99. ALDIZKARIA - 2023ko maiatzaren 11

1. NAFARROAKO FORU KOMUNITATEA

1.7. BESTELAKOAK

768/2023 Ebazpena, 2023ko apirilaren 25ekoa, Nafarroako Unibertsitate Publikoko errektoreak emana. Haren bidez agintzen da argitaratzeko "Erabakia, Nafarroako Unibertsitate Publikoko Ezagutzan Oinarritutako Entitateei buruzko Erregelamendua onesten duena", Gobernu Kontseiluak 2023ko apirilaren 25ean hartutako erabaki baten bidez onetsia.

2003ko maiatzaren 12ko 110/2003 Foru Dekretuak onetsitako Unibertsitateko Estatutuetako 40. artikuluak ematen dizkidan eskumenak erabiliz, agintzen dut argitaratzeko Gobernu Kontseiluak 2023ko apirilaren 25ean hartutako erabakia, Nafarroako Unibertsitate Publikoko Ezagutzan Oinarritutako Entitateei buruzko Erregelamendua onesten duena.

"GOBERNU KONTSEILUAREN ERABAKIA, EZAGUTZAN OINARRITUTAKO NAFARROAKO UNIBERTSITATE PUBLIKOKO ENTITATEEN ERREGELAMENDUA ONESTEN DUENA

Ezagutzan Oinarritutako Entitatea (aurrerantzean, EOE) honako helburu sozial hau duen entitatea da: ikerketa, garapena eta berrikuntza, kontzeptu-probak egitea, zerbitzu teknikoak ematea, jabetza industrialeko eta intelektualeko eskubideak ustiatzea eta lagatzea, eta Zientziako, Teknologiako eta Berrikuntzako Espainiako Sistemako eragile publikoen berrikuntzak eta emaitzak erabiltzea eta aprobetxatzea. Entitate horiek ezagutzaren transferentziaren eragile nagusiak dira, teknologia-sarea eta garapen ekonomikoa sustatzen dituzte, kualifikazio handiko enplegua sortzen laguntzen dute, industria-inguruneari balio erantsi handia ematen diote eta gazteak lan-munduan sartu daitezen laguntzen dute.

EBCek nagusiki unibertsitateak, ikerketa-institutuak edo ikerketa-zentroak garatzen dituzte, eta horrek ikertzaileei aukera gehiago ematen dizkie beren ekintzailetza-proiektuak enpresa bihurtzeko.

Unibertsitate Sistemaren Lege Organikoak, ikerketari eta ezagutzaren eta berrikuntzaren transferentziari eta trukeari buruzko IV. Tituluaren 13. artikuluan, administrazio publikoei agintzen die ezagutzan oinarritutako entitateak edo enpresak sortzeko politikak sustatu ditzaten. III. kapituluan 61. artikuluak jasotzen du unibertsitateek aukera dutela ezagutzan oinarritutako entitateak edo enpresak sortzeko edo horietan parte hartzeko, unibertsitateko langile jakin batzuei baimena ematen zaiela entitatea horietan sartzeko aldi baterako eszedentzia hartzeko, eta aukera dagoela bateraezintasunen araudia partzialki ez aplikatzeko. IV. kapituluko 66. artikulua irakasle eta ikertzaileen mugikortasunari buruzkoa da, ezagutzan oinarritutako entitate edo enpresetako mugikortasuna barne.

Halaber, 2011ko martxoaren 4ko 2/2011 Ekonomia Iraunkorraren Legeko II. tituluko V. kapituluko 3. atala ikerketa-jarduerako emaitzak transferitzeari buruzkoa da, eta, zehazki, 64. artikuluan aipatzen du unibertsitateek zilegi dutela oinarri teknologikoa duten berrikuntza-enpresak sortzeko.

