Iragarkia

99. ALDIZKARIA - 2023ko maiatzaren 11

1. NAFARROAKO FORU KOMUNITATEA

1.7. BESTELAKOAK

766/2023 Ebazpena, 2023ko apirilaren 25ekoa, Nafarroako Unibertsitate Publikoko errektoreak emana. Haren bidez agintzen da argitaratzeko "Erabakia, Nafarroako Unibertsitate Publikoko graduko ikasketetan prestakuntza osagarriko unibertsitate jarduerengatik kredituak aitortzen dituen araudia onesten duena", Gobernu Kontseiluak 2023ko apirilaren 25ean hartutako erabaki baten bidez onetsia.

2003ko maiatzaren 12ko 110/2003 Foru Dekretuak onetsitako Unibertsitateko Estatutuetako 40. artikuluak ematen dizkidan eskumenak erabiliz, agintzen dut argitaratzeko Gobernu Kontseiluak 2023ko apirilaren 25ean hartutako erabakia, Nafarroako Unibertsitate Publikoko graduko ikasketetan prestakuntza osagarriko unibertsitate jarduerengatik kredituak aitortzen dituen araudia onesten duena.

GOBERNU KONTSEILUAREN ERABAKIA, NAFARROAKO UNIBERTSITATE PUBLIKOKO GRADUKO IKASKETETAKO PRESTAKUNTZA OSAGARRIKO UNIBERTSITATE JARDUERENGATIK KREDITUAK AITORTZEKO ARAUDIA ONESTEN DUENA

2007ko urriaren 29ko 1393/2007 Errege Dekretuan xedatutakoa garatzeko, Gobernu Kontseiluak, 2010eko maiatzaren 14ko erabaki baten bidez, Unibertsitate Zabalpeneko Jardueretan Parte Hartzeagatik ematen diren kredituen aitorpen akademikoaren araudia onetsi zuen (2010eko maiatzaren 31ko NAOn argitaratua, 66. zk.).

822/2021 Errege Dekretuak, 2021eko irailaren 28koak, Unibertsitateko ikasketen antolamendua eta haien kalitatea bermatzeko prozedura ezartzen dituenak, 1393/2007 Errege Dekretua indargabetu zuen.

Errege dekretu horretan bertan, 10.9.c) artikuluak ezartzen duenez, aitorpena izaten ahalko dute ikasleek "lankidetzako, elkartasuneko, kulturako, kiroleko eta ikasleen ordezkaritzako unibertsitate-jardueretan parte hartzeari dagozkion kredituek, eta, gutxienez, sei kredituren baliokideak izanen dira. Era berean, prozedura horien xede izan daitezke unibertsitateak irakaskuntzari lotuta antolatzen dituen beste jarduera akademiko batzuk. Edonola ere, artikulu honetako c) letran ezarritako aitorpena izanen duten kreditu guztiak ezin izanen dira inola ere ikasketa-planeko kreditu guztien ehuneko 10 baino gehiago izan".

2021eko 822/2021 Errege Dekretuaren 10.9 artikuluan xedatutakoa garatzeko, Unibertsitate Proiekzioko, Kulturako eta Dibulgazioko errektoreordeak graduko ikasketetako prestakuntza osagarriko unibertsitate jarduerengatik kredituak aitortzeko araudia proposatu du. Araudi horrek –aldez aurretik aztertu zuen Unibertsitateko Ikasketa Batzordeak 2023ko martxoaren 13an, astelehena, egindako bileran– indargabetu egiten du unibertsitate zabalpeneko jardueretan parte hartzeagatik kredituen aitorpen akademikoa erregulatzen duen araudia, 2010eko maiatzaren 14ko Gobernu Kontseiluaren erabakiz onetsia.

Aurreko guztiarengatik, honako hau da Gobernu Kontseiluak, idazkari nagusiak proposatuta, bere kideek aldez aurretik eztabaida egin eta gero, 2023ko apirilaren 25ean egindako bileran hartu duen,

ERABAKIA:

Lehenbizikoa.–Nafarroako Unibertsitate Publikoko graduko ikasketetan prestakuntza osagarriko unibertsitate zabalpeneko kredituak aitortzeko araudi hau onestea.

Bigarrena.–Araudi hau Nafarroako Unibertsitate Publikoaren iragarki ohol elektronikoan eta Nafarroako Aldizkari Ofizialean argitaratzea.

