31. ALDIZKARIA - 2022ko otsailaren 11

6. BESTELAKO IRAGARKIAK

6.2. PARTIKULARREN IRAGARKIAK

NAFARROAKO ERDIALDEKO GARAPEN PARTZUERGOA

Estatutuen aldaketaren behin betiko onespena

Nafarroako Erdialdeko Garapen Partzuergoaren Batzar Orokorrak 2021eko abenduaren 21ean hartutako erabakiaren bidez onetsi da erakunde horren estatutuen aldaketa, eta horrenbestez, hona hemen onetsi ondorego testua osorik:

I. TITULUA

Izena eta lege araudia

1. artikulua.

1. Erriberrin (Nafarroa) eratu da “Nafarroako Erdialdeko Garapen Partzuergoa”; Zuzenbide Publikoko entitatea da, irabazi asmorik gabea, izaera juridiko propioa eta erabateko ahalmena dituena, bere helburuak betetzeko.

2. Partzuergoa arautuko da hauen arabera: Sektore Publikoaren Araubide Juridikoari buruzko urriaren 1eko 40/2015 Legea, Nafarroako Toki Administrazioari buruzko uztailaren 2ko 6/1990 Legea, bere estatutuak eta aplikagarriak diren gainerako araudiak.

Partzuergoa banandu, desegin eta azkentzeko eskubidearen araubideari buruz, Sektore Publikoaren Araubide Juridikoari buruzko urriaren 1eko 40/2015 Legean, Nafarroako Toki Administrazioari buruzko uztailaren 2ko 6/1990 Legean eta bere estatutuetan aurreikusten ez diren gauzetarako, Nafarroako Foru Zuzenbide Zibilaren Konpilazioa edo Foru Berria onesten duen martxoaren 1eko 1/1973 Legean ezarritakoa beteko da. Likidazio araubideari dagokionez, Sektore Publikoaren Araubide Juridikoari buruzko urriaren 1eko 40/2015 Legearen 97. artikuluan xedatutakoa beteko da, edo bestela, uztailaren 2ko 1/2010 Legegintzazko Errege Dekretua, edo haiek aldatzen edo ordezten dituen araudia.

3. Partzuergoaren zerbitzura dauden langileen araubide juridikoa izanen da adskripzioan hartzen duen administrazio publikoari dagokiona. Haien ordainsariak ez dira inoiz izanen handiagoak administrazio horretako pareko lanpostuetarako ezarritakoak baino. Funtzionarioak edo kontratatuak izan daitezke.

Salbuespen gisa, bete beharreko eginkizunen berezitasuna kontuan hartuta, Partzuergoan parte hartzen duten administrazioetako langileek betetzea ezinezkoa denean, Partzuergoa atxiki den administrazioko organo eskudunak baimena ematen ahalko dio hari langile horien zuzeneko kontratazioa egin dezan, aipatu eginkizunak betetzeko.

2. artikulua. Partzuergoaren izena Nafarroako Erdialdeko Garapen Partzuergoa izanen da.

II. TITULUA

Egoitza, osaera, lurralde eremua eta adskripzio araudia

3. artikulua. Partzuergoa denbora mugarik gabe eratzen da, eta egoitza hartzen du Erriberriko Pozas kaleko 13.ean, eta sukurtsalak, agentziak edo ordezkaritzak ezartzen ahalko ditu bere baitan elkartutako edozein udaletan.

4. artikulua. Partzuergoan elkartu dira Erdialdearen garapenerako interes publikoa eta soziala bilatzen duten toki entitateak eta entitate pribatuak, irabazi asmorik gabekoak.

5. artikulua. Partzuergo honen erreferentziazko lurralde eremua Nafarroako Erdialdera mugatzen da. Partzuergoa osatzen duten toki entitateen zerrenda eta kopurua eranskin batean zehazten da, eta zerrenda hori aldatzen ahalko da, Estatutu hauek aldatu beharrik gabe.

III. TITULUA

Helburuak

6. artikulua. Nafarroako Erdialdeko garapen osoa lortzeko, lehentasunezko helburu hauek ezarri dira:

a) Eskualdearen garapen ekonomikoa eta soziala aurrera eramateko behar diren ekintzak planifikatzea eta egikaritzea.

b) Ekimen publiko eta pribatuekin lankidetzan aritzea, eskualdean egiten diren jarduerak eta inbertsioak finantzatzeko baliabide ekonomikoak lortzeko eginkizunean.

c) Partzuergoan elkartutako entitateen ekimenak bideratzea eta bultzatzea.

d) Partzuergoaren funtzionamendurako eta hark sustatzen dituen jardueretarako behar den finantzazioa kudeatzea.

