Iragarkia

156. ALDIZKARIA - 2023ko uztailaren 28a

1. NAFARROAKO FORU KOMUNITATEA

1.1. XEDAPEN OROKORRAK

1.1.2. Foru Dekretuak

56/2023 FORU DEKRETUA, uztailaren 5ekoa, zeinaren bidez arautzen baita, Nafarroako Foru Komunitatean, aisialdiko hezkuntza eskolak eta horien irakaskuntzak aitortzeko bidea.

1. artikulua. Xedea.

2. artikulua. Kontzeptua eta xedea.

II. KAPITULUA.–BALDINTZAK ETA AITORTZA.

3. artikulua. Baldintzak.

4. artikulua. Aitortza-eskaera.

5. artikulua. Aitortza.

6. artikulua. Aitortzaren ondorioak.

7. artikulua. Betebeharrak.

8. artikulua. Dokumentazio administratiboa.

III. KAPITULUA.–IRAKASKUNTZAK.

9. artikulua. Prestakuntza.

10. artikulua. Bestelako prestakuntza batzuk.

11. artikulua. Ikasleen baldintzak.

12. artikulua. Prestakuntzen deskripzioa.

13. artikulua. Modalitate ez-presentziala.

14. artikulua. Prestakuntzen antolamendua.

15. artikulua. Praktiken modulua.

16. artikulua. Ikastaroen ebaluazioa.

17. artikulua. Ikastaroen dokumentazioa izapidetzea.

18. artikulua. Emandako diplomen erregistroa.

IV. KAPITULUA.–EGIAZTATZEA, GAINBEGIRATZEA ETA AITORTZA GALTZEA.

19. artikulua. Egiaztatzea eta gainbegiratzea.

20. artikulua. Aitortza galtzea.

V. KAPITULUA.–NAFARROAKO GAZTERIAREN INSTITUTUAREN KOORDINAZIO- ETA IKUSKARITZA-LANA.

21. artikulua. Nafarroako Gazteriaren Institutuaren koordinazio-lana.

22. artikulua. Nafarroako Gazteriaren Institutuaren ikuskaritza-lana.

Lehenengo xedapen iragankorra.–Aurretik emandako diplomak.

Bigarren xedapen iragankorra.–Lehendik dauden eskolak egokitzea.

Hirugarren xedapen iragankorra.–Hasitako ikastaroak.

Xedapen indargabetzaile bakarra.–Arauak indargabetzea.

Azken xedapenetako lehena.–Arauak emateko gaikuntza.

Azken xedapenetako bigarrena.–Indarra hartzea.

ZIOEN AZALPENA

Haurren eta gazteen arloko politiken funtsezko printzipioetako bat da aisialdiaren balioa nabarmentzea, ikasteko aukera ematen baitie biztanleriaren sektore horiei. Hezkuntza- eta komunitate-aisialdiak bizikidetzarako eta garapen pertsonalerako hezkuntza-aukera ugari eskaintzen ditu, hainbat eremutan. Haren dimentsio ludikoa ezinbestekoa da pertsonaren oreka soziala, fisikoa, psikologikoa eta emozionala sustatzeko.

Bai ikastetxeek bai hezkuntza-aisialdian aritzen diren erakundeek sozializazio-espazio seguruak eskaintzen dituzte, eta erreferentziazko hezkuntza-figurak eman, zeinak laguntza positiboa baitira haur eta gazteentzat. Beren lanbide-jardunean, prebentzio-osagai bat dira arrisku-jokabideen eta desoreka emozionalaren aurrean, eta, aldi berean, balio hauek transmititzen dituzte: ingurumena zaintzea, pertsonen arteko berdintasunezko harremanak, emakumeen eta gizonen arteko berdintasuna txertatzea, sexu- eta genero-aniztasuna kontuan hartzea, dibertsitate funtzionala aintzat hartzea edo kultura-aniztasuna balio eta aukera gisa onartzea. Haien jardunaren oinarria da beren programetan parte hartzen dutenek parte hartzea modu boluntarioan, automotibatuan eta atseginez. Programa horietan honako hauek aurkituko ditugu beti: beste pertsona batzuekiko trukea eta harremanak, zuzeneko kontaktua aniztasunarekin, eta hainbat errealitate eta esperientzia pertsonaletara hurbiltzea. Horren guztiaren eraginez, haien hezkuntza- eta komunitate-dimentsioa are handiagoa da.

Horrez gain, gazteen enplegua sustatzearekin lotura zuzena duen eremua da gazte askori aukera ematen baitie eskarmentua hartzeko edo, are gehiago, lan-kontratu bat lortzeko. Izan ere, ez da harritzekoa gazte horietako askoren lehen lana izatea aisialdiko monitore aritzea. Esperientzia hori, berdin lanean edo modu boluntarioan aritu monitore, aukera bikaina da etorkizuneko ibilbide profesionalean baliozko izanen dituzten hainbat gaitasun eskuratzeko.

Arau-esparruan, Espainiako Konstituzioaren 27. artikuluak hezkuntzarako eskubidea bermatzen eta orokortzen du, oinarrizko eskubide gisa eta giza nortasuna erabat garatzeko tresna gisa. Konstituzioak exijitzen die, era berean, botere publikoei ezen prestakuntza-politikak eta lanbidean berregokitzekoak susta ditzaten (Espainiako Konstituzioaren 40. artikulua).

Manu horiek betetzeko, Estatuak Kualifikazioei eta Lanbide Heziketari buruzko ekainaren 19ko 5/2002 Lege Organikoa eman zuen. Lege horren xedea da Lanbide Heziketaren, kualifikazioen eta akreditazioen sistema integral bat antolatzea, Estatuaren eskumenen barruan, zeinak eraginkortasunez eta gardentasunez erantzunen baitie gizartearen eta ekonomiaren arloko eskaerei, zenbait prestakuntza-modalitateren bidez. Ildo beretik, Europako Kontseiluaren Lehendakaritzak Gazteriaren aldeko Europako Ituna adostu zuen 2005eko martxoaren 23an. Itun horrek planteatzen duen helburuetako bat da are lankidetza estuagoa lortzea lanbide kualifikazioen arloan, gardenagoak eta alderagarriagoak izan daitezen, eta defendatzen du aitortu beharra dagoela hezkuntza ez-formalaren eta informalaren eremuan egiten den lana.