Azkenik, 14/2011 Legeak, 2011ko ekainaren 1ekoak, Zientzia, Teknologia eta Berrikuntzari buruzkoak (2022ko irailaren 5eko 17/2022 Legeak aldatua), III. tituluan arreta berezia ematen dio berrikuntza eta ezagutzaren transferentzia bultzatzeari. Hala, 33. artikuluan, gauzatu beharreko neurrietako bat "ezagutzan oinarritutako entitate berriak sor daitezela sustatzea" dela dio. Bestalde, 35 bis artikuluak, ezagutzaren balorizazioari eta transferentziari buruzkoak, "ezagutzak, gaitasunak eta teknologia transferitzeko mekanismoak" ezartzeari buruz hitz egiten du, eta bereziki interesgarritzat jotzen du "ezagutzan oinarritutako entitateak sortzea eta haiei laguntzea". 36 quater artikuluak dioenez, unibertsitate publikoen kasuan, ezagutzan oinarritutako entitateak sortzeko edo horietan parte hartzeko prozedura aplikatzekoa den unibertsitate legedian xedatutakoaren arabera arautuko da.

Administrazio Publikoari dagokionez, eta, bereziki, unibertsitate publikoetan lan egiten duten karrerako funtzionario edo lan kontratudun langile finkoei dagokienez, 17. artikuluak I+G+b-ko eragile pribatuetan eta ezagutzan oinarritutako entitateetan sartzeko helburuz eszedentziak baliatzeko aukera jasotzen du. Era berean, 18. artikuluak merkataritza-sozietateetan lanaldi partzialeko eta iraupen mugatuko zerbitzuak emateko baimena arautzen du, hala nola ezagutzan oinarritutako entitateak, bai eta bateraezintasunen araudia partzialki ez aplikatzeko baimena ere.

Espiritu hari jarraikiz, Nafarroako Unibertsitate Publikoko Estatutuek hau ezartzen dute 66. artikuluan: "Unibertsitateak egiten duen ikerketaren emaitzen balioztatzea sustatuko du, eta, bereziki, ikerketa-jarduerari esker eratutako enpresak sortzea edo haietan parte hartzea bultzatuko du". Horrez gain, artikulu berean, jarduera hori arautzen duen araudi bat Gobernu Kontseiluan onesteko agindua ematen du.

Hori guztia oinarri hartuta, 2012an Nafarroako Unibertsitate Publikoaren Oinarri Teknologikoko Enpresen Erregelamendua egin zen, Gobernu Kontseiluak 2012ko uztailaren 4an hartutako erabaki baten bidez onetsia, helburu hauekin: Nafarroako Unibertsitate Publikoko OTEak bideragarriak izatea eta irautea, bertako langileen partaidetza arautzea eta sortutako enpresaren kapitalean Unibertsitateak parte hartzeko baldintzak ezartzea eta hark instalazio eta zerbitzuetarako duen sarbidea arautzea. Duela gutxi garatu den erregulazio eta araudi berria dela eta, beharrezkoa da beste erregelamendu bat onestea, Ezagutzan Oinarritutako Entitateen izen berria eta 10 urte baino gehiagoko aplikazio praktikoaren ondoren ikusitako funtzionamendu-kontu batzuk jasoko dituena.

Horregatik guztiagatik, Garapen Digitaleko errektoreordeak proposatuta, honako hau da Gobernu Kontseiluak, bere kideek aldez aurretik eztabaida egin eta gero, 2023ko apirilaren 25ean egindako bileran hartu duen,

ERABAKIA:

Lehenbizikoa.–Ezagutzan Oinarritutako Entitateei buruzko Nafarroako Unibertsitate Publikoaren erregelamendu hau onestea.

Bigarrena.–Erregelamendu hau Nafarroako Unibertsitate Publikoaren iragarki ohol elektronikoan eta Nafarroako Aldizkari Ofizialean argitaratzea.

Hirugarrena.–Erregelamendu honen aurka, zilegi da administrazioarekiko auzi-errekurtsoa jartzea Nafarroako Justizia Auzitegi Nagusiko administrazioarekiko auzien epaitegietan, bi hilabeteko epean, Erabakia Nafarroako Aldizkari Ofizialean argitaratu eta biharamunetik kontatzen hasita, Unibertsitate Sistemari buruzko 2023ko martxoaren 22ko 2/2023 Lege Organikoaren 38.4 artikuluan eta Nafarroako Unibertsitate Publikoaren Estatutuetako 144.1 artikuluan xedatutakoarekin bat etorriz."