Hirugarrena.–Araudi honen aurka, zilegi da administrazioarekiko auzi-errekurtsoa jartzea Nafarroako Justizia Auzitegi Nagusiko administrazioarekiko auzien epaitegietan, bi hilabeteko epean, erabakia Nafarroako Aldizkari Ofizialean argitaratu eta biharamunetik kontatzen hasita, Unibertsitate Sistemari buruzko 2023ko martxoaren 22ko 2/2023 Lege Organikoaren 38.4 artikuluan eta Nafarroako Unibertsitate Publikoaren Estatutuetako 144.1 artikuluan xedatutakoarekin bat etorriz."

Iruñean, 2023ko apirilaren 25ean.–Errektorea, Ramón Gonzalo García.

GRADUKO IKASKETETAN PRESTAKUNTZA OSAGARRIKO UNIBERTSITATE JARDUERENGATIK KREDITUAK AITORTZEN DITUEN ARAUDIA.

Laburpena

ZERGATIKOEN AZALPENA

ATARIKO KAPITULUA.–Araudiaren xedea eta aplikazio eremua.

1. artikulua. Araudiaren xedea.

2. artikulua. Aplikazio eremua.

LEHENBIZIKO KAPITULUA.–Graduko ikasketetako prestakuntza osagarriko unibertsitate jarduerak eta haien aitorpena.

3. artikulua. Definizioa.

4. artikulua. Tipologia.

LEHENBIZIKO ATALA.–Zeharkako prestakuntza.

5. artikulua. Helburua.

6. artikulua. Zeharkako prestakuntza.

BIGARREN ATALA.–Elkartasuneko eta lankidetzako jarduerak.

7. artikulua. Helburua.

8. artikulua. Elkartasuneko eta lankidetzako jarduerak.

HIRUGARREN ATALA.–Kultur jarduerak.

9. artikulua. Helburua.

10. artikulua. Aitortzen ahal diren kultur jarduerak.

LAUGARREN ATALA.–Kirol jarduerak.

11. artikulua. Helburua.

12. artikulua. Aitortzen ahal diren kirol jarduerak.

BOSGARREN ATALA.–Hizkuntzak ikastea.

13. artikulua. Helburua.

14. artikulua. Aitortzen ahal diren hizkuntza-ikasketak.

SEIGARREN ATALA.–Ikasleen ordezkaritzako jarduerak.

15. artikulua. Ikasleen ordezkaritza.

16. artikulua. Aitortzen ahal diren ordezkaritzako jarduerak.

ZAZPIGARREN ATALA.–Prestakuntza osagarriko kredituak aitortzearen arloan eskumena duen errektoreordetzak zehazten dituen beste jarduera batzuk.

17. artikulua. Errektoreordetzak baimendutako jarduerak.

18. artikulua. Baimena emateko prozedura.

BIGARREN KAPITULUA.–Kredituak Aitortzeko Eta Espedientean Sartzeko Administrazio Prozedura.

19. artikulua. Kredituen aitorpenaren kontzeptua.

20. artikulua. Aitorpena emateko eskumena.

21. artikulua. Aitortzen ahal diren kredituak: kopurua eta tipologia.

22. artikulua. Bertaratzea eta parte-hartzea.

23. artikulua. Espedientean kalifikatzea.

24. artikulua. Kredituen aitorpena egiteko prozedura.

25. artikulua. Kredituak espedientean sartzeko prozedura.

26. artikulua. Jarduerak upnapass-ean sartzea.

27. artikulua. Baliabideak.

XEDAPEN GEHIGARRI BAKARRA

XEDAPEN INDARGABETZAILE BAKARRA ARAUAK INDARGABETZEA

AZKEN XEDAPENA

ZERGATIKOEN AZALPENA

2021eko irailaren 28ko 822/2021 Errege Dekretuak, Unibertsitateko ikasketen antolamendua eta haien kalitatea bermatzeko prozedura ezartzen dituenak, ezartzen du ikasketa horien xedea dela egresatuak bermeekin sartu ahal izatea tokiko lan merkatuetan eta merkatu globaletan, eta, aldi berean, herritar aske, kritiko eta beren gizarte demokratikoekiko konprometitu gisa jardutea. Etengabeko aldaketan dauden gizarteek ezagutza zientifiko, teknologiko eta humanistiko berriak behar dituzte.

