Iragarkia
144. ALDIZKARIA - 2023ko uztailaren 11
1. NAFARROAKO FORU KOMUNITATEA
1.7. BESTELAKOAK
1356/2023 EBAZPENA, 2023ko ekainaren 27koa, Nafarroako Unibertsitate Publikoko errektoreak emana. Haren bidez agintzen da argitaratzea "Erabakia, Unibertsitate Publikoko Administrazio eta Zerbitzuetako langileen opor, baimen, lizentzia, lanaldi eta eszedentzien arautegia aldatzen duena", Gobernu Kontseiluak 2023ko ekainaren 27an hartu zuen erabakiaren bidez onetsia.
2003ko maiatzaren 12ko 110/2003 Foru Dekretuak onetsitako Unibertsitateko Estatutuetako 40. artikuluak ematen dizkidan eskumenak erabiliz, agindua ematen dut Gobernu Kontseiluak 2023ko ekainaren 27an hartutako erabakia argitaratzeko. Erabaki horren bidez, Nafarroako Unibertsitate Publikoaren administrazioko eta zerbitzuetako langileen plantilla organikoa aldatu da.
"NAFARROAKO UNIBERTSITATE PUBLIKOKO GOBERNU KONTSEILUAREN ERABAKIA, ADMINISTRAZIOKO ETA ZERBITZUETAKO LANGILEEN OPOR, BAIMEN, LIZENTZIA, LANALDI ETA ESZEDENTZIEN ARAUTEGIA ALDATZEN DUENA
Gobernu Kontseiluak 2017ko uztailaren 4an hartutako erabaki baten bidez, Nafarroako Unibertsitate Publikoko Administrazioko eta Zerbitzuetako Langileen Opor, Baimen, Lizentzia, Lanaldi eta Eszedentzien Arautegia onetsi zen.
Nafarroako administrazio publikoetan diharduten langile guztiei aplikatu beharreko zenbait arautan izan diren aldaketek eragina izan dute arautegi horretan jasotako erregulazioan. Azpimarratzekoa da ezen, duela gutxiko 2023ko martxoaren 29ko 2/2023 Foru Legeak, 1993ko abuztuaren 30eko 251/1993 Legegintzako Foru Dekretuaren bidez onetsitako Nafarroako Administrazio Publikoen Zerbitzuko Langileen Estatutuaren testu bategina aldatzen duenak, berrikuntza garrantzitsuak ekarri dituela bai opor egunen eta norberaren kontuetarako baimen egunen kopuruari, bai borondatezko eszedentziaren erregimenari dagokienez.
Aurretik ere, foru araudia egokitu egin behar izan zen seme-alaben jaiotzaren eta haiek zaindu beharraren ondoriozko baimenekin lotuta izandako berrikuntzetara, zaintza horretan kontziliazioaren eta erantzunkidetasunaren helburuei erantzuteko.
Era berean, Unibertsitate Sistemari buruzko 2023ko martxoaren 22ko 2/2023 Lege Organiko berriak orain arte erabili izan den "administrazioko eta zerbitzuetako langile" izendapena aldatu du, eta "teknikari, kudeaketari eta administrazioko eta zerbitzuetako langile" izendapena ezarri du.
Azkenik, aldatu egin behar dira Erregistro Orokorrari egindako aipamenak, aurrerantzean Erregistro Elektronikoa aipatu behar baita, Gobernu Kontseiluak 2022ko abenduaren 19ko erabaki baten bidez onetsitako Nafarroako Unibertsitate Publikoaren Administrazio Elektronikoari buruzko Erregelamenduarekin bat etorriz. Halaber, gaztelaniazko testuan Langilearen Atariaren izena aldatu da hizkera inklusiboa aplikatzeko.
Segurtasun juridikoaren printzipioari erantzunez, ezinbestekoa da gure araudia legegintzako berrikuntza orokorretara egokitzea, horien eragina duten puntuak zehazki, eta, gainera, gure araubidearen berezitasunek eskatzen dituzten egokitzapenak egin behar dira ezarritako baldintza berriak geure gain hartzeko.