Iruñean, 2023ko apirilaren 25ean.–Errektorea, Ramón Gonzalo García.

NAFARROAKO UNIBERTSITATE PUBLIKOKO EZAGUTZAN OINARRITUTAKO ENTITATEEI BURUZKO ERREGELAMENDUA

1. artikulua. Nafarroako Unibertsitate Publikoko ezagutzan oinarritutako entitateen definizioa eta betebeharrak.

1. Nafarroako Unibertsitate Publikoko ezagutzan oinarritutako entitatetzat (aurrerantzean EOE) edo "spin-off"tzat hartuko da honako baldintza hauek betetzen dituen erakunde oro:

a) Jatorria Nafarroako Unibertsitate Publikoaren ikerketa-jardueran izatea, hau da, Unibertsitatearen barnean bere azpiegitura eta baliabideak erabiliz sortutako ikerketan, sorkuntzan eta ezagutzan.

b) Enpresa-ekimena ikerketaren emaitzen ustiapenean oinarrituta egotea, eta merkatuari ekarpena egitea, hala nola ondasunak edo zerbitzuak, aurrerapen teknologikoak eta ezagutza berriak.

c) Haren sustapenean eta sorreran Nafarroako Unibertsitate Publikoko edo administrazio publikoetako irakasle eta ikertzaileek eta teknikari, kudeaketari eta administrazioko eta zerbitzuetako langileek parte hartzea, edota kontratu bidez Unibertsitateari lotutako beste edozein langilek.

2. NUPeko EOE-ek edo "spin-off"ek lankidetza-hitzarmen bat sinatu beharko dute Nafarroako Unibertsitate Publikoarekin, ustiatu beharreko ikerketaren emaitza transferitzeko kontratua zehazteko. Enpresak Nafarroako Unibertsitate Publikoaren partaidetza badu, bazkide itun bat sinatu beharko du.

3. Unibertsitateak ezagutzan oinarritutako entitatearen izaera egiaztatuko du, bere gobernu organoen bitartez, araudi honi eta aplikatzekoak diren gainerako arauei jarraikiz. Era berean, "Nafarroako Unibertsitate Publikoaren spin-off" marka emanen dio. Aipatutako lankidetza-hitzarmenean arautuko da nola erabiliko duen enpresak marka hori.

2. artikulua. Nafarroako Unibertsitate Publikoko EOE-en Batzordea.

1. Nafarroako Unibertsitate Publikoko EOE-en Batzordea arduratuko da EOEak sortzeko proposamenak baloratzeaz, 3. artikuluan zehaztutako prozeduraren arabera.

2. Hauek izanen dira EOE-en Batzordeko kideak: errektorea, edo hark eskuordetzen duen errektoreordea, zeina batzordeburua izanen baita; ekintzailetzarekin edo ezagutzaren transferentziarekin lotutako arloko zuzendaria, zena idazkari arituko baita; Ikerketa Batzordeak bere kideen artean izendatutako pertsona bat; eta Gizarte Kontseiluak bere kideen artean izendatutako pertsona bat. Gainera, errektoreak Nafarroako Unibertsitate Publikoarekin lankidetzan aritu ohi diren eta enpresen sustapenarekin zerikusia duten erakundeetako hiru kide izendatzen ahalko ditu gehienez.

Era berean, Batzordearen bileretara gonbidatu gisa joaten ahalko dira Zerbitzu Juridikoko Adar Juridikoko teknikari bat eta Ikerketa Zerbitzuko teknikari bat, hitzarekin baina botorik gabe.

3. artikulua. EOEak sortzeko prozedura.

1. Unibertsitateko ekintzaileek EOE bat sortzeko proposamena egin nahi izanez gero, Ikerketa Zerbitzuan aurkeztuko dute, emandako ereduaren arabera. Dokumentu horretan, alderdi hauei buruzko gutxieneko informazioa jasoko da:

1.1. Talde ekintzailearen osaera, Unibertsitatearekin duen harremana, Unibertsitatearen spinn-off aitorpena lortuko duen enpresa bat eratzeko borondatea, sozietate mota eta sustatzaileek entitate berrian duten parte-hartzeari eragin diezaioketen legezko gai guztiak.