Gazteriaren Lurralde arteko Kontseiluaren 2012ko ekainaren 21eko erabakiaren bidez onetsi zen ezen autonomia-erkidegoetako gazteria-erakundeek aisialdiko prestakuntza arautzeko beren arauak egokitu behar zituztela lanbide kualifikazioak argitaratu ondotik sortutako egoera berrira. Horrela, prestakuntza-edukiak funtsean berdinak izanen dira Espainiako lurralde osoan, Europan erraz ezagutzeko eta homologatzeko modukoak, eta horrek aukera emanen du profesionalak are gehiago mugi daitezen Espainian zein Europar Batasunean.

Bestalde, Nafarroako Foru Komunitateak erabateko eskumena du gazteentzako politikaren arloan, Nafarroako Foru Eraentza Berrezarri eta Hobetzeari buruzko abuztuaren 10eko 13/1982 Lege Organikoaren 44.18 artikuluan ezarritakoaren arabera. Esleitutako eskumen horren babesean, Gazteriari buruzko apirilaren 1eko 11/2011 Foru Legea onetsi zen. Foru lege horretan, honela definitu zen gazteriaren arloko hezkuntza ez-formala: "pertsonaren garapena faboratzen duten jarduera ez-arautuen multzoa. Nafarroako Gazteentzako Jardueren Eskolak (NGJE) eta Astialdiko Eskolek eman ahalko dute". Alde horretatik, nabarmentzekoa da hezkuntza ez-formalak beste eremu batzuetan ere baduela garrantzia, hala nola berdintasunaren eremuan; halaxe adierazi zen bai apirilaren 4ko 17/2019 Foru Legean, Emakumeen eta Gizonen Berdintasunari buruzkoan, bai apirilaren 10eko 14/2015 Foru Legean, Emakumeen Kontrako Indarkeriari Aurre Egitekoan.

Nafarroako Gazteriaren Institutuak, hainbat arauren bidez, haur eta gazteen aisialdiko hezitzaileen prestakuntza arautu du, baita eskolen aitortza ere. Arautu ditu, esaterako, ekainaren 21eko 235/1999 Foru Dekretuaren bidez, zeinaren bidez arautu baitzen haur eta gazteen aisialdiko hezkuntza eskolen aitortza ofiziala, eskola horien eta Nafarroako Foru Komunitateko Administrazioaren arteko harremanak, eta haur eta gazteen aisialdiko hezitzaileen prestakuntza. Eta beste hauen bidez: 17/2002 Foru Agindua, otsailaren 20koa, Gizarte Ongizate, Kirol eta Gazteri kontseilariak emana, Aisialdiko Eskolen onarpen ofizialerako, Gazteekin egiten diren Jardueretarako Nafarroako Eskolarekin (GENE) izanen dituen harremanetarako eta ofizialki onartutako Aisialdiko Eskolen ohiko funtzionamendurako arauak ezartzen dituena; eta 34/2004 Foru Agindua, otsailaren 20koa, Gizarte Ongizate, Kirol eta Gazteria kontseilariak emana, ofizialki onarturiko Astialdiko Eskolek astialdiko zuzendari eta begirale izateko ematen dituzten ikastaroen arauak ezartzen dituena.

Gizartearen eta arauen bilakaeraren, Nafarroako Gazteriaren Institutuak garatutako esperientziaren, eta haurren eta gazteen aisialdiak berez duen garrantzi handiaren eraginez, beharrezkoa da aisialdiko hezkuntza eskolen araudia eta eskaintzen dituzten irakaskuntzak inguruabar berrietara egokitzea. Azken batean, profil profesional horiek bultzatu eta indartu behar dira, prestakuntza-lan delikatua egiten baitute, askotan adingabeekin.

Arau honek aisialdiko hezkuntza eskolak eta horiek eman ditzaketen prestakuntzak aitortzeko araubidea ezartzen du. Eskola horiek bete beharko dute honako bi errege-dekretu hauetan profesionaltasun-ziurtagiriei buruz xedatutakoa: 1537/2011 Errege Dekretua, urriaren 31koa, zeinaren bidez bi profesionaltasun-ziurtagiri sortzen baitira, Gizarte eta Kultur eta Komunitatearentzako Zerbitzuak izeneko lanbide-arlokoak eta profesionaltasun-ziurtagirien Estatuko katalogoan sartzekoak; eta 1697/2011 Errege Dekretua, azaroaren 18koa, zeinaren bidez bost profesionaltasun-ziurtagiri ezartzen baitira, Gizarte eta Kultur eta Komunitatearentzako Zerbitzuak arlokoak eta profesionaltasun-ziurtagirien Estatuko katalogoan sartzekoak.

Orain arte adierazi den guztiarengatik, Lehendakaritzako, Berdintasuneko, Funtzio Publikoko eta Barneko kontseilariak proposaturik, Nafarroako Kontseiluarekin bat etorrita, eta Nafarroako Gobernuak 2023ko uztailaren 5eko bilkuran hartutako erabakiarekin bat,

DEKRETATZEN DUT:

I. KAPITULUA.–XEDAPEN OROKORRAK

1. artikulua. Xedea.

Foru dekretu honen xedea da Nafarroako Foru Komunitatean aisialdiko hezkuntza eskolak eta horien irakaskuntzak aitortzea arautzea.

2. artikulua. Kontzeptua eta xedea.

Aisialdiko hezkuntza eskolak dira pertsona fisiko edo juridikoek sustatzen dituzten eskolak. Ekimen publiko edo pribatukoak izan daitezke eta haien zeregina da pertsonak prestatzea aisialdiaren eta hezkuntza ez-formalaren arloan. Haien helburu nagusia da aisialdiko hezkuntza-jardueren arduradunak prestatzea eta trebatzea, aplikagarriak zaizkien konpetentzia-atal ofizialetan ezarritakoaren arabera. Horrez gain, beste prestakuntza-jarduera osagarri batzuk programatu eta egin ahal izanen dituzte beren eskumen-esparruaren barruan, eta aplikatzekoa den araudiarekin bat.

II. KAPITULUA.–BALDINTZAK ETA AITORTZA

3. artikulua. Baldintzak.

