185. ALDIZKARIA - 2023ko irailaren 4a

1. NAFARROAKO FORU KOMUNITATEA

1.7. BESTELAKOAK

277E/2023 EBAZPENA, abuztuaren 18koa, Ekonomia Zirkularraren eta Klima Aldaketaren Zerbitzuko zuzendariak emana, zeinaren bidez partez onartzen baita Oltza zendeako udal mugartean ibilgailu motordunak fabrikatzen dituen instalazio baten ingurumen baimen integratuan ezarritako funtzionamendu baldintzen aldaketa. Jardueraren titularra Volkswagen Navarra SA da.

Instalazio horrek badu ingurumen baimen integratua, Ingurumenaren eta Uraren zuzendari nagusiaren azaroaren 23ko 2361/2007 Ebazpenaren bidez emana, gero, Landa Garapeneko, Ingurumeneko eta Toki Administrazioko kontseilariaren uztailaren 5eko 10/2012 Foru Aginduaren bidez eta Ingurumenaren eta Uraren zuzendari nagusiaren irailaren 29ko 1537/2011 Ebazpenaren bidez aldatu zena, eta Ingurumenaren eta Uraren zuzendari nagusiaren apirilaren 25eko 158E/2014 Ebazpenaren bidez eguneratu zena.

2019ko otsailaren 15ean, titularrak ingurumen baimen integratuan jasotako baldintzak aldatzeko eskatu zuen, zehazki, kolektore publikora husten den IHUAren efluentearen isurketaren gehieneko balioa aldatzeko (fluoruroen parametroa). Hala, proposatzen du 10 mg/l-tik 25 mg/l-ra igotzea kontrol puntualetan, eta 20 mg/l-ko gehieneko balioa ezartzea sei hilabeteko kontroletan, batezbesteko mugikor gisa.

Proposamen hori baloratzeko asmoz, Ekonomia Zirkularraren eta Klima Aldaketaren Zerbitzuak azterketa bat eskatu zion titularrari, gurutzatutako ondorioei eta ondorio ekonomikoei buruzkoa, BREF agiriaren (2009) metodologiari jarraituz, non konparatuko baitziren fluoruroen isurketaren egungo gehieneko balioaren (10 mg/l) egoera, kontuan hartuta hura betetzeko neurri teknikoen aplikazioa, eta proposatutako isurketaren gehieneko balioaren (25 mg/l) egoera.

Ekonomia Zirkularraren eta Klima Aldaketaren Zerbitzuak berrikusi ditu ondorio gurutzatuei eta ekonomikoei buruzko azterketa eta aurkeztutako gainerako dokumentazioa, eta ondorioztatu du ez dela onargarria eskatutako proposamena, honako arrazoi hauengatik:

–Batzordearen 2020/2009 (EB) Betearazpen Erabakiak, 2020ko ekainaren 22koak, gainazalak disolbatzaile organikoekin tratatzeko teknika erabilgarri onenei (TEO) buruzko ondorioak ezartzen dituenak, bere 21. teknika erabilgarri onenean 2-25 mg/l bitarteko NEA-TEOa ezartzen du fluoruroen parametrorako.

–Otsailaren 20ko 12/2006 Foru Dekretuak, saneamendu-kolektore publikoetara ur-isurketak egin ditzaketen jardueren ezarpenari eta funtzionamenduari aplikatu beharreko baldintza teknikoak ezartzen dituenak, 10 mg/l-ko gehieneko balioa ezartzen du fluoruroen isurketetarako, oro har, kolektorera egiten den edozein isurketarentzat, baita ingurumen baimen integratuaren araubidearen mende ez dauden instalazioek sortutako isurketentzat ere.

–Titularrak aurkeztutako ondorio ekonomiko eta gurutzatuei buruzko azterketan bi alternatiba aztertu dira. Alde batetik, isurketaren tratamendua hobetzea, otsailaren 20ko 12/2006 Foru Dekretuan eta indarrean dagoen ingurumen baimen bateratuan ezarritako fluoruroen gehieneko balioa (10 mg/l) betez, eta, ondorioz, arazketako lohien ekoizpena handitzea. Bestalde, egungo tratamenduari eusteko aukera aztertzen da, 10 mg/l-ko gehieneko balioa gaindituz, eta Iruñerriko HUAn tratatu eta diluitu ondoren ibilgura isurtzea.

–Azterketak adierazten du bi alternatiben ingurumen ondorioen arteko aldeak ez direla erabakigarriak, eta fluoruroen prezipitazioa areagotzeko erreaktibo espezifiko bat gehitzeak berekin dakarrela instalazioaren IHUAren egungo tratamenduaren kostua urtean 136.809 euro handitzea, 25 urteko bizitza ekonomikorako, baina, hala ere, azterketak ez du justifikatzen igoera horrek instalazioaren bideragarritasun ekonomikoan eraginik izatea.

–Ondorioz, isurketaren gaur egungo gehieneko balioa onargarria (10 mg/l) koherentea da 2020/2009 (EB) Betearazpen Erabakiarekin eta otsailaren 20ko 12/2006 Foru Dekretuarekin, eta ondorio gurutzatuei eta ekonomikoei buruzko azterketak ez du justifikatu hura betetzea bideraezina denik.

Ondoren, 2022ko apirilaren 4an, titularrak alegazioak aurkeztu zizkion ebazpen proposamenari, argudiatuz instalazioaren ur-kontsumoaren efizientzia handiak eta hondakin-uren isurketaren murrizketak aukera eman beharko luketela fluoruroen kontzentrazioaren gehieneko balioa 20 mg/l-koa izateko, seihilekoaren batezbesteko gisa, eta neurketa puntualetan 25 mg/l-koa, otsailaren 20ko 12/2006 Foru Dekretuan ezarritako gehieneko balioa baino handiagoa. Horretarako, egunean isuritako emaria eta urtean isuritako emaria mugatu behar dira, eguneko 13,5 kg-ko fluoruro-karga eta urteko 2.000 kg-ko fluoruro-karga mantenduz.