Errege dekretu horretan bertan, 10.9.c) artikuluak ezartzen duenez, aitorpena izaten ahalko dute ikasleek "lankidetzako, elkartasuneko, kulturako, kiroleko eta ikasleen ordezkaritzako unibertsitate-jardueretan parte hartzeari dagozkion kredituek, eta, gutxienez, sei kredituren baliokideak izanen dira. Era berean, prozedura horien xede izan daitezke unibertsitateak irakaskuntzari lotuta antolatzen dituen beste jarduera akademiko batzuk. Edonola ere, artikulu honetako c) letran ezarritako aitorpena izanen duten kreditu guztiak ezin izanen dira inola ere ikasketa-planeko kreditu guztien ehuneko 10 baino gehiago izan".

Ikasleek unibertsitatean duten autonomiaren esparruan, eta ikasleei prestakuntza integrala eskaintzeko, Nafarroako Unibertsitate Publikoak zeharkako eta diziplina anitzeko prestakuntza-jarduerak diseinatzeko politika aktiboa du, graduetako curriculum espezifikoa osatze aldera. Prestakuntza osagarriaren barruan sartzen dira zeharkako prestakuntza-eskaintza, elkartasun- eta lankidetza-jarduerak, hizkuntza-ikasketak, kultur prestakuntza, kirola, ikasleen ordezkaritza eta asoziazionismoa, eta ikastegiek antolatutako prestakuntza osagarriko jarduera espezifikoak.

Nafarroako Unibertsitate Publikoko graduko eta Unibertsitate masterreko ikasketa-planak diseinatzeko eta horien egiaztapen-memoriak egiteko eta aldatzeko arauek, 2022ko ekainaren 7ko Gobernu Kontseiluaren Erabakiaren bidez onetsitakoek, 16. artikuluan ezartzen dutenez, "graduko ikasketa-planek gutxienez 6 ECTSko aitorpen akademikoa izan beharko dute aukerako kredituetan, unibertsitateko kultur eta kirol jardueretan, ikasleen ordezkaritzako jardueretan, elkartasuneko eta lankidetzako jardueretan eta Unibertsitateak irakaskuntzari lotuta antolatzen dituen beste jarduera akademiko batzuetan. Ezin izanen dira inola ere ikasketa-planeko kreditu guztien ehuneko 10 baino gehiago izan".

Beharrezkoa da akademikoak ez diren unibertsitateko jarduera horietan kredituak aitortzeko irizpideak ezartzea, jarduera horien baldintza eta betekizun espezifikoak zehazte aldera.

Arauak atariko kapitulu bat du, haren xedea eta aplikazio eremua zehazten dituena, eta beste bi kapitulu, aitorpena izan dezaketen prestakuntza osagarriko jarduerak eta jarduera horiek espedientean sartzeko prozedura deskribatzen dituztenak, guztira 29 artikulutan. Halaber, xedapen gehigarri bat, xedapen iragankor bat, xedapen indargabetzaile bat eta azken xedapen bat ditu.

Arau hau Nafarroako Unibertsitate Publikoaren Estatutuetako 20.b) artikuluan ezarritakoaren babesean eman da –2003ko maiatzaren 12ko 110/2003 Foru Dekretuaren bidez onetsi ziren Estatutuak (NAO, 63 zk., 2003ko maiatzaren 19koa), eta Nafarroako Gobernuak 2011ko martxoaren 21ean hartutako erabaki baten bidez aldatu (NAO, 70. zk., 2011ko apirilaren 11koa)–; izan ere, artikulu horren arabera, Gobernu Kontseiluaren eginkizunen artean dago jarraibide orokorrak eta horiek ikasketak antolatzeko arloetan aplikatzeko prozedurak onestea.

ATARIKO KAPITULUA

Araudiaren xedea eta aplikazio eremua

1. artikulua. Araudiaren xedea.

Araudi honen xedea 2021eko irailaren 28ko 822/2021 Errege Dekretuaren 10.9.c) artikuluan ezarritako aurreikuspenak garatzea da -Errege Dekretu horrek unibertsitateko jardueren eta prestakuntza osagarriaren arloan Unibertsitateko ikasketen antolamendua eta haien kalitatea bermatzeko prozedura ezartzen ditu.

2. artikulua. Aplikazio eremua.

Araudi honetako xedapenak Nafarroako Unibertsitate Publikoko unibertsitateko ikasketa ofizialetan matrikulatuta dauden ikasleei aplikatuko zaizkie.

