Iragarkia

208. ALDIZKARIA - 2023ko urriaren 5a

1. NAFARROAKO FORU KOMUNITATEA

1.7. BESTELAKOAK

2091/2023 EBAZPENA, 2023ko irailaren 29koa, Nafarroako Unibertsitate Publikoko errektoreak emana. Haren bidez agintzen da argitaratzeko Gobernu Kontseiluak 2023ko irailaren 29an onetsitako "Erabakia, Nafarroako Unibertsitate Publikoko ordezko irakasleak hautatzeko eta kontratatzeko prozesua arautzen duen Erregelamendua onesten duena".

2003ko maiatzaren 12ko 110/2003 Foru Dekreturen bidez onetsi ziren Unibertsitateko Estatutuetako 40. artikuluak ematen dizkidan eskumenak erabiliz, agindua ematen dut Gobernu Kontseiluak 2023ko irailaren 29an hartutako erabakia argitaratzeko. Erabaki horren bidez, Nafarroako Unibertsitate Publikoko ordezko irakasleak hautatzeko eta kontratatzeko prozesua arautzen duen Erregelamendua onetsi da.

"GOBERNU KONTSEILUAREN ERABAKIA, NAFARROAKO UNIBERTSITATE PUBLIKOKO ORDEZKO IRAKASLEAK HAUTATZEKO ETA KONTRATATZEKO PROZESUARI BURUZKO ERREGELAMENDUA ONESTEN DUENA

Unibertsitate Sistemari buruzko 2023ko martxoaren 22ko 2/2023 Legeak (LOSU) 80.1 artikuluan jasotzen du irakasleak kontratatzeko aukera dagoela honako hauen ordezkapenak egiteko: irakasle eta ikertzaileak, lanpostua erreserbatzeko eskubidea dutenak eta ematen dituzten zerbitzuak aldi baterako eteten dituztenak baimenak, lizentziak edo zerbitzu aktiboa ez den beste egoera administratibo batzuk -iraupen luzeko baja medikoak barne- erregulatzen dituen araubidea aplikatzearen ondorioz.

LOSUren arabera, aplikatzekoak diren lehiaketa publikoko prozeduren bidez hautatuko dira ordezko irakasleak, eta unibertsitateek lanpostu horiek kudeatzeko eta betetzeko tresna espezifikoak ezartzen ahalko dituzte, lan poltsak barne. Kontratuak ezin izanen du gainditu ordeztutako irakasleari esleitutakoa, eta ezin izanen da kontratazioko unibertsitatean beste izaera bateko jarduera unibertsitarioetara zabaldu, hala nola ikerkuntzara edo kudeaketako eta koordinazioko egiturazko funtzioak betetzera, salbu eta lanpostu horiek irakaslanarekin lotura zuzena badute. Kontratuaren iraupena, berritzeak edo luzapenak barne, kontratua justifikatu zuen arrazoi objektiboaren araberakoa izanen da.

Nafarroako Unibertsitate Publikoak ez du ordezko irakasleak LOSUren 80.1 artikuluak ezarritako baldintzetan hautatzeko eta kontratatzeko araudirik. Bereziki garrantzitsua da lan poltsak sortzeko eta kudeatzeko araubideak bidea ematea irakasleen ordezkapenak egin behar diren uneetan kontratazioa arin egiteko.

Horregatik, Erregelamendu honen xedea Nafarroako Unibertsitate Publikoko ordezko irakasleak hautatzeko eta kontratatzeko prozesua arautzea da, 2023ko martxoaren 22ko Unibertsitate Sistemari buruzko 2/2023 Lege Organikoaren (LOSU) 80.1 artikulua garatuz.

Horretarako, Irakasleen Gaietarako errektoreordeak proposatuta eta ordezkari sindikalei entzun eta gero, honako hau da Nafarroako Unibertsitate Publikoko Gobernu Kontseiluak 2023ko irailaren 29an egindako bileran hartu duen

ERABAKIA:

Lehenbizikoa.–Nafarroako Unibertsitate Publikoko ordezko irakasleak hautatzeko eta kontratatzeko prozesua arautzen duen Erregelamendua onestea, erabaki honen eranskinean jasotzen den bezala.

Bigarrena.–Erabaki hau sailetako zuzendariei, Giza Baliabideen Zerbitzuko zuzendariari eta Irakasleen Gaietarako errektoreordeari adieraztea.

Hirugarrena.–Erabaki hau Nafarroako Unibertsitate Publikoaren iragarki ohol elektronikoan eta Nafarroako Aldizkari Ofizialean argitaratzea.

Laugarrena.–Erabaki honen aurka zilegi da berraztertzeko errekurtsoa aurkeztea Gobernu Kontseiluari zuzendua, hilabeteko epean, edo administrazioarekiko auzi-errekurtsoa Nafarroako maila bereko epaitegietan, bi hilabeteko epean, biak ere argitaratu eta biharamunetik kontatzen hasita."

Iruñean, 2023ko irailaren 29an.–Errektorea, Ramón Gonzalo García.

NAFARROAKO UNIBERTSITATE PUBLIKOAN ORDEZKO IRAKASLEAK HAUTATZEKO ETA KONTRATATZEKO PROZESUAREN ERREGELAMENDUA

I. TITULUA.–XEDAPEN OROKORRAK

1. artikulua. Xedea.

1. Erregelamendu honen xedea Nafarroako Unibertsitate Publikoko ordezko irakasleak hautatzeko eta kontratatzeko prozesua arautzea da, 2023ko martxoaren 22ko Unibertsitate Sistemari buruzko 2/2023 Lege Organikoaren (LOSU) 80.1 artikulua garatuz.

2. artikulua. Araubide juridikoa.

LOSU legean, hura garatzeko araudian, erregelamendu honetan, deialdien oinarrietan eta aplikatzekoak diren gainerako arau orokorretan xedatutakoak arautuko du ordezko irakasleen hautaketa eta kontratazioa.

3. artikulua. Printzipioak.