1. Aisialdiko hezkuntza eskola gisa aitortzeko eskatu ahal izanen dute honako baldintza hauek betetzen dituzten eskolek:

a) Beren jarduera nagusia Nafarroako Foru Komunitatean garatzen duen ekimen publiko edo pribatuko pertsona fisiko edo juridikoak sustatuak izatea.

b) Pertsona juridikoa izanez gero, estatutuetan jasota izatea, helburu gisa, aisialdiko hezkuntza eta hezkuntza ez-formala.

c) Gutxienez hiru irakasleko taldea izatea. Irakasle horiek unibertsitate-titulua izanen dute, edo Animazio Soziokultural eta Turistikoko goi-mailako teknikariaren titulua, edo hiru urteko eskarmentua egiaztatua, edo 200 irakaskuntza-ordu efektibo aisialdiarekin lotura duten gaietan.

d) Zuzendaria izatea eskolan. Zuzendariak unibertsitateko titulua izan beharko du, edo Animazio Soziokultural eta Turistikoko goi-mailako teknikariaren titulua, haurren eta gazteen aisialdiko jardueren zuzendari diploma, eta, gutxienez ere, bi urteko edo 200 ordu efektiboko eskarmentua aisialdiko jardueren zuzendari gisa.

e) Eskolara atxikitako langile guztiek sexu-izaerako delituen ziurtagiri bat izan beharko dute, aurrekaririk gabea. Ziurtagiriak urtero berritu beharko dira.

f) Sarbide publikoko administrazio-egoitza bat izatea Nafarroan, aurrez aurreko arreta eskaintzea eta bertan lan egiten duten pertsonentzako espazio egokiak izatea.

g) Prestakuntza-gela bat izatea, nahikoa handia dena eta behar bezala ekipaturik dagoena prestakuntza teoriko-praktikoak egiteko. Eskolaren egoitzan berean egon daiteke edo, bestela ere, berea ez den baina prestakuntzarako erabil dezakeen beste espazio batean.

h) Eskolak estatutu batzuk izan beharko ditu indarrean, eta estatutu horiek, gutxienez, eduki hau izan beharko dute:

h.1) Eskolaren izena eta kokapena.

h.2) Xedeak eta helburuak.

h.3) Irakasle-taldea.

h.4) Jardueraren lurralde-eremua.

h.5) Ordezkaritza-, zuzendaritza- eta administrazio-organoak.

h.6) Partaidetza-organoak, halakorik badago.

h.7) Ekonomia- eta finantzaketa-araubidea.

h.8) Eskolaren funtzionamendu-arauak.

h.9) Hezkuntza-proiektua, zeinetan azalduko baita zer helburu orokorretan oinarritzen den hezkuntza eta printzipio ideologikoak zein teorikoak. Balio hauek jasoko dira, zehazki: ingurumena zaintzea, pertsonen arteko berdintasunezko harremanak, emakumeen eta gizonen arteko berdintasuna, sexu- eta genero-aniztasuna, dibertsitate funtzionala edo kultura-aniztasuna onartzea balio eta aukera gisa.

h.10) Eskolaren metodologia pedagogikoaren deskribapena. Metodologia horrek aktiboa eta motibatzailea izan beharko du, eta oinarri izanen ditu hezkuntza "ez-formalaren" berezko irakaskuntza- eta ikaskuntza-teknikak, pertsonen arteko harremanak sustatzen dituztenak eta taldeen dinamismoa nahiz parte-hartzea bultzatzen dituztenak.

h.11) Jardueren, irakasleen eta ikasleen ebaluazio- eta jarraipen-sistemak.

h.12) Azkentzeko eta eteteko arrazoiak, eta egon daitekeen soberakin ekonomikoa zertara bideratuko den.

h.13) Bideragarritasun-plan bat izatea.

2. Baldintza horiek guztiak eskola jardunean ari den epe osoan bete beharko dira.

4. artikulua. Aitortza-eskaera.

1. Nortasun juridikoa duten aisialdiko hezkuntza eskolek eta, nortasun juridikorik izan gabe ere, administrazio publikoarekin harreman elektronikoa izatera behartuta daudenek telematika bidez aurkeztu beharko dute eskabidea, nahitaez, Nafarroako Gobernuaren Erregistro Orokor Elektronikoan. Aisialdiko hezkuntza eskolek, baldin administrazio publikoarekin harreman elektronikoa izatera behartuta ez dauden pertsona fisikoak badira, eskabidea aurkezten ahalko dute Administrazio Publikoen Administrazio Prozedura Erkidearen urriaren 1eko 39/2015 Legearen 16.4 artikuluan ezarritako edozein bitartekoren bidez.

2. Eskaerarekin batera, foru dekretu honen I. eranskineko erantzukizunpeko adierazpena aurkeztu beharko da, eskolaren ordezkariak sinatua, zeinetan adieraziko baita ezen betetzen dituela foru dekretu honetan eta gainerako araudi aplikagarrian azaltzen diren baldintzak, baduela hori guztia egiaztatzen duen dokumentazioa eta, hala eskatuz gero, aurkeztuko duela ere.

3. Nafarroako Gazteriaren Institutuak egiaztatuko ditu aisialdiko hezkuntza eskola legez eratutako erakundea dela erakusten duten agiriak.

4. Eskabidea osatzeko edo zuzentzeko errekerimendua, halakorik izanez gero betiere, Administrazio Publikoen Administrazio Prozedura Erkidearen urriaren 1eko 39/2015 Legean ezarritako moduan eta epean eginen da.

5. artikulua. Aitortza.

1. Aitortza-eskaerak Nafarroako Gazteriaren Institutuko zuzendari eta kudeatzailearen ebazpen bidez ebatziko dira.

2. Aisialdiko hezkuntza eskola aitortzeak berekin dakar eskola hori Nafarroako Gazteriaren Institutuaren aisialdiko hezkuntza eskolen katalogoan inskribatzea. Katalogo hori arautuko da hura sortu eta arautzen duen foru-aginduan jasotako arauen arabera.

3. Nafarroako aisialdiko hezkuntza eskolen katalogoa publikoa izanen da, eta informatiboa besterik ez da izanen. Haren helburua izanen da dauden eskolen publikotasuna zaintzea eta eskolei buruzko informazioa eguneraturik izatea.

6. artikulua. Aitortzaren ondorioak.