1.2. Enpresa sortzeko oinarri diren ikerketa-emaitzak.

1.3. Enpresa-plana edo EOEaren bideragarritasun teknikoa nahiz ekonomiko-finantzarioa ebaluatzeko bidea emanen duen dokumentua.

1.4. EOEaren eta Unibertsitatearen arteko lankidetzen proposamena. Lankidetza horiek era hauetakoak izaten ahalko dira: EOEaren kapitalean parte hartzea, sustapen baliabideak (inkubagailuak) eskura jartzea, Unibertsitateko baliabideak erabiltzeko proposatzea, LOSUren 60. artikuluan oinarritutako kontratuak (modalitate guztietan), lankidetzako ikerketa-proiektuak, doktoretza industrialak, ikasketen amaierako lanak, doktoretza-tesiak, enpresako praktikak, irteera profesional berriak garatzea edo Unibertsitatearen eta enpresaren arteko sinergia errazten duen beste edozein ekintza.

2. Ikerketa Zerbitzuak txosten bat eginen du proposamenari buruz, goiko 1.2 puntuaren ondoriozko gaiei eta sustatzaileek ikerketaren emaitzetan duten parte-hartzeari buruzkoa batik bat. Txosten hori errektoreorde eskudunari bidaliko zaio, proposamenarekin eta talde sustatzaileak aurkeztutako dokumentazioarekin batera.

3. Errektoreorde eskudunak, hala badagokio, eskaera tramitera onartu, eta EOE-en Batzorderako deialdia eginen du. Ebazpen hori sustatzaileei helaraziko zaie. Eskaera tramitera onartu ezean, interesdunek bederatzigarren apartatuan aipatzen den errekurtsoa jartzen ahalko dute.

4. Batzordea bilduta, talde ekintzailearen proposamena aztertuko du, eta zilegi izanen du eskatzaileei dokumentu gehiago aurkez ditzatela eta behar bezala garatuta ez dauden alderdiak argitu ditzatela eskatzeko. Batzordeak egoki baderitzo, sustatzaileak bilera batera gonbidatzen ahalko ditu, eta, bertan, beren proiektua aurkeztuko dute eta batzordekideek galderak eginen dizkiete.

5. Batzordearen ebaluazioaren emaitza honelakoa izan daiteke: i) ebaluazio positiboa, Unibertsitateari baimena emanen diona lankidetza-hitzarmena eta, hala badagokio, Unibertsitateak enpresan parte hartzeko sistema idazteko; ii) proposamenean aldaketak egiteko eskaera, zeinaren ondorioz Batzordeari berriz ere aurkeztu beharko baitzaio proposamena; iii) ebaluazio negatiboa.

6. Ebaluazioa positiboa bada, lankidetza-hitzarmena eta, hala badagokio, bazkide ituna idatzi ondoren, behin betiko proposamena Unibertsitateko Gobernu Kontseiluari igorriko zaio, onespena eman diezaion entitatea Nafarroako Unibertsitate Publikoko EOE gisa aitortzeari, bidezkoa bada. Aitorpen akordioan, enpresan parte hartzen duten irakasleen bateragarritasun adierazpena jasoko da.

7. Ebaluazioa eginda proposamenak aldaketarik behar badu, talde ekintzaileak aukera izanen du aldaketak egin eta aldatutako proposamena Ikerketa Zerbitzuan aurkezteko, eta Batzordeak berriz baloratuko du. Aldatutako proposamen horrek ebaluazio positiboa lortu beharko du 6. apartatuan adierazitako prozedurari jarraitu ahal izateko.

8. Ebaluazioa negatiboa bada, errektoreorde eskudunaren ebazpen bidez, ezetsi eginen da entitatea EOE gisa aitortzeko eskaera. Kasu horretan, talde ekintzaileak ezin izanen du EOE bat sortzeko proposamen berri bat Ikerketa Zerbitzuan aurkeztu Batzordea bildu zenetik urtebete igaro arte. Batzordeak egindako ebaluazioaren aurka ezin izanen da errekurtsorik jarri. Hala ere, interesdunek zalantzan jartzen ahalko dute egin zaien ebaluazioa, errekurtso bat aurkeztuz entitatea EOE gisa aitortzeko eskaera ezetsi duen errektoreordearen ebazpenaren aurka.