Lehiaketa publikoaren bidez kontratatuko dira ordezko irakasleak, eta lehiaketa horrek izangaien aukera-berdintasuna eta merezimendu-, gaitasun-, publizitate- eta lehia-printzipioak bermatuko ditu beti, bai eta Nafarroako Unibertsitate Publikoan errekurtsoa jartzeko aukera ere.

LOSU legearen 80.1 artikuluari jarraikiz, lan poltsak sortzen ahalko dira ordezko irakasleen kontratazioa kudeatzeko eta kontratazio beharrei erantzuteko baliabide espezifiko gisa.

4. artikulua. Kontratazioaren ezaugarriak.

Zilegi da langileak kontratatzea lanpostua erreserban gordetzeko eskubidea duten irakasle eta ikertzaileak ordezteko, LOSU legearen 80.1 artikuluaren arabera.

1. Honako egoera hauei erantzuteko erabiltzen ahalko da kontratua:

a) Baimenak eta lizentziak.

b) Zerbitzu aktiboa ez den beste egoera administratibo batzuk.

c) Zerbitzu eginkizunak.

d) Lanaldi murriztuak.

e) Irakasle-lanaldi murriztuak kudeatzaile karguren bat izateagatik Unibertsitatean edo beste mota bateko irakasle-lanaldi murriztuak aintzatespenen bat dela kausa, betiere Unibertsitatearen barne araudian jasoa badago.

2. Ezaugarri hauek izanen ditu kontratazioak:

a) Helburu bat bakarra izanen du kontratuak: irakasle-lanak egitea; ez dira sartuko ez ikerketa-lanak, ez kudeaketakoak. Horregatik, lanaldi partzialekoak izanen dira beti kontratuak.

b) Ordainsariak erregelamendu honen 20. artikuluan jasotakoak izanen dira.

c) Lan poltsak erabiliko dira ordezko irakasleak kontratatzeko, eta erregelamendu honetako prozeduraren arabera sortuko dira lan poltsa horiek.

II. TITULUA.–LAN POLTSAK SORTZEA ETA ORDENATZEA

5. artikulua. Lan poltsak sortzeko lehiaketen deialdiak.

1. Lan poltsak sortzeko lehiaketa publikoaren deia irakasleen gaietan eskumena duen errektoreordeak eginen du ebazpen baten bidez hiru urtean behin, ahal dela apirilean, eta ikasturtearen hasieran erabiltzeko aurrerapen askirekin beti.

2. Gobernu Kontseiluak onetsiko du, sailek proposatuta, zenbat lan poltsatarako deia eginen den eta zein arlotakoa izanen den bakoitza; normalean, ahalik eta arlo gehien sartuko dira lan poltsa bakoitzean. Salbuespen gisa, zilegi izanen da Osasun Zientzien arloetarako lan poltsak espezialitate medikoak irizpidetzat hartuta eratzea.

Sailari egoki irudituz gero, hizkuntza irizpidetzat hartuta ere egiten ahalko dira lan poltsetarako deiak.

3. Deialdietan, honako datu hauek jaso behar dira:

a) Zein den lan poltsaren aplikazio eremua.

b) Zer baldintza bete behar dituzten izangaiek.

c) Eskaerak nola eta noiz aurkeztu behar dituzten.

d) Nor diren hautaketa-batzordeetako kideak.

e) Nolakoak diren ordezko irakasleak hautatzeko sistema, merezimenduak puntuatzeko baremoa eta ordezko irakasleak hautatzeko prozesua, eta zenbat puntu behar dituzten gutxienez lan poltsan sartzeko, I. eranskinaren arabera.

f) Zer baliabide eta leku ofizialetan argitaratuko diren prozesuan zehar sortutako ebazpenak, prozesuan egin beharreko jakinarazpenen ondorioetarako.

g) Zer kontratu mota eta ordainsari emanen zaizkien.

4. Nafarroako Unibertsitate Publikoko ohol elektronikoan argitaratuko da lan poltsetarako deialdia egiteko ebazpena, eta unibertsitateen gaietan eskumena duen ministerioak irakasle eta ikertzaileen lehiaketetarako duen erregistro publikoari emanen zaio aditzera.

6. artikulua. Lan poltsen tramitazioa eta kudeaketa.

Giza Baliabideen Zerbitzuak du eskumena erregelamendu honetan deskribatutako lan poltsak sortzeko deialdiak tramitatzeko, galarazi gabe beste organo batzuek eginkizun horretarako eskumenak espresuki esleituak edukitzea. Giza Baliabideen Zerbitzuak kudeatuko ditu, orobat, ordezko irakasleak kontratatzeko prozesuarekin zerikusia duten deialdi, kontratazio eta gorabehera guztiak.

7. artikulua. Parte hartzeko baldintzak.

1. Lan poltsak eratzeko deialdietan parte hartu ahal izateko, honako baldintza hauek bete behar dituzte izangaiek:

a) 16 urte baino gehiago izatea, eta erretiro adina betea ez izatea.

b) Ez edukitzea gaixotasunik, ez muga fisikorik, ez psikikorik, funtzio publikoak betetzea galarazten duenik.

c) Ez egotea baztertua edozein administrazio publikotako zerbitzutik diziplina-espediente bat dela kausa, ez egotea ezgaitua funtzio publikoak betetzeko, eta ez edukitzea irakaskuntzarekin bateraezina den kargu edo funtzioren bat. Espainiako nazionalitatea ez duten izangaien kasuan, baldintza hau betetzeko beharrezkoa izanen da norberaren Estatuan funtzio publikora sartzea galarazten duen diziplina-zehapen edo kondena penalik ez edukitzea.

d) Unibertsitateko titulu bat edukitzea: lizentziatura, ingeniaritza, arkitektura, unibertsitate gradua, unibertsitate masterra edo doktoretza. Hala ere, kontratazio jakin batzuetarako, zilegi izanen da titulazio maila jakin bat eskatzea. Gainera, Osasun Zientzietako lan poltsetarako, espezialitate mediko jakin bateko titulazioa eduki beharko da, deialdian hala eskatzen bada.