e) Eskualdeko gizarte sarea sentsibilizatzea arazoen inguruan eta haren garapenaren interesentzat lagungarriak diren baliabideen, ekintzen eta proiektuen inguruan.

f) Eragile ekonomiko eta sozialen parte-hartze aktiboa lortzea, eskualdeak dituen arazoen konponbide partekatua lortzeko prozesuan.

g) Eskualdeko emakume eta gizonen garapen berdinzalea sustatzea, hori lortzeko beharrezkoak diren ekintzak bultzatuz eta artikulatuz.

h) Enpresa espiritua sustatzea eskualdean, eta ekonomia nahiz eskualdeko enpresa egitura dinamizatzea eta dibertsifikatzea.

i) Erdialdeko turismo jarduketak koordinatzea, garatzea eta bateratzea.

j) Gure lurraldean gizarte erantzukizunari loturiko ekintzak nork bere gain hartzeko eta abiarazteko bitartekoak eta ekintzak kudeatu eta sustatzea.

6 bis artikulua.

1. Legezko ondorio guztietarako, aurrekontu ekitaldi bakoitzean, Partzuergoa atxikiko zaio Batzar Orokorrean gobernu organo goren gisa boto gehien dituen administrazio publikoari.

Administrazio batek baino gehiagok boto kopuru bera dutenean, berdinketa kasuetarako, kalitateko botoa duenaren alde gauzatuko da adskripzioa. Halakorik ezean, artaturiko bizilagun gehien edo lurralde zabalena duen administrazioari atxikiko zaio Partzuergoa, estatutu hauetan definitutako xedeen arabera, alegia, lehentasunez pertsonei zerbitzuak ematea edo lurraldearen gaineko jarduketak garatzea, hurrenez hurren.

2. Administrazio publiko batekiko adskripzioan aldaketarik izanez gero, estatutu hauek ere aldatu beharko dira, adskripzioaren aldaketa gauzatzen deneko aurrekontu ekitaldiaren hurrengo aurrekontu ekitaldia hasten denetik, sei hilabeteko epean.

Bizilagun gehien izatearen irizpidea kontuan hartzen bada, aintzat hartuko dira Partzuergoko kide diren udaletako bizilagunen kopuru ofizialak, administrazio organo eskudunaren onespen ofiziala izan dutenak.

7. artikulua.

1. Partzuergoak ahalmena du bere helburuak betetzeko behar diren egintzak egiteko, besteak beste, honako hauek:

a) Tokiko, eskualdeko, estatuko nahiz Europar Batasuneko erakunde publikoei eskatzen ahal zaizkien dirulaguntzak eta bestelako laguntzak eskatzea eta kudeatzea.

b) Ezarritako kuoten kobrantzak egitea, bai udalei, bai Partzuergoko kide diren gainerako entitateei ere.

c) Entitate pribatuen laguntzak edo dirulaguntzak kudeatzea, bere eskumenen esparruan.

d) Banketxeei eta aurrezki kutxei kredituak eta maileguak eskatzea.

e) Hitzarmenak eta obra edo zerbitzu kontratuak sinatzea, baita bere funtzionamendurako behar diren gainerako egintza guztiak ere.

f) Beharrezkoak diren zerbitzuak antolatzea.

g) Langileak kontratatzea.

h) Entitatearen funtzionamendua garatzeko behar diren inbertsioak egitea.

i) Laguntzak eta dirulaguntzak ematea.

2. Partzuergoak bere eskumeneko zerbitzuak ematen ahalko ditu, toki araubideko legeetan aurreikusirik dauden bideak erabiliz. Bereziki, Partzuergoak sustatzen ahalko du erakunde autonomo edo merkataritza elkarte baten sorreta eta, orobat, entitate horiei eskuordetzan ematen ahalko die bere helburuak betetzeko beharrezkoak iruditzen zaizkion eskumenak eta eskudantziak.

IV. TITULUA

Partzuergoko entitateak

8. artikulua. Partzuergoko kide izaten ahal dira Nafarroako Foru Komunitateko Administrazioa, estatutu hauetako 5. artikuluan zehaztutako lurralde eremuko toki administrazioak, eta toki administrazioen interes publikoko helburuekin bat datozen helburuak dituzten elkarteak, fundazioak eta entitate pribatuak.

Kide izateko eskaera entitate eskatzailearen legezko ordezkaria den pertsonak sinatu beharko du, eta harekin batera aurkeztu beharko du kide izateko akordioa organo eskudunak hartu izanaren ziurtagiria, adierazten duena Partzuergoarekiko atxikipena eta estatutuen onarpena.

9. artikulua. Erdialdeko Partzuergoak eskualdearen garapenarekin lotura duten elkarteen sorrera sustatuko du.