9. Errektoreorde eskudunak hartutako ebazpen guztiak errektoreak eskuordetuta egindakotzat joko dira, eta, ondorioz, administrazio bidea agortzen dute. Ebazpen horien aurka, interesdunek zilegi izanen dute berraztertzeko errekurtsoa aurkeztea Unibertsitateko errektoreari zuzendua, hilabeteko epean.

10. Ekonomia Gaietarako Zerbitzuak eta Zerbitzu Juridikoak espedienteari buruzko txosten bat egin beharko dute, eta Ikuskaritza eta Kontu-hartzailetza Zerbitzuak espedientea fiskalizatuko du.

11. Batzordeak proposatzen badu Unibertsitateak talde sustatzailearekin batera sozietatearen sorreran eta/edo kapital sozialean parte hartzea, Gizarte Kontseiluak onetsi beharko du, Gobernu Kontseiluak proposatuta.

12. Baldin eta EOE bat aitortzeko eskaera aurkeztu ondoren, eta Unibertsitateko Gobernu Kontseiluak erabakia hartu aurretik, talde sustatzaileak premiazkoa balu sozietatearen eraketa formalizatzea bideragarritasun ekonomikoagatik, bazkide inbertitzaileak erakartzeagatik, laguntzen deialdietan parte hartzeagatik eta abarrengatik, horren berri eman beharko dio errektoreorde eskudunari.

4. artikulua. Unibertsitateak EOE-etan parte hartzea eta ekarpena egitea.

1. Unibertsitateak honako modalitate hauetako baten edo batzuen bidez hartzen ahalko du parte ezagutzan oinarritutako entitateen kapitalean:

a) Zuzenean, edo enpresen bidez –baldin eta haietan portzentaje handiena badu–, EOEaren kapital sozialean, dagokion diru ekarpenaren bidez.

Behar bezala justifikatutako kasuetan izan ezik, Unibertsitateak kapitalean duen partaidetza gutxienekoa izanen da: %5ekoa kapitalean sartzen den unean. Diluzio kasuetan, parte-hartzearen ehuneko hori ez da inoiz %2tik behera jaitsiko. Behar bezala justifikatutako kasuetan izan ezik, partaidetza aldi baterakoa izanen da: gutxienez 5 urtez eta gehienez 10 urtez hartzen ahalko da parte kapitalean.

b) Salbuespenezko kasuetan, kapitalean parte hartzeko, aurrez ebaluatutako ondasun, eskubide edo zerbitzuak jenerotan ematen ahalko dira.

2. Unibertsitateak EOE-en jardueretan laguntzen ahalko du, modalitate hauetakoren baten bidez:

a) Ikerketetako emaitzak ustiatzeko eskubideak lagaz, lizentzia-kontratuen bidez.

b) Baimena emanez Unibertsitateko zerbitzuak eta espazioak erabiltzeko, horiek arautzen dituzten arauei jarraikiz, bai eta sortzen diren enpresei laguntzeko unibertsitate zerbitzuak erabiltzeko ere.

c) EOE-ei eskainitako zerbitzu eta espazioen erabilgarritasuna eta erabilera haiek onartzeko unean zehaztuko dira, edo akordio espezifiko baten bidez. Akordio horretan, aldeen eskubide eta betebeharrei buruzko alderdiak zehaztuko dira, eta honako hauek jasoko dira: haien kokapena, esleitutako zerbitzu eta lokalak, EOEak ordaindu beharreko kontraprestazio ekonomikoa eta erabileraren iraupena.

d) Enpresak eta Unibertsitateak sinatutako hitzarmenean EOE-ei laguntzeko zehazten den beste edozein ekarpen.

3. Unibertsitateak EOE-etan parte hartzeko partida bat gehitzen ahalko du bere urteko aurrekontuan. Unibertsitatearen ekarpenak bere sozietate, fundazio edo erakunderen batetik jasotako diru kopuruak ere izan daitezke. Unibertsitateari lotutako langileek EOE baten kapital sozialari egindako ekarpenak ez dira inola ere ekarpen unibertsitariotzat hartuko.