e) Atzerriko tituluak behar bezala homologatuak egon behar dira edo baliokidetasuna aitortua eduki behar dute.

f) Izangaiak Europar Batasunekoak ez badira, Espainian legez bizitzea. Espainian bizi ez diren atzerritarrek ere parte hartzeko aukera izanen dute, betiere parte hartzeko baldintzak betetzen badituzte. Kasu horretan, atzerritarrei buruzko legeek eskatzen dituzten baimenak lortu beharko dituzte kontratazioa egin ahal izateko.

g) Espainiako nazionalitatea ez dutenek gaztelania maila egokia eduki behar dute. Hori egiaztatzeko dokumenturik ez badute, NUPek zilegi izanen du proba bat egitea, gaztelaniaz ahoz eta idatziz behar bezala komunikatzeko gai direla ziurtatzeko.

2. Baldintza espezifikoak:

Kontuan hartuta zer irakasteko beharra dagoen, zilegi izanen da baldintza espezifikoak eskatzea, besteak beste hizkuntza jakin batzuetan aritzen jakitea.

3. Eskaerak aurkezteko epea bukatzen den egunean bete behar dira deialdiko baldintzak –deialdi bakoitzaren oinarrietan ezarritako epean–, bai eta kontratua sinatzen denera arte ere.

Nahiz eta hizkuntza jakin batean aritzen jakitea ez izan lan poltsa zehatz batean parte hartzeko baldintza, izangaiek noiznahi aurkezten ahalko dute dakizkiten hizkuntzen mailaren egiaztagiria Nafarroako Unibertsitate Publikoko erregistro elektronikoan. Hartara, hautagai izanen dira une horretatik aurrera baldintza hori eskatzen duten lanpostuak betetzeko.

Era berean, masterreko titulu ofizial baten egiaztagiria ere aurkezten ahalko dute noiznahi Nafarroako Unibertsitate Publikoaren erregistro elektronikoan. Hala, hautagai izanen dira une horretatik aurrera baldintza hori eskatzen duten lanpostuetarako.

8. artikulua. Eskaerak eta onarpena.

1. Lehiaketetan parte hartu nahi dutenek eskabidea bete eta NUPen egoitza elektronikoaren bidez aurkeztu behar dute Nafarroako Unibertsitate Publikoko Giza Baliabideen Zerbitzuan.

2. Interesdunek eskabidean espresuki adierazi behar dute zein lan poltsatan parte hartu nahi duten.

3. Eskaerak aurkezteko epea 10 egun baliodunekoa izanen da, deialdia argitaratu eta biharamunetik kontatzen hasita.

4. Eskabidearekin batera, honako agiri hauek aurkeztu behar dituzte interesdunek:

a) Eskabide inprimakia, deialdiko ereduarekin bat datorrena (harremanetarako datu guztiak adierazi behar dituzte inprimakian, eta zer hizkuntza eta campus nahiago dituzten).

b) Parte hartzeko behar den titulazio akademiko ofizialaren fotokopia.

c) Hizkuntzaren bat jakitea beharrezkoa bada, hizkuntza horren maila egiaztatzen duen ziurtagiri ofiziala. Hori egiaztatzeko dokumenturik ez badute, NUPek zilegi izanen du proba bat egitea, gaztelaniaz ahoz eta idatziz behar bezala komunikatzeko gai direla ziurtatzeko.

d) Osasun Zientzietako lan poltsetarako, espezialitate mediko jakin baten egiaztagiria, deialdian parte hartzeko baldintza bada.

5. Lehiaketan parte hartzeko eskaerak aurkezteko epea bukatutakoan, lan poltsa bakoitzaren deialdian xedatutakoa betez onartu eta baztertu diren izangaien behin-behineko zerrenda argitaratuko da, eta, baztertu diren izangaien kasuan, zergatia adieraziko da.

Zerrenda horrekin batera, hizkuntza-proba egiteko onartu diren izangaien zerrenda argitaratuko da, bai eta proba non, zer egunetan eta zer ordutan eginen den ere.

Unibertsitateak merezimenduen egiaztagiriak telematikoki aurkezteko eskatuko die izangai guztiei, deialdian ezarritakoaren arabera.

6. Behin-behinean baztertu diren izangaiek edo zerrendan sartu ez direnek 5 egun balioduneko epea izanen dute, behin-behineko zerrenda argitaratu eta biharamunetik kontatzen hasita, lehiaketatik behin-behinean baztertzeko arrazoia akatsen bat izan bada, akatsak zuzentzeko eta erreklamazioak egiteko.

7. Epe horretan ez badute zuzentzen lehiaketatik behin-behinean baztertzeko arrazoia izandako akatsa, lehiaketatik behin betiko baztertuak geldituko dira.

8. Epe hori pasa ondoren, izangai onartuen eta baztertuen behin betiko zerrenda argitaratuko da egoitza elektronikoan.

9. Lehiaketan parte hartzeko baldintzen egiaztagiriak ez aurkezteagatik izangaia behin-behinean baztertzea galarazi gabe, ezin zuzenduzko baztertzeko arrazoiak dira eskaera epez kanpo aurkeztea eta lehiaketaren bidez lortu nahi den lanposturako bete behar diren baldintzak ez betetzea.

10. Izangaiek ezin izanen dituzte aldatu eskaeran egindako aukerak, ez eta beste merezimendu batzuk alegatu edo justifikatu ere, lan poltsa indarrean dagoen bitartean, non eta ez den hizkuntzen jakintza-maila edo masterreko titulu ofiziala egiaztatzeko –deialdian xedatutakoari jarraikiz–; nolanahi ere, horrek ez duen ekarriko merezimenduak berriz baloratzea.

9. artikulua. Baremazio Batzordea.

