Iragarkia

104. ALDIZKARIA - 2023ko maiatzaren 18a

1. NAFARROAKO FORU KOMUNITATEA

1.7. BESTELAKOAK

423/2023 EBAZPENA, apirilaren 21ekoa, Osasunbidea-Nafarroako Osasun Zerbitzuko zuzendari kudeatzaileak emana, zeinaren bidez 33/2023 Dekretuan aipatzen diren audioprotesiak ebaluatzeko, egokitzeko, kontrolatzeko, horien jarraipena egiteko eta mantentze lanak egiteko protokoloen gutxieneko edukia ezartzen baita (33/2023 Dekretua, martxoaren 29koa, zeinaren bidez prestazio ortoprotesikoa arautzen baita, eta sortzen baita Nafarroan prestazio ortoprotesikoa kudeatzen laguntzen duten establezimenduen erregistroa).

Martxoaren 29ko 33/2023 Dekretuaren bidez prestazio ortoprotesikoa (kanpoko ortoprotesien modalitatea) arautzen da, eta sortzen Nafarroan prestazio ortoprotesikoa kudeatzen laguntzen duten establezimenduen erregistroa sortzen da. Dekretu horrek 6. artikuluaren 3. puntuan ezartzen duenaren arabera, audioprotesi-establezimenduek protokolo batzuk sartu beharko dituzte maiatzaren 22ko 71/2009 Foru Aginduaren 13. artikuluan exijitzen den kalitatea bermatzeko sisteman, audiofonoak ebaluatzeko, egokitzeko, kontrolatzeko, haien jarraipena egiteko eta mantentze lanak egiteko, bai helduentzat, bai haurrentzat. Protokolo horietan jaso beharko dira, gutxienez ere, Osasunbidea-Nafarroako Osasun Zerbitzuko zuzendari kudeatzailearen ebazpen bidez arautuko diren alderdiak.

Osasunbidea-Nafarroako Osasun Zerbitzuak audioprotesi-prestazioa emanen badu, ezinbestekoa da aurrean aipatutako protokoloen edukia garatzea, audioprotesi-prestazioa ematen duten establezimenduetan nahitaez bete beharko baitituzte.

Martxoaren 29ko 33/2023 Foru Dekretuan ezartzen denarekin bat etorriz, honako hau,

EBAZTEN DUT:

1. Audioprotesien establezimenduek audifonoak (helduenak zein haurrenak) ebaluatzeko, egokitzeko, kontrolatzeko, horien jarraipena egiteko eta mantentze lanak egiteko protokoloak (martxoaren 29ko 33/2023 Dekretuan aipatzen direnak) sartu behar dituzte audioprotesien kalitatea bermatzeko sisteman. Protokolo horien gutxieneko edukia ebazpen honen eranskinean zehazten dena izan behar da.

2. Ebazpen hau Nafarroako Aldizkari Ofizialean argitara dadila agintzea.

3. Ebazpen honek ez du administrazio bidea amaitzen, eta beraren aurka gora jotzeko errekurtsoa aurkezten ahalko zaio Osasuneko kontseilariari errekurtsoaren xede den egintza argitaratu edo jakinarazi eta hurrengo egunetik hilabete iragan baino lehen, Nafarroako Foru Komunitateko Administrazioari eta foru-sektore publiko instituzionalari buruzko martxoaren 11ko 11/2019 Foru Legearen 126.1.c) eta 126.3 artikuluetan xedatzen denarekin bat etorriz.

Iruñean, 2023ko apirilaren 21ean.–Osasunbidea-Nafarroako Osasun Zerbitzuko zuzendari kudeatzailea, Gregorio Achutegui Basagoiti.

ERANSKINA.–AUDIOPROTESIEN PRESTAZIOAN LAGUNTZEN DUTEN ESTABLEZIMENDUEK BETE BEHARREKO AUDIFONOAK EBALUATZEKO, EGOKITZEKO, KONTROLATZEKO, HORIEN JARRAIPENA EGITEKO ETA MANTENTZE LANAK EGITEKO PROTOKOLOEN GUTXIENEKO EDUKIA

Haurrentzako zerbitzuak egiten dituzten establezimenduak.