1. Nafarroako Gazteria Institutuaren aitortzari esker, aisialdiko hezkuntza eskolek eman ahal izanen dituzte haur eta gazteentzako aisialdiko jardueretako monitore izateko prestakuntza-ikastaroak, bai eta haur eta gazteentzako aisialdiko jardueretako zuzendari izatekoak ere, eta ezar daitezkeen beste irakaskuntza osagarri batzuk emateko ere bai. Ikastaro eta irakaskuntza horien diplomak ofizialki aitortuko ditu Nafarroako Gazteriaren Institutuak.

2. Nafarroako Gazteriaren Institutuko zuzendari-kudeatzaileak ebatziko du kasuan kasuko eskola inskribatzea Nafarroako Gazteriaren Institutuaren aisialdiko hezkuntza eskolen katalogoan. Une horretatik aurrera izanen ditu ondorioak hizpide dugun aitortzak.

7. artikulua. Betebeharrak.

Nafarroako Gazteria Institutuak aitortutako aisialdiko hezkuntza eskolek betebehar hauek bete beharko dituzte:

a) Zerga arloko eta Gizarte Segurantzarekiko betebeharrak egunean izatea.

b) Urte naturaleko azken hiruhilekoan aurkeztea hurrengo urtean eginen diren ikastaroen plangintza. Honako hauek zehaztu beharko dira, gutxienez ere: ikastaroen programazio pedagogikoa, non eginen diren, eta zer egunetan diren hastekoak eta bukatzekoak.

c) Urtean gutxienez ere ikastaro ofizial bat ematea, dela haur eta gazteentzako aisialdiko jardueretako monitore izateko ikastaro ofizial bat, dela haur eta gazteentzako aisialdiko jardueren zuzendari izateko ikastaro ofizial bat.

d) Eskolako administrazio-jardueraren artxibo bat sortzea, mantentzea eta zaintzea, eta behar bezala eguneratuta edukitzea.

e) Nafarroako Gazteriaren Institutuaren gainbegiratze-jarduna erraztea, aukera emanez programatutako jarduerak eta eskolako dokumentazio administratiboa ikusteko.

f) Erantzukizun zibileko eta istripuetarako aseguru bat izatea indarrean, zeinak estaliko baititu bere jarduerak gauzatzearen ondoriozko arriskuak.

g) Praktiken modulua egitea, zer trebakuntza lortu behar den, horren araberako espazio batean, eta eskolan arduradun bat izendatzea praktika horien jarraipena egiteko.

h) Praktiken modulua hasi aurretik, ikasleei sexu-izaerako delituen ziurtagiri bat eskatzea, aurrekaririk gabea. Ziurtagiri horrek izan behar du, gehienez ere, praktikak hasi baino hiru hilabete lehenago emana, ez gehiago.

i) Eskola bat ixten baldin bada, eskola horrek Nafarroako Gazteria Institutuak aitortutako beste eskola bati transferitu beharko dizkio bai izapidetze bidean diren espedienteak –baldin ikasleek horretarako baimena eman badiote berariaz–, bai itxi arte eman dituen ikastaroen diplomei buruzko informazioa. Transferentzia hori bi eskolen arteko idatzizko akordioaren bidez gauzatuko da, eta Nafarroako Gazteriaren Institutuari horren berri eman beharko zaio. Ikasleek horretarako baimenik ematen ez badute, prestakuntza bertan behera utzi ahal izanen dute, eta harengatik ordaindu duten zenbatekoa itzuliko zaie.

j) Ikasleren batek eskola aldatzea eskatzen baldin badu, jatorrizko eskolak bere espedientearen kopia bat transferitu beharko dio eskola hartzaileari.

k) Indarrean dagoen datuak babesteko araudia betetzea.

l) Kexa- eta erreklamazio-orriak jartzea erabiltzaileen eskura.

m) Aitortza-eskabideko datuetan aldaketarik bada, edozein dela ere, haren berri ematea Nafarroako Gazteria Institutuari, datuok une oro eguneratuta egon daitezen eta akatsik izan ez dezaten.

8. artikulua. Dokumentazio administratiboa.

Aisialdiko hezkuntza eskola aitortuek dokumentazio administratibo hau sortu, eguneratu eta zaindu beharko dute:

a) Emandako ikastaroen zerrenda eta dagozkien aktak, non jasoko baitira ikasleen zerrenda eta "gai" edo "ez gai" kalifikazioa.

b) Eskolako ikasle bakoitzaren banakako espedienteak. Espediente horietan, egin diren moduluak jaso beharko dira, praktika-moduluak barne. Espediente horiek suntsitu ahal izanen dira ikastaroa amaitu eta bost urte igarotakoan edo datuak babesteko indarrean dagoen araudiak ezartzen duen epean.

III. KAPITULUA.–IRAKASKUNTZAK

9. artikulua. Prestakuntza.

Foru dekretu honen babesean ofizialki aitortzen diren aisialdiko hezkuntza eskolek honako prestakuntza hauek emateko ahalmena izanen dute:

a) Haur eta gazteentzako aisialdiko jardueretako monitorea.

b) Haur eta gazteentzako aisialdiko jardueren zuzendaria.

c) Aurreko apartatuetan deskribatutako prestazioen osagarriak, baldin Nafarroako Gazteriaren Institutuak egokitzat jotzen baditu kolektibo jakin baten eskaerei erantzuteko edo kolektibo horrek beharrak dituela atzeman delako.

10. artikulua. Bestelako prestakuntza batzuk.

Aisialdiko hezkuntza eskolek beste prestakuntza batzuk eman ahalko dituzte beren jarduera-eremuaren barruan, foru dekretu honek araututakoez harago. Prestakuntza horiek, Nafarroako Gazteriaren Institutuaren aitortza jasotzeko, bat etorri beharko dute foru dekretu honetan jasotzen diren balioekin: ingurumena zaintzea, pertsonen arteko berdintasunezko harremanak, emakumeen eta gizonen arteko berdintasuna, sexu- eta genero-aniztasuna kontuan hartzea, dibertsitate funtzionala aintzat hartzea edo onartzea kultura-aniztasunaren balioa eta ematen duen aukera.

11. artikulua. Ikasleen baldintzak.