Dagokion negoziazio mahaian xede horrekin proposamena aurkeztu eta akordio bat lortu ondoren, eta horren ondoriozko negoziazio prozesua amaituta, mahaia osatzen duten ordezkari sindikalen gehiengoarekin, honako hau da Gobernu Kontseiluak, kudeatzaileak proposaturik, 2023ko ekainaren 27an egindako bileran hartu duen
ERABAKIA:
Lehenbizikoa.–Aldatzea Nafarroako Unibertsitate Publikoaren Administrazioko eta Zerbitzuetako Langileen Opor, Baimen, Lizentzia, Lanaldi eta Eszedentzien Arautegia, 2017ko uztailaren 4ko erabaki baten bidez onetsia. Hauek dira aldaketak:
1) "Administrazioko eta zerbitzuetako langile" adierazpenaren ordez, "teknikari, kudeaketari eta administrazioko eta zerbitzuetako langile" forma erabiliko da testuan ageri den guztietan, arautegiaren izenburua barne.
2) "Erregistro Orokor" adierazpenaren ordez, "Erregistro Elektroniko" forma erabiliko da testuan ageri den guztietan.
3) "Langilearen Ataria" adierazpenari dagokionez, gaztelaniazko testuan aldaketak egin dira hizkera inklusiboa aplikatzeko.
4) 3. artikulua aldatu da, eta honela idatzita geldituko da:
"3. artikulua. Oporren iraupena.
1.–Nafarroako Unibertsitate Publikoko teknikari, kudeaketari eta administrazioko eta zerbitzuetako langileek urtean 27 laneguneko oporrak hartzeko eskubidea izango dute, bakoitzak zerbitzu aktiboan eman duen urte bakoitzeko, edo, bestela, proportzioan dagokien aldia hartzeko, zerbitzuan emandako denbora motzagoa bada.
2.–Horrez gain, beste lau opor egun hartzeko eskubidea izango dute. Hamabost urteko antzinatasuna dutenek beste egun bat izango dute; hogeikoa dutenek, beste bi; hogeita bostekoa dutenek, beste hiru; eta hogeita hamarrekoa dutenek, beste lau.
3.–Aurreko idatz-zatia aplikatzearen ondoriozko opor egun gehigarriak zerbitzu aktiboko urte oso bakoitzean sortutakoei gehituko zaizkie. Zerbitzualdia laburragoa bada, antzinatasunagatiko opor egun gehigarrien parte proportzionala sortuko da."
5) 4. artikulua aldatu da, eta honela idatzita geldituko da:
"4. artikulua. Oporrak hartzeko erregimena.
1.–Oporrak urte naturalaren barruan hartuko dira, eta hurrengo urteko urtarrilaren 31ra arte. Oporrak egun horretatik aurrera hartzea salbuespenezkoa izango da, eta Kudeatzailetzak baimendu beharko du, Zerbitzuko Zuzendaritzak proposamen arrazoitua egin ondoren.
2.–Oporrak hartzeko, aurretik baimena jaso beharko da, eta zerbitzuaren beharrekin bateragarriak izan beharko dute.
3.–Oro har, langileek eskubidea edukiko dute beren arauzko opor egunetatik 12 udan hartzeko, hots, ekainaren 15etik abuztuaren 31ra bitartean.
4.–Opor egunen % 80 urte bakoitzeko azaroaren 15a baino lehen hartu beharko dira.
5.–Baimendutako oporraldi bat bertan behera geldituko da, eta beste aldi batean hartzeko aukera egongo da, baldin eta hartu baino lehen egoera hauetakoren bat gertatzen bada: aita edo ama bihurtzea, arriskua izatea haurdunaldian edo edoskitze naturaleko aldian, baimena hartzeko eskubidea edukitzea heriotza edo ospitaleratze batengatik, edo aldi baterako ezintasuna izatea.
