Iragarkia

49. ALDIZKARIA - 2023ko martxoaren 9a

1. NAFARROAKO FORU KOMUNITATEA

1.7. BESTELAKOAK

8/2023 FORU AGINDUA, otsailaren 15ekoa, Lurralde Kohesiorako kontseilariak emana, Nafarroako Foru Komunitatean despopulazio-arriskuan dauden udalerrien zerrenda onesten duena.

Lurralde Kohesiorako Departamentuaren egitura organikoa ezartzen duen urriaren 30eko 263/2019 Foru Dekretuaren 1. artikuluak departamentu honi esleitzen dio despopulazioaren aurkako estrategia kudeatzeko eskumena.

Bestalde, 8. artikuluak ahalmena ematen dio Toki Administrazioaren eta Despopulazioaren Zuzendaritza Nagusiari Nafarroako Foru Komunitateko erronka demografikoaren eta despopulazioaren aurkako estrategiarekin zerikusia duten neurriak aztertu, koordinatu, proposatu eta izapidetzeko.

Erronka demografikoa eta despopulazioa modu integralean bideratu behar dira. Eraldaketak behar dituzte, ekintza publikoaren hainbat eremutan. Toki Administrazioaren eta Despopulazioaren Zuzendaritza Nagusiak gai horiei buruzko ekimenak garatu eta gauzatzen ditu.

Toki Administrazioaren eta Despopulazioaren Zuzendaritza Nagusiko Aholkularitza Juridikorako eta Lankidetzarako Zerbitzuari atxikitako Toki Informazioaren eta Despopulazioaren aurkako Borrokarako Estrategiaren Atalak azterlan bat burutu du, honela deitzen dena: "Nafarroan Despopulatzeko Arriskuan dauden Eremuen Mapa. Nafarroako despopulazioaren zonifikazioa eta kategorizazioa". Web atarian argitaratu da (https://administracionlocal.navarra.es/areas/Despoblacion-MapaNavarra/default.aspx), eta bertan, Nafarroako Foru Komunitateko udalerriak 0, 1., 2., 3., 4., 5. eta 6. motetan sailkatu dira, duten despopulazio-arriskuaren arabera.

Aurreko mota horien sailkapena parametro hauetan oinarritzen da: 0 mota, despopulazio-arriskurik gabeko udalerriak; 1. mota, despopulazio-arrisku muturrekoan dauden udalerriak, 8 biz/km² edo gutxiagoko biztanleria-dentsitatearekin; 2. mota, despopulazio-arrisku bizian dauden udalerriak, 12,5 biz/km² edo gutxiagoko eta 8 biz/km² baino gehiagoko biztanleria-dentsitatearekin; 3. mota, despopulazio-arrisku esanguratsuan dauden udalerriak, 25 biz/km² edo gutxiagoko eta 12,5 biz/km² baino gehiagoko biztanleria-dentsitatearekin; 4. mota, gainbehera bizia duten udalerriak, 25 biz/km² baino gehiagoko biztanleria-dentsitatearekin eta 1989 eta 2019 arteko hogeita hamar urteetan %15eko edo gehiagoko biztanleria-murrizketarekin; 5. mota, gainbehera moderatua duten udalerriak, 25 biz/km² baino gehiagoko biztanleria-dentsitatearekin eta 1989 eta 2019 arteko hogeita hamar urteetan %15etik beherako biztanleria-murrizketarekin; 6. mota, udalerri kalteberak, 200 biztanletik beherako biztanleguneak dituztenak, biztanle asko galtzeko joera dutenak eta udalerriaren bideragarritasun-arriskua dutenak, mende honetan (2000-2019) biztanleria garbia galdu dutenak edo despopulazio-arriskuan dauden udalerrien artean daudenak, biztanleria-hazkunde nabarmenik gabe. Era berean, trakzio udalerriaren kategoria ezarri da. Udalerri hori, aipatutako motetako batekoa izanik, erreferentzia da inguruko udalerrientzat zerbitzuak emateko orduan, eta bere jarduketa-eremuko udalerrien despopulazio-arriskuari dagokionez, joera-aldaketa lideratzen du.

Azterlan horrek zehazten duenez, 1., 2., 3., 4. eta 5. motetan sailkatutako udalerriak despopulazio-arriskuan daude.

Zenbait zerga aldatu eta beste tributu-neurri batzuk hartzeari buruzko abenduaren 28ko 36/2022 Foru Legeak, bosgarren artikuluan, hitzaurrearekin lotuta, ezartzen du du despopulazio-arriskuan dauden udalerriak Lurralde Kohesiorako Departamentuko kontseilariaren foru agindu bidez ezarritakoak izanen direla.

Beraz, Nafarroako Foru Komunitateko Administrazioan beharrezkoa da despopulazio-arriskuan dauden udalerrien zerrenda bat edukitzea, aipatutako foru legean aurreikusitako ondorioetarako.

Foru agindu hau Toki Araubideko Foru Batzordeari jakinaraziko zaio horretarako egiten den lehen bilkuran.

Horrenbestez, erabiliz Nafarroako Gobernuari eta Lehendakariari buruzko abenduaren 3ko 14/2004 Foru Legearen 41. eta 56. artikuluen bidez eta Lurralde Kohesiorako Departamentuaren egitura organikoa ezartzen duen urriaren 30eko 263/2019 Foru Dekretuaren 1. artikuluren bidez esleitu dizkidaten eskudantziak,

AGINTZEN DUT:

1. Nafarroako Foru Komunitatean despopulazio-arriskuan dauden udalerrien zerrenda onestea, foru agindu honen I. eranskinean jasotakoa.

2. Haren aplikazioa ezartzea Nafarroako Foru Komunitateko Administrazioan, Zenbait zerga aldatu eta beste tributu-neurri batzuk hartzeari buruzko abenduaren 28ko 36/2022 Foru Legea indarrean jartzen denetik aurrerako ondorioekin.

3. Foru agindu hau igortzea Lurralde Kohesiorako Departamentuko Idazkaritza Tekniko Nagusira eta Ekonomia eta Ogasun Departamentuko Idazkaritza Tekniko Nagusira, behar diren ondorioak izan ditzan.

4. Foru agindu hau Nafarroako Aldizkari Ofizialean argitaratzea, eta aditzera ematea administrazio publikoek haren aurka administrazioarekiko auzi-errekurtsoa jar dezaketela, Nafarroako Justizia Auzitegi Nagusiko Administrazioarekiko Auzien Salari zuzendua, bi hilabeteko epean, argitaratu eta biharamunetik hasita. Horrek ez du galarazten Nafarroako Gobernuan aldez aurreko errekerimendua egin ahal izatea, Administrazioarekiko Auzien Jurisdikzioa arautzen duen uztailaren 13ko 29/1998 Legearen 44. artikuluan aurreikusitako moduan eta epean.

Iruñean, 2023ko otsailaren 15ean.–Lurralde Kohesiorako kontseilaria, Bernardo Ciriza Pérez.

I. ERANSKINA

Despopulazio-arriskuan dauden Nafarroako Foru Komunitateko udalerrien zerrenda

Oharrak:

1. CMUN Nastatek argitaratzen duen Nafarroako Izendegiko udalerri-kodea da.

2. Despopulazio-arrisku mota (1etik 5era) despopulazio-arrisku motaren deskribapen honi dagokio:

Iragarkiaren kodea: F2302801