10. artikulua.

1. Partzuergoko kide izatea arrazoi hauetako batengatik galduko da:

A.–Partzuergoko edozein kidek bere borondatez banatzea erabakitzea. Partzuergoko kideek nahi dutelarik hartzen ahal dute bereizteko erabakia. Bereziki, udalak bereizten ahalko dira, zerbitzu bat emateari uzten diotenean, zerbitzu hori ematea Partzuergoaren esku geratu ondoren. Bereizteko eskubidea Partzuergoaren gobernu organo gorenari zuzendutako idazki baten bidez egikaritu behar da. Jakinarazpena onartzeko erabakia hartu beharko du Partzuergoak, idazkia aurkeztu eta hiru hilabeteko epean, gehienez.

Bereizteko eskubidea egikaritzeak Partzuergoa desegitea ekarriko du berekin, salbu eta gainerako kideek aurrera jarraitzea erabakitzen badute, eta barnean jarraitzen badute, gutxienez, administrazio bat baino gehiagorekiko lotura edo mendekotasuna duten bi administrazio, entitate edo erakunde publikok.

Bereizketa horrek Partzuergoa desegitea eragiten ez badu, arau hauek hartuko dira kontuan:

1. Bereizteko eskubidea egikaritzen duen entitateari dagokion bereizketa-kuota kalkulatzeko kontuan hartuko dira, alde batetik, likidazioa egin balitz, haren emaitzako ondare garbiaren saldoan egokituko zitzaion partea, eta bestetik, ondare banaketa egiteko estatutuetan ezarritako irizpidea.

2. Bereizteko kuotaren ordainketa, positiboa denean, hiru urteko gehieneko epean gauzatuko da, Partzuergoak bereizteko asmoaren jakinarazpena onartzeko erabakia, artikulu honetan ezarritako baldintzetan, hartzen duenetik kontatuta. Jakinarazpena onartzeko erabaki horretan zehaztuko dira ordainketaren baldintzak. Bereizteko kuota negatiboa denean, bereizi den entitateak arestian ezarritako epe bera izanen du ordainketa egiteko.

3. Partzuergoa atxikia balego bereizteko eskubidea egikaritzen duen administrazioari, erabaki beharko da, administrazio edo entitate publikoen artean, zeini atxikiko zaion aurrerantzean Partzuergoa.

4. Baja hartzen duen toki entitateak, toki garapeneko estrategia partekatuaren edo antzeko baten esparruan lotura izan duen europar programazio aldi osoari dagozkion kuotak ordaindu beharko ditu, eta urte oso bati dagokion ordainketa egin beharko du, penalizazio kontzeptuan.

B.–Partzuergoak erabakitako bereizketa, aldizkako sarrera kuotak edo kuota bereziak, Partzuergoak berezkoak dituen jarduerak mantentzeko eta eginkizunak eta gaitasunak garatzeko Batzar Orokorrak ezartzen ahal dituenak, ez ordaindu izanagatik. Aski izanen da bi kuota jarraian ez ordaintzea, edo hiru, segidakoak ez direnak, bereizteko.

2. Bereizketa gauzatuko da bereizteko kuota zehaztu ondoren, kuota positiboa denean, edo zorra ordaindu ondoren, kuota negatiboa aterako balitz.

3. Partzuergoko kidearen izaera galtzeak ez du inolaz ere salbuetsiko bereiziko den entitatea bereizketa gauzatzen den unean ordaindu gabe dituen karga, betebehar eta konpromisoak betetzeko eginbeharretik.

11. artikulua. Partzuergoan elkartutako entitateen eskubideak:

a) Partzuergoaren helburuak lortzen esku hartzea.

b) Batzorde Betearazlean edo Partzuergoko edozein organotan, kide anitzekoa nahiz pertsona bakarrekoa, esku hartzeko hautatuak izatea edo hautatzaileak izatea.

c) Batzar Orokorrean parte hartzea, hitza eta botoa dituztela.

d) Argibideak eskatzea Partzuergoaren edozein alderdiri eta tramitatzen diren gaiei buruz, haietan interesa izanez gero.

e) Askatasun osoz Partzuergotik ateratzea.

f) Hartutako erabakiei kontra egitea, horretarako eskatzen diren baldintzak eta beharkizunak beteta.

g) Zehapena jasoz gero, Batzar Orokorraren entzunaldia izatea.

12. artikulua. Partzuergoan elkartutako entitateen betebeharrak hauek dira:

a) Estatutuak eta Partzuergoaren gainerako agiriak eta legez onetsitako eta hartutako erabakiak betetzea eta betearaztea.

b) Deialdia jasoz gero, bilkuretara joatea.

c) Hautatuak edo izendatuak badira, kargu eta izendapen horiek onartzea eta behar bezalako arretaz betetzea.

d) Sarrerako kuotak, aldizkakoak, apartekoak eta asistentzia faltagatik onartutakoak ordaintzea.