LEHENBIZIKO KAPITULUA

Graduko ikasketetako prestakuntza osagarriko unibertsitate jarduerak eta haien aitorpena

3. artikulua. Definizioa.

Araudi honen ondorioetarako, Nafarroako Unibertsitate Publikoak edo beste unibertsitate batzuek baimendutako jarduerak hartzen dira prestakuntza osagarriko jarduera akademikotzat, baldin eta NUPekin lankidetza-akordioak badituzte eta jarduera horiek ikasleen prestakuntza integrala lortzen laguntzen badute, hainbat alderditan, hala nola zeharkako edukien prestakuntzan, elkartasuneko jardueretan, lankidetzan, kulturaren sustapenean, hizkuntzen ikaskuntzan, ikasleen ordezkaritzan eta asoziazionismoan edo garapen iraunkorrean, besteak beste.

4. artikulua. Tipologia.

Bereziki, prestakuntza osagarriko jarduerak dira:

–Zeharkako prestakuntzako jarduerak.

–Elkartasuneko eta lankidetzako jarduerak.

–Kultur jarduerak.

–Kirol jarduerak.

–Hizkuntzen ikaskuntza.

–Ikasleen ordezkaritzako eta asoziazionismoko jarduerak.

–Prestakuntza osagarriko kredituak aitortzeko eskumena duen Errektoreordetzak ikasturte bakoitzerako zehazten dituen beste jarduera batzuk, bai errektoretza-taldeak bultzatuak, bai ikastegiek aldez aurretik eskatuak ere.

LEHENBIZIKO ATALA

Zeharkako prestakuntza

5. artikulua. Helburua.

Zeharkako prestakuntzako jarduerak berariaz diseinatuta daude graduetako prestakuntza osatzeko, eta, hala, ikasleek garapen pertsonala, soziala eta profesionala ahalbidetuko duten ezagutzak, trebetasunak eta balioak eskuratzeko.

6. artikulua. Zeharkako prestakuntzako jarduerak.

Prestakuntza-jarduera hauek aitortuko dira, 21.3 artikuluan aipatzen diren sei hilean behingo ebazpenetan ezartzen den kreditu kopuruarekin:

a) Zeharkako gaitasunen programa espezifikoak: garapen pertsonala, gaitasun digitalak, garapen jasangarria.

b) Gradu jakin batzuetako irakasgaiak, ikasleen prestakuntza integralari ekarpena egiten diotenak. Irakasgai horiek ez dira prestakuntza osagarritzat hartuko beren ikasketa-planean prestakuntza hori duten graduko ikasleentzat.

c) Prestakuntza integralari laguntzen dioten ikastaroak eta irakasgaiak, Nafarroako Unibertsitate Publikoarekin estatu-mailako edo nazioarteko hitzarmenen bidez harremana duten beste unibertsitate batzuek eskaintzen dituztenak.

d) Nafarroako Unibertsitate Publikoko ikasketa berekiak. Unibertsitateko aditu titulu propioen kasuan, gainditutako ECTSak ezin izanen dira aitortu unibertsitateko aditu tituluarekin lotura zuzena duten ikasketa ofizialetan, salbu eta zeharkako konpetentzietakoak badira, eta gehienez 6 ECTS emanen zaizkie.

e) Enpresa-ekintzailetza eta lan orientazioa hobetzeko berariazko programak.

f) Zeharkako prestakuntzako beste programa batzuk, baldin eta prestakuntza osagarriko kredituak aitortzeko eskumena duen errektoreordetzak urte bakoitzean aitortzen baditu.

BIGARREN ATALA

Elkartasuneko eta lankidetzako jarduerak

7. artikulua. Helburua.

Ikasleen artean gai hauen inguruko sentsibilizazioari, prestakuntzari eta sustapenari laguntzea: elkartasuna, berdintasuna, giza eskubideen defentsa, bakearen kultura, kulturen arteko elkarrizketa, bizikidetzarako hezkuntza, desgaitasuna duten pertsonen arreta, gizarte inklusioa, garapen jasangarria, ingurumenaren zaintza, osasunaren sustapena eta prebentzio kulturaren garapena, irisgarritasuna eta diseinu unibertsala, nazioarteko lankidetza, etab. Prestakuntza horrekin, espero izatekoa da egresatuak gai izatea gizarte bidezkoago, seguruago, jasangarriago eta solidarioagoa eraikitzeko.