6.–Oporraldia mozten bada aita edo ama bihurtzeagatik, arriskua izateagatik haurdunaldian edo edoskitze naturaleko aldian, baimena hartzeko eskubidea edukitzeagatik heriotza edo ospitaleratze batengatik, edo aldi baterako ezintasuna izateagatik, oporraldia eten egingo da, eta gainerako denbora beste aldi batean hartzeko aukera egongo da, opor horiei dagokien urte naturala bukatu ez bada; hala izanez gero, hurrengo idatz-zatian xedatutakoa aplikatuko da.
7.–Aitatasunak, amatasunak edo haurdunaldiko nahiz edoskitze naturaleko aldiko arrisku egoerek galarazten badute oporrak dagokien urte naturalean hartzea, zilegi da opor horiek dagokion egoera amaitu eta jarraian hartzea.
Aldi baterako ezintasunaren ondorioz oporrak urte naturalaren barruan hartzea ezinezkoa bada, zilegi da oporrak lanera itzuli eta gero hartzea, horiei dagokien urtea bukatu eta hurrengo hemezortzi hilabeteen barruan.
8.–Lan harremana bukatzearen ondorioz hartu ezin izan diren oporrei soilik emango zaie konpentsazio ekonomikoa.
9.–Lanaldiaren urteko banaketak ezingo du inolaz ere opor egunen kopurua aldatu."
6) Aldatu egin da 5. artikuluaren 2. apartatua, eta honela idatzita geldituko da:
"2.–Lehen idatz-zatian adierazitakoaren salbuespen izango da aldi hauei dagokien oporren eskaera:
–Aste Santua, hots, igandetik igandera eta hurren datorren astea.
–Uda, hots, ekainaren 15etik abuztuaren 31 arte doan aldia.
–Urte bukaera, hots, azaroaren 29tik urtarrilaren 31 arte doan aldia.
Aldi horietan oporrak hartzeko eskaera dagokion aldia hasten den egunaren aurretik hilabete lehenago aurkeztu beharko da, gutxienez ere, eta eskaerak aurkezteko epea amaitu, eta 15 eguneko epean ebatzi beharko dira, gehienez ere. Data horren aurretik, ezingo da aldi horri dagokion baimenik onetsi.
Unitate bakoitzean, oporrak eskatzeko epe hori bukatuta, unitateko langileen oporraldien plangintza adieraziko duen taula bat prestatuko da, eta langile horietako guztiek eskuragarri edukiko dute.
Zerbitzuaren beharrak direla-eta oporrak hartzeari ezezkoa ematen bazaio, interesdunari idazki arrazoitu baten bidez jakinarazi beharko zaio; alde horretatik, nahikoa arrazoi izango da aldi horretan langile aski ez edukitzea, artikulu honen 3. idatz-zatian aipatutako plangintza-taularen arabera.
Zerbitzu, atal edo unitate bakoitzean lanpostua duten langileek aldi berean hartu nahi badituzte oporrak, ados jartzen saiatuko dira, arduradunaren bitartez, eta azken buruan zozketa egingo dute horretarako. Hurrengo urteetan ere nahi bera badute, zozketatik salbuetsiko dute zozketagatik edo zerbitzu beharrengatik aurrekoan opor egunak aldatu zituena."
7) Paragrafo hau gehitu zaio 5. artikuluaren 3. apartatuari:
"Otsailaren 15erako ez bada adierazi zenbatekoa den urte osoan zehar zerbitzuaren funtzionamendu normala bermatzeko beharrezkoa den gutxieneko plantilla -azaroaren 15era arteko opor egunak kontuan hartuta-, aurreko urtekoa onartutzat joko da."
8) 6. artikulua aldatu da, eta honela idatzita geldituko da:
"6. artikulua. Ama biologikoa ez den gurasoaren baimena seme edo alaba baten jaiotzagatik, adoptatzeko asmoetarako zaintzagatik, harreragatik edo adopzioagatik.
