1. NAFARROAKO FORU KOMUNITATEA
1.7. BESTELAKOAK
433E/2023 EBAZPENA, azaroaren 21ekoa, Ekonomia Zirkularraren eta Klima Aldaketaren Zerbitzuko zuzendariak emana, zeinaren bidez partez onartzen baita Caparrosoko udal-mugartean dagoen eta biodiesela eta produktu oleaginosoak ekoizten dituen instalazio baten ingurumen baimen integratuan ezarritako funtzionamendu baldintzei dagokienez eskatutako aldaketa. Horren ondorioz, instalazioak eta hango jarduerak ebazpen honen eranskinean ezarritako baldintzak bete beharko dituzte. Instalazioaren titularra Tech Natural Oleo SL da.
Instalazio horrek badu ingurumen baimen integratua, Ingurumeneko, Lurraldearen Antolamenduko eta Etxebizitzako kontseilariaren 360/2006 Foru Aginduaren bidez emana, eta ondoren Ekonomia Zirkularraren eta Uraren zuzendari nagusiaren 2E/2019 Ebazpenak eta 141E/2019 Ebazpenak aldatua.
2023ko uztailaren 21ean, titularrak bere ingurumen baimen integratuan dauden baldintzak aldatzeko eskatu du, zehazki, ingurumen baimen integratuaren III. eranskinean, instalazioan sortzen diren hondakinen zerrendan, zenbait hondakin mota berri sartzeko.
Ekonomia Zirkularraren eta Klima Aldaketaren Zerbitzuak berrikusi du aurkeztutako eskaera, eta balorazio hau egin:
EHZ KODEA | DESKRIBAPENA | BALORAZIOA |
130205* | Olio erabilia | Onartu da sortutako hondakinen zerrendan sartzea. Motor-olio mineral kloratu gabeen, transmisio mekanikokoen eta lubrifikatzaileen deskribapena esleitzen zaio, Batzordearen 2014ko abenduaren 18ko Erabakian jasotakoa. |
130502* | Olioak dituzten urak/lohiak | Onartu da sortutako hondakinen zerrendan sartzea. Ura eta olio-gaiak bereizteko lohien deskribapena esleitzen zaio, Batzordearen 2014ko abenduaren 18ko Erabakian jasotakoa. |
160215* | Baztertutako ekipoetatik kendutako osagai arriskutsuak | Onartu da sortutako hondakinen zerrendan sartzea. |
160504* | Aerosol hutsak | Onartu da sortutako hondakinen zerrendan sartzea. |
190805 | Hiriko hondakin urak tratatu ondoko lohiak. | Onartu da sortutako hondakinen zerrendan sartzea. |
191212 | Zabor industriala | Ez da onargarria. Eskatutako kodea hondakinen tratamendu mekanikotik sortutako beste hondakin batzuei dagokie. Instalazioak ez du egiten hondakinen tratamendu mekanikoaren prozesurik. |
200121* | Fluoreszenteak | Onartu da sortutako hondakinen zerrendan sartzea. |
Onartutako aldaketek ez dute eragozten instalazioaren funtzionamendu egokia ingurumenari dagokionez, eta bat datoz ingurumen baimen integratuan ezarritako gehieneko isurketa balioekin eta gainerako eskakizunekin, bai eta teknika erabilgarri onenen aplikazioarekin ere.
Kasu honetan, Ingurumenean Eragina duten Jarduerak arautzen dituen abenduaren 16ko 17/2020 Foru Legea garatzeko Erregelamenduaren 35. artikuluan ezarritako inguruabarrak gertatzen direla uste da, eta, ondorioz, bidezkoa da ingurumen baimen integratuan ezarritako baldintzak ofizioz aldatzea, artikulu horretan ezarritako administrazio prozedurarekin bat etorriz, eta ez da egokitzat jotzen aldaketa-espediente hau jendaurrean jartzea.
Ebazpen proposamena instalazioaren titularrari entzunaldia emateko tramitean egon da hamabost egunez, eta hark ez du proposamenaren aurkako alegaziorik aurkeztu.
Adierazitakoarekin bat, eta Ingurumeneko zuzendari nagusiak azaroaren 8an emandako 107/2019 Ebazpenaren bidez eskuordeturik ditudan eskumenak erabiliz,
EBAZTEN DUT:
Lehendabizikoa.–Partez onartzea Caparrosoko udal mugartean dagoen eta biodiesela eta produktu oleaginosoak ekoizten dituen instalazio baten ingurumen baimen integratuan ezarritako funtzionamendu baldintzei dagokienez eskatutako aldaketa; horren ondorioz, instalazioak eta jarduerak berak ebazpen honen eranskinean adierazitako baldintzak bete beharko dituzte. Instalazioaren titularra Tech Natural Oleo SL da.
Bigarrena.–Ebazpen honetan jasotako baldintzak betetzen ez badira, Kutsaduraren Prebentzio eta Kontrol Integratuaren Legearen testu bateginaren IV. tituluan jasotako ingurumen-diziplinako neurriak hartuko dira (abenduaren 16ko 1/2016 Legegintzako Errege Dekretuaren bidez onetsi zen testu bategina), eta, subsidiarioki, Ingurumenean Eragina duten Jarduerak arautzen dituen abenduaren 16ko 17/2020 Foru Legearen III. tituluan ezarritako zehapen-araubidean jasotakoak, ezertan galarazi gabe legeria sektorialean ezarritakoa, aurrerantzean ere aplikatu beharko baita.
Hirugarrena.–Ebazpen hau Nafarroako Aldizkari Ofizialean argitaratzea.
Laugarrena.–Ebazpen honek ez du administrazio bidea amaitzen, eta espedientean interesa dutenek, administrazio publikoek izan ezik, gora jotzeko errekurtsoa jartzen ahalko dute haren kontra, Landa Garapeneko eta Ingurumeneko kontseilariari zuzendua, hilabeteko epean. Administrazio publikoek administrazioarekiko auzi-errekurtsoa jar dezakete, Nafarroako Justizia Auzitegi Nagusiko Administrazioarekiko Auzien Salari zuzendua, bi hilabeteko epean. Horrek ez du galarazten Nafarroako Gobernuari aurretiazko errekerimendua egin ahal izatea, Administrazioarekiko Auzien Jurisdikzioa arautzen duen uztailaren 13ko 29/1998 Legearen 44. artikuluan ezarritako moduan eta epean. Ebazpen hau jakinarazi eta biharamunetik aurrera kontatuko dira epeak.
Bosgarrena.–Ebazpen hau Tech Natural Oleo SLri eta Caparrosoko Udalari igortzea, behar diren ondorioak izan ditzan.
Iruñean, 2023ko azaroaren 21ean.–Klima Aldaketaren Ataleko burua, Javier Vera Janín, Ekonomia Zirkularraren eta Klima Aldaketaren Zerbitzuko zuzendariaren ordez, Ingurumeneko zuzendari nagusiaren 291E/2019 Ebazpenean xedatutakoari jarraikiz.
Oharra: ebazpen honetan aipatzen diren eranskinak interesdunen eskura egonen dira Ingurumen Zuzendaritza Nagusiaren bulegoetan (González Tablas kalea 9, behea, Iruña; Ekonomia Zirkularraren eta Klima Aldaketaren Zerbitzua) eta Nafarroako Gobernuaren webgune honetan: https://extra.navarra.es/InformacionPublicaPRTR/CentroPublicaciones.html#/CentroPublicaciones.
Iragarkiaren kodea: F2316782