8. artikulua. Aitortzen ahal diren elkartasuneko eta lankidetzako jarduerak.

Jarduera hauek aitortuko dira, 21.3 artikuluan aipatzen diren sei hilean behingo ebazpenetan ezartzen den kreditu kopuruarekin:

a) Unibertsitateak antolatutako mentoretzako, mentoretza sozialeko eta boluntariotzako programetan parte hartzea.

b) Garapen jasangarriaren helburuekin lotutako prestakuntza-ekintzak.

c) Garapenerako sentsibilizazio- eta hezkuntza-ekintza espezifikoak eta garapenerako nazioarteko lankidetzako proiektuak formulatzea.

HIRUGARREN ATALA

Kultur jarduerak

9. artikulua. Helburua.

Kultur jardueren helburu nagusia da ikasle guztiei prestakuntza ematea curriculumekoak ez diren kulturako arloetan, hala nola musikan, antzerkian, literaturan, zineman edo pinturan. Horrela, hezkuntza integrala sustatzeaz gain, sormena, kulturaren arloko jakin-mina eta beste trebetasun, interes eta ezagutza batzuen garapena hedatzeko beharrezko bideak eskainiko dira.

10. artikulua. Aitortzen ahal diren kultur jarduerak.

Jarduera hauek aitortuko dira, 21.3 artikuluan aipatzen diren sei hilean behingo ebazpenetan ezartzen den kreditu kopuruarekin:

a) Kultura eta dibulgazioa sustatzeko eskumena duen errektoreordetzak antolatutako kultur ikastaroetan parte hartzea.

b) Kultur ekoizpeneko talde egonkorretan parte hartzea (abesbatza, antzerki-taldea eta kultura eta dibulgazioa sustatzeko eskumena duen errektoreordetzak ezartzen dituen beste batzuk).

c) Unibertsitateko eztabaida-ligan parte hartzea.

d) "Eman kreditua zure kulturari" programan parte hartzea.

e) Kultur arloko beste jarduera eta programa batzuk.

LAUGARREN ATALA

Kirol jarduerak

11. artikulua. Helburua.

Kirol jardueren helburua kirol-jarduera fisikoak eskaintzea eta sustatzea da, dela osasuna sustatuz, dela kirolarekin lotutako beste balio batzuk eskuratuz, hala nola ahalegina, errespetua edo lankidetza.

12. artikulua. Aitortzen ahal diren kirol jarduerak.

Kirol jarduera hauek aitortuko dira, 21.3 artikuluan aipatzen diren sei hilean behingo ebazpenetan ezartzen den kreditu kopuruarekin:

a) Kirol eskolek zuzendutako eta antolatutako jardueretan parte hartzea.

b) Kirol eta osasun gela: gela horretako jardueretan parte hartzea eta haiek gauzatzea, kirol programaren osagarri gisa eta osasunaren hezkuntzara eta sustapenera bideratuta.

c) Nafarroako Unibertsitate Publikoaren Torneoan, Espainiako Unibertsitateen arteko txapelketetan eta beste torneo batzuetan parte hartzea.

BOSGARREN ATALA

Hizkuntzak ikastea

13. artikulua. Helburua.

Atzerriko hizkuntzetako gaitasuna errazteko eta ikaslea lan merkatuen eta tokiko eta maila globaleko gizarteen aldaketa-dinamikekin lotutako komunikazio erronketarako prestatzeko, Nafarroako Unibertsitate Publikoak ikasleek beren unibertsitateko ikasketetan zehar Hizkuntzen Goi Mailako Ikastegian hizkuntzak ikas ditzatela bultzatuko du.

14. artikulua. Aitortzen ahal diren hizkuntza-ikasketak.

1. Kredituak Hizkuntzen Goi Mailako Ikastegiak ikasturte bakoitzean eskainitako hizkuntza-ikastaroekin bakarrik aitortuko dira, 21.3. artikuluan aipatzen diren sei hilean behingo ebazpenetan ezarritako kreditu kopuruarekin. Hauen bidez egiten ahal da kredituen aitorpena:

a) Hizkuntzen Europako Erreferentzia Esparru Bateratuko maila bati dagozkion eta ikasleen graduko ikasketa-planaren barruan ez dauden ikastaroak gaindituz.

b) Azterketa ofizialak prestatzeko ikastaro bereziak eginez.

2. Kredituen aitorpen hori ekarriko duten ikastaroak gainditzeko, Hizkuntzen Europako Erreferentzia Esparru Bateratuko mailetako batean "gai" kalifikazioa izan beharko da.