4. Unibertsitatearen partaidetzen kapital sozialaren aldaketak, kapitala handitu, murriztu edo partaidetzak nahiz akzio sozialak erosi edo saltzearen ondoriozkoak, Gizarte Kontseiluak onetsi beharko ditu, Gobernu Kontseiluak proposatuta.

Ez da beharrezkoa izanen kapital sozialaren aldaketa onestea baldin eta aldaketa hori artikulu honen 1.a) paragrafoan aipatutako ehunekoen barnean badago –%2 eta %5 artean– eta hasierako akordioan hala aurreikusi bada.

5. Gizarte Kontseiluak EOE-en urteko kontuak onetsi beharko ditu baldin eta kapital sozialaren parterik handiena Unibertsitatearena bada. Onespena Unibertsitatearen epe berberetan eginen da, kalterik egin gabe merkataritza-legeriari edo entitate horiek beren nortasun juridikoaren arabera izan dezaketen bestelako legeei. Hori guztia, kalterik egin gabe EOE-ek unibertsitateen epe eta prozedura beretan kontuak emateko duten betebeharrari.

6. Unibertsitateak EOE batean parte hartzeak berekin ekar dezake Unibertsitateak eskubidea izatea EOEaren administrazio organoan ordezkari kopuru jakin bat izendatzeko, kapital sozialean duen partaidetzarekiko proportzionala. Hala ere, Unibertsitateak zilegi du eskubide hori ez baliatzea, eta, egokitzat jotzen badu, ahalmena izanen du ordezkari bat izendatzeko, EOEaren administrazio organoaren bileretara entzule gisa joan dadin.

Gobernu Kontseiluak, Unibertsitateko errektoreak edo hark eskuordetzen duen errektoreordeak proposatuta, ahalmena izanen du Unibertsitateak EOEaren administrazio organoan izanen dituen ordezkariak izendatzeko, bai eta haiek kargutik kentzeko eta ordezkatzeko eta ordezkariak izendatzeari uko egiteko ere.

5. artikulua. EOE-en betebeharrak.

1. Erregelamendu honen babesean sortzen diren ezagutzan oinarritutako entitateek derrigor bete beharko dituzte indarrean dagoen legeria zibil, komertzial, laboral eta fiskalak nahiz Unibertsitatearen eta enpresa-proiektua proposatzen dutenen arteko lankidetza-hitzarmenak exijitzen dituzten baldintzak.

2. EOE-ek urtero aurkeztu beharko dute entitatea sortzeko orduan ezarritako helburuak betetzeari buruzko memoria edo txostena, eta, urtero, martxoaren 30a baino lehen bidali beharko dituzte urteko kontuak eta gauzatutako kudeaketari buruzko txostena, bai eta enpresa-erakundearen estatutuetan sartu nahi den edozein aldaketa ere.

3. Unibertsitateak barneko nahiz kanpoko auditoretzak egiten ahalko ditu, ekonomikoak, teknologikoak zein era guztietakoak, egokitzat jotzen badu bere egoera finantzarioa eta teknologikoa zehazteko.

4. Unibertsitateko langile berriak bazkide gisa sartzea Unibertsitateko Gobernu Kontseiluak onetsi beharko du, eta, gainera, indarrean dagoen legeriak exijitzen dituen gainerako baldintzak ere bete beharko dira.

5. Enpresak EOE izaera galtzen badu edo Unibertsitatearekin hartutako betebeharrak larriki urratzen baditu, Unibertsitateak bertan behera utziko du babes oro, eta enpresan duen partaidetza salduko du, halakorik izanez gero. Enpresak galdu eginen du "Nafarroako Unibertsitate Publikoaren spin-off" aipamena erabiltzeko eskubidea.