1.–Hamazazpi asteko baimen ordaindua emango da seme edo alaba baten jaiotza, adoptatzeko asmoetarako zaintza, harrera edo adopzioagatik. Aste horietatik, gertaera eragilearen ondorengo sei asteak nahitaez hartu beharrekoak izango dira. Baimen hori beste bi astez luzatuko da seme edo alaba desgaitua bada -bat guraso bakoitzarentzat-, baita bigarrenetik aurrerako seme edo alaba bakoitzeko ere seme edo alaba baten baino gehiagoren jaiotza, adopzio, adoptatzeko asmoetarako zaintza edo harrera kasuetan. Aste horiek jaiotza datatik, adoptatzeko edo harrera egiteko asmoetarako zaintzaren administrazio erabakiaren egunetik edo adopzioa ematen duen ebazpen judizialaren egunetik aurrera hartu beharko dira.
2.–Baimen hori hartu behar duen aita edo amak banaturik hartzen ahalko du, baina, betiere, lehenbiziko sei asteak etenik gabe hartu beharko ditu, segidan, eta umea jaio, edo adopziorako edo harrerarako zaintzaren erabaki judiziala hartu edo adopzioa eratzeko erabaki judiziala hartu eta berehala.
3.–Bi gurasoek lan egiten badute, lehenbiziko sei asteak pasatu ondoren, baimen hori etenik gabe hartzen ahalko da, erditzearen ondorengo nahitaezko atsedenaldia amaitzen denetik semeak edo alabak hamabi hilabete bete arte. Etenik gabe hartzez gero, baimen aldi bakoitzerako gutxienez 15 egun lehenago jakinarazi behar da, eta asteak osorik hartuko dira.
4.–Baimen hau erditzeagatiko lizentziaren hamazazpigarren astearen ondoren hartzea erabakitzen bada, azken lizentzia hori baliatzen duen gurasoak eskatzen badu hamabi hilabete baino gutxiagoko seme edo alaba bati bularra emateko denbora metatzea 12.3 artikuluak aipatzen dituen lanaldi osoetan, aldi hori amaitzean hasiko dira zenbatzen ama biologikoa ez den gurasoaren baimenaren gainerako hamaika asteak.
5.–Erditze goiztiarra gertatzen bada, edo, beste edozein arrazoi dela-eta, jaioberriak ospitalean egon behar badu erditu ondoren, baimen hori luzatu egingo da, jaioberriak zenbat egun eman ospitalean, beste hainbeste, gehienez ere hamahiru astera arte.
6.–Semea edo alaba hiltzen bada, baimenaren iraupena ez da murriztuko, salbu eta langileak nahitaezko sei asteko atsedenaldia amaitu ondoren lanpostura itzultzeko eskatzen badu.
7.–Zerbitzuaren beharrekin bateragarria bada, artikulu honetan araututako baimen ordaindua lanaldi partzialean baliatzen ahalko da, lanaldiaren heren bat edo erdia eginez, langileak ezarrita duen lanaldiaren lehenbiziko eta/edo azken orduetan betiere.
8.–Baimen hori baliatzen den bitartean, langileak aukera izanen du Unibertsitateak antolatzen dituen prestakuntza-ikastaroetan parte hartzeko, betiere jaiotza-dataren, adopziorako zaintzaren edo harreraren ondorengo lehen sei asteak jarraian eta berehala pasatu badira.
9) 10. artikuluaren izenburua aldatu da, eta honela idatzita geldituko da:
"10. artikulua. Ama biologikoa ez den gurasoaren baimenak, ahaideen heriotzagatikoak, ahaideen gaixotasunagatikoak edo ahaideen kirurgia handiagatikoak zenbatzeko berezitasunak.
10) Aldatu egin da 12. artikuluaren 4. apartatua, eta honela idatzita geldituko da:
"4.–Bularra emateko baimen bakarra emango da seme edo alaba bakoitzeko. Guraso batek nahiz besteak era berean erabil dezakete baimen hori, modalitatea kontuan hartu gabe. Artikulu honetan jasotako baimena langileen eskubide indibiduala da, eta ezin zaio beste guraso, adoptatzaile, zaintzaile edo hartzaileari pasatu."