SEIGARREN ATALA

Ikasleen ordezkaritzako eta asoziazionismoko jarduerak

15. artikulua. Ikasleen ordezkaritza eta asoziazionismoa.

Nafarroako Unibertsitate Publikoak ikasleen presentzia sustatuko du gobernu organoetan, batzordeetan eta lantaldeetan, parte-hartze aktibo eta demokratikoaren eta erabakiak hartzeko erantzunkidetasunaren adierazle diren neurrian. Halaber, ikasleen elkarteak egotea sustatuko du.

16. artikulua. Ikasleen ordezkaritzako eta asoziazionismoko jarduerak.

Ikasleen ordezkaritzako eta asoziazionismoko jarduera hauek aitortuko dira, 21.3 artikuluan aipatzen diren sei hilean behingo ebazpenetan ezartzen den kreditu kopuruarekin:

a) Gobernu Kontseiluko, Unibertsitateko Klaustroko eta Unibertsitateko Gizarte Kontseiluko Ikasleen ordezkariak.

b) Ikastegietako batzarretako eta sailetako kontseiluetako ikasleen ordezkariak.

c) Ikasleen Kontseiluko lehendakaritzako, idazkaritzako eta Batzorde Iraunkorreko kide diren ikasleak.

d) Ikastaroko edo taldeko delegatuak edo delegatuordeak.

e) Titulu berriak ezartzeko eratutako lantaldeetan parte hartzeko izendatutako ikasleak.

f) Unibertsitateko ikasleen elkarteren bateko Zuzendaritza Batzordeko edo kide anitzeko gobernu-organoren bateko lehendakaria eta kideak.

g) Ikasleen arloan eskumena duen errektoreordetzak aitortutako beste jarduera batzuetan parte hartutakoak.

ZAZPIGARREN ATALA

Prestakuntza osagarriko kredituak aitortzearen arloan eskumena duen errektoreordetzak zehazten dituen beste jarduera batzuk

17. artikulua. Errektoreordetzak baimendutako jarduerak.

Aurreko ataletan adierazitako jarduerez gain, kredituak aitortzeko eskumena duen errektoreordetzak baimendutako ikastaro, mintegi eta antzeko jardueretan parte hartu izana aitortzen ahalko da ikastegiek edo errektoretza-taldeak aldez aurretik eskatuta.

18. artikulua. Baimena emateko prozedura.

1. Irakasleek, arduradun akademikoek edo, oro har, jarduera horiek bultzatu dituzten administrazio unitateek ikasturte bakoitzerako aurkeztuko diete ikastegietako zuzendaritzei zer aukera dagoen jarduera horiek aitorpen akademikoa izateko.

2. Ikastegietako zuzendaritzek, jarduerak ikasleen prestakuntza integralaren ikuspegitik zer interes duen ikusita, prestakuntza osagarriko kredituak aitortzeko eskumena duen errektoreordetzari kredituak aitortzeko eskabidea igorriko diote jarduera egin aurretik, baita jarduera hori 21.3 artikuluan aipatzen diren sei hilean behingo ebazpenetan formalki sartzeko eskabidea ere –artikulu horrek aitortzen ahal diren kredituak eta haiek betetzeko baldintzak adierazten ditu–. Ondorio horietarako, ikastegietako zuzendaritzek justifikazio-txosten bat erantsiko diote eskabideari. Txosten horretan, aitorpena jasoko duen jarduerak zer prestakuntza-helburu duen adieraziko da, bai eta jarduera hori zertan datzan eta zenbat iraunen duen ere. Errektoreordetzak egoki irizten dien argibideak eskatu ahalko dizkio.

BIGARREN KAPITULUA

Kredituak aitortzeko eta espedientean sartzeko administrazio prozedura

19. artikulua. Kredituen aitorpenaren kontzeptua.

Araudi honetan ezarritakoaren ondorioetarako, kreditu aitorpentzat hartuko da araudi honetan zerrendatutako jarduerak egiteagatik ikasleen espedientean kreditu jakin batzuk sartzea, titulu ofizialak lortzera bideratutako ikasketa-planetan sartuta ez daudenak.

20. artikulua. Aitorpena emateko eskumena.

Prestakuntza osagarriko kredituak aitortzen dituen errektoreordetzaren eskumena izanen da kredituak aitortzea I. kapituluan deskribatutako edozein jardueratan parte hartzeagatik.