1. Sail bakoitzerako eratutako baremazio batzorde espezifikoek ezarriko dute merezimenduak baloratzeko baremoa.

2. Baremazio Batzordea honako hauek osatuko dute, Saileko Kontseiluak proposaturik: batetik, batzordekide titularrak, kide kopurua bakoitia izanik eta bost kide gehienez; eta, bestetik, ordezko batzordekideak, kide kopuru bera izanik. Denak ere Unibertsitatearekin lotura iraunkorra duten irakasle doktoreak izan behar dira (unibertsitateko katedradunak, unibertsitateko titularrak, kontratupeko doktoreak edo lan kontratudun irakasle iraunkorrak), eta lan poltsarako deialdia egina duen sailekoak. Gainera, lan poltsaren aplikazio eremuari dagozkion arloek ahalik eta ordezkari gehien eduki behar dituzte batzordean.

Batzordearen osaerak orekatua izan behar du gizon eta emakumeen arteko kide kopuruari dagokionez, salbu eta ezinezkoa bada behar bezala arrazoitutako zio oinarritu eta objektiboengatik.

3. Baremazio batzordeko kide izendatua izanez gero, irakasleak ezin dio uko egin, non eta ez dion behar bezala justifikatutako arrazoiren bat alegatzen irakasleen gaietan eskumena duen errektoreordeari. Justifikazioa onartuz gero, beste irakasle bat proposatuko du Saileko Kontseiluak.

4. Hiru urteko indarraldia izanen du Baremazio Batzordeak, eta beste hiru urtez luzatzen ahalko da.

5. Irakasleen gaietan eskumena duen errektoreordek izendatuko ditu batzordekideak.

6. Eskaerak baremoaren arabera baloratu eta ordenatu behar dituzte batzordekideek, eta legezkotasunaren, objektibotasunaren eta inpartzialtasunaren printzipioak errespetatuz jardun behar dute beti.

10. artikulua. Baremazio batzordearen funtzionamendua eta araubide juridikoa.

1. Sektore Publikoaren Araubide Juridikoaren urriaren 1eko 40/2015 Legean kide anitzeko organoei buruz xedatutakoak zuzenduko du Baremazio batzordea, eta, subsidiarioki, Nafarroako Unibertsitate Publikoko Kide Anitzeko Organoen Funtzionamendurako Erregelamendu Orokorra onartzen duen 2018ko apirilaren 24ko Gobernu Kontseiluaren Erabakiak. 40/2015 Legearen 23. artikuluak ezartzen duen arrazoiren bat gertatzen denean, batzordekideek parte hartzeari uko egin beharko diote, eta horren berri eman deialdia egin duen organoari. Lege horren 24. artikuluak ezartzen duenaren arabera, izangaiek zilegi dute batzordekideak errefusatzea, aipatutako egoera horietakoren bat gertatzen denean.

2. Batzordea jardunean hasi baino lehen eratuko da formalki. Eratze ekitaldian, batzordekide guztiak egon behar dira.

11. artikulua. Hautaketa-sistema.

Hautaketa-sistema merezimenduen lehiaketa publikoa izanen da, eta I. eranskineko baremoa eta deialdian jasotako balorazio irizpideak aplikatuko dira.

12. artikulua. Hautaketa-prozesuaren nondik norakoa.

1. Batzordeak ebatziko du hautaketa-prozesua, eta lan poltsa egiteko proposamenarekin bukatuko da.

2. Deialdian onartutako balorazio irizpideen arabera baloratuko ditu batzordeak izangaiak. Izangai bakoitzaren balorazio indibidualizatua jasoko da erabakietan, arrazoitua eta zenbakizko puntuazioarekin.

3. Balorazio prozesua bukatu ondoren, izangai bakoitzak baremoaren apartatu bakoitzean zer puntuazio izan duen eta bukaerako puntuazioa guztira zein duen argitaratuko du batzordeak Nafarroako Unibertsitate Publikoaren egoitza elektronikoan. Argitalpen hori izanen da interesdunentzako jakinarazpena ondorio guztietarako.

4. Izangaien puntuazioen aurka zilegi da alegazioak aurkeztea, Baremazio Batzordeari berari zuzendua, bost egun balioduneko epean, puntuazioen argitalpena Nafarroako Unibertsitate Publikoren webgunean argitaratu eta biharamunetik kontatzen hasita. Alegazio idazkian, haien oinarri diren arrazoiak eman behar dira aditzera. Ez da onartuko merezimenduak berriz ere baloratzeko besterik eskatzen ez duen alegazio generikorik. Alegazio hori aurkeztea ezinbesteko baldintza da izangaiak ordenatzeko proposamenaren aurkako erreklamazioa errektoreari aurkezteko.

5. Alegazioak ebatzi ondoren, edo epea bukatutakoan alegaziorik aurkeztu ez bada, lehiaketan eskatu den gutxieneko puntuazioa erdietsi duten eskatzaileen behin betiko zerrenda ordenatua argitaratuko du Baremazio Batzordeak Nafarroako Unibertsitate Publikoaren egoitza elektronikoan. Zerrendari erantsirik, lan poltsa egiteko proposamena egonen da.

13. artikulua. Izangaiak ordenatzeko behin betiko proposamenaren kontrako erreklamazioak.

1. Interesdunek zilegi dute erreklamazioa aurkeztea Baremazio Batzordeak izangaiak ordenatzeko egindako behin betiko proposamenaren aurka Nafarroako Unibertsitate Publikoko errektorearen aurrean, hamar egun balioduneko epean, proposamena argitaratu eta biharamunetik kontatzen hasita.

2. Erreklamazio idazkian, haien oinarri diren arrazoiak eman behar dira aditzera. Ez da onartuko Baremazio Batzordean alegaziorik aurkeztu ez duten interesdunen erreklamaziorik, ezta merezimenduen balorazioa berriz egiteko bakarrik eskatzeko erreklamazio generikorik ere.

