horretan xedatutakoarekin bat etorriz, eta Energia elektrikoa garraiatzeko, banatzeko, merkaturatzeko eta hornitzeko jarduerak eta instalazioak baimentzeko prozedurak arautzen dituen abenduaren 1eko 1955/2000 Errege Dekretuaren 125. artikuluarekin eta ondorengoekin bat etorriz egindako izapidetzearen ondorioz, sustatzaileak konpromisoa hartu zuen proiektuan zenbait aldaketa egiteko, bereziki ADIF Trenbide Azpiegituren Administratzailearen, Iberdrola Redes Inteligentes SAUren, Ebroko Konfederazio Hidrografikoaren, Nafarroako Ubideko Ureztatzaileen Komunitatearen, Enagás Transporte SAUren eta Red Eléctrica de España SAUren txostenei erantzunez. Honako hauek dira:

–«Serna I Solar» instalazio fotovoltaikoa, La Serna I azpiestazioa eta 220 kV-eko linearen trazadura egokitzea, erakundeek beren eskumeneko ondasunak eta zerbitzuak okupatzeko eta instalazioa haietatik igarotzeko ezarritako baldintzak betetzeko.

Aurretiazko administrazio-baimenaren ebazpen horretan xedatutakoaren arabera, ingurumen-inpaktuaren ebaluazioaren esparruan, sustatzaileak, 2021eko urriaren 13an, adierazitako inpaktuetako batzuk murrizten dituen aldaketa batzuk aurkeztu zituen; hona hemen aldaketa horiek:

–Lur-mugimenduak kentzea modulu fotovoltaikoak instalatzean, eta kableetarako zangetan eta transformadoreak eraikitzeko bakarrik erabiltzea.

–Aldaketak egituretan eta moduluetan, egituraren azalera hasierako 560.796,85 m²-etatik 552.330,89 m²-ra jaisteko aukera ematen dutenak.

–Azalera hesitua murriztea, hasierako 97,629 ha-etatik 81,433 ha-ra.

–Materialak biltzeko 4 eremuak laborantzako lurretan kokatzea.

–Lurperatze partziala, barne direla Alhama ibaiarekin gurutzatzen den sektoreko lurperatzea (29. eta 30. euskarriak) eta 43. eta 54 A euskarrien artekoa.

–Eragindako III. motako azalera ureztatua, kalitate agrologiko onenekoa, murriztea, 10,3 ha-tik 4,91 ha-ra; hala, mota horretako azalera ureztatua ezarpenaren azalera osoaren %5,99ra mugatu da.

Adierazitako aurretiazko administrazio-baimenaren ebazpenean jasotakoarekin bat etorriz, Trantsizio Ekologikorako eta Erronka Demografikorako Ministerioko Ingurumen Kalitatearen eta Ebaluazioaren Zuzendaritza Nagusiaren 2022ko maiatzaren 31ko Ebazpenean –haren bidez, ingurumen-inpaktuaren aldeko adierazpena ematen zaio proiektuari, eta 2022ko ekainaren 9an argitaratu zen Estatuko Aldizkari Ofizialean (137. zenbakia)– zehaztutako proiektuaren baldintza guztiak betetzearen kalterik gabe, egikaritze-proiektua definitzeko, zehazki eta beste batzuen artean, aldaketa hauek egin behar ziren:

–220 kV-eko linearen tartea lurperatu eginen da 28. eta 30. euskarrien artean; modu horretan, ez dio eraginen erriberako landarediari (2.8.a baldintza).

–220 kV-eko linea lurperatu eginen da 35. eta 36. euskarrien arteko tartean, 400/220 kV-eko Las Labradas TAEraino. Lurperatutako linearen oinplanoko trazadura hasiera batean proiektatutako aireko linearako aurreikusita zegoena bera izanen da. Halere, aldaketa txiki batzuk egiten ahalko dira beharrezkoa denean, landaredi naturala duten esparruei kalterik ez eragiteko edo beste azpiegitura batzuekin gurutzatu ahal izateko (2.8.b baldintza).

–Toki egokirik bada, lekuz aldatuko da 400/220 kV-eko Las Labradas TAErako aurreikusia zegoen kokapena, Cierzo mendietako pinudien hegalaren hegoaldera eramanda, 400 kV-eko La Serna TAE azpiestaziotik (REE) hurbil (2.8.c baldintza).

–400/220 kV-eko Las Labradas TAEa eta 400 kV-eko La Serna TAEa (REE) lotuko dituen 400 kV-eko aireko linea lurpean joanen da (2.8.d baldintza).

Ondorioz, proiektuaren aurretiazko administrazio-baimenaren ebazpenean berariaz jasotzen zen beharrezkoa izanen zela proposatutako aldaketaren baten aurretiazko administrazio-baimena lortzea, baldin eta ez badira betetzen abenduaren 1eko 1955/2000 Errege Dekretuaren 115.2 artikuluko kasuak (1955/2000 Errege Dekretua, energia elektrikoa garraiatzeko, banatzeko, merkaturatzeko eta hornitzeko jarduerak eta instalazioak baimentzeko prozedurak arautzen dituena).

