3. ESTATUKO ADMINISTRAZIOA
GOBERNUAREN ORDEZKARITZA
Jendaurreko informazioa, La Senda eta El Camino haize-parkeen eta energia ateratzeko haiei lotutako azpiegituren aurretiazko administrazio baimenaren, eraikitzeko administrazio baimenaren eta onura publikoaren deklarazioaren eskaerari buruzkoa (PEol-707 AC)
Hala ezarrita baitago Sektore Elektrikoari buruzko abenduaren 26ko 24/2013 Legearen 53.1.a) eta b) eta 54. artikuluetan, Argindarra garraiatu, banatu, merkaturatu eta hornitzeko jarduerak eta instalazioak baimentzeko prozedura arautzen dituen abenduaren 1eko 1955/2000 Errege Dekretuaren 122., 130. eta 143. artikuluetan, eta Nahitaezko Desjabetzeari buruzko 1954ko abenduaren 16ko Legearen 17., 18., 19. eta 52. artikuluetan, eta lege horren Erregelamenduaren 56. artikuluan (1957ko apirilaren 26ko Dekretua), jendaurrean jartzen da aurretiazko administrazio baimenaren, eraikitzeko administrazio baimenaren eta onura publikoaren deklarazioaren eskaera La Senda haize-parkearen (11,4 MW) eta El Camino haize-parkearen (22,8 MW) proiektuetarako, martxoaren 29ko 6/2022 Errege Lege Dekretuaren 7. artikuluan ezarritako prozedura erraztuaren arabera (errege lege dekretu horren bidez, Ukrainako gerraren ondorio ekonomiko eta sozialei erantzuteko plan nazionalaren esparruan presako neurriak hartu ziren). Espedienteak metatuta daude batera tramitatzeko "PEol-707 AC" espedientean. Hona hemen haien ezaugarriak:
Eskatzailea: Desarrollos Renovables del Norte SLU; helbidea: Avenida de Europa 10. 28108 Alcobendas (Madril).
Eskaeraren xedea: aurretiazko administrazio baimenaren, eraikitzeko administrazio baimenaren eta onura publikoaren deklarazioaren eskaera La Senda haize-parkearen (11,4 MW) eta El Camino haize-parkearen (22,8 MW) proiektuetarako.
Organo eskuduna: Trantsizio Ekologikorako eta Erronka Demografikorako Ministerioko Politika Energetikoaren eta Meategien Zuzendaritza Nagusia da aurretiazko administrazio baimenaz, eraikitzeko administrazio baimenaz eta onura publikoaren deklarazioaz ebazteko eskumena duen organo substantiboa.
Tramitazio organoa: Gobernuaren Nafarroako Ordezkaritzako Industria eta Energia Arlo Funtzionala, Nafarroako zatian. Alegazioak arlo funtzional horri zuzenduko zaizkio, Gobernuaren Nafarroako Ordezkaritzan, helbide honetan: Merindadeen plaza, z.g., 31071, Iruña.
Instalazioen deskribapena: Proiektuko haize-parkeak Azueloko, Aguilar Kodesko, Arasko eta Vianako udal-mugarteetan (Nafarroa) egonen dira, eta haietatik energia ateratzeko azpiegiturek ukituko dituzte Azueloko, Aguilar Kodesko (Nafarroa) eta Guardiako (Araba) udal-mugarteak.
Instalazioen ezaugarriak hauek dira:
–La Senda haize-parkea: 2 Nordex haize-sorgailu, 5,7 MW-ekoak; dorrean, 118 metroko altuera dute abatzek eta 163 metroko diametroa palek. Instalatu gogo den potentzia, guztira, 11,4 MW-ekoa da, eta 20 kV-eko lurpeko linea bat du.
–El Camino haize-parkea: 4 Nordex haize-sorgailu, 5,7 MW-ekoak; dorrean, 118 metroko altuera dute abatzek eta 163 metroko diametroa palek. Instalatu gogo den potentzia, guztira, 22,8 MW-ekoa da, eta 20 kV-eko lurpeko linea bat du.
–Las Llanas Kodes azpiestazioa; 220/12 transformazio posizio bat dauka jada (55 MVA-koa) eta gaur egun hara joaten da Aras haize-parkeko energia. Erantsita paratuko da 20/12 kV-eko ebakitze eta transformazio zentro bat, 13 MVA-koa La Senda haize-parkerako, eta, El Camino haize-parkerako, berriz, oraingo 220/20 kV-eko transformazio posizio bat egonen da, 75 MVA-koa (egun hara joaten da Azuelo haize-parkeko energia). Foru Komunitatean izapidetuko da.
–"Las Llanas Kodes TAE - Guardia 220 kV-eko TAE" 220 kV-eko goi tentsioko aireko linea (egun haren bidez ateratzen da martxan dauden hainbat haize-parketako energia).
–Guardia 220 kV-eko TAE, REErena.