21. artikulua. Aitortzen ahal diren kredituak: kopurua eta tipologia.

1. Kontzeptu honetan, ikasleek graduko ikasketa-plan ofizialeko kreditu guztien gehienez ere %10 lortzeko aukera izanen dute.

2. Aitortutako kredituen kopurua ikasketa-planak ezarrita duen aukerako kredituen parte izanen da, eta, beraz, onarpen horrek ezin izanen du inolaz ere gainditu planean jasotako aukerako kredituen kopurua. Aipamenak dituzten ikasketa-planen kasuan, prestakuntza osagarrian aitortutako kredituek ezin izanen dituzte ordeztu aipamenean nahitaez egin beharreko irakasgaiak.

3. Prestakuntza osagarriaren arloan eskumena duen errektoreordetzak ikasturte bakoitzerako baimendutako jarduerak bakarrik aitortuko dira kreditu bidez. Bertan zehaztuko dira kreditu kopurua, izena emateko epeak, ikasleek kreditu horiek lortzeko bete behar dituzten baldintza akademikoak eta jarduera bakoitzerako eskaintzen diren plazen gehieneko kopurua. Baimendutako jarduerak eguneratuta agertuko dira errektoreordetzak ikasturte bakoitzerako onartzen dituen sei hilean behingo ebazpenetan, eta araudi honen eranskin gisa erantsiko dira.

4. Graduko ikasketak egin bitartean egiten diren jarduerak baizik ez dira aitortuko. Titulazio bat baino gehiago egiten ari direnek haietako bakar batean aitortzen ahalko dituzte kredituak.

22. artikulua. Bertaratzea eta parte-hartzea.

Kirolaren, kulturaren, gizartearen eta lankidetzaren arloko jardueren kasuan, beharrezkoa izanen da gutxienez jarduera horien saioen %80ra bertaratzea. Ikasleen ordezkaritzako jardueren kasuan, beharrezkoa izanen da gutxienez saioen %80ra bertaratzea ikasturte bakoitzean edo kide anitzeko organoetan edo batzorde edo lantalde bakoitzak iraunen duen aldian. Asoziazionismoagatiko kredituen aitorpenaren kasuan, beharrezkoa izanen da dagokion elkarteak ikasturtean egindako jarduerak aurkeztea eta bertan adieraztea kredituak aitortzen ahal dituzten zer ikaslek parte hartu duten. Gainerako jardueretan, bertaratzeko eta parte hartzeko baldintzak jarduerak deskribatzen dituen eskaintzan zehaztuko dira.

23. artikulua. Espedientean kalifikatzea.

1. Aitortutako prestakuntza osagarriko unibertsitate-jardueretarako kredituak espedientean jasoko dira "Gai, 5.0" kalifikazioarekin. Kalifikazio hori ez da zenbatuko graduko tituluaren espediente akademikoaren batezbestekoa kalkulatzeko.

2. Graduko tituluaren espediente akademikoan "aitortutako jarduera" izenarekin agertuko da.

24. artikulua. Kredituen aitorpena egiteko prozedura.

1. Araudi honetan adierazitako edozein jarduera amaitzean, errektoreordetzek edo administrazio-unitate arduradunek jarduera horiek amaitu eta gainditu dituzten ikasleen zerrenda (graduko edozein titulutan matrikulatutako ikasleak) bidali beharko diote Graduko Ikasketen Atalari, formatu elektronikoan, behar den ebazpenak ezarritako baldintzei jarraikiz.

2. Informazio horrek honako datu hauek jaso beharko ditu:

a) Ikasle bakoitzaren NANa, izen-abizenak eta IIZ (Ikaslearen Identifikazio Zenbakia).

b) Zer graduko titulutan aplikatuko den kredituen aitorpena.

c) Jardueraren kodea eta izena, bai eta jarduerari esleitutako kreditu kopurua ere, 21.3 artikuluan aipatzen diren sei hilean behingo ebazpenetan ezarritakoaren arabera.

d) Jarduera zer ikasturte akademikotan gainditu den.

3. Informazio hori jaso, eta kudeaketa akademikoko aplikazio informatikoan sartuko da. Horrela, ikasleek ohiko bideetatik kontsultatzen ahal izanen dute, eta zer jarduera gainditu dituzten jakiten ahalko dute, beren espedientean sar ditzaketen prestakuntza osagarriko kredituak aitortzeko.

