1. NAFARROAKO FORU KOMUNITATEA
1.7. BESTELAKOAK
765/2023 EBAZPENA, 2023ko apirilaren 25ekoa, Nafarroako Unibertsitate Publikoko errektoreak emana. Haren bidez agintzen da argitaratzeko "Erabakia, Nafarroako Unibertsitate Publikoko irakasle laguntzaile doktoreen lanpostuetarako lehiaketetan aplikatu beharreko baremoa aldatzen duena", Gobernu Kontseiluak 2023ko apirilaren 25ean hartutako erabaki baten bidez onetsia.
2003ko maiatzaren 12ko 110/2003 Foru Dekretuak onetsitako Unibertsitateko Estatutuetako 40. artikuluak ematen dizkidan eskumenak erabiliz, agintzen dut argitaratu dadila Gobernu Kontseiluaren 2023ko apirilaren 25eko Erabakia, Nafarroako Unibertsitate Publikoko irakasle laguntzaile doktore izateko baremoa aldatzen duena.
"GOBERNU KONTSEILUAREN ERABAKIA, NAFARROAKO UNIBERTSITATE PUBLIKOKO IRAKASLE LAGUNTZAILE DOKTOREEN LANPOSTUETARAKO LEHIAKETETAN APLIKATU BEHARREKO BAREMOA ALDATZEN DUENA
Berriki indarra hartu duen Unibertsitate Sistemari buruzko 2023ko martxoaren 22ko 2/2023 Lege Organikoak, beste gai berritzaile askoren artean, aldaketa sakon bat sartu du unibertsitateko irakasleen erregulazioan, bereziki lan-kontratupeko irakasleei dagokienez, eta erregulazio hori unibertsitate publiko guztietan zuzenean da aplikatzekoa.
Lege organiko horrek sartutako berrikuntzetako bat da kendu dela akreditazioa izan beharra irakasle laguntzaile doktoreen lanpostuak lortzeko. Legeak zenbait aldaketa egin ditu figura horri dagokionez, eta horien artean dago doktore titulua izatea izanen dela halako lanpostu bat lortzeko baldintza bakarra.
Akreditazio hori, ordea, lehentasunezko meritutzat hartu behar da lege organiko hori onetsi ondorengo lau urteetan, haren hirugarren xedapen iragankorrean ezarritakoaren arabera.
Legea indarrean sartu zenetik aplikatzekoa den aurreikuspen horren ondorioz, Nafarroako Unibertsitate Publikoak berehala aldatu behar du irakasleen kategoria horretako lanpostuak eskuratzeko lehiaketei aplikatu beharreko baremoa, datorren ikasturteari ekiteko behar diren deialdiak onetsi baino lehen, eta geroagorako utzi behar du irakasleen lehiaketak arautzen dituen egungo araudiaren egokitzapen orokorra, aurtengo abenduaren 31ra arte aplikatzekoa dena, aipatutako lege organikoaren hamaikagarren xedapen iragankorrean ezarritakoaren arabera.
Erabaki honen bidez, aldatu egiten da, beraz, irakasle laguntzaile doktoreen lanpostuak lortzeko lehiaketei aplikatu beharreko baremoa, zeina Gobernu Kontseiluaren 2016ko irailaren 7ko erabaki baten bidez onetsi baitzen —erabaki horrek Nafarroako Unibertsitate Publikoan lotura iraunkorrik gabeko irakasleak kontratatzeko hautaketa-prozesuak arautzen dituen Erregelamendua onetsi zuen—, Unibertsitate Sistemari buruzko 2023ko martxoaren 22ko 2/2023 Lege Organikoan ezarritakora egokitzeko.
Horretarako, Irakasleen Gaietarako errektoreordeak proposatuta, Batzorde Akademikoari 2023ko apirilaren 18an egindako bileran entzun ondoren eta Nafarroako Unibertsitate Publikoan ordezkaritza duten sindikatuekin negoziatu ondoren, hau da Gobernu Kontseiluak, 2023ko apirilaren 25ean egindako bileran, hartu duen,
ERABAKIA:
Lehenbizikoa.–Irakasle laguntzaile doktoreen lanpostuak eskuratzeko lehiaketetan aplikatu beharreko baremoa aldatzea, Unibertsitate Sistemari buruzko 2023ko martxoaren 22ko 2/2023 Lege Organikoaren hirugarren xedapen iragankorrean adierazitakora egokitzeko. Baremo hori Gobernu Kontseiluaren 2016ko irailaren 7ko Erabakiaren bidez onetsi zen, zeinak Nafarroako Unibertsitate Publikoan lotura iraunkorrik gabeko irakasleak kontratatzeko hautaketa-prozesuak arautzen dituen Erregelamendua onetsi baitzuen. Baremo berria erabaki honen eranskinean dago jasoa.