1.–Audifonoak ebaluatzea eta egokitzea:

–Belarri atzeko audioprotesiak egokitzea eskola-bizitzan zehar.

–Eskola-bizitzan ematen diren audiofono guztietan FM jartzeko aukera.

–Pazientearen ardura daukan audiologia protesikoko goi mailako teknikaria (APGT) Nafarroako Gobernuaren 0 - 3 bitarteko haurren hipoakusia detektatzeko eta horren arreta goiztiarrerako programako hileko diziplinarteko bileretan izatea.

–Pazienteen eskola-bizitzan lankidetzan aritzea Nafarroako Hezkuntza Bereziko Baliabideen Zentroko (NHBBZ) profesionalekin.

2.–Pazienteen jarraipena eta kontrola, eta audifonoak mantentzeko lanak:

–CODEPEHk zenbait agerkaritan pazienteak kontrolatzeko emandako gomendioen jarraipena.

Bizitzako lehen 18 hiletan, etengabe, egoerak eskatzen duen heinean.
18 hiletik 3 urtera, 3 hilean behin.
3 urtetik 6 urtera, 6 hilean behin.
6 urtetik gora, gortasuna egonkorra bada, urtean behin.
Jarraibide orokor hauek paziente bakoitzaren inguruabarretara moldatu beharko dira.

–Kasu bakoitzean egokitzapenik hoberena bilatzeko konpromisoa. Kontuan eduki behar da haur askok gortasunarekin lotutako sindromeren bat dutela, eta horietako batzuen ongizatea ez dela hobetzen hobeki entzuteagatik.

16 - 26 urte bitartekoentzako zerbitzuak egiten dituzten establezimenduak.

1.–Audifonoak ebaluatzea eta egokitzea:

–Pazienteak onartzean fluxua errespetatzea, eta informazio klinikoa isilpean gordetzea.

–Emandako audifonoak eranskin honetan ezartzen diren mailetara egokitzea (10 kanal gutxienez).

–Audifonoa matxuratuz gero, berria ematea.

–Pazienteari eta beraren ahaideei etxerako soluzio auditiboei buruzko aholkuak ematea.

–Lankidetza erraza paziente bakoitzaren ORL arduradunarekin, ahoz zein idatziz.

–Osasunbideko ORL zerbitzuak protesiaren egokitzapena behar dela adierazten duenetik astebete iragan baino lehen hartzea pazientea.

–ORL zerbitzuaren jarraibideak aintzat hartuta, pazientearentzat audioprotesirik egokiena zein izan daitekeen aztertzea .

–Lehen arreta-saiotik hilabete iragan baino lehen ematea audifonoak pazienteari.

–Pazienteari audifonoa ematen zaionean, haren ardura daukan ORL zerbitzura txostena bidaltzea, azaltzen duena nolakoa den audifonoa eta nolakoa izan den lehen egokitzapena.

–Pazienteari edota haren ahaideei audifonoa erabiltzeko jarraibideak eta azalpena ematea.

2.–Pazienteen jarraipena eta kontrola, eta audifonoak mantentzeko lanak:

–Audifonoa egokitzea eta mantentzeko lanak egitea (APGTren berezko egitekoak), eta pazientearen adinera moldatzea jarraipen-aldi osoan.

–Honako hauek argitzen dituen txostena bidaltzea APGTren pazientearen ardura daukan ORL zerbitzura: berrikuspenaren emaitza, egokitzapenaren ezaugarri elektroakustikoak, eta egindako probak.

–ORL zerbitzuak desadostasunen bat aipatzen badu edo zerbait iradokitzen badu, pazientearen ardura daukan APGTk egoera berriz aztertzea, hura erosoago egon dadin eta hobeki bizi dadin.

0 - 26 urte bitartekoentzako zerbitzuak egiten dituzten establezimenduak.