1. Haur eta gazteentzako aisialdiko jardueretako monitoreen prestakuntzan matrikulatu nahi dutenek honako baldintza hauek bete beharko dituzte:

a) 18 urte izatea ikastaroaren zati teorikoa amaitzean.

b) Ikastaroaren hasieran honako kualifikazio hauetakoren bat izatea:

b.1) Derrigorrezko Bigarren Hezkuntzako edo goi-mailako hezkuntzako titulua.

b.2) Oinarrizko mailako titulua edo baliokidea (OLH).

b.3) 2. mailako edo goragoko profesionaltasun-ziurtagiria.

b.4) Lanbide arlo bereko 1. mailako profesionaltasun-ziurtagiria.

b.5) Gaindituta izatea erdi-mailako heziketa zikloetara sartzeko proba.

b.6) Gainditua izatea 25 urtetik gorakoak unibertsitatean sartzeko proba.

b.7) Gaindituta izatea goi-mailako sarrera-proba.

2. Haur eta gazteentzako aisialdiko jardueretako zuzendarien prestakuntzan matrikulatu nahi dutenek honako baldintza hauek bete beharko dituzte:

a) 21 urte izatea ikastaroa hasten den unean.

b) Ikastaroaren hasieran honako kualifikazio hauetakoren bat izatea:

b.1) Batxilergoko titulua edo goragokoa.

b.2) Goi-mailako teknikariaren titulua.

b.3) Gizarte eta Kultur eta Komunitatearentzako Zerbitzuen arloko erdi mailako teknikaria.

b.4) Haur eta gazteentzako aisialdiko jardueretako monitorearen diploma.

b.5) Haur eta gazteentzako hezkuntza-aisialdiko jarduerak dinamizatzeko profesionaltasun-ziurtagiria, baldin eta ziurtagiri horren eduki teoriko-praktikoak pareka badaitezke Haur eta Gazteentzako Aisialdiko Jardueretako Monitorearen Diplomakoekin.

12. artikulua. Prestakuntzen deskribapena.

1. Haur eta gazteentzako aisialdiko jardueretako monitorea. Haren baitan izanen da eskuratzea haur eta gazteei zuzendutako hezkuntza-aisialdiko jarduerak antolatzeko, dinamizatzeko eta ebaluatzeko beharrezko gaitasunak, erakunde baten programazio orokorraren esparruan, hori guztia talde-animazioko berariazko teknikak aplikatuta, balioetan oinarritutako hezkuntza berariaz nabarmenduta, eta segurtasuneko eta arriskuen prebentzioko oinarrizko neurriak kontuan hartuta.

Ikastaroa 310 ordukoa izanen da. Urriaren 31ko 1537/2011 Errege Dekretuaren bidez, Gizarte eta Kultur eta Komunitatearentzako Zerbitzuak izeneko lanbide-arloari dagozkion bi profesionaltasun-ziurtagiri sortu ziren, zeinak sartu baitziren profesionaltasun-ziurtagirien Estatuko katalogoan (SSC564–2 Haur eta gazteentzako hezkuntza-aisialdiko jardueren dinamizazioa). Bada, hizpide dugun ikastaroak izanen ditu, hain zuzen ere, errege dekretu horretan ezarritako gaitasun-unitateak, errealizazio profesionalak eta ingurune profesionalaren deskribapena, han ezarritako banaketa eta ordu kopuru berberaz.

Baldin ikasleek badituzte haur eta gazteentzako aisialdiko jardueren zuzendariaren diploma, edo dagokion profesionaltasun-ziurtagiria, egin ahal izanen dituzte, bakar-bakarrik, aldez aurretik egin ez dituzten ikastaroko modulu espezifikoak.

2. Haur eta gazteentzako aisialdiko jardueren zuzendaria. Haren baitan izanen da eskuratzea, alderdi guztietan, haur eta gazteei zuzendutako hezkuntza-aisialdiko proiektuak planifikatzeko, antolatzeko, kudeatzeko, dinamizatzeko eta ebaluatzeko beharrezkoak diren gaitasunak; proiektu horiek ordezkatzea, barnean zein kanpoan, eta bere gain hartzea monitore-taldea sortzeko, kontrolatzeko eta dinamizatzeko ardura.

Ikastaroak 410 orduko iraupena izanen du. Azaroaren 18ko 1697/2011 Errege Dekretuaren bidez, Gizarte eta Kultur eta Komunitatearentzako Zerbitzuak izeneko lanbide-arloari dagozkion bost profesionaltasun-ziurtagiri sortu ziren, zeinak sartu baitziren profesionaltasun-ziurtagirien Estatuko katalogoan (SSC565–3: haurren eta gazteentzako hezkuntza-aisialdiko jardueren zuzendaritza eta koordinazioa). Bada, hizpide dugun ikastaroak izanen ditu, hain zuzen ere, errege dekretu horren II. eranskinean ezarritako gaitasun-unitateak, errealizazio profesionalak, gauzatzeko irizpideak eta ingurune profesionalaren deskribapena, han ezarritako banaketa eta ordu kopuru berberaz.

Baldin ikasleek badituzte haur eta gazteentzako aisialdiko jardueretako monitorearen diploma, edo dagokion profesionaltasun-ziurtagiria, egin ahal izanen dituzte, bakar-bakarrik, aldez aurretik egin ez dituzten ikastaroko moduluak.

3. Prestakuntza osagarriak, edo aisialdiko beste prestakuntza batzuk, planteatu beharko dira artikulu honetan deskribatutakoaren antzera, eta Nafarroako Gazteriaren Institutuak baimena eman eta gainbegiratu beharko ditu.

13. artikulua. Modalitate ez-presentziala.

1. Modalitate ez-presentzialean eman ahal izanen da, gehienez ere, modulu teoriko bakoitzari dagozkion orduen %25. Praktiketako moduluak ezin izanen dira modalitate horretan egin.

2. Programazioan argi eta garbi identifikatu beharko da zer eduki emanen den modu ez-presentzialean, eta adieraziko da, era berean, zer metodologia erabiliko den kasu bakoitzean eduki horiek gauzatzeko.

3. Modu ez-presentzialean ematen den prestakuntza horrek halako didaktikaz eginen da non bermatuko baita edukiak eraginkortasunez ikasiko direla, eta ikasleentzako tutore-laguntza ere izan beharko du beti.

14. artikulua. Prestakuntzen antolamendua.

