1. NAFARROAKO FORU KOMUNITATEA
1.7. BESTELAKOAK
1355/2023 EBAZPENA, 2023ko ekainaren 27koa, Nafarroako Unibertsitate Publikoko errektoreak emana. Haren bidez agintzen da argitaratzeko Gobernu Kontseiluak 2023ko ekainaren 27an onetsitako "Erabakia, ponderazio parametroen balioak onesten dituena, 2024-2025 ikasturtetik aurrera Nafarroako Unibertsitate Publikoak ematen dituen graduko ikasketa ofizialetan onartua izateko nota kalkulatzekoak".
2003ko maiatzaren 12ko 110/2003 Foru Dekretuak onetsitako Unibertsitateko Estatutuetako 40. artikuluak ematen dizkidan eskumenak erabiliz, agintzen dut argitaratzeko Gobernu Kontseiluak 2023ko ekainaren 27an onetsitako Erabakia, Unibertsitatera sartzeko ponderazio parametroen balioak onesten dituena, 2024-2025 ikasturtetik aurrera Nafarroako Unibertsitate Publikoak ematen dituen graduko ikasketa ofizialetan onartua izateko nota kalkulatzekoak".
"ERABAKIA, ZEINAREN BIDEZ PONDERAZIO PARAMETROEN BALIOAK ONESTEN BAITIRA NAFARROAKO UNIBERTSITATE PUBLIKOAK EMATEN DITUEN GRADUKO IKASKETA OFIZIALETAN 2024-2025 IKASTURTEAN ONARTUA IZATEKO NOTAK KALKULATZEKO
Hezkuntzari buruzko 2006ko maiatzaren 3ko 2/2006 Lege Organikoaren 38. artikuluak -3/2020 Lege Organikoaren artikulu bakarraren 32. puntuaren bidez aldatua- 1. apartatuan ezartzen duenez, Unibertsitate-ikasketak egin ahal izateko, batxilergoan lortutako kalifikazioekin batera batxilergoan eskuratutako jakintzak eta heldutasun akademikoa, eta unibertsitate-ikasketak arrakastarekin egiteko gaitasuna objektibotasunez balioetsiko dituen proba bat eta bakarra gainditu beharko da. Bestalde, 6. apartatuak xedatzen du Gobernuak oinarrizko araudia ezarriko duela unibertsitateei aukera emateko sarbide proba gainditu duten ikasleak onartzeko prozedurak finkatzeko.
Unibertsitateko graduko ikasketa ofizialetan onartua izateko prozeduren oinarrizko araudia ezartzen duen 2014ko ekainaren 6ko 412/2014 Errege Dekretuaren 7. artikuluaren 4. apartatuak ezartzen du unibertsitate publikoek gutxienez ikasturte bat lehenago argitaratuko dituztela unibertsitateko graduko ikasketa ofizialetan onartua izateko aplikatuko diren prozedurak, haien edukia, funtzionamendu arauak eta datak, balorazio eta ponderazio irizpideak eta baremoak, bai eta ikaspostuak esleitzeko lehentasunezko ordena ezartzeko aplikatuko diren arauak ere.
2023-2024 ikasturtean, Batxilergoko antolamendua eta gutxieneko ikasketak ezartzen dituen 2022ko apirilaren 5eko 243/2022 Errege Dekretuan ezarritakoaren arabera emanen da Batxilergoko bigarren ikasmaila. Horregatik, unibertsitateko ikasketetan onartua izateko dauden ponderazio parametroak berrikusi beharra dago, Errege Dekretu horrek aurreikusten dituen antolamendu orokorra eta ikasgaiak kontuan hartuta.
Unibertsitatera sartzeko baldintzen eta unibertsitateko graduko ikasketa ofizialetan onartua izateko prozeduren antolamendu berria onartu bitartean, beharrezkoa da, gehiago luzatu gabe, 2024-2025 ikasturteko onarpen prozeduran erabiliko diren ponderazio parametroak onartzea, 2023-2024 ikasturtean Batxilergoko bigarren ikasmaila hasiko dutenek haiek zein diren jakin dezaten.
Kontsultak egin zaizkie Unibertsitateko ikastegiei eta Nafarroako Gobernuko Hezkuntza Departamentuari.
Azaldutako guztiarengatik, eta Ikasleen Gaietarako, Enpleguko eta Ekintzailetzako errektoreordeak proposatuta, hau da Gobernu Kontseiluak, bere kideek aldez aurretik deliberatu ondoren, 2023ko ekainaren 27an egindako bileran hartu duen
ERABAKIA:
Lehenbizikoa.–Eranskinean adierazitako ponderazio parametroen balioak onestea, Unibertsitatean Sartzeko Probako azterketetan gainditutako irakasgaiei edo unibertsitate publikoek proba horrekin batera egindako beste azterketa batzuetan gainditutakoei dagozkienak -Batxilergoko bigarren ikasmailako beste irakasgai komun batzuei edo modalitateko irakasgaiei buruzkoak, bai eta irakasgai komun gisa ikasitakoa ez den atzerriko bigarren hizkuntza bati buruzkoak ere-, zeinak Nafarroako Unibertsitate Publikoak ematen dituen graduko ikasketa ofizialetan onartua izateko nota kalkulatzeko erabiliko baitira.
Bigarrena.–Eranskinean adierazitako ponderazio parametroen balioak onestea, 2022-2023 ikasturtean Batxilergotik Unibertsitatean Sartzeko Ebaluazioan gainditutako irakasgaiei dagozkienak, zeinak Nafarroako Unibertsitate Publikoak ematen dituen graduko ikasketa ofizialetan onartua izateko notak kalkulatzeko erabiliko baitira.
Hirugarrena.–Erabaki honen bidez onetsitako ponderazio parametroak 2024-2025 ikasturtetik aurrera izanen dira aplikatzekoak.
Laugarrena.–Erabaki hau aditzera ematea Ikasleen Gaietarako, Enpleguko eta Ekintzailetzako Errektoreordetzari, Irakaskuntzako Errektoreordetzari, Irakaskuntza Zerbitzuari eta Sarbidearen, Beken eta Tituluen Atalari.
Bosgarrena.–Nafarroako Aldizkari Ofizialean argitaratu eta biharamunean hartuko du indarra erabaki honek.
Seigarrena.–Erabaki honen aurka, zilegi da administrazioarekiko auzi-errekurtsoa jartzea Nafarroako Administrazioarekiko Auzietako Epaitegietan, bi hilabeteko epean, erabakia Nafarroako Aldizkari Ofizialean argitaratu eta biharamunetik kontatzen hasita, Administrazioarekiko Auzien Jurisdikzioari buruzko 1998ko uztailaren 13ko 29/1998 Legearen xedapenetan ezarritakoarekin bat".
Iruñean, 2023ko ekainaren 27an.–Errektorea, Ramón Gonzalo García.
Jaitsi dokumentu osoa (PDFa).
Iragarkiaren kodea: F2309924