3. Erreklamazioa aurkeztu eta errektoreak tramitatzea onartzen badu ebazpen baten bidez, prozedura eten eginen da behin betiko ebazpena eman arte. Giza Baliabideen Zerbitzuak egoitza elektronikoaren webgunean argitaratuko du tramitera onartutako erreklamazioen zerrenda, eta interesdunei bost egun balioduneko epea emanen die alegazioak aurkez ditzaten. Epe horretan bertan, Baremazio Batzordeari bidaliko zaio erreklamazioa, egoki baderitzo horren berri eman dezan.

4. Izangaien ordenaren kontrako erreklamazioak Erreklamazio Batzordeak baloratuko ditu, zeina Nafarroako Unibertsitate Publikoaren Estatutuetan baitago xedatua Nafarroako Unibertsitate Publikoko irakasle ez-iraunkorrak hautatzeko prozesuetarako.

5. Erreklamazio Batzordeak hertsiki prozedurazkoak diren alderdiak baloratuko ditu lehiaketan, eta egiaztatuko du Baremazio Batzordeak benetan errespetatzen dituela izangaien aukera-berdintasuna eta merezimendu eta gaitasun printzipioak. Erreklamazio Batzordeak ezin izanen du inola ere ordeztu Baremazio Batzordeak izangaien egokitasunari buruz egindako oinarrizko balorazioa.

5.1. Erreklamazio Batzordeak, aurkeztutako erreklamazioa ikusirik, zilegi izanen du, betiere Zuzenbidearekin bat etorriz, erabaki hauetakoren bat hartzea:

a) Eskumenik ez badu, aurkeztutako erreklamazioa ez onartzea.

b) Baldin eta uste badu prozedura-akatsen bat izan dela eta horrek babesik gabe utzi duela erreklamazioa jarri duen alderdia, agintzea hautaketa-prozedura formazko akatsa egin den unera atzera eramatea.

c) Baldin eta uste badu baremoko puntuazioen baturan kalkulu akats ageriko eta nabarmenen bat egin dela, atzemandako akatsa zuzentzea Baremazio Batzordearen proposamenean. Horrek ondorioak izanen ditu Baremazio Batzordearen proposamenean, aldatu eginen baitu izangaien hurrenkera.

d) Uste badu ez dagoela nahikoa arrazoirik berdintasunari, merezimenduei edo gaitasunei dagokien printzipioren bat urratzeko, Erreklamazio Batzordeak zuzenean berretsiko du Baremazio Batzordearen proposamena.

e) Aurkeztutako alegazioak fundamenturen batekin baietsiz gero, Erreklamazio Batzordeak horren berri emanen dio Baremazio Batzordeari, txosten osagarri bat egin dezan aurkeztutako erreklamazioan argudiatutako uzi edo argudioetako bati edo guztiei buruz. Zentzu horretan, Erreklamazio Batzordeak zilegi izanen du Baremazio Batzordeari eskatzea justifika ditzala eman dituen puntuazioak, berrikus ditzala puntuazioak, edo bi gauzak, erreklamazioaren arabera. Txostenaren eskaeran zehaztuko da zer alderdiri buruzko informazioa eskatzen den.

Txostena jaso ondoren, Erreklamazio Batzordeak uste badu Baremazio Batzordeak txostenean ez duela nahikoa arrazoi eman eskatu zaizkion alderdi guztiei buruz, beste txosten osagarri bat eskatzen ahalko dio.

Gainerako izangaiek aurkeztutako txostenak eta alegazioak ikusita, Erreklamazio Batzordeak aukera izanen du Baremazio Batzordearen proposamen berria berresteko edo ez berresteko.

Berdintasunari, merezimenduei eta gaitasunei buruzko printzipioak ezagutzen ez direla agerikoa den kasuetan baino ez da egonen proposamena ez berresteko aukera.

Baremazio Batzordearen proposamena berresten ez badu, Erreklamazio Batzordeak beste baremazio batzorde bat izendatzeko eskatuko dio irakasleen gaietan eskumena duen errektoreordeari, balorazioa berriz egin dezan.

5.2. Erreklamazio Batzordeak bere kideen botoen gehiengoz hartuko ditu erabakiak, eta, bozketan berdinketarik badago, erabakigarria izanen da batzordeburuaren botoa. Batzordeak, bere erabakia hartzeko, aukera izanen du beharrezkotzat jotzen dituen txostenak eskatzeko, baita Unibertsitateko Zerbitzu Juridikoaren txosten juridikoa ere.

5.3. Erreklamazio Batzordeak gehienez ere hilabeteko epea izanen du erabakia hartzeko, erreklamazioa aurkezten den egunetik zenbatzen hasita. Epea bukatutakoan erantzunik jaso ez bada, erreklamazioari ezezkoa eman zaiola ulertuko da.

5.4. Erreklamazio Batzordeak erreklamazioari buruz hartzen duen erabakia loteslea izanen da errektorearentzat. Errektoreak ebazpen bat emanen du aurkeztutako erreklamazioa ebazteko.

5.5. Izangaiak ordenatzeko behin betiko proposamena duen ebazpenak, errektorearenak, hautaketa-prozesua bukatuko du, eta Nafarroako Unibertsitate Publikoaren egoitza elektronikoan argitaratuko da. Argitalpen hori izanen da interesdunentzako jakinarazpena ondorio guztietarako. Ebazpen horrek administrazio bidea agortzen du, eta bere aurka zilegi da administrazioarekiko auzi errekurtsoa jartzea Nafarroako Administrazioarekiko Auzien Epaitegian.

III. TITULUA.–LAN POLTSAK KUDEATZEA

14. artikulua. Lan poltsen indarraldia.

1. Lan poltsak NUPen egoitza elektronikoan argitaratu eta biharamunean sartuko dira indarrean.

2. Giza Baliabideen Zerbitzuak egoitza elektronikoan argitaratuko ditu eguneraturik lan poltsak.

3. Hiru ikasturte osoko indarraldia izanen dute. Epe hori bukatutakoan, lan poltsek indarrean segituko dute hurrengoak sortu arte.

