1. NAFARROAKO FORU KOMUNITATEA
1.7. BESTELAKOAK
127/2024 EBAZPENA, ekainaren 27koa, Aurrekontuen eta Ondarearen zuzendari nagusiak emana, bukaera ematen diona Jorge Ramón Sarasa Juanto jaunaren oinordekotza prozedurari (GP 2023016) Nafarroako Foru Komunitatea abintestato jaraunsle deklaratu gabe.
Iruñeko Lehen Auzialdiko 6. Epaitegiko Justizia Administrazioaren letraduaren 2023ko urtarrilaren 18ko antolaketa-eginbidearen bidez, Ondare Zerbitzuari jakinarazi zitzaion 13.934,26 euroko soberakin bat zegoela, Jorge Ramón Sarasa Juanto jaunaren jaraunspen jasogabean titulu judizialen betearazpen batetik zetorrena (262/2017 prozedura-zenbakia).
Aurrekontuen, Ondarearen eta Politika Ekonomikoaren zuzendari nagusiak uztailaren 24an emandako 181/2023 Ebazpenaren bidez, hasiera eman zitzaion Nafarroako Foru Komunitatea Jorge Ramón Sarasa Juanto jaunaren abintestato jaraunsle (GP 2022182) deklaratzeko prozedurari.
Nafarroako Ondareari buruzko apirilaren 4ko 14/2007 Foru Legeak 24.5 artikuluan xedatzen duenez, Nafarroako Foru Komunitatearen aldeko legezko oinordetza eginen da lege horrexetan, Nafarroako Foru Zuzenbide Zibilaren arauetan eta aplikatzekoak diren arau osagarri edo erregelamenduzkoetan ezarritakoari jarraikiz.
Bestalde, Nafarroako Foru Zuzenbide Zibilari buruzko Konpilazioaren edo Nafarroako Foru Berriaren 300. Legeak ezartzen du legezko oinordetzara joko dela baldin eta jarauntsi osoa edo zati bat xedatzen ez bada testamentu bidez, oinordetza-itun baten bidez edo, konpilazio horrekin bat etorrita, oinordetza gauzatzeko baliozko beste modu baten bidez.
Foru Berriaren 304. Legeak, aipatu jauna hil zen egunean, 2008ko irailaren 2an, indarrean zegoen idazketan, ondasun ez-tronkalen ondasunen legezko oinordetzaren hurrenkera ezartzen du, eta 1. zenbakitik 6.era bitarteko zenbakietan bata bestearen atzetik egin beharreko deiak finkatzen ditu, eta 7. zenbakian dio ezen, aurreko zenbakietan adierazitako ahaiderik izan ezean, Nafarroako Foru Komunitatea izanen dela oinordekoa, eta jarauntsia banatuko duela ongintzako, hezkuntzako, ekintza sozialeko edo lanbide erakundeen artean, Nafarroako Komunitateko eta udal mailakoen artean erdi bana. Era berean, Foru Berriaren 307. Legean zehazten da zein ahaideri deituko zaien ondasun tronkalen oinordeko izateko, eta, azken paragrafoan ezartzen denez, "halako ahaiderik izan ezean, oinordetza gauzatuko da 304. Legearekin bat etorriz". Heriotza-egunean aplikagarria den araudi horren arabera, kasu honetan seigarren mailara bitarteko odol ahaideak izan daitezke jaraunsle.
Jorge Ramón Sarasa Juanto jauna Iruñean jaio zen, 1936ko apirilaren 20an, eta Iruñean hil zen, 2008ko irailaren 2an.
Hona hemen orain arte identifikatu diren eta zenduari egozten zaizkion ondasunak (alde batera utzi gabe hemendik aurrera ager litezkeenak):
–13.934,26 euroko soberakina, titulu judizialen betearazpen batetik datorrena (262/2017 prozedura-zenbakia), Iruñeko Lehen Auzialdiko 6. Epaitegian.
–Bankuko lau kontu, guztira, 2.228,98 euroko saldoa egiten dutenak 2011ko abenduaren 31n.
Espedientean jasota daude heriotza-ziurtagiriak, kausatzailearen azken nahietako egintzen erregistroaren agiriak eta heriotza aseguruen kontratuenak.
Beharrezko ikerketak egin ondoren, ezin izan da egiaztatu Nafarroako Foru Komunitatearena baino eskubide hobea duen legezko jaraunslerik ez dagoenik. Beraz, bidezko da prozedurari bukaera ematea Nafarroako Foru Komunitatea Jorge Ramón Sarasa Juanto jaunaren abintestato jaraunsle deklaratu gabe.
Horrenbestez, Nafarroako Ondareari buruzko apirilaren 4ko 14/2007 Foru Legearen 24.5 artikuluak emandako ahalmenen ondorioz eta Ekonomia eta Ogasun Departamentuaren egitura organikoa ezartzen duen urriaren 30eko 243/2023 Foru Dekretuaren 19. artikuluaren bidez esleitu didaten eskumena erabiliz,
EBAZTEN DUT:
1. Prozedurari bukaera ematea Nafarroako Foru Komunitatea Jorge Ramón Sarasa Juanto jaunaren abintestato jaraunsle deklaratu gabe.
2. Ebazpen hau Estatuko Aldizkari Ofizialean eta Nafarroako Aldizkari Ofizialean argitara dadila agintzea, eta Iruñeko Udalera igortzea bertako iragarki taulan ikusgai jar dadin hilabetez, Nafarroako Ondareari buruzko apirilaren 4ko 14/2007 Legearen 24. artikuluko 6. apartatuan aurreikusitakoarekin bat.
3. Ebazpen hau igortzea Ekonomia eta Ogasun Departamentuko Kontabilitate Orokorraren Atalera eta Ondare Zerbitzura (Ondarearen Kudeaketa Juridikoaren Atala eta Administrazio Aferetarako Bulegoa) eta departamentu horretan Ekonomia eta Ogasun Departamentuak duen kontu-hartzailetza delegatura.
Eskumenen eta prozeduraren gaineko arauak urratuz gero, ebazpen honen kontra gora jotzeko errekurtsoa jartzen ahalko da, Ekonomia eta Ogasuneko kontseilariari zuzendua, hilabeteko epean, bat etorriz Nafarroako Foru Komunitateko Administrazioari eta foru-sektore publiko instituzionalari buruzko martxoaren 11ko 11/2019 Foru Legearen 126.1.b) artikuluan eta Administrazio Publikoen Administrazio Prozedura Erkideari buruzko urriaren 1eko 39/2015 Legearen 121. eta 122. artikuluetan xedatutakoarekin, betiere administrazioarekiko auzi-errekurtsoa jarri baino lehen.
Eskumenen eta prozeduraren gaineko arauen urraketa kasuetatik aparte, Nafarroako Ondareari buruzko apirilaren 4ko 14/2007 Foru Legearen 24.6 artikuluak adierazten duenez, administrazioa abintestato jaraunsle deklaratzeak edo haren alde ondasunak adjudikatu izanak beren jaraunspenerako eskubidea edo beste eskubide zibil batzuk kaltetu dituela uste dutenak dagozkion ekintzez baliatzen ahalko dira organo jurisdikzional zibiletan.
Iruñean, 2024ko ekainaren 27an.–Aurrekontuen eta Ondarearen zuzendari nagusia, Maite Domínguez Muguiro.
Iragarkiaren kodea: F2410513