Buganvilla Solar PV SLk, 2023ko maiatzaren 12an, aurrez deskribatutako aldaketen aurretiazko administrazio-baimena eta eraikitzeko administrazio-baimena eskatu zituen, eta 2023ko maiatzaren 19an eta 2023ko ekainaren 29an zuzendu. Horretarako, honako hauek aurkeztu zituen: exekuzio-proiektua, Sektore Elektrikoari buruzko abenduaren 26ko 24/2013 Legearen 53.1 artikuluaren arabera aplikatzekoa den araudia betetzen duela egiaztatzen duen erantzukizunpeko adierazpena, eta onura publikoaren deklarazioa, 107,79 MW-eko potentzia instalatuko Serna I Solar eguzki-instalazio fotovoltaikorako eta haren ebakuazio azpiegiturarako (Corella eta Tuterako udal-mugarteetan, Nafarroan).

Espedienteari hasiera eman zitzaion Gobernuak Nafarroan duen Ordezkaritzako Industria eta Energia Arloan; abenduaren 1eko 1955/2000 Errege Dekretuaren 127., 131. eta 146. artikuluetan xedatutakoarekin bat etorriz izapidetu zen, eta kasuan kasuko txostenak eskatu zitzaizkien administrazioei, erakundeei eta zerbitzu publikoko edo interes orokorreko zerbitzuetako enpresei, instalazioak haien kargurako ondasunak eta eskubideak ukitzen dituen heinean.

Erantzuna bidali dute Nafarroako Gobernuaren Kultura Zuzendaritza Nagusiko (Vianako Printzea Erakundea) Ondare Arkitektonikoaren Atalak, Nafarroako Gobernuaren Lurralde Antolamenduko Zuzendaritza Nagusiak, Nafarroako Gobernuaren Barne Zuzendaritza Nagusiak (Babes Zibila) eta Garraioetako, Mugikortasuneko eta Hiri Agendako Ministerioaren Trenbide Sarearen Plangintza eta Ebaluazioko Zuzendaritza Nagusiak, eta erantzunetatik ez da oposiziorik ondorioztatzen. Sustatzaileari igorri zaizkio erantzun horiek, eta horiekin ados dagoela jakinarazi du.

Nafarroako Gobernuaren Herri-lanen eta Azpiegituren Zuzendaritza Nagusiaren, Trenbide-azpiegituren Administrazioaren (ADIF), I-DE Redes Eléctricas Inteligentes SAUren, Red Eléctrica de España SAUren, Enagás Transporte SAren, Solen Energía La Nava SLren, Solen Energía Valdelafuente SLren, EDP Renovables España SLUren eta Nafarroako Gobernuko Landa Garapeneko eta Ingurumeneko Departamentuko Ingurumen Zuzendaritza Nagusiaren erantzunak jaso dira; baldintza teknikoak ezartzen dira erantzun horietan, eta, dagokionean, instalazioak haien eskumeneko ondasunak eta zerbitzuak okupatu edo zeharkatu behar baditu, erakunde horiei baimena eskatzeko beharra jasotzen da. Sustatzaileari igorri zaizkio erantzun horiek, eta ados dagoela jakinarazi du.

Ombatilloko Ureztatzaileen Komunitatearen erantzuna jaso da. Lehen erantzun gisa, adierazi dute ez datozela bat proiektuarekin, haien ondasunei eragiten dielako. Zehaztu dute ureztatzeko eremua eta ureztatze-eraikuntzak erabilera publikokotzat aitortuta daudela, eta baldintza batzuk jaso dituzte, proiektua baimentzen bada ere. Sustatzaileari helarazi zaio. Erantzun du, eta adierazi du aipatutako baldintzak jasotzeko konpromisoa hartzen duela. Sustatzailearen erantzuna helarazi zaio erakundeari, eta bigarren erantzun bat eman du: berriro adierazi du ez dagoela ados, ez direlako jaso proiektuari dagozkion aldaketak. Sustatzaileak, 2024ko uztailaren 5ean, "PSF SERNA I SOLAR PV eta haren ebakuazio-azpiegiturak" proiektuaren eta Ombatilloko Ureztatzaileen Komunitatearen ureztatze-azpiegituren (17. poligonoko 5., 6., 9., 24., 26., 27. eta 57. lurzatietan, Corellan –Nafarroa–) arteko bateragarritasun-akordioa aurkeztu zuen, 2024ko uztailaren 3an Buganvilla Solar PV SLk eta Ombatilloko Ureztatzaileen Komunitateak sinatua.

Nafarroako Gobernuko Industriaren, Energiaren eta S4 Proiektu Estrategikoen Zuzendaritza Nagusiari, Ebroko Konfederazio Hidrografikoari, Corellako Udalari, Tuterako Udalari, Nafarroako Ubideko Ureztatzaileen Elkarte Orokorrari, Renovables de la Ribera SLri, Tudela Solar SLri, Enerfin Sociedad de Energía SLUri eta Autopistas de Navarra SAri galdetu zaie, eta ez da haien erantzunik jaso. Beraz, jotzen da ados daudela, adierazitako abenduaren 1eko 1955/2000 Errege Dekretuaren 127.2, 131.1 eta 146.1 artikuluetan zehaztutakoari jarraikiz.