11) 21. artikulua aldatu da, eta honela idatzita geldituko da:
"21. artikulua. Norberaren kontuak.
1.–Teknikari, kudeaketari eta administrazioko eta zerbitzuetako langileek zilegi dute, gehienez ere, hiru eguneko baimen ordaindua norberaren kontuengatik, urte natural edo kontratuko urte bakoitzeko; alegia, egun bateko baimena emango zaie lau hilabete osoz lan egiteagatik. Lau hilabetetik beherako zerbitzu aldiek ez dute norberaren kontuetarako egunak hartzeko eskubiderik ematen. Egun horiek hartzeko aldia hurrengo urteko urtarrilaren 31ra arte, ez gehiago, luzatzeko aukera izango da.
Zerbitzuaren beharrekin bateragarria baldin bada, zilegi da baimena zenbait alditan erabiltzea, eta aldi horiek ez dira izango 30 minututik beherakoak edota 3 ordu baino luzeagoak.
2.–Era berean, norberaren kontuetarako bi baimen-egun gehigarri hartzeko eskubidea izango du 18 urteko antzinatasuna lortzen duenean. Beste egun bat gehituko da langileak 24 urteko antzinatasuna lortzen duenean, eta beste egun bat une horretatik aurrera betetako hiru urteko aldi bakoitzeko.
3.–Aurreko paragrafoa aplikatzearen ondoriozko norberaren kontuetarako baimen egun gehigarriak zerbitzu aktiboko urte oso bakoitzean sortutakoei gehituko zaizkie. Zerbitzualdia laburragoa bada, antzinatasunagatiko norberaren kontuetarako baimen egun gehigarrien parte proportzionala sortuko da.
4.–Baimena erabiltzeko, 5 egun aurretik jakinarazi behar da, gutxienez ere. Hala ere, orduka erabiltzen bada, baimena eskatzeko epea txikiagoa izan daiteke, eta lehenbailehen eta betiere aurretiaz eskatu beharko da."
12) Aldatu egin da 22. artikuluaren 4. apartatua, eta honela idatzita geldituko da:
"4.–Lizentziaren eskaera Giza Baliabideen Zerbitzura igorri beharko da, hauetako batekin batera: Erregistro Zibilak emandako ezkontza ziurtagiriaren kopia, Erregistroen eta Notariotzaren Zuzendaritza Nagusiaren zigilu elektronikoa duen ezkontza ziurtagiri elektronikoa, bikote egonkorra osatzeko borondatea adierazten duen agiri publikoaren kopia, edo Bikote Egonkorren Nafarroako Erregistroan inskripzioa egin izanaren ziurtagiriaren kopia.
13) 23. artikulua aldatu da, eta honela idatzita geldituko da:
"23. artikulua. Lizentzia erditzeagatik.
1.–Administrazio eta zerbitzuetako langileek, erditzearen kasuan, ordaindutako hamazazpi asteko lizentzia hartzeko eskubidea izango dute, eta aste horietatik erditu ondorengo sei asteak nahitaez eta etenik gabe hartu beharko dituzte. Lizentzia horrek bi aste gehiago iraungo du semea edo alaba desgaitua bada, eta, erditze anizkoitza bada, seme edo alaba bakoitzarengatik, bigarrenetik aurrera -bat guraso bakoitzarentzat-.
Nolanahi ere, ama hiltzen bada, beste gurasoak lizentziaren aldi guztia hartu ahal izango du, edo, hala gertatzen bada, lizentziari gelditzen zaion denbora.
2.–Bi gurasoek lan egiten badute eta nahitaezko atsedenaldiko lehenbiziko sei asteak iragan ondoren, lizentzia hori haiek nahi bezala hartzen ahalko dute. Etenik gabe hartuko da denbora hori, eta erditzearen ondorengo nahitaezko atsedenaldia amaitzen denetik semeak edo alabak hamabi hilabete bete arte baliatzen ahalko da. Etenik gabe hartzez gero, baimen aldi bakoitzerako gutxienez 15 egun lehenago jakinarazi behar da, eta asteak osorik hartuko dira.