V. TITULUA

Partzuergoaren araubide funtzional eta juridikoa

13. artikulua. Partzuergoaren gobernua eta administrazioa egikarituko dituztenak Batzar Orokorra, Batzorde Betearazlea eta Lehendakaria izanen dira, beren eskumenen baitan.

14. artikulua. Partzuergoaren kide anitzeko organoen bilera guztien akta jasoko du Idazkaritzak, bertan adieraziz nor elkartu diren, azterturiko gaien laburpena, bozketen emaitza eta, halakorik balitz, hartutako erabakiarekin bat ez datozen boto partikularrak, hala nola, interesgarria iruditzen zaion bestelako edozein gertakizun.

Hartutako erabakiarekin bat ez datozen botoa eta abstentzio motibatua emateak berekin ekarriko du hartatik erator daitezkeen erantzukizunetatik salbuetsita egotea.

15. artikulua. Partzuergoaren Idazkaritza bertan elkartutako udal bateko idazkaritza kontu hartzaile batek eramanen du.

I. KAPITULUA

Batzar Orokorra

16. artikulua. Batzar Orokorra Partzuergoaren organo gorena da, eta bertan elkartutako entitate guztien ordezkaritza biltzen du.

Erabakiak elkartutako entitate guztien botoen gehiengo soilez hartuko dira, quorum handiago baten berrespena behar duten gaiak ez badira.

Batzar Orokorraren bilkuretara joaten ahal dira Lehendakaritzak arrazoi profesionalengatik deitzen dituen pertsona guztiak. Hitza bai, baina botorik ez dute izanen.

17. artikulua. Batzar Orokorraren batzarrak ohikoak eta ezohikoak izanen dira.

18. artikulua. Batzar Orokorra modu baliozkoan eratuko da, baldin eta kideen erdiak gehi bat bertaratzen badira, lehen deialdian. Bigarren deialdian, modu baliozkoan eratuko da bertaratzen diren kideen kopurua edozein dela ere, beti ere, bazkide guztien bosten bat baino gehiago badira.

Bigarren deialdia gauzatuko da lehenengo deialdirako jarritako ordutik ordu erdira.

19. artikulua. Partzuergoan elkartutako entitateek beren ordezkariak izanen diren pertsonak aukeratuko dituzte, eta behar den egiaztagiria emanen zaie.

20. artikulua. Batzar Orokor arrunta gutxienez urtean bi aldiz elkartuko da. Gai-zerrendan, bestelako gai interesgarriez gain, aztertu eta onartu beharko dira urteko kontuak eta aurrekontuak, aurreko urteari dagozkion kontuak likidatzea eta betetzea, eta batzorde Betearazlearen azalpena, urteko kudeaketaren inguruan.

21. artikulua. Batzar Orokorraren beste edozein deialdi ezohikoa izanen da.

22. artikulua. Ezohiko Batzar Orokorraren deialdia eginen da Lehendakaritzak edo Batzorde Betearazleak egokia irizten diotenean, edo elkartutako entitateen bosten batek, gutxienez, Batzarreko botoen % 20 ordezkatzen duenak, eskatzen duenean. Azken kasu honetan, eskaera idatziz aurkeztu behar da, eta egiaztatuta utzi behar dira eskatzaileen sinadurak, eztabaidarako proposatzen diren eta Batzar Orokorraren gai-zerrendan jasoko diren gaiak; eskaeratik hilabete bateko gehieneko epera elkartuko da Batzarra. Epe hori deialdirik egin gabe igaroz gero, Batzarraren deialdia egiteko aukera izanen du eskaera egin duen kolektiboak.

23. artikulua. Batzar Orokorrak ondoko eskudantziak ditu:

a) Estatutuak, Barne Araubiderako Erregelamendua eta munta duten bestelako dokumentu organikoak onestea eta aldatzea.

b) Partzuergoaren ohiko eta ezohiko aurrekontuak eta kontu orokorrak onartzea.

c) Berrikuntza programaren prozesua eta eskualdearen garapenerako beste edozein estrategia bultzatzea.

d) Partzuergoa desegitea.

e) Lehendakaria hautatzea.

f) Lehendakariordea eta Batzorde Betearazleko kideak hautatzea.

g) Partzuergoan entitate berrien onarpena onestea.

Onartuak izateko, b), c) eta f) apartatuetako gaiak izan ezik, gehiengo absolutua behar dute. Batzorde Orokorrak erakunde autonomo baten esku utz dezake c) apartatuan jasotzen den eginkizuna.