6. Unibertsitateko Gobernu Kontseiluak, modu arrazoituan hala erabakiz gero, enpresa-entitatean dituen partaidetzak besterentzen ahalko ditu, Unibertsitateak EOEaren kapitalean iraun beharreko denbora igarota betiere. Hori dela-eta, bazkide itunak klausula bat izanen du, eta, haren arabera, entitate berriaren bazkide edo partaide diren Unibertsitateko komunitateko kideek edo entitateak berak berrerosi egin beharko dituzte Unibertsitateak entitate horretan izenpetzen dituen partaidetzak.

Kasu horietan, Unibertsitateak enpresa-erakundean duen partaidetzaren benetako balioa peritu txosten baten bidez finkatuko da.

6. artikulua. Unibertsitatearentzako kontraprestazioak.

Unibertsitateak EOEari emandako babesaren ondoriozko kontraprestazioek formula hauetakoren bat edo batzuk erabiltzen ahalko dituzte:

1. Dibidenduak kobratzea kapital sozialean parte hartzeagatik.

2. Royalty direlakoak kobratzea ezagutza unibertsitarioa erabiltzeagatik.

3. Prezioak kobratzea Unibertsitateko ondasunak edo zerbitzuak erabiltzeagatik.

4. Lehentasunez Unibertsitatea kontratatzea aholkularitza mota guztietarako eta I+G+b-ko lanak egiteko.

5. Praktiketako ikasleak onartzea.

6. Enpresaren esparruan ikasketen amaierako lanak eta doktoretza-tesiak egin ahal izatea.

7. Unibertsitateko langileen eta prestakuntzaldiko ikertzaileen aldi baterako mugikortasunerako akordioak sinatzea.

8. Enpresak eta Nafarroako Unibertsitate Publikoak sinatutako hitzarmenean adostutako beste edozein.

Lortutako itzulkin ekonomikoak Unibertsitatearen aurrekontuari gehituko zaizkio, eta, lehentasunez, Unibertsitateko ezagutzan oinarritutako entitateen sorrera sustatzeko jardueretara bideratuko dira.

7. artikulua. Unibertsitateko langileen partaidetza.

1. Unibertsitateko irakasle eta ikertzaileek aukera izanen dute erregelamendu honen 1. artikuluaren arabera ikerketetatik sortutako prozesuak gauzatzearen ondorio diren enpresen sorreran parte hartzeko, edo dagoeneko sortuak dauden EOE-etan partaide gisa sartzeko.

2. Nolanahi ere, irakasle eta ikertzaileek ezagutzan oinarritutako entitate batean parte hartuz gero, horren berri emanen zaie ikertzaile horiek atxikita dauden sailari eta arlo horretan eskumena duen errektoreordetzari.

3. Errektoreak, sailaren premiek horretarako aukera ematen badute, EOEan sartzeko aldi baterako eszedentzia ematen ahalko die unibertsitateko irakaskidegoetako irakasle funtzionarioei eta lan kontratudun irakasle iraunkorrei, indarrean dagoen legeriak ezartzen duen moduan. Era berean, ikertzaileei baimena ematen ahalko die lanaldi partzialeko lan kontratuaren bidez EOEan zerbitzuak emateko, indarrean den legerian ezarritako baldintzetan.

4. Lotura iraunkorra duten teknikari, kudeaketari eta administrazioko eta zerbitzuetako langile funtzionario nahiz lan kontratudunek baimena eskatzen ahalko dute Unibertsitatearen mendeko edo hari lotutako EOE batean sartzeko, aldi baterako eszedentzia baten bidez, indarrean den legerian ezarritako baldintzetan. Nolanahi ere, EOE batean parte hartuz gero, horren berri emanen zaie horiek atxikita dauden zerbitzuko zuzendaritzari eta Kudeatzailetzari.

5. EOE batean parte hartzen dutenean, unibertsitateko irakaskidegoetako irakasle funtzionarioei, lan kontratudun irakasle iraunkorrei eta lotura iraunkorra duten teknikari, kudeaketari eta administrazioko eta zerbitzuetako langile funtzionario nahiz lan kontratudunei ez zaizkie aplikatuko Administrazio publikoen zerbitzuko langileen bateraezintasunei buruzko Legearen 12.1 artikuluaren b) eta d) letretan eta 16. artikuluetan ezarritako mugak baldin eta Gobernu Kontseiluaren akordio esplizitu bat badago, indarrean den araudian ezarritako baldintzetan.