Halaber, informazio publikoaren tramitea bete da, abenduaren 1eko 1955/2000 Errege Dekretuaren 125. eta 144. artikuluetan ezarritakoaren arabera, argitara emanez 2023ko maiatzaren 23ko Estatuko Aldizkari Ofizialean (122. Zenbakia), 2023ko maiatzaren 30eko Nafarroako Aldizkari Ofizialean (112. zenbakia) eta 2023ko ekainaren 2ko Diario de Noticias egunkarian, eta jendaurrean ikusgai edukiz udaletako ediktu-tauletan. Alegazio batzuk jaso dira, eta sustatzaileak erantzuna eman die.

Gobernuak Nafarroan duen Ordezkaritzako Industria eta Energia Arloak txostena igorri du 2023ko urriaren 9an, eta, aurrerago, dokumentuekin osatu du; halaber, Tuterako Udalaren txosten bat jaso da, garaiz kanpo, zeinean ez baitzaio aurka egiten proiektuari.

Kontuan izanik ezen, abenduaren 9ko 21/2013 Legearen 42. artikuluak ezartzen duenez, organo substantiboak behar bezala kontuan hartu duela egindako ingurumen eraginaren ebaluazioa.

Instalazioaren proiektuari eta haren ebakuazio-azpiegiturari, eta halaber ingurumen-inpaktuaren azterketari, ingurumen-inpaktuaren ebaluazioaren prozedura aplikatu zaie, eta ingurumen-inpaktuaren adierazpen aldekoa egin da, Trantsizio Ekologikorako eta Erronka Demografikorako Ministerioaren Ingurumen Kalitatearen eta Ebaluazioaren Zuzendaritza Nagusiaren 2022ko maiatzaren 31ko Ebazpenaren bidez. Ebazpen horretan, ingurumen-ebaluazioaren ondoriozko ingurumen-baldintzak ezartzen dira, prebentzio-, zuzenketa- eta konpentsazio-neurriak barne. 2022ko ekainaren 9an argitaratu zen ebazpena Estatuko Aldizkari Ofizialean (137. zenbakia).

Ingurumen-inpaktuaren adierazpenean ezarritakoaren arabera, proiektuari aplikatzekoak izanen dira ezarritako ingurumen-baldintzak eta prebentzio-, zuzenketa- eta konpentsazio-neurriak, eta, hala badagokio, ingurumen-inpaktuaren azterketan jasotako jarraipen-neurriak, jendaurreko informazioaren eta kontsulten ondotik onetsitakoak eta informazio gehigarrian proposatutakoak, ez badira ingurumen-inpaktuaren adierazpenean xedatutakoaren aurkakoak.

Proiektuaren aurretiazko administrazio-baimenaren ebazpenean xedatutakoren arabera, ingurumen-inpaktuaren adierazpenean proiektuari ezarritako baldintza guztiak bete behar badira ere, hura baita nahitaezko txosten erabakigarria, zeinak ezartzen baitu, abenduaren 9ko 21/2013 Legearen 41. artikuluarekin bat, zer baldintzatan garatzen ahal den proiektua, bai exekuzioan bai ustiapenean, proiektua definitzeko kontuan hartuko dira, bereziki eta besteak beste, ingurumen-inpaktuaren adierazpenean xedatutako baldintza eta neurri hauek, eta betetzen direla egiaztatzeko dokumentazioa aurkeztuko da:

–Ez da jarraitzailerik instalatuko %10etik gorako malda duten tokietan, ezta ibarbideen hondoan ere, ibarbide horietan ura ibil badaiteke euri asko egiten duenean edo azaleko hidromorfologia edafikoa (urtarokoa zein iraunkorra) baldin badago. Ibarbide horien hondoak panelik eta bestelako oztoporik gabe edukiko dira, landaredia belarkara naturalez estalita behar adinako zabaleran (2.2 baldintza). 220 kV-eko linea-tartea lurperatu eginen da 28. eta 30. euskarrien artean, erriberako landarediari ez eragiteko (2.8.a baldintza).

–220 kV-eko linea lurperatu eginen da 35. eta 36. euskarrien arteko tartean, 400/220 kV-eko Las Labradas TAEraino. Lurperatutako linearen oinplanoko trazadura hasiera batean proiektatutako aireko linearako aurreikusita zegoena bera izanen da. Halere, aldaketa txiki batzuk egiten ahalko dira beharrezkoa denean, landaredi naturala duten esparruei kalterik ez eragiteko edo beste azpiegitura batzuekin gurutzatu ahal izateko (2.8.b baldintza).

–Toki egokirik bada, lekuz aldatuko da 400/220 kV-eko Las Labradas TAErako aurreikusia zegoen kokapena, Cierzo mendietako pinudien hegalaren hegoaldera eramanda, 400 kV-eko La Serna TAE azpiestaziotik (REE) hurbil (2.8.c baldintza). Baldintza hori betetzeko balizko jarduketak Red Eléctrica de Españarekin koordinatuko dira, haien jabetzeko instalazioei ukipenik ez eragiteko. Hark egindako txostena ikusirik.

–400/220 kV-eko Las Labradas TAEa eta 400 kV-eko La Serna TAEa (REE) lotuko dituen 400 kV-eko aireko linea lurpean joanen da (2.8.d baldintza).

