1. NAFARROAKO FORU KOMUNITATEA
1.7. BESTELAKOAK
173E/2023 EBAZPENA, maiatzaren 16koa, Ekonomia Zirkularraren eta Klima Aldaketaren Zerbitzuko zuzendariak emana, zeinaren bidez partez onartzen baita Tuterako udal mugartean animalientzako landare-jatorriko pentsu konposatuak fabrikatzen dituen instalazio baten ingurumen baimen integratuan ezarritako funtzionamendu baldintzak aldatzea, sortutako hondakin berriak sartzeari dagokionez. Instalaziaren titularra De Heus Nutrición Animal SAU da.
Instalazio horrek badu ingurumen baimen integratua, Ingurumeneko eta Lurralde Antolamenduko zuzendari nagusiaren urriaren 22ko 809/2018 Ebazpenaren bidez emana, gero Ekonomia Zirkularraren eta Klima Aldaketaren Zerbitzuko zuzendariaren apirilaren 28ko 120E/2022 Ebazpenaren bidez aldatu zena.
2022ko uztailaren 22an, titularrak instalazioaren ingurumen baimen integratuan dauden baldintzak aldatzeko eskatu zuen. Zehazki, honako hauek:
–Ingurumen baimen integratuaren III. eranskinean, sortutako hondakinen zerrendan, honako kode hauek dituzten hondakin berriak sartzea: EHZ 150102 (plastikoa), 191202 (txatarra), 020103 (pentsua (konposta)), 070513* (iraungitako medikamentuak, eta medikamentua daramaten pentsuen hondarrak) eta 030123 (ontzi kutsatuak).
–Baimena, instalazio horrek hondakin arriskutsuak biltegiratzeko duen gehieneko epea 12 hilabetekoa izan dadin, eta ez 6 hilabetekoa.
Ekonomia Zirkularraren eta Klima Aldaketaren Zerbitzuak berrikusi du aurkeztutako eskaera, eta balorazio hau egin:
–Hondakin berri horiek ingurumen baimen integratuaren III. eranskinean, sortutako hondakinen zerrendan, sartzeari dagokionez:
EHZ KODEA | DESKRIBAPENA | BALORAZIOA |
150102 | Plastikozko ontziak | 2022-04-26an egindako ingurumen ikuskapenaren ondorioz, beharrezkotzat jo da hondakin hori sartzea |
191202 | Txatarra | 2022-04-26an egindako ingurumen ikuskapenaren ondorioz, komenigarritzat jo da hondakin hori sartzea Hala ere, EHZ kodea ez da egokia; horren ordez, 17 04 05 kodearekin sartuko da (burdina eta altzairua) |
020103 | Pentsua (konposta) | 2022-04-26an egindako ingurumen ikuskapenaren ondorioz, beharrezkotzat jo da hondakin hori sartzea. Hala ere, 02 03 04 EHZ kodearekin sartuko da, kontsumorako edo elaboraziorako egokiak ez diren materialak |
070513* | Iraungitako medikamentuak, eta medikamentua daramaten pentsuen hondarrak | 2022-04-26an egindako ingurumen ikuskapenaren ondorioz, beharrezkotzat jo da hondakin horiek sartzea. Hala ere, Batzordearen 2014ko abenduaren 18ko Erabakiaren hondakinen zerrendaren arabera, iraungitako medikamentuei 07 05 13** EHZ kodea legokieke, eta medikamentua daramaten pentsuen hondarrei, berriz, 02 03 04 kodea (kontsumorako edo elaboraziorako egokiak ez diren materialak) |
030123 | Ontzi kutsatuak | EHZ kode hori ez dago Erabakiaren hondakinen zerrendan. Ikusi da eskaeran aurkeztutako tratamendu-kontratuetako batean zenbaki hori posta-kode gisa agertzen dela. Hortaz, EHZ gisa hartu omen da, akats baten ondorioz. Ontzi kutsatuei 15 01 10* EHZ kodea dagokie, IBIaren III. eranskinean jasota dagoena. Hala ere, EHZ hori erabil daiteke sortzen diren ontzi kutsatu batzuetarako: adibidez, zaku kutsatuak (2022-04-26an egindako ikuskapen bisitan ikusi zirenak), plastikozko ontzi kutsatuak, metalezko ontzi kutsatuak eta abar |
Onartutako aldaketek ez dute eragozten instalazioaren funtzionamendu egokia ingurumenari dagokionez, eta bat datoz ingurumen baimen integratuan isurketarako ezarritako gehieneko mugarekin eta gainerako eskakizunekin, bai eta teknika erabilgarri onenen aplikazioarekin ere.