4. Lan poltsen indarraldiari dagokionez 5.1 artikuluan adierazitakoaren salbuespen gisa, lan poltsa batek bi izangai baino gutxiago dituenean, zilegi izanen da hautaketa-prozesu baterako deia egitea beste lan poltsa bat sortzeko. Salbuespen gisa, gerora sortutako arrazoiengatik, Irakasleen Gaietarako errektoreordeak baimena ematen ahalko du lan poltsa baterako deia egiteko. Lan poltsa berriak lehentasuna izanen du lehenagokoen aldean.

15. artikulua. Izangaiei deitzea.

1. Sailak lan poltsako langileak kontratatzeko eskatuko dio, inprimaki normalizatu baten bidez, irakasleen gaietan eskumena duen errektoreordeari. Eskaera egin ahal izateko, erregelamendu honetako 4.2 artikuluan jasotako arrazoietako bat egon behar da tartean.

2. Inprimakian, aditzera eman behar du ordezkapena zergatik eginen den, zein irakasle ordeztuko den eta nolakoa izanen den irakaslana (ordutegia eta irakasgaia). Gainera, ordezkapena egiteko baldintza gisa, irakasleak zer titulazio eta hizkuntza-maila eduki behar dituen ere eman behar du jakitera.

3. Ordezko irakasleak aldi berean irakasle bat baino gehiago ordezten ahalko du, baina ezin izanen du astean 8 orduko irakaslana gainditu.

4. Giza Baliabideen Zerbitzuak ordezkapen eskaintza eginen die puntuazioaren araberako ordena zorrotzean, telefonoz edo posta elektronikoz edo unean-unean erabilgarri dauden bitarteko teknologikoak erabiliz, sailak eskatu duen ordezkapenerako baldintza espezifiko eta beharrezkoak betetzen dituztenei.

5. Aurrekoa gorabehera, izangai bat ordezkapen bat egiten ari den bitartean beste irakasleren bat ordezteko beharra sortzen bada lan poltsa beraren aplikazio eremuan, Giza Baliabideetako Zerbitzuak kontratua handiagotzeko eskaintza eginen dio, astean gehienez 8 orduko irakaslana izateraino, nahiz eta lan poltsako beste izangai batzuek puntuazio hobea eduki.

6. Bestalde, izangai batek irakasle jakin baten ordezkapena egin eta 15 egun natural pasatu baino lehen berriz ere irakasle hori bera ordeztu beharra badago, irakaslearen ordezko izandako izangaiak eginen du ordezkapena baldin eta lanerako prest badago.

7. Ordezkapena egiteko deia jasotzen duenak 48 ordu izanen ditu, jakinarazpena egiten zaionetik, ordezkapena egin nahi duen edo uko eginen dion jakitera emateko, baliabide telematikoen bidez. Epe horretan erantzuten ez badu, ordezkapen eskaintzari uko egin diola ulertuko da, eta lan poltsako hurrengo izangaiari deituko zaio. Izangaia aurkitu ezin denean ere gauza bera eginen da.

16. artikulua. Lanpostuan lanean hastea.

1. Ordezkapena esleitu zaion irakaslea Giza Baliabideen Zerbitzuak adierazitako egunean hasiko da lanean, eta sekula ez 72 orduko tartea pasatu baino lehen. Lanean hasten ez bada, ordezkapen eskaintzari uko egin diola ulertuko da, eta lan poltsako hurrengoari deituko zaio.

2. Egoera bereziak kontuan hartzearren, batez ere familiako bizitza eta lana uztartzearekin zerikusia dutenak, zilegi izanen da aurreko paragrafoan aipatutako epea luzatzea. Irakasleen gaietan eskumena duen errektoreordeak erabaki behar du halako egoerarik ba ote dagoen.

3. Eskainiko den kontratuak urtebete baino gehiago iraunen duela aurreikusten bada, eta izangaiak baimen bat badu amatasunagatik, aitatasunagatik edo kontziliazioarekin zerikusia duen beste arrazoiren batengatik, aukera emanen zaio lanean berriz hasteko data baimena bukatu ondorengoa duen kontratu bat formalizatzeko. Halakoetan, lan poltsako hurrengo izangaiari eskainiko zaio ordezkapena izangai baimenduna lanean hasten den arte.

4. Sailek, ahal den neurrian, erraztasunak emanen dizkiote ordezko irakasleari irakaslanean has dadin, batik bat astebete pasatu baino lehenago hasi behar badu.

17. artikulua. Kontratuaren ezaugarriak.

1. Kontratuan irakaslana baino ez da sartuko (tutoretzako arreta barne), eta ezin izanen du ordeztutako irakasleari esleitutako irakaslana gainditu.

2. Ordezkoari ezin zaio unibertsitateko bestelako lanik eman: ez ikerketa-lanik, ez eta kudeaketako eta koordinazioko eginkizun egiturazkorik ere.

3. Kontratuaren iraupena, berritzeak edo luzapenak barne, kontratua justifikatu zuen arrazoi objektiboaren araberakoa izanen da.

4. Irakasle baten baino gehiagoren ordezkoa izanik horietako bat ordezteko arrazoia bukatzen bada, ordezko irakasleak beste irakasleen ordezkapena egiten segituko du irakaskuntza-ahalmena dagokion neurrian murriztuta. Halakoetan, ordezko irakasleak aukera izanen du ordezkapenari uko egiteko, eta horrek ez du ekarriko lan poltsatik kanporatzea. Zilegi izanen du, gainera, irakaskuntza-ahalmena handitzea, beste ordezkapen bat egiteko beharra sortzen bada 15.5 artikuluan adierazi bezala.

18. artikulua. Uko egiteko arrazoiak lan poltsatik kanporatua izan gabe.