24. artikulua. Batzar Orokorra biltzeko deia egitea, bai ohikoa, bai ezohikoa, lehendakariari dagokio, Partzuergoan elkartutako entitateen eskaeraz biltzeko kasurako aurreikusitakoa ukatu gabe.

Idatziz jakinarazi behar da, jarduera egin baino hiru egun lehenago gutxienez. Komunikazioan adierazi behar dira, gutxienez, Batzarra elkartzeko lekua, eguna eta ordua, eta gai-zerrendako gaiak ere bai.

Deialdiaren eta elkartzeko unearen arteko epean, elkartutako entitateen eskura egonen da, Partzuergoaren egoitzan, gai-zerrendan jasotako gaien inguruko dokumentazioa.

25. artikulua. Batzarrean eztabaidatuko dira, orobat, helburu sozialari dagozkion eta Batzorde Betearazleak, edo Partzuergoan elkartutako entitateen bosten batek, proposatu dituen gaiak, batzarra elkartu aurretik gutxienez lau eguneko aurrerapenez proposatu badituzte; Partzuergoan elkartutako entitateei jakinarazi behar zaizkie proposatutako gai berriak, Batzarra elkartu baino egun bat lehenago, gutxienez.

26. artikulua. Batzar Orokorrean elkartuko dira Partzuergoko kide diren Udalen eta entitateen ordezkariak.

27. artikulua. Toki entitateen ordezkariak udalbatza bakoitzak osoko bilkuran hautatuko ditu bere kideen artean. Ordezkari horiek ez badira joaten, ez Partzuergoaren batzarretara, ez haren erakunde autonomoaren batzarretara, toki entitateei jakinaraziko zaie.

Udal bakoitzak titular bat hautatuko du, eta gutxienez haren bi ordezko, batzarrean bere ordezkaritza bermatzeko.

28. artikulua. Batzar Orokorreko bozketen araubideari dagokionez, ondoko ordezkaritza talde hauek ezartzen dira, eta Batzar Orokorrean botoa emateko eskubidea izanen dute entitateen ordezkariek, banaketa honen arabera:

–Toki entitateak: 100 boto.

–Entitate pribatuak: 5 boto.

Nazioarteko, Europako, estatu, erkidego nahiz toki mailako araudian, edota beste erakunde nahiz entitate baten araudian ezarritakoaren arabera, beharrezkoa denean entitate pribatuen ordezkagarritasuna izatea gutxienez botoa emateko eskubidea dutenen ehuneko berrogeita hamar, eskakizun hori aplikagarri bada eta Partzuergoari eragiten badio, programak gauzatzeko jardueretan, laguntzen nahiz diru-laguntzen eskaeretan, edo Partzuergoak egin nahi dituen edo egiten ari den jardueretan, honela gauzatuko da ordezkatzeko eta botoa emateko eskubidea:

–Toki entitateak: 100 boto.

–Entitate pribatuak: 100 boto.

–Bi kasuetan ere, entitate bazkide bakoitzaren boto kopurua izanen da bere sektorean duen partaidetzaren ehunekoaren araberakoa. Ordezkagarritasun hori gauzatzeko modua entitatearen barne araubidearen gaineko erregelamenduan zehaztuko da.

II. KAPITULUA

Batzorde Betearazlea

29. artikulua. Batzorde Betearazlea da Partzuergoaren gobernu, kudeaketa eta administrazio organo kide anitzekoa.

Batzordea osatuko dute lehendakariak, lehendakariordeak, diruzainak eta zortzi bokalek.

–Lehendakaria: Partzuergoaren lehendakaria.

–Lehendakariordea: Partzuergoaren lehendakariordea.

–Hiru bokal: toki entitateen ordezkariak.

–Bost bokal: sektoreen ordezkaritza talde bakoitzeko kide bana.

–Diruzainaren kargua Batzorde Betearazleko kide batek beteko du, udal entitatea ez den entitate batetik datorrena.

30. artikulua. Batzorde Betearazleko kide diren Partzuergoko entitateen ordezkariak lau urteko aldi baterako hautatzen dira. Udal hauteskundeak egin ondoren berrituko dira karguak, eta udalek jakinarazi ondoren entitatearen udal ordezkarien datuak.