–Hondakin arriskutsuak biltegiratzeko gehieneko denborari dagokionez:
2022-09-27an, 0003-0110-2022-000277 espedientearen barruan, titularrari jakinarazpen bat bidali zitzaion, jakinarazteko hondakin arriskutsuak biltegiratzeko 6 hilabeteko epea mantentzen zela, ez delako hura aldatzeko salbuespenezko inguruabarrik egiaztatu, 7/2022 Legearen 21. artikuluaren arabera.
Ebazpen proposamena instalazioaren titularrari entzunaldia emateko tramitean egon da hamabost egunez, eta hark ez du proposamenaren aurkako alegaziorik aurkeztu.
Adierazitakoarekin bat, eta Ingurumeneko zuzendari nagusiak azaroaren 8an emandako 107/2019 Ebazpenaren bidez eskuordeturik ditudan eskumenak erabiliz,
EBAZTEN DUT:
Lehena.–Partez onartzea Tuterako udal mugartean animalientzako landare-jatorriko pentsu konposatuak fabrikatzen dituen instalazio baten ingurumen baimen integratuan ezarritako funtzionamendu baldintzen aldaketa, sortutako hondakin berriak sartzeari dagokionez. Horren ondorioz, instalazioak eta hango jarduerak ebazpen honen eranskinean adierazitako baldintzak bete beharko dituzte. Instalazioaren titularra De Heus Nutrición Animal SAU da.
Bigarrena.–Bere horretan mantentzea Ingurumeneko eta Lurraldearen Antolamenduko zuzendari nagusiaren urriaren 22ko 809E/2018 Ebazpenaren bidez instalazioari emandako ingurumen baimen integratuan, hondakinen produkzioari dagokionez, agertzen diren baimen eta inskripzioen indarraldia, ebazpen honetan xedatutakoari aurka egiten ez dioten heinean.
Hirugarrena.–Ebazpen honetan jasotako baldintzak betetzen ez badira, Kutsaduraren Prebentzio eta Kontrol Integratuaren Legearen testu bateginaren IV. tituluan jasotako ingurumen diziplinako neurriak hartuko dira (abenduaren 16ko 1/2016 Legegintzako Errege Dekretuaren bidez onetsi zen testu bategin hori), eta, subsidiarioki, Ingurumenean Eragina duten Jarduerak arautzen dituen abenduaren 16ko 17/2020 Foru Legearen III. tituluan ezarritako zehapen-araubidean jasotakoak, ezertan galarazi gabe legeria sektorialean ezarritakoa, aurrerantzean ere aplikatu beharko baita.
Laugarrena.–Ebazpen hau Nafarroako Aldizkari Ofizialean argitaratzea.
Bosgarrena.–Ebazpen honek ez du administrazio bidea amaitzen, eta espedientean interesa dutenek, administrazio publikoek izan ezik, gora jotzeko errekurtsoa jartzen ahalko dute, Landa Garapeneko eta Ingurumeneko kontseilariari zuzendua, hilabeteko epean. Administrazio publikoek administrazioarekiko auzi-errekurtsoa jar dezakete, Nafarroako Justizia Auzitegi Nagusiko Administrazioarekiko Auzien Salari zuzendua, bi hilabeteko epean. Horrek ez du galarazten Nafarroako Gobernuari aurretiazko errekerimendua egin ahal izatea, Administrazioarekiko Auzien Jurisdikzioa arautzen duen uztailaren 13ko 29/1998 Legearen 44. artikuluan ezarritako moduan eta epean. Ebazpen hau jakinarazi eta biharamunetik aurrera kontatuko dira epeak.
Seigarrena.–Ebazpen hau igortzea De Heus Nutrición Animal SAUra eta Tuterako Udalera, behar diren ondorioak izan ditzan.
Iruñean, 2023ko maiatzaren 16an.–Ekonomia Zirkularraren eta Klima Aldaketaren Zerbitzuko zuzendaria, Pedro Zuazo Onagoitia.
Oharra: ebazpen honetan aipatzen diren eranskinak interesdunen eskura egonen dira Ingurumen Zuzendaritza Nagusiaren bulegoetan (González Tablas kalea 9, behea, Iruña; Ekonomia Zirkularraren eta Klima Aldaketaren Zerbitzua) eta Nafarroako Gobernuaren webgune honetan: https://extra.navarra.es/InformacionPublicaPRTR/CentroPublicaciones.html#/CentroPublicaciones
Iragarkiaren kodea: F2307686