Ekonomia Zirkularraren eta Klima Aldaketaren Zerbitzuak aztertu zuen aurkeztutako eskaera, eta ondorioztatu zuen onargarria zela, instalazioaren ingurumen funtzionamendu egokiarekin eta teknika erabilgarri onenak aplikatzearekin bat zetorrelako. Horrenbestez, aldeko ebazpen proposamena egin zuen, adierazitako baldintzak ezarrita.

Ondoren, 2022ko urriaren 21ean, titularrak alegazioak aurkeztu zizkion ebazpen proposamenari, argudiatuz ebazpen proposamena egingarria izanen litzatekeela urteko ekoizpena txikiagoa balitz instalazioaren ekoizpen-ahalmena baino (urtean 400.000 ibilgailu). Hori dela eta, urteko isurketa-bolumenak eta eguneko isurketa-bolumenak ekoizpen horri egin beharko liokete erreferentzia; hots, 160.000 m³ urtean eta 721 m³ egunean, hurrenez hurren. Eskatutako kantitateek kolektorera isuritako fluoruroen eguneko eta urteko karga handitzea zekartela ikusita, txosten bat eskatu zitzaion kolektore-sarearen kudeatzaileari, jakiteko eskatutako isurketa zenbatean zen bateragarria udal HUAren maneiu eta kudeaketarekin eta HUAko arazketa-lohiekin. Kolektore-sarearen kudeatzaileak txosten bat eman du instalazioaren isurketa HUAn onargarria dela adieraziz, betiere eguneko emaria gehienez 667 m³-koa bada.

Kasu honetan, Ingurumenean Eragina duten Jarduerak arautzen dituen abenduaren 16ko 17/2020 Foru Legea garatzeko Erregelamenduaren 35. artikuluan ezarritako inguruabarrak gertatzen direla uste da, eta, ondorioz, bidezkoa da ingurumen baimen integratuan ezarritako baldintzak ofizioz aldatzea, artikulu horretan ezarritako administrazio prozedurarekin bat etorriz.

Adierazitakoarekin bat, eta Ingurumeneko zuzendari nagusiak azaroaren 8an emandako 107/2019 Ebazpenaren bidez eskuordeturik ditudan eskumenak erabiliz,

EBAZTEN DUT:

Lehena.–Partez onartzea Oltza zendeako udal mugartean ibilgailu motordunak fabrikatzen dituen instalazio baten ingurumen baimen integratuan ezarritako funtzionamendu baldintzen aldaketa. Horren ondorioz, instalazioak eta hango jarduerak ebazpen honen eranskinetan adierazitako baldintzak bete beharko dituzte. Jardueraren titularra Volkswagen Navarra SA da.

Bigarrena.–Ebazpen honetan jasotako baldintzak betetzen ez badira, Kutsaduraren Prebentzio eta Kontrol Integratuaren Legearen testu bateginaren IV. tituluan jasotako ingurumen-diziplinako neurriak hartuko dira (abenduaren 16ko 1/2016 Legegintzako Errege Dekretuaren bidez onetsi zen testu bategina), eta, subsidiarioki, Ingurumenean Eragina duten Jarduerak arautzen dituen abenduaren 16ko 17/2020 Foru Legearen III. tituluan ezarritako zehapen-araubidean jasotakoak, ezertan galarazi gabe legeria sektorialean ezarritakoa, aurrerantzean ere aplikatu beharko baita.

Hirugarrena.–Ebazpen hau Nafarroako Aldizkari Ofizialean argitaratzea.

Laugarrena.–Ebazpen honek ez du administrazio bidea amaitzen, eta espedientean interesa dutenek, administrazio publikoek izan ezik, gora jotzeko errekurtsoa jartzen ahalko dute haren kontra, Landa Garapeneko eta Ingurumeneko kontseilariari zuzendua, hilabeteko epean. Administrazio publikoek administrazioarekiko auzi-errekurtsoa jar dezakete, Nafarroako Justizia Auzitegi Nagusiko Administrazioarekiko Auzien Salari zuzendua, bi hilabeteko epean. Horrek ez du galarazten Nafarroako Gobernuari aurretiazko errekerimendua egin ahal izatea, Administrazioarekiko Auzien Jurisdikzioa arautzen duen uztailaren 13ko 29/1998 Legearen 44. artikuluan ezarritako moduan eta epean. Ebazpen hau jakinarazi eta biharamunetik aurrera kontatuko dira epeak.

Bosgarrena.–Ebazpen hau Volkswagen Navarra SAri, Oltza Zendeako Udalari, Iruñerriko Mankomunitateari eta NILSAri igortzea, behar diren ondorioak izan ditzan.

Iruñean, 2023ko abuztuaren 18an.–Klima Aldaketaren Ataleko burua, Javier Vera Janín, Ekonomia Zirkularraren eta Klima Aldaketaren Zerbitzuko zuzendariaren ordez, Ingurumeneko zuzendari nagusiaren 291E/2019 Ebazpenean xedatutakoari jarraikiz.

Oharra: ebazpen honetan aipatzen diren eranskinak interesdunen eskura egonen dira Ingurumen Zuzendaritza Nagusiaren bulegoetan (González Tablas kalea 9, behea, Iruña; Ekonomia Zirkularraren eta Klima Aldaketaren Zerbitzua) eta Nafarroako Gobernuaren webgune honetan: https://extra.navarra.es/InformacionPublicaPRTR/CentroPublicaciones.html#/CentroPublicaciones.

Iragarkiaren kodea: F2312223