31. artikulua. Batzorde Betearazlearen eskumenak dira Partzuergoaren kudeaketa, gobernua, administrazioa eta ordezkaritza egiteko behar direnak, eta bereziki honako hauek:

a) Batzar Orokorrean hartutako erabakiak gauzatzea.

b) Partzuergoaren helburuak betetzeko eta, oro har, haren funtzionamendu egokia bermatzeko beharrezkoak diren neurriak hartzea.

c) Batzar Orokorrean aurkeztu beharreko Urteko txosten ekonomikoa, aurrekontua, memoria, jardueren plana eta egokiak iruditzen zaizkion txostenak prestatzea.

d) Estatutuetan eta elkartearen gainerako dokumentuetan jasotzen diren aginduen edukia aplikatzea.

e) Entitate bazkideen sarrerako, aldizkako eta aparteko kuotak finkatzea, eta ordaintzeko modua argitzea.

f) Estatutuen aldaketa proposatzea eta elkartean nahitaez betebeharreko gainerako araudiak prestatzea.

g) Batzar Orokorrari jakinaraztea entitate bazkideen onarpena, zehapena eta bereizketa, Partzuergoaren estatutuen eta dokumentuen edukiaren arabera.

h) Batzar Orokorra biltzeko deia egitea, lehendakariak uko egiten badio.

i) Zorrak eta obligazioak aitortzea eta helburu sozialak betetzeko behar diren dokumentu publikoak nahiz pribatuak ematea, Batzorde Orokorraren erabakiak betez.

j) Egokiak iruditzen zaizkion lan batzordeak eta haien jarduketarako araudiak sortzea.

k) Elkartearen lege, estatutu eta dokumentuetatik etortzen diren bestelako eginkizun guztiak, Partzuergoaren xederako egokiak, entitatearen ibilera onerako beharrezkoak eta elkartearen beste organo batentzat erreserbatuta ez daudenak.

32. artikulua. Batzorde Betearazlearen bilerak deitzea lehendakariari dagokio, eta batzordekideei jakinarazi behar zaie gutxienez hiru eguneko aurrerapenez, premiazko kasuetan izan ezik.

Jakinarazpena idatziz eginen da, eta adierazi behar dira, gutxienez, Batzordea elkartzeko lekua, eguna eta ordua, eta gai-zerrendako gaiak ere bai.

33. artikulua. Batzorde Betearazlearen bilera eratzea baliozkoa izanen da lehenengo deialdian batzordekideen gehiengoa elkartzen bada. Bigarren deialdian, lehendakaria eta batzordekideen bosten bat elkartzen bada. Bigarren deialdia gauzatuko da lehenengo deialdirako jarritako ordutik ordu erdira.

Erabakiak elkartutako kideen botoen gehiengoaz hartuko dira.

34. artikulua. Batzorde Betearazlearen bilera eratzea baliozkoa izanen da lehenengo deialdian batzordekideen gehiengoa elkartzen bada. Bigarren deialdian, lehendakaria eta batzordekideen bosten bat elkartzen bada.

Erabakiak elkartutako kideen botoen gehiengoaz hartuko dira.

III. KAPITULUA

Lehendakaria

35. artikulua. Lehendakaria da Partzuergoaren organo betearazlea, haren legezko ordezkaritza du, Batzar Orokorra elkartzeko deialdia egiten du eta haren buru da, eta haren erabakiak betearazten ditu.

36. artikulua. Lehendakariaren ahalmenak hauek dira:

a) Batzar Orokorraren eta Batzorde Betearazlearen deialdia egitea, eztabaidak zuzentzea eta bilkurak amaitutzat jotzea.

b) Batzorde Betearazlearen bozketetan izaten diren berdinketak haustea, kalitate botoarekin.

c) Modu baliozkoan erabakitako ordainketak agintzea.

d) Partzuergoaren ordezkaritza eginkizunak izatea.

e) Batzar Orokorraren eta Batzorde Betearazlearen erabakiak betetzen direla zaintzea.

f) Era guztietako kontratazioak eta esleipenak egitea, haien zenbatekoa ohiko aurrekontuaren % 10 baino handiagoa ez bada, eta nolanahi ere sei milioi eurotik gorakoa ez bada, barne direla urte anitzekoak, lau urtetik gorako iraupena ez badute.

g) Legeek, elkarteko organoek eta estatutuek ematen dizkioten gainerako eginkizunak.

37. artikulua. Partzuergoko lehendakaria kanpoan edo eri bada, edo postua hutsik badago, lehendakariordea ariko da haren ordez.

38. artikulua. Lehendakariak bere kargua utziko du arrazoi hauengatik:

a) Agintaldia bukatzea.

b) Ezgaitasun fisikoa edo mentala.

c) Karguarekin bateraezinak diren jarduerak egitea.

d) Kargua betetzean legea hausteagatik zigor-epai irmo baten bidez kondenatua izatea.

e) Uko egitea.

f) Hiltzeagatik.

IV. KAPITULUA

Batzorde Betearazleko gainerako kideak

39. artikulua. Lehendakariordea ariko da Partzuergoko Lehendakariaren ordez, hura kanpoan edo eri bada. Lehendakaritza hutsik dagoenean, Partzuergoko jarduneko Lehendakaritza izanen du.