1. Haur eta gazteentzako aisialdiko jardueretako monitore izateko ikastaro bat abiarazi ahal izateko, gutxienez zortzi pertsona egon beharko dira matrikulatuta. Haur eta gazteentzako aisialdiko jardueretako zuzendari izateko ikastaro bat abiarazi ahal izateko, gutxienez sei pertsona egon beharko dira matrikulatuta. Bi prestakuntzetan, ikastaro bakoitzeko hogeita bost lagun egon ahal izanen dira matrikulatuta, gehienez ere. Nafarroako Gazteriaren Institutuak hitzartutakoez bestelako ikasle-kupoak baimendu ahalko ditu, baldin eskola batek aldez aurretik eskaera arrazoitua egiten badu eta betiere eman beharreko prestakuntzaren kalitatea bermatzen bada.

2. Prestakuntza bakoitzak gutxienez hiru laguneko irakasle-talde bat izan beharko du, eta haietako bakar batek ere ezin izanen du eman ordu guztien %50 baino gehiago, praktiken moduluko orduak alde batera utzita. Pertsona horietako batek, gutxienez ere, ikastaroaren zuzendari-eginkizunak beteko ditu, zeinak izan beharko baitu haur eta gazteentzako aisialdiko jardueren zuzendariaren diploma.

3. Lanaldiko eskola-orduak zortzi izanen dira gehienez, gaua igarotzen ez bada, eta hamar ordu gehienez, gaua igarotzen bada.

4. Zati teorikoko moduluek gehienez ere hamabi hilabeteko iraupena izanen dute. Salbuespen horiek, justifikatutako arrazoiengatik, Nafarroako Gazteriaren Institutuaren baimena beharko dute.

5. Derrigorrezkoa da prestakuntzetara joatea. Gehienez ere prestakuntza-orduen %10 huts egin ahal izanen da. Prestakuntza huts eginez gero, behar bezala justifikatu beharko zaio prestakuntzaren arduradunari.

15. artikulua. Praktiken modulua.

1. Praktiken modulua, oro har, modulu teorikoak gainditu ondoren hasiko da, eta bukatu beharko da ikastaroa hasi zenetik hiru urte igaro baino lehen, behar bezala justifikatutako salbuespenetan izan ezik. Salbuespen horiek Nafarroako Gazteriaren Institutuak baimendu beharko ditu.

2. Aisialdiko hezkuntza eskolek protokolo bat izan beharko dute praktiken modulua egiteko. Protokolo hori aldez aurretik eman beharko zaie ikasleei, eta eraginkor bihurtuko da hitzarmen bat sinatzen dutenean eskolako praktiken arduradunak, harrerako erakundeko edo enpresako arduradun batek eta ikasleak. Hitzarmen horretan honako hauek jaso beharko dira: praktikak gainbegiratuko dituen harrerako erakundeko edo -enpresako pertsonaren datuak, ikasleek bete beharreko eginkizunak, hasiera- eta amaiera-datak, ordu-kopurua eta edukiak, eta ikasleen eskubideak eta betebeharrak.

3. Praktiken modulua egin beharko da haur (hiru urtetik aurrera), gazte edo antzekoei zuzendutako aisialdiko jardueretan. Praktiketako 160 ordu egin beharko dira haur eta gazteentzako aisialdiko jardueretako monitore-titulua lortzeko, eta 120 ordu haur eta gazteentzako aisialdiko jardueretako zuzendari-titulua lortzeko. Praktikak egiteko gaua igaro behar bada, gehienez 12 ordu zenbatuko dira lanaldi bakoitzeko. Gaua igaro beharrik ez badago, gehienez 9 ordu zenbatuko dira lanaldi bakoitzeko.

4. Praktikak honako modalitate hauetako edozeinetan egin ahal izanen dira:

a) Modalitate intentsiboa: kanpamentuak, udalekuak, udako zentroak, aisialdiko jarduera-zentroak, eta gaua igarotzea eskatzen duten eta hezkuntza ez-formalarekin lotuta dauden proiektuak. Praktiken gutxieneko iraupena bost egunekoa izanen da.

b) Modalitate estentsiboa: praktiken moduluan zer gaitasun lantzen diren, gaitasun horiek lortzeko bidea ematen duten jarduerak garatzen dituen erakunde, eskola-esparruko elkarte edo antzekoren batean jardutea denboran barrena modu jarraituan.

c) Modalitate mistoa: modalitate intentsiboan eta modalitate estentsiboan deskribatutako jardueretan parte hartzea, harik eta modulu bakoitzak eskatzen dituen praktika-orduak osatu arte eta kasu bakoitzean ezartzen diren baldintzak betez.

5. Praktikak egin bitartean, harrerako erakundeko edo enpresako tutore batek ikasleak gainbegiratu beharko ditu une oro. Praktika horiek tutorizatzeko ardura dutenek honako titulazio hauek izan beharko dituzte:

a) Haur eta gazteentzako aisialdiko jardueretako monitore-tituluaren praktiken tutore direnek haur eta gazteentzako aisialdiko jardueretako monitore-titulua izan beharko dute.

b) Haur eta gazteentzako aisialdiko jardueren zuzendari-tituluaren praktiken tutore direnek haur eta gazteentzako aisialdiko jardueren zuzendari-titulua izan beharko dute.

6. Aisialdiko hezkuntza eskolek ikasleen praktikak gainbegiratu beharko dituzte, horretarako ezartzen dituzten prozeduren bidez.

7. Praktikak amaitzean, ikasle bakoitzak memoria bat eginen du, zeinetan jasoko baitu zer ekarpen egin duen gauzatutako zereginak prestatzeko, garatzeko eta ebaluatzeko orduan.

8. Ikasleak memoria hori aurkeztu beharko du aisialdiko hezkuntza eskolan, eta, horrekin batera, praktiketako tutoreak sinatutako eta harrerako erakundeak edo enpresak zigilatutako ziurtagiria. Ziurtagiri horretan, honako hauek adieraziko dira: egindako praktikak zer egunetan hasi eta zer egunetan bukatu ziren, iraupena eta edukia, bai eta ikaslearen azken ebaluazio labur bat ere.

9. Praktikek ez dakarte inolako lan-harremanik praktikak egiten dituzten ikasleen eta harrerako erakundearen edo -enpresaren artean, eta praktiketan aritzen direnek ezin izanen dute jardun bertako profesional edo langile boluntarioen ordez.

16. artikulua. Ikastaroen ebaluazioa.