–Transformazio zentroen, azpiestazioen eta linea elektrikoen proiektuak egokitu eginen dira, trazadurak moldatuta edo bestelako neurri eraginkorren bidez, ez dadin egon etxebizitzarik, erabilera sentikorreko eraikinik edo populaziorik 5.000 V/m-tik gorako eremu elektrikoen edo 100 μT-tik gorako eremu elektrikoen eraginpean. Aipatu proiektuetan berariaz justifikatu beharko da baldintza hori betetzen dela (2.22 baldintza).

–Ingurumena zaintzeko programa osatu eta aldatu beharko da, IIADan ezarritako baldintzen arabera.

Halaber, ingurumen-inpaktuaren azterketan eta ingurumen-inpaktuaren adierazpenean ezarritako baldintza eta neurri bakoitza zehaztu eta aurrekontuan sartu beharko du sustatzaileak, proiektuan nahiz haren gehigarri batean, xehakatuta, halako eran non aipatutako ingurumen-inpaktuaren adierazpenean zehaztutako neurri bakoitza identifikatzen ahalko baita onetsi aurretik.

Proiektuaren aldaketen aurretiazko administrazio-baimena, eraikitzeko administrazio-baimena eta onura publikoaren deklarazioa lortzeko, sustatzaileak, 2023ko maiatzaren 12an aurkeztu zuen, eta geroago osatu, ingurumen-inpaktuaren adierazpenean eta aurretiazko administrazio-baimenaren ebazpenean eta aipatutako aurretiazko administrazio-baimenean ezarritako baldintzak betetzen dituela egiaztatzen duten agiriak, baita erantzukizunpeko adierazpena ere, abenduaren 26ko 24/2013 Legearen 53.4 artikuluan xedatutakoa betez.

Abenduaren 26ko 24/2013 Legearen 21.5 artikuluaren arabera, ekoizpen-instalazioak ebakuazio-azpiegiturak izanen ditu; haien artean, garraio- edo banaketa-sarearekiko konexioa eta, hala badagokio, energia elektrikoaren eraldaketa.

Ingurumen-inpaktuaren adierazpenaren eta sustatzaileak izapidetzean onartutako baldintzen arabera, ebakuazio-azpiegiturak honako jarduketa hauek aurreikusten ditu:

–30 kV-eko lurpeko 5 zirkuitu, "Serna I Solar" instalazioaren transformazio-zentroan hasi eta "Serna I" SETera (30/220 kV) doazenak.

–Serna I 30/220 kV-eko transformazio-azpiestazio elektrikoa.

–Airetiko eta lurpeko 220 kV-eko linea elektrikoa, "Serna I" SETetik (30/220 kV) "Labradas" SEra (400/220 kV).

–Labradas 400/220 kV-eko azpiestazio elektriko kolektorea.

–400 kV-eko lurpeko linea, "Labradas" SEtik (400/220 kV) LA SERNA (400 kV) SEra.

–LA SERNA 400 kV-eko azpiestazioa, Red Eléctrica de España SAUren jabetzakoa, zerbitzuan dagoena.

Abenduaren 26ko 24/2013 Legearen 53.1 artikuluaren arabera, eraikitzeko administrazio-baimenak aukera ematen dio titularrari instalazioa eraikitzeko, eskatutako baldintza teknikoak betez gero.

Sustatzaileak, 2022ko urrian eta 2023ko maiatzean, erantzukizunpeko adierazpena sinatu zuen, aplikatu beharreko araudia betetzen zuela egiaztatzen duena.

Sektore Elektrikoari buruzko abenduaren 26ko 24/2013 Legeak enpresa-ekimen askea aitortzen du energia elektrikoaren hornidurarako jardueretan aritzeko. Abenduaren 26ko 24/2013 Legearen 53.4 artikuluaren arabera, sustatzaileak egiaztatu du baduela proiektua egiteko gaitasun legal, tekniko eta ekonomiko-finantzarioa. Horretarako, Merkatuen eta Lehiaren Batzorde Nazionalak zegokion txostena egin zuen, abenduaren 1eko 1955/2000 Errege Dekretuaren 127.6 artikuluan xedatutakoa kontuan hartuta, eta 2022ko azaroaren 10eko bilkuran onetsi.

Administrazio Publikoen Administrazio Prozedura Erkideari buruzko urriaren 1eko 39/2015 Legearen 82. artikuluan ezarritakoarekin bat, zuzendaritza nagusi honen ebazpen-proposamenari buruzko entzunaldia eman zaio sustatzaileari, eta hark, erantzunean, adostasuna adierazi eta agiriak aurkeztu ditu, zeinak aztertu baitira eta, hala zegokionean, ebazpenera gehitu.

Aintzat hartuz Administrazioaren jarduera zuzendu behar duten printzipioak, prozesuaren azkartasuna eta ekonomia, alegia, bidezkoa da egintza bakar baten bidez ebaztea eskatzailearen eskaera, aipatutako jarduketari aurretiazko administrazio-baimena eta eraikitzeko administrazio-baimena emateari eta haren onura publikoa zehazki deklaratzeari buruzkoa.