40. artikulua. Diruzainaren eginkizunak hauek izanen dira:

a) Elkargoaren funtsak bildu eta zaintzea.

b) Kontabilitatea zuzentzea.

c) Elkartearen diru-sarreren berri izatea eta haien kontua eramatea.

d) Lehendakariak ematen dituen ordainketa aginduak betetzea.

e) Eragiketa ekonomiko guztien kontu hartzea.

f) Memoria, aurrekontua eta balantzea aurreratzea, Batzorde Betearazleari eta Batzar Orokorrari aurkezteko.

VI. TITULUA

Araubide ekonomikoa

41. artikulua.

1. Partzuergoak bete beharko du atxikitzen den administrazio publikoaren aurrekontu, kontabilitate eta kontrol araubidea.

2. Atxikitzen zaion administrazioaren erantzukizuna izanen da urteko kontuen auditoretza egitea.

3. Partzuergoaren aurrekontuak eta urteko kontuak atxikitzen den administrazio publikoaren aurrekontuetan eta urteko kontuetan sartuko dira.

4. Partzuergoaren ondare araubidea atxikitzen den administrazioarena bera izanen da.

42. artikulua. Partzuergoan elkartutako entitateen ekarpenak Partzuergoan duten partaidetzaren araberakoak izanen dira.

Batzarretara huts egiteagatik ezarritako kuota urtero kobratuko da eta toki entitateak Partzuergoko Batzar Orokorraren nahiz haren erakunde autonomoaren bilkuretara egindako hutsegiteek osatuko dute; bi bilkurak egun berean egin badira, hutsegite bakarra kontatuko da. Kuotaren zenbatekoa izanen da 100 euro bilkurako, eta ez zaio justifikatu gabeko lehenengo hutsegiteari aplikatuko. Justifikatutako hutsegitea izanen da toki entitatearen ordezkaritzari berari dagokiona, toki entitatearen edo hura partaide den bestelako erakundeen bilkuretan, behar bezalako ziurtagiriak aurkezten badira.

VII. TITULUA

Dokumentu araubidea

43. artikulua. Liburu hauek osatzen dute Partzuergoaren dokumentu araubidea:

a) Partzuerren erregistro liburua: hartan jasoko dira izena, erregistro zenbakia eta helbidea.

b) Akta liburua: hartan jasoko dira Batzar Orokorraren eta Batzorde Betearazlearen bilkurei dagozkien aktak. Aktak Partzuergoko idazkariak sinatuko ditu, lehendakariak ikus-onetsia emanik.

c) Kontabilitate liburuak.

d) Inbentarioa, Partzuergoaren ondarea osatzen duten ondasun eta eskubideak sarturik.

e) Indarra duen legeriaren arabera, partzuergo izaerako pertsona juridikoendako nahitaezkoak diren liburuak.

VIII. TITULUA

Erakunde autonomoaren ahalmenak

44. artikulua. Partzuergoak erakunde autonomo bat sortzen ahalko du, estatutu hauetan aurreikusten diren zerbitzuak eta jarduerak gauzatzeko.

45. artikulua. Erakunde autonomoak bere pertsonalitate juridikoa izanen du eta ekiteko gaitasun osoa, bere helburuak betetzeko, eta Nafarroako Toki Administrazioari buruzko uztailaren 2ko 6/1990 Foru Legearen 192. eta 196. artikuluetan, eta Toki Araubidearen Oinarriak arautzen dituen apirilaren 2ko 7/1985 Legearen 85. artikuluan xedatutakoa bete beharko du.

IX. TITULUA

Partzuergoa desegitea

46. artikulua.

1. Partzuergoa desegiten ahal da bertan elkartutako entitateek nahi dutenean, helburu horretarako berariaz deitutako Batzar Orokorraren erabaki baten bidez adierazita. Desegiteko erabakia erdiesteko Partzuergoko kideen legezko kopuruaren bi herenen aldeko botoa behar du, haren ekarpen finantzarioen bi heren ordezkatzen dituztenak.

Desegitea gertatuko da, orobat, bereizketarik gertatuz gero, eta kide diren entitateetatik bakar batek ere ez badu adierazten Partzuergoari jarraipena emateko asmorik, bereizketa kasurako estatutu hauetan ezarritako baldintzetan.

2. Desegiteko erabakian, organo edo entitate likidatzaile bat izendatuko da, Partzuergoa atxikia dagoen administrazio publikoarekin lotura duena, edo haren mendekoa.