1. Aisialdiko hezkuntza eskolek, prestakuntza-ikastaroak ebaluatzeko, irizpide hauek hartuko dituzte kontuan, gutxienez ere:

a) Ikasleen parte-hartzea. Bertaratzea, aprobetxamendua eta parte-hartzearen kalitatea ebaluatuko dira.

b) Ikasleen egokitasuna, hau da, ikasleek lortu izana aisialdiko jardueretako monitore edo zuzendari gisa jarduteko gaitasun eta jarrera pertsonalen multzoa.

2. Prestakuntza-moduluak "gai" edo "ez gai" gisa ebaluatuko dira. Erreferentziazko ebaluazio-irizpideak apirilaren 20ko 567/2011 Errege Dekretuan agertzen diren horiek izanen dira. Errege dekretu horren bidez profesionaltasun-ziurtagirien Estatuko katalogoa osatu zen, Gizarte eta Kultur eta Komunitatearentzako Zerbitzuak arloko lau profesionaltasun-ziurtagiri ezarrita.

3. Ikastaro bateko prestakuntza-modulu guztiak gainditu dituzten ikasleak diploma ofiziala lortzeko proposatuko dira.

17. artikulua. Ikastaroen dokumentazioa izapidetzea.

1. Ikastaroen hasieran eta horiek amaitu ondoren, aisialdiko hezkuntza eskolek honako dokumentazio hau bidali beharko diote Nafarroako Gazteriaren Institutuari:

a) Prestakuntza-ikastaroak hasi baino bost egun lehenago aurkeztu beharreko dokumentazioa:

a.1) Ikasturte bakoitzeko irakasle-taldea osatzen duten pertsonen zerrenda.

a.2) Ikasturte bakoitzean izena eman duten ikasleen zerrenda osoa.

a.3) Ikasle bakoitzaren NANaren, pasaportearen edo identifikazio-agiriaren fotokopia eta izena emateko formularioa, behar bezala beteta.

a.4) Ikasturte bakoitzaren egutegia, ikasgaiak, datak, ordutegiak, irakasleak eta emateko tokia adierazita.

b) Zati teorikoa amaitu eta hilabete naturaleko epean honako dokumentazio hau aurkeztu beharko da: prestakuntza-modulu guztietan "gai" edo "ez gai" gisa ebaluatutako ikasleen kalifikazio-aktak.

c) Prestakuntza osoa amaitu eta bi hilabete naturaleko epean honako dokumentazio hau aurkeztu beharko da: ikastaroetako ikasleen azken kalifikazioaren aktak.

2. Dokumentazio hori bidaltzeko prozedura foru dekretu honen 4.1 artikuluan xedatutakoaren arabera gauzatuko da.

3. Nafarroako Gazteriaren Institutuak bestelako dokumentazio osagarria eskatu ahal izanen die aisialdiko hezkuntza eskolei, baldin ikastaroen dokumentazioa behar bezala izapidetzeko komeni bada.

18. artikulua. Emandako diplomen erregistroa.

Nafarroako Gazteriaren Institutuari dagokio foru dekretu honetan arautzen diren prestakuntzen diploma ofizialak ematea eta erregistratzea. Horretarako, Nafarroako Gazteriaren Institutuak emandako diplomen erregistroa zainduko du, alegia, foru dekretu honetan jasotzen diren prestakuntzak gainditu izana ziurtatzen duten diplomena.

IV. KAPITULUA.–EGIAZTATZEA, GAINBEGIRATZEA ETA AITORTZA GALTZEA

19. artikulua. Egiaztatzea eta gainbegiratzea.

Nafarroako Gazteriaren Institutuak, bere eskumenak baliatuta eta foru dekretu honetan ezarritakoa betetzen dela egiaztatze aldera, ahalmena izanen du egokitzat jotzen dituen egiaztatze- eta gainbegiratze-ekintza guztiak egiteko.

20. artikulua. Aitortza galtzea.

1. Nafarroako Gazteriaren Institutuko zuzendari-kudeatzaileak aisialdiko hezkuntza eskola baten jarduera bertan behera uztea erabaki ahal izanen du ebazpen bidez, baldin betetzen bada Administrazio Publikoen Administrazio Prozedura Erkideari buruzko urriaren 1eko 39/2015 Legearen 69.4 artikuluan jasotakoa.

2. Era berean, aisialdiko hezkuntza eskola baten jarduera bertan behera uztea erabaki ahal izanen da honako kasu hauetan:

a) Eskolak ez dituenean betetzen hura aitortzeko eskatzen diren betekizunak eta baldintzak, edo horiek betetzeari uzten dionean.

b) Eskolak erregelamendu honetan ezarritako edozein betebehar betetzen ez duenean.

3. Nafarroako Gazteriaren Institutuak ofizioz hasi ahalko du aitortza galtzeko administrazio-espedientea, baldin artikulu honetan deskribatutako egoeraren bat hautematen badu. Prozedura bideratuko da Administrazio Publikoen Administrazio Prozedura Erkideari buruzko urriaren 1eko 39/2015 Legearen arabera.

4. Eskolak nahi duenean eskatu ahal izanen du jarduera borondatez bertan behera uzteko, baina abian dituen prestakuntzak amaitu beharko ditu.

5. Nafarroako Gazteriaren Institutuko zuzendari-kudeatzailearen ebazpenak, aisialdiko hezkuntza eskola baten jarduera bertan behera uztea erabakitzen duenak, ez dio amaiera ematen administrazio bideari, eta ebazpen horren aurka dagozkion errekurtsoak jarri ahal izanen dira, bat etorriz aplikatzekoa den administrazio-prozeduraren araudi orokorrarekin.

V. KAPITULUA.–NAFARROAKO GAZTERIAREN INSTITUTUAREN KOORDINAZIO- ETA IKUSKARITZA-LANA

21. artikulua. Nafarroako Gazteriaren Institutuaren koordinazio-lana.

1. Nafarroako Gazteriaren Institutuak, bere eskumenen barruan, aisialdiko hezkuntzaren arloko koordinazio-lana eginen du. Horretarako, koordinazio-bilerak deituko ditu, eta, horietan parte hartuko dute, Nafarroako Gazteriaren Institutuko langileez gain, aisialdiko hezkuntza eskoletako ofizialki onartutako arduradunek, bai eta, zer gai jorratuko den, horietan esku hartzeko egokitzat jotzen diren beste pertsona batzuek ere.