3.–Erditze goiztiarra gertatzen bada, edo, beste edozein arrazoi dela-eta, jaioberriak ospitalean egon behar badu erditu ondoren, lizentzia hori luzatu egingo da, jaioberriak zenbat egun eman ospitalean, beste hainbeste, gehienez ere hamahiru astera arte.
4.–Semea edo alaba hiltzen bada, lizentziaren iraupena ez da murriztuko, salbu eta amak lanpostura itzultzea eskatzen badu atseden hartzeko derrigor hartu behar dituen sei aste horiek bukatzen zaizkionean.
5.–Lizentzia horretaz baliatu bitartean, nahitaezko atsedenaldia amaitu ondoren, langileak aukera izango du Unibertsitateak antolatzen dituen prestakuntza-ikastaroetan parte hartzeko."
14) 26. artikulua aldatu da, eta honela idatzita geldituko da:
"26. artikulua. Lizentzia adopzioagatik, adoptatzeko asmoetarako zaintzagatik edo harreragatik.
1.–Norbait adoptatzeagatik, aldi baterako edota modu iraunkorrean etxean hartzeagatik, edo adoptatzeko asmoz zaintzeagatik, teknikari, kudeaketari eta administrazioko eta zerbitzuetako langileek eskubidea edukiko dute hamazazpi asteko lizentzia ordaindua hartzeko. Lizentzia horrek bi aste gehiago iraungo du semea edo alaba desgaitua bada, eta seme edo alaba bakoitzeko ere seme edo alaba baten baino gehiagoren jaiotza, adopzio, adoptatzeko asmoetarako zaintza edo harrera kasuetan (aste bat guraso bakoitzarentzat).
2.–Sei aste, nahitaez etenik gabe hartu beharko ditu, segidan, adopziorako edo harrerarako zaintzaren erabaki judiziala hartu edo adopzioa eratzeko erabaki judiziala hartu eta berehala.
3.–Bi gurasoek lan egiten badute eta nahitaezko atsedenaldiko lehenbiziko sei asteak iragan ondoren, lizentzia hori haiek nahi bezala hartzen ahalko dute. Etenik gabe hartuko da denbora hori, eta erditzearen ondorengo nahitaezko atsedenaldia amaitzen denetik semeak edo alabak hamabi hilabete bete arte baliatzen ahalko da. Etenik gabeko lizentziaren kasuan, oporraldi bakoitzerako gutxienez 15 egun lehenago jakinarazi beharko da, eta aste osoak hartuko dira.
4.–Adopziorako edo harrerarako zaintzaren administrazio-erabakia hartzen denetik edo adopzioa eratzen duen ebazpen judiziala ematen denetik aurrera zenbatuko da epea, eta adingabe berak ezin izango du inola ere lizentzia hori aldi bat baino gehiago baliatzeko eskubiderik eman.
5.–Nazioarteko adopzioa edo harrera denean, eta gurasoek ume adoptatuaren jaioterrira joan behar badute, aurreko paragrafoetan aurreikusitako lizentzia adopzioaren erabaki judiziala edo harreraren erabaki administratiboa edo judiziala hartu baino lau aste lehenago ere has daiteke. Halaber, halako kasuetan, bi hilabeterainoko baimena hartzeko eskubidea edukiko dute langileek, eta, aldi horretan, oinarrizko ordainsariak jasoko dituzte, ez besterik.
6.–Artikulu honetan aurreikusitako adopzio, adopzio-helburuko zaintza edo harrera kasuak, aldi baterakoak zein iraunkorrak, aplikatzekoa den araudian ezarritakoak izango dira. Nolanahi ere, aldi baterako harrerak gutxienez urtebeteko iraupena izan beharko du.