3. Entitate likidatzailearen eginkizuna izanen da Partzuergoko kide bakoitzari dagokion bereizketa kuota, estatutu hauetan aurreikusitakoaren arabera.

Likidazio kuota hori kalkulatzeko kontuan hartuko da likidazioaren ondoren ondare garbiaren emaitzako saldoan entitate bakoitzari dagokion parte-hartzea. Kuota eta banaketa egiteko irizpidea kalkulatzeko kontuan hartuko dira, alde batetik, kide bakoitzak ondare funtsari egin dion ekarpenen portzentajea, eta bestetik urte bakoitzean esleitutako finantzazioa. Partzuergoko kideren batek ekarpenik egin izan ez balu, horretarako beharturik ez zegoelako, kontuan hartuko den irizpidea izanen da diru-sarreretan izan duen partaidetza, Partzuergoko kide izan den bitartean.

Partzuergoak erabaki beharko ditu, orobat, likidazio kuota ordaintzeko modua eta baldintzak.

4. Partzuergoan elkartutako entitateek erabakitzen ahalko dute, desegite kasurako, aktibo eta pasibo guztiak lagatzea beste entitate bati, sektore publikokoa bada eta juridikoki egokia bada, Partzuergoaren jardueraren jarraipena bermatzeko eta haren helburuak bete ahal izateko. Aktibo eta pasibo guztien lagapena eginez gero, likidaziorik gabeko desegitea izanen da.

2021EKO ABENDUAREN 21EAN ONARTUTAKO ALDAKETAREN XEDAPEN GEHIGARRIAK, IRAGANKORRA ETA AZKENA

Lehen Xedapen Gehigarria.–Partzuergoaren adskripzioa.

Estatutu hauetan xedatutakoaren arabera, Nafarroako Erdialdeko Garapen Partzuergoa Erriberriko Udalari atxikia geratzen da.

Adskripziorako irizpideak aplikatuta, aldaketarik gertatzen bada adskripzioan, Xedapen Gehigarri honen aldaketa ere onartu beharko da, sei hilabeteko epean, adskripzio berria gertatu den urteko aurrekontu ekitaldia hasi zenetik kontatuta.

Bigarren Xedapen Gehigarria.–Tokiko Ekintza Taldea.

Nafarroako Erdialdeko Tokiko Ekintza Taldeak bere eginkizunak aurrera eramaten eta bere eskumenak gauzatzen jarraituko du, Nafarroako Erdialdeko garapen Partzuergoaren erakunde autonomo gisa. Hala ere, Partzuergoak, aldaketa honek indarra hartu eta hiru urteko epean, aztertu beharko du, eta ondoren erabaki, delako Tokiko Ekintza Talde horren jarraipena legezkoa, komenigarria eta egokia ote den.

Xedapen Iragankorra.–Partzuergoko langileen eskubideak.

Partzuergoko langileen zerbitzuetako kontratu-harremanen irizpideak eta baldintzak ez dira ukituko aldaketa honek indarra hartu ondoren.

Azken xedapena.–Indarra hartzea.

Nafarroako Erdialdeko Garapen Partzuergoaren estatutuen aldaketa honek indarra hartuko du Nafarroako Aldizkari Ofizialean osorik argitaratu eta biharamunean.

Erriberrin, 2022ko urtarrilaren 3an.–Partzuergoko lehendakaria, Alejandro Antoñanzas Salvo.

ERDIALDEKO GARAPEN PARTZUERGOKO KIDE DIREN UDALAK

1.–Adiosko Udala.

2.–Añorbeko Udala.

3.–Artaxoako Udala.

4.–Artazuko Udala.

5.–Barasoaingo Udala.

6.–Beireko Udala.

7.–Berbintzanako Udala.

8.–Biurrun-Olkozko Udala.

9.–Caparrosoko Udala.

10.–Zarrakazteluko Udala.

11.–Enerizko Udala.

12.–Garinoaingo Udala

13.–Girgillaoko Udala.

14.–Larragako Udala.

15.–Legardako Udala.

16.–Leozko Udala.

17.–Melidako Udala.

18.–Mendigorriko Udala.

19.–Miranda Argako Udala.

20.–Murillo el Cuendeko Udala.

21.–Murillo el Frutoko Udala.

22.–Obanosko Udala.

23.–Erriberriko Udala.

24.–Olorizko Udala.

25.–Orisoaingo Udala

26.–Pitillasko Udala.

27.–Garesko Udala.

28.–Puiuko Udala.

29.–Santakarako Udala.

30.–San Martin Unxeko Udala.

31.–Tafallako Udala.

32.–Tebas-Muru Artederretako Udala.

33.–Tirapuko Udala.

34.–Uxueko Udala.

35.–Untzueko Udala.

Iragarkiaren kodea: L2201792