6. Unibertsitateko langileei EOEan parte hartzeko baimena emateko, ezinbestekoa da langile horiek une oro bermatzea Unibertsitateari legozkiokeen asmakuntzen eta ikerketako emaitzen titulartasuna. Era berean, Unibertsitateko lan jardueraren eta enpresan duten partaidetzaren artean interes gatazka sor dezakeen edozein gorabehera esanguratsuren berri eman beharko diote Unibertsitateari.

7. EOEan parte hartzen duten Unibertsitateko langileek ezin izanen dute informazio konfidentzialik edo jabetza industrial edo intelektualeko objekturik zabaldu baldin eta Unibertsitateko edo haren mendeko entitateetako kide izateagatik eskuratu edo ezagutu badituzte.

8. Aipatutako eginbeharrak ez betetzeak berekin ekartzen ahalko du Unibertsitateak bertan behera uztea EOEari ematen dion babesa, eta enpresan duen partaidetza salduko du, halakorik izanez gero. Unibertsitateko langileei diziplina-erantzukizuna eta/edo exijitzeko moduko beste edozein erantzukizun egotz dakieke, horrek izan litezkeen legezko ondorioekin, kalte-galeren ordaina barne.

8. artikulua. Unibertsitatea sustatzeko neurriak.

1. Unibertsitateak, zuzenean arlo horretan eskumena duen errektoreordetzaren bitartez edo beste entitate eta erakunde publiko edo pribatu batzuekin lankidetzan, ezagutzan oinarritutako entitate unibertsitarioen sorrera eta aitorpena sustatuko du, eta kultura ekintzailea sustatuko du Unibertsitatean.

2. Irakasle eta ikertzaileek sortutako ezagutzan oinarritutako entitateak sustatzeko xedez, Unibertsitateak antzeko helburu soziala duten entitateetan parte hartzen ahalko du.

3. Unibertsitateak beharrezko prozedurak ezarriko ditu bere baitan sortutako EOE-ek jabetza industrialaren arloko laguntza-zerbitzuak erabili ahal izan ditzaten Unibertsitateko Ikerketa Zerbitzuaren bitartez. Era berean, aholku emanen dio enpresen sorrerarako baldintza administratiboak eta bere jarduera-eremuko araudia betetzeari dagokionez.

4. Unibertsitateak ekintzailetza babesten duten entitateekiko akordioak eta hitzarmenak sustatuko ditu enpresak abiarazteko prozesuak errazteko. Era berean, finantza-enpresekin, arrisku-kapitalekoekin edo business angels direlakoekin akordioak egitea sustatuko du edo Unibertsitatearen mendeko EOE-en kapitala handitzeko edo haiei kredituak emateko.

9. artikulua. EOE-en erregistroa.

Unibertsitateak bere baitan sortu diren ezagutzan oinarritutako entitateen erregistro bat izanen du, Ikerketa Zerbitzuaren mendekoa. Erregistro horretan, Unibertsitateak entitate bakoitzaren kapitalean duen partaidetza eta haren portzentajea jasoko dira, halakorik badu, bai eta proposamen-egileen identitatea, onarpen data eta estatutuak ere.

LEHENBIZIKO XEDAPEN GEHIGARRIA

Nafarroako Unibertsitate Publikoko Oinarri Teknologikoko Enpresei buruzko Erregelamenduaren babesean sortutako enpresak sustatzeko prozedurak –Gobernu Kontseiluak 2012ko uztailaren 4ko erabaki baten bidez onetsi zen erregelamendu hori– araudi horretan ezarritakoaren arabera arautu eta ebatziko dira.

XEDAPEN INDARGABETZAILEA

Indargabetua gelditzen da Nafarroako Unibertsitate Publikoko Oinarri Teknologikoko Enpresei buruzko Erregelamendua, Gobernu Kontseiluak 2012ko uztailaren 4ko erabaki baten bidez onetsia.

AZKEN XEDAPEN BAKARRA

Nafarroako Aldizkari Ofizialean argitara eman, eta biharamunean hartuko du indarra erregelamendu honek.

Iragarkiaren kodea: F2306547