7.–Lizentzia horretaz baliatu bitartean, nahitaezko atsedenaldia amaitu ondoren, langileak aukera izango du Unibertsitateak antolatzen dituen prestakuntza-ikastaroetan parte hartzeko."
15) 29. artikuluko 1. eta 6. apartatuak aldatu dira. Honela geldituko dira:
1.–Teknikariek, kudeaketakoek eta administrazioko eta zerbitzuetako langileek lanaldia erdira murrizteko eskubidea izango dute, ordainsariak murriztu gabe, minbizia edo gaixotasun larriren bat duen seme edo alaba adingabea zaintzeko, baldin eta gaixoa zuzenean, etengabe eta modu iraunkorrean zaindu behar bada gaixotasunaren tratamendu jarraituan, aldez aurretik ospitaleratzea behar izan edo ez. Salbuespen gisa, zilegi da lanaldiaren murrizketa ehuneko handiago batera iristea, % 99,99ra gehienez ere, baldin eta behar bezala egiaztatzen bada beharrezkoa dela lizentziaren helburua betetzeko.
2.–Lizentziak semea edo alaba ospitalean dagoen bitartean eta tratamendu jarraitua hartzen ari den bitartean edukiko du indarraldia, eta, gehienez ere, seme edo alabak hogeita hiru betetzen dituen arte.
16) Aldatu egin da 39. artikuluaren 2. apartatua, eta honela idatzita geldituko da:
"2.–Administrazioko eta zerbitzuetako langileek eskubidea dute lanaldia heren bat murrizteko eta ordainsarien % 100 jasotzeko, hamabi hilabetetik beherako seme edo alabaren legezko zaintzarengatik. Hiru urtetik beherako adingabe bat adoptatuz edo harreran hartuz gero, edo hiru urte baino gehiago izanik ere gizarteratzeko edo familian txertatzeko zailtasun berezirik baldin badu –eskumena duten gizarte zerbitzuek egiaztatutako zailtasunak–, lanaldi murrizketa urtebetez ere aplikatuko da, harrerarako erabaki administratiboa edo judiziala hartzen denetik edo adopzioaren ebazpen judiziala ematen denetik kontatzen hasita.
Bi gurasoak Unibertsitateko administrazioko eta zerbitzuetako langileak badira, haietako batek bakarrik izango du aukera baimena osotasunean baliatzeko, eta ezin izango dute bi gurasoek aldi berean hartu edo partekatu.
Kontratupeko langileek lanaldi ordaindu hau baliatzeko aukera izango dute beren kontratua urtebetekoa edo luzeagoa bada.
17) 42. artikuluaren 1. idatz-zatia ezabatu da.
18) 47. artikulua aldatu da, eta honela idatzita geldituko da:
"47. artikulua. Borondatezko eszedentzia.
1.–Zilegi izango da kasu hauetan funtzionarioak borondatezko eszedentzia egoeran deklaratzea:
Nafarroako Unibertsitate Publikoa ez den beste administrazio publiko batean edo nortasun juridiko propioa duen erakunde batean zerbitzuak ematen hasten denean, betetzen duen lanpostuaren erreserbarekin lehenbiziko hemezortzi hilabeteetan.
Lanpostuaz jabetzeko unean beste administrazio publiko batean ari denean zerbitzuak ematen.
Funtzionarioek Nafarroako Unibertsitate Publikoaren barrenean beste lanpostu bat lortzen badute, lanpostua maila berekoa izan edo ez, haietako bat aukeratu beharko dute, eta beste lanpostuan borondatezko eszedentzian deklara ditzatela eskatu. Salbuespen dira, horretarako, burutzak edo unitate organikoetako zuzendari lanpsotuak.
Interesdunak eskatu ondoren, Nafarroako Unibertsitate Publikoan maila bereko edo desberdineko beste lanpostu batean aldi baterako zerbitzuak ematen hasten diren funtzionarioak borondatezko eszedentzian deklaratuko dira, ordura arte betetzen ari ziren lanpostua hemezortzi hilabetez gordeta betiere.