Baimen horiek ematen badira ere, lurraldearen antolamenduari eta ingurumenari dagozkien eta beharrezkoak diren kontzesio eta baimenak beharko dira, bai eta aplikatzekoak diren xedapenek eragindako beste guztiak ere. Halaber, obra egiteko beharrezkoak diren gainerako baimen guztiak eskuratu beharko dira, abenduaren 26ko 24/2013 Legearen 53.6 artikuluan eta abenduaren 1eko 1955/2000 Errege Dekretuaren 120.2 artikuluan aurreikusitakoaren arabera.

Azaldutakoaren ondorioz, Energia Politikako eta Meatzeetako Zuzendaritza Nagusi honek,

EBAZTEN DU:

Lehenengoa.–Aldaketen aurretiazko administrazio-baimena ematea Buganvilla Solar PV SLri 107,79 MW-eko potentzia instalatuko Serna I Solar eguzki-instalazio fotovoltaikoaren eta haren ebakuazio-azpiegituraren proiektuari (Corella eta Tuterako udal-mugarteetan, Nafarroan), ebazpen honetan jasotzen diren baldintzetan.

Bigarrena.–Administrazio-baimena ematea Buganvilla Solar PV SLri "Serna I Solar" eguzki-instalazio fotovoltaikoa, 107,79 MW potentzia instalatukoa, eta haren ebakuazio-azpiegitura eraikitzeko; Corella eta Tutera udal-mugarteetan kokatzen dira, Nafarroan. Dokumentu hauetan definitutako ezaugarriak izanen ditu: "Serna I Solar Instalazio Fotovoltaikoaren Proiektu Tekniko Administratiboa" (107,79 MW-eko potentzia instalatukoa) eta 30 kV-eko ebakuazio-azpiegitura, 2023ko maiatzekoa; "Serna I 30/220 SET Transformazio Azpiestazioaren Proiektu Tekniko Administratiboaaren aldaketa", 2022ko urrikoa; "Airetiko eta lurpeko 220 kV-eko linea elektrikoa, Serna I (220/30 kV) SETetik Labradas (400/220 kV) SETera, egikaritzeko proiektuaren aldaketa", 2023ko maiatzekoa; "SE Labradas (400/220 kV) Transformazio Azpiestazio Kolektorearen Proiektu Tekniko Administratiboaren Proiektu Teknikoaren aldaketa", 2023ko martxokoa; "SE Labradas eta SE La Serna REE lotzeko goi-tentsioko 400 kV-eko airetiko linea, duplex zirkuitu bakunekoa, Egikaritzeko Proiektua", 2020ko urrikoa; eta "SET Labradastik SET La Serna REErako 400 kV-eko linea elektrikoa egikaritzeko proiektuaren eranskina" 2022ko urrikoa. Halaber izango ditu ebazpen honetan jasotako xehetasunak.

Proiektuaren xedea da instalazio fotovoltaiko bat eraikitzea, energia elektrikoa sortzeko eta energia hori sarera eramateko.

Hona hemen instalazio fotovoltaikoaren ezaugarri nagusiak:

–Teknologia-mota: Eguzki-energia fotovoltaikoa.

–Potentzia instalatua, ekainaren 6ko 413/2014 Errege Dekretuaren 3. artikuluaren arabera: 107,79 MW.

–Modulu-kopurua eta -mota: Bi aurpegiko 196.716 modulu, Jinko fabrikatzailearenak (edo antzekoa), Tiger Pro N-Type-78HL4-BDV modelokoak, 610 Wp-eko potentziakoak.

–Moduluen potentzia gailurra: 120,00 MWp.

–Inbertsore-kopurua eta -mota: 360 inbertsore, Huawei fabrikatzailearenak, SUN2000-330KTL-H1 modelokoak, 300 kVA-eko potentzia unitariokoak.

–Inbertsoreen potentzia, guztira: 107,79 MW.

–Sarbiderako ahalmena, Red Eléctrica de España SAUk emandako sarbide- eta konexio-baimenetan ezarritakoaren arabera: 94,20 MW.

–Euskarri-mota: finkoa/ardatz bateko jarraitzailea/bi ardatzeko jarraitzailea.

–Transformazio-zentroak: 17, 6,600 kVA-ko potentziarekin.

–Ukitutako udal-mugarteak: Corella eta Tutera (Nafarroa).

Ebakuazio-azpiegitura baimenduak honela osatuta daude:

• Lurpeko 30 kV-eko 5 zirkuitu, "Serna I Solar" instalazioko transformazio-zentroetatik "Serna I" SETera (30/220 kV).
• Kapazitatea eta/edo sekzioa: 240 mm² eta 400 mm².
• 30/220 kV-eko Serna I transformazio-azpiestazio elektrikoak, Corellan (Nafarroa), 88/110 MVAko transformadore bat du. Hona haren ezaugarri nagusiak:
  • 220 kV-eko parkea:
    • Konfigurazioa: barra bakuna.
    • Instalazioa: kanpokoa, airetik isolatua.
    • Lineako posizio bat.
  • 30 kV-eko parkea:
    • Konfigurazioa: barra bakuna.
    • Instalazioa: kanpokoa, airetik isolatua.
    • bost linea-posizio eta transformadore-posizio bat.
• 220 kV-eko airetiko eta lurpeko ebakuazio-linea elektrikoa "Serna I" (30/220 kV) transformazio-azpiestaziotik irteten da, eta "Labradas" (220/400 kV) transformazio-azpiestazio kolektorera iristen da. Hauexek dira aipatu linearen ezaugarri nagusiak:
  • Sistema: korronte alterno trifasikoa.
  • Tentsioa: 220 kV.
  • Ukitutako udal-mugarteak: Corella eta Tutera (Nafarroa).
  • Ahalmena: 120 MW.
  • Luzera: 17.738,82 m, 6 tartetan banatuta:
    • Aireko tartea, 4.493,23 metrokoa, jatorriko portikotik 16 zenbakiko euskarrira.
    • Lurpeko tartea, 284,83 metrokoa, 16 zenbakiko euskarritik 18 zenbakiko euskarrira.
    • Aireko tartea, 3299,92 m-koa, 18. euskarritik 28. euskarriraino.
    • Lurpeko tartea, 407,68 metrokoa, 28 zenbakiko euskarritik 30 zenbakiko euskarrira.
    • Aireko tartea, 1699,56 m-koa, 30. euskarritik 35. euskarriraino.
    • Lurpeko tartea, 7553,60 metrokoa, 35 zenbakiko euskarritik azken portikora
  • Airetiko tartearen ezaugarriak:
    • Maiztasuna: 50 Hz.
    • Zirkuitu-kopurua: 1. Simplexa.
    • Eroale-mota: SX LA-455.
    • Lurreko kableak: 1 x OPGW, 1 motakoa, 17 kA 15,3.
    • Euskarriak: dorre metalikoak, sareta-itxurakoak.
    • Euskarri-kopurua: 35.
    • Isolamendua: CS 120 SB 1050/6125.
    • Zimenduak: Lau bloke independentetan zatikatuak, sekzio zirkularrekoak, "elefante-hanka" motakoak.
  • Lurpeko tartearen ezaugarriak:
    • Eroale-mota: RHZ1-RA+2OL 127/220 kV 1x630 K Al + H200
    • Isolamendua: XLPE sare-polietilenoa.
    • Zirkuitu-kopurua: 1. Simplexa.
• "Labradas" (220/400 kV) transformazio-azpiestazio kolektoreak (Tuteran dago, Nafarroan) 100/120 MVA-eko transformadore bat du. Hona haren ezaugarri nagusiak:
  • 220 kV-eko parkea:
    • Konfigurazioa: barra bakuna.
    • Instalazioa: kanpoko instalazioa.
    • Lineako posizio bat.
  • 400 kV-eko parkea:
    • Konfigurazioa: barra bakuna.
    • Instalazioa: kanpoko instalazioa.
    • 2 posizio: linea-posizio bat eta transformadore-linea bat.
• Ebakuaziorako 400 kV-eko lurpeko linea elektrikoa Labradas 220/400 kV-eko transformazio-azpiestazio kolektorean hasten da eta 400 kV-eko La Serna aspieztazioraino doa. Hauexek dira aipatu linearen ezaugarri nagusiak:
  • Sistema: korronte alterno trifasikoa.
  • Tentsioa: 400 kV.
  • Maiztasuna: 50 Hz.
  • Zirkuitu-kopurua: 1. Duplexa.
  • Ahalmena: 389,20 MW.
  • Eroale-mota: RHZ1-RA+2OL 230/400 kV 1x2500 MAl + T450 Al.
  • Isolamendua: XLPE sare-polietilenoa.
  • Luzera: 479,39 m.
  • Ukitutako udal-mugartea: Tutera, Nafarroan.

Ebakuazio-azpiegituraren gainerako zatia, garraio-sarearekin lotu artekoa, dagoeneko zerbitzuan den 400 kV-eko La Serna azpiestazioa da, Red Eléctrica de España SAUren jabetzakoa.

Sustatzaileak izapidetzean onartutako baldintzak bete beharko ditu, bai eta Ingurumen Kalitatearen eta Ebaluazioaren Zuzendaritza Nagusiaren ingurumen-inpaktuaren adierazpenean ezarritako baldintzak ere.

Era berean, bete beharko ditu Sistemaren Operadoreak ezartzen dituen arau teknikoak eta jarduteko prozedurak.

Baimen hau emateak ez du ezertan ukatzen aplikatu beharreko beste xedapen batzuen arabera beharrezkoak diren bestelako kontzesio eta baimenak lortzea, eta, bereziki, lurraldearen antolamenduari eta ingurumenari dagozkionak; halaber, abenduaren 26ko 24/2013 Legearen 53.6 artikuluan eta abenduaren 1eko 1955/2000 Errege Dekretuaren 120.2 artikuluan aurreikusitakoaren arabera obra gauzatzeko behar diren gainerako baimenak ere beharko dira.

Proiektuari aldaketak aurkezteko, abenduaren 1eko 1955/2000 Errege Dekretuaren 115. artikuluan ezarritakoa aplikatuko da.

Hirugarrena. Baimentzen den instalazioa onura publikokoa dela zehazki deklaratzea, sustatzaileak aurkeztu duen ukitutako ondasun eta eskubideen zerrenda zehatz eta banakatuarekin. Zerrenda hori 2023ko maiatzaren 23an argitaratu zen Estatuko Aldizkari Ofizialean (122. zenbakia) eta 2023ko maiatzaren 30ean Nafarroako Aldizkari Ofizialean (112. zenbakia), aipatutako abenduaren 1eko 1955/2000 Errege Dekretuan aurreikusitako ondorioetarako.