Aurrekontu zenbatetsia: La Senda haize-parkea eta energia ateratzeko azpiegitura: El Camino haize-parkea eta energia ateratzeko azpiegitura: 22.734.870 euro.
Helburua: Energia elektrikoa sortzea bi haize-parkeren bidez, eta hura ateratzea energia elektrikoaren garraio sarera.
Eskatzaileak aurretiazko administrazio baimenaren, eraikitzeko administrazio baimenaren eta onura publikoaren deklarazioaren eskaera egin du proiektu horietarako. Hura onesteko eskumena Trantsizio Ekologikorako eta Erronka Demografikorako Ministeriorena da, eta Gobernuaren Nafarroako Ordezkaritzako Industria eta Energiako Arloarena, berriz, aipatutako ebazpenen eskaerari buruzko administrazio espedientea izapidetzea. Proiektuak jendaurreko informazioaren eta administrazio publikoei informazioa emateko izapideen mende daude, abenduaren 1eko 1955/2000 Errege Dekretuaren 125., 127. eta 131. artikuluetan xedatutakoaren arabera (errege dekretu horren bidez, argindarra garraiatu, banatu, merkaturatu eta hornitzeko jarduerak eta instalazioak baimentzeko prozedura arautzen dira). Hala ere, izapide horiek bateratu egiten dira, eta aurreikusitako epe guztiak erdira murrizten dira.
Sektore Elektrikoari buruzko 24/1997 Legearen 54. artikuluan ezarritakoaren arabera, "energia elektrikoa sortu, garraiatu eta banatzeko instalazio elektrikoen onura publikoa deklaratzen da haiek ezartzeko behar diren ondasun eta eskubideen nahitaezko desjabetzearen ondorioetarako eta bide zortasuna ezarri eta erabili ahal izateko.
Onura publikoaren berariazko aitorpena egiteko, Sektore Elektrikoari buruzko abenduaren 26ko 24/2013 Legearen 55. artikuluan ezarritakoaren arabera, beharrezkoa da enpresa interesdunak eskatzea, eta, horrekin batera, bere iritziz desjabetu beharko liratekeen ondasun eta eskubideen banakako zerrenda zehatza aurkeztuko du.
Onura publikoaren deklarazioak berekin ekarriko ditu Sektore Elektrikoari buruzko 24/2013 Legearen 56. artikuluan eta goian aipatutako 1955/2000 Errege Dekretuaren 149. artikuluan adierazitako ondorioak.
Eta hori guztia aditzera ematen da orok jakin dezan eta aztertu ahal izan daitezen proiektuak eta lurzatien planoak, alegia dokumentu guztiak, teknikoak eta ingurumenari buruzkoak, Gobernuak Nafarroan duen Ordezkaritzako Industria eta Energia Arloaren bulegoetan (Merindadeen plaza z.g., 31071, Iruña), aurretik hitzordua eskatuta, edo esteka honetan:
https://www.mptfp.gob.es/eu/portal/delegaciones_gobierno/delegaciones/navarra/proyectos-ci.html
Era berean, eta bat etorriz goian aipatutako 1955/2000 Errege Dekretuaren 144. artikuluarekin, proiektuaren ukipenak zehazten dituen eta proiektuak ukitutako ondasun eta eskubideen banakako zerrenda zehatza jasotzen duen dokumentu teknikoa aztergai egonen da iragarki honetan aipatutako udal-mugarteetako udaletxeetan.
Interesdunek bidezkotzat jotzen dituzten alegazioak aurkezten ahal dituzte, arlo honi zuzenduak, iragarki hau argitaratu eta biharamunetik hasita 15 eguneko epean, bai idatziz, euskarri fisiko batean, Gobernuaren Ordezkaritzaren Erregistro Orokorrean, bai Estatuko Administrazio Orokorraren Erregistro Elektronikoaren bidez (https://rec.redsara.es), bai Administrazio Publikoen Administrazio Prozedura Erkideari buruzko urriaren 1eko 39/2015 Legearen 16. artikuluan adierazten diren moduetan.
Ondoren, argitara ematen da, eskatzailearen iritziz, desjabetu beharko liratekeen ondasun eta eskubide ukituen banakako zerrenda zehatza, batzuetan lurren jabari osoa desjabetuz, eta beste batzuetan bide zortasuna ezarriz energia elektrikorako eta zerbitzu osagarrietarako, konparazio batera, sarbideak edo beste instalazio osagarri batzuk.
1. eranskinean, El Camino haize-parkearen zerrenda eta, 2. eranskinean, La Senda haize-parkearen zerrenda.
El Camino eta La Senda haize-parkeek ukitutako ondasun eta eskubideen zerrenda (PDFa).
Iruñean, 2023ko otsailaren 10ean.–Industria eta Energia Arloko zuzendaria, Ignacio Irujo Sanz.
Iragarkiaren kodea: E2302798