1. Honako arrazoi hauek onargarriak izanen dira ordezkapen eskaintzei uko egiteko, saileko lan poltsatik kanporatua izan gabe:

a) Aldi baterako desgaitasuna edo amatasunagatik edo adopzioagatik lizentzia edukitzea. Kontratu bati horregatik uko egiten diotenak ezin izanen dira berriz lanerako prest egon harik eta behar bezala frogatu arte bukatu dela uko egin izana justifikatu zuen egoera.

b) Haurdun egotea.

c) 3 urtetik beherako ume bat zaintzapean izatea, biologikoa izan nahiz adopziozkoa.

d) Prestakuntzan dauden ikertzaileen kontratua, doktoretza aurreko beka lehiaketa bidezkoa edo doktoretza ondoko kontratua edukitzea.

e) Unibertsitateko ikasketak egiten aritzea. Ikasketen kasuan, ikasturte osoari aplikatuko zaio ukoa, eta matrikularen bidez frogatuko da.

f) Atzerrian aritzea gobernuz kanpoko erakunde batean lanean.

g) Ordezkapena bateraezina izatea interesdunak sektore publikoan edo pribatuan betetzen duen lanpostuarekin.

h) Eskaini dioten kontratua behar bezala betetzeko gai ez delako egitea uko izangaiak ordezkapenari.

i) Eskaini dioten kontratuaren eginkizunak betetzearekin bateraezina den desgaitasunen bat edukitzeagatik egitea uko izangaiak ordezkapenari.

j) Sailak hasieran aurreikusitako irakaskuntza-ahalmena txikitzea edo handitzea eskatu duelako egitea uko ordezkapenari.

2. Uko egiteko arrazoi horietakoren bat alegatzeko, arrazoia justifikatzeko agiria aurkeztu beharko dio izangaiak uko egiten duen unean Giza Baliabideen Zerbitzuari. Era berean, uko egiteko arrazoia bukatu dela jakinarazi beharko dio Giza Baliabideen Zerbitzuari, eta lan poltsan berriz aktibatzeko eskatu. Bien bitartean, ez diote ordezkapenik eskainiko.

19. artikulua. Lan poltsatik kanporatzea.

1. Izangaia izena emanda dagoen lan poltsa guztietatik erabat eta behin betiko kanporatzeko arrazoiak izanen dira honako hauek (aurreko artikuluan deskribatutako kasuak galarazi gabe):

a) Sinatua duen kontratu bati uko egitea.

b) Eskaintza bati uko egitea, baldin eta ez bada aurreko artikuluan adierazitakoez bestelako arrazoi batengatik.

c) Izangaiak aukeratutako ezaugarrien eta modalitateen araberako ordezkapen bat esleitzen zaionean, ez joatea ordezkapena egitera ezarritako epean eta ez ematea arrazoirik eskaintzari uko egitea justifikatzeko.

d) Diziplina-espedientearen bidezko zehazpen bat edukitzea falta larriagatik edo oso larriagatik; kontuan hartuko da zehapenen preskripzio epea.

e) Sailaren edo irakasleen gaietan eskumena duen errektoreordearen txosten negatiboa.

f) Alegatutako merezimenduetakoren bat faltsua dela egiaztatzea.

2. Halako kasuetan, irakasleen gaietan eskumena duen errektoreordeak lan poltsatik kanporatzeko ebazpena bidaliko dio interesdunari. Ebazpen horren aurka zilegi izanen da Zuzenbidean dagokion errekurtsoa aurkeztea, zeina ebazpenean emanen baita aditzera.

20. artikulua. Ordainsariak.

1. Ordezko irakasleen ordainsariak 36/2009 Foru Dekretuaren 10. artikuluan ezarritakoak izanen dira. 2009ko apirilaren 20ko foru dekretua da hori, eta Nafarroako Unibertsitate Publikoko kontratupeko irakasle eta ikertzaileen araubidea arautzen du. Kontratua irakaslana egiteko bakarrik izanen denez, lanaldi partzialekoa izanen da, eta ordainsaria proportzionalki kalkulatuko da kontratatutako ordu kopuruaren arabera eta taula honi jarraikiz:

21. artikulua. Kontratua azkentzea.

1. Ordezko irakasleen kontratua honako arrazoi hauetakoren batengatik azkenduko da:

a) Ordeztua izan den irakaslea lanera itzuli delako.

b) Bukatu delako ordeztutako irakasleak lanera itzultzeko legez edo konbentzioz ezarritako epea.

c) Bukatu delako kontratazioa justifikatu zuen irakaskuntza-arduraldia murrizteko eskubidea.

d) Izangaiak uko egin diolako kontratuari.

e) Irakasten hasi ondoren, sailak erabaki duelako izangaiak ez duela gaitasun aski irakaslana behar bezala egiteko. Halakoetan, ezegokitasunaren prozeduraren arabera jokatu behar da, zeina hurrengo arauan baitago jasoa.

f) Ordenamendu juridikoan jasotako gainerako arrazoietako batengatik.

2. Ordezko irakasleen kontratuak ez dakar berekin kontratua bukatutakoan kalte ordainik jasotzeko eskubidea, non eta ez dagoen eskubide hori bermatzen duen legezko edo konbentziozko xedapen kolektiboren bat.

3. Kontratua azkendu eginen da salaketagatik eta aurreabisurik eman beharrik gabe, kontrakorik ituntzen ez bada bederen.

4. Langileak kontratuan atzera eginez gero, gutxienez hamabost egun natural lehenago eman behar du aurreabisua, eta horrek ez dio kalterik eginen lan poltsetan mantentzeko aukeran izan dezakeen eraginari. Aurreabisua emateko epea ez betetzeak zigorra ekarriko du: izangaiak, zenbat egun atzeratu, hainbeste soldata-egun galduko ditu.

5. Sailak aditzera emanen dio Giza Baliabideen Zerbitzuari kontratazioa justifikatu zuen irakaslanari berriz ekinen diola ordeztutako irakasleak. Orduan, Giza Baliabideen Zerbitzuak kontratua azkenduko zaiola jakinaraziko dio ordezko irakasleari, horren berri ematea beharrezkoa den kasuetan.

22. artikulua. Ezegokitasunaren prozedura.