Abenduaren 26ko 24/2013 Legearen 56.2 artikuluan ezarritakoarekin bat etorriz, onura publikoaren deklarazio horrek berekin dakar, zehazki, baldintza teknikoak eskatu zaizkien erakundeek dagokion baimena emateko eskubidea, instalazio elektrikoa ezartzeko, pasatzeko edo okupatzeko baimena alegia, Estatuaren edo autonomia-erkidegoen jabari, erabilera edo zerbitzu publikoko edo ondareko lurretan edo probintziaren edo udalerriaren erabilera publikoko lurretan, berekietan nahiz herri lurretan, bai eta horien obra eta zerbitzuetan eta zortasun publikoko eremuetan ere.

Administrazio Publikoen Administrazio Prozedura Erkideari buruzko urriaren 1eko 39/2015 Legearen 121. eta 122. artikuluetan eta Sektore Publikoaren Araubide Juridikoari buruzko urriaren 1eko 40/2015 Legearen 62.2.i) artikuluan xedatutakoarekin bat, ebazpen honek ez du administrazio bidea amaitzen, eta beronen kontra gora jotzeko errekurtsoa aurkezten ahalko da, Energiaren Estatuko Idazkaritzari zuzendua, ebazpena jakinarazi eta biharamunetik hasita hilabeteko epean.

Epe hori iraganik errekurtsoa jarri gabe, ebazpena irmoa izanen da ondorio guzietarako. Epeak hilabeteka zenbatzeko, urriaren 1eko 39/2015 Legearen 30. artikuluan xedatutakoa bete beharko da.

2024ko uztailaren 5a.–Manuel García Hernández, Energia Politika eta Meatzeetako zuzendari nagusia.

ERANSKINA

Eraikitzeko administrazio-baimena ematen da, abenduaren 1eko 1955/2000 Errege Dekretuan xedatutakoarekin bat eta baldintza berezi hauekin:

1. Lanak egitean, aurkeztu den proiektuarekin eta aplikatzekoak zaizkion erregelamenduzko xedapenei jarraituko zaie, eskatzen eta hala badagokio baimentzen diren aldaketekin.

2. Abenduaren 1eko 1955/2000 Errege Dekretuaren 131.10 artikuluarekin bat, ustiatzeko baimena emateko epea honako hauetako txikiena izanen da: a) hogeita lau hilabeteko epea, ebazpen hau eskatzaileari jakinarazten zaion egunetik aurrera kontatuta, edo b) proiektu honi 23/2020 Errege Lege Dekretuaren 1. artikuluan ustiapen-baimena lortzeko ezarritako aldia aplikatzearen ondoriozko epea (23/2020 Errege Lege Dekretua, ekainaren 23koa, Energiaren arloko eta ekonomia suspertzeko beste eremu batzuetako neurriak onartzen dituena).

Sustatzaileak, eraikitzeko administrazio-baimena lortu eta gehienez ere hiru hilabeteko epean, epea luzatzea eskatzen ahalko du, ekainaren 23ko 23/2020 Errege Lege Dekretuaren 1.1.b) 5 artikuluan jasotako mugarria betetzeko, honako hauek adierazita, gutxienez: (i) instalazioak ustiatzeko administrazio-baimena lortuko duen urte naturalaren seihilekoa eta (ii) behin-behineko edo behin betiko ustiatzeko administrazio-baimena lortzeko ezintasuna espresuki onartzeko konpromisoa, bai eta energia elektrikoa ekoizteko instalazioen administrazio-erregistroan adierazitako seihilekoa hasi baino lehen aldez aurretik edo behin betiko inskribatzeko ezintasuna ere.

Ukrainako eta Ekialde Hurbileko gatazken ondorio ekonomiko eta sozialei aurre egiteko eta lehortearen ondorioak arintzeko neurriak hartzen dituen abenduaren 27ko 8/2023 Errege Lege Dekretuaren 28. artikuluaren arabera, ustiatzeko administrazio-baimena izateko epea ez da inoiz zortzi urtetik gorakoa izanen.

3. Instalazio horren titularrak lanen amaieraren berri eman beharko dio probintziako organo eskudunari, ustiapen-baimena behin betikoz onartu eta zabaltzeko, abenduaren 1eko 1955/2000 Errege Dekretuaren 132. artikuluaren arabera.

4. Sustatzaileak ingurumen-inpaktuaren adierazpenean ezarritako baldintza guztiak bete beharko ditu, Trantsizio Ekologikorako eta Erronka Demografikorako Ministerioaren Ingurumen Kalitatearen eta Ebaluazioaren Zuzendaritza Nagusiaren 2022ko maiatzaren 31ko Ebazpenaren bidez ezarri bezala. Izan ere, nahitaezkoa eta erabakigarria da txosten hori, zeinak ezartzen baitu, abenduaren 9ko 21/2013 Legearen 41. artikuluaren arabera, zer baldintzatan garatu daitekeen proiektua hura exekutatzeko eta ustiatzeko garaian eta, bereziki, obrek dirauten bitartean:

–Instalazioa lurraren berezko topografiara egokituko da, eta behar-beharrezkoak ez diren lur-mugimenduak kenduko dira. Eraikuntza-fasean, sastrakak kendu eta nibelatzeko lanak panelen berme-lerroan eta bide, kanalizazio eta transformazio-zentroetan baino ez dira eginen. Haitzen azaleratzeak errespetatuko dira, eta ez da eguzki-plakarik jarriko haietan. Jarraitzaileak zuzenean tinkatuko dira, hormigoi armaturik jarri gabe ainguraketan. 2.1 baldintza.