Bigarrena.–Erabaki hau Nafarroako Unibertsitate Publikoaren iragarki-ohol elektronikoan eta Nafarroako Aldizkari Ofizialean argitaratzea.
Hirugarrena.–Erabaki honek Nafarroako Unibertsitate Publikoaren iragarki-ohol elektronikoan argitaratzen den egunean hartuko du indarra.
Laugarrena.–Erabaki honen aurka zilegi da berraztertzeko errekurtsoa aurkeztea Gobernu Kontseiluari zuzendua, hilabeteko epean, edo administrazioarekiko auzi-errekurtsoa Nafarroako maila bereko epaitegietan, bi hilabeteko epean, biak ere argitaratu eta biharamunetik kontatzen hasita."
Iruñean, 2023ko apirilaren 25ean.–Errektorea, Ramón Gonzalo García.
ERANSKINA
3.–Irakasle laguntzaile doktoreen lanpostuak.
Honako elementu hauek baloratuko dira, kontuan izanik beti eta apartatu guztietan zenbateko lotura dagoen jardueraren eta lanpostuaren profilaren artean. Apartatu bakoitzerako, 0 eta 1 bitarteko ponderazio faktore bat ezartzen ahalko da. Zorrotz justifikatua egon behar du ponderazio faktoreak, eta koherentea izan behar du erabiltzen den bakoitzean.
1. Merezimendu hauek baloratuko dira:
a) Ikerketa-lanak eta zientziaren arloko argitalpenak (gehienez 35 puntu).
b) Ikerketa-egonaldiak prestigio nabarmeneko unibertsitate edo ikerketa-zentroetan (lehiatzailearen lantokia edo prestakuntza-tokia ez den beste batean (gehienez 10 puntu).
c) Erakunde publikoek finantzatutako ikerketa-bekak (gehienez 5 puntu).
d) Espediente akademikoa (gehienez 10 puntu). Lehenik eta behin, espediente akademikoko batez besteko nota aritmetikoa kalkulatuko da, irakasgai bakoitzaren kreditu kopuruaren arabera ponderatuta. Horretarako, "Gainditua" kalifikazioari 1 puntu emanen zaio; "Oso ongi" kalifikazioari 2 puntu; "Bikain" kalifikazioari 3 puntu; eta "Ohorezko matrikula" kalifikazioari 4 puntu. Ez dira kontuan hartuko "Ez aurkeztua" eta "Ez gainditua" kalifikazioak.
Gero, batez besteko nota aritmetikoa bider 2,5 eginen da, eta hala lortuko da apartatu honen puntuazioa.
e) Doktoretza (gehienez 5 puntu).
f) Unibertsitateko irakaskuntza-jarduerak, dagokion kontratuarekin behar bezala justifikatuta (gehienez 15 puntu).
g) Lanpostuaren profilari lotutako irakasgai baten irakaskuntza-proiektua (gehienez 6 puntu).
h) Ikerketa-proiektua (gehienez 6 puntu).
i) Beste merezimendu batzuk (gehienez 8 puntu). Apartatu honetan hauek baloratuko dira, Batzordearen irizpidearen arabera: unibertsitatetik kanpo egindako jarduera profesionala, hizkuntzak, jasotako espezializazio ikastaroak, unibertsitateko beste titulazio batzuk, bekak, sariak eta lehiakideak aurkezten duen beste edozein merezimendu.
2. Lehentasunezko merezimendua (LOSUren hirugarren xedapen iragankorra): ANECAk emandako irakasle laguntzaile doktorearen akreditazioa dutenei puntuazio gehigarria emanen zaie: baremoko a), b) c), e), f) eta i) ataletan lortutako guztizko puntuazioaren baturaren %20.
Kontratazio proposamena egin ahal izateko, azken puntuazioa 50 puntukoa edo handiagoa behar da izan.
Iragarkiaren kodea: F2306512