1. 21.1 e) artikuluan jasotako arrazoiagatik kontratua azkendu ahal izateko, honako prozedura hau bete behar da:

a) Saileko zuzendariak irakasleen gaietan eskumena duen errektoreordeari jakinaraziko dio irakaslea ez dela egokia esleitutako irakaslana egiteko, eta kontratua azkentzeko eskaera eginen dio. Egokitasunaren berri ematen duen txostenarekin batera, justifikazio agiriak aurkeztu behar ditu.

b) Irakasleen gaietan eskumena duen errektoreordeak entzunaldia emanen dio interesdunari, eta alegazioak tramitatuko ditu.

c) Irakasleen gaietan eskumena duen errektoreordeak, aintzat harturik sailak bidalitako txostena eta interesdunak egindako alegazioak, kontratua azkentzea proposatuko dio errektoreari, horretarako arrazoia behar bezala egiaztatua dagoela uste badu; bestela, artxibatu eginen du eskaera.

d) Errektoreak ebatziko du, ahalik eta lasterren, kontratua azkentzeko proposamena.

23. artikulua. Sindikatuei informazioa ematea.

1. Irakasleen gaietan eskumena duen errektoreordeak informazioa eman die Enpresa Batzordeari eta Irakasle eta Ikertzaileen Batzordeari sortu diren lan poltsei, eskatu diren kontratazioei eta lan poltsetatik kanporatu direnei buruz.

2. Unibertsitatearekin lotura irakurrik ez duten irakasleentzako lehiaketa arrunten berri ematen zaienean emanen zaie informazio hori.

3. Ezegokitasunaren prozeduraren berri ere emanen zaie Enpresa Batzordeari eta Irakasle eta Ikertzaileen Batzordeari.

24. artikulua. Datuen babesa Nafarroako Unibertsitate Publikoak langileen kudeaketaren arloan antolatutako prozesuetan parte hartzeak interesdunen datuak tratatzea ekarriko du berekin. Datu horien tratamenduaren arduraduna Nafarroako Unibertsitate Publikoa da.

1. Datuen tratamendua aplikatzekoa zaion araudiari jarraikiz eginen da, hots, Datuak Babesteko 2016/679 EB Erregelamendu Orokorrari eta Datu Pertsonalak Babesteko 2018ko abenduaren 5eko 3/2018 Lege Organikoari jarraikiz. Tratamenduaren deskribapena Tratamendu Jardueren Erregistroan dago kontsultatzeko.

2. Tratatuko diren datuak batez ere hautaketa-prozesuetako izangaienak eta NUPeko langileenak izanen dira; hauek hain zuzen ere: izena, deiturak, NANa, datu akademikoak eta profesionalak eta, beharrezkoa denean, bankuko datuak eta Gizarte Segurantzakoak, edo ondoren deskribatzen den xedea betetzeko beharrezkoak direnak.

3. Datuen tratamendua justifikatzen duen xedea hau da: hautaketa-prozedurak, mugikortasunekoak, egoera administratiboak, ziurtagiriak, edo Giza Baliabideen arloan NUPen eskumenekoak diren beste batzuk tramitatzea. Xede horrek interes publikoa edo botere publikoa legitimatzen du, Datuak Babesteko Erregelamendu Orokorraren 6.1.e) artikuluak ezartzen duen bezala. Hauek dira oinarri juridikoak, langileei buruzko beste arau batzuen artean: Enplegatu Publikoaren Oinarrizko Estatutuaren Legearen testu bategina onesten duen 5/2015 Legegintzako Errege Dekretua, 2015eko urriaren 30ekoa, eta Nafarroako Administrazio Publikoen zerbitzura dauden Langileen Estatutuaren testu bategina onesten duen 251/1993 Legegintzako Foru Dekretua, 1993ko abuztuaren 30ekoa.

4. Datuak tratatzeko jarduerei dagokienez, interesdunek eskubidea dute datuak eskuratzeko, zuzentzeko, ezabatzeko, mugatzeko, haiei kontra egiteko eta transferitzeko. Horretarako, mezu bat bidali behar dute delegado.protecciondatos@unavarra.es helbidera, Datu Pertsonalak Babesteko Lege Organikoaren 11. artikulutik 18. artikulura bitartekoei jarraikiz. Desadostasunen bat izanez gero, Datuak Babesteko Espainiar Agentziara jo dezakete, https://www.aepd.es/ domeinuaren bidez.

XEDAPEN IRAGANKORRA

2023-2024 ikasturtearen hasieran sortuko dira lehenbizikoz lan poltsak.

AZKEN XEDAPENA

Gobernu Kontseiluak onetsi, Nafarroako Aldizkari Ofizialean argitaratu eta biharamunean hartuko du indarra araudi honek.

I. ERANSKINA.–BAREMOA

Irizpide orokor gisa, honako elementu hauek baloratuko dira, kontuan izanik beti eta apartatu guztietan zenbateko lotura dagoen irakaslanaren eta sailak dituen arloen artean (sortzen den lan poltsari dagokion sailekoak). Apartatu bakoitzerako, 0 eta 1 bitarteko ponderazio faktore bat ezartzen ahalko da. Zorrotz justifikatua egon behar da ponderazio faktorea, eta koherentea izan behar da erabiltzen den bakoitzean.

1. Espediente akademikoa (20 puntu gehienez). Espediente akademikoaren batez besteko nota (10etik kalkulatua) bider 2 eginen da, apartatu honetako puntuazioa lortzeko.

2. Doktoretza (gehienez 10 puntu).

3. Prestakuntza akademikoa (20 puntu gehienez). Dirulaguntzak eta bekak, prestakuntza-ikastaroak, ikasketa amaierako edo doktoretzako aparteko sariak, hizkuntza-ziurtagiriak.

4. Irakasle-lanean izandako esperientzia, unibertsitatekoan batez ere (30 puntu gehienez).

5. Ikerketa-lanean izandako esperientzia (25 puntu gehienez).

6. Esperientzia profesionala (25 puntu gehienez).

Lan poltsetan sartzeko, bukaerako puntuazioa, guztira, 30 puntukoa edo gehiagokoa izan behar da.

Iragarkiaren kodea: F2314089