–Bilketarako, mailegutarako, zabortegitarako, lurrak metatzeko eta antzekoetarako eremuak laborantzako lurren gainean jarriko dira, inola ere ez landaredi naturaleko eremuetan. Makineria uzteko, materialak biltzeko eta kutsagarriak izan daitezkeen elementuak dituzten gainerako gainazal osagarriak inpermeabilizatu eginen dira, eta isuririk gertatuz gero isuria erabat jasotzeko eta kudeatzeko aukera ematen duten elementuak izan beharko dituzte. Obrako instalazioetan ez da eginen makineriaren mantentze-lanik. 2.3 baldintza.

–Eraikuntza- eta eraispen-faseetan, ez da biltegirik, instalaziorik eta gainazal osagarririk jarriko Europar Batasunaren intereseko habitatak edo landaredia naturala duten eremuetan. Europar Batasunaren intereseko habitatak edo zuhaitzak dituzten gainazal guztiak balizatu eginen dira, eta ez da jarduketarik eginen haietan. 2.6 baldintza.

–«La Sarda» eta «Agua Salada, Montes del Cierzo y Plana de Santa Ana» estepako abifauna kontserbatzeko gune garrantzitsuetan linea elektrikoa lurperatzeko lanak apirila eta uztaila bitarteko hilabeteetatik kanpo (biak barne) egin beharko dira. 2.8.e baldintza.

–El Sasillo sakanak balio ekologikoa du, Agua Salada idoiaren, Valdelafuente sakanaren eta Ebro ibaiaren arteko huste- eta komunikazio-ibilgu naturala baita; horrenbestez, haren jarraitutasun ekologikoa ziurtatu beharko da obrak egin bitartean eta gero ere, eta berezko landaredia naturala eta orain dagoen topografia errespetatu. 2.9 baldintza.

–Lanak egin bitartean espezie mehatxaturen bat badela detektatzen bada erasana gerta litekeena, berehala jakinaraziko zaio hori Biodibertsitatearen Zerbitzuari, egoki diren babes-neurriak xeda ditzan. 2.11 baldintza.

–Eraikuntza-fasean, debekatua izanen da edozein lan gauez egitea. 2.12 baldintza.

–Kontrol arkeologiko bat eginen da proiektuaren eraikuntzak eragindako eremuetan, Nafarroako Ondare Historikoaren Zerbitzuak zehazten duen baldintzetan. Balio kulturaleko aztarnarik aurkituz gero, lanak geraraziko dira, eta zerbitzu horri jakinaraziko zaio. 2.17 baldintza.

5. Ingurumenaren Kalitatearen eta Ebaluazioaren Zuzendaritza Nagusiaren ingurumen-inpaktuaren adierazpenak, halaber, baldintza espezifiko batzuk ezartzen ditu, ustiapen-baimena lortu aurretik bete beharrekoak, eta baldintza horiek betetzen direla jakinarazi beharko zaio probintziako organo eskudunari, eskatzaileak zehaztutako eta aurrekontuan sartutako neurriak proiektu batean edo haren eranskin batean aurkeztu ondotik.

6. Eraikitzeko administrazio-baimenak ez du inola ere instalazioaren titularra salbuesten instalazioek behar dituzten gainerako baimen osagarriak lortzetik; besteak beste, lortu beharko ditu industria segurtasunaren arloko legeriak, sistema laguntzaileei dagokienez, haiek instalatu edo abian jarri aurretik, eskatzen dituen baimenak, autonomia-erkidegoen eskumenekoak, edo, bestela, kontrolerako beste formalitate guztiak bete beharko ditu.

7. Ustiatzeko baimena lortzeko, egiaztatu beharko da sarbide- eta konexio-baimenak eguneratu direla, ukitutako udal-mugarteen baldintzen arabera.

8. Administrazioak ondoriorik gabe utziko du ebazpen hau baldin eta ikusten bada, denboraren joanean, ebazpenean ezartzen diren eskubideen titularrak ez dituela betetzen hemen ezarritako baldintzak eta betekizunak. Kasu horietan, Administrazioak, behar den espedientea bideratu ondotik, interesdunari entzunaldia emanda, erabakiko du kasuko baimena baliogabetzea, horrek dakartzan ondorio administratibo eta zibil guztiekin, indarreko lege-xedapenekin eta abenduaren 26ko 24/2013 Legearen 53.10 artikuluan aurreikusitakoarekin bat etorriz.

9. Instalazioaren titularrak kontuan hartuko ditu, hura egiteko, erakundeek ezarri dituzten baldintzak, zeinak jakinarazi baitzaizkio eta berak berariaz onartu baititu.

Iragarkiaren kodea: E2410861