4. Informazio horrekin bat ez datozen ikasleek erreklamazioa aurkezten ahalko dute Graduko Ikasketen Atalean, egin beharreko zuzenketak egin ditzaten.

25. artikulua. Kredituak espedientean sartzeko prozedura.

1. Ikasleak kredituak espedientean sartzeko eskatzen ahalko dio Graduko Ikasketen Atalari. Nolanahi ere, kredituak espedientean sartzeko, kasuan kasuko prezio publikoak ordaindu beharko dira. Graduko Ikasketen Atalak zenbateko horri dagokion bankuko abonu agiria emanen dizu.

2. Ikasturteko edozein unetan eskatzen ahalko da kredituak espedientean sartzeko.

3. Espedientean sartu ondoren, aitortutako kredituak ezin izanen dira ezabatu edo beste batzuekin ordezkatu.

4. Aitorpenarekin bat ez datozen ikasleek erreklamazioa aurkezten ahalko dute Graduko Ikasketen Atalean Unibertsitatearen egoitza elektronikoaren erregistro elektronikoaren bidez, behar diren zuzenketak egin daitezen.

26. artikulua. Jarduerak upnapass-ean sartzea.

Ikasleak graduko ikasketekin batera egin dituen prestakuntza osagarriko jarduera guztiak upnapass-ean edo, beharrezkoa bada, horretarako gaitzen den dokumentu digitalean jasoko dira.

Upnapass Nafarroako Unibertsitate Publikoak ematen duen dokumentua da, ikasleei automatikoki bidaltzen diena graduko titulu ofizialaren eskaera egin ondoren. Helburua da prestakuntza osagarria curriculumean islatzea, bai ikasleen prestakuntza integralari begira duen garrantziagatik, bai ikasle bakoitzak aukeratutako prestakuntza osagarriko ibilbideen espezifikotasuna erakusteagatik.

27. artikulua. Errekurtsoak.

25.4 artikuluan aipatzen diren erreklamazioen ebazpenen aurka, ikasleek berraztertzeko errekurtsoa aurkezten ahalko diote Nafarroako Unibertsitate Publikoko errektoreari hilabeteko epean, edo administrazioarekiko auzi-errekurtsoa Nafarroako administrazioarekiko Auzietako Epaitegian, bi hilabeteko epean, jakinarazpena edo argitalpena egin eta hurrengo egunetik zenbatzen hasita.

Xedapen gehigarri bakarra.–Prestakuntza osagarriko kredituak aitortzeko eskumenak dituen errektoreordetzari ahalmena ematen zaio araudi honetan xedatutakoa garatzeko eta aplikatzeko behar diren ebazpenak emateko, bereziki 21.3 artikuluan aipatzen diren sei hilean behingo ebazpenak emateko. Erabaki horiek Unibertsitatearen iragarki ohol elektronikoan argitaratuko dira. Ebazpen horietan, prestakuntza osagarriko jarduerei, kreditu kopuruari, betekizunei eta gutxieneko bertaratzeari buruzko informazio zehatza jasoko da.

Xedapen iragankor bakarra.–Araudi honen 21.3 artikuluan aipatzen diren sei hilean behingo ebazpenetako lehenbizikoa onetsi arte, kredituak aitortuko dira I. eranskinean eta Unibertsitate Zabalpeneko Jardueretan Parte Hartzeagatik ematen diren kredituen aitorpen akademikoaren araudia garatzeko xedapenetan jasotako jarduerengatik –Gobernu Kontseiluak 2010eko maiatzaren 14an erabaki bidez onetsitako araudia–, betiere araudi honetan eskatzen diren baldintzekin bat badatoz. Jarduera horiek aitortzeak ez ditu inola ere gaindituko 6. artikuluko d) apartatuan eta 21.1 artikuluan ezarritako mugak.

Xedapen indargabetzaile bakarra.–Araudi honek indargabetu egiten du Gobernu Kontseiluaren 2010eko maiatzaren 14ko erabakia, unibertsitate zabalpeneko jardueretan parte hartzeagatik ematen diren kredituen aitorpen akademikoaren araudia onesten duena (2010eko maiatzaren 31ko NAO, 66. zk.).

Azken xedapena.–Araudi hau Nafarroako Aldizkari Ofizialean argitaratu eta biharamunean sartuko da indarrean.

Iragarkiaren kodea: F2306511