Funtzionario-lanpostuaz jabetzeko unean langilea Nafarroako Unibertsitate Publikoan maila bereko edo desberdineko beste lanpostu batean ari bada lanean aldi baterako zerbitzuak ematen, funtzionario-lanpostuan borondatezko eszedentzian deklaratzeko aukera izango du.
Alderdi politikoetako edo erakunde sindikal edo profesionaletako zuzendari izateko, funtzio publikoan jardutearekin bateragarria bada.
Funtzionarioaren interesagatik, jatorrizko lanpostua gordeko zaio lehen hemezortzi hilabeteetan, baldin eta zerbitzuaren beharrek horretarako aukera ematen badute, eta interesdunak egiaztatzen badu zerbitzu aktiboan edo horren pareko egoera batean aritu dela eszedentzia-eskaera aurkeztu aurreko bi urteetan gutxienez ere.
2.–Borondatezko eszedentzia aldi mugagabe baterako ematen dela ulertuko da kasu guztietan.
3.–Behar bezala justifikatutako beharraren kasuan izan ezik, borondatezko eszedentzian dauden funtzionarioak ezin izango dira zerbitzu aktibora itzuli egoera horretan urtebete pasatzen duten arte. Lanera itzuliko dela adostutakoan, hilabeteko epean hasi behar du berriz lanean. Bestela, funtzionario izaera galduko du.
4.–Borondatezko eszedentzian dauden funtzionarioek, betiere, duten mailari, graduari eta antzinatasunari eutsiko diete, baina egoera horrek ez du eskubide ekonomikorik sortuko, eta egoera horretan pasatutako denbora ez zaie inolaz ere kontuan hartuko.
5.–1. idatz-zatiko b, c, d, e f eta g letretan jasotako kasuetan, borondatezko eszedentziarako eskaera Unibertsitateko Erregistro Elektronikoan aurkeztu behar da, ondorio eguna baino 15 lanegun lehenago beranduenez.
Bigarrena.–Antzinatasunagatiko opor-egun gehigarriak eta antzinatasunagatiko norberaren gauzetarako baimenen aplikazioa 2023. urtean.
Nafarroako Unibertsitate Publikoko Administrazioko eta Zerbitzuetako langileen oporrei, baimenei, lizentziei, lanaldiei eta eszedentziei buruzko Erregelamenduaren 3. artikuluko 3. paragrafoan eta 21. artikuluko 3. paragrafoan xedatutakoari kalterik egin gabe, honako erabakiaren erredakzioan, 2023. urte osoan zerbitzu aktiboan dauden langileek urte horretan aipatutako artikuluetako lehenbiziko bi idatz-zatien aplikazioaren ondorioz antzinatasunagatik dagozkien opor-egun gehigarri guztiak eta norberaren gauzetarako baimen guztiak baliatzen ahalko dituzte.
Hirugarrena.–Erabaki hau Nafarroako Unibertsitate Publikoaren iragarki-ohol elektronikoan eta Nafarroako Aldizkari Ofizialean argitaratzea.
Laugarrena.–Erabaki honek Nafarroako Unibertsitate Publikoaren iragarki-ohol elektronikoan argitaratzen den egunean hartuko du indarra.
Bosgarrena.–Erabaki honen aurka, zilegi da administrazioarekiko auzi-errekurtsoa jartzea Nafarroako Administrazioarekiko Auzietako Epaitegietan, bi hilabeteko epean, Erabakia Nafarroako Aldizkari Ofizialean argitaratu eta biharamunetik kontatzen hasita, Administrazioarekiko Auzien Jurisdikzioari buruzko 1998ko uztailaren 13ko 29/1998 Legearen xedapenetan ezarritakoarekin bat".
Iruñean, 2023ko ekainaren 27an.–Errektorea, Ramón Gonzalo García.
Iragarkiaren kodea: F2309925
Sarbidea
Nafarroako Aldizkari Ofiziala
Paseo Pablo Sarasate, 38, 2.º izda.
31001 - Iruña
848 42 12 50