2. Bilera horien helburua da gune bat sortzea, hausnarketarako, trukerako eta lanerako zein hobetzeko iradokizunak edo proposamenak egiteko aisialdiko hezkuntzaren esparruan.

3. Nafarroako Gazteriaren Institutuak urtero bilera bat deituko du, gutxienez ere, ofizialki aitortutako aisialdiko hezkuntza eskolekin.

22. artikulua. Nafarroako Gazteriaren Institutuaren ikuskaritza-lana.

Nafarroako Gazteriaren Institutuak ikuskaritza-lana eginen du foru dekretu honetan jasotzen den gaian, berresteko betetzen dela bertan xedatutakoa.

Lehenengo xedapen iragankorra.–Aurretik emandako diplomak.

Araudi hau indarrean sartu aurretik indarrean zegoen aisialdiko hezkuntza eskolen araudia aplikatuz emandako diploma guztiak baliozkoak izanen dira aurrerantzean ere, inolako izapiderik egin beharrik gabe.

Bigarren xedapen iragankorra.–Lehendik dauden eskolak egokitzea.

Ekainaren 21eko 235/1999 Foru Dekretuaren bidez arautu ziren haur eta gazteen aisialdiko eskolen onarpen ofiziala, eskola horien eta Nafarroako Foru Komunitateko Administrazioaren arteko harremanak eta haur eta gazteen aisialdiko hezitzaileen prestakuntza. Araudi hau indarrean sartzen den egunean, aisialdiko zenbait hezkuntza eskolak aitortza ofiziala izanen dute, aipatu foru dekretu horretan xedatutakoaren arabera. Eskola horiek sei hilabeteko epea izanen dute Nafarroako Gazteriaren Institutuari jakinarazteko hezkuntza-jardunari eusten diotela foru dekretu honek indarra hartzen duenetik aurrera. Horretarako, erantzukizunpeko adierazpen bat aurkeztu beharko dute, foru dekretu honen 4. artikuluan xedatutakoaren arabera. Bestela, deklaratzen ahalko da eskolak ezin izanen duela aurrerantzean aisialdiko hezkuntza eskola gisa jardun, 20. artikuluan xedatutakoaren arabera.

Hirugarren xedapen iragankorra.–Hasitako ikastaroak.

Foru dekretu honek indarra hartu aurretik hasita zeuden ikastaroek aurreko araudiaren pean jarraituko dute, baldin eta aldez aurretik jakinarazi badira, data eta forma egokian jakinarazi ere, eta araudi horretan ezarritako gainerako baldintzak betetzen badituzte. Ikastaro horiek hogeita zazpi hilabeteko epean amaitu beharko dira, foru dekretu hau indarrean sartzen denetik zenbatzen hasita.

Xedapen indargabetzaile bakarra.–Arauak indargabetzea.

Indarrik gabe uzten dira foru dekretu honetan ezarritakoari aurka egiten dioten maila bereko edo baxuagoko arau guztiak. Indarrik gabe uzten dira, bereziki, honako xedapen hauek:

a) 235/1999 Foru Dekretua, ekainaren 21ekoa, Haur eta Gazteen Astialdirako Eskolen onarpen ofiziala, Eskola horien eta Nafarroako Foru Komunitateko Administrazioaren arteko harremanak eta Haur eta gazteen astialdirako hezitzaileen prestakuntza arautzen dituena.

b) 17/2002 Foru Agindua, otsailaren 20koa, Gizarte Ongizate, Kirol eta Gazteri kontseilariak emana, Aisialdiko Eskolen onarpen ofizialerako, Gazteekin egiten diren Jardueretarako Nafarroako Eskolarekin (GENE) izanen dituen harremanetarako eta ofizialki onartutako Aisialdiko Eskolen ohiko funtzionamendurako arauak ezartzen dituena.

c) 34/2004 Foru Agindua, otsailaren 20koa, Gizarte Ongizate, Kirol eta Gazteria kontseilariak emana, ofizialki onarturiko Astialdiko Eskolek astialdiko zuzendari eta begirale izateko ematen dituzten ikastaroen arauak ezartzen dituena.

Azken xedapenetako lehena.–Arauak emateko gaikuntza.

Gazteriaren arloko eskumena duen departamentuko titularrari ahalmena ematen zaio foru dekretu honetan ezarritakoa garatzeko beharrezkoak diren egintza eta xedapen guztiak eman ditzan, bai eta dekretu honen eranskinean ezarritakoaren edukia eguneratzeko ere.

Azken xedapenetako bigarrena.–Indarra hartzea.

Foru dekretu honek Nafarroako Aldizkari Ofizialean argitaratu eta biharamunean hartuko du indarra.

Iruñean, 2023ko uztailaren 5ean.–Nafarroako Gobernuko lehendakaria, María Chivite Navascués.–Lehendakaritzako, Berdintasuneko, Funtzio Publikoko eta Barneko kontseilaria, Javier Remírez Apesteguía.

I. ERANSKINA.–ERANTZUKIZUNPEKO ADIERAZPENA

Nik, .....................................................................................................................................................

jaunak/andreak (jakinarazpenetarako helbidea: .......................................................................................;

NANa: .......................................................................; telefono-zenbakia: ...................................................;

helbide elektronikoa: ......................................................................................................................................,

nire izenean edo ........................................................................................................................................

aisialdiko hezkuntza eskola ordezkatuz (ezabatu egokia ez dena)

helbidea: ....................................................................................................................................................;

IFZ:.........................................................................; telefono-zenbakia: ....................................................;

helbide elektronikoa: ....................................................................................................., honako hau

ADIERAZTEN DUT:

Eskolak betetzen dituela uztailaren 5eko 56/2023 Foru Dekretuaren 3. artikuluan eta aplikatzekoak diren gainerako arauetan azaltzen diren baldintzak (foru dekretu horren bidez arautu da nola, Nafarroako Foru Komunitatean, aisialdiko hezkuntza eskolak eta horien irakaskuntzak aitortzeko bidea). Adierazten dut, era berean, eskolak baduela hori egiaztatzen duen dokumentazioa eta, hala eskatuz gero, aurkeztu eginen duela.

Eta jasota gera dadin eta bidezko ondorioak izan ditzan, idazki hau egin eta sinatzen dut,

Iruñean, 20..….(e)ko …………………….…………….aren ……………………(e)(a)n.

(Sinadura)

Iragarkiaren